رواية عروس الهور الجزء الأول للكاتبة هيلانا الفصل الثاني والعشرون
بعد ياهو يكلي شبيك زعلان
ويشاقيني ويكلي دموعي تسوه
وبعد ياهو يكلي شبيك مهموم
ويحسسني حتى احزاني حلوة
ياهو من الرسايل يدري مخنوك؟
المن اتعب ضحكته تصير تچوه.
: -عسسسساااااف شنننووو جابةة ياااااويلي راح يگتلوا خلاص
جان جسمي كلة يرعش مادري خفت رجعت ركض للغرفة شسوووي لازم شمس تجي وأحجيلها
ضليت أفتر بالصالة ما أخذني صبر نزلت جوة للغرفة هاي إلى جوة
كعدت أدور على أي شي. فتحت واحد. من المجرات جان بي أسلاح وياهن اوراق داخل فايل
كعدت على اركبي وأكلب بيهن. قطع أراضي بأاسم ازاد تسعين دونم تقريبا كلهن محولات بأسم رغد جابر
منو رغد جابر معقولة نفسها رغد.
زين أزاد ليش محول ألاراضي مالتة لهاي البنية
لميتهن و رجعتهن لمكانهن كلت تجي شمس وأحجيله هستوني دا أطلع ولاگني عصام وجه بوجه
: -وين يا حلو
: -ءءء عصاااام
سحب الكرسي وكعد عليه قلص عيونة
بشك: -شسوين هنا
: -جنت ادور عليك
: -السبب
: -حتى أحجي وياك واكلك تبعد عني
: -او مثلا حتى دكليلي شجنتي تسوين بالمخزن
: -يا مخزن
: -انتي وين جنتي
: -هنا ما رايحة لمكان.
گام من مكانة وتقدم خطوة بتجاهي رجعت كلش لباب والباب مفتوح كلت أشرد قبل لا أنحصر مثل ذيج المرة
كال بسخرية: -الجذب موهبة وأنتي مشگلتج ماعدج هالموهبة
: -خوش من رخصتك
قبل لا أطلع كال بتهديد: -حرف واحد اذا طلع منج
أسود عيشتج
: -ش، ن. وو
: -ادري بيج وين جنتي وشنو شفتي
: -ما شفت شي
: -عساف
: -تمام ليش جايبي
: -نأدبة
: -ما تكتلة موت صح
: -شفتيني كاتل واحد من قبل
: -ما أدري انت مجرم
: -لا ما مقبولة منج.
عفتة وصعدت مو مال أطول بالكلام وياه هو ما مخلي حاحز بينا وأني أخاف وأنخلس منه
مرت ساعة هيج وشفتهم طلعوا من المخزن عصام گدامهم وجماعته أثنين لازمين عساف وهو مجتف
أخذوا للسيارة، فتحت الباب وصحت على عصام أندار ورجعلي
: -نعم
: -وين ماخذينة
: -خايفة عليه شني
: -أول شي هو أبن عمي مهما كان وشي الثاني شنو الفايدة اذا تبقون ناس تكتل ناس شوكت تنتهي هالسالفة مو تعبنة
طلع جكارتة ورثها وسحب منها نفس كال.
: -لا تخافين على أبنج عمج الطلي مرجعينة لحضن ماما
: -لعد ليش جبتة
: -عدنة شغيلة وياه راشدي على دفرة نحلت
: -عابتلك أكرهكك مجرررم ومتوحش
: -شحلاتج من تكرهيني فدوة لله
سديت الباب بوجهه ورجعت لصالة حتى نفسي ضاق من هاالبيت ومليت من هالشگول والاكشن الكاعد يصير
جريت نفس وزفرتة الله كريم بلكي نخلص
منهم حاولت أضحك على نفسي.
: -شمس
اليوم عملية على والكل موجود گوة قنعت عصام يخليني أجي هو وعزيز أكلوا راسي.
لبست لبس دكاترة وكمامة وبقيت أفتر
أروح وأرجع خطت المستشفى خوط علما خلصت العملية.
رجليّ طاحن من المشي وانوب كل شوي وحدة تسألني: وين الاستشارية؟ عبالك آني أندل.
مو زين أندل غرفة علي.
مليت كلش طلعت گعدت بالحديقة
وبچيت ما أدري حسّيت نفسي غريبة.
الموجودين جوه أصدقائه وأقاربة وأمه وحتى رغد بس آني هنا حيل حزّت بنفسي ختنگت.
لحد ما إجتني رغد وكالت: العملية نجحت خلتني أكمز من الفرحة
انتظرت لليل وآني أحوس جوه لحد ما وعى من البنج وأمه شافته وأقاربة وبعدين مشوا.
صارت بصنعش وأجه عزيز كال
: -تعالي يلا
كلت أجاني الفرج رحت طايرة وشعوري ما أدري شلون يوصف عبالك رايحة أشوف حبيبي لأول مرة
كلبي يدگ وإدية عركانة
حتى نسيت آني وين.
وصلنا لباب الغرفة عزيز فتحه بهدوء گالي
: - هوه واعي بس بعده تعبان
هزّيت راسي ودخلت، شفته!
وجهه أصفر عيونه نص مفتوحة بس أول ما شافني ابتسم.
هاي الابتسامة نسّتني التعب نسّتني دموعي
نسّتني كل لحظة حسيت بيها بغربة.
