رواية وتيرة الأعرج للكاتبة حوراء السعيدي الفصل الخامس
درغام: الاعرج؟
أرسلان: نعم
لقبك غريب لا بد اله حكاية
-كلشي بالحياة اله حكاية و لابد أن تحكى يوماً.
نزلت نظراتي على رجله سليمة ما بيها شي لأن
إلي يسمع لقب الاعرج أول فكرة تجي بعقله
هو اعرج حق و حقيقي و عنده مشكلة برجله.
الرجل سليمة معناها لقبك فعلاً اله حكاية عجبني غموضك.
گعدنا بأماكنا صرنا نتبادل الحديث بخصوص عملنا
و شغلنا بديت اسئلة عن بعض الاسئلة.
درغام: سكنك وين
ارسلان: بغداد.
شغلك
سابقاً بمنطقة ال.
اهلاً و سهلاً بيك بينا
عزيز الگلب
رجعنا نتناقش عجبني تفكيره من ناحية الشغل مالتنا
و تفوقه واضح، ما غلط مجاهد من گال عنه ذيب
فعلاً عقله عبقري، وگف يريد يروح مد أيده إلي.
النا لقاء أن شاء الله
أن شاء الله
غادر المكان اجه مُجاهد صفك بأيده.
مُجاهد: هااا سيدي شگتلك
درغام: لحد الآن كلشي مُمتاز، بس بعد لازم أنشوف شغله يله نحكم
نشوفه ليش لا
انا جعت و محمد أمشي ناكل شي
يله و هم نخابر عرور طگ أفادي عليه.
نهجم بيت أفادك يالحنين
أمشي أمشي.
وجدان.
طلعت من صالة العمليات تعبانة دخلت الغرفتي الخاصة
أرتاح لأن بعد هم عندي عملية أندگ الباب أستغربت
من الضيف إلى جاي وگفت مبتسمة بأستغراب
سلطان: الله يساعدج دكتورة
وجدان: سلطان؟ اليوم عندنا خيرك
جاوبني بهدوء بس شكله مو مو طبيعي الحيرة مزروعة بوجهه.
اجيت علمودچ
علمودي؟
أيي إذا ما عندج شي اگدر أخذ من وگتج
أتفضل.
صارت عيوني على الدفتر إلى بين أيديه بس ماعندي
معلومة مال شنو هذا بالضبط بدأ حديثنا الغريب.
أريد اسئلج عن كم شغلة
أتفضل أن شاء الله خير.
صفن بوجهي نزلت راسي أعدل بحجابي رجعت
رفعته صار طيف ابتسامة بوجهه شماله هل الرجال.
أسمعنك سلطان شني راح تبقى صافن هيچ
چاا شحلاة الصفنة إذا هيچ.
سويت روحي ما أسمع ولا متفهمة شي تحمحم و فتح الدفتر.
شنو تذكرين من چنا بالعمارة ببيتكم القديم.
ضحكت اهز بأيدي.
بس الذل و الأهاين و الگتل مال أبوي
و بعد
مثل شنو تقصد و بعد.
مشط شعره بأيده و مبينة الرجفة بيهن.
مثلاً اشياء غريبة جذبتج أو أشخاص
رجعت للماضي بذاكرتي أريدن أتذكر شي مثل ما گال بس ماكو
ما أتذكر شي بذاك البيت غير علاقتي بسلطان وضيم أبوي
التفتت اله وأحسه منتظر الجواب مني بلهفة من سمع جوابي رجع غيم الحزن وجهه.
ما أتذكر شي
حاولي وجدان حاولي تذكرين أي شي.
-شمالك سلطان هسه شجاب هل الاسئلة أبالك صارلنا
سنين طالعين من ذاك البيت و من العمارة كلها
ردت اتأكد من شي
شنو هذا الشي؟
راد يحجي أندگ الباب باوعنا أثنينا على مصدر الصوت
چان دكتور سامر أحد الدكاترة إلى موجودين هنا بالمستشفى ويايَّ.
وگفت احتراماً اله.
