رواية وتيرة الأعرج للكاتبة حوراء السعيدي الفصل الخامس والأربعون
ارسلان.
طلعت من البيت مستعجل أريد الحگ على مُجاهد لا أيسوي شي غلط يتندم
عليه بسبب عصبيته و من كل عقله يريد يگتل رجل امه ما أدري شصاير
و شنو السبب إلى وصله لهل مرحلة، أتذكر مرة رحت وياه من أستلم راتبه و راح الأمه
انطاها مصرف مو هواي أعرف عن حياته بس إلى أدري بي ابوه ميت من
صغره و امه اتزوجت رجلها ما يريده هوَ ماخذله بيت گاعد بي
و يروح الامه.
بين فترة و فترة، الطريق شطوله صار دگ جهازي شفته غياهب إلى عفتها واگفة و طلعت.
ارسلان: ها غياهب
غياهب: شصاير؟ خير شبيه مُجاهد.
والله ما أدري هل رايحله خابرني فاقد يگلي تعال إلى لا اسوي شي غلط يمكن رايح الامه
و تلاگي هالحيوان رجل امه شوف شمحاجي
ليش انتِ تعرفين عن حياته؟
أي صديق درغام تعرف الروح بالروح من الطفولة و مرة درغام سولفلي عنه مشاكل ويا زوج امه
تمام قفلي الباب بين ما ارجع خلي اشوفه هاي هل وصلت.
سديته منها نزلت و اشوف العالم ملتمة و لازمين مُجاهد واگف گبال بيت
أمه نفسه بيت رجلها مشيت اله لزمته صاير نار محترگ حرگ و الوادم لازمته
گوا هوَ يتهدد و ذاك رجل امه هم لازمينه يتهدد عليه.
ارسلان: اهدأ مُجاهد.
رد يصيح صياح.
مُجاهد: وللك شهدأ مااااا يخلليني اشووف اميي وللك امي هااااي.
خذيته لازمة و هم يتصايحون بينهم.
خوية على بختك على كيفك.
عاط و هوَ يخزر برجل امه.
مُجاهد: غصباااااً عليك اشووووفهاااا و انعللل والديك.
ذاك رجع يصيح من بين الوادم و يگله.
لوووو اتنط ما اتشوفهااا ولي منااا.
اتخبل صاحبي درت وجهي عليه باوعتله من فوگ لجوا مبين واحد زايعته الگاع و ماله منه.
ارسلان: احتراماً الشيباتك ما راح اسوي شي و انصحك خلينا نتفاهم و نحلها بدون فضايح گدام امة محمد.
ادخلوا زلم كبار من المنطقة چانوا واگفين و وافقوني الرأي دخلنا البيته و هم لو تعوفهم واحد ياكل الثاني حچى رجال جبير و مبين خير من رزانة و هيبة كلامه.
الرجال: ابو أحمد انتَ ليش مانع الرجال مُجاهد يشوف أمه تراها أمه مو من حگك تمنعه منها.
ابو احمد: ما اريده يدخل البيتي عنده بيت و يولي اله.
مُجاهد: ميت على بيتك ولك انا لو امي تسايرني هسه اخذها و اروووح.
أمك ما أتريد أتشوفك.
حجي فارغ هذا من يمك، امي تخاف منك ولك حرامات خذتك حرامات تنعد
علي الزلم بس اريد افهم شمستفادة وباقية وياااك واحد بهيم حتى مصرفها
مني ولك هيَّ اختي إلى هيَّ بنتك مااا تصرف عليها و انا اصرف عليهاا أب انتَ أب؟
اباوعله يحجي محترگ گلبه على امه بقوا يتشاحنون بالحچي و هذا يخبله من يگله أمك
ما اتريدك حتى الزلم الموجودة ما گدرت عليهم و يسكتووهم بالاخير گال نفس الرجال إلى تدخل اول مرة.
الرجال: خلي ام مجاهد تجي و اتأكدلنا كلامك ابو أحمد وين أكو أم ما تريد اتشوف ابنها.
صاح على ولد شاب يجي بگد مُجاهد طلب منه يصيحلها طلع شوية
و دخلت علينا بعبايتها مجُاهد بس شافها ركض الها حضنها يبوس بايديها و هيَّ عين عليه و عين على رجلها.
ابو احمد: هاااي گدامكم اسئلوها.
باوعتله صفح لو ما الناس الگاعدة الزگة بالگاع على أسلوبه.
ارسلان: أي نسئلها چا شعندنا.
رجعت الامه اباوعلها نظراتها ما ريحتني بس مجبور اسئلها.
الله يساعدج ام مُجاهد يابه رجلج يگول ما اتريدين تشوفين ابنج صدگ هالكلام لو تسفيط منه؟
عم السكوت بين الموجودين و مُجاهد عيونه تتأمل أمه مسحت دموعها و هيَّ تجاوب.
ام مُجاهد: اي يمة صحيح انا الگتله ما اريد اشوفه و لا بعد يجي هنا.
ما قهرني هنا غير هالولد إلى بقى صافن بأمه.
مُجاهد: شتحچين يمة؟
روح يمة و بعد لا تجي لهل البيت.
لزم ايديها و يسئلها اكثر.
يمة احجيلي مهددج بشي؟ والله اكسر ظهره الج بس گليلي شلون ما اجي و انا بالدوام روحي تفرفح على شوفتج بس اريد اشوفج
روح مُجاهد انا ما اريدنك تجي جياتك جاي تخرب ببيتي.
عاف ايديها بهدوء مصدوم من كلامها رد عليها مخنوگ بصوته.
تكسرين ابنج علمود رجلج؟
والله يا يمة من جاي تجي تصير مشاكل
اخذج ويايَّ و جيبي اختي هم وياج و عيشوا ببيتي و ابن إلى يتگرب الكم لا
تكسريني هالكسرة يمة، فوگ كسرتج إلى خليتيها بيَّ من الصغر.
ما اگدر
بقى صافن بيها الدقائق.
انتِ أم و أم درغام أم؟ تدرين الغربة حنوا عليَّ حتى اكثر منج بالوگت اللي
انتِ هامج بس رجلج وبنتج گلت ميخالف تبقى أمك كسرتي بيَّ و كسرتي
بخاطري و انا طفل رحتي تزوجتي و جبتيني وياج شبعت ضيم وياه.
بقت تبجي و هوَ ضحك مقهور.
عليمن تبچين يمة هايهية رايح و اطلع كلب ابن كلب اذا وصلتلج بعد
راح أعتبرج اندفنتي بصف أبوي، امي ماتتت من اليوم، متهناية برجلج و عائلتج.
عافها و طلع اترخصت من الموجودين ردت اطلع صرت گبالها تبجي عليمن تبجي ما أدري.
ارسلان: كسرتي بأبنج علمود واحد ما يدري بيج تنامين جوعانة لو شبعانة الله يسامحج.
