رواية وتيرة الأعرج للكاتبة حوراء السعيدي الفصل الثالث عشر
غياهب.
طلعت بعد معاناة وسين وجيم ويا أبوية بسبب هالكلب عبد
دخلت المحل الأجهزة أشتريت جهاز لأن جهازي من ذاك اليوم
كسرته و مو شي جديد عليَّ من أفقد أعصابي ما عندي غير التكسير
أخذت جهاز و طلعت البيت خالي أشوف وضع درغام شلون صار
و هم أشوف وضع أختي، أتقصدت أبقيها هناك بلگي شي يتغير ببقائها.
نزلت ألهم قفلت سيارتي و دگيت الباب طلع خالي رحب بيَّ.
دخلنا جوا أول ما دخلت صارت گدامي گاعدة و بحضنها صحن أكل سلمت عليهم.
غياهب: خالة شلونها حنين أن شاء الله تساعدج.
أبتسمت خالتي تباوعلها گرصت خدها.
جوهرة: فدوة الوجها حبيبت گلبي ممقصرة.
شلون صار درغام؟
گلبت وجها خالتي مثل إلى ضايجة من شي.
الحمدلله يمه، بس يريد يرجع الدوامه ومضوجني.
إذا وضعه يسمحله عوفوا يداوم.
حنين: لا يحتاج يرتاح أكثر.
رجعت جسمي لوره و خالي طلع باوعتلهن.
غياهب: الراحة مو بالگعدة و النوم إذا النفسية تعبانة كل هذا ما أيفيد. وينه هوَ؟
أشرتلي حنين بحواجبها أتجاه غرفته.
حنين: گاعد بغرفته.
أروح أشوفه و أجي.
نهضت من مكاني و حنين اخذت الجهاز أتشوفه
لأن نزلته ويايَّ ما أدري ألمن نزلته دگيت الباب أجاني صوته.
درغام: أتفضل
فتحت الباب دخلت رفع راسه شافني أبتسم بوجهي سد الحاسبة إلى گدامه.
عاش من شافج أولريش.
لا تعاتب كلشي متگوم فوگ راسي صايرة
ما أندل دربي.
تغيرت نظراته للأهتمام و أردف بتسائل.
ليش خيرج؟
عوفك مني أنتَ شلون صرت؟ گالولي تريد ترجع للدوام.
لا عوفج مني انتِ إلى احچيلي مو علساس أخوان.
أمم ما أدري والله، درغام ضايعة حيل ضايعة
أخاف أخذ قرار و أتكون نتائجه غلط.
گلبج شيگلج
بيبي تعرفني أني ما فد يوم مشيت وره گلبي أمشي وره عقلي.
أيي و عقلج شيگلج.
مشوش حالياً، المهم شلون صرت.
ماشي الحال.
ردت تنجلط بسبب أختي.
أنچبي.
ههههههه لهاي الدرجة تحبهااا.
و أكثر.
ان شاء الله يجي يوم و تبادلك نفس المشاعر أصبر
عليها لا تستعجل عندي أحساس راح تحبك مثل ما تحبهاا بس يحتاج وقت و صبر.
تعبت غياهب سنين و أنا أنتظر.
حقك بس ما نگدر نجبرها على شي و لا هيّ تريد تلعب وياك و تغشك بشي.
هز براسه وطيف أبتسامة أنرسم على وجهه.
الله كريم، من طلعت من المستشفى أجتني تتختس هنا الغرفتي و لزمتها.
قلصت عيوني أباوعله.
ما سويتلها شي مو؟
لا وين مكرود تدرين بيَّ فقير.
وگفت أضحك أعرف بسوالفه.
لأن أدري بيك فقير سئلتك، يله أروح أني أرجع للبيت.
لا أرجعي أگعدي أريد اسئلج عن شغلة.
رجعت گعدت بمكاني.
شغلة شنو؟
غياهب احچيلي الصراحة و لأن انا من طفولتج
أعرفج و أعرف كلشي عنج بس مغلس عنج من مرات تدخلين نفسج بمصايب.
المطلوب؟
بذاك اليوم وين چنتي من أختفيتي ما دخلت بعقلي و لا صدگتج مال طلعتي تتمشين.
أخلص من سلطان تجيني أنتَ.
الي يخوفنا منج تاخذين قرارتج بنفسج ماتشورين
أحد و إلى براسج تسوينه محد يگدر عليج.
أنطيته الموضوع بدون مقدمات.
عبد رجع.
فتح عيونه و علامات الصدمة أخترقت ملامحه.
شنوووو رجع؟
بذاك اليوم من رجعت من بيت خالي عمران هوَ إلى خطفني بس نقذني ذاك الواحد.
رجعت تغيرت ملامحه و تجمد أكثر بكلامي.
منو ذاك الواحد؟
غياهب: صديقك الاعرج.
درغام: أرسلان؟
أيي.
و شلون عرف أنتِ مخطوفة و ليش ما أنطاني خبر.
علساس و حسب كلامه يگول لمحتهم من خطفوج
و لحگنا شمدريني ليش ما أنطاك الخبر وجه السؤال اله مو إلي.
شو تحچين عادي عندج الموضوع غياهب تعرررفين عبد شنووو لو تريدين أذكرررج.
يعني شسوي؟ أبقى أخذ وضعية الخايفة طبه مرض حشاك شيريك يسوي خلي يسوي.
انتِ السبب بسجنه متوقعة راح يعوفج بسهولة.
بالنسبة إلى ما متندمة و فخورة بالسويته ويا هالكلب
راسج يابس
يله أروح أني بعدين اجي الكم
أنتبهي الروحج
ان شاء الله.
طلعت من غرفته و أترخصت منهم لأن أبوية وحدة
بالبيت سلمت وطلعت هذا الناقصني أخلف
من خلگ.
زعطوط رجعت أتذكر سبب ثأره ويايَّ و شلون خسر كلشي.
چنت طالبة بالجامعة مالي علاقة لا بالرايح و لا بالجاي گعدت
بأحد الأماكن التابعة للجامعة باوعت لساعتي إلى لابستهاماباقي شي
للمحاضرة لزمت أغراضي و مشيت متوجهه القسمي باثناء
مدا أمشي أصطدمت بشخص وگعت أغلب أغراضي
دنگت ألملم بيهن رفعت عيوني چانت بنيه بس حالها غريب نزلت
ألمستواي تلم بأغراضي و أيدها ترجف بقت تتعذر.
أسفة أسفة ما منتبها والله أعذريني.
لا عادي عيوني بس أنتِ بخير؟
صفنت الثواني بوجهي و أردفت بنبرة توتر.
هاا أيي أييي.
هزيت راسي و هيَّ راحت مكملة طريقها دخلت للمحاضرة
بلشت و طبعاً الطلاب شي مركزة شي بغير عالم كملت و طلعنا
شفت نفس البنيه تمشي و تتلفت وراها دخلت للحمامات لا هاي
وراها شي وضعها مو طبيعي غريب ويشكك أي شخص أيشوفها دخلت
وراها بس شافتني كمزت من مكانها لأزمة جهة گلبها تبچي.
غياهب: بيج شي؟
گعدت بالگاع تبچي بصوت مكتوم نزلت گعدت بمستواها أباوعلها.
احچيلي بيج شي ليش هيج وضعج محتاجة شي.
حچت من بين دموعها بصوت مخنوگ.
وضعي صعب حيل صعب.
تگدرين تحچيلي يمكن اگدر أساعدج.
