رواية بين سلاسل العادات للكاتبة كفاية كاظم الفصل التاسع والعشرون
سجى: -طلعت اركض على صوت عمي يصيح فتحت عيوني على وسعهن متكومة على وجهها وعمي يدك على وجهها رجلية ماشالتني كوة وصلت الها درتها علية ادك على وجهها ماكو فاقدة كلش عمي عافني ملتهي يخابر حسيت گلبي وگف من سمعتة يكول.
-اي استشهد اليوم حضرو رواحتكم.
الدنيا افترت بية كمت ما اشوف شي بعيوني بس لا عباس كمت ارجف اريد احجي ماكدر كلها التمت محد يتجرأ يسال ياهو الاستشهد بلعت ريك جريتة من ردن دشداشتة التفتلي عيونة مدمعة مدري شلون ضليت واكفة وماطحت.
-ياهو. الاستشهد بروح ابوك لاتكسرنا
ردت اطيح وسندني علية اعاين لحلگة بس اريدة ينطقها: -ليث استشهد الله يرحمة.
طحت بالكاع دموعي تجري رحمتك يا اللهي بعمر الورد بس يرجع يزفوة الله اكبر شاف بحياتة جريت اختي لحضني ابجي على حضها كلنا انخبصنة بالاستشهداد راحو يشيعونة وهدوة ضلت مطروحة دحلناها جوة گلبي تفتت مر وكت طويل وهي ماكاعدة رحت ورديت لكيتها كاعدة حتى رمشة ماترمش ونوف تبجي وتحجي وياها.
نوف: -الله يرحمة راح للجنة شهيد هنيالة.
حضنتها احجي وياها اريدها ترد علية ماكو ولا تحس بينة حتى ماتعاينلة مكابلينها وكاعدين نبجي للعصر كلش صار التشييع سوولة زفة ومرروة من بابنة صعدنا فوك السطح نشوف الشارع من الطول للطول متروس سيارات العلم العراقي يرفرف على تابوتة منظر يهد الحيل صحبانة ملخو رواحتهم بس عباس ماشفناة عيوني راحت من البجي يربي شاب جنة وردة شلون بامة وهي تحضر لعرسة ماحاسبة. حساب التابوت.
ركضت لنوف طاحت بالكاع تملخ بروحها اريد الزم اديها ماكدرتلها وجهها صار يصب دم تصرخ بصوت عالي يهد الحيل.
-ووين ررايحيين الكاااع بااارردة ترراب يغطييكم لاتعووفوونة وتمشوون دررب النننجف وحش يخووف. حياااوي اررجع اشتااقيتلك تعااال ارريد اشووفك.
اني والبنات كوة الا سيطرنة عليها دموعها ما سكتن نزلناها جوة خدودها مزلغتهن والوجة احمررر راحت تركض لفراشها ضمت وجهها بالمخدة تصرخ گلبي تكطع اواسي ياهي بيهن بنوف لو باختي بس عيونها تتحرك اجت حبوبتي تقرا عليها قرآن ضلت على حطتها.
رحت لنوف سحبتها من الفراش لاترجع لحالتها القديمه مغمضة عيونها ودموعها تنزل اخذتها لحضني امسح على شعرها المگطعتها.
سجى: -كولي يا الله هذا امر الله ترحميلة مو زين البجي يابعد روحي
ضامة راسها بحضني وتناشق جاوبتني صوتها يرجف
نوف: -شوفي شوفي سجى حيحفرولهم حفرة بالكاع تخيلي بالكاع بارردة ويخلونهم بيها ويخلون عليهم التراب ويعوفونهم وحدهم
-هاي سنة الحياة اول وتالي نموت ويدفنونة كلها تندفن النبي والوصي والامام
-صغاار خطيةة صغااار شلوون يدفنوونهم موو حررام عليهم اخووي بعدة صغيير لييش مااات.
لزمت اديها كوة ضلت تصرخ بصوت عالي دموعها بللني لافتها بحضني جنها طفل هلگدوتها ادك عليها مثل الام من تنوم ابنها غفت والسانها يلهلج باسم حياوي وخطية صغير اخ ياقهر حياوي كسر روحها مو گلبها غطيتها وعفت شريقة يمها تبجي لبجيها
رحت اشوف هدوة على حطتها نحجي نضرب بيها داخلة بصدمة اليل كلة كاعدة يمها مددة وفاتحة عيونها امسح على اخدها احاجيها ماترد علية.
رفعت راسي والتفتت للباب واكف بطولة ساد الباب وجهها مطعون طعن بدلتة كلها تراب ودم ضل واكف بمجانة كمت رحت يمة وكتلة.
-البقية بحياتك خاتمة الاحزان
عيونه صايرات دم مارد علية ولا عاينلي دخل ببسطالة راح كعد يم راسها وكفت اعاينلهم تلمس خدها باصابعة غمضت عيونها مسح عليهن وحجة بصوت مبحوح.
عباس: -المكتوب مامنة مهروب احجي شي هدوة لاتحرگين گلبي بالزايد.
رفع راسها خلاة بحضنة ابد مااستغربت من زمان يعاملها هيج حتى جانت تبات بحجرتة متعودة على وضعهم، نزلن دموعة على خدها شهكت بصوت وخلت ايدها على حلگها ميل ايدها وكال.
عباس: ابجي اصرخي لاتسكتين وتهدين روحج
ضمت راسها بحضنة مجلبة بقميصة وتبجي عيوني راحت من اسمع شهگاتها ضليت على وكفتي منا لمن غفت من البجي غطاها وطلع.
مر شهر كامل حايرة بنوف وبهدوة ثنينهن حالتهن حالة عالنات الحداد هديوة لبست اسود ونوف وياها.
نزعنة هديوة الاسود ونوف مجلبة وتصرخ تخبلت هالبت من يوم التشييع انعادت ايام الحزن عليها جاي تعيشهن من جديد.