عفتها و طلعت وراه ادور عليه شخط بسيارته و طلع مالحگت عليه صعدت
بسيارتي امشي وراه و هوَ عبالك الشارع مابي أحد يمشي سريع لازم
گلبي هسه ينگلب على هاي سياقته اتصل بي ما يجاوب، الطريق الماشي.
بي مو طريق بيته وين رايح هذا رجعت احاول اتصل بي فتح خط مجاوبني.
ارسلان: شنيي مُجاهد وينن رايح.
جاوبني مختنگ گوا الحچاية تطلع منه.
مُجاهد: رايح الابوي
للنجف؟
اي
اي لا تروح رحدك نروح انا وياك
وين رايح انتَ مرتك تبقى وحدها
خفف سرعتك و واوگف گدامي خليني اتفاهم وياك.
سديته منه اباوعله خفف سرعته و وگف نزل، وگفت سيارتي على جهة نزلت اله احاچي.
ارسلان: راح تروح ويايَّ للبيت و باجر نطلع للنجف انا وياك.
مُجاهد: لا هسه أروح گلبي نار ارسلان امي ولك امي هاي عافتني و فضلا رجلها عليَّ.
گلنا گلوبنا ضامة نار و هذا حال إلى يفگد.
وگف يمسح بوجهه دموعه ما گدر يضمهن گعد بالتراب يبجي گعدت بصفه
ماكو شي يواسي و يخفف عليه محد يحس بالشعور بس إلى يفگد اهله
و الاصعب من طرف واحد منهم ما يريدك مخليك منبوذ و الاثنين انا عشتهن
و اعرف بشعورهن شعور تعيش بين أهلك منبوذ و شعور تخسر أهلك.
مُجاهد.
تحملت الضيم علمودها ارسلان هاي تاليتي هيج تجازيني امي
هيَّ هاي الدنيا.
ضل يحچي ويبجي مثل الطفل العايفته امه و هوَ صدگ عافته شگد ما نكبر
بس من توصل يم أهلنا نحس نفسنا اطفال و نرجع حالنا حال الطفل
الي يريد أهله، گومته من الگاع و هوَ بأصعب حال مو مال أعوفه وحدة.
ارسلان: راح تصعد سيارتك هسه و تمشي ورايَّ.
رفع راسه عيونه حمر.
مُجاهد: وين؟
مو گتلك البيتي و الصبح نطلع للنجف
لا رايح البيتي و الصبح أجيك.
مُجاهد؟ چا شگلت انا يله ورايَّ تعال.
عفته و صعدت بسيارتي ماشي گدامه متوجه البيته دزيت رسالة الغياهب
انطيتها خبر، باوعتله ورايَّ يمشي الله يساعد گلبه وصلنا اثنينا گبال بيتي بقى گاعد بسيارته ما نزل رحتله.
يخوي يله أنزل
والله ما اله داعي اجي هنا گتلك خليني اروح البيتي و أجيك الصبح
دمشي امشي يجيني الصبح عود يستحي.
فتحت الباب
دخلنا سياراتنا للكراج دگيت الباب الجوا فتحته غياهب و اختفت قبل لا يدخل.
مُجاهد عفته بغرفة الضيوف دخلت للمطبخ شفتها واگفة ابتسمتلي بابتسامتها الترد كل حيلي.
غياهب.
غياهب: أجه مُجاهد وياك مو؟
ارسلان: اي جوا
امم عادي أسلم عليه؟
عادي يحيلي اخوي هذا بس اوگفي شو.
بقى يباوع الملابسي اتأكد منها طلعنا من المطبخ اسلم عليه اني اعرفه بس گد السلام بينا بس شافنا دخلنا وگف و خطية شصاير بحاله.
غياهب: السلام عليكم خوية
رد السلام و هوَ عيونه بالگاع مارفعها.
مُجاهد: عليكم السلام خيتي حياج الله.
شلونك ان شاء الله بخير
الحمدلله.
ابتسمت بلطف رجعت للمطبخ سويت ضيافة مرتبة اخذتها حطيتها گدامهم
اترخصت منهم صعدت الغرفتي هاللعبان النفس دمرني سبحت و لبست
ملابس شتائية لان شتاء و باردة وگفت گدام المرايا أمشط بشعري باوعت لرگبتي
الي بيها أثر چوية من الماضي تلمسته بايدي و ذكرتها.
شستفاديتي من حرمتيني من حنيتج؟ و من كلمك ماما تركتي ندوب صعب تنمحي.
كملت شعري سحبت عطر ارسلان رشيت منه احس عطره احلى رغم رجالي.
اخذت كتاب من كتبي شغلت التدفئة تمددت بمكاني لبست نظاراتي
بديت أقرأ بالكتاب ما حسيت بالوقت لان اندمجت بعالم القراءة باثناء ما داقرأ دخل ارسلان ابتسم بوجهي.
ارسلان: بعدج گاعدة
غياهب: اندمجت بالقراءة ما حاسة.
يگلك خوفك من قارئة الكتب
اممم لان تكرن واعية و ناضجة اكثر
بالضبط
أخذت فراس المُجاهد؟
ذب نفس ماحسر و نزع الكوت مالته گعد بصفي و بعيونه الحزن.
أي و خطية نام تعبان.
ما أدري اذا من حقي اسئل او لا لان شي مو يمي بس داحس الموضوع قاهره
كلش غياهب كلش گعد بالشارع يبجي.
عفت الكتاب إلى بايدي نزعت نظاراتي مستغربة.
خير ان شاء الله؟
امه السبب
شبيها؟
بدأ يحجيلي بالتسلسل شنو إلى صار و مقهور عليه.
زوج امه من الطفولة معذبة عاش عيشة الكشرة وياه.
نوب عود صحنا الامه لو ما صايحيلها احسن اجت و كسرت بالرجال
گدام الموجودين تگله كل ماتجي اصيرلي مشاكل و ما اريد بيتي يخرب.
طبكت حواجبي بتسائل.
لا تگلي گالتله بعد ما اريد أشوفك؟ و لا تجي.
ضرب ايد بايد بأسف.
اي والله غياهب للأسف هذا اللي صار
من كل عقلهاا هااي؟
كاللها اذا مهددج احجي ما حچت و الله العالم بعد احنا ما گاعدين بنص بيتهم و لا ندري بالداخله بس عيَّ اختارت رجلها على ابنها.
يلا عادي حالها حال زمُرد طز بهيج امهات حرامات يتسمن امهات ذني.
تمددت و تغطيت مغمضة عيوني، گلبي يأذيني من أشوف أحد سبب كسرته امه لو ابوه غصتي أعتلت بلعومي.
ارسلان: غياهب؟
غياهب: اممم
شبيج يحيلي
مابيَّ شي اريد انام
و صوتج و غصتج هاي الخانگتج.
اختنگت من الوضعية.
شلون گلوبهن تنطيهن يأذن أولادهن ما يعرفن الكسرة إلى يخلنها بينا
تبقى للكبر حتى لو گبرنا ورب عوضنا راح تبقى بداخلنا غصة منهن والله.
