رواية بين سلاسل العادات للكاتبة كفاية كاظم الفصل الرابع والخمسون
سجى.
تقربت على الباب خليت اذني وصرررت ادددك بكل قوووتي واصييح عمتي لان حبوبتي ماتسمع الباب مقفول وهي نايمة ماكووو صووت حنجرتي انشلعت احس صوتي طبك وماكو جواب لا من عمتي ولا من حبوبتي...
ردت اطلع بس خفت تضربني وتموتني صح اني قوية بس ماكدرر اطلعلها بلعت ريك وايدي ترجف خليتها على يدة الباب اريد افتحها واسمع صوتة فحطان يكلها؛-ووووينهاااا شلوون عرررفت.
سناء: -اااانا حجيتلهااا من حررگتي مادرري شلووون حجيتتت
ابتعدت عن الباب خايفة گلبي يدك بقوة الخوف نخلني نخل صار يضرب على الباب بكل قوتة يصيح
-للججج افتحيييي البااااب افتحيييية بس احجيييي ويااااج مااسووويلج شييي
سناء: -جنك تخبلتتتت شنييي ماتسويلهاااا شي ولك موتهااااا هاي راح تعترررف عليناااا ندخل سجوون من وراااك ورررطتنييي من حجيتلييي.
نزلت علية انواع الغلط وهو مثل الثور هجم عليها صاراخها ترس البيت دفعها بقوة سمعت الطبة باذني ورجع يدفر بالباب احسة راح ينقلع الساني انبلع اريد احجي ماكدر عقلي وكف عن التفكير...
رجعت اسحل بروحي من الخوف اباوع بالغرفة اريد احتمي بشي اباوع للحيطان اتوسل بيهن يحمني من الراح يصير لزمت بطني بخوف يمة راح اموووت على ايديهم النجسة...
ضميت روحي بين الجرباية والميز خليتة كدامي والباب لازال يتكسر شهكت مخلية ايدي على حلكي من سمعت الباب وكع بالكاع وهو دخل صوت نفسة مسموع ويصيح لمرتة: -بتتتت الكلببببب سجيننننة بسرررررعة.
تشاهدت على روحي ودموعي تجري جسمي يرجف من الخوف اسمعهم يحجون بقتلي حسيت روحي انسحبت من اجو يدوروني ويغلطون علية ضميت حتى راسي اختفى صوتهم طلعت عيوني ارجف واشوفة يباوعلي مبتسم توسلته بعيوني بس جان ناوي موتي عيونة كلها شر تقدم يباوع للباب
لحظات كفيلة تخليني اتشاهد واموت قبل لايجي عزرائيل يقبض روحي...
خوف، رهبة، ررررعب، كلهن ملتمات بس لحظة بس لحظة انقلبت الطاولة وصوت سيارات الشرطة طوق المكان فتحت عيوني على وسعهن اباوعلة راح يركض بعد ماكدرت اتحرك من مكاني شكاعد يصير نجيت اني وهالطفل خلصت منهم ورجلي هم خلص
ضحكت بخبال ودموعي تنزل بعدني مامصدكة الصار ماكدرت اتحرك من مكاني لمن الشرطة داهمو الغرفة كمت مرعوبة اتراجف سن يطك بسن ماعندي غير كلمة: -ارفد بريء والله هو بريء.
رافعة ادية والضابط دخل يسالني: -انتي زينة سوالج شي
هزيت راسي برعب: -لا لا زينة نجيت ربي نجاني انا وابني نجيت رادو يكتلوني والله رادو يكتلوني وهنا يدفنوني حتى يكولون شردت وي واحد
دموعي تنزل بغزارة ويسالوني واجاوبهم دخلت حبوبتي مثبتة نظراتها علية واكفة بشموخ كل شوية اباوعلها وارجع اجاوبهم ركضت طلعت التليفون وادية ترجف حتى صوتي يرجف: -هنا هنا الاعتراف سيدي هو بريء هم الكتلوة والله بريء.
اخذو التليفون مني واخذو اقوالنة حتى ام ارفد حجت كل الصار وهي المبغتهم يجون مر اليوم ماعرف شلون مر طلعوني من البيت ابجي واضحك وارجف كلهم تواجدت من عمامي ولد عمي نصهم ماراضين ويحجون علينة بس اني مايهمني يهمني ثبت برائة رجلي...
ساعة بعد ساعة سؤال بعد سؤال ضجيج حاوطني فرحة منتظرة التحقيق...
سناء وزوجها لزمتهم الشرطة بعد ماثبتت عليهم التهمة قتل عاصم ومحاولة قتلي عمتي قدمت اقوالها بالسمعتة والشافتة التسجيل صار بيد الشرطة وبعد اشهر طويلة وسلب حرية شخص بريء ثبتت برائتة بكل الطرق ثاني يوم بعد الصار متصلين بتليفوني وابو البيت فاتح الكامرات ومسجلة عاصم ورجل سناء يمشون سوة قريب عن المكان المقتول بية وبنفس الوقت...
كل الادلة انجمعت بوقت واحد بعد ما اختفت كل الدلائل وكلشي ثبت هو القاتل اليوم كلشي ثبت هو البريء...
فرحة ترست روحي ماكدر اعبر عن مدى سعادتي بخبر طلعة ارفد بهلفترة وصل خبر وفاة
امة انكسرت الفرحة يطلع من السجن يتلقى هيج خبر مااتوقع ردة فعلة شني...
لبست اسود مهما يكون تبقى امة رحت للفاتحة نسابتها سووها يوم واحد وخلصت حتى ناس بعد ما اجت، رجعت لبيتي اني والبنات نضفناة ماخلينة شي بية ماغسلنا لان تلوث بيهم خليتة يلگ لگ اخر شي رشيت المعطر ابتسمت اباوع واضحك
واخيرا راح ارجع لبيتي ويرجع ينورة صاحبة...
رحت للمطبخ لازمة خاصرتي وبطني كدامي بارزة لكيت رغد كاعدة بالكاع بطنها كدامها والمواعين بحضنها تاكل بشهية بقيت اباوعلها بعدها ما بالعة لكمة تخلي الثانية رحت ضربتها على راسها.