وجدان: اتفضل دكتور
سامر: زاد فضلج دكتورة بس أجيت أتناقش وياج
بخصوص المريض إلى اجانا اليوم إذا عندج مجال.
ابالي والله بس أعذرني لأن أنشغلت و عندي عملية
چنت مقررة بس أكمل أجيك حالياً يمي ضيف أكمل و اجي.
ماكو مشكلة دكتورة كملي راح اكون بأنتظارج.
طلع باوعت السلطان الگاعد بمكانه ما أتحرك و ملامحه
مدخنات أعرفنه عشگ الطفولة هذا حافظته حفظ گام وگف.
سلطان: أنا أترخص منج دكتورة أخذي راحتج أخذنا من وگتج أكيد مشغولة.
وجدان: لا بس.
رفع أيده ماخلاني أكمل.
أخذي راحتج
طلع من الغرفة گعدت بمكاني متعجبة شماله هذا الشيب
تارس راسه و يسوي سوالف المراهقين رجعت الشغلي
و اگولن ليش يسئل عن بيتنا القديم و يا أشخاص قصده.
غياهب.
گاعدين على السفرة ناكل ساكتين و كل واحد بينا
صافن بشي إلى أن أبوية كسر حاجز الصمت.
سلطان: شعجب هل العطلة ما ابالجن أتسافرن.
جاوبته و أني اكل.
غياهب: بالنسبة إلى لا.
هز براسه متفهمني، دار الحنين إلى ما أدري شعجب ساكتة مو من طبيعتها.
حنين: اني هم ما أريد بابا
سلطان: بكيفجن بابا.
ابتعدت عن السفرة مكمله أكلي أبوية عيونه بالصحن
إلي گدامه، أشرتلي حنين بأشارة بمعنى أجل إلى أريد.
احچي بس لشوگت مثلاً نبقى نتردد نسئل وخايفين.
بابا عادي اسئلك سؤال و يكون جوابك صريح النا
أسئلي
حنين دارت وجها خايفة من ردت فعله.
شنو السبب إلى منعك تتزوج خالة وجدان وانتَ حب
طفولتها وحبك، متأكدة أكو سبب قوي منعك و خلاك
تخطي و تجازف هيج و تكسر گلبهاا.
رفع راسه مرجع الصحن إلى گدامه لگدام أكثر و عيونه
أثبتت ناحيتي صافن بيَّ عضيت شفتي الحنين
إلي حسيتها راح تچفص بس الحمدلله التزمت الصمت.
سلطان: ليش هذا السؤال؟
رجعت شعري وره أذني خافية توتري منه
لأن أبوية يخوف من يتعصب.
غياهب: صح الموضوع ماضي و خاص بيك بس أحنا
يهمنا نعرف إلى صار من سنين صارلكم سنوات متعذبين
نقر بأطراف أصابعه على الميز بخفه و گال.
سدن الموضوع ولا تفتحون الماضي.
بس يا بابا م...
ضرب الخاشوكة بالصحن كمزنا اني و حنين
و أحنا بمكانه و عاط بعصبية.
گلتتتتت سدوووووا الموووضوع غياااهب.
عافنا و دخل الغرفته باوعت الحنين عيونها مدمعة و وجها كله انگلب.
شبيچ حنين؟
حنين: ليش تسئلينه؟ تدرين بي ما يقبل ينفتح
هذا الموضوع ولا يقبل أحد يتناقش بي
و شگد ينرفزه.
أيييي؟ و لشوگت يبقى مطمطم كلشي.
عفتها و نهضت من مكاني رحت وراه دگيت باب غرفته
ماكو صوت رجعت ادگ بي طول يله فتحه، شافني و رجع
الداخل الغرفة بس ترك الباب مفتوح دخلت وراه سديته.
دار وجهه إلى موجه كلامه.
سلطان: غياهب انا علمتج تصيرين قوية
و جسرة بس صايرة أكثر من اللازم.
غياهب: يابه يا جسرة، مليت من غموضكم هذا كل واحد
يحمل وراه أسرار و أني متأكدة هسه مثل ما شايفتك أكو سبب
قوي جبرك تسوي إلى صار احچي وريح گلبي ليش متحمل العذاب وحدك.