تعاي تعاي.
لمني بحضنه ضميت وجهي برگبته ابچي و هوَ ساكت يمسد على شعري بهدوء.
تروحين تزورين ترتاحين.
ابتعد عنه رافعة راسي اباوعله عيوني مغوشة بدموعها.
يعني نروح اني و وياك.
اي و مجاهد ويانا هم راد يروح بس ما خليته دنيا ليل و وضعه تعبان.
تمام بس شوگت
باجر الصبح نطلع
بس اني ما اروح للمگبرة.
باوعلي بأستفهام.
ليش؟
ما احبها ارسلان اخاف منها روحوا انتم و اني ابقى بالامام
چا تاليتنا كلنا بيها عليمن نخاف
اني ما اخاف من الموت بس ما أحب أدخل للمگابر.
چا گولي ما تجيني اذا أموت.
لا تحچيي هيج.
حضنته خايفة من هاي الفكرة اني مو بقوة أفقد أحد أحبه نزلت دموعي.
هسه شبيج تبچين خبلتيني.
ليش تحچي هيج؟
عزيزة عيوني هذا انا يمج.
لا تحجي بعد هيج فدوة ارسلان
هايهية بابا يلا نامي و ارتاحي عوفي كلشي بيد رب العالمين
گوم بدل
خوش هسه أجيج.
نهض من مكانه غير ملابسه و طلع يفرش اسنانه رجع حاضني ما ادري شبيه النوم جفاني و مختنگة همستله.
ارسلان
بعدج ما نايمة
انتَ ليش گاعد
تدرين من سافرتي رحت الاهلي للنجف
حچتلي العلوية
أنتهيت غياهب من شفت كبورهم واحد بصف الثاني.
الله يرحمهم.
بس بعد ما وصلت الهم رجليَّ تثكل من أوصل الهم.
گعدت على حيلي و هوَ نايم متمدد بمكانه ايده بايدي عضيت شفتي خايفة
من ردت فعل سؤالي بس خاطرت و سئلت.
ليش ما تجرب تدور على أبوك فاروق ما تعرف عايش ميت طلع من السجن لا.
كل ملامحه تغيرت و صارت غاضبة طبك حواجبه.
شجابه على بالج؟
هيج ما اقصد شي
ما أتشرف بي و إلى علاقة بي هوَ حتى العشيرة متبرية منه.
يعني انتَ عندك عمام تعرفهم؟
سدي الموضوع غياهب.
ليش تتهرب من الماضي لازم تواجهه.
عاط بي بصوت كمزت بمكاني متفاجئه من ردت فعله.
گتللج عووووفي الموضوع ليشش تلحين بي؟
تمام أعتذر مو قصدي.
درت وجهي مستغربة من ردت فعله ليش ما يريد يوصل الهم و هوَ من
عشيرة معروفة اكيد عنده عمام سمعت طبكة الباب انسد طلع، اتندمت
لان سئلت هسه شكو اسئل اني بس ليش مايريدهم و لا يريد شي يربطه
بأهل أبوه، بقيت احوص بمكاني ما گدرت انام و لا تغفى عيوني.
الى ان رجع مثلت نايمة احس بحركاته باس عيوني.
ارسلان: نمتي؟
ما انطيت ردت فعل بقيت أمثل هالشي مشى ايده على شعري و نزل بيها الملامحي.
اسف لان عليت صوتي عليج بس هذا الموضوع ما أحبه و لا أحب احجي
بي انا كسرتي تضاعف كسرتج و كسرة مُجاهد من أمهاتكم، منو راح يتقبل
ابن فاروق و مرته إلى خلوا عكل ناس
و سمعتهم تنداس هم اساس دمار حياتي اتمنى لو الله ماخذ روحي.
من الولادة من طلگت بيَّ امي و لا اعيش عارهم و اتحمل عقاب غيري اخواني
وخالي هم كل اهلي هم بس إلى يهموني بهل الدنيا و انضفتي انتِ لهل
القائمة ماعندي غيركم، اريد اعيش علمودكم و كلشي ما اريد من الدنيا.
اسمعله و ميتة قهر و اني داسمع الكلامه لعد شگد خجلان من فعلة أمه
و أبوه و غلطهم الفادح، فتحت عيوني درت عليه اباوعله عيونه الحزن تارسهن فتحتله ايديَّ مبتسمة.
تجي بحضني؟
بدون ما يحجي ذب ثكله بحضني بست شعره حاضنه راسه الصدري.
غياهب: اذا تريد أصيرلك حتى عشيرة مو بس أهل.
زعلتي مني لان علت صوتي عليج
اممم شوي بس يمكن هم الغلط مني ف خلينا ننسى الموضوع بعد ما انفتحه.
غياهب
عيونها
صوتج حلو من تقرين قصائد.
يگولون.
أقريلي قصيدة ادري بيج ما تحبين الاغاني.
ابتسمت الكلامه.
انتَ سامع صوتي؟
اي من خذيتج الذاك البيت و تعاركنا جنتي مشتاقة الابوج و قريتي قصيدة
شتحب أقرالك
بكيفج
غمض عيونك.
باوعتله غمض عيونه، غمضت عيوني بديت أقراله من أحد القصائد الحافظتها ر اتي امشي بايدي بنص شعره.
-يريح الهاب وياك وديني
أزور أحباب غياب عن عيني
سفرهم طال و انا بهل الحال
أزور أحباب غياب عن عيني
عليله و ذاب دلالي
خلص ب الاه و الونه
ابوية حسين فارگني خبر لليوم مامنه.
انفاسه ثكلت عرفته نام غمضت عيوني و بهل الليلة كل واحد بينا غمض عيونه.
و بداخله الف حسرة مو بس مُجاهد إلى نام مقهور من امه مكسور و مخذول من أقرب الناس اله.
للصبح گعدت قبله و هوَ على نفس نومته بدلت و نزلت جهزت الريوگ الهم خابرت حنين أشوفها.
غياهب: صباحو چفصة.
حنين: يا صباح هذا ليش منو نايم.
ليش؟
هذا ابن اختج من هسه مستهتر البارحة ما خلانا ننام اريد ابچي غياهب.
ههههههههه بس بالبداية انتبهي النفسج هسه نايم مو
اي وراح انام هسه.
ديري بالج على نفسج و على ابنج اني راح اروح ويا ارسلان للنجف
و مُجاهد وياكم مو
وين تدرين؟
مو درغام اتصل عليه لان أستغرب ما أجه النا طلع خطية الرجال عايش مأسات
البارحة وراد يجي درغام الكم بس ما قبل مُجاهد گاله بس ارجع و ارتاح أجيكم.
الله يساعده، مثل ما گتلج لا تصيرين رعنه حنين صرتي ام كل خطوة انتبهي بيها.
اني ما اعرف الكلشي خايفة.
تتعلمين اي شي تحتاجينه گليلي و يمج خالة جوهرة تعتبرج مثل بنتها لا تخجلين منها
ان شاء الله ادعيلي مو تنسين.
