رواية وتيرة الأعرج للكاتبة حوراء السعيدي الفصل الحادي والخمسون
حنين.
ما قبلوا يدخلون الغياهب أكثر من شخص و لأن اني دوامي هنا بالمستشفى
گدرنا ندخل الها أنمرد گلبي مرد عليها، كل ما أصفن اگول اختي شلون طلعت
من هذا الحادث و بيها نفس؟ بس أرجع و اتأمل بمقولة
ماكو شيء صعب عند رب العالمين .
أتقدم الها أبوية و هيَّ فاتحة عيونها بتعب تفتحهن الثواني و ترجع تغمضهن
حاول يسيطر على نفسه بس ما گدر نزلت دموعه نزل بجسمه مقبل راسها.
سلطان: بنيتي غياهب ريت الوجع بيَّ و لا بيج بابا شسويتي بيَّ أنهد حيلي عليج.
لمعت عيونها بدموعها نزلن متسللات بهدوء بدون ما يطلع منها صوت
نزلت انظارها على بطنها تغيرت نظراتها بسرعة فهمها ابوية.
عايشات عايشات بابا لا تخافين.
غمضت عيونها كأنما تحمد ربها حاولت تحچي بس بكلام بصعوبة يطلع منها و چان سؤالها الاول.
غياهب: ار. ارسلان؟
هم زين بس عنده كسور الحمدلله ماكو شي خطر.
طبكت حواجبها بألم و هيَّ تگول.
أريد أشوف بناتي.
الكلام ما يطلع عدل منها بس فاهميها رفع راسه ابوية عليَّ و رجع يباوعلها يطمن بيها.
سلطان: شوية تعبانات لان أجن قبل موعد ولادتهن و حطوهن بالخدج مابيهن شي يخوف.
درنا بوجهنا اتجاه الصوت الجاي من گدام الباب و چان صوت ارسلان
يصيح بصوته المليان تعب بقت عيون اختي اتجاه الباب طلع ابوية اله رحت يمها لازمة أيدها المجرحة.
حنين: يمكن يريد أيشوفج و ما قبلوا.
بقى صوت ارسلان مستمر و نسمعه يصيح و معاند و يگلهم غصباً عليكم
ادخل هوَ غلط تصرفه بس كلامه چان نابع من حرگت گلبه يريد أيشوف غياهب
كبت الهوسة يم الباب بالساعة و هذا روحه فرفحت و هوَ يحاول يدخللها
صار هدوء معقولة اقتنع ما يدخل؟
بس الدقائق و أنفتح الباب و فعلاً سواها و دخل الها ابتسمت بوسط حزني
و اني داشوفه سوا اللي يريده سبحان الله نفس العناد و يباسة الراس هوَ و مرته.
سلطان: انا طالع ما يصير نبقى هالگثر ارسلان المدير گال شوية و تطلع بابا لا أتسويلنا مشاكل.
و يا ترى ارسلان وياه و سمعه؟ لا طبعاً مجرد دخل فصل عن العالم تحس
دخل عالم غير عن عالمنا مگعدي على الكرسي المتحرك رجله مچبسيها
بصبابة و ايده هم ابوية طلع رحت قربته يم اختي و اني ابتعدت عنهم وگفت
علي جهة اباوع الهل الاثنين إلى ما شافوا الراحة بحياتهم مد ايده اللي مابيها شي لزم ايدها.
ارسلان: يا حيل ارسلان يا روحه و دنيته انتِ.
يجبر بنفسه يتقرب الها أكثر المشكلة هوَ متضرر شلون سمحوله يطلع باسها
بجبينها يعدل بشعرها الواگع منه، ناسيني و ناسي كلشي طلعت شهگة
من گلبه و دموعه نزلت ثاني مرة أشوف دموعه تنزل على اختي بيوم طلاگهم و اليوم همسلها بصوت مخنوگ.
يوجعج شي؟
هزت براسها بهدوء لا تطمن بي طبك حواجبه يحچي بغصه صوته مدموج بخنگة
و رجفة ما أدري شلون يحچي و هوَ بهل الوضع.
ارسلان: تجذبين عليَّ ما أتريدين أنقهر جاي تتأذين.
بقى بحيرة شلون يلزمها و منين يخاف تتوجع رجع باسها همس مبتسم.
أجن سيرين و لازين أجن بناتنا.
أتقدمت الهم و مجبورة اكيد مسحت دموعي اللي نزلت على منظرهم.
حنين: ارسلان.
رفع راسه ابتعد عنها خجلان مني تحمحم.
ارسلان: اتفضلي ام الحسن.
ما نگدر نبقى أكثر لازم نطلع.
هسه دخلت مالحگت أشبع منها.
بس أصبر ذني الايام و بعدها براحتك اشوفها محد يگدر يمنعك تعرف قوانين المستشفيات.
هز راسه بقبول و وجه كلامه ال غياهب.
ارسلان: انا يمج غياهب ارجعيلي أنتِ و بناتنا ينتظرونج خليج قوية ارسلان ما يسوا شي بدونج وروح أعزازه.
ختم كلامه بايس اصابع ايدها اخذته و ايده بايدها لحد ما ابتعذ تفارقت
الأيادي طلعنا من الباب خوالي جايين و الكل واگف عبالك عشيرة ما عدا.
ناز و خالها ماموجودين سلموا خوالي على ارسلان و يتحمدوله بالسلامة و اخوه هم موجود.
عمر: الحمدلله على سلامتكم.
جابر: مشافى ان شاء الله ابني الحمدلله على سلامتكم انتَ و مريتك و بنياتك.
رد عليهم و صوته بعده بي الرجفة.
ارسلان: الله يسلمكم.
اجه عمر اخذه مني رحت وگفت يم درغام اللي مقلص عيونه و يباوع
ال مُجاهد ضربته بخفة بعكس ايدي دار وجهه الي.
درغام: هااا شني لا تتحرشين احنا بنص المستشفى.
حنين: شكو دا اتباوع للولد بهل النظرة منتبها عليك من أجه لحد الان تباوعله هيج.
قرب راسه إلى و گال بخفوت.
اگلج و ما تگولين؟
اي گول.
أبتعد عني و هوَ يگول.
لا ما اگول لان انتِ فضيحة و هم الموضوع بعدني ما متأكد منه كلش.
ترا اني أحافظ على السر أبو الحسن لا تظلمني هيچ.
باوعلي بطرف عينه.
اسئل مجرب و لا تسئل حكيم.
وعلي شبيك مل تصدگني.
مصدگج مصدگج عود من اتأكد يصير خير.
أجه مُجاهد قريب علينا شگد متربي هذا الولد لو يموت ما يحط عينه بعيني.
مُجاهد: انا راح أروحن محتاج شي ضلعي؟
درغام: احچي الارسلان عن اللي صار.
دار وجهه يباوع الارسلان اللي خوالي واگفين يحجون وياه ورجع باوعلنا.
مُجاهد: خلي مرته و بناته و هوَ يطلعون بالسلامة و احچيله وضعه مو مال هيج نقاشات.
اذا لزم الأمر انا احچيله.
بكيفك بعد يلا في امان الله.
ويننن رايح؟
عندي شغل.
شغليش؟
دارت عيوني بينهم درغام اذا تگله منو روحك يگلهم مُجاهد ضحك مُجاهد و جاوبه.
بعدين أسولفلك.
غمزلة زوجي بخبث و هوَ يجاوبه.
نسولف ليش لا أموووت بالسوالف وياك ضلعي.
ديلااا انچب أعرف شنو اللي أبالك.
همزين تدري علمود لا أتعبني و لا أتعبك و جرب تجذب العب الغالي على الغالي.
رفع راسه مُجاهد يضحك بصمت ما يگدر يفلت بالحچي لان انا واگفة رجع گال.
مُجاهد: دام أبوك هنا أروح اسئله بنفسي سؤال وانتَ واحد استغفرالله.
مرتك واگفة اختي ام الحسن ما اگدر احچي گدامها شي احتراماً الها.
راح مُجاهد جاب خالي جابر وأجوا وگفوا يمنا.
مُجاهد: الله بالخير عمي.
جابر: الله بالخير و العافية.
رايد اسئلك عن سالفة و الحسين باقي بنفسي أعرفها و فضولي بعد ما يسمح أسكت.
خير ان شاء الله.
ليش أتسمي درغام سبع الهورة ؟ ما يرضى يحچي شگد گلناله يحچي
ما يحچي نوب احنا هم مشيناها سبع الهورة تعال سبع الهورة امشي سبع الهورة و مانعرف المعنى.
ضحك خالي يمسح على شواربه يباوع الدرغام بفخر.
جابر: ليش ما تحچي الاصدقائك؟
درغام: خيولون يابه.
حچاها بضحك رجع مُجاهد يحچي و ميت بفضوله.
مُجاهد: هسه تحچولنا او لا.
رد عليه خالي.
