رواية ولد الباشا للكاتبة فاطمة الأحمد الفصل السادس والثلاثون
سيرا
نزلت وياهم وتن طلع شيشة عُطر
رش علينا وعلى نفسه.
وَتان: علمود ريحة الحريق حرائق تروح.
سيرا: ذكي ااانتَ
الثاني ما ياخذ وينطي ويانه إلا ما ندر، تركنا
ودخل للمستشفى، احنه هم لحگناه وصلنا
وياه للطابق البيها غُرفة أبيل.
ثلاثتنا نمشي بإتجاه الغُرفه، إيمار سبقنا وصار گدام الباب لكن وگف، اشر بإيده بمعنى انتظرو
استغربنا ومشينا بهدوء شفنا الباب مفتوح على نُصه وإيمار متصنم بمكانه يسمع كلامهم مع بعض.
أبيل أُمك موجوده بالبصره.
متأكد، منو انطاك المعلومات؟
نفسه AXR ماكو غيره يگدر يخترق نظامهم الأمني.
هِلال حچت واتضح أنه الكل موجود، عمو اشتر وعلى سَند حتى عزام موجود.
بابا حبيبي فدوى استعجل شمنتظر
منتظر الوقت المناسب.
نظرتله عيونه غرگانه بالدموع وكل جسمه يرجف من العصبيه والقهر، مشى للأمام بخطوات ثگيله
يضرب بإيده على الباب ويدخل يحچي بصراخ.
إيمار: منتظررررر الوقت المنااااااسب منتظررررر الوقت المناسب شوووووگت يجي وقتك المناسب شوووووگت 18 سنة وقتتتتتتتك المنااااااسب حااارمني من أمي حااارمني من أاامي يااا چذاااب
الكل اندار للباب من دخلنا.
الأشتر: إيمار اهدى خل افهمك الحقيقه
ما يصير تحچي هيچي ويا أبوك.
عمو اشتر أجا يحتوي إيمار لكن نتر إيده چنت وراه و هو واگف بمكانه يحچي.
إيمار: لااااا تحاااول تلزمنييي ااانت مثله، وانتي هلااال كُلكم چذبتووو عليَّه ااابيل ولك خويااا حتى ااانت حتى ااانت.
هِلال: بابا فدوى احچيلك كلمه، إيمار إيمار اهدى حبيبي هسا تتخربط على سند، عزاام ليش ساكتين.
علي سَند: إيمار ابوك ما أكد موت امك ولا أكد إذا چانت عايشه، ابوك 18 سنه بين الحياة والموت ما يدري جسار بالدقيقة الجايه شراح يسوي بيها يقتلها يعذبها ما چآن يدري.
أبيل: تعال يم اخوك إيمار تعال لا تسوي هيچي.
أبيل حتى أنت چنننت تدررري،؟ براااووو عليييكم خوش چذب خوش تأليييف أبويه چآن عايش بين الحياة والموت خوووش چذذذب خووش تبرييرر
عزام: إيمار اعرف الحقيقه صعبه عليك
مو سهل تعيش حياتك بكذبه، أبويه چآن مجبور يبقى ساكت لحدما يحرر أمك افهم عاد شبيك.
أشر عليه ويحچي بقهر وما يلحگ يمسح عيونه.
لا لا لا لا انت انت بالذات لا تسوي روحك الأخو اليفهمني هذا أبيل گدامك كُبرنا سويه ويعرف شگد امي وفراقها أثر على حياتي على نفسيتي مع ذالك وغدر بيّه وضم السالفه عليَّه.
أبيل: گتللللك تعااال يمي إيمار
تريدني اسمع منك ترريييدني اسمع منننك و اااانت اسووءءء منهم اااسوء.
عزام انصدم حتى ما يرمش وبس عيونه محمره
هلال اجت لزمت إيمار وترزله فوگ حالته.
هِلال: كاافي عاااد اعرف شلووون تحچي ويااا اخوونا شبييك فقددت يبقى اخونا واكبر منننك اااعتذررر يلا
عزام تقدم وإيمار بألف يا على واگف على حيله
لزم راس اخوه باسه وجره لحظنه يحچي ب تَوعُد
عزام: اهدى ابن أبويه أهدى اعرف شجاي تحس
أمك هايه، اوعدك ارجعها ألك وعد ارجعها ألك بس أصبر هل فترة.
عافه بهدوء وطلع من الغُرفه، أما عمو أيهم گعد مندگ ولازم راسه، عمو اشتر ما عافه وأبيل هنا ينادي اخوه ويريد يگوم لكن على سَند ما يسمحله.
أبيل: إيمار، على ساعدني خل أگوم ما تشوفه ساكت إيمار احچي وياك وَتن ليييششش واااگف
شووفه إيمار
هِلال: إيمار احچي كلمه إيماااار
فجأة إيمار وگع من طوله چنت أكثر وحده قريبه عليه، خليت راسه بحظني واحاول اصحيه.
ودموعي ما توگف هذا فاقد يحچي وعيونه مغمضهن.
سيرا: إيمار إيمار افتح عيونك إيمااار نااادو الدكتور إيمااار.
كلكم تدفعون الثَمن محد ينفذ من نار گلبي على امي
هِلال: إيمااار فدوى لا تحچي هييچي بااابااا عموو بابا ديير بااالك على بابا أبيل لا تگوم لا تگوووم. دخيييلك يااا ااالله
عمو ارتفع ضغطه من جهة، وأبيل حاول يگوم شال الكانيولات الدم والمُغذي وشال أجهزة الگلب من صدره وگع وعلى ساعده وتن طلع ينادي الدكتور.
وأبيل كنبص بحالته هاي إيده تنزف ويحاول يصحي اخوه.
أبيل: ي يلا يلا گوم وصية امي گوم يا حيلي هلال احچي وياه يسمع منچ إيمار گوم لا تسوي هيچي بينا أمي تريدك اول واحد تريد تشوفك اول واحد إيمااار.
أنتهى إيمار حتى إيده الچان شاد على إيدي رخاها
ودخل بالظلام.
وَسن
خليت روج أحمر طوخ
فردت شعري الفستان أبيض والخصر مشدود
وگفت اشوف طول الكعب على الفستان.
وَسن: ما حبيت.
بدلته لأطول كعب عندي لبستها برجلي وگفت
مره ثانيه، وهل مره انغرمت بنفسي كالعاده.
وَسن: من يوم يومچ هووت.
اجت عيني على الخاتم
وَسن: ما عرفت أخلص منچ.
لبستها بأصبعي اليسار، دزيت رساله وكتبتلها
وَسن: (نامت لو بعدها؟ )
بسرعه جاوبتني (تريد ماما وبابا)
دزيت آخر رسالة قبل لا أنزل.
وَسن: (نيميها لا انيمچ بصف المگرن. )
قفلت الفون وشمرته عالتُخم.
وَسن: مُربية فاشله لازم داد يفصلها.
رتبت دلعة الفستان وطلعت من غرفتنا
للطابق الأول، نزلت الدرج اللي كُله مرشوش ورد أحمر و في مُنتصف الصالة الطاوله جاهزه
والشاهدين جاهزين، وينتظرون
شافني وتقدم بخطوات رزنه بإتجاه الدرج شايل باقة ورود توليب أبيض و أسود، اردفت بيني وبين نفسي وآني مستمره انزل.
وَسن: توليب أبيض و أسود.