من عيوني.
سديته منها رجعت اكمل سمعت صوته ديخابر دخل للمطبخ و جهازه
علي اذنه گعد يحجي ما ادري ويامن بس إلى فهمته من خلال حديثه بخصوص شغله كمل وسده.
ارسلان: صباح الخير
غياهب: صباح الخيرات.
رجع يكتب بجهازه جهزتله صينية الريوگ هوَ و مُجاهد.
يلا ارسلان كملت
عاشت ايدج يابه تعبناج
ماكو اي تعب.
ابتسم بوجهي و اخذ الصينية طلع گعدت اكلت شوية مو كلش اشتهي
بقيت گاعدة انتظرهم يكملون علمود اغسل المواعين و اصعد اجهز نفسي
دخلت اتصفح باحد البرامج شفت ارسلان ناشر صورة الحسن.
و مسوي تاك الدرغام ضحكت هاي شوگت اخذها ما انتبهت عليه، دخلت
لباقي الصور إلى بحسابه دخلت للتعليقات بعضها بنات اكو ضباط هم
معلقين اتوقع اصدقائه دخلت على باقي المنشورات كلام البعض غثني و ضوجني.
دخل وبأيده الصينية باوعتله صفح ما ادري شبيه هنَّ مجرد متابعات
بس نار شبت بوجهي احسها دتطلع من عمق جسمي و ملامحي مر وقت
و اني نفس الحالة دخل مكملين اخذت الصينية بدون ما اباوعله.
ارسلان: شبيج غياهب؟
غياهب: اكمل شغلي و اصعد اجهز نفسي.
ما سئلت عن هذا الشي شبيه وجهج مطعون احمر
حساسية
ما عندج حساسية انتِ شوگت لحگت تصير بيج
ما أدري
غياهب
نعم؟
اتقدم ناحيتي لزم ايدي يباوع بوجهي.
شبيج حبيبتي
مو گتلك مابيَّ شي.
اعرفج من تجذبين
ما مجذبة
جاي تجذبين
خوش
استغفرلله شبيج بابا.
بقيت ساكتة اغسل بالكلاصات و لو بيدي احطهن براسه من حرگت گلبي بقى واگف مكتف ايديه و يباوعلي و اني اغسل اريد اكسر المواعين و اطلع غضبي جبتهن رگع ررگع.
ما الج نية تحچين
لا.
مسوي شي يضوجج يحيلي احچيلي لا تبقين كاتمة
ما امسوي شي ارسلان ما امسوي.
لا الواضح الشغلة مليوصة.
نشفت المواعين عفته طلعت من المظبخ صعدت ابدل فوگاها يسئل هاي لو غياهب.
تنشر صورها و شباب تعلقلها جان انگلت الدنيا طلعت ملابس إلى اجه سحبهن مني.
انطيني الملابس
مو قبل ما تحجين
مو كلنا مابينا شي
واضح ما بيج شي تضحكين على نفسج بهل الحجي تعاي تعاي.
اخذني من ايدي إلى صارت ترجف من شاف وضعي تخبل.
ارسلان: وللج احچييي لاااا تخبلينيي شبيج
لاااا تصيح عليَّ ارسسلان
اسف بس احجي شبيج بابا ليش ايدج هيج ترجف
مابيَّ شي
هم گالت ما بيَّ شي.
ردت أگوم رجع گعدني خازرني.
غياهب
راح نتأخر على الولد عيب.
عوفي الولد و احچي مو شلعتي گلبي
عادي خلي ينشلع.!
اها يعني عاجبج الوضع
كلش يعجبني.
خوش غياهب خليج بعنادج هذا.
رفعت حاجبي و نهضت من مكاني ابدل درت عليه.
گوووم أطلع
شني؟
أريد أبدل
چا ما تبدلين منو لازمج
گووم أطلع من الغرفة بيبي
چا كل يوم مو تبدلين بس هسه صارت اطلع برا
يعجبني
أها أشتغلت الهرمونات
ارسسلان
جوزائية ما عليج عتب التناقض يمشي بدمج
جوزائية و لا الجدي اشتغل من جوا لجوا.
الله يهديج.
خزرته منفعلة.
ليششش شبيه و الله يهديني.
اخذ مني الفستان.
تسمحيلي
بشنو؟
أبدلج.
و شبيه ما عندي أيد
التعاون بين الزوجين حلو
اي حلو بس مو بهذا الشي
لا حلو بكلشي.
نزعني البلوزة يباوعلي بعيون مليانة حب و تقابلة نظراتي المليانة غضب ضحك و هوَ يلبسني بالفستان.
هسه ليش تخزرين.
شعليك
اخ منج يالفوصة، اوگفي.
راح للمراية جاب المشط وگف يمشط بشعري نزلت راسي مبتسمة ذكرت ابوية
من جنا صغار شلون يبدل النا و يمشط شعرنا شما انسوي
ما أنجازي.
كمل و نزل بعيونه يباوعلي شافني مبتسمة.
هاا أبتسمنا شو
ذكرت بابا من چنا صغار هم يبدل النا وينشط شعرنا
اممم حتى انا خواتي چنت امشطلهن
الله
بس بالبداية جان تمشيطي يفشل انسام چنت اسويلها ضفاير و ما ترضى
مليكة تسويلها الا انا و خطية من اسويلها ما يجن عدلات بس هيَّ تفرح بيهن.
أهنيك جنت گد المسؤولية
بس يبقون يفگدون مكان أهلهم.
بقيت ساكتة لان كلامه صح لو الدنيا تغرگنا بحنيتها يبقى اكو فراغ بداخلك.
مستفقد هذا الجانب رفعت شعري طلعت إلى حجاب اشتريت اثنين للاحتياط
ضامتهن وگفت البسه ما اعرف اضبطة اجيت ابجي كل ما اسوي يخرب هوَ وگف يجهز نفسه اجه رجع دارني عليه.
اوگفي انا اسوي الج.
وين تعرف بهالسوالف انتَ
چا شيرادله هوَ
مو مرة ما عرفت اتسوي الي
نجرب
سوي إلى مرتب مو تطلعني أفشل.
بقى يسوي بي و كل شوية فاتحة يگول ها لا مو هيج لا اوگفي عرفت
و كلشي ماكو گام طلع جهازه وبحث باليوتيوب تعلم لفات حجاب و هوَ واگف.
يطبق وياها بكل تركيز كاتمة ضحكتي ماكو هيج والله خلگه طويل لحد
ما ضبطه باوعت النفسي بالمراية مرتبة إلى حطيت ايديَّ على وجهي فرحانة شگد حلو لبست بشت فوگ فستاني و نزلنا.
مُجاهد ينتظرنا بسيارته رحنا بسيارة وحدة صعدت وره سلمت و اتوجهنا الطريق النجف من زمان ما زايرة
هم يسولفون عن الشغل و اني ساكتة اباوع للطريق درت وجهي من شغل
القصيدة إلى البارحة قريتها اله قبل لا ينام رجعت راسي على الجامة و استمتع.
