رواية وتيرة الأعرج للكاتبة حوراء السعيدي الفصل الثاني والثلاثون
الاعرج.
طلعت من المعمل تارك مجيد داخله النار التهبت كلشي داخله شفت خالي
اجه من الجهة الثانية صعدنا باوع للوره مال السيارة دار وجهه يسئل.
كُميل: وين مجيد؟
ارسلان: راح يصير كباب.
رجع يباوع للمعمل ويباوعلي.
حرگته؟
عيب هذا الحجي شنو هل الاتهامات ما سويت شي بس شفته يحب يلعب بالنار خليتها بوسطه.
فتح عيونه بعد ما شاف ماكو تردد عندي.
انتَ شگللت ولك مووو گلت تنطي درس وتذبه بباب بيت أهله بعد ما تخلي بنفسه يحرگ المعمل مالته؟
و غيرت رأيي
شنو وضعك ارسلان اليوم كل ساعة مغير خططك؟
حاله من حال غسان هم اعتده على وحدة محرمة عليه مجيد يستاااهل المووووت
مادمررر بس طفولة غيااااهب دمرررر ناس غيرهااا بالكامل و قضى على مستقبلهم ماااا متندم على إلى سويته.
ارسلان
أحب اقضي على الفساد مو بيدي وداعتك
و الزهرة مو صاحي انتَ چنك عالگها بينا و بين أهله.
ما راح يعرفون انا إلى سويت كل هذا حتى الكاميرات انحذف كلشي منها
الله وكيلك لو وصل الهم الفيديو إلى صورته راح يفرحون خلصوا منه هل النكس ابن النكس مكد راح يفك حلگه.
يا فيديو؟
طلعت جهازي شغلتله الفيديو إلى بي اعتراف مجيد بقى صافن تغيرت ملامحه.
الله اكبر ولك هذا حتى من ينگتل ما يبرد گلبي منه.
أوصلك للبيت
لا وصلني للمكان إلى بي سيارتي هسه علويتي بالها يمي اتصلت مرتين ما گدرت اجاوبها لان التهيت بالحارس.
شسويت للحارس
خطية انجبرت اخلي فاقد الوعي
المهم ما صارله شي
لا مابيه شي
خلي أوصلك لا العلوية تنومك اليوم بالصالة
أي و الزهرة
چا شگد تخاف منها
المايخاف من مرته مو زلمة.
شددد.
خااايب امشي يله هسه انا شبيه ماشي وياك
تموت عليَّ غير والله خوش رجال انا
اكللل تبن.
درت وجهي اباوع للمعمل النار شبت بي حركت السيارة مشينا وصلته
للمكان إلى بي سيارته بقيت صافن من زمان ما شايف ناز و لا مليكة أشرتله جاي وراك.
غرام.
طلع ويا ارسلان بعد ما گال رايح اله بشغلة اتأخر الوقت و هوَ ما راجع
بدأ القلق يسيطر عليَّ ارسلان ما ارتاح السوالفه لازم عنده مصيبة وگفت اسوي
اكل عبرت الساعة ال 11 يله جعنا ناز گاعدة يمي ساكتة مرات تنام من وگت
مرات تبقى گاعدة دخل علينا عمر إلى وجهه بعد ما ضحك من يوم إلى شاف نيروز.
عمر: چا وين خالي
غرام: طلع و گال عنده شغل
شغليش هذا اليوم هوَ حتى ما اجه للمعرض.
ما حبيت احچي و اگله راح الارسلان شعليه بعدين يصير شي يوگع براسي.
ما أدري حتى ما حچالي شي.
هز براسه و طلع گعدت بصف ناز چانت تباوع وره عمر.
غرام: ناز.
دارت وجهه إلى مبتسمة.
مشتهية شي يعني اسوي الج اكله تحبينها شوفي اني صح قبل ما جنت كلش اعرف بس هسه اعرف كلشي علمتني مليكة.
أردفت بكلام متقطع بي فهمته
ناز: ا. ار. اريد ارسلان.
بقيت ساكتة ما عندي جوتب الها دخل عمر بايده علبة صغيرة لونها احمر گعد.
بصف ناز واخيراً ابتسم نهضت من مكاني ورحت اجيب البتيته طلعتها غسلتها
قشرتها گعدت اسوي بيها و اباوعلهم من احب المناظر الگلبي منظر ناز
ويا اخوانها من يباوعولها لو اهتمامهم، فتح العلبة طلع منها تراچي
شكلهن نازك لا اصغار و لا كبار حجمهن متوسط اتقرب الها يلبسها.
عمر: چا بس ارسلان يجيبلج أسوار ذهب انا هم اجيبلج ياروح عمر.
باسها براسها ضحك عمر فرحان من شافها اول مرة تبادر وتحضنه وفرحانة بالجابه الها وگفت يم الطباخ اكلي صوتهم يوصل الي.
ناز: و. وين ارسلان
عمر: عنده شغل بس يكمل يجي يشوفج.
درت وجهي بأستغراب من سمعت صوت ارسلان مجرد سمعته ناز نهضت
من مكانها ركضت عليه حضنته مثل الطفلة مبرطمة بزعل ابتسمت مالزمت نفسي من شفته قلدها.
ارسلان: لا لا هاي ليش الحلو مبرطم
عمر: خبصتنا بيك تريدك
اروح نذر و فدوة للي يسئل عني.
رفع راسه يباوعلي.
ارسلان: شلونج مرت خالي
غرام: الحمدلله.
رجعت اكمل بشغلي اجه استاذ كُميل وگف بصفي و الولد گعدوا على الكراسي و ناز بنصهم يسولفون وياها.
كُميل: احم.
ما حاجيته صرت ابيع ثكل عليه رجع تحمحم صاح ارسلان.
ارسلان: شبيك خالي ماي وبصفك
كُميل: مالك علاقة خلية باخوانك و خليني بضيمي
يا ضيم؟
گنالك مالك علاقة.
رجع يحجي بس يريدني احجي وياه احتار شيسوي.
كُميل: جان عندي شغل ف اتأخرت
غرام: خوش
هسه انتِ ليش زعلانة.
ما زعلانة
لا والزهرة زعلانة مبينة من وجهج الگالبته.
مارديت اتجاهلته خلي يضوج لعد بس هوَ يضوجني و مايجاوب على اتصالاتي
كملت الاكل وصبيته نقلته للميز إلى گاعدين عليه الولد و هوَ ينقل ويايَّ و كل شوية گايل.
كُميل: انطيني عنج.
گعدنا ناكل مليكة من زمان تعشت و نامت ارسلان ما اكل بس يوكل بناز
لحد ما شبعت حبيت اسئل عن غياهب بس جان عندي تردد خفت يفشلني
و يخجلني لان علاقتي مو قوية بي بس اتجرأت و سئلت.
غرام: شلونها غياهب
ارسلان: غياهب؟
اي غياهب.
ذب حسرة و غيم الحزن ملامحه.
مرة زينة و مرة لا.
عمر: و شوگت ترجعهاااا الابوها اجانا من كم يوم وراد توضيح ليش اسمك ارسلان فاروق و انا عمر حسين
ارسلان: شگتوله
شنگله يعني اكيد ما انجذب هم عليه حچيناله كلشي.
تغيرت ملامح ارسلان احسه يكره ماضيه وگف راد يطلع گتله.
غرام: ما اكلت شي خوية
ارسلان: الف عافية ما اشتهي اريد ارجع الغياهب وحدها راح اشوف مليكة و اطلع.
ودع ناز و طلع عمر قلص عيونه يباوع الخاله بشك.
عمر: خالي وين جنتوا انتَ و ارسلان لا تگلي صدفة تلاگينا.
رد عليه كُميل و هوَ ياكل.