صاح من مكانه شگد يغثني.
نَائل: نعمم نعمممم أنه حُب ابيض واسود.
اقترحت يخلي وردايتين حمره بالنص احتراما وتقديرا لدم الأنذااال اللي ماتو بسبب قصة حُبكم.
وَسن: لوسيفر أنت أنچب.
نزلت آخر پايه وگفنا أمام بعض.
انطاني الباقة وتقرب باسني بطرف شفتي.
ورجع لوسيفر صاح.
نَائل: شايف شايف المرأة ألتي تزوجت ثلاث مرات من نفس الخايس، رايُد بُنيَّةً وفيةً مِثْلُهآاا.
ناجي: ماكو بنية ترضى بيك هم سايكو هم لوسيفر، انتَ ضل ضل عار وعلّه على گلبي.
لزم إيدي ومسح على الخاتم.
ليش خانگتچ اشوفها راهمه على الأوتفت.
تشابكت اصابع إيدنا سوا ومشينا مع بعض يم الطاولة، سحبلي الكرسي وگعدنا، أمام القاضي.
نَائل: اگلك جوجو ربك شگال اء ايي أن كيدهن عظيم انت متزوج ثلاث مرات وهاي المره الرابعه من نفس البومه الشگره.
جاسر: اعرف شلون تحچي.
ناجي: نئول ألزم لسانك كافي تمسلت.
القاضي تدخل بالنقاش.
--: إذا بقيتو تتجادلون العقد يتأجل.
وَسن: بليز فضها خل نخلص من هل إجراءات.
نَائل: بلييززز فضها املاك جسار ينتظرها.
جاسر: تالي وياك شني سالفتك؟
نَائل: مو آني مو آني هذا صديقي.
وَسن: دقيقه حُبي هسا أنت لوسيفر لو سايكو.؟
نَائل: لو كُنت اعرف كُنت هَئولك.
جاسر: ناجي شوية ألزم أخوك يعني لا تخليني افجر دماغه الفارغ.
نائل گام وصرخ
نَائل: تفجررررر دمااااغ منووو اااابن الحيوااااان
جاسر: لا حول ولا قوة الا بالله العلي العظيم ألزم اااخوووك.
نَائل: تماااام انچب بدون ذكر اسماء تمام راح اشهد على زواجكم الخايس وامشي ما اريد ابتلي بيك.
وَسن: شگد تلغلغون فدوه لألل، اوپس نسيت.
نَائل: ولا أنتي شگد حقيره شگددد؟
--: استهدووو بالله شبيكم خل أعقد وامشي.
نَائل نظرله وعيونه موسعهن يتخبل من اسم الله
گام من مكانه هد على القاضي يخنگه بإيد وحده.
نَائل: گللللت بدووون ذكرررر ااااسماااااء ماااا تفهم ماااا تفهمم إلا اااطيح حظك لگبر سلفك إلاااا اخليك تررركض مصللللخ.
وَسن: كوميديا سوداء وحق ذاك المگرن.
ناجي: هو منو طيح حظ اخويه غير ذاك المگرن
نَائل كافي نااائل راح يموت الرجااال عووفه.
جاسر: مهزله والله.
ناجي: شبييييك يمعود لا تذكررره.
جاسر: اجيبله شيخ يقرا عليه ويفضنا.
وَسن: حُبي لا تقترح هيج اقتراحات هذا مو لصالحنا.
جاسر: يا حُبي هذا ينرادله رُقيه.
ناجي: نااائل عوفه، اانت انچب رُقيه شجااابها بالنُص.
وَسن: حمموووتت ههههاي رُقيه شرعيه يا غبيييي باله يم اختي امدااا حظك.
جاسر: خرب بنات هاشم آلمياحي لعبن لعب بگلوب أبناء نَصار.
نائل عاف القاضي وكل جسمه ينتفض
گعد وطلع من جيب الجاكيت گزازة عُطر فارغة حجمها صغيّر بگد اصبع الخُنصر قربها من خشمه وضل يشم بيها.
من سنه واني اشوفه يشم بيها سواء من چآن برا العراق او من رجع قبلنا وكلما افتح كاميرا وياه اشوفه يشم بيها، شني قصتها!
وَسن: هاي الشيشة بيها كوكاين غير مرئي لو شني سالفتها؟
نَائل: لا تخلي خشمچ يطلع من خارطة وجهچ.
جاسر: انت ليش ما تعرف تحچي.
نَائل: ياااخي تعااال علمني تعاال علمني تعااال
فرد ذراعه وكل كلامه ينطي رد فعل بجسمه وإيده
ناجي: تمام أهدى متسودن شبيك.؟
القاضي يشرب ماي ومصفر، گمت من مكاني.
وجاسر ساكت يشاهد بصمت والنار تطلع من نظراته يغار من طبيعة ميانتي ويا نائل، تقربت سحبت الشيشة منه وهو رافض
نَائل: رررجعي لا أبتلي بيييچ.
وَسن: ريلاكس حُبي خل اشمه شبي هذا.
قربته من خشمي اول ما شميت ريحة العُطر
غمضت عيوني من جمالها وفواحتها، عُطر نسائي بحت و قوي قوي كلش اعرفها لهاي الماركة العالمية.
رجعتله الشيشة وهو ضمها بجيب الجاكيت
فعليا نَائل اذا فقد اعصابه يشم من العُطر ويهدئ يرجع طبيعي من يشم منها.
وَسن: لوو ستوري؟
نَائل: سدي حلگچ لا اشئه شئ.
ماكو شي من هذا الحچي، العطر راحه نفسيه لا أكثر.
وَسن: اووو ياااه يااه ريلي!
نَائل: لاااااا تخليني اااابتلي بيييچ.
لزمه ناجي ويحاول يهدي الوضع ضحكت بصوت عالي على وضعه مبين غارگ من راسه لرجليه.
كلمن گعد بمكانه حتى نكتب عقد زواجنا
بالمحكمة العراقيه بمأنه عدنه عدة جنسيات
من عِدة بُلدان خارجية فلازم زواجنا يتم تسجيله بالمحكمة العراقيه وكلشي يكون رسمي وقانوني.
--: جاسر أبن جاسر جابر المياحي تقبل ب وسن زوجة إلك على سُنة.
نَائل: ستوب ستووب يقبل يقبل بدون ذكر اسماء كمل يلا.
جاسر: لا حول ولا قوة الا! اقبل هي مرتي من قبل ثلاث مرات شهل سؤال.
--: منك الصبر ياا.
نَائل: يا قدير يا قديس بس بدون ذكر اسماء استر على روحك لا ابتلي بيك.
--: بنتي وَسن هاشم المياحي تقبلين بجاسر مياحي زوجاً ألچ للمرة اشگد الرابعه گلتو؟
وَسن: اي اربع مرات يتزوجني حلل الشرع بفضلي. اقبل جيب القلم.
--: ألف مبروك عليچ كيدچ عظيم والله، وقعوا هنا.
نَائل: بدوون ذكر اسماااء
--: خبلتوووني خبلتوني انت تشهدد وانت الثاني تشهدد احچوو.
ناجي: امسحها بوجهي حظرة جنابك نعم اشهد
نَائل: نعم اشهد على هذا الزواج المو جديد علينا. سهرة تعيسه حبايبي لازم نمشي.
وَسن: گال نمشي هذا يقصد لوسيفر هههههاي
اخذ من الشوكولاته الموجودة وطلع من القصر.
