رواية وتيرة الأعرج للكاتبة حوراء السعيدي الفصل الرابع والأربعون
غياهب.
چانت سيارة عمر داخلة بالحاوية الجبيرة الموجودة قريبة على
بيتنا بحيث الحاوية مخسوفة خسف ركض عليه ارسلان نيروز بصفه
مشيت وره بخطوات سريعة فتحت الباب نزلتها غمضت عيوني
براحة من أثنينهم ما بيهم شي، نزلوا أثنينهم و أرسلان لازم عمر يباوعله بعيون تارسها الخوف.
ارسلان: عمر بيك شي؟ اتأذيت حاچيني.
عمر: مابيَّ شي خوية والله بس ما أدري شصار طلعت گدامنا بزونة عود ردت أروح على الجانب الثاني لا أدعمها.
ما أدري شصار ما سيطرت بعد ما أشوف روحي الا بحاوية الزبالة.
حضنه بخوف مانگ الولد للأسف أنزرع بداخل ارسلان وهواس حالة
الفقد او شخص من إلى يحبهم يتأذه رجع بعيونه النيروز.
ارسلان: وانتِ خوية ان شاء اللع ما بيج شي.
ايدها على گلبها جاوبته.
نيروز: الحمدلله بس أنهبطت والله.
أنفتح باب بيت أهلي طلع منه ابوية اجه يمشي بأتجاهنا صارت عيونه على سيارة عمر.
سلطان: خير شصاير هنا؟
غياهب: حادث بسيط صار ويا عمر و نيروز.
الحمدلله على سلامتكم خو ما بيكم شي بابا؟
عمر: الله يسلمك عمي ماكو شس بسيطة.
صفت سيارة درغام و حنين گدامنا نزلوا منها و هم نفس الحالة حچينالهم إلى صار گال درغام.
درغام: على هاي الهبطة ارسلان انگطع نسله.
باوعله بتك نظره ارسلان.
ارسلان: رحم الله والديك خوش تبشر بخير انتَ.
دارت عيوني على أبوية الواگف رافع حاجبه وايديه وره ظهره يباوعلهم
و حنين تحجي ويا نيروز تطمن عليها بسبب الحادث.
غياهب: بابا اتفضل ويانا.
سلطان: زاد فضلج بس مواعدين صديقة خالتج هيَّ و زوجها نروحلهم وره العشه و هسه راح نروح.
تمام حبيبي.
سلم ورجع للبيت دخلنا كلنا جوا نيروز گعدت بصف عمر تهمس همس
بالكلام بسبب خجلها من الموجودين و هوَ يطمن بيها ماكو شي
دخلت للمطبخ اخذلهم شي يشربوا دخلت ورايَّ حنين بايدها
شي مُغلف أبتسمت و هيَّ تباوع بأرجاء المطبخ.
حنين: بيتكم كلش حلو خوش مأثثي.
غياهب: ذوقنا اني و ارسلان.
كلش حلو والله حتى الالوان هادئة مو هوسة و الاثاث مرتبي بطريقة مرتبة.
شكراً عيني.
مدت ايديها إلى بيها الكيس المُغلف.
جبتلج هدية.
هدية شنو؟
أفتحيها و شوفي.
عفت الكاسات مال المي بالصينية و اخذته افتحه تباوعلي
بحماس من ملامحها گلت أكيد شي يستحق كل هذا الحماس
حتى اني أشتغل فضولي اريد أعرف شنو إلى بداخله فتحتها طبكت
حواجبي شنو هذا ماباين منه بس التور إلى مزينة فتحته.
كله طلعته فتحت عيوني من شفته ثوب نوم فضيحة لا صدگ فضيحة
مو شي زين و لا وسط لا فضيحة ظاهرة حچيت بصوت ناصي خاف يسمعوني و ننفضح.
لِچ حنيننن شنووو هذا؟
شتشوفين ثوب نوم عجبج صح؟
هذا ثوب استغفرالله تحچينا گوا.
لا تبالغين ترا أكثر المتزوجات يلبسن هيج و لا تنسين الليلة أول ليلة الكم ان شاء الله تريدينا ينتظر سنة.
انچبي مالج علاقة بهل السوالف شي خاص بينا اني وياه ايععع.
انچبي انتٍ خوش؟ والله اليوم كله أفتر اريد شي يعجبني گوا لگيته
أخذي الج ما أريده عندي اني مستورات مو مثل هذا الفضيحة
خوب عليمن الواحد يلبسه يبقى بدونه ايععع طاح حظج على هيج سالفة سزز.
ترا والله حلو شبيج.
ايععع ما اريده و بعدين ارسلان ما يدور هالشغلات.
منو ما يدور؟ بابا الزلم تموت على هالسوالف.
بيبي معليج والله ما اخذه و لا احطه على جسمي خلي الج هوَ انتِ ورجلج مهيلكين نفس الطينه.
و منو گلج ما ألبس.
الفاااااسقة.
شمرته بوجهه و اخذت الصينية طلعت الهم من كل عقلها تريدني البسه قدمت إلى بالصينية الهم.
درغام: أدري شنو رحتن تطبخن باچه هيَّ ماية.
ارسلان: أخوات و يجوز چانن يسولفن عن شي رخي سبع الهورة.
گعدت بصف ارسلان اجت حنين وبايدها الكيس باوعلها درغام.
درغام: قلقتيني بهذا بلائي لو اعرف شنو إلى بي بس تفترين بي.
گعدت بصفه حطته بجهه.
حنين: شغلات خاصة حبيبي.
ارسلان: عمر ليش ما جبت ناز وياك.
عمر: مگابلة سراج ناز و ما گتلها.
هز براسه أدري بي يشتاقلها بس يجبر نفسه يتعود على الوضع
الجديد مر وگت و السوالف مُستمرة جبنا ضيافة لان درغام فضحنا.
عمر: ارسلان شتگول لو أنسوي العرس عائلي.
چان منزل راسه يكتب بالجهاز رفعه على كلام عمر.
ارسلان: چا انتَ تريده هيج صرت مثل مرت أخيك روحكم بالعائلية.
مجرد رأي
لا خوية عمران يفشخنا اذا ما أنسوي عرس البنته.
ضحكت نيروز گالها ارسلان.
تريدين عرس خوية چا حقج والله شني غياهب و حنين أحسن منج سوينالهن عرس.
غياهب: عاد شلون عرس صارت مصارعات بينا.
درغام: أكلكم عرس و أتسون غصباً عليكم بنتنا نريدلها عرس يتسولف بي.
ارسلان: عمي نسوي عرس شلوون ما أنسوي.
مسح على وجهه درغام و عيونه بيها حجي بس مثل المحتار شلون يحجي باوع الارسلان موجه كلامه.
اگلك ارسلان
ها خوية
أبريني الذمة
عليمن؟
سالفة طلعت مني و اني ضايج مو بقصدي
هيَّ شني غير نعرفها.
عرفته يقصد من گال مو ابنهم الحقيقي بس ما أريده يحجي گدامه
هسه راح يتأذه منها اني إلى چنت أكرهه و ما أطيقه بس ما اتجرأت
بيوم انطق ويا هيج كلام أشرت الدرغام بعيوني ما يحجي و أتمنى فهمني.
درغام: يخوي حچاية خليها تولي بس أبريني الذمة عليها.
هايهية مبري الذمة سبع الهورة.
أبتسم درغام بأرتياح متشكرة، گالت حنين.
حنين: خلونا نلعب
غياهب: شنلعب؟
لعبة الصراحة.
الكل وافق و گعدنا بالگاع گعدتنا صارت دائرية حنين طلبت ورقة
و قلم تكتب الاسماء احنا هيج نلعبها إلى يطلع اسمه يتوجهله سؤال
جاب الها ارسلان مثل ما طلبت بس هوَ إلى كتب الاسماء ردنا نبلش و أندگ جرس بيتنا.
ارسلان: لو عازمين الجيران بعد بقت عليهم.
غياهب: خاف ابوية
حنين: لِچ أبوية غير راح ويا خالتي الصديقتها
أي صدگ تسيت.
طلع ارسلان يفتح الباب الثواني سمعنا صوت طفل يبجي دخلوا.
الخال و غرام و وياهم ناز و سراج شايلة ارسلان يبوس بي ويسكته
سلموا علينا حضنتني العلوية وجهه صاير دم من گد ما ضامة ضحكتها همستلي.