كُميل: جان عندنا شغل
اهاا شغل و بله شغليش هذا
روح اسئل اخوك اعذرني انا ما احجي كاتم الاسرار
اگص ايدي اذا ما وراكم شي و شي جبير هم
لا ما يحتاج تگصها عموري لان صح كلامك.
تغير كل الحديث من عمر گال.
عمر: انا قررت اسافر.
اثنينا باوعناله بتفاجئ من قراره.
كُميل: عمير لا تبقى تاكل نعل وين مولي
خالي شعندي باقي هنا.
حاولت اني الاحجي وياه لان كُميل كب وصار عصبي ما يتفاهم.
غرام: بالعكس ليش شعندك؟ عندك احنا عائلتك ناز بأمس الحاجة الكم
أنتم اخوانها، مليكة متعلقة بيك هواية راح تنقهر على فراگك و احنا هم نضوج لا تعوف اخوك وحدة.
اخوي؟ علوية ليش اخوي وينه منو شايفة الانتقام عامي بعده حتى عنا.
كُميل: هذا عذر منك گول ما اگدر اشوفها تتزوج گدامي لا تطلع حجتك بسوالف ارسلان.
اشرتله يسكت ما يجيب موضوع نيروز بس ما فاد و گف و هوَ متعصب.
شوووف عمر رجلك اكسرررها اذا خطت خطوة خارج هالبيت انتم امانة
يمي و تبقون گدااام عيووني عليمن الحگ عليك؟ لو على أخوووك
حتى شيب بررراسي طلعتووا من قهرررركم لشوگت تبقون هيج.
ليش خالي انا شمسوي مو هاي گدامك حتى بالشغل گدامك غلطة و غلطتها و جانت بسبب غبائي.
وتريد تعوف كلشي و تروح؟
بقى عمر ساكت منزل راسه الثواني رفع راسه عيونه تلمع بقهره و ناز تباوعله اللفة بايدها.
خالي تريد الصدگ ما اگدر اشوفها تتزوج گدامي.
راد يحجي كُميل بصياح اشرتله على ناز اتماسك نفسه واردف بهدوء.
منو گالك تتزوج
محد گال بس من حچيت وياها الواضح تريد تتزوج و تنساني
اذا تحبك صدگ ماراح تتزوج غيرك.
غرام: صح كلام خالك عمر و اذا صارت شغلة عناد ف هيَّ اكثر وحدة.
راح تدمر نفسها اكثر مما تدمرك لان راح تعيش ويا شخص ما تحبه
و لا متقبلته و غلط الشخص يتزوج احد ما مقتنع بي لان الزواج مو لعبة.
نهض من مكانه يمسح بوجهه إلى انقلب بدون ما يحجي ويرد على كلامنا مد ايده الناز گومها.
عمر: راح أنوم ناز تصبحون على خير.
طلع هوَ و ناز بقينا ساكتين اثنينا يمكن فعلاً يريد يسافر و يشرد من كلشي ديصير مديعيشون حياتهم طبيعي من المشاكل.
كُميل: وين صفنتي؟
غرام: أفكر بحياتكم كلها أكشن.
هز أيده بملل.
علساس عاجبنا هالاكشن.
وين جنتوا انتَ و ارسلان
سوينا شغلة
أي أفهم بس شنو؟
ما تنعسين گومي ننام
ليش تتجاهل سؤالي
من تشوفيني أتجاهل سؤال معناها ما اگدررر احچي
اخاف صفيت على الغلط ويا ارسلان؟
لا انا موضوع غياهب و أهلها من زمان ضده بس سوينا شغلة الشخص يستاهلها
اريد اعرفها
بعدين الكل يعرفها بالوقت المناسب.
مالحيت أكثر الواضح ما راح يحجي شي نظفت المطبخ غسلت المواعين.
ابتسمت بدون ما يشوفني واگف بصفي اغسل المواعين و اي ماعون
اغسله ياخذه مني و يحطه بمكانه طلعنا اثنينا قبل لا ندخل الغرفتنا راح شاف امه لگاها نايمة.
كُميل: شلونها امي اليوم
غرام: كلش زينة و حتى العلاج دينطي نتيجة
الحمدلله.
شوگت نروح للسونار كل يوم مأجلين روحتنا
هايهية باجر اخذج انعل ابو الشغل.
دخلنا للغرفة غيرت لبسي بسرعة دحست روحي بصفه رفع راسه يضحك.
مو علساس زعلانة
راحت الزعولة
أخ منج.
حطني بحضنه بطني صايرة حاجز بينا.
ابن الكلب من هسه مخلي حواجز بينا انا وامه.
شنو انتَ هم تحجي بصيغة ولد
غير انتِ كله تگولين ابني و ابني بس هم يگلي احساسي ولد
باجر نعرف بس عود لا تدلل اكثر مني.
قرب وجهه الوجهي.
أكو وحدة تغار من بزرها
بس اذا تدلل بي اكثر.
رفع ايده يمشيها بهدوء على ايدي ويصعدها الرقبتي.
تحبيني غرام؟
بكيفك.
ضرب جبينه بجبيني.
شنو بكيفي
هههههه اموت عليك كمولة.
عض خدي رجع عض حنجي ورم وجهي و ما يعض هيج لا يعض من كل گلبه عيوني دمعت.
اووييي كااافي ورمت وجهي كُميل
غير چنه كيمر شلون ما اعض هيج من شنو مخلوقة انتِ
مو الهلدرجة.
نزل ايده البطني.
ابني ما ادري بنتي اعذرنا انا و امك جاي نصير سرسرية بس ما اتحمل.
سحب وجهي قبلني ابتعد و هوَ يگول.
بهذلتيني بهل العيون خالي
وجهي بوخ خجل.
ليش تنزلين عيونج
أخجل.
ضحك بصوت.
أخرب على إلى يخجل.
ضمني بحضنه و كل شوية ساب الطفل، الثاني يوم العصر جهزت نفسي
نروح للدكتورة صار كُميل اذا نطلع اني وياه يخلي عمر يبقى بالبيت انطيناهم خبر و عمر موتني ضحك يصيح ورانا.
عمر: بروووح امج بروووح امج اذا ولد على اسمي
كُميل: نسمي ارسلان و يطلع على هتالة ارسلان
لاااا خالي صدگ تحجي تسمي ارسلان شيخلصنا بعد.
ضحكنا على سوالفه وطلعنا للدكتورة حجزلي الصبح لان الانتظار مال الدكاترة.
يموت وصلنا اول مادخلنا انتظرنه قليل ودخلنا الها نمت بالمكان الخاص
و گلبي يدك من التوتر بدأت الدكتورة بشغلها تمشي بالجهاز على بطني ابتسمت و هيَّ تگول.
الدكتورة: الطفل بصحة جيدة و الحمدلله حملج ماشي طبيعي.
كُميل واگف قريب منا حسيته هم توتره ما يقل عني ما اتحمل گالها.
كُميل: دكتورة هوَ شنو جنس الطفل فرخة لو فرخ.
ضحكت الدكتورة من گلبها على كلامه.
الدكتورة: جايكم ولد ان شاء الله.
دمعت عيوني من كلامها و فرحت اكثر احساسي ما طلع غلط ابتعدت
مني اكو مثل البردة سحبها كُميل يبوس بوجهي بعشوائية فرحان همست.
غرام: عزززا اا تشوفنا الدكتورة.
كُميل: هسه خلي اتشوف و اذا شافت ما اشايفة واحد يبوس مرته.
ابتسمت فرحانة الفرحته إلى تنقرأ بعيونه.
احلى هدية جاي تقدميها الي.
زادت ابتسامتي نزلت عدلت لبسي ولبست عبايتي طلعنا للدكتورة انطتني.