أطلعييي برررا غياهب عوفينيي.
واجهني بالحقيقة ليش تريد أعوفك خالتي
و ما واجهتها
و كسرتها و لليوم بسببك تموت الف موته بداخلها
أنتَ عبالك من رجعت عاشت حياتها يعني نست كلشي لاا غلطان.
أتقربت اله لزمت أيده أنظرله بنظرات تحمل التوسل.
أحچيلي أحلفك بمعزة بناتك بگلبك.
تغيرت ملامحه بعد كلامي.
ما راح تتحملون الحقيقة.
حچاها بنبرة هزت گلبي يا ترى شنو الحقيقة إلى يحاول
ما يكشف عنها فزيت من أفكاري على صوته.
سلطان: غياهب
بسرعة جاوبته كل ضني راح يحچيلي.
غياهب: هااا بابا راح تحچي؟
هز راسه بحركة بمعنى لا أتقدم بخطوات للميز إلى گدامه طلع منه
الدفتر إلى مانع أي بشر يتقرب اله أو يلزمه حچى و هوَ يأكد بكلامه.
هذا الدفتر يصير عندج باليوم إلى أصير بي جوا التراب
ذب حسرة و هوَ يكمل، غياهب هذا الدفتر بي أجوابة كل اسئلتج أنتِ و أختج.
بلعت ريگ بخوف أردفت من بين ضياعي بكلامه.
بديت أخاف بابا.
أبتسم بوجهي لزم أيدي باسها و بدون ما يحچي طلعني
من الغرفة و قفل الباب عليه بقيت واگفة بمكاني فترة أفكر بكلامه.
رجعت الحنين و كالعادة اجت رسالة من أحد إلارقام
إلي هل الفترة شغلها بس رسائل وگفت اقرأ بالرسالة المكتوبة.
من نفس الرقم إلى دولي صوتج يرهم تغنين من اغاني ياس خضر.
بس سرعان ما قريت المكتوب بحلقت عيوني بصدمة من كاتب كلام عجزت أفسره.
المجهول: أولريش المُلتقى السبت الساعة
6: 06 محدد الساعة.
باوعت للتاريخ اليوم خميس يعني بعد يومين كتبتله.
غياهب: إذا چان هذا المُلتقى يخلينا نتعرف عليك ليش لا بأنتظارك.
لزمت جهازي عاصرة عليه بقوة لازم أعرف منو هذا
و شيريد مني بالضبط و ليش كلامه كله الغاز متفهم شي منه.
رغم عقلي بس عجزت أفهمه، و بنفس الوقت راح من بالي
هو شلون يعرف أسم أولريش الخاص بيَّ مافكرت بي.
دخلت يم حنين تلم بالاكل مجرد نظرتلي فهمت
ما حصلت أي جواب من أبوية، أجه يوم السبت
وذني اليومين چانن خاليات من أي شي دز گال.
المجهول: الموقع راح يوصلج.
بقيت بغرفتي مجهزة نفسي لابسة انتظره يدزه اهز برجلي سريع
طبعي هذا من أكون بحالة انتظار أو عصبية
و ما اگدر احجي.
دز الموقع وگفت بسرعة لبست حذائي وسحبت.
جنطتي نزلت سريع صارت بوجهي حنين.
حنين: هاا خير وين
غياهب: عندي شغلة أكملها و أرجع ما اتأخر.
عبرتها مشيت كم خطوة أستوقفني سؤالها.
أبوية يدري بهاي الطلعة؟
أضطريت أنجبر اچذب عليها لأن هوَ طالع ماعنده علم بشي.
أيي شبيج يدري قابل وين رايحة قابل هنا بالمنطقة ما أبتعد تعالي اقفلي الباب ورايَّ.
طلعت سريع علمود ما تلزمني لأن أدري بيها راح تكثر اسئلة
و مو وگتها صعدت بسيارتي وأخيراً راح أعرف.