گالي بصوت خافت: -أجيتي
: -إي جيت، الحمد لله على السلامة
كعدت يمة على طرف السرير ودنكت خليت بوسة على جبينة
حضنت جف أيدة وهو أبتسملي بتعب
: -جنت خايفة تعوفني وحدي
: - شلون أعوفج بعدني عايش
: -بعد عندك ألم
: - أحسن من قبل، بس مو مثل من شفتج حتى ألم نسيتة.
: -خفت عليك، اليوم چنت أفتر بالمستشفى مثل المخبلة من القلق
علي: - وگلبچ هم چان يفتر؟
: - كلبي ما گدر يهدأ أصلا من يوم دخلت مستشفى، حسيت راح أفقدك
: -جااا بالضيم لو رايح وبعد ما شفت عيونچ
ضحكت بتساع وكتلة: -تدري أهلك ما يردوني حتى لمستشفى ما أكدر أجي بسببهم
رد: -ولج منو مايردج غير ما رايدد روحة ويروحلج فدوة
: -ترة خالة ما ترديني بس هي شفتها من أهلك متخبلة مني ودكول الا أطلگج من علي.
: -مو كتلتي نفسج الا تعرفني على أمك
: -بطللللت ونبي ششسوي بأهلك هاهيه بس أنت
ضحك وأني مكيفة بي ما صدكت رجعلي بخير وعافية، التفتت من نفتح الباب ودخل عزيز
كال جماعة على جاين، فودعتة ومشيت
رجعت للبيت فرحانة على نجحت عملية صح ما شبعت منه شوف بس المهم صحتة.
وثاني يوم هم جنت يمة بالمستشفى وكيفت لان ماكو أحد بس أني ويا من الصبح
: -حبيبي
حط أيدة على جبيني وحجة بستغراب: -مصخنة؟
: -لا ليش
: -أول مرة دكولين حبيبي مو من عوايدج
أبتسمت بتساع: - موزين
گرص خدي وكال: - ريگيني مادامج هنا
: -من عيوني
: -أموت على ربك أنة
گمت فتحت العلاگيك جان عزيز جايب كيمر وصمون وجاي جايبي من البيت
صبيتلة وسويتلة لفة گيمر بعدة هستوة دياكل وامة فااتتت خزرتني.
وأجت دنكت عليه بوستة واخذت صينية مني خلتهة بحضنها وحجت: -أني أوگلة لا تموتينة خاف أنوب حاطتلة شي بي يالمسمومة
گمت وگفت على جهة وهو باوعلي عاض بطن خدة كالها: -من أيد شمس أكل حتى السم يمة
هو كال هيج لو أني كلبي طار عبالك لو شگايل
ايع صايرة خفيفة تف عليه
امة هزت أيدهة وخلت لگمة بحلگة راح تخنك رجلي ونبي
: -مدري شلون مكتوب بجنسيتك ابن هاشم وأنت ماخذلي هاي المگموعة.
ضحك وهي عبالك طفل مو رجال مشورب باقية كل شوي تكرص بخدة وتبوسة براسة وهو هم حيل يحبها يدنك ويبوس أديها
هسه أني شكو وأگفة خلا أمشي عفتهم وطلعت كعدت برا وبعدين أجة عصام وعزيز هم فاتوا
بقيت وحدي كاعدة ما حبيت أتناكر وي أمة وهو مريض خطية.
فخليت ورجعت للبيت
كلت أشوفة بعدين
نزعت حذائي وفتت شايلتهة بيدي
لكيت شجن كاعدة بالصالة
أيدها على خذها وصافنة تباوع من الشباك
متغيرة تتصفن هواي وتفز بسرعة بس نحاجيهة.
وعيونها مدمعة وجهة مغيم وحيل حاقدة على عصام من أسالها متجاوبني
خليت الحذائة على جنب واجيت من وراه كعدت بصفها ما حست بيه
مديت أيدي على وسطها وهي فزت وطفرت من مكانها ضحكت بمراح
كالت بعصبية: -خوفتيني شنو هل لزمة
شمس: -شجونة أنتِ إلى مخوفتني صارلج يومين مو على بعضج
حكت خدهة بتوتر: -أأء أني بس دا أفكر بابا
شمس: - مادام على نجحت عمليتة وبعد ماكو على خطر على حياتة أن شاءلله الباقي ينحل.
شجن: -واذا أنتقم من بابا على إلى سوا بي
شمس: -ما يسويهه يعني علمودي لازم يفكر بيه
شجن: -متاكدة
شمس: -مادري شجن محتارة وحيرة جبيرة
أتمنى تنتهي الخلافات بينهم اريد نبني عائلة اني وعلى بس بنفس الوقت شلون نبني هل عائلة وهمه بينهم عداوة وي منو أنحاز لمنو ادافع
تربعت وكعدت أكبالي أني صايرة كعدتي على قنفة وهي جوة يم الطاولة حضنت جفوف أدية
شجن: -شمس أنيي خايفة
شمس: - من شنو.
شجن: -علي وجماعتة خطرين راح تضيعين نفسج وتضيعينة وياج شوفي حتى بابا ماندري وين أخذوا
شمس: -متفهمة خوفج بس صدكي على مو هيج
هو صح بينا ثار بس ممكن نتلافة هالشي ونتصالح
اني راح أحاول أصالح العلاقة بينة هو وبابا اكيد
شجن: -ما راح يتصلح شي صدگي
شمس: -لا يصلح على يحبني ولخاطري يسوي كلشي وأثقة منه
شجن: -إذا على يحبچ خلي يثبت هالحب
و يختارچ مو يختار الدم والثأر.
