رواية وتيرة الأعرج للكاتبة حوراء السعيدي الفصل السابع والثلاثون
غياهب.
أصواتهم صارت تدگ براسي من گالوا گلبه توقف طلعوني خارج الغرفة
بنص صدمتي بلعت ريگي طابكة حواجبي عقلي يرفض إلى سمعه لزمني ابوية
يباوعلي بنظرات كلها قلق، لحظات هيَّ بس وين أخذت هواية من عمري
الصدمات كافلة تكبرك سنين لگدام غمضت عيوني مختنگة انفاسي
صارت ما منتظمة اسمع الصوت ابوية بس الساني ثكل.
سلطان: بابا غياهب أفتحي عيونج.
فتحتهن بثكل بهدوء درت بعيوني على الباب دكتور يدخل و دكتور يطلع كُميل واگف يحارب بوگفته حاله صار يبچي الصخر.
غياهب: بابا
سلطان: بس اتفائلي بالخير بنيتي ان شاء الله ماكو شي.
اخذني الحضنه يهدأ بيَّ، بينما اني أحس بروحي داتنسلب مني گعدني
علي الكرسي گعد گبالي ثاني ركبته لازم ايديَّ يهدأ من وضعي خايف
تجيني الحالة مالتي إلى گلبي بدأ يتعب منها رجفت شفتي.
ما راح يموت
ما يموت بس عوفي هل الأفكار يا نظر عيني.
هزيت براسي و اقنع بنفسي بكلام ابوية عيني على الباب طولوا عنده رجعت اباوع الابوية يباوعلي بقهر.
طولوا؟
يسون شغلهم.
مسحت وجهي جسمي كب نار وجهي كأنما نار لسعته أهفي بأيدي
ما أحس بنسمة باردة وگفنا كلنا من طلعوا الدكاترة ايدي على گلبي
أخاف أسمع ذيج الجملة و هم ينطونا خبر موته، شگد ما الشخص
يأذينا و تحقد الساعات و أيام عليه بداخلك بس بنفس الوقت عذابك أكبر من عندك.
مشاعر ثانية أتجاهه أصعب موقف يعيشه الانسان ويدخل بحرب التناقض، بقيت بمكاني اسمع الحديث الدكتور.
سلطان: دكتور شنو وضع مريضنا؟
كُميل مخلي عيونه بوجه الدكتور و عيونه إلى تسئل قبل لا ينطق لسانه كلها انفاسها محتبسة.
الدكتور: الحمدلله على سلامة المريض تخطى مرحلة الخطر و أكو أشارة ثانية
صحى من الغيبوبة و هاي أول مرة تصير شخص ما يطول بالغيبوبة
لهيج حد أقصى متفاجئ لان وضعه جان شبه مستحيل يعيش و ما چان بايدينا.
شي غير رحمة رب العالمين مريضكم انكتب اله عمر جديد بس لازال وضعه تعبان يحتاج يبقى فترة هنا.
نزلت دموعي ويا كل كلام الدكتور ذبيت نفس براحة و كُميل يردد بالحمدلله ياربي.
كُميل: أي أي دكتور بقي شگد مااا اتريد عسا ما سنة المهم يصير بخير.
بقى يسولف وياه و يستفسر عن حالته اتقدم ابوية إلى ابتسم بوجهي.
سلطان: مو گتلج اتفائلي بالخير بابا.
مسحت دموعي شگد صايرات بسهولة ينزلن و اني إلى جنت لو اتگطع و أموت.
ما تنزل دموعي و جانت وحدة من أمنياتي بس اريد ابجي و أصير حالي حال
البشر بس من يوم إلى دخل الحياتي ارسلان و اني دموعي صارت
دمعة تتسابق ويا الثانية أخذت جنطتي بأيدي.
غياهب: بابا رايحة للحمام أغسل.
أنتظرج هنا.
مشيت متناسية وين الحمامات بالضبط نسيت سئلت دخلت الهن ذبيت جنطتي
غسلت وجهي رفعع راسي اباوع النفسي بالمراية شديصير بحياتي؟
ليش هيج حياتي غريبة منو يصدگ قصتي ويا ارسلان و يقتنع مجرد ذكرى.
منه بطفولتي سوت كل هذا دفنت مشاعري إلى ما ادري حب او تعلق الشخص
ما جنت ادري بيا ارض الله مخلي، كلشي تغير من عرفته نفسه إلى أكرهه
داعيش بمشاعر متناقضة إلى أعرفه أريد أهرب من كلشي مسحن وجهي وطلعت
چان ابوية واگف ويا الخال يسولفون مجرد لمحوني سكتوا وگفت كبالهم ابتسمت بوجه الخال بتعب.
غياهب: الحمدلله على سلامتة
كُميل: الله يسلمج خالي.
طلعت الحلقة قدمتها اله بقى يباوعلها بعدم فهم.
شنو هذا؟
بقت عندي من يوم الحادث أتمنى توصلها اله من صحته تتحسن.
اخذها مني بدون ما اباوع بعيوني رفعت راسي الابوية.
بابا نروح
سلطان: بكيفج غياهب.
حچى الخال بتسائل.
كُميل: ما تنتظرون تشوفون ارسلان؟
باوعت الابوية ادري بي متحمل كلشي علمودي و الا لو القرار يرجع اله ما يوصل هنا و لا اله علاقة.
غياهب: لا خالي مو لازم.
رمقني بنظرات كأنما يگلي أبقي بس أكتفى بالسكوت سلمنا عليه مودعينا.
طلعنا من المستشفى ما أريده يشوفني خلي كلشي مثل ما هوَ، مجرد عذاب
الي و اله من نجتمع بمكان واحد صعدت بالسيارة ساكتة و أعصار
الأفكار تعبت عقلي، اباوع للطريق و أريده يطول أكثر أحس بنفسي
محتاجة هدوء و طريق بعيد خالي من أي بشر التفتت على صوت أبوية.
سلطان: غياهب
غياهب: هاا حَبيبي
ليش ما بقيتي تشوفينه؟
عرفنا وضعه و تقريباً صار بخير ما يحتاج وجودي بعد.
هز براسه ساكت أنتبهت الأيده لابس ساعة جديدة شكلها حَلو.
حلوة ساعتك الجديدة.
أبتسم و عيونه صارت عليها.
خالتج جابتها إلى من فترة لبستها بعرس حنين هم
امم ما أنتبهت.
بقيت صافنة بي أباوع بملامحه الحمدلله التعب بيهن مو مثل قبل بعد ما
أخذ الانسانة إلى يتمناها من سنين، تربيته النا و احنا بنات محد ساعدة بينا
خصوصاً احنا بنات و احتياجاتهن و مسؤؤلية مو اي شخص يگدر عليهن
بس بالنهاية حارب كلشي علمودنا صرنا عيونه إلى أيشوف بيهن و ما يرد علينا غير ب نظر عيني .
اختي اسم على مُسمى فعلاً حنونة و طفولية برائتها غالبة عليها بي مو غبية
مثل ما البعض ياخذ نظره عن هيج شخصيات، أتمنى بيوم حياتنا تستقر
و نمارسها طبيعي مثلنا مثل أي عائلة و اني عائلتي نقطعة ضعفي
و نقطة هالضعف سبب بوصولي لكل إلى اني بي، وصلنا للبيت و أفكاري
مو راضية تهدأ فتحت الباب حنين راجعة البيت خالي، خالتي بدوامها
دخل ابوية ورايَّ، گعدت و الهدوء محتلني گعد گبالي ساكتين اثنينا.
بقيتا على هالوضع الدقائق الى أن كسر حاجز الصمت بسؤاله.
سلطان: بشنو تفكرين غياهب
غياهب: بكلشي
اي و وين وصلتي بتفكيرج؟
ضايعة
و الى متى تبقين هيج.
