رواية بين سلاسل العادات للكاتبة كفاية كاظم الفصل السابع والخمسون
ما ينسد مگاني منين مثلي تجيب
رغد
بيدي قلم اكتب كل شي صار وياي وصلت الى ماعلية تركت القلم ورجعت للبداية ابتسمت بحزن، منو متخيل النهاية هيج تكون! محد اكيد ونهايتي راح تكون مختلفة لكن بعد ما تشرق الشمس بولادتي بعد ما احتضن طفلي لصدري.
كبرت بطني ولحد الان ماعرف جنس الجنين خليتة مفاجأة، رحت اجهز نفسي للولادة وشروق اجت وياي وسجى من سمعت بينة دكت رجل رحنا تلاثتنا نحضر لاطفالنا سجى اشترت جهاز لبنتها وشروق لابنها واني بقيت محتارة اخذ ملابس ولد لو بنية.
سجى: -شني من كلب عندج يعني اكو وحده ماعدها الفضول تعرف البطنها شني هسة ديلا شتختارين انا اكول اشتري مشكل
شروق: -لا خل تاخذ ملابس ترهم للجنسين هي بناتية ولادية.
فعلاً اخذت ملابس للجنسين ترهم جهزنا كلشي نحتاجة ورجعنا للبيت.
غسلت وارتاحيت صاحتلي حبوبتي رحت كعدت يمها جانت تسبح بالسبحة.
-ها حبوبة ردتيني
-من زمان رايدتج بس هسة وكتها يحبوبة راح تجيبين ورجلج يريدج ارجعيلة يحبوبة لو مو لاجلة لاجل ابنكم
-جدة ماكدر شلون ارجع على شريجة تحرك بدمي افهموني انتهت سالفتنا من اتزوج وفضل وحدة علية لو ما متزوج بيها باب وجواب بس هسة مستحيل ارجع مو انا الترضة بالشرج.
-الشرع محلل اربعة يحبوبة والمرة ما تاكلج هي بيت وانتي بيت
-االشرع حلل اربعة اي صح لكن لعدة اسباب ومنها
اكثار النسل، اذا كانت الزوجة مريضة او غير قادرة على الانجاب او كانت غير مطيعة ومهملة تجاة زوجها وبعد اسباب الشرع ما كال للرجال روح تزوج ومرتك صغيرة وبطاعتك وكلشي موفرتلك
جاسب ماعندة اي حجة حتى يتزوج علية هو راد يحرك گلبي ويكسرني وما عاش اليكسرني.
خل يعرف خيري، من تزوج على وانا عروس بعدني وين راد يوصل؟ شني غايتة؟
معروفة واضحة غايتة يكسرني مو شلون ارجع اعيش وي واحد من البداية كسرني وهانت علية دموعي هو مو اختار مرة غيري خل يعيش وياها انا ما ارهملة زوجة والطفل يربى بين اهلة مو عد غريب
-يجدة تضلين طول عمرج راكبة راسج اذا ما رجعتي هسة ترجعين تالي
-صدكي ما ارجع لا اليوم ولا باجر اريد اعيش لنفسي وابني واول ما اجيب يطلگني ماريد اضل على ذمتة.
وصليلة هذا الحجي
-الله يهديكم
غصة بلعومي هالموضوع خانكني شلون اشرح مشاعري منو اليفهمني كلها تحجي علية لان محد عاش العشتة محد حاس باحساسي.
كالعادة ختلت بنفسي حتى احجي وي طفلي لان هو الوحيد الشهد على كلشي و يسمعلي بانصات.
-حبيبي لاتضوج مني ابوك ماكدر ارجعلة بس ما راح احرمك منة ابوك ضلمني وماقدر مشاعري محد يفهمني والله جنت احبة اي حبيتة هواي حبيتة ما انسى شلون هو ينام وانا احفظ بتفاصيل وجهة حبيتة بس شلفايدة حرگ گلبي والحب صار رماد
دموعي اخذت مجراها امسح على بطني احس اني مو وحيدة اكو شخص وياي وقريب مني شكد ماكرهت هالحمل حبيتة حسيت اكو شي إلى خاص ما راح يجي يوم ويفرط بية...
ذبيت حسرة اباوع بالغرفة فارغة وين جانت صوت البنات عالي هنا سجى تسولف علية هنا زهراء هي وهدوة يتعاركن هنا نوف مامتعودة على جونا كلهن طشن استاحشهن كل يوم احنلهن واتذكر سوالفنة
نمت والدموع على خدي داعيتلهن بالراحة والسعادة
صرت احس برفسات والم مو طبيعي قربت ولادتي اي قربت الايام الحلوة، وبيوم الالم موتني كل مرة اكدر اتداركة هالمرة ماكدرت وصرت اصيح بصوت عالي على اثرها الكل التم حولي...
لزمتني شروق تبجي ولازمة بطنها من حركت كلبي صحت بيها: -شبييييج تبجيييين انتتي ااانا الجاااي اطلككك
-خايفففة ررغدد ررااح اوولد يمكن
-امشييي وليي منييي بعد وكتتت
لبست شلون ما جان وغراضي كلها مجهزتها روحي تطلع وترجع اريد صرت اكل بيدي من الوجع ولسوء الحظ جان اجازة المجسب واجة ملهوف علية ومن شافني تخبل واني تخبلت من شفتة صرت اصيح بحركة ودموعي تصب.
-ااالمنننن جاااايني تحللللم انطييييك الطفللللل اكتتتلك اااموووتك بس تلزززمة رررروح من ووووجهههي
ما حجة ولا كلمة اخذني سحلني لا اجيب بالطريق بين ماوصلنا المستشفى علية ذنب بعد ماسويت الاجراءات المطلوبة دخلوني لصالة الولادة
شفت الموت بعيوني بس بعد الالم مكافأة جبيرة.
سمعت صوت طفلي ابجي وياه والدكتورة تصيح ادفعي بعد اكو طفل ساعات مميتة لكن تستاهل لان العوض جبير دموعي ما وكفت من الفرحة ولدت طفلين وبلغوني ثنينهم ولد...
بعد مرور ساعات.
روحي تلوب على شوفتهم اريد اشمهم احضنهم اشوف شكلهم اهلي دخلو باركولي واني الح اريدهم خفت صاير بيهم شي وتخبلت من شافو حالتي كالو دقايق نجيبهم من الخدج وضعهم ممتاز وهما بصحة جيدة وكاملة ايامهم...
دخل جاسب شايل طفل مديتلة ايدي خلاة بحضني بهدوء اخذتة لصدري شميتة وشهكت: -يابعد روح امك نورت حياتي
جان طفل صغير حتى عيونة مامفتحهن بس سبحان الله الزرع مشاعر عضيمة تجاهة يكول اعرفة من زمان وهيج حابتة رفعت عيوني لجاسب الجان وجهة احمر وصافن بينة: -اسمة حيدر وين كرار جيبة حباب اريد اكحل عيوني بية
جابت عايشة الطفل الثاني رادت تاخذ حيدر ماقبلت خليتة على جهتي اليمنة وكرار على جهتي اليسرة.
شميتة وبستة رغم صغرة ابتسمت ودموعي تنزل
-يمة حيدر انت يميني وكرار انت يساري مبارك إلى ومباركتكم بداحي الباب اريدة يحفظكم اورثو الشجاعة منة والعدالة
جانو نسخة اخذوهم مني وخلوني ارتاح بعد ماخلص هاليوم الجان من اجمل ايام عمري وانظمام حيدر وكرار لحياتي، رجعت للبيت وجاسب ذبح خروفين وبيومهة صار عرس هلاهل وجكليت واصدقائة يرمون فرحانين والكل صار يصيحلة ابو حيدر.
فرحتي ماتنوصف نسيت الالم ونسيت كلشي حايرة بيهم وحبوبتي كاعدة يمي تعلمني عليهم وشلون ارضع صعبة والله اخاف ما اسيطر.
الحمدلله مر اسبوع وتعودت عليهم وصحتي تحسنت
جاسب يجي بشكل مبالغ بية يكعد يمهم يباوع بشكلهم مطلع ايد حيدر وهو ساد ايدة على اصبعة
جاسب: -رغد شوفي شلون مجلب بية شوفي شوفي مبين يحبني اندارلك سبع فدوات بوية حيدر.
اتجاوب وياة بقدر مقدرة وضعة وهو ابوهم واول اطفال الة مخليتة على راحتة وياهم بس من يحجي وياي اغلس عنة.
جاع كرار وصار يصرخ انطانياة وضل كاعد يمي
-خير يلة اطلع
-ليش
-اريد ارضع شني الليش تريدني ارضع جدامك!
بلع ريك وطلع رضعتة وغيرتلة كمطتة ونام ورة بربع ساعة حيدر صار يبجي وهم رضعتة حيلي راح كل شوية يجوعون شكلتلهم حليب يساعدني بالليل
اذا بجو ثنينهم...
طلعت اغسل ملابسهم ولاكتني شروق وجهة احمر ورحمن وراها رحتلها مبينة عدها ولادة.
-ها ولج يوجعج شي
شروق: -اي شوية مدري شلون
-روحي للمستشفى
-لا بعد مو هسة الوجع مو قوي
رحمن: -اكلج رغد هاي راح تكمل التاسع وماكو ولادة
شسوي
-احمي ماي حار ولدها صير ام زكي سهلة مارادلها شي
-شكد طايحة حظ والله لو مابعدج نفسة جان عرفت شغلي وياج
رغد: -من هسة خوية تغيرت نفسيتك بسيطة رحمن اروح لفارس اكعد بيتة اكلة اخوي طردني انا وجهالي.
-بدت رحمة الله ولج شطرد شلون يصعدن السكر عندي هسسسة شسووي ولج الفرررخ لززك بطنهااا
-يابة اخذها وخلصنة
شروق دكت رجلها ماتروح تكول بعد وكت الدكتوره انطتني موعد اروح بية ثاني يوم صار عندها وجع رحتلها حاضنة رحمن وتناشغ.