كم نصيحة اتشكرناها و طلعنا منها صعدنا بالسيارة بنص الطريق غير طريقنا مو الطريق البيت.
غرام: وين رايحين حبيبي
كُميل: نشتري تجهيزات الطفل
لا مو هسه بعد وگت خلي من ادخل بشهري نطلع نشتري
ها هيج تشوفين
اي كمولة
يروحلج فدوة.
اخذ تحلاية الخبر من الطريق دخلنا للبيت انسام عندنا اجوا اول اثنين هيَّ و عمر يسئلون بلهفة حجوا بصوت واحد.
عمر، انسام: هاااا شطللععع
كُميل: طلع راسه بعد رجليه.
حچى عمر قالب عيونه.
گولي انتِ علوية هذا رجلج يماطل بالسالفة
غرام: راح يجينا ولد ههههه.
هلهلت انسام بوستني وراحت الخالها باسته باركت النا و عمر تحسه
فرحان اكثر منه هم اتبارك النا دخلنا المليكة بشرناها نزلت دموعها.
مليكة: الحمدلله شفت هل يوم گبل لا أموتن.
باس ايدها كُميل.
كُميل: من عمري على عمرج.
بقينا گاعدين و ناز ويانا و جهال انسام ما ادري شعجب هل المرة گاعدين هادئين.
عمر: هسه شنو تسمونا على اسمي او لا.
كُميل: لا اسمك و لا اسم اخوك هو انتم گوا جارعكم يصير عندب صنف ثاني منكم.
عود راح يصير عنده ولد و بقى يشيم علينا
طبعاً بيك خير روح اتزوج انتَ وصير ابو فلان
عمي ما اريد اتزوج ابنكم يصير ابني بس گلولنا شتسمونه
انسام: شبيك خالي شو صدگ شفت روحك علينا قابل اسماء اخواني مو حلوة هم و اسمائهم يخبلوون.
دزلها عمر بوسة بالهوا و هيَّ رجعتها اله يضحكون.
كُميل: ياهيَّ حمادة العروس امها و خلاتها
عمر: وين الربط؟
اكو ربط من يشتغل عقلك المجيم
ديله أسكت لا تشيم علينا.
بقت سالفة تجر سالفة و عمر و كُميل واحد يفشل بالثاني دزيت رسالة السوزان
وانطيتها الخبر بقيت يمهم اباوعلهم متونسة على سوالفهم صفنت بيهم شيصير
لو هل العائلة ما عاشت إلى عاشته و ارسلان هسه مشلوع گلبه شيصير لو عاشوا بسعادة؟
حنين.
گاعدين بيت خالي عندنا طفرنا كلنا على صوت الرمي إلى صار كلنا وگفنا.
مرعوبين من الصوت طلع ابوية و خالي و درغام يشوفون شصاير بقينا بالبيت
ما طول وصار صوت صريخ نسوان بس ما معروف منين هذا الصوت.
جوهرة: بسم الله الرحمن الرحيم شنو هذا الصريخ و الرمي.
بدأ أطلاق النار
يزداد ما ينقص انگلبت الدنيا بهل الليل احس عشنا بحالة رعب اتصلت بابوية
و درغام ميجاوبون يخلون الواحد لا هوَ بأرضه و لا هوَ بسماه رجع اتصل درغام بسرعة جاوبته.
حنين: شنوووو السالفة درغام طلعتوا بعد و اختفيتوااا.
صعقني من گال.
درغام: مجيد مات.
ايدي صارت على فمي مصعوقة من إلى سمعته اردفت بصدمة.
مات؟
المعمل محترگ و هوَ بي و هذا الرمي اهلنا جاي يرمون والصريخ مال اهل بيته اذا تگدرن تعالن.
اتقدمن خالاتي يباوعن بنظرات تسائل.
وجدان: ولج ماما منو مات احچي گلوبنا صارت بايدينا.
بلعت ريگ ساكتة شلون اگلها اخوها المات فززني من صفنتي صوت درغام.
درغام: رايحين للمستشفى حنين.
سد الخط بقيت حايرة شلون احجي بلعت ريگ بتوتر و عيونهن منتظره جواب مني.
حنين: خالي مجيد المعمل مالته محترگ و هوَ بوسطه.
لطمت خالتي وجدان على وجها و خالتي جوهرة ضربت صدرها.
جوهرة: دخيلك يا ربي.
خالة يگول درغام اذا تگدرن تجن
اييي ماما شلون ما انروح وجدان و.
بقينا صافنين الحالة خالتي وجدان إلى صارت گوا واگفة على رجليها
وجها انگلب أصفر گعدناها ركضت جبت ماي غسلنا وجها بس نريدها.
ترجع تركز ويانا رغم كل إلى جان يسوي خالي مجيد من حقارة وياها و تهجمه
علينا بيوم عرسها هيَّ وابوية بس ما شفتها حقدت عليه رجعت بتركيزها
ويانا ودموعها على خدها لبسنه اسود بس خالتي من موتت امها لابسة اسود طلعنا
من بيتنا وصفت سيارة ابوية گدامنا نزل النا متوجه الخالتي شاف حالها إلى تخربط.
سلطان: دريت راح يصير بيها شي و ين ماخذاتها ما تشوفن حالتها
جوهرة: ماترضى خوية
اصعدن بالسيارة اوصلجن.
صعدنا وياه و خالتي صعدت بصف ابوية تناشغ بدموعها حچت بكسرة مردت گلبي على حالها.
وجدان: شلون بيَّ ياربي يوميا رايحلي واحد والله گلبي تعب
سلطان: گولي يا الله وجدان كلنا على هذا الطريق.
خوالي و عمامي كلنا بنفس المنطقة بس فرق شوارع بينا و اكو بيهم بنفس
الشارع وبيت خالي مجيد اقرب بيت النا من كمية الرمي دب الرعب بداخلي اول مرة
اشوف هيج شي حتى بفاتحة جدي ما سووا هيج وصلنا ابوية و الزلم صايرة.
هوسة لزمت خالتي والف وصية من ابوية عليها گوا تمشي دخلنا للبيت و بكل
خطوة الاصوات إلى داخل البيت تقترب اكثر كل صرخة تطلع تخليك ترجف
هوَ عنده بنات اثنين وولد اثنين واحد منهم متزوج دخلنا و اشوفهن مگطعات نفسهن تگطع.
رغم علاقتنا السطحية بيهن بس شگد گلبي حزن على حالتهن دخلت خالتي
گابلتهن اكره اجواء الفواتح بس مجبورة للصبح جابوا الجنازة ابتعدت عنهم.
مخترعة من الاصوات إلى صارت حد ما اخذوا بدأت ايام الفاتحة تمشي
خالتي اتدمرت ما صارلها فترة من فقدت امها و هسه اخوها جان اليوم السابع
و كلها تحجي من وره خشمها ويايَّ و ويا نيروز روحي طلعت طول هالايام عبالك
اعدائهم مو بناتهم و اذا يريدون شي الزلم بس صياح، گعدت بصفي نيروز تحجي ماعاجبها الوضع.
نيروز ؛ هسه احنا عود هم عندنا عم الغسل
حنين: شبيج؟
هاي طيبة كل ما تفوت من يمي تضربني و من اگلها شبيج تگلي ما شفتج مرة مرتين مو كل ماتفوت من يمي جذابة متقصدة
تحملي هوَ بس اليوم ونخلص بعد ما نوصل لهنا كلها تباوعلنا بحقد عبالك بايگين ورث أبهاتهم.
طبعاً يكرهونا اني بنت نادين و عمران إلى اخذها غصباً على خشومهم
و عاند سالم و انتِ بنت سلطان إلى غصباً عليهم من بعد سنين خذه وجدان
طُز شلون شخصيات و اهتملها.