شمس: -وأني راح أختارة إذا اختار الصلح ونسى الثار مالتة بس إذا استمر بالحقد راح أوگف ضده.
ما أريد أبقى ضايعة بعد وعايشة بقلق راح أحجي وياه بس شوي يتحسن
شجن: - أني وياچ شمس بس لا تخلين حبچ لعلي يعميچ
هزت راسها، وبعدنة دنحجي وفاتتت رغد وعصام، سلمت رغد ونزل جوة وعصام هم رايح وراه بس شمس صاحت عليه
وكف ورجع علينا.
شمس: -عصام شنو المشكلة بينك وبين شجن
ضيق عيونة بشك وشبح بتسامة على شفتة
عصام: -ماعندي مشكلة.
شوف الجذاب
شجن: -لاء عدددك شنو نسيت شسووويت
عصام: -شسويت
شمس: -شمسوي احجي
عصام: -اي احجي اذا غلطان اعتذر كدام شمس
شجن: -شسوووا هاءء يعني شواا هو ضايقني بكلامة
عصام: -أسف
شمس: -أني ماعرف شنو صاير بينكم بس ياريت ما أضايق أختي وهي أن شاءلله هاليومين يرجعون للبيتهم واذا اكو فد حزازية بينكم أخذهم ونروح للبيتي اذا تقبل.
عصام: -لا ياااابة بيتكم هذا أنة أروح وأن شاءلله ما نضايق ست شجن حجاها وباوعلها وهي دنكت راسها
هو نزل جوة وهي صعدت فوك كالت أنام
ضليت وحدي بالمطبخ مفرفشة حتى نوم ما جايني كلت أسويلهم أكل
شوية وأجتي رغد كالت
: - ريحت الطبخ طلعت شمسوية
شمس: - تمن ودجاج گلت نغير جو جوعانة أصبلج
: -اييي صبييي أشتهيت
صبيت الها وبعدنة دنضحك والباب أندك لا مو أندك تفلش هذا يا قليل ذوق هيج يدك.
صدك ما يستحي تعصبت ورحت أفتحه ورغد وراي.
: -شجن
أفتر بالغرفة وأفكر شوكت
نرجع للبيتنا وأرتاح گمت أشتاق للاحياتنا القديمة وبيتنا وضحكتنا
منو جانت بينا تتوقع راح نجي هنا
لو ننصدم بذولة الناس أني بحياتي متخيلت
يدخل لحياتي شخص مثل عصام
حالي حال كل بنية أتمنى أتزوج شخص مثقف مرتب ومن عائلة حلوة ومرتبة ونعيش باجواء أسرية هادئة
فزيت على صوت حجي وأصياح گلت
منو دا يرعد
گمت حطيت الشال على راسي ونزلت.
وگفت على آخر باية شفت مرة أول مرة أشوفها متعصبة وتهد وترد على شمس.
ولازمتها رغد وشمس واگفة ورة
ماما وطبعاً ماما ما مقصرة هم تعد وتسفط عليها.
ماما تگلها روحي منا
وهي ترعد تريد تفترس شمس
لو بيدها تگطعها بسنونها عيونها نار عليها
گالت بحقد وصوت عالي
-كون عساها بعافيتج وعساج أنتي بالفراش موش علاوي يا ال، (خوب الفشار حدث ولا حرج).
ردت عليها شمس برود
- يا عيني يا خالة أني شمسوية شبيج عليه شتردين مني.
- تطلعين من حياة على ما أشوفج وياه! مستحيل أقبل بوحدة مثلج ساقتصير جنتي
نهال: - شو طلعي برااااا بتتتي تشررررفككم وهو ابنج منو بحالة غير هو لازگ لبتي لزگ لا كرامة لا دهر دروحي حاجي ابنج دادا بدل ما جايتنه وأسويلي فضل إذا قنعتي ابنج يطلگها
شمس: - بس أني أحبه ماما
نهال: - أنتي أنجبي شمس.
-تحبينه وركعتي بجيلة چا عبالج نسيت سوايتج ولج حلفتة وذممته گتله رجع البنية لأهلها ما لها ذنب گلت خطية. تالي طلعتي ب. فريتي عقل فر وتزوججج
-خالة أهدي تمام ويعني ابنج خاطفني شسوي مثلاً أكيد راح أدافع عن نفسي. هذا الحجي قبل حالياً أني أحبه
- حبج برص يطلگج يطلگج وروح المرحوم أتبرى منه إذا ما طلگج
شمس: - مو أني حامل خالة تقبلين حفيدج يظل بغير أب ويربى بعيد عنكم.
هي گالت هيج وماما شهگت ذيج الشهگة گلت نجلطت وأم على هم تخبلت وصراحة حتى أني تفاجأت شوكت صار هالشي
چان ماما عتت شمس من إيدها: - تحجين صدگ ولج
شمس: - آخ ماما إي راح تصيرين بيبية
نهال: - ولج شلون تحبلين يالمصخمة
شمس: - ما أدري إجه وحده.
- من كون الله يغسلج الزگي بعد الزگي
: -طبعاً ألزك غير أبو ابني لعد أربي وحدي والمفروض تفرحين راح أجيب الكم ولي العهد وأحسن النسل مالتكم.
