رواية بين سلاسل العادات للكاتبة كفاية كاظم الفصل السادس والأربعون
رغد.
كاعدة وايدي على خدي احس روحي تنهش من القهر ضربت رجلي بقوة ودموعي حالفات ينزلن
-شكد حقييير ونذل ياررربي صبررني بنذالتة ماشفت
سجى: -على كفيج وي روحج وداعتج مايسوة كلها كم شهر وتتطلكين هسة خو مايضل العمر كلة مخليج على ذمتة
رغد: -عبالي راح اخلص طلع الحقير ماخذ احتياطة وضامن حملي وانا شلون ماحاسة بروحي شلون
صرت اضرب بوجهي بثنين ادية والبنات لزمني يهدأن بية.
سجى: -وانتي شلون رضيتي يتگربلج هيج نسيتي.
رغد: -شبيج انتي شكاعد تحجين يعني من كل عقلج اسلمة روحي اخذني غصب الحقير الله ياخذة كلشي توقعت بس ماتوقعت احبل
سجى: -والله سالفتجن عجيبة يعني اكو وحده ماتدري بروحها شكد كاطعتها شني من بشر مادري
رغد: -من زمان تغيب عني مرات اسابيع متعودة عليها مو شي جديد اخخخ ولجن راح اموت قهر
سجى: -عليمن تنقهرين وهو متونس ماتسوة السالفة
رغد: -يعني صدك تحجييين ربطني بية طول العمر ضمني بهاي السالفة.
شروق: -ماكو هيج شي ضمنج وماضمنج ماطول دريتي هسة الطلاك ينعاد
سجى: -انا اكول اجلن السالفة لان ماكو نتيجة تعرفن جماعتنة شلون يفكرون وانتي عيني رغد ديربالج على روحي وعلى البطنج الطفل ماخصة لاتسوين بية شي جهنم وراج خافي ربج بية يصيرلج سند بالمستقبل وطلعي جاسب من عقلج راح يبدي الدوام ارجعي داومي وخلية بحياتة وانتي بحياتج
رغد: -الله كريم نشوف شلون تخلص وياة.
عقلي مشوش وروحي مكسورة خاصة من بعد ماتاكدت من حملي ولان ماجنت اعرف بية فطلاكي باطل المدوخني شلون جان متاكد واني الثولة مادري الضاهر متاكد من نفسة وضامن النتيجة.
جانت ابالي انزل الطفل بعدين عرفت بحجم الخطا وقبل لا ارتكبة طلعت الفكرة من راسي هذا الطفل هدية من رب العالمين والهدية رادلها شكر رغم كل الحزن والقهر البداخلي من هذا الموضوع تحمدت الله وشكرتة ماعرف ارادتة العضيمة شني...
حاولت اتجازة الموضوع واخفي اثار الحزن ثوب الضعف نزعتة من زمان ولبست ثوب القوة جاسب صار شخص عادي حالة حال حسن مثل ماحبيتة من كل كلبي وكرهتة وحاليا حتى ماكرها يجي يوم وجاسب حتى ماحس بشعور الكرة تجاهة...
كل واحد عاش حياتة هو ومرتة بعيدين عن نظري واكفة اكلب بالملابس اريد احضر روحي للدوام وهذا الشي الوحيد المفرحني ومرجع واهسي بالدنيا من اكعد واتخيل روحي اشتغل محللة ولابسة الابكوت الابيض وراتبي بيدي تنتعش روحي...
هدى: -شسوين
رغد: -احضر للدوام
هدى: -بعد وكت هسة دور الثاني بعدة ماممتحن
رغد: -الدور الثاني شغلتة طويلة نبدي دوام وانتم بعدكم.
انتبهت عليها مدنكة راسها ودموعها تنزل بهدوء لزمت ايدها بخوف ورفعت راسها: -شبيج هدوة ليش تبجين
هدى: -اخاف ارسب ماقارية شي
رغد: -كولي يالله ان شاءلله الاسئلة سهلة وانتي قاريتهن وضابطتهن من زمان شكو بعد
هدى: -نسيت كلشي المراجعة اهم من القراية كلها ماكدر اراجع زين راسي يوجعني
حضنتها ميتة قهر عليها شهگتها تطلع من كلبها حاولت اراجعلها وعباس من ينزل يضل كاعد يقريها ويشرحلها الاسئلة الوزارية والمرشحات.
شكد شفت ناس بحياتي بس ولا واحد صادفني بية حنية مثل حنية عباس عليها...
الساعة بالاربعة العصر وهو استلمها من الوحدة نامت ساعة واستلمها سويت كيكة خليت قطع بصحن وخدرت قوري جاي صغير واخذتة الهم.
عباس: -هسة شني الماضابطتة بالرياضيات
هدى: -بس الاشارات يعني الموجب بالسالب شيصير وذني
عباس: -اعيدها الج الموجب بالموجب موجب والسالب بالسالب موجب.