الحجرة صايرة عبارة عن كتب كوة اجبر بيهن يقرن عفت رغد تشرحلهن وطلعت برا بيدي ملزمتي ردت اروح للبستان ولزمني اغسل المواعين غسلتهن وطلعت ادورلي على شي اخلية برجلي لاگاني ابن عمي صغير جنة شاذي يطگك بعلجة وجهة كلة جبس.
-خفة هالشكل شبيج تعاينلي جنك جريذي سابح بالخيس دروح اغسل وجهج شني ذنبنة نشوف جهرتكم.
راح لامة يبجي ويشكي سجيوة طكتني رحت اركض حافي لاتجي وتجلب وياي وانة منا شلوني يبوو راح الوكت سحبت شحاطة من يم الديوانية ورحت اقرا
كل ما اشوف صعوبة المواد اهون على روحي.
-خاب شني نمونة هسة البگة لبگ شيرادلة علم الذرة احفضة واسطرة الهم ديلة سجيوة ماضل شي هاي السنة راح تخلص هنة سنتين واخلي الشسمها على راسي زعم يهب الهوة ويلكفها مني يبوو جا يسويها الحظ.
سوالفي مايخلصن احجي اكثر من ما اقرا ضبطت المادة ورجعت كوة امشي شني السالفة باوعت لرجلية شني من شحاطة هاي ام الكعب نزعتها وهزيت بيدي ياهو يلبس هيج شلون يمشي وصلت للبيت بعدني بالحوش واجتني حصوة همزين ما اجت بعيني دخيلك يالحمزة صار الحصو علية بفلس خليت الملزمة على وجهي اريد احمي روحي شفت ابو اذانات يضحك غلطت علية بصوت عالي شمر حصوة صارت بية شلت الشحاطة راح بصوب الديوانية وشمرتها علية فتحت عيوني فاكة حلكي.
ثنين زلم واحد لابس دشداشة بيضة والثاني بنطرون وقميص اجت بضهرة لزم ضهرة ودار وجهها علية يبوو يبوو طلعت الاملح ياكاع انشكي وبلعيني مخنزر علية وذاك الزلمة يضحك من الفشلة اشرتلة بيدي هلو وطب جاسب وراي انحصرت حصرة الجلب رجلية نبتن بالكاع لا اكدر امشي ولا اكدر ابقى صاح ابو دشداشة.
-يول دحج هاي شحاطتي برجل هالبنوتة تعال يبا تعال صارلك ساعة تدور ثاريها برجل المحروسة.
درت وجهي للمجسب يعضلي بشفتة بسيطة نزعت الشحاطة واخذتها يبدي ارجعها لصاحبها صاح بية المجسب تعاي ماعرفت شسوي ردت اشمرها على الزلمة وصاح بية.
-لا يبلوة تريدين تفشخينة.
شمرتها من ايدي ورحت اركض وجهي مشتعل نار وكلبي صاير طبل وانهطر بعتبة باب المطبخ على وجهي تكسرت تكسر كومتني سفانة من شفت نسوان عمي سويت روحي كلشي مابية صعدت يم البنات اغم بگصتي واكمز سالني شكو وسولفتلهن خربن ضحك كعدت رجل فوك رجل اضم الفشلة.
-اححح المهم ضحكتن وطلعتجن من جو الكأبة بعد شتريدن مني هفففف الزوم علية
رغد: -يلة يلة غطوة غطوة محد شاف
-يلة انجبن واقرن لاتصير جلبات
سفانة: -يبووو شوكت تعوفين الغلط.
سجى: يتها غلطت عليجن
رغد: -لا يابة جلبات وانجبن
سجى: انجبن مو غلطة معناها اسكتن والجلبات عادي يعني هسة من اكلجن لبوات حمامات فراشات مو تكيفن بالتالي كلهن حيوانات احححح
رغد: -ديلا ولي لاتتفلسفين براسنا شلون منطق خايس عووععع
سجى: -منطقي مثالي مو خايس كووش.
نزلت جوة كعدت بالمطبخ اشوف ياهو اليطب وياهو اليروح وسن وعبير صايرات صاحبات وهاي عبير كل شوية ترش سمها على سفانة هي تطك بالكاع من الجمال وشايفة روحها شوفه انة وانة ماكدرت اسكت لزوم اتدخل...
-اكول عبير شني شو لا اجو عيالج لا رجلج كعدتي وسكتي جهالج وين لاسألتي عليهم كلتي عمت عيني وينكم يمة شني عجبج الوضع.
عبير: -سجيوة لا تدخلين
-وين داخلة رحمة لجدج بس اسئل شني تاليتج مثلا عليمن زعلانة.
عبير: -ناس ماتخاف من الله اعتدو علية ذاك الضرب وشمروني الله لايوفقهم
عفتها تتحسب شني من بشر شوكت نخلص منها هسة هي لحد الان هادئة بس ماتضل بهذا الهدوء لازم تسويلها شي لثاني يوم داومن البنات رجعن وجوهن تبشر بخير كالن مجاوبات راحن يبدلن صعدتلهن الغدة كعدن ياكلن الا رغد ماهي طلعت ادورها لكيتها تبجي رحتلها كلبي طاير.
-ولج شبيج راح تجلطني
-ماكو شي
خليتها تخلص نوح وبجي وحجت منزلة راسها بالكاع
رغد: -احبة.
سجى: -صخام الصخمج ياهوة
-حسن
-دهر فرج شتحبين منة واحد مهتلف واكبر جذاب شفتي منة حتى تحبينة لج انتي غبية بعد كل السواة بيج وتكولين احبة دمر مستقبلج بجذبة وطيحان حضة هسة هو وي الحبيبات سوالف وكركرة وانتي هنا محبوسة لا دراسة ولا طبة ولا طلعة ليش تخليني ادج روحي بمنشار
-اي صح ادري والله ادري جذب وضحك علية ودمر مستقبلي بس ماكدر انساة مو بسهولة عيشني بحلم وردي فجاة صحيت على الواقع مر.