محد يگدر يساعدني.
بقيت حايرة بحالتها بس چنت مصرة أعرف إلى موصلها
لهيچ حالة خصوصاً بعد ما شفت الخوف إلى متلبسها.
احچيلي و وعد أساعدج.
هه تساعديني؟ شلون تساعدين وحدة متورطة ويا ناس الدولة ألهم.
هسه دحچي و أنشوف الدولة المنو.
بقت ساكتة و دموعها لا زالت مُستمرة مسحت وجها و گالت.
راح احچي بس والله خايفة أخاف اتأذه.
احچي حبيبتي أني انطيتج وعد أساعدج.
أردفت بصوت مُرتجف.
أكو شخص
أيي شبيه هذا الشخص
يريدني أبيع مخدرات للبنات و أشتغل وياه.
أتجحظت عيوني أستوعب كلامها معقولة كلامها صحيح
و أكو هيج ناس هنا مسحت جبيني و أني اگلها.
كملي
يريدني أسحب البنات لهذا الطريق و هددني إذا ما أتوافقين
ألبسج تهمة تدخلج السجن و تحلمين تطلعين منها.
چانت تحچي بخوف و تبچي بقهر مبين هذا الشخص
شگد راعبها و مسود عيشتها وگفتها أغسل بوجها و أيديها
و أني أفكر شنو إلى ممكن أگدر أسوي لأن أنطيتها وعد أساعدها.
خليج طبيعية لأن داتجيبين الشكوك الچ من خلال وضعج
خايفة والله
باچر نحچي أصبريلي بس اليوم أفكر.
وصيتها ألف وصية تنتبه و تبقى طبيعية لأن ممكن أحد
غيري ينتبه عليها مثل ما أني أنتبهت رجعت القسمها و أنتهى الدوام.
رجعت للبيت و أني أفكر شلون أساعدها و هنا ما عندي غيره
هوَ الوحيد إلى يگدر يدخل ويحلها أتصلت عليه.
درغام: عيني ونظرها.
غياهب: محتاجتك كلش ضروري نحچي.
خير أبوج بي شي حنين بيها شي؟
لا ما بيهم شي الموضوع خارج أطارهم
احچي
أسمعني درغام و ركز ويايَّ اليوم بالدوام صار شي
شفت بنيه و، حچيتله كلشي صار بالحرف الواحد شفته
صفن أردفت بأستغراب. وين صفنت درغام؟
موجود أسمعج غياهب، زين هيَّ عندها أثبات شي عليه.
ضربت جبيني بقوا.
راح من بالي اسئلها.
باچر من تشوفينها حاولي تتسلسلين بالكلام وياها و إذا عندها دليل نعرف شلون نشتغل.
سديته منه الثاني يوم أدور عليها ماكو وين راحت ياربي
بصعوبة گدرت الگاها بين حشود الطلاب سحبتها
بجهة أبين نحجي طبيعي علمود ميشكون بينا.
غياهب: اني حچيت ويا شخص و يگدر يساعدج بس طلب اسئلج عندج أثبات دليل عليه.
أي أييي عندي المحادثة مال كلامنا موجودة من يهدد و هذا رقمه هم.
حَلو بيبي أنتظريني هنا.
أبتعدت عنها بجهة تصلت بدرغام حچيتله كلامها
بدأ يشرحلي إللي لازم أسوي سديته ورجعت الها.
لازم نسوي شي و شوية تعتبر مخاطرة مستعدة تخاطرين علمود تتخلصين من كل هذا؟
بلعت ريگها بتوتر و نظرات الحيرة تنقرأ بعيونها هزت براسها.
أسوي كلشي بس أخلص من هالشخص صار كابوس بحياتي.
أتصلي بيه گليله أنتِ موافقة تساعدينه بعد ما فكرتي
و أكو بنيه ثانية هم تريد تشتغل ويانا جيب كمية تكون كافية النا.
فتحت عيونها ما مستوعبة كلامي ماتعرف درغام
أتشعوط من أقترحت عليه الفكرة و ادخل هيج
مخاطرة بس ماكو أحد راح يسيطر عليها و هيَّ وحدها.
شداتحچين أنتِ؟
أفهميني لازم نلزمه لأن يمكن الاثبات إلى عندج
مو كلش يفيدنا و يگدرون يتلاعبون بي فهمتيني؟
وگفت احچي وياها أقنعها بصعوبة أقتنعت أتصلت بي
و گالتله مثل ما خططنا طلب منها بس يخلص الدوام
يلتقي بينا أنطاها مكان معتزل رجعت أنطيت خبر ال درغام بكلشي.
و گال راح يكون ويانا خطوة بخطوة و قريب علينا بدون
ما يحس بشي مرت كم ساعة و خلص الدوام أباوعلها راح تموت من توترها.
غياهب: إذا تبقين هيج راح تخربين كلشي لا تنسين هوَ هنا إذا شافج راح يكشف كلشي.
أجتها رسالة منه كاتبلها تعالن طلعنا من الجامعة
و أدري هاي مخاطرة جبيرة مني بس لازم أخلصها منه
معيشها بكابوس خصوصاً درغام اتأكد من كُلشي
يعني مستحيل تطلع تلعب أو مچذبة بشي أخذنا تكسي.
و طلعنا متوجهين للمكان إلى حدده النا تواصلت ويا درغام
و گال مسيطرين على كلشي بعد مامر وقت وصلنا للمكان.
نزلنا أباوع للمكان شبه مهجور و كله درابين أعترف خفت
بداخلي لأن ذوله مجرمين كلشي يگدرون يسون صرنا
ندخل داخل الدرابين و نرجف توتر وخوف شهگنا أثنينا
من أنفتح الباب من أحد البيوت القليلة الموجودة بهذهِ
الدربونة چان ولد شاب أردف بصوت ناصي
و عيونه تباوع ورانه.
عبد: أدخلن.
دخلنا جوا البيت هيكل تعبان گعدنا وحدة بصف الثانية
گعد مقابيلنا نزلت عيوني على السلاح إلى گدامه.
غياهب: ليش طلبت نلتقي هنا؟
عبد: علمود ما نجلب الشكوك النا يا حلوة
امم صح.
رجع بنظراته للبنيه إلى لأزمة گلبي منها لا تچفص بتصرف سئلها.
عبد: شعجب و افقتي مو چنتي رافضة فوگاها
جايبة وحدة وياج شنو هاي التطورات السريعة.
جاوبته و هيَّ تتصنع عدم الخوف.
فكرت الها و شفتها شغلة تفيدني و هاي صديقتي.
رجع يباوعلي نظراته أتجاهي نظرات حقيرة
و واضح شنو
إلي يدور بعقله وگف بمكانه و هنا الصدمة
من گال.
أني ما جبت شي ويايَّ اليوم.
ضغطت على اسناني من الداخل معناها هيج ماراح نستفاد شي من إلى خططناله.
غياهب: بس الأتفاق ما چان هيج؟
عبد: حبيبتي لازم نتأكد من كلشي أكيد ما أتريدين
كلشي بسرعة و أني ما أعرف زين الناس إلى راح أتعامل وياهم.
بدأ يتقرب النا بخطواته گعد يم البنيه و نضراته مقرفة مثله.
نهضت من مكاني بهدوء عيوني على السلاح إلى بقى بالمكان مالته
و الشباك صاير قريب منه يعني أتفيدني هيج حركة.