صدگ بس خلصت الختمة مال السابع كلمن رجع البيته و خالتي مرة اگول
بالغت بحزنها عليه و مرة اگول يبقى اخوها بس سوالفه موزينة و لا عنده موقف
زين وياها وويانا نتذكره بي هذا الاسبوع ما شفت درغام بي حتى اتصال ماكو منه
سبحت خالتي و بدلتلها نومتها وطلعت دخلت اني هم سبحت و هلكانة تعب
بايام الفاتحة الخايسات ما يشتغلن اكثر شي شمرن الشغل علينا اني
و نيروز و الفاتحة اتعب مي و چاي و تنظيف ظهورتنا انكسرت.
طلعت من الحمام ابوية ماراجع شمرت نفسي بفراشي اريد انام نومة اهل الكهف
من التعب نمت ودخلت بسبات أستمر ما أدري الكم ساعة فزيت على أحد يبوس
بايدي فتحت عيوني شفته گاعد بصفي بس ضوء التيبلام مشتغل.
درغام: ليش نايمة بدون ما مشطه شعرج
حنين: تعبانة ما بيَّ حيل
شلونها عمتي
تعبانة نفسيتها تدمرت.
شفته صفن ساكت گعدت على حيلي و التعب مزروع بجسمي.
وين صفنت درغام
من رحنا للمستشفى و صار فحص للجثة لگوا أيد مجيد مكسورة.
حسيت النعاس طار من عيوني بعد ما سمعت كلامه.
هوَ يعني محروگ كله؟
لا مو كله جزء منه بس مختنگ من الدخان لان الحارس من فاتح الباب يگول لاگي على اخر انفاسه
لعد الحارس وين جان من صار كل هذا؟
الحريق فعل فاعل.
رجعت عدلت گعدتي و اني مركزه بكلامه.
ما فهمت
الحارس يگول انضربت من وره و بعد ما ادري شصار رحنا للكاميرات مابيها شي.
يمة بديت اخاف شنو منو هذا إلى سوا هيج.
التفت إلى بنظرات شك.
احس ارسلان اله ايد بالصار.
معقولة توصل بي يسوي هيج جريمة؟
ليش ما توصل واحد حقده عامي و يريد ثأر منه.
بقيت أضرب صفنات سداسية اني ادري بي يريد ياخذ ثأره بس جنت اگول
ما معقولة يقتل احد حطيت راسي على رجله متمدده ايده تسللت شعري.
حنين: هسه غياهب شدتسوي
تلگينها روحها طالعة ما تتحمل تتقيد بمكان واحد
أتمنى لو بذاك اليوم ابوية سامع منها حقيقة زواجها و جايبينها وياكم.
حنين احچيلي شنو سبب زواجها و انتِ منين عرفتي السبب اذا ابوج بنفسه ما يعرفه.
سكتت ما اگدر اخاطر و اگول نيروز تعرف كلشي قبلنا.
من ترجع غياهب هيَّ تحجيلكم كلشي اما منين عرفت هذا شي مختلف.
ما اگدر احجي منين عرفت و منو بالضبط نيروز راح توگع بيها و درغام لو عرف يتخبل.
براحتج بلائيي بس متأكد جاي تحمين شخص لان حافظج وحافظ كل اسلوبج و تصرفاتج.
العب بشعري خلي انام.
نلعب بشعرج نلعب ابوية يا ام العيون المكحلة.
ابتسمت غمضت عيوني رجعت نمت متناسية ابوية شلون تركه يدخل هنا يمي
فزيت الصبح نفس نومتي طبكت حواجبي اتلمست الشي إلى نايمة عليه
شي صلب رفعت راسي كمزت من مكاني من شفته مبقيني على رجله نايمة
و هوَ مرجع راسه على تاج الجرباية، فركت ايديَّ بتوتر هسه شلون اذا ابوية شافة.
اووف ادري بي ما يحب هالشغلات، اتقربت اله سوده عليَّ ما نايم عدل.
ادري بي اما اخذته النومة بدون ما يحس او ما هان عليه يعوفني همستله بصوت خافت و گلبي يدك اتخيل ابوية يدخل علينا.
حنين: درغام عمري.
مارد هزيته من كتفه فتح عيونه بنعاس ابتسم بعيونه الكلها نعاس.
درغام: اول مرة صباحي يصير حلو هيج و انا اصبح بهل العيون
ولك ابو جلطة عوف الرومانسيات شوفلك مكان تضم روحك بي اليوم
ليش؟
ابوية اذا شافك يشگك شگ.
عبالي راح يخاف و يطفر شو هذا اتمدد بطوله ما مهتم و هوَ يگول.
حتى ما سويت شي يستاهل و أنشگ بي عاد لو مسوي
شوف راح انزل بس انتَ لا تنزل درغام ابوية راح يضوج و هو منا ضايج على غياهب
ما انزل ابوية ما انزل بس خليني انام تعبان
اي اي تمام نام.
كمزت من مكاني و ادعي ربي ابوية ما موجود نزلت شفت خالتي واگفة تسوي
ريوگ ادور بعيوني على ابوية صبحن عليها و عيوني على الدرج خاف يجي ابوية و يصعد.
حنين: صباح الخير خالة.
ردت بتعب و ملامح شاحبة.
وجدان: صباح النور.
حكيت وره شعري بتوتر.
شنو بابا وين؟
طلع الدوامه.
زفرت نفس طوووويل براحة.
تمام اغسل و اجي نتريگ.
صعدت على السريع دخلت للغرفة طبكت الباب فتح عيونه.
حنين: يلااااا گوووم الأهلك ابوية بدووامه ماعندك غير هل الفرصة تنقذ نفسك بيها.
حچى بأنزعاج.
درغام: استغفرالله وتالي وياج
محد گالك تصعدلي البارحة شلون دخلت اريد افهم
چااا غير گلبي ال و أشتاگ الج.
درغام لا تضوج من كلامي بس اعرف خطوبتنا طولت بس دتشوف ظروف.
عكسنا و بابا ادري بي يغار ر ما يقبل بهيج تصرفات و ماريد يضوج فوگ ضوجته هل الفترة وتعرف الاسباب.
فاهمج ما اختلفنا حنين بس انتِ مرتي بالحلال و ما مسويلج شي انا البارحة نيتي اطلع بس مادري بنفسي غفيت.
امم ادري بس تعرف ابوية شگد مهم بالنسبة الي
وانا شنو ذنبي؟ ما جاي اشبع منج.
رحت گعدت بصفه لان گلب خلقته لزمت ايده.
خلي نصبر بعد شوية و ترجع اختي و بذاك الوگت نحدد زواجنا
أمري لله حظي ما ادري بيا خيسة نااايم.
بسته بخده طابك حواجبه بانزعاج.
لا تضوج الخاطري من اصير يمك اشبع مني اصلاً اخليك تمل مني.
واخيراً ابتسم جر خدي بخفه.
ما أمل منج لو تگايليني العمر كله.
ركزت بنظراتي بعمق عيونه.
شنو إلى يثبت
صايرة على كلشي تريدين اثبات بلائيي الجميل
يله گول شنو إلى يثبت.
طبطب على ايدي مبتسم.
تحملت سنين و انا كاتم حبي الج و گلبي بكل مرة يشوفج يتمنى يضمج بداخله.
واگلج شگد حابج و حتى من رفضتيني بقيت متمسك بيج ما عفتج فوك عذاب السنين
بقيت متحمل كلشي بس علمود احصلج بيوم من الايام و الحمدلله ربي
ما قصر وزرع حبي بداخلج وتريدين بعد هالتعب كله أمل منج
أحطج بوسط عيوني و انا الممنون .
حنين: دلغام كزكزززت وربي تعااال أبوسك.
تعاي هههههه.