رغد: -وووووجع رررراااسي المعفنة
-انجبي ولج شني معفنة شو ماتستحين ام بططططن
-عاد احسن منج ام شوارب جنج العكيد ابو شهاب
-انجب ابو الناار
هدى: -لككك حيوووو الارررجال ههههههه ثنينجن جنجن زلم وحدة تكل للثانية شواربي امتن يععععع.
سجى: -ولج مكموعة غير ماكاعدة
فارس: -حكج عمي مخلصتها خطط ومخططات الضباط ماتلحكج انصحج ترحين تشتغلين محقق جنائي
سجى: -غير انا ما احجي عقلي يوزن بلد شعبالك
فارس: -والله ارفد ربح بيج اكول استقتل عليج وانا اكول شبيها هيج ميت عليهة جنها زلمة لا انوثة ولا رقة اثاري يريد زلمة يحمي ضهرة مثلج مو مرة تتنعوص
-فاااارس يااااااء هاي عود صدددك تحجي علية هسة ادري بروحي مو رقيقة وهاي بس مو هيج تكول علية عينك عينك زلمة.
-والله احنا الزلم مانسوي سوايتج حتى المخرجين الهندين ماسوو مثلج
-احممممممم هسة هذا مدح ذم راح امشية وعلى طاري الزلم اطلع اريد احف شواربي لايتخلس الزلمة
-هم صدك هسة عبالة صاحبة طلع من السجن ولحكة
-هه هه هه يلة راويني عرض اجتافك بسيطة اذا ما ارجع واكلب سفانة عليك اكلها مصادق البنات الوياة وشفتة يحجي وياهن صورة وصووت وهنا لابسات خلاعي.
شال كلاص ماي شمرة علية تنكعت: -وولج صايرة كلش فلا تستحين خاف كبل عندج ذرة مستحة هسة انشالت ام الخلاعي يجي زلمتج وانا شلون افر راسة عليج
-وانا اخلي سفانة تطلب الطلاك وتاخذ جهالك واسفرهم للخارج
شردت من شفتة يريد يرشني بطاسة ماي رحت للصالة واجت وراي رغد تشرب بقوطية ببسي
رغد: -ااااح هني ومري يمة بلعافية عليكم شبعتو مو عود كول امي ما دللتني هسة انت بطني وانا اعلف عليك جا من تطلع شسويلك.
-تعاي تعاي ام بطن همج بس الاكل اريد من شهيتج شوية ابني راح يلزك على بطني
-عين الحااااسود بيهااا عوود وسجاجين هم مو بس عود عاااع كلتي ابني صدك بيج ولد
-لا والله مامسوية سونار بس يطلع ارفد نروح نشوف ولد لو بنية
-تذكرين من جنتي تكولين اذا بنية اسميها شام واذا ولد معتز
-اي وهو هيج بعدني عد ذوقي
-ذوق خايس
-مثلج
-وليش مثلي خو مثل امة انا شكو
-ديلا تعاي حفيلي هاج البكرة.
-دروحي للحافوفة راجعة علية شكد فكررر انوب بلاش
-هي الحافوفة كلاوات ولا ينضفن زين مو نفسج تسويني المعععع لمععع
-فلوووس فلووس اريد مو بلاش
-جدر دولمة ولبن وطرشي وفواكة وببسي ها
-اااالله اشتهيت اي يلة اريد بدال الفلوس اطلعج عروس والله يا ام الصالون يا حافوفة
-كفووو منج بت العممم على الحلوة والمرة
-للوحة للوحة ضلعة.
نضفت وجهي ورتبت حواجبي صدك سويتني المع لمع بستها بخدها ورحت اكمل باقي الترتيبات ضلن يمي اليوم كلة ماخليت شي ماسويتة حتى بطني كامت توجعني بس فرحتي اكبر...
ثاني يوم حضر فارس ذبيحة من يطلع يذبحها ماكو الصبح بين ماتريكو اني ماكلت شي نفسي مسدودة ضليت احوم شوكت اشوفة واكحل عيوني بشوفتة اسمع الرمي برا خبص المنطقة معناها رجع رجلية كامت ماتشيلني من الكاع گلبي يدك بقوة مشتاكتلة بوية ياشوفتة الترد الروح اشهرر يكول سنين مو اشهر...
هلاهل وجكليت ورمي عرس عدنة حتى نسينة امة ميتة ماصارلها فترة كومتني رغد من شافتني منتهية
-يلة ولج اجة الاملح امشي تلكية.
ابتسمت ودموعي نزلن طلعنا من باب المطبخ هي عافتني ودخلت لان صايرة هوسة بالباب ارتجيت على الحايط ادورة بعيوني فزيت على صوتة يسلم على حبوبتي ويبوس براسة عيوني تحولن علية واذا اشوفة بطولة الفارغ لابس قميص وبنطرون اسود ومحلق لحيتة متأنق ماتخيلت هيج شكلة والنظافة اكيد الولد ماخذينة لحمام وملابس جديدة...
عيوني بعد حتى رمشة مارمشن تمركزن علية شهكت من التفت علية ودموعي تصب رفع عيونة بعيوني شصاير بحالة ضعفان بشكل والتعب باين علية تقدمت بخطوات ثكيلة وهو كملها اجة حضني خليت راسي بصدرة اشهك باس راسي يردد: -عگال ديوان مرة بالف زلمة.
تلمس خدي وابتعد راح للزلم دخلو جوة بالاستقبال واني دخلت للمطبخ كعدت على الكرسي اضحك وابجي وكلها تباركلي كمت من شفت حبوبتي داخلة رحتلها اخذت ايدها بستها باحترام رفعت راسي وباستني بكصتي تحت انظار الموجودات...
كالت بشموخ وفخر: -تربات ايدي شكت حلوك وجابت حگوگ
-جدتي العشق تاج وباج مرة سبعة الحوگ
دفعتني بخفة وهي تكول: -ولي من ويهي حمضتي على كلبي من كثر ماكعدت يمج بعد لعبت روحي من شوفتج.
