رواية الرمق الأخير للكاتبة شمس العراقية الفصل السابع
الطاف رجع ندهني بگتفِ واني مصممه ما اتحرك من مكاني إلا يحجي حضرته؟ ما أحب الرجال الغامض أني هم اكدر اكون غامضه شنو فرقهم عنه!
فيصل أنتِ ليش عناد
الطاف لا تحاول ارجع احجي ونكمل موضوعنا أظن هذا زواج عمر مو يوم يومين
ادري عمر واني أريد اخلص عمري على ايدج بس إذا تبقين بهذه طريقه كلامج ما أظن، امشي خزيتنا كلها تباوعلنا رجال طول بعرض موكفته حضرتج!؟
والله اسأل نفسك بالأول.
الطااااف اعصابي قبطت عليج كسري الشيطان وكومي ساعه السوده عزمتج بيها
روح أني ارجع وحدي چر الكرسي وكعد مقابيلي واني ابتسمت لا ارادياً
عود منتصره الخبيثه يلا بشنو نحجي أريد اولي للبيت تعبان أريد أنام
مو زين النوم تسمن هواي وانت تغديت سمك الله يساعد جسمك
ادخلي بالمفيد بشنو نحجي
اكو مره بحياتك قبلي احجي.
ماكو شخص يرتبط إذا ما مرتبط قبلها أما ناجح أما فاشل، وما أحب سوالف المزعطه تغارين منها لو تعال سولفلي شلون جانت علاقتهم شئ انتهى وصار ماضي واحنا ولد اليوم
أظن فهمت!؟
غصب عنج تفهمين ولو شگلج تشلعين گلبي من أول يوم انتصرتي عليه
تمام ابتسمت وكمت قبله عگد حواجبه مستغرب اردفت: - يلا گوم تأخرنا أنت مو تعبان ونعسان
لا فلا ينكدرلج تكعديني بمزاچج وتكوميني بمزاجح لا اليوم انسحلنا امشي عمي امشي.
ھَہھَہ. ضحگت هو خله ايده على شفتي باوع للناس وهو يكولي
لا تضحكين ينعل بلسيج ضحگتج رنانه
تمام تمام، طلعنا للبيت كل اشوي يباوعلي حسيت عنده سالفه، خير فيصل اكو شئ
فيصل يعني الصراحة لو تترگين جامعتج مو أحسن أنتِ بعدج مرحلة ثانيه! تزوجين شسوين بالدراسة بعد...
الطاف شنو شنو من سابع المستحيللات اترك دراستي وهذا الشئ اتفقنا عليه لا تخلف وعدك رجاءاً.
علي كيفچ اعصابج يمعوده خلص انسي الموضوع تكول ذابح اهلج مو كايلج اترك ِ دارستج
أي دراستي خط أحمر أني تعبانه ومستقبلي اصلاً ما جنت مفكره اتزوج إلا اتخرج بس قسمه صارت
أي فيصل اندل دربج سكتي عاد ما تعرفين تحجين
وصلني البيت وراح اني حيل ضچت گبل لغرفتي بقيت كاعده كلامه يرن بالاذني إذا سواها وجبرني اترك دراستي عزه اعوفه والله هففف، انفتح الباب ذهب اجتني لأن شكلي واضح عليه الزعل
ذهب شسوه هذا شبي وجهج.
الطاف ما اعرف موضوع الدراسه يكولي لو تتركين مو أحسن الج أنتِ تزوجين بعد
خيولي عبالچ استحي منه عابتله وانتِ صوجج شكو وافقتي هالمره كل مره ترفضين اليجيج شجاج وافقتي من دون كل إلى تقدموا الج
وافقت من وراهم أگلوا رأسي طيبه ومازن عبالك نايمه على گلبهم، علمود يرتاحون فرغ الاستقبال ضيمهم شغلي ما يدرون كملت دراستي بتعبي مو تعب أحد
أنتِ من يومج سباعيه وقسمتج هم ما بيها قصور خوش ولد بس هاا أني ما أحبه مو بيدي.
ھَہھَہھَہ ضحگتيني عمي لا تحبينه
أي اضحگي من يستاهل تقهرين نفسج
مستحيل انقهر علمود شخص بس انقهرت علئ تعبي شكثر جانوا مقهورين لأن اشتغل، يلا إيه الرزق الچ وال سميه والبنات
فدوه لروحج الطيبه وليدي الصغيرون والحنونه
اخذتني لحضنها وسوالفهاا الحلوات خليتني انسى شئ إسمه مغثه يمكن قوه شخصيتي هي اساسها ماخذه الدنيا بوجه يضحك وين تصفى خل تصفى هو العمر مره وحده...