احنا وقعنا عقد الزواج والقاضي خطيه يلملم أغراضه يريد يمشي بأسرع وقت ناجي استلمه
يفهمه من الألف إلى الياء و هو الراح يوصله بإيده.
اخذت تلفون جاسر، خليت رجل على رجل
اتصلت على بابا وفتحت كاميرا عادة ما يحچي بس يستمعلي
وَسن: هلو داد شلونك، شوف العقد تم و تزوجنا
، بعد يومين يطلع بطاقتنا الموحدة بالنُسخة الجديده بيها مذكور متزوج /ة المهم.
براو عليچ وينه جاسر.
وَسن: صافن على جمالي.
وسن بابا تالي ويا سوالفچ.
وَسن: التالي ما ادري نسأل المگرن؟
انطيه الموبايل...
وَسن: جوجو حُبي تعال حاچي عمك.
چآن نازع جاكيته فاتح ثلاث دُگم ورافع الأكمام بطريقة هوت مرات يخليني اصفن عليه بعدين اتذكر آني ما انسحل، آني اسحل.
سحب كُرسي وگعد بصفي حاوطني وما اخذ الموبايل عود آني اتصنم ألزم الموبايل لحظرة جنابك؟
جاسر: تأمرني عمي أسمعك.
نائل وناجي عرفو الحقيقه وهسا همه ويانه ضد جسار تدري شني الخطوة الثانية؟
جاسر: بتراء جسار...
نايس بتراء عدهه 50 بالمية من املاك جسار ونسبة 20 بالميه على أسم وسن.
وَسن: اخوك الوغد كاتب خمس قصور بأسم بتوره.
اخويه الوغد يعرف شجاي يتصرف.
جاسر: عمي جسار عنده 25 بالمية من أسهُم شركة الباشا هذا شلون ناخذه منه؟
ارتفعت الأسهُم وتضاعفت صارن 50 بالميه.
هو حاليا يملك نصف الشركه واذا الباشا درى بهذا الحچي يخلص على الأدهم.
وَسن: ذاك الرجال الطيب ما اتوقع منه هيچي.
بابا بس آني اعرف هذا اللي تگولين عليه رجال طيب
وَسن: داد احسك غرت منه.
لا ابد.
جاسر: عمي بنوتتنا شلونها؟
لو يهمك چآن تعرف.
وَسن: حُبي جوجو لو ساكت مو احسنلك؟
جاسر: العم وبنت العم علينا، أروح اعرف اخبار بتوره العروسه الجديده احسن شي.
وَسن: خابصني بيها وحق ذاك المگرن قيطان بحذائي ما اشدها.
جاسر: منو جاب طاري الغيره دا اشم ريحة حريئ حرائق.
كملو عركتكم ما عندي واهس اشاهدكم.
وَسن: گود نايت داد، بوسات حظنات.
قفلت المكالمه ونظرتله ذيچ النظره البارده
وَسن: جاسر احسك تحبها اذا تحبها صارحني
عادي نطلقها من أبن ادهم واخطبها إلك ترا المره ما تاكل مره. وبعدين اقدمكم قُربان لذاك المگرن و اخلص!
سحب الكرسي من تحتي وتقرب شالني خلاني على رجله تشبثت برقبته، تلامس خدودي اردف.
محلل الشرع وياچ منينلچ رجال يحبچ بگدي؟
آني صاحبة الفضل عُمرَك شايف إمراة ترضى تتزوج اربع مرات من نفس الرجال.
الثوله وَسن آلمياحي ترضى.
شگد حقير ونذل باقيه وياك علمود الجهال.
لا تصيرين اور ترا هي بنوته وحده اليسمعچ يگول مخلفتلي روضه.
تقرب باسني بشغف، هيچي احنه نكره بعض نعادي بعض، نحب بعض بكيفنا، لكن نترك بعض الموت أهون من هاي الفكره!
لأن العشناه مو قليل العشناه مستحيل يتحمله
إنسان طبيعي ماضينا كان أحمر بلون الدم
ما صرنا لبعض بسهولة!
ابتعد يجر نفس، طلعت جگاره من باكيته الموجود على الطاوله ورثتها اخذت نفس منه
وانطيته.
وَسن: النكهة مجانيه من عندي.
كريمه انتي ماكو بكرمچ.
ضلينا هيچي هو نفس وآني نفس ندخن من نفس الجگاره إلى أن خلصناها، گمت رجعت على الكرسي مالتي وجمعت شعري على جهه
وَسن: يلا كافي رومانسيات خل نحچي بالصدگ.
اسمعچ بيبي.
وَسن: ناجي ونائل الأحجار الجديده برُقعة الشطرنج، داد فهمهم التَقرب من خواتي ممنوع
لكن ناجي ما ألتزم ف مثلا البارحه راجع وشايلها شيول من السياره للبيت.
رومانتيكي شعليچ بيهم بلكت يحبها صدگ؟
لا تخليني اتسودن عليكم شني يحبها ابويا ما يقبل عنده خطوة اهم يخطيها بيهن.
ابوچ يستغلهن؟
ترا مستغلنا كُلنا شبيك، المهم زواج خواتي من ولد نَصار ما يصير لو يگوم جابر من گبره.
متأثره بولد اشتر.
ولد الداهي اشتر سوالفهم تضحكني، المهم
عوفلي بتوره خليها تخلص شهر عسلها ونشوفلها حل بمأنه هي ببالها فكرة احنه خوات ومدري ايش من هل خرط.
وسن ترا بتراء صدگ تحبچ وتحب خواتچ و كبرت مع فكرة الفراشات الثلاث و أنه لازم بيوم من الايام يجتمعن!
وَسن: تبقى بنت جسار اللي سلب مني أمي وابويه وعيشني بجحيم 18 سنه.
راح تحبيها من تلتقين بيها.
وَسن: حُبي أنت تريد تنام بالصالة؟
گاتل روحي عليچ بليز.
حقك مسحول سحل، موبايلي بالغُرفه اروح اتصل على المربية خل اشوف شسوت احس راح اطردها بس ارجع!
شبيها ترا خوش تربي.
يا خوش تربي، طفلة عُمرها سبع أشهر ما تعرف تنيمها!
عفته وصعدت للغرفه دخلت لگيتها مراسله
و دازه ريكورد صوت الطفلة وهي تبچي
اتصلت عليها فورا جاوبت فتحت كاميرا بوجه بنتي.
وَسن: صوفيا طفي الاضويه وشغلي ليزر النجوم بالغُرفه.
سوت مثل ما گلتلها وآني هم فتحت الاضوية الخافتة ويا نفس ليزر النجوم، رحت تمددت على
الچربايه رفعت الموبايل حتى أبين وبنتي تضحك بالكاميرا.
غمضت عيوني لثواني همهمت بهدوء بعدها.
بلشت ارددلها نفس الأغنيه اللي كانت سبباً في نجاتي.
وَسن: حلمي تحطم واختفى
والعزم في قلبي غفا.
والدمع من عينيَّ يسقُط ملهفا
طفلة عُمرها سبع شهور تبتسم على كلمات هاي الأغنيه وما تدري الروايه اللي ما خلف كلماتها.
وَسن: أملي تحطم في الصخور
والحزن أضحى بي يدور.
واليأس يكتُب نفسه بين السطور
وَسن: الخوف قيّد اضلُعي
لم يبقَ لي شخصٌ معي.
