رواية بين سلاسل العادات للكاتبة كفاية كاظم الفصل السادس والخمسون
-هيوو مو احجي ويااااج صاارلي شكثررر ماتردين
-هدى: ها شني شتريدين؟
رغد: -انتي وين بالج؟
زهراء: -يم عبسي
هدى: -انجبي يلا ولن منيييي ثنينجننن
عفتهن دايخة راسي يوجعني اريد مكان اختل بية مابية احد صعدت فوك السطح كعدت بزاوية لامة نفسي واعيد بالكلام الگالة عباس هاي اني اتخيل لو هو فعلاً كلي احبج!
لا مستحيل يكولها شبيه تخبلت ههههه وين اكو هيج عباس يكلي احبج عقلي ضرب الضاهر من كد ما افكر بية صرت اتخيل بس احسة حقيقة!
ضربت على راسي ودموعي وحدهن نزلن شني هالعذاب شوكت يخلص يوم بعد يوم يزيد حبة بگلبي والنتيجة شني؟
دموعي غرگن وجناتي طلعت شكو شي بداخلي وصرت اشهك بصوت عالي فزيت من حسيت ايد على جتفي رفعت عيوني مرعوبة بس تطمنت من شفتها.
رغد: -شبيج هداوي عليش تبجين
-راسي يوجعني.
-والراسة يوجعة يصعد فوك السطح يبجي!؟
خلت سلة الملابس على جهة واجت كعدت بصفي ساحبتني لحضنها خليت راسي بحضنها ودموعي تنزل في حين هي تمسح على ضهري بحنية بدون اي كلام...
-تعبت رغد گلبي يوجعني مو راسي، امي تريدني اتزوج ابن اختها صرت اتخيل عباس يكول انا احبج وتعاي نتزوج
شهكت ورفعت راسي مسحت دموعي وضحكت لازمة بيدها: -هههه تخيلي عباس يكلي احبج ويمكن كلي تقبلين نتزوج هههههههه
-شوكت هذا الحجي
-جاي اتخيل شبيج.
-هو مو صاحج يريد يحجي وياج
-اي
-جا هذا الموضوع الرادج بية ماتتخيلين صدك كالج
فتحت عيوني بصدمة خليت ايدي على حلكي اهز براسي مامصدكة: -اييييييي لجججج اييييي يمكن صدددك ماجااااي اتخيل
كرصتني تضرب بية اسكت احس كلبي يريد يطلع لزمتها اهز بيها: -عليج الله صدك ماجاي اتخيل يعني هو كالي يحبني
-اي يابة هو يحبج من زمان شني انتي ثولة ماتحسين هو ياهو المايعرف عباس يحبني
-يحبنيي حببب حبببب لو هيج مو نفس هذا الحبببب.
-ههههههههه ولج صوتج اي حب حببب نفس البالج
-يممممة ماجااي اصددك
غمضت عيوني اعيد الموقف والرجفة اخذتني والله مامصدكة الصار وتالي ماتالي العاشگتة روحي يطلع عاشكني نزلت طايرررة طاايرة من الفررح الضحكة ماتفارك وجهي عيووني تدور علية وين راح اريد المحة اشتاكيتلة شو ماكو اختفة روحي تلوب علية لليل هو ماكو ضليت رايحة راجعة يم غرفتة كل شوية امد راسي بيها ماكو وين راح...
كعدت بالمطبخ حتى اذا اجة اشوفة صارت الساعة بهدعش وهو ماكو خفت صاير بية شي وانوب كمت انعس طلعت جزر اكرط بية والنعسة بعيوني اغفة وارجع افز مادري شلون نمت على الكرسي راسي مخليتة على الطاولة...
لابسة بدلة عرس افتر بيها واضحك واكفة عيني على الباب متانية عباس ساعة ورة ساعة ماكو فزيت من دخل بهتت ملامحي من شفت العريس مو عباس صرخت بصوت عالي لكيت روحي بالكاع ارفس جني صخل واصرخ بصوت.
سكتت فحطانة افتح بعيوني مدنك يرفعني من ملابسي ويدك بخدي: -اسم الله الرحمن كلت اكعدج تنامين بحجرتج مادري هيج يصير
-انته ياهو اهووو عبسي ليش ما اجيت حقير انته اكبر حقيررر ليش عفتني اله مو متانيتك ولابسة البدلة شلون تعوفني بيوم العرس وتخلي غيرك ياخذني.
دفعتة بقوة وضربتة راجدي بكل قوتي عفتة وراي ومشيت لغرفتي اطوطح بمشيتي صرت ادفر بالباب برجلي وادك: -افتتتتحن البااااب زماااايل شمرررتني بالشاااارع الله لايوفقجنننن زهيرررة الخايسسة والله اررروح افضحجج واطلع سوالفففج وي نزنز هاااا
طلعتلي رغد تجرجر بية وتسد بحلكي: -تخبلتي شبيج ووولج فضحتينة راح تكعدين امة محمد
-جلبااات ليش طردتني وخليتني انام بالمطبخ امداجن.
شمرت روحي بالفراش ماكعدت الا على رفسات زهراء كمتلها لزمتها من شعرها ادفر بيها: -موو مطموورة لييش تررفسين ززماااال ااانتي بشررر نايممم
زهراء: -مااكو غيرررج زمااال شلون الباررحة فضحتيني حقيررة
-االباررحة مافضحتج اليووم افضحج ااانا اعلمج الصفرررررة شعرررري يبووووو يممممممة
اجت رغد تفاكك بينة هلست شعري واني هم ماقصرت...
رغد: -احتررركت اررواحجن شبيجننن مجلووبااات
هدى: -اذا زگطتني هاي الزمالة اموتها.
زهراء: -كلهاا بعد لاتحجي علية
رجعت نمت ورغد فوك راسي سحبت الفراشات صفطتها: -وولج كومي شبيج سكررانة الباررحة
-اممممم تعبانة
عافتني وراحت ماحس الا امي ترفع بية فركت عيوني اشوفها مخنزرة بوجهي: -ها يمة شبيج
-امشيي اسبحييي كااافي مطموررة للحمام يلاااا
-شكووو بالحمام بس ابو بريص اهووو ولا يخلوون الواحد ينااام انااام بالسطح بعددد.
اخذتني دفع بية واني النعاس بعيوني ماحس الا الدوش فوك راسي صرت اكمز بمكاني دقايق وجابتلي ملابس علكتهن...
-هسة شكو من الصبببببببح اسبببببح
-خالتتتج راااح تجييي تشووفج بهذااا شكلج المعفن حتى تزوهر من ورة خلقتج
-احلى من خلقتها عاد شبية
كفختني وسدت الباب امري لله سبحت ولبست شلون فستان الجديد انوب رحت للغرفة انشف بشعري.
-اكلج رغد شني اليوم عيد شكو
-خالتج جاية
-شكوو
-خطابة خطابة.
-يععع بس لا لبنها المايع جنة ابو بريص استغفرالله
-اي هو غير انتي ضاربة وياة ميانة
-يمتها دهر حتى دهررر اليسمعج يصدك هو اصلا اسئلة عن دراستة والمواد وهيج
-المهم خية رايدج
كعدت بالكاع امشط ولطمت على صدري واني اتذكر الحلم ملخت رروحي: -وولج ررغدة الحگيلييي البارحة تزووجتة بالحلم يمااااة يماااة ما اجااني عبااس اجة هو يبوووووو على حضي
-شكو ولج فهميني.
بديت احجيلها كلشي صار واتذكرت من ضربت عباس راجدي صرنا نلطم ثنينة.
رغد: -صخااام ولج شماالج سكررانة
-والله مادرري شبييية بس يمكن جني تلبس بية اي ولج جني هذا لان ضليت كاعدة بالمطبخ ايي
كامت تهز بيدها وتفتر ضامة ضحكتها مشطت بسرعة
وطلعت صاحت وراي: -ووين ولج انتي هالفترة مايصير تطلعين من الحجرة خاف تسوين سالفة بعد
-لا لا شبيج بس اروح اشرحله اكلة الجني سوة هيج مو انا.
طلعت ركض لغرفتة حتى مادكيت الباب التفتلي جان يكوي بملابسة رفع عيونة ودنك متجاهلني بلعت ريك وتقربت افرك باصابعي يربي شحجي هسة
وياة صخام بوجهي.
-احممم عباس البارحة ترررى هاي مو انااا هذا جني لبسني جي ضالة بالمطبخ وحيدي خو انته تعرفني شلون اسوي هيج بيك اءءء اسفة صح مو انا الضربتك بس اعتذر نيابة عن الجني هاا شني سامحتني
رفع عيونة ابتسم ابتسامة جانبية ورجع يكمل: -روحي بوية مسامحج
-هاا
-وداعتج.