مرت الأيام جان مستعجل على الزواج تمنيت تخلص هالسنه يلا نتزوج باقي كم شهر بس هو أصر تالي كلتله براحتك
رحنا جهزنا أني وذهب وجديتي أخذت كلشي احتاجه حتى ملابس جامعة أخذت كلشي يصير خاف اروح يمه يصير طماع براسي ھَہھَہ چنت احسب لگلشي واخذت هدايا للبنات وامهن وذهب وجديتي حتى مازن وابوي كل واحد ساعه بس طيبه اه گلبي يا طيبه خليتچ جرح للموت ما انساه...
رجعت تعبانه خليت ذهب والبنات يرتبون واني گبل نمت ما كعدت إلا هو اتصل لكيت ماكو احد
وجاوبته
فيصل شلونج عيني
الطاف زينه
مشتاقلچ
أي
هاا هيج صارت بس أي
بعدني ما متعوده عليك
وشوكت تتعودين حضرتج
شبيك أنت ترى ما احب أحد يريدني على مزاجه
هو أنتِ على مزاجي وعاجبتني ميت بيچ اريدج يمي اليوم گبل باجر بس انتِ عبارة عن گتله مشاعر جامده.
ما احب اتغزل وبعدني ما ماخذه على الجو الغزل مالتك خوما اكعد اجاملك واني كلتلك خل فتره الخطوبه طول علمود نعيش قصه حب ونتعارف أكثر أنت ما رضيت
ما اطولها لو مدري شنو يصير لو أمي تموت هم اخذج عمي ترى مسلوگ أريد مره بيتي ترى دحت
اليسمعك يكول حياتك كلها نسوان هاي إذا مو اكو نسوان بحياتك قبلي
ماكو بس انتِ
شنو اليثبت
هم سمعتِ انسان خالي من الماضي
لا!؟ بس شنو ماضيك هذا الخطير.
مو خطير القصة وما بيها أريد الحاضر بيج
تعرف تجرح وتطيب نفس الوقت
شغلتي هاي! أني چسر للطيبين، بس كون اكو أحد يثمن وجودي بحياته أريد اتقدس عندج وبس
معوز حنان
محترك گلبي
أحم أي شسويت خلصت شغلگ
ما عندي شئ الغرفه موجوده بس جراجف اخواتي يشترون وكم شغله وتبقين بس انتِ
ليش مو مفروض أني اختارها شبسرعه اشتريتها ليش هيج أنت مستعجل
الغرفه جاهزه وكافي تلغين هي كل الغرف نفس الشئ صاج وين الاختلاف بيهن.
اني ردت ترگي نازل موديله هسه كلش حلو
تركي هذا منين طلع وبعدين سعره بالاوراق عمي الخشبي أحلى وارتب خلص أخذت اني بعد
ماشي بالعافيه علينا
ما تحلى إلا بوجودچ لو بيدي اليوم تنوريها بس شسويلج طولتيها عليه
فيصل ما احب بسرعه بسرعه عبالك احد راكض ورانا واني عندي دوام هم يلا الحگ
ماشي كيفچ باي.
الله وياك هذا شكد مزاجي الله يعين گلبي شكلي ورطت روحي الله يكون بالعون مستحيل اخلي يتحكم بيه اثنينا نمشي حياتنا تهون الطاف تهون
كمت اتوضى اجيت أصلي رن التلفون طيبه ما جاوبتها اكثر من مره اخر شي دزت رساله
طيبه بس ابارك الچ وبعدها اولي وعد
اتصلت وجاوبتها: - شتردين اختصري!؟
سلامتج أريد بس سعادتج تبقين خيتي واريد الج الزين
مغزل كلامچ شنو!؟
مازن وابوي هم سألوا عليه خوش ناس لو گبل وافقوا.
أي طبعاً لعد خوما حيا الله
أني هم سألت عنه يعني اني وقادر يگولون خوش ناس
أي احسن من هذا أبن عم رچلج بس ردتي تزوجينه إليه دفنيني بالريف يمج
لا تصيرين انانيه اني ردت الزين الج وناس نعرفهم وهم تكونين قرييه مني لا كلشي تفسيرنه مو زين
قريبه منج! من يمتى هذا الكلام قبل شگج بيه لو بعده يل الفاهمه
أنتِ زين تعرفين زوجي معجب بيج ويريدچ!