ما تحسون الجو حار
لا زين
ما لادري شو حارة.
غمزلي بتلاعب و قذارة.
خففي من إلى لابسته.
أبتسمت بتصنع بينما أني لو بيدي أشرب من دمه و أنعل والديه
راح أفتح الشباك.
تقدمت بهدوء و متوترة من حركتي إلى راح أسويها أتخيل
ابوية يعرف اني هسه وين و بشنو مورطة نفسي إلا يجرم بيَّ.
فتحت الشباك و أسمعه يهمس بكلام للبنيه كلام دنيئ مثله
درت وجهي شفته ما منتبها عليَّ أتقربت الجهة السلاح
سحبته بحركة سريعة وگع الگلاص إلى چان موجود
طفر من مكانه و أتوسعت عيونه أتجاهي.
حيوان حتى الحيوانات أحسن منكم يا قذرين.
أشرت للبنيه تجي يمي بسرعة أجت تركض صارت ورايَّ.
عبد: تغدرن بيَّ يا
غياهب: أكل قنادر لا أقندرك أشرف منك.
طبكت حواجبي من شفته رجع گعد بمكانه وصار يضحك و يرجع يضحك متهستر شبيه هذا عقله بي خلل.
عليمن تضحك؟
السلاح إلى بأيدج فارغ.
باوعتله چان كلامه صح.
لعد تشيلك سلاح بدون مخزن شگد غبي.
طلع المخزن من جيبه كله رصاص باوعت للمسدس
إلي بأيدي طلعت المخزن فارغ فد مرة غمضت عيوني بقلة
صبر رجعت باوعتله و أشرتله على السلاح.
بس ما ننكر يبقى سلاح و ثكيل ما معقولة ما بي فائدة.
ضحك مستهزأ بكلامي.
ههههههههههههه و شلون بي فائدة و لا طلقة داخله.
هسه راح أتشوف بيبي.
وگفت گدامه و هوَ على نفس گعدته ما تحرك أخذ الامان
لأن السلاح فارغ رفعته بدون أي مقدمات ولأن عندي سرعة
حركة ضربته برأسه عاط بصوت متألم و الدم صار ينزل.
عبد: يااااا بنت الكلللببب
غياهب: أبوووك الكلب ياااا كللللببب.
بنفس الدقائق أقتحموا المكان درغام و جماعته تقرب درغام علينا توزعت نظراته عليه و عليَّ.
درغام: هذا شبيه راسه
اني ضربته.
صاح واحد من جماعته.
عاشوووو.
خزرة درغام و ذاك بعد ألصم لصم ما حچى دنگ راسه.
درغام: الخطة ما چانت هيج
غياهب: هذا الحيوان خرب كلشي طلع ماجايل أي شي وياه عود صار ذكي.
أشرلهم يأخذونها و طلب من البنيه تجي وياهم
تقدم أفادتها شتعرف عنه طلعنا من المكان متوجهين
للمركز بس للأسف كلشي هيج راح طلع عنده ظهر قوي بالدولة
إلي هوَ أبوه و حتى الرقم إلى چان يهدد بي مو بأسمه أتمنيتها.
لو مسجلة وحدة من اتصالاته بصوته ما طول بالسجن لأن أهله
واصلين و گدروا يطلعونه البنيه سوت نقل الغير محافظة
و أنتقلت هيَّ و أهلها درغام حذره يتقرب مني أختفى عبد
من ذاك اليوم و إلى عرفناه سافر خارج البلد
و هسه من سنين رجع يصفي حسابه ويايَّ.
نزلت للبيت وصلت لأن طول الطريق چنت تحت ذكريات الماضي ردت أصعد الغرفتي سمعت صوت أبوية يناديني بأسمي رحتله الغرفته وگفت يم الباب.
غياهب: هاا بابا
سلطان: تعاي أدخلي.
تقدمت اله أشرلي أگعد بصفه حضني الصدره أبتسمت بدأ يسولف ويايَّ.
أصعب شي بالنسبة للاباء من بناتهم يكبرن و يتزوجن
ليش هذا كلامك.
سكت الثواني مرت و حچى الكلام إلى أتوقعته.
الضابط أرسلان خطبج مني.
غمضت عيوني مختنگة و نغزات صارت بگلبي.
أيي و شگتله أنتَ.
گتله أفتح الموضوع وياج بالاول و أرجعله خبر.
أبتعدت عنه أخفي كلشي بيَّ من هذا الشخص.
أفكر بالموضوع و أرجعلك جواب
براحتج بنيتي.
طلعت منه صعدت الغرفتي ما بقت مسبة ما سبيته بيها
هذا أرسلان طلعت خطي حطيته بالجهاز الجديد و مجرد أشتغل
الخط بعد ما شحنته و أتفحصته چان جايني رسائل بكثرة
علي خطي و من بين الرسائل كلها جذبتني رسالة وحدة و قلبت كل الموازين و غيرت كلشي.
مر أسبوع و حنين رجعت من بيت خالي بدأت تغلط و تحچي لأن عفتها هناك درغام رجع الدوامه.
حنين: خالتي گوا عليها خلته يداوم.
غياهب: هيَّ لو بيدها تخلي يبطل من شغله و تگابله.
رجع أبوية من دوامه گعد تعبان بقى يسولف هوَ وحنين
و تسولفله شگد مشتاقتله و تبوس وتحضن بي عبالك صارلها
سنة ما شايفته و تگله صاير حَلو و هوَ يضحك مكيف على سوالفها.
غياهب: بابا.
دار وجهه يضحك.
سلطان: نظر عيني.
سكتت اتأكد من قراري إلى اخذته بهذا الاسبوع رفعت راسي اله.
أني موافقة على الزواج من أرسلان.
ما چنت أعرف هذا قراري راح يخليني أربح شي و أخسر شي ثاني.
غرام.
طلع أرسلان من الغرفة إلى ممنوع أحد يدخللها
الغرفة المجهولة أي أسميها مجهولة لأن كلشي ما أعرف عنها
گلبي نبضه صار ببلعومي والله من خوفي الدنيا ظلام
و هوَ لابس أسود و وجهه ما يگصه السيف.
أرسلان: شمگعدج؟
أريد الكلمة تطلع مني يمه يا خوفي منه بلعت ريگي
و حچيت بتلعثم أشرله على الدولكه إلى بأيدي.
غرام: شسمه هذا أجيب مي من المطبخ.
تفضلي للمطبخ.
هزيت راسي ما مفتهمة شي شنو هذا الشخص و شنو السر إلي.
بهاي الغرفة الممنوع أحد يتقرب أو يدخللها زين منو إلى بيها
ليش يدخلون أكل داخلها إذا أرسلان ماموجود لو عمر لو كُميل
و كم مرة أسمع اصوات بالليل أحس راح أفقد عقلي وياهم
مدا أفهم شي منهم كلشي غامض تريدلك واحد بيهم واضح و تفهم حياته ماكو.
مر كم يوم دخل أرسلان و الأبتسامة مرسومة على
ثغره كانت أبتسامة كأنما شخص رابح شي
و منتصر گعد
حاط رجل فوق رجل و أردف بكلام خلانا كُلنا ندخل بحالة أستغراب وصدمة.
أرسلان: جهزوا نفسكم.
عمر: على شنو نجهز أنفسنا؟
أخوك راح يتزوج حبي
أرسسسلاننن.
ما أهتم العصبية عمر و نبرته.
هسه أبوها خابرني و رجعلي موافقة البنيه.