هدى: -اي ليش مو سالب مو هسة من ضربنة الموجب بالموجب طلع موجب شمعنة السالب انا هنا اخربط
عباس: -مو شوفي الموجب اعتبرية شخص كامل دين واخلاق من كلهن هذا راح يتزوج مرة نفسة راح تتغير اطباعة للاسوء؟
هدى: -لا لان المرة مثلة خوش
عباس: -شفتي والسالب هذا واحد ناقص راح يتزوج مرة مثلة ناقصة من ينجمعون يصيرون خوش ناس يعني موجب
رغد: -ههههههههههه انتم منيلكم هاي السوالف حتى خربتو القواعد.
عباس: -شسوي بية وماجاي احط عقلي واطلعلها تمثيل واشبة وياريت فايد
هدى: -لا والله فاد هاي بعد حفظتها ما انساها السالب مثل سجى وارفد والموجب مثل سفانة وفارس
رغد: -هاي كون تسمعج حتى تسويج ناقصة
طلعت منهم ورحت للمطبخ عزلت الكاونتر وكعدت احسب ايام ولادتي السنة الدراسية ست اشهر والحمل تسعة يعني بالعطلة اولد هم زين فززني صوت يكرها گلبي ابتسمت صفح ودرت وجهي
دخل هو ومرتة...
جاسب: -ها شلونج ام ابني.
رغد: -ميخصك هاي وحدة وشغله ثانية لاتفرح هواي مالك اي شي يمي هسة انت محرم علية
جاسب: -لاه غير لازم تدرين طلاگي باطل جنت اضحك عليج
رغد: -ضحكو عليك بجهنم كون ولا يهمك نجدد الطلاك وعلى العموم تبقة محرم علية لاخر نفس
جاسب: -نشوف ام ابني العزيز
رغد: -احس گلبي اشتعل نار من طريقة كلامة سكتت متجاهلتهم دفع مرتة بخفة وكال: -يلا مريومة سلمي على ضرتج الجبيرة.
اجت البنية وجهها مبلوع تريد تسلم علية خليت ايدي كدامي مانعتها: -وصل وصل مايحتاج
جاسب: -ماريد بينجن مشاكل اتفقن بينجن لان هذا عمر وقسمن ايامجن يوم الج ويوم لمريوم.
احس الدم صعد لراسي كمت ماشوف دربي ماحسيت غير شايلة السجينة وهاجمة علية جنت ناوية اخليها بكلبة بس من صدني نبتتها بزندة وصرت ادك على صدرة بحرگة واصيح بصوت عالي: -لانعل حضي الاغبررر وانعل اليوووم الصرررت بية باسمممك لو منطينييي فصلييية ولا راضييية بيييك مستفزززز مرريض خاااين غداااارررر.
ماحسيت غير اجتني دفرة شمرتني بعيد لزمت الحايط ودرت وجهي علية اشوف الدم تارس الكاع ومرتة جامدة بمكانها حتى ماتصرخ دخلن نسوان عمامي وشافن الفاجعة قبل لايصرخن طلع من المطبخ...
كلها تجمعت على الصوت محد يعرف السالفة شني رحت بوجهي للغرفة سديتها علية ورحت ادور على الموبايل ايدي ترجف كلبت الغراض يلة لكيتة اول مافتحتة شفت رقم رحمن اتصلت بية ارجف
-رحم. خوي...
اريد اكمل جملة ماكدر صاح بصوت مليان خوف: -رغد بس لاصار بالفرخ شي ليش رغد لييششش ذبيتية مو.
كطعت كلامة واردفت صوتي يرجف: -السجينة السجينة خليتها بيدة
-شسويتي شصاااار فهميييني
اخذت نفس وكعدت بالكاع: -حرك دمي وضربتة بالسجينة بيدة
-جاسب؟
-اي هو هووو
سدة بوجهي شمرت الموبايل من ايدي ارجف مو خوف وانما رهبة شلون تجرأت منظر الدم براسي
غمضت عيوني اسمع الباب يندك مافتحت الباب ولا هتميت لكلام احد.
دك الموبايل شفتها سجى فتحت الاتصال واجة صوتها: -شلونج ولج؟ سوالج الشي؟ طكج؟ شصار شسويتي
نزلن دموعي والشهكة طلعت من كل كلبي: -سجى يكلي قسمي الايام بينج وبين مرتي
-من غسل اليغسلة خاب وعلى مايسوة تبجين علية وحيل بية لو مخلية السجينة بكلبة حتى نرتاح منة
اجة صوت ارفد: -بوية منجن النسوان والله تخوفن كلة كتل وصلخ وذبح
سجى: -امشو عدل واحنا نمشي عدل الاعوج تاليتة بالحديقة ندفنة.
سمعت صرختها وانسد الاتصال ماطلعت لمن اجة رحمن فتحت الباب راساً حضني بجيت بحضنة بقهر
وهو يمسد براسي ويردد: -حصل خير، خيولي لاتبجين محد يستاهل دموعج
-يريدني ارضة واضل وياة على شرك والله لو يصبونة إلى ذهب روحي ماتريدة ولا تهواة
رحمن: -هذا هو بس جيبي بالسلامة اول لان هسة القيامة كابة عدنا
-ما اريد ارجعلة والله لو رجعتني اله احرك روحي وخطيتي بركبتكم
-لاتحجين هيج عمرج غالي مايتعوض لاتفكرين بالحرام وراج جهنم.
