رواية عروس الهور الجزء الأول للكاتبة هيلانا الفصل الأول
وأگفة شمس عالمرآية تخلي مكياجها وترتب شعرها والراديو يصدع بأعلى صوت بأغنية كاظم الساهر
شحلو طولك من تمشي وناراك
وعفه كلبي الحمل ناري ونارك...
مخلية المخدة ع راسي أحاول انام
بس الصوت يخترق المخدة
عبالك كاظم يغني شخصيًا بالغرفة. شلت المخدة وصرخت بعصبية
: -شمس! تاااالي ما راح تحسّين؟
فزت وندارت: -آه فززتيني هو هالشكل! اسم الله عليج شبيج شكو
رفعت راسي بعصبية أباوع الها.
شجن: -سم الله عليّة؟ الله يسمع منچ شنو ذنبي كل يوم أكعد ع صوت كاظم اللي ما أطيقه دطفي الراديو عاد
شمس: -وشصار عليج إذا كعدتي هاي أنتي متخرجة وتنامين كل يوم لليل كعدي من الصبح شويّة نشّطي نفسچ
شجن: -شعندي أكعد الحمدلله متخرجة وما عندي شغل يكعدني من الصبح. يلا يلا أنزلي بلا زعاج ولا كاظم ولا هم يحزنون عفية شگد بطرانة
شمس: -أي صبحنا على لسانچ كاعدة بطالة عطالة.
شجن: -بطالة؟ أهون منچ اللي حياتچ كلها تصرفينها عالمرآية وكاظم الساهر ابو النسوان
نزلنة لمطبخ لكينة ماما تجهز الفطور
شجن: -صباح الخير ماما
نهال: -صباح الخير حبيبتي، ليش أصواتكم طالعة من الصبح شكو
سحبت الكرسي وكعدت صبتلي جاي: -ماما شمس مدري شبيها حالفة تعكر مزاجي كل يوم بصوت كاظم
دخلت للمطبخ المسعدة وشعرها يهتز وياه حركة راسها
شمس: -هاا ماما شوفيني بعد دكولين شي عني ليش ما دكولين لأبتچ المدللة تسكت.
نهال: - شمس أنتي تعرفين أختچ ما تتحمل الازعاج
من الصبح لا تعاندين
شمس: -ماما وين البس بشارع حتى ما أزعجها يعني صوت كاظم يموت
نهال: -لا تموتين ولا شي بس البسي بهدوء والراديو شوية خففي صوتة حتى لا أكسر الراديو بنفسي
شمس: -لعد أنتي ما تعرفيني ما أبلّش يومي إذا ما أسمع كاظم
شجن: -وإحنا ما نبلش يومنا إذا ما نتعارك
خزرتنة ماما ماراضية. شمس كامت فلتتت لكلية واني سويت انسحاب تتدريجي للغرفة.
طلعت شفت بابا منتظرني بالحديقة وفاتح بنيد السيارة مدري شيدور بيها
عود يوصلني الكلية هي هاي سيارة بابا أقدم من سلام عليكم وتعبانة كلش
ومايقبل يبدلهة يكول بتي اكو واحد يبدل بتة
تقربت من ورة وهو ما منتبه خليت بوسة على خدة
ضحك والتفتلي: -شمس
: -صباحو بابا
: -هله باباتي. شو تاخرتي
: -جنت اتناكر وي شجن تعرف اسوالف شجن مايحتاج أحجي!
دار صعد وأني بصفة اول ما مشينة وسيارة بدت تركص طبعا ولا ارتاحلهة بس شسوي مجبورة
جانت أطلع أصوات من اول ما طلعنة
: -سيارة بيه صوت
سالم: -عادي بابا دتغني
شمس: -لا كاعد تتطلب النجدة دكول كبرت كافي عوفوني لخاطر الله
ارتكيت على الباب حسيته ديهتز كلش قوي التفت لبابا: -اكولك بابا الباب ديقفل ويفتح وحدة
سالم: -لا تخافين هذا طبيعي السياره تتهوى شوي.
فجأءة الباب طاح بنص الشارع صحت بصوت عالي: - الباب طاررر شنو الطبيعي بالموضوع
وكف السيارة ونزل بهدوء وناس ورانة دك هورن وزدحام وبابا لا كنما
خلا بالجنطة وكلي ارجعي اكعدي ورة خاف توكعين
ورة الباب
شمس: -بس لو نغير السيارة فدوة
سالم: -السيارة مثل بنتي ما ابدلهة ابددد
وصلني بسلام لكلية وقررت مرة ثانية أكتب وصيتي قبل لا أصعد.