غرام: عبالي ماكو أحد هنا مكرود يا ارسلان ههههههههههههه.
رديت عليها بنفس الهمس.
غياهب: لا يسمعج علوية و يشتغل السانه علينا.
طفرنا اثنينا على صوته إلى يلعلع.
ارسلان: اتفضلوووووا اتفضلوووا لوووو جايبين مليكة ويااكم و تكمل السبحة.
كُميل: امي راحت الاختها رجعت تخربطت كلنا اكيد يعني مشتاقيلنا و أجيناكم.
ايييي هلاااا بيكم
شو اصيح؟
ياهوووا مصيححح محدد مصيححح.
تونا گعدنا ورجع الباب أندگ صاح ارسلان.
ارسلان: ياااااا صبر أيوب.
محد گدر يلزم نفسه كلها غصت بالضحك گام درغام و هوَ يگول.
درغام: اگعد انا افتح الباب هذا رماد گال وين أنتم گتله يم ارسلان تعال.
چاا ما گتله يجيب الباقين بقت عليهم
ان شاء الله على الجايات.
راح يفتح الباب و اني دحست روحي بصف ارسلان علمود سراج.
غياهب: اووويي حبيبي انطينياه ارسلان شگد حلو.
باوعلي مبتسم.
ارسلان: تحبين الاطفال؟
أكو واحد ميجب هالكائنات اللطيفة.
اممم شنو رأيج نجيب منهم.
و بكل ثول جاوبته.
شلون؟
ما أدري شبيه و شكو صرت ثولة و هوسة أصواتهم ثولتني غمزلي بتلاعب.
بغرفة النوم يصيرون.
أدبسززز انطينياااه.
أهتزت أكتافه يضحك بصمت ضام وجهه بسراج انطانياه و لازگ روحه بيَّ.
غياهب بوسي بحلگه.
باوعتله بطرف عيني.
و ليش يعني تحديداً بهذا المكان.
علمود من يكبر يطلع يشبهني
ارسلان وين الربط بكلامك
والله اكو ربط بس انتِ شو ما فهمتي
اذا طلع مثلك الخال يتبرأ منه
عادي أجيبه يمي
يستهتر الولد اذا ربيته انتَ
شبيه رجال فقير
كلشش.
دخلوا الولد رماد سلم و العلوية گاعدة بعبايتها، كلش تعجبني
بطريقة لبسها و أخلاقها ويا المقابل حتى من تتجاوز عليها ترد
عليك بأخلاقها او تتجاهلك ما شفت منها ضعف و اذا شفت ضعف.
عندها بالبداية فهذا الشي جان حقها إلى عاشته شي صعب رجعت
بنت النفسها شخصية قوية و الاحلى ما غيرت أخلاقها و لا طيبة گلبها و لا اي شي من شخصيتها ماعدا الضغف شطبته وحطت بمكانه قوة.
اتقدم رماد ناحيتنا.
رماد: أنطوني أنطوني هالبزون شوف عيونه ملونه و اشگر هذا من جماعتي.
اخذه مني يعضعض بخدوده و سراج يبجي صاحت بي نيروز.
نيروز: ولك مو هيج
اذا يصير عندي هيج طفل ما يطول اسبوع اكله اكل.
كلنا التفتنا على صوت ناز من گالت.
ناز: شوف الشذب.
هوَ هم دار بجسمه عليها.
رماد: شسمه؟
ناز: شذب
هاي وين عايشة البنيه شنو شذب
عمر: تقصد جذب
هاا خوش.
دار وجهه منك من الشيطان رماد ما تلزگ بوحدة حلوة بس يجوز
لان اخت الولد و هم گاعدين و ناز اكبر منه اكيد ما يتقرب الها.
حنين: موور كلنااا نلعب شنووو نسيتوووا.
درغام: عوفيهاا غير مرة.
لا والله صارلي ساعة مجهزة اسئلة كوومة بعقلي ما والله ما.
ارسلان: لا تزعلين ام روح الحلوة نلعب قابل شعندنا.
رجعنا گعدنا نفس الگعدة و هيَّ ضافت اسم الخال
و غرام و رماد
ناز ما قبلت تلعب اخذت سراج تلعب وياه و گعدت بجهة
بدأت
حنين اول وحدة تسحب بالاوراق طلع الاول رماد.
حنين: اي رماد اسئلك اني
رماد: اسئلي سؤال بي خير مو تافه مثلج.
كفخة درغام من وره على راسه.
درغام: احچي بأدب ويا مرتي
أخو مريتك
أنچب.
حنين تباوعله بشماته و تتغامز بحواجبها.
حنين: ليش تحب الحلوات؟
هز بايده رماد و جاوبها.
رماد: هوَ رب العالمين يحب الجمال احنا ماتريدين نحب الجمال.
لا گول اني زاحف ليش مستحي.
وانتِ شعليجج ليشش محروگ گلبج.
من جمالك ينحرگ گلبي
بهاي حقج بعد اني ابن الروسيا
مصدگ روحك اصلاً الابيض بسرعة يتوسخ.
تحمحم عمر لان هوَ و ارسلان من أصحاب البشرة البيضة بس
مو كلش غير عن رماد لا هم بياض طبيعي.
عمر: يعني قصدج احنا نتوسخ؟
ضحكت حنين خجلانة.
حنين: لا اقصد إلى ابيض مثل رماد.
ضحكوا على فطاريتها و رجعنا نلعب هالمرة اخذ الورقة درغام و كان صاحب النصيب اني.
درغام: هل المرة انا اسئل
غياهب: اتفضل.
تجاوبيني بصراحة غياهب؟
هزيت براسي اي.
لو عمي سلطان ما طالب من ارسلان يطلگج و خيرج تبقين ويا ارسلان لو تختارين نفسج شنو راح يكون قرارج؟
تحولت انظار الكل عليَّ حتى ناز صار تركيزها ويا جوابي ابتسمت.
غياهب: أختار نفسي.
درغام: السبب؟
عزة النفس و الكرامة للأنسان مهمات أهم مَن الحب بذاته.
و الشخص إلى يتقبل الأهانة النفسه أسفي عليه ماكو أحترام النفسه.
تشجعين المرأة تكون قوية؟
أكيد و أحنا النساء بحد ذاتنا قوة بس بينا إلى عواطفه
تتحكم بي و هنا أتشوف جانب غير لازم تكون الامرأة قوية، بعضنا
ينخلق بمجتمع يستصغرها و يكون السبب بضعف الشخصية
المرأة اذا مو نصف المجتمع ف هيَّ المجتمع بأكمله الها حقوق حالها
حال الرجال متساوين ك حقوق بالنهاية نواة المجتمع هيَّ.
شهادتها وثقافتها و وعيها تكسر بيهن قيود الحياة.
كلهم صفقوا بحماس رد الخال.
كُميل: لبوة تعجبيني.
ابتسمت دارت عيوني على ارسلان الساكت مبتسم يباوعلي بنظرات ثابتة رجع گاله الخال.
هم واعية و هم محامية انتَ خوش زلمة تسويلها شي.
أشرله عليَّ.
ارسلان: مثل ما گالت الرجال و النساء متساوون.
غرام: اني وحدة من البنات إلى چانت شخصيتي ضعيفة بسبب المجتمع إلى عشت بي و السبب الثاني أهلي عندهم كلشي عيب و كلشي ممنوع و حرام حتى الاشياء إلى رب العالمين محللها عندهم بيها مشكلة من الصغر أنبنت بداخلي شخصية ضعيفة لأن ماكو إلى يساندك و يقويك يكسرونك بالعادات و التقاليد و قوانينهم.
ارسلان: والله يا علوية خلي إعترفلج بشغلة اول ما اجيتي
عدنا جنت أضوج من شخصيتج الضعيفة مع العلم احب احترامج للكل.
و النفسج بس عيبج جان تسكتين هواي عن حقج بس اگول حقها
عندها سببها بس أثبتي انتِ قوية بأفعالج مو بطولة اللسان بصبرج و ايمانج برب العالمين.
باوعلها الخال بحب و فخر.
كُميل: علويتي تغيرت للأفضل و الأهم بقت نقية و نظيفة مثل ما هيَّ.
رجعنا نكمل باللعبة و هالمرة اسم ارسلان طلع كمزت حنين سحلها
درغام تريد تسئله هيَّ و هذا لازمها لان حامل.
درغام: وللج حنين.