-طلكوني ماريدة
-هسة طلاك ماكو بس اضمنج شي واحد مايلمسج ولا يتكرب عليج
مر اسبوع خف طاري السالفة وحسب السمعتة السجينة كاطعة شرايين ومخيطينهن الحجي الصار علية بفلس بس ماهتميت ولا راددت واحد ورحمن تعارك وياهم وصار بوجههم وكال: -اليحجي وياها اخلي دمة بطولة
حتى ابوي كام مايحجي وياة الشي المفرحني ومقويني وجودة بحياتي حسيت بروحي مسنودة فعلاً الاخ سند...
الساعة بالعشرة بالليل شروق تتنسة وروحها رايحة سويتلها صينية مشكل طرشي وليمون اقراص ملح بصحن وخيار كطعته رشيت فوكة سماك وحلاوة بصحن وعصاير ولبن لان كل شوية مشتهين شي
بعدني ماشايلة الصينية ودخل نزار سحبها من ايدي وخلاها على الطاولة باوعلي تعجب.
نزار: -شني هاي شو انا دايخ مو
صار يفرك بعيونة ورجع كال: -لا والله هذا الصيف والشتا البرد والحر مجتمع عود صدك هاي عصير ولبن ليمون وطرشي وحلاوة دخيلك يالحمزة.
دخلت بهدومي من الفشلة تحمحمت: -مو هاي لهديوة وهذا لشريقة
-ها اي كولي هيج روحي روحي صارن الي
يجيب قرص الليمون يغطة بالملح بعدين بالسماك وياكلة ويصيح: -اححححححح بوية
من يمي حمضت كعدت يمة وصرت اكل وياة واحد يكل للثاني: -اححح والله حامض
نزار: -يشيل فلك طرجن شلون تاكلنة بس طيب
رغد: -حوامل نتنسة مو بيدنة
نزار: -رجولتجن حموضة وتتنسن بخموضة باع القسمة الزالفة
رغد: -امر الله هذا.
نزار: -سبحانك ربي اكلج صدك لكيتلج شغلة بيها طن فلوس تشتغلين؟
-الله وايدك كول شني من شغلة
-وي عصابة مو بس انتي انا وياج هم ماعوفج وينطونة خيرررر شدات
-عصااابة!
-اممممممم عصابة شبيج سويتي روحج فقيرة هما محتاجين مرة وانتي صايرة تخوفين صيتج طر السلف كلة وهما من سمعو بيج اجو علية كلولي اله بقشيشات بس اقنعها شكلتي
-عود تحجي صدك
-خاب مال الغسل جا اجذب ولج فلوسسس
-خاب طير.
-خاب دولي ضلي تعاركي بالسجاجين انتي والمجسب
-عندي الاقوة
-صايرات مدري شلونجن هاي سجيوة علمت هاي الدروب اخذ مرتي كبل لاتعلمنها وياجن انا رجال فقير بس اشوف الدم تموع روحي
طكيتها بضحكة قوية ماشوف الا البنات فوك راسي خازراتني...
نزار: -فكس لهلعيون شمالجن تخوزرن
شروق: -انا مو صارلي ساعه متانيتج تاليتج توكلين بنزار
نزار: -هسة ماكل من فلوس رجلج الغثة خفة هالوجة الاصفر.
تجاهلت كلامة وكعدت تاكل نزار عيونة صارت على زهراء اول مرة اشوف واحد تضحك عيونة مو اسنونة...
نزار: -يا ناموسة وينك وينك شفتك شفتك يا ناموسة
رحمن: -اهلاً بالنمس
نزار: -اهلاً بابو الحكم لم رجال الحارة بساااع
رحمن: -غير يكعد راحة ابو النار كل يومية مطبور خدة
نزار: -فشرررت
رغد: -هاي ام عصام سعاد ههههههههههههههه
طحنة صفح من الضحك على سوالفهم بقى يمنة 12انوب يسحل بزهراء يريد ياخذها وياة كوة رحمن طلعة...
اجتني الصبح شروق انطتني مبلغ: -هاي رحمن عافهن الج كال خل تروح وي امي تشتري غراض للدوام عندة شغل
رحت بدلت واخذتني امي اشتريت بشتات وفساتين حوامل لان اني مالبس عباية ماخليت شي بخاطري عطور اكسسوارات احذية جنط الفلوس كفن وزاد منهن رجعت للبيت لكيت هدى جاية من الامتحان تصفن...
-ها شلونج جاوبتي
-نص ونص
خطية خلصت امتحاناتها بالف ياعلي كل ماتجي من امتحان تضل تصفن ومن الحكها الكة عيونها حمر من البجي...
مر فترة على بداية دوام الجامعات خليت الدوام يستقر الا قررت اداوم جاي احضر ملابسي لباجر طلعت فستان كلت البسة مادام بطني مامبينة ولو هو عريض ذبيت البيدي من سمعت الهوسة جوة...