جابر: سميته سبع الهورة لان أبني فعلاً سبع و ما يخاف من شي وين ما تحطه يگلك انا گدها أفتحر بشجاعته، و هاي قبل بالهورة تصير خطرة لان كلشي تلاگي بيها و اللي يدخل الها و يطلع مابي شي يتسمى سبع الهورة و درغام من هوَ صغير شفت عنده هالشجاعة و الصفات ابني من صغره لو انتَ لو على تتأذون يطيح گبلكم عنده لو صار عليكم شي انا اشوفه يگلب الدنيا عليكم وانتَ يجوز اكثر واحد راح تفهم كلامي و شاهد عليه شچان أيسوي من يضوجونك رجل امك و ابنه زلمة خشن بس حنين على عزازه و أحبابه صاحب نخوة أبني زلمة كلف ما غلطت من سميته سبع الهورة .
ابتسم مُجاهد بسعادة.
مُجاهد: رحم الله والديك هسه ريحت گلبي و فضوله و تريد الصدگ يستاهل أبنك.
نفش ريشاته درغام و بقى يباوعله بغرور يضم بضحكته أجه مُجاهد كفخة
بعلابية فتح عيونه درغام گوم رجعها اله و كفخة صاح بيهم خالي.
جابر: ولككم بوية كبرتوا شبيكم عبالك زعاطيط انتَ أتزوجت و صرت أب و انتَ شكبرة بعد تصير ما تتزوج؟
حنين: عنده حساسية من النسوان خالو.
هوَ منو طلب رأيي منو گال احچي؟ مجرد حچيت هيج غصوا بالضحك بقيت اباوعلهم.
احم. ماچفصت مو؟ گولوا اي.
گرص خدي خالي يضحك.
لا بعد خالج ما حچيتي الا الصدگ.
دار خالي جابر على خالي عمران الواگف يم ارسلان.
جابر: يمعود ابو نيروز الرجال طالع من الموت سوالفكم جبتوها هنا.
عمران: هنَّ كسرين چم يوم و يرجع مثل الحصان.
اخذ عمر ارسلان الغرفته و خالتي گالت اتروح چانت يم ابوية لان اتأخرت.
علي دوامها و ابوية خوالي بقوا يلحون عليه يرجع يرتاح اقلتًا لان تعب هنا.
سلطان: يابه شبيكم شلون اروحن و بنتي تبقى وحدها.
اجه عمر بعد ما رجع ارسلان سمع كلامنا.
عمر: عمي لا يبقى بالك ناز راح تبقى ويا غياهب.
حنين: شبيكم؟ ترا اني هنا.
جابر: بابا انتِ تنشغلين بدوامج خوما تبقين مكابلة اختج مايصير تقصرين بدوامج ولزم احد يبقى يمها.
هيَّ وينها ناز شو اختفت.
عمر: راحت هيَّ و خالي يجيبون شغلات غياهب و شغلات بناتها من سلمونا اغراض ارسلان بيهن المفاتيح مال بيتهم.
درغام: خوش حچي عمي سلطان هسه بعد ما عندك عذر ارجع للبيت
ارتاح و هم غياهب هسه محد يگدر يشوفها براحته.
بعد أقناع صعب گدروا ياخذونه و حلفني كل ما يخابر أجاوبه و احچيله الصدگ
ما أضم عنه شي، راح الكل حتى مُجاهد بقوا درغام و عمر واگفين.
درغام: راح اروح يم ارسلان وانتِ روحي الشغلج لا تخلين تصير عليج نقطة.
حنين: بس لا تبقين تطلعلي كل شوية عوفني اشتغل براحتي.
بحالج انا علساس.
قلبت عيوني.
هه واضح.
ضحك عمر علينا أستحيت منه سكتت.
درغام: شو أرسلان ما طلب يشوف بناته؟
جاوبه عمر.
عمر: گلتله يگول خلي غياهب تتعافى و انشوفهن سوا لان تبقى فرحتي ناقصة اذا اشوفهن وحدي.
درغام: هسه أحنا شلون نميز بينهن و هنَّ وجه واحد ياهيَّ سيرين ويا هيَّ لارين؟
أبتسم عمر و سئل.
عمر: احم. شفتوهن؟
اي بنات أخوة چنهن امهن و خالتهن فرد وجه واحد.
رجع ابتسم، مهما حاول يبين احسه يستفقد موضوع يصير أب بيوم و راح يبقى هذا الشي بگلبه طول العمر.
الله يحفظهن، ايي نسيت اگلك ارسلان رايدك.
عرفت راح يطلب يحچي ويايَّ يلا تعال انروحله، وانتِ حنين الشغلج.
راحوا الولد و اني بديت بشغلي انوار ما بينت اليوم ماكو؟ أستغربت خابرتها.
حنين: شنو وينج اليوم الدوام من شوكت بدأ.
انوار: مريضة والله اليوم ما اگدر اجي.
سلامتج لعد انتبهي النفسج.
الله يسلمج، شلونه وضع اختج بالي يمج اعذريني بس والله من رجعت من الدوام و المرض لازمني.
معذورة، الحمدلله احسن.
الحمدلله.
سديته منها ما طولت لا يجي المدير يطنطن فوگ روسنا واحد قنقينه بشكل خانگنا خنگ.
درغام: ها خوية.
ارسلان: شصار على موضوع الحادث؟
جماعتك لزموا صاحب السيارة.
شطلع وياكم؟ مظلوم لو مقصود الحادث؟
مقصودة.
سالم؟
اي.
ايا كلب عرفته، السايق اللي لزمتوا ما يعرف شي عنه؟
داگه مُجاهد دگة معدلة بس ما طالع شي منه غير هوَ مكلفة بالحادث مالتكم.
أسمع درغام هذا أكو واحد جاي يساعده و مو شاك؟ لا متأكد سالم
ما يگدر يسوي كلشي وحدة و هوَ مطلوب أكو أيد جاي تساعده بتنفيذ خططه.
أبالك أحد؟
صفن ساگت هوَ تعبان بس يضغط على روحه.
ثائر.
ما أتوقع لان انا جبته و هم دگيته ما طلع منه شي غير الرقم و الرقم متخلص منه سالم.
ثائر يعرف شي و ضامه.
اذا هيج الحجي راح أرجع أستضيفه معناها يمنا.
سويله سبرايز بس بالليل مو بالنهار لان بالنهار كلشي مكشوف.
هايهية.
درغام سالم هواية لعب بذيله صار لازم ينگص هالذيل عمك عمران هم حچى بالموضوع مال الحادث وعقله راح يوگف يريدون مكانه.
دخللي الزمه و انعللل والديه اللي ما يگص هل الذيل.
ناز.
دخلنا البيت ارسلان اخذ اغراض البنات اللي جانوا مشتريهن خالي
مبقيهن عنده بسيارة جبناهن ويانا ماشاء الله هواية جايبين للتوأم و اغراض
الغياهب و ارسلان و وجهي لا زال مبوخ من اخر موقف صار بالمستشفى
بقى خالي گاعد جوا و اني صعدت فوگ بديت أجهز بملابس البنات
اللي جايبيهن يخلنك غصب عنك تشتهي يصير عندك طفل، دگ جهازي و هوَ بجنطتي.
عفت الجنطة على النص مال التوأم حبيبات عمتهن طلعت جهازي چان رقم منو هذا؟
اني رقمي بس عند أهلي و حتى ماعندي صديقات و انطيهن الرقم فتحت خط.
ناز: الو؟
ماكو صوت بس صوت هوا قوي عبالك عبالك أحد دايسوق رجعت كررت كلامي.
الو تسمعني؟
أنسد الخط ظهرت حركة تعجب بملامحي ذبيت الجهاز يمكن واحد مشتبه
بالرقم رجعت أكمل غراضهم حد ما كملت نزلت جوا شفت خالي خطية تمدد.
علي القنفة و نايم حطيت الجنط بالارض باوعتله محتارة اگعده لو يبقى نايم بس مضطرة همست.
ناز: خالي.
بسرعة فتح عيونه حمر فرگهن و گعد.
كُميل: كملتي خالي؟
اي.
چا يلا انروح علمود ارجع للبيت اناملي كم ساعة راسي مو إلى و الزهرة مانايم البارحة للصبح.
اخذ الجنط و طلعنا راجعين للمستشفى صار گدامنا بباب الدخول من وصلنا
زوج حنين طالع سلم وراح كملنا طريقنا بالبداية دخلنا الارسلان چان نايم بس عمر
گاعد يمه.
كُميل: شافها؟
عمر: اي و صارتلك ذيج الهوسة و العركة وياهم و دخل گوا عليهم بس ما طول.
المهم شافها و ارتاح.
خالي بعد ما أطلعع وين أكو واحد طالع من الموت يسوي سوايته هاي.
أتحمل عمر أتحمل، أخوك زين باقي عقل براسه على الشافه و الجاي أيشوفه من صغره لليوم.
گلهن مچودرات بگلبه .
زفر نفس بحسرة خالي و هوَ يباوع الارسلان النايم.
تهون خالي تهون.
ناز: جبتله ملابس.
عمر: فدوة للنادرة حبيبة أخوها.
ناز: متوجع ارسلان؟
شلون ما يتوجع و هوَ ما گاعد بگاع الله و يرتاح.
كُميل: انا رايح للبيت عمر ارجعلك بالليل مسطور سطر.
روح خالي اساساً ردت اگلك و سبقتني و اذا البنات گاللك يجن لا تجيب وحدة هسه
الا لمن يسمحون النا انشوف غياهب على راحتنا لان نيروز خابرتني
تريد تجي گتلها ما يقبلون احد يشوفها انتَ هم هيج گللها.