حنين: اني اسئل والله حبابين والله والله بنفسي هذا السؤال.
غياهب: اليوم انتِ و رجلج مستلمتنا.
هسه شنو اسئل؟
ارسلان: اسئلي ام روح الحلوة.
أبتسمت بسعادة و وجهت سؤالها اله.
حنين: شنو شعورك من انتِ و اختي أطلگتوا؟ ادري شوية
سؤال محرج بس انتم و لا احد بيكم عبرنا عن اللي بداخله.
عض شفته السفلية غمض عيونه الثواني ساكت رد عليها.
مثل شعور إلى يدفنله عزيز و يرجع من دفنته راحت و خذت كل حيلي وياها.
فتح عيونه يباوع باتجاهي ألقى مقطع من قصيدة.
و رجوت عيني أن تكف دموعها.
يوم الوداع نشدتها لا تدمعي
أغمضتها كي لا تفيض فأمطرت أيقنت أني لست أملك مدمعي و رأيت حلماً أنني
ودعتهم ف بكيت من ألم الحنين و هم معي.
حنين: الله شگد حلوة الكلمات.
أكتفى بالابتسامة رجعوا يكملون لعب سحبت جهازي بحثت
عن القصيدة بالكلمات نزلتها يمي هوَ راح گعد يم ناز بس حط
سراج بينهم حاجز يمكن يخاف تتقربله بقى يسولف وياها تقريباً لل 11
ونص بالليل اترخصوا و گفلهم ارسلان يم الباب.
ارسلان: هالمرة سويتوها مرة الثانية لا أتسوونهاا.
ضحكوا وصعدوا بسيارتهم رجعنا جوا الصالة مگلوبة گلاب
دخلت انظفها دخل ورايَّ شلت الصينية اخذها مني.
ارسلان: روحي اكلي ما تعشيتي انتِ انا انظفها.
غياهب: ننظفها سوا و ناكل سوا ها؟
الي تريدي.
نظفناها سوا ورتبناها و هوَ يسب بيهم.
ارسلان: خطار خايسين شوف كشور الحب وين ذابيها
خطار غير يا عيني.
ترك كلشي رفع راسه بنظرات أستغراب.
غياهب؟
عيوني
شو انتِ ما تگليلي حبيبي؟
احتاج اتعود على الوضعية وياك
اخخخ غياهب اخخخ
هاا ارسلان هاا
انا رجال رومانسي وانتِ عكسي.
لعد إلى حصرتك بصالة أهلها منو؟
شنو رأيج ترجعين تحصريني هنا بصالتنا.
اتأدب.
شمر المقعد عليَّ يضحك.
بس بهاي فالحة عليَّ.
كملنا و دخلت للمطبخ گدامه أحمي الاكل لان ما رجعنا تعشينا
من أجوا بديت أسولف وياه أحاول اخلي علاقتي تتحسن بي لان
قبل ما چنا على علاقة مُسالمة اكثرها جانت مشاكل وكره و انفر منه هوَ بالصالة يجاوبني.
ارسلان بيا قاعة راح اتسون عرس عمر؟
بكيفهم هوَو مرته يختارون
ماباقي شي غيا اسبوع واحد.
شو أختفى صوته درت وجهي و جمدت بمكاني من شفته لازم
هذا الكيس إلى جابته حنين الله يطيح حظج حنيم شكو مبقيته؟
ارسلان: اگلج هذا مو الحنين يمكم خطية نسته
هاا؟ اي يمكن انطينياه.
اتقدم انطانياه و الواضح ما فاتحة و لا شايف شنو إلى بداخله بس خلي اسئله و اتأكد.
احم. هم فتحته
لا مو إلى شلون أفتحه.
ضيقت عيوني اباوعله.
امممم ارسلان.
و عيونج
تمام صدگتك.
گعدنا ناكل و هوَ يسولف عن تجهيزات عرس عمر يريد يسويله
عرس فخم لان يگول اخوي الوحيد لزمت ايده و اني اكل.
غياهب: شگد تحب أخواتك
ارسلان: ماكو شي يوصف حبي الهم ذولة من ريحة أهلي بقولي.
الله يحفظكم البعض و تفرح بيهم.
و يحفظج إلى عزيزة عيوني.
ارسلان
حيلي
و اني شگد تحبني؟
غياهب الحب اذا نوصفه بكمية فهذا مو حب الحب الحقيقي
من انتَ ما تعرف ليش حاب هذا الشخص وروحك متعلگة بي.
هنا ماراح تگدر توصل الشي يوصل الحبك و وصفه.
شنو اني بالنسبة الك
اشوفج شي مقدس يخصني .
أوف المنحرف شلون يحجي كلام حلو لعد شبيه ما أعرف احجي مثلك.
رفع راسه يضحك جر خدي.
أدخلج دورة يمي و نطبق سوا
لا أريد بس اني اسمع منك
چا انا هم خطية اريد شي منا منا بوسة، حضنه، شمة حظي هم مصخم.
ترا مو حلوة اذا كله غزل اذا ما أدفر و أعيط و أتعارك ما أحس بالطعم
و المكرود ارسلان طايح بيها
الي يريد الحلو يجرع المُر بيبي.
انتِ لو تعوفين كلمة بيبي أصير بخير
تخبل والله فلا عندك ذوق.
باوعلي صفح يهز بايده رجع يكمل اكله بين ماكملنا غسلت
الصحونة إلى اكلنه بيهن و عفته يسوي بكم شغلة بالصالة
صعدت گدامه جهازي بأيدي اجتني رسالة من خالة وجدان أستغربت
مو من عادتها تستخدم الرسائل دخلت الغرفتي گعدت
و أقرأ
رمشت متفاجئة من كلامها و لا توقعت بيوم تطلع هيَّ نفسها.
وجدان: أتمنى تشوفين رسالتي خالاتي حبيبتي حابة أنطيج نصيحة.
أم لبنتها انتِ اليوم بديتي مشوار حياتج من جديد ويا انسان من أختيارج
حارب علمود يرجعج بعد ما ضيعج عاقبتي و اخذ حصته
من العقاب اتمنى تگدرين تسامحينه من كل گلبج و تعوفين الماضي
بظهرج، انا أعتذر لأعترافي بهذا الشي الج بس اريد اگلج انا نفسي
الي جنت اساعد ارسلان وانقله أخبارج.
اجاني بيوم من الايام للمستشفى بروح ميتة منتهي توسل اساعده
و من شفت وضعه شگد يحبج وهاويج قبلت يمكن تضوجين مني.
وتزعلين بس احب اگلج زوجج عاش طفولة ضحية اب وام خطئوا و بعدين
رجع انحرم من ناس ربته بسبب ابوي و عمي إلى رب العالمين راح يحتار
بعذابه بيهم عوضي ماما حبيبتي عوضوا بعضكم و ابدوا بحياة
جديدة بعيدة عن ماضيكم المؤلم لا تسمحين السوا مجيد وياج يأثر عليج
بعلاقتج ويا ارسلان ابديها من الليلة و ادعي ربي يرزقكم الراحة ويسعدكم بحياتكم.
انتهيت من قراءة الرسالة دموعي تنزل بهدوء يعني هيَّ إلى جانت تنقله.
معاناتي و وضعي إلى عشته مسحت دموعي كلامها كله صح بديت بمشوار
جديد بحياتي ما اريد الماضي يأثر على حاضري و مستقبلي
فتحت كنتوري اخذت منه ملابس بس مو نفس إلى جابته حنين
فضيحة طلعت دخلت للحمام بدلت و گلبي نبضاته دتتسارع عبالك خفقان و هاج.
غسلت وجهي وفرشت أسناني رتبت نفسي ما احب المكياج كلش
ف أكتفيت بالمرطب حطيت مكياج شي خفيف و حتى ما بين عبالك محاطة
رشيت معطر جسم خاص عدلت شعري ايدي على گلبي متوترة طلعت.
امشي ورجل أطخ برجل من توتري وصلت يم الباب بلعت ريگ ياربي
ساعدني خليني اخطي هالخطوة بنجاح فتحت الباب چان واگف
ينزع بقميصه من شافني دخلت بقى واگف عيونه اكلتني من فوگ لجوا.
سديت الباب ابين نفسي طبيعية رجعت خصلة من شعري وره اذني مثل عادتي من اتوتر.
غياهب: كملت البلازما
ارسلان: امم اي چان الواير فالت.
ها تمام.