سجى...
الوضع صار ينرفزني ماكدر اتحمل اكثر من هيج ماكو هيج بشر عايشين ويانة جنت اكول عيب هسة يعتبرني من هذا النوع الماتريد اخت لو ام كلت خل احجي...
جان نايم على الجرباية يلعب بموبايلة رحت يمة صرت العب بشعرة: -اكول ارفد انا ما اجذب ولا اكدر اضم عليك
رفع راسة يباوعلي بمعنى كملي: -اذا احجي توعدني ماتسوي مشاكل
نهض روحة عيونة بيهن اسئلة واجوبتهن موجوده بس يريد يتاكد من كلامي: -شكو شصاير؟
-بالبداية احلفلي ماتتهور
-احجي بدون مقدمات
لزمت ايدة وبلعت ريك خفت يسويلنا سالفة احنا بغنى عنها: -رجل امك مرتين اجة للبيت من ورة ماتطلع
بعدني مامكملة كلامي طفر من مكانة مثل الاعصار يصيح بصوت عالي: -وووولج يمممممة احنااااااا شلغيييناااااا
طفرت اركض وراة متندمة لان كتلة هو بالاصل اريد احجيلة على اختها ورجلها الكاعد يمنة طلعت عمتي مافاهمة السالفة يشيل روحة ويدگها بالكاع...
ارفد: -اناااااا موووو كتلللللج بييييت ابووووي النكسسس مايطبلةةةة هالكلببببب شكوووو تجيبيييينة شكوووووو لانعل ابووووة واشرررب من دمممممة وكوليييي ارررفد ما كاااال
يحجي وياها وعيونها علية تباوعلي بعدم رضا سحبتة من ايدة شفتة فقد وخاف يمد ايدة عليها لان شكلة مو بوعية نترني بقوة وهجم يكسر شكو شي يطلع كدامة والسانة يسب ويغلط...
عافتة ودخلت لغرفتها واني ضليت بوضع الصدمة اشوف كدامي وحش على قمة انهيارة مافكرت ولا شوية بالوضع الراح يوصلة من يسمع...
رحتلة اركض من شفت ايدة اخذها الدم سحبتها ونترني بقوة يصيح بدون مايباوعلي: -عوووفيييني لاتلزززميييني صرررتي حنيييينة علييييية
مافهمت عليمن يقصد بس اكيد مو علية سحبت ايدة بقوة لفيتها بشالي راد ينترني صحت بية...
-شبييييك شبيييييك دممممك رااااح يخلصصصص.
سكت يتتفس بقوة وجهها صار ازرگ كوة خلاني اعقم ايدة والفها طلع بعد ماشفتة ومن يومها وعمتي كلمة ماتحجي وياة الصراحة خايفة من هدوئها.
ارفد بدة دوامة ولحد هذا الوقت مايحجي وي امة اخوتة الباقيات مايجن ابد كم مرة شفتهن حتى شكولهن نسيتها ملتهيات بحياتهن مامعتبراتة اخو بس اختة (سناء) هي وجهالها اشوفها اكثر ما اشوف ارفد...
كاعدة بالمطبخ حاطة ايدي على خدي اباوعلها هي وجهالها ارفد حذرني بطريقة غير مباشرة منها كال خلي عينج منها لاتخلينها وحدها سالتة ليش بس ماحصلت منة جواب وافي...
سناء: -وينج هيوو اريد فلوس
-وانا شكو رئيس البنك المركزي
-هسة شني لسانج شطولة حسرة نحجي وين فلوس اخوي
-بجيبة
-الفلوس العندة ياجيب اليلمها
-ليش تحسسيني يشتغل وي الوزراء ترة هو استاذ وراتبة يادوب يكفينة ويضمن عيشتنة.
ضحكت بصوت عالي وهزت بيدة بقيت متفاجاة بس سكتت حتى تكمل كلامها كالت وهي تكشر موز لجهالها القرودة...
سناء: -خير عد رجلج هذا البيت باسمة وسيارة ووو.
بقت تعدد املاك اله نكرت كلامها: -شبيج حبي بيج شي انتي منيلة هيج
-ورررث ورررث ابوة عافة اله وعيني عينك لا اخو ولا اخت بس اله يلعب بية جا نفس حضنة ابونة مهتلف كلشي ماورثنة منه مخلصها يجدي من امي نسحبلة فلوس وتنطية.
كمت منها مصدومة وبنفس الوقت من طريقة كلامها المستفزة تذب حسرات نافستة...
بقة سؤال يدور براسي ليش ماكالي ارفد طردت الافكار وكلت يجوز ناسي او ماخاطرة السالفة براسة وانا هم استحيت اسئلة خفت يفكرني طماعة...
صبيت غدة اخذتة اله بالغرفة لان الجهال دمرة وتلعب نفسة جاي ناكل وكتلة بالحجتة إلى اختة اكدلي كلامها...
