رواية ولد الباشا للكاتبة فاطمة الأحمد الفصل الثامن
إيمار
خلى الگيتار عالسياره مرر السچينه على اوتارها وبلش يگطهن وحده وحده ويحجي.
الباشا: هذاا حتى تتعلم المسؤوليه
وهذا حتى تفهم وتستوعب أنت مو ابن حيالله رجال عاادي انت ابن الباشا وابن الباشا يصير رجااال ومسؤول موو داايح بالملاهي
يغني ويعززف عالگيتاار ياا غبيي
إيمار: ترييدني ااصيرر مثل عزآم وأبيل وغييرهم ماا اصيرلك ماا اللزم سلاح
تحلم بيوم اللزم سلاح تحللم
اندارلي أبويا بعدما قطع كل الأوتار.
عمي يلزمه وهو يحجي
الباشا: عشررين سنه اربي بيك تااالي تطلع داايح وشلاااايتي.
إيمار: چآ شني اعادي الناس اعاديهم يوميه اقتل واحد تريدني مجرم ما يرحمم ماا اصيرلك هييج، اعيش بكيفي واسوي اليعجبني
أبيل: انجب إيمار شلون هيج تحجي ويا ابونا
إيمار: ووالله؟
ول امنااا امنااا قتلوووها بسببه بسبب العداوات العنده اخذوها مني انت جنت جبير بس آنا أبيل آنا جنت طفل جنت 4 سنوات بسبب ابووك تيتمت.
درت وجهي أكثر شي اكره بنفسي مشاعري
وضعفي من اتذكر امي، عمي جان يحجي ويا ابويا وبعد ما رد عليه وتان تقرب يحاول يحظني نترت ايده أبيل اجا هم نترت ايده
بس هذا أبيل ما عافني اخذني بحظنه يحجي
أبيل: تمام انچب يابعد اخوك كافي تبچي تعرفني احبك، احرگ يونان وتركيا علمودك.
إيمار: بله وخر حتى مواساة مثل أخوة العالم ما تعرف تواسي كله حرگ.
ابتعدت امسح وجهي رجعت إيمار البارد.
المايهمه غير نفسه تقدمت للسيارة ابويا جان صاعد ويدخن شلت الگيتار قاطع بس الأوتار
وما خادشها خدشه، لبسته بضهري وعدلت
الشفقه.
إيمار: وَتان وين دراجتي؟
وَتان: الشباب جابوها للتقاطع
هزيت راسي ومشيت عفتهم ورايا وصلت للتقاطع الاثنين موجودات دراجة وَتان ودراجتي
إيمار: تريدني اصير گتال واشيل سلاح؟
اي ارسل dream
لبست الخوذه وصعدت انطلقت بأقصى سرعه
للمكان المُعتاد.
أبيل
إيمار مشى من المكان بقينا احنه
وگاع: اخوك تسودن.
أبيل: اخوك عقل ما عنده من يوم يومه متسودن
وَتان: حاشاي من كلامك
الأشتر: امشي لا اهنا اخلص عليك شلون ابتليت. وگاع اخذ هذا الشلايتي وارجعو للبيت
الباشا: إيمار وين راح.
أبيل: يابه عوفك منه خل يولي يرجع للبيت ماعنده مكان ثاني
صاح بيه اردف
الباشا: اخووك ماا تعوفه تضل وياه شوكت تفهم اخوك هذاا، أبيل امشي وراه امشي ورا اخوك لا اخلص عليكم ثنيناتكم.
أبيل: خل اشوف وين دايح هسا انت خليك ريلاكس
نضرلي وما جاوب رگع الباب
الأشتر: شوگت تبطل تعامل الكل بنفس الأسلوب؟
عدلت الجاكيت لبست نظارتي.
أبيل: من تبطل تفزز جدنا السابع بگبره كل شويه، اگلك وَتوني ماطورك مدري دراجتك الناريه بمكانهه مو؟
وَتان: شهل اللقاب ما اقبلها والله
بعدين منو گال اسمحلك تركبها
أبيل: بكيفك خوما بكيفك. سلام
عفتهم ورحت للدراجه وبوجهي للبيت احتمال راجع، بعد نص ساعة وصلت فتحت الباب البيت هدوء مشيت للغرفة فتحت الباب ضلام دآمس، ماكو احد
أبيل: شلون بلوه وين مولي
نظرت للدرج إلى يوصل للطابق الثاني
متروك مشيت احتمال بنفس الغرفه.
كلما اصعد پايه الصوت يصير أقرب يبدو.
فعلا إيمار موجود هنا، وصلت للباب والصوت واضح الاضويه قليله المكان مليان لوحات وصور امنا إيمار واگف گدام البرنده
ومشغل فلاشة الموبايل يرسمها للمره الالف
الشاشه مشتغله والفيديو عباره عن أمي شايله إيمار وتبوسه تنادي بصوتها العذب يخلص ويرجع يتكرر.
- إيماري عُمررم جااانم روحمم هيااتم إيمار
إيمار جان يردد وراها إلى أن وگف عن الرسم
وانظرلي بطرف عين كأن دخلت أرض محرمه
أرض تخصه وحده اردف ببرود وإصرار.
إيمار: غرفه محرمه عليكم أنتُ الإيدكم كلها دم اطلع أبيل...
اجيت اتقدم واحجي.
أبيل: إيمار شهل كلام بعمري ما قاتل شخص بدون سبب كلهم أعداء ورايدين يقتلوني او يقتلونك.
لزمت لوحه زغيره راسمها إيمار جانت بس وجهها تلامست ملامحهه الحلوه، صييّح بصوت مقهور وعصبي
إيمار: أبيل لااا توسخ صورها منوو سمحلك تللزم صورتها منوو اطلع برا اطلع وعوفني بوحدي ابقى نضييف من جراايمكم.