منو هذا المجهول أو ممكن يطلع نفسه إلى أبالي
رفعت جهازي أشوف الموقع يبعد عن منطقتنا ساعة تقريباً بس
ميخالف المهم يا غياهب تعرفين منو هذا إلى صارله فترة دا يلعب وياج.
أسرعت بالسياقة غير عن المُعتاد علمود أوصل
لأن ماباقي شي
علي الموعد المحدد دگ جهازي زفرت نفس عفية
جهاز يا يدگ يا رسائل تندز عليه ما يسكت طلعته
من جنطتي خففت السرعة من شفت المتصل أبويةزد
وگفت بجهه بالطريق هسه أكيد راح يكشفني ويعرف.
طالعة و يسئل وين فتحت الخط عليه.
غياهب: ها يا حَلو.
و لأول مرة من بعد سنوات أسمع نبرة صوته بنبرة مختلفة
اليوم إلى مليانة سعادة و فرح و هو يگول
و يأكد كل حرف ينطقه.
سلطان: راح احجي كلشي غياهب اليوم راح أكشف
كل چذبهم وخداعهم إلى و وجدان راح أرجعها إلي.
أنرسمت أبتسامة فرح على وجهي من خلال وجهه.
و الله؟ و اخيراً بس منو هم و جذب شنو
جاي للبيت و تعرفون كلشي.
سكتت محتارة شلون يرجع و أني ما موجودة أجاني صوته مثل ما أتوقعت.
أنتِ طالعة غياهب شنو هل الصوت؟
هااا أييي بابا طالعة محتاجين شغلات للبيت طلعت أشتريهن و أرجع
چا لو مخابراتني اجيب الچن إلى تريدينه
عادي بابا
أنتظرج بالبيت لا تتأخرين بنيتي و لا تسوقين سريع
حاضر.
غلقت الاتصال و جانب مني أرتاح لأن راح ينكشف كلشي
أسرار من سنين أتكتمت و الكل أنظلم بسببها رجعت
أسوق و استغفر وين صاير هذا بتلفات الدنيا هذا المكان.
كُميل
دخلت للشقة شفتها هندسة وينها هاي رحت شغلت الأضوية
درت وجهي كمزتني واگفة بطولها وعبايتها لأزمة الماسحة بأيدها.
غرام: اااا، هذا أنتَ شسمه عبالي حرامي
كُميل: أشتعل شعلان المشعول
غرام: منو شعلان
كُميل: شعليج عيناي.
شلون عيون عيونك
لا تبقين تتجعبزين عليَّ عود لأن عيونج خضر هوَ غير وجهج بالطول
شنو تتجعبزين
شعليج.
أندگ باب الشقة باوعتلها بشك.
منتظرة أحد ولِچ
لا و أني يعني أنتظر منو؟ حچيتلك كلشي عني.
خاف واحد منا منا هسه يطلع كلشي حچيتي چذب و الزهرة أدفنج هنا.
فتحت عيونها.
ورسول الله ما مچذبة.
رحت للباب أفتحه يا چلب أبن چلب جايني هسه أشرتلها
تدخل جوا دخلت تركض بعبايتها وهيَّ گصيرة عبالك قنينة
ولافة روحها فتحت الباب باوعت للي گدامي.
كُميل: هاي شنو منو جاينا اليوم خالي
أبن أختك
أنكس خلق الله تعال أدخل جوا.
دخل گدامي و أنا رحت للمطبخ اجيبله سم
و حريشي
ماي نسيت غرام جوا درت وجهي واسمع صرختها.
أنفضحناااا عفت الگلاص من أيدي وطلعت أركض الها
دخلت للصالة هاي شوگت طلعت لأزمة الماسحة
ترجف وهذا المطي واگف يدخن مامهتم د
كُميل: شبيچ أنگرررصتي
غرام: منوووو هذا و ليش داخل هنااا
عذرينا عيناي هسه أعرفج عليه شوفي خالي هذا أحب أعرفج عليه ابن اختي الاعرج .
غرام: موقف أصعب من موقف أدخل بيهن عيوني
تباوعلهم أثنينهم واگفين أردفت بخوف. ليش اسمه الاعرج؟
راد يجاوبني كُميل وهذا الاسمه الاعرج رد قبله.