رحت عليه بست بخده رجع أشرلي الخدة الثاني هم بسته أشرلي على عيونه ضحكت بوسته بعيونه.
درغام: أوفيششش ياراحة بوستك.
ابو جلطة يله يله مو تسرسحت على الوضعية.
لا اوگفي بعد مكان نسيتي تبوسيني منه
وين؟
أشرلي على شفته ضربته بخفة خازرته.
كاافي شنو شبععع.
سحبني من خصري لزگني بي يما گلبي شيصير بحالي اتبهذل من اصير وياه
بهذا القرب حتى ادوخ غرس راسه برگبتي سحب نفس منها رفع راسه عيونه تباوع للشامة إلى جوا شفتي
أحب هالشامة.
هذا اگلك درغام خالتي هسه تنتظرني اني راح انزل
أنزلي
أي وخرر أيدك.
ملصت نفسي منه طلعت غسلت بسرعة ونزلت اركض عبالك احد يركض ورايَّ.
دخلت للمطبخ خليت خالتي تگعد بالجهة المعاكسة يعني ظهرها يصير على الباب
و اني گعدت گبال الباب انتظرت دقائق و هذا بعده ما نازل موووتني
غير ينزل بس لا رجع نام شفته نزل و اني صرت الهي بخالتي امسلت بانواع
الحجي بس اريدها ماتحس بشي صرت اخبططط خبط بالكلام جمدت
بمكاني من صارت صوت طبكة الباب بلعت العافية من خالتي گالت.
وجدان: چني سمعت صوت الباب.
حنين: لا خالة وين شو كلشي ما سمعت انا و لا اكووو صوت
شلون ما سمعتي انا سمعت طبكة باب.
عضيت شفتي بتوتر من گامت من مكانها تستفقد الباب بقيت بمكاني وره شوية رجعت طابكة حواجبها.
ماكو احد
موووو گلتلج اني بس ما صدگتيني، راح ابدل و اطلع الدوامي انتِ تداومين اليوم.؟
اي صارلي كم يوم مأجلة مراجعيني.
هزيت راسي بقبول صعدت بدلت ونزلت طلعت الدوامي دخلت للمستشفى لاگتني انوار.
انوار: هلا حنينه
حنين: هلا انوار
شلون صرتي.
ماشية.
بعد ساعة اكو عملية و اسمج بيها
مال شنو
ولادة
شصار على موضوع خالج الله يرحمه
شيصير خية طلعت الشغلة فعل فاعل و هل ديمشون بالموضوع
اگلج حنيم شنو هاي حياتكم ربي يساعدكم تطلعون من مصيبة تدخلون بالثانية.
ابتسمت مجاملة بدون أي خلگ تحس گلبك تعود على الوضع بس بداخلك محترگ حرگ.
الي شفتي شي قليل اكو شغلات عقلج يوگف اذا تسمعيها.
بقت تباوعلي بأستغراب ما حجت اكثر مرت ساعة و دخلت الصالة العمليات.
جانت البنيه الام صغيرة انصدمت بيها والله مادري الاهل عقليهم وين من يزوجون
بهل البنات اتذكر اني بعمرها جنت ابجي و ازعل اذا ميجيبولي إلى اريده
يعني هيَّ طفلة و تولد طفل شنو الفرق بينهم و اكثر شي اكرهه بالمجتمع هالعادة
من يزوجون بناتهم بعمر صغير وولدهم نفس الحالة و حجتهم هيَّ اولادهم يكبرون
وياهم ما يفكرون الزواج مو بس تخلف. قبل لا نبلش بتخديرها وگفت اسولف.
وياها اطمن بيها علامات الخوف مرسومة على وجها ابتسمت الها اطمن بيها ارفع من معنوياتها.
حنين: شنو راح يجيج
بنيه
لعد حتشوفين الحنية ان شاء الله.
بقيت واگفة اباوعلها نزلت دمعة منها.
ليش تبجين لا تخافين حبيبتي
والله ما اعرف شلون راح اتصرف وياها اني بنفسي محتاجة الاهتمام والرعاية شلون حگدر انطي الطفلة
شگد صارلج متزوجة
سنة ونص
زوجج شگد عمره
30 عمره.
هزيت راسي بيأس مقارنة بعمرها جبير عليها بقيت اطمن بيها.
لا تخافين راح تگعدين بنوتج بحضنج وراح تنطيها كل الحب و الاهتمام
بس اتعاملي صح وياها و كلشي ينحل متأكدة راح تصيرين احلى ام دام تفكيرج هيج
اممم وشوفي لا تنتظرين احد يعلمج اكو كتب تعلمج التعامل ويا الطفل شوفي فيديوات هم.
هزّت راسها فرحانة.
اي اي والله اشتري و اقراهن و اتعلم اني اريد احب بنتي هواي ماريد تعيش إلى عشته اني.
بلشت عمليتها اصحاب العملية القيصرية اعتبرهن امهات مضحيات يفتحون.
البطن اكثر من طبقة و غير الالم إلى يصير بعد الولادة بس هيَّ مو كل ام أم كملت
العملية طلعت امشي و گدامي احد الممرضات وگفها صوت رجال بسؤاله عن بنته رحت عليه.
حنين: السلام عليكم حجي
عليكم السلام.
بنتك الحمدلله بخير هيَّ و طفلتها هسه الدكتورة تطلع تشرحلكم كلشي.
غمض عيونه بأرتياح
الحمدلله.
باوعت للمكان لعد وين امها زوجها.
حجي انتَ وحدك هنا
لا بوية زوجها و امها جانوا موجودين بس راحوا ياكلون.
هز راسه بنظرات قهر مبتسم بعد سلامة بنته
ها ماشي حجي ارتاح انتَ.
عفته وكملت طريقي متنرفزه تاكل وبنتها بنص الموت لو زوجها الاغبر
مو لازم يوگف بصف ابوها الضمير انعدم نزلت امشي مالي خلگ الدنيا طالعة
من عيني اتحسها انعدمت من عيونك گعدت بحديقة المستشفى اخذتني ذاكرتي
القبل سنين من جنت بمرحلة المتوسطة جانت اكو وحدة بصفنا تنگط سم الرايح
و الجاي ما خالص منها اني وغياهب بنفس الصف سوا اشترينا اني وياها جانت.
عكسي صداقتها بحدود بس بالجامعة لزموني اهلي و ماخلوني اختلط زيادة نمشي وصارت بوجهنا نفس الطالبة.
عذراء: ايععع وجهجن واحد نفس الشكل ما تضوجن
غياهب: شعليج ولي منا
حنين: اگلج انتِ شتريدين كل فترة و اجيتي تتحرشين بينا ماعندج غيرنا بعدين شعليج بوجهنا.
عفناها و گعدنا بالساحة مال المدرسة ناكل بحلوياتنا إلى اشتريناهن باوعت الاختي تفتح بالكيكة وطابكة حواجبها.
غياهب
ها
عذراء اجت.
دارت وجها شافتها جاية هيَّ و بنات اثنين باتجاهها و كفنا اثنينا.
غياهب: اجه الچلب وربعه
عذراء: اكلي لِچ.
ما اكلج اعذريني.
شهگت من هجمن علينا كوثر و إلى وياها على غياهب رغم هنَّ اثنين و عذراء
وياهن بس ما گدرن الغياهب ملختهن هنَّ الثلاثة هاي الثالثة اجت هجمت عليَّ سحلتني
من شعري رجعت عليها سحلتها من شعرها اعت بي عت صاحت عذراء من وجه الكتله الب انكتلتها من غياهب.
عذراء: انعلللل ابوووووجن ولج اخخخ.
غياهب: حنين هاي تسب بابوية يااا حقيرة اني اعلمج.