وشعرت همسا خافتا في مسمعي.
همس يقول إلى متى.؟
ستظل تغرقُ في البُكى.
قُم نحو شمس الصُبح لا غيم الشتاء
ابتسمت وياها احاول اخفي دموعي واكمل
الأغنيه حتى تنام لأن اعتادت على هذا الشي.
وَسن: يأس القلوب نعم يُزال
لا لا يدوم فَ ذا مُحال
فانظر إلى الدُنيا معي هيَّا تَعال
حسيت عليه لمن دخل للغرفه تمدد بصفي
رفع راسي خلاه على ذراعه وهمس بأذني
يكمل الأغنيه وياي
وَ انظر إلى تِلك النجوم.
مهما تُغطيها الغيوم.
ستظل تَلمع حُرةً حُباً تَحوم.
نضراتي بين بنتي اللي نامت وبين جاسر اللي.
رجع احتواني مثل أول مره ألتقينا بيها.
قفلت الخط ودفنت راسي بحظنه
جاسر صار السما اللي خلاني نجمة
تلمع حُره بلا اصفاد.
واصلين مرحلة نحب بعض بطريقة مجنونه
مالها اي تَسمية ولا تَفسير.
هِلال
بعدما إيمار وگع من طوله نقلناه لغرفة خاصة
الأطباء راقبو حالته و انطو مُهدءات للأعصاب
أما أبيل فجرحه گام ينزف بسبب وگعته على اخوه
الممرضه عالجته وگفت النزيف ونضفت الجرح
اما حالة أبويه فمو احسن منهم ضغطه ارتفع
وبس يسأل عن اخوتي خاصة عزام ضل يگول
وينه وين راح خل يجي.
اعرفه انقهر من كلام إيمار بس ما يبين
عفت وتن ويا إيمار و طلعت شفت سيرا بالباب گاعده وتمسح دموعها.
هِلال: سيرا حبيبتي ليش بعدچ هنا وينه على سَند كافي يا عمري لا تبچين ما بي شي بابا هم وضعه تمام ليش تبچين.
كنبصت حظنتها وهي تحچي وتشهگ.
سيرا: ما ادري أفرح عبن امچ عايشه لو أزعل على حالة عمو وأبيل وإيمار، .
هِلال: فدوى اروحلچ أنتي القوية ليش هيچي
تبچين بالعكس افرحي ها هاي آني هم فرحانه
امي راح ترجعلي وإيمار نفسيته تعبانه لهذا السبب ما تحمل الخبر
مسحت طرف عيني ما اريدها تشوفني هيچي.
ابتعدت عنها، مسحت دموعها، سيرا صح شُجاعة وشخصيتها قوية لكن لمن يتعلق الأمر بعائلتها
بدون استثناء. تكون حساسة إلى أبعد حد.
هِلال: كافي تبچين شايفه دموع بعيوني؟ لا
فليش تبچين. ول شتررررم تعااال شوف طرگاعه تبچييي.
سيرا: گلتي شترم!
هِلال: اي شترم شبيها شترم اشتور اشتوري شعليچ، عمي وادلعه بكيفي.
سيرا: تمام ما ابچي بس لا تخربين أسم عمي المُفضل!
هِلال: Cok güzel. شتررم هننننج وييينك
سيرا: هلاااال.
هِلال: Evet. Evet
طلع عمو اشتر من غرفة أبيل فرد ذراعه من بعيد يناديها.
الأشتر: ااانييمكم بصف جدنا السابع اذا تزعلوهاا.
گامت ركضتله ارتمت بحظنه وهو من يحظنها يشيلها شيول من الگاع.
الأشتر: طرگاعة عمها منو مبچيها هلال هاي عليمن تبچي؟
هِلال: على حالة إيمار وأبيل.
الأشتر: صدگ چذب بويه ذوله ولد الحاروگه
مثل الجمر تشوفيهم مطفين والرماد مغطيهم
لكن من تنفخين عليهم يشتعلون ويشعلون ابو ابوچ.
هِلال: عميقه عميقه جداً.
سيرا: چآ خل ننفخ عليهم بلكت يشتعلون شني كلمن بغرفة طامر.
الأشتر: لاااع هسا عوفيهم خل يولون يوم يومين ونرجعلهم تعاي وياي وين اخوچ علي؟
سيرا: راح لمرته. رجع للنجف
خليت ايدي على حلگي من جُرأتها.
عمو اشتر ابتسم بتسليك واردف مثل عادته
اللي متوارثه بينه وبين ولده اللي يحچون بنفس الأسلوب.
الأشتر: معذور اخوچ الماشايف وشاف.
صاح بصوته العالي ينادي وَتان ويصيح وينك ياااا قشمررر تعااال.
وَتان: الجانب الايجابي أنه ما ناداني بأسمي اي يابه شتريد؟
الأشتر: إذا أنت مو قشمر ليش اجيت
وَتان: ذليتني ذل هذا تالي احترامي الشديد إلك يا أبي؟
الأشتر: انچب واخذ سيرا للبيت.
وَتان: دمشي گدامي خل اوصلچ.
الأشتر: احچي عدل وياها، سيرا امشي خل وتن يلحگچ.
سيرا تتباهى بعمو و شلون يعاملها ك أميرة وهذا عيونه بگصته. من يصعد الحماوه عنده يگوم يملست بإختصار.
وَتان: يابه ليش خلفتني شهل فراغ الچان عندك؟
الأشتر: وتن دموع أمك غالية ما اريدها تبچي على گبرك، روح من وجهي.
وَتان: ءءها سفرة إلى الله افتهمنا، امشي لچ اقصد تفضلي خاتون من بعدچ.
يدفع دفع بظهر سيرا وهاي تردله بالشماته
حوّلت انظاري لعمو اشتر اللي سارح على شكلهم.
هِلال: نوووو مستحيل لا تفكر بيها.
الأشتر: وصار عندي احفاد منهم.
هِلال: واات ذاا هيييل خيالك واسع وخطيرر.
الأشتر: وحق جدنا السابع اذا اخليها براسي تصير.
هِلال: ابوس تراب گبر جدنا السابع بس لا تخليها براسك ذوله مثل الأخوة واصدقاء روح بروح لا تخرب هاي الصداقه بهيچي تفكير.
حاوط كتافي باس شعري بحنية
الأشتر: عم نمزح لا تبالغين شني متسودن
اخرب بين ولدنا؟
هِلال: حاشاك اشتور الورد ضد الحرارة والبرد.
ابتعد نظرلي بجدية.
الأشتر: مرات ناهد حچيها صح انطيتكم مجال
خليتكم تركبون على چتافي
هِلال: يبووو عم نمزح مزح.
ابتعد يرجع لغرفة أبيل ويحچي من بعيد وياي.
الأشتر: أربيكم أربيكم واشوفكم اشتر جديد ما شفتو بحياتكم.
الإنسان الوحيد اللي مر الدهر وما تغير ولا شاخ بعده ذاك الشاب اللي بعمر 25 نفس الاسلوب نفس الروح والمعنوية، الكل أتفق على محبتة
الكل يحس بالأمان وياه ويحب روحه و اسلوبه المُميز.
ما ادري هُدهُده شبيها تريده يكون صارم ويانه ويتصرف مثل الشُيّاب اللي بعمر ال 55.؟
اكملت خطواتي بإتجاه المصعد اريد انزل للحديقه متأكده عزام گاعد هناكه مستحيل يرجع للبيت ويتركنا.