من يمي نخرطت عافيتي من أسلوبه وشلون يحچي.
الاعرج: كثرة الاسئلة مضرة بالصحة.
اچذب إذا اگول ما خفت منه نوب يطگطگ برگبته
صخام الصخمج غرام عفتهم شمرت الماسحة و دخلت للغرفة
أهرول قفلتها أضرب بخدودي اثنين زلم
و بيت واحد ياربي اني وين ورطت نفسي.
نزعت عبايتي شجابني على هالناس الغريبة العجيبة
دخيل أسمك يا ابو الحسنين أحميني مر وقت واني
گاعدة وحدي أندگ الباب جفلت بمكاني رحت وره الباب.
منووو؟
انا كُميل
و شتريد.
أفتحي الباب.
لووو تموت و ليش أفتح الباب فوگاها جايب أبن اختك هنا
ليش تخليني أستخدم غير أسلوب وياج ترا المفاتيح
عندي نسخ منها لا تخليني أفتحه بنفسي بعدين ارسلان راح ماموجود
منووو نووووب ارسلان، صخام الصخمچ غررررام
الغسل الهل العيون إلى تلمع، ارسلان نفسه الاعرج.
صحت بيه ضوجني لأن يغلط.
لااااا تغلط
ولِچ خوووش بس أفتحييي الباب راح تجلطيني
من الله يجلطج خرررب روحك شعلان المشعووول.
فتحت الباب وگفت من وراه مديت راسي.
هااا شتريد؟
شهگت من دفع الباب و دخل گلبي وگع بأيدي مالابسة
عبايتي ركضت سحبتها لبستهاا وهذا ضاربله صفنة بيَّ.
غرام: وينننن صااافن؟
حسيته أنتبه على نفسه تحمحم يمسح بوجهه.
كُميل: اگلج أنتِ وين بيتكم بالضبط بيا منطقة و من أي عشيرة.
ليش تسئل؟ تريد تنطيهم خبر عني مووو
غرام؟
اتجمعن دموعي بعيوني رديت عليه مختنگة.
هااا
خالي انا أدري أنتِ بوضع فاقدة الثقة بالكل
و حقج بسبب.
إلي تعرضتي اله لأن مو شي سهل و مارايد أسويلج شي
بس لازم اتأكد من كلشي يخصج علمود أعرف شتصرف
بخصوص موضوعج قابل تبقين هيج ما اگدر أبقيج
هنا أنتِ بنيه و أنا رجال ما ترهم هيچ.
سكتت لأن كلامه صح و هوَ غريب عني بدون تردد انطيته عنوان منطقتي و بيتي.
أهلي من السادة ال گاعدين بمنطقة ال
مجرد كملت أتوسعت عيونه يباوعلي رفع أيده بصدمة.
أووووگفي أوووگفييي أنتِ شنووو علوية؟
أي.
صفگ أيد ب أيد بدم فاير أول مرة أشوفه هيچ يحچي من أول ما أجيت لليوم.
ووولكم سااادة و جدكم رسوووول الله تغتصبون
وتظلمون بنيه وين تروحون من عذاب الله، الله ينتقم منكم.
عافني واگفة و طلع من يمي گعدت وره الباب حاضنة نفسي
محررة دموعي إلى ما مر يوم إذا ما نزلن بحرگة گلب
شنو مضموم إلى بعد و هذا الرجال ما مجبور يتحمل
مسؤؤليتي شنو ذنبه؟ و يجيب وحدة من الشارع بنص
الليل شهگت بدموعي مغطية وجهي ابچي بقهر وقلة حيلة.
نيروز.
أكبر خطأ يقترفه الإنسان بحياته بحق نفسه من يلتجأ
الطريق الحب بسن المراهقة بهذا العمر المفروض
الشخص يحارب علمود دراسته مستقبله، أحلامه، أهدافه، طموحاته كلها تعتمد عليه.