لا والله بعدج مريضه وافگارج الوسخه بس تعالي كوليلي بيه شرع ذكروا زواج الاخوات بابا حرررام حرررام ما يچوز شبيج أنتِ بس حقج تركي دراستج ما اخذتي علم ينفعچ ويشغل عقلج
اعترف أني غبيه أمامچ بس مو معناتهاا تقللين من الاحترام البينا الطاف أنتِ تغيرتي هواية.
طيبه لا تتصلين بعد زواج وراح اتزوج شتردين بعد راح اعيش حياتي وحتى دراستي أكملها والمشغل ذهب استلمته علمود ترتاحين أكثر وضميرج يرتاح أنتِ ومازن حالفتوني عليه كرهتوني بعيشتيي تزوجي وتزوجي هاي تزوجت فكوا عني رجاءاً
الله يسعدج مع السلامة.
مع السلامة، انتهى الاتصال بينا وحبل الوصل انقطع والخوه ما عادت موجوده أخت وحده لعب الشيطان برأسها وبعدها عني وصفيت وحدي واني امس الحاجه الها تجهيز العروسة وشغلاتها كلهن افتقدت امي واختي بيهن صارت حالها حال امي بس الفرق امي ميته هي عايشه...
ومشت الأيام واليوم الحنه مالتي من الصبح وحدي احضر شغلاتي وبدلتي هوسه افتر دخت ضربت رأسي بقوه هواية شغلات مو مكانهن، دخلت جديتي عليه.
الحجيه شبيج بنيتي روحي جهزي نفسج وشغلاتج أني اجهزهن ولا تشيلين هم
فدوه لروحج بوستها دخلت الحمام غسلت ما خليت مكياج طلعت مازن شافني وابتسم وابوي هز رأسه وكال
حاتم بعدها صغيرونه حملتها مسؤوليه زواج وهي طالبه حملچ ثگيل بنيتي شلون ادبرينه شايل الچ هم
الطاف لازمته كفوف أيديه وابوس بيهن جاوبته اني بنت أبوي أني اشبه امي.
(ماكو شئ صعب بس الصعب لمن نكول عليه صعب).
هاي الكلمة منك أخذتها وأن شاء الله أني گدها واتخرج وتحضر حفل تخرجي واحصد ثمر تعبك عليه
حاتم اني ما تعبت عليچ ولا على دراستج أنتِ تعبتي علينا أنتِ طفله جنت تتوسلين مازن يخليج تروحين دوره تعليم خياطه وصرتي خياطه مشهورة وفتحتي مشغل وصار الج إسم وكملتي دراستج ودروسج وخطوط هذن كلهن أنتِ تعبتي على نفسج بنفسج بينتي المرأه هي تبني نفسها مو احد يبنيها.
وهذن كلهن بفضلك وبفضل كلامك إليه أنت قدوتي بهذهِ الحياة أنت علمتني اسند نفسي بنفسي حضنته بقوه يعز عليه فراگگ واني منك ما شبعانه...
أصعب وجع فراق الأهل طلعت من بيتنا ماكو دموع بس قهره بگلبي وتذكرت امي وابوي إلى وجوده بحد ذاته نعمه بالنسبه إليه الأب هو الروح بوسط الجسد،.
وصلنا الصالون جانت أخته موجوده وذهب وهديه بنت سميه هم اجت ويانا اباوع بالوجوه روحي تريد احد من هلي باوعتلي ذهب كأنما تقرأ عيوني وفاهمتني!
ذهب أني كل هلچ أني خيتچ وامچ وكلهم يبعد العافيه واهلها والله اسويلج حنه ما صارت بس عيونج تبقى تلمع بدون دمعه ولو أدري بيج ما تبجين عينج عين الصخل...
الطاف ھَہھه فدوه لسوالفچ الحلوه يا فرحتي بوجودج، باوعت النا حياة أخته الجبيرة وابتسمت.
حياة ليش شنو تقرب الج لأن علاقتكم كلش حلوه
ذهب بنتي وصديقتي وجارتي كل هلي أني ما عندي أهل هي اهلي ويوجعني گلبي إذا تأذتت هي الروح بوسط معاليچي ينعل بلسيج نزلت دموعي تأثرت خلص ما ابجي اتعلم منج
الطاف أي ممنوع البچي إلا في حالات الضرورية فدوه لعينج...