ذبيت حسرة مبتسمة وگفت أصب مي إلى أشرب و احجي وياه.
يمكن ما مكتوبلي أرتاح بحياتي كل انسان ياخذ قسمته من الحياة وَاصبِر وَمَا صَبُركَ إلا بِاللّهِ. نصبر والله كريم
چنت منطيته ظهري و اسولف وياه استوقف حركتي كلامه من گال.
سافري غياهب.
أستداريت عليه متفاجئة من كلامه مو هوَ نفسه إلى طلب مني ما أسافر و لغيت كلشي علموده؟ طبكت حواجبي باسائل.
بس انتَ قبل طلبت من ما أسافر
و هسه جاي اگلج سافري اذا تبقين هنا ما راح تتخطين شي.
رجعت المكاني گاعدة أفكر بالموضوع إلى فاجئني بي.
بس ليش غيرت رأيك
أدور راحتج انا نظر عيني بابا
أفكر بالموضوع ذني الايام
الج كل الوقت
بابا هم وصلت الفاتحة زمُرد؟
لا بس خالتج راحت و خوالج جابر و عمران من باب الاحترام عزيتهم باتصال و هم مامسوين فاتحة بس أستخلاف
ماكو خبر عن سالم
فص ملح و ذاب ما اله أي أثر.
منو مستلم موضوعه
الموضوع بالاخير أتسلم ال عمران و جابر طلعوا درغام منه لان تدرين بسالم
يكرهه و خاف يصير شي على ابنه جابر استبعده
شگال درغام
ما حچى شي لأن تدرين بي ما يكسر كلمة جابر
زين سوا خالي لان جدي سالم ما يحب درغام و لا سامح الله خاف يأذي.
ذب حسرة طويلة.
كلشي بجهة يا غياهب و موتت عمتي هيلة إلى ذبحها بجهة.
قشعر جسمي
محرد ذكرى للموقف شحال إلى يشوف بعينه شخص ينذبح صعدت
بدلت و نزلت اطبخ الغده احاول أشغل بنفسي و ما أفكر بشي بس تنجح بالنهار و يرسبك الليل .
تغدينا سويتله چاي مشت الايام هادئة بحياتنا، حنين كل يومين عندنا أقترحت
عليها يسافرون بس رفضت گالت الوقت مو مناسب لان دوامها بي مشكلة بسبب
الخفر درغام مايريدها تلزم خفر و لازم تدقيق و ما ادري شنو سوالف.
المستشفيات و جرت الايام يشتغلون بموضوعها شلعوا گلبها بي يله رهمت الشغلة
اشوفها مرتاحة وياه و هالشي يريحني أكثر، ارسلان بعد ما عرفت عنه شي.
و لا حاولت أعرف اريد أبتعد شگد ما اگدر لان قربنا غلط، موضوع السفر
بقى أبالي وفكرت بي الايام طويلة و بالنهاية وصلت القرار و أتمنى يكون صحيح.
دخل أبوية بأيده علاگتين حط وحدة بحضني جنت متمددة اقرأ كتاب
فتحتها چانت حلويات و مكسرات ضحكت باوعت للثانية نفس الشي.
غياهب: لعد الثانية المنو؟
سلطان: الحنينه اذا تدري جايبلج و ما جايبلها تدك طبل علينا.
ههههههه والله صح زين سويت.
ابتسم بوجهي.
شلونج انتِ؟
الحمدلله
نگدر نحجي؟
نزعت نظاراتي حطيتهن فوك الكتاب خليتهن بجهة لان فاهمة شنو إلى يزيد
يحجي بي بعد اخر انهيار صار ويايَّ حتى لو مو كلشي طلعت بس گدرت
أطلع قسم من إلى كاتمته بذاك اليوم، بس داحس مع الوقت روحي شگد ما حنينه دا تقسى و صابني برود غريب.
غياهب: اتفضل.
سلطان: انتظرت ترتاحين هالفترة بس اذا ما تگدرين نترك الموضوع.
لا بابا احچي
تجاوبيني بصدق و ما تكتمين؟
اي.
شنو مشاعرج اتجاه ارسلان شنو الموضوع إلى حجيتي بي بذاك اليوم حبيتي شخص و اكتشفتي نفسه زوجج والله يا بابا فريتي عقلي هنا.
راح أحجيلك كلشي
ياريت خلي گلبي يرتاح.
حضنت نفسي أباوع للشباك إلى گدامي.
عشت ويا ارسلان شفت بي اكثر من جانب، أحسسه ما فاهمة شي و أتغابى.
و أنكر عدم فهمي الشي يخصه، ليلة زواجي مني ما أنساها بذيج الليلة
روحي جانت تموت على البطيئ من جهة صدمتي بأجدادي و من جهة صدمتي
بتدمير عائلة كاملة روحي فرفحت بذاك الليل، أتناقض ويايَّ مرة إلى أشوف
عنده الحنية و الخوف إلى يشبه حنيتك و خوفك عليَّ و مرة اشوفه شيطان كافل يخلق الرعب بداخلي.
بسبب أنتقامه عشت بخوف بس مو على نفسي لا عشت بهاي الحالة
منه لا يأذي أحد بيكم قلع أظفري مد أيده عليّ، غمضت عيوني الغصة.
حرگت بلعومي و اني أتذكز ذيج الليلة السوداوية ما چنت أشوف بشر گدامي
لعد شگد حقده چبير علينا و عماه، زفزت نفس بعمق رجعت أكمل كلامي.
نتعارك هواية و السبب كله چان أنتقامه اني إلى چان گلبي يحترگ على أهلي و هوَ إلى چان گلبه يحترگ على أهله.
سلطان: غلطته الوحيدة هاي و لا من الممكن أسامحه عليها گتله بنتي أمانة يمك بس ما صان هل الامانة.
مشت حياتي وياه يوم هادئ يوم ماضيه و حقده يتحكمون بي خوفه على.
اخوانه اشبه بخوفك علينا أشوف ناز ر أنقهر بابا لان سالم و عياش يقربولي
من دمهم اني أباوع العائلتهم شلون تدمرت اب أنقتل ظلم ام أنتحرت
و ما تحملت فقدان زوجها هل الاشياء جانت تأذي گلبي بس ما اگدر احچي
و شنو إلى اگدر احجي حتى لو حچيت شنو الفائدة و لا واحد من عائلته جان قابل بكل أفعاله بس محد يگدر عليه.
ليش ما حجيتي من هددج بالزواج.
حتى لو حچيت تتوقع راح ينحل شي؟ لا طبعاً كلشي راح يتعقد.
و يمكن يطبق كل كلامه ممكن يأذي أحد بيكم اضحي بنفسي و لا أحد بيكم يتأذه.
انتَ ما تدري بشعوري بذاك اليوم إلى من عرفت بي هوَ نفسه إلى صوب
حنين صرخت تعذبت غلطت بس ما ارتاحيت بكل يوم جنت اموت عنده موقف
أصعب من موقف صرت مثل بلاع الموس لا يگدر يحجي و لا يگدر يبلعه عشت بحرب وياه.
مسحت وجهي أختنگت رفعت شعري لزمني ابوية يهدأ بوضعي نزلت دموعي مداگدر انسى شي.
سلطان: كافي سدي الموضوع عوفي غير مرة جاي تتأذين من تتذكرين.
رفعع براسي اله عيوني غوشن بسبب دموعي.
غياهب: أتذكره؟ ليش اني نسيت الحرب إلى عشتها تنام و تگعد ويايَّ الذكريات.
سلطان: تعاي الحضني من انعل ابو سالم لابو حتى ابوي إلى دمرونا.
حضني يمسد على شعري بينما شهگاتي تشگ بصدري.