-هما كلهم هيج بس بالبداية يخلون البنات يتعودن عليهم ويحبنهم تالي يستغلونهم لان سيطرو عليهم مثل المنوم المغناطيسي
-ساعديني سجى فدوة سوالفة ماتروح من بالي بعدني احبة واشتاگ الة شسوي
-يرادلج وكت خية مثل مااخذتي وكت تحبينة رادلج وكت تكرهينة وتنعلين صفحة الخلفوة.
هاي حقيقة مانكدر نبدلها مو بس رغد غيرها وغيرها حتى لو متأذية من هالشخص بس تبقى تحبى لان زرع بيها مشاعر تجاهة حقيقية عكس مشاعرة المزيفة سكتتها و اصريت عليها تتغدى ويانة.
كلنة البنات ملتمات ناكل ونسولف فزينة من اندفع الباب غمضت عيوني بقلت صبر ام رحمن جفتت
تغلط وتسب بشريقة چيتت عليها تسحب بيها من شعرها كمتلها اريد اطلع البت منها شعرها طاح بيدها دفعتها ليغاد تصيح بذاك الحس العالي.
-امهااات الشوارع الگ. ابني من ورة جهرتج حتى البيت مايلفية نسيت وجهها من وراج البربو.
لو تضلين بس انتي ماخذج اخواتي يعيرني بامج واخواتج الگ.
نوف: -شبيييج كافيي ماتمليين حفضناهااا هاي الاسطورة ياهو ابنج خبصتينة بية ماخذج اله ومااخذج فد شخصية هو
رادت تجلب بيها وصرت جدامها دفعتها من صدرها
ضلت تغلط وتصيح علية: -خليني اكضها الا امسح بيها الكاع بطول النعال وتمدين لسانج علية انة اعلمج اليوم.
تدفع بية وتتوعد الها ونوف ماتسكت ترجع الحجاية بعشرة.
نوف: -مو بكييفج تضرربيني انتتي مررة مددي ايددج على وحدة بينااا حتى احرگج وانتي نااايمة واعلمج شلون تمسحين بية الكاع
صحت بنوف اريدها تسكت هاي فضحتنا من تسمع نوف تراددها تصير بالزايد حيلي راح من المحايز الا تلزم شريقة خلفلة على رضية طلعتها الله لاينطيها حتى ماكملنا غدانة. شريقة تبجي ونوف حاضنتها وتسكت بيها.
نوف: -هي مرة خل تمد ايدها عليج الا احركها بنفط خاف مستحكرتج انيييي اعلمهاااا
رادت تطلع جلبت بيها رديتها: -وين مولية لاتنسحلين اكعدي وانجبي شني صايرة جنتل
نوف: -ماتشووفينهااا شلعتتت شعررهااا بتتت الحيو.
سديت حلگها لاتسمعها وترجع شيكضيها وياهن نوف صايرة وكحة كلش ولسانها بية سبع مترات النهار كلة مرادد هي ونسوان عمامي. للعصر يلة هاد الجو ضلت شريقة حابسة روحها وياها هديوة هاي بلة انتهت سالفتها ماتنزل جوة دوم واذا نزلت نوف طابة بخاصرتها، راحت سفانة للدكتورة تحدد الجنس رحت للمطبخ اسوي كيكة روحي طلعت عاد واحد يغير جو شوية.
اجة نزار گعد على الكرسي صاح: -سجيوة خانم اشعليلي هاي الجكارة
-اي يدلل نزار قباني.
-اهوو خبصتينة بية بس لايطلع حبيبج
-لا يابة اروح احبلي واحد اسمة نزار، وانت موجود اهمداني
-احمم عود صگد
-اي جا انت شبيك شاب مرتب حليو السانة ينكط عسل وين نلكة مثلك
-يعععععععععع هاي هو
التفتنا لزهراء عافسة وجهها جنها تريد تتقيء خزرها ونتر بيها.
نزار: -شبيج ولج لا اكووم
زهراء: -جا ماتكوم كاضتك
نزار: -زهيران ولي مني ماناقصج كملي سجيوة خوش انتي تحجين
جاسب: -على شني خوش تحجي سجيوة
نزار: -ها هيج اكعد سلامتك.
سحبله كرسي كعد علية خازرني صخام بوجهي بس لا يصدك روحه بس جنة نسى بساع السالفة شمر روحة نزار على جاسب يكلة.
نزار: -خاب شني اشتاكيتلكم ماتحسون عايفيني وماشين ولا كلتو صاحبي يبوووووو عليكم نسيتووني انة انسي حتى الله مايرضاها
جاسب: لا يرضاها الله حبيبي
نزار: -راح اتطوع بالجيش شعدي ضال هنا وي ذولة الجلاب حتى مايحترموني ولا جني استاذهم.
جاسب: -لا تطوع ولا تورط روحك انت زلمة عدك ربو اكعد وانجب محد عاتب عليك والمحطة ضلت الك اسرح وجول بيها ويم اهلك وراحة سامع بالجيش وضيمة
نزار: -هم صدك بطلت بعد وين اتابع يحيى ولميس
اموتن غير يو ماشفتهم
جاسب: -حييييل قديم بعدك تابعة
نزار: -شني قديميش بعدهم بالباكيت وهاي نيرمين الجلبة عافت عمار وراحت ورة ايمين المهلس والله يالنسوان تفوو عليجن.
يحجي محترك كلبة على عمار واكفة اضحك بالسكتة عليهم يحجي والمجسب يسمعلة باهتمام.
نزار: -اكلك هو عمار ماينجب ويتزوج فريحة هم حلوة وعيونها زرك يلصفن شكو يركض ورة ام شعرات جنهن محابس
جاسب: -هم صكد ليش
نزار: -امداة لو انة منه ارضى بفريحة جنها العافية اكلك اريد اتزوج وحدة تشبهها ماتعرفلي وحدة منا منا عيونها خضر زرك كلشي الجان
جاسب: -لا منين ماكو هاي المواصفات
نزار: -اريد اعرس شني يمتها ترة كبرت حيل.