شروق: -انت تحبني مو
رحمن: -روحي من الدنيا اعشگج
شروق: -رررحمن حبني حبني اموتك يو ما تحبني
رحمن: -انا اموت لو ما حبج
-مو تزوج يو متت فدوة رحمن.
رحمن تسودن من سمعها هيج تحجي صار يرجف الزلم ماترجفهم غير النسوان هسة مدري اضحك عليهم مدري اضوج شالها بحضنة واخذوها للمستشفى ضلت للعصر حيل يلا صارت عدها ولادة
الفرحة فرحتين صارت اجت سفانة لزمت المطبخ طلعت على الريحة كل جدر والاكبر منة صبتلي وكعدت اكل خاف كبل جنت اكل ماعون هسة ثنين
رجعت صبيت ماعون ثاني ودخلت مريم سلمت وكفت تباوعلي...
مريم: -ما شاءلله شهيتج مفتوحة عكسي كلشي ماشتهي والجالي موتني.
رغد: -قل اعوذ برب الفلق
تركت الماعون وكمت دخلت جوة انسدت نفسي هدوة كاعدة يم الجهال حتى تنام يمي من ماكو عباس.
هدى: -شبيج كالبة وجهج
رغد: -شلون ناس غثة حاطة عينها حتى على لكمتي بت المسموط
هدى: -اهوو هم هاي الغثة كل ما اشوفها معدتي تكلب اشوف بيها وسن
-شلون شكول يبوو شذكرتيني.
-المصيبة ما ناسيتها ولج اتخيلها هي وعباس وامووت احترك رغم هي مطلكها وهسة يمكن تزوجت بس اتخيل جان ينام وياها اشعوط مرة سالتة سؤال بايخ وتخبل على والله صعبة يبوووو
-شعور مقرف مو
-كلش كلش والله حاسة بيج يعني ينام يم مرتة ويجيج يعععععععع
عفست وجهها لعبانة روحها ماتحملت وطلعت تركض ذبت من راسها اجتني وجهها اصفر تحجي على وسن ومريم.
-يمعودة طلعيها من بالج حرام مايصير هيج تفكرين.
-مو بيدي يحترك كلبي امداج رغد اذا رجعتيلة وتخلين هاي العكروكة تحارك بيج واليوم يومي تصيرين استغفر الله
-هذا السبب الخلاني مستحيل افكر ارجعلة اشتري راحت بالي واخلص
اجت سفانة شايلة صينية: -مو مساع اكلت المن متعبة روحج وجايبة
سفانة: -ما اكلتي زين
-يلة ناكل سوى
كعدت هدوة وجهال سفانة اباوع لعلي يوكل باخوة وهو يريد ياكل وحدة.
علي: -يمة صيحي بية راح يحوسنة حوس يوصل المرك للحايط.
سفانة: -عوفة ياكل وحدة اغسلة بس يخلص
علي: -ماصارت هاي كل شوية يوصخ روحة كلة من وراج خلية ياكل وحدة وعلمتية يلة ماياكل انا اوكلة الرضة والما رضة
صار يجيب ويخلي بحلكة وذاك يصرخ يرد يلعب بالخاشوكة سفانة تباوعلهم وتاكل مالها غرض وجنها تعرف الراح يصير امير استسلم وصار ياكل مطنكر
ويخزر على بحقد وهو ملامحة جدية يكول ابوة.
اول ماشبع طلع يركض وعلى وراة ابتسمت وباوعت لجهالي: -فدوة شوكت يكبرون وهيج يصير يتعاركون ولو هسة هما مامقصرين
سفانة: -يكبرون هههه على مريحني ومفكرة احبل بس اخوة يكبر
-ادري كل يومييييية حبلة خلي الجهال يكبررون
التفتنة لسجيوة واكفة بالباب مخلية العباية بطرف راسها وبطنها كدامها سلمت بطرف ايدهة وكعت تاكل لا حس ولا نفس.
هدى: -اكلج شني ماعدكم اكل ذبيتي روحج على الصينية اليشوفج يكول جانت بحصار التسعين.
سجى: -شلون اكوم ادفرها اسكتي عني اسكتي
-سلامتج خية اشوفج مدخنة
-تعاركنة اني والاملح
-مو شي جديد كل يومية تتعاركون
-هالمرة العركة تختلف لج گلب علية يكلي ماتسمين شام شني هالاسم غيرية مو عيب علية هذا الاسم جنت مختارتة كبل لا اشوف وجهة الاملح تالي اغيرة
-وين وصلتو اختاريتم لا
-كتلة اسميها ريم وافق
-حلو اسم ريم
-لج كبل كال اي حتى ما ناقشني حسيت بية عندة حبيبة اسمها ريم وتعاركت وياة.
-والله ادورين المشاكل يعني الا عندة حبيبة الاسم حلو ديلا اتوكلي بالله وسميها ريم وفضيها
سكتت تهز براسها كملنا اكل وهدى راحت تغسل مواعين وسجى مخلية حيدر بحضنها وصافنة بكرار
-اكلج هذا ياهو وهذا ياهو يمة نسخة شلون تميزين بينهم
-اكو فرق بس بسيط محد ينتبهلة غيري
-ذولة من يكبرون يخلسون الواحد ويشككونة بروحة
ردت اكلج اريد نسيب بس تذكرت نسيبي موجود عليوي الحنين ذولة يطلعون على جاسب شايلين خشومهم.
-خو يطلعون علية حبابين
اجت هدوة تخابر بزهراء من شافت اللمة كالت اجي بس تجي شروق جابو شروق واستقبلناها بالصلاوات رحمن طاير بابنة سماه رضا شلون طفل هاااادء
بشكل عجيب طالع على امة.
سجى بقت ينمة تخلص اسبوع لان ارفد عندة شغل محافظات ضلت يمي ونستني ولو تجفص بالبطن.
كاعدين كلنا حتى سفانة يمنة نست بيتها. تسوي تمر
وهدوة تحضر صينية حلويات وفواكة.
سجى: -خاااب هيووو وين وليتييي مو الفررخة كامت ترفس تكول خالتي مااتت عاشت
رجعت اندارت علية: -اكلج رغد ما تعبين من جهالج واغ ويغ يدوخون
رغد: -اصواتهم نغمات موسيقية تطرب اذني شدكولين انتي
-تحبينهم؟
-روحي من الدنيا بدي اضل مكابلتهم ما اتحرك
دنكت اشم بيهم وهي صافنة علينة: ؛ عن قريب راح تجربين هالشعور راح تحبينها اكثر من رجلج
-خايفة انا شني اريدها تضل بطني احس ما ماثرة علية
-افااا انتي تخافين والله وكت.
-لا لا مو اخاف بس هيج مدري شلون ديلا اريد اكل اسكتن لا اكتل ارفد على هالدكة الناقصة هسة كايلتلة يخلف انا اعلمة بس اجيب
-نشوف خية
جابت هدوة الصينية وصارت تاكل وعافسة وجها اعرفها ضايجة وتريد تعارك بس ويامن جانت هدى تاكل وتوكل جهال سفانة.
سجى: -لج عوفيهم ذولة نسابتي لاتخلين عينج عليهم تلوكي لجهال رغد
هدى: -اهووو والله عندج سوالف هسة ياهو اليفكر نفسج
سجى: -بيا شهر ولج.
رفعت راسها صافنة بوجهها علت صوتها وعدلت كعدتها: -مو احجيي وياااج بيا شهرر
هدى: -شني بيا شهر
سجى: -حامل شكد الج
هدى: -ياااء مو حامل شبيج منين تجيبين الاخبار
سجى: -سويتلج سونار بعيوني هسة انتي حامل
هزت ايدها هدى ورجعت تاكل سحبت الماعون من كدامها وضلت تحسبلها هلهلت واحنا نسكت بيها
-يابة حامل شني سوناري يجذب مو عيب وانتي زهيران هم مبينة حامل هذا نزار ملطلط وكاعدلج كعدة حامل بالخير.
خلت البنات مصوفرات وهي تاكل سفانة تنوم بامير كالتلها: -ما تاخذيلي سونار شوفيني حامل لا
-علي بيك حيل تحتار باخو صغير
علي: -ماريد اخو اريد اخت بنية هو انتن ما تجيبن بنات عود ليش؟
سجى: -لاتخاف موتك بالحفظ والصون معليك بالباقين عود ياخذون غريبات هسة تريد اخت مو
علي: اي وعلى ادللها اشتريلها قراصات واسويلها كصيبة.
سجى: -راح اجيب البت كامت تزاكط تريد على سفانة شدي حيلج هالايام اكو حمل وبنية هم يلا على اجتك اخت
رغد: -بعد مانروح نسوي تحليل ولا سونار سجيوة موجودة اكلج خليني سكرتيرة عندج
سجى: -يلا انتي سكرتيرة عندي وجهالج يفترون على المراجعين خالة احنة ماناكل ولا نشرب راح نموت من الجوع الناس تنطيهم فلوس وانتي تشتغلين عندي طكيتي.
صدك جا انمونة نفتح عيادة وهو سونار وتفرينة وانا اذا اعرفلة اعرف بنية لو ولد من شكل البطن
رغد: -دنطيني اكل تمر زين لحليبي
اخذت اكل وشوية واندك الباب صاحت ادخل عدلت شالي من دخل جاسب تحمحم وكال: -اريد اشوف الجهال
سجى: -هسة كاضينك ما تشوفهم
خزرها ودخل كعدت يمهم اخذ حيدر خلاة بحضنة يمرر اصبعة على خدة ويشم بية.
سجى: -اي جاسب شلونك شخبارك
جاسب: -السؤال الصح من الشخص الغلط.
سجى: -هسة مو زين اسال عليك ضال بالدار المهم ما كتلي وين مخلصها صدك مرتك بيها ولد بنية؟
سكت ورة دقايق كال: -بنية
سجى: -ياخيرك يا ربي صارو عدك تلث جهال بس خطية ذولة بعيدين عنك
ضل يهز برجلة ويفتح بكماطة رجعت حجت: -خاف نسيت ماضل شجم يوم ويطلع اربعين رغد عود حضر روحك مو تنسى
ما جاوب ولا بكلمة رجع حيدر واخذ كرار شمة وطلع ماخذ على وياة سفاتة ضلت تحجي على سجى ماقابلة واني بينهم ساكتة.