بقيت واگفة بمكاني و عيوني تتلفت بزوايا الغرفة مشكلتي.
الأزلية فاشلة بتعبير مشاعري و هالسوالف غير عن اختي
الي جريئة بهيج شغلات دار ورايَّ حضني.
ارسلان: شبيج؟
غياهب: مابيَّ شي
متوترة
قليل
ما يحتاج تسوين كل هذا انا ما ماخذج علمود إلى ابالج
أدري بهذا الشي
انتظرج شگد ما تريدين لا تتقيدين ويايَّ.
درت عليه و رجلي َّ صرت گوا واگفة عليهن ايديَّ صارت على صدره
رفعت راسي لان هوَ أطول مني اباوع بعيونه إلى دتاكدلي ما أخاف من شي.
بلشنا من جديد ما اريد شي يأثر على علاقتنا.
و هالشي ما راح يأثر إلى يهمني روحج و گلبج.
ذكرت كلامي خالتي كله.
من كل گلبي مسامحتك لأن عذبتك أضعاف من عذابك الي
تمونين
أريد أعترفلك بشي.
قربني اله شدني الحضنه.
گولي يا روح أرسلان.
ابو القراصة
شبيه؟
ما أدري بس اني عشت و كبرت رايده هذا الشخص جنت اضحك
علي نفسي اگول هذا يمكن تعلق او ما ادري بس إلى اعرفه رب العالمين
زرع حبه بداخلي ما اعرف تعلقه بدون ما أعرف السبب.
أوف.
نزل المستواية طبع قبلة بخدي و انفاسه الدافية تضرب بوجهي همس و هوَ يمرر انفه على خدي.
يعني هسه تحبين ابو القراصة ما تحبيني
ههههههههه ترا اثنينكم نفس الشخص.
رفعني من الگاع شايليني بين ايديه و يضحك.
و انا الخبصت روحي بالانتقام و اذبح و اصلخ تالي ما تالي
اول ما شفتج ما ادري شعملتي بيَّ و هم نكرته و تغاضيت عنه
بس ماكو مهرب الفرق بينا انا حبيتج من جنت اراقبج بالجامعة.
رفعت ايديَّ محاوطة رقبته.
شلون لعد گدرت تأذيني؟
من چنت أفكر بأهلي و بالاشياء إلى شفتها احس بروحي
اصير غير شخص و انا لو شفتلي طفل بالشارع روحي تروح عليه اذكر
روحي و معاناتي، من أفقد و إذيج اتأذه وياج، تبچين
و دموعج تحرگتي بس الظروف إلى جمعتنا چانت أقوى.
ليش ما گتلي انتَ إلى حرگت المعمل و بي مجيد.
تغيرت ملامحه و أحتلها الجمود.
شمدريج؟
حچولي كلشي بيوم خطوبة عمر و نيروز.
ما اردت أذكرج او اخليج تفكرين سويت هالشي علمود غاية حتى.
ابوج ما ردته يدري بس خالي إلى حچى لو بقت عليَّ ما احچي البشر.
بس انتَ أثبتت إلى يتقرب للشي المقدس عندك ما اترحمه.
بقى ساكت عيونه بعيوني نزل جبينه الجبيني و هوَ بعده واگف شايلني.
سبحان الزرع حبج بداخلي و خلاني هيج مهوس بيج صرت مريض بيج والله.
ليش تغلس على موضوع مجيد؟
خيولي لا تفتحين موضوعه.
هزيت براسي.
غياهب: ما تعبت شايلني
ارسلان: شتعب هوَ انتِ وينه ثكلج بخف الريشة.
ضحكت حطني بمكاني إلى انام بي بس إلى صار غريب تركني وطلعت شبيه؟
بقيت گاعدة طول و هوَ ما راجع نزلت من سرسري رحت للشباك اباوعله
گاعد ويدخن وحدة تخلص جكارة يشرب الثانية بقيت واگفة اباوعله
اراقبة صارت ب 2 بالليل يلا رجع دخل شافني طبك حواجبه.
ارسلان: ليش ما نايمة؟
غياهب: ارسلان بيك شي؟
لا تعاي ننام
ارسلان؟
رفع عيونه اتجحظت عيوني عيونه دم خفت عليه رحت امشي بخطوات سريعة حضنت وجهه احچي وياه.
شبيك يعيوني ليش هيج حالتك
مجرد تعب غياهب.
ما يحط عيونه بعيوني.
قبل كم ساعة ما جان بيك شي
هز راسه بهدوء عافني واگفة وراح أتمدد بمكانه حط أيده على عيونه شصار؟
ليش هيج تغير وضعه تمددت بصفه بمكاني خايفة عليه اتقربت اله
نمت بصفه على نفس المخدة حضنت ايده وراسي على كتفه.
استاذ ارسلان
امممم
شو أحسك صرت ما تحبني
انچبي
لعد ليش هيج دا تتصرف.
طلعت حسرة من صدره مديت ايدي بعدت ايده عن عيونه بقيت متبسمرة.
بمكاني من نزلت دموعه و هوَ مغمض.
غياهب: ارسلان؟ فدوة احچيلي شبيك.
بدون ما يحجي حط راسه على صدري وايده حضنتني بقوة همس بصوت مشخوط بالبحة.
حضنيني مثل الام من تحضن أبنها ما شابع من حضن الام انا عشت عمري متحسر عليه.
سويت مثل ما ايريد مشيت ايدي بهدوء على شعره ساكتة ميتة قهر على حالته.
غياهب
عيوني.
ليلة عرسنا و إلى سويته ما اگدر أتخطاه اكره نفسي من أتذكره
شلون انتِ سامحتيني؟ و انا ما سامحت نفسي.
الماضي للماضي ليش تخلي يأثر علينا.
غياهب والله انا مو سيئ بس الانتقام عمه عيوني.
ياروح غياهب عفت الماضي للماضي إلى يهمني انتَ.
رد مختنگ.
بس شلون و انا أذيتج؟
صار جسمه يرجف و الكلمة تطلع من عنده گوا أحس بحرارة
جسمه صارت تچوي نهضت من مكاني ايدي على جبينه حرارته مرتفعة
ياربي دخيلك شبيه هاي كله بسبب قهره نزلت جوا اسويله كمادات
اخذتهن و صعدت اله لاف روحه بالغطى و يرجف گعدت بصفه سحبته منه.
عوفيني بردان.
ارسلان.
فتح عيونه إلى ذبلت يباوع و يرجع يغمضهن ويفتح بيهن.
ضميني بحضنج غياهب.
أضمك بحضني بس بالاول انسوي الكمادات علمود تنزل حرارتك تمام ابني؟
اي.
بديت أحط بالكمادات و كل ما احطهن على جسمه يفز بين ما كملت
عبالك طفل، صفنت بهذا الحال هاي احنا كبرنا بطفولتنا و من وگت
و اليوم بينا يحتاج الاهتمام و الدلال إلى ينعطي للطفل نزلت دموعي
بهدوء شگد ما يگولون عني قاسية بس ما أتحمل گلبي ينزف قهر.
نزلت المستواه بسته بخده و اني اهمس بالكلام.
أصيرلك الأم و كلشي تريده .
بقيت گاعدة يم راسه أنتظر حرارته تنزل بس للاسف ما نزلت خفت
أكثر سحبت جهازي محتارة عليمن اتصل بهذا الوقت ما اريد أقلق
الناس بس ما عندي غير ابوية و اقرب شخص الي، اتصلت مرتين
ما جاوب بالثالثة جاوبني و مبين نايم من صوته.
سلطان: خير بابا بيج شي؟
غياهب: اني مابيَّ شي بس ارسلان
شبيه؟
ما أدري بس أتمرض صخن مداتنزل حرارته و ما عندنا علاج بالبيت سويتله كمادات مدتفيد.
هسه راح نجيج انا و خالتج لا تخافين.
سديته منه و حرارته خبلتني مداتنزل تزيد ما تنقص بدلت ملابسي
و اني اتسائل بيني و بين نفسي لعد من عفتك شگد تمرضت بدون
لا أحد يدري بيك وانتَ تصارع قهرك، ندمك، عذابك
الدقائق اندگ جرس البيت هذا اكيد ابوية نزلت فتحته جان هوَ
و خالتي سودة عليَّ جاين نص الليل وبايدهم أدوية.
سلطان: ها بابا وينه ارسلان؟
رديت عليه بصوت محتقن مختنگة.
غياهب: فوگ.