و عيونج الغالية عندي يا غياهب انا ما ألومه على اي شي سوا عتبي وياه.
عليج عتبي على السوا بيج و السوا بحنين هذا الحارگ روحي و خلاني أكرهه الا أنتن خط أحمر عندي.
ما نطيت جواب الكلامه لان ما عندي جواب يبررله أفعاله الغلط سواء
قبلنا او لا هاي الحقيقة ما تنكر. أستمريت احچيله عن كلشي عشته الى ان وصلت الموضوع معرفتنا بالطفولة.
سلطان: كتمتي مشاعرج الشخص ما تعرفينه؟
غياهب: للأسف حتى ما اتذكر شي منه هواية غير صوته ما ادري حب فعلاً.
او هوَ مجرد تعلق بس وصلت مرحلة حتى بصلاتي أدعي ألتقي بهذا الشخص
و من طلع ارسلان شچانت مشاعرج.
هنا الأصعب عشت تناقض و رجعت اعيش بحرب مابين عقلي و گلبي أنصدمت بابا أنصدمت طلع نفسه إلى كارهته.
يعني أرسلان يعرفج من الطفولة انتِ نفسج.
لا بعد ما اتزوجنا عرف بهذا الشي بس هوَ جان مراقبني من ايام الجامعة.
لاعبها صح
ما أيسوي شي الا متأكد من ربحه
و مجيد؟
رجفت اطرافي مجرد ذكر اسمه هالشي صعب عليَّ من أذكره أكره الحياة و إلى بيها عصرت عيوني بإطراف أصابعي.
نگدر ما نحجي بالموضوع
هايهية براحتج بس.
نزلت ايدي اباوعله و عيونه حايرة باللي يريد يحجي بي.
بس شنو بابا؟
أتمنى تاخذين جلسات تساعدج تتخلصين من ثغرات الماضي ما تنسين شي منتهين
من هالنقطة بابا، بس الجلسات راح تساعدج ترتاحين و تتخطين بعض الامور و انا وياج خطوة بخطوة.
مو سويناها قبل و فشلت بيها ما گدرت احجي شي.
مو يگولون الحياة تجارب نجرب مابيها شي.
انتَ حالياً خليتني تحت تفكير بموضوعين السفر و الجلسات.
حضن وجهي مقبل راسي يذب بحسرات.
كلشي علمودج ما اريدج تبقين هية هاي جاي تدمرين بروحج و ما حاسة. بس اكو شي غريب
شنو؟
ارسلان حرگ كلشي تابع الخوالج و عمامج و مجيد الخسيس مات حرگ مال المعمل تتوقعين ارسلان اله ايد بموته؟
رفعت راسي اباوع بنظرات كلها تركيز بالموضوع.
يعني تتوقع هوَ وره هالشي؟
عنده علم بالسوا وياج مجيد؟
اي من چنا بذاك البيت انهاريت بدون وعي حجيتله بس هوَ مارجع فتح الموضوع و لا ذكر شي عنه الو ان انفصلنا
تگدرين تتذكرين بيا تاريخ؟
عصرت مخي اتذكر هوَ من جنت هناك وين أعرف التواريخ لا عندي جهاز لا شي هزيت براسي.
لا ما أتذكر
ارتاحي انتِ و فكري بالحچيناه براحتج
ان شاء الله.
غرام.
مر أسبوع طلعوا ارسلان من المستشفى و عمر يشتغل بأوراق السفر
لان گاله يستمر بيهن و ممنوع يتأجل السفر لازم يسافرون و هوَ عمر خطية.
من يطلع يضل باله على ناز يخاف تجيها الحالة و تأذي احد، يخابر أنسام
تجي يمها تتعامل وياها بحنية ما تعوفها و لا دقيقة و هسه من ارسلان
رجع تبقى گاعدة عنده و بعد ما رجعت أذت أحد.
اخذت الاكل الارسلان الغرفته دخلت شفتها گاعدة بصفه ويا دخولي
سمعتها تگله أريده بس ما فهمت شنو إلى اتريده بالضبط رفع راسه
ارسلان شافني يحجي بتعب و گوا لان أصاباته خطرات جانن على گولت.
مليكة طلع من الموت للمرة الثانية نذرت سفرة لأم البنين عليها السلام بس ارسلان يتشافى و يصير بخير
أبتسمت بوجهم انطيته الاكل ردت اطلع صاح ورايَّ بصوته التعبان.
ارسلان: ام سراج.
درت وجهي عليه.
غرام: ها خوية محتاج شي
جيبيلنا سراج.
باوعت النار مبتسمة مثل طبيعتها و تباوعلي.
سراج؟
اي جيبي لا تخافين انا هنا
تمام.
طلعت الغرفتي خايفة خاف اتشوفه بحضنه و تجيها حالتها بس الدكتورة.
گالت وضعها مو بسبب غيره شلت ابني وطلعت الهم دخلت عدل گعدته ارسلان وجهه كله أنعفس من الالم طبك حواجبه.
ارسلان: انطينياه.
غرام: اذا تحب يبقى عندي و اتشوفه
لا تخافين علوية انا يمها
لا تفهمني غلط بس اني خايفة يصير مثل ذاك اليوم ويتأذه وضعها.
باوعلها و هيَّ تباوعله.
ارسلان: ناز انتِ تحبين سراج؟
بسرعة هزت براسها ب أي رجع يباوعلي ارسلان مبتسم بخفة.
انطينياه و ابقي هنا علمود ترتاحين.
تقدمن اله حطيته بين ايديه وگفت قريبة عليهم خايفة عليها و خايفة على ابني اباوع عليها لزمت ايده الصغيرة و تتبسم.
ناز: هذا حَلو.
ارسلان: يشگ شگ عليَّ غير.
هيَّ هم هزت راسها ضحكت نوب ابني شجابة على ارسلان عاد هوَ گال.
منين عليَّ هذا عيونه خضر و انا عيوني تختلف.
حطه بحضني.
بقى ارسلان حاير و متردد بطلبها رحت عليهم.
غرام: عادي خلي.
ارسلان: بس لا تخلينها على الچرباية نزلوا جوا.
اخذت سراج منه و هوَ فهمها نزلت ويايَّ گعدت بالگاع حطيته بحضنها
و هيَّ فرحانة بقيت مندمجة وياها الا لمن ارسلان بدأ يسئل.
ارسلان: اخر مرة قبل لا تجيها حالتها ناز عند منو چانت؟
غرام: چانت أنسام تأخذها عندها للبيت
أهاا.
بقى ساكت و عيونه بالصينية مال الاكل إلى گدامه و تحسه يفكر بشي رفع راسه گال.
بلا زحمة عليج انطيني جهازي يمج على الميز.
اخذت الجهاز سلمته اله گعدت يم ناز و عين عليه و عين عليها حتى اكل ما اكل.
ايده على صدره من يتحرك فتح الجهاز و مبين بدأ يراسل من خلال حركة أيده
لان بس يكتب جانت ملامحه عادية بس مر وقت تغيرت و برز دمار بجبينه
وجهه كله أحتقن من العصبية ذب الجهاز و يباوع الناز صدمني من گال.
ارسلان: ناززز ممنوع بعد تطلع من البيت الا ويايَّ
غرام: بس ليش؟
رجع بنظراته اتجاه ناز فهمت ما يريد يحجي شي گدامها سكت مرت ساعة
و سراج بحضنها تلعب وياه و تطبع بوسات بهدوء على خده بين ما نام اخذته.
منها طلعت منهم صار گدامي عمر بايده اوراق واضحة تخص السفر.
عمر: ارسلان گاعد؟
غرام: اي و عنده ناز هم.