سفانة: -ترة خطية شبيج وياة بالزايد تحركين كلبة
سجى: -لان يستاهل محد كلة روح اتزوج محد يعرف جاسب بكدي لج جان يموتها جواة خاف نست انا ما نسيت
رغد: -لا مانسيت ولا راح انسة كلة كم يوم وتنتهي القصة
غيرن الموضوع سجى من حقها ما الومها من هيج تعامل جاسب لان هي شاهدة على اغلب عركاتي ومعاناتي وياة محترك كلبها علية...
ملتهية بجهالي اغسل وابدل وارضع اهتمامي وقتي كلة الهم نورو حياتي الجانت طافية جاسب ما عايفهم كل يومية يجي اعوفة يمهم واطلع من يصيحلي ارجعلهم وهاي مخلصينها...
شروق متبهذلة برضا بس يبجي وهي روحها بايدة كابلتة وضلت تبجي وياة اخذتة لحبوبتي لكتة ممتون ردتة يلة نام اثاري الفاهية ما تكمطة وهي وابوة يشيلونة هيج فانمتن...
بستة برقة واخذتة لغرفتها فتحت الباب برجلي ولكيت رحمن يمها حاضنها يبوس براسها ويكللها.
-شروقي لاتبجين فدوة
-تعبت والله ماعرف شبية بس يبجي
رغد: -غير ما تكمطينة من وراكم مخلوع متنة بعد لاتخلينة هيج محلل
جان نايم خطية خليتة بكاروكة ردت اطلع ورحمن صاحلي: -ها رغدة شلونهم الجهال
-الحمدلله بنعمة
-خو ما متعبيج
-شوية هاا مو هواي فدوات الهم تعبهم يهون
-اشتاكيت الهم ماشفتهم انزل اشوفهم.
باس ابنة ونزل وياي خطية رحمن كل مايجي من الدوام يجي يشوفهم ويلعب وياهم تعلق بيهم كلش شكد افرح من اشوفهم هيج...
كعدت الصبح وسويت روتيني غسلت لحيدر وبوطرتة كمطتة ورضعتة من شبع رجعت لاخوة سوبتلة نفس الشي شلت حيدر انطيتة لحبوبتي حكمة ورجعت لكرار لنوفة اخذتة تغنيلة.
سويتلي ريوك وكعدت اكل رفعت راسي لصوت نزار جاي هو وزهراء سلمو وكعد زهراء بقت واكفة سحب الخبزة من ايدي وكال لزهراء صبيلي جاي.
زهراء: -مو تريكت
-اشتهيت شلون بلة هاي رغد تشهي من تاكل
رضية: -كون يسمعك جاسب
نزار: -النية النية جا ماتعرفوني وتعرفون تفكيري.
جابتلة كلاص جاي وكلشي ماخلة اكل الريوك كلة
ضليت خازرتة بحقد بعدني جوعانة.
نزار: -يلا يلا تعوضين لاتحطين عينج هسة ترجعين تاكلين صدك يكولون تاكلين الاخضر واليابس
-هذا يا جلب كلك هيج
-الجلب وراج شخصياً بس مايعض بية ابو صفار
ضحك واني ضحكت وياة ضربتة زهراء على ضهرة
زهراء: -ها تحجي علية بعد مارجع يلة روح تابع مسلسلات وحدك
نزار: -اي ومن يصير اعلان شسوي
غمزلها وهي صارت حمرة وتضرب رجلها بالكاع.
زهراء: -ما ارجع نزار بعد انساني اضل يم رغد وحهالها
نزار؛-تاكلج بس تجوع انا ما اكل لا زهرتي اليوم تبدي حلقة جديدة من المسلسل تفوتج
زهراء: -عادي اشوفة هنا
نزار: -غير ما ينشرونة بس لخاطري يدزونة إلى والا هو بعدة مانازل على الشاشة
رغد: -گبينة يمة احتريت احتريت غدي شلون سوالف تنكط.
نزار: -كملي شتنكط عسل مو اي طبعاً عسل مثلي
كمت اغسل الصحون ودخلت سجى كام نزار يسلم عليها وكان صار اجتماع العمالقة...
سجى: -لككك هلا بنزار قباني
-اهلا بام الجمال الرباني هستوها نورت الدنيا من اجيتي
-بوجودك منورة يا هلا ومية هلا بيك ولك صاير، تخبل شني هاي
-الزواج يسوي الواحد حلو
كعدو يسولفون وكانهم صارلهم شكد ماشايفين بعض
اخذت كرار يبجي رجعتة لمكانة هزيتة وخليت بحلكة الملهي سكت دنكت بستة: -بعد روحي ماتدرون شكد احبكم يساري انت كرار يمة
زهراء راحت للدكتورة واخذت امها وضلت سجى تحوم على هدوة تكلها حامل وذيج تكول لا.
سجى: -هسة انا راح اجيبلج تحليل وانتي جربي شتخسرين
هدى: -متاكدة مو حامل شبيج
رغد: -هسة انتي شخسرانة دجربي
راحت سجى وصت الجهال كالو الصيدلية معزلة هسة اجلتها للعصر قبل الغدة اجت زهراء وجهها احمر خفنا بيها شي ومن سالناها طاحت دموعها وكالت...
زهراء: -صار فترة احس لويات بطني والالم كلت تنطيني علاج حتى يروح بس كالت انا حامل صارلي شهر
طفرنا من الفرح وهي تبجي: -ولج ليش تبجين.
زهراء: -ماريد شني بعدني زغيرة مو هسة
سجى: -والله عيارات التزوج شيجيها ورث لو كنز هو فرخ تالي يسون رواحتهن زغار اذا زغار شكو تزوجتن صغار كال صغار
رغد: -على كيفج وي البت يبوو عليج بس ترزلين
سجى: -يحركن الكلب هسة صارت زغيرة وماتريد اروح ابارك لزار قباني
هدى اخذت زهراء تسكت بيها وسجى راحت لنزار طلعت اشوف ردة فعلة.
سجى: -مبررروك يابة شايف كل الخير
نزار: -اشكرج سجيوة الورد رحمة الله والديج وجزاج الله الف خير.
سجى: -ترة جاي اباركلك ما مجيبة مرتك
نزار: -خاب فرحان مدري شلون اشرحلجن يبووو راح يصير عندي زعطوط واخيراً مو بس انتن عدجن زعاطيط ولجننننن هلهلننننن نزار راح يصيررر ابووو
هلهلنة ثنينة وهو طاير من الفرح الكل يباركلة ومستحيل اذا ما ربط المسلسلات بحياتة...
نزار: -جنت من اشوف البطل يفرح يو صار عندة فرخ
اكول تمثيل وين اكو هيج طلعت صكد بووية اريد اركص كون ردح حتى احس بروحي فرحان.
رضية: -استر على روحك لا تصير بالنعل وتطلع الفرحة من خشمك
نزار: -يلا رايح للبيت وافرح يلا زهرررة امشينة نرروح
عايشة: -الدكتورة كالت رادلها راحة حملها ضعيف خل يصير شهر واخذها
نزار: -لا عمة على بختج شني شهر ما اكدر يو ما اشوف وجهها الاصفر اريدها فدوة صيحيها
رضية: -ولك تكلك يطيح الفرخ وفرحتك هاي تتبخر وانت بكيفك خليها بس يثبت واخذها
خطية شكد ضاج انطاها فلوس وراح ضلت هي فاتحة حلكها وراة...
-خطية ضاج لان راح تضلين
زهراء: -جا غير متعود علية شوفن هو يجي من الشغل يسبح ويجي وياي نسوي غدة سوة وناكل بعدين ننام وللعصر نسوي جاي وكعك ونكعد نتابع مسلسلات ورة العشة يطلع شوية ويرجع هم نتابع مسلسلات يعني ابد ما يفاركني
سجى: -راح ابجي شلون قصة تبجي المطي بس حلوة حبيتها.
ضلت زهراء يمنة بهاي الايام شكد فرحت لان كلهن موجودات سجى جنها العريف شلتاخ ماخذة البيت فرران الجاهل صايحة بيه الجبير مرزلتة ما مخلية كلها تصيح شوكت يجي رجلها ونفتك منها...
كاعدة يم شروق تعلم بيها على ابنها وكل شوية ومرزلتها خطية شروق لاتعرف تبدل لابنها ولاتسبحة خلفلة على عمتها...
كاعدة انيم بجهالي واجتني سجى الضحكة شاكة حلكها وطك اصبع: -مصيبة جديدة مو
سجى: -لاعععع ولج هديوة حامل هههههههههه.
رغد: -صلوات اخذتيلها تحليل
سجى: -اي الفاهية الخط واضح يعني من زمان حامل
الله شلون سنة كلها حمل ولادة ياخيرك ربي جهالنة كلهم نفس الكصة بس من هسة جهالج يحترمون بنتي ويحسبونها اختهم يشترولها ويدللونها
رغد: -ادللي انتي وريم الفلا بعيونة نخليها.
مرت الايام جهالي ماخذين كل وقتي سجى رجعت لبيتها وهم خطية ثكلت من الحمل شروق ابنها نشنش وحبوبتة تموت علية حتى بالليل يعوفونة يمها، زهراء وهدى النساوة لاعبة بيهن لعب وحدة اخس من الثانية...
لكيتهن صايرات من الروس وخطية زهراء كالعادة مسحولة فاككتهن كوة علي.
-شبيجن تتعاررركن ماتستحنن نسوووان صررتن.
هدى: -ترررة ماصارت هاي بكلشي وياي حتى من اشتهي شي هي تشتهية تلعب روحي تلعب روحها ساعة السودة من حبلت وياج والله لو ادري بيج حبلة اشرب حب مانع وافتك منج هسة من يصير عندي طلوك هي هم ونولد بنفس الصالة حتى انتحر
متت ضحك عليها تحجي بحركة ودمها فاير وزهراء تشيل بروحها وتركعها.