كلهم تغيرت ملامحهم بعد ما سمعوا كلامه الأخير
رد عليه كُميل ببرود عكس هذيج المرة من تعاركوا و أصواتهم علت.
كُميل: بيها الخير مبروك مقدماً على دمارك.
دخل الغرفته ما ماهتم لأحد ما طول و هوَ يطلع منها.
بأيده سفطة أوراق ما أدري مال شنو بالضبط أتوجه للباب راد يطلع ولزمه عمر مانعه.
عمر: أرسلان انتَ ليش ما تفهم عمرك كله تفكر صح ليش
الا هذا الشي ما جاي تفكررررله صح وووولك البنيه مالهااااا
علاقة حتى نيرووووز إلى بسببك كسرتهااا
و هيَّ مالهااااا ذنب.
نزلت نظرات أرسلان على أيد عمر.
نزل أيدك عمررر
و إذا ما نزلتهااا شتسووووي هم ترجع تضربني
ما أريد أسوي هذا الشي لاااا ترجع تجبرررني.
تراجع عن هذا الزواج
لااااااا.
أروح بنفسي احچيلهم كلشي.
ضحك بخفة.
عمر أنتَ حتى خطوبتي ما راح تحظرها و لا حتى زواجي.
هز بأيده كُميل و هوَ أخذ وضعية المشاهدة.
كُميل: طبعاً تمنعه تخاف يفضحك لو شافته نيروز.
أرسلان: أحب إلى يفهمني.
عاف الكل و طلع بقيت صافنة منو نيروز؟ شنو ينفضح لا الشغلة
صارت فد مرة ما أدري شلون شجعت نفسي
و سئلت هالمرة.
غرام: أعتذر على سؤالي بس مدا أفهم انتم ليش ما نعين.
زواجه من هاي البنيه و منو نيروز و شنو يفضح و الله عقلي ما يفهم عليكم.
جاوبني عمر و وجهه مگلوب دم من العصبية.
عمر: و الله حقج احنا إلى يعيش ويانا عقله يشطح و مايفهم
أي شي من حياتنا أرسسسلان ماااا يحب هاي البنيه
يريد يتزوجهااا بسسس علموووود...
قاطع حديثه كُميل خازره.
كُميل: عمررررر.
شكوووو خلوووها تعرررف ليش عبالهااا أرسلان ملاك
و هوَ شيطااان، أكملج مرت خالي، أرسلان يريد يتزوجها.
علمود ينتقم من أهلهااا و هااا خاف عبالك بس هوَ المذنب
لااااا انا عم مذنب وياه لأن شاركته و كسرت بنيه أعتبرتني
بيوم من الأيام القرار الوحيد الصح بحياتها بس بالتالي
شسوووويت خذلتهااا و أنطيتهااا ظهررري.
صافنة على كلامه يمكن أرسالان ما تفاجئت بي بگد
ما أتفاجئت ب عمر وگف كُميل صاير بركان من الغضب و صاح.
كُميل: ألبسي عبااااايتج وتعااااي.
حچيت بنص صدمتي.
وين؟
بدون اسئلة غرام رايحين المكان.
دخلت و أني بقمة صدمتي و أستوعب إلى سمعته
بدلت على السريع لبست عبايتي و طلعت صعدت
وياه بالسيارة و هوَ ساكت بس ينافخ بعصبية.
غرام: وين رايحين.
جاوبني و هوَ يشغل بالسيارة.
كُميل: للنجف
-للنحف شنسوي؟
من نوصل تعرفين.
أتوجهنا المحافظة النجف و تقريباً تبعد عن بغداد ساعتين
أو ساعتين ونص السكوت محتلنا و كل دقيقة كُميل ناعل
وساب أرسلان بينما اني ساكتة و أسمعله.
غرام
ها كُميل
خايف على البنيه
ليش شنو ممكن راح يسوي وياها؟
ما أدري هذا عقله الواحد يعجز يفهمه
ليش ما أتحاول توصل الها و تمنعها من هذا الزواج.
شهگت من ضرب على الستيرن بقوا و صاح.
ياررريتتتت ياررريتتت أگدرررر بس متأكددد هوَ جبرررهااا على الزواج حتى لو حجيتلهاااا راح تبقى على مووووافقتهااا.
باثناء الحديث دگ جهازه فتح خط يحجي.
كُميل: حياك حضرة المحامي، أي، لا والله طالع للنجف، ليش شصار وياك؟، أسمعك أتفضل.
بقوا يحجون الشخص المتصل يحچي وياه و كُميل يستعمله.
ساكت و طولوا إلى أن سده وفاجئني من گال.
كُميل: هذا المحامي و كلته بقضيتج يشوفها.
وضعي كله أتخربط بقت عيوني تراقب شفايفه شنو راح تنطق.
شگالك
اوگفي اتأكد من محامي ثاني أعرفه.
رجع يخابر بشخص ثاني و شرحله الوضع هم بالنص ساعة
يحجون و يتناقشون كمل و وگف السيارة بس وجهه ما يبشر بالخير.
غرام: شصار؟
يگولون لا تقدم رفع قضية و لا أتعب نفسك بخصوص الاعتداء إلى صارلج.
السبب؟
لان لو لجأنا للفحص الطبي مو أكيد يبين كلشي.
و أنتِ صارلج أشهر و بحكم متزوجة راح يتهمونا بالجذب
و يطعنون بالقضية صحيح انا و أنتِ مابينا أي علاقة
زوجية بس بنفس الوقت يگدرون يقلبوها.
نزلت دموعي بخذلان هم هالمرة.
يعني شنو؟ حقي ما راح أخذه.
بسسس لاااا تبچين خليني أفهمج.
مسحت دموعي أباوعله.
ما ابچي فهمني
نگدر نكاومهم عشائرياً و نوگفهم عند حدهم و يكتبون تعهد ما راح
يتقربون الچ لأن أنتِ بالغة السن القانوني و صرتي مرتي بوصيتي فقط.
درت وجهي عنه وجع گلبي أتضاعف دموعي تحرگ بخدي
من الكلام إلى سمعته چان أملي أخذ حقي منهم و أعيش
بسلام و غسان يتحاسب بس وين يلگونه و هوَ الگاع انشگت
و بلعته محد يعرف وينه، رجع يسوق إلى أن وصلنا ما منتبها للطريق
هسه يله أنتبهت هاي مقبرة؟ شنسوي هنا باوعتله مستغربة أردفت بتسائل.
شنسوي بالمقبرة؟
نزور موتانا قابل نرگص بيها.
نزلت وياه أشترى مي ورد من إلى يبيعون مشيت وياه وصلنا يم قبرين واحد بصف الثاني تاريخ الوفاة فرق سنوات بينهم رفعت راسي اله.
منو؟
أختي و زوجها.
طبكت حواجبي أخته و زوجها ما أعرفهم يمكن أهل الولد
أكيد هم لأن إلى عرفته ميتين، دنك بذب ب مي ورد و گعد بصف قبورهم طلع من جيبه قرأن صغير
بدأ يقرأ بسورة (يس) بصوت مسموع وگفت اني على جهه
قريتلهم الفاتحة مر وقت من كمل غمض عيونه و بدأ يحچي بكلام ما فهمته.
كُميل: أمانتكم صعبة رحتوا و أمنتوها عندي.
رفع عيونه إلى لمعت بالدموع.
أهل الولد
الله يرحمهم
أرسلان
شبيه.