-اءءء بس شوف البارحة شصار نسيت
-وانا فاقد الذاكرة
-ياااء يمةة اسم الله صددك اسويلك ريووك
-متريك. اليوم شكو كاشخة من الصبح
-شقصددك انا ما اكشخ ومبهذلة مووو؟
-لا بوية مو هذا كصدي بس اكول لابسة فستان مال طلعة
-ها والله مادري هاي امي تفتر علية يلا انا اروح باي باي
-هههههه باي روحي
طلعت وجهي نار ركضت للغرفة اجر نفس كوة خليت اصبعي بحلكي ورفعت عيوني لرغد: -اكلج شو ماصار شي احس الوضع طبيعي يجوز انا صدك اتخيل.
-لا ماتتخيلين صدك كالج بس انتي من طلعتي بدون ماتكليلة شي ضن انتي ماتريدينة ولهذا السبب سد الموضوع
-صخاام بوجهي انا ماريدة شبية تسودنت ليش هو اكو واحد احسن منة!
-لا والله وين اكو
-هسة شسوي حبابة خاف اعرس من هذا المبحلس
-عوفيها علية اجت رغد ام المخططات اااحح راح تشب النار انا الكم اليوم
-شراح تسوين
-دروحي خلي مكياج بس مو هواي يلا جدامي
-ياااء شعندي معررسة
-دمشي غشمر الج الصافي سوي مثل ما اكلج.
-ديلا نشوف وين يصفة بية الدهر
رتبت روحي ونزلت اتريك متت جوع ماكو اقل من ساعة اجت خالتي گلبت خلقتي رحت سلمت عليها وطلعت بحجة اساعدهم بالغدة اجت رغد سحبتني
همست بذني: -امشي لاتطلعين بعد
-ليش ولج
-سوي روحج نايمة راح اقيس النبض وارجعلج
ابتسمت ورحت اركض هاي رغد صايرة داهية كعدت العب بموبايلي شلون تونس نايمة على بطني ورجلية رافعتهن والعب: -لااااااااا يبوووووووو خررررب بيكمممممم.
وصلت لمرحلة متقدمة وخسرت روحي صارت بخشمي شمرت الموبايل وتلفلفت بالغطة اكل بشفايفي طفرت من اجت رغد كعدت بصفي نزعت الشال تهفي: -هاااا
-وجع حجيت وياة
-شنيييي يبووو احجيي بساااع
-كتلة عباس اليوم جايين خطابة لهدوة وهي ماتريدهم
-اي شكال
-كال ماكو واحد يجبرها
-اي وبعدين
-كتلة والله كاسرة خاطري بس تبجي الليل كلة خاف امها تجبرها علية
-اي وبسسس.
-ومرض غير هي مراحل هسة بينتلة انتي ماراضية حتى يخربها وبعدين نبدي بالخطة الثانية
-يا خطة ولج هاي
-بالليل مو هسة شبيج
عوجت حلكي ماعاجبني يلا شعدنة ننتظر وصارت اللحظة المنتظرتها اجتني امي تقنع بية: -ها ولج جنج ماعاجبج
-اي والله ماعاجبني لاتسولفينها مارضة بابن اختج لو يضل بس هو بالدنيا
جرتني من اذني غمضت عيوني بوجع ولزمت ايدها
-اااخ يمة اااذني يبوووو.
-ولج شبية ابن اختي ولج هذا بالمستقبل يعيشج اميرة فلوس يخرخش دكتور ويمج الحساب واهلة عدهم خير من الله يخلونج بكيفج تكملين دراسة وتتعينين اخلصي من هالساس
-مارريد اتزوج هي كوة
-انتي دورين العسكري نفس ذاك الاستشهد وعافج هم يستشهد وتضلين بالدار
-هو ياهووو
-انا رايحة اكل لخالتج راضية.
راحت وعافتني صافنة هاي صدك سوتها بعدني ما نازلة واسمعة يصيح باسمي كلبي احسة وكف كوة نزلت دخلت اتراجف كلهم مجتمعين وخالتي وياهم صاحني عيونة حمر: -تعاي هدوة يمي
اشر على مكان بصفة رحت كعدت اباوع بالوجوة مرتبكة كلها عيونها علية.
عباس: -بوية هدوة خالتج خاطبتج لابنها اريد اسمعها منج راضية لا
اباوع لامي تريد تاكلني لزمت بدشداشة عباس رفعت عيوني بعيونة وهزيت راسي: -لا ماراضية.
ابتسم وكال: -ام حسام البنية ماراضية واحنا مانجبر بناتنة على شي ماعدكم قسمة يمنة
كالت امي: -لا شني السالفة هي وين تعرف الزين من المو زين احنا اهلها ونقرر النشوفة يناسبها حالها حال بناتنه وبعدين احنا ماننطي الغريب خية ام حسام اسبوع ونردلج خبر
عباس: -عمممة جدامج البت ماراضية شني هي اجبار ماتريدة فضت وانتهت سدو الموضوع.
كالها بنتر كمت طفرت اركض رحت للغرفة دخلت وسديت الباب علية كلبي يدك بقوة توقعت امي تلحكني بس ماكو امنت كلش ورحت انام قيلولة
ماحس الا الدفرات بطني طفرت اكمز بالغرفة وهي وراي تصيح.
-وولج شبية ابن اااخوي البالج مايصير على جثتي
-هووو شنيييي البالي ماريد اتزوج كااافي.
طفرت اركض لغرفتة وهي وراي فتحت الباب بدون ما ادكة لكيتة نايم طفرتة يا فشلة الفشلة نايم البداخليات من شاف امي لبس الدشداشة وكام خلاني ورة ضهرة يصيح بيها وهي تلعلع بصوتها
وتكلة: -ناوشنياها اربيها من جديد خاف ماعرفت اربيها بصغرها
-بعد وكت عمة وينج عنها من زمان هسة جاية تربينها ولا تهتمين ربيتها خوش تربية
-هووو مااااكو خررب اخلاقهااا غيرررك طلعتتت عينهاا بدلالك
-تستاهل.
بقو واحد يصد والثاني يرد ماخلت كلمة ماحجتها اخر شي كال عباس بعد ماطگ كلبة: -انااا نهاي عليها واريدكم تزوجونها وانا موجود
نار وذبة عليها طلعت تشيل بروحهة وتركعها ركع الباب وراها بقوة بعد ماخلت البيت هوووسة
ضليت خاتلة مخلية ادية على اذاناتي من الصياح
الصار صار كبالي ثاني ركبتة من العصبية يريد ينفجر حجة كلمة لا غيرها...
-ترضين بية كزوج؟
دموعي نزلن هزيت راسي باي عدة مرات ابتسم ابتسامة جانبية وسحبني لحضنة حضني بكل قوتة
احس گلبة يريد يطلع.
عباس: -نتوكل على الله واطلبج منهم
ابتعد ارجف مامصدكة من شافني هيج نزل بدون مايحجي وياي شوية وجاب رغد وقفل الباب علينة خاف امي تجي...
رغد: -ها ولج الصار
-خطبني هو عبسي
-كلوووووووشششششش ههههههه وفرتو علية شغل الخطة الثانية
-مادري شلون صارت فجأة.
صار الصوت عالي طفرنا نستمع مخلين اذنا على الباب اسمعة يحجي بصوت عالي: -البت راضية بية وانا ابن عمها رايدة ماعدكم حجة هدوة ماتطلع لغيري ماطول هي راضية بية
صوت امي جان كلش عالي ومانسمع غير حبوبتي بالعوجية كسرتها وهي تستنجد احد يطلعها منها حصلتلها نصيب رغم احنا مانشوف بس نسمع من بعدها اختفت الاصوات على ما اعتقد نزلو جوة
ضلينا محبوسين نتفرگع نريد نسمع شيحجون ماكو.
كاعدة اكل باضافري واشوف رغد صارت اطك اصبع
وتغني...
-هسة احنة بيا حال تغنين
-عباس النشمي الحوگ القيادة بجفك تلوگ كلووووووولشششششش اخذ العاشگها وليدنة زفيناة بصاية حيدررر كلووولششش
-وين اخذ العاشگها جا غير كاعدة مكابلتج تففف على هيج خلقة
-هسة انا حامل والهرمونات تلعب براحتها انتي شبيج ثوول كون وعباس بس كول بلي وبيك خير وادللي.
ضحكت بصوت عالي وهي صفنت بوجهي وكامت تضحك على روحها من الملل صرت اراقب حركاتها وهي تحجي وي بطنها: -اشهد يبعد امك اليوم راح يعرس عمكم عباس عاد هو خوش زلمة حنين وحليو وكفو بس راح ياخذ زعطوطة فاهية
-شلون راح تخليني اجيبها ناقصة ايام
ابتعدت عنها هاي مدري شبيها صدك الهرمونات مشكلة عدها بعد فترة انفتح الباب اذا بزهراء تجرجر بية انزل وياها: -على كيفج ولج وين
-كلها تريدج جوة.