ثاني يوم بالليل
شجن: -
الصالة مضوية بضوء التلفزيون
ومناوي باشا طالع واحنا كاعدين ننباوع
بس ماما وبابا يتهامسون عبالك عشاق. ماخذيلهم زواية وحيدهم
وشمس نايمة على رجلي وتباوع مركزة على المسلسل ندستهة
شجن: -شوفي ماما وبابا مسوين قصة حب عالتقاعد
شجن: - يمعودة عوفيهم شلون أركز ويه الباشا وأنتي تگطعين السالفة. دشوفي جوهر بيك صدك خوش رجال كون يطلعلي واحد مثله
شجن: - جوهر بيك حتى بالأحلام صعبة.
شمس: -لعد يريد أحسن مني
لميت حلكي بضحكة: -لا اكيد بس رجال يدري بيج محجوزة لأبن عمج العمارجي
شمس: -اوووي لا عفية انوب ناقصني ازوج بالعمارة
شجن: -يكولون حلو
شمس: -حلو،؟ جذب! أصلاً أهل العمارة ما بيهم حلوين ويحچون كله جا و شنهي مرة رحت ويا بابا طلعت روحي شوب ونوب يخبزون بالتنور الطين دخانهم يخنگ
مسحت على ركبتهة البيضة وهي توخر سلسلة على جهة: -لا مامي ما أعيش هناك أموت من أول يوم.
شجن: -لعد ينطوج لابن خالو الحزبي
فكت حلكهة مصدومة: -منوووو كاااالج
شجن: - خالة من اجت الجمعة سمعتها گالت لماما أريد شمس لعمر
شمس: - ولج أنتي لو تصيرين مراسلة تلفزيونية أحسنلچ لأن أخبارچ أسرع من الأخبار العاجلة
شجن: -دولي غير داكلج حتى يصير عدج علم
رجعت راسها على رجلي ومغمضة تك عين حجت بستهزاء
: -يابا انطوني خيار ثالث هذا شينحب منه عمر؟
شجن: -والله ينحب ما ينحب. المهم ماما تحبه وفكري بيهة.
شمس: -چذب صدك شنو عبالها رح اوفق
بابا گلب وجهه فجأة وطگنة بنظرة مال مدير مدرسة
سالم: - ها شبيجن شداتحجن
أستعدلت شمس بگعدتهة وكالت بجذب
: - نحچي عن جوهر بيك بابا صدك شخصية عظيمة مثلك
هز راسه وكال: - فعلا
كرصتهة من أيدهة فزت بسرعة
: -اخخ خزرتهة شكد اجذبين ولج
ضربتني بخفة: - يمعودة دسكتي...
أنوب بوست ماما وبابا وصعدت للغرفة
صعدت وراهة. الباب مفتوح شوي وصوت كاظم الساهر قولي أحبك كي تزيد وسامتي.
يدوّي عبالك كاعدين بوسط حفلة عائلية بس بدون عائلة.
دخلت بشويّة وأول ما شفتها. گمت أضحك بلا وعي شمس واگفة بالنص رابطة وصلة على خصرها وتركص عبالك متدربة ويا فرقة الفنون الشعبية
شمرت نفسي عالسرير وأرتكيت على إيدي أباوعلهة وأضحك
: -ولج شوشة شبيج
وگفت بنص الركصة وتباوعلي بحدة: - شنو مشكلتچ لا تعكرين مزاجي أحس نفسي كاظم الساهر النسخة النسائية
شجن: -لا أنتي نسخة حسن البلام وهو يقلد كاظم.
شمرت الوصلة وگعدت: -شنو، والله لو ما أنتي أختي چان رفعت قضية عليچ تحطمين مواهبي دايما
شجن: -لا لا بالعكس استمري اذا استمريتي هيج أحتمال ينحذف اسم كاظم من الأغنية ويسجلوها باسمچ
شمس: -اوف أنتي تنشرين الطاقة السلبية وتخربين المزاج، طلعت وكعدت على الشرفة تسمع وحدهة والهوء يدخل لغرفة بردت
: -ولج شمسسس دسدي ملنجة وراج ثول
ولا سمعتني منطربة عابت سحبت الحاف
لفيت راسي ونمت بذات الجوء بارد وتمطر مال نوم ودفو.