بعدك على قرارك؟
أخذ الجنطة عمر و حطها على جهة يجر حسرة بعد حسرة شگ گلبي بيهن.
عمر: للأبد و أتمنى ما تحچون بي بعد هاي قسمتنا من رب العالمين وراضين بيها المهم زوجتي عندي ما يهمني شي ثاني سواء صار طفل او لا.
هايهية براحتك خالي انتَ أعرف بمصلحتكم.
طلع خالي بقيت يم عمر و أخاف احچيله شنو طلبت من العلوية تنطيكم
طفلها و يصير غير شي من فكرتلها شفت طلبي چان غلط مهما كان يبقى
طفلها و الگلب يبقى يحن لبزره و عمر مستحيل يتقبل الموضوع خصوصاً بعد.
ما شفت ردت فعله بموضوع التبني اللي أقترحوا، بدأت الايام تمشي هنا بالمستشفى.
مهتمين بارسلان و غياهب و بناتهم وضع غياهب صار أحسن
و تحن و تون على بناتها
اتريد أتشوفهن و ارسلان مگابلها اهلها ما تركوها واحد يروح و واحد يجي
خلصنا اسبوع كامل و باجر يطلعونهم من المستشفى هم وبناتهم وضعهن
اتحسن الحمدلله لليل صار اللقاء المُنتظر ببناتهم.
چان الكل موجود ابو غياهب و خالتها و اختها و زوجها و ارسلان گاعد بصفها.
الغياهب ينتظرون بلهفة و عيون كُلها لهفة أشتياق، حماس، راح يجيبون
بناتهم عيونهم على الباب حچت غياهب و عيونها ما اتغيرت مسار نظراتها.
غياهب: شلون تحملت ما اتشوفهم لو اني ما اتحمل.
ارسلان: لعيونج أتحمل المايتحمل عزيزة عيوني صح هنَّ قطعة من روحي
بس جبرت نفسي أتحمل و أشوفهن وياج اريد أعيش كلشي وياج لحظة بلحظة فرح و حزن.
أبتسمت غياهب اله و نظراتهم تحچي مدى الحب اللي بينهم، أنفتح الباب.
و دخلوا جايبين التوأم سيرين و لارين ، الكل فرحان الشوفتهن حطوا وحدة
بحضن غياهب اللي ما أعجز شلون أوصف ملامحها، رادوا يحطون الثانية
بايد أرسلان لان الثانية بعدها ما متعافاية رد عليهم ارسلان بوتر و هوَ يباوع عليهن.
ارسلان: لا أخاف ما أسيطر عليها بأيد وحدة.
حطتها الممرضة بمكانها و غياهب عيونها مدمعة بفرح تباوع للبنيه إلى بحضنها و مبتسمة طايرة بفرحتها بيهن.
غياهب.
أجمل شعور يعيشه بني ادم هيَّ بلحظة من يحطون قطعة من روحك
و من دمك ولحمك بين أيديك، شعور الأمومة اللي تحسه و أتعيشه ما يتكرر
خصوصاً من يكون أول مرة، دخلت اصبعي باصابع بنتي الصغيرة
أريد اضمها بنص روحي أتمنى أكون أم حنونة عليهن و أعيشهن طفولة أحسن
من طفولتي أنطيهن الحب و لاهتمام و كلشي أستفقدته اني، أريد أصير صديقة.
الهن قبل لا أصير أم مثل ما سوا أبوية الفرق هوَ كان أب مو أم درت بعيوني للثانية اللي ارسلان مگابلها.
ارسلان: عيوني تركزت على الشامة اللي بايدها صايرة ما گدرت اضمنها
الحضني چنت أتمنى أضمها آلصدر أبوها و اشم عطرها عطر البرائة اللي
أول ما ينولد الانسان هوَ بي، أنعام رب العالمين لا تعد و لا تحصى شگد البشر
يغلط بس من يتوب الله سبحانه وتعالى شگد ينعم عليه من حيث لا يعلم.
رفعت راسي للانسانة اللي الها فضل چبير بتغير حياتي هيَّ السبب
الاساسي بتغير كلشي تباوعلي بعيونها المكحلة و بحضنها وحدة من ورداتي.
اللي بحضنج سيرين و اللي يمي لارين شتگولين؟
ضحكت ماسيطرت على دموعها.
غياهب: نسخة وحدة شلون نفرق؟
رجعت عيوني على اللي سميتها لارين الگلبي بقى يرف عليها مجرد اباوعلها.
ارسلان: عندها شامة بچف أيدها راح نفرق بينهن.
طلعوا الجماعة كلهم بعد ما شافوا البنات اجدادهن و خالتهن، عيوني ماتشبع.
و يمكن ما راح تشبع هذا المنظر مرتي و بناتي يسوا كلشي عندي ادفع كلشي
عندي و لو لزم حتى عمري أدفعه بس أعيشه لهذا اليوم بكل تفاصيله
منو يصدگ طفل مثلي ماشاف بحياته غير الجرائم و التجريح و الحقد الي
أستوطن گلبه اليوم هوَ أب؟
و صارت عنده عائلة فرحان بيها بس ما احس بروحي بواقع احسنها.
بحلم اريد شي يثبتلي هذا الجاي أعيشه هوَ واقع و الجاي أشوفنه صدگ مو حلم.
غياهب: ههههههه ارسلان ما مصدگة بين أيدينا بناتنا مدا اگدر أوصف شعوري والله و فرحتي اني غياهب صرت ماما؟
أجما أم بعيوني.
اممم يمكن يمكن اخذات بياضك و اتوقع حياخذون شعري شوف من هسه شعرهم حلو.
باوعتلهن عيوني تباوع السيرين و لارين بناتي ضحكت.
نعمة اذا ماخذات مني.
نزلن دموعها و هيَّ تباوعلها حالها مثل حالي ما مصدگة.
ليش تبچين يحيلي.
دموع فرح والله، شگد حلو عوض رب العالمين لأنسان.
اممم شو لارين أتربعت بالگلب أكثر.
ها بدينا بالتفرقة.
شوفي الشامة اللي بالايد تخبل ياروح أبوها ههههههههه.
غياهب: صفنت بي سبحان الزرع التعلق الغريب بهل الطفلة و هالسرعة بينها
و بين أرسلان بحيث بقى بس مگابلها حتى سيرين ما أتقرب الها بگد
ما ماتقرب الارين نزل بوجهه قريب من وجها يهمس بالكلام.
ارسلان: شنو هاي بابا شو روحي تعلگت بيج.
رجع يلزم باصابع ايدها.
شنو هل الاصابع اكلهن اكل حبيبتي
الثاني يوم طلعنا من المستشفى متوجهين البيتنا من وصلنا تغيرت الخطة
ابوية گال ما تبقون بيتكم لان وضعكم بعده ما متشافي على ألأخير. وانتم عندكم توأم أصر نبقى عندهم رد عليه أرسلان.
ارسلان: عمي لو تخلينا نروح الاهلي مو احسن ما انريد نتعبكم.
سلطان: ماكو أي تعب بنتي و بناتها عيوني الهن.
غمزلي ارسلان يريد يخبث واضح.
يعني تقصد بكلامك تگلي روح بس انتَ الاهلك؟
ضحك ابوية عرف ملعوبة.
سلطان: اتفضلوا اتفضلوا اخلص من المزنجر يطلعلي الاعرج.
دخلنا جوا و ارسلان يمشي على عكازة بعده وضعه، خالتي ويانا و اهل ارسلان
طلعوا البيتهم ناز ما قصرت ويانا خطية تعبت طول فترة بقائنا بالمستشفى
گعدنا و بناتي حطيتهن وحدة بصف الثاني اجه ابوية گعد بصفهن يباوعلهن مبتسم.
سلطان: يذكرني بيج انتِ و حنين أول ما صرتن.
ارسلان: رجاءً بناتي لحد يحتك بيهن.
نظرله بابا بطرف عينه.
شيخلصنا بعد.
هنا سمعه ارسلان رجع يتداهر وياه و طبعاً يتقصد لان يحب المداهرة هذا هوَ و درغام يتقصدون يداهرون وياه.
ارسلان: أنا أب غيور مثل بعض الناس.
وجدان: الله يحفظهن الكم و تكون بداية السعادتكم هل المخلوقتين.
ارسلان: يحفظج النا عمتي الغالية.
گالت خالتي و فرحانة بوجودنا.
جهزت الكم غرفة هنا جوا لان مو مال تصعدون و تنزلون و انتم بعدكم تعبانين.
غياهب: تعبناج خالاتي.
عيوني الكم.
نهض ابوية من مكانه من يم البنات واجه ارسلان گعد.
ارسلان: حطي وحدة بحضني ما اتحمل بعد گلبي طك اريد اضم وحدة منهن.
غياهب: أي وحدة منهن؟ لارين لو سيرين؟
عض شفته يباوعلهن بحيرة.
أختيار صعب غياهب خاف أشيل وحدة و تزعل الثانية؟ يگولون الطفل يفهم كلشي.
ضحكت النظراته و كلامه اتجاهن.
عندي فكرة.
شني؟
تاخذ وحدة وره الثانية.
خوش.
شلت سيرين حطيتها بأيده و هوَ زين سيطر عليها بأيد وحدة لأن مكمطينها دنك باسها على كيفه يخاف تتحسس.