عاف الفرچه وتقدم يدفع بيه حتى اطلع ما عاركته بس حظنته وشايل صورة امنا بإيدي
أبيل: إيمار اهدى اهدى لا تحجي هيج أنت
اخويا وروحي أنت وصية امنا إيمار افديك بروحي وارتكب الف جريمة لخاطر تضل سالم. ليش هيج تحجي
إيمار: ماتت بسببه مستحيل اسامحه
أبيل: يحبك والله ابونا يحبك أكثر مني ومن هلال چآن خايف عليك وتعرفه عصبي.
ابتعد واخذ اللوحه من ايدي مسح عليها باسها ورجعها لمكانهه، اردف.
إيمار: 18 سنه واحنا ما ندري گبرها وين
هلال يوم تگول ماتت ويوم تگول عايشه وكله بسببه مو راضي يقتنع أنه ماتت وبسببه امنا ما عدهه گبر نروحلها بسببه أبيل هو السبب.
انداريت لمن ابوي مشى وعمي الاشتر وراه
أبيل: وعلى الضرغام راح تموت الرجال شبيك إيمار ترريده ينجلط؟
مسح وجه صفن عالباب اعرفه رغم صلابة وجه گدام ابويا بس يحبه ويخاف عليه، توتر
صار يحجي. ويأشر عالباب.
إيمار: بغلاة المحروسه روح اللحگ ابوك انوب لا يصيرله شي بسببي وتگولو گتلته
يقصد المسدس لزمت راسه بسته، طلعت وآنا احجي
أبيل: گول خايف على ابويا شبيك رافع خشمك اابو االملاهي.
عفته وطلعت انزل للطابق الأول اشوف ابويا.
البتراء
ضربته كلّه على وجه ابتعد لازم خشمه يتقدم وآني أتراجع ضرب ضهري بالمغسلة قرب وجه ومد إيده سحب أكثر من كلينس وتراجع خطوات يمسح الدم من خشمه وينظرلي بطريقه غريبه
- خو هسا اگدر اهنا اجنزج بس ما نمد إيدنا على الجنس اللطيف.
أشرت عالمرايه اردفت
بتراء: هايه المرايه باوع بوضعك وشوف
الجنس اللطيف شمسويه بيك.
- بنيه فحله.
هسا نجي للصدگ وين مكانها.؟
بتراء: مكان منو شجاي تحجي.؟
شمر الكلينس وتقدم بخطوات بطيئه ورث جگاره اخذ منها نفس وزفر الدخان بوجهي
اردف بطريقه غريبه.
- الروح الچانت المأسوره وياج صار 18 سنه
بتراء: وخر خلقتك الخايسه واحجي بوضوح
فعلا ابتعد يكمل الجگاره قبل لا يحجي دگ تلفونه جاوب.
- محد، عفته بالميناء چآ شني أجره وراي. والله حتى ابليس ما يدري آنا بينهم، اي الحلوه يمي، استغفرالله اقصد گدامي، احاول
ارجع باچر، والله شبيك، ما ادري احتمال چذب
سلام.
نظرلي وشمر الجگاره أشر أصبعه بتهديد
- يُفضل ما تجيبن طاريه لا شفتيني ولا تعرفيني هسا تفضلي آنستي نكمل الحفله.
فتح الباب وأشر حتى اعبر گدامه مشيت وقبل لا اطلع انداريتله.
بتراء: كلكم جنس قابيل مابيكم شريف
ماصدگت كلامك ولا عن أي روح تحجي
ولا يهمني شنو فلمك ويا الجسار بس شغله وحده. احفظها بعقلك. لا تفكر توگف بيني وبين الثأر.
رگعت الباب عود حتى اضرب وجه خله ايده وگفها واجا ورايا يعدل البدله والقناع، اردف.
- الجنس اللطيف الجنس اللطيف ول خااالي
بتراء: هاي شبيك لاحگني افتن عليك والله
- افتني عليه حتى اتفنن بيچ بتوره
أوه عندج وشم بنص ظهرج اويلي، اللهم إنك تُغفر الذنوب لمن تاب صارن 15 ركعه.
وگفت وچان ورايا هم وگف انداريتله
بتراء: صدگ مبين؟
تقدم بخطوات بطيئه درت وجهي صار بظهري همس وهو يخلي أصبعه على كل فراشه وحده تحت الثانيه ويعدد
- واحد، أثنين، ثلاثه
بتوره گصگصو جناحاتچ بس روحج بعدها.
تحارب تريد تحلق من هذا القفص شنو رايج نتعاون؟
ضربته بكوع ايدي ورجعت شعري ورا اغطي ظهري، اردفت
بتراء: تعاون ما اتعاون كلمن بحاله والشاطر يفوز بالأول + شگد أخلاقك سزز وتگول مؤمن؟
كملت امشي للقاعده وهو ورايا يحجي
- اهم شي نصلي ونصوم مو مثلكم يا قوم الفُجار
بتراء: شسوي بيئتي هيج.
دخلنا للقاعه كل ثُنائي جانو يرگصون على اغنيه تُركيه اجيت امشي لزم إيدي سحبني عليه ابتعد شويه ورجع سحب إيدي أعلن عن بدء رقصه ثُنائيه بينا، ما اعترضت كملت الرقصه تحت أنظار الحظور الكل مستغرب من الغريب إلى يرقص ويا أبنة الجسار سحبني عليه حاظني من ورا وبعدها رفعني لصدره
همس كلمات ما صدگتهن بس لامسن روحي المأسوره
- هنن كلمتين مكانها وين؟ والثانيه نادي بأسمي احررچ واضمچ بعيوني منهم.
بتراء: لا أعرف مكانها ولا اعرف اسمك.
نزلني وأنهينا الرقصه جاسر اجا من بعيد
نزع الجاكيت رفع أكمام القميص راد يضربه بوكس وگفه بوجه ولزم ايده اردف
- على گولة ابن عمي خليك ريلاكس
جاسر: ياا نذل شلون ترگص وياااها
بتراء: آني إلى طلبت.