-جا انا العكس اريدج دوم وياي عايشة
-ترى انا ما اتحمل عرامتج العرمة ولي غاد خل زلمتج يكضبج
-ميخالف نوفة صرت عرمة بعد ما اعجب مو تكولين ترباتي خوش خوش
تعاونة نصب الغدة سوينة مفطح اكل من اكل الفواكة من كل نوع ومن غير النواعم ولدنا اجو نقلو الاكل هو ما اجة بعد بين ماتغدينة وغسلنا المواعين سوينا الجاي وكذلك ما اجة كل ما يدخل احد كلبي يرف عبالي هو تنفست بقهر والبنات كفن البيت كف رجعنا يلمع...
بس خلصو راحن طلعت وراهن اسلم عليهن واتشكر منهم رجعت جوة ذبيت نفس حمل وانزاح من كلبي رحت اسبح هو بالاستقبال الجوارين يمة...
طلعت من الحمام لابس تراكات سود بارزات بطني شعري ينكط ماي على ضهري رحت امشي ايدي على خاصرتي حركة الحوامل هاي وصلت للمراية ادور مشط وطاوق خصري جسمي كزبر وصار يرجف تبهذلت احوالي يكول اول مرة لازمني بعد شعري عن ركبتي وخلة راسة يطبع بوسات وياخذ نفس...
دفعتة ارجف ودموعي تسابق حتى الهوى انكطع عني كعدت على الجرباية وهو نزل ثاني ركبتة لازم ايدي يبوس بيها: -شبيج سجوة اجيبلج ماي
هو كال سجوة واني انفجرت ابجي حضني جلبت بية ابجي خاف مابجيت زين وتجاهلت كلشي اليوم طلعتهن دمعة دمعة حاضنين بعض وثنينة نبجي.
كعد يمي يمسح بدموعي ساكت يباوع بوجهي واني كذلك احفظ معالم وجهة الجديدة تلمست جرح بخدة وهو عينة على ايدة تقربت بستة الجرح وعيونة نزلت على شفتي بادرت واخذت شفتة كمل بدالي لازم وجهي بثنين ادية بكل تملك يطفي نار العشك والابتعاد يفصل ويرجع يلين ويقسى جاوبنة بهاي القبلة عن كل مشاعر الشوك...
مرغلت راسي بصدرة واخذت ايدة امررها على بطني جسمة تصلب وايدة ضلت جامدة رفعت عيوني بعيونة المليانة دموع: ابنك مدري بنتك تسلم عليك تريد تسمع صوت ابوها ماسامعتة كبل
لزمت خدة بيدي وهزيت راسي: -كم شهر وتصير احلى اب
مسحت عيونة يضغط على مدمع العين سحب ايدة الترجف وصار كبالي يمرر ايدة على بطني دنك باسها
-ماكدرت اشاركج فرحة الحمل وحتى النساوة ماشاركتج بيها
-جنت اتنسى على وجهك.
اخذت وجهة اطبع بوسات بكل مكان: -مشتاكلج
-وانا اكثر
رجع حضني يمرر ايدي بشعر وياخذ منة نفس
: -الله عوضني عن وحدتي بيج جنت ادري راح اطيح وخايف محد يسندني لان ماعندي اخو ولا اخت وحتى اب وام بس اجيتي انتي سندتيني وطلعتي حگي ماتدرين شكد كبرتي بعيني وهاي المخاطرة السويتيها بعمري ما انساها
-ابو بيتي ترخصلك الروح
-امشي انزعي اسود مذبلج
بلعت ريك وباوعت بعيونة همست: -مو امك ماصارلها من ماتت.
-الله يرحمها الاسود مايرجع الميت
دنكت بست خدة وكتلة: -البقية بحياتك
-انا لله وانا اليه راجعون الله يرحمها ويغفرلها
-حزنان عليها
-اريد انام بحضنج دلكي راسي بيدج يوجعني
عدلت كعدتي وهو تمدد راسة بحضني صرت ادلك راسة بهدوء وهو مغمض عيونة؛-ااخ بوية.
سكت واني سكتت كسر الهدوء وكال: -تمنيت امي تدلكلي راسي مثل باقي الجهال من اجي اكلها راسي يوجعني تنطيني حبوب تكلي اشرب هسة يطيب انا ماجنت رايد حبوب اريدها تسوي مثل صحباني من تسويلهم امهاتهم
دنكت بستة بكصتة: -انا اسويلك شوكت مايوجعك.
-جنت اتمنى يوم تحضني لو تنيمني بحضنها اتحسر على ابسط شي منها مثلا من اطلع تخلي ايدها على راسي لو تسالني وين جنت سجى انا عشت يتيم الاب والام رغم امي جانت عايشة وبيت ابوي بس جانت حبها وحنانها توزعة لبناتها ولرجلها الخاين شفتي شسوت علمودة باعتني من زمان باعتني بس جنت متمسك بيها وهي بكل مرة تفضل رجلها وتخلية يتصرف وياي بكيفة شيسوي هو الصح يضرب يخون يهين سجلت املاك ابوي كلها باسمة.
ااااخ ااااااااااخ گلبي متلوع منها كلهن بصوب ومن اشتكت علية بصوب تضل لچمة بگلبي للموت
-اسم الله على گلبك والله يرحمها
-راحت واحنا مامصفين حساباتنا ولا متباررين الذمم
سجى انا تعبان من صغري ماشفت فرحة وراحة من مات ابوي انكلبت حياتي احتويني انا ضايع وتعبان ضميني بروحج.
-بوسط گلبي اضمك روحي انت راح اعوضك عن كلشي فات بعمرك نبدي عمر جديد واحد محتوي الثاني واحد يحب وينطي حنية للثاني نكون عائلة راح تصير الاب المثالي جهالك راح يحبوك بس انا اكثر طبعاً لان امهم والله اكتلهم بس يفرقون بينة ويحركون گلبي.
ضحك ونهض يبوس بية نام مخليني بحضنة بعد شعري خلة راسة بركبتي وغمض عيونة ماكو شوية ونام ضليت كاعدة اريد اشبع منة شوف تنفست براحة وخليت راسي على صدرة ونمت كعدت بعد فترة غيرت ملابسي الوان دشداشة كصيرة كلوش.