دخل الهم و اني نومت سراج بمكانه ابوه بشغله و ايدي الحمدلله احسن
من قبل طلعت للحديقة گعدت جهازي بايدي اتصلت على سوزان سولفنا شوية
وسديته ردت ادخل للبيت جوا و أندگ الباب مال بيتنا رحت فتحته جانت انسام اباوعلها العيون حمر و مبين باچية.
غرام: انسام شبيج.
أردفت مختنگة بدموعها.
انسام: ارسلان وين.
بغرفته.
دخلت بدون ما تحجي شصاير ليش البنيه هيج وضعها؟ دخلت وراها
اتوجهت الغرفة ارسلان دخلت اباوعلهم عمر مستغرب من حالتها و ارسلان يخزر بيها شافني صاح.
ارسلان: اخذي ناز الغرفتها لو يم مليكة.
اخذتها عفتها يم مليكة و اسمع صوت انسام تحجي و تبجي الباب جان مفتوح و اصواتهم طالعة.
انسام: بيمن أحلفلك موووو قصدي أذكررها
ارسلان: انا شمحذركم؟ شگد وصيت الماضي المهجوووم لااا تفتحوا گدامها هيَّ مو بعقل سليم و تذكرونهاا.
ارسلان والله نيتي مو أذيها بس گلت يمكن تعودت وراح تاخذ الموضوع طبيعي.
عاط بيها ارسلان و گوا يحجي منتهي.
ياااا طبيعي انتِ ما تشوفين العلاج إلى جاي نعالجهاا بي.
عمر: شبيكم فهموني؟ ارسلان ليش هيج تحجي ويا انسام؟
جاوبه و جبينه اتعرق لزم صدره بتعب.
اختك حاجية عن اهلك گدامها من رايحة الها البيتها و ما مكتفية بهالشي جاية هنا و هن حاجية بالموضوع.
فتح عيونه عمر يباوع الانسام.
عمر: يعني انتِ السبب وره حالتها؟
بچت انسام بصوت كسرت خاطري و هيَّ تحاول تبرللهم.
انسام: گتلكم والله موووووو قصدي مووووو بس أختكم اختي هم و أخااااف عليهااا ليش متفهموني ليش عبالكم اريد أذيهاا.
سكتوا طلع عمر مت الغرفة حاضنها و انسام گطعت روحها بالبجي
گعد وياها بالصالة يفهمها عن حالة ناز و يشرحلها و فهمها إلى سوته غلط
لان ما يگدرون هسه يفتحون شي من الماضي گدام ناز حالتها ما تسمح
لليل رجع كُميل و ارسلان سولفله كلشي و جان رده اله.
كُميل: ميخالف غلطة صارت بعد.
حاول يهدي الوضع بينهم و هيَّ خطية رجعت البيتها و تلوم بروحها و تكرر
مو بقصدها و حزت بخاطرها لان ارسلان اول مرة يعلي صوته عليها و هوَ نفس الحالة انقهر من الموقف.
طلع عمر لارم ارسلان يمشي بي بهدوء ويصنف عليه.
عمر: خاااب شنييي شثگلك.
ارسلان: دمشيني وانجب رجال انتَ.
گعد و هوَ أيده على صدره حتى النفس صعب عليه صار باوع بالوجوه الگاعدة اني و مليكة و كُميل و عمر.
ارسلان: چا وين ناز؟
مليكة: تعشت و نامت يمة.
غمض عيونه مرجع راسه لوره كُميل يباوعله والله يموت عليه شصار بحالة
من أرسلان بالمستشفى رجع ارسلان فاتح عيونه يسئل ب عمر.
شگد باقي على سفركم
عمر: يومين
مليكة: انسام تروح وياكم تخلي فروخهه يمنا
عمر: اي مليكة شدوا روسكم يگرعان.
الي يسمعكم يگول چنتوا صوت ما ينسمعلكم بصغركم
انا هادئ من يوم يومي
غرام: ههههههه والله جهالها حبابين من تاخذهم بالسياسة
وين چنهم قرودة بس يكمزون.
كلنا نسولف و ارسلان ساكت بس يباوع بعيونه و مبتسم، طلع كُميل حلقة.
كُميل: هاك خالي هاي الحلقة گالولي أرجعها الك.
تمركزت عيون ارسلان عليها الدقائق صافن بيها گام خاله حطها بأيده.
ارسلان: ليش انتَ وين شفتها؟
اجت هيَّ و أبوها للمستشفى.
سئله بأهتمام.
هم دخلت إلى شافتني؟
دنك كُميل راسه يتصفح بجهازه و رجع غيم الحزن ملامح ارسلان بجوابه.
لا ما أهتمت بس من اجوا هيَّ و أبوها سئلوا عايش ميت وراحوا.
بس هيَّ جانت ويايَّ بيوم الحادث
چا و اذا؟
قبض على الحلقة داخل أيده و وجها دخن بحزنه.
ارسلان: عمر رجعني للغرفة.
نهض عمر من مكانه ساعده دخله الغرفته ورجع الخاله.
عمر: خالي ليش جذبت عليه؟ ما شفته شلون أنقهر
كُميل: اذا احجيله حالتها و شصار بالمستشفى راح يلزگ بيها و أبوها
ما يريده عمر ما يريده يتقرب البنته راح تصير مشاكل خلي يعتق البنيه
من عنده هيَّ حتى ما قبلت اتشوفه من رجع لوعيه.
بس أنقهر أخوي شفته شلون تغير؟
يكبر و ينسى.
و لا واحد بينا گدر يصلح غلطه و يرجع إلى يحبها
كل انسان يتحمل نتائج أفعاله.
هز بأيده كُميل يضحك مستهزأ.
كُميل: گال أنتقام گال و هم طاحوا على وجوهم العارات.
قلب عيونه عمر ما عاجبه الكلام.
عمر: شبيك خالي تضحك علينا لو على جروحنا
لا عليكم.
اشرلي بايده عمر على خاله.
علوية سكتي رجلج
غرام: شعلية انتَ و خالك.
رجع يأشر المليكة.
عمر: صيحي على ابنج.
مليكة: و يطبكم حريشي انتَ و أخوك هذا إلى ما ياخذ الحجي بعددد
روحي خلنكم تبچون وتعضون اصابعكم ندك گوويات بعد عيني هيَّ هاي النسوان
رحم الله والديج ردتج عون صرتيلي فرعون.
گام من مكانه گعد قريب من خاله يشاور بي و عمر غاص بالضحك كُميل يخزر بي رجع يباوعلي.
عمر: أم سراج العلم.
أبتسمت لو ادري بالضامة إلى الا أطم روحي.
غرام: ها خوية
چا خالي ما سولفلج شسويتي بالتخدير.
سد حلگه كُميل وذاك ميت ضحك و اني مثل الاطرش بالزفة.
غرام: ياا خنگته عوووفه يحجي.
كُميل: اذا حچى شهر ما تطلعين من باب الغرفة
اي عوفة خلي يحجي
متاكدة؟
أي شبيك.
بعد ايده عن عمر و هذا مستمر يضحك و كبر لفني اني مبتسمة وياه.
عمر: لا ما احجي خلي خالي يحجيلج
لا حباب احجي شكو
لا لا خلي يحجي خالي انا مل احجي.
طلع من يمنا بقينا اني وياه وأمه گعدت بصفه.
غرام: أحچيلي شنو راد عمر
كُميل: راد يحجي چفصاتج من سويتي العملية.
غرام: لا بلة اني اصلا ما اچفص حتى لو بالتخدير
لا ابداً سودة عليَّ وين أكو منج ما چفصتي و لا طشرتي العرض
دحچي
انا مو گايلج اسم كمولة بس بالغرفة تحجينه
اي
بالعملية چفصتي
يااا هيَّ هاي؟ اذا بس هيج عادي و اذا عرفوا اگلك كموله.