صعد ابوية گدامنا لزمتني خالتي.
وجدان: لا تخافين ماما
غياهب: مدا يتخطى الماضي تمرض بسببه متأكدة
تعاي انشوفه كافي امسحي دموعج.
صعدنا اني وياها فتحت الباب جان ابوية گاعد بصفه و يهتم بي يشربه بالعلاج رجع راسه على المخدة.
سلطان: هسه بس يبدي مفعول العلاج بجسمه يصير احسن لا تخافين حبيبتي.
وجدان: احنا عندنا علاج بالبيت و هذا جبناه ان شاء الله يفيده اذا ما صار احسن ناخذه للمستشفى.
گال ابوية.
جيبي بعد غطى خلي جسمه يعرگ تطلع الصخونة.
هزيت براسي طلعت جبتله غطى ثاني غطيناه بي.
سلطان: راح نروح احنا اذا صار شي خابريني بس متاكد هذا العلاج هيه يصحي.
تمام بابا و اعتذر گعدتكم نص الليل بس ما حبيت اخوف الباقين
عيوني الج نظر عيني ديربالج عليه.
ان شاء الله.
نزلت وياهم سديت الباب و رجعت صعدت اله نمت بصفه ايدي جوا
راسي اباوعله عيوني صارت تغفي قفلت نمت بدون ما أحس على
نفسي، للصبح حسيت باحد حط ايده جوا راسي فتحت عيوني مجرد شفته كمزت من مكاني حضنت وجهه.
غياهب: شلون صرت
ارسلان: اسم الله شبيج ياروحي.
سحبني الحضنه يمسد على شعري.
خفت عليك البارحة
صرت احسن لا تخافين.
باسني بشعري غطاني بنفس اللغطى مالته.
نامي البارحة ما نايمة زين
گول والله صرت زين اوگف بلا أشوف حرارتك.
مديت ايدي على جبينه اتفحص حرارته و جسمه نازله الحمدلله.
هاا هسه ارتاحيتي
شو ما گتلي انطيني بوسة مو اگلك متغير.
ضحك بصوت گرص ايدي بخفة متقصدة احجي بهل الطريقة.
فوصة و من اگلها تبقى تطلع اعذار
ما احب انطي شي بسهولة.
حقج عيني حقج بنت سلطان انتِ منو يگدرلج.
نهضت من مكاني گعدت لزمت ايده اسولف وياه.
بعيداً عن كلشي ممكن نتخطى الماضي سوا؟
بقى ساكت الثواني رد.
ان شاء الله.
اخخ ارسلان اخخ
ههههه اخخ غياهب اخخ شبيج.
ممكن اتحرش بيك شو صاير حلو.
عض شفته يضحك و اني على ضحكته اضحك.
حلالج تحرشي
شاطر بيبي يلا گوم خلي نفسل و نتريگ
وللج تعاااي نامي البارحة مبينة سهرانة ويايَّ.
شو شبعانة نوم اوووف گوووم يلااا.
نهض من مكانه رفعني شايلني طلعنا من الغرفة يضحك لان اللوح برجليَّ مثل الطفلة نزلني بالحمام.
ارسلان: اوگفي
هاا؟
خلي اغسل وجهج
لا عاد مو الهادرجة يمعود
لهل الدرجة ونص.
فتح الماي و يغسل بوجهي بينما اني غاصة بالضحك كمل وگف ينشف بوجهي.
ارسلان: هسه تمام امشطلج شعرج؟ لا مو هسه خلي نتريگ و امشطه الج.
غسل وجهه و نزلنا جوا فتح الثلاجة گال.
اي يا مدام شتريدين من ريوگ؟
بيض عيون وچاي
من عيني اگعدي
هم انتَ راح أتسوي؟
شكو بيها؟
اممم مابيها شي بس خلي اساعدك
دگعدي هوَ ريوگ شتساعديني بي.
گعدت على الكرسي اباوعله ايدي جوا خدي بصراحة اغفي بس.
ما احب ابقى نايمة جسمي ينتهي طلع الغلاية حط بيها مي و چاي
وياها كم حبة هيل بعدها راح طلع البيض من الثلاجة طلع طاوة
حطها على النار صفگت بايديَّ بحمااااس.
ست بيت شااااطرة
انچبي ترا ما اسويلج رجال شطولني شعرضني تگليلي ست بيت يا حيف
بيبي دنشاقة وياك.
سحبت نفسي من المطبخ اجيب جهازي جبت جهازي احب احتفظ بالذكريات و هوَ التفت الي.
ارسلان: وين رحتي؟
غياهب: جبت جهازي.
دار بجسمه يصب بالچاي صورته كم صورة بدون ما يحس كاتمة
ضحكتي لا يشوفني و يطيح حظي حطيت الجهاز على جهة من جاب
الاكل مسوي البيض مثل ما أحبه و مجهز وياه شرائح جبن و زيتون.
رجال معدل انا عمي
لا تذلنا
يا حيف انا اذلج.
گعدنا نتريگ و هالمرة ما صار شي همزين دگ جهازي چان عمر؟ شعنده يتصل عليَّ انطيته الارسلان.
هذا عمر
عمر؟ چا ليش متصل عليج مو عليَّ
يمكن متصل بس جهازك فوگ
اي هم صدگ.
فتح خط عليه يحجي وياه و اني اخوط بالچاي.
ارسلان: هلا عمر صباح النور. قبل شوية جهازي مو يمي. اي اكمل واجيك. ان شاء الله حياك الله.
سده ورجع الجهاز الي.
متصل عليَّ و جهازي فوگ يريد نروح نجهر باقي شغلات العرس
اي عيوني مو گتلك
شراح اتسوين اليوم؟
راح اروح ويا نيروز حنين مو مال تفتر هواية و هيَّ حامل.
شنو رأيج نسوي عرس
لا ما اريد ارسلان
براحتج
ليش بنفسك تسوي عرس؟
علمودج انا
والله ما اشوف يحتاج.
هايهية يحيلي، نطلع انا وياج نشتري ملابس للعرس
تمام.
كملنا وصعد يبدل لان عمره منتظره كملت شغلي جوا صعدت جهزت
نفسي نزلنا سوا يوصلني بطريقة النيروز طلعنا قبل لا نصعد مد ايده الجيبه طلع منها مفتاح.
ارسلان: هاج هذا المفتاح مال البيت انا عندي نسخة خاف تحتاجي.
اخذته منه ضمينه بجنطتي صعدنا بالسيارة و ابوية اتصل عليَّ يطمن على ارسلان.
غياهب: صباح الخير حبيبي.
سلطان: صباح العافية عليج شلون صار ارسلان؟
الحمدلله احسن و هسه طالعين مابيَّ شي
الحمدلله يله اخذوا راحتكم بابا.
سديته منه باوعلي طابك حواجبه بتسائل.
ارسلان: چا ابوج شمدري؟
مو البارحة خفت عليك لان حرارتك اتخوف صارت اتصلت عليه اجه هوَ و خالتي جايبين علاج وياهم
زحمتيهم
لا عادي و ابوية أقرب واحد النا
ممنون
عيني و عيني، اشتاقيت السيارتي.
أشرلي عليها يم باب اهلي.
لوحيلها بالسلام
صدقة لله
عادي اطلعي بيها غياهب قابل احد مانعج.
هالفترة صرت اتعاجز اطلع بيها او بالمختصر اتعاجز من السياقة
بكيفج بعد.
شغل السيارة و وصلني البيت خالي عمران قبل لا انزل لزم ايدي.
انتبهي النفسج لا تعبين هواي من تجوعين اكلي لا تغلسين
ممنوع تصيرين عصبية و تنقهرين اخاف تجيج النوبة انا ما ارجع لليل.
أبتسمت الكلمات اهتمامه.
تمام بيبي
اشتعلوووووا
ههههههه تمام حبيبي حبيبي
اييي من الاول هيج.
قبل ايدي و نزلت بقى واگف يباوعلي الى ان دخلت البيت.
خالي لوحتله بايدي باي، دخلت جوا خالة نادين فتحتلي الباب.
غياهب: حبيبتي خالة شهل الجمال.
ضحكت بخجل والله تخبل نسخة رماد منها.
نادين: الف مبروك الرجوعج الزوجج
الله يبارك بيج.
غياهب اگدر اسئلة عن شي
اتفضلي.
من عشتي ببيت عيالج شلون شفتيهم احنا ندري خوش ناس بس نبقى ما نعلم باللي داخل البيت.