رفعت شعري بقراصة فوك وخليت مكياج خفيف وعطر رشيت طلعت للمطبخ احضر عشا سويت اكثر من نوع ومقبلات اشكال ترست الميز اذن الاذان رحت اكعدة كلبني علية صرخت بصوت عالي لازمة بطني وهو نهض فاتح عيونة: -ها شبيج شصار
-حاااااامل شلون تكلبني ولك شثگلني بلا صار بالطفل شي وانا كوة ملزكتة بعلج.
انكلب على ضهرة مخلي ايدة على عيونة يضحك بصوت عالي ضحكت وضميت ضحكتي بسرعة تحمحمت وبوزت شفتي: -جا مامجذبة عليك سويت ربط الا ثبت مبين فاهي عليك
طفر من مكانة وانا وكفت اباوعلة سحبني من ثوبي ماكدرت اركض: -يااااهو فاااهي
-ها فاهي شني عود فاهي هاي كلمة جديدة
عاف ثوبي وعيونة تفصلني تفصال تحمحمت بخجل وضربتة على صدرة بخفة كتلة بدلع: -اووي حبيبي روح صلي وتعال ناكل.
سبقتة بين ماخلص اجة للمطبخ يباوع للاكل اجيت بصفة لزك خليت ايدي على جتفة مرتجية علية
-ها شلوني فدوة لايدي
دفر ايدي من جتفة خازرني يباوعلي عافس وجهة
-شبيك
-اتذكرت صحباني البلسجن هيج يحطون ايدهم على جتفي حركتهم هاي
خزرتة بطرف عيني درت لمكاني اهز بيدي: -ماعندك ذوق ولا يكول مرتي اسمعها كلمة حلوة
-بالليل اسمعها كلام مو بس كلمة
-ماااريد يلا خوش على اساس اهتم لكلامك
-هم كلت وين تتأثر وتهتم
-ااااااااارفد
-روحة.
-اشتعلت لا لا لا استغفرالله ربي ما اشتعلت قصدي قصدي
خليت اصبعي بحلكي اتذكرلي كلمة مرادفة تسد مكان الجفصة رفعت عيوني خازرني: -مالكيت كلمة مرادفة بس نكدر نكول نحبت روحك مو
هز بيدة كاتم ضحكتة وبدا ياكل اكلت وهو ساكت ماعرف اسكت يربي ومن احجي اجفص بس اهون من اضل ساكتة لو تضل علية حتى انسى شلون احجي
-اكول ارفد شلونة السجن؟
-راحة.
-اي صح راحة بس لاكو موبايل ولا تلفزيون شني واحد يعاين بوجهة الثاني امداها من راحة يعععع
رفع راسة رافع حاجب: -شني تتشمتين جنج
-
لا لا ما اتشمت شبيك بس اوضخ احمم صدك السجناء خطية شلونهم
-يسلمون عليج
-
الله يسلمهم سودة علية لو ما حامل جان سويتلكم اكل واخليهم يرفعونك من الكاع كلها تضل صيح كفوو من مرتك كفوو منها
-زليخة غير
-
نفس الشي ثنينة فائقين الجمال صدك هم اكو عصابات بالسجن.
جان ياكل بلكمة غص بيها وجها صار اااااحمر صبيتلة كلاص ماي انطيتة شرب وخلة ايدة على وجها يضحك ويضرب على رجلة: -عصاااابات هههههههههه
لج جا هما شكو بالسجن جابوهم من الجامع مثلا
-لا مو هيج انت افتهمتني غلط قصدي نفس البلمسلسلات التركية هيج اكو واحد جبير لازمهم يتامر وكلها تخاف منة واكو ثاني هم جبير وشقاوة ومسوي عصابة وثنينهم يتعاركون وسجاجين وطكة وطاك و
-هووب هووب يواشج لاترحين زايد
-يعني اكو مو.
-مسلسلات احنة مو مسلسلات بس هم اكو هيج شوية
-تدري ارفد كون انا بدالك ادخل سجن
-هيج تحبيني وتخافين علية
-لا بس حتى اعيش الدور واصير الزعيمة على السجينات واسوي فريق بس فريقي حبابين ويساعدون المحتاج...
بعدني مامكملة كلامي وكع من الكرسي للكاع غاص ضحك ويضرب على رجلة شبية هذا الزلمة السجن خرب عقلة يمكن سودة علية كام وراح يغسل التفت على نشغتي العالية: -شبيج
-كل هذااااااا الاكل وماتاكل؟ انا المن مسويتة.
-بوية ماريد مامتت بالسجن اموت بالاكل
-ترا مامسوية سمج شبيك
-الففف رحمة على روح السمج مايغصص سوالفج التغصص
-بعد ماحجي شبيك بس اكل فدوة والله حرام عليك اتعب واطبح وانا حامل ومكسور ضهري تالي تعوفعن ماماكل منهن وين صااايرة حتى الله مايرضاها
-دگيتي اليتيمة بعد امري لله اكعد واكل حسيت بتأنيب الضمير.
-اي انتم الزلم كل هذا وماعاجبكم العجب نجيب ونخلي بحلوكم كلشي تريدونة جاهز ترى من هسة المواعين ترجع يوم عليك ويوم علية انا مرة تعبانة وفرخي تعبان نريد نستراح شوية
-راح ارجع للسجن
-لا حباب لاترجع جا ويامن احجي واسولف هاي سوالفي
-مو بلة شفتي اهم شي سوالفج
-لا لا اهم شي انت اكيد املح ملوحي قصدي حبوبي فدوة اروحلك
-طبگن ان شاءلله عبالي ارجع الكاج متغيرة.
-افاااا ماتشوف التغير بطني كبرانة عفتني مو حامل هسة صرت حامل وشعري من القهر طولان سانتيمات
-طركااااااعة ااااعرفي شتحجين شني عفتج مو حااااامل جا هذا منيننننن اجة
-هااا
-وجعا، بگلب عاصم
-لا مو هيج قصدي قصدي من عفتني بطني صافطة و.
-افتهمت اكلي كافي تسولفين ترة اروح ارتكب جريمة وارجع للسجن.
