رواية وتيرة الأعرج للكاتبة حوراء السعيدي الفصل الثالث والثلاثون
غياهب
ضاع الكلام مني أربط الساني العيون و نظراتها جانت تحجي كلشي بهل الدقائق
كلشي صار صدمة انسحابه من أنتقامه أعترافه إلى ما توقعت راح
يبوح بي بيوم حچيت بصوت مبحوح أثر صراخي.
غياهب: الدم؟
اردف بهدوء و عيونه تارسها الدمع متمركزة بوسط عيوني.
ارسلان: لا تخافين ماكو شي من إلى أبالج.
نزلت دموعي أكثر.
لعد شنو هذا الدم فهمني ارسلان
گومي نغسل و أفهمج.
ما ترددت و لا رفضت اريد أفهم كلشي عقلي ضرب من إلى ديصير.
وگفني أشرتله اني امشي وحدي جسمي يرجف أبتعد عني نزعت ازار الصلاة
الي صار كله دم من أيده اذا ما سوا شي شنو هذا الدم؟ طلعت مشى ورايَّ
بخطوات مبعثرة دخلت للحمام اغسل و ايديَّ يرجفن برعب اريد أفهم كلشي
معقولة ديحجي الصدگ و ما أذه أحد، غسلت درت وجهي شفته واگف
يم الباب و الدم ينزل من أيده بلعت ريگ بخوف طلعت دخل قبل لا يغسل التفت الي.
روحي اگعدي هسه أجي
اريد أعرف موضوع الدم.
هز راسه ساكت رفع ردن القميص و هنا عقلي طار شهگت ايدي على فمي من المنظر جارح ايده من الطول للطول معدتي قلبت من المنظر درت وجهي.
شبيهااا ايدك؟
طلعت قهري بايدي ما جان گدامي حل
يعني انتَ جرحت نفسك؟
اممم.
رمشت بتعجب طريقة الاذية إلى مأذي نفسه بيها بشعة سكتت أفكر
من كل عقله اذها هيج بسبب قهره و عصبيته طلع گدامي لاف المنشفة
عليها يوقف النزيف گعدنا اثنينا ساكتين اريده بس يحجي روحي فرفحت بين ما حچى.
ارسلان: جنت رايح المنطقة أهلج و قافل على النهاية و اخذ ثأري منهم. ابتسم بخفة و عيونه بايده يباوعلها. الماهزة شي بالدنيا هزته عيونج حضرة المحامية
منو جنت رايد تگتل؟
واحد من خوالج و ابوج.
اتجحظت عيوني ويا كلامه.
ابووووية؟
اي ليش اجذب عليج.
نهضت من مكاني واگفة گدامه عيوني جمرت من كلامه نيضي احسه صار براسي.
بسسسس هوَ شعليههه
يبقى أبن عياش، عياش نفسه إلى حرمني من أبوي
ياااا سلام على التفكير.
غياهب انا ما عفت انتقامي راح اخذه لو بعد الف سنة.
اتوقفت حركتي طبكت حواجبي بعدم فهم ما فاهمة مقصد كلامه.
وضح؟
راح تعرفين كلشي
دتلعب عليَّ ارسلان؟ شنوووو ما گتلت احد و شنووو فزتي عليَّ و هسه تگلي ما عفت انتقامي
لا ما عاش إلى يلعب عليج بنت سلطان انتِ تلعبين مدينة بأكملها و محد يلعب عليج
بدت تتلف اعصابي فهمنييي.
تغيرت ملامحه و لانت وزاد حزن ملامحه.
اخر مرة شفتج قبل لا اطلع منا لاول مرة من شفتج و شفتيني ما بيوم تنازلتي
الي و لا حجيتي بيوم بطريقة توسل كرامتج مخليتها فوگ كلشي اي شي يبذر
مني ترجعي إلى اضعاف بس اليوم لاول مرة حسيتج حجيتي بتوسل هيَّ
جملة وحدة منج طلعت بأنكسار بس بقت تتردد بعقلي كل الطريق، رفعت سلاحي
علي ابوج من بعيد جنت رايد اخذه غدر ردت اگتله بس ما گدرت عيوني صارت
گدامي ما گدرت اول مرة احس نفسب عاجز وضعيف جبت حياتي كلها.
دايس على گلبي و مشاعره محد گدرلي غياهب محد بس انتِ.
يحجي ورجفة صوته واضحة.
ارسلان: خلي نطلع غياهب
غياهب: وين؟
اهلج ينتظرونا بالبيت.
اهلي؟
اي.
بقيت صافنة ما مستوعبة كلامه بدون ما ارد دخلت غيرت ملابسي و كل
ذرة بجسمي ترجف گلبي نبضه ما مستقر شلون راح تكون مواجهتنا
و هم ما يعرفون غير نص الحقيقة راح يزيد غضبهم من ارسلان، زفرت نفس
بعمق روحي متلوعة طلعت شفته واگف يلف بأيده بقيت واكفة انتظر دخل.
غير ملابسه و اغراضه جنطتي بايدي طلعنا الدنيا ليل راد يصعد شفته مو بوضع يگدر يسوق بسبب ايده.
غياهب: اذا تحب اگدر اسوق بمكانك.
ارسلان: شلون وانتِ ما تندلين الطريق
انتَ تدليني و اني امشي.
هز راسه بقبول انطاني المفاتيح مال السيارة صعدت قبل لا نطلع بلعت ريگ
التفتت للبيت إلى گضيت بي ايامي كل هالفترة شگد نحفرت ذكريات بداخلة فزيت على صوته و هوَ يسئل.
ليش ترجفين
لا لا ما أرجف مابيَّ شي.
باوعلي بنظرات قلق و أهتمام.
اذا تحسين تريد تجيج النوبة عوفي انا اسوق.
شغلت السيارة درت وجهي صارت لگدام.
بالعكس مرتاحة راح التقي بأهلي
خوش.
طلعنا من المكان اسوق و هوَ يدليني بالطريق بس موتتني رجفة صوته جان
كل تركيزي بيها الطريق كله ساكتين بس من يدليني بالطريق يحجي بس اخخ يا رجفة صوته إلى نهتني ومردت گلبي مرد.
ارسلان: بعد كملي الطريق انتِ تعرفي.
اي. هذا شسمه ارسلان أيدك شلون صارت
مابيها شي
اتأذيك؟
ذب حسرة مرجع راسه لوره.
الادية بالجسم أهون نگدر نعالجها بس شلون لو صارت بنص روحك صعب تعالجها.
فعلاً.
طلع جكارة يدخن عيونه بالجامة تحسه انسان منتهي هزيل بهل اللحظة
باقي بس جسد ما فكرت راح اشوفه بيوم من الايام بهذا الشكل و الضعف
السبب شخصيته لا ارادياً تخليك تفكر هالشخص عديم الرحمة و مايكسره شي.
ارسلان: غياهب
عيوني
وگفي السيارة.