ذب حسرة من أعماق قلبه.
مو أبنهم.
كأنما شخص سطرني بشي أتوسعت عيوني شدا أسمع أني.
شنو مو أبنهم كُميل والله عقلي أنفر منكم.
أبتسم بخفه أبتسامة مليانة أكثر من شعور.
انتِ هيج چا إلى راح أتصير مرته شلون شراح يصير بيها من تسمع سبب زواجهم.
شلون مو أبنهم فهمني
خلي نروح للامام و هناك أحجيلج.
هزيت براسي و أني بعدني ما مستوعبة شي و أني و حق
هذا المكان الموجودة بي عقلي حسيته وگف من إلى سمعته منو أرسلان؟
و ليش يريد ينتقم من هل البنيه و أهلها طلعنا للامام الدنيا
صارت مغرب و أذن وصلنا للامام على عليه السلام توضينا
و وگفنا نصلي، كملت قبله وگعدت أنتظره يكمل لأن
طول بصلاته أباوع للمكان شگد مريح للنفس و للقلب
تتمنى تگابل هذا المكان و تگعد طول عمرك خصوصاً.
من أتشوف العوائل و الأطفال تلعب براحتها. فززني صوته.
تقبل الله علوية
منا و منكم
نگوم نزور و نرجع هنا شتگولين
بكيفك.
طلعنا و وصاني ينتظرني بهذا المكان علمود ما أضيع
دخلت جوا ما چانت أكو ناس هواية لزمت الشباك
و حررت دموعي ينزلن يم ابو الحسنين أريد أطلع كلشي
كابته شكو تعب بگلبي أبچي من كل گلب وشوغه.
مولاي أجيتك تعبانة من الدنيا و ناسها مولاي خسرت كلشي
مو يگولون عليك كافل الأيتام أكفلني يا أبا الحسن.
صرت أنهان بكل مكان أتواجد بي خسرت نفسي
واليسوا و المايسوا يحچي عليَّ. شهگت بدموعي أكثر ناسيه الناس الموجودة. أجيتك أشكيلك وحدة وحدة موجعات گلبي.
بگد ما بچيت تعبت و راسي كام يأذيني أبتعدت
الدنيا صارت تفتر بيَّ حسيت على ملمس أيد لزمتني
من كتفي باوعت شفتها أحد النساء إلى يخدمون.
انتِ زينة.
هزيت راسي بتعب بس داخلي مرتاح كأنما صخرة
كانت على گلبي وراحت تحررت أبتسمت بوجهه وطلعت.
أمشي خطوة خطوة بهدوء و أسحب بنفس بكل قوتي
نسمات الهواء الباردة تضرب بوجهي، وصلت للمكان
إلي أتفقنا نلتقي بي شفته واگف و يباوع للناس.
وگفت بمكاني أباوعله الوحيد إلى سندتني بوقت
إلي ماچان عندي سند غير الله، الوحيد إلى خاطر بحياته
علمودي الوحيد إلى تقبلني بكل حالاتي شلون راح أرجعلك
كل مواقفك هاي، دار وجهه باوعلي أبتسمت بوجهه
أجه يمشي بكل رزانه بأتجاهي وگف يمي.
شلون صرتي
أحسن
ذبيتي حملج.
أيي.
الله يريح گلبج، تغلي خلي نگعد نتعشه أكيد جوعانة
اني مو جوعانة
بس أنا جوعان و أنتِ شنو معدتج معدة عصفور
ماماكله من الغدة و هسه شوفي الساعة تعاي عيناي تعاي شنو بكيفج ماتاكلين.
صارت عيني على رجال يوزع جكليت للناس مبين مراد لزمته من ردن قميصه أردفت بخجل.
أحم خالي.
هههههههههههه بعد خالج گولي
أريد جكليته
هسه أشتريلج
لا أريد من ذاك الرجال إلى ديوزع للناس
لا عيب غرام شبينا ما عندنا فلوس نشتري.
لا مو هيج بس هذا مراد من شخص يطلب من الله و أهل البيت و ينطونا إلى يتمناه ينذرون يوزعون.
بقى يباوع بعيوني و حچى بصوت هادئ بس اني و هوَ نسمعه.
يعني إذا هسه طلبت شي منهم ينطوني مرادي؟
اذا نيتك صافية ليش لا أهل البيت ما يقصرون من بعد رب العالمين
چا خالي نذراً عليَّ لو تحقق إلى أبالي أجيب كونية جكليت وأوزعها هنا.
ههههههههه لعد أن شاء الله يتحقق إلى أبالك يارب.
سحبني من كف أيدي إلى صار بكف أيدع نمشي گدام الناس خجلانة من ملمسه وصلنا يم الرجال.
كُميل: السلام عليكم حجي.
رد عليه الرجال.
عليكم السلام أبني
حجي رائد لمرتي جكليته منك
تدلل أبني.
أحنا طلبنه جكليته وحدة بس هوَ شال أربعة وحطهن بأيدينا أثنين ب أيدي و أثنين ب أيد كُميل.
كُميل: حجي طلبنا وحدة أحنا
وليدي كل وأحد منكم ياكل وحدة و الثانية يحتفظ
بيها من يتحقق إلى يريده يجي يوزع هنا و يخليها من ضمن التوزيعات.
رحم الله و الديك ممنون منك.
سلمنا عليه و أمشي بفرح وراحه كل ما يباوعلي أيشوفني مبتسمة.
شو طلعي سنونج
شنو؟
شبيج من تضحكين طلعي سنونج خلي أشوفهن
يااا گول أسنانج
عليج ابو الحسنين إلى هسه گاعدين عنده.
ضحكت من گلبي على كلامه.
هاي ليش سنونج هيج ناعمات
گول أسنانج مو سنونج
سنونج لو شلونج
ههههههههههه كافي عليك الله الناس راح تبقى تباوعلنا.
گعدنت جايب عشاء ما أدري شوگت يمكن من اني
بالأمام جوا لأن طولت يسويلي لفات صغار.
و يضحك.
هاج هاي اللفة الصغيرة ناعمة مثل سنونج
شكراً خالي
تندلين مقبرة أهلج؟
وگفت اللگمة ببلعومي هزيت راسي.
لا والله
حتى انا ما أندلها چان خذيتج ال أمج الله يرحمها بس
و لا يهمج علوية اسئلج أن شاء الله و بس نجي هنا مرة ثانية اخذج تزوريها
تسلم.
دنگت مقهورة و ين ألگاج يا يمه و أحضنج رحتي و عفتيني
بهاي الدنيا رجع مدلي لفة اخذتها منه اكل ذكرت موضوع أرسلان.
شو ما حچيتلي
شحجيلج
بخصوص أرسلان
كملي اكل.
لا حباب سوالف و أحنا ناكل
راح تنسد نفسيتج كملي أكل بالاول.
صرت أكل بأستعجال بس أريد أخلص و صدگ خلصنا
حط الأكل الزايد على جهة وبدأ يسولفلي
و هنا إلى سمعته
چان غير عن كل تفكيراتي، صدمة، قهر، و لا توقعت
أسمع هيج شي عن أرسلان شنو من شخص هذا أتشنج
جسمي حتى الكلام صرت أستصعبه من إلى سمعته.
وانا لليوم ما اگدر أذي أمانة حسين و عفاف دائماً چان
حسين يگلي رغم صغير چنت أكبر من أرسلان بسنوات قليلة.