شنو هل الترافة بابا.
سحبت نفس بألم بعدني متضررة من أثر الحادث و منا العملية خطواتي بهدوء رفعت راسي اباوعلهم.
يلا عيني ست لارين تنتظر حضن بابا هم.
فزت ملامحها طبكت حواجبي بنص ابتسامتي مستغربة من ملامحه اللي تغيرت.
الا هاي روحي بيها.
اخذت سيرين منه رجعتها المكانها و رجعت انطيته ست لارين بحضنه.
يشم بيها يحچي وياها لان ابوية و خالتي تركونا وحدنا.
ارسلان: حتى لو كبرتن ما انطيجن اخليجن گدام عيني.
بقى طول اليوم مكابلهم و گاعد و اذا يبچن هوَ أول بينا يروحلهن رغم وضعه
لليل الكل أجانا أهل ارسلان و أنسام وياهم من زمان ما شايفتها و خوالي
بيت جابر و عمران و تكافشوا رماد و حنين.
رماد: دشوووووف الجمااال خررب بعرضجن مووو ابن حنين المزنجر راسه مصلبخ.
حنين: ذني بنات و البياض حلو عليهن بعدين اني ما احب الرجال الابيض كلش.
هسه انتِ صاحلج و گلتي لا، غير رجلج مزنجر عبالك دهن سيارات و أبنج مثل ابوه.
درغام: زلم حوك أحنا.
رماد: تسبحون ما تسبحون يبقى لونكم واحد.
أباوع للبنات غرام و ناز يحاربن ما تطلع صحكتهم گوا مصبرات روحهن
لان الكل گاعد، سراج يمشي و يوگع لحد ما وصل الارسلان رفعه بايده كبل سراج حضنه.
كُميل: خالي لا تتقرب البناتك و ابني موجود لا يموت من غيرته.
أجت مليكة باستني و تباوع للتوأم.
مليكة: اللهم صلي على محمد وآل محمد يحفظجن الرحمن يا بعد بيتي.
حچى عمر من مكانه.
عمر: مليكة خلي اشيلهن يعني يصير؟ مو.
غياهب: اي عادي.
اجت نيروز اخذت سيرين صرت أفرق بين بناتي من الشامة اللي بچف الأيد
حطتها بحضن عمر و گعدت بصفه فرحانين بيها.
نيروز: اوييي عمر شوف شعرها يجنن مبين يطلع مثل شعر امها.
رفع عيونه يباوعلها و ايشوف فرحتها من لمست هل الطفلة الكل أنتبه الهم بس ما باليد حيلة اجه رماد اخذ لارين.
غياهب: رماد على كيفك.
رفع راسه الامه الگاعدة و عيونها تنبع قهر على بنتها بس گدر رماد يكسر الجو بسوالفه و مشاكسته.
رماد: يمة دامج بعدج شابة جيبيلنا فريخ نلعب عليه.
عمران: ناوشوني النعال.
شبيك سيد الوالد؟ بعدكم شباب اريد اخ او اخت العب عليه بالبيت
مكابل الحيطان و اذا ماتسولي، زوجوني بعد كبرت اني.
نادين: عمران أناوشة النعال لو لا؟
ابنج جلده يحگه و استهتر اكثر.
رماد: هسه شكلنااا.
ارسلان: يلاااا رماد رجع بنتي مو خذاك الواهس.
صفگ درغام بايديه.
درغام: أستلم أجانااا سلطان الثاني بالعائلة.
صاح بي ابوية.
سلطان: و شبيه سلطان؟
تاج على الراس بعد هذا ابووووو مرررتي.
نهض ارسلان مَن مكانه و أشر الدرغام يجي وياه طلعوا برا، بقيت گاعدة.
بمكاني ما اگدر أتحرك هواية بس بالي يمهم جابوا الضيافة خالتي و حنين انسولف اني و العلوية.
غرام: اريد بنيه.
غياهب: ما رحتي للسونار.
لا بعدني.
دخلت حنين يمنا و ناز تباوع للتوأم تريد وحدة بس محد ينطيها اخذوهن
فلاحه ملاچه عمر و نيروز لازمين وحدة و رماد لازم وحدة ما يقبل ينطيها.
حنين: سولفيلي تتنسين على شي حامض لو حلو؟
غرام: حلو.
بيج بنيه.
غياهب: ام زكي أستقري.
حنين: ههههههههههه بباب الحارة شفت اذا وحدة تتنسى على حامض يعني البيبي ولد، و اذا حلو بنت.
مو گتلج ام زكي.
لعد ارسلان و درغام شعندهم طلعوا؟
ما ادري يمكن حديث خاص يخص الشغل.
هسه وگت خصوصياتهم مايشوفون فرحانين و منجمعين كلنا.
أنتبهت
الغرام عيونها صافنة على عمر و نيروز و ذبتلها حسرة بهدوء كل اللي ابالي
مقهورة على نفس السبب اللي كلنا مقهورين عليه.
حنين: بيج شي علوية؟
أبتسمت أبتسامتها اللي تزيدها جمالاً.
غرام: لا مابيَّ شي شوية تعبانة.
غياهب: چان بقيتي ما اجيتي ليش تعبتي نفسج.
غير من چنتوا بالمستشفى سحلنا روحنا سحل علمود نجي و ما جابونا
حتى عمر الحباب قفل بالبداية گالوا بس يتحسن وضعه ناخذجن بعدين گلبوا گالوا من يطلعون من المستشفى.
انسام: خاب شهيتني أحبل شني عمي ذني بنات أخوي يگول كيك.
ردت أجاوبها و صرخ ابن حنين باوعناله چان رماد لازم أيده يضحك گامتله.
حنين هادة شالته و الولد مفرفح گام خالي عمران اخذ لارين حطها بحضن ناز و جر رماد من أذنه.
عمران: شسووويت بالطفل ولك؟
رماد: ههههههههههه اخخخ ههههههههههه بووووية ههههههههه ماسويت شي بس عضيته.
كفخه خالي على راسه.
ولك طفل شتعض بي؟
اجتني مشاعر حب اتجاهه و عضيته شكو بيها هيَّ عضة قابل شمسوي.
حنين: والله الا اگول الدرغام عليك أصبرلي بس يرجع.
رماد: ديلاا يلااا هسه شسوينه.
سحله خالي گعده بصفه و ابن حنين شيسكته بعد بي شغلة اذا يبجي بعد
ما يسكت دخلوا الولد ارسلان و درغام شاف ابنه يبجي اجه خذاه من امه يسئل.
درغام: شبيه؟ ليش يبچي؟ عفته مابي شي.
خزرت حنين رماد ضايجة منه.
حنين: رماد عضه.
شمر درغام الحسن على اكه وركض على رماد لزمه دگ گتل و رماد بس يضحك ما مهتم و هذا يتنرفز أكثر.
درغام: رماااد لاااا تصيررر زمااال.
رماد: ولكم هيَّ عضة شكو كبرتوها ما بقى واحد ما سحلني.
انچب لك، أشوفك بعد تتقربله الا أطيح حظك.
عافه ورجع الابنه يسكت بي و هذا مثل امه مگروص حسرة الواحد يسويله
شي اذا ما يخبص الجو و كل شوية واحد مرزل رماد صار دوشك رزايل و هوَ ما مهتم ياكل و يضحك.
رجعوا البنات يمي بناتي، نايمات اجه ابوهن گعد يمهن گام ابوية من مكانه
وگف قريب عليهن طلع من جيبه علبتين صغار فتحهن چانن تراچي ذهب
ناعمات قدمهن كل وحدة حط مالاتها على صدرها هديتهن.
سلطان: أحتاريت شنو اجيبلهن بالاخير ماطلع الا هالشي مني.
غياهب: حبيبي بابا ليش زحمت نفسك.
حبيبات جدو ماكو أي زحمة و تعب.
گاموا خوالي من أماكنهم هم حطوا على صدرهن فلوس دلاعة بمعنى مُباركة و هدية بهل المناسبة
و خالاتي نفس الحالة أجه الخال و غرام حطوا ورقة يم سيرين و ورقة يم لارين باوعلهم ارسلان.
ارسلان: شنو بس ذني؟
كُميل: چا شتريد؟
من صار سراج ما قصرت وياه و هسه تحطلي بس ورقتين يم بناتي انا منك أطم روحي.
ضحكت العلوية.
غرام: أنطيت خير من الله من صار سراج ما قصرت نحچي الحق.
رحم الله والديج.
عضيتله شفه يسكت خجلت من كلامه نزلت راسي وجهي بوخ و هوَ فلا سكت بقى يداهر ويا خاله.
شبيك ناقص فلوس؟ عندك معرض سيارات دولارات تستلم و حاط دلاعة
بنياتي ورقتين والله عيب عليك خالي چان أستحيت.
درغام: چااا شكثررر اريد گليلات الورقتين وين اكو واحد يتشرط.
ارسلان: بس انا.
ضحك الخال يهز براسه بيأس منه رجع طلع ورقتين و حطهن يم البنات صارن اربعة.
كُميل: اللسان الدلالة الزمه، يتبرن بعزكم و دلالكم خالي.
غياهب: شكراً الك.