جاسب: -جا انة شعلية ابوك امك ذولاك واحجي وياهم
نزار: -ومرض هسة شبيك اذا ماحجي وياك المن احجي. احووي احوووي عيونها زرك وشعرها اصفر حتى يو اصبغة الها
زهراء: -تهي بهي شوف شيريد ياهي الترضة بيك سودة وسمينة وهم ماتريدك انته شايف روحك جنك ابن السحارة ام طارق
واكفة وراة وتحجي طفرلها عضاها من ايدها كلبت الدنيا بالصريخ يكول ذاب عليها تيزاب جاسب طاحلة دك رزايل شكل نزار صار يموت ضحك خاف من شافها تصرخ.
جاسب: -جلببب انتتت تعضهااا
نزار: -والحمزة ما لبالي هيج يصير بيها تعاي ابوسها وهسة تطيب
اخذ ايدها يريد يبوسها ودفعاه جاسب ناطات عيونة
يسكت بيها رحت اشوف الكيكة استوت عفتها على الحرارة اجت حبوبتي على الصوت هزت بيدها وكعدت.
جدة نوفة: -زهيران مكروصة
نزار: -صكد مگروصة
جاسب: -اختتتي هااي عليمن تحجي
نزار: -مو على اختك وعلي.
شبعت ضحك عليهم شوية واجت سفانة تضحك اول ماطبت طشت رضية الجكليت دنكت الم ونزار يلم وياي ويصيح.
-هنا هنا اشمري علية
ترست ادية ترس صار يخلي بحلكة ثنين ثنين كوة يعلج رحت ابارك لسفانة بيها ولد طب فارس وراهن عيونة حمر وجهها احمر باركنالة خطية طاير من الفرح اول ماكعدو صحت بيهم.
-معتزز نسميةةة
نزار: -شني متعز انوب
سجى: الاسم مو فارس نسمية معتز
نزار: -خفة شلون ذوق معتز ليش ماتسمينة ابو الحكم امدااج.
سجى: -يااء هسة انت شعليك هو ابنك لو ابن فارس
فارس: -مو انة ناذر اسمية على جي طلبتة من الامام وهم هذا الاسم بخاطري من زمان
سجى: -خوش على حلو بس اذا صار بعد عدك غيرة اسمية معتزز
نزار: -شخبصتينة بمعتز كون الاسم عاجبج اتزوجي وسمي ابنج معتز.
خزرتة وطلعت لايشمرلة حجاية اكبر من راسة رجعت يم البنات الكأبة واصلة فول ماتسمع بس خطة القلم ماتحركنة للعشا بس شلنة السفرة كلها طفرت بيها امواعين ردت اغسلهن ورغد مارضت كلت انة اغسل ماعدي شي.
رغد: -اكثر وقت يتجمع السوالف براسي من اغسل مواعين اغسل ومندمجة بافكاري شكد كارهة نفسي من اشتاق لصوتة شكد حقير علقني بية بطريقة غريبة كلش اسب والعن نفسي وكلبي السكط ماكول غير حسبي الله ونعم الوكيل هو الياخذ حگي منة كل دمعة تطيح من عيني اريد الله يحاسبة عليهن فزيت من صفنتي التفتتلة ورجعت درت وجهي عنة.
-شتريد
جاسب: -جاي
-بس اكمل البيدي
-عود جيبية وراي لحجرتي.
كالها بنتر وراح لحد هذا اليوم مايعاين بوجهي علساس جان شلونة بس هسة احسة تلعب نفسة من يشوفني لان شاف حسن لازم ايدي خليت القوري على النار ونضفت الطباخ كعدت عيني على القوري النار تغلي بداخلي مثلة طفرت طفيتة وصبيتلة بكوب اخذتة اله دكيت الباب ودخلت من كال طبي
واكف يطلع بملابسة يخلي بالجنطة ولا جني موجوده نترت بية: -الجااي برررد ماتااخذة.
دار وجهة يعاينلي بطرف عينة هز ايدة ورجع دار وجهة يحضر بجنطتة. ضليت واكفة الجاي بيدي راح يبرد تأفأفت مطنكرة خلص البيدة واخذة مني اشرلي للكنتور ورجع كعد على الجرباية اخذ شربة وكال.
-شوفي شناقص الجنطة راسي انسطر.
للحظة ردت انزل بس اجت فكرة براسي بلكت والله تصير رحت افر عيوني فاتح الخانة الوسط ام البابين باوعت بالجنطة بيها ملابس رحت للجرارات شكو عطر مشط مگص شفرات خليتهن اجيب واكوم ترستها ترس عيوني غوركت من كال.
-تعودتي على كعدت البيت مو حلوة ترة اكل ونوم تفيدج
عفت البيدي وصرت جدامة عيوني تلالي بيها الدموع
طبكت اصابعي سوة وحجيت متوترة يخزر بية ماعاجبة ويشرب جاي.
-جاسب اريد احجي وياك حباب اسمعلي.
جاسب: -عود خوش بس لادوخيني واحجي شي مفيد
-اي اي
اخذت نفس شلون افتح الموضوع اخر امل إلى هذا كوة لزمت دموعي: جاسب خليني ارجع والنبي بعد مالي علاقة باحد حتى لو ابن الوزير والله تندمت وتعلمت من غلطي خليني ارجع ماطول جاي يمتحنون الفاينل حتى لو ارسب الكورس الاول المهم الكورس الثاني بالعطلة اقرا الفاتني.
-بعدج تفكرين بالدراسة انسيها للدوم تحلمين حلم ترجعيلها وخلي يكون ببالج اذا سمعت بيج كايلة اريد ارجع اكلهم على علاقتج وهذا موبايلج عدي متروس رسايل حب وغرام خلهم يشوفون شغلهم وياج.