اندارلي حسيته احترگ بدمه ابتسمت ابتسامه مستفزه اردفت
بتراء: بس لا كبت الغيره العراقيه عندك
- لا ما اعتقد لأن بلا غيره ما تشوفين شلون ملبسينج لبس المصلخات.
جاسر: ااخلص علييك والله.
- بس لا تحلف بالله وانت صلاة ما تصلي
جاسر: ياا حررس
- اطلع وحدي خليك ريلاكس
عافه وعبرني يغمزلي وطلع من القصر
الجسار جان يشاهد بصمت وهذا الصمت ما يبشر بالخير عفتهم واجيت اصعد
جاسر مشى ورايا نظرتله بطرف عين وكملت
للغرفه حاجيت الحارسين.
بتراء: من تقفلو الباب لا تخلو يدخل.
-- آسف ممنوع ناخذ أوامر منج.
بتراء: ذيول جسار شتوقع منكم
دخلت للغرفه بسرعه وهما قفلوا الباب توترت.
شسوي اذا اجاا رحت سحبت شكو اثاث وخليته ورا الباب أكثر من قنفة سحبتهن ورا الباب نزعت الكعب وشمرته بعيد بقيت افتر بالغرفه وافرك بإيدي
بتراء: يا ربي بس لا يجي
دخيلك يا على سَند يا على سَند
وگع گلبي بحظني لمن بلش يدفر ويحجي
جاسر: حقييررره شلون ترگصيين ويااا شخص غريب ياا حقيرره ياا سااقطه
بتراء: دخيلك يا على سند دخيلك
بديت أبچي اول مره بعد هاي السنين.
فعلا حسيت هاي نهايتي هل مره ينفذ تهديده وما يهمه ااذا حرام لو حلال
ضل يدفر الباب ويريد يدخل مايگدر من الاثاث اللي ورا الباب، لزمت الفستان وافتر بالغرفه
من الخوف والهبطه حتى القناع ما شلته
بتراء: دخيلك ياا على سَند ياا على سَند
صارت أكو أصوات من البرنده متت من الخوف إلى أن صعد للغرفه نفس المقنع بس نازع الجاكيت باقي بس بالقناع والقميص الأبيض.
- اجييتج والله بس تعاي بسرعه.
بتراء: اانت تخبلت شلون صعدت يا على دخيلك
- غرفتج بالطابق الثاني فسهل كُلش
يلا بتوره خل نمشي.
جاسر استمر يدفر الباب وهذا يحجي بهمس
رديت بنفس النبره خاف يسمعنا.
بتراء: مستحيييل اثق بيك مستحيل اثق بجنس آدم اذا تريد حياتك امشي منا
مد ايده يحجي
- بتراء انطيني ايدج ترا راح تندمين اذا بقيتي
ما ادري شلون هيج ضعفت بچيت گدامه هزيت راسي وحجيت
بتراء: لااا اذا اجيت وياك اخسر حق الفراشات الثلاثه اخسرهن ما اجي لا ما اجي.
تقدم لزم وجهي مرر ابهامه ينشف رموشي فوگ القناع وثنينا مقنعين وجاسر مستمر يدفر ويصييح
بتراء: روح اذا فعلآ تريد تساعدني لا تدخلني بمشكله أكبر اذا شافك وياي بنفس المكان يقتلهن يقتلهن و و
- و؟، بتراء احجي منو هنن احجي
بس معلومه زغيرة منج تحرر روح مأسوره
صار 18 سنه بتراء احجي.
فعلا جاسر بلش يدفع الباب
لزمت ذراعه طلعته للبرنده اردفت قبل لا ينزل.
بتراء: بوحدي مأسوره صدگني لو اعرف جسار آسر بنت غيري چآن خاطرت بحياتي حتى ما تعيش اللي اعيشه اي معلومات سمعته منهم ترا كله كاذبه همه هيج بألف وجه ومستحيل ينطون معلومه دقيقه او صحيحه.
- بتراء اذا رحت ما ارجع ولا راح نلتقي
محد يحررج تخلصين عمرج مأسوره بقصورهم
بتراء: الله وياي، وعلى سَند.
تقرب خله گصته بگصتي اردف
- على سَندچ اذا تجين وياي بتراء خل نتساعد
دفعته عني وحجيت.
بتراء: مستحيل اثق مستحيل اخاطر، انزل قبل لا يشوفك بغرفتي ويتهمني بشي مالي ذنب بي
هز راسه ما رد بسرعه نزل شفته شاد حبل
من فوگ لتحت بشي حديد اله أكثر من راس
اشرلي اشمره وشمرته ضل ينظرلي وبعدها عبر السياج وطلع للشارع قبل لا اللتفت
لزمني من شعري وسحبني للغرفه يحجي
جاسر: حيواانه منو چاان هذا اللي رگصتي ويااه؟
احاول احرر روحي ما اگدر لف شعري على ايده ويحجي.
جاسر: شوووگت تفهمين شووكت ممنوع منعااً بااتً تشوفين غيري تحااجين غيري
تفلت بوجه وترك شعري يمسح وجه اردفت
بتراء: 18 سنه ماا شايفه غير خلقتتتك يااا قااتل يااا بس والله الواحد الأحد، لأخذ حقي من بين عيونكم واااحد وااحد لأخذ حقق كل لحظه من حياتي الضااعت
جاسر: چآ ودعي الفراشات
وَدق، رُقيه
ابتعدت لازمه راسي نزلت أيدي شفايفي يرجفن كلشي الا هنن، شمرت القناع واجيت بوجه احجي.
بتراء: مراح تسويلهم شي مراح تسويلهم شي
نضرلي من فوگ لتحت اردف
جاسر: إلا إذا.