- نسلكم النكس ما نريده على حورج على حور نسلج
ام شعفة
نهال: - لعد إحنا الميتين عليكم وترحون فدوة لبتي وين صاحلكم هيج هو ابنج شلونة عاد چنه أفريقي
شمس: - بالعلامة أبنچ أزرك خالة
- من كون خالة التخلل أعظامج يالتايهه
نهال- أگلج شو ما تستحين شنو تايهه شايفة على بتي شي هي على ذمة ابنج احترمي ناس همج أنتم!
باوعت على أظافرها وحجت.
شمس: - خالة وعيونج ما تايهه هو من حضن بابا لحضن أبنج وبعدين ابنج چان لاحگني وحبني شسويلة أدفر النعمة هو صح دايح بس شسوي مايصير نتبطر على نعمة الله
نهال: - دكافي جوزي منا عاد ميتين عليه ابنج
وكليلة يطلك شمس نذر عليه أذبح أبعير اذا طلگها
چان شمس حجت بتمسكن: - خالة الله وكيلچ ما أردت أأذي أحد بس إذا هذا الثمن اللي لازم أدفعه لأن حبيت أبنج وتحملت وصبرت فراح أتحمله
وراح أربي أبني وحدي.
وأم على صلبة ما تتأثر بهالسوالف مبينة. لفت عباتها وطلعت للباب وگالت
: -لو تجيبين منة فروخ ترس البيت هم أخلي يطلگج
خلت ومشت وماما اندارت لشمس. لمت أديهة وغمّتها وصعدت فوگ.
مسحت على وجهها وشمرت نفسها على الكرويتة ومصعدة رجليها على مسند عيونها على السگف
إجيت يمها: - شمس صدگ حامل؟
- لا
- لعد؟
- أريد أسكتهن ما شفتي شسوّن
- مبينة أمه ما تريدج.
- هو يردني.
- وشلون راح تعيشين وياها
- مجبورة تتقبلني على شان حفيدها.
- هو وينه يالجذابة
ضحكت. سألتها باستفهام
- صدگ شعجب ماكو بيبي لحد الآن
- لأن ماكو علاقة بينا.
- شعجب
- ما أعرف بس هو دايح ما يلفي عليه وأني چنت مريضة ومشوشة مالي خلگ
- لعد شلون تجذبين هسه أكيد أمه توصل الحجي إله.
- خلي توصله چان خابصني ابني وابني
- يلا استعجلوا وسوولنا بيبي بلكي يفض هالنزاعات.
استعدلت بگعدتها وحطت إيدها على بطنها بحلامية.
: - أتمنى يصير هالشي ويصير عدنا بيبي والعلاقة بين على وبابا تعمر وأشوفهم سوا. أتمنى أشوف العائلتين مجمعين سوا والفرحة والضحكة مالية الجوء
- الله كريم كلشي بيد ربج عسى ولعل تصير.
- متفائلة إن شاء الله.
: -شمس
ورة أربع أيام طلع على من المستشفى صار زين
وأهلي رجعوا للبيتهم وأحنا هم رجعنا للبيتنا
جنت نايمة وفزيت عركانة على أثر حلم كلش مرعب
بعدني على افراشي وأني أستجدي ذاكرتي
جني لابسة دشداشة سودة وكاعدة بغرفة كله دم
حتى الحياطين ملطخة دم
بلعت ريكي خايفة. على وصار زين بعد ماكو شي اخاف منه هاي أطغاث احلام اكيد من التعب
حجيت وي نفسي أهديهة
گمت من الفراش غسلت ونزلت جوة بيتنة فارغ
وحشة الصراحة.
تعودت على أمي واختي والشباب ورغد الكل جان موجود بذاك البيت رجعنة لصنطة هنا
حطيت الجاي على نار وسحبت الكرسي كعدت
ايدي على خدي وأنعس راسي صاير طبل
، كلشي بيه يئن من التعب
بعدني مصدومة من الحلم عيوني كل ساعة تروّح لزاوية بالغرفة
أتأكد إذا الدم جان حقيقي لو بس خيال
حسيت بنفسي أتنفس بسرعة
حضنت روحي أطمنئها وكمت طلعت للحديقة شفتة
كاعد وحدة وماد رجلي على كرسي كدامة.
رجعت أغمض عيوني شوي وهزيت راسي أبعد الافكار الموزينة من رأسي
مشيت خطوات خفيفة بتجاهة وكفت وراه
ما حس بيه خليت أدية على متونة التفت
: -صباح الخير
أبتسملي وفتح أدي أنداريت كعدت على رجلي ولفيت أدية على ركبتة مخلية راسي على صدرة
ضمني حيل لصدرة كتلة: -أريد أسالك سؤال
كال: -اذا بخصوص أبوج أفضل ما أسالين راح يرجع للعراق بذني الكم يوم ولو ماعيونج ما أهدة تدريني
: -لا مو بابا
: -جا شني
: -علي راح نبقى هيج.
: -شلون يعني
: -دم وثار وحقد يعني ما نستقر، ما نرتاح اريد أنكون أسرة من حقي اعيش مرتاحة
تنهد وكال: -يصير خير
أعرف ما نأوي خير ممرتاحة
رجع حجة: -أريد طفل
فزيت وگمت من حضنة: -شنووووو
طگهة ضحكة: -أخووو لمصطفى أريددد
: -بعد وقت
: -لا مو بعد وقت كبرت انة خاف بعدج طفلة أنة شايب اريد أشوف ولدي
رغم جنت مفكرة بالموضوع بس من حسيته صدك مادري خفت ووضعنه مو مستقر كلش يعني ابد مو مال طفل
: -ها شگلتي.