نزلت دموعي وجهي اشتعل نار: -كتلك تعلمت من غلطي بعد ماعيدها ليش حرامات تروح السنة علية والله مامسوية شي
طفر من مكانة لزمني من حنجي يضغط بقوة كسر سنوني بحلكي دموعي تنزل اعاين بعيونة كلهن نار وحقد.
جاسب: -لا شافج الله مامسووية شي بس سوالف تالي الليل وحبيبي وحياتي وبعد عمري ومرتي مامسوية شي وتكعدين وياة وتتسامرون مثل طيور الحب مامسوية شي ويلزم ايدج يكول مرررتة كل ذني ومامسووية شي
دفعني تكومت على وجهي ماتحملت هلموقف ابجي بحرگة وادية ترجف ضربت على الكاع وصحت.
-غلطتت وعررفتت غلطتتي ادفففع عمرري خسااارة لييش لييش
نزل للكاع ثنة رجلة صار بمستواي رفع راسي شعري تكطع خليت ايدي فوك ايدة متوجعة.
-موتج حلال بعيني والدليل موجود اذا تجيبين سيرة الدراسة تخسرين عمرج وحتى لو كملتي هم تخسرين حياتج تدرين ليش لان هناك تبيعين شرفج وتروحين بيها بسالفة غسل العار استري على روحج واسكتي ليش تهيضين على روحج وتروحين بيها
ريتني ميتة ولا سامعة هذا الحجي نغز گلبي وخلة ندبة بروحي ابيع شرفي نهضت روحي وكمت اريد اطلع وكفت من صاح اروح يمة وجهي متروس دموعي مسحت وجهي ورفعت عيوني اشوفة شيريد.
بهتت ملامحي من نزع التشيرت وشمرة بوجهي بقة بالداخلية رفعلي حاجبة وكال.
-امشي اغسليها هي وذنيج ملابسي الوصخات
اخذتهن وطلعت احس روحي ذليلة ماضل احترام ولا كرامة لروحي رحت غسلتهن اله وشريتهن الجو حلو بالسطح بس باردة كعدت لامة رجلية لصدري ودموعي تنزل مو هينة تعب عمر يروح بغلطة وحدة بس تعب السادس وقرايتة يعادل ميت سنة كلهن راحت بشربة ماي فزيت ودرت وجهي.
الكاع انثرت اوراق وملازم فتحت عيوني على وسعهن شبت بيهن النار كمزت مثل المجنونة اطفي بيهن بيدي ماحسيت بنار رفعني من ضهري حاضني روحي تفرفحت تفرفح احس النار بروحي داخلي احترك مو كتبي صوتي راح من القهر متت بهاي الساعة احتركت روحي وياهن.
عافني تكورت بالكاع خدي انترس تراب عيوني تجري دمع لو جامعتة طفيتهن اعاينلهن هفتن وصارن ردماد صرت مثلهن رماد لا احرك ايد ولا رجل غمضت عيوني وحسيت بية يشيلني بعد ماحسيت بشي ثاني.
سرى
حابسني النذل بالغرفة مجرد يشمرلي اكل عبالك حيوان عندة ماعرف شكاعد يصير بهلبيت ولا منو البية اسمع اصوات وناس تسولف جوة ضحك وسوالف شنو الموضوع مدا افهم اخذت ملابسي سبحت وكعدت امشط كاعدة على اعصابي سمعت الباب انفتح حتى ما التفتت علية قفل الباب واجة يمة كلبت وجهي لذاك الصوب دارني علية نترت بية
-اررريد امشط مداشوووف
-اني امشطلج
-شكرا ماريد.
اخذ المشط وطفرت لفيتة ايدي ترجف كبل ثبتة بقراصة رحت الهي روحي كدام المراية اشيل شي وارجع شي بلكت الله وينگلع شهكت من حضني لزمت ادية افتح بيهن جسمي كلة يرجف.
-بس وخر بس شوية حمووت
سد حلگي بيدة والايد الثانية يجولها براحتة على جسمي النار شبت بية عضيت ايدة بقوة ضربني راجداي فرني فر ارتجيت على السرير لازمة خدي الدنيا افترت بية. سحبني من شعري ودارني علية عيوني يجدحن نار ركزت بعيونة.
-شتريد هه اخذ التريدة وانگلع لاتبقى تماطل مالي خلگك
ماحجة شي اباوع لبلعومة تفاحة ادم تصعد وتنزل سحبني لحضنة جاعصني يحضن بية بقوة اختنكت كلش ادفع بية حايط مو بشر دنك راسة لوجهي اصبعة يمشية على خدي ميلت راسي جرة بيدة
نبت اصابعة بخدودي حجة كاز على سنونة.
-ليش ماتريديني تكش روحج مني شسويت اني انحب واكو ينجنن بية بس انتي لييش هييج تسووين
-هه مجنونات بيك يا سلام ماتروحلهن ذني البدون عقل.
-ماكو غيرج بدون عقل اريدج ماتفهمين
-مو شي جديد من يوم الجبتني مانافرني طيحت حضي وجسمي انهار من ورة عنفك وهمجيتك
-ماريد جسمج اريدج كلج كلج
-لو تموت ما اصير الك كلني اخر يوم بحياتي اكون مرتاحة وياك لو مسلمتك جسمي بارادتي
-لييش لييش
-لا والك عين تسأل ليش هه شلون بشر
-ابطل وحشية اغير اسلوبي بالمقابل بطلي برود ونفور.
دفعتة بقوة دفعني على السرير: -مو بيدي نفسي ماتطيقك اكرهك تلعب نفسي منك ماريدك تلمسني اتقزز بعد اكثر من هيج ماكدر احجي
صار فوگي ايدة على رگبتي يعصر بيها عيونة بعيوني ماهزتني نضراتة ولا من كال.