و أني وحدة من البنات إلى خطأت بهذا الخطأ خطئي بمراهقتي
هذا الشي و اليوم لو أجاني شخص و سئلني شنو رأيج
بالحب بفترة المراهقة راح يكون جوابي اله
فاشل .
لأن احنا بهذا العمر ما ناضجين النضج الكامل ولا مكتسبين.
الوعي الكامل و المطلوب أكثرنا بهيچ عمر ما يعرف
يفرق بين الصح و الخطأ و هذا الشي السبب بأغلاط أغلب البنات
و الشباب وسبب الهم الدمار و الدخول بحالة اكتأب
ونفسية تعبانة مثل ما دخلت بهيج وضع
و عشت مرحلة صعبة من عمري.
خصوصاً أحنا البنات كائن عاطفي و نتعامل بالاكثر بالعاطفة
و يگدر البعض يستغلنا من خلال هل النقطة
و بالاكثر
إلي يكون فاقد الحب من العائلة، الاهتمام اني ما جنت.
فاقدة كل هذا بس مع ذلك خطئت و خليت عاطفتي تتحكم بيَّ و بمشاعري.
و هذا الخطأ علمني درس، تعبت نفسياً و جسدياً
و بعد معاناة گدرت أتغلب على كل هذا و أطلع منه بس
مو و حدي چان أكو من يشجعني و يحفزني
و يفهمني
شخص دخل حياتي لا ارادياً بدون سابق أنذار.
فزيت من أفكاري على صوت أمي.
نادين: نيروز ماما.
نيروز: هاا أمي
ابوج يجي للغده؟
ضربت كصتي لأن نسيت أبلغها أبوية خابرني.
اسفة بس والله نسيت خابرني گال ما يجي
غير تگليلي.
نسيت و داعتج
بقت تباوعلي بشك.
منو ماخذ عقلج و بالج و هيج تنسين
مو أحد.
گعدت يمي لميت رجليَّ چنت مادتهن سويت إلها مكان تگعد أبتسمت بوجها.
بعدج تخافين ترجعين تكررين الخطأ.
ذبيت نفس بحسرة لأن فعلاً من أتذكر أنقهر.
الي شفته مو سهل ولا عادي تعبت بذيج الفترة و كرهت حتى نفسي
كبرتي والصار خلي درس الج.
دخل رماد علينا يباوع مقلص عيونه الزرگ عندنا رماد
طالع على أمي بجماله و صاحب كاريزما
و جسم.
و لا عبالك عمره ما داخل بعده ال 18 سنة مهتم بنفسه و حتى
لحية عنده كاملة و على گولت بابا حتى من يطلع بطولي صاير.
رماد: متجمعات الله يستر من جمعاتجن
نيروز: شغاثك هسه أنتَ.
نادين: وين چنت دايح يالدايح
گعد و بقى يحچي ويناكر بينا.
رماد: يعني اني دايح، والدايح وين يروح أكيد يديح ب أرض الله الواسعة.
بقى هوَ و أمي يتداهرون هيَّ تحجي عليه علمود
دراسته تگله أدرس ماتفيدك غير دراستك
و طبعاً ما تخلى.
الگعدة من تحرشاته وسوالفه التافهة تركتهم يتناكرون
ورحت الغرفتي لزمت جهازي دازلي رسالة.
مشتاقلج نيروز.
بقت عيوني تباوع للرسالة و أحس بنفسي أتغير
من احچي وياه بس بنفس الوقت ما أريد أعيد غلطي
و أرجع أذي نفسي كتبتله وإني أحاول أسيطر على نبضات گلبي.
نيروز: شلونك عمر.
تركت الجهاز و صرت أحچي بيني و بين نفسي و أتوقع
أغلب البنات هيج من يبقون وحدهم يحجون شغلات
بكثرة بداخلهم لأن ما يگدرون يحچونها لأحد
صح أحس.
بمشاعره أتجاها بس ما أريد أجازف و لا أخطي أي خطوة
ولا أي شي لان بصغري دفعت الثمن چانت نفسيتي ما أريد أرجع أنخذل و أنكسر.