اثناء وقوفي بالمصعد منتظره اوصل للطابق الأول وگاع اتصل بيّه.
هِلال: اي وگاع احچي صاير شي؟
زوجچ المتسودن متضارب ويا ولد يوسف
اللي جايين للبصره عود سياحة وهُمه بالحقيقة لاحگين أبيل.
هِلال: و. إصاباته خفيفه لو شلون؟
اگعد اشرحلچ إصاباته شلون ادزلچ ستريك؟
هِلال: تسوي فضل.
بله انچبي شايفتني سيرا لو أريم؟
هِلال: چآ احچيلي حيل متأذي؟
شيلوحه هو اللي جنزهم تجنز والشرطة
اخذتهم للمركز وآنه فوگ ضيم شغلي طلعته بكفالة.
هِلال: عفيه عاشت ايدك وينه هو؟
گال اجي وما اجاني
هِلال: شايل الحساسات على شني تغني.
انتي شايله الحساسات وبالچ يم هيثم يوسف
ما اغني دا أگول گال اجي وما اجاني ساعه منتظره يم السيارة راح يشتري جگاير.
طلعت من المصعد مشيت برا المستشفى واحچي وياه.
هِلال: وگاع روح وراه خاف هاد على شخص ثاني.
لا ما اعتقد، هياته جاي وبإيده بُطل يشرب منه
هِلال: شنييي وگاااع وبينك وين دااايحين؟
ريلاكس ريلاكس اتشاقه بإيده قوطية Red Bull.
هِلال: شگد دمك ثگييييل ولي.
قفلت الخط شگد مغثة، وصلت للحديقه شفتهم
گاعدين بالحديقه على العُشب هو و عزّه إللي يبدو متصل بيها او هي اجت من حالها و مخليه راسها على كتفه.
حبيتهم سوا ما ردت اخرب عليهم بقيت واگفه بمكاني، من عزّهَ اجاها اتصال گامت تحچي وشافتني أشرت عليه وآني هزيت راسي اي
رحت يمه گعدت ساكته وهو ساكت ما يدير وجهه ناحيتي بس يحچي وياي بهدوء.
عزام: إيمار شلون وضعه؟
هِلال: ما ادري الدكتور گال الأدوية تهدئ اعصابه مؤقتا لازم ما يتعرض للصدمات والعصبيه.
حچيتي ويا. أبونا بخصوص علاج الأعصاب بالخارج.؟
اشوفه شلون گوه متمالك نفسه يتجاهل النظر.
ناحيتي، ناديته بصوت هادئ گوه متمالكه نفسي و دموعي.
هِلال: عزام...
يا روح عزام.
خليت راسي على كتفه وهو صامت ما تحرك
اعرفه يحافظ على المسافه اللي بينا بمأنه احنه مو أخوة من نفس الأم.
هِلال: عوفك من حچي الناس أنت بالنسبة ألي
تبقى أخويه الچبير اللي احبه اكثر واحد ومستحيل اكرهك بيوم عوفك من حچي إيمار
هو حالته خاصة أنت ماكو بحنانك نُسخة من أبونا هيچي أشوفك.
نظرلي و أول مره اشوف عيونه تلمع بالدموع هز راسه عِدة مرات بمعنى اي وگام.
تذكرت عندي شغله اسويها أنتي فوتي جوا هنا الجو بارد.
هِلال: عزام زين لحظة وين تروح.؟
راح ما وگف اجت عزّهَ مستغربه تتسائل.
عزّهَ: شصار وين راح عزام؟
هِلال: ما ادري چنت احچي عادي وياه بس هو گام مستعجل گال عنده شغله يسويها.
عزّهَ: تمام تمام آنه اروح وراه انتي فوتي جوا انتبهي على اخوتج وعمي.
ركضت وراه وهي تحاول تتصل عليه شني سالفتهم تصرفاتهم غريبه.
ال بتراء
بعدما وصلنا لبيتنا بالنجف ماما يقين رحبت بينا بالهلال رغم الضروف الحاصله.
ما مر نُص ساعه اجته مكالمه من ولد عمه گالو ارجع أكو سالفة مهمه، ما گال شكو فورا طلع من البيت.
آني صعدت ويا ماما يقين اللي تناديني براء!
يعني عمو أدهم ما حچالها ولا على سَند حاچيلها؟
دخلت غُرفتي القديمه شفتها مرتبه وماما يقين
واگفه بصفي ما ادري شلون اطلعها من الغرفه اريد اشوف الدفتر اذا بمكانه.
يَقين: اساعدچ تنقلين ملابسچ واغراضچ لغرفتكم انتي وعلى سند؟
گعدت لازمه راسي امثل بلكت تطلع
بتراء: احس راسي نصين من الوجع ودايخه، ماما يقين راح انزل اخذ حباية مسكن ألم وارجع.
يَقين: لا لا اگعدي يمعوده خاف توگعين ما دام دايخه آنه اجيبلچ بنيتي.
بتراء: فدوى لگلبچ ربي يحفظچ.
ضليت اباوعلها لحدما طلعت من الغرفه وسدت الباب فورا گمت رفعت الفرش، من شفته بمكانه
اخذت نفس بالراحه.
بتراء: دخيلك يا على السَند دخيلك هم زين بعده باقي. على سَند ما جاب طاري الكتاب يعني ما قاريها ولا شايفها اصلا!، .
أخذته وخليته بين اغراضي اللي راح انقله لغرفة على سَند، دخلت ماما يقين وآني واگفه ألملم ملابسي.
يَقين: ليش واگفه مو چنتي دايخه اگعدي آنه
اخليهن بالجُنط.
بتراء: لا صرت احسن و هسا وهسا اشرب الدوا واصير احسن.
اخذت شريط الحبوب من إيدها ويا گلاص الماي، تمعنت بيها وهي منتظره اخذ حباية.
بتراء: حبة وجع راس مو؟
يَقين: چآ شني بنيتي.
بتراء: لا بس اسأل عندي حساسية من كذا نوع
هذا شسمه؟
يَقين: بندول.
بتراء: لالا عندي حساسيه منها ما اريد حاسه روحي أحسن ما اشربها.
يَقين: ادز فاضل يجيبلچ نوع ثاني؟
شربت الماي وعفت شريط الحبوب بإيدها
بتراء: احسن والله ما اريد شي.
لملمت ملابسي والگلادة ويا الدفتر بين ثيابي.
وطلعت من الغرفه متوتره وهي جابت الباقي واجت وراي.
يَقين: بنيتي خاف بيچ شي اخذچ للدكتوره؟
بتراء: لا والله ما بيّه شي صرت احسن احسن.
دخيلك يا على السَند دخيييلك شگد اتوتر گدامها
أنوب تنظرلي نضرات غريبه، نضرات حُب وحنان لكن يربكني ما ادري ليش.
دخلنا لغرفة على سَند اللي صارت غرفتي كذلك
احتمال أكبر غُرفة بكُل القصر زاويه منها مكتبة بيها كُتبت أدبيه ودينيه
والزاوية الثانيه حسيت ترهم عليه نسميها زاوية الإنجازات لأن بيها كُل شهاداته وميدالياته خلال
مهنته ك كابتن ناقلة بترول.
عافت اغراضي بالغرفه وتركتني گالت تروح تتصل على أدهم، سديت الباب وراها.