حياة بس الشخص إذا ما يبجي ما يرتاح
الطاف بس ما يجيب حل والضعف محلو للمرأه ما اعرف احس البچي يخليني ضعيفه كدام نفسي يعني ابجي الا ألامور تجبرني ابجي...
حياة تعجبني شخصيتج.
الطاف شكراً بلشت المگياج وتسريحه فتحت شعري طوله وسط بس ثخين، وذهب كل اشوية تتصل على سميه والبنات علمود تجهيزات الحنه فدوه لروحها ما قصرت عاد اجتي كامت تصيح عليهن ثولتهن بلسانها إلى ينقط عسل
ذهب يلا سولي شعري وأريد مكياج نفس لطوفتي هيج كون يلمع وعندي فستان أريد ارهش من جمال
حياة ليش خيه تردين رجال!
ذهب منو كلج الگشخه والاناقه للرجال لا خيه آخر همي الرجال عايشه حياتي ما اربط روحي برجال عشتوا خليني مرتاحة منه ومن لسانه وعگب أبو خليل ما يحلالي رجال
هديه عمه كم مره كلتي كلمه رجال ھَہھَہ
حياة ھَہھَہھَہھَہ شحلو سوالفچ منو هذا ابو خليل
ذهب واحد اخذنا النسوان بسحورتهن امداه تمشي مره بسحر خيولي
عگرتن مزاجي الحلو يلا خيه رتبيني شئ خفيف مرتب كون يرهش.
الطاف أهم شئ يرهش ھَہھَہھَہھَہ وحده وراه الثانيه آخر شيء هديه خلت شئ خفيف طلعت تخبل ربي يكتب الج حياة حلوه مثل وجهج
هديه شكراً يا احلى عمه
الطاف حضنتها فرحتهن بيه ما تنوصف طلعنا للبيت والاغاني وهي وذهب يصفگن أغاني لحد ما وصلنا البيت حتى باب الحوش مخليات النفاخ والنشرات نزلت وبدلتي اتعثر بيها اجت سميه وذهب ساعدوني شفت أبوي بالحديقه هو وجديتي ابتسمت الهم لا تنزلون دموعي تأثرت.
حاتم الفرح والسعادة لعمرج بنت روحي ربي يسعدج بنيتي الحلوه طالعه تخلبين بس ذهب احلى منج
ذهب أي والله أبو مازن عشت صدك اني احلى منها
حاتم أي صدك تخلبين
الطاف ضحگنا ودخلت الاستقبال كعدت فارشات ومرتباات حتى الميز جاهز باوعت كيكه اسماءنا اشرت الهن منو چاب الكيكه.
ذهب صديقاتج من الجامعه دزنها وگالن نچيها رايحات الصالون عيني
الطاف صدك فدوه لعمرهن بس تبقين أنتِ صديقه روحي الوحيده.
وليدي الصغيرون لا تخليني ابجي يسيح المكياج يخرب اللوك يلا خل اشوف تجهيزات هاي سميه فاهيه.
الطاف راحت بقيت اباوع الأجواء كلش حلوه صحيح ناقصها وجود امي واختي بس الحمدلله اثنينهن الله يرحمهن...
بدوأ يچون ذهب عازمه المنطقة كلها عمامي ولا أحد اجه اما خوالي من ماتت امي ما شفنا أحد منهم.
يعني بالمختصر ذهب وكفت وياي بكلهن وجديتي العافيه تروح وترجع عليه اسويلي لفات اصغار لأن جوعانه شبعت واجت هديه خلت حمره لان خف لونها...
مر وقت وسمعنا صوت الاغاني اجو احس گلبي وكع بالكاع غمضت عيوني لازمت أيديه ذهب ودخلوا أمه وخالاته وبنات خواله هو دخل جان طالع حلو لابس قاط نيلي قميص أبيض ومحلق صدك حلو باسني من رأسي وكعد بصفي عيونه على ترتيب.
فيصل حلوه ومرتبه نفس الوقت شهل الذوق عاشت ايدج على الترتيب عجبني ذوقج
الطاف شكراً هذا من ذوقك
كلهم ما عندي ذوق بس بيج عرفت الذوق شلون شكله باقي طعمه
ما جاوبته بس خدودي صارت نار شغلوا الأغاني والركص المعدل ما قصرن ذبن لحم وبعدها صديقاتي اجو باركوا النا عيونه تباوع اهنا واهنا ذهب كرصتني بيدي ها شتردين
ذهب اكص ايدي إذا ما طلع يدور حلوات ويموت عليهن باعي عيونه شلون يباوع.