: -راح أخلي ريوك كوم نتريك
: -الله يسلمج لوتية
طفرت كدامة لمطبخ حضرت الريوك وهو أجة كعد صبيتلة وبقيت أكل على ساكت
: -أشبيج أنصگرتي
: -اااءء مابية شي
غمزلي وحجة بخبث: -حضري نفسج ليلة من أرجع
گشولت بوجهه وهو ضحك وگام كال عندة شغل ومشة بقيت وحدي
بين ما كملت شغل البيت.
ورجعت تمددت على قنفة وخابرتة فتح خط
كال: -هااا. عيني
: -علي أمك ما تريدني
: -هاي عيارة جديدة
: -لا بس سالفة أبالي هواي أفكر بيه
: -بعد لا تفكرين.
: -تتتوقع تحبني
: -لاءء
: -وأبنه
: -يحبج
: -صدك على تذكرت شغلة من جنت مريض حلمت بيك ميت
: -ميت بعيونج
: -ها ها ها غزلك قديم ما يحرك مشاعري
: -ولي عندي شغل باللليل أجيج
سد الخط وبقيت أتمضحك أنتظرة يجي بالليل
أخر شي ضربني بوري وما أجة
أجت بس رغد ورة العشة وكالت مشغول ما يرجع ليلة
بعدة ما طاب الدايح بعدة ما طاب گام ما يلفي
تأففت وضليت كاعدة جوة أني ما مطمنئة رغم كلشي كلبي ما مرتاح.
علي راح يگعد وما يسوي شي بعد الصار
ما أدري الموضوع بي أنة
أكو شي دا يصير ومن طلع من المستشفى وأجة للبيت جانت شجن موجودة وسلمت عليه
حسيت أكو نظرات غريبة بينهم وهي كلش متوترة
مو على طبيعتها وسالته كال ماكو شي
نفتح الباب ودخل تفأجت شافني بعدني كاعدة
: -علي
: -عيونة
: -أجيت
: -لا بعدني
مشيت حضنتة شال أدية وحطهن على ركبتة وخلة أدي على خصري ورفعني حتى أصير قريبة الة
وباسني
وكفت على طروف أصابعي وبادلتة بكل حب.
بعدين أذكرت رغد موجودة بالبيت كبل دفعتة
: -أشبيج ولج
مسحت على وجهي ومشيت كدامة صاعدة للغرفة وهو وراي
: -رغد هنا زحمة تشوفنة بهالوضوع
: -بايگين
: -لا مو بايگين بس عيب
كال بسخرية: -مرتي الموؤدبة
: -رجلي الازرك
لزمني على درج خلة شفتة يم أذاني وبأسها كال
: -ياهووو الازرك ولج
: -مو أنت أني
: -غزالتي
: -عيوني أبن هاشم
: -تردين طفل مني لو لا
رمشت بهدوء وغمزتلة: -الوضع خرج عن السيطرة.
: -تعمين على روحج بحرگاتج مو مال واحد يراعيج
: -راعي روحك الشايب أنوب خالة ما ترديني فوك ما قابلة ببنها الشايب واني بعدني شابة ومقررة أحسن النسل وما تقبل
أجة يلزمني ركضت بسرعة للغرفة أضحك
ارتكيت على ميز دخل يسب بيه
غمزتلة وعضيت شفتي: -يولد تتطلع تبياتة
رد عليه وهو ينزع بسترتة: -لا تتحرشين مزوج ما خون مرتي
: -اووووي الشريف ما عرفتك
: -مو سالفة شريف بس مرتي مجلوبة
: -تحبها
: -مني.؟
: -مرتك وما تخونها.
باوعلي هيج بنظرات حلوة خلا مشاعري هوسة وكال: -غير أموت عليه
بلعت ريكي وأستحيت
بس الابتسامة شگت حلگي.
: -شجن
جنت گاعدة على درج وماما تفتر يمي
ما مرتاحة على أساس اليوم بابا راجع.
سمعنا صوت السيارة وماما ركضت فتحت الباب وطلعت وأني وراها شفته نازل من تكسي.
سلمت عليه ماما وأني هم حضنته جنت خايفة عليه كلش من جماعة على العفطية المجرمين.
ورجل شمس القائد مال العفطية
دخلنا جوه وماما تبوس بإيدي وتبچي وهو هم فرحان بينا بس مبينة ضوجة بعيونه والقهر.
الصار مو شوية وبيت هاشم الله مسلطهم علينا والله مصيبة.
رحت للمطبخ أسوي غدة
والباب اندگ گتلهم أني أفتحه
أول ما فتحته صارت بوجهي مرام تفأجت ضليت فاگة حلگي.
وهي حضنتني وتطگ من الفرح
شجن: - مراااام.!
مرام - إييي مرررام بشحمها ولحمها! بربج ما اشتاقيتلي إجيت من بغداد لعيونج حتى مديرج الفاهي ما سواها.
والله جنت مصدومة بحيث غمتني وفاتت تسحب بجنطتها.
تلگتها ماما رغم ماما ما تحبها بس تعاملت وياها بأسلوب حلو وسلمت على بابا.
وگعدت وأني لحد هسه متفاجئة إجيت بصفها.
مرام- شو ما فرحانة بشوفتي
شجن-: لا ولج بس فاجئتيني شجابج؟
مرام: -طگ گلبي مشتاقتلجن وإجيت.