هزيت راسي رافضه
بتراء: لاا مستحيل لا ما ماأگدر ح حرام
جاسر: چآ شني اصبر منا لحدما نرجع للبصره؟
بتراء: شنو لحدما نرجع شوكت نرجع؟
جاسر خواتي وين احجي بالبصره مو مو؟
جاسر: ما احجي ببلاش
انهاريت اضربه واحجي بصوت عالي
بتراء: الله ياااخذك الله يخلصنا من شرركم ياا كاافرين ياا قاتلين اخواتي اريدهن الله ياخذك الله ياخذك يا جسار.
دفعني وگعت عالارض صار يمشي حواليه ويحجي. كلام وگف شعر راسي
جاسر: باجر بأول طيارة نرجع للبصره
وبعد فتره خواتج الاثنين يتم خطوبتهن من
نائل وناجي بعدها دورنا آني وأنتي
راح للبرنده كأنه شاك بشي كنبص شال شغله واندارلي بطريقه غريبه رفع ايده يشوّفني.
جاسر: منو چآن بالغرفه قبل دخولي؟
گلادة سيف الإمام على عليه السلام لونها سلري ومبين رجاليه، تقدم بإتجاهي يكرر
جاسر: منو چآآن بالغرفه قبل دخولي؟
اااحجي ياا نذللة.
بتراء: محد مااكو هااي إلى هااي ااني جبتها ويااي من البصره قبل قبل لا نسافر
عصر وجهي بين ايده اردف يشد على الكلمات
جاسر: اذا طلعتي تبيعين براسي الشرف وانتي بلا شرف.؟ اخلص على خواتج.
ابتعد شمر الگلاده عالارض وطلع لميت رجليه
لحظني ارجف رجف من العصبيه إيدي گوه مسيطرة عليهن. نظرت للگلاده ومديت ايدي
شلته گلادة سيف الإمام على عليه ومنقوش عليها علي سَند حظنته لصدري اردد نفس الجمله المعتاده.
بتراء: على سَند على سَند على سَند
بقيت هيج لحدما غفيت.
أريم
جنا مجتمعين على طاولة الريوگ كُلنا
ابويا رجع من النَجف وجاب ماما يَقين وياه
اخويا راح يرجع اليوم ويجي للبصره.
هلال نزلت تركض ركض والموبايل بإيدها
هِلال: ولج هُدهُد اابنج رااجع هلااا هلاا
الأدهم: هِلاله بنيتي گولي ابوج راجع
شگد روحها حلوه اجت باست راس ابويا وسحبت كرسي گعدت
هِلال: عمي الغالي ابويا يصير ابن هُدهُده وآنا بشرتها بالخبر وگلت ابنج راجع مو هيج سيرا؟
سيرا: بلى بلى.
ناهد: هِلاله محد يعدل كلامها هي تحاجيني شلون ما تريد
هِلال: اوي خل ابوس ايدج هُدهُده
گامت مرت بصف هدآم وهو يدير راسه وياها كنبصت باست ايد هدهده ورجعت لمكانها
ناهد: تعللمن منهاا تعلمن
سجى: ما عدنه هاي العادات شني بوسة الأيد
الكل بلع لگمه محد علق إلا عَزام
اردف.
عزآم: شكو بيها بوسة الأيد؟ هاي آنا گدامج أگوم ابوس ايدها خل اشوف شكو بيها
واحد ينظر للثاني بس لا صدگ يسويها ويگوم يبوس ايد هلال امه حجت.
سجى: عزآم آني شگلتك؟ اكيد ما تبوس ايدها
عَزآم: بلى أگوم ابوس ايدها وراسها فد مره
فعلآ گام ورجع الكرسي لمكانه تقدم عبر امه والكل عينه عليه عبر هلال وكنبص باس ايد هدهده وگام باس راسها اندار لعمه سجى
عَزام: ان شاء الله اللتزم منا وجاي
سُفره دايمآ.
عافنا بصدمنتا هلال طايره من الفرحه لأن
عزآم بطريقه او بأخرى سندها، اردفت عمه سجى مثل عادتها
سجى: تالي عمره يمشي بكلام وعادات بنت التُركيه.
سيرا: كالما كالما عمه سجى.
آني وهدآم فهمنا مقصدها عض شفته
وكفخها خفيف اردف بهمس
هَدآم: اسكتي يا رياليه هم زين ما تفهمج
سيرا: يمعود هاي ماكو شي يأثر بيهاا
رفع راسه لمن ابويا ناداه
الأدهم: هدَآم
هَدآم: نعم يابه أمر
الأدهم: تروح للميناء اخوك اليوم راجع
ناقلة بترول رست بميناء إزمير وهو راجع
باليخت تنتظره لحدما يوصل.
هَدآم: صار يابه
اجت عمه يَقين ويا أمي من المطبخ مبتسمه
يبدو سمعت كلام بابا
يَقين: راجع؟ واليوم؟
شگد احب علاقتهم امي ابتسمت تأشر على عمه تگعد
ندى: اگعدي يَقين راجع والله تريگي حتى نلحگ نجهزله الغدا مثل ما يحب
سيرا: واي فدوى واخيرا اخي وسندي في الحياة راجع
سجى: ترا هدآم اخوج الحقيقي هو لازم سندج مو ابن مرت ابوج
الأدهم: سسجى تااالي وياج
ندى: أدهم تمام اهدى آنا اتصرف.
سجى: شبيك خويا عائله ما تمشي على مبدأ الحقائق
ناهد: اي حجيج صح چآ شبيه ما مشيتج على مبدأ الحقائق.
هَدآم: عمه سجى رجاءً لا تدخلين بالروابط العائليه احنه اخوا بيناتنا ليش تتدخلين.؟
امي اشرتله بمعنى يسكت وما يحجي عصب وگام، عمه يَقين تحجي وامي تبصم على كلامها.