وگفتهت على جهة مستغربة من طلبه نزل منها وگف على جهة أيده على گلبه يسحب بالنفي مغمض عيونه نزلت وراه اشوفه.
بيك شي ارسلان؟
بقى الثواني ساكت فتح عيونه بتعب.
ها غياهب ها، مابيَّ خلي نرجع اتأخرنا.
رجعنا للسيارة اباوعله صعد گدامي حتى مشيته صارت ما متوازنة صعدت
مكملة طريقنا إلى ممكن راح يشتق الطريقين استغرقنا وقت يله وصلنا البيت اهل ارسلان.
وگفت السيارة گدام البيت باوعت بعيوني سيارة درغام و ابوية واگفات.
هم دخلنا للداخل فتح الباب بالمفاتيح إلى عنده دخلت و گلبي ما ادري ميت
ما ادري خايف من المواجهة دخلنا للداخل جان الكل موجود وگفوا يباوعون علينا
ناس فاهمة وناس مافهمة شي اجتني حنين تركض حضنتني بلهفة أشتياق نزلت دموعنا سوا.
غياهب: صغيرونتي
حنين: مشتاقتلج يا روح اختج
أكثر ياروح اختج.
حاضنتني بقوا صوت شهگاتها أعتلت المكان عيوني دارت على ذاك الرجال
الي رباني واگف بضعف عيونه تلمع بدموعه سلمت على العلوية ما ادري.
شعجب طالعة بس لا ناز و لا مليكة من ضمن المجتمعين وگفت مترددة حايرة
بنص ضياع أروح الابوية او لا بعذ اخر لقاء بينا اللحظات انفتحلي ايديه مشيتله
بخطوات ثكيلة مبعثرة بروح مشتاقتله ذبيت نفسي بحضنه ما مصدگة بعد تعب و معناة و فراق أشهر اليوم گدرت أشوفه.
سلطان: نظر عيني.
نزلت دموعي اخذه مسارها بهدوء حاضنته بكل قوتي اريد اضم نفسي جوا جناحه ماريد شي غيره تعبانة الدرجة اريد بس اغمض عيوني و اطلع من هذا العالم وقساوته.
غياهب: بابا
عيون ابوج و گلبه هديتي حيلي بغيابج.
رفعت راسي اباوعله بدموع.
باس راسي بكل حنبة التفتنا على صوت ارسلان.
ارسلان: السلام عليكم.
خوالي جابر و عمران موجودين يباوعون بأستغراب للوضع ردوا السلام الكل.
ماعدا ابوية ودرغام ردوا ببرود و الكل على ملامحه ملامح تسائل عن الوضع حچى خالي عمران مبتسم.
عمران: خير ان شاء الله شنو سبب هاي الجمعة احنا اجينا بس ماعندنا فكرة.
جابر: خير ان شاء الله احد يفهمنا.
وگف ارسلان بنص المكان طلع سلاحه حطه على جهة و يوزع بنظراته عليهم.
ارسلان: ليش مستعجلين هسه تفهمون كلشي.
درغام: يفضل تستعجل لان متحمل على اعصابي.
واحد رمق الثاني بنظرات غضب باوع خالي جابر مستغرب من كلام درغام رد عليه سائله.
جابر: شجااي يصير؟
هسه هوَ يفهمنا يابه اتوقع صار الوگت إلى الكل يعرف حقيقتك ارسلان.
حط ايده وره ظهره ارسلان رفع راسه بكل شموخ و لا كأنما إلى شفته بالسيارة بدأ يحجي وصفن الكل بكلامه.
ارسلان: لگيتوا إلى حرگ أملاك اخوانكم؟
عمران: لا. تعرف شي؟
و هنا صعقهم من گالهم.
مو أعرف أنما انا السبب بكلشي.
وگفوا خوالي اثنينهم بعد مارجعوا گعدوا من ثواني و ابوية ودرغام واحد
يباوع للثاني عبالك يدرون و أكد كلامي من درغام هز بأيده و هوَ يگول.
درغام: ها عمي شگتلك مو گتلك هوَ وره كلشي.
جابر: أحد يفهمنا شجاي يصير.
رجع ارسلان مكما كلامه.
ارسلان: كلشي صار من حريق بأملاكم انا سببه انا بايدي حرگت كلشي يخص أخوانكم و أبهاتكم.
أعتلت الصدمة وجوه الموجودين.
عمران: انتَ؟
اي نعم انا.
دار وجهه خالي عمران الخالي جابر و ابوية.
شجاااي يحجي هذا؟
حچى ابوية بعد ما جان ملتزم الصمت الوقت.
سلطان: العدو المجهول نفسه ارسلان.
بلعت ريگ بخوف من كبت الهوسة و هوَ واگف ببرود.
جابر: شنوووو السبب إلى خلاااك تسوي كل هذا تدرررب بسبب أفعاالك الناس صارت تنام جووعانة؟
ارسلان: انا و اخواني هم بيوم من الايام نمنا بهذا الشكل.
عمران: سلطاااااان نسيبك شجاي يحجي.
ابتعد عني ابوية لزمتني حنين همست بخوف.
حنين: راح تكب دخيلك ياربي.
غياهب: لزميني حنين بعد ما اگدر اوگف على رجليَّ.
لزمتني ارجف و هم يتصايحون بينهم خالي عمران لزم ارسلان يتعارك وياه.
عمران: منووووو انتَ احجي ليشش هيج سوووويت.
ارسلان: واحد رجع ياخذ ثأره
ثأر شنو؟
ثأر اهلي إلى أهلكم سببه
أهلكم؟ شتعني بكلامك.
و منا بدأت تنفتح الدفاتر القديمة ماا الماضي وگف وحچالهم كلشي
اباوعلهم صفنوا صفنة بحياتي ماشفتهم صفنوها من قوة سماع الحقيقة خالي عمران رجع لوره مرتد.
جابر: ابوي و عمي گتالين أهلك؟
ارسلان: و سببب مرررررض اختي و سببب كلشي عشناااه.
كمزت من مكاني من درغام عاط بي.
درغام: بسسسس مووو معناها تدخل غياااهب بالنص هيَّ شكوووو تدخلهاااا قلة زلم ماتاخذ حگك منهممم.
بقى ساكت ارسلان متأكدة يعرف هل النقطة شگد ما برر الها محد راح يعذره بيها.
ارسلان: اذا انتَ بمكاني ما اتوقع راح تكط ناس على جهة و تگول.
ما الهم علاقة وانتَ دخلك علارة مليان حقد و غل، و الانتقام انزرع بيك وانتَ طفل.
سلطان: شنو إلى اتريده بالضبط ارسلان؟
خطف نظره مني و رجع يجاوب ابوية.
انتقامي ما راح أعوفه بس خلوا أبالكم شي واحد.
عمران: شنو؟
رفع سلاحه و يأشر عليه قشعر جسمي من قسمانه و نبرة صوته.
اقسم بالله العظيم و بكلشي خالقة طاهر، أقسم بالماوصلت اجدامي الهم و.