-اشو عجبني اروح سجن اضنة حلو شو كل شوية وكلت ارجع للسجن اخذني وياك بداعتي وابني هناك اربية يطلع تربات السجون بوووويااااا
-شلون بلسانج هذا يوم عن يوم يطول
-ادري هو متسلق والله مصيبة
كملنا اكل رحت سويت جاي وعزلت المواعين: -بس اليوم راح اغسلهن ومن باجر نسوي نوبة هسة خطية تعبان
صبيتلة جاي وهو يباوعلي ويدخن جبت الكلاص خليتة كدامة وكعدت اخذ يشرب واني احجي.
-اكلك همزين دخلت سجن حتى العالم تضل تخاف مني ومن جهالي اكلهم تسكتون عني تررررى رجلييي خررريج سجووون
-ياسالفة السجن الماتخلص بس اشرب جاي ارتكب جريمة بيج وارجع للسجن من جديد
-لا بروحي اتشاقة وياك اكلك هم اكو ضابطات حلوات يجنكم حراسات
-اكو نعالات مكطعة بس
-انت مو مال واحد يحجي وياك يعععع نفسية انوب السجن سواك نفسية بالزايد
-هسة اكوم اعلمج السجن شسوة بية
-شسووة احجي اسمعك
-لا اراويج بالافعال.
جنت مخلية ادية على خدودي مثبتتهن بالميز ومتونسة عبالي يسولفلي ويروي فضولي اشو هذا كام سحبني اخذ شفتي وللغرفة...
-وولك ارفد حااامل حااامل الفرررخ ملزززك رااااح يطيح استر علينة
-بس ابني ملزگ
-خطية بعدة مامتعود عليك هسة يكول منين هذا الزلمة اليحجي وي امي انوب خاف ياخذ نظرة مو حلوة علية
-اي مو امة مريم العذراء اجة الفرخ من السما استغفر الله استغفر الله منج ومن سوالفج تحجين المطي
-قصدك donkey.
لزم وجهي اخذ شفتي وخلاني اكمز من عض الساني ضربتة على صدرة واخذني شمرني بعد ماكدرتلة
كعدت الصبح سبحت وجهزت نفسي حتى نروح للدكتورة سويت ريوك وهو نايم كعدتة اجة ياكل لكمة ويغمز لو يعض شفتة: -السجن خرب اخلاقك ومناك انت جنت فووووول اخلاق
كام من مكانة واني طفرت لزمني اخذ شفتي وعض لساني مسح شفتة باصبعة وكال: - هاي كل ماتكولين سجن اعضة وانتي بكيفج.
لطمتة على وجهة راجدي وطلعت لابسة عبايتي كاعدة بالحوش وهو يتريك عادي بدل وطلع خزرتة بطرف عيني اهز بيدي: -شكل مجرمين سبحان الله صدك يكول طالع من الس...
خليت ايدي على حلكي وطلعت مابية حيل للعرك صعدت وطول الطريق نتناكر واحد يصد والثاني يرد هي هاي طبيعة علاقتنا حتى مو مثل البشر كلمة وحدة غزل وسطعش كلمة بسامير...
وصلنا للدكتورة دخلت وهو طلع برا ضل يدخن بين ما اجة دوري دخلت كالت الدكتورة: -صحت الطفل جيدة بس لاترهقين نفسج هواي
-دكتورة اريد اعرف الجنس
-اي ماما ادللي
-حبابة صيحي رجلي خل نعرف سوية اذا ماتصير زحمة
-عادي ماما
شوية واجة ارفد غطتني وخلت الجهاز وعيونة بالشاشة ارفد لازم ايدي ومستحي من الدكتورة بس ماكسر بخاطري ودخل كالت الدكتورة: -شوفو طفلكم شلون يتحرك
-ههههههه طالع على ابوة مايكعد راحة.
خزرني يعض على شفتة مسح كصتة وكاللها بدون مايباوع لوجهها: -ماعرفنة الجنس ولد بنية
الدكتورة: -ليكون انت من النوع اليريد ولد ويضوج اذا اجتة بنية
-بالعكس والله انا ابالي بنية تشبة امها هيج لسانها ينكط عسل وهادئة عليها بعد شريد من الله اذا بنية والحمد الله على نعمتة.
-بنوتة بالطريق الف مبروك
دنك ارفد باس كصتي بقوة مبتسم وعيونة تضحك فررررح تلمس ايدي باسها وطلع طلعت وراة اضحك.
لزم ايدي وحضني من جتفي: -راح تجي شام
-بكلبي هي وامها
-بعد گلبي هي وابوها العزاز
-البيت انترس حنية من هسة
-نغرگك حنية غير تدللل انت
اخذني لمطعم طلب انواع الاكل طاير من الفرح وبدون مايحجي باين على ملامحها وهيج مرت ايامنا منتظرين شام ويمكن تصير عركة على الاسم ونغيرة الله يعلم...
سرى
خلصت الايام المأساوية وضع الها القدر نهاية ابتدت حياتي بداية جديدة بشي مختلف عن الجنت راسمتة بالي...
لازمة شهادة تخرجي بيدي ودموعي تنزل بهدوء اليوم تخرجت رسمياً حققت حلمي وحلم حياوي اخذت الشهادة نيابةً عنا احنة الاثنين گلبي يتگطع قهر من اشوف الشباب تخرجو وفرحانين وهو وين جوة التراب غصة بلعومي راح تخنگني الشوگ كتال.
اريد اتخطى وفاتة ماكدر حياوي مترسخ بعقلي وبگلبي شكد حاولت ابدي بداية جديدة وي باهر بس فشلت فشلت وعلاقتنا انتهت قبل لاتبدي ماكو شي اسمة سرى وباهر...
-مبروك مهندستنا
-الله يبارك بيك ماعرف شنو احجي او اعبر عن مدى امتناني اللك
-لاتحسبيني صاحب فضل ابد احسبيني اخوج الجابتة الدنيا
-ونعم الاخ والله اخوي ابن امي ماسوى سوايتك باهر انت شي جبير بحياتي ممتنة لوجودك.