يَقين: باوعي أختي الكريمة سنين واحنا سوا عائله عين الحاره بارده علينا كلمن ببيته وكل اسبوع نجتمع على نفس السفره الشباب والبنات كبرو سوا همه أخوه سيرا، أريم، عزهَ مثل بناتي لو الله رزقني ببنت ما جنت احبهن مثل حبي للثلاثه هذني. رجاء لا تحاولين تشوهين الرابط البينهم بسبب تفكيرج
ندى: الاخوه ثنينهم بنفس المكانه الله شاهد
ما افرق بينهم احبهم ثنينهم فليش هيج تسممين نفسنا كل أسبوع؟ سالمين خيه
ما تملين؟
الأدهم: سجى احترمج لأن مرت الباشا بس مال تحاولين توگعين بين ولدنا وبناتنا ما اسمحلج والباشا لو يدري بحجيج هذا جان.
سجى: كمل خويا كمل چآن طلگني؟
ناهد: الحليم تكفيه إشاره
گامت ودمها فاير قبل لا تمشي سيرا گامت تزيد عليها
سيرا: ول هُدهُده خل ابوس ايدج قبل لا اطلع للجامعه اوي فديت جيبي راسج فد مره اوي ربي يطول بعمرج هُدهُدتي بوساات
شالت كُتبها ومشت
سجى: ندى ربي بنتج ربي.
امي وعمه يَقين جاوبن بنفس اللحظه ونفس الكلام
--: متربيه خمسطاعش مره كفيلج العباس
أريم: لااا صدگ اكوم ابوس إيدچن مامااتي
بست ايد امي وعبرت عمه سجى حجيت
أريم: ماماتي يَقيني ايدج ابوسه
بستها وهي باست خدي بس شافتنا هيج طلعت من غرفة الطعام ما ادري وين راحت
وگفني ابويا بعدما حس بالغيره
الأدهم: منو سمحلج تبوسين بيهن منو
چآ وآنا؟
ضحكنا بسته بخده ورجعت لمكاني
ناهد: 57 سنه وتغار شبقيت للشباب؟
الأدهم: والله بعدني احس روحي بعمر 27
هلال مخليه ايدها على خدها تتأملهم اردفت
هِلال: اوي شحلاتكم
الأدهم: حلات عيونج بنت الغالي
سويت مثل حركة هلال اتأملهم اردفت
أريم: گايز احنا عائله تخبل بس أكو خلل واحد العمه سجى موجوده
ندى: أريم كافي غيري الموضوع
الأدهم: بالعافيه عليكم آنا عندي شغل
گام يمشي كلنا نادينا عليه واشرنا على هدهده
-- ما تبوس ايد امك يا أدهم باشا؟
اندارلنا يبتسم
الأدهم: شلون ما ابوس ايدها.
فعلا رجع باسها و اردف
الأدهم: ربي يطول بعمرج يما ونضل نبوس بإيدج لحدما ترضين علينا
ناهد: راضيه عليكم انت وكل عائلة الباشا
بس ابقو بظهر بعض لا يفرگكم حجي القيل والقال.
الأدهم: ان شاء الله يما ان شاء الله.
رايح للشركة عَزه بوحدهه وعدنه اجتماع
احتمال نتأخر للغدا
ناهد: ترجع للبيت قبل لا يرجع ابنك مفهوم تأجل الشغل هذا يوم مهم ابنك راجع من اول رحله اله لازم تكون بإنتظاره
الأدهم: تدللين يما تدللين.
سيرا
السايق نزلني بباب الجامعه ومشى أريم هم وصلت بسيارتها وگفت وطلعت سلمت عليه تحجي.
أريم: البيست مالتج رجعت تأخرت؟
سيرا: ازدحام ازدحام هسا تجي
أريم: خل ادخل على محاظرتي انتي طالبة المرحلة الأولى انوب قسم الفنون
سيرا: اگلج هذا بسمار لو شني؟
أريماا عزاا شلون هيجي
عافتني ودخلت معليش تتباهه لأن مرحله ثانيه بإدارة الأعمال عاينت للساعه مثل عادتها هم تأخرت. اجيت ادخل
صييّحت بصوت عالي وهي تنزل من الباص.
- ولج سيراا عزاا بعينج ما توگفيلي
رديت عليها بإبتسامه وبنبرة شوي عاليه حتى تسمع
سيرا: انتظرتتج دهرر تالي ماتالي عزاا بعيني امشي بسرعه
وصلت يمي گوه تجر نفس وتعدل شعرها تحاظنا الحظن الروتيني، اردفت
سيرا: صباح الخير ياا اجمل بيست فريند. وَدق.
ابتعدت تحجي بأسلوبها المرح مثل جوي
وَدق: صباحج آني الورده، اكلج هيلب ترا ما حليت ولا واجب، البارحه حبوبتي مرضانه كفيلج العباس بألف يا على خلصت صفحه
سيرا: والله آنا كفيلي جدي السابع
بألف يا على قريت صفحتين اصلا ما حليت ولا كلمه، لحسن الحظ لوما رسبتي سنتين چآن ما تعارفنا
مشينا للحرم الجامعي وحده لازمه ايد الثانيه
ونسولف، جاوبت بنبرة حزينه بعدها رجعت مرحه
وَدق: بسبب الضروف اللي مرينا بيها.
، سيرا أحلفي بالله ما تچذبين باوعي خاف ناصبه عليه وتجاوبين الإمتحان! صح مو نفس القسم بس نتساعد بالمعلوماات
سيرا: والعباس والحسن والحسين وعلى الضرغام ما قاريه عبن جنت اتابع مباراة ريال وبرشلونه
وَدق: چآآ والإمتحااان موو شدييت ظهرري بييچ، عزاا العزااج
سيرا: كالما كالما اهم شي فاز الريال
دفعتني فاير دمها مشت للقاعه وهي تحجي
وَدق: رفاق السوء الحذرتني منهن رُقيه
عزاا بعينج، خل ريال وكالما ينفعج.
سيرا: اوي شبيج خليج ريلاكس اتس ايزي
، نعوضها بغير امتحان ونتساعد.
وَدق: تنصبين عليه لو شنو ترا مرحله أولى بالجامعه مو اول ابتدائي عزا العزااج
بالمره الجايه على حظي يطلع أكو لعبة ريال ومان سيتي، انوب نغرگ غررگ بشط العرب.