لا شافتهم عبنب سالم انا گتاله وين مااا الگاااه و انتقامي اخذه، و انا من هل اللحظة
سحبت نفسي من كلشي يمكن لو گاتل أحد بيكم ضميري ما يرتاح و اعيش بعذاب اكبر من هذا عذابي هسه.
درغام: وشرايد هسه نسامحك مثلاً؟
ارسلان: لا حبيبي ما طالب السماح من احد جمعتكم اوضحلكم هالنقطة.
جابر: انتَ السبب بموت عمي عياش، و السبب باصابة حنين، و السبب
بحرگ كلشي يخص اخواني و ولد عمي و اخذت بنتنا بالخداع.
اي انا السبب بكل هذا بس اتلاحگت نفسي و ما غلطت أكثر، وتريد الصدگ
ما اشوف نفسي غلطان بس بشغلتين الاولى اصابة حنين جانت بالغلط
بكيفكم تصدگون ما تصدگون براحتكم و غلطي الثاني غياهب.
عمران: يعني طول هالفترة وهالوگت عدونا گدام عيونه و بينا وماندري بي عاشت ايدك سلطان متأكد تدري بكلشي.
سلطان: اي ادري، بنتي عنده ما مستعد اخاطر بيها بسبب ابوك و أبوي بنتي دخلت بنار مالها ذنب ببها.
درغام: حنيننن.
فتحت عيونها حنين على صوته ووجها انخطف لونه وگفت تباوعله.
حنين: ها درغام
صار وگت تحجين شنو الشي إلى هدد بي ارسلان غياهب و جبرها تتزوجه.
رجعت نظراتها إلى بحيرة همست.
غياهب شسوي؟
غياهب: احجي دام أنكشف كلشي.
راحت امشي حچت بصعوبة ما هاين عليها تظهر هيج حقيقة منها.
حنين: هوَ ارسلان هددها اذا ما تتزوجه راح...
سلطان: يگتلنا
لا.
باوعلها بأستغراب و ما فاهم.
چا بشنو هددها؟
مسحت وجها ماتريد تحجي اختي و اعرفها نبرة صوتها بيها تردد تحجي بس انجبرت حچت مختنگة بغصتها.
هددها اذا ما تزوجه راح يتزوجني إلى ويخرب شغل درغام كله و ينفصل حتى من الشغل.
اتوسعت عيون الكل على كلامها بينما اني انتهيت بعد ما گدرت اسوي شي و لا اعين نفسي رجليَّ يرجفن.
درغام: شتحچين شنووووو؟
حنين: هذا سبب قبول غياهب للزواج إلى بذاك اليوم ما سمعتوا منها.
ثواني و من بعد الهدوء إلى صار رجعت كبت بينهم هجم درغام على ارسلان
يريدون يفاككوهم ما مايگدرون واحد صار يضرب بالثاني اتمالخوا
بينهم كُميل و عمر و خوالي گوا سحبوهم من بعض شك حاجبه خلاه ينزف
ابوية واگف على نفس وگفته ودرغام يصيح ويغلط على ارسلان مشى ابوية الارسلان.
سلطان: لعبت بينا هواي و هسه صار وگت تنتهي هل اللعبة.
عدل نفسه
ارسلان و ايده رجعت تنزف الدم بين من جوا القميص.
ارسلان: المطلوب؟
التفت عليَّ ابوية و يباوعلي عيونه دم وجه جملته إلى قلبت كل الموازين و قلبت كلشي بحياتنا.
سلطان: طلگ غياهب و هسه.
رمشت بثكل، بينما ارسلان صفن الثواني بوجهه و اردف بسخرية.
اطلگهااا؟
أي تطلگهاا
مرتي اريدهاا ما أطلگهااا.
عته ابوية ساحبه من ياخة قميصة ضربة بالحايط يحجي من بين أسنانه.
لاااااا تخليني ارتكب بيك جريمة هسه
لووووو تموتني و تطبق كلشي تحچي ماااا أطلگهااا
موووووو بكيفك.
صار واحد يتحدا للثاني بالكلام و خوالي بعدهم بصدمتهم.
عمران: انا راح اتصل بالشرطة يجون ياخذونا
ارسلان: دليلك وين؟ عندكم دليل انا مسوي كل هذا؟ لا طبعاً.
خلاهم يصفنون لان محد عنده دليل عليه سحبني ابوية من ايدي يريد يطلع بيَّ لزمه ارسلان مانعنا نطلع.
وينننن ماخذهااا.
دفعه ابوية بقوا من يم صدره باعده عنه.
ماااا اخليهااا ثانية عندك سويتهااا قبل و عفتهااا يمك بس هسه لااا ما ارجع اكررر هالغلط.
مرتي؟
بالخداع.
بلع ريگ يباوعلي بنظرات توسل و ألم.
ارسلان: ما الك حق تاخذها.
سلطان: ادوس على القانون و على كلشي لأجل بناتي
خليني احجي وياها بس دقائق.
ايييي كلام ماااا يربطكم بعدددد
مووووو بكيفك.
عمران: حتى حگك خربته بعمايلك.
عاط بصوت رج المكان.
ارسلان: مااااا راح أطلگ لوووو تنشلع عيونكم
سلطان: و اذا هيَّ طلبت هذا الشي بنفسها؟
باوعلي بعيون حايرة من الجواب حچى بصوت مختنگ.
الي تريده هيَّ يجرالها مو إلى أنتم تريدوا.
التفت ناحيتي ابوية بكل ثقة طالب مني.
سلطان: يله غياهب اخلصي من كلشي بابا اطلبي الطلاگ.
اختنگت بدموعي إلى حابستها بلعت ريگ و انا حايرة بالموقف إلى اني بي.
غياهب: اگدر احجي وياه بس شوية بابا
ليش تحجين ويااااه شبقى هو وتحچين بييي.
الله يخليك بابا بس شوية ما أطول.
بعد توسلات مني قبل طلعت گدامه امشي بالحديقة وگفت اجه يمشي سريع و بكل لهفة لزم ايدي.
ارسلان: ماراح تعوفيني مو؟ والله اعوضج عن كلشي بسس لاااا تروحين غياهب.
سحبت ايدي منه رجعت خصلات شعري إلى واگعة لگدام وره اذني.
غياهب: خلي ينتهي كلشي كلشي
لا غياهب لا تگولين هيج دخيلج والله اموت من بعدج.
ما تموت إلى گدر يتحمل ألم الماضي المؤام و شلعان الگلب و عذاب كل هالسنوات راح يتحمل هذا الشي هم.
نزلت دموعه نزلت دموع الاعرج بضعف و قلة حيلة.
حتى انتِ راح تسوينها و تعوفيني.
ما اگدر ابقى وياك كافي لهنا تعبنا فرحانة والله لان ما غلطت ولا سويت إلى أبالك
بسببج، انتِ السبب بتغيير كلشي
الحمدلله لعد جنت سبب بهيج شي و الا الدم وصل للركاب.
حضن وجهي بين ايديه أحاول أتهرب من نظراته.