اطمني حبيبتي والله عمر وردة مال الله و راح يسعد نيروز لا
تخافين هوَ يحبها و يموت عليها لا تبقين قلقانة بهل الموضوع من.
عشت وياهم شفت احترامهم للمرأة لو شايفة شلون يحترمون العلوية
و يعزوها والله احترامهم ينباس ف لا تخافون انتِ
و خالي.
الله يريح گلبج مثل ما ريحتي گلبي.
ابتسمت من حقها كل اهل هيج خصوصاً نيروز وحيدتهم.
غياهب: لعد نيروز وين اتأخرنا
دخلت تجهز نفسها و خالج هم يبدل علمود يوصلجن.
گعدنا نسولف اني وياها و فرحانة لبنتها طلع خالي سلمت عليه حضنته.
عمران: اعذرينا عروس جديدة و جبناج و يگلك البارحة مسويلكم مداهمة.
ضحكت و اني اجاوبه.
غياهب: عروستيش خالي خلص وگتنا احنا هسه دور غيرنا.
طلعت نيروز مجهزة نفسها سلمت و طلعنا مشى خالي گدامنا يشغل السيارة نيروز صفت يمي.
نيروز: شلون جانت ليلة البارحة
غياهب: نحسة
اسم الله شكو؟
ارسلان انقهر و اتمرض
ياا خطية هذا مثل عمر من ينقهر هم يتمرض
بس هسه الحمدلله احسن اتلاحگوا ابوية و خالتي بالعلاج خطية اجوني نص الليل
بس ليش انقهر.؟
من الماضي
طرگاعة اللفت الماضي هالماضي الاكشر دمرنا دمار.
ابوج ما يجيب سيرة سالم؟
ماكو ولج يگول فص ملح و ذاب ما اله أثر
الله ياخذه كلشي بسببه
حسبي الله و نعم الوكيل بي.
صعدنا ويا خالي وصلنا للسوگ و هوَ راح عنده شغل گال
من تكملن اتصلن افترينا اخذنا كم قطعة و شغلات نيروز محتاجتهن
اربع ساعات نفتر بعدها بلغنا خالي كملنا اجه وصلنا للصالون
حجزنا لازم قبل كم يوم الحجز رجعنا للبيت تغديت يمهم بقيت ارتب وياها اغراضها.
لليل كلش اجاني ارسلان و هيج مرت الايام الوضع هادئ و نركض
بتحهيزات العرس طلعنا اني وياه اخذنا ملابس للعرس، اجه يوم العرس
رحت اني ويا نيروز حنين ما قبل درغام و داتتعب بسبب شغلها
هم يگلها موزين عليج و اختي حركة كملت مني البنية إلى بالصالون
درت وجهي اباوع النيروز هيَّ ناعمة و ملامحها هادئة مثل شخصيتها
بالحفافة و التغييرات صارت شي ثاني و بدلتها عبالك أميرة هيَّ.
و عمر راهمين البعض لان نفس الهدوء، اتصل بيَّ ارسلان.
ارسلان: هااا يابه احنا قربنا نوصل جهزوا نفسكم.
غياهب: مكملين ماعندنا شي بس الصور ياخذوها بالصالون لو بالقاعة.؟
لا بالقاعة مأجرين مصورة
تمام لعد ننتظركم.
سديته و گتلها على موضوع الصور گالت بعد احسن جهزتها
ربع ساعة و صارت اصوات الزفة و الطربكة دخل عمر العروسته
خجلت اباوعلهم و ابقى واگفة و هوَ واگف وياها ما ادري شيحجي.
مبتسم طاير بسعادته لو حنين هنا جان زرگتهم، الفرحة بعيونهم هم الاثنين.
صار وگت نطلع اخذت اغراضنا لزمتهن بايدي و هم طلعوا گدامي
طلعت وراهم عيوني تدور عليه هوسة السيارات لمحته من بعيد أشرلي جايج
شايل سراج رافعة لفوگ يركص بي ضحكت صعدوا العرسان بسيارتهم و هوَ اجاني.
ارسلان: ياا مدام ممكن نتعرف.
اخذت سراج منه اضحك حاضنته يمة هالطفل يخليك تكزكز.
غياهب: في قلبي رجل.
شددد.
شعبالك لعد روووح منا شنو تتحرش بيَّ هسه زوجي يشوفك
عادي يطلگج و اني اخذج
ما اعوفه حتى لو طلگني ابقى لازگة بي.
هنياله.
رفعت حاجبي اباوعله.
شدعوة هالگد كاشخ؟
چا غير عرس اخوي
عود من تدخل للقاعة ديربالك على عيونك
تغارين عليَّ؟
هالمرة الجواب مختلف عن قبل چنت اگلك خلينب أبلعك و أطيقة
يلا أغار عليك اما هسه العكس و لا أنصحك تختبر غيرتي لان انانية بالاشياء إلى تخصني
شددد يابه شددد.
هههههههه يلا اتأخرنا الناس طلعت واحنا بعدنا.
صعدنا بسيارتنا سراج بحضني اخذت صور النا احنا الثلاثة سووا
العمر زفة تخبل حالها حال زفة عرسي و عرس حنين وصلنا للقاعة
دخلنا جوا و بدأت الفعاليات مال الاحتفالية التابعة للعرس و اكيد
اقاربهم هالمرة موجودات ياررربي سمم سممم ينگطن گعدت يم العلوية و ناز إلى يصفنن بجمالهن.
ناز: غياهب انتم ما تجون النا صرتوا ما تحبونا.
غياهب: لا بس والله انشغلنا هالفترة بالعرس و ارسلان يركض ويا عمر و اني ويا نيروز ان شاء الله نجيكم.
باوعتلي بزعل عيونها مدمعة.
ارسلان صاير ما يحبني
بالعكس حبيبتي ناز ارسلان يموت عليج بس انشغل ذني الايام.
بقت ساكتة و عيونها مدمعة هوَ فعلاً انشغل حتى اني مداشوفه
الا من يرجع للبيت و مرة طلعنا علمود نشتري ملابس شفت غرام صافنة.
غياهب: علوية صافنة بيج شي؟
غرام: ابوية مريض و هاي اكثر من مرة يطلب يشوفني.
روحي اله يبقى ابوج و مريض لا سامح الله رب العالمين ياخذ امانته و انتم ما متبارين الذمة.
نزلت دمعة منها نزلت راسها طبطبت على ايدها.
ميخالف غرام الحساب يم رب العالمين
يكمل العرس و اروحله الله كريم اني حچيت ال كُميل گال بكيفج و شي راجعلج ما امنعج
و فعلاً شي راجعلج انتِ بكيفج.
هزت براسها.
الله كريم.
رجعنا اندمجنا باجواء العرس و صار وقت دخول العريس
انطوا علم خاف وحدة تريد تلبس شي و من هالسوالف أشرتلي خالة.
نادين على نيروز حطيت سراج بحضن امه وصعدت الها ارتبها خاف
محتاجة شي و طبعاً مثل اي عروس اشتغل عندها التوتر.
انفتح باب القاعة بس اتفاجئت من دخوليتهم ويا دخولهم اشتغلت
اغنية و بس العرس و الخال و ارسلان، وگفت بجهة بكل شموخ و ثقة
و لا كأنوا نفسي اني إلى كسرتني الحياة صار بصفي يباوع الشعري همس قريب مني.
شعرج الاسود من يسحل وراج يسحل گلبي وياه
شددد ههههه
هاا غياهب ها هسه منو يقلد
مو تگول اني وانتِ واحد.
و ما يجي بعدالنا
اي هايهية لعد و يگولون اذا تحب شخص ف راح تتأثر بشخصيته و كلامه و تصرفاته تصير تشبهه
اممم بعد قارئة كتب و محامية منو يلحگج الكل سؤال عندج جواب
ديربالك مني بيبي
بعد ذكرجن انذكر بالقران ان كيدهن عظيم
اخذوا الحذر
حيالات، مسمومات، الكيد مالتجن اعظم من كيد الشيطان انتن النسوان.
ايي ما گتلي راح ترگص؟
وين عمير لاغي هالفقرات
ليش عود
يستحي عمت عيني مثل اخوه
يمة التفخفخ يمة.
ضحك و گال.