اروح اطلعهن هسه بصف الگمر ويباوع وجه التانگي
الطاف سكتي لا يسمعهن عيب صوتچ كصينا الگيگه واكلنا واحد الثاني واخذنا صور جان جايب كاميرا أخته تأخذ صور أخذت وياه اهلي واني بدلتي دخلت غرفه أبوي واخذت اني وياه وجديتي وذهب والبنات بس من دونه هو عفته يمهن رجعت يمه يأكل كيك احم فيصل لا تأكل تسمن
فيصل ماشي اصلا شبعت بعد وگت أنتِ مدري وين رحتي وهسه وكت اهلج غير تبقين يمي.
الطاف ترى أخذت صوره ورجعت شبيك أنت ما عندك صبر ارجع أكل ما عليه بعد تريد تسمن تريد تضعف كيفك
لا اضعف احسن علمود ما يزعل الحلو
لا زعلت ولا شئ جسمك مو جسمي
فهمنا عاد ضحكي عاد لا تگلبين الخلقه
الطاف أي قدموا ضيافه البنات وهو خبلني بعيونه مدري وين تروح الظاهر صدك ايدور حلوات واكتشفت هالشي متأخر أني الك لعد...
خلصت الحفله رأسي صدع بشكل فضيع حتى دخت لأن هواي طولوا يلا راحوا والهوسه بالبيت تجلط الجهال كلبوا الدنيا حتى زرعات أبوي راحن بين رجلين أني بدلتي اباوع عزه هاي شنو
ذهب خيه همج مفروض جهال ما يجون جلطوني
الطاف يلا سهله ابدل بدلتي واجي اساعدج دخلت الغرفه البنات ساعدوني بيها اخدمجن بيوم عرسجن
هديه فدوه الج عمه عيونه الج تدللين.
الطاف ما قصرن وسميه خطيه غسلت ونظفت وكفن وكفه ما تثمن عاد اني شلت كارتونه كيك وعصير والكيكه هم نصها خليتهن بيد سميه اخذيها ألف عافية
سميه الله يعافيج ويسعدج يالطيبه الحنونه والله يعز علينا فراكج حتى البنات مقهورات عليج يحبنج يشهد الله انتي حالج حالهن.
الطاف فدوه لروحج مو بعيدة عليكم ذهب صارت وصلتين تعبت سوده عليه حتى عشه سوت وياي تعشينا ما خليتهن يروحون بقوا يمي سهروا وياي ولبس انطيتهن ملابسي كلهن ما أخذت كلشي فقط جهازي كله انطيته الهن وسميه توزع بينهن وهنا متعاركات كل وحده تريد قطعه شكل خليت بيد ذهب كم فلس كوه اخذتهن فرحت بيهن...
وكضينا الليل سوالف حلوه وداعيه وجديتي كامت تبجي بوستها وتدعيلي ونمت بحضنها وغفيت رغم الغصه البصدري...
صباحاً: -.
الطاف كعدت ذهب محضرتي الحمام تسبحت جانت محضرتي ماي ريحته ترد الروح من طلعت جديتي تقرأ على رأسي وذهب جهزت الجنط علمود ياخذونهن وشغلاتي من اروح الصالون. رتبت نفسي شئ بسيط لأن هو يجي ياخذني الصالون
ذهب كوليله اليوم لا يحجي وياي لأن واصله لخشمي أني بدون شيء ما أحبه انوب ياخذج مني اليوم
الطاف ھَہھ ماشي تدللين حبيبتي، يلا هسه يجي كالي نص ساعه يمكم، أثناء كلامنا رن هورن سيارته أجه أجه.
ذهب أي فهمنااا يلا امشي
الطاف ملامح الحزن بينت على وجهه باوعت سميه عيني ابقي يم جديتي اليوم باتوا يمها بالي يبقى يمها
سميه لا توصين بعيونه هاي الغاليه روحي الله يسعدج
الطاف ما تقصرون، طلعت وراها سلمنا وطلعنا الصالون وهو ساكت حسيته ضايج خير فيصل بيك شئ
فيصل هاا لا كلشي ما بيه اشوي تعب لا يضل بالج حلوتي.
الطاف ماشي لحد لما وصلنا هو ما يحجي وصلنا وراح دخلنا الصالون تنتظر ام الصالون تجينا اكولج حسيتي بي مو عبالك ضايج
ذهب ليش ضايج عشتوا مفروض فرحان راح يأخذ زينه البنات يمعوده أحسن ما سمعنا صوته تعرفين بيه ما أحبه ولا اطيقه.