سيرا: بربج لا تهبطين معنوياتي
عبرنا القاعه الأولى نمشي للقاعه مالتنه
وَدق: قصدج عالطوبه مو؟ لأن انتي مو مال
وحده حابه تكمل دراستها.
سيرا: لا والله حابه كُلش بس ابويا يضغط عليه حتى اغير القسم للإدارة والاقتصاد
وَدق: باوعي للصراحه اهلج كلامهم صح
قسم الفنون الجميله ما منها فايده هسا آني
ادرس إدارة واقتصاد بيها تعينات واذا شغل خاص بعد أفضل مثلا انتو عدكم شركات نفط
وتسويق ودا اتخيل بيوم تستلمين الإدارة بمكان ابوج.
سيرا: ودا اتخيل هدآم واگف سكرتير يم باب مكتبي، وَدق أنچبي إدارة شنو وجع راس شنو، راح اللزم فرچتي وارسم أفكاري اوي متحمسه للتخرج يومن اصير فنانه معروفه
وَدق: في حال ابتعدتي عن الطوبه وريال
- نجيبلچن حب شمس خل تحلى السوالف!
فزينا من صوت الاستاذه
سيرا: اها لا استاذه لا تلهينا عدنه درس بغير وقت نقبل عزيمتچ امشي امشي
لزمت ايد وَدق ومشينا
وَدق: عزاا بعينج ولج خطيه عقلها صار إيرورر.
سيرا: تعلمي مني تعلمي تفرين عقلهم بردودچ لا تصيرين فاهيه ياكلوچ بلا ملح
وَدق: يعني ارش ملح؟
وگفت يم القسم
سيرا: فوتي على قسمج فوتي لا ارشج بغير شي
وَدق: رشيني بنفط والجداحه عليه انتحر واخلص احسن من القهر بعد الفشل
دفعت بظهرها
سيرا: فوتي يمعوده راح عليج المحاظره
دخلت وهي تأشر بمعنى اصبريلي
سيرا: گمت ارجف من تهديدچ والله يا الله
وين جنت رايحه آنا؟ اي قسم الفنون
صخااام خربت أم مزاجي بالفوز.
دخلت للقاعه سلمت عبالي الاستاذ مو موجود
سيرا: هلووو گايز بسررعه هييلب كل وحده وواحد بيكم تنطيني معلومه عن امتحان اليوم بسررعه
واحد ينظر للثاني ويأشرون بعيونهم لو لازمين گصتهم مشيت لمقعدي واحجي وياهم
سيرا: شبيكم بس لا انتو جماعة برشلونة
وهذا تأثير الخساره الفادحه عليكم اوي هاردلك
- هاردلك الچ سيرا الأدهم باشا.
عفت الكُتب عالمقعد بلعت ريگ عاينت على زميلتي أشرت بإيدها تحت المعقد رحتي بيها و آنا اهمس كلمه أنچبي انداريت الاستاذ ورايا بالباب واگف.
سيرا: اها استاذ مُعاذ گود مورننغ چنا.
مُعاذ: اطلعي برا.
سيرا: استاذ لسّن تو مي.
مُعاذ: لا تعوجين حلگج واطلعي برا لو يجي الباشا بنفسه هم ما تكملين محاظرتي روحي للساحه أكو طوبه أجمعي ولد المنطقة واللعبو بلكت تنجحين بدرس الرياضه.
سيرا: اي نايس شكرا على النصيحة هسا برضات أمك عليك خل ناخذ الدرس
مُعاذ: سيرا شهل ميانه امشي طلعي براا
شلت كُتبي اردفت
سيرا: بالعباس اروح اللعب طوبه وعلى مسؤوليتك استاذ + احجي لأمي عليك
مُعاذ: اطلعي برا بدون تفاخر ام امج ما تخوفني
سيرا: حجيت على حبوبتنا.
--: استاذ الدرس ناخذه لو تحلون خلافاتكم العائليه.؟
مُعاذ: سامر اطلع برا وياها.
سيرا: استاذ واطلب عاصم واياد للدفاع وهند وساره خط وسط طلعهم ويانه خل يكمل الفريق
مسح وجه يحاول ما يضحك اردف
مُعاذ: احم أنچبي واگعدي بمكانچ يلا
سيرا: يعني المباراة نأجلها؟
مُعاذ: نأجلها بس اگعدي بقدرة القادر دابلع اسلوبچ.
ابتسمتله ابتسامه تسليكيه وگعدت بمكاني
بلش الدرس وبلش يشرحلنا وآنا أسجل
تراكمت عليه الواجبات كمل المحاظره وطلع انداريت للشله التعبانه
سيرا: شصار قبل نص ساعة؟
- ما صار شي ولا انتي ذبيتي ميانه انگلشيه معربه ويا الاستاذ
--: اصلا ما هددتي الاستاذ بحبوبتج!
-: شباب احد بيكم سمع سيرا وهي تگول اللعب طوبه؟
الكل: لااااء
سيرا: عفيييه اغاااتي هييج اريدكم
يلا سي يو گايز. بعد الإستراحة طبعاً
الكل: والعباس طرگاااعه
انداريت الهم
سيرا: ول خالي بنت الباشا چآ شعبالكم
عفت القاعه رحت للحديقه وَدق منتظرتني
وَدق: ليش تأخرتي؟
سيرا: مصادقه غيرچ
وَدق: بدوون اذني.
ضحكت بوجهه، اردفت.
سيرا: ريلاكس والله اتشاقه ما اصادق غيرج هو بس انتي وگوه متحملتج.
وَدق: على هذا الحچي أچيت من الجسر الإيطالي.