-احبج ورايدج ليلة وحدة اتمتع وانتي برضاتج
-لاتحلم زيادة ماتصير ولا ابادلك بشي للموت والله
-لا شافج الله تعصين وتنفرين من زوجج
-ههههههههههههههههههههه صاير تعرف الله وشرعة
-خلينة نبدي من جديد.
-اي صح يلة نبدي وي شخصية جديدة شكد وتدخل بشخصية ثانية شهر لا لا هواي اسبوع اي احتمال كل اسبوع شخصية
-شتريدين اسوي
-عوفني اروح لان بزعتها لروحي عليوم انتحر من وراك.
فتحت عيوني على صوت الولد العالي طفر الهم يركض حسيت صارت هوسة صوتهم عالي مرت دقايق الباب عايفة مفتوح نزلت امشي على كيف يمكن نساة اربع ولد طلعو يتراكضون البيت فرغ تماما اسمع بس صوت شخط السيارات نزلت جوة للصالة فتحت عيوني بدهشة الباب مفتوح الفرحة غمرت روحي.
رجعت للغرفة گلبي يدك بقوة حايرة ومحتارة كسرت وقت التفكير اخذت صاية لبستها فوك ملابسي وشمرت شال على راسي طلعت حذاء لبستها دورت على فلوس مالكيت مافكرت بشي ثاني بهذا الوقت نزلت اركض قبل لا واحد يجي منهم.
وصلت للباب الخوف يقرا الف حسيتة فخ طلعت متجاهلة كلة تفكير سلبي رحت للشارع امشي وادعي بلكي تجي سيارة تخلصني من هذا الجحيم شارع فارغ بس جماعتة يجون منا درت وجهي للبيت هزيت ايدي بلة هذا اليشوفة مو يكول هنيال العايشين بية جنهم ملوك بس محد يدري داخل هالقصر ناس تتمنى الموت الجحيم كلمة ماتعبر الجاي اعيشة.
مر وقت لا بأس بية بعد عندي امل تجي سيارة رحت امشي وين وصلت البيت صار ماينشاف وكفت اجر النفس كوة مر وقت والشارع فارغ يارب دزلي وحدة تاخذني حسيت روحي طارت من الفرحة من اجت سيارة ركضت اشر الها ودموعي بدت تنزل حسيت خلص راح اخلص من كلشي وانسى العشتة وانسى جنت حامل وتگطع ابني كدام عيني. وكفت السيارة
سودة مضللة ماهتميت لشي ولا ذولة منو بس شيسوولي مثلا يعذبوني مو اني عايشة بعذاب.
فتح الجامة ولد لابس نضارات سود وملابسة كلهن اسود مسحت دموعي وكتلة: -وصلني وياك لوين متروح
كال اصعدي فتحت الباب صعدت روحي طايرة حرك السيارة ودموعي تصب حتى نسيت الخوف من هالرجال الصاعدة وياة رفعت عيوني شفتة بالجامة نازع النضارات عيونة خضر يتجدحن عكد حاجبة وكال.
-بيج شي كولي اساعدج
-بس اخذني حباب وين توصل انت
-انتي وين توصلين.
انطيتة اسم المنطقة خايفة على فرحانة مدري ابجي مدري اضحك حرت شسوي، السيارة تمشي والرجال ساكت ماسال ليش اني هنا وليش ابجي هذا الشي الخوفني حسيتة من جماعتة لان لبسة وسيارتة مال ناس ثكال.
-انت منو والقران گلبي خلصان داخلة على الله وعليك اعتبرني اختك ولاتسويلي شي
-اهدي اختي قسم ما اسويلج شي انتي بايدي امينة
-حتاخذني للمنطقة الگتلك عليها
-هسة تعرفين.
گلبي شوية ويوگف المجهول يخوف يمشي بية ماعرف وين تندمت الف مرة لان طلعت لو باقية وي شعواط يشعوط روحي مو احسن طبكت السيارة بصف بيت سن يطك بسن وين ورطت نفسي بيا مصيبة بيا جماعة نزل وفتحلي الباب انزل دموعي تجري صرت اتوسل بية.
-فدوة لاتسويلي شي عليك الله كتلك داخلة على الله وعليك بشاربك اني والله لو مرتاحة ماطلعت
-اهدي اختي اهدي شوية البالج مو صحيح ما اسويلج شي شيليها من بالج الفكرة.
-انت منين من جماعتة فدوة كلي
-لا احنة الشرطة
فتحت عيوني بذهول وكلت متفاجئة: -شرررطة!
-وياج ضابط لاتخافين
بقيت بمكاني اريد استوعب ما اكدر اباوعلة لطولة يمشي كدامي كلش طول وضخم معقولة ضابط لو يطلع مثل دلهار او يمكن عدوة ويستخدمني ضدة ردت اركض وانتبهلي وكفت خايفة كلش. ابتسم نص خد ومد ايدة بسترتة طلع باج خلة كدام عيني قريتة
كلبي برد نوعا ما اسمة باهر فعلا ضابط مثل ماكال.
باهر: -ها وهسة تاكدتي اني ضابط مو تاجر
-لا بعدني لحضة هذا عيونة سود بالجنسية وانت عيونك خضر
ضحك وكال: -يولو ما مخلي عدسات
عكدت حاجبي اباوعلة شهلورطة الصرت بيها خليت ايدي على خصري وكتلة: -بلة افرك عيونك خل اتاكد من صحة كلامك
فرك عيونة مغمضهن رجع فتحهن يضحك: -خضررر يولي خضرر انتي حولة عليش ماتشوفين بالجنسية زين منيلي سود.
اريدلي بس حجة اضيع الوقت او يمكن اذا اخذت وانطيت وياة اعرفة من يافئة اخذت جنسيتة اتاكد منها مايبين اللون سحبها من ايدي وكال باستعجال.