يگول استحي بس رگصته هوَ و مرته بقاها لان ما يگدر يلغيها ماتشوفين دخلنا بس انا و خالي وياه
نيروز و عمر لايگين البعض نفس الهدوء و الخجل.
درت عليه من ذكرت ناز.
ناز زعلانة منك.
أختفت ابتسامته.
ليش؟
تگول صاير ما يحبني و متغير لا اوگف ما گالت هيج هاي بهارات
مني بس گالت ماتجون النا و صاير ما يحبني اي هيج گالت بالضبط
غير تگليلها انشغل ويا عمر
ايي ايي گتلها يمعود بس بقت زعلانة.
صدگ انشغلت ويا عمر بس ما ناسيها و اسئل عمر عنها لو خالي
بس اشوف هم النا احسن هالبعد هالفترة نتعود شوية على الوضع
نروحلهم قبل لا تروح الدوامك.
هز براسه بقى يدور بعيونه عليها الى ان شافها من بعيد دار وجهه
دخيللل محمد شوف خالي وين گااعد.
انتبهت عليه گاعد يم العلوية و عمر و نيروز بلشت فقرة رگصهم.
عادي هم كلهم أقاربكم ماكو غريب و هوَ يم زوجته گاعد.
راح اطلع انا و گولي الخالي ارسلان يگول خلي يجي العالم تنتظرنا.
طلع من القاعة و اني رحت الهم.
غياهب: شلونك خال
كُميل: هلا باللبوة خالي
ارسلان يگول خلي يجي لان الناس منتظرتكم
ابن الطحال غير شافني گعدت.
اخذ سراج وياه و طلع، گعدت بمكاني نباوع للعرسان اكو شلة گاعدة ورايَّ جذب مسمعي حديثهن.
ولج هيَّ هااي مرت ارسلان شفتيها
اي هيَّ هاي خبصونا بيها معصعصة.
درت وجهي عليهن مبتسمة بس شافني سكتن رفعت حاجبي.
غياهب: معصعصة، مربربة، خشمج لا تحشري بغيرج القاضي راضي.
ما گدرن حتى يردن درت للبنات غرام ضحكت من شافت ردي الهن
عجيب هالبشر يدخل بكلشي سمين ضعيف، ابيض، اسمر، داكن اللون الناس
شعليها اكره هالفئة يمكن اني ما اهتم الكلام الناس و لا افكر بس اكو
ناس تنحرح بداخلها من احد يستنقدها و هاي كسر للخاطر
و ويا ويل عذاب كسرة الخاطر و لا عبالك مخلوقين من طينة وحدة.
كملوا الرقص العرسان و طلع عمر اجت حنين انضمت النا چانت.
گاعدة ويا خالاتي و مليكة گعدت وايدها على بطنها.
حنين: شوووووگت اجيببب
غياهب: شبيج روحج صايرة بخشمج
شو الحمل لعبااان نفس يوميا ما اخلي درغام يدخل للغرفة
الا يسبح و ما يرش من عطره، عطره شمرته خارج الغرفة
سويتي الرجال برمائي
ويمشي ويصيح بالبيت ما طلع حمل و خرب بابوه إلى يخليج بعد تخلفين يكسر خاطري بس يختي مو بيدي
يلا كلها كم شهر وتخلصين
يوم الالج.
ابتسمت بوجهه باوعت الغرام و ال ناز.
حنين: دخل اباوع بخلقجن بلگي ابني يطلع مثلجن نوب يحظي
ابوه مزنجر و اني هم مو بيضة شراح يطلع الطفل دخيلك ربي.
غرام: هههههههه المهم اتمام الخلقة
اي والله الحمدلله هسه لو يجي صخل هم قابلة المهم إتمام الخلقة.
بقت ترطن علينا بسوالفها وذني الفاهيات خربانات ضحك عليها
لحد ما خلص العرس بالقاعة وصلنا عمر و نيروز للفندق ورجعنا للبيت
الكعب للي لابسته أذه رجليَّ ما صدگت اوصل للبيت
و انزعه.
بس دخلنا اتمددت بالصالة و نزعته اتنفست براحة.
ارسلان: تعبانة
غياهب: الحذاء تكرم دمرني
راح اسويلج ماي دافي نگعي بي رجليج
لا لا اني اسوي روح ارتاح انتَ هم تعبان.
هز براسه و صعد رحت سويت مي دافي خجلت منه ما يخليني اسوي
شي ما ادري شلونها حسيتها مو حلوة بحقي من هو يسوي كلشي
كملت ريحت رجليَّ بالمي الدافي ارتخيت شوية وصعدت اله دخلت الغرفتنا جان گدامه كومة أوراق.
شنو هل الاوراق
شغل.
سكتت ما عليه بشغله و هوَ هم ما يحجي عن شغلهم بدلت مسحت
مكياجي گعدت بصفه اباوع وياه اكو بيهن مو كلش افهم عليهن اغلبها مشفرة.
ارسلان: نامي بابا انا اتأخر و يمكن انزل جوا اكمل شغلي
لا حباب ابقى يمي.
سوالي حركة بأنفه و ضام ضحكته ضربته بخفه على رجله.
طلعهااا ليش ضاامهاا
أكو وحدة جانت تتخبل بس اتقرب الها تطلع جبار إلى بداخلها و اتصيح ايع وخر.
دفرته برجلي خازرته و كاتمة ضحكتي شلون يقلدني.
تقلد عليَّ.
هااا رجعنا للمدافر.
شهگت من ما احس غير هوَ هم دفرني رجعتله الدفرة رجع هوَ
هم رجعها إلى ضوجني سحبت ايده عضيتهاااا عضة من كل گلبي دفعني لازم مكان العضة.
ولللج شبيججج
طلگني
شددد
طلگني ارسلان هسه تطلگني
ما اطلگ غياهب ما أطلگ
لا الا تطلگ بعد ما اريدك
مو احنا نلعب
طلگني لا انتحر
لا بشرفج؟ زين بيا طريقة هنَّ هواية طرق
أذب روحي من الچرباية
له له شنيهاي عمي ماكو مثل هل الطريقة كلش قوية عاشت ايدج اتوكلي يله.
هههههههه ارسسسلان
هاا يحيلي
تعال سولف ويايَّ باجر كمل شغلك
تأمرين.
سفط الاوراق على جهك واتمدد فتحلي ايديه دخلت بحضنه لزمت ايده العب باصابعه.
ارسلان: سولفيلي حضرة المحامية كل حواسي تسمعلج.
هوَ شوف اليوم صار موقف بس اني ما ضجت منه بس اريد أسولفه الك.
اسمعج حبيبي
اكو ناس من اقاربكم مو گعدت يم العلوية
اي
اي فشنو چانن گاعدات ورانا من اجيت اني گعدت اثنين يسولفن يگولن هيَّ هاي مرت ارسلان الخبصونا بيها
ياا.
السانك عيبب
هاا اسف كملي عزيزة عيوني
اي فهذا اني درت وجهي الهن ورزلتهن و گتلهن القاضي راضي
امممم.
دفرته برجلي.
شنووو اممم
هاا يعني كملتي سالفتج لو بعد
كملتها ليش داحسك ما متفاعل ويايَّ درووووح مو صوجك صوجي اني اسولفلك ابو النسوان.
هذا ياهو ابو النسوان؟
اذكرك لووو ناسي ميلاد من حصررتك.
هذا شغل چان مهمة
هااا و هاي فاطمة إلى ساعدتها.؟
اي ساعدتها ما عندي شي وياها
هسه منوووو ابو النسوان؟
مو انا.
گلب عليَّ طابك حواجبه.
ارسلان: نسيتي راهب؟
ما عنده شي ويايَّ الولد
نظراته ما ارتاحيت الها
هاا اي شوف خطيبته تگول اخته مثل عيونج و شعرج
لا بشرررفج
اهووو دكافي تستهزأ
سودة عليَّ من شافج ذكر المرحومة خاااب منيله هالكلاوووات
لا والله صدگ حتى شوفني ابن اخته.
حجيتله مختصر عن الموضوع اني اسولف و هذا المنحرف يبوس بخدودي.
و هذا موضوع راهب كله
خيولي ما احبه اتمنى افكس عيونه إلى تباوعلج
انتَ كله كسر و فكس.
نزل وجهه الوجهي.
أغار غياهب أغار أفهميني، حتى من تگولين الابوج حبيبي أغار بس مو من حقي أمنعج
بكلشي الك حق الا ابوية لان تدري شنو بالنسبة الي
و لأن أدري ساكت.