بسماعها كلماتها عالم ثاني مستحيل يصادف مرة اسمع قصيدة اذا ما افكر باهل البيت.
الصمت أحتل السيارة و بس صوت القصيدة مسموع الى ان وصلنا للنجف
اشتريت ازار صلاة لبسته قبل لا نروح للمگبرة زرنا دخلت للضريح الحمدلله
رحنا بيوم ماكو ازدحام قوي زرت و كملت طلعت للمكان إلى اتفقنا نلتقي
بي مالگيتهم بقيت واگفة بمكاني انتظرهم گعدت على جهة اباوع للناس.
صارت گدامي بنيه صغيرة تشبه سراج الشعر اشقر و العيون بحر ابتسمت.
بوجهي رديتلها الابتسامة شافتها امها باوعتلي ضحكت حطت بايدها كعكة
و باكيت عصير اشرت الها اتجاهي اجتني البنيه تركض مدت ايديها الصغار الي.
خالة ماما دالتلي وديهم الج.
نزلت المستواها بستها بخدها.
غياهب: گولي الماما تگول خالة شكراً.
اخذتهن منها راحت تركض الامها تشاور بيها و ترجع تباوعلي ضحكت
علي حركاتها شوية و اجوا الولد باوع ارسلان الايدي.
ارسلان: هاي منيلج؟
أشرتله على البنيه دار يباوع عليها هوَ و مُجاهد أبتسموا الها رفعوا
ايديهم لوحولها بالسلام غطت وجها تضحك دار وجهه ارسلان يضحك.
چنها سراج
حتى اني گلت هيج اول ما شفتها
الله يحفظها الاهلها، احنا راح نروح للمگبرة تروحين؟
بقيت ساكتة مترددة بحياتي ما داخلة مگابر بس اشوفهن مرات بالجهاز.
تمام اروح وياكم.
هز براسه و طلعنا بالسيارة نمشي ما اتوقع شخص يدخل الها و ما ايشوف.
الصور و كلشي بيها و يطلع منها مرتاح گلبه ينمرد مرد.
ارسلان: مُجاهد بالاول خلي نروح وياك.
و صدگ اول شي رحنا الابو مُجاهد الله يرحمه چان بالفتحة الثالثة
و الثالثة صايرة شي فوگ شي كلش ضكة ردت انزل و مُجاهد گال.
مُجاهد: لا خوية لا تنزلين غياهب.
بقينا نباوع اني و ارسلان بي.
لأن شوية گبر ابوي بعيد و صايرة خنگة هنا اقري الفاتحة وهديها الكل الموتى.
ارسلان: چا هيج الموتى يتعاركون عليها شني.
صارت شبه ابتسامة على ثغر مُجاهد.
مُجاهد: ولك شيتعاركون هيَّ فاتحة.
ضحك ارسلان قفلوا السيارة عليَّ و دخلوا جوا بقيت گاعدة و اباوع للناس
الي جاية تزور امواتها قريت الفاتحة و اني بالسيارة گاعدة هديتها للجميع
بس ما أدري توصل او لا بهيج طريقة، ساعة كاملة مرت يله رجعوا.
و مُجاهد للاسف جان وضعه تعبان عيونه منتهيات من گد ما باچي صعدوا
ساكتين و طلعنا الاهل ارسلان بغير فتحة وصلنا الهم و السيارة ما تدخل كلش.
يمهم ما رادوني انزل بس هالمرة صممت انزل وياهم جبت ويايَّ قران من بيتي يگولون زين للميت.
نزلنا نمشي احنا الثلاثة و صوت القران مسموع بالمكبرة يخلي جسمك كله
يقشعر و أكو صوت يگول يا بني ادم أعمل خير بدنياك يفيدك بأخرتك
وگف ارسلان گدام گبر طفل صغير مخلين صورته الطفل عبالك طير ذهب
قراله الفاتحة بقى يباوعله ورجع النا يمشي بصفي.
غياهب: تعرفه؟
ارسلان: لا بس هذيج المرة من اجيت شفته
الله يرحمه كلش صغير.
الموت ما يعرف لا صغير و لا جبير.
وصلنا قريب من أهله و أتبسمرنا بمكانه من إلى شفناه گدامنا، بنيه مخلية
راسها على واحد من الگبور و ايدها الثانية على الكبر الثاني باوعنا بجهة
هذولة الخال و غرام معناها هاي البنيه نفسها ناز ماكو غيرها، بلع ريگ ارسلان
وراح الهم يمشي سريع وگف گبالها رفعت راسها و دموعها تارسات
عيونها گعد گبالها ارسلان يباوعلها بقهر وحزن درت وجهي على السؤال إلى توجهلي.
مُجاهد: هاي اخت ارسلان الصغيرة؟
غياهب: أي ناز
هيَّ تعالجت مو
أي الحمدلله
الحمدلله خطية ما تستاهل چنها وردة حرامات شبابها يدمر
تعبوا و هم يعالجون بيها
المهم گدروا يرجعوها مثل قبل.
مشيت الهم وگفت يم گبورهم گلبي ممرود على هالشوفه و المنظر شگول
عليكم يا أجدادي فتحت القران على يورة يس بديت أقرأ بيها و شهگات
ناز تشگ الگلب و هيَّ تعاتب بأهلها بصوتها الهادئ تهمس همس بعتابها.
و هنا أدركت إلى ايشوف مصايب الناس تهون عليه مصيبته
كملت و گفت على جهة بصف العلوية و هم على نفس الگعدة ارسلان يريد يمد ايده يلزمها بس ما يگدر.
ارسلان: ناز خوية.
اجه الخال يمسح بدموعه على حالتها ناز أذتنا بعتابها لزمها يريد يگومها ما تقبل شهگت بصوت عالي من بين دموعها.
ناز: فدووووة عوووفوني.
رحت وياه لزمتها حاضنتها البنيه أنتهت و هم جايين قبلنا انطتنا
غرام بطل مي غسلت وجهه وشربتها و شهگتها لازالت بصدرها.
غياهب: حبيبتي ناز ما ايصير نسوي هيج يتعذبون من يشوفونج هيج.
رفعت ايديها الوجها مغطيته تبچي بصوت عالي حچي نضحك بي على أنفسنا
اذا مانبچي و نصرخ و نطلع ضيم گلبنا ما نرتاح درت على ارسلان مغطي
وجهه يم گبر ابوه و اكتافه تهتز يبجي بصمت.
موقف أذاني اباوع الزوجي إلى انتهى لو الاخته إلى صوت بچيها
يشگ الگلب لو گلبك حجر هم تنفهر گوا گوموا ناز و خذوها للسيارة.
غياهب: ارسلان.
وخر ايده من وجهه يمسح بوجهه صوته مختنگ باوع المكان ناز دار بعيونه عليَّ.