لا يروحي خلي أكملج
كمل
فضحتي ارسلان ماخذ رقم غياهب منج.
عزززززا
و الزهرة بس هاي هم زينة مقارنة بچفصتج الاخيرة
صخام الصخمني شچفصا بالاخير؟
باوع الامه الگاعدة تضحك ورجع يباوعلي همس بأذني.
أجت امي تسلم عليج جان تگليلها خالة ابنج ليش يريد البسله احمر و عمر و ارسلان واگفين.
اتجحظت عيوني و جسمي أتشنج من الصدمة بلعت ريگ أباوعله و هوَ يضمضم بضحكته.
تجذب عليَّ اني ما احجي هيج
و الزهرة ما مجذب و هاي امي اسئليها.
نزلت دموعي من الفشلة الله يطيح حظج غرام على هيج چفصة لو حاچيه على ارسلان و لا هاي الچفصة.
كُميل: هسه ليش البجي غير ماتدرين بروحج
شگددد عيب من الولد.
عيناي ارسلان ما يهتم لهيج شغلات بس عمر واحد عار مالج علاقة بي أشگ حلگه بس يحجي شي وياج.
رجع عمر دخل غمز الخالة و هوَ يگله.
عمر: هاا كموله
كُميل: مووو اگوملك هسه
يمنا شكل ويم غيرنا شكل صدگ لو گالوا إلى أستحوا ماتوا.
نزلت دموعي
أكثر متفشلة مبرطمة ركض وراه كُميل وذاك طفر الغرفته و اسمع بس صياحهم باوعت المليكة ابچي.
غرام: خالة انتِ الا تسلمين عليَّ و اني بالبنج ما صبرتي شوية.
مليكة: خفة لهل الوجه مالج غرض بعمير.
طلع كُميل بأيده حزام دخل كلمن الغرفته نمت بمكاني و اني افكر بالموضوع هسه شيگولون عليَّ باوعتله خازرته.
غرام: كله من ورررراك.
كُميل: چااا انا شلي علاقة غير انتِ چفصتي
غيررررر انتَ گلتلي أحبببب الاحمررررر عليج
بس ما گتلج أفضحينا عيناي.
زفرت نفس بعصبية درت وجهي عليه منطيته ظهري.
عود صدگ ضجتي
اي ورسول الله موقف يفشل
گتلته الج بالحزام
وو ليش تضربه قابل حچى شي من عنده.
شوف شوف شلون استغفرالله تحچينا گوا
كلله بسبببك.
خوش گومي ألبسيلي أحمر.
درت وجهي بسرعة اله خازرته.
ماااا البسسسس بعددد
خوش لا تلبسين خلي أتزوج وتلبسلي أحمر
رووووح لأم السحورررة حبك الأووولي
اخخ اخخ الحب الأولي.
أحس بروحي أحترگت من الغيرة الحرارة صارت تطلع من اذني.
بعدك ما ناسيها؟
منو؟
جيلان
غير الحب الاولي شلون انساه
طلگني
خوش باجر الصبح نروح نتطلگ
بكل سهولة؟
غير انتِ تريدين تتطلگين.
دفعته من صدره مختنگة بعبرتي لزم وجهي يضحك ما يخليني أديره يبوس بي خربان ضحك و اني دمي محترررگ.
كُميل: اخ منج بكلشي تصدگين
غرام: روحلهااا موووو ماناسي حبك الاولي.
تروحلج فدوة وداعت ابنا مو أبالي و طلعت من گلبي من زمان
واضح وانتَ بعدة تذكرها
شوگت ذكرتها ترا انتِ ذكرتيها وردت أضوجج
طلگنييي
خوش
يعنييي تطلگني؟
لا
هستوك گلت خوش
غير اخذج على گد عقلج.
حقيرررر.
فتح عيونه على كلمتي و اني انلصمت صارت عندي لحظة أدراك شچفصت.
اسفة اسفة والله طلعت مني بدون تفكير
اول مرة تحجين هيج
لان أحترگ گلبي و گاعد تستفز بيَّ
لا تعيديها غرام خلي علاقتنا مبنية على الاحترام.
هزيت براسي درت وجهي عاضة شفتي متفشلة اول مرة يطلع مني هيج كلام
بس ورسول الله مو قصدي لان احنا علاقتنا أنبنت على الاحترام أختنگت بغصتي سحبني الحضنه ضامه وجهي بصدرع.
ليش تبچين علويتي
مو قصدي أتجاوز بالكلام.
عادي كلنا يطلع كلام منا بدون قصد
اسفة
لا ما أرضى بالاعتذار انا.
رفعت راسي اله مد ايده يبعد بالشعر إلى على وجهي.
لعد شتريد؟
نزل اصبعه على شفايفي.
بوسيني بهل الترفات.
رجعت ضميت وجهي.
لا تستغل الوضع الك ترا اني الزعلانة
و عليمن زعلانة يحظي
ما ادري المهم اني زعلانة و لازم تراضيني.
چا گولي بوسني انتِ ليش مستحية لو عيارة زايدة.
لااااا ورسول الله ما اقصد هيج ليشش تفكيرررك منحرررف.
گرصني برجلي.
و هوَ إلى يشوفج شيصير تفكيره تفكير ابو عمامه
أوووووف يااا ربي
غرام تدرين بروحج من تصيرين عصبية وجهج يصير عبالك طماطة ممرودة
تتنمررر؟
لا أمدح بيج.
شووو وخر وخررر هسه اني شمخليني يمك اروح يم مليكة أحسلي.
شدني الحضنه أقوا يباوع بعيوني.
ما متفقين هيج وتعوفيني انام وحدي
لعدد خليك عاقل
خوش خوش بس نامي ما اريد شي منج
عفية خالي
انجبي رجلج انا
ما يصير اگلك خالي مو
اي
يله بعد ما اگلك.
بچى سراج برطمت اريد ابجي وياه الليل كله يخليني سهرانة نزلت اله شلته
بس يبجي ما ادري شبيه ما يسكت گعدت ابجي وياه نزل كُميل اخذه مني
يريد يسكته ما يسكت تخبللت شبيه اندگ باب الغرفة سحبت بشت لبسته فوگ
الي لابسته ولبست حجابي فتحت الباب اتفاجئت بي هذا ارسلان وگوا واگف.
ارسلان: شبيه سراج؟
مسحت دموعي و اني اجاوبه.
غرام: ما ادري بس يبجي حتى مو جوعان
انطينياه
يبچي راح يتعبك
ميخالف جيبي.
انطاهياه كُميل اخذه بحضنه وهوَ يبجي يمشي على كيفه ما قبل كُميل
يساعده يسولف ويا سراج بهمس بقينا اني و خاله نباوعلهم الدقائق أختفى صوت بچي سراج باوعتله.
غرام: شو سكت؟
ضحك كُميل و يطك أصبعتين.
كُميل: هايهية أنعرف مستقبل ابنج
يعني شنو؟
دتعاي ننام دام سكت عند ارسلان لا تخافين عليه يعرف شلون يتعامل وياه.
رجعنا نمنا و سراج بعد ما سمعتله صوت صرت اشوف يوم بعد يوم تعلق.
ارسلان بي و ابني اذا احد اخذه يفضحنا بالبجي بس عند ارسلان
يسكت مسنح ضحكت بصمت من فهمت مقصد كُميل يقصد مستقبلاً يطلع ارسلان.
كملوا ذني اليومين كلشي بخصوص السفر و اجه اليوم إلى يسافرون
بي جهال انسام بقوا يمنا لان ابوهم مرتبط بدوام و ما يگدر عليهم خصوصاً
هم حركين عاد هنا نگدرلهم و هم يخافون من ارسلان و علاقتها بعيالها
مو شي من اليوم إلى حماها مد ايده عليها، جهزت كل شغلات ناز من ملابس.