: -زين ليش انا ما ادري شمعنى ماتكلي
-والله مو بالي و لا انتي سائلتني.
-اكلك رجل اختك مقيم يمنة هو مرتة
-احساس مشيول منة وانا هم حجيت وي اختي علية
-اكول صارلة فترة ماكو
كملنا غدة وشلت الصينية غسلت المواعين ونضفت المطبخ عفتها هي وجهالها بالاستقبال كاعدة على البلازما وصايرة لخة متعجبة بيها غير تجي تسولف وي امها تكعد هاي اشو لو تجي تابع مسلسلات لو تاكل...
اخذت ملابس ورحت سبحت مشطت شعري وتعطرت رحت يمة خليت ايدي بشعرة اسويلة مساج
-اي منا منا
-لك مو تدلل
-لك استغفرالله.
-استغفرالله عليك واكف على لساني حسرة علية احجي شي
-هسة جذبي جذبة بيها خير ماتشوفيني مدد شوكت وكفت على لسانج
-بدا التمس.
خليت ايدي على حلكي وهو طفر زحفت اريد انزل وسحبني من شعري: -شعررري ووولك يبووو هد شعري لا اموتك
-ليش ماتعرفين تحجين اكو وحدة تكل لرجلها تمسلت
-والله مو كصدي اسفة اسسسسفة.
شمرني على الجرباية انبطحت على ضهري صار فوكي دفرتة برجلي ثبت رجلية برجلية لزمتة من صدرة جاعصة بيدي التشيرت: -بس تسوي شي غير قانوي ا.
-كملي شتسوين
-ابوسك حبيبي
رفعت روحي بستة ومررت ايدي على وجهها: -فدوة لله وعطيتة صاير تخبل
-شوكت تصيرين مثل الاوادم تحجين عدل
-احبك واحب كلمن يحبك
خنكني بيدي احسة يدغدغني صرت اضحك وادفع بيدة: -مو هيج ولك
-هم كالت ولك
-هسة مو زين جا تذكر من جنت اكلك انجب.
بس حجيتها حسيت لحمة طارت من زندي دفعتة مايندفع ضربتة حيل على ضهره: -خررب ابليسسسك
طاااارت الحمة طاااارت
-احححح خل تطير بيج هواي لحم
-منيلي لحممم منيين اشووو باقية بس جلددد
دفعتة ونزلت من الجرباية امسح بيدي صايرة زركة مووتتني وجع شفتة تمدد وخل ايدة على وجهي
ارفد: -طفي الضوة وياج من تطلعين
-انا اعلمك الاملح.
كمت رحت لفيتها باندج والله صارت توجعني حيل رجعتلة لكيتة نايم لكيت المكص على الميز سحبتة ورحت امشي على اطراف اصابعي كعدت يمة بهدوء
ومديت ايدي بشعرة اريد اكصة بعدني مامحركة المكص وطفر بوجهي طلع كاعد رحت اركض وردت اطلع وسحبني من تشيرتي.
طبكني على الحايط صدري يصعد وينزل جعصني على الحايط كرصتة من زندة كفخني راجدي ردت ارجعة ولزم ادية خلهن ورة ضهري طابكهن سوة ويمشي بية ضهري صاير بصدرة...
-عووفني ترة انت علت بية وانا كل هذا ماسويتلك شي
-لو ماكاعد بيج مكرضة شعري العوبة
-ماكو غيرك الاعوب
دفرني على الجرباية طحت على وجهي ردت اكوم وطوقني: -l m sorry
-تفيدج انا من الاول ناويلج على نية كشرة بس عبرتها وانتي جبتيها
-يلولد الله بالخير عليك ترة انا احبك شبلاك
-السانج اعدلة الج ok
-يبوووو No No No.
الساعة الاربعة العصر ارفد طالع من البيت واشوف الجهال يحجون وي امهم: -يمة انطينة الف مو خالي انطاج كومة فلوس
سناء: -ولد القندرة الفلوس لحلككم لو نصخم بيها روحو لحبوبتكم تنطيكم
راحو يركضون رجعو بيدهم فلوس شوية واندك الباب عرفتة رجلها اجة ياخذها سديت باب الاستقبال المفتوح بالصالة ورديت باب المطبخ اجو الجهال كالو امي تكول سوي عصير لابوي وخلي ماعون فواكة...
-هو انتو خليتو فواكة حتى الخيار والطماطة عبالكم فواكة
دورت بالثلاجة مالكيت فواكة وين يخلون صبيت عصير وضامة حلويات خليتهن بماعون لان هاي تفضحني وهو رجلها يبقة حتى ياكل شلت الصينة انتضرتها تجي ماكو طلعت بالحوش الباب مفتوح والجهال طالعة...
دخلت جوة عمتي بغرفتها من شفتها وشافتني اشك بيها مريضة نفسية شكلها مو طبيعي لا تحجي ولاتسوي شي...
خليت اذني على باب الاستقبال واسمع حديثها هي ورجلها فتحت حلگي و شهكت من انفتح الباب بوجهي...
سرى...