بس يگلي أرسلان أمانة يمك راح وهاي الأمانة لليوم يمي بس المشكلة.
شنو المشكلة
المشكلة هاي الأمانة شهدت جريمة ثانية بحياته خلته
يتحول من طفل بريئ نقي إلى إنسان عديم الرحمه مهووس بشي اسمه أنتقام ولطخها كلها سوا.
ما فهمت جريمة ثانية شنو.
فرگ وجهه أكثر من مرة سحب بطل مي غسل وجهه.
لهنا كافي ما اگدر أكمل مع الأيام تعرفين كلشي.
تحبه أنتَ؟
من الطفولة سوا
أحس بداخله بعده طفل بريئ
يصارع عقله و گلبه جاي يتعذب أدري بي.
دا أفكر بشي بس مو تگولي بطرانة
شنو
يمكن هاي البنيه إذا دخلت حياته تكون سبب بتغييره
مستحيل بعدج ما تعرفين البنيه
انتَ تعرفها؟
شايفها مرة وحدة مبينة وحدة جسرة وقوية ما أدري أخاف
أرسلان يكسر كل هذا و إلا أتمناها تكسر راسه و الحجي بينا
حاسها تلوگ اله هذا يرادله وحدة تمشي على الصراط المستقيم
ان شاء الله مياذيها.
گومي غرام نرجع للبيت اتأخرنا هيه امي تلگينها ضل بالها و ما اگدر أخلي عمر وحدة ويا أرسلان يتعاركون.
أخوانه يعرفون بكلشي يخصه
أي عندهم علم
طلعنا نمشي من جهة عاطفتي أتجاه أرسلان بعد ما سمعت
قصته إلى كانت ناقصة مو كاملة و من جهة تفكيري
بالبنيه إلى راح يتزوجها شلون راح تكون حياتها وياه.
غياهب.
حنين مخبوصة خبص عبالك عرس و لا عبالك مجرد خطبة.
حنين: اگلج غياهب شنو راح تلبسين.
أتمددت بفراشي حطيت راسي على مخدتي.
غياهب: شمدريني.
أهووو غياهب أحسج مثل الوحدة إلى مجبورة ترا خطوبتج باجر.
سكتت يا ترى لو تعرفون فعلاً مجبورة على هذا الزواج
شنو موقفكم غمضت عيوني و النغزات بكل مرة أفكر بالموضوع أتشلني شل.
شگد تنگين خابرني خالتي هيَّ راح تشتريلي على ذوقها.
خالة وجدان
أيي.
صفگت بأيدها بسعادة.
زين سويتي خالتي أحب ذوقها
بس گتلها تجيبلي شي طويل و مو مخلع و هالسوالف.
اجت گعدت بصفي تمسد على شعري.
أدري راح تضوجين من كلامي يمكن بس تخجلين تطلعين الاثار الموجودة مو؟
لا بس ما أحب اشوفهن.
أسمعها تحسرت حسرة أذتني بداخلي قبل لا تأذيها طلعت
من الغرفة طفت الضوء قلبت على ظهري أباوع للسگف
الغرفة محتلها الظلام الدامس دائماً اسئل نفسي هذا السؤال.
اني ليش هيج حياتي؟ الشي الحلو بيها بابا و اختي عيوني تتكحل بشوفتهم و تنعمي بغيابهم .
دگ جهازي رفعته بوجهي چان أرسلان رفضته بوجهه مالي
خلگه رجع يكرر الإتصال خرررررب شگدد لزگة جاوبته.
غياهب: نعممم
أرسلان: نعم الله ضلوعج ليش ما تجاوبيني
ما فارغتلك
أممممم ليش جاي تحضرين بنفسج إلى باجر
هه مصدگ روحك.
ليش ما أصدگ روحي، زواج و خليتج توافقين عليه
و بنفسكم رجعت لي الموافقة مجرد طلبتج مرة من أبوج.
طبعاً تطلبني مرة وحدة لأن تعرف شلون تستغل
الوضع الصالحك و گعدت تساومني يااا ساااافل
المهم عندي حققت إلى أريده
عندي سؤال
جواب حضرة المحامية.
شنو مصلحتك من هذا الزواج رغم لا أعرفك و لا تعرفني
بس اني أعرفج و أعرفج كلش زين.
أبتسمت مستهزئه بكلامه.
شتعرف بله أصدمني
عوفيها باجر أحجيلج
لا بشرفك
وشرفي.
كمية حقارة عندك مو طبيعية
عيب هاي باجر راح أصير زوجج
أي زوجي تصير إذا ماطلعت كلشي من عينك فلا أتسمى بنت سلطان.
الساحة الج و إلى و أثنينا بيها و أنشوف منو يربح بالنهاية
عسسااااك بجهنم
وانتِ ويايَّ.
سديته بوجهه ماكو هيج بشر بحياتي ما شفت بشر مثله
انسان بارد و أستفزازي الدرجة يخليك تتشعوط
مثل هل البشر الحقير بغيت روحي بالغطى
و أسب بي.
گعدت الصبح بالعشرة خالتي موجودة و نيروز هم حطيت راسي على كتف خالتي.
غياهب: صباح الخير
وجدان: صباح الكسل يا عروس.
عقجت وجهي بقرف.
عروس شنو بعدني ما صايرة.
اگلج وينه هذا أرسلان ما مركزة بشكله خلي أشوفه
للأسف ما عندي شي يخصه.
رفعت عيوني من حنين طفرت من مكانها.
حنين: صدگ جذب اني حصلت حتى حسابه و لج غياهب
ينشر صورة بس بالمدني ما مبين هو ضابط و البنات
مثل المطر بس نسيبنا ثكيل عشتو ما يرد على أحد.
غياهب: يموت بثكله الله يحفظه كلش ثكيل اسئلوني عنه.
وجدان: هههههههه شبيج ولج
هسه يطلع مسطرهن بالخاص
صيري شاطرة و أحتوي الرجال بالاحتواء ميشوف غيرج و لا يباوع الغيرج.
باوعتلهن معاجبني شي أهز بأيدي يريدني أحتوي.
اني لا من جماعة الرومانسية ولا أحبها و إذا يغلط ويايَّ أخذ حقي منه
لا هايهية أستمر الزواج.
وانتِ لِچ حنينننن منيلج حسابه رحتي تبحوووشين عنه.
حنين: من حساب درغام لأن صديقة
غياهب: والله الج خلگ تدورين.
وجدان: أشتريتلج فستان مثل ماطلبتي لبسي گومي خلي أنشوفه عليج و هم شغلات خاصة بالخطوبة.
أخذته منها و صعدت للغرفة لبسته عجبني من ناحية التصميم.
لونه أوف وايت خليتها تشتريلي لأن أعرف بنفسي
بس أشتري اني راح أجيبه أسود لبسته و باوعت النفسي
بشرتي حنطاوية مايله للبياض جاي گاعد عليَّ لايگ
نزلت جوا أبتسمن لزمتني حنين من أيدي تضحك تفرتي حول نفسي.
حنين: يشگ شگ.
نيروز: أي والله غياهب حيل حَلو عليج.
گعدنا و أحس بنفسي متضايقة ما متعودة مثل باقي
البنات بهيج يوم يهتمون بنفسهم و بباقي الشغلات إلى تصير
بالخطوبة صح أحب اكشخ و ألبس بس لبسي محدد و كله رسمي.
صعدت بدلته وحطيته بجهة نزلت اساعدهم بالتحضيرات دخل أبوية جايب أغراض.