دگ الجهاز و گلبي زادت نبضاته و أني أشوفه يتصل
جاوبته و الخجل و التوتر متملكني.
عمر: شلونها العرمة.
شسالفة شبيه أحس گوا صرت أتنفس بالويلاه طلعت الكلمة مني.
احم. هَلا
أووف أوف شمشتاگ الهالصوت إلى حارمتني منه
عمر اتأدب لا تحچي هيچ
ليش شحچيت أنا.
تعرف زين شحچيت ما يحتاج أعيد كلامك.
سكتنا أحنا الاثنين ما أحب نطلع عن أطار صداقتنا
رغم هوَ محترم ويايَّ، كسرت حاجز الصمت
و سئلته.
سكتت عموره
أريد احچيلج شي
عدلت گعدتي و رجعت احاچي.
أي احچي شو شعندك
اذا احچي يمكن بعد ما أتباوعين بوجهي إلى راح تسمعي صعب.
ههههههه شلون يعني ترا مكانتك و معزتك عندي تعرفها
ما أنسى شلون ساعدتني و طلعتني من ال أني بي
خليتني أساعد نفسي و اتخطى و علمتني هواية شغلات.
أسمعه يجر بالحسرات و حچى يأكد كلامه.
لازم أشوفج باجر.
كمزت من مكاني.
شتشوووف يمعود هو بالدوام أني ما احجي وياك قليل
و تدري هل الفكرة رافضتها مال التقي بيك وحدي
لازم تسوين هذا الشي نيروزه لأن الموضوع مو مال جهاز
ما أدري عمر ما أدري تدري بيَّ ما أحب هيج شي ولا أريد تجي حچاية الأهلي
أدري بيج والله بس لازم مجبور أشوفج وجه الوجه و أفهمج.
اذا گدرت لأن هسه ما اگدر صح أهلي منطينا مجال بس بحدود
براحتج.
سديته منه التفكير أخذ حيز مني شنو الموضوع.
المهم هذا إلى يخلي هيج مُصر نلتقي والله ما أعرف
أوف يا عمر مرات أحس نفسي أعرفك و مرات لا سمعت
امي تصيحلي طلعت صابة الاكل گعدت وياها هيَّ و رماد
گعدت بس أصفن حتى ما أكلت شي هوَ و لا مرة طالب نلتقي طول ما عرفته.
مر أسبوع كامل و أني أحاول أشوفلي عذر
و أطلع من البيت
گدرت أقنع امي التقي بصديقة إلي، طلعت ولازمة گلبي
من إلى منتظرني، أتفقت ويا ابو التكسي ينتظرني
ما أيروح دخلت للمكان إلى گال عليه و ما مرتاحة.
بس شافني أجه مبتسم وگف يمي د
عمر: هلا نيروزه
نيروز: شنو الموضوع
ليش مستعجلة
ما اگدر اتأخر.
أشرلي أگعد على الكرسي گعدت بس ماچنت متخيلة
ولامتوقعة إلى راح أسمعه من توتري يمكن سير الجنطة
اجه ينگطع بگد ماضاغطة عليه أنطاني ظهره الثواني دار ناحيتي.
نيروز
هاا عمر
انتِ أنظف بنيه شافتها عيوني، بس.
بس شنو؟
ما أريد أدخلج بدماري.
طبكت حواجبي بعدم فهم.
ما فهمت؟
أنا ما ألتقيت بيج عن طريق الصدفة
هههههه شلون لعد إذا مو صدفة.
كلشي صار چان مخطط اله
رجعت اضحك من گد ثقتي بي مستحيل أصدگ بشي
شنو مسلسل هندي.
فرگ وجهه و نزل حاني جسمه المستواي أردف بنظرات ضياع ماليها الندم.
أتقربت منج لأجل غاية
ش. شنو غاية؟
غمض عيونه عاصرهن عصر رجع فتحهن همس بكلمة غيرت مجرى كلشي.
- الأنتقام
صفنت بي ما مستوعبة كلامه ولا أي شي حچاه
شنو أنتقام شنو مخطط وگفت مبتعدة عنه.