گلبي صار بلعومي من الخوف والتوتر نزلت جوة كلها مجتمعة وجهي صار ينطي الوان كلها تباوعلي صاحلي ابوي اروحلة هستوني شفتة محسوب عندي ابو بس بالاسم ولا مرة كال شمحتاجة لو صاحني
رحت يمة ابلع بريكي دنكت راسي العب بصابعي من التوتر وهو يكلي: -بوية هدوة ابن خالتج رايدج وابن عمج ياهو التريدينة
الساني انبلع بس مو مال اسكت وادمر مستقبلي بعد دقايق كتلة: -ماريد ابن خالتي مانتوالم انا وياة
-عباس طلبج مني شدكولين.
-بكيفك
رفعت عيوني المدمعة بعيونة مركز وياي رجفت من كال ابوي: -عباس ابنة ونعرفة كلش زين وهو مربيها على ايدة ماضن غير واحد يصونها مثلة بوية عباس المرة الك تستاهلها
صار هلاهل وصياح بنفس الوقت الجو انخبص خبص امي صارت تملخ بروحها وتصيح.
-حسبي الله ونعم الوكيل عليكم قشمرتو بتي وانطيتوها اله لابكدها ولا حذاها فوك هذا مطلك ومايخلف.
الكل تجاهل كلامها ورغد تهلهل هي وحبوبتي احس راسي انسطر خوف وتوتر اخر شي سمعتة الخطبة الجمعة طفرت لغرفتي مامصدكة شوية واجن وراي رغد وزهراء يباركن البيت هدأ شوية رغد قفلت الباب خابرت سجى بغلتها...
سجى: -ووولجن هذااا مقلببب موو؟
رغد: -يا مقلب خية الجمعة الخطبة
-ولج اختي الفاهية الكاتلة روحة على عبسي راح تصير اله ماصدك شهزة اشو جنة بلوكة مايتحرك
-الغيرة هزتة خلتة يرعش
-وولجن ماصدددك جايتجنننن.
-هلا بيج متانيتج
نزعت رغد شالها رفعت الدشداشة وشدت الشال بطنها شكبرها وهي تدور اغاني شغلت وضلت تهز واني اباوعلها بنص عين اخر شي صحت بيها.
-وولج حامل الفررخ لايصير بية شي
-لاتخافين ابني يحب الركص طالع على المجسب
عفست وجهة وفتحت الشال شمرتة وكعدت مبينة اتذكرت شي، لليل اجت سجى تحير شتسوي من الفرحة لزمت وجهي وسطرتني راجدي فتحت عيوني بصدمة: -هاااااي ليششش
سجى: -اسفة والحمزة من الحماااس يبووو. تعاي ابوسج.
باستني وراحت صاحت بيها رغد وين
سجى: -ابارك لعباس واجيس نبض
راحت ورجعت منتهية ضحك ذبت نفس وكالت
-شعلتة الج شعل طلع عاشك ولهان يبوو شكددد فرحااانة بيكممم
مر اليوم ماطلعت من الغرفة واني لحد الان مامصدكة الصار خفت اطلع اتحلم، لثاني يوم الصبح
كعدت من غبشة صليت وبعد ما نمت تريكت وسويت ريوك لحبوبتي وصعدت كبل لايكعدون مدري شبية استحي...
البنات كلهن نايمات طكت روحي وطلعت من الغرفة صارت بوجهي امي وجهها مايكصة السيف سحبتني من ملابسي طاكة عيونها بوجهي تحجي بهدوء ممزوج بعصبية...
-ولج شمالج خايبة تاخذين هذا الشايب رباج على ايدة لابكدج ولا حذاج وانتي بعدج صغيرة وطالبة جامعة الف واحد يجيج احسن منة افتحي عقلج يالثولة عباس مطلگ وبالعسكرية ماكاعدلج يا رايح ياجاي وعلى ساعة يستشهد يخليج ارملة.
-الاعمار بيد الله كل واحد يموت بالطريقة الكاتبها الله
-امدااج يحضي ضحك عليج ولج يمة عوفية مو بكدج ولا يفيدج ارضي بابن خالتج والله يعيشج اميرة اطلعي شوفي الناس عوفي عباس اخذي اي واحد غير عباس.
-ماخذ غير عباس ولايحله واحد بعيني غيرة عباس التحجين علية داراني مثل الماي البلصينية انتي امي ما داريتيني مثلة عباس كلشي سوالي بدون مقابل لو اطلبة روحة ينطينياها بدون ما يسال عباس مكتوب إلى وانا مكتوبة بعد ما كل واحد راح بدرب رجعتنة الدروب وانجمعنا حلم شبابي عبيس.
بمجرد حجيت هالكلام افترستني انهدت راجديات وعض شعري وكع بديها اريد اطلع روحي منها ماكدر انتهيت من صدك لو ما طلعن البنات على صوتي وطلعني منها جان موتتني...
وكعت على وجهي ورغد كومتني وسجى تتعارك وي امي المحسوبة بس بالاسم عمري كلة ما اجت حجت وياي لو كالتلي شبيج مابيج بس من ردت ازوج واختار شريكي صارت الام الخايفة على بتها ومستقبلها...
عفت سجى تتعارك وياها هي ورغد ودخلت للغرفة ارجف وجسمي يكت عرك دقايق وصرت اتلهوى من الجوع جسمي كلة يحركني حاضنة المخدة وابجي بصوت اجن البنات كشفني وشهكن من شافن ركبتي وشعري منتف...
سجى صارت تجيب فلان وتركع فلان نزلت واسمع صوتة عالي ركضت قفلت الباب ماريدة يشوفني بهذا شكلي والله يكلب البيت...
بعد الصار كلت لو يعدموني ما اختار غير عباس وحتى لو هو عافني اني ماعوفة، بعد ماشبعت بجي اخذتلي ملابس ورحت اسبح شكول وشحجي اثار العض صايرة بنفسجية يكول عدوتها مو بتها...
دخلت للغرفة لافة المنشفة على شعري لكيتة كدامي ردت ارجع وهو كام اجة باتجاهي قفل الباب وصار كبالي اباوعلة بعيون مدمعة وهو يتفحصني بعيونة القلقانة...
-كسر بيدها والله لو مو مرة جان عدمتها العافية
-بس هاي امي.
-لاتكولين امج من زمان كتلج انا هلج امج من الصغر مالها غرض بيج هاي ام هاي ماكلة ركبتج اكل شمسوية بايكة ناهبة
-احبك هواي، محد حبني بكدك احن شخص شفتة بحياتي انت عبسي لاتعوفني
سحبني لحضنة مطوقني بكل قوتة ضميت راسي بصدرة اشهك وابجي هنا الحنان والامان بحضنة مو بالعالم، ابتعد عني يستغفر ويمسح كصتة وعيونة على ركبتي بلع ريك وابتعد ايدة ترجف.
عباس: -الجاي مو اكثر من الراح باسرع وكت خل ننجمع عباس وهدوة مثل شدة ورد حلالي رد إلى واخيراً ماتت العادات البعدتني عنج وجمعنا القدر
طلع واني گلبي يدك بقوة نسيت الصار ورجعت للحياة انبض بقوة بشوفتة اخذت الموبايل وخبرت صديقاتي على خطبتي شكد فرحن اخر شي خابرت نوف من سمعت صوتة اتذكرت ذيج الايام الجنة نسولف بيها علية بجيت وكتلها...
-معزومة على خطبتي انتي وانمار
-عزااا ولج ياخطبة شكاعد يصير.
-اءءء عبيس وانا راح ننخطب
عاطت بصوت عالي وكع الموبايل بالكاع مااوصف فرحتها اكدت عليها تحضر بهيج مناسبة مهمة عندي
-لج اني الما اجي افااا جاية جاية راح احضر غراضي وللناصرية ياحلوة الحلوات ردي علية هههههه تسودنت من الفرحة
لثاني يوم عساس اروح للصالون واجت رغد تطك اصبع وتكول: -لجج هددوة ماكو خطبة
كمت من مكاني احس گلبي وكف والدم جمد بعروكي
-ليش ماكو مايريدني مو.
-خايبة من هسة اغمج على كصتج يا مايريدج الزلمة مايتحمل راح يسويها هي خطبة هي عرس
بهتت ملامحي وذبيت نفس: -شلون ما نلحك؟ يمتها؟
-اليوم يجيب غرفة اخشاب جديدة الولد جايين يفلشون بالغرفة مالتة.