سلطان: هل عيني بابا، هذا كلشي جبتلجن شوفن شناقصجن بعد.
باوعت للأغراض ماكو شي ناقص رفعت راسي
احاچي شفته صافن بخابتي إلى مشغولة ويا حنين.
احم.
ألتفت إلي.
هااا بابا
ما ناقصنا شي يوم عرسك و نفرح بيك.
أجه بصفي وگف همس بصوت ناصي.
ان شاء الله من خالتج.
ضحكت بصوت عالي خالتي و حنين بقن يباوعن علينا أبوية نزل راسه خافي أبتسامته عافنا و طلع نجهز.
درت وجهي عليهن.
غياهب: حنين ما تحسين بابا لازم يتزوج.
اباوع الحالتي بتك عين و أشتغل و گفت تباوعلنا.
حنين: ياريت و أصير من البنات إلى حاضررات أعراس أبوهن.
نكمل خطوبتي و ندورله على وحدة. عضيت شفتي أكتم ضحكتي. شتگولين خالة؟
وجدان: ما بيها شي من حقه و أنتن بعد راح تزوجن قابل باقيات وياه طول العمر
أي والله يا خالة اني هم فكرت هيج بابا يحتاج امرأة بحياته
اي خوب أبوج يكيفلهاا
شلون لعد ميكيف رجال و من حقه.
باوعت الحنين غمزتلها.
غياهب: حنين ما تشتمين ريحة حرگ
وصلت الريحة النص خشمي خيه.
خالتي رجعت تكمل بشغلها و مبين تضايقت من الموضوع
و حتى يمكن ما أنتبهت الكلامنا اني و حنين على سالفة الحرگ إلى چنا دنقصدها بيها.
للظهر بعد ما كملنا كلشي بديت أجهز نفسي للخطبة
لأن عائلية أهله و أهلي بيت خالي جابر وبيت خالي عمران
و أبوية گال عيب و زحمه لازم نعزم نسوان عمامي.
علاقتنا بس بالاسم أساساً بس أكيد اليوم راح يتواجدون كل عمامي و جدي عياش.
حنين: غياهب بس شوية أخليلج ما أكثر والله
غياهب: لا لا ما أريد وجهي يتحسس
لِچ غيررر خطووبتج أحطلج مكياج قليل و إذا ما عجبج أغسلس
واذا وجهي أتحسس
الزگي بالنعال
ليش ما ألزگ النعال بگصتج أحسن
هسسسه شنووو الناس راح تجي و أحنا بعدنا.
قلبت عيوني بملل.
أوف أمري لله حطي بس شي نازك و خفيف.
غمضت عيوني و هاي الله العالم شراح تخبص و تلعب أسمع ضحك نيروز عطت بيها.
لِج شصخمتي حنين
ما صخمت والله أسكتي دا أشتغل
لعد نيروز ليش تضحك
ختووولي معليج بيها، نعااال نيروز أسكتي لا أجيج.
كلمتني باوعت النفسي و لأزمة گلبي منها بالمرتبة شفت
ملامحي لا والله خوش مشتعلة شغل خفيف و طبيعي و گفت ورايَّ لأزمة شعري.
شعرج شنسوي.
ردت أرد عليها و أجتني رسالة من صخمان كاتب. خلي شعرج مفتوح.
مصدگ نفسه أحنا حالنا حال إلى يريدون يعرسون والله يا الله رفعت عيوني الحنين.
أرفعي شعري مالي خلگ أفتحه يفيدني و هوَ طويل.
بدأت تشتغلي بتسريحة بسيطة حنين تعرف بهاي الشغلات
سوالف المكياج و التسريحات، الحيوان عباله أمشي تحت
أمره بسيطة أرسلان الأعرج، بقيت گاعدة بغرفتي
رجعت وگفت گدام المراية أباوع النفسي حنين ساحبة
عيوني بأيلاينر بس ما حطيت كحلة لأن أساس جذور عيوني مكحلة.
مر وقت و أجت حنين گالت وصلوا نزلت وياها دخلت
مرة كبيرة بالعمر بس مو كلش و وياها بنات شابات وحدة الله
يستر عليها من جمالها عيون الكُل بقت مركزة عليها العيون
خضر و ساحبتهن بكحل أسود طالعات يخبلن بارزات ملامحها
ربنا بيهم و جرت سوالف الخطبة المُعتادة النسوان إلي
جايات مو هواية و مبين ما بيهن عرج خباثة مثل أبنهم.
گالوا راح نعقد أختنگت خنگة بس ربي يعلم بحالي بهاي اللحظة.
راح أصير بأسم هذا الشخص إلى ما أطيقه گعدوني
يم باب الصالة و حطوا جوا رجليَّ المغطس
ما أدري شنو هاي
جانت التقاليد هيج ماشية عند بعض العوائل جابوا قرأن
هم و بدأ السيد يعقد النا و صل إلى ياخذ الموافقة مني.
غمضت عيوني گلبي دگاته ما گدرت أسيطر عليهن ياربي
اني دخلت هذا الطريق مو بأرادتي بس مجبورة على كلشي
دا أسوي ساعدني اني ما أعرف هذا الشخص و لا أعرف شنو نيته.
و مصلحته من هذا الزواج طلعت من أفكاري على صوت خالتي وجدان.
وجدان: حبيبتي غياهب منتظرين الموافقة.
أنطيت الوكالة
بصوت يرجف هادئ، أعتلت صوت الهلاهل بس ما أدري
منو إلى تهلهل هيج ولو أهتميت رجع السيد ياخذ وكالة
الموافقة من أرسلان أنطاها اله و هيج كمل كلشي وصرت زوجته شرعاً.
رجعتني خالتي المكاني و الكُل يبارك مر وقت و گالوا راح
يدخل العريس علمود نلبس الحلقات حسيت راح يلبسوني.
كفني مو حلقة، بقيت منزلة عيوني ما طايقته كارهته أعتلى
صوت النسوان عرفته دخل من خلال المُباركات
إلي صارت همستلي خالتي من شافت توتري.
وجدان: أهدئي ما يحتاج هذا التوتر حبييتي بس يلبسج الحلقة.
صار بصفي و گفنا جابوا الحلقات لزمت الحلقة بأيدي
ترجف رجيف فضيع لزم أيدي ضاغط عليها رفعت عيوني
اله خازرته زفرت نفس بعمق أتلابسنا الحلقات و جايبين
تخم ذهب لبسانياه همس يم أذني.
أرسلان: ماعرفتج طلعتي تخجلين.
غياهب: ما أخجل بس ما طايقة وجودك وكله، فضهاا عاد لا تماطل بيهااا.
ليش صرتي بأسمي بعد
بأسمك فقط
أممم جيد.
كملنا سوالف الخطبة إلى جبر عليَّ سويتها ما أباوعله
بس أسمع صوته يحجي بسبب كرهي اله طلع زفرت نفس
براحة گعدت أفكاري غير عن أفكار الموجودين شوية و أجت
البنيه أم عيون الخضر راحت يم خالتي بس حسيت ملامحها
ينگطن خجل ما أعرف شنو حچت ويا خالتي هزتلها براسها و رجعت أجتني گالت.
وجدان: خطيبج يريد يشوفج.
غياهب: شبيه هذا ما شايف ما صارلة شوية من طالع منا
عادي خالاتي صار زوجج لعد
مااا، گولوله ما أتريد
گومي حبيبتي عوفي العناد هسه عيب من الناس أجوا طلبوا مني.