-عجل الوقت مالو حوبة استعجلي مو مال اتصفن
راح يمشي سريع رحت وراة بدون تفكير فتح الباب ودخل بقيت برا بيت صغير كلش حتى مابيه كراج صاحلي ادخل بس ماكدرت شلون يربي شسويت المن اجيت وياة ماحجة وياي شي بقيت اباوعلة اجة وانطاني جهاز صغير عكدت حواجبي وكتلة.
-شنو هذا.
-هذا جهاز تبقينة يمج عن طريقة توصلين المعلومات النة يعني حنة راح نتواصل وياي شوكت يجي ادهم وشوكت تجي الشاحنات وقت الاستلام كولهن عن طريقج
-ادهم منو
-رجلج
-شقصدك لحضة لحضة خل استوعب هو مو اسمة دلهار مدري شعواط
-ههههاااايييي دلهار وشعواط بسرعة صدگتي والله عندج عقل
-يعني اسمة ادهم هسة
-اي بس اياج ثم اياج تناديلة باسمو الحقيقي شكنتي تصيحيلو دلهار رترجعين تصيحن دلهار وكذا
-فهمني انت شلون عرفتني زوجتة.
-اخت عادل الخسيس نعرف من زمان باعج الة مقابل بضاعة كثير كبيرة وربح وراها فلوس
-تعرف وين يوديهن ذني الفلوس ترة عادل مامنطينة شي حتى بيتنة باعة واخذ فلوسة
-اخوكي الكل يطلبو فلوس وركبتو مرهونة زوجج تا ياخذ الفلوس يسد الدين
اخذت الجهاز بيدي بللت شفتي وباوعتلة بحيرة
-شلون وصلت للمكان الجنت بية اني
-كلو بخطة وترتيب مني انا سويتها تا تطلعين واشوفج وجهج الطيف.
ابتعدت منة ورحت امشي باتجاة السيارة راسي مسطور كلشي مجاي افهم لحد الان ممستوعبة هذا ضابط، ارتجيت على السيارة باوعتلة بحيرة يمشي باتجاهي وجهة يطمن حرفيا يختلف عنهم ذولاك وجوهم تخوف. وكف كدامي خلة ايدة بجيبة
-سرى: دخت اني والله مجاي افهم
-اسئلي واني اجاوبج الج نص ساعة وبعدها ترجعين
-وين ارجع
-لبيت ادهم
-يعني ماخلص منة.
-تخلصين وتخلصين غيرج ساعدينة بهاذي المهمة إلى من اصعب واخطر المهمات عصابة كثير كبيرة عن طريقج نمحيهم من الاساس
-بس اخاف انلزم ويقتلني موت
-ما يسويها
-انت كلت مجرم ومن اخطر العصابات ليش ميسويها
يخاف ربة مثلا
-لا اكيد بس الافندي شكلو ارتاحلك كثير
-هه شلون عرفت
-الافندي مايبقى وحدة عندو لفترة طويلة مثل مابقاكي عندو
-اممم صح اتفق طاح على وجهها
-كثيغ حلو
-مصلاوي انت.
-هههههه لا مشكل انا جامع للهجات العراق بلساني لاتهتمين لهجتي مخربطة تماما
-مامهتمة بس لازم اعرف
-سرى من هسة صغتي وحدة منا تشتغلين عدنا شكد الفترة مانعغف شهغ شغيت مانعغف
ضرب على كصتة بخفة يضحك وهمس: -عوف الراء يولي عوفها
-شكاعد تحجي
-ولا شي ادخلي ننتفق على عملنا كيف يكون
صعدت بالسيارة يشرحلي وين اخلي الجهاز وشنو المعلومات اليريدها بالضبط خلص كلامة وكال.
-صيري ذكية حذرة قوية والاهم تعرفين شلون تطلعين الكلام منو اتقربيلو كلش تا لا يشك بيك
-تمام زين شلون توصلني خاف يطلع گدامنا
-لاتخافين هسا مايرجع حترجعين لمكانج كانك كلشي ماسويتي تسدينو للباب وتبقين طبيعية كانك كما كنتي.
وصلنة للبيت وقبل لا انزل كال: -اخت سرى الوطن محتاجك وابناء الوطن محتاجينك لاتتراجعين وساعدينة تا نقضي عليهم وندمرهم كلو يصير من تخلين ايدك بيدنا اتحملي طول الفتره والمماطلات الحتصير لاتستلمين مهما صار
-ان شاءلله.
خفت اكثر مما جنت خايفة مسؤولييتي كبرت هسة صارت الدولة وراي تجاهلت كلام وتوقعات سلبية هواي ورجعت للبيت مثل ماكال محد موجود دخلت البيت على وضعة سديت الباب ورحت لغرفتي ذبيت شالي وكعدت على السرير لازمة راسي بيدي طلعت بشنو ودخلت بشنو صدك لو كالو يم حسين صرتي بثنين مسؤوليتين وكعن براسي ماكو غير الله يساعدني حتى نخلص من الظلم...
هدى: -كاعدة مبتسمة على نوف واخبالاتها تركض ورة البزازين فرت البستان بيهن فر اجتلي فحطانة كوة تجر النفس.
نوف: -هففف فحطت وما لزمتهن
-مايلزمن ذني عوفيهن صدك صرتي احسن
-اني المفروض اسئلج هذا السؤال صرتي احسن
-جذب ما تخطيت لسة كلبي يوكف من اسمع جلمة استشهد عبالي عباس راح للابد اخ اخ راح ولد شاب
اجت حضنتني مخلية راسها على راسي غمضت عيوني احجي البكلبي مجمر.
-ماكدرت اتخطة ضحكتة لو صوتة كلبي يأذيني من اتخيلة مات واندفن ليش نوف ليش والله خطية بعدة شاب مو لان خطيبي وضايجة علية بس هو خطية ماكدر ماكدر اتخيل.
سكتت ابجي وهي تبجي وياي دمعها لامس خدي مسحت خدها ابتسمت ومسحت خدي.