شجن: - من وين جبتي العنوان
مرام: - أو الغسل لعد مو أنتي أنطيتيني العنوان
شجن: -ما أدري شو ما أذكر.
مرام: - إي شكو ماكو شموسة شلونها
شجن: -زينة إذا تردين أخابرها تجي بالليل.
- إي خابريها، مشتاقة. لو تاخذيني إلها؟
- لا أخابرها.
تغدينا سوا وأنوب صعدنا لغرفتي.
وبقيت أسولفلها على وضعنا وسألتها عن أهلها.
گالت: - قررت أنهزم بلكي أشوفلي رجل منا منا تصير وياي صدفة شي بس ماكو.
ردتلي شايب يتحرش بيه بالطريق ماكو.
حتى التحرش محرومة منه.
- أويلي عليج مسكينة.
وراه العشة بالليل سويت شامية وجبنا عصاير وهالسوالف على أساس نسهر بالسطح.
بعدنا بالغرفة هي متمددة وأني أسفط بملابسها بالكنتور.
وسمعت دگة قوية على باب فزينا اثنيننا.
باوعت للجهة الباب وحجت
- منو يجيكم هسه
- ما أدري
طلعت وگفت يم درج أباوع ليجوه وهي وراي.
شفت عصام وعزيز شجابهم شيردون
مرام: - منين هالمزز
-: جماعة رجل شمس العفطية
- أووي فدوة لجوّي. لزمت إيدي وگالت.
-: الله عليج أطيني دفرة عود على أساس تخربطت ووگعت من الدرج بلكي أصير لقطة وأصيدلي واحد منهم.
-: وهسه أنتي مشمورة من الدرج واحتمال تتكسرين علمود تصيدين عفطي حتى ما تسوى هالتعب.
- خاب يا عفطية دشوفيهم يماي يسلمون على الگلب حبيتهم خابري أختج خلي تعزمنا باچر يمها.
فكيت حلگي. ارتچت على الدرج وعيونها عليهم.
-: بشرفج تنسقيلي ويا واحد منهم حتى إذا ويا رجل شمس قابلة.
عفتها وبقيت مركزة عليهم ما أدري شنو يحجي ويا بابا عصام بس بابا انگلَب وجهه گلاب.
وخلوا ومشوا ذوله ما نخلص منهم شلون
أنوب هذا عصام كل ما أشوفه يجيني مغص.
وأتذكر الصار خرا عليه
رجعت مرام وكعدت على السرير وسحبت غطاي گالت: - يمعودة والله تعبانة من السفر بس من شفت هالمزز حتى التعب راح خصوصاً أبو قميص أسود
جانت تقصد عصام
گتّلها وأنا أضحك
: -ولج عيب بعدين مو خوش ولد آني أعرفه
كلبت عيونها بنزعاج.
: -خوش لو مو خوش أحب السرسرية عادي
: -لا تگولين هيج لا صدگ يجيج واحد سرسري
: -والعباس قبلانة أصلاً قبل كم يوم أمي گالت حلمت بيج مزوجة جيرانة أبو سعدون حظي أبو سعدون أريد من هاي الحلويات المطشرة يمكم
: -حتى بالحلم ما عندج نصيب بيه حظ
: -يبقى ابو سعدون أحسن من مديرج الفاهي
ضحكت رجعت گالت
: -شگد صارلي بلا زلمة شوكت أخلف شوكت نعيش رومنسيات
: -رگدي إن شاء الله ندورلج من العمارة زلمة گلف.
: -والله إذا صدتيي إلى زلمة بهاي السنة أخليج على راسي
شگد تافهة بقينا نضحك وتأخرنا إلا نمنا دگيت على شمس من موبايل بابا حتى أگلها نريد نتفضل يمها مثل ما گالت مرام بس ماكو ما جاوبت.
الصبح بغرفتي متمددة مرام تفتر بالغرفة تدور على فستان
: -شجووون وين الفستان الأحمر
: -ليش لابسة فستان وين رايحين حفلة
رفعت واحد بيدها
: -هاي خوش لبسة شمس لازم تشوفني مرتبة يمكن عدهم أحد من جماعتهم
: -أنتي رايحة تزورين صديقتچ لو رايحة نخطب
: -والله الزيارة فرصة وكل خطوة محسوبة بلكي أوگع بحضن رجل طيب يريحني من الدنيا والتعب والهم
: -خاف حلمانة مرام من الصبح.
: -البارحة ما نمت هالمزز ببالي لليل كله أزاگط من أتحلم بيهم كله طبگ
وخرت الغطة ودخلت للحمام أسبح وهي تصيح وراي
مرام: -آني چنت ناوية أسوي مكياج خفيف بس غيرت رأيي راح أكحل عيوني وأطوخهن حتى واحد. منهم يزحلك بعيوني
: -فدوة مرام أرگدي هسه منو يخلينا نروح خاف بابا ما يقبل
: -يااااع ليش ما يقبل وآني گاعدة من الخمسة البخ وأدور شي بيه خير ألبسه
: -مو بابا عنده خلاف وي رجل شمس وما يقبل نروح الهم.
: -نروح بسكتة منو يدري آني أگوله عمو أريد شجن تشوفني العمارة تعرفني عليها
: -هسه يگولج شجن مطفية منين تعرف العمارة
: -ميخالف أگوله عمو أنت فرني صراحة أبوج خوش صيدة بس مستحية منجن
: -الحمد لله طلعتي تستحين
طبعاً نزلنا وبابا چان ما موجود وجذبت على ماما گتلها نروح للسوگ وما قبلت
گوة قنعتها مرام ومرام ضيفة قبلت
طلعنا نمشي على الشارع لحد ما شفنا تكسي
أجرناها وبوجهنا لبيت شمس.