زهراء: -وانا شعلية هو الله هيج كاتب قابل انا رحت حبلت عمدة.
ماكو دقايق ورجعن، طلع اربعيني والدوام ما ضلة شي ويبدي مريم بطنها كبرانة وكل ما اشوفها واتذكر هي شريكتي اموت حركة ليش بعدني بعز شبابي وضرة فوك راسي شلون اتحملها عمر كامل راح اهلك روحي وحتى جهالي وياي مالي خلك هي مال حب مو دست على كلبي شني حنيت لان شفت تعامل جاسب وي ولدة...
كبل لاارجع احن خل افضها وبيوم حضرت روحي ادري هسة يجي ماكو دقايق واجة سلم ويحاول مايباوعلي هواي راح لجهالة خلاهم بحضنة يلعب بيهم استغرب لان ماطلعت وكانة حس على الشي الراح احجية دنك راسة مايبين بس واضحة رجفة ايدة من يلعب بالجهال...
-طلع اربعيني طلكني جاسب لهنا وخلص ماكدر اتحمل فكرة رجلي متزوج علية انت تعرف كلش الزين علاقتنا انتهت من تزوجت بعد لا تماطل ما راح يتبدل شي لاتخليني احرك بدمي واقارن روحي وي الجبتها علية ماناقصة حركان كلب لو ضالة بكلبك تجاهي ذرة مشاعر ريحني وطلكني...
-يجرالج العصر حضري روحج
يريد يرفع الجهال ماكدر خفت لايوكعون تقرب اخذتهم من حضنة اباوعلة مغمض عيونة مثل اليستنشق عطر حسيت على روحي وهو كام.
ساعات ماكو ساعات وجاب الشيخ محد يدري وكلها تفاجات الكل ماقابل وخاصة بعد ماصار عدنة جهال بس ماكدر والله كرامتي ما تسمحلي ابقى على ذمتة وهو يطب ويطلع على مرتة...
لبست عباتي رافعة راسي واتضاهر اللامبالاة قبل لايحجون اهلي ويعارضون صار الطلاك اباوعلة جان مو طبيعي كل جسمة يرجف وجهة يصب عرك.
من نطق الطلاق صوتة يرجف اشوف الكل منقهر ومتعاطف وياة حتى اني لحضة كسر خاطري بس يستاهل من ايدة هو خرب كلشي وكسر روحي والكسر بعمرة مايتصلح...
تطلكت وصار عندي تنافض عجيب شكلة مايروح من بالي ومن هذا اليوم اختفى حتى جهالة ما يجيهم ومرتة عد اهلها...
فترة اسبوع وتجاوزت الصار هو هذا الردتة على شني اضوج وجهالي نسوني كلشي بضحكتهم ترد روحي احلى فقرة من اقفل الباب واحللهم اباوعلهم يتكافشون واضل ارزل بيهم.
-عود هاي يمكم كاعدة وتتعاركون لو اكوم شتسوين ادبسززية شلون اداوم واعوفكم سوة ها انتم ماتستحون يميني (حيدر) اعتذر من اخوك وانت يساري(كرار) بعد لاتمد ايدك علية
بعدها ارجع اكمطهم وارضعهم تالي اتمدد بسدهم اقرالهم قصص حافظتها من جنت صغيرة...
-وتوتة توتة خلصت الحتوتة تصبحون على خير بعد روحي.
-تعاال لا تروح وتعوفني
عباس: -صخام بوجهي كون مو تكولين ماريدك
-مو انا هذا ابنك مايريدك يكرهك انا احبك اموت عليك تعاي لحضني
اجة تقرب طالعة روحة حضنتة وبستة بركبتة: -عبسي لاتضوج مني خوش بعد لاتخلي عطر روح اسبح بيك عطر
-شعرري مبلل هستوني سبحت
-اي بس بيك عطر افركة حيل خل يروح
ابتعدت عنة ودرت وجهي ابجي صار يصيح واني ازيد بالبجي: -ارروح اسبح خمسطعش الف مرة بس لاتبجين.
اخذ ملابس جديدات وطلع يسبح والله كاسر خاطري اريدة ومن يتقرب مني تلعب نفسي من عطرة الحمل لعب باخلاقي خطية هو الطايح بيها كل شوية سابح من وراي اجة ينشف بشعرة ويصيح...
-اليشوفني يكول شابع هل كل شوية سابح لجججج
تكلللييي صخيمةةة شني ماتشبععع عووف البت حبلة لايصير بيها شي شفتييي شلون يفكرررون
صار نار خطية يمتها متقربلي شو كل شوية دافعتة رحت يمة امسح بوجهة: -ختولي حبيبي لاتضوج اعصابك عمري
-كلة من وراج.
-ابنك والله مو اني
-بس يطلع اشلع اذاناتة وكولي ما كال
-خطية لا حرام يدلل عليك غير يحبك واليحب يدلل على اليحبة
رفعت رجلية وحاوطت ركبتة طاوق خصري باوعت بعيونة ارمش: -ليش انت هلكد حلو
-اكل شكر هواي
-واووو جا هم راح اكل شكر حتى اصير مثلك حلو
كرص خدي يمرر خشمة على خشمي ويكزكز: -انتي تخبلين ما تحتاجين حلاة
-امممم بس مو مثلك الله شكد احبك اووويلي رجلي الصاك اوووف ضجت
-منين
-من جمالك الساحلني سحل.
-اموت على المسحولة
-وانا اموت على الساحلني
عفست وجهي وضربت كصتي: -يععع شني ساحلني تفف علية شلون ماعرف احجي جعتتت
-تعاي اوكلج
راح كعد يم الثلاجة كعدت بحضنة وهو يطلع حلويات يفتحلي ويكلي ها شلونها: -تخبل مثلك هيح حلوة
-شلون تكببنة اسكتي بوية واكلي
-اريد عصير
طلعلي وفتحة يشربني فتحت جبس واخبط عصير ونستلة وجبس اخر شي طلعت حليب بككو والا اشربة وياي واوكلة وهو ياخذ من ايدي.
-عبيس
-رجفة روحة.
-مدري ليش حتى من انت يمي اتحلم بيك بالحلم والحقيقة اريدك وياي
باسني بخدي قوي: -احطج بكلبي بوية كون كل وكت اطلعج واشمج شكد اشتاكلج ومن اكعد وحدي اتذكر سوالفج واضحك جماعتي صارو يكولون هذا بية جني يضحك وحدة
-احلى جني ذولة مايعرفون بسوالف العشاك
-ولا راح يعرفون مثلي
-بعد انت خبرة هسة انا متعجبة بيك شلون صبرت كل هاي السنين علي
-وبعد اصبر عمر كامل المهم اشوفج مرتاحة وتضحكين
-راح ابجي اسكت يلا اسكت.
ايدة تمشي على شعري ذبيت البيدي خنكتني العبرة رحت للحمام غسلت ودموعي تجري طلعت لكيتة بوجهي عبالة استفرغ سحبني من ايدي يمسح بوجهي...
-سودة علية بوية تاذيج معدتج؟
هزيت راسي بلا واني امسح بعيوني كعدت على الجرباية راح طلعلي علج وانطانياة: -اكلي بلكي يروح العبان نفس
خليت ايدي على عيني افرك بيها مبرطمة شفتي ودموعي تنزل كعد كبالة يمسح بدموعي ويبوس بدية: -شسوي هسة كولي امشي اخذج للطبيب.
-ماريد كوم احضني هسة اصير زينة
اخذني لحضنة خليت راسي بركبتة اخذ نفس: -حنانك الزايد يضيعني عبيس انا ما اتحمل كل هذا الحنان
-بنيتي انتي شلون ما اعاملج بحنية أصلاً انا بس يمج اطلع كل حنيتي
-حيل احبك
-حبيني بيج وماتحبيني اخسر بالدنيا وبحبج افوز
اخذت وجهة اطبع بوسات وهو يستسلم بيدي.
تمر الايام بهدوء تام عباس روحي من الدنيا بيوم الينزل عندي عيد احتار شسوي وهو يخلص كل الاجازة وياي يا يطلعنا ناكل ونشرب شكد نتونس بهاي الطلعة البسيطة. وبيوم اليلتحق ابقة يم رغد الغرفة بدونة ضلمة.
كل ما اشوف رغد وتعاملها وي جهالها اتحمس لولادتي بعيني اشوف رغد ام مثالية شكد شفت امهات بس مثلها ماكو علاقتها بيهم مختلفة تسولفلهم ابسط التفاصيل برغم هما مايفتهمون اول ما تجي من الدوام تركض ملهوفة الهم تبوسهم وتشمهم وتضل تسولفلهم عن المواد وصعوبتها.
-ما اسولفلكم يمة المرحلة الثالثة مقبرة الله ينعلها وذولة الدكاترة شادين ويانة ولا تشوفون الوضع لعبان نفس صايرة طخة طيخ يبووو عليهم متتت.
مبتسمة مركزة وياها كلش خاصة بالليل قبل لا تنام تضل تحجي قصص افتح سبيكر واخلي عباس يسمع وياي وميتين عليها ضحك جوة البطانية...
شكد حلو من تسميهم يميني و يساري الكل استغرب وهي مشتة عليهم حتى ماتصيحلهم باسمائهم كبرو ونشنشو صارو يخبلون الكل يحبهم من واحد لواحد عد عمامي لو حبوباتي تعوفهم عدها من تريد تقرا وهما ابد ما يستغربون وهذا الشي مريحها كلش...
اما جاسب خسر رغد وهي ربحت بجهالها ومستقبلها عيونة تفتر وراها وين ماتروح وهي العكس ابد ما تباوعلة روحها بجهالها وحتى هو ميت بيهم يكول عباس هما يغيرون نفسيتة ويرجعونة للحياة.
مرتة جابت بنية سماها ولاية علاقة بمريم مهتزة بشكل وكل يومية زعلانة وهو مايهتم لويرجعها بس تعلق بنتة كلش ومن تزعل ياخذها يجيبها ينمة يخليها يم اخوانها يكعد يخليهم تلاثتهم يمة ويلعبهم.