ساعة بسبعة ونص. جنت لابسة ومجهزة نفسي وشجن علساس تروح ويانة
لان بابا لاكي الهة شغل بدائرة. محاسبة
جان الجو مغيم
والشوارع مليانة طين بعد ليلة كله مطر
جنت واكفة عند الباب وشجن مرتكية على بنيد السيارة
ننتظر بابا يوصلنة
طبعا كعد يتفقد السيارة اللاندوا
تاخرنة وبابا بعدة يتفحص
: -بابا اليوم مو وقت فحص السيارة. رح نتأخر
حجت شجن بسخرية: -لو تفحصها كل يوم شنو اللي إلى راح يصير هي السيارة عايشة على الدعاء.
رد علينا وهو ينفض ايدي: -يبا هي هالسيارة صابرة عليكم. لو سيارة ثانية جان خربت من زمان
شجن صعدت السيارة وتعدل ربطتهة
: -عبالك وحش مو سيارة تجعر من تمشي
كعدت بصفهة ورة وبابا يباوعلنة ماراضي
: -بس لا تنسين هاي السيارة راح توصلج للشغل كل يوم
سالم: -هي سيارة الماعاجبتكم جنت بشبابي يكلولي ملك الطريق من أسوقهة
شجن: -اكيد ملك الطريق لأنه محد يجرأ يقرب من هاي السيارة خاف يندعم
واحنه بالطريق السيارة كل شوي توكف.
وأني وشجن وحدة تباوع لثانية خوب شجن كوة صابرة ماتضحك
مد أيدة وشغل الراديو القديم.
الراديو بدأ بصوت مشوش واغنية
عمي يبلام تعبني الهوى
شجن خلت اديهة على اذانه وصاحت: - شنو هذا بابا شعدنة أسمع أغاني الأعراس الصباحية
سالم: -هذا فن إنتو ما تقدرون الفن الأصيل.
شمس: - بابا خلّي الفن الأصيل على صفحة ركّز على الطريق عبالك السيارة رح تطير
فجأة صوت انفجار طلع من جهة الإطار الخلفي والسيارة وگفت.
و شجن طلعت أول وحدة من السيارة وهي لازمة رأسها عبالك بطلة درامية
شجن: -خلصنا السيارة راحت بيها
طلع بابا من سيارة متعصب وأحنه واكفين على جهة
كال بلوم: -لا تصيرين درامية شجن هذا مجرد بنچر بسيط هسه أصلحه بربع ساعة
شمس: - ربع ساعة كل مرة تگول هيچ ونبقى ساعة نصور وي السيارة
مشيت على جهة شفتلي حجرة كعدت عليها ادري سالفة مطولة.
شجن تباوعلي واني كاعدة على حجرة كالت بسخرية: -شوف بتك شلون كاعدة عبالك أميرة منتظرة عربانة الخيل
شمس: -وأنتِ شنو كليوباترا اللي تمثل دور ضحية بكلشي
شجن: متضحك
زمخ بينة بابا سكتنه وهو قرر يصلح لاندو وحدة
أخذ جك السيارة وبدأ يرفعها
شجن: -بابا ترا مبين تحتاج مساعدة
ليش ما نوگف تاكسي
سالم: -ساعدوني بدل هالحچي شجنجيبيلي المفتاح اللي جوه الكرسي الأمامي.
شجن راحت تجيب المفتاح ورجعت بيدهة جنطة قديمة مليانة أدوات قديمة
شجن: -هذا شنو أدوات نجارة لو أدوات تصليح
مدة ايدة واخذ الجنطة منهة: - هاي جنطة أسرار محد يفتحها بس أني
شمس: - عبالك كهربائي أختصاص سيارات
شجن: -لا أكيد المهمات السرية اللي يسويها كلها تصليح سيارات
مرت ساعة وبابا كمل تصليح البنجر وكف وكال
بابتسامة وأسعة مثل إلى محقق أنجاز عظيم
ولو هو تصليح لاندو يعتبر أنجاز عظيم.
: -خلصنا السيارة هسه رجعت مثل الجديدة
شمس: -راح نمشي نص الطريق وونوگف مرة ثانية
رد بثقة: -لا اليوم السيارة رح تودينا وترجعنا بسلام
شجن: -أها يعني نقرأ الفاتحة على الطريق قبل ما نتحرك
شمس: - أعتقد السيارة تريد تتقاعد لازم نجيب وحدة جديدة
سالم: -هاي سيارة خرافية مو كل واحد يعرف قيمتها
شجن: -والله بابا سيارة هاي تنكد اكثر مني كلما نطلع تعطل
سالم: - السيارة رح تبقى وياكم حتى لما تتزوجون خليكم ساكتين مفهوم.