بيومها البيت انخبص فلشو غرفتة ونزار دك رجل يحجي وي حبوبتي ويحجي بحركة: -اريد اعرس شني صارلي شكد الوياي فرخو وانا كلشي ماكو والعباس احرك بيتكم يو ما تعرسولي هالفرخة وسقطت بالمدرسة بعد شكو يعني الا تكلكم زوووجوني يلا ترتاحوون
-ابشر يجدة عرسكم انت وعباس سوة روح خبر اهلك
وكف يهلهل بصوت عالي نزل على حبوبتي يشيل بيها وهي تصرخ وتضرب بية نزلها وصار يطگ اصبعتين.
-والحاكمم گال هذااا العرس منين عمامة شيوخ واهل امة سلاطين والحاكم كال كلووووووشش
اجو الولد على صوتة عباس يخزر بية: -خير شكو تهلهل فرحان بية
نزار: -فرحان بروحي مبروك علينا العرس
عباس: -ياعررس لككك
نزار: -شمالك غير راح اعرس وياك
دفرة عباس وصاح: -خرررب حضي نزار يعرس وياي شني ما لكيت يوم هاي الايام شكثرها شذكرك بالعرس.
نزار: -لاتضل تدردم اعرس يعني اعررس وشني انت مو عرست كبل هي طمع كليومية زفة انا زلمة مظلوم كلشي ماشايف خلوني اعرس راح اشك اهدوومي
جذب رايح لاهلي اركصهم
راد يطلع وصاح بصوت عالي: -ووولج زهيررران حضرري روحج للعررس رراح نعرررس ونلعب جوولة
ركض والخاشوكة صارت بضهرة طلع يغلط على عباس، عقلي في حالة صدمة عرسين سوة اني وزهراء وحدة صافنة بوجهة الثانية هي صارت جنها فارة دفرتها وصحت بيها...
هدى: -امشيي ولي منييي حتى بعرسي لحكتيني بطططلت بعد ماعررس ثنينة نلبس بدلات ونتمكيج يبووووو
زهراء: -اكلج انا ماريد اعرس شني مااااا
هدى: -اليشوفج يكول شنهي هاي البنية البريئة وانتم مخلصينها مباوس بالمطبخ عيييييعععععععع
-وووسم يمتهاااا يمتهااااا
-هسة لو ماشايفتكم بعيني هم كلت جذب صارت ماتريد العرس الصفرة يلة لحكي على روحج وسوي خبطة توخر منج الصفار.
صرنا نركض منا ومنا اني وهاي العوبة سوى اشترينا جهاز سوى واني شاختار هي تشتري مثلي اخليها تشتري وارجع الاشتريتة وهي تموت حركة
-لا تقلديني اشتري وحدج خوووش يلا ولي ترى نزار مو مثل عباس ذاك يريد مثل الممثلات جيبيلة
-وعباس يريد مشلتح نمري
-دطيري عبيس مو فاسد مثل نزار الملطلط
-عود نشوف المو فاسد بعيدين تتلاكة الوجوة.
رجعنا هلكانين ورانا صالون تنضيف وجة وشعر وهم نحجز بدلات عباس شد الغرفة الجديدة لحد الان ماشايفتها استحي بيوم الردنة نروح للصالون ودة علية رحت عيوني بالكاع استحي اباوع بوجهة
حسيتة صار كبالي رفع وجهي باصابعة ابتسمت بخجل تحمحم وكال.
-بوية هدوة شعرج لاتلعبين بية عوفية على لونة
رفع حاجبي بيدة رفعت عيوني بعيونة تلمع: -لاتخلينهن يكصن حواجبج يسونج مثلهن شيطانة
-جا شسوي
-بس حفي شواربج.
ضحك وضحكت على ضحكتة ضربني بخفة على خدي وكال: -شوفي الاخشاب حلو؟ انا متاكد ذوقج
هزيت راسي مبتسمة باوعت بالغرفة تجنن من صدك كلشي كامل بيها ابتسمت وطلعت من سمعت سجى تصيح باسمي اخذتني تجرجر بية وتكول.
-ولج زمالة لاتخلينة يشوفج منا للعرس خوش يالغبرة
-عود ليش
-حتى يشتاكلج ويضل يفكر بيج.
هزيت ايدي ومشيت حصلتلي راجدي على ضهري ضليت بالمطبخ ننتظر سفانة تجي تروح ويانة اجت عافت جهالها عد فارس كاعد مخلي ابنة امير بحضنة يهز بية...
فارس: -ابني حبيبي اسكت هشش هشش لاتبجي عيب الزلم ماتبجي
سفانة: -لاتضل تهزهز بية ثويلة ممة وشربة مو الكاة كاتلة الجوه
فارس: -ثار مو تدللون
كرصتة من زندة وابتعدت صار يفرك بيدة ويهز براسة
اجة على صاح بية؛-بوية تعال لاتعوفني هذا اخوك يبهذلني
علي: -اريد اروح وي امي.
فارس: -جا امك رايحة للصالون كلة نسوان مو عيب وانته زلمة وهناك النسوان تلطخ بيك حمرة
علي: -جا اخليهن يرحن وحدهن نسوان بدون زلمة مو عيب انا مارضة على امي تطلع وحدها
فارس: -وياهو الكلك ما وياهن زلمة جا وسجيوة شواربها ما اجن بعينك
خزرتة سجى تهز بيدها وتكلة: -حاط گورك وي شواربي هناااااااا وينهن وينهن على نسيبي تعال وياي عيب تعوف مرتك وحدها تطلع.
فارس صار يباوعلة بنظرات حنونة بلكي ينقهر على ويضل يم اخوة يسكتة لو بجة وصدك ضل على يمة واحنا رحنا كلنا للصالون.
امي ولا حجت وياي ابد ولا الها دخل بية كل ماتشوفني تصيح: -لا اعرفج ولاتعرفيني ليوم الدين
سكتت بالعة غصتي ولو مكان الام مايتعوض بس البنات عوضنه وحبوبتي وياي راحت ملتمين عليها تسولف وام الصالون تاخذ وتنطي كيفت عليها رغد جانت كاعدة بحضنها علاكة حلويات تاكل وتباوعلنة.
صارن هي سجى دفرات وحدة تريد تسوي كبل الثانية...
زهراء ميشت شعرها هي وشروق والباقي تنضيف وتعديلات واني من ضمنهم بس حسيت وجهي يزلك من النعومة خدودي صارن ورديات خطية زهراء طكگ حب لان اول مرة تسوي وجهها مادري حساس واخذت الدرب تبجي واحنا نحجي عليها يروح منا للعرس...
زهراء: -ما اعرس بطلت هسة نزار يضل يعيب علية
جدة نوفة: -شنهي يعيب عليج هو احلة منج هالاملح
سجى: -حبوبة ما اسمحلج الاملح لقب رجلي.
-خيعونة عليج يجدة
وصلنا للبيت ولكينة كدامنة انمار ونوف والبيت مخبوص بيهم انخبصنا اكثر كل وحدة بينة تسحب نوف تباوسها صارلنة شكد ماشايفينة اخر شي سحبها انمار من عدنا.
انمار: -البت مايعة روحها علكيفجن وياهن حامل لاتختنك
جدة نوفة؛-شمالك بس مرتك تختنك هالبنياتنة راحن للصالون مشي ورجعن مشي وكل وحدة بطنها شكبرها ما اختنكن
انمار: -حبوبة هاي من غير مصنع.
اخذنا نوف وصعدنا ذبينا ارواحتنا فحطانين جابولنة الغدة ناكل ونسولف وي نوف المتغيرة تغيير جذري
-نوف: اكلجن شنو شو كلنة حوامل
-اي والله شني السالفة جا ياهي التركص
سجى: -معليجن انا اركص حتى لو بتي ملزكة لا جذب طالعة على امها قووية
رغد: -صلفة وام السان كولي
سجى: -صدك ماكتلجن بس اجيب اصير دلالة يكلجن بيها خوش فلوس هالشغلة وتعرفني انا لساني طويل حرامات اضيع مستقبلي.
رغد: -اليسمعج يكول تنامون بدون عشا عوفيها إلى انا اشتغل دلالة امراة مطلقة وعندي طفل اريد اعيشة تخيلن اخط الكحل واطلعة من عيوني واجوي حلكي بديرم احمررر واخلي حمرة سحرية فوكهن والطخ خدودي والعباية زالكة من راسي واطلعلي برجم
سجى: -والمجسب يكعدلج على الدررب كعود حلوة يم عيون السود يصفور وراج لو بشيلج العلاكة
رغد: -لا اخلية يجيبلي الطلب شكو وحدة ما تنطيني الفلوس اودية عليهم.