-اسكتي يول بلا كلام زايد اليوم نريد نفرح بتخرجج المهندسة سغى عن حق وحقيقي
-ههههههه سغى صارلك هواي ماكايلها
ضربني على راسي بخفة ومشة كدامي يضحك: -اختاري هدية تخرجج
بلعت الغصة افرك باصابيعي ماكدرت انطق فاجئني من كال: -ترحين للنجف
دموعي نزلن والشهكة طلعت غصب عني خليت ايدي على حلكي ابجي بحرگة اخذني من ايدي كعدني وخر ايدي من حلكي: -ابجي اصرخي لاتخبين داخلج
-مثل هاليوم تخرجنا ثنينا لابسين زي التخرج.
سكتت ماكدرت اكمل بس دموعي شرحن مدى حزني وخسارتي الجبيرة مسحت وجهي وصبرت نفسي مو وكتها صعدت بالسيارة ساكتة وبداخلي نيران مشتعلة انتبهت الة يكول: -حضري ابنج حتى اخذكم مادام ماعندي شي
هزيت راسي حتى ماكدرت احجي ماعندي كلام يعبر عن مدى فرحتي وحزني الانجمعن بنفس الوقت وصلنا وراساً رحت اخذت ابني سبحتة وجهزتة انطيتة لباهر يلعبة ويضحك بية فدوة صاير يخبل وهذا متسودن علية يعض ويكرص بخدودة ويصيح.
-ااااكلة انا اااكلة يوول عش هالكثر انت حليوو امووت اناا امووت بجمااالك
ابتسمت واخذت ملابس اسبح جهزت نفسي واخذت ابني من راح يسبح رحت للمطبخ اسويلة اكل انطيت ابني لصفية تلاعبة واني اطبخ سويت لفات صاج وعصير وشوية مقبلات بعدني اريد اصيحلة اجة دخل متأنق لاخر درجة وعطرة سابقة...
-اوويلي يابة انشگ خشمي شگ هسة انت مهندسة وبعد شيف ههههههه
-عفية سويلي معنويات حتى تصير ثقتي بنفسي فوول.
-بالطلاق ما اكل الا تاكلين وياي
خزرتة وكعدت اكل وهو عينة على احمد يسويلة حركات بوجهة يخلية يموت ضحك واني لا ارادي اضحك على تصرفاتة محد يتوقع هالشخص هيج لطيف صاح بية خلاني اسكت: -عشششش تضحكين
-ماضاحكة هاي شبيك
-اي عفية مو وياج اني
اكلت شوية وعفتة رحت حضرت جنطة اخذ احتياجاتي إلى ولابني ماكو اقل الدقايق طلعنا.
ابني بحضني خليت خشمي براسة اشم عطرة والعب بشعرة كوة منعت نفسي ابجي گلبي تفتت احسب دقيقة دقيقة شوكت نوصل روحي متلهفة يكول صدك راح اشوفة واحضنة...
نام ابني بحضني واني كلبي وعيوني نار ماغمضت ساعة عيني على الطريق والهدوء عام بالمكان وصلنا بعد ساعات باهر اخذ احمد بحضنة واني امشي وراة بعد ماكدر اميز شي قبل لا نوصل انطانياة اخذتة بحضني ارررجف رجف ماصاير حتى هو لاحظ هالشي علية وقبل لا المح قبرة كال: -هذا حال الدنيا كلنا بهلحفرة احجي وياة على كيفج بس لاتصرخين الصراخ عذاب الميت.
هزيت راسي وهو بس وصلني اختفى التفتت لقبرة وشهكت شهكة شكت گلبي بعد ماكدر رجلية ماحملتني خليت ابني على صفحة بكرسية وكعدت على ركبي بس اشهك بصوت عالي اختنكت اريد اتنفس ما اكدر رفعت راسي اشوف وجهة البشوش مبتسم ومخلين على قبرة احلى صورة لابس اسود وشعرة نازل على عيونة هالصورة بلذات اعشقها
مررت ايدي علية وشفتي ترجف الرؤيا انعدمت عندي
-حبيبي حياوي.
بس نطقتها انفجرت بجي اصرخ من كل كلبي عبرت عن شوقي وحزني بالبجي ماي عيوني صفة الدمع جف بعيني التفتت على ابني ساكت اي صوت مابدر منة طلعتة وخليتة على قبرة: -احمد هذا احمد جبتة الك لازم تتعرف علية هذا الراح يصبرني على غيابك
شوف حتى يشبهك والله طول الوقت انت على بالي ماعفتني ولا عفت.
خليت ايدي على عيوني ابجي بدون دموع بس اهتز واضرب على رجلي بحركة: -اخذذك منييي المووت باگك منيي ضحكتتتك صررت اتحسررر عليهاااا مووتتني متتت اني بعددك عشت بدون روحي سودة علية طولك الحلو جوة التراب يريتني اني ميتة بدالك.
مسحت وجهي بحركة: ؛اليوم تدري شصار تخرجت ما اجيتك فارغة اخذت الشهادة شهادتنا ثنينا تخرجنا احنا اني رحت علمودك هندسة والله ماجنت احبها بس ردتك قريب علية اشوفك بكل مكان اصفن بيك واعوف الدرس تالي انت رحت واني تخرجت والله مافرحانة ااااخ اااخ ماشبعت منك شوف
خليت راسي على قبرة حاضنتة: -احضني اريد حضنك الدافي وينك يلا احضني اني بردانة من يوم الرحت ولحد الان اريد تحضني، يلا ميخالف اني احضنك.
حضنتة ابوس بقبرة: -اجيتك لاحضنتني ولا بستني احجي وياي اريد اسمع صوتك يمممممممة ررررراح امووووت من القهرررررر احاااااجي بالترررررراب ومااااكو جوووووواب
حزن، انكسار، ارواح معذبة، قلوب مجروحة معلولة لايوجد لها داء الموت لايعرف قلوب المحبين كيف تبدو بعد الفراق...
طرحت مشاعري دموعي عتبي سوالفي على قبرة طبعت بوساتي على حجر لايرد جواب شلت ابني وابتعدت عن قبرة لكن تركت روحي يمة...