اتقدموا حنين و درغام هم چانت هديتهم فلوس اما عمر و نيروز هديتهم
مجموعة هداية بناتيه و هم فلوس وياهن و انسام وياهم رجع الكل گعد گام
رماد بأيده علاگة بقينا نباوعله مد ايده بوسطها و طلع منها جواريب.
حطيت ايدي على حلگي ما اگدر اضحك بسبب عمليتي شلون نظرات الكل بقت تباوعله.
حنين: بشرررفك جواريب؟ جوارريب هدية؟
رماد: ليش أكو أحسن من هالهدية؟
جوررايب جوراريب شهل البخل هوَ الجوز يگتل روحه بالف دينار.
حياتي ذني ماركة.
درغام: راح اگوملك إلسانك الزمه.
ست چفصة نقصددد ايييي شبيك مااا تتفاهم.
اجه للبنات يبوس بيهن و مايبوس عدل لا چنه خبل دفعه ارسلان منهن.
ارسلان: استغفرلله شبيككك ولك؟
رماد: ريحتهن طيبة و العباس.
درغام: لطششش بعددد ابن الروسيا.
زوجووني لا أسويلكم سالفة اريد وحدة جمالهااا يشگ المطي شگتين.
جاوبته خالة نادين.
نادين: كلشي يطلع منك انتَ.
رماد: زوجيني معناها اريد منهن شوووووفي الخدود ولللچ يمة والريحة الطيبة.
لزم ارسلان الجواريب يباوعلهن ما مقتنع بيهن.
ارسلان: عود ذني الجواريب ماركة شني؟ وين أكو جواريب ماركة مبين جايبهن من البالة بربع دينار.
رماد: و العباس جبتهن من صاحبي و گالي ذني ماركة علساس هسه يطلع ضاحك عليَّ الا أنعل والديه.
ضحك الكل ورجع المكانه و هوَ يگول اذا طلع ضاحك عليَّ أطلع فلوسي
الي دفعتهن من خشمه سكت الكل من مليكة حچت ويا ابوية.
مليكة: يمة سلطان رايدتك بحچاية.
سلطان: اتفضلي حجية.
انا أدري انتم ما تقصرون و يا بنيتكم و بناتها بس انا اشوفن لو غياهب
تجي يمنا و نداريها احسن هم البنات يمي ماعندهن شي انتَ رجال تصيرلك.
طلعة و الجهال يريدون اهتمام و مريتك بدوامها.
باوعلي ابوية و رجع مكمل كلامه وياها.
سلطان: اللي تريدي ام كُميل اخذوهن صح كلامج لان غياهب عمليتها بعدها و بناتها يريدن رعاية.
خافنك صار بخاطرك يمة؟ أمشيه عليك الدهرة لا تزعل.
لا حجيه على بختج احنا اهل و ماكو فرق بينا ان شاء الله.
دارت علينا الحجية مبتسمة.
مليكة: وانتِ يمة شني تگولين.
غياهب: بكيفكم ماكو فرق سواء هنا او عندكم اثنينكم ما تقصرون.
ناز: ياييييي يعني راح تجون النا تبقون.
گاموا البنات يجهزون أغراضنا علمود نرجع ويا اهل ارسلان مر وقت طلعنا
من بيت أهلي امشي على كيفي على گولت حنين ما ادري شلون طلعتوا
من هالحادث، الحادث اللي ماسئلت عنه لهل اللحظة لان متأكدة سببه سالم.
صعدنا اني و ارسلان و العلوية ويا الخال و الباقين ويا عمر ودعنا أبوية اللي شفته ضاج بس يدور راحتنا.
سلطان: ديربالج على نفسج و على بناتج.
غياهب: ان شاء الله.
طلعنا من فرع بيت أهلي وحدة من بناتي بحضني و وحدة عند غرام سراج
يم ارسلان گاعد و كل شوية داير وجهه يباوع للبنات و يأشر عليهن بكلام ما مفهوم منفهم غير كلمة دادة.
وصلنا البيت أهل ارسلان فتحت ناز الباب فرحانة نزلت بحذر اتقدم اللي لزم ايدي.
ارسلان: انزلي على كيفج بابا.
نزلت چان صيف و الحر يگتل بوخه دخلنا للبيت و مليكة تهلهل و فرحانة.
بينا مجهزين النا غرفتنا إلى قبل چنا ساكنين بيها دخلت للغرفة غيرت ملابسي تعبانة تمددت بمكاني دخلت غرام الي.
غرام: محتاجة شي غياهب ناقصج شي.
غياهب: لا بيبي.
ارتاحي لعدّ تعبتي اليوم.
هوَ راح أنام.
طلعت و سدت الباب وراها گلبت على الجهة الثانية إلى بيها بناتي اباوعلهن
مبتسمة الراحة اللي اني بيها اول مرة احس بنفسي مرتاحة هالگد مجرد عيوني
تباوعلهن انسى كل تعبي، دخل ارسلان بعكازته گعد بصفي.
ارسلان: تعبانة؟
بصراحة أي.
نامي.
وانتَ؟
أشر على التوأم.
أشبع عيوني بيهن و انام.
اممم.
غمضت عيوني انام لان تعبانة و جسمي بقى يون عليَّ بالالم لازم ما أتحرك هواية و احتاج راحة بين النايمة و الگاعدة اسمعه يسولف وياهن و يهمس بالكلام همس.
ارسلان: سبحان الزرع محبتجن بنص گلبي و تعلقجن بروحي، گلبي
ما غلط من حَس جايني بنيه بس اجيتن أثنين مو وحدة و يا محلاتچن.
حسيته أتمدد بصفي أنفاسه صارت برگبتي طبع بوسة خفيفة و هوَ يگول.
أشكرج هواية غياهب مُنقذتي من اخطائي انتِ .
غرس راسه بشعري يسحب نفس و وياه حسرة، الثاني يوم گعدنا على صوت
بُكاء التوأم اثنينا فزينا و مليكة تدگ الباب نزلت امشي گوا فتحت الباب عاطت بينا.
مليكة: عدلين ميتين ولكم البنات يبچن ما تسمعوهن؟
درت وجهي اريد اروحلهن شفت ارسلان يمهن يحاول يسكت بيهن ما يگدر
يشيل وحدة رحتله اخذت وحدة و مليكة اخذت وحدة و اثنينهن يبچن توترت.
بينهن حرت المنو أنطي نفسي شافتني مليكة بهذا الوضع.
مليكة: جوعانات بنياتج يمة رضعي هاي اللي بايديج و خليني اصبر بالثانية بين ما تكملين.
هزيت براسي و گعدت ارضع بيها و فعلاً چانت جوعانة و للاسف صدري
ماچان يساعد للاثنين ارسلان واگف فوگ راسي يفرگ بعيونه.
غياهب: ارجع نام.
ارسلان: و البنات؟
مليكة يمي.
مليكة: روح نام بغرفتي ما راح تگدر تنام هنا هوسة.
هز براسه.
و طلع بقينا اني وياها كملت من الاولى و لاحظت مليكة رضاعتي و يمكن
ما اتشبع اخذت الثانية رضعتها طلعنا الهن ملابس بدلنالهن و گالت انجيب
حليب يساعدني لان رضاعتي موكافية صدري شبه جاف، دخلن البنات و گابلنا.
ناز: ياروح عمتجن چنجن فراولة.
نيروز: لِچ لا چنهن قطع كيك.
مليكة: چا ماتگومن اتسون لرجولتجن ريوگ يتريگون گبل لا يروحون الشغلهم.
غرام: بعدهم نايمين خالة.
يااااع چااا أحنا هم نريدلنا لگمة گوووومن لااا تگابلني.
خافن منها طلعن العلوية و نيروز يسون ريوگ بقت بس ناز گالتلها.
مليگة: چااا وانتِ؟
ناز: مااا اگوووم.
تغسل لهل الوجه.
هسه انتِ بجمالي و تحچين على وجهي.
غير بشبابي الراج چنت شحلاتني و گصيبتي تسحل وراي.
أصيح أرسلان عليج هسه منين گصيبتج وراچ.
تچذبيني ام شعر المزنجر.
ضحكت ناز هاي هم مو شوية غمزتلي رجعت تباوع المليكة بغرور و تفر بخصلات شعرها.
يخبللل لون شعرررري احسن مما اخليله حنة.
بقت ناصبة عليها و مليكة بس تريد تگوملها كملنا البنات و دخلت نيروز.
نيروز: يلا تعالوا اتريگوا.
عفنا التوأم هادئات بالغرفةو طلعنا للصالة امشي حسيت يايد لزمتني رفعت راسي واگف وجهه مبين چان بالحمام يغسل.
غياهب: مانمت؟
ارسلان: اللي عنده اخو مثل عمر و خال مثل خالي ينام مرتاح أكيد لا.
أبتسمت لان الولد مگعدينه گعدنا كلنا نتريگ.
عمر: ارسلان ما ترجع ويانا هنا بالبيت والله يخوي البيت ما ادري شلونه.
چانت ناز تاكل تاكل من حچى عمر هيج رفعت راسها ومأيدة كلامه.
ناز: اييي حبابين ارجعوا يمنا هنا.
ركزت بعيونها على ارسلان المنزل راسه وصافن رجعت گالت.
اذا عليَّ اني اتعودت والله ما أتقربلك و لا ألزمك.