سجى: -هنا بس يشوفنة ينطنة الفلوس وزيادة بوسة خوش شغل رغد استمري
هدى: -كون يسمعجن جاسب الا يتسودن عليجن يصير عدجن طلوگ
نوف: -لاتحجن على جاسب ترى حباب
سجى: -صح حباب يحب التعدد خاب ما تنلصمين
نوف: -لا مو جنت هنا عايشة جان يقريني لسة اتذكر
سجى: -طلعت اله وكفات ايباااخ بس صدك لو كالو اياكم ونكران الجميل عفية عليج نوفه عجبتني تربيتج هذا انمار خوش يربي احتمال من اجيب بنتي انطيها الكم ربوها.
رغد: -والله يحصلون بيها حسنة احسن ما اخلاقها تخرب من وراج
نوف: -بنااات اسمعني ززين
سجى: -غير تحجي الفاهية
نوف: -هاي التفات واسراء العكروكات وين راحن يعني مانعزمهن يجن هنا مو تزوجن خل نعزمهن نشوفهن وين صارن شكلتن؟
سجى: -دخيل ربج على العقل الشايلتة تعاي ابوسج ولج شذكرج بيهن بس نعم الله عليج صح لازم نشوفهن ونعزمهن ماطول متزوجات وتغيرت اوضاعهن.
شروق: -ما اضن يجن كبل ردت اروحلهن ورحمن خابر رجل التفات كالت ماريد اشوف خلقتها حتى تفشلت جدام زلمتها هيج تحجي
رغد: -هاي شوكت شو ماندري
شروق: -من زمان عود كلت اخواتي حتى لو هاي الاضفر مايطلع من اللحم كلت اضل على اتصال وياهن بس هنا صدني شكد انقهرت بوكتها
سجى: -لاتنقهرين خية كلنا اخواتج دشوفي هاي العشيرة كلها اخواتج خيعونج علينة شلون بنات احنة نهببببل نهبببل
رغد: -صح صح اتفق.
شروق: -جا صدك انتن اخواتي من زمان حاسبتجن بعد روحي
اندفر الباب كلنا كمزنا بهتت وجوهنا من شفنة على شايل اخوة على كلبة وفحطان وجهة صاير احمر اجة يسحل بية شمرة على امة يصيح.
-گلي لابنج لايطلع بالشارع بلة دعمتة سيارة مو تضلين تلطمين هاااج ابنج انا مالي دخل وعلى بس اشوفة طالع اخلي ابوي يكتلج وياخذ فوكج مرة
شهكت سفانة تدك على صدرها تريد تلوحة وسجى سحبتة الها تبوس بية.
سفانة: -ولك عليوي ترفع حسك علية وانا امك وتهددني بابوك تريد تزوجة حتى المرة تسويك المارد السحري خدام عدها تخليك انطينياة هذا لسانة طولان
علي: -يمة انتي تحركين الاعصاب بس تحجين انا ما اخلي ابوي يزوج شبيج صدكتي غير اكتلة بس يعاين لغيرج بس هذا ابنج مايفتهم يكوم ويطيح يكسر عظامي من يطيح على وجهها.
سكتت سفانة عيونها مدمعة على حنية ابنها اجة لاخوة يمسح بوجهة ويبوس بية: -شلع كلبي اميري شلعة والله بس يتعثر.
باس امة يعتذر منها حضنتهم سفانة تبوس بيهم على رغم عمرة بس كلش واعي وكلامة مفهوم ورزن والشي اليميزة حنيتة سجيوة كل شوية وصاحت
-نسيبي يمة فدوة على بنيتي الك لاتعاين لغيرها
احلى ايام مرت علينة كلنا متجمعين نجهز ونحضر كلشي جهزنا حجزنا بدلات عرس وحنا اني وردية وزهراء حمرة تقريباًكملنا كلشي والحنة باجر، البنات انخبصن باللبس مايكفيهن شي الحمل مسمنهن.
نوف بطنها مو جبيرة جايبة وياها فستان بس الثلاثي سجى ورغد وشروق راحن اشترن فساتين وماعاجبهن يريدن مشلتح رغم الجابنهن ما مقصرات
الليل كلة يركصن ماخلنة نام وخو هاي رغد صايرة كلش ماتنجرع وعينها طالعة تركص وتهز لمن طاحت صفح كعدت الصبح راسي مسطور سبحت وزهراء تدفر بالباب تريد تسبح طلعتلها سحلتها.
-دومج لاحكتني حتى هنا يجوز بالغرفة هم تلحكيني
زهراء: -امداج الخايسة ياهو الميت على شكلج تفوو.
عرايس صرنا وبعدنا نتعارك بس صدك تضوجني وين ماروح تلحكني بزعتني رحنا للصالون رجعنا الضهر للبيت تلكنة بالهلاهل والجكليت كعدنا بالديوانية كلش كلش جبيرة تعادل القاعة الولد كلهم مامتواجدين فرغو البيت...
اباوع لبناتنا طالعات لعابات بفساتينهن مكياجهن ضابطاته اكثر من ام الصالون والمصيبة كلهن حوامل يفترن لازمات بطونهن نوف اجت يمي روحة رايحة.
طفن الضوة صار المكان هندس شوية واشتغل ضوة احمر وازرك صار المكان يجنن سجى راحت شغلت اغنية واجت تكومنا طلعت اغنية انت معلم وتكابلن هي ورغد ذني الواحد شيحجي وياهن هسة، رغد تاشر لسجى تكلها...
-لتستاهل طيارة لطيارة شوية عليك
تطير انت في العالي منوصلك يغالي
والي خلك متفهم يجي يوم ويندم
ولتسمع إلى يخدعك انت معلم
سجى تفر علية وتهز جتف تكلها: -والي خلك مايفهم يجي يوم ويندم ولاتسمع إلى يخدعك انت معلم معللممممم.
يهزن وحدة تفتر على الثانية ويسحبنة بالنص ركصتنا صارت مثل بالمسلسلات التركية سجى كعدت بالكاع ثانية رجلها وتفر بالمنديل الاحمر
ورغد فاتحة اديناتها ثنينهن تحوم مثل الصكر
الركص ولا غلطة كلنا صرنا نركص حتى نوف وشروق النسوان الغربة ضلن صافنات علينة
اخر شي شغلن اغنية زينو زينو وهم دبجن دبج حتى حبوبتي دبجت وياهن يمكن هالمناسبة احلى مناسبة صارت لان نفسيتنا كلنة مرتاحة...
كلشي صار يجنن خللي حنة ولفنها بالوردة ولزهراء هم تعبنا كلش يلة كمنا الولد ما اجو لان عباس ما عاقدلي ونزار ما خلاة لان اني موجوده.
بالليل استلمنا حنة الولد هم صارت بالديوانية والوحوش الاغاني نزار يشغلهن ويركص بالنص عباس واكف على صفحة يباوع عليهم وجاسب كاعد بعيد عنهم يدخن اما الباقين يركصون شي وشي تسلم على الخطار...
اخر شي سحبو عباس الولد جان لابس دشداشة بيضة ولاف جراوية على راسة ولدنا كلهم دشاديش حتى انمار لابس نيلية ولاف جراوية نوف تباوعلة وتضحك
نوف: -فدوة الله شكد حلو رجلي اريد ابوسة
سجى: -شو صايرة كلش ماتستحين وعلفكرة رجولتنا كلهم حلوين مو بس انمار
نوف: -علفكرة اني مشفت احد غيري نموري اللطيف
سجى: -خيعونة اي والله
بهلاثناء اجت مريم دافع بينة تكول: -اريد اشوف رجلي يمة فدوة شحلاتة ابو بيتي يخبل.
رغد جانت كاعدة تاكل حتى ما اجت شافت لان بطنها اذتها هاي تحجي عبالها تغثها وهي ولا يمها
اخر شي دفعتها سجى ماخلتها تشوف...
ركزت بيهم سوو دائرة وصارو يلعبون جوبي وماعرف منين جابو مطرب يغني بس مبين سوالف نزار ولدنا مايحبون الطربكة بس هو من زمان كال.
لعبو جوبي واحنة فاكين حلوكنا اكثر واحد ضابطة انمار وجاسب خفاف بطفرتهم والسبح بيدهم فارس شايل ابنة يصور بيهم...
للساعة 11 خلصت الحفلة وكلها طشت جنا ملتمين بالمطبخ ناكل دخلو ولدنا كلهم فارس راح لمرتة يقنع بيها تروح والصبح ترجع وهي تريد تضل شروق ورحمن صعدو سجى طلعت ورة ارفد برا ضل نوف مجلبة بانمار مكزكزة على سنونها.
اما جاسب واكف عيونة على رغد التاكل بالحلويات ومستلذة مندمجة باكلتها وهو مندمج بيها ولا انسى عبسي الماكلني بعيونة عفس وجهة بلطافة شكد احب هاي الحركة كرص خشمي ودنك همس.