رجعت تعبانة هلكانة عيوني ما اخليهن بعيون باهر اليوم عرفت ليش ماحاول يتقرب مني لو انطة فرصة لزواجنا حتى يستمر يعرف بية مشاعري مو ملكة لذلك ما حاول ولا محاولة وياي...
جنت كاعدة احجي وي سلينا ونحسب ايامها بطنها كبرانة واشوف الخوف بعيونها مو خوف ولادة لا خوف من الطفل، ركضت على صوت احمد جان يبجي شلتة من السرير اهز بية واحاول اسويلة ممة
اجة باهر اخذة من عندي واني رحت اجهزها
-انطينياة ارضعة.
اخذتة كعدت ارضعة شفتة كعد مقابيلي يفرك بوجهها
-عندك كلام مهم كول اني هم عندي كلام جداً مهم بس بالبداية اسمعك
-من باجر ترحين تشتغلين لكيتلج وضيفة
-اكو سؤال بالي مالكيت جواب اله مقنع، باهر انت ليش تزوجتني؟
-الصراحة لان احس الصار بسببي لو ما مساعدتنا يمكن ما تاذيتي من قبل ادهم ويمكن هو يغير تعاملة وياج وعشتو سوى
-لا تذكرني بية شخص مريض مستحيل نكون عائلة.
-بس هو يحبج ومن دخل للسجن يسال عليج من عرف متزوجة وعندج طفل انتحر
حسيت الهوى انكطع بريتي وكعت الممة من ايدي وعيوني انفتحت على وسعها دقايق اني صافنة مامستوعبة کلبي يدگ بقوة خليت ايدي على صدري اريد احجي ماكدر كمل كلامة وكال...
-ما مات ادهم بقة عايش ودز جماعة يشوفون اثرج حتى يرجع يسفرج ومن يطلع يرجعلج حياتج جانت بخطر ذيج الفترة منا مرضج وصحتج النفسية لو جان ماخذينج متِ بيدهم
-ش شلون بقة عايش.
-بقدرة قادر، بدل مايتوب ويستغفر قتل نفسو بايدو حوبة البنات القتلهم بعز شبابهن
-فعلاً هو قاتل جان يكلي انت مو اول وحده تدخل للبيت حالج حال غيرج ما تطلعين من البيت
-فعلاً جان يتزوج ويقتل بدم بارد
-ماعرفتو السبب
-عرفنا جان ادهم شخص عادي بس من انقتلت زوجتة تغيرت شخصيتة ومن ادهم لدلهار صار شخص مؤذي مريض مجرم
-الله خلصني منة بس خايفة ابنة يطلع علية بالمستقبل يكولون الساس نداس.
-ابو تربة بالبيئة الغلط والدة مافيا شيصير هو شيخ
اما احمد انتي راح تكونين اله الام والاب تعلمينة مبادىء وقيم صحيحة
-يعني انت ماكو لهنا وتخلص
-وعدتج بس تصيرين زينة كدرت امن على مستقبلج ومستقبل هالنتفة صرتي امراة قوية عاملة وبنفس الوقت ام منا وغاد تشتغلين وتعيشين ابنج
-ماكدر اشكرك لان الشكر اقل شي يقال بحقك مراح انساك راح ادعيلك بكل صلاة.
-هذا الاحتاجة من باجر تاخذين ابنج وتبتعدين عن ارض الحارث المتروسة الغام جبتكم حتى احميكم ما اريدكم تتأذون
-صاير شي
-حياتنة خطر ابتعدو عنها عيشو عيشة بسيطة واي شي تحتاجين اني موجود رنة تليفون فقط تجيبني
كام وكف على حيلة جسمي يرجف خليت ابني على السرير وكفت كدامة دموعي نزلت مسحتهن ورفعت راسي مبتسمة بوجهة: -نعم الاخ ونعم الصديق اتمنالك كل التوفيق انت شخص صعب يتكرر مرتين.
فتح ادية عيونة مدمعة كوة مسيطر على دموعة: -0حضنة وداع اخوة
رحت لحضنة بدون تقيد طبطب على ضهري بخفة ابتعدت امسح بعيوني: -راح تزورنا مو؟
-اكيد اكيد تعودت على النتفة ما اتركة ابد
-راح نشتاقلك هوووواي
-حتى اني والله اكثر اشتاق يلا كافي كااافي وين رايحين انتو لماليزيا اشو نفس المحافظة بين يوم ويوم ازوركم بس مو تطرديني
-لا ما اطردك بس ما اسويلك اكل انت تطبخ لنفسك والنة هههههههه.
-بذاتة شترجة منج بس ميخالف اجيب اكل بس إلى وللنتفة اما انتي ضلي اتفرجي علينة من بعيد ما نعطيج اكل ولا شوية هههههه
-لا مو لهلدرجة تصيرون حقراء حبابين انتو هههه
-باجر تصيرين حرة
ك
رص خشمي وطلع عافني بحالة ذهول ماكدر اوصف مشاعري مر اليوم صافنة افكر بالمجهول عفت كلشي وبقيت اردد الحمد الى ان غفيت...
يوم جديد حياة جديدة سبحت ولبست قاط اسود كسرتة بربطة جكليتية وحذاء والجنطة نفس اللون ميكب خفيف ضفت لمساتي الاخيرة طلعت ابني لصفية تلكتني بالصلوات...
صفية: -يا جمالج يا حبيبتي سرى عين الله ترعاج بنيتي
-تسلمين حبيبتي صفية
-حمودي يا عيني تعال حبيب روحي
-هو جاي خصيصاً الج يبقة عندج.
اخذتة تبوس بية وتصفكلة وتغنيلة وهو يضحك على ضحكتها ابتسمت وطلعت ماكو داعي اوصيها سيارة جانت منتظرتني صعدت وبالطريق اتصلت بية نهى
حالياً مسافرة لان ما راحت بايام زواجها حجينة شوية وسديتة منها اباوع للطريق واخيراً وصلنا.
نزلت كدام شركة ملفاتي بيدي والفرحة مترسخة باعماقي رحت للسكرتيرة دلتني على غرفة المدير بنفس اليوم اختبروني وبين ماكملت طلعت متاخرة
اتصل بية باهر سولفتلة مختصر وبعدها رجعت للبيت.