ارسلان: وين ناز؟
اخذها الخال للسيارة انتهت كلش مو مال تبقى بعد.
اجه صوت مُجاهد.
مُجاهد: شد حيلك خوية الله يرحمهم.
اخذ مي ورد يمكن الخال جايبه رشى على كبورهم طلعنا منهم رحنا انشوف
ناز جانت گاعدة مرجعة راسها لوره و دموعها تنزل بهدوء دخل للسيارة
ارسلان يمها يحجي وياها ابتعدنا يحجون براحتهم و عيوني عليهم.
غرام: لو ندري بيكم تجون جان اجينا سوا
غياهب: صارت مفاجئة ما مخططين الها، شجابكم انتم
ناز البارحة گلبت البيت علينا بالبچي تريد تجي راد عمر يجيبها
بس خالة گاله انتَ ابقى بالبيت لان احنا هم مطلوبين زيارة علساس
يجون هوَ و نيروز بس مليكة رجلها ما تگدر بقوا يمها.
خيرها بغيرها.
رجعت عيوني تباوع للاخ و اخته هوَ يحجي وياها و هيَّ دموعها تتسابق
العيون انگلبت دم صارت عيوني على مُجاهد الواگف يدخن و يباوعلهم صافن.
من انتبه عليَّ نزل راسه منحرج، نزل ارسلان و كلها رجعت للسيارة اتفقنا.
نرجع للامام نتغده هناك و نرجع لبغداد لان الخال يگول عنده نذر ما ادري مال
شنو رجعنا للامام گعدنا و مُجاهد ويانا بس گاعد بجهة يم ارسلان اجه الخال
من بعيد شايل كيس چبير ضلينا نباوع كلنا و غرام ضامة ابتسامتها.
ارسلان: شنو هذا خالي؟
كُميل: جكليت
الشنو؟
ناذرة
نذر الشنو المن
هسه انتَ شعللليك.
باوع للعلوية.
كُميل: گومي علوية نوزعه انا و وياج.
راحتله غرام و اخذت ابنها وياها انباوعلهم من بعيد يوزعون للناس گعدت بصف ناز الترمش بعيونها بهدوء.
غياهب: جوعانة؟
هزت براسها لا.
اممم زرتوا؟
صوتها مبحرح ردت.
اي قبل لا انزوح للمگبرة.
لعد طالعين من وگت.
بقت منزلة راسها و الحجاب الاسود بارز بياضها و جمالها.
ارسلان: اگلج غياهب تعرفين ليش جاي يوزعون
غياهب: لا بس يمكن محصلين مرادهم و ناذرين.
وفضوووولي شلون
هو واضح نادزين
يجوز.
كملوا ورجعوا باقي شي قليل وزوعوا النا گاعدين بقينا، أذن الظهر صلينا
و سراج اتنحس كل شوية باچي شلع گلب امه اخذه منها ارسلان و هوَ لوتي خاتل بحضن ارسلان ما ايريد احد.
مُجاهد: هههههه شو هذا متعلق بيك.
ارسلان: ابني هذا شلون ما يتعلق بيَّ.
رد الخال.
كُميل: و انا فد نعااال.
ضحكوا راح جاب غده انجمعنا الكل ياكلون ما اكلت شي لعبانة نفسي بس تفاحة.
ارسلان: غياهب ليش ما تاكلين.
غياهب: ما ادري لعبانة نفسي مالي نفس اكل شي.
اتقرب إلى اكثر همس.
شبيج؟ يوجعج شي
لا والله مابيَّ شي بس ما اريد اكب
من نرجع نروح للدكتورة لان انتِ حتى البارحة لعبت نفسج من السيارة رغم سيارتي مابيها شي.
اي والله بس احب صايرة أحب عطرك.
ضحك يباوعلي.
شنو هاي
البارحة من انتَ نايم اشم بيك شم و احس ما شبعانة.
جعل دومج تشمين عطري.
ضحكت بصمت لان عيب الناس گاعدة و احنا نتهامس بين ماكملنا.
جهزنا نفسنا نرجع الخال و البنات گالوا راح يطلعون الكربلاء باجر يرجعون
ودعناهم و رجعنا البغداد، وصلنا مُجاهد البيتنا و طلع البيته ردت ادخل
للبيت صار وجع براسي قوي عيوني غوشت بلعت ريگ
و جسمي
احسه مات لزمت بالباب انتبه عليه طبك حواجبه بأستغراب لزمني من ايدي يمشي بيَّ الداخل البيت.
ارسلان: مو مال تبقين هيج خلي نروح للمستشفى
غياهب: لا هسه أصير أحسن
لا غياهب گلت هسه عوفي العناد.
غسل وجهي و نشفه شالني طلع بيَّ حطني بالسيارة طلع ابوية شافنا
اجه يباوعلي يحجي بنظرات قلق وگف يم باب السيارة.
سلطان: شبيج بابا حبيبتي.
لزمت راسي جاوبه ارسلان.
ارسلان: والله ما أدري عمي چنا بالزيارة هسه رجعنا شو اتخربطت مآخذها للمستشفى.
صعد ابوية بصفي و أشر الارسلان يصعد.
سلطان: أخذنا للمستشفى إلى تداوم بي وجدان.
لمني بحضنه يقرأ على راسي ايات ما تحملت ذبيت من راسي بالسيارة لعبت نفسي فتح الجامة ارسلان ر هوَ يگول.
ارسلان: فدوة فدوة الج لا تهتمين.
لحد ما وصلنا للمستشفى روحي طلعت اجتتنا خالتي دخلتني الدكتورة
صديقتها نومتني بمكاني بدأ بالاجراءات و الفحوصات سوولي تحاليل
مر وقت بين ما طلعت التحاليل رفعت راسها الدكتورة.
الدكتورة: صدگ تحجون وجدان البنيه حامل بالشهر الثاني.
فتحت عيوني بتعب ويا كلامها باوعتلي خالتي لمعت عيونها بالفرح رجعت اتأكد كلامها ويا الدكتورة.
وجدان: صدگ دكتورة يعني غياهب حامل؟
اي والله هاج شوفي.
انطتها التحليل اتشوفها اجتني خالتي حضنتني و اتبارك إلى بينما اني
بعدني بصدمتي حامل؟ سمحوا الابوية و الارسلان يدخلون دخلوا اثنينهم نفس الخوف و القلق بعيونهم اتجاهي.
ارسلان: دكتورة شبيها زوجتي؟
الدكتورة: كل خير ان شاء الله
ما فهمت؟
زوجتك حامل و بالشهر الثاني.
طغت ملامح السعادة ملامحه ابوية نفس الحالة اتقدم ابوية باس راسي يضحك.
سلطان: ههههه وحدة صارت ام و الثانية راح تصير ام الق الحمدلله
ياربي خليتني اشوف هاليوم مبروك يا بعد ابوج.
ابتسمتله خجلانة بعد ما استوعبت الوضع.
غياهب: يبارك بيج بابا.