يشيل الملهي مالت حيدر يخلية لكرار ومالت كرار ينطية لولاية ويضل وكرار يصرخ ورغد تجي ترزلة
-هسة عود شمهناها هيج تسوي تخلي يبجي هذا هم لعب
-بكيفي
-والله بس اسمعك مبجي واحد بيهم اخذهم
يضل يضحك على شكلها العصبي ابد ما تقبل واحد يبجيهم حتى لو بالشقة...
احس رغد صارت ام لتلث جهال ولاية دائماً عدها وي جهالها ماتفرقها عنهم بين ماتجي امها وياخذها منها.
شروق وابنها مختفين من الدنيا ابد مايطلعون ولاينسمع الهم صوت وكل اليجي يرزلها لان ماتنزل
رضا فدوة يجنن عيونة صفر واشكر على امة
حبوبتة ماتخلية يطيح بالكاع مخليتة على كلبها وعلاقتها هي وشروق كلش اتحسنت...
كلنا منتظرين ولادة سجى اجتنة تمشي كوة وكل ما تتوجع تسب بارفد نايمين بالليل واجاها الوجع اتصلت بارفد...
سجى: -وولك ررراح اموت وانت نايم امدددة حضي من النسووان رجلي نايم وانا امووت نايم ياشليف الصوف نايم والمنايا تحوف نااام ارررجع نااام
-اجيج هسة عندج ولادة
-ماكووو ولادة بس هاي بنتك تريد تاخذ بثارك مني خاف ما متكتلني ولك ارفد انت حلتها علية اعترف كليومية تحجي وياها بصوت ناصي انا اعلمكم خونة
واحد نايم والثانية تررفس
-ولج شبيج اجيج
-ارفد انت طالك يلا طاااالك سمعت طالك بالثلاثة.
اعلمك بس اجيب واشد حزامي كلكم علية ييووو
كاعدين نسمعلها صوتها شعلاتة حتى جهال رغد كعدو على صوتها ورغد تعبانة هي ابتلت بيهم تهز وتسكت...
سجى: -ووولج صخااام كومي لجهالج شيبوني
رغد: -اممم تعبانة انتي كعدتيهم رجعي نوميهم
نمنة وهي تسب وتهز بيهم سوتلهم ممة ترضع وتسب برغد وجاسب وحتى مريم دوختنا واحنة عدنا دوام كعدت اطوطح لبست ورغد تبدل لجهالها شبعتهم وراحت لبست انطتهم لعايشة وطلعنا كل وحده لجامعتها...
من رجعت لكيت سجى ماخذينها للمستشفى وزهراء وشروق يساعدن بالطبخ الاثنين تركن الدراسة...
بين ما سبحت وصليت اكلت وي رغد على الواكف وسجى بعدها ما ولادة نمت وكعدت العصر كالو ولدت رغد موبايلها مانزل كل شوية متصلة شلونها
حضرنا االغرفة وكلشي جاهز لليل جابوها ولازم رغد تهلهل فرحانة اكثر منها اخذت البنية منهم نايمة
وسجى تخزر بينة يكول احنة كايليها احبلي...
خليناها ترتاح ولليل جبنة اكل وكعدنا وياها ناكل.
صاحت لعلاوي باستة وشالت بتها خلتها بحضنة
سجى: -هاي ريمة الك حلوة شدكول
علي: -بس هاي حيل صغيرة وحمرة
سجى: -بعد روحي غير صغيرة هسة تكبر وتصير تخبل لاتخاف
علي مكيف بيها. وهاي من كل عقلها تكول: -امنت على مستقبل بنتي الحمدلله رزقها موجود.
اخذتها تتفحص بوجها وتكول: -الخشم خشم ابوهة همزين خشمي جبير بلة العيون بعدهن مورمات الحلك يمكن نفس حلكي بزغري الاذانات زين وضعهن مو كبار بس اضنها ملحة على ابوها تعالن ولجن شوفنها يمة بس لاتطلع ملحة وانا امها
سفانة: -بعدها هسة تكبر وتبين بس ردي السانج
سجى: -يلا ماطول انتي عمتها ما خاف عليها انتي خوش عمة تسيطر عليج وعلى فارس شوفي يمة انا اعرف اختار اختاريتلج عائلة مسالمة مابيها حياية.
ضلت اسبوع كامل يمنة وخطية ارفد يستحي يدخل لذلك رجعت لبيتها وحبوبتي راحت وياها هم اسبوع ورجعت تصيح.
-جنا بوحدة صرنا بثنين ولكم مو بت وكحة بس تبجي دوختني الله يساعد الزلمة جان بسجيوة هسة سجيوة وبتها...
بنص الليل نايمين وموبايلاتنة تحترك علينة كلوبنة توكف عبالنة صاير شي تطلع سجى: -يابة شتريدين متصلة بنص الليل مو تدرين نايمين
سجى: -هاي المكروصة ماتنام بس تصرخ حرت شسوي وياها
-خاف جوعانة مريضة.
-كلشي مابيها خباثة ماتخليني انام
-واحنة شكو بيج وبنتج
-جا تنامن وانا اضل كاعدة والله اكعدجن كلجن مو بس انا ضالة مكابلة الحايط وهذا الاملح طردني من الغرفة انا وريمة قفل الباب علية اتوسل بية يفتحلي يكلي وراي شغل اريد انام انتي ماعندج شي ضلي اسهري عليها
-يهج راح واحنة هم نهج من وراجن
كل يوم تتصل بينة بنص الليل تطير النومة صرنا نخلي موبايلاتنة صامت يلا ارتاحينة منها ومن ازعاجها...
بطني صارت تكبر الحمل والدراسة متعب بدرجة لاتوصف رجعت من الدوام ميتة تعب بس سبحت ذبيت روحي ميتة، فركت ركبتي احسها تبزني درت وجهي ومن حسيت بلمساتة طفرت من النوم افرك بعيوني ضحكت وحضنتة: -هاي انت شوكت اجيت
-من جنتي نايمة وتهذرين باسمي
ضميت راسي بصدرة ابوس بية: -هاي جنت بالحلم رحت للمدرسة وما اجيتني تاخذني بسيارتك رجعت امشي واسب بيك
-لا تسبين بية
-بالحلم مو صدك جا ضجت لان رجعت امشي.
-بوية يالمدرسة مجلبة وياج راح تتخرجين وسوالفج بالمدرسة
-والله مادري ليش بعدني اتحلم بية
-وانا شني ذنبي انشتم من ورة مدرستج
باوعتلة مبوزة شفتي رفعت جتفي ماعرف دنك اخذ شفتي، ايدة يمررها على بطني ويرجع يكرص خدي ويبوس ايدي كام جاب حلويات وعصاير وكعد يفتحلي وينطيني اكل واوكلة وياي عيونة على بطني...
-شوكت تجيبين
-بعد هواي
-الله يسهلج
سحبني لحضنة واني اكل: -اممم عبيس شدكول حامل بولد لو بنية.
-احساسي يكول ولد واسمة فضل
-امم خوش احساس واذا اجت بنية
-احطها بروحي ويمكن من وراجن اترك العسكرية لان ماكدر بدون ما اشوفجن كل يوم
-لا مايصير تتركها نزعل عليك ابو فضل
ابتسم عيونة مدمعة وحضني بقوة.
مرت ايامي بين اهتمام وحب عبسي إلى ودراستي وانتظار الطفل يكمل حياتنا المليانة حب وحنان.
-ووواحد ثنين تلاااااثة هجووووم
راحن البزازين يركض وميمو بالمقدمة سابقهن انمار جان كاعد بالصالة يشتغل باوراق من شافهن يركضن طفر من مكانة يركض للغرفة بس ما لحك جلب بية ميمو من رجلة وهو تسودن صار يرفس بية طحت بالكاع ميتة ضحك علية اختنكت كمت ما اتنفس.
اجت سكر ولوز يركضن تخبل من صارن داير مدايرة
صاح بصوت رج البيت رج واني منتهية ضحك...
-ووووولج صخاااااام تعااااي اخذذذذيههههههن لا اذبححححححن جدددددامججججج
حيلي باد اريد اوكف ماكدر اضحك كمت بية مابية انكسر خاطري علية شلت ميمو واشرتلهن يجن اجن يركضن باتجاهي طلعتهن برا اضحك...
-عفية عليجن كفوو طلعتن الملح والزاد اثر بيجن شلت ميمو اهوس بية: -طلعنا الحگ ما ضايع طلعنا.
رجعتهن لبيتهن مطيتهن اكل ضليت افتر بالحديقة هسة شلون ادخل خاف يموتني كعدت بالمرجوحة اهز على كيف لازمة بطني الجنها طوبة صفنت افكر وما احس الا روحي مرفوعة صرخت ولزمت بيدة
-انهااار حاااامل الطفللل يمممة الطفل
-اليوم اعلگججججج انتي وابنننننج ااااانا شجممم مرررة كتللللج البزززازين بعديهنننن عني
-شعلية اني هنا يحبنك واجن يسلمن عليك
-هسة تشوفين بعينج شسوي بيهن وبيج.
سحلني من شعري لزمت ايدة بوجع رفعت راسي شعرة يقطر ماي وصدرة عاري هستوة سابح طبعت بوسة على صدرة ضربني على خدي وزمخ بوجهي
-ماااتأثرررين اليوووم اعلمممج على استهتاررررج
بس دخلني للمطبخ نبت سنونة بمتني وادية لازمهم شطت بمكاني: -خررررررب يووومك ايييدي انشلعععع اللحمممم اليوووم اموووتك
سحب شعري وعضني بركبتي خلاني ارافس عافني صاير نار: -هاي لان حامل بس ما اطيحها الج.
طلع وطلعت وراة سد الباب عليهن وشال القفص جلبت بية اصيح وهو قافل ولا يهتملي اخذاهن وطلع حتى قميص ما لابس سد الباب وحرك السيارة واني الطم واصرخ...