بس ما أذيتهم انا ما گتلت أحد بس حرگت أملاكهم الس من فلوس الحرام
ما ادري شنو الحكم إلى راح يحكموا عليك خوالي بس ابوية واضح حكمه.
يريد يحرمني منج وياخذج مني هذا اكبر انتقام رد منه.
بعمري ما چنت الك و لا راح أصير ابدي حياتك من جديد ارسلان گدامك وگت تتغير بي انتَ هواية تأذيت بحياتك انطي النفسك حقها.
أبديها اذا انتِ ويايَّ
مستحيل يجمعنا شي بعد
يا وجع گلبي من حچاياتج
خلي كلشي ينتهي اليوم.
ضغط على معصم ايدي بقوا مفرفح.
ولچ شنوووو إلى ينتهي جاي تنهيني بكلامج .
غمضت عيوني و اني منتهية بصعوبة مسيطرة على نفسي الهدوء محتلني رفع ايده يتلمس بوجهي.
راح يموتني هل الهدوء إلى بيج باوعيلي بعيونج بغياهب.
هزيت راسي برفض
اريد أحضنه اريد احچيله إلى بگلبي بس ما اگدر هواية اشياء تمنعني
اريد احضنه اخفف ألم روحه إلى دتحترگ فز گلبي من قبلني بهدوء زادت
انفاسي وسرعة نبضات گلبي فتحت عيوني عيونه بعيوني دموعه تنزل ابتعد
عني قليل بعد شعري قرب راسه الرگبتي قبلها ضغطت بايدي على ملابسي ليش.
مدا امنعه ليش رايده هذا القرب هالمرة، جسمي انتهى و اني احس بدموعه تلامس رگبتي رفع راسه ثبته على كتفي.
ارسلان: إلى تريدي يجرالج أولريش.
چانت اكو مغسلة بجهة راحلها يغسل بوجهه وگف ينشف بوجهه فتح ازرار
من القميص يفرگ بصدره مختنگ الدقائق بقى على هذا الوضع غلقهن رجع عليَّ.
راح تطبقين كل كلامج إلى حجيتي قبل؟
اي
تعاي.
مشيت بخطواتي الثكيلة امشي گدامه وروحي دتموت على البطيئ دخلنا.
جوا الكل منتظرنا و محد طايق وجوده خنگني الوضع ما عدا اهله و حنين نظراتهم غير.
سلطان: شصار؟
حچيت بدون ما ارفع عيوني و اباوعله.
غياهب: هايهية بابا راح ينتهي كلشي.
اتقدم ارسلان وگف گدامنا اني و ابوية منتهي عيونه انتهت اتدمرت ثبت ايده على الميز يمنع نفسه من السقوط.
ارسلان: غياهب سلطان.
انقبض گلبي من نبرته غمضت عيوني وروحي انتهت كلها دقائق ر أنتهى كلشي لحظات من اصعب اللحظات إلى مريت بيها بحياتي.
غياهب: ها ارسلان.
فتحت عيوني حررت دموعي إلى رجعت تنزل بدون ما تتوقف نزل راسه عاض
شفته ذب حسرة و هوَ ينطقها رفع عيونه قابلته نظراتي ابتسمت بوجهه دموعي
يحرگن خدي أشرتله بعيوني ينطقها و عيونه ترفض ينطقها بس أستسلم للأمر الواقع.
ارسلان: انتِ طالق.
عم الهدوء بالمكان قابلته بابتسامة منكسرة ما جانت كلمة عادية اشبه بالرصاصة.
الي أخترقت قلبي درت وجهي انفاسي بصعوبة صرت ألتقطها باوعت بعيوني للكل اردفت بغصة حارگة أوتاري.
غياهب: أنتهينا و أنتهى كلشي.
صارت عيوني على غرام و حنين المصعوقات من إلى صار طلعت من يمهم
بحسد مُميت روحي تركتها هنا و كلشي انتهى ارسلان و غياهب انتهوا
و طريقهم أشتق من هل اللحظة كل واحد بينا صار بطريق مختلف.
ولم يبقى سوى صدى خطواتٍ شَهدها الزمان، وأما القلوبُ فكانت اشبهُ بوترٍ مشدود بينَ نداءٍ للبقاء وواقعٍ يَحتم الرِثاء، رثاء الحُب هو الشقاء.
حنين.
ما توقعت ارسلان يستسلم بهل السهولة و يترك غياهب بس اختي ما تركت
اي حل و كلام ابوية ماكسرته هالمرة و لا كسرت بابوية ما جنت اريدهم ينفصلون
ردت كلشي ينحل بالتفاهم بس مو كلشي نريده يصير، رجعنا للبيت و اختي.
الحرف ما نطقته هادئة حنى مدمع عينها جف يحجي وياها ابوية ماتحجي حجيت
وياها اني نفس الحالة وصلنا للبيت نزلت تمشي بهدوء و كل روح مابيها طافية
انفتح الباب لاگتها خالتي بس غياهب صارت انسانة من الجليلد ببرودها
حضنتها خالتي و ابتعدت مكملة طريقها صاح وراها ابوية.
سلطان: غياهب.
دارت وجها بملامح شاحبة.
غياهب: ها بابا.
راح عليها حضنها وگعت بين ايديه.
نظر عيني انتِ سامحيني بابا لان مديت ايدي عليج بذاك اليوم بدون ما أفهم منج.
شهگت بدموعها تبچي بصوت عالي و من كل گلبها ضامة وجها بحضنه.
غياهب: ماااا حسيتوا بيَّ محد بيكم حس ليش ليش.
دمعت عيون ابوية على حالها.
حقج.
اخذتها خالتي صعدتها الغرفتها دخل ابوية ويا خوالي للصالة دخلت وراهم روحي محترگة حرگ عليها.
حنين: بابااا ليششش خليتهمم يطلگووون ليششش.
رفع راسه يباوعلي.
سلطان: ليش تريدين اختج تبقى ويا هيج شخص؟ شوفهاااا نجوم الظهررر
كسرتهم اثنينهم بابا انتَ جبرتهم على هذا الطلاگ ارسلان و اختي ليش ماكو احد بيكم فهمهم؟
عمران: عوفي موضوع اختج انتهى بعد هسه عندنا موضوع عمايله وكلشي سوا.
شبيك خالي؟ صدگ تحجي داگول انتم كسرتوووهم عااف انتقامه بس علمود اختي متأكدة ارسلان يحبهاااا
درغام: ما عاف شي حنين گال هو گال الجدي سالم
حقه.
صفنوا كلهم ناحيتي و على كلامي.
حنين: اي حقه ياخذ انتقامه من اجدادي و غلطه جان من دخل الكل
بس نقذ نفسه حرگ بس الاملاك و طُز بالاملاك وبالفلووووس كلها لووو شما
يحرگ ما راح يرجع إلى خسرهم ماراح يرجع امه وابوه، انتم گضيتوا
عمركم واگفين ويا الحق ليش هسه تغيرتوا؟
صاح بي ابوية فززني من وگفتي.