طلع الكل بقينا اني و ارسلان سحب كرسي گعد يمي لزم ايدي قبل باطنها.
ارسلان: هسه انا شلون أجازيج؟
غياهب: ما فهمت يعني ليش
راح تخليني اصير أب و أعيش شعور الأبوه.
اممم بس انتَ عشتها ويا أخوانك
شي عن شي يختلف هذا إلى راح يجي من دمي و الرابط إلى راح يقوي حبنا.
قرب نفسه باسني بخدي دفعته بخفه اضحك.
ايععع لا تبوسني لان استفرغت بالسيارة و احس بنفسي صارت ريحتي مو طيبة
احبج بكل حالاتج
گول والله؟
والله.
لعد تعال خليني أشم عطرك أحس نفسي اتنسى على عطرك مو على شي ثاني
هللشي من صالحي راح اشبع أحضان
ايااا فاسد.
رجعت الدكتورة النا طمنتنا و لازم اكل و انطت كم نصيحة بخصوص.
الحمل اللي اي دكتورة تنصح بيها الحوامل رجعنا للبيت اهلي ما قبلوا يدخلون دخلت جوا باوعت عليه.
غياهب: ارسلان أغسل سيارتك صارت بيها ريحة مو طيبة رغم منظفها
اي يحيلي هسه اغسلها تعاي اتمددي لو تصعدين للغرفة.
نعسانة كلش راح اصعد فوگ.
ما احس غير انرفعت شايلني صعد بيَّ حطيت راسي صدره.
هاي راح تدللني هيج لان حامل
أدللج حتى لو مو حامل
عفية لان بس أشوفك تدلل على مصلحة تصير خلافيات بينا و يمكن أطلگك ديربالك.
فوصة مو بيدج
المسودن
رحم الله والديج
هلو بيبي.
حطني بمكاني غطاني سحبت مخدته حضنتها اشم بيها حتى اني متفاجئة
من نفسي صرت اريده يمي اربعة و عشرين ساعة.
غياهب: مو خوش سالفة صرت احضن بالمخدة و أشم بعطرك.
اغسل السيارة و اجيج بدلي لا تبقين هيج ما ترتاحين.
نزل جوا
علمود سيارته بالدفرات سحلت نفسي غيرت ملابسي ورجعت المكاني
جسمي نحلان وخرت الكانولا إلى بايدي غمضت عيوني و السعادة.
منصوبة بنص گلبي، و هيج مشت أول أشهر من حملي بالضيم كلش تعبت
بيها اكل ما اكل اي شي اكله اذبه على المغذيات ايديَّ أتزرفت تزرف
من الكانولات من ارسلان يروح الدوامه اروح يم اهلي و من يجي هوَ يتعذب بيَّ و للاسف مو بيدي.
غرام.
قدمت على الجامعة لان جانت باقيتلي سنة وحدة و ناز تدرس للخارجي
الولد يجيبون بالكتب و الملازم و مستلميها عمر و نيروز مستلميها يدرسون بيها مرات توصل مرحلة تبچي بسبب عقلها يستصعب المواد.
ناز: مجاااي افهم اووووف.
عمر: بس فرقي بين الفاعل و المفعول به
راح ارسب ماا افهم
يابه بس افهمي و فرقي بينهن الفاعل مرفوع و المفعول به منصوب.
نيروز: شوفي ناز راح اسئلج و جاوبيني ها؟
هزت براسها و دموعها بعيونها.
الفاعل بشنو يرفع؟
بالضمة
و المفعول به؟
بالفتحة او الكسرة او الالف او الياء.
صفگت نيروز بحماس تشجعها.
عفية بعددد ليش مستصعبتهن.
اكررررره العربي يدووخ.
عمر: انتِ مصعبتها المادة لان القواعد لازم تفهمينه فهم.
رجعوا يدرسون ببها المعلومات بصعوبة عقلها يستلمها لان من زمان تاركة
الدراسة دخل كُميل هوَ و سراج چانوا برا باوعت الابني طبكت حواجبي
بأستغراب مبرطم و عيونه تلمع بالدموع رحت عليه اخذته حضنته.
غرام: شبيه كُميل؟
كُميل: چنت أشاقة وياه و الزهرة ما عبالي يفهم عليَّ.
ليش بشنو اشاقيت وياه؟
گتله ارسلان راح يصير اب و بعد ما ايريدك شو هذا برطم شمدريني يفهم.
صدددگ تحچي؟ اكو واحد يحجي ويا طفل هيج وانتَ تعرف هوَ متعلق بارسلان.
عمر: أحسلك ترزلت خالي.
كُميل: خليك بشغلك لا اجي تدري شگطع الخاطر مرتك محترمك.
ضحكت نيروز و هيَّ تشرح الناز گعدت اباوعله يمة ابني هوَ شفهمه بهيج سوالف.
عمر: خالي ارسلان صارله اسبوعي ما شايفي و هوَ مُجاز مو بالدوام
ولك مرته خطية حملها متعبها و عايشة على المغذيات وعطر أخوك.
غرام: فضحت البنيه ساعة السودة إلى سمعت اتصالنااا.
كُميل: هسه شحاچي انا.
اندگ باب البيت راح كُميل يفتحه گال عمر.
عمر: انا باب بيتنا من يندگ الزم گلبي لان لازم جايتنا مصيبة مابيها مجال.
نيروز: يمكن ارسلان او رماد گال يريد يجيني.
دخل كُميل خلقته مگلوبة باوعت على الوراه هاي نفسها البنيه فاطمة؟ الي
قبل مرة اجت هنا نفسها الساعدها ارسلان وگفنا اني و نيروز ماتعرفها عمر بقى على نفس گعدته.
عمر: خيررر يا طير؟ شرايدة.
فاطمة: السلام عليكم.
محد رد السلام بس اني و البنات.
كُميل: خالي انتِ مل توبين من سوالفج المكسرة عاجبج ارسلان يكسر ظهرج.
والله انجبرت اجي لان محتاجه مساعدته
جاوبها عمر و مبين ما طايقها.
عمر: لو تنطين ما يساعدج روحي للي تشتغلين وياهم هم يساعدونج اخوي ما مجبور يساعدج.
فاطمة: انتَ لااا تدخل احجي ويااا خالك اني.
كُميل: عفواً ليش ما يدخل؟ الجاي تحجين عليه اخوه
تساعدوني او لا؟
وگف عمر بمكانه ورد عليها بنبرة غضب خازرها.
عمر: على أي إساس انسااعدج فوگاها تتأمرين مووو صوجج صوچنا احنا
مدخلين البيتنا وحدة مثلج امشي روحي منااااا لا والله هسه اخابر ارسلان يدوسج بالقندرررة.
خزرت عمر بعد ما سمعت جوابه بقيت متعجبة شهل الصلافة گعد عمر ينفض غضب.
خالي لا تحجي شي الارسلان اجت هاي عوفه حاير بمرته و بيته.
كُميل: علساس راح يهتملها.