وإحنا بالسيارة هي كل شوي أطوخ الحمرة وتحط عطر گالت
: -شنو أسماء الشباب الحلوين مال البارحة
: -واحد عزيز والثاني عصام
: -اممم أگلج خاف نوصل هناك وما نلگاهم وتروح الجية ابلاش
: -لعد مو على أساس رايحة تشوفين شمس
: -هي زيارة وتسيارة شوفي إذا ما طلع عدهم أحد نخليها تخابر عزيز هو چان يباوعلي البارحة مو يمكن انعجب بيه
: -ما شفته باوعلج أصلاً أخ عزيز كلش مؤدب ما يباوع وبعدين وين باوعلج مو جنه فوك.
: -لا شفته باوعلي أنتي عمية المهم أحب المؤدبين
: -البارحة چنتي تحبين ساقطين
وصلنا هناك نزلنا وهي مشت گدامي دگت الباب تأخرت إلا فتحت الباب شمس
توهها گاعدة ومفتحة تگ عين وكفشتها صاعدة وجهها كله مخربط گالت بصدمة
: -هااااي منو. مرام
مرام: -تعالي تعالي لو تعرفين شگد مشتاقتلج
أخذتها بالاحضان ودخلنا جوه گعدنا وهي صعدت بدلت ورجعت علينا بس شكلها تعبان وچنها ما نايمة عيونها نعسانة
مرام تتلفتت بالبيت گالت.
: -وين رجلج أريد أشوفه
: -مو هنا طلع من الصبح
: -لا حرامات
: -ليش
ضحكت وشمس لحد هسه مستغربة
شجن: -معليج سالفة طويلة هاي
گامت تسويلنا چاي ورحنا يمهم بالمطبخ وهي تسأل مرام عن أهلها وأحوالها
آخر شي طگت وتنرفزت
مرام: -أكلج أجيتج شايلة آمالي أريد رجال أريد حياة أريد حب
شمس: -ههههههه ما بطلتي بعدج
: -يمعودة هي ياهو التشوفه تريد تزوجه
انتبهت على شمس بلا شال ورگبتها وصدرها مطگعة ألوان عبالك متحسسة گتلها.
: -شوشة شبي جسمج متحسس
شافتني وين أباوع حطت إيدها على صدرها وحجت
: -هاءء إااي يمكن
مرام: -الحساسية تهيج من الحر
شمس: -شوية جو مو هالگد هالأيام
بقينا يمهم للغدة وهي تسوي غدة وإحنا بس نفتر وناكل خوب مرام ما بقت شي بالثلاجة ما طلعته
وكل ما أگلها خلي نروح تگول لا ما تقبل
إلا تشوف رجل شمس وجماعته
وفعلا أجة على شفتة حيل متغير عضيت شفتي بنددم من أجت عيني بعينة
رغم كلشي ما جاب طاري ابدد ولا حجة عني.
وأحس مستحية وفشلانة منه ما أعرف أشلون أعتذر منه وبيا عين
سلم علينا وصعد فوك ومرام بقت تكمز
: -هو هذا رجلج
: -اي فدوة لطولة
: -لعد والمزز وين راحوا ما يجون
: -شعدهم
: -دخلي رجلج يخابرهم بشرفج
: -جوزي مرام جوزي
حطينة السفرة وهو نزل يمنة وطول ما أحنا كاعدين مرام أطك كاهيات وتسولف ويا
وعلي فضحتنة. جنت كاعدة من جهة شمس
وهو بصف مرتة صاير ومرام أكبالنة
جان حجة وي شمس بهمس: -هاي صديقتج مستوية.
وهاي شمس هم طايحظه دكلة: -لا نية
علي: -لا والله مستوية للاخير
ما فهمت شنو مستوية بالضبط كملنة وهو ما بقى مشة
علي أساس نأجر تكسي بس عزيز كالة على يوصلنا وفعلا ما قصر اخ عزيز جابنة
بالطريق مرام كعدت وراه كلش بحيث يشوفها بالمراية وكل شوي أطگة بنظرة
بس طبعا اخ عزيز موؤدب وموؤمن تقي قابل هو عصام الساقط المتحرش
ابد ولا عبر مرام ولا أباوع عاد مرام طگت روحها
كالتلة
: -أهاااه الجو اليوم لطيف مناسب للحب عبالك مو.
هو ساكت من شافها تباوعلة أستحة منها لان تحجي ويا ما حب يفشلها رد عليه
: -لا حارة وشرچية مو مال حب أختي
: -أختكككك شنووو ااااااختك عرف ولف يا ماتستحي يا ماعدك ذوق بعد كلي خالتي فد نوب
: -العفوو أعصابج ست
: -خليت بيها أعصاب أنت
گرصتها من أيدهة: -لج مرام فضحتينا الله يااااخذج أسگتي.