صار المالح بفلس بينا الطالبات التمن علينا و المديرة گوا فاككونا اخذونا للادارة
وبدأت ترزل بينا اكره المديرة مالتنا لان باطلة.
المديرة: شنوووو هل الاستهتار طالبات وبنات شوارع لووو بيوت.
گومي هنا يا غياهب ردي الكلام عليها ما سكتت الها.
غياهب: ست هاي انتِ مربية الاجيال تحجين هيج لعد شبقيتي للباقين.
شهگت بصوت من شفتها فرة وجه غياهب براشدي و عذراء تباوع بشماته رجعت ترزل بينا و قست بالكلام على غياهب.
اخذت اختي من الادارة سحل تريد تفترس المديرة بس منو ممكن يگدر يسكت
عن حقه غياهب؟ هه لا اكيد بس رجعنا حجت الابوية كلشي و ابوية واحد يتقرب
النا ينجن جنونه الثاني يوم راح ويانا للمدرسة لعب بيها لعب للمديرة.
سلطان: انتِ بأي حق تمدين ايدج على بنتي؟ تعاجزتي توصلين خبر إلى و انا اتصرف وياها لووووو جانت غلطانة.
المديرة: طولت السانها ويايَّ استاذ سلطان.
و من طوووولت السانها ما تعرفين توصليلي خبر و انا اتصرف وياهااا تروحين تمدين ايددددج عليهااااا.
التفت الغياهب الواگفة.
سلطان: بشنو طولتي السانج؟
غياهب: من جابتنا هنا بقت تحجي علينا و تگول شنو هل الاستهتار بنات شوارع لو بيوت گتلها اذا انتِ مربية الاجيال هيج شبقيتي للباقين.
دار وجهه ابوية للمديرة ياربي شگد اكرها.
هذا كلام ينحجي ويا طالبات وين دراستج و ثقافتج و تفهمج. الطالبة من تغلط
اكو أهل ولي امر يحاسب ويصحح الغلط بقى يحجي ويرزل ورزل غياهب هم گالها
ممنوع تردين على احد شيصير تجيني تبلغيني و انا اتصرف طلع ابوية بعد.
ما تعارك هوَ و المديرة حضنتني بحنية غياهب مبتسمة.
غياهب: لا تخافين و اني بظهرج والله إلى يسويلج شي العب بي طوبة.
و فعلاً ما خلفت بكلامها جابت عمرها تسد إلى و سند دائماً إلى واگفة ويايَّ
رغم نفس العمر بس أفهم مني من كبرت صارت تشيل همي مثل الام
من تشيل هم بنتها من اغلط تعلمنب الاخت نعمة بالحياة.
فزيت من افكاري على صوت الممرضة.
طالبينج
حنين: منو؟
البنيه إلى جنتي بعمليتها.
هزيت راسي بقبول ورحت وياها مستغربة شتريد مني المريضة دخلت للغرفة
الخاصة شفت امها وزوجها گاعدين و ابوها خطية گاعد بصف راسها أيقنت بهل اللحظة مرات اكو اباء حنيتهم اقوا من الام.
حنين: تفضلي طلبتيني.
جانت لازالت تعبانة.
اي
محتاجة شي اگدر اساعدج بي؟
حسيتها مثل إلى خجلانة تحجي ومنحرجة.
مو صارت عندي بنيه
اي الله يحفظها.
اني ما جنت مختارة الها اسم اذا تسمحين النا نگدر نسميها على اسمج.
علامات الدهشة أعتلت ملامحي ابتسمت بفرح بطلبها.
طبعاً أسمحلكم
بس شنو اسمج
حنين
الله اسمج شگد حلو اسم على مُسمى.
ضحكت گعدت وياها و جابوا بنتها رفعت راسي مبتسمة اباوع الزوجها بس ينافخ
بعصبية مكتومة و امها ماعاجبها العجب ما اگول غير الله يساعدها
طلعت امشي مترخصة منهم استوقفني صوت زوجها يم الباب إلى جان ينتر بالكلام نتر.
من البددداية گتللج هل البنيه مااا اريدهاااا.
بقيت متفاجئة بكلامه شلون ديحجي هيج وهيَّ ما صارلها هواية طالعة من الموت اسمعها ردت عليه.
شبيك شوفها شحلاتها والله يعني بيدي اني هذا رزق رب العالمين
مااا احب البنااات افهمي هذا الشي.
صاح بيها ابوها.
الحجي: وولك شبيهااا البنيه هذا رزق رب العالمين تتبطررر على رزقه؟ انتَ أحمد ربك الف مرة أنطااااك بنيه صحتهااا مابيها شي و بخيرر لااا تتعافى لااا الله يگلبهااا بيك ماتريدهاااا يطبك مرررض اخذها هيَّ وبنتها واربيها.
حجت هنا الاماية عود والله حرام تسمى ام هالنماذج.
الام: شبيك عيني حجي شحجى هيه هوَ حقه يريدله ولد يشيل اسمه البنيه شتسوي تاليتهااا للرجال.
وبنتج شيبتتتت؟ وبعد ما تخلفله صوووجي خذت بحجيج وزوجتها الواحد ما يسوا اظفرهااا خلينييي سااااكت.
عفتهم يتجادلون بالكلام بينهم انقهرت على البنيه شنو ذنبها هيَّ و امها ما يدرون
البنيه شگد حنونه حتى الرسول حچى عنها بس هيج بشر ما يتوب الا رب العالمين
يعاقبه شمدري يمكن ينطي الولد ويطلع عاق و يشلع گلبه بس جيب إلى يفهم
مرّت ساعات خلص دوامي مقهورة بداخلي و حقدت على كل شخص ينفر من البنات اجتني رسالة من درغام.
درغام: لا تروحين ويا السائق انا اجي اخذج.
حنين: تمام بس ليش انتَ راح تجي.
نروح لاي مكان محتاج نگعد سوا وانطيت خبر الابوج.
ابتسمت بنص حزني.
أنتظرك.
دزيت رسالة للسائق ما يجي خلص وقا دوامي طلعت شفته واگف و متأنق بصف سيارته رحت عليه سلمت.
شو متأنق شعندك
الي يسمعج يگول مبهذل
لا مو هيج
اصعدي اصعدي الله يرزقنا تركيزج.
صعدت قبله لان هوَ اجاه اتصال وراح على جهة يخابر بقيت گاعدة.
وحدي انتظر شفت وحدة مكابلته و تباوع طلعت راسي من الجامة صحت.
حنين: درغام.
رفع راسه ابتسم من شافني مطلعة راسي من الجامة أشرلي بايده جاي رجعت اباوع
الهاي ماتباوعلي صافنة بي ما أنشلعت من مكانها اريدهااا بس تروح اريدهااا
تباوعلي و اخيراً انتبهت عليَّ رفعت ايدي اشرتلها على الحلقة و اشرتلها على درغام
بس شافت حركتي دخلت للمستشفى شگد اكره هيج بنات صعد كبل باسني بخدي سريع و ابتعد.
درغام: ها حبيبي شكو مطلعة راسج من الجامة
حنين: هيج بس اتأخرت وانتَ تخابر
اتصال من شغلي
خاف اتصال من معجبة لان ماشاء الله كثرانات معجباتك حضرة الضابط.
شغل السيارة طلعنا يسوق و يسولف.
ليش تحرگين بدمج ما شايف غيرج انا و عيونج
ترررا مو بيدي ما اتحمل شنو وحدة تباوعلك
شلون بله اخلي لافته على كصتي مكتوب عليها ممنوع النظر.
حجيت بعصبية ضايجة.
لا موووو هيج بسسس تررررا انتَ مالتي يعني ليشش يباوعووون
احبج.