سلطان: حنين صعددددي الغرررفتج
راح تتندمون والله
علي شنوووو نتندم ولج وحد مثله جبرررر اختج تتزوجه تحت تهديد شلععع.
اظفرهااا مد ايده عليهااا ما اهتم لاي شي انا و لا مهتم الابوي بكبره كل واحد
وياخذ جزاته و اذا هسه گدامي و يگتل عمي سالم همممم ما اهتم لان ادري بيهن مجرمين وامي تشهدد عليهم
ولچ انا مشكلتي حرگ روحي على بنتي أشهرررر و انا لا ليلي ليل و لا نهاري نهار
بسببه رفعتتت ايدي عليهااا لارل مرة بسببه، ذوله خوالج يريدون ياخذون شي.
منه ذاك هوَ المهم بنتي عندي و حتى لوووو يحبهاا ما أعترررف بحبه ويحلممم يشوووف اظفر منهااا.
صفنت بيهم محد ديفهم الموقف ارسلان غلط بس أتعاقب أشد عقاب
هوَ حرموا من اختي، صعدت فوگ قبل لا ادخل للغرفة سمعت صوت المي جاي
من الحمام عرفتها تسبح گعدت داخل غرفتها انتظرها تطلع و گلبي
يأذيني والله خصوصاً كل ما اتذكر اخر نظرة بين غياهب و ارسلان.
طولت بالحمام خفت لا صارلها شي خالتي نازلة دگيت الباب عليها اجاني صوتها مبحوح و مبين دتبجي.
غياهب: هسه اجي.
رجعت انتظرها شوية واجت دخلت لافه البرنص عليها عيونها حمر فتحتلي ايديها حضنتها.
حنين: ليش قبلتي بالطلاگ ليش مانطيتي فرصة
غياهب: سواء هسه او بعدين هالشي راح يصير
بس يحبج ارسلان؟
الحب مو كلشي اكو اشياء ننجبر ندوس عليها علمود نگدر ناخذ قرارنا الصح
تحبي غياهب؟
سكتت ما انطت جواب السؤالي اخذت المشط وگعدت على چربايتها.
تعاي مشطيلي.
اخذت المشط منها گعدت امشط بشعرهت اباوع الجسمها ضعفانة اكثر
من قبل الهالات جوا عيونها اثر التعب النفسي إلى بي هيَّ.
حنين: راح تتخطين
جرح من جروح گلبي صار .
ابوية و خوالي صاروا انانيين كرهت تصرفهم
متوقع موقفهم لو ما اجدادي وفعلتهم جان شفتي ردت فعل أقوى
هاي اذا سكتوا لان مدخنين من العصبية.
ردت ببرود.
ما يهمني شي.
كملتلها تمشيط شعرها حطت راسها على مخدتها و عيونها تفتر حول الغرفة.
اشتاقيت الكلشي بهل الغرفة
من رحتي لليوم كل فترة انظفها.
ابتسمت بنص حزنها.
صايرة نادرة چفوصي.
بستها بخدها.
ممكن ما تكتمين
بس اريد انام و ارتاح
تمام.
طفيت الاضوية إلى بالغرفة و طلعت ادري بيها جاي تكتم و ما تريد
تبين انكسارها نزلت جوا شفتهم بعدهم يتناقشون صارت بوجهي خالتي.
وجدان: هاا خالاتي شلون صارت اختج.
حنين: شلون صارت يعني سالفة الطلاق إلى صارت كلها غلط بغلط و انا ويا ارسلان
أسكتي لا يسمعونج كلهم صايرين طگة ونص من اعصابهم
خلي يسمعون بلكي يرجع عقلهم براسهم.
اجه صوت درغام من ورايَّ.
درغام: عقل منو يرجع؟
رديت بعدم أهمية من قهري منهم.
حنين: عقل كل واحد اتفق على هذا الطلاق و أيده، تحسسوني انتم لو جنتوا بنفس الموقف راح تسكتون
تريدين اختج تبقى ويا واحد مثله؟
اي اريد لان عرف غلطه.
اتقدم إلى خازرني صارت خالتي بنصنا تهدأ من الوضع إلى بلش يسوء بينا.
وجدان: لا تفضحونااا
درغام: عمه فهميهااا زين لا تبقى تمسلت وحدهاا
مااا امسلت بس تضوجون من احد يحجي الصراحة.
سحبتني خالتي للمطبخ عفته بركان من العصبية صار
وجدان: عوفي حنين كبري عقلج.
حنين: هسه ما گتيلي شصار شنو اتفقوا الشيوخ مالتنا.
اقصد ابوية و خوالي هزت راسها بيأس.
ابوج يگلهم انا مالي علاقة بالسوا لان صدگ ابوي و عمي كل شغلهم.
واضح بالحرام و ما اهتم الشي مشكلتي وياه بس لان دخل بناتي بالنص.
شگالوا خوالي
خوالج حايرين باجر راح يروحون يحجون ويا عمتي ام سلطان لان سلطان گالهم اجت امي وحجتلي عن حسين
بلگي يفهمون لعبت نفسي من هالحياة احتار أنقهر على اختي إلى اتأذت
بدون ذنب، لو على ارسلان إلى مشاف يوم بحياته حلو
احچيلي شصار هناك.
كعدت احچيلها كلشي صار هناك و هم اتعاطفت ويا وضع ارسلان بالنسبة.
الي مو صافة وياه هوَ غلط و غلطه جبير بس اتمنيت يستعدل و يفهمون الي
هوَ بي ماكو احد يسكت من يتعرض المثل ما اتعرض ارسلان و لا يبقى عقل
براسه يگله هذا صح و هذا غلط، راحو خوالي و ابوية صعد الغياهب
شافها نايمة بقى طول لليل گاعد عندها بالغرفة رحت نمت الثاني يوم گعدت
مسطورة سطر عضيت شفتي بيأس من الحال مدتعيش حزنها، واگفة
تحظر ريوگ دارت وجها شافتني ابتسمت بعيون ذبلانة حزينة.
غياهب: صباح الخير
حنين: صباح الخيرات.
مابقى شي و يكمل الريوگ غسلي وتعاي
لعد وين بابا و خالتي
طلعوا يجيبون صمون من الفرن هسه يجون.
دخلت غسلت رفعت راسي وجهي صاير مادري شلون هالفترة لا اهتمام
لا عناية مالي خلگ الشي من وره المصايب رجعت الها شفتها محضرته
بالكامل مثل عادتها كلشي بترتيب ونظيف لان هيَّ من النوع إلى مهووسة بشي
اسمه نظافة و ترتيب، دخلوا ابوية و خالتي إلى ابتسامتهم انرسمت على وجوهم مجرد شافوا طول اختي گعدنا ناكل.
سلطان: الحمدلله من رجعت هاي لمتنا.
حنين: رجعت سعادتنا على حيتب سعادة غيرنا.
راد يشرب الچاب من سمع كلامي رجعه المكانه رفع حاجبه يباوعلي و الواضح ما اتقبل بسماري.