سيرا: اچيت وراج والله بس وآنا مخليه اوكسجين
بس شاطره تدفع بيه ما تگدرلي
وَدق: ولي فد وحده طرگاعه شنو الصار بمحاظرة استاذ مُعاذ
سيرا: نفس السيناريو من اجفص وهو ورايا
وَدق: شو احسه يحبج
سيرا: وات شنهوا. ولج ترا ابن خالتي
ومتزوج بس مجرد علاقة طالبه واستاذ
وَدق: چآ ليش يرضى بمجرد ما تحششين.
براس الطُلاب؟ او غير شي
سيرا: لأن آنا ذكيه ذكيه اعرف نقاط الضعف عند المقابل واستغل هذا الشي مثلآ استاذ مُعاذ اذا سمع تحشيش وتصنيف يصير ريلاكس.
دخلت للكافتيريا گعدنا
وَدق: سيرا رُقيه تتصل
سيرا: جاوبي ان شاء الله خوما بيها شي حبوبتج.؟
وَدق: خايفه ان شاء الله مو علمودها
شالت الإتصال وهي صوتهه اختفى من الخوف والتوتر.
وَدق: آ الو رُقرق اتصلتي خوما بيها شي.؟
رُقيه: شبيج عمري صوتج ليش هيج لا تخافين صارت احسن بس ارجعي للبيت فورا بعد الدوام العصر اطلع ادور ورا هذيج السالفه فلازم تبقين وياها
سيرا: ها ولج طمنيني خوما بيها شي؟
هزت رأسها ب لا
وَدق: تمام عمري سلام لا تطلعين قبل ما اوصل خل نحجي، اي تمام گدهاا والله. سلام
قفلت الخط تاخذ نفس وتزفره، اردفت
وَدق: مابيها شي بس رُقيه عدها قضيه تشتغل عليها ولازم تطلع من البيت وگالت ارجع بدون تأخير.
سيرا: چآ نطلع والسايق يوصلج
وَدق: لا باوعي لا اقصد ارجع بالباص مثل كل يوم هيج احسن ولج كومي محاظرتج بلشت وآني هم ادخل للمحاظره مالتي
استغربت من ترددها شلت الكُتب ورجعت
اكمل المحاظرات بعد الدوام اجا الباص صعدت وهي تلوح بإيدها راحت وانتظرت السايق
وصلني بوجهنا للبيت قبل لا يرجع اخويا.
البتراء
غرفه مُضلمه ونفس الصوت والروح التعبانه من التعذيب صرخات واهات عبرت الباب مشيت بالممر نفس الممر ما يروح من بالي فتحت الباب قبل لا اللحگها صوب وقتلها صرخت صرخه اهل الأرض والسماء سمعوها
بتراء: يمااااااااا.
فتحت عيوني بعدني متمدده عالارض بنفس الفستان وآني بغرفتي مو بنفس البُقعه المُحرمه كُل اللي شفته چآن كابوس مُعتاد گام يخطي خطواته بإتجاهي وكأنه من زمان بالغرفه ومنتظرني اگعد ثبت عكازته أمام عيوني مباشرةً رفعت انظاري لفوگ واگف وبوجه الشيطاني ينظرلي اردف
الجسار: گومي بدلي الطياره بعد ساعه
أيدي بعدها ترجف من فزعتي بالكابوس
سندت روحي باوعت بعدني شاده على الگلاده شديت عليها أكثر استقوي بيها همست.
بتراء: على سَند
الجسار: هم گالت سند ولج بابا حاله حالج هذا ياهو شگد جاهله
اختفت ملامح وجهي المألمه گمتله ادفع بي واصرخ
بتراء: لااا تحجي ياا كاافر ياا فااجر ياا جاااهل محدد غيرك جاااهل لا تووسخ اسمه على لساانك ياا كاافر
الرد چان ضربه وحده بعكازته وعلى ضهري رأساً وگعت على ايدي غمضت عيوني بألم بألم فضيع العكاز كله رؤس مو حيالله عكاز
أداة تعذيب بإختصار.
الجسار: ألف مره گتلج لا توگفين بوجه ابوج.
گتلج خلي عقلج براسج واستوعبي الواقع انتي الموروثه من بعدي لو چآن عندي ابن ما چآن اكترثت لحياتج جان قبل لا تنولدين قتلتج بس مع الأسف اسوء اختيار لمن خلفتج المفروض تكوني ولد مو بنيه.
شجاي يحجي شلون هيج يحجي عن بنته اسوء اختيار؟ فعلا لو قاتلني قبل لا انولد چان احسن ماچنت هسا بهذا العذاب واكون شاهده على مقتل أمي. شديت على الگلاده وگمت شامخه ما يكسرني الف ضربه منه وآني براسي مخليتهم. ينظرلي بنظره كلها حقد واحتقار وكُره.
بتراء: فعلآ اسوء قراراتك خلفتني خللفت بترااااءك وحق على السَند اخذ بثأري منكم كُلكم وااحد وااحد.
مثبت ايديه ثنينهم عالعكاز وآني افتر حواليه واحجي بكل قوه وشجاعه.
بتراء: نائل اللي خليته يقتل مررت عممه نااجي اللي يحاوول يتحاارش جااسر اللي مقرر تزوجني منه. وااحد واحد اقتلهم وعلى السَند بس الله يطول بعمري. وبعدها.؟
وگفت بوجه ينظرلي وكأنه يريد يشرب من دمي
بتراء: بعدها يجيي دوررك، وكل وااحد يندفن بوحده من قصوركم بالبصره ولايهمك ما اذبكم للچلاب.
رفع ايده وبالعكاز ضربني على ركبتي كنبصت متألمه بس ما صرخت رايح صوتي المن اصرخ بعد.
الجسار: ساقطه بنت الخاينه ولا وحده بيچن شريفه
بتراء: نسل الفُجااار من وين الشرررف يااا عدييم الشرررف ياا كاافر
كنبص يمرد وجهي بين ايده ويحجي
الجسار: بترااء لا تخليني اخلص على خوااتج
بتراء: مطمئنه مادام حبوبتي لامتهن بحظنهه لو تقتل اامك همم ياا مجرم حتى هيه تقتللهااا؟
عافني وگام مسح الدم اللي بقى عالعكاز من أثر الضربه على رجلي مشى للباب التفتلي نص التفاته اردف.