خزرته درت وجهي لزم ايدي بايده كل شوية بايسها و يتغزل بيَّ بس يريد
الطنكورة تروح و اني كل ما اريد انسى ر ارجع طبيعية اتذكر لجين و هاي
الوحدة اطنكر اكثر وصلنا للمطعم نزلنا اجوائه حلوة گعدنا باحد الاماكن.
درغام: هسه شلون تبقين هيج مطنكرة
حنين: لا هايهية يله ماريد اخرب طلعتنا.
هاي حجة حنين انتِ من اجيتي مبين من وجهج ضايجة شصاير وياج
اليوم صار بالمستشفى موقف كلش غثني درغام
شصار؟
حجيتله عن البنيه و عن الكلام إلى سمعته طلعت إلى بگلبي عليهم من گد ما غثوني و ما گدرت أدخل لان عائلة بينهم مو من حقي أدخل.
هيج بشر ما يقدر النعمة إلى منطيها رب العالمين اله
أنقهرت على الطفلة و على أمها
هم الصوج من ابوها چا هوَ يمشي بحجي مرته شني تدري ببنتك بعدها صغيرة
اوف
عوفينا من الناس شنو تاكلين.
بكيفك حتى نفسي للاكل مسدودة
حنين لا تبالغين بسبب عواطفج هواي هيج حالات مثل هل البنيه تعودي تتقبلين.
كلشي تشوفينه دخلي للمحاكم شوفي المصايب إلى بيها.
ما ادري درغام يمكن اني لان عشت بينكم مو هواية شفت شغلات عجيبة غريبة بعيداً عن الماضي
الدنيا بيها اشكال لا تخدعج المظاهر.
طلبنا اكل و رجع يحاول يطلعني من مودي ما ارتاح الا شافني ضحكت اتونست
وياه بهل الليلة حسيته اخذ مساحته براحته لان گدام ابوية يتقيد طلعنا من المطعم خابره ابوية.
درغام: اخ منك سلطان.
فتح خط عليه يضحك.
جايننن و العباس ابوووو فاضللل جاينننن.
اختفت ضحكة درغام حگ طرف حاجبه ساكت و يسمع الابوية بقيت
واگفة بس اريده يسده و افهم شصاير سده أشرلي أصعد.
صعدت و كلي خوف صرت أحس ما يمر يوم اذا ما ننهبط بي صعدت ساكتة وجهه دخن من العصبية.
شكوووو درغام.
مكان شغل عمامي أحترررگ
يمة شحرررگه
ارسسسلان ماكووووو غيره
ماعندنا دليل هوَ ليششش نتهمه
حنين متأكد هوَ مثل ماااا شايفج اذا ما يحرگ كلشي ما رااااح يكن ويسترررراح.
سكتت خايفة بداخلي رجعنا للبيت طول الطريق ينافخ من العصبية دخلنا شفت
خوالي عندنا خالي جابر و عمران بس الزلم گاعدين انضمينا الهم گعدت ساكتة
و بدوا يتناقشون بينما ابوية ساكت كأنما يعرف منو وره كلشي و إلى ديحرك
مديخلي أي أثر اله على گولت خالي عمران مثل الجني، و هيج بدأت ايامنا
عشنا برعب صرنا نختف لا تحترك بيوتنا علينا.
الي ديحرگ كل يومين حارگ مكان مابقى شي على حال الناس دمرررهم دمااار.
دمر املاك خوالي و عمامي التحق درغام الدوامه خالي عمران و جابر عندهم
املاك و اعمال بس خارج بغداد بس عمامي و خوالي الباقين محلاتهم و مكاتبهم
صارت رماد ثمانية و عشرين يوم ما بقى الفلس على حالهم دمرهم خلاهم يگعدون
علي الحديدة صاروا يعرضون ببيوتهم للبيع علمود يسدون ديونهم باعوا بيت العائلة
لان خساوا خسارات فادحة بشغلهم بالمختصر إلى حرگ كلشي خلاهم.
يفرون باذاناتهم و هم ما يعرفرنه گعدهم على الحديدة خلاهم يدگون
علي روسهم ما عدا محلات ابوية الوحيدة إلى ما اتقرب الهن.
غياهب.
باجر نهاية الشهر إلى حدده ارسلان من فترة ما عندي فكرة شسوا هالفترة
جان يطلع ما يرجع الا وجه الفجر ابتعد عني هواية حتى صار ماضايقني
مثل قبل كلامه محدود ويايَّ مرات تمر ايام ما يحجي الحرف ويايَّ عثرت التوت رجلي
گعدت لازمتها بألم ماجان موجود بالبيت و گفت امشي و أعرج ما اگدر امشي.
عليها دخلت للغرفة إلى بيها اغراضنا فتحت الجنطة اداوي رجلي اكو مرهم
مرة گالي عليه باثناء مدافتح الجنطة طلعت العلبة أستوقف حركتي.
الخنجر إلى موجود داخل الجنطة منقوش عليها شي مديت ايدي طلعتها رفعتها
گدام عيوني اباوعلها طولت بنظراتي عليها مصفنة بالاسم منقوش عليها اسم أولريش .
گلبتها للجهة الثانية منقوش عليها اسم ارسلان و تاريخ ميلاده رجعتها المكانها.
من سمعت صوت الباب اخذت العلبة مال المرهم فتحتها رجلي أذتني بألمها
دخل باوع منزله عيوني بس رجليه اشوف حركاته رفعت راسي من اجاني صوته.
ارسلان: شبيها رجلج غياهب؟
غياهب: و اني انشي عثرت ما ادري شصارلها
تأذيج؟
اممم.
گعد بصف رجلي رفعها بهدوء عطت بصوت متوجعة
شدتسوووييي
خلي ادهنها بالمرهم بلگي يخف الالم
اني اسويها
اش
اش بعينك.
مالي خلگ اتناقش بقيت ساكتة كاتمة وجعي يدهن بيها عاضة ايدي اكتم سوتي رفع راسه بعد ما كملها.
خلصنا
شكراً.
مارد عليَّ ملامحة تعبانة غير عن قبل طلع من يمي متفاجئة بتصرفاته
داحسه شخص ثاني قبل اذا شافني يبقى يذب حجي عليَّ لو يفتح اي موضوع
حتى لو سخيف المهم عنده يسولف ويايَّ بس صارله فترة تغير تحسه صار
شخص غير بقيت بمكاني گاعدة، مليت من الگعدة سحبت واحد من كتبي امشي
و اعرج جان گاعد يدخن وصافن بفراغ الزاوية گعدت كباله اقرأ بالكتاب.
كل ما ارفع عيني اشوفه صافن بيَّ حسيت توترت بسبب نظراته سديت الكتاب و سئلته.
راح تاكلني بعيونك ملاحظ نفسك؟
نشبع بعيونا
باجر اخر يوم
امم
راح ارجع الاهلي مو
اي.
وانتَ؟
شبيه؟
شراح اتسوي
أكمل إلى بديت بي.
وبعدين؟
أعيش بذكرياتج.
نزلت عيوني منه نبضات گلبي تسارعت من نبرة صوته الهادئة و كلامه حطيت الكتاب على وجهي اخفي وضعي.
ارسلان
حيلي
راح تنهيها بالدم؟
اي.
غمضت عيوني كاتمة غضبي
تدري ما راح اسامحك لو سويتها
اي ادري
راح أندمك.
هم أدري
راح عيونك تدورني و ما تلگاني
عادي انا و الميت سوا ماكو فرق.
هزتني اخر جملة نزلت دمعة مني رفعت ايدي مسحتها بقيت الكتاب كبال وجهي.
ارسلان: تدرين شنو اتمنى غياهب.
نزلت الكتاب من وجهي اباوعله نزلت عيوني على المطفاية مال الجكاير مدخن بكثرة.