- يممممة بزززازززيني مااااتن ذبحهننن المجرررم انطاااهن للجلاببببب يبوووووو ولجججج سكررر بناتتتج ينوكلنننن كدااام عينج شيضل بيج بعددد
وللللك ميمووو بعدك ماتزوجت لوووز عود كلت ازوجها الك بس اجيب صخاااام بوووجهك انمااار
صوتي طبك ابجي واصرخ الضحك طلع من عيوني.
كعدت بالكاع فحطانة مددة رجلية مرة فترة حيلي بايد وعيوني على مكانهن والله كلبي شعوط عليهن انفتح الباب دخل يفر بالسويك ومبتسم بخباثة
رفعت عيوني اخزر بية: -وين وديتهن
-صاحبي عندة جلب بوليسي صارن وجبة بسيطة اله
فتحت عيوني على وسعهن وكمت رحت اضرب بية واصرخ من شافني تخبلت كام يصيح: -اجذب عليج والله ذنيج ما شامرهن هسة اجيبهن الج بس اسكتي.
-هسة تجيبهن اخذهن وروح لاهلي بعد ما اخليهن يمك المجررم حاقد عليهن بس تريدهن يموتن وتخلص
-كتلج لا تشمرينهن علية
-تستاهل لان تحرك كلبي وتجاهلني
-غير عندي شغل
-شغلك وي النسوان انعل ابو الشغل اذا بية نسوان
خلة ايدة على راسة رافع عيونة بملل طلع وعافني اصيح واحجي علية اشك الجيران راح يشيلون من ورانة اجة شايل القفص خلاة بمكانة وابتعد رحت اركض ملهوفة فتحت القفص طلعتهن حاضنتهن ابوس بيهم...
-يمة خالسجن مخلوسات سودة علية وجوهجن صفر من الخوف بس اني اعلمة الجن
مسحت عيوني بعنف لكيتة على كعدتة كدامة الابتوب رحت للغرفة وفتحت الكنتور يمكن بية اربع فساتين وكلهن مشلتحات طلبتهن من النت كلش عجبني اخذت الاسود لبستة كلة اغراء تمكيجت ورشيت عطر رحت كعدت كبالة بالصالة بيدي كاسة عصير من اشرب اطلع صوت...
جان كلش مندمج رفع عيونة ضل مصدوم بعد مارمش خليت رجل على رجل اشرب وانثر بشعري كمت اخذت الكلاص للمطبخ وهو عيونة وراي رجعت اتمايل واكل بنستلة رفعت حاجب وكتلة.
-خير عيووونك بشغلك اقصد بالنسوان امهات القضايا
عض شفة وهز راسة: -وانتي صاروخ فلك
-طاح على راسك
رحت اتابع مسلسلي وهو لحكني راد يحضني دفعتة
ورفعت اصبعي بوجهة؛-دير بالك تلمسني يلا امشي من وجهي
-لا تخليني افلششش البيتتتت على.
-عليمن تفلشة بلة كول؟
-على راسيييي شبيييييج
-شمسويتلك
-خررررب بية اشتعلتتتت اعوووفلج البيت واطلععع
-اي اكو من ينتظررك
-انعععععل رررروحي اذااا استلمت قضيييية نسوووان اشتغللللل عماااالة وشهااادة المحاماة اعلكهاااا بالحااايط خوووش
رفعت جتفي بمعنى بكيفك درت وجهي اباوع برود وهو صار بارود بس ينافخ درت وجهي علية.
-روح كمل شغلك امي
-ليش تخليني اسب العشيرة شبيييييييج وووويااي
-شمسويتلك
-ااااه ما مسوية شي لجججج تحسسيني بية جرررب.
-جرب ولا تخوني لان الجرب عندي اهون بهواي
-هسة شتريدين
-ماريد شي انت شتريد
-ضلي تابعي مسلسلات ضلي اعوف البيت الج ولبزازينج تابعي وياهن
راح للغرفة لبس قميصة وطلع طلعت وراة قبل لايطلع جلبت بية وهو ينفخ طوقت ركبتة.
-لا تروح
-لج راح تخبليني ليش تسوين هيج
-يعجبني
-هسة شتريدين خليني اولي
-بالبداية اعتذر
-ما غلطان
-اعتذر
حركت خشمي على ركبتة كال: -اسف
-مو بس مني اعتذر من القطط لان زعلانات مني هم بسببك.
-لج انتي تخبلتي هنا بزازين شعتذررر منهن
-يفتهمن يلا اعتذر لخاطري هاي اذا عندي خاطر
ذب نفس بملل رحت كدامة طلعتهن سطرتهن وكتلة يلة اعتذر منهم واحد واحد
كام يسب ويفرك بركبتة اخذني على كد عقلي وكعد نص ركبة لوح بيدة لميمو وكالة اسف ابن السطلة
وانتن اسف منجن
-لان خوفتجن بعد ماتنعاد
-لان خوفتجن بعد ماتنعاد ان شاءلله
-الجن البيت والنة الشارع
-الجن البيت والنة الشارع بعد اهمشي تسامحني كرمال الغدير سامحني.
-سامحنك روح ادخل
دخل واني متت ضحك شكاعد يصير دخلت اشوفة يرفس بالقنفة ويصيح: اتابععع هنوووود خبلوووها اههههل القديرررر
خليت ايدي على حلكي اضحك صدك هالفترة كالبتها مسلسلات هندية وصارلنة اسبوع ما نتحاجة مرة خابرت علية وحدة تتماوع ونبرة صوتها بيه اغراء لدرجة كزبر جسمي هو يكول عدها قضية تريدني الزمها واني كبيت علية لا اخذ القضية ولا احجي وياة...
رحتلة حضنتة تجمد بمكانة: -يلة نتصالح لخاطر البطني بس يا ويلك وسواد ليلك اذا حجيت وي نسوان عسى ما تكعد وتسكت بس نسوان No
تصالحنة حسيتة خطية مطلعة روحة هالفترة، ثاني يوم رحنا للدكتورة واعرف جنس الجنين راح ادخل بالخامس وبعدني ماعرف ولد لو بنية الدراسة هالكتني ماعندي وقت ابد...
اجة دوري اخذت سونار وكالتلي الدكتوره بية بنوتة طرت من الفرح طلعت جان منتظرني لكيتة يدخن ذب الجكارة واجة باتجاهي...
-ها بشري شلونج صحتج زينة
-كلش زينة بس دكول لاتحركين دمج كتلها رجلي يحركة
-لا ان شاءلله ماكو شي يحرك الگلب بس حطي عقلج براسي وعوفي الهنود
-خوش احط عقلي براسي قصدك عقلي طافر خوش خوش
-طركاعة الطاحت على راسي ما اقصد هيج
صعدت السيارة كالبة وجهي وهو يبرر قصدة اخر شي ابتسمت: -يلا لاتعيدها انتبة على الالفاظك باجر بنتي ماتحترمني.
فتح عيونة على وسعهن يريدني اعيد الكلتة خليت ايدي على بطني وميلت راسي: -بية بنوتة حتجينة عن قريب
ما اكدر اوصف فرحتة اكتفى بالسكوت لان مايعرف يعبر طويل الطريق يبوس بيدي نزل جاب عشة وحلويات وصعد...
-فرحان مو؟
-الدنيا ما واسعتني من الفرح
-بس مو تحبها اكثر مني ترة اغار والله اطردكم بالشارع واعيش وي بزازبني
-ام البزازين راح تصير ام
-اي عيني لعد شعبالك ام ونص
-غير خلفلة علية سويتج ام
-سخيف.
-سهلة تجيبين واطلعلج گلب جديد هسة اكول خطية حامل
-لا تهدد ترة ما اجيب اخليها بطني
-اي خليها المايعة
-جني ماعاجبتك!
-عاجبتني المايعة وفهاوتها
-عبالي يلا سوق بسرعه خطية ميمو كتلة الجوع
ضل ينافخ ابد مايحبة ولا يطيقة اول ماوصلت رحت انطيتة اكل وهو واكف فوك راسي يباوعلة بحقد
-تهتمين بميمو اكثر ما تهتمين بية شني مشاركني بيج هالبزون الفاسد يدور احضان ورومانسيات
-عرفتك حاقد علية ترة فقير
-ترة اغار.
-عزااا تغار من بزوون! صدك تحجين
-اي والله اكرها واغار عليج منه ابدي اشمرة من اعلى بناية ويتكسر شني ينام بحضنج ويتلفلف ويشم بيج الله ياخذك ميمو
-يااا شبيك هاي تدعي علية ترة خطية والله ازعل واتمرض لو صار بية شي
-هو شمصبرني علية غيرج الله كريم بلكت تجيبين وتلتهين بنتج
دخل جوة واني بقيت مصدومة يغار من بزون عجيب شلون يفكر ولا مرة فكرت هيج.
غسلت ادية ورحت اكل وياة شبعت ورحت اقرا هالفترة هاملة كلشي واتابع مسلسلات وعايفة المواد تتراكم والله مالي خلكهن ولا بية حيل االصفارة تتراكع...
بقيت افكر باسم للطفلة واول اسم خطرلي روز
اول ماكلت لانمار على الاسم هز ايدة وكال.
-ومنين اجيبلها جاك اذا تكبر روز لو موز احسن
-شوف حبيبي صار اسمها روز بدون تنمر وكلام زايد
ابو روز احبك هواي.
تقبل الاسم وماعارض هواي. تمر الايام بين الحمل والدراسة لو مو انمار وياي فلا ادبر شي خطية البيت علية اكثر شي بالجمعة افرغ انضفة وارتبة.
بكد ماعندي واهس بالدرلسة رجعلي انمار الواهس بكلامة واهتمامة نظم وقتي وسوالي جدول ادرس علية كدرت اضبط المواد وارجع مستواي...
خلال هالفترة صار عرس سجاد عرس بسيط جداً حتى حنة ما سوة رفيف سوت حفلة بسيطة اجيت من الامتحان بدلت وطلعت وي امي وسرى ونسوان جوارينا امي تعرفت على نص المنطقة وصارت تروح على النسوان وتجينة نسوان لبيتنة تغيرت نفسيتها.