هيَّ بعدها تشتغل بذاك الشغل
اي و حتى شفتها ذاك اليوم تمشي ويا واحد كرشه الخشمه.
حتى ما اگدر اگول ذاك المثل لان ينطبق عليها بس هيَّ ما أتوب ادري بيها.
ختولي، اگلكم خلونا نطلع بالليل و مناك نروح انشوف غياهب.
ناز: اييييييي
كُميل: كيفتي بس كون ما تدرسين.
تعبت غير تونسوني تغيرولي جو شوية
الي يسمعج مشرمتهاا كلش بالدراسة
خالوا ترا نتزاعل ليش هيج تحجي عليَّ.
لليل جهزنا نفسنا و طلعنا حتى مليكة ويانا لان ما نگدر نعوفها وحدها بالبيت دخلنا لأحد الاماكن خاص للعوائل.
كُميل: عمير انتَ تدفع الحساب.
عمر شعليك انا؟ انتَ إلى اقترحت نطلع يعني انتَ العازمنا لا اصير قفاص.
تخسى فلوسي جوا رجلين سراج و ام سراج
ديلا عود انتَ أدفع لا تبقى تفتر ورايَّ.
ضحكنا على مناكرتهم طلبوا الاكل جابوا جانت گعدة من العمر بين عائلتي
دگ جهازي طلعته من جنطتي جانت سوزان فصلته گلت من ارجع احجي وياها
بس رجعت تتصل انطيت سراج المليكة فتحت خط عليها مبتسمة.
غرام: طالعة سوزان بس ارجع نحجي.
غابت ابتسامتي و اني اسمعها تبجي.
سوزان: غرام تعاي إلى للبيت.
شصاير بيج شي؟ ابنج بي شي؟
ابوية دينازع فدوة تعاي صارلي شگد اتوسل بيج تجين
تمام.
غلقت المكالمة منها و وضعي كله اتخربط رفعت راسي ال كُميل إلى يباوعلي استصعبت الجملة قويت نفسي و نطقتها.
غرام: تگدر تاخذني البيت سوزان لان. لان أبوية دينازع.
نزلت دمعة مني بأذية الكل يباوعلي هز براسه گام وگف بدون تردد.
كُميل: گومي علوية.
درت على مليكة مختنگة.
خلي سراج يمج
مليكة: روحي يمة لا يضل بالج.
ردت امشي استوقفني كلامها من گالت.
غرام أبري الذمة الأبوج.
باوعتلها انطتني نظرات فهمت مقصدها طلعنا من المطعم صعدنا بسيارته
متوجهين البيت سوزان ابوية عندها لان محد اله، وصلنا و سيارات
صافة يم باب بيتها اكيد ذولة عمامي بقيت گاعدة بالسيارة مستصعبة دخولي بينهم فتح الباب كُميل.
كُميل: أنزلي علوية و خليج قوية و أكسري عيونهم.
نزلت و رجليَّ ترجف عدلت عبايتي دگينا الباب طلع زوج سوزان سلمنا عليه.
دخلنا جوا اتلگتني سوزان اختي عيونها منتهية حضنتني تبچي بينما اني أقوي بنفسي.
سوزان: ابوية تعبان غرام مو أكيد يعيش للصبح.
بلعت ريگ ضاگ النفس.
غرام: الأعمار بيد الله.
دخلنا جوا گلبي يدگ سريع وگفت يم الباب و اني اشوف كل الاشخاص الي
طعنوا بيَّ و مدوا ايديهم عليَّ و ظلموني مشيت لگدام كم خطوة وگفت بنص
الصالة اباوعلهم عمامي و نسوانهم و اولادهم باوعت على الكل سويت
حركة مع الاسف درت على سوزان مخليتهم وره ظهري.
غرام: وينه ابوية؟
اجه صوت عمي منصور.
منصور: هسه عرفتي ابوج شكثر توسلنا بيج تجين لو هسه لان سمعتي بي راح يموت ويصير ورث اجيتي.
غمضت عيوني اسيطر على نفسي ما انهار ذولة شوفتهم
تخليك تنهار
من طغيانهم درت عليه رفعت حاجبي مبتسمة.
غرام: الحمدلله اني مو بعازة الورث عندي عائلة تسوا كل ورث الدنيا عندي، بس الواضح تشوفون نفسكم عبالكم اني مثلكم.
و بكل صلافة تحجين؟
اكيد لان الحمدلله ما سويت الحرام و لا اكلت حق احد و لا ظلمت بشر شي
اكيد احجي بثقة و شجاعة و عفواً يا صلافة تحجي عنها؟ هذا الحق و الواقع مالتكم.
لزمتني سوزان.
سوزان: امشي غرام عوفي، وانتَ عمي ياريت تسكت لان ما اشوف الوگت مناسب ما اتشوف وضعنا.
دخلت للغرفة شايطة بداخلي من اسلوبه كُميل ما حچى بقى ماخذ وضعية
المشاهد ادري بي يريدني اني اواجهم و واوگفهم عند حدهم و ابين الهم مو غرام الأولية إلى تنكسر بسهولة.
باوعت للسرير الموجود و گلبي احسه يريد يطلع من مكانه بقت عيوني صافنة معقولة هذا ابوية؟
المرض شمسوي بي اتقدمت اله بخطوات ثكيلة گعدت بصفه فتح عيونه اتفاجئت من گال.
ياسر: سوزان؟
باوعت السوزان بعدم فهم ليش يگول سوزان اني گاعدة گباله معقولة ما عرفني؟
أشرتلها و خلتني اموت الف موته ويا جوابها.
سوزان: فقد نظره ابوية.
ايدي على حلگي دموعي أخذت مسارها المرض شمسوي بي ماكله اكل مديت ايدي الترجف لزمت ايده.
غرام: ان. اني غرام بابا.
شد بقضبة ايده على ايدي ابتسم بتعب.
ياسر: غرام اجيتي
اي اجيت.
انتظرتج هواية تجيني ردت اشوفج و اشوفن ابنج گبل لا أعمى گالولي صار عندج ولد.
بچيت أكثر على تعبه و حالته اني ليش ما اجيته من قبل ليش گلبي هيج قسى على ابوية.
غرام
هاا بابا اسمعك.
الكلمة گوا تطلع منه يصارع ويا النفس.
أبريني الذمة ظلمتج فوگ ظلمج.
غطيت وجهي بايديَّ ابچي بصوت مسموع ابچي بقهر و أذية شينسي.
ذيج الايام و اوجاعها رديت من بين دموعي.
غرام: مسامحتك يابه مسامحتك مبري الذمة على كلشي.
نزلت ايديَّ من صار صوت كأنما شخص شخر و صار هدوء بالمكان فززني
صوت سوزان إلى صرخت و الموجودين و هم يگولون
انا لله وانا اليه راجعون درت بوجهي شفايفي ترجف دموعي تنزل بدون ماتوگف أردفت بعدم أستيعاب.
غرام: م. ماااات؟