-شيجيب باجر وارتوي انا العطشانج من سنين
وجهي صار تطلع منه حرارة صعد فوك من يوم الطلبني ماشفت بعيونة ذيج النظرة القديمة شفت اشوف نظرات عاشك قديم وين جنت عنهن ابد ماحاول يحتك بية يخاف يصير شي بالحرام حتى لو لمسة وهذا الشي الاحبة بية...
رغد
روحي صارت بالاكل اجوع بسرعة وخاصة اذا احجي لو اتحرك جنت كاعدة اكل ومن شفت نوف وانمار صعدو ضليت اني وجاسب المادري من شوكت هنا كمت اريد اطلع اجة صار كدامي سد باب المطبخ اليطل على الصالة والباب الرئيسي سادة ماعرف من شوكت...
تثاوبت وكتلة بنعاس: -وخر انريد نام نعست.
رمش عيونة بثقل بلع ريك وتقرب ابتعد راسا رحت كعدت على الكرسي حتى لايتقربلي رفعت اصبعي وكتلة برود: -كافي مسلتة لاعبالك اتاثر اذا لمستني ونرجع كافي بوية انتهى كلشي ضل شكم شهر وتصير محرم علية اتقى الله ولاتنسى هالشي
سحب كرسي وكعد كبالي ذبيت نفس وخليت ايدي على راسي: -راسي مسطور من الركص والاغاني اريد انطمر مو وكت سوالف
رفعت عيوني الة عيونة على شفايفي ذبيت نفس ورجعت روحي ليورة: -ديلا شتريد بنصاص الليالي.
-مادري شلون اكلج...
-ماريد تكلي شي
-رغد
-خير
-ارجعيلي...
انتي اول واخر حب بحياتي كلبي يدك باسمج وعيوني بكل مجان ماتشوف غيرج تعبتيني ارجعي وارجع شخص جديد مثل ماتريدينة يصير
-جاسب ماكو شي اسمة ارجعي انا مارجع خلص وصلت لنهاية الطريق شلون ارجع للبداية انا لو بالوسط جان رجعت بس هسة لا والف لا عوفني جاسب سالفتنة انتهت.
-وحبي؟ ولهفتي؟ وهوسي بيج؟ ماينتهن صدكي لا دكتور ولا غيرة يخلصني بس انتي تخلصيني تعبت رغد اريد اعيش روحي يمج ماترضة ترجعلي
-كلشي ينتهي ويخلص الحب والكرة والمودة كلشي بهلدنيا ينتهي مثل ماجنت ما اطيقك صرت اكرهك بعدين احبك بعدين اعشقك بعدين رجعت اكرهك تالي صرت ما تعنيلي شي تصدك حتى مشاعر الكرة خلصت وانت هم راح تخلص من حبك ولهفتك.
-رغد ليش كبرتيها انتي خليج بمجاني وشفتي الصار رحتي غبتي تالي اشوفة مو اكول جانت وياة لو بالمطعم كاعدة كبالة ودموعج تنزل شكيت وفسرت كلشي بكيفي عرفت كلشي بعدين وطلع كلشي صدفة وانا تندمت الصار ماينعاد شتريدين انا حاضر بس ارجعي
-تؤ تؤ تؤ ماكو شي يرجع مثل ماجان ابدد ابدد مشاعري ماتت تجاهك من شكيت بية وشككتني بروحي اليحب يسمع من اليحبة اليحب ياذي روحة وما ياذي اليحبة وانت ماجنت تحبني والدليل سويتهن كلهن.
-انسي الماضي انسيج الماضي والله اخليج تنسينة اعيشج اميرة شتريدين اجيبلج حتى مرتي اطلكها بس خل نرجع اشوفج كبال وجهي ما طالب غير شي
-اذا تنسى وجع الحرك الاثر يذكرك بية وانت خليت جويات بروحي لا من الممكن انساهن
-تنسين كلهن ينسن ويسامحن ويرجعن يفتحن صفحات جديده ويبدن من جديد وهنا صاير بيهن الاسوء منج.
-ما راح اكول ماعدهن كرامة لا كل وحدة ونفسيتها وقابليتها على النسيان انا اختلف روحي عزيزة هواي ضحيت بيها ههههه اذكرك النسيتة وبديت صفحة وياك مو نسيت من اخذتني للشقة موتتني كتل لان عرفت عندي علاقة مو هددتني تكل لاهلي وخليتني اكل بروحي هسة اهلي يموتوني مو اخذتني غصب.
اذكرك كبل لانسوي عرس شلون جنت تصرف وياي يكول عبدة عندك جاسب نسيت الكتل الاهانة الضرب تحملتهن لان جنت مجبورة جنت ضعيفة ماكدر انهض نسيتهن وانطيتك فرصة باول شغلة صارت خربت كلشي ورجعت ذاك الوحش
تريدني ارجعلك معناها ارتكب جريمة بحق نفسي شلون اخيلك تبوس الخد الجان حاضن اثر اصابعك شلون اتعامل وياك بدية الاعضامهن رادن يتكسرن
-اسكتي اششش اششس
-شلوون اخليك تلمس شعري الكطعتة بيدك شلون
-اش اشش اسكتي فدوة اسكتي.
-شلون اعاينلك بالعيون البجيتهن دم لو تلمس جسمي الكلة كدمات مو حرام علية ارجعلك نفسي تحاسبني شلون اتقبل سجاني ولك يامرة
تتقبل هالاهانة والظلم انتم لو ما متاكدين النسوان ترجعلكم مافكرتم ترفعون ايدكم بوجهن كافي ضلم المرة لازم تنضرب وتنهان تالي ترجع لان عدها جهال وعيب تصير مطلقة
خاب طز بالمجتمع
وطزز بهلعقول الجاهلة
وطز بالحب اليهين الشخص
وطز بالمشاعر
وطز بكلام الناس.
منا ورايح اي لنفسي وماكو شي فلان اكو نفسي ثم نفسي ثم نفسي
تصبح على ايام ناسي بيها حروف اسمي مو بس ناسيني ونصيحة انتبة لنعمتك كبل لاتطير مثل ماطرت من ايدك مع السلامة.
نو
فتحت الباب واحس شعور غريب انتابني بلعت ريگ وتقدمت ليكدام التفتتلة سد الباب عيونة تفتر بالغرفة واخر شي ركز بذاك المكان الانكتلت روحة بية اشوفة صار يرجف وعيونة جاحظة تقدمت اله لزمت ايدة بقوة ودرت وجهة علية اخلية يركز وياي
-لاتصفن انمار لاتصفن باوعلي هنا هنا.
فرك عيونة وراح كعد على السرير صافن اباوع بالغرفة واتذكر ذيج الفترة من اسوء الايام العشتها هنا هاي الزاوية الضمتني ماخذتني للعتمة هنا خبر موت اخوي وروحي هنا عافني وخلاني وحيدة
نفضت راسي من الذكريات السيئة ورحت حضنتة خليت راسي على صدرة.
رفعت ايدي على كلبة يدك بقوة طبعت بوسة على ركبتة ولزمت وجهة: -نمر حبيبي
-روحة
-احبك اكثر من المر العشتة.
-وحبي الج مايتكدر بشي وعد زلمة انسيج كل مر ضگتية ابدل ايامج السود بايام بيض صافية مثل گلبج
طبعت بوسة على شفتة ودفعتة كمت افتريت بالغرفة اذكرة بالقديم.
-تذكر من كتلك مشط شعري وزمخت بوجهي كتلي ماعندج ادين شكد زعلت بوكتها
-غير انتي تسويلي اغرائات شعرج بية عطر يشل روحي
-امممم لك نمر تذكر من بدلت بالكنتور وكعت على ضهري ههههههههههههههههه اخ بطني والله تفشلت بوكتها.
ابتسم يتاملني اجيت كعدت بصفة وكتلة: -صدك وين جنت تروح بالليل كل ما اكعد الكاك ماكو اعترفت ويامن تسهر.
سحبني علية عاض على شفتة: -لاتغلس جاوب يلة
-اشرد منج غير
-اني عزا شمسويتلك والله اني فقيرة
-اي فقيرة تسوين اغرائات تلبسين تراكات ضيگة وتنامين على وجهج لو تلبسين دشداشة واصلة للستار زرورج يلمعن لمع لو ركبتج تلك لگ خرب غيرتج كوة لازم روحي عليج كلت هاي السالفة ماتفيد اطلع احسن ما ارتكب بيها جريمة.
-هاي شوكت شو ما اتذكر
-حكج بس انا اتذكر اول بت اشوفها هيج كريبة علية، كصيبتها تفتر وراها لو من تنامين كذلتج السودة تنزل على عيوني ماتدرين شيصير بحالي
-بس اني جنت حلالك ليش ماتقربتلي
-خفت عليج ترفة صغيرة بريئة مدللة حرام اعيشج بجحيمي كلشي ما جان من المقام شغلي نفسيتي تعامل ابوي تمنيت عرفتج بغير ضروف
-لنفترض شفتني بغير مكان واني مو بت عمك راح تحبني.