غياهب: ششتمنى؟
أحضنج مرة وحدة بأرادتج وتبادليني هذا الحضن بدون ما تلعب نفسج مني .
مسح على وجهه و على شعره ابتسم تك خد.
هيَّ أمنيات و المايگعد حظه ريا أهله يريد يگعد حظه وياج .
طفى الجكارة رجعت الكتاب على وجهي بحركة سريعة سحبه مني گعد كبالي قريب مني عيونه تتأمل ملامح وجهي.
غياهب.
عيوني.
بقى ساكت يبلع بريگه عيوني تدور على وجهي جبينه متعرق بعيونه حجي نهض من مكانه مبتعد دار وجهه عني.
حضري نفسج باجر طللعين من هذا المكان.
ضاگ النفس بيَّ اي مو هذا إلى تريدي غياهب شبيج لا تتنازلين و تمشين.
وره گلبج لان تخسرين نفسج إلى سوا وياج مو سهل صعب يتسامح عليه
احتار عليمن اسامحه عشت عذاب نفسي وياه بس كرامتي أهم و أدوس على كلشي لأجلها
وگفت بمكاني لازم أقنعه ما يخلي الدم يجر والله راح تروح ناس مالها ذنب
ويصير نهر من الدم بين الطرفين محد راح يسكت دخلت وراه.
غياهب: ارسلان أترك موضوع الدم صدگني بفعلتك هاي راح تخلي
الثأرات تجر راح تروح ناس مالها ذنب ماراح تستفاد شي
ارسلان: ودم ابوي و امي يروح هيج؟
اخذه من سالم الباقين مالهم علاقة
لا اتعبين نفسج باجر بالليل راح تطلعين منا حضرة المحامية.
عافني وطلع بقيت اشيل بروحي و ارگعها من الحركة خايفة من حرب باجر
شراح يصير بمنو راح ينختم هذا الثأر منو راح يكون الضحية رجفت شفتي
خوف نزلت دموعي و اني اتخيل ابوية يكون ضحية لهذا الانتقام، طول الليل
ما نمت التفكير اخذ حيز مني راد كاد ينفجر تعبت بتفكيري و اني انتظر باجر.
و شنو بالضبط راح يصير ما جنت ادري راح يصدمني ويصدم الكل بفعلته.
ما نمت للصبح بقيت گاعدة بالصالة و هوَ يسبح طلع من الحمام بدل ملابسة
طلع جنطته حطها على الميز يجهز بنفسه رجلي ورمت بصعوبة امشي عليها
وگفت استندت بجدران الحايط الرطبة سحلت نفسي و گفت گدامه لزم سلاحه حطه بخصره و الخنجر نفسه إلى شفته لازمه بايده.
أشوفك تجهز نفسك لازم أعلنت الحرب رسمياً.
اتقدم بخطوات إلى وگف لزم حنكي.
صار وگت الدك بالدم.
صفنت بعيونه مابيها شي يدل هذا بشر و لاول مرة خلال هل الاشهر إلى مضيتهن هنا اردفت بنبرة توسل.
لا أتسويهااا.
سنين صارلي منتظر ها اللحظة و اليوم اجه و گتها. حضرة المحامية لو طالبة غير شي ما رديتج.
گلبي صرت ما اگدر أسيطر على نبضاته شهگت النفس نزلت دموعي اباوعله.
ما أبريك الذمة الى يوم الدين على كلشي راح اتسوي.
تغيرت ملامحه كلها فكه ينبض و اگدر اركز بهذا الشي ماحچى عافني و طلع.
گعدت بالگاع منهارة ابچي راح ارجع أنكسر اليوم صرخت من عمق قلبي
بصوت حسيت حنجرتي اتجرحت بهل اليوم بچيت حد ما انتهيت صرت اكح بقوة
من گد البجي العبت نفسي ركضت للحمام من شفت نفسي اريد اتقيئ ذبيت من راسي.
غسلت و كل اجزاء جسمي ترجف رجعت المكاني گعدت هدوء تام مستوطن المكان
ماكو اي صوت وصف مطابق الحالتي بهذا اليوم وصفته.
هوَ كان هذا الهدوء اشبه لهدوء يوم العاشر من محرم من يصيب هذا اليوم هدوء و تباوع للجو و للدنيا تخنگك.
جهزت اغراضي بجنطتي وروحي ميتة بقيت بس جسد بدون روح دموعي ما بطلت
نزولها اذا صار شي الابوية ما ابقى عايشة اموت لو خوالي جابر عمران الي
بمثابة ابوية ما اگدر اختار بينهم شراح اتسوي يالاعرج، للمغرب اسمع الاذان
المغرب بس الصوت مو قريب بس اگدر أسمعه وگفت اتوضأ كل حيل ماعندي.
اليوم غياهب سمحت للضعف ياخذها وگفت أصلي أطلب من ربي العون و القوة
اذا عندي نقطة ضعف بالحياة هم أهلي كملت صلاة سجدت بعد الصلاة دموعي نزلت بغزارة.
يارب دخيل أسمك انتَ ما أترد عبدك من يطلبك بحاجة طببي منك لا تخلي يغلط هالغلطة.
نمت على السجادة لامة رجليَّ الصدري دموعي تنزل ماخذه مسارها بهدوء
بقيت ساعات بهذا الحال انفتح الباب عيوني مغوشة من دموعي بدأت تتوضح.
الرؤيا عندي عيوني توقفت عن الرمش جسمي اتشنج من المنظر أليّ گدامي
نزلت دموعي أكثر من شفت الدم بأيده صرخت بصوت و بروح مفرفحة.
غياهب: لااااااااا ارسسسلاان.
رفعني من السجادة حاضني يمسح بدموعي بايده إلى مابيها شي.
ارسلان: دخيلج أهدي.
ملخت روحي تملخ خلاص سواهاااا سووواهااا ابچي بصوت عالي انتهيتتت صرخت بوجهه.
سويتهاااا ارسلن سويتهاااا گتلت منوووووو دم منووووو هذااا بأيدك.
حطني على السجادة مال الصلاة مثبت ايديَّ على صدري يريد يثبتني اتهسترت.
أسمعيني بس.
مجرررررم شنوووووو فررررقك عن سالم و عيااااش هم گتلوا ابرياء و انتَ مثلهمممم الله يااااخذك عسااااك بحهنم عساااك بلووووعة گلب مااالهاااا علاج.
حيلي أنهد تعبت باوعتله بتعب و عتب بلع ريگ رفع راسه بعد ما چان منزله
رجع نزله يباوع بعيوني شهگاتي تتردد بصدري نظرلي بتركيز يريد يحجي و متردد.
گلبي فرفح ذب نفس متحسر حچى وصوته يرجف وگفت دموعي جامدة بعيوني من گال بهمس.
ما سويت شي غياهب ما گتلللت أحد وگفت عيونج گدامي ماااا گدرت ما گدررررت أذي أحددد .
نزلت دمعة من عينه وگعت على خدي بقيت صافنة أستوعب إلى حچاه بقى
كلامه الثواني يتردد بعقلي يمسح بدموعي إلى رجعت تنزل بابهام أصبعه.
أفرحي غياهب أفرحي گدرتي تفوزين على الاعرج بسببج خسرت اكبر حرب بحياتي مخططلها من سنين
شهگ بدموعه.
بضياع اختلطت دموعه ويت دموعي يحچي مختنگ من صدمتي بكلامه أحس
الدنيا اتوقفت هنا اي بهاي اللحظة كلشي اتوقف بهذا الموقف حط ايده جوا راسي
مقبل جبيني رجع باس عيوني المتروسة بدموعي همس بصوت مبحوح رجف كل ذره بجسمي.
ارسلان: أحبج كثر ما بگلبي شوغات .