بيوم الزفة سجاد جانت عيونة مركزة على مكان فارغ كانة يتخيل حياوي وياة رغم وجود ولد عمي بس يحس بنقص حتى فرحتة جانت مكسورة وكلنة لاحظنة هالشي تمت الزفة...
سرى اهتمت بالمعازيم تستقبل وتودع واني رفيف جلبت بية خايفة ترجف هي بالاصل خجولة ومن تشوفة تتوتر بقيت اهدي بيها...
-حبيبتي خليج ريلكس سجاد كلش واعي وحباب مو همجي صدكي ما يجبرج على شي ويخليج بعيونة خافي من الناس كلها بس لاتخافين منه.
كان خوفها مو طبيعي واشك السبب من مرة اخوها مخوفتها ماقبلت اتركها بقيت احجي وياها على الغرفة واخذ ذوقها وهي تجاوبني وترجف كمت من صارت الهلاهل قريبة معناها اجة جلبت بية تباوعلي بعيون مدمعة اخذتها لحضني اهديها...
دخل سجاد وتفاجأ من حالتها نزع سترتة واجة يمنة
رفع حاجبة بمعنى شكو: -خايفة
-ليش
-يعني ليش برأيك
اخذها من حضني سحبها اله وهي ترجف رفع كذلتها عن عيونها وحجة بصوت هادء: -شبيج رفرف ليش كل هالرجف.
-اخاف والله
احتضن وجهها بثنين ادية وكال: -شو باوعيلي
اني اخوف شي؟ أذي روحي وما أذيج اطمني لاترجفين ولا تخافين
رفيف: -يعني اذا ماخليتك ما تضربني مو؟
رفع ايدها باسها وخلاها على كلبة: -اضربج ليش؟ باي ذنب حبيبتي انتي حرة والقرار الج اني ما اجبرج على قربي او شي ثاني وهاي كدام اختي تريديني اطلع من الغرفة اطلع لخاطرج اهم شي تاخذين راحتج.
من شافت كلامة حضنتة تبجي حتى اني ردت ابجي ابتسمت وكتلهم: -يلا اخذو راحتكم ان شاءلله زواج الدهر الف مبروك وشايفين كل الخير
سحبني وضمني لحضنة باسني براسي: -غاليتي تكومين بالسلامة
ابتسمت والدمعة بعيوني ما اتحمل هيج تصرفات تخرخر حنان رحت لغرفتي بدلت ونزلت اتعشى طلعت سرى جلبت بيها تبات ماقبلت كالت عدها دوام بستة ابنها ودعتهم...
كعدت اكل حلويات والبيت صار هادىء اشوف مهند بدا ينضف خطية ماسحتة ويغسل بالاستقبال هالحجي الساعة 11 ونص اريد اساعدة بس ماكدر تعبانة وبطني تاذيني اندمجت بالاكل وطفرت والماعون وكع بالكاع...
درت وجهي فاتحة عيوني على وسعهن لكيت عبدالله وراي الحقير كمزني خليت ايدي على كلبي يدك بقوة اجة مهند على صوتي وقبل لا يسالني لزم عبدالله طاحلة تكفخ ورزايل...
مهند: -لك انت متجوز من سوالفك زمال بلة صار بيها شي وهي حامل شوكت تعقل
-من تزوجوني والله اصير شخص ثاني هادىء وعاقل ورزن
مهند؛-اذا ما نخليك تعبر العشرين يلا نفكر نزوجك تافهة كدامي نغسل البيت
اخذة يغسل علية وهو يدردم يريد يتزوج هاي منو التزوجة مادري، حاجيت انمار شوية ورحت انام كعدت متاخرة لكيت رفيف وي امي تسولف باركتلها
وسالت على سجاد كالت راح للنجف امي ماقابلة وتعاتبها شلون ما كالتلها وخلتة يروح...
رفيف: -مو هو كلي لتكولين ميصير احجي غير وصاني
مبين من اول ليلة معلمها على اطباعة شكد فرحت بية شلون بنية حلوة وحبابة الرب يسعدهم.
بقيت يمهم هم يجي خطار وامي وحدها رفيف اندمجت وي عبدالله واخذت على جوة مبين شكلو ثنائي مهند من بعيد وي الكل مايختلط عازل نفسة
عبدالله: -الحمدلله بعد الطعن بية من قبل اختي العكروكة الله ماقصر ودزلي اخت والهي رفرف من صدك اخت كول وفعل مو نفس العكاريك العدنا.
نوف: -اي نشوف شكد تتحملك والله تبزع منك ومن سوالفك التافهة بس اصبر
عبدالله: -لا ماتبزع مو رفرف
رفيف: -اكيد لا شلون ابزع شتريد كلي اسويلك اغسل ملابسك اسويلك اكل جاي لاتستحي اطلب مني بعد صرت اخوي
عبدالله طاير من الفرح كاعد يسولف عليها وهي مكيفة تسمعلة نص كلامة جذب وخطية مصدكتة
ابتسمت على شكلهم وكعدت بالحديقة ارسل بالبنات
واشوف اخبارهن...
رفعت راسي من دخل سجاد كمت اتلكاه حضني بقوة.
حسيت بكسرتة وشكد هو محتاجة.
-رحتلة؟
سجاد: -وسولفتلة عن كلشي
-فرحان هو بيك
-جان يكول نسوي عرسنا سوى ما لبس هدوم العرس ضل القاط معلك بالكنتور تمنيت افرح بية وازفة بيدي وهو يزفني بيدة نوف اني خسرت اخوي وصاحبي من الكة صاحب مثلة.
المفروض يزفني بيدة ويهوسلي شلون عافني واني بحاجتة؟ عرست وهو عريس المقابر شاب نايم بين الشياب هضيمة والله هضيمة اعوفة وحده واحنا جبنة العمر سوى.
نزلت دموعي بغزارة مسحت دموعي ودكيت على ضهرة: -انت تشاء وانا اشاء والله يفعل مايشاء الله يحبة واخذة يمة اترحملة كلنا خسرنا روح شوف مرتك عيب عايفها عروس
مسح وجهة ودخل لاكتة تسلم علية اخذها لحضنة ضاعت توصل لصدرة باسها براسة وكللها...
-شلونج
-بشوفتك زينة زرت اهلي
-اي زرتهم وغسلت قبورهم وقريت الهم الفاتحة
-كلتلهم بتكم تزوجت؟ وجانت محتاجتكم
-كلشي كلتلهم.
حضنها يمسح على ضهرها عافتة وصعدت تركض تبجي على اهلها راح وراها واني طلعت للحديقة ابجي عليها خطية بهالعمر فاقدة امها وابوها بس ان شاءلله سجاد يعوضها ويسد النقص من شفت علاقتهم تطمنت وارتاح كلبي منة رفيف كلش مطيعةلا ترادد ولا تطلب وهو مايقصر وياها...
رجعت لبيتي وضعتي بالدراسة والله الصيدلة ضيعتني تندمت بكد شعر راسي من دخلت هالقسم على كولة انمار تهون خلصت ماضل شي بس سنتين.
مرت الايام صعبة كلش الى ان ولدت محتضنة طفلتي لحضني انمار متخبل بيها وعلية من اول ما شالها لزمها وصار يرجف فرحة لا توصف جان فرحان اكثر مني ابتسمت وحمدت ربي يستاهل انمار يفرح حقة هذا...
كعدت امي وياي وعايشة اجت يمي ضلت للاربعين
خلال هالفترة انمار حتى اكل يوكلني شما احجي عن اهتمامة اكون مقصرة خلاني اشوف نفسي مقصرة تجاهة بكلشي...
طلع الاربعين وبينت معاني روزاية ونشنشت خدودها برزن وصارت تجنن انمار ياخذها يسبحها ويلبسها
لكيتة ملبسها بدلة ناعمة وردية كلوش وحذاء قماش
وطاك قماش ابيض صفنت علية شلون يرتب بيها ويختارلها ملابس وينسق رشلها عطر اطفال ومددها على السرير يصور بيها يخلي ايدة بيدها ويسوي حركات بقيت مجتفة ادية واباوعلة عيوني مدمعة
انتبهلي واجة اخذني لحضنة يبوس بية: -روح لروزة اهتم بيها واني اهملني حتى صرت ما تبوسني هواي.
ضحك وصار يبوس بية بقوة واني ادفع بية.
انمار: -روز وام روز نفس المعزة ثنينجن نفس الاهتمام اقدملجن
-داحس بيها ضرتي شنو نفس الاهتمام
ضحك وراح شالها يبوس بيها وهي تضحك يشمرها فوك واني اصيح خايفة: -لا انمار توكع فدوه لاتعيد هالحركة
-لج راحححح اكلهااااا ما اتحمل جنت بوحدة صرت بثنين تموتني تريدن
-اسم الله عليك حبيبي بس نجلطك شوية بجمالنة.
اخذته من ايدة ابوس بيها وهي عينها على ابوها تريدة اخذها مني مجلبة بلحيتة هزيت ايدي
-بس اصبرولي انتو الاتنين اذا ما اجيب ولد والعب عليكم اصبرولي
-مستعجلة تعاي ما دام فارغ اسبوع وتجيج اعراض الحمل
هزيت بيدي ورحت لبزازيني اوكلهن والعب وياهن نزلت دموعي وصرت اشكي لسكر وهي تباوعلي بانصات...
-لج سكر حملت بيها وشلتها بطني تالي تريد ابوها وماتريدني وفوك كل هذا صار رجلي تخيلي انمار الحاسدتني علية صار الها يشتريلها ملابس ويلبس ويرضعها واني صرت لا شي ترضينها كولي
كالت ميو واني اخذتها حجة وصرت ابجي اجة كومني يسكت بية وصدرة يهتز دفعتة اشوفة ميت ضحك من هذا اليوم صرت وياهم اول باول...
اريد اسبحها بس ماكدر اسيطر عليها اخاف انتظرتة يجي وهي تصرخ سويتلها ممة رضعتها وضليت كاعدة انتظرة يجي ويبدللها.