رفع راسه ويا كلامها ابتسم الها.
ارسلان: أول و تالي كلمن يطلع ببيت وحدة و عوائلنا جاي تكبر ماريد نتقيد كلنا ببيت واحد.
كُميل: بكيفك خالي اللي ترتاحوله البيت بيتكم.
مشت الايام و اسبوع يجر اسبوع بدينا نتعافى و بناتنا كل يوم يحلون أكثر
بس لاحظت ميشبهني و لا يشبهن ارسلان ماعدا البياض و الشعر ورثنا مني
و من ابوهن و منو يجي يشوفهن يگولون مايشبهنكم رغم صغار بعدهن حتى
الاربعين مطالعاته و ارسلان الاحظه يسكت ما يعلق، لحد ما بيوم دخلت للغرفة
لگيته شايل وحدة من البنات بعد ما فك التچبيس اللي بأيده وگفت گدامه متخوصرة.
غياهب: أحسك تعرف البنات يشبهن منو بس ما اتريد تحچي.
رد و عيونه عليهن.
ارسلان: يشبهنا غير؟
وين يشبهنا؟ ارسلان دباوعلهن وجهن مدور مبين و اني وجهي طولاني
و حتى ما مبين و لا ذرة يم ملامحي و لا نفس رموشي و لا اي شي
بس الشعر لاحظ بناتك وارثات جمال بس من منو؟
اممم.
حاولت ايده حاضنتها حط سيرين بمكانها.
غياهب: أرضي فضولي و احچي.
سحبني الحضنه ايده اتسللت الوره ظهري حاضني شدني اله اكثر طبع قبلة بشفايفي و همس مختنگ.
يشبهن أمي واضح.
طبكت حواجبي و ابتسامتي على وجهي.
أمك؟
مو أمي عفاف، أمي مرت فاروق.
فتحت عيونه بدهشة من كلامه ما أتوقعت اسمع هذا الجواب.
امك.
اممم.
الله يرحمها حضنته مقهورة لان ماضيه لليوم يقهره.
اني أمك و حبيبتك و صديقتك و شريكة حياتك للموت لا تفكر ما الك أحد احنا كلنا يمك و كلنا نحبك.
اخذني الحضنه اكثر و يتحسر.
شمصبرني على الدنيا غيركم.
أحبك أرسلان.
ميت بيچ.
ابتعدت عنه من شفت عيونه تلمع بالدموع مديت ايدي امسح بعيونه بزعل.
امم احنا مو اتفقنا نتعالج سوا شو مغلس عن الموضوع و احنا اتفقنا من اني حامل.
ما صارت فرصة.
زين نبلش؟ جاهز لهل الخطوة.
دار وجهه للبنات يباوعلهن بحنية و نطق.
الخاطرج و الخاطرهن كلشي أسوي.
الخاطر نفسك مو بس الخاطرنا نفسك الها حق عليك.
وانتِ؟
راح أحارب علمود أنجح اريد أعيش وياك و ويا بناتي و اني متخطية الماضي ما اريد امثل بشي تعبت من التمثيل.
انا هم غياهب اريد اتخطى كلشي تعبت احنا ضحايا اغلاط اهلنا بالماضي .
ان شاء الله، وين مبدل تريد تطلع شنو؟
اي عندي شغل.
امم لا تتأخر نشتاقلك ترا.
صار من بطن عيني.
شوگت نرجع البيتنا دام صرنا أحسن من قبل.
هنا مأمن عليچن أكثر بس قابل لشوگت نبقى ذني اليومين نرجع ان شاء الله.
براحتك بيبي.
رجع يبوس ببناته و يشمهن شم مثل ما يبوسني و يشمني.
ارسلان: بنياتي.
التفت إلى گال.
شعجب ما سئلتي شي عن الحادث.
لان أعرف الجواب.
هز براسه و رجع گال.
طالع أحقق بهذا الموضوع جدج قربت نهايته.
طلع طلعت وراه عفت بناتي وحدة گاعدة و وحدة نايمة، الخال و عمر كالعادة
بشغلهم و انسام هالفترة تجينا بين يوم ويوم بس صارلها يومين مريضة كلش
ارسلان دز الها ناز تداريها لان يگول رايحلها لاگيها خطية بالفراش
نايمة من مرضها و هيَّ عندها اطفال، گعدت يم مليكة و البنات يمها نيروز و غرام.
و بداخلي خوف من موضوع سالم كل ما ينذكر خوف ما اگدر أتغاضى عنه.
لزمت العلوية ظهرها متألمة.
غرام: ظهري موتني ما أدري شبيه.
مليكة: انا فلا مرتاحتلج گتلج من أمس أخذنج للطبيب ما رضيتي.
اباوعلها مبين الالم طاغي عليها.
غياهب: مليكة لو تاخذينها للدكتورة لا سامح الله لا يصير شي و يروح يصير بيها و بالطفل شي خطر.
گالت نيروز.
نيروز: اذا ما تگدرين اني اخذها عمر يقبل أطلع اذا شي ضروري.
مليكة: انا اخذنها بس خلي البسن عبايتي و جواريبي گومي يمة غرام بدلي.
گامت ولازمة ظهرها دموعها بعيونها اجه سراج ذب روحه على نيروز شالته تضحك و هوَ يضحكلها.
غياهب: نيروزه.
التفتت اللي وسراج لازم وجهه يبوس بخدها.
نيروز: هاا غياهب.
شلونه وضعج؟
قلت أبتسامتها و رجعت اتلاعب بسراج.
أحاول اتعود مابيدنا شي الحمدلله على المقسوم.
صدگ عمر ما قابل تتبنون سولفولي البنات.
اي.
عن نفسي أشوف قراره صحيح لان الولد من يكبر يحرم عليج و اذا بنيه عمر يحرم عليها بس تبلغ.
صحيح هوَ گال هيج هم و گال جهال خالي و جهال اخوية هم جهالنا.
بدون ما تحچون بناتي مثل بناتج و اذا تريدين اخليهن من يكبرن يصيحلج حتى ماما.
نزلت دموعها مبتسمة.
الله يحفظهن الج و الابوهن.
طلعت مليكة لابسة شيلتها و عبايتها و اجت غرام البنيه وجها اصفر گالت.
غرام: خالة كُميل جاي النا ياخذنا ما قبل نروح وحدنا.
مليكة: بعد من الزينات مالي خلگ يبقى يحچي عبن طلعنا وحدنا.
گعدن.
و سراج گلب الدنيا من شافهن لابسات اعبيهن خذته نيروز
و طلعت
للحديقة ربع ساعة و اجه الخال اخذهن و طلعوا بقينا بس اني و نيروز بالبيت خابرت حنين.
حنين: هلو عيني شلونكم.
غياهب: الحمدلله.
بالليل جايينكم اني و ابوية و خالتي و بيت خالي لأن درغام عنده شغل يمكن ما يجي.
هلا بيكم عيوني.
شلونهن بنياتنا.
ضحكت دخلت جوا للغرفة اشوفهن.
بس وحدة گاعد الثانية نايمة.
شوفي احسهن هيج راح يطلعن مثلنا كزكزت عليهن.
تطلع وحدة تچفص و وحدة تلم چفصاا وراها.
ضحكت بصوت و هيَّ تگول.
بالضبططط مثلنا اني اچفص وانتَ تسددين ورايَّ.
بقت تسولف شوية و تگول درغام دا يطلع من الصبح مايرجع لليل و من اسئله
ماينطي جواب و على مرتين متعاركين بسبب هذا الشي، سديته منها
بقيت گاعدة ماكو شي أسوي اخذت بنتي الگاعدة اللي هيَّ لارين تناغي، رفعتها اباوعلها الاعب بيها.
ماماتي نياتي.
الاعب بيها و الابتسامة شگت حلگي من شفتها ابتسمت گلبي مات بابتسامتها و شكلها البريئ.
يمة فدوة للي يضحكلي.
بقيت الوقت هواية احجي وياها و الاعبها و هيَّ بس تبتسملي سحبت
جهازي اصور بيها و هيَّ تضحك باوعت بعيوني للثانية نايمة بهدوء
ضحكت و اني دا افكر اطلع مثل حنين و من هسه عاشقة للنوم.
ارسلان.
أتصلت على درغام أشوفه وين ماخذ ثائر.
ارسلان: هااا درغام وين أنتم؟
درغام: بمكان ال راح تجي؟
أي جايك.
اتوجهت للمكان إلى موجودين بي بسيارة عمر لان سيارتي اتضررت
من الحادث ثائر مو بالمركز لان هناك الوضع ما راح يصير مثل ما نريد وصلت
الهم دخلت لگيت درغام و مُجاهد واگفين و ثائر گدامهم صارلة فترة هنا.
ارسلان: عوفونا وحدنا و انطوني جهازه.
أنطوني الجهاز و طلعوا الولد درغام و مُجاهد باوعت الوجهه مزورگ.
ثائر: شتريدوون مني؟
ارسلان: كل خير حبيبي.
فتحت جهازه مابي قفل لاغي سحبت كرسي گعدت گباله.
اي ثائر.
شرايد؟
سالم وين؟
يوووميههه هيَّ مووو گتلكم مااا ادري ويننن گااعد.