بيدي وردة اركض اريد انطيها اله جان يمشي وي اصدقائة صحت وراة باسمة التفتت خازرني لاول مرة ارفع صوتي تقدمت باتجاهة قدمتلة الوردة ورجعت كذلتي ورة اذني باوع عليها اسحيت من شفتها ذبلانة...
-هاي صار شكلها هيج لان تاخرت يلة لكيتك
ابتسم ومد ايدة اخذها وكال: -ليش كطعتيها الورد قيمته وجمالة يروح من ينقطف
-مو جنت اريد اهديلك هدية ومالكيت غير الورد.
فزيت على صوت صفية تصيح باسمي فتحت عيوني بقوة ولزمت راسي اني وين جنت؟
باوعت لايدي كاطعة وردة من الحديقة بهتت ملامحي ودموعي صارن بطرف عيني شرجعني للماضي! ليش اني شوكت نسيتة احد مواقف طفولتي الحلوة وي حياوي...
اجت سيلي شايلة احمد بحضنها جاية باتجاهي
-ابنج مدام ماخلاني انام
اخذتة منها شميتة وبستة: -تحملونا بس كم يوم راح نرجع لبيتنا لا شنو غير ترجعين ويانة.
-لا سرى بعد تعذريني ماكدر اجي مادام ولدتي خلصت مهمتي
شمرت شعرها ورة ضهرها تلعب بخد احمد عيوني تجول بملامحها وجهها شاحب جوة عيونها هالات سودة: -سيلي انتي مريضة شي؟
جاوبت بتوتر واضح على ملامحها: -ها لا مبية شي
-بس شكلج يكول غير شي
-شيبين عندج؟
-ماعرف بس احسج مريضة لاتهملين نفسج
-تعبانة شوية بس.
دارت وجهها وراحت حتى لا يطول الحديث اكثر علاقتها بية جاي تضعف ماتختلط بية بصورة عامة وي الكل مو بس وياي مختفية عن الانظار ماجاي الاحظها بكعداتنا...
اخذت احمد ودخلت جوة اسمع صوت نقاش عالي بس ماكدرت اميزة بس صوت الحارث جان واضح
هالعائلة غريبة كلش يوم عن يوم تتراكم بداخلي الاسئلة تجاهم...
غيرت ملابس البيبي وسويتلة ممة خليتة بسريرة وباوع لملامحة احس الفرح تارس روحي من اشوف ثمرة تعبي بحضني تاكدت الدنيا اخذ وعطا اخذت مني شخص وانطتني غيرة...
احلى عطايا الرب النسخة الصغيرة من حياوي من كدما جان على بالي طلع يشبه.
اخذت علاجي وبقت بس الابرة رحت لصفية ضربتها إلى بالساعتين اني خدرانة عيوني ما افتحها من ورة العلاج ومفعولة القوي...
فتحت عيوني لكيت باهر كاعد مخلي احمد بحضنة مطلع اديناتة ويضرب بيهن وجهها ابتسمت على منظرهم خفت لا يتعلق بية زايد ضحكت من شفته يلعب وياة ويكول...
باهر: -قال قيلو من قتل الفيلو بت العسكر كامت تسكر من سكرها الورد الاحمر
انتبة لضحكتي دنك مستحي يبوس برجلة: -يصير اكلة لو ميصير
-اذا جوعان اكوم اجهزلك اكل
-جوعان هذا الفصعوووون لك اموت بية
-بعدة صغير شحبيت منة
-كلو يا بابا يا بابا ناعم مثل الحرير لك جننني.
-ههههههه تخبلت باهر
-من شفتو لاول مرة عقلي ضرب هاج اخذي ابنج
خلة بحضني دنكت بستة رفعت راسي على سؤالة
: -شلون صرتي
-اخذت العلاج شوية فكني انت شلونك
-الحمدلله اروح محتاجة شي
-وين بس لاعندك مهمة جديدة!
عبر ايدة على شعرة وهز راسة: -شسوي يولو. سمطنوني سمط ماتخلص شاسوي مابيدي شي
ان شاءلله هاي اخر مهمة
-الله يسهلك ويساعدك
راح باهر وماعرف المهمة الجديدة شكد تطول بس حسب كلامة مو اكثر من شهر...
احس روحي طكت من كعدة البيت مامرتاحة اكو شي زاعجني ردت اتصل باختي لكيت موبايلي طافي شحن خليتة على الشحن تاكدت من البيبي نايم وطلعت برا...
الجو حلو كلش وبرودة المكان تنعش واكفة واتامل الطبيعة حرك اقدامي صوت بكاء من تقدمت عرفت سيلي ليش تبجي!؟
جانت كاعدة بالكاع مخلية راسها بحضنها وصوت شهكاتها عالية خليت ايدي على ضهرها طفرت من مكانة دارت وجهها تمسح بدموعها سالتها بخوف
-بيج شي سيلي؟ احجيلي.
-مابية شي بس تعبانة
كالعادة حتى كلامي ماكملتة اختفت من انظاري وعافتني بوسط افكاري وخوفي عليها...