-لا انا جنت مبتعد عن جنس حواء حتى من تمر من يمي بنية ما اعاينلها خاف انعجب بيها والحب يدمرني
-عليك الله شوكت حبيتني
-اول ماشفتج احسج دخلتي كلبي بفطاريتج حبيتج كطفلة
-بس اني ماجنت طفلة والله جنت جبيرة
-بس تصرفاتج تكول طفلة من شفتيني ملثم بالفاتحة ضليتي تبجين يبووو على ذيج الايام
سحبني يبوس بية ويعض بخدي: -رفستي كلبي وطبيتي حتى ما استأذنتي مني.
-هههه واني هم حبيتك اني هواي نمر روحي تعلقت بيك جنت احسك عرف بديرة غرب
-اول شخص يحبني واول شخص اثر بية غيابي
رجعتيني للحياة بعد ماجنت اسير بالماضي وعايش بية صرتي الماضي والحاضر والمستقبل
-وطني ملاذي الامن لاتعوفني
-للموت
-نموت سوى ونعيش سوى
-انجبي يلة انجبي ونامي
-ههههههه نومني يلا خو ما تريدني انام وحدي
-مو تدللين انا الانومج بحضيني.
نمت بحضنة يلعب بشعري غفيت على لمساتة كعدنا الصبح البيت هوسة وضجة صاير خطار وكلها تشتغل
اني ما سويت اي شي رحت اجهز نفسي وي البنات
اخذو العروسات للصالون واحنة بقينة نحضر انفسنا مادري شوكت خلص الوقت رحنا نركض نلبس.
لبست فستان فستقي عريض من جوة بارز بطني رسمت ميكب طوخ ورفعت شعري شادتة خليت شال على متني دخل انمار واني جاي ارش عطر اجة تقدم سحبني عافس وجهة.
-ها حبحب شبيك
-ليش هيج لاطمة بوجهج
-حبيبي لان عرس.
-امسحية شكر ماتطلعين بهذا شكلج لاتعبيني فديوة
-فدوة نموري بس اليوم بعد ابد ما اخلي ميكب فدوة حباب حبحب
-اي حبحب ونموري تطورات صايرة
-شفت بعد ما اكلك انهار نمر نموري احبك چثير الحب
-الحمرة من نصيبي
-لاااااا يبووووو
ماسيطرت على الوضع الحمرة شفطها راح يضحك يبدل واني اعدل بالروج ابد ماصارت مثل قبل
عفست وجهي وكعدت انتظرة اجة ينشف بشعرة ويسد بازرارات الدشداشة تقربت منة اسد بيهن.
وصلت لاخر دكمة رفعت رجلي طبعت بوسة على ركبتة عض شفتة يكول.
-شلون تريدين اعوف العرس واعرس عليج
-لافدوة لاتخرب اللوك بس اني ابوس لتبوس انت
طبعت بوسة وابتعدت لايخليني اتمكيج من جديد
كاعدة اترقب لتفاصيلة الصغيرة شلون يلف الجراوية لو يلبس الساعة والمحابس اخر شي خلة مثل القلم بمكان الجيب البصدرة صار يرش عطر على نحرة
دمعت عيوني واني اشوفة شلون طالع حضنتة من ضهرة...
-لاتتحارشين ماضل وكت للزفة.
-ليش هيج طالع حلو والله اغار واضوج هيج هواي
-ها هسة صرنا متعادلين خو انا لا لابس الوان ولا مخلي شي لوجهي شدكولين لكلبي وانا هيج اشوفج جنج سندريلا
-اميري اللطيف احبك مدري شلون اخليك هيج تطلع
اهتز ضهرة يضحك درتلة يمشط بشواربة برطمت شفتي كوة لازمة عيوني همست: -يلوكلك تصير شيخ
-ااه
-والله شيخ صاك النسوان تضل تسوي طلايب حتى تجي وتشوفك
-وينطوني هدايا نسوان وفصليات
-اي حتى انحركم بگلب بااااررد.
-الغيرة بوية الغيرة
-اصلا اني ما اغار هه منو كال اغار
-اي صح ياهو اليكول مشتعلة نار
عضيتة من زندة بقوة وهو عافس وجهة رفعت حاجب وكتلة: -صح منو اليكول
عدلت ملابسة بحركة واشرش عطر: -يلا حبيبي توكل توكل زفهم وارجع منتظرتك
-على نار.
باسني بركبتي وخلة الشال على راسي لفة خنكني بية غمزلي وطلع طلعت وياة شفتة راح يحجي وي فارس ورجعت لاكاني عمي فايز رحت سلمت علية وصعدت للبنات رغد طالعة لعابة صفنت عليها اصلي على النبي وسجى مو انقص منها...
نزلنا من جابو العرايس من الصالون خلوهن بالصالة كل واحد يكعد بمرتة نزل الكبوس عن وجه هدوة ضحكت اصلي على محمد() هداوي نازكة نازكة من صدك تخبل وزهراء هم تجن بس هدى احلى لان لون شعرها طبيعي...
نزار دخل بالنص اخذ ايد حبوبتي يركص بيها
ويهوس هو وياها...
-احنا الطگينة اصبعنا و حتى الحاكم وكفنا
وصلاوات ماشاء الله بردت العين الحارة
تكابلو يهلهلون والجكليت صار مراكع اول مرة اشوف عريس هيج فرحان ويركص مثل نزار لا والهوسات يجنن.
جدة نوفة: -يالعباس سبع حضوظ حط بيه خسر العافها ورابح الشاريها. سبع ساعات بالصالون لاتلعب بكذلتها
عباس جان هادء مخلصها يعدل بهدوة لفلفها تلفلف حتى شعرة ماطلع منها...
اجو اهل نزار اخذو زهراء يتشكرون منا ونزار جلب بحبوبتي يبوس بيها وهي تدفع بية زهراء حضنت عباس وصارت تبجي وجاسب يسكت بيها ويهدد بنزار اذا يزعلها مايخليهة تشوفة اباوع لرحمن ساحب رغد علية يعدل بشعرها الطالع وهي تنطية جكليت وتضحك...
طلعو ماخذين زهراء كلها طلعت وراهم يهوسولها
-نتشكر من عمها وبوها نتشكر من كال اخذوها
بت عمنا واختنا تصير جنتنا منريد الغريبة ادوس عتبتنا.
وبعد من الكولات والهوسات الجنوبية راحت زهراء من هالبيت مودعينها بالهلاهل والجكليت متمنيلها السعادة وي نزار، راحت امها وياها ونسوان عمي احنا ماكدرنا نمشي لان الشارع كلة زلم...
عباس طلع للزلم بقت هدوة بدلتها البيضة لزمت ايدها عيونها مغوركة باركتلها همست بتوتر.
-خايفة
-اهوو ترى هذا عباس شبيج حباب
-شلون اوخر الخوف هسة هفففف نوف انتي شسويتي بيوم عرسج حتى نسيتي الخوف.
طكيتها بضحكة عالية حتى بطني كامت توجعني من الضحك: -ولج اني جنت مكبسلةلا والنوب كلشي ماعرف عن ليلة الدخلة ولا يمي السالفة
-شلون بخت
بعدنا نسولف والهلاهل اشتعلت من جديد ركزنا بالنسوان وجانت صدمة عمرنا اسراء والتفات يهلهلن ويطشن جكليت.
التفات: -االفففف الصلاة والسلام عليك يارسول الله محمد كلوووووووش.
بهتت وجوهنا كلنة نباوعلهم باستغراب شعجب شلون اجن محد راحلهن هنا سلمن على حبوبتي ونسوان عمي راحتلهن شروق ملهوفة تسلم عليهن اسراء من ورة خشمها تسلم عليها اجن سلمن على هدى نزعت شالي ولزمت بطني التفات تخوز بية
واجت تكلي: -شلونج نوفة
-بخير
-حامل
-اممم شنو تشوفين اي
-حيل عبالي جهالج بالمدرسة هسة بس يلا
ردت اكطعها باسنوني بس مثلت البرود انثر بشعري وهنا يخزرن بشروق بحقد وبرغد كالتلها اسراء.
-ياء رغد عود صدك رجلج تزجج عليج يبوو وين مرتة عاد
اجتهن مرتة يسلمن عليها ويباركلهةعلى حملها نزعت رغد شالها وكالتلهن: -اووف البارحة يتوسل بية ارجعلة يقهر يقهر يكلي لاتطلبين الطلاك بس قراري ثابت جان خطية هالولد حبي مخبلة ههههههاااااي
اول مرة اشوف زلمة يبجي اوووف
سجى: -بعد گلبي سويلة delete (حذف) من حياتج
رغد: -امم exactly (بالضبط).