يعني أنتِ ما تحبينه لأن هو ما ينحب لو شنو شو أني اشوفه حباب ما بي شئ.
لا كلشي ما بي هو ورده بس أني مقهوره لأن راح ياخذج مني لهذا السبب لان يضل بالج، اروح اشوف ام الصالون وين نامت الباب مفتوح وهي ماكو صالونات آخر وكت
ماشي خطيه خاف عدها شغل لو تتريك خليها هسه تجينا اكولج لا تنسين شغلاتي والجنطة بيها فلوسي ما اعرف وين اخليها اخليها يمج باالسبعه تجيبها يمي خاف ادزها بالغراض كلشي يصير خاف تروح غير انجلط وهذا مازن ما يخلي فلس يم جديتي أدري بي واني مخليتهن للحاجه.
ذهب خليهن يمي حبيبه الدنيا ما بيها أمان من تحتاحين فلوسج بالحفظ والامان
الطاف أي هذا هو عمري انتِ اجت ام الصالون بلشت مكياج لبست حجاب اليوم ما طولت لأن ماكو تسريحة توني ردت اتصل عليه هو اتصل جاوبته هلأ
فيصل هاا عيني خلصتوا
الطاف أي بس الحجاب تلبسه إليه وهذا هو
حجاب شنو!؟
ً حجاب بدال التسريحة
شنو شنو!؟ ومنو كلچ تلبسين حجاب اني أريد تسريحة يعني بشرفج مجهز السيارات نجي وانتِ لحد الان ما مسويه شعرج...
أني مقرره حجاب وابوي كذلك وصاني البس حجاب ومقتنعه بي
كيف ابوج امشي أني أني أريد تسىريحه رجعي سوي شعرج بدون عناد
حجاب وهذا هو
تعاندين يعني
لا مقتنعه بي
الطااااف
جاوبته برود هاا!؟
رجعي خل تسويلچ شعرج ترى تأخرنا بدون عناد
فيصل لا تحاول الحجاب ولبسته وخلص يلا أني اترخص البنية تريد تشتغل براحتها
يعني تبقين على قرارج حجاب
أي والستر حلو
أحد كلچ عرضِ بالشوارع
حشاك بس أنت صعبت الأمر شسويلك يعني رد بصيااااح.
الطاااااف ترى اعصابي قبطت عليج رجعي سوي شعرچ موقف الناس علمود حضرتج
هذا العندي حجاب يعني حجاب تسريحة سويت بالحنه وخلص، فيصل لا اطولها
مااشي ما أطولها عليج أنتِ مصممه على الحجاب وتسمعين كلام ابوج
وكلامي ما اله كل أهميه عندچ
إذن ماكو عرس!
يعني شنو!؟
ماكو عرس ابقي بيت أبوچ تبعين مثالياات برأسي
صدك تحجي أنت
أي والله
بشرفك كول والله
أني طلع ما عندي شرف لا كدامج ولا كدام أبوج.
فيصل شبيك يعني صدك تحجي علمود حجاب وتسىريحه هيج تسوي
واظن أني ما مسويه شئ غلط بالعكس شيء زين
أي صدك! وتحجين ورأسچ يابس تمشين كلمتچ عليه خل ابوج يفيدج يلا سلاااام
وين
ما اجي ابقي بيت أبوج
الطاف أكبر صدممممه بحياتي كلها وللموت ما انساها كسرته بيه وكع التلفون من ايدي وأم صالون بعدها عفتهن دخلت الحمام بخبال اغسل وچهي وذهب تتوسل بيه تريد تفهم منِ شبيه.
ذهب خيولي خيولي الله ياخذه لا تنقهرين يروحلج فدوه الحقير النذل ولج مو أنتِ تنقهرين علمود رجال
رفعت رأسي واني غاسله وجهي، جيبي كلنكس هذا المكياج ما يطلع كم طبقه مخليه لخاطر الله
يعني ما مقهوره على إلى صار.
أبداً، امشي جيبي كلنكس من جنطتي اروح للبيت. بقيت أباوع بالمرايا واحاجي روحي ربي ليش إلى يريد الستره محد يريده الك بيها أراده سخرلي الاحسن يالله غمضت عيوني تماسگت روحي وأخذت الكلنكس منها ومسحت كل بقايا المكياج خلصنا وطلعنا بعدنا باب الصالون صار مازن بوجهيي!؟
مازن شمسويه الطاااااف!؟