للعصر طلعنا اني وباهر وبسرية تامة ماعرف ليش ماقبل واحد يعرف بطلاكنا نفس الشيخ العقدلنا طلگنا وانتهت رحلتي وي باهر وي بيت الحارث...
جبنا الطريق نسولف ونضحك عادي وصلني الم غراضي وراح ماعرف وين بالاساس اني ماعرف تحركاتة اليوم ما اجة بس بلغني الصبح من غبشة اجي اخذج اني هم ماعندي شي جهزت نفسي وانتظرتة من الصبح ابني بحضني العب بية...
سلينا جانت عدها موعد دكتورة هم سلمت علية وبقينة شوية نسولف راحت تشوف سيارة تاخذها واجت سيارة نزل انمار مستعجل دخل جوة اتصلت بنوف ابلغها باخر الاخبار لان معتزلة عن كلشي وماسحة المواقع عسلساس تريد تطلك منة وهي متسودنة علية اتصلت بيها بعدنا نحجي وطلع انمار مستعجل بيدة ملفات جنت اني كدام الباب اشوف التحركات الرايح والجاي سلينا تخابر لازمة بطنها وانمار طالع ما احس الا الرمي فوك روسنا...
صرخت واخذت ابني اركض بية جوة خليتة على فراشة وطلعت اركض اشوف سلينا بقت برا والطلق مستمر والموبايل على اذني نوف تصيح...
فتحت عيوني بصدمة واني اشوف سلينا بالكاع الدم ماخذها وانمار بيدة سلاح يرمي وجماعتنا يرمون.
صرخت بصوت من اجت طلقة بانمار وكع السلاح من ايدة ولزم صدرة بعدها الرمي انكطع والجو صار صنطة رجلية ما شالتني حسيت نفسي اشاهد مسلسل تركي لابية اشوف انمار ميت لو عدل لو سلينا التمت عليها الحماية اخذوها باحدى السيارات وباهر طبك سيارتة يركض على انمار اخذ الملفات وشالو انمار هو وكم واحد ركضت اصرخ ارجف مصدومة مرعوبة صعدت وياهم وللمستشفى ماكو ربع ساعة وصلنا انمار الطلقة بصدرة واحد من الحماية مخلي وصلة يضغط على الجرح وباهر يحجي وياة: -اااانمار ااانمار ااسمعني انمارر وياي لاتغمضض لاتفقد الووعي ذوولة مستهدفيننننك مووو؟ لوو مستهدفين سلينا؟
نطق اسمها يعني مستهدفينها وبعدها نقلو بالسدية والحماية وياة يركضون وكفت اتنفس سريع ايدي على گلبي انتبهت للموبايل يررن نوف تتصل فتحت الاتصال اجاني صوت سجاد: -شصار سرررى هاااي تسوودنت تكول انمار ماات
-ماعرف سجاد انمار تصاوب اخذوة للعمليات وسلينا هم هي حامل.
مسحت دموعي وانطيتة عنوان المستشفى ماكو دقايق وانملة المكان بجماعة الحارث وهو وياهم يروح منا ومنا وباهر يحجي وياة بحركة بصوت ناصي بس كانة يهددة وهو مدنك راسة...
القلق اكلنة الاثنين بغرفة العمليات سرى بنهاية شهر الثامن خفت الطفل تاذى شنو حياتها والله تجن هالبنية ادينة على كلوبنا ندعي ساعات تمر وهما بالداخل ركض باهر لغرفتة سلينا طلعن الممرضات بيدهن طفلة تصرخ وكف باهر جامد واني مثلة نخاف نسال ونفجع باوعتلنا الممرضة تهز بالطفلة بيدها الصايرة قطعة دم سالها باهر بصوت يرجف
-اختي عايشة
-عايشة بس حالتها خطرة نقذنا الطفلة وهي والله.
راحت بدون ماتجاوبنة اخذت الطفلة للخذج كعد باهر مهدود حيلة مخلي ادية على وجها مدنك راسة
كعدت يمة: -ان شاءلله تطلع سالمة هي وانمار ادعيلهم مابيدنا غير الدعاء
جاوبني وهو على وضعة: -بعد ماترجعين لبيتنا بوجهج لبيت اهلج وابنج يجي وراج ابتعدي عن حياتنا صيري سبعة وابدعي بشغلج
-ان شاءلله.
السنتنا تلهج بالدعاء الهم ماكو دقايق وفزيت من مكاني على صريخ نوف ميزتة من بعيد كمت ارجف واشوفها لازمها سجاد واخوانها وهي مثل الطير المذبوح الوجهة قطعة دم هي بيضة ومن البجي مصبوغة صبغ...
-يممممة ماااات انهاااار مات واني ما شايييفتة ولا اعرررف اخباااارررة فددوووة گلوولة لايمووووت والله اموووت وررراة لايعوووفني گلولة فدوة سجاااد اموووت والله ما اتحمممل فرراگ.
خرت بين اديهم وطاحت مغمي عليها شالوها يركضون بيها كمت ما اتحرك الرجفة احتلت جسمي من الخوف اني بعد شوية واطيح مثل نوف كوة سحلت روحي ورحت اشوفها مشكلينها مغذي والممرضة تكللهم: -انهيار عصبي
بقينة كاعدين برا حالنة مايسر العدو مانعرف شصار بهل ساعات منو سو هيج بس هما يعرفون عالمهم خطر وغامض...
ساعات تمر والقلق اكلنة طلع الدكتور من غرفة انمار راحولة يركضون لزمت بطني خبطت من الخوف اتنطر حلوكهم كلشي ولا يصير بية شي تموت نوف بس حياوي كافي عليها ذبيت نفس براحة من سمعت الدكتور يشرح حالتة ويكول: -الرصاصة اجت بصدرة طلعناها حالياً لكن مانكدر نحدد وضعة الا بعد اربعة وعشرين ساعة، بالسلامة ان شاءلله.
كعدنا نراقب بقلق وتوتر محد صحى بيهم وسلينا لحد الان بغرفة العمليات طلعت الدكتورة كلنا ركضنا الها وباهر يحجي ويرجف: -دكتورة اختي عايشة مو؟