و احتياجات و انسام رجعت مشترية كم شغلة بس المشكلة جانت شلون نقنع ناز تروح بدون ارسلان و مثل ما توقعت.
كلنا واگفين يرد خالهم يوصلهم للمطار و هيَّ خاتلة بظهر ارسلان ما تقبل تروح وياهم گعد يسولف وياها يقنع بيها.
ارسلان: راح نتزاعل انا و وياج عمر وياج و انسام بس أطيب أجيج.
هزت راسها برفض.
باوعيلي بابا.
رفعت راسها و عيونها مدمعة.
راح ياخذج عمر المكان حَلو و بي العال و أطفال انتِ مو تحبينهم
ناز: أي.
أي چا لازم تروحين وياهم و اني بس اصير زين اجي.
رفع راسه ال عمر.
عمر راح تاخذها مو
عمر: اكيدد و أشتريلها إلى تريده
أكو لعابات مثل شعرج و عيونج يشتريلج ها شگلتي بابا.
هزت براسها ودموعها تتسابق حضنها ارسلان لمعت دموعه بعيونه و وجه كلامه الخاله.
ارسلان: وصلهم خالي لا يتأخرون.
اخذها عمر منه و هيَّ تبچي عجيب تعلقها بي گوا طلعوها بعد ما ودعناهم
متت قهر عليها و هيَّ تباوعله ما اتحمل ارسلان دار وجهه عنها مايريد.
يضعف گدامها موقف چان للأسف ما يحمل غير مشاعر حزن و خوف للأخوة.
حنين.
رجعت من دوامي والله مدير المستشفى صاير غثة بشكل خصوصاً دوامي
تغير عن قبل غيرت ملابسي باوعت للغرفة نظيفة و مرتبة درغام يشبه غياهب
بالنظافة و الترتيب و التدقيق بابسط شي عكسي اني فوضوية مرات اگله
انتَ و أختي بيكم مرض اسمه نظافة اخذت ملابسي الوسخة حطتهن
بالغسالة وگفت لازمة جهازي اراسل بغياهب و حجتلي عن موضوع السفر.
ما اريدها تسافر بس مو من حقي أمنعها و هيَّ تگول اريد أسافر و ارتاح تعبت اجه درغام بصفي ابتسم بوجهي باسني بخدي.
درغام: شتسوين؟
حنين: اغسل ملابسي
جان نمتي و ارتاحيتي و من تگعدين تغسلينهن
لا زينة مو كلش تعبانة
ابوج جابلج علاكة.
ههههههه شنو جايبلي بيها
حلويات و شغلات تحبينها يگول ذني البنتي گتله قصدك لمرتي طگني بخزرة
لا تضوج أبوية
ويامن تحجين
ويا غياهب تريد تسافر
مو بطلت و عمي گالها ماكو سفر؟
رجع گايللها سافري و ارتاحي اان ديشوف رضعها ديتقدم بالتعب
يابه انا سالفة السفر و لا رايدها و لا مقتنع بيها مارايدها هناك وحدها
أختيارها هذا مو من حقنا ندخل
أدري أبوية بس مو مال تستقر هناك خليها تروح سياحة
ما تستقر بس تروح فترة هناك
اذا هيج خليها تسافر ترتاح.
درت وجهي أرجع أعيد الغسالة بدون وعي و بكل ثول گلت وچفصت.
اي يمعود خليها ترتاح ارسلان حتى بيت اخذ گبال بيتنا و ما.
عضيت شفتي بقوا على چفصتي و هوَ أختفى صوته اريد اطم روحي
علي چفصتي درت وجهي ملامحه متغيرة طابك حواجبه بأستغراب.
شحچيتي عيدي
هيج هيج أنسى.
خزرني بعيونه.
أحجي.
سبيت روحي شحچاني يلامون من يگلولي چفوصي
شبيك درغام گتلك هيج
من شوگت ارسلان اخذ بيت گبال بيت أهلج؟
من قبل زواجنا
وضميتوا عليَّ؟
اني شكو بابا گال هوَ يتفاهم وياك بعدين احنا شعلينا الرجال اخذ بيت ما گعد بنص بيتنا
و علساااس مااا اخذه علمود غياااهب.
لا طبعاً علمودها قابل علمود منو.
بقى ينافخ بعصبية.
حنين: درغام احنا ما خصنا بيهم صرت تلومني قبل من احجي عن ارسلان
بس هسه اگلك مالنا علاقة بيهم اختي مو صغيرة انسانة واعية و ابوية وياها حُرة بحياتها
يعني شنو تريدهااا ترررجعله؟
والله عاد حياتها هاي إلى تريده هيَّ بالنهاية ما تمشي بكيف أحد.
طع من يمي ضايج و بركان صاير. صح غياهب بمثابة اخته ويعزها.
بس مو من حقنا نمشيها على هوانا و هيَّ تريد تسافر و ترتاح شيصير
بيها لو ضغطنا عليها أكثر، جففت الملابس بعد ما انغسلن وشريتهن
گعدت يم خالي و خالتي درغام طالع باوعلي خالي.
جابر: شبيه رجلج
حنين: زلة لسان و چفصت گدامه عن بيت ارسلان
احنا هم بينا غلط ما حچيناله اني من فترة سولفلي ابوج
هوَ بابا گال اني احجي وياه و أفهمه بس يمكن نسى
من يرجع انا افهمه و احجي وياه
لليل كلش رجع گالب خلقته رحت عليه.
حنين: أحطلك عشه درغام
درغام: لا ما اشتهي.
دخل للغرفة دخلت وراه سديت الباب لزمت ايده موقفته.
درغام
اسمعج
حَبيبي احنا مو من حقنا ندخل بارسلان.
أدري بس مو ياخذ بيت گدام بيت أهلج و كلنا ندري غايته
ابوية موجود و هيَّ عقلها يتحكم بيها لو تمشي وره گلبها چان ما عافته بذاك اليوم و أطلگت منه
أنشوف
ابو جلطة ت ا ما متعشية اني
ليش ما تعشيتي
عشتوا عود منتظرة زوجي تالي يگلي ما أشتهي.
ابتسم گرص خدودي خرب ايده والله خشنة.
حطي اكل ناكل سوا
مو گلت ما تشتهي؟
علمودج غير
لو هيج الزلم لو ما تنراد.
رجع سحب خدودي يعض بيهن.
شلون بيَّ بلسانج هم يچفص و هم ينگط عسل.
اوووويي درغام شلعت خدودي.
يله ناكل لازم اجهز أغراضي باجر رايح للدوام.
خفت ضحكتي و أختنگت.
شو اجازتك خلصت بسرعة
شغل.
حضنته ما اريده يروح تعودت عليه.
حباب ابقى بعد تعودت عليك والله
احم. تعودتي عليَّ لو على تحرشاتي.
ضربته و هوَ يضحك
شگدددد مااا تستحي والله اخابررر ابووووية عليك.
ابوج بس يسمع اسمس يحمة مو نوب تگليله شسوي
عيببب ماما عيب
العيب بالجيب.
يله بدل وتعال و ها خالي گال بس يرجع يريد يحجي وياك
تمام بلائي.
طلعت للمطبخ أحمي الاكل كلشي ماكو بالطبخ مستلمة شغلي بالبيت
تنظيف و اغسل ملابس بالغسالة و اكو ملابس لا اغلسهن بايدي و غسل
مواعين خالتي عليها الطبخ و الخبز مرات تخبز عندها تنور على الغاز.
و مرات يجيبون من المخبز و فدوة ابداً ما محسستني بشي، جهزت الاكل اجه المزنجر گعدنا ناكل اني وياه بالمطبخ.