وگفت بنص الغرفة افتر حوالين نفسي
محتاره شسوي؟
بتراء: ارتب ملابسي بعدين اگعد احتار بمصايبي
اخذت تراك خفيف بدلت وطلع شديت شعري
ذيل حصان وتذكرت على سَند من گال شدي شعرچ مثل ذيل الچلب
بتراء: والله چآن متقصد يسوي روحه غشيم
يدور حُجة حتى يسبني ويسب جسار.
رفعت أكمام التراك وفتحت باب الكنتور
باوعت بملابسه فوگ تحت.
بتراء: مول كامل مُتكامل من وين ابدي.
فتحت باقي الأبواب كلهن ملابسه مكان فاضي ماكو الكنتور اربع أمتار كله ملابسه.
بتراء: شنو يعني شنوو يعني شمعنى اصبرلي
اعيد ترتيبك.
فرغتها كلها ورجعت رتبت ملابسه بطريقه حلوه
وهم ما تاخذ مكان هوايا بالكنتور، اجيت على القسم اللي لازم أعلگه علگتهن بالترتيب وبصفحه وحدة بعدما كان قميص بزاوية، جاكيت بزاويه، تيشيرتات بزاويه. گمت جمعتهم وعلگتهم بنفس الزاويه.
بتراء: عاشت ايدج بتوره صار أكو مساحة تكفي
ملابسي وزيادة.
بلشت ارتب ملابسي كلها واعلگ ملابس الطلعات والمناسبات، اجيت على قسم الاحذيه.
هم شفته نفس النمط يعني الافندي عنده فوگ
العشر أنواع من الأحذية وكلها مبين غاليه.
بتراء: حاطط عينه على حذاء جسار المشتريها بفلوس حرام، دشوف شگد صارف على احذيتك.
مُبذرر ما طالع لأبوك
سويت مكان شلون ما چان، رتبت الكعب والاحذيه الرياضيه ويا الصنادل.
كملت تصفيط اغراضي، دخلت الحمام غسلت ايديه، طلعت بقت اخر شغله وهي الكتاب وين أوديها
بتراء: بيها كلام خطير ما ممكن احد يصدگني
اذا هييچي احچيها ألهم.
جبت قلم گعدت أكتب الصار من الأيام الماضيه
وبديت اتذكر تفاصيل بالماضي تفاصيل خطيره
هم كتبتها وچنت ناسيه اذا كاتبه احداث المستشفى القديم والصار والشفته هناكه فگمت
مره ثانيه كتبت تفاصيل ذاك اليوم المشؤوم
اخر شي كتبته كانت تخُص أمي المغدوره.
وجسار شلون يعاملها وشنو چآن يحچي وياها
إلى أن وصلت للحظه الأبشع بحياتي. نَائل چآن بإيده المُسدس و...
وگف القلم عن الكتابه
بتراء: مليان حبر ليش ما يكتب.
گمت جبت غيره هم ما يكتب بلشت اسمع صوت قطرات ماي مثل اللي ينزل من صنبور قديم بسطل محطوط تحته.
نظراتي تدور بأرجاء الغُرفه أكو شي غلط
ديصير ركضت للحمام ماكو شي ماكو ماي مفتوح ولا غيره. رجعت لمكاني عالچربايه لزمت الدفتر
لگيت مكتوب بحبر أحمر.
أنا من الفاعل، وَ ليس هو
بتراء: دخيلك يا على السَند دخيييلك يا أبا الفضل گمتي تتخيلين گمتي تهلوسين، مرضوچ مو صاحيه انتي.
غفلت عن الدفتر وآني نظراتي بالغرفه من رجعت باوعت لگيت الكتابه اللي بالحبر الأحمر صايره مثل بقعة دم ومختفي الكلام.
فزيت من مكاني مرعوبه ركضت لتلفوني جبته
واتصلت بعلي سَند مره مرتين حتى جاوبني.
بتراء: ألو الو على سَند وينك
بالمستشفى وين يعني شبيچ صاير شي؟
بتراء: شوف أكو اشياء غريبه تصير بغرفتك تعال
شوف دا اسمع صوت قطرات ماي و...
احچيله لو اسكت. إذا طلع يخدعني مثل المره الماضية.
قطرات ماي و.؟
بتراء: أنسى تأثرت بفلم رُعب شفته من شويه.
بتوره روحي نامي ولا تحاچين ابويه.
بتراء: شجاب ابوك بالنص خل يولي مو بالبيت.
تمام آنه راجع للبيت بعد ساعات.
بتراء: باوع ترا خانني التعبير اقصد يولو ابوك مو بالبيت عمو ادهم چآن مو بالبيت هسا راجع ويمكن ويا أمك.
حبيبي گمتي تجفصين اخذي نفس عميق
بس اوصل اطيح حظچ.
بتراء: لا تغلط الو الو قفلت الخط الو؟
قفل الخط بوجهي ضليت متوتره من الصار
ومحتاره الدفتر وين اضمه ما لگيت مكان ثاني
هم رفعت الفرش وخليتها بنص عالچربايه تحت الدوشك.
خليت الگلادة وياها ورجعت الدوشك والچراچف مثل ما چآن. ، صارت الساعه بال 8 بدلت التراك لبست فستان سمپل ونزلت شفت ماما يقين مجهزة العشا وچانت جايه تناديني.
يَقين: اجيت اناديچ هم زين اجيتي تعاي بنيتي
مشيت وياها لغُرفة الطعام أدهم رفع راسه ودار وجهه ناحيتي نظرلي بإبتسامه، اردف.
الأدهم: اهلا اهلا بالعروسه.
ابتسمتله شسوي يعني بس ليش على سَند گال ما احچي ويا ابوه؟
گعدت بمكاني وهو ياكُل وهادئ اعصابه بارده إلى أبعد حد.
اكلت لُگمتين وما اشتهي شي، أكمل اكله
طلع عُلبة مبين عليها مال مجوهرات، من تحت الميزه ومد إيده يقدمها.
الأدهم: هديه مني ألچ. چنتي الغاليه.
بتراء: لا ما ماكو داعي.
يَقين: اخذيها بنتي هذا حقچ وهيچي هيّ العادات
أخذته بهدوء وما فتحتها
الأدهم: مراح تفتحيها حابب اشوف رد فعلچ.
بتراء: خجلتني عمي راح افتحه.
بألف يا على متحمله حديثه البارد، اباوعلهم
وما ادري شبيهم واحد ينظر للثاني منتظرين رد فعلي.
فتحت العُلبه، وسعن عيوني شهگت و العُلبة وگع من إيدي على الأرض وادهم يضحك بهدوء.
يَقين: أسم الله بنتي شصار.
كل جسمي ينتفض وگلبي يدگ بسرعه.
ماما يقين شالته من الگاع وخلته بإيدي الترجف
يَقين: براء شبيچ بنتي.؟
بتراء: شي چآن يزحف فوگ الأسوار.
أخذته وفتحته مره ثانيه لكن مابيها شي غير أسوارة كرستال مبينه غاليه.
يَقين: ما بيها شي هياته بس الاسوارة شوفيها
كلش حلوة.
طلعته من مكانه سحبت إيدي لبستني الأسورا
ومبتسمه.
يَقين: مبارك عليچ كلش حلوه ذوق أدهم مميز
دائماً.
بتراء: اء اي شكرا عمو. عن اذنكم.