مشيت مسافة وصارت بوجهي نهى فتحت عيوني متفاجاة من جيتها لبيت الحارث اول ماوصلو بقو اسبوع يمي وبعدها انتقلو لبيتنا القديم...
وجهها اصفر والخوف باين على ملامحها لزمتها من ايدها وسالتها بخوف: -شكو نهى شصاير؟
نو.
لبست صاية وذبيت شال على راسي فتحت الباب وصرت وراة صحت منو؟
ما اجاني رد مديت راسي وانصدمت احس الرجفة صارت باطرافي الخوف امتلكني بهاي اللحظة!
ضرف علية قطرات دم وطلقة متوسطتة دورت عيوني بالشارع فارغ مابية طير الطاير شلت الضرف من الكاع يرجف بيدي من الخوف الطلقة بيدي تلصف من الشمس دخلت وفتحتة حتى الهوى انكطع عني من قريت المكتوب بخط واضح...
-لاتلعب بالنار نهايتك تحددها طلقة.
شمرتة من حسيت ايدي انصبغت احمر رحت اركض اغسل بيها ودموعي تنزل ركضت قفلت الباب الداخلي ورحت ادور على التليفون اتصلتةبية مباشرة گلبي يدك بقوة اجاني صوتة شهكت.
-تعال هاي طلقة بالباب راح يكتلوك بيها
انمار: -شكو شصاير
-راح يموتوك لا تجي انهار هاي طلقة تمووت والله
مافتهم شي من كلامي ماكدرت احجي من الخوف
انمار: -جايج لاتفتحين الباب ضلي بغرفتج اقفليها عليج.
الخوف امتلكني بهاي اللحظة تخيلت مشاهد مرعبة ركضت للغرفة قفلتها خفت لاتجي مجموعه يكسرون الباب ويدخلون زحفت جوة الجرباية...
مر وقت بس دموعي تنزل شنو شغلك يا انمار حتى تجيك تهديدات للباب؟ حسيت الباب انفتح بعدة طرف الجرجف باوعت حابسة انفاسي اشوف عيونة حمررر وايدة تختض يدورني بعيونة زحفت على بطني وطلعت ركضت لحضنة المكان الوحيد الاحس بالامان بية...
اشهك وابجي يحاول يسكتني ويهديني طلعت الرسالة والطلقة اخليهن بيدة وابجي بخبال: -هاي هاي راح يكتلوك بيها مثل مثل ماراح اخوي هم انت هم بعد يبعدوك عني امووت امووت
-كافي كافي بوية ماكو شي جهال نلعب بيناتنة شبيج اصدقائي ذولة مسوين بية مقلب
-يا مقلبببب شبيك انهار هذا مقلب تهديد الك هذا
-يابة شلون تصدكين هذا مقلب صاحبي الكلب سواة بينة كلنا حتى عود يشوفنا نخاف لو لا
-جذاااب ادرري تجذبببب.
-هسة اخابر على جماعتي واتاكدري بنفسج
غسل وجهي وشربني مي سحبني علية مكعدني بحضنة ضامني لصدرة يمسح بوجهي وموبايلة بيدة يتصل ماعرف بمنو بس اجة صوت شاب كلة.
انمار: -اجاكم الضرف للباب والله مقلب ابن الكلب عبالة نخاف
-بطران يخوي اجاني هم والجهال راسمين بية
انمار: -خبل هسة مال مقالب همزين ما واكف گلب البت
-ولا يهمك هسة اروح اسحلة الك سحل
-ماتقصر شوف شغلك.
سد الاتصال ودنك باسني بقيت لازمتة من قميصة بقوة حتى صوتي اختفى مرر اصبعة على خدي
-شكر شني سالفتك بوية
-خايفة
-افاا تخافين وانا موجود
-عبالي عصابة يكتلوك ويرجعون علية مثل البلمسلسلات
-جا المسلسلات وين وحياتنة وين لاتخافين هذا واحد قشمر هسة اروح أدبة
-لا تروح حباب
-يمج ماروح بس كومي جنج بزونة خاتلة بحضني
-لاتعيب كلة من وراك ومن ورة صاحبك الزمال اكو واحد هيج يسوي مقلب.
-اندري انتي كلتي زمال هي الزمايل تفتهم شي
-لا
-مو بلة
مر اليوم كاعد وياي ينكت ويحشش خلاني اصدك هالشي مقلب الخوف غادرني بسرعة مثل ما امتلكني
كاعدة احجي وي البنات اتصال جماعي سديت الاتصال ورحت اشوفة وين صار كاعد بالحديقة يخابر ويكتب كعدت بصفة جان فاتح سبيكر سدة ورجع يكتب انتظرتة خلص وكتلة: -ليش ماتريدني اسمع شدكولون
-حرام تسمعين صوت الاجنبي
-يمة منك عيار وجذاب وين لكيتها هاي
-بالشارع يم الباب.
ضربني على خدي بخفة ولم اوراقة دخل ورحت وراة اجاة اتصال وكعد يحجي عفتة بعد ورحت اسبح جهزت نفسي لكيتة يريد ينام...