سجى: -احلى محللة والله ان شاءلله حبيبتي تفتحين مختبر اي صدك بنات ما كتلجن تخرجت واخذت البكالوريوس باللغة الانكليزية ورغد ثالثة تحليلات ونوف صيدلة راح تتخرج وانمار من هسة يجهزلها صيدلية تشتغل بيها وهداوي ثانية فيزياء طبية وانتن؟
ها اي ماكو لا شهادة ولا كذا العيال اولى
وجوهن صارت حمر سجى استفزتهن لا اكثر.
راحن يحجن وي نسوان عمي وشوية اجة انمار ماشافهن ابد اجة علية سحبني يعدل بالشال ويكلي.
-مو كتلج لاتذبينة يابعد روحي منا ولدنا.
-حبيبي اختنكت اني متعودة اللبس مشلتح ما اتحمل هففف
-شفتج رادلها ملص امشي اكعدي تعبتي سحبلي كرسي كعدت علية وابتسم اشوفهن يردن ياكلنة التفت من التفات سلمت علية عيونة صارت بكصتة يباوعلي مطگك عيونة...
-اووي حبيبي هاي التفات الشريرة تذكرتها.
انمار: -خير ياطير شعدجن جاياتنة هم تريدن تخربن البيت وتمشن يمممممة لاتخلنهن ياكلن لو يشربن شي وانتن عيونجن عليهن لايرشن سحر لو يدفنن ولو هنا شاطرات بالمخدرات
اخذني من ايدي صعدني متنرفز يحجي بتهديد
-والله لو يصير شي بمرتي احركجن هالمرة
التفات: -هاي عود كلنا نشوف اهلنا بكلت كلوبهن حنت علينة
انمار: -يتفلون منجن دم ياهو الميت عليجن هسة انتن بعداد الموتى.
اتضح ان محد عازمهن هنا جايات من وحدهن حتى شروق ما كايلة لرحمن، سجى استلمتهن خلتهن يطفرن من الحركة ماضلن ولا تحملن من شافنة هيج
راحن بساعتها كبل لا عمامي يشوفونهن...
ورة العشا صار عقد الشيخ جوة، صعدنا هدوة لغرفتها نضحك بيها ونطلعها من التوتر نزلت لاكاني انمار بماعون سحبني للغرفة يوكل بية اخذني غسل ادية ورجعني استلمني تصنيف...
هدى
دگات گلبي سريعة اباوع لايدي ترجف شصار معقولة الحلم صار حقيقة!
صوت هلاهل يقترب يدل على قربة نهضت اباوع بارجاء الغرفة وين اضم روحي مشاعري اختلطت ماميز شي بس اعرف شي واحد اريد اخفي روحي
عيوني اتجهن صوب الباب الانفتح استقرت نظراتي علية ابتسمت واني احفظ شكلة الطالع يخبل ابتسم بوجهي وندار يقفل الباب وي كل طكة گلبي ينغزني شعور صعب اوصفة...
تقدم باتجاهي صار كبالي وجهي صار بين ادية بلعت ريك ورفعت عيوني بوجهة عيونة تجول بملامحي دنك طبع بوسة بكصتي احس جسمي كزبر غمضت عيوني لازمة ايدة ارجف ابتعد شوية وركز بشفايفي اخذهن صرت تحت سيطرتة فتح السحاب وايدة تجول على ضهري دفعتة ارجف بشكل مو طبيعي.
ابتعد لازم ايدي ويكول: -لاتخافين مني ما أذيج بوية هدوة
ماجاوبتة الساني اختفة شافني ارجف عافني وراح طلع ملابس اجة كال راح اسبح.
طلع وركضت اطلع ملابس نزعت البدلة ولست ثوب نوم ضعت بية همزين بس ادية مبينات لبست فوكة روب مسحت مكياجي مثكل وجهي خو الرموش كوة اشوف من وراهن كعدت افتح بالتسريحة دخل ينشف بشعرة واني الدمعة بعيوني الماشة جلبت بشعري نعلت ام الصالون الف مررة اجة يمي بدون كلام صار يفتح ويشمر متت جوع وتعب وشعري بعد بية ماش.
-يلة شني جعت ماخلص الماش هففف
-خلصت بس جم وحده هسة شلون واحد يحجي على ام الصالون.
-سبيتها كافي بعد لاتسبها حرام
-تستاهل جا هاي دكة دكها بينة
خلص شعري رحت امشط بية احس راسي ينتك من كثر ماشعري مضبوط، اشوفة ضال منتظرني فرش مصلايات واشرلي اصلي رحت لبست عباية الصلاة
وصليت وراة كملت وهو بعدة ماكدرت اكوم مابية حيل خلص وسحب ايدي باسها وكمل يدعي بصوت ناصي...
عباس: -اللهم احفظها وابعدها عن كل مكروة وشر اللهم وفقني لرعايتها يا الله اجعل المودة والرحمة قائمة بيننا بارك لنا في هذه العلاقة وانزل علينا السكينة.
حسيت بالراحة والطمأنينة من سمعت كلامة، راح يفتح الباب واني صفطت المصلايات ورجعتهم لمكانهم ذبيت العباية ورحت كعدت يمة خليت ايدي على رجلة مرتجية علية واغفي كاعدة من غبشة صار يلف وينطيني كوة ابلع اللكمة كملت قبلة ومن ردت اطلع عاف البيدة واخذني غسلت ورجعت.
تمددت على الفراش وبعد مادري شصار كعدت على صوتة يندهني انكلبت على صفحتي.
-اكعدي بوية
-اممم ماروح للمدرسة اليوم المعلمة تغيب كالت.
رجعت نمت واخر شي كعدت حيل لح وياي طفرت عاكدة حواجبي صرخت بوجهة: -ماررروح للمدرسة هي كوة
طاح على وجهة يضحك لازم بطنة هذا شبية اباوع لروحي صخام جسمي طالع سحبت الغطا متذكرة الصار لفيت رروحي بالغطا اعض باصابعي وادك على خدودي هاي اني شبية.
شكد ضل يحجي ولا كمت اخر شي شفتة راح لبست بسرعة ورحت للحمام من رجعت لكيتة كبالي
سويت روحي ماشفتة ورحت للمراية امشط
رجف جسمي من طاوقني اخذ نفس من ركبتي وهمس: -ليش ترجفين.
-لان تتقربلي
-رجفتج شلت حالي وبهذلتني
-امممم
-عطشان
-اكو ماي هنا يمكن
اشرت على الميز دارني علية ونزل عيونة لشفتي ابتسم ومرر اصبعة على شفتي: -الماي مايروي العاشگ وشفاف محبوبة جدامة
-هاا
خلصت الوقت ساكتة اذا احجي كلش اكول ها اي
ماكدرلة كلامة يخجلني شفت شخص جديد عاشگ.
اليوم السابع إلى جان اسبوع غير وي عباس خاف جنت احبة هسة هايمة بية متت بتعاملة واهتمامة وخوفة علية جمع بين كل الصفات شايل هم شلون يلتحق واضل وحدي ولا يكول ادري بشغلة.
للعصر سوينة حفلة بنات ونوف باجر ترجع لبغداد
عزمنا زهراء جابها نزار سلم علينة وكال...
-لا تعبن زهرتي ديربالجن عليها
سجى: -شكالولك نطلعها عمالة لاتخاف عليها هي بايدي امينة
نزار: -لسان دلالة ماحجي وياج.
طلع ولاكاة جاسب سلم علية نزار وكلة: -جبت اختك شوفوها عدل ترى بعد ماتشوفونها مكابلها وكاعد لافها لف بحضيني
ضرباة جاسب راجدي طير وجهة لزم خدة نزار وكلة
-لخاطر زهرتي ما حاجيك اتجاوزك
شمر بوسة لزهراء وخلة جاسب يفور، خلصنا الحفلة تونسنا وسجى استلمت مريم وعبير جلطتهن...
مرت الايام هادئة ومليانة حب صرت اشوف الدنيا وردية بوجود عباس، امي لحد هذا اليوم ماتحاجيني.
عفتها براحتها بيوم يلتحق عباس ضليت الليل سهرانة وياة اريد اشبع منه شوف اجة الصبح حضرتلة كلشي رغم الغصة بلعومي بس مابينت
خطية هو ماقصر جابلي ثلاجة ترسها حلويات واشياء احبها خاف محد يجيبلي وانطاني مصرف وراح...
رجعت لغرفتي ضايجة هاي كل مرة هيج اضل كالبة خلقتي من يروح نمت وكعدت على صريخ رغد.