كلشي صار البارحة المفروض من زمان يصير بابا الموضوع انسد و مالنا علاقة بشي بعد.
ابتسمت نهضت من مكاني.
الف عافية اني ما اشتهي راح اروح الدوامي.
عفتهم صعدت ابدل علمود دوامي و بالي يم خوالي شنو إلى ممكن راح.
يسوا خايفة لا يبقون يدورون حقوق و ثارات، راحوا البيت جدي عياش و هنا
طلعت المصايب كلها طلعوا مو جريمة وحدة اكثر من جريمة سالبين اروح ناس ببرود و
ظالمين الناس رجعوا خوالي بيومها مشعوطين ويصيحون وجوهنا اتصخمت
گدام الناس رجعت من دوامي بيومها و سمعت متناقشين بموضوع ارسلان
ولاگين حل و الكل أتفق عليه و اتفقوا يروحون اله البيته ويبلغوا.
اما غياهب ما ادري شوصف وضعها اطلگوا محكمة هيَّ وارسلان واستعجل.
بيها ابوية من خلال معارفة عاشت ايام من اصعب الايام إلى مرت بحياتها
بس بعدها بدأت تفاجئنا بالتغيير إلى صار بشخصيتها قبل جانت تلبس كله
ردن طويلة علمود تخفي الاثار صارت تطلعهن و متقبلتهن، صازت هيَّ تجبرني اهتم بنفسي وياها.
حنين: غياهب ما سئلتي خالي مجيد شلون مات؟
غياهب: ما يهمني
مات حرگ بمعمله.
درت وجها و الماسك على وجها.
حرگ بمعمله؟
اي و الحريق احد متقصد سوا مو هيج يعني مو قدر لا أحد متقصد.
رجعت للمراية تباوع بيها مثل إلى تفكر گالت.
تتوقعين ارسلان وره هذا الشي؟
ما ادري بس هوَما حچى بيوم من رجعج بس اعترف بكلشي
كلشي توقعي من ارسلان، بس شوشتي عقلي شلون مجيد بنص المعمل و أحترگ
ما ادري.
هزت راسها تنقض الافكار من عقلها.
كافي هايهية ماريد افكر باحد بيهم اني بديت حياتي من جديد.
مالحيت وياها كملنا و طلعنا لليل گاعدين و اني و درغام علاقتنا متوترة بسبب.
اني من ينجاب سيرة ارسلان و احجي رأيي يضوج و غياهب لاحظت
هذا الشي هم حجت ويايَّ بس ما اگدر اسكت ينرفزني بتفكيره، غياهب
هالفترة كلها ما تطلع من البيت ومحد ضغط عليها بس فاجئتنا بقرارها.
غياهب: بابا اني قررت اسافر.
بقينا نباوعلها حتى ما حجت بالموضوع طول هل كم شهر إلى من اطلگت لليوم
و لا لمحت الشي سلطان: وين تسافرين؟
لبنان دام بديت حياتي من جديد، نفسي الها حق عليَّ.
ما فهمت بابا غياهب تسافرين سياحة لو شنو؟
لا أستقر هناك.
باوعلها ابوية بعدم رضى.
لا ما اگدر أفاركج انا يضل بالي يمج غياهب.
حبيبي اجي زيارة ما اگطع بس ما حابه ابقى هنا
تريدين تشردين تخافين تشوفين أرسلان.
بابا ارسلان شعليه؟ ماضي و أنتهى بالنسبة الب بديت من جديد
حنين: لا تسافرين هسه عود بالاول احضري زواجي بس كون محد يموت بعد
غياهب: اكيد ما اسافر اذا ما تتزوجين.
بقى ابوية الايام رافض الموضوع و غياهب تحاول تقنع بي الى ان ثبت.
وياها بقرار انُ تسافر بالاول واتشوف الوضع اذا ناسبها كلش وشاف
تغيير بيها احتمال يقبل بس يبقى السؤال هل فعلاً اختي تخطت لو دتحاول تسافر تتهرب من ماضيها ويا ارسلان؟
غرام.
راحت غياهب بس خذت روح أرسلان وياها مجرد طلعوا هيَّ و أهلها
من الباب ارسلان و گع عندنا أخذوا للمستشفى كُميل و عمر منتهي للفجر
كلش رجعرا لازمينة من الجهتين يمشون بي رادوا يدخلونه للغرفة مالته ما قبل طلب.
يبقى بالصالة سوتها غياهب و خلته يبجي طبقت كل كلامها و وعودها
و فعلاً صار هالشي و خلته يعض أصابعه ندم و عضهن ندم.
كُميل: ليش ما تنام بغرفتك هنا ما ترتاح بالنومة.
حچى بتعب وصوت مُغلف ببحه نزلت دموعه.
ارسلان: كلشي بالغرفة يذكرني بيها
عمر: من البداية گتلة عوف هل الانتقام يا ارسلان راح تحرگ روحك بي بس ما خذت بالحجي و هاي شفت بعيونك شلون أحترگت.
اطلعوا عوفوني وحدي.
طلعنا كلنا بقى كُميل واگف يم الباب يباوعله كلنا مقهورين على حالته منو يصدگ هذا نفسه ارسلان.
كِميل: بحياتي ما شفت ارسلان بهل الحالة ما جنت ادري يحبها الهاي الدرجة
غرام: ما ادري كلامي وقته او لا بس مدتشوف الطلاق مو حل
غرام چا شتريدين من أهلها يسون لو انا بمكانهم هم ما اخلي بنتي عنده إلى سوا غلط بغلط و الحمدلله ما غلط أكثر
بس حسيت غياهب ماردت تطلگ بس فضلت كرامتها على گلبها.
الي مثل غياهب معروفة شراح تختار.
أذن الفجر توضينا و صلينا دگيت الباب على عمر طلع و هم مبين تعبان.
عمر: اتفضلي
غرام: اذن اجيت اگلك علمود تصلي.
اي هسه أصلي.
سئلته بأحراج مادري شكو حتى لو سالفة عادية اخجل اسئل عنها.
انتَ بخير؟
لا والله مرت خالي مو بخير روحي متگطعة على اخوي و مابيدي شي أسوي.
صلي و ارتاح الله كريم كلسي يهون.
طلع يتوضه رحت أشوف ارسلان اذا نام جان الباب مفتوح قليل منه اسمع الصوت قصيدة مشغلها.
ورجوتُ عيني أن تكُف دموعها
يوَم الوداعِ نشدتُها لا تدمعي
أغُمضتها كي لا تفيضَ فأمطرت أيقنتُ أني لست أملكُ مدمَعي
ورأيتُ حلماً أنني ودعتُهم
ف بكيتُ مِن ألم الحنين و هَم معي
مراً عليَّ أن أودع رائراً
كيف للذين حملتهم في أضلعي.
چان المقطع مو طويل بي يبقى يعيد بي يكرره مغمض عيونه و الضوء
مشتغل اباوعله دموعه و لا وگفت كأنما فاقد امه لو ابوه بهل الليلة رجعت.