أهاا گتلي ما تدري؟
گمت من مكاني صرفنت أردانات القميص أجته كفخة.
لا تصير ذكي ويايَّ العبك انتَ و جدك على تك رجل.
ههههههههههههههه.
أضحك أضحك تالي هالضحك بچي.
جدي محضرلك مفاجئة.
سحبت جكارة من باكيتي ادخن رفعت رجلي حاطها على الكرسي الگاعد عليه.
امم و شنو المفاجئة؟
راح يحرگ گلوبكم مثلل ماحرگت أبوي.
والله من أنعللل أبووووك لابو جدك.
فتحت الحبل المربوط بي سحلته عذبته عذاب الكافر و ما أنطى أي معلومات
عن سالم اتوقفت من دگ جهازي خليته نايم بالگاع بدمه چان رقم فتحت الخط.
ارسلان: نعم؟
الصوت هذا چنت منتظره من زمان.
سالم: حي الله الاعرج.
سالم الخيسيس زمان عليك.
فتحت الحاسبة اللي موجودة اريد أحدد مكانه فتحت سبيكر و گعدت
أدور على المكان دخل درغام إشرتله يسكت ورجعت مستمر وياه.
شلونك نسيبي.
اكللل ما أتشرررف أصيررر نسيب قااال مثلك.
ضحك بشر و خبث.
اتصلت علمود اسئلك سؤال واحد.
أجه درغام مركز ويانا بالكلام يسمع الكلام جده.
ارسلان: أكيد تسئل شوگت نهايتك حبيبي سلومي ان شاء الله مابقالها شي ألزمك لو تصير جوا الگاع أطلعك منها.
سالم: ودعت بناتك زين؟
درغام: أباوع الارسلان من ذكر سالك بناته اختفت ابتسامته ورد عليه بهدوء.
لا اتجيب طاري بناتي على الساااانك الزفرررر.
سد سالم الاتصال بدون ما يحچي و خلانا صافنين بسرعة كمز ارسلان من مكانه و الحاسبة طاحت بالگاع.
ارسلان: راااح يرووووح البيت اهللي لاااااااا ياااا الله.
طلع يركض مسحت وجهي لزمت ثائر سگطته تسگط.
درغام: اذا صار شي البناته ياااااا ويلكم.
رد و هوَ يحچي گوا بكلام لاول مرة اخاف منه.
ثائر: راح أتشب النار إلى شعلتوها ورضيتوا بيها.
دفرته ببطنه وطلعت الحگ ارسلان صار برجهي مُجاهد.
مُجاهد: شكووو شبيكم؟ شبيه ارسلان طلع يركض.
اقفللل الباب على هالكللب و تعاال وراي سالم يمكن رايح الاهل ارسسلان.
أكو حماية هناك شلون بعد يگدر يدخل؟
ماااا ادرررري رايح انااا.
عفته واگف و طلعت بسيارتي ادعي ربي مايوصل الاحد و لا يأذي احد بس چان هدفه هوَ أرسلان و بناته .
غياهب.
سوت أكل نيروز السراج گعدت توكل بي طلعت يمها بالحديقة مطمئنة أكو حماية برا.
غياهب: اتأخروا مو؟
نيروز: لان راحوا بدون حجز فيتأخرون.
نسوي كيكة؟
يللاا.
شالت سراج و دخلنا جوا للمطبخ طلعنا مواد الكيكة و بدينا نخبط بيها
چنا نسولف اني وياها عن سالك و دگ جهازي باوعت شفته ارسلان
ايديَّ جانت متوسخات رخت اغسل وگفت اغسلهن اندگ الباب بس الباب
الثاني اللي صاير من وره البيت مو الباب الرئيسي.
نيروز: منو دا ايدگ هذا الباب؟
باوعتلها بأستغراب.
غياهب: خاف واحد من الحماية لان هم حاطين واحد بهذا الباب گال أرسلان سمعته يسولف الخاله.
لا تفتحين الباب غياهب.
يمكن محتاج شي خطية هم واگفين طول الوگت و الجو حار.
انزرع الخوف بعيون نيروز.
شو خايفة.
باوعت الجهازي انگطع الاتصال طلعت من المطبخ و رجع جهازي اسمعه
يدگ گلت خلي اشوف اللي بالباب اكيد ارسلان يريد يطمن عن التوأم
صرت قريبة يم الباب و نيروز طلعت راسها من باب المطبخ صاحت.
رجلج دايتصل غياهب خبصنا خبص بالاتصال.
جاوبي انتِ هسه أجي گليله هسه تجي تحاچيك.
هزت براسها شفتها فتحت خط خلته على أذنها و اني ايدي صارت.
علي الباب فتحته، ما چنت أعرف شنو المضموم وره هذا الباب و ياريت ما
فتحته لهذا الباب بيوم من الايام و لا وصلت اله و لا شفت منو الطارق
و شنو الوراه، مجرد فتحته اندفع بسرعة شهگت من الولد واحد من الحماية
وگع گدامي بقيت جامدة بمكاني ارجف راسه ينزف وغايب عن الوعي.
وگفت و انفاسي احسها اتوقفت و جسمي صار يرجف و اسمع صوت
نيروز صاحت مانعتني افتح الباب بس شنو الفائدة؟ اتأخرت رفعت.
انظاري للواگف گدامي موجه سلاحه اتجاهي سالم! دفعني لداخل لوره
و اني بعدني بنص صدمتي الولد الضاربة تركه بالترك الواگفين بي و الدم ينزل من راسه.
سالم: أمشي گدامي جدي.
غياهب: ساااافل شجاابك هنا.
ما أحس غير أنشلت براشدي وجهي شب نار حط سلاحه براسي نيروز متبسمرة
بمكانها بايدها سراج و دموعها تنزل بخوف دخلنا جوا للبيت ما هامتني
نفسي خفت على بناتي لا يسوي شي الهن، وگفنا بالصالة دفعني.
يم نيروز الصارت ترجف مثل السعفة.
لزمت أيدها أهديها گعد گبالنا حاط رجل على رجل و شكله خبيث مابي ذرررررة ررررحمة.
سالم: أنطيت أشارة الرجلج اذا ذكي راح يفهم و يجي لهنا هاي اذا لحگ طبعاً.
شرررررايد انتَ؟ مووووو كااافي مصايبك.
وگف ما اگدر أسوي شي أخاف يأذي نيروز و سراج بقى يباوع السراج يضحك بخبث.
سالم: أبن منو هذا؟
ما يخصك، صدگني ارسلان اذا وصل لهنا ما راح يخليك تطلع من الباب عايش.
صار باب البيت يندگ بقوا واضح الحماية فتح الشباك يضحك باستهزاء.
حمايتكم صار الها علم ما راح نگدر نكمل شغلنا هنا.
سحب نيروز من ايدها ركضت عليه احميهم منه، دفعني بكل ماعنده
قوة انضرب راسي بالحايط صرخت بألم عيوني صرت گوا افتحهن راسي راح ينفجر
دخلها الغرفة مليكة هيَّ و سراج سحب المفتاح من الداخل و قفلة عليها صوتها انبح
و هيَّ تصرخ صوت صريخ سراج عج بالبيت، سحبني من ايدي رافع سلاحه مخلي بنص راسي و يحجي سريع.
وينننن بنااااتج؟
ماحچيت ما أريده يوصل الهن ضغط بسلاحه على راسي نزلت دموعي من الالم راسي اتفلش صرخ بوجهي.
وينهنننن؟
لووووو تمووووت يااااا كلب مااا اگلك وينهننن.
بس ماكو مهرب من القدر بچن بناتي و أنعرف مكانهن مشى بخطوات
و اني وياه على مصدر الصوت و الاثنين يتصارخن بنفس الوگت كمزت
من صار باب الصالة إلى قفلة هم يندگ بالقوة و يصيحون باسمي سحب وحدة.
من بناتي حطها بين ايديَّ تصرخ سحبني يمشي بيَّ سريع رفع ايده يهدد.
أي حركة تسوينهاا تخسرين بنتج صيري عاقلة و لااااا تتذاكين غياااهب.
بلعت ريگ بخوف و جسمي كله يرجف خوف طلعني من الباب اللي دخل
منه معقولة ما استفقدوا هذا المكان؟ صعدني بسيارته و مشى بيها
حضنت بنتي خايفة ابچي بصوت مسموع و الثانية عفتها مفرفحة بدموعها يا
ترى راح ارجع الها؟ راح ارجع اضمها الحضني راح نرجع اني و اختها؟
باوعت من وره سيارة الحماية لحگتنا انزرع بداخلي أمل راح يخلصووووني
منه انس و بنتي هذا المجرم السفاح بقى سالم يدخل بشوارع و درابين
علمود يضيعهم و يمشي سريع زرف گلبي من گال.
سالم: اذا ما فجعت گلوبكم بهل الليلة مثلللل مافجعتوووووا گلبي ب أبني.
الخوف سيطر عليَّ خوفي على بنتي شراح أيسوي أذن المغرب و أحنا نمشي
بالشوارع الحماية اللي ورانه ضاعت سيارتهم نزلت دموعي بضعف.
و قلة حيلة، دعيت بهل المغربية أحد ينقذنا ماااااا اريد ينفجعع گلبي
اللي بحضني چانت لارين حضنتها الصدري بكل ماعندي قوة من خوفي
جسمي يرتعش خوف ورهبة، وصلنا اشبه بصحراء فتح الباب وسلاحه موجهه علينا.