وگفت و أني أتوعدله بسيطة سئلتها.
وين يشوفني
بالصالة الثانية موجود بيها.
طلعت أمشي بهدوء فتحت الباب صارت عيوني عليه
مو زحف هذا بس فعلاً چان شكله يجذب ك شخصية وكاريزما
لابس قاط أسود مقفل و قميص أبيض هوَ مو أسمر أبيض.
بس بياض طبيعي لايگ اله ك رجل دخلت سديت الباب وگفت مكتفة أيديَّ و هوَ گبالي.
أرسلان: شبيج طافرة هناك هيچ اخوف
غياهب: أوف أي كلش راح أموع من خوفي.
غمزلي و هوَ يمشي بأتجاهي.
تقصدين تموعين من جمالي
دطيررر
أطير و أصير بحضنج
هيووو لا تتطاول بالحجي
هيووو بعينج زوجج انا أحترمي.
من شفته صار قريب عليَّ طفرت أمشي لگدام گعدت
مثل العاقلة لا يسويلي شي دار وجهه ناحيتي.
يعني شلون راح اگضيها أركض وراج.
شتريد؟ شكو طلبت تشوفني هسه لو متزوجين
علي حب بيها مجال، اثنين يحبون بعض مو أثنين يكرهون
بعض واحد ما يطيق الثاني أتجاهل كل كلامي و أردف طابك حواجبه.
انا مو گتلج عوفي شعرج مفتوح
شعري و بكيفي أسوي إلى يعجبني.
حبي لازم ما تعرفين
شنو؟
كلچ و كلشي خاص بيج صار إلي
الله شلون اتأثرت واو واو
شيأثرج تلگفين لگف أنتِ
احچي عدل.
اجه گعد بصفي.
خليج عاقلة
من يوم يومي عاقلة بيبي.
بيبي أنتِ حيل وگحة و راح أتعبيني هاي من أولها تعاندين
ما أتوقع أحد جبرك.
وگفت بطولي گدامه.
غياهب: تحب أذكرك شسويت؟ او أتحب أذكرك بشنو ساومتني علمود أقبل بهذا الزواج.
رجع وگف گدامي يعدل بسترته و فتح دكم القميص
هذا شبيه شدايسوي شهگت من أنسحبت من خصري بحركة سريعة منه.
أكررره هااااي السوالف لا تسويهنن صخمااان أرسلان.
خوش مطلعتلي أسم صخمان
وخر أيديك شبيك؟
و إذا ما وخرتهن شتسوين؟
أبتسمت بوجهه و أني أضرب بأصابعي على صدره بخفه.
أسوي شي جداً مؤذي
أممم
أتحب أتشوف؟
طبعاً
خاف ما تتحمل بيب
أتحمل بس شوفينا عضلاتج.
متأكد أرسلان عندك وقت تتراجع ترا
ما فهمت أنتِ مطعمة، ساعة جنج صاحبي ساعة تنگطين أنوثة شنو فلمج
حسب الوضع
صلافة ترليون.
أبتسمت بوجهه غمزتله، عباله أستسلم ثنيت ركبتي
و أني واگفة ضربته بذاك المكان أبتعد عني مغمض عيونه
بألم مدنگ همس بصوت متألم عروگ گصته بانت.
خرب رووووحج.
شعلية أنتَ لحيت و گلت أتحمل
أطلعهاا من عينج أصبريلي بس
أموع ياويلي أموع
تريدين تگطعين نسلي بنت سلطان
ديله هوَ واحد إلى هوَ أنتَ و گوا جارعينك نوب يجون من نسلك.
درت وجهي تاركته يصارع بالألم، متوجهه للباب أطلع رجع
سحبني أنضربت بالحايط إلى بصف الباب بس هالمرة ملامحه تختلف ملامحه
كلها غضب لزم فكي مرة يضغط عليه بقوا مرة يرخي أيده.
لا تلعبين ويايَّ غياهب
زواجنا زاجف مختلف ف لا تلمسني لأن أقرف من كل لمسة تجي منك.
راح أخسر خشمج هذا المرفوع.
دفعته عني و أنفاسي متضاربة رفعت أيدي بوجهه احچي بثقة و أعصابي تعبت.
وحق جلالة أسم الله إذا ما خليتك تبچي ورايَّ أكون
ناقصة شرف وانتَ گلتها الساحة النا و أنشوف منو راح
يربح راح أندمك على كلشي أخليك تعضض أصابعك ندم.
بدأ العد التنازلي من اليوم.
سبب زواجنااا شنو
من نتزوج تعرفينه
المجهول
يا مجهول حبي
لا تفكر نفسك بس أنتَ الذكي باللعبة المجهول أنتَ أنتظر هسه أجي.
فتحت الباب أريد أحد يجيبلي جهازي طلعت نيروز صحت الها.
غياهب: نيروز تعاي شوية بلا زحمه
نيروز: ها غياهب
ولو أتعبج بس ممكن تصعدين تجيبيلي جهازي.
صعدت تجيبه بقيت أنتظرها لحد ما نزلت اخذته منها متشكرة منها رجعت اله دخلت على قائمة الرسائل إلى چانت تجيني حطيتهن بوجهه.
هذا أنتَ؟
أرسلان: شنو إلى يثبت
الي يثبت بنفس اليوم إلى المجهول حدد المُلتقى
بينا أنتَ أجيت خطبتني من أبوية فلا تحاول تصير لوتي براسي أرسلان.
أممم أي أنا
واخيراً عرفت هذا المجهول إلى صارله كل هل الأشهر
خافي نفسه ويلعب ختيلان. معناها نفسك إلى دخلت البيتنا هم و أني بالحمام.
شدعوة هالگد ذكية
أستغفرلله جاوب أرسلان لا تبقى تلعب بأعصابي.
نعم انا بس وداعتج ما شفت شي خليتلج المنشفة بالباب و طلعت.
شنو من بشر أنتَ
غياهب
الله يااااخذككك.
ركز بنظراته و هوَ يوجه كلامه الجدي أتجاهي.
أشتغلكم على البطيئ وداعتج ما أخطي خطوة إذا ما ضامنها من مصلحتي.
طلعت من الصالة دمي يفورر فوران ما رجعت يمهم صعدت
فوگ قفلت الباب ما أريد أشوف أحد شنو من بشر يا ربي
شلون گدر يلعب كل هالالعاب شنووو من عقل هذا شايل الدقائق اندگ الباب.
غياهب: منو
أنسام: أنا أنسام
منو أنسام؟
أخت أرسلان.
فتحت الباب أبتسمت بوجهي رديتلها الأبتسامة.
نگدر نحچي
تفضلي.
دخلت سديت الباب بطلب منها دارت وجهه ناحيتي.
انا أدري أخوي مهددج توافقين على هذا الزواج
و شنو إلى راح يتغير
ليش وافقتي؟
تگدرين تسئلين اخوج الكفو.
صدگيني محد قابل على كلشي جاي أيسوي
طلعت العائلة كلها تعرف.
غياهب صدگيني وصلت وياه هو و أخوي بينهم أتضاربوا لأن أخوي الثاني ما قابل على أفعاله و تصرفاته.
أخوج؟
أي أخوي الصغير عمر.
أتجحظت عيوني و أني أسمع الجوابها الدنيا صارت تفتر بيَّ.
غياهب: أخوج أسمه عمررر؟