درغام: شلونه دوامج جاي تعبين
حنين: زين و وين اكو عمل مابي تعب درغام طبعاً للي يأدي عمله بضمير و يشتغل
صح علمود يحلل خبزته
تريد عصير
لا اريد چاي.
حطيت اللگمة بحلگي و أشرتله.
لعد گوم سوي الروحك چاي و اني اريد عصير.
هز بأيده نهض من مكانه يسوي چاي ضحكت على شكله.
حنين: هااا حظرة الضابط كأنو الموضوع ما عاجبك.
درغام: لا عمي عاجبني و عاجب الخلفني إلى كلمة گدامج
زوج صالح براو
ترررررا أغردلج هسه
صبلي وياك عصير فرش حياتي.
صبلي بگلاص حطه گدامي مبتسم.
اتفضلي بنت سلطان
شكراً ابن جابر.
راح صب چاي و رجع گعد نكمل عشانا كملنا اكل راح الخالي وگفت اغسل
المواعين الاكلنا بيهن نشفت ايديَّ من كملت طلعت يمهم للصالة گعدت بصف
خالتي جوهرة و خالي يحجي وياه و يفهمه بخصوص موضوع ارسلان و مو من حقه يدخل بگعدته ببيته.
درغام: هايهية يابه مثل ما اتريد
جابر: عفية بسبعي.
گعدنا يمهم شوية وطلعت اني احظر أغراضه مال الدوام فتح الباب دخل سحبها مني شافني مطنكرة حضن وجهي.
درغام: حنين اذا تبقين هيج اروح و انا ما مرتاح
حنين: تمام
گعد و گعدني على رجله يرجع بشعري لوره.
اتعودي على هالشي مرات الشغل يجبرنا نبقى اكثر من دوامنا هم.
شلون يعني؟
يعني ابقى ايام زايدة فوگ دوامي.
حضنته رگبته احچي مختنگة.
بس هيج هواية
مجبورين
راح أشتاقلك
مو گدي.
تحبني؟
جر انفي بخفه.
أكو واحد ما يحب روحه
اممم تدري شغلة
شنو
ما توقعت نفسي راح أحبك هالگد
المهم حبيتيني غصباً عليج و اخذتج.
طبعت قبلة بمكان غمازته إلى بخده، رجعت اكمل تجهيز جنطته و هوَ مُجاهد
فتح الصوت وگف بصفي ينطيني باغراضه إلى يحتاجهن ويسولف وياه.
مُجاهد: لك هااا ضلعي تزوجت و نسيتني.
درغام: انچب لا تجذب قبل يومين وياك طالع.
ماااا شبعت منك صوچ مرتك خذتك مني.
ضحكت على سوالفه و هم لا زالوا مستمرين بالكلام.
شوگت تلتحق انتَ
وراك بيومين باجر رايح الارسلان اشوفه.
سكت درغام ما انطى اي جواب من سمع اسم ارسلان.
مجاهد: نعاااا مو احاچيك
درغام: أسمعك يابه
ليش تسكت من أجيب طاري ارسلان
هيج
درغام أنصحك تگعد بينك وبين نفسك و تفكر لا تنسى ارسلان نقذك من نص الموت و مادور مقابل وياك
ما ناسي هذا الشي بس انتَ تعرف شي و انا أعرف شي
الله يهديكم.
غياهب.
مرت فترة و أنطيت موافقتي للسفر الابوية بس جان قراره ما أستقر هناك.
بس اروح اغير من نفسيتي و ابتعد عن الضغوطات، بديت أرتب سفرتي
و بمساعدة ابوية ويايَّ خطوة بخطوة ما عافني رجعنا من أحد الاماكن
خالتي مجهزة الاكل بس تعبانة كلش اترخصت منهم ما اشتهي صعدت
الغرفتي نمت حتى بملابسي مابيَّ حيل أبدل غطيت بالنوم ما ادري شگد
نمت بس فترة طويلة حسب اعتقادي دگ جهازي فتحت خط و عيوني گوا فاتحتهن.
الو
حنين: هاا هلو اگلج وينكم انتم بالبيت
اممم قبل مادري شگد من رجعنا
نايمة
اممم.
خوش اني باجر أجيكم و أتغده عندكم سولي غده دسم
هلا بيج.
سديته منها باوعت للساعة بثلاثة الفجر ادري شنو حلمانة بينا رجعت
غمضت عيوني هم دگ الجهاز هل البنيه ما تبطل سوالفها فتحت خط.
غياهب: استغفرالله شبيجج شبيجج ما تتصلين الا الواحد نايم و تعبان.
رف گلبي ويا نبرة صوته بس مو صوته نفسه لا وين التعب ينحچي بي.
ارسلان: نايمة.
فتحت عيوني حتى النومة طارت گعدت على حيلي.
غياهب: اهلاً ارسلان
شلونج
تمام وانتَ
أريد أشوفج.
أعذرني ما اگدر
محتاجج غياهب.
حچى هالكلمتين مختنگ بيهن.
ما اريد ارجع اكسر ثقة ابوية بسببك أتمنى تتفهم موقفي
ماشي.
طبك الخط بوجهي ما اريد أفكر بشي كافي رجعت انام و جبرت نفسي
علي النوم في سبيل ما أفكر بشي مرت وقت احس بالباب أنفتح اكيد ابوية
مرات يدخل يتأكد مني او ايشوف محتاجة شي بقيت مغمضة عيوني.
تسللت ايد الشعري اسمع سحبة نفس و انفاس قريبة عليَّ ابوية ما عنده هيج تصرفات و حركات جمدت بمكاني من گال.
ارسلان: الفوصة أدري بيج گاعدة.
شديصير معقولة داحلم؟ گعدت باعدته عني شغلت التيبلام توسعت
عيوني من شفته گاعد بصفي طفرت من مكاني مرعوبة شدخله للبيت وشوصله لهنا الداخل الغرفتي.
غياهب: ارسلان ووولك شتسوووي هنااا؟
ارسلان: مريض و أجيتج و انا أسحب بروحي شتريدين أكثر؟ واحد صدره مفتوح و جايج برجليه.
لا انتَ تخبلت رسمياً والله شلون دخلت للبيت.
رفع المفاتيح إلى بايده اشرلي عليهن و التعب متجمع بصوته من يحجي.
اممم من جنت نسيب ابوج نسخت المفاتيح بدون ما احد يدري هوَ ادري غلط بدون ما تنطيني محاضره بس شنسوي الوگت جبرني لان يدري ببنته فوصة
لعد قبل الزواج شلون جنت تدخل للبيت؟
اممم لا ذيج حيل و شغل خاص
انتَ شترريد بهل الليل تدري ابوية اذا يلكفك هنا يطلعك جنازة منا.
أشرلي بصفه.
تعاي اگعدي أريد أسولف وياج
ما
تعاي يا غياهب والله تعبان و گوا النفس جاي أسحبه
انتَ أهلك يدرون بيك طالع؟ شلون سمحولك تطلع بهيج حالة.
لا ما يدرون بطلعتي لو يدري خالي يكسر رجليَّ
ياريت فد يوم يكسرهن ونخلص
ما تخلصين مني اجيج زحف.
هف
تعاي اگعدي.
سحبت الكرسي إلى بغرفتي قبل لا اگعد قفلت الباب لا أحد يدخل ولو هم محد
يدخل الا يدگ الباب بس للاحتياط شغلت الضوء گعدت اكابر بعدم
أهتمامي، الشاش إلى ملفوف بي صدره طالع قليل من قميصه.
غياهب: الدكتور گال دخلت بغيبوبة شو ما طولت ورجعت عبالي ارتاح منك هل الفترة.
قلص عيونه يباوعلي بشك.