الغرفتي ميتة قهر على الوضع إلى وصله بس كلشي من ايده چان.
ايام مرت و ارسلان بنفس الحال صحته بدأت تتراجع و ضعف حتى مليكة
حجت وياه ما جان يرد على احد الليل يخلصه تدخين و ها القصيدة
بكل ليلة أسمعها يگعد وحدة بالصالة الغرفة ما ينام بيها يدخللها على گد لبسه وشغلاته ويطلع.
مرات يگعد بالحديقة يحجون خاله و عمر ما يفيد الا بيوم من الايام گاعدين.
كلنا نحجي وياه لان الولد تغير كلش اندگ باب البيت طلع عمر يشوف منو شوية ورجع گال.
عمر: خوال غياهب و ابوها هنا.
بسرعة رفع راسه نهض من مكانه و سئل بلهفة.
ارسلان: غياهب وياهم؟
لا ارسلان بس خوالها و ابوها.
رجع الحزن غيم بملامحه طلعوا كلهم يشوفون ليش جايين بقيت گاعدة
يم ناز إلى تبقى نهارها مكابلة ارسلان وگاعدة حتى لو ما يحجي وياها.
كُميل: رحبنا بالناس دخلوا جنت لازم گلبي لا تصير الشغلة ثارات گعدنا كلنا ارسلان تشوفه ميت ماتحسه بعالمنا.
جابر: احنا اجينا وراح نخلي حد الكلشي.
حچى ارسلان ببرود يباوعلهم.
ارسلان: حد الشنو بالضبط ابو درغام؟
أجينا نبلغك احنا متنازلين عن كلشي و أبوي مالنا اي علاقة بي من اليوم.
ضل يباوعلي ارسلان مستغرب من كلامهم.
يعني تتنازلون عن أبوكم؟
وگف عمران يحچي و هالرجال يعجبني بحچاياته.
عمران: أبوي و عمي ما مسوين بس هل الجريمة بحياتهم للأسف أكتشفنا
هواي شغلات و هنا ما بقى عندنا غير حل انتَ حر تريد تاخذ حگك بالعشاير و
العادات احنا جاهزين تريده بالقانون هم جاهزين بس أبوي احنا من اليوم متبرين منه.
نط ارسلان من مكانه بسرعة يحجي بعصبية.
ارسلان: ياااا قانون هذا تحجووون عنه سااالم مووته على ايدي و قسمت بعظمة الله.
سلطان: هايهية معناها ارسلان بعد ما بقى شي يربطنا بيك.
ضل ارسلان يباوعله مطول بصفناته بسلطان گاموا اترخصوا الجماعة
و طلعوا و حتى غريب وتحد يتبرأ من ابوه بس سالم قذر فشل الناس وسود
وجوهم گدام العالم و إلى يصدم مو جريمة و لا جريمتين و بعد فترة وصلنا
خبر حتى عشيرته متبرية منه حتى لو انگتل أي ثار ما راح ياخذون وراه.
غرام: دخلوا الولد و حچى كُميل إلى صار حاولت مليكة تقنع ارسلان يعوفه
بس ارسلان بقى ثابت على كلامه وين ما ايشوف سالم يگتله حتى لو خسر شغله.
اربع أشهر مرت ماكو شي جديد بحياتنا الولد ياخذون ارسلان من ينزل مُجاز
من دوامه علمود يغيروله جو بس ماكو فائدة روحه يم غياهب الاكل مو ذاك الاكل و إلى يحاجي يجاوبه من وره خشمه.
دخلت بشهري ما باقي شي الولادتي جهزت الابني من كلشي مشتريات
اني و كُميل و عمر يجيب و يحط هم صرت أحتار وين احط الاغراض
أندگ بال الغرفة لبست حجابي فتحته اتفاجئت من شفته ارسلان.
ارسلان: أعتذر لأن جاي أدك الباب عليج مرت خالي.
أبتسمت بوجهه واضح محلق جديد و طالع مرتب.
غرام: لا عادي خوية اتفضل.
عض شفته منحرج.
عندج رقم غياهب الجديد لان القديم انا كسرته ويا الجهاز و يمكن ما مجددته ماخذه رقم جديد.
هوَ عندي بس خاف ماتقبل انطي
أنطينياه و مالج علاقة بشي
اسئلك شي
اتفضلي
انتَ مدا تراقبها معقولة.
ذبلة حسرة.
اراقب شلون ما اراقب بس ماتطلع من البيت خبلتني من يوم المحكمة خلتني اتحسر على خيالها و اعض اصابعي ندم على كلشي
راح اجيبه الك.
أبتسم بأمتنان، دخلت كتبته اله رجعت اله انطيتهياه.
ممنون منج علوية ما انسالج هالجميل
تدلل.
راح و فرحان بايده الرقم هوَ اني ادري بيها ما اطلع و اخر مرة گالت
ما اريده يلمحني تريد تندمه على كلشي حسب كلامها اخر مرة ويايَّ
لليل نايمين و أحس صار عندي الم بالاول غلست گلت طبيعي بس بعدها ما گدرت صار الم قوي عندي گعدت كُميل.
غرام: اخخخخ يمة
كُميل: شبيج غرام؟
يمكن راح اجيب طلوگ عندي.
يا طلوگ من اسبوع يم الدكتورة گالت بعد.
من قوة الالم وروحي عطت بي.
داگوووول أطلگ انتَ ماااا تفهممم اخخخخخ.
نزل من الجرباية متوتر فتح البال مادري رين راح لزمت بطني أعض بايدي كاتمة صوتي دخلت مليكة و هوَ وگف يبدل.
مليكة: ياااع ولك البنيه راح تموت يمة.
كُميل: يمة شبيججج أدري تطلگين وياهااا انتِ مووو لعبتن بحالي انطني صبررر.
غيرت ملابسي مليكة لبستني حجابي و عبابتي روحي احسها دتطلع ناز.
بليلتها يم اختها عند أنسام بدأت تتعود على اختها شالني حطني بالسيارة مد راسه عمر من الجامة مال السيارة.
عمر: حاااط ابو فاضل إلى ما يسمي ابنه مثل اسمي.
كُميل: راح أنعللللل استغفرلله ولي منااا
يلا جايين وراكم انا و ارسلان
تررررا طلوگ مو عرس.
عادي غير ابن خالنا راح يجي نسويله استقبال خاص.
صاحت بيهم مليكة انتهيت استحي اصرخ گدامهم نزلت دموعي من الوجع.
مليكة: ولك يمة أمشي وانتَ عميررر انااا أعلمنك.
أبتعد عمر يضحك طلعنا للمستشفى ملخت روحي تملخ بين ما وصلنا
دخلوني فحصتني الدكتورة گالت لازم عملية فوراً لان عندي مشاكل غيروا
لبسي للبس مال العمليات نزلت دموعي خايفة طلعوني و هوَ يمشي ورايَّ خايف يمسح بدموعي.
غرام: خايفة كُميل.