-روز لا تباوعيلي هيج ادري بيج تكولين ام جيس حب اهوو ترة اخاف توكعين ويصير بيج شي فننتظر حبيبي زوجي يجي يسبحج يلا عدلي عيونج
اجة انمار باسني وراح الها تسويلة بديها متعجبة شلون بهلعمر وتعرفة وتحبة هيج.
انمار: -ابااة روحي عمري گلبي حبيبة روحي تعاليلي تعاليلي فديوة للبنات.
اخذها يبوس بيها ويشم اخذها يسبحها اباوعلة شلون مسيطر عليها وهي تزلك بيدة هاي لو اني جان صارت طشار، خلص انطيتة المنشفة اخذها ينشفها طلعت ملابس اخذتة منها البسها وهو اخذ ملابس وراح يسبح...
لبستها تراك برمودة وتشيرت من فوك خيوط طلع يجنن عليها ولو هي كلشي حلو عليها بيضة مثل الكطن والوان تبرزها ذبيت روحي بصفها العبها وادغدغ بيها من رجلها وهي تضحك.
-روزاية ياجكليتة حامض حلو باكيتة.
اصفكلها وهي متونسة اجة انمار شمر روحة بصفنة هي بس تشوفة تضل تضحك استلمها يغنيلها ويبوس بيها تقربت خليت روحي بحضنة ونمت وهما على سوالفهم...
بيوم اهلي مسوين عزيمة انطيتها لانمار ورحت جهزتلها جنطة صغيرة وجهزت نفسي هما جاهزين طلعنة انمار يسوق ويبوس بيدها ويغني.
-انا مرية وعندي فروخ ورجلي اسمة صلبوخ
وسميرة بنت الجلبي شعرها اصفر حلبي.
هي تهز بروحها على صوتة واغانية واني ميتة ضحك على هالاغنية مدري منين جايبها دائماً يرددها...
وصلنا وبعدني اريد انزل اشوف احمد يركض بالشارع طلعت سرى وراة ما منتبهتلنة تصيح
-حيااااوي ولك تعال ماماااا لاتندعم حياوييييي
ركضت وراها شالتة تبوس بية وتحجي بتحذير بهتت ملامحي واني اشوف هالمشهد راح حياوي واجة حياوي ثاني شكد حبج عظيم ياسرى...
نزل انمار واخذ روز من ايدي نزلت وهسة يلا انتبهتلنة رحت اسلم عليها واخذت ابنها ابوسة وهي تشكية: -وكح صاير يطلع بالشارع يريد يجلطني اطلع وشوف بعد شسويلك
دخلنا نسلم على الموجودين رفيف من شافتني اجتي تركض وسجاد يكلها على كيفج سلمت عليها علاقتي بيها تخبل مثل اي اخت واختها اخذت بنتي من انمار تبوس بيها...
رفيف: -الله لج نوفة هيج وراح تجيني بنية كون مثل بنتج
-ليش انتي حامل.
غمضت عيونها تهز براسها احس فراشات بكلبي باركتلها ورحت لسجاد باركتلة هستوهم عارفين بالحمل الفرحة غامرة البيت...
(هالبارت بعنوان حمل ولادة )
كعدنا كلنة ناكل وعبدالله فتح موضوع الزواج
وصار يلطم: -خايب انت النسيب زوجني مو محامي وتكرف بالفلوس شبيك فوك ما نطيتك اختي لحم جتافها من خيري
انمار: -يابة تدلل بس دليني على بيت البنية ونروح نخطبها شعدنة غيرك.
عبدالله: -الله يبشرك بالخير ويفرحك مثل مافرحتني بس انتظرني ادورلي وحده حبابة وخبلة مثلي لان تعرف مو كل وحده تتحملني
سجاد: -واخيرا اعترفت بروحك خبل
عبدالله: -رفرف سمعتي رجلج يحجي علية ترضين يكلي خبل برايج اني خبل
رفيف: -لا ماقبل اكيد هو وين اكو اعقل منك بعد مايعيدهة لاتهتم
عبدالله: -هاي البنت المعدلة هسة لو عدها اخت جان اخذتها لو جانت عمرها سنة هم انتظرها.
اللمة تخبل وسوالف عبدالله ورفيف محلينها وسجاد يخزر بيها بعد هي تربية عبدالله شيكول تكلة اي
رحنا اني وسرى نغسل مواعين ماخليناها تشتغل بس سوت الجاي وراحت يمهم...
-اي ست سرى شلونج شخبارج
-شوفت عينج
-تخبلين صايرة انغرمت بجمالج
-ههههه انغرمي دادة
-شلون روتينج
-اكعد الصبح اصلي وابدل اتريك على السريع وابوس حياوي واطلع للدوام
-شلونة الدوام وياج
-كلش زين باهر الله يخلية مخليلي مكان زين
-الله يخلية وين راح هم يجيكم.
-لا والله ماكو خطية عندة شغل كلة محافظات بالشهر مرة يجينة حياوي متعلق كل يومية يخابرة كاميرا يضل شكد يحجي وياة اصدقاء ههههه احمد يموت علية ومن يجي ياخذة يطلعة ويرجع محملة
-وسلينا وين راحت هم عندج تواصل وياها
-اكيد عندي تواصل وياها ماعايفتها دائماً نتواصل حالياً ساكنة بالخارج تدز صورها ومقاطع فيدو هي وبنتها يكول اجانب ثنينهم شكران وشعرهن اصفر وعيونهن ملونة متت بيهم بتها تحجي كلة انكليزي ماتعرف عريي.
-ربي يحفظها الها ويسعدهم، اي بعد شكو جديد
-ماكو بس احمد وشعوذتة خطية شالع كلب امي من يشوفها تضوج يجي يبوس بيها ويراضيها هي امة مو اني اكثر وقتي بالدوام...
خلصنا كلشي ما حسينة بالشغل السوالف اخذتنا غسلت ادية ورحت دخلت لكيت انمار هو وامي وسجاد على صفحة يسولفون ومهند وعبدالله ورفيف يلعبون بروز ويبوسون بيها...
عبدالله: -الفاهية صار عدها طفلة واني لا امداني
-لاتضوج حبيبي اعتبرها بنتك شفت شكد اني لطيفة.
احمد مات بروز يبوس بيها وسرى تصور بية تونسنا وغيرنا جو رجعنا لبيتنا...
اتصلت بهدى اشوف اخبارها خطية الحمل موتها وبطنها كبرانة انطتني زهراء يمهم هم سلمت عليها ثنينهن نفس الاشهر ذني حتى بالولادة سوى كالت اليوم كلهن متجمعات فرت الكامرا اشوف الهوسة الزينة سجى تلعب بنتها وعلى مكابلها يلعب وياها وفارس كاعد بحضنة امير دخل جاسب شايل بنتة انطاها لامة واخذ وراح لولدة يبوس بيهم مبين شكد يحبهم نزلت شروق من الدرج بيدها ابنها يرفرف على ابوة انطتة اله يبوس بية وهي راحت للمطبخ دخل عباس ابتسم يباوع لهداوي مد ايدة بيها جكليتة راحت اخذتها واجت كالت ثواب...
انطتني رغد احجي وياه خطية تصيح من جهالها
-انا راح اتخبل من وراهم
شروق: -جذابة فد حبابين بس هي تصيح بيهم
رغد: -ما يمشون مثل ماريد يبووو
صورتلهن بنتي وشلون نايمة كزكزن عليها وسجى تصيح قابل مثل بنتي ملحة بس همزين لكيتلها رجل
سدت الاتصال منهن والضحكة مرسومة على وجهي
رحت بدلت ومشطت شعري طاوقني انمار هاي لازم مستحيل اوكف على المراية اذا ما اجة، خلة راسة بركبتي يطبع بوساتة...
-انمار تحبني.
-روحي واعز من روحي اموت واحية بيج
-واني اعشقك ملجأي وملاذي حبيبي وزوجي يبووو احبك تعال ابوسك
-جدامج
طبعت بوساتي بكل وجهة وكطعتها علينة روز بجيتها
راخلها واني اضحك: -هاي ماتريد ننجمع تخربها علينة
-من حقها ابوها وتغار علية
ضربتة على ضهرة وهو يضحك اخذها يبوس بيها ويكلي: -حل الله حرك كلبج مثل ماتحركين كلبي بميمو
-دخل اروح اشوفة خطية جاع
رحت لكيتة شبعان حبيت اسوي خباثة واخذتة شايلتة من شافة عبس وجهها وصاح...
-ووولج لااااا طلعيييية
-لج شوفي ماما ابوج يخاف من قط صغير
-هسة اعلمج اليخاف تلعب روحي
خلة روز بسريرها واجة شمرت ميمو وطفرت رحت اركض وسحلني من التشيرت: -اخاف مو
-لا انت سبعي ماتخاف
-لازم تدفعين كفارة
سحلني للغرفة اريد اطلع روحي ماكو: -احبك نمروة بوسة بوسة اوكف لك انمار شوف مو اني احبك وبعد ماعيدها وداعتك
عضني بقوة ومسح مكان العضة: -وانا هم احبج بس عوفي سوالف البزازين
-خوش خوش.
عافني امشي ومن دخل كدامي كتلة انمار راح اجيبهن كلهن راد يجيني صحت اجذذذذب اجذذب
راح شمر روحة على السرير رحت يمة حضنتة
: -احسن مكان بالعالم حضنك
-مفتوح الج بكل مكان وزمان ام روزاية شسويتي بية
-ماسويت بس حبيتك هووووواي ههههههه
-اول مرة استفاد من العادات وحكمها مثل ما اخذت مني عائلة انطتني عائلة.
النهاية.
ابتدأت قصتنا بحكم العادات وانتهت بحكم القدر.
كانت صفحات مليئة بالتقاليد والعادات بعثرت ابطالنا مثل ورقات الشجر لكن كان حد لها ختم القدر ختمة واصدر قرارة بان يكون لهؤلاء الابطال المتعبين نصيباً من السعادة والاستقرار.