گمت من مكاني وادهم انطاني العُلبه.
الأدهم: لا تنسين هذا.
بتراء: شكرا مره ثانيه عمي.
طلعت فورا على غرفتي وگلبي صار يدگ بسرعه
نظرت لمعصم إيدي الأسورا شكلها فخمة بس گلبي ما مرتاح متأكده شفت شي بالعلبة تزحف عليها.
حاولت افتح قفل الاسوارا ما تنفتح
بتراء: تااالي وياچ شنو قصتچ ليش ما تنفتح.
دخلت للحمام غسلت ايدي بصابون واحاول انزع الاسوارة شلون ما چآن لكن ما تتحرك من معصم إيدي مُصممة على مقاسي، تعبت من المحاولة طلعت وكل ملابسي ماي انجبرت ابدل وهل مره لبست تراك نوم.
ضل گلبي يدگ بسرعه مثل اللي عنده خفقان
اجي واروح واحس مخنوگه نفسي مو طبيعي
گعدت على طرف الچربايه اردد يا حُسين يا مضلوم وبعدها اردد يا الله يا على دخيلك
فجأة اذني صار بيها صوت صفير عالي بحيث
سديت اذاني واحاولي اتحمل وجع راسي.
بتراء: دخيييلك يااا على دخيييلك راااسي
دخيييلك.
تمددت بفراشي احاول اتغاضه عن وجعي راسي
بقيت ساعتين اتگلب بفراشي وما ادري شلون أنام.
خايفه انزل تحت وادهم يطلع بوجهي بقيت هيج اتحمل الوجع إلى أن غفيت وبعدها ما حسيت بنفسي شوگت غفيت
گعدت من الغفوة وعيوني ما تشوف شي الغرفة مُضلمه حسيت ظهري مثل النار شخص حاظني وريحة عُطره المخلوط بالجگاير سطر راسي
تلامست إيده اللي محاوط خصري بقوة
ومخلي راسه بشعري بعد محاولات كثيره
واتحرك گوه درت وجهي صرنا وجه بوجه فتح عيونه ونعسان يحچي گوه
نامي لا اطييح حظچ.
ضليت صافنه بملامح وجه هذا شحچي وياه.
استوعبت الصار من ساعات وتذكرت شلون صارت أمور غريبة وياي، بثواني قليله رجعلي الخوف
فورا حظنته بكل قوتي وهو يشد على حظني
يبوس بشعري وبين لحظه والثانيه يهمس
أحبچ حيل أحبچ.
هذا ناصب عليه ما نايم ضل يحظني ويمسح على ظهري ورجع يكرر كلمة احبچ كأن يريد يطمئن گلبي.
أحبچ وما اسمح لأبوچ الگواد ياخذچ مني
تحب منو؟
احب بَترائي عندچ أي اسئلة أُخرى؟
ما وثقت بيك وچذبت عليك وساعدت جاسر.
وبعدني ما واثقه بيك، شلون تحبني هيچ أنت ناصب عليَّه؟
نظرلي وتلامس خدودي، اردف.
أحبچ حُب عُمر ترا مو يوم ولا يومين.
و إذا گتلك ما اصدگ بيك ما عندي ثقة بجنس آدم؟
يطبچ طوب شسويلچ المهم أحبچ ومتفهم وضعچ أنتي تحت تأثير ذيچ الأدوية اللي جسار چان ينطيچ منهن.
وليش يطبني طوب احچي عدل وياي ولا تغلط.
ومن انتي تجفصين ببطني عادي!
آني معذوره لأن يخونني التعبير.
صفن على وجهي وتقرب من رقبتي عبالي يبوسني.
بس عضني وما ابتعد واني هنا اضربه واتعارك وياه
مچلووووب مچلووووب مااا شااايف شبييك لاا تعضنيييي يااا ياا.
رفع راسه نظرلي بتحذير.
ياا يا شني احچيي احچي كُلي اذان صاغيه؟
يا همار
بتراء گلتي همار لو خانچ التعبير؟
دقيقه همار شنو معناها اها دونكي أي.
لا تسودنيني احچي عدل خلص گلبي من ثالث ليلة.
طلگني محد گال اتزوجني.
لا انتي تريدين جوله حتى تعقلين.
لاااا وحق جدددكم السااابع خانني التعبيييرر.
متت من الضحك ضل يزعجني ويعضع بيّه هسا لو اسبه سبي يصير اسوء ضلينا شويه نتحاظن وشويه نتظارب إلى أن نمنا.
ال عَزّه
گعدت من النوم ما شفت عزام موجود
بصفي عاينت للساعه چانت بال8 ونص الصبح
گمت فورا سبحت وبدلت حتى انزل للشركة
اخذت تلفوني شفت واصلني إيميل من قسم المالية عزام ارسلها من خمس دقايق
عزّهَ: رايح للشركه قبلي؟
خليت التلفون بالجُنطه و اخذت نظارتي.
طلعت من الغرفه شفت هدآم مبدل وطالع.
عزّهَ: صباح الخير هدآم، امورك تمام؟
وگف واندارلي شفت وجهه عليه آثار ضرب
رحت يمه وهذا روحه بخشمه ما يتحاچى.
عزّهَ: شصاير وياك ويامن متضارب؟
ولد النعوله.
عزّهَ: اي واحد منهم شمدريني ويامن متضارب.
هسا شبيچ من صباح الله شر واستجواب؟
عزّهَ: شبيك ما تتحاچى شبيك؟
عزّهَ عوفيني بضيمي.
ما وگف دقيقه زايده فورا نزل.
عزّهَ: عود مُر علينا شهرين ما جاي للشركه ترا ما يصير!
شغلي بالميناء ما عليَّه بيكم.
بقيت واگفه بمكاني، وگاع طلع من غرفته، اردف.
اخوچ البارحه چآن متضارب ويا ولد يوسف
والشرطه جرتهم للمركز ف رحت طلعته بكفالة.
عزّهَ: المُنقذ انت اشتر نمبر 2
هسا هذا الطلع وياچ أفااا.
عفته ومشيت، ضل يحچي وراي
علي الأقل گووولي شُكراا؟
خوياا شكرا شكرا، و بالمُقابل لا تفتح حلگك يم ابويه ما اريده يعرف بهل مُصيبة الجديده
عود أفكررر افكرر.
لا حول ولا قوة الا بالله العلي العظيم
مُستفز، نزلت جوا شفت أريم بإيدها آيباد
وتتصفح النيت اما سيرا گاعده تتريگ. رحت حچيت وياها.
عزّهَ: سيرا البارحه شچنتي تسوين ويا وَتن و إيمار؟
أريم: ليش ما رحتي على بيت ودق؟
عزّهَ: دقيقه أريم، سيرا انتي شمخبصه؟
سيرا: ريلاكس ماي سيستر خل اشرحلچ الصُدف الصارت چنت رايحه على بيت وَدق، بس بالباب شفت الشباب وعرفت رايحين يزورون أبيلو فگلت اجي وياكم شبااب فگالو بعيونا نشيلچ ورحت وياهم نزور أبيلو وصار الصار
أريم: دقيقه خلي اقرأ هذا الخبر.
إخماد حريق قُرب شط العرب وذلك إثر مجموعة شباب طائشين وفاقدي الوعي بسبب المشروبات الكحوليه.
سيرا: إااالى الله سفره إاالى الله.