أنزززززلي.
نزلت دموعي ويا صوته المُرعب أردفت متوسلتله.
الله يخليك لا تأذيها مالها ذنب طفلة والله طفلة.
انزززززلي.
سحبني من ايدي روحي مفرفحة دخلني الداخل غرفة بيها رجليَّ صارت خيوط.
داخلها تنكة مگصوصة و بصفها قوري چاي و چرباية مال نفر واحد
كرسي صغير محطوط على الجهة الثانية بدون مقدمات سحب بنتي سحب
لارين مني و يهدد بي مخلي سلاحه عليها، حطها على الچرباية.
گعدني على الكرسي راسي راح أذب منه من الالم رجع ايديَّ لوره يشد بيهن
كلشي ما اگدر أسوي لازمني من الايد التوجعني باچر بناتي راح يصير
عمرهن اربعين يوم چنت مجهزة الهن كلشي ردت انسوي احتفال الهن، التفتت اله عيوني جمرت.
غياهب: اذا بنتي تتأاااااذه تنددددفن قبلهاااا.
ضحك بشر وخبث معدوم الرحمة گعد يمهاا يحررررگ بروحيييي حرررگ يمشي بالسلاح عليهااا.
سالم: ودعيهااا جدي حبيبتي ودعيهاااا ودعي بنتج.
نبضي أتسارع و كل ذرة بجسمي ترجف من شفته گام شعل النار اللي بالتنكة
المگصوصة صارت دخانة اختنگتتتت منتهية و بنتي تصرخ عيوني عليهااا.
وووووولك حيووووووان شداتسوووووي الله ياااااخذك ولك طفلة شنووووو ذنبهااااا.
ما ايرد عليَّ لف على وكهه الشماغ مالته وشال بنتي فاتح الگماط مالتهااا هزيت راسي برفض صرخت متوسلة.
ابووووووس أيدددددك لااااا اتسوووووييي شي.
صرت أتوسل بي أتوسل ملختتت روحي تملللخ مااا يرد مااا ايرد عليَّ النااار شبت
حمررررررة گعد قريب عليهاا بنتي اللي راح أتروح نتيجة ذنب مو ذنبها .
أحاووول أفك برروحي عيوووني غوشت من دموووعهااا قويت نفسي
بس اريد أفتح هل الحبللل اللي رابطينييي بي مثللل الحيوووان توسعتتت.
عيوني شاهگة اتوقفت حركتي و گلبي نبضه صار ينبض ببطء من سمعت صررررخة
بنتي رفعتتتت راسي بقت عيوني مفتوحة بدون ما ترمش و اني داشوف هالسفااااح بكل
خبث و قذارة يحررررگ برجليهااا ماا گفاااه صارررر يحرررگ بأيديهاا، أيديهاا اللي ابوها ميت بترافتهن.
حاطهاااا بنص الناررر و يضحككك ببرود يضحككك بفاجعة گلبي، صررررخا بصووووت من أعماق روحي.
لااااااااااا بنتييييي لارررين.
جسمي مات أريد أعين بروحي الفرفحت ما گدرت حطها على الچرباية
و گاد قلبها أن يتوقف بصراخها العالي سحب أقسام بسلاحه
رمشت بثكل نزلت مني دمعة أشبه بجمرة تچوي خدي صرخت بنص دموعي
و اني أشوف بعيوني الطلقة أستوطنت صدر بنتي ما طلع منها غير شهگة الموت.
بحة صوت بريئة
كالطير لم تخدشُها قساوة الحياة بعد
انكتم صوت بُكائها بعُنف و صبت دِمائُها و ملئت الأرض
فارقت الحياة قبل أن تعيشها حتى
عادت ألى رحمتهُ ف هنيئًا لها.
بأي طريقة سَيُعاقبهُ ربُنا؟ فَ حتمًا أنهُ لم ينجوا من العقاب
و سلامًا ألى تِلك الطيرة البريئة التي لم تحمُل قساوة الدُنيا و أرادت أن ترجع الى مَسكنٌ يُناسبُها.
ارسلان: وينننن صاروووا هوَ دزلي العنوان هنااااا.
درغام: عيوني تراقب بالمنطقة لحد ما شفت سيارة واگفة و طلع صوت چيلة ثأرت
ما أدري شحچي عن موقفنا هنا أسرع ارسلان بسياقته لحد ما وصلنا نزل
ارسلان يركض و سلاحه بايده ركضت وراه دفر الباب ركضت وراه دخلت بقت
عيوني صافنة بالمنظر الگدامي غياهب عيونها دم صافنة رجعت بعيوني اباوع للمكان الصافنة
بي طفلة ما اتشوف منها غير مغرگة بالدم ملابسها ملخطة بالدماء.
رفع سلاحه سالم موجهه على ارسلان مالحگ و أرسلان فاتح عيونه اتخبل
زرف صدره مفرغ الشاجور بي طاح سالم بالگاع سابح بدمه ويا طيحته
صاح سلاح ارسلان من ايده و عيونه على بنته مشى بخطوات بطيئه
عيونه بيها لحد ما وصل الها ركضت الغياهب افتح قيدها طاحت بين ايديَّ مثل الجثة
بس عيونها مفتوحة.
انشگ گلبي و أنقسم قسمين على لوعة و حرگت گلبه صاح بعلو صوته.
ارسلان: لاااااااااا بووووووية لااااااا بنيتيييي.
خذاها الحضنه و الدم ينزل منها حاضنها الصدره قميصه الچان ابيض
اتلطخ بدمها
دخل مُجاهد يركض وجهه انگلب أصفر فاتح عيونه غياهب بين ايديَّ مثل الميتة بس عيونها فاتحتهن.
مُجاهد: الله اكبررررر.
اللي صار ما كسر بس اخوتي كسرنا كلنا فجع گلوبنا سالم بهل الليلة الظلمة
بچى العيون گلها فرفحت أرواحنا طفلة ما يتجاوز عمرها الاربعين يوم تموت و بهيج طريقة؟
أتقرب مُجاهد الارسلان يريد ياخذها انتهى ما يرضى ينطيها حاضنها.
الصدره و يشهگ بدموعه نزلت دموع مُجاهد ما گدر يسيطر عليها دخلوا ابوي
و عمي سلطان و عمران اتبسمروا بمكانهم يباوعون السالم الطايح
بدمه و على بنت ارسلان الحاضنها بدمها هدم حيلي ارسلان نزلت دموعي على حال صاحبي.
ارسلان: بابا لارين انا بابا فتحيلي عيونج لا تغمضيهن يلا بابا فتحيهن لا تصيرين انتِ هم جرح من جروح گلبي.
جابر: انا لله وانا اليه راجعون.
اجه عمي سلطان اللي ما طلع منه الحرف اخذ غياهب رحت الارسلان.
اريد اخذها منه راح يموت ما يرضى عاصرهاااا عصرررر بحضنه.
درغام: ارسلان خوية.
رفع عيونه حمر.
ارسلان: راحت بنيتي المالحگت أفرح بيها راح وردتي درغام.
دگ جهازي طلعت مختنگ شفتها حنين شگلها؟ ما لحگنا نتقذ بنت اختج
وصارت طيرة من طيور الجنة ما گدرت ماعندي الجرأة أجاوبها، گوا گدرنا نسحب
البنيه من ارسلان لفها ابوية باللغطى الموجود حاضنها طلع بيها شال عمي.
سلطان غياهب و طلع بيها گومنه ارسلان گوا منتهي طلعناه انا و مُجاهد
لازمينة قبل لا نصعد طاح بين ايدينا صعدناه منتهي هاي چانت كسرة ارسلان الكبرى.
نزل من السيارة ركض السيارة ابوي خذاها أشرلنا ابوي نعوفه رجع حاضنها
بس شهگاته مسموعه صعد بالسيارة، الطريق كله على نفس الوضع گلبي
موتني و انا اشوفه حاضن بنته و مُجاهد يسوق و دموعه تتسابق على حاله.
وصلنا للمستشفى يريدون ياخذوها منه ما يرضى ينطيها يصيح بنص المستشفى فاقد.
ارسلان: ولكم عفتهااااا مابيهااااا شي عفتتتتت بنتي بصف اختهاااا شميتهاااا ما ادري راح تكون اخرررر مرررة ولكمممم ما گدرررررت احمي بنتي.
غياهب اخذوها من عمي سلطان، اجه يحاچي.
سلطان: ارسلان ابني.
رد عليه ارسلان بغصه و صوته منتهي.
لا تگلولي انطيهاااا البارحة گضيت الليل العب وياها و ويا اختهاااا هسسه عررررفت ليش روحي تعلگت بيهاا.
أكرام الميت دفنه حرام تبقى هيج الطفلة.
سحبها عمي منه و عيون ارسلان بيها راد يروح وراها لزموا ابوية و مُجاهد گعد بالگاع مهدود حيله مكسور المستشفى كل واحد شافه صار يبچي على حاله صاااح بصوت متغلغلة بي الكسرة و الخذلان من الدنيا.
ارسلان: هاااااا يالمگبررررة خذتيييي شكووووو عزيززززز عندي .