نوف: -اول مرة بحياتي الكة وحدة مثل تفكيري صح اتفق اني هم هيج افكر شاب طويل مرتب ضحكتة تجنن يموت هيج
-استشهد نوف شهيد هذا.
-اي اعرف الله يرحمة ويرحم الجميع شنو نكدر نسوي هذا مكتوب من فوك مو هيج يكولون
-اي صح
-اي يلا كومي كافي بجي باجر اخر امتحان النة خل نروح لسجى تراجعلنة
رحنلة بوجهنا للحجرة وسن تريد تاكلني من يوم الاستشهد بية خطيبي ادري بيها ماراح تجوز مني الله اليسترني منها طلع بوجهنا عباس جلبت بنوف ومشيت بدون ما اعاينلة صاح وراي وكفت منطيتة ضهري كرصتني نوف درت وجهي اهزلها براسي.
عباس: -شلونجن
نوف: -زينات
عباس: -دومجن.
نوف: -تسلم
عباس: -اوكفن خل اجيبلجن مصرف
هدى: -مايحتاج عدنة خير من الله
جريت نوف ودفعتها بالحجرة.
نوف: -شبيج العكروكة ام العكاريك شبيج وي الرجال تعنفصين علية كبررر
هدى: -هسة انتي شعليج
نوف: -ديلا انجبي
سجى: -ها نوف سالمة بس لا انعديتي مني انوب كلة تصيحين انجبي
نوف: -لا بس يم هاي العكروكة تعنفص على الولد
سجى: -عيب امي عيب بدلي اسلوبج لا اطيح حضج
هدى: -دولن بكيفي.
سجى: -راحت مددت على بطنها تقرا ونوف وياها رحت اشوف سفانة صايرة حبيسة بالحجرة ماتطلع لامنا ولامنا حياية تذب سم عليها وهاي عبير يووة عيالها حتى ما يسالون عليها يريدون يطلكون ساعة السودة اذا تطلكت البيت يصير فلم هندي بس نجيب مصور كلشي كامل حتى حياية متوفرة شفتهة زينة
رحت اكضي شغلها ورغد هم مامقصرة النهار كلة تشتغل خطية تطلع حركتها بالشغل والتنضيف.
مريت من ام رغد تخابر برحمن تدك على رجلها وتكلة.
-يو ماجيت اتبرة منك تسمعني اغضب عليك ليوم الدين ولك رحيمان ارجع وي ابن عمك لاتشلع كلبي
هزيت ايدي وصعدت والله يا الله هم حاسبة روحها ام عود تسال عليه كبر كون لفج كملت تحاضيري ونمت من وكت كعدت الصبح وصلني فارس بدربة
رحت كعدت اراجع بعد وكت اتصلت بريم بعدها.
طلعت علج وصرت اتمعلج جني صخلة لو ما لعبان النفس اتمعلج واضحك الناس علية رفعت راسي يبوو لا هلة ولا مرحبا خليت الملزمة على وجهي بلكت مايشوفني شفتة يخابر طفرت من مجاني للقسم تانيت ريم ياهسة تجي ياهسة ماكو فات الاملح عطرة سابقة خزرتة بطرف عيني ودنكت العب بموبايلي سويت روحي ماشفتة طب ولن هيثم فوك راسي...
-شلونج سجى
-الحمدلله.
رحت امشي جدام الاملح هسة يلزكلي هيثم يوسف وفعلا اجة وراي يصيح: -لحضة سجى ممكن شوية
بدي اصيح يبوو الم الجامعة بس تادبت وكتلة اتفضل اخي اشوف الاملح ضل يفتر يسوي روحة يخابر.
هيثم: -عادي نحجي
-لا لا لا.
صعدت كبل لقسمي من محاظرة لمحاظرة مالحك يحجي وياي واخر محاظرة طفرت كبلهم مابية حيل يلزك وياي وانة راسي مسطور رحت للكراج متانية نزار قباني اشتعلت صفحتة بس انة واكفة خرب بيهم لازم يفشلوني جدام صاحبهم الاملح سويت روحي الوضع ريلكس وانة مشتعلة نار صار جدامي
رفعت راسي كبل لا انطق كال.
-يتاخرون عليج امشي اوصلج
-عادي اتانيهم
-لا مو عادي تانين وحدج هنا
-لاتدخل
-بلا حجي زايد اصعدي اووصلج.
-شو تصيح بوجهي فصلية الك انة
-لابوية وينج وين الفصلية انتي شيخ بس ناگصج عكال
-هه هه هه ضحكتني ضحكتني
-وربج شكد شفت بس مثل السانج وكاحتج ماشفت
-ولا راح تشوف خوووش
رحت امشي اشتعلت نار امداني اذا خليتة يوصلني شعلت الموبايل شعل على نزار ماكو غالق موبايلة يعرفلها الحقير رجعت اتصلت بفارس جاوبني وكال
-ارجعي وي ارفد راح تصير ازدحامات محد يلحگ عليج.
ردت اكسر الموبايل من العصبية رحت حتى ماحجيت وياة صعدت بالسيارة وجهي مايگصة الطبر مو السيف تذكرت من امداني اذا صعدت وياة غميت روحي ضحك بصوت وكال.
-مو صاحية احلف عليج
-احلف براحتك مايهمني لان مقتنعة
سكتت عنة خليت الهتفون بذني وغفيت السيارة بيها عطر وجوها حلو فزيت من نومتي ازاگط.
-منو شنو ياهو
-انزلي وصلتي لو تريدين ترحين وياي للبيت
عدلت عباتي ونزلت: -شكرا جزيلا
-عفوا.
عيوني يلزكن من النعاس رجعت كملت نومتي كعدت العصر اكلت ورجعت نمت وراي جمعة كعدت الصبح كلت اهتم بروحي اصخم اجت هديوة تركض ونوف وراها وحدة تكل للثانية لا اني احجي.
-هييووو ولجن وحدة تحجييي
هدى: -لج اجووج خطاابة يااااي راح تعررسين.