الجسار: الخادمات يدخلن ويرتبن كلشي بعد نص ساعة تنزلين ويا الحارس.
باوعت الاثاث كله بمكانه يبدو من زمان رتبو كلشي وآني نايمه طلع ورگع الباب. گمت للحمام اعرج والدم ينزل من رجلي ضهري كله جروح لحظات ودخلت المساعده العراقيه أسمها صفاء.
- آنسة اساعدج؟
شفت شايله علبة الإسعافات الأولية هزيت راسي ودخلت قفلت باب الحمام الحمام عباره
عن غرفه چبيره بيها قسم تغير الملابس بجها
گعدت على الكرسي المحطوط بغرفة التبديل.
نزلت الفستان وبدت تعقم الجروح وتخلي بلاستر كملت وراحت لرجلي رفعت الفستان
لحد الركب كله جروح أكثر شي رجلي متأذيه
- آنستي ليش السيد هيج يسوي.؟
سكتت شجاوب كملت وخلت بلاستر أكثر من خمس جروح برجلي انداريت للمرايا فوگ السبع جروح بس بضهري ووحده اجت بالوشم رجفن شفايفي لمن شفتهن هيج
- آنسه لا تنقهرين خفيفه مو عميقه مثل البقيه
بتراء: واذا تشوه الوشم
- نجدده والله بس لا تنقهرين
گعدت لازمه راسي احاول ما أبچي.
بتراء: صفاء ساعديني انطيني معلومات عن أي شي مثلا أكو أكو بنيه غيري؟
- شلون يعني؟
بتراء: بنيه غيري هيج مأسوره وجسار ياخذها وياه مثلي مثلي بكل مكان وياه
چانت مستغربه من كلامي معقوله الشاب المقنع يچذب؟
- آنستي والله ما افهم شلون يعني قصر چبير وما مسموحلي افتر بكيفي من المطبخ لغرفتج لا أكثر.
بتراء: اي معلومه صفاء بس خل اتأكد من شغله ببالي
ضلت تفكر إلى أن.
- آنستي البارحه سيد جاسر لمن طلع من غرفتج نزل للمطبخ.
رفعت راسي منتظره تكمل
- طلب عصير طبيعي جهزته وكملت شغلي شفته يخلي بيها شي مثل دوا او علاج ما ادري واخذها.
بتراء: شلون يعني شربها؟ لو شنو؟
- لا آنستي لمن طلع آني لحگته خفت مخلي سم وماخذه الج بس من طلعت شفته انطاها
لسيد ناجي والسيد صعدها للطابق الثالث.
گمت استفسر منها
بتراء: صفاء منو بالطابق الثالث؟
- طابق متروك وبس غرف نوم هيج عرفت من الخدم الموجودين هنا.
بتراء: طابق متروك وبس غرف نوم روح مأسوره 18 سنه وياي طابق متروك وبس غرف نوم روح مأسوره 18 سنه وياي.
- آنسه ليش تسألين أكو وحده غيرج هنا؟
هزيت راسي وانداريت ادور لبسه مناسبه مثل المخبله حتى أبدل واطلع بلكت ادور على شي اگدر اتحرك براحتي
بتراء: ماا ماا ادري صفاء ما ادري ان شاء الله مو صح ان شاء الله ماتكون مأسوره وياي دخيلك يا على سَند.
لبست الگلاده برقبتي السلسال چآن طويل طلعت صفاء وآني بدلت لبست بلوزه ام الرقبه ودخلت الگلاده تحت الملابس وجينز عريض گعدت اللبس الحذاء الرياضي، لميت شعري ورفعته لفوگ شديته وطلعت صفاء دخلت لملمت كل ملابسي وجابت الجنطه خلته عالچربايه متت من ألم الجروح وبس اعرج تقربت للباب باوعت مقفول
انداريت
بتراء: صفاء تعاي بسرعه
اجت بسرعه واگفات ورا الباب نحجي بهمس.
بتراء: هسا راح ابقى ورا الباب وانتي تصرخي وتنادي الانسه هربت من الشباك هيج أريدج تمثليها بقوه وتخلي الحرس يصدگو ويدخلون للغرفة وبعدها آني اطلع واقفل عليكم تمام؟
- يقتلونا سوا.
لزمت اكتافها ما ادري شلون اخليها تبطل تخاف منهم
بتراء: باوعي صفصف والله ما يقتلوج لأن آني آنستج ما اسمحلهم يلا صفصف بس خل اصعد للطابق الثالث.
هزت راسها موافقه حظنتها بقوه ابتعد
بتراء: بس اتحرر منهم اخذج ويايه.
يلا صفصف بلشي بس اوگفي هناك بالبرنده.
هزت راسها وراحت وگفت بالبرنده أشرت بأصبعي اعددلها
بتراء: وااحد، ثنيين، ثلاثه Go
بلشت تصييح وآني ورا الباب
- الأمن بترااء هرربت الأمنن بترااء هربت من البررنده يااا أمن ياا حاارس افتح الباب افتح وتعاااال البتراااء هربت.
فعلا بسرعه الحارسين ثنينهم فتحو الباب دخلو يركضون للبرنده واني طلعت من ورا الباب قفلت عليهم ورجعو يدگون الباب كلشي صار رگض صعدت الدرج للطابق الثالث فوگ 25 پايه صعدت وآني بتك رجل اعرج دخلت للممر كله تراب ووسخ فعلآ مبين متروك.
حاولت ادخل للغرف الأوليه كلهه مُقفله.
كملت بالممر إلى أن سمعت صوت من إحدى الغُرف صوت هزيل صوت تعبان اغنيه او كلمات شعريه تُردد ترُدد بصوت مقهور
- جااانم روححم هيااتم عُمررم.