كُميل: لا تخافين عيناي ان شاء الله تطلعين بالسلامة.
غصيت بدموعي.
حباب اذا صارلي شس مو تضرب ابني لو تصيح عليه
انجبي حبيبي شهل الحجي مايصيرلج شي.
ضحكت الممرضة إلى تمشي ويانا على طريقة كلامه.
اخاف اموت والله خايفة
عيارة زايدة.
البنيه اسمع بس شهگات ضحكتها خزرته.
مو صوجك عود دتواسيني.
قربنا ندخل الصالة العمليات باس راسي و هوَ يوصيني أقرأ بايات و ادعية
ادري بي خايف يمكن اكثر مني بس جان يريد يبعد الخوف عني دخلوني
و الخوف متملكني ما حسيت بشي بعد من خدروني.
ارسلان: خالي شبيك
كُميل: خايف عليها ارسلان
ان شاء الله تطلع بالسلامة العلوية طيبة.
ان شاء الله ان شاء الله
عمر: تسمونه على اسمي لو لا
اسمي نعال و لا اسمي عليكم.
حچى ارسلان مبتسم من زمان ماشايفة مبتسم.
يعني شنصيحلك ابو نعال
الله يطيح حظكم ولد اخت انتم.
ضحكوا اثنينهم و امي گاعدة تدعيلها مر وقت وطلعوها من العمليات
لو مبقينها جوا و لا الفضايح إلى صارت دخلوها بغرفة وحدها دخلنالها
جانت نايمة شوية و گعدت تبجي وتون گعدت بصفها.
كُميل: علويتي الحمدلله على سلامتج.
عاطت بصوتها.
غرام: شگووووو بطني.
اي ادري شگوهت قابل شيسولها.
تحجي و مغمضة فاصلة عن كلشي بسبب التخدير.
ابنا يشبهمن
بعدنا ما شايفي شوية ويجيبونه
اسمي ارسلان.
كمز عمر من مكانه.
عمر: مع الاسف عليج علوية خيبتي ضني بيج هوَ انتِ شنو شفتي
من ارسلان بس الخرعات انا جنت حباب وياج بعتيني بسرعة.
ارسلان: مالك علاقة هيَّ تريد تسمي على اسمي
والله و لا اخليها تسمي على اسمك هاي العايز هوَ واحد و گوا بالعينه.
ضربة ارسلان على ظهره بقوة.
ابنها و بكيفها.
غرام: كمولة.
حكيت طارق حاجبي ادري بيها راح تچفص دنگت عليها.
علوية بداعت جدج محمد رسول الله لا تچفصين
كموووووولة
ولچ هااااا
ارسلان اخذ رقم غياهب مني.
ضرب گصته ارسلان بعد ما شافنا نباوعله.
ارسلان: يرحم والديج أسكتي فضحتينااا.
غرام: شوووو يصيح عليَّ هذا منوووو هذا أسحللله كمولتي اخخخخ بطني.
غمز عمر.
عمر: كمولة و كمولتي طلعن خالي طلعن
كُميل: مووو اگوملك ما اخلي عظم صاحي بيك.
اجت امي تتحمدلها بالسلامة و هم لو باقية بمكانها و لا المصيبة إلى صارت.
مليكة: بنيتي حبيبتي الحمدلله على سلامتج يتربى بعزكم و دلالكم.
صفنت العلوية و فجرتها.
غرام: خالة ابنج ليش يگلي البسي احمر من ننام.
غص عمر بالضحك گعد بالگاع لازم ببطنه و ارسلان وجهه أحتقن ضام ضحكته طلع من كل الغرفة بدون ما يحجي.
عمر: اليوم الفضايح بفلس.
ردت أشگ هدومي من وره التچفيص حتى سوالفنا طلعتهن للصبح يله رجعت.
لوعيها جابوا الطفل بي من شكار امه و ابيض بس بعده ما واضح كلش
يشبهمن حطوا بحضنها و فرحتي من فرحة عيونها إلى تلمع.
غرام: شعور حَلو شعور الأمومة بسته بخده على كيفي عيوني دمعت
من شفت رزق رب العالمين و عوضه رفعت راسي للكل واگفين مبتسمين علينا.
غرام: شنو نسمي.
بعدهم ما مجاوبين و كلنا التفتنا الأثر الصوت إلى اجه من الباب.
غياهب: السلام عليكم.
بقينا صافنين متفاجئين بقدومها عيوني تحولت على ارسلان إلى عيونه تحسه.
توقفت عن الرمش من شافها گدامه بعد أشهر رد الكل عليها اتقدت باتجاهي
مبتسمة سحبت كرسي گعدت يمي نهائياً ما باوعت الارسلان إلى عيونه اكلتها بنظراته.
غرام: فرحتيني بجيتج بس شلون عرفتي
غياهب: ست چفوصي هنا تداوم وشايفتكم من سائله گايليلها حالة ولادة أجيت أباركلج
تعبتي نفسج
تعبج راحة عيوني، انطيني هذا الحلو.
اخذته حطتها بحضنه تضحك.
يمكن يطلع يشبهج
ههههههه اي يمكن
الحمدلله على سلامتج
الله يسلمج لعد حنين ليش ما اجت.
عندها شغل گالت اذا صارلها مجال و لحگت عليكم تجي
براحتها.
بقت ساكتة تباوع بابني عيونها تضحك فتحت جنطتها حطتله دلاعة
اما تكون فلوس او هداية بس هيَّ حطت فلوس حطته بمكانه اباوعلها
بتركيز حليانة و سمنانة هم رافعة قسم من شعرهت و لابسة فستان إلى جذبني
الاثار إلى بايدها ما شايفتهن قبل بس إلى برگبتها رجعت اباوع الارسلان
هسه اني بيا حاا واراقب الناس شفته مبتسم وعيونه على ايديها.
راحت المليكة حضنتها بكل حُب تبوس بيها.
مليكة: بعد عيوني بنيتي شلونج
غياهب: الحمدلله ملوكة مشتاقتلج.
سلمت على عمر و كُميل صارت گبال ارسلان مدت أيدها اتصافحة بكل ثقة مبتسمة.
غياهب: شلونك ارسلان.
نزلت عيونه على ايدها مد ايده إلى ترجف صافحها.
ارسلان: صرت بخير.
ابتسمت دارت وجها تتعامل ويا ك أي شخص عادي ما ادري هيَّ بهل الاشهر
تخطت كلشي وماندري شنو إلى عاشته او يمكن تمثل التخطي لبست جنطتها على متنها.
غياهب: أترخص منكُم لازم أروح
ارسلان: مستعجلة؟
دارت وجها عليه و صدمتنا من گالت.
صح لان دامشي بشغلات سفري.
طبك حواجبه و هوَ عيونه بيها.
تسافرين؟
أي راح أسافر طالعة خارج العراق قريباً.
تبدلت ملامحه قابض على ايده بينما هيَّ قابلته بنظرات مختلفة كأنما تأكدله اني اگدر أعيش بدونك و عايشة حياتي.