نيروز: أنتقام شنووووو شدا تحچي أنتَ شبيك.
أتقرب إلى حاول يلزم أيدي أو ما أدري من صدمتي.
يمكن لزمها دفعته باعدته عني.
أنتقاااام شنووووو عمررر
اسف والله أدري صعبة عليج تتقبلين هيج موضوع
بسسس ماااا أريد أبقى وياااج ونيتي غيررر عن نيتج.
نزلت دموعي و أني أردله الكلام بخيبة.
لا تكسرني أنتَ الشخص الوحيد إلى گدرت أثق بي
هاي الحقيقة إلى ما گدرت أصارحج بيها طول هل الفترة
أنتقاااام شنووووو؟ وياااامن أنتقامك اني شنووووو علاقتي بي
ما اگدر احچيلج شي غير إلى حچيتي هسه.
درت وجهي منطيته ظهري محررة دموعي إلى صارت تنزل
بدون توقف نزعت السلسلة إلى لابستها من عنده هدية
حافظت عليها مثل ما أحافظ على نفسي أعترف حابته
و چنت أفكر هو ممكن هل المرة الأختيار الصح عفتها بجهه و درت عليه.
نيروز: هسه شنو يا عمر؟
عمر: كل واحد بينا بطريق، تتأذين أكثر ويايَّ إذا تبقين
و بلا وعي حچيتها بكسرة.
حسافة بيوم خليت گلبي يدگ الك
تغيرت ملامحه أتقرب إلى ما فاهم مقصد كلامي.
شنو يدگ الي؟
-موفق بأنتقامك خلصت غايتك
طلعت من المكان أرجف دموعي مو گادرة والله أسيطر
عليهن گلبي يأذيني أحس الدنيا كلها أتفقت اليوم على
كسرتي مسحتهن مو اني إلى دموعها تنزل على رجال.
فتحت الباب مال التكسي إلى منتظرني
و أستوقف صعودي صوته.
عمر: أوووگفي
التفتت و عيوني يحرگني حرگ.
نعم؟
مد أيده ترجف بيها السلسلة إلى نزعتها جوا.
نسيتيهااا
رجعت اله بخطوات غير ثابتة بس أحاول اخليها.
أتصير ثابتة لزمتها بأيدي أبتسمت بأستهزاء حطيتها بأيده.
-ما إلها بعد أي داعي تبقى عندي العلاقة إلى بينا چانت
لأجل أنتقامك مخطط إلها كلشي أحتفظ بيها هيَّ
و ذكرياتها بالنسبة إلى من اليوم أنمحى كلشي.
رجعت صعدت و أني هل المرة تاركة كلشي ورايَّ بالماضي
هو إلى داولي جرحي بس هسه طرحه منو إلى يداوي ويعالجه؟
هذا الموقف ضاف صلابة وقساوة بداخلي.
حنين.
گعدت و گدامي الايباد مالتي مطلعة فلم
و حلوياتي
يمي مسوية أجواء النفسي منتظرة غياهب إلى طلعت
و بعد ما رجعت و أبوية بعده هم سمعت صوت
الباب الخارجي أكيد واحد منهم اجه.
طفرت من مكاني أشوف منو وگفت يم الشباك شفت أبوية
واگف يفتح بالباب و سيارته يريد يدخلها جوا الداخل
البيت بالساحة فرحت أخيراً واحد منهم اجه مليت گاعدة وحدي.
طلعت أمشي أفتح الباب الداخلي مال بيتنا فتحته.
و وگفت بين ما يدخل سيارته طلع ما أدري شنو إلي
راح يصير لو أدري ما أخلي يخطي خطواته أكثر.
دخل السيارة ونزل منها رجع للباب الخارجي يسده
وصل يمه و دار وجهه إلى شافني واگفة أبتسملي
رفع أيده يلوحلي بيها مجرد لوحلي ما أسمع غير صوت
طلقة شهگت بفزع و رجع أتكرر الصوت بأطلاق الثانية
للمرة الثانية بنفس الدقائق أتبسمرت بمكاني جاحظة عيوني من المنظر إلى صار گدامي.