-وين بس لاتنام
-جنت اريد انام بس من شفت هذا الجمال بطلت
-عادي اذا تعبان نام
رحت يمة سحبني علية باسني وشمني بقوة: -اذووب بيج
-شكر انت واني جاي حتى تذوب بية
-انتي روحي وراحتي واخر ندة عللورد ينزل انتي ليل ولالتي وتفاحتي الجمعت حلاة الشمس والضل
-ههههه فدوة شكد حلو هالكلام هذا يقصدني مو.
-لا يقصد الطنطل النايم بصفي
-يمة وينة
حضنتة بقوة اتلفت ضحك بصوت عالي وابتسمت وياة: -اليبتلي بفاهية شيسوي؟
-يبوسها ويسكت
-بس بوسة
-بعد بكيفة هاي
-خوش حجي هذا صايرة تعجبيني كلش كلش
طلع للدوام وصاني مافتح الباب دخلت جوة لكيت الموبايل يرن ابتسمت من شفت المتصل عائشة
بقينا نسولف وسالتها عن الكل واخيرا عن عمي.
-زين كايم وطايح نريد نجي لبغداد ونمر عليكم
-الله حبيتتت ارريد اشوفج مشتاقتلج كلش.
فعلاً بعد يومين اجت هي وعمي فايز جانت عدهم مراجعة دكتور ومناك زارو الامام واجونة رحبت بيهم وطرت فرحة عمي فايز تعبان والمرض مبين علية...
جنت متحمسة اشوف علاقة انهار بابوة بعد هذا الزمن اجة سلم علية اعتيادي وكعد عمي ما سألة هواي بس عايشة ماخلت وهو يجاوبها بكل اريحية
يومين بقو يمنة تمنيت عايشة تبقى تعيش ويانة جلبت بيها: -حبابة ابقي يمنة شتسوين راجعة هناك مامليتي؟
-لا يمة ديرتي ماكدر اعوفها وعيالي مناك.
-حبابة ابقي يمنة تونسينة
انمار: -يمة ترة تجذب عليج تريدج تطبخين بدالها وهم تغسلين المواعين وياها ادري بيها مرتب استغلالية
-عزااا عمة والله يجذب ماريد منج شي بس تبقين
انمار: -حتى تشرد بليلة ضلمة من بزازينج
-اهووو انهار شبيك وياي شوفي عمة هو ميريدج تبقين يمنة
عائشة: -حكة غير يحلالة الجو وياج حا وين يلكة هيج احسن مايخلصها بالختلات مثل ماجانو ربعة
انمار: -يمة انتي لازمة العشيرة كلها.
عائشة: -هما يطلعون جدامي شسوي
انمار: -بعد طنكرت شكر شوفي يمة شوفيها
عائشة: -اجي يمكم من يصير عدكم جهال عايلة بيج
انمار: -لا والله ها سمعتي جيبي جهال وتجي تداريهم بدالج شكلتي؟
هزيت راسي وهو وامة ضحكو راحو واحس البيت فرغ تونست وياهم وفكرة اكو اشخاص وياك يسولفون ويشاركونك يومك حلوة...
جنت كاعدة اكوي ملابسة اجة سبح وكال: -تحضري الحارث عازمنة.
بدون ما اسال طفرت فرحانة رحت اسبح واجيت اطلع ملابس حضني من ضهري وخلة راسة بركبتي
-شنو البس فستان لو لبس رسمي؟
-كلشي يلوك لاميرتي الحلوة
-لعد البس شي رسمي
طلعت قاط ازرك كسرتة بربطة بيضة وبوت ابيض وجنطة كذلك طلعت فرحانة بشكلي وبطلعتي متحمسة اشوف سرى وابنها...
-ها شلوني حلوة مو؟
-تموتين خرب غيرتج شلون تخليني ابطل ازرك وانتي بيضة اخ يالفاهي يالماتحس بية
رحت خليت ايدي على صدرة: -افا اني ماحس بيك
مو عيب.
كزكز على سنونة واخذلة نصيب بالبوس كوة شلعتة وصلنة لبيتهم لكينة الكل مجتمع سلمت ورحت ادور سرى ما لكيتها طلعت من الباب الخلفي ماشفتها يمكن مادورتها زين هسة تطلع بالمطبخ لو يم سيلي
صارت رجعتي من الباب الرئيسي يعني ارجع افوت منهم رجلية يبسن من سمعت الحارث يكول...
-شوكت تعلن عن زواجك بسيلي
احس الهوى انكطع عن ريتي من سمعت المقصود انمار وجاوبة: -بعد مو وكت.
الحارث: -السالفة طلعت من ماعونها يا انمار والبت حامل ماريد مشكلة وي اخوي وابنة
صرت عيوني ماشوف بيهن جسمي كلة يرجف وكعت بالكاع ماكدر اتنفس كوة اجر الهوى اذني صارت بيهن وشوشة مستحيل السمعتة صدك اكيد غلط السمعتة
وكفت على طولي والطلق صار فوك راسي وكعت بالكاع و...