أريم: سيرا خلي عينچ بعيني واحچي أنتي وإيمار ويا الداهي وَتن مالكم إيد بالموضوع؟
سيرا: أووختي عينج عن قُرب تبين حوله.
بعدين ألنا إيد ألنا رجل ألنا خشم
أريم: امداااچ ما تجاوبين بصراحه وخري شگد دمچ ثگيل.
سيرا: عُمرچ شايفه عسل خفيف؟
عزّهَ: الحچي وياچن مضيعة للوقت.
طلعت من غُرفة الطعام وسيرا هم طالعه وراي تحچي ويا أريم
سيرا: يلا اخوتااي اروح على دوامي ما انتظرچ.
أريم: اوگفي نروح سوااا.
رحت للگراج اخذت السويچ من السايق
و انطلقت للشركة.
اول ما وصلت سألت عن عزام گالو عنده اجتماع
دخلت على مكتبي، وبلشت ادقق بالحسابات الجديده.
عزّهَ: العائدات ازدات بس الأرقام مختلفه!
بحثت بإيميل الشركه وعن صفقات آخر الشهر
حُصة أبويه من الأسهم جاي تزداد بسرعه من 25
واصل 50 يعني هسا على سَند يگدر يصير رئيس مجلس الإدارة بمكان ابويه.
اتصلت على سكرتيرة عزام.
عزّهَ: دزيلي ملف أعضاء مجلس الإدارة
حسيت أكو شي غلط انتظرت يوصل الملف من وصلني تفقدته.
عزّهَ: ميس العضو الجديد بالمجلس يمتلك 50 من عضوية الإدارة يعني يمتلك اسهُم بگد أسهم السيد اشتر والسيد أيهم. ليش ما مذكور اسمه؟
مس السيد أدهم هيج يريد.
عزّهَ: عمامي إلهم علم؟
ما ادري والله.
گمت معصبه عليها
عزّهَ: چااا شني تدررريين
مس والله هيج طالب مني السيد أدهم.
عزّهَ: شجاي تسوي بابا شجااي تسوي.
روحي من وجهي خل يطلع المسيو عزام ونشوف تاليتچ.
مس اني موضفه وما ردت اخسر شغلي.
عزّهَ: اطلعي برا...
گمت اخذت تلفوني اتصلت على بابا مرتين بالثالث حتى جاوبني.
ادري ادري.
عزّهَ: بابا انت شجاي تسوي ليش جاي تشتغل من ورا عمامي شني انت تريد تنفصل عن الشركه تريد تنهي الشراكات لو تريد تنهي كلشي؟
بابا أنتي ما تعرفين قوانين اللعبة فلا تتدخلين ولا يطلع من حلگچ حرف.
عزّهَ: شغلة وحده احچيها إلك. تلگاني بوجهك إذا تغدر عمامي. الله وياك.
دخل عزام للمكتب وينظر وراه بعدها نظرلي.
عزام: عمي الدرهم شمصخم؟
عزّهَ: عاش لسانك تعال شوف اخر إنجازاته، مدخل شخص مجهول منطيه اسهُم من حُصته
والاسهم مرتفعه. ف النسبة صاعدة من 25 إلى 50 من اسهم أعضاء مجلس الإدارة.
اخبار توطي الراس، المحيرني هذا بأي شفت راح يدير الشركه.
عزّهَ: بالشفت ما بعد الليل. عزام لا تحشش على هذا الموضوع، انت ملاحظ شي غريب؟
ملاحظ كلشي بس ما احچي.
سحب كرسي وگعد يبدل أماكن أحجار الشطرنج الموجودة گدامه.
اللعبه راح تأخذ مُنحنى آخر.
عزّهَ: بشني تفكر عزام لا تتصرف بصمت.
إنتهينا من خطوة. التحرُك في صمت
بدل الوزير بالبيدق وخلاه على جنب شغل التوقيت. اردف
احنه دخلنه بخانة تحدث فقط عندما يحين الوقت لقول ذلك
گمت گعدت مامه التوقيت خلص وبدلت الحجر.
عزّهَ: كش مات الملك رُغم كثرة الوزراء والبيادق حواليه.
تدرين ليش؟
قانون نيوتن الثالث.
ذكيه.
وين تروح؟
اطبق قانون نيوتن الثالث.
عزام بدون خبال لخاطر ذاك الطيب الرباك.
حظن وجهي بين إيديه باسني بخدي واردف.
لخاطر ذاك الطيب الرباني لخاطر اخويه الطاح من طوله على خبر امه. مو لخاطر شي او شخص ثاني.
اجي وياك ما اعوفك.
ليس الآن.
بسس لا تحاجيني بهل بروود شبييك.
عندچ اجتماع مجلس الإدارة لا تتأخرين.
باس جبنيي طلع من الغرفه وما سد الباب وراه.
ضليت اجي واروح، اطرافي ترجف من افكر برد فعلهم.
وَسن
بعد ليلة البارحه گمت الصبح
اتجهز حتى اروح للشركة اللي إلنا النُص بيها
سواء بتراء ترجع ما ترجع تبقى حُره لكن آني
مُديرة تنفيذيه لازم ابلش شغلي بيها.
البارحه بقيت بالقصر اللي يعود لأبويه
أما شجاوب سُعاد فهي اصلا تعرف متزوجه من جاسر صار سنة، اما خواتي الباقيات بعدين اسويلهن سُبراايز
وصلت للشركه حوالي الساعة 10 الصبح
جسار جاي من 9 تقصدت اتأخر اعرفه يتكهرب من اسلوبي.
فتحت باب مكتبي ما لحگت ادخل طلع من مكتب الإدارة.
جسار: الحلوه جايه من وگت چآن تعاي بال 12.
أنداريت ناحيته چنت لابسه تنوره گصيره
و جاكيت طويل فوگاها، خليت إيدي بجيب التنوره نظرتله فوگ تحت.
وَسن: اوو ماي آنكل خل اذكرك إذا العُمر أثر عليك Fifty × Fifty شوگت ما اجي بكيفي.
دخلت و سديت الباب بوجهه.
نزعت الجاكيت علگته بمكانه.
وَسن: اعشق شخصيتي الهووت.
بلشت شغلي بذمة وضمير لأن بالنهايه هذا حصة أبويه فلازم اتفوق عليه واسحب باقي الأسهم
من تحت إدارته.
اتصلت على السكرتيرة
وَسن: تعاي حُبي.
دخلت وباوعت بيها فوگ تحت.
وَسن: مطروده.
نعم مس شسويت ليش تطرديني.
وَسن: حُبي آني بكيفي قبل لا اطلع من هدوئي
اتفضلي برا.
مس بليز ما سويت شي السيد جسار بس سألني
بخصوص ملف التداول.
وَسن: وحق ذاك المگرن راح اتسودن عليچ اطلعيييي.
شلت ملف الشغل
نزلت للطابق الأول عند الرسبشن.
وَسن: سلمي نَسخة لجميع أعضاء مجلس الإدارة بما فيهم جسار. و دزيلي مجموعة موضفات اختار منهن فد سكرتيرة ما تكون ذيل لهذا وهذاك.
امرچ مس.
سمعت صوت خطوات شخص دخل لبناية الشركة الموضفه وسعت عيونها بصدمه
وَسن: شبيچ حُبي شفتي لوسيفر؟
المدير التنفيذي لشركة أبناء الباشا واگف وراچ مس.