دارد عليه مالحگت ألتهمني بقبلة يتفنن بتقبليها ايده تسللت الخصري.
في سكونِ الليلِ والأحلامُ تنتشر
نادتهُ عَيناي هل يَصغي ويعتبر
وكلماتُ العِشقُ في شفتاهُ تنتثر
وَورودٌ من الخَجل تندَثر
ورجلٌ بكلامِه وَوعودِهِ يَفتخر
ليأتي يومٌ فيهِ الهَوى يَنتَصِر.
وكفوفٌ تتعانق من دون غَدِر
فَ قلوبِ الشامِتينَ يعلوها الضَجر.
الحُب هو النهَر من اجتازهُ قد عبر . مُكتمل زواجنا
بعد مرور عدة أشهر من حياتنا إلى عمها الهدوء و السعادة
كل واحد بينا اخذ إلى يريده و عايش رياهغو يسعى الكلشي
في سبيل يخلي سعيد، حنين هذا شهرها الدكتورة كالتلها
بأي لحظة ممكن تجيج الولادة و جهزي نفسج، ارسلان راح بهالفترة
للمهمة و الحمدلله رجع منها بالسلامة.
چنا معزومين يم أهله الكل گاعد منجمع سراج عمره صار سنة و كم شهر
و كل ما جايله يزيد بتعلقه بارسلان يموت عليه اكثر من ابوه.
كُميل: ولك بووية انا ابوك مو ارسلان.
ارسلان: تربيتي بعد روحي
اتفل عليك و على تربيتك السگط
يا حيف انا تربيتي سگط
غرام اغسلي ايدج من ابنا دامه تربية ارسلان دشوووفي ما يريدنا ينسى روحه من أيشوفه.
سراج خاتل بحضن ارسلان و يوزع ابتسامات و ارسلان خربان.
عليه عمر و نيروز گاعدين بصف بعض يتهامسون رغم مر أشهر على زواجهم
بس نيروز من تحجي وياه گدامنا خدودها تولع بالخجل ابتسمت المنظرهم
ناز الحمد لله علاجها كمل و حتى وضعها صار افضل من قبل اجت گعدت گدام ارسلان تباوعله بعيونها الزرگ.
ناز: اريد أدرس.
باوعلها ارسلان و كلنا وياه هيَّ حسب ما عرفت ابتدائية ما مكملتها ابتسم الها.
ارسلان: تدرسين؟
ناز: اي
عمر: نقدملها على الخارجي.
غياهب: افضل خطوة تخطيها امتحني سادس ابتدائي و بعدها امتحني الثالث و السادس.
كُميل: و غرام السنة هم راح ترجع تكمل اخر سنة من جامعتها دام سراج كبر يبقى يم امي و ناز هنا
مليكة: هايهبة يمك قدموا للبنيات وخلوهن يدرسن.
اتفقوا يقدمولهن السنة و ناز عمر اخذ مسؤليتها هوَ و نيروز
يدرسوها دگ جهازي چان درغام جاوبته.
غياهب: هلا درغام
درغام: هااا غياهب وينجح انتِ جاااي ادگ على باب بيتكم
خير؟ احنا يم اهل ارسلان.
اختج جاي تطلگ و ما ترضى تروح للمستشفى الا انتِ تجين.
وگفت بسرعة الكل يباوعلي.
هسه جاية.
سديته منه درت وجهي الارسلان إلى يباوعلي بتسائل.
ارسلان حباب وصلني البيت خالي حنين عندها ولادة.
هاا على الخير يلا نروح يابه.
اترخصنا منهم و طلعنا الطريق كله متوترة عبالك اني إلى دا اطلگ
وصلنا البيت خالي و اختي منتهية من كل عقلها معاندة ماتقبل الا اني.
وياها طلعنا بيها للمستشفى اني ودرغام و خالة جوهرة ويانا، ارسلان و خالي اجوا ورانا.
حنين: ولكممممم يمةةة راحححح امووووووتتتت.
غياهب: گولي يا الله.
عاااطت بصوتهااا المفضووح.
انتِ انچبييييي
رحم الله والديج
درغام: شبيج بلائيي فضحتيناا عمت عيني هيج متوجعة.
غير يسكت عنها هاي ام نص عقل تخبلت.
حنين: اسكتتتتت اذا ماااا اشگك انتَ و أبنك.
درغام يضمضم بضحكته و هاي تخبلت و خالتي تقرأ عليها ايات.
حاضنتها مردت ايدي مرد خفت عليها لات اول مرة اشوف وحدة تطلگ
گدامي و صلنا للمستشفى اخذناها بالكرسي و درغام يحجي وياها
و هاي تصرخ ملخت روحها تملخ ملخت شعرها مثل المسودنة ارسلان يمشي ورانا.
حنين: انعلللل ابوية اذا احبلللل بعدددد.
درغام: حتى انااا انعل ابووية اذا خليتج تحبليننن بعددد
ليشششش انييييي هايشة و تگلي تحبليننن.
غير انتِ گلتي احبللل و انا ويااج على الواهس
جذاببببب ابوووو جلللطة.
ارسلان: دعوفها شبيك يمعود ماتشوف حالها.
دخلوها جوا و احنا بقينا بالانتظار اشتغل خوفنا عليها ثلاث ساعات
احنا واگفين ننتظر درغام انطحن طحن من القهر وگفت بجهة اشتركت
بالخط نت وطلعت سورة مريم أقرأ بيها لتسهيل الولادة قريتها و كملت
و هم بعدهم درغام وجهه انگلب كركم لازمة خالي.
طلعت الدكتورة إلى اشرفت على ولادتها.
بشرتنا اختي ولدت بالسلامة و الطفل بصحة جيدة بس حنين تعبانة.
بسبب الولادة بس كان تعل ولادة لا اكثر، مر وگت و دخلنا الها گاعد
يم راسها درغام و يباوعلها بخوف فتحت عيونها بتعب.
حنين: وين ابني؟
درغام: هسه يجيبوا حنيني.
جابوا الطفل حطوا بحضن امه اباوعله بيبي صغير حيل.
غياهب: اوووي يا روح خالتك.
اتقدم خالي يأذن بأذنه اخذه منهم وگف علمود يسمونه و كانوا متفقين
خالي إلى يسمي و سماه الحسن چفوصي صارت ام الحسن و درغام ابو الحسن.
فرحانيم بي اول طفل بعائلتنا اجوا ابوية و خالتي و اشتغلت بينا هوَ و درغام.
درغام: صرت جد بفضلي
سلطان: استغفرالله
بزودي.
صاح عليه خالي يله سكت طلعوها من المستشفى و الهلاهل
و الجكليت عبالك عرس خالتي جوهرة فرحتها ماتنوصف
وصلنا للبيت مرت كم ساعة اخذته منها حطيته بحضني ما مبين يشبهمن
بعده بس رموشة علينا اني و حنين.
حنين: شو ما مامصدگة صرت أم.
غياهب: و لا اني هوَ انتِ يحتاجلج تربية بعد و ضبط باعداداتج انتِ ودرغام شلون راح تربون طفل.
اني هم گلت هيج بس يله جوجو موجودة
منو جوجو؟
خالة جوهرة.
ضحكت دخلناها الغرفتها ترتاح حطيت ابنها بمكانه المخصص
طلعت دخل الها درغام و اني و ارسلان اترخصنا منهم ابوية و خاالتي
بقوا عندهم، فتحت الباب مال السيارة و معدتي قلبت جبرت نفسي
و صعدت طلعت روحي حد ما وصلنا كبل للحمام استفزغت راسي موتني.
ارسلان: شنو السالفة خاف معدتج تحسست من الاكل
لا يمكن من ريحة البانزين او.
اثنينا صفنا بوجه بعض معقولة إلى ابالي نفس اللي اباله؟
غياهب: معقولة اني حامل؟
حك طرف حاجبه مبتسم.
ارسلان: ما ادري.
صفنت الشهرية من زمان مت جايتني اريد تحجي و دگ جهاز ارسلان باوعله و حچى بأستغراب.
هذا مُجاهد خير شعنده.
فتح خط عليه و اني سرحت بأفكاري خاف صدگ حامل بس فزيت منها من مُجاهد عاط بارسلان.
ابقى يمك جااااي اللك لااا تتخبل.
طلع يركض و حتى مالحگت اسئل لزمت گلبي شبيه مُجاهد شصاير؟