: -شوووف لك خاف عبالك أني جبيرة بالعمر وكذا ترا البگدي بعدهن ما مزوجات وبعدين أني ادور طبقات طبقية مو بيدي انت شنو مو يمي مهتلف
عزيز: - رحمة الله والديج
مرام: - تدلل اغاتي
نزلنة من سيارة وهي بعدها تلعلع عطت بيها
: -عيب هسه شيكول علينا الرجال
: -شيكول خيكول يولي بالطگاك. واكلج صدك شوفيلي واحد من ولد عمج
: -غثة ما يفيدوج
: -ترا ما ارجع من العمارة ايدي فارغةة
: -هو اذا ما لگينة كلش أطيج بابا أخذي وأرجعي.
: -خاف امج تزعل
: -لا نمونة شنو
دخلنة جوة على ساكت شفت ماما وبابا يسولفون ما منتبهين علينا عود ردت نفوت سكته بس
بابا صاح علينا كال
: -وين جنتن
: -بالسوك بابا
: -كل هالوقت
: -اي
: -شو ما مشتريات شي
أيدنة فارغة جان مرام كالت: -مالگينة شي يعجبنة عمو وهم ما فرينة كل السوك تسوي فضل اذا تاخذنة بالليل
سالم: -ميخالف تتدللن
أخذتهه وصعدنة فوك، مقررة تبقى أسبوعين هنا بس، للامانة مونستني.
وراها بيومين
بالليل طلعنا بابا أخذنة نتسوك ونفتر
أنوب أشترينة ورد وتونسنا كلش ناقصنة بس شمس هالطلعة ذكرتني بغداد
من جنة مرتاحين ودوم نطلع سوا
هسه أباوع لبابا عيونة تحجي هواي
ويصفن هواي. احسة شايل هموم الدنيا على راسة
طلعنة للشارع أنريد نأجر تكسي بابا كدامنة يمشي وأحنا وراه
ومرام كل شوي تغمز لواحد وتأشر بالوردة
الي يشوفنة يكول ذني ساقطات.
وكفنة على شارع دا أناجر تكسي وأجت دراجة من بعيد بيه أثنين ملثمين صارو قريبن منه كلش
نزل واحد حاط أيدة ورة ظهرة وكال بصوت عالي
: -أنت سالم
أستغربنة وبابا كالة: -تفضل أني
ما أحس غير طلع أسلاحة وطگ بابا طلقتين
وحجة بصوت مسموع: -علي ال هاشم يكلك الحمدلله على السلامة
مرام صرخت وأني جمدت بمكاني كلشي صار بالحظات هيج فجة
وكعن الوردات من أيدي وركضتلة طحت يمه وهو يتنفس كوة وعيونة مدمعةة.
دشداشتة نصبغت حمرة وصدرة غرك بالدم
جانن بصدرة
حطيت راسة بحضني: -ب، ا، ب، اااا
مرام لمت الناس علينا وهي تعيط بصوت عالي
التمت اهل المحلات علينا
شالوا من حضني وشاب متوسط بالعمر جاب سيارتة وخلوا بيه
ركبت وياهم مفجوعة عيوني على بابا راسة بحضني
وجفوفه باردة عيونه نص مفتوحة ويتنفس سريع
صاعد ويانة رجال جبير مخلي وصلة على صدرة ويضغط على مكان الاصابة
ومرام بالصدر كل شوي أتعيط بالسايق دكلة.
– سووق سووق. اااااسرررع
وهو يحاول يهدينة يكول
: -مابي شي ماااااابي شي
حطيت أيدي على خدة حجيت ويا وأني ارجف
ما مصدكة: -بابا حبيبي
بجيت وهو عيونة مدمعات حجة كوة: -لا تبجين حبيبتي مابيه شي
كالي مابيه شي بس هو غمض عيونة
بقيت أضرب بي خفيف على خدة
: -بااااباااااا فتتتتح عيووونك راااح نوصل يروحي باااباااااا
مسحت عرگه دموعه النزلت من عيونة
ودمه المالي صدرة جنت أمسح بدية
جنت أحچيله بصوت يرجف.
: - بابا دير بالك تروح هااا انت مو كلت نطلع لخارج ونبلش حياة جديدة لااا تعوفنة منو النا غيرك أنضيع يلاااا حبيبي أقوى على مودنة هسه نوصل يروحي
دمعة نزلت من عينه بس هو ما حرك جفنه يغمض عيونة ويرجع يفتحهن كال بصوت واهن
: -ش، م، س
: -شببييه شمسسس هسهههه اخابرهاااا بس نوصل
تمام حبيبي
بوست أدية وعصرتهن حيل باردات يرعبني من احس بي برودة حاولت أدفيهن وأضمهن بدية
: - بابااااا...
غمض عيونة وسگت برد حيل برد.
رجف صدري وأنا أحس بكل نفس يتبخر من صدره
إيدي على كلبة ودگاته تصير أضعف
صوت صفارة الإسعاف قريب بس ما يفيد.
وصلنا باب الطوارئ بس بابا برد
نزلوا ويّانا. أخذوا أبويه من حضني چنت لازمة إيده ما رضيت أفلّتهة
الدكتور صاح: - عالسريع!
دخلوا وأنا چنت أركض وراهم. بس الممرضة وگفتني بوجهها
: - لو سمحتِ، ابقي هنا
كعدت على الأرض حضاضنة ركبي
ودموعي تنزل
مرام چانت ساكتة وبس تتصل على شمس هي ماعدها بس رقم شمس وما أجاوب.
وأني أصلا مبايلي راح من خطفني أزاد
مرت الدقايق عبالك عمر
وطلع الدكتور، بدون ما يرفع راسه
بس كال جملة وحدة جانت كفيلة تخليني أنهار
: - البقاء لله.