وانتِ شمدريج بكل هذا.
رجعت خصلات شعري لوره.
خالك سولفلنا.
أهاا هوَ خالي هم گال أجيتي بس مرة وحدة انتِ و أبوج المراهق
لاااا تحجي على ابوية ارسلان احترم
اسف عمي ابو زوجتي السابقة إلى هيَّ انتِ طليقتي
المطلوب هسه عوفنا من كل هذا الزبدة؟
احبج .
تبسمرت بمكاني و گلبي دگاته ألعب بعداداته يباوعلي بعيون تعبانة.
أرجعيلي غياهب تعبت بدونج
بأحلامك
شنو إلى تريدينه؟ عفت كلشي علمودج وانتِ ما سويتي شي غير عفتيني بنص الطريق.
أغلاطك صعبة و صعب تتسامح
أسوي كلشي و أخليج تسامحيني.
غمضت عيوني تسللت دمعة مني نازلة على خدي صعب أنك تنطق شي عكس إلى بداخلك.
ما أريدك
انا أريدج
دتفتهم شداحجي؟
اي بس ما أصدگ لان جاي تجذبين
ما مجبورة أخليك تصدگ براحتك
الليل شطولة بغيابج
كااافي ارسلان.
نهضت من مكاني ارجف سحبت المفاتيح من ايده اخذتهن.
غياهب: گووم أرجع البيتكم.
وگف لازم مكان اصابته همس بهدوء.
ليش كافي تخافين تضعفين گدامي
و منو حضرتك و أضعف گدامك.
أتقرب بخطوات اتجاهي ابتعدت عنه رافعه ايدي أحذره.
لاااا تتقرب لا تنسى أحنا مطلگين
ما أسوي شي.
دارت عيونه حوال الغرفة اتوقفت انظاره على جنطة سفري المطلعتها
اتقدم الها، مسحت وجهي بتوتر مستحيل أخلي يعرف بيا يوم راح أسافر ادري بي راح يخربه ررفع راسه.
ارسلان: هاي الجنطة مال شنو
غياهب: جنطة بيها شغلاتي.
صفن بوجهي يرمش بعيونه بهدوء.
راح تسافرين؟
ما يخصك
غيااااهب
لاااا تعلي صوتك.
اتقدم عليَّ لزم ايديَّ اسحب بيهن ما يعوفهن تخبل.
ارسلان عووووف ايديَّ شبيك
ترريديننن تسافرررين
يابه ما اسافررر منيلك هالحجي انتَ.
بلع ريگه خبطت عيونه بلونهن.
لا اتكسريني اكثر مما مكسور
شوف ارسلان انتَ هسه تعبان ارجع للبيت.
رجع مرتد لوره دايخ لزمته گعدته سبيت حظي الف مرة على كلشي دامر بي.
أبقى هنا تمام راح اجيبلك مي هسه اجي.
سحبني من ايدي گعدني بصفه.
ما اريد شي غياهب ما اريد شي اريدج انتِ رايدج الج.
وگع بين ايديَّ
بتعب نزلت دموعي و اني اشوف حالته مسحت عيوني سحبت جهازه
و هوَ لازم راسه يهلوس بكلمة لا تعوفيني
طلعت رقم خاله خلي يجي ياخذه مستحيل يگدر يسوق بهيج وضع اتصلت بالثانية يله جاوب.
كُميل: ها أرسلان
غياهب: اني غياهب.
سكت الثواني رد بأستغراب.
غياهب شيسوي يمج جهاز ارسلان
خالي ارسلان يمي.
استغفرالله ياربي شجاابه يمج.
حجيتله مختصر عن وضعه.
اذا ممكن تجي تاخذه لا يگعدون أهلي و اتصير مشكلة.
جاي بس طلعي إلى يم الباب.
سديته منه ورجعتله باوعلي يفرگ بوجهه.
غياهب: راح يجي ياخذك خالك.
هز براسه بقى يباوع بالغرفة عينه على جنطة سفري نهض من مكانه
و مشيته ما متوازنة عبالي راح يروح الها بس خلاني بأستغرابي من فتح كنتوري
بقيت اباوعله ما فاهمة شديسوي اراقب حركاته يگلب بملابسي سحب بلوز اسود سادة
مالتي سد باب الكنتور اتقدم باتجاه الميز ضل يفتح بعطوراتي يشم بيهن.
ويرجعن الا ان استقر على واحد اكثر شي استخدمه ضل يرش على البلوز غرگه تغرگ ورجعه العطر المكانه.
رفع گدام وجهه يشم بي مغمض عيونه دمرني موتني بتصرفاته، همستله بصوتي إلى يرجف.
أنزل ارسلان خالك هسه راح يجي لا يگعد ابوية ما اريد مشاكل تعبت من المشاكل والله
صار عزيزة عيوني.
فتح الباب طلع يمشي و اني وراه اخاف أحد يگعد و هو مو يصحة زينة شلون
گدر يجي وحدة حبست انفاسي بين ما طلع من البيت قبل لا يطلع من الباب.
دار بعيونه ناحيتي ساكت بس يباوع بعيونه بدون ما يحجي طلع مكمل طريقة.
رجعت للبيت صعدت الغرفتي أباوعله من الشباك گعد بسيارته بقيت واگفة
الى ان اجه خاله شفته نزل من سيارته راح عليه نزله من السيارة صعده بسيارته.
و سيارة ارسلان حطها گبال بيته كلش ورجع صعد بسيارته طلعوا من الفرع
مال بيتنا رجعت المكاني شديسوي بنفسه هذا الانسان؟
الثاني يوم اجت حنين النا و عقلي مشوش بالصار البارحة جان يوم جمعة.
و ماباقي شي السفري غير ايام بس واترك كلشي ورايَّ، اجت نيروز گعدنا احنا الثلاثة.
غياهب: شبيج نيروز شو تصفنين
نيروز: ها مابيَّ شي.
حنين: شلون ما بيج شي وانتِ ماخذة صفنات ابو صابر
انچبي
تضوجون من الصدگ.
فهمت سبب وضعها ما اتوقع اكو غير سبب.
غياهب: تفكرين ب عمر؟
نيروز: ما شفته و لا وصلس بعد من اخر مرة طبق وعده
لان شاف منج رفض اكثر من مرة و بكل مرة يشوف قساوتج.
بقت ساكتة تباوعلي بعيون مدمعة.
حنين: تگدرين تنطينا فرصة نيروز، عمر غلطة مو جبير مثل ذولاك الناس
بس هوَ أستغباني
أستغباج و لا ضحك عليج باسم الحب، اخذ منج معلومات عن اهلج ما گالج اني احبج ورايدج وتركج بنص الطريق.
غياهب: اممم كلام حنين بي وجهة نظر و دالاحظ خالي عمران بدأ يستلطف
ارسلان و عائلته و أثبت هالشي من گال ماعندي شي وياهم
نيروز: بس اني ما أعرف اذا هوَ يحبني ما سامعتها منه يمكن متندم على غلطه بس ما يحبني.
كمزت حنين من مكانها وغمتها لطش بگصتها.
حنين: غبية تبقين غبية لو ما يحبج يگلج لا تتزوجين شغليلي هل العقل.
بسسسس ما گااال يحبني أفهمي.
عادي غصباً عليه من تنطينه الاشارة يگولها.
نهضت من مكاني اجيب شي نشربه و هاي نيروز راسها يابس ما تقتنع
بسهولة و حنين گاعدة تشرحلها درت وجهب و أتبسمرت بمكاني جاحظة
عيوني و اني داشوف خالي عمران واگف بباب الصالة الگاعدين بيها.
و حنين ونيروز مستمرات يحجن ما منتبهات و منا نيروز دخلت بقوقعة عذابها.