صعدنة وشجن أدردم وحذائهة أدمرت طين وبابا كل شوي يكلهة صوتج لا أزعجين لاندو
عبالك لاندو تحس وتزعل. احس بابا يحب سيارتة اكثر منه مدري معتبرهة بتة الچبيرة يمكن
وصلنة للكلية، وأنتظرني لحد ما دخلت من بوابة ومشة أتاكد
بابا يخاف علينة كلش ولو بيدة حتى للدوام يجي ويانة
جنت أمشي وأسحب بجفوف ادية داخل بلوزة أدفيهن حسيت اكو حركة وكفت والتفت
أيهم، ابتسمت وبادلني الابتسامة صار بصفي نمشي كال: -صباح الخير.
شمس: -صباح النور اليوم جاين سوة
ايهم: -متواعدين هههه
شمس: -شعجب اجيت كلت اليوم مطر بالعادة منشوفك بالمطر
ايهم: -حتى اشوفج
شمس: -تعبان انت
ايهم: -وادعتج اداوم حتى اشوفج قابل مكطع نفسي على دراسة اصلا م ب المقبول كافي
أبتسمت نص أبتسامة. ورجعت وجهي اباوع كدامي على طلاب صرنة قريبين على الكلية
هو بغير كلية وغير أختصاص بس أحنه أصدقاء من زمان جنه جيران انوب صرنة أصدقاء.
كال بهتمام: -ليش ماترحين لكنيسة وتكفرين من ذنوبج
-أني مسلمة
- ههه نسيت صدك لعد روحي للجامع
-من الاخير شتريد
-اريد أضحكج
-أسوالفك سخيفة متضحك
-شكو ضاجتي وشديتي خشمج
-اه ما ضايجة بس اني مزعوجة وانت زعجتني بزايد
-اشبيج منو وياج أحجيلي
-ماما دتفكر تزوجني للابن خالتو. عمر
-منين طلعت هل سالفة
-ماعرف وبابا من جهة يلح يردنة نروح ازيارة ل العمارة هناك يم أعمامي وأني ممرتاحة لهل سالفة
-شلون أعمام ب، همة.
التفتت عليه بسرعة: -صوووتك لا يسمعك احد تخبلت انت
-وشحجيت أني
-ترى حتى الحياطين الهة اذان ما شفت شي من حياتي لا اضيع من وراك اسكت
رد بدون نفس: -لا يمعودة أنتم بينكم حبايب ترى همة بس على أقليات مثل ال، يقتلوهم
حجيت بنبرة حادة: -أهوو موضوع متعرف بي لا تحجي بي المسألة مو مسألة م، ومس. ترى مسالة سياسة ومصالح شكو واحد يهدد الحكم يخفو من الوجود وعلى يوم من ورة لسانك احنه هم نموت.
غطة حلگة بنبرة من سخرية: -مو همة نفسهم هجمو علينا بليلة ظلمة وكتلو امي وأبوي لان م.
مو همة الارهابين أشو هسه همة أصحاب بلد وأحنه تهجرنة ست شمس وبعدين أني ما أخاف
-شوف أني صح علاقتي مو قوية بعائلة بابا بس مو معناها تحجي عنهم وأسكت بعدين اذ همة جانو بالح مو معناها قتلوا الناس كافي، مو كله نفس العقلية والاجرام اكو ناس تخاف الله
-وأعمامج يخافون الله
-عدك شك.
ضحك بصوت عالي وكال بستهزاء: -تذكرين أبن عمج ازاد الجان يحجي بعنجهية ومن هددني بالقتل وطفة جكارتة الكوبي براسي
-بوكتهة جان بينكم خلاف انت لا تحول الامور الشخصية لموضوع عام
-بالعكس ماكو شخصنة ابد بس ماتكدرين تعترفين ولد عمج وعائلتج النهج الب يمشي بدمهم وما يطهرون.
- ماكو بع غيرك واذ محروك دمك على م مثل ما دكول لعد لي نعدموا قبلهم شنو كانوا ترى من كل طوائف نقتلو وماكو فرق طائفة وطائفة اي شخص يهدد نظام الحكم يموت
-اي عادي انتم متعودين ناس تكتل ناس أحنا شعلينة
-مو قصة عادي. اه بس تعرف النقاش وياك عقيم تعبتني اروح لدوامي احسن
مشيت صاح وراي ما وكفت بوجهي للمحاضرة تعبني معتوه
وبكل سالفة حط ازاد شكد يكره.
هسه صح أني ما أحب ولد عمي بس مأقبل أحد يحجي عنهم بس أني أحجي مسموح.