رواية وتيرة الأعرج للكاتبة حوراء السعيدي الفصل الرابع عشر
حنين.
خلصت الخطبة و الناس كلها راحت لبيوتها حتى أهل أرسلان
و هاي نيروز النعال ما أدري وين أختفت اختي دخلت الغرفتها بعد ما طلعت
وگفت أنظف اليوم كلشي براسي وين الشغلة إلى أتعاجز
منها صارت براسي ألتفتت على مصدر الصوت من ورايَّ.
درغام: شبيج عبالك عجوز أتدردمين
حنين: لعدد شنو يخلون التنظيف بس عليَّ أشتغل عندهم اني و ذني النعالات ما أدري وينهن.
صيري مرة و أشتغلي لا تعتمدين على أحد.
تعاال أشتغل ويايَّ.
حچيتها زلة لسان ما چنت أقصد يسويها صدگ. حط أجهزته على الكاونتر و مفتاح سيارته رفع أرداناته گال.
يله تعاي شنسوي بالأول
ههههه لا شبيك دا أشاقة اني هسه أكمل.
أنطيته ظهري منحرجة من چفصتي وياه أجاني صوته.
مساعدة ما بيها شي بلائ، أقصد حنين.
عرفته راد يگول بلائي الجميل بس يمكن بدأ يتقبل كلشي
هزيت براسي وبدينا نتساعد بالشغل أخذ الكراتين و الهوسة
طلع يذبهن و رجع من كل عقله يريد يمسك الأرضية.
سحبت الماسحة منه الخاصة بالمسح.
لا درغام شنو السالفة والله اني أمسح
دجيبي شبيج هسه شمسوي و أنتِ تعبتي اليوم.
رجع سحبها مني و أشرلي اگعد على الكرسي گعدت و بداخلي شعور خجل.
حضرة الضابط.
هااا.
صفنت الثواني برده لأن يختلف عن قبل رجعت أبتسمت بوجهه.
أرسلانو خوش رجال مو؟
وگفت حركته و بأيده الماسحة باوعلي طابك حواجبه
و أردف بأستغراب ونبرة توضح كلامي ما عجبه.
أرسلانو؟
أي
ليش هوَ أخوج و هيچ تحچين عنه؟
نسيبي صار هوَ يسميني أم روح الحلوة و أني أسمي أرسلانو شعليك بينا.
مو أجي افرگ حلگج.
هسه شكو ضجت؟ المهم احچيلي شتعرف عنه.
ما صارلي أشهر من عرفته خوش ولد بس اني متفاجئ من شغلة
شنو
زواجهم هوَ و غياهب ماتحسين صار بسرعة غريبة.
صفنت بكلامه و أثنينا نظراته تحچي شي فكرت بعقلي
حسب ما گالت غياهب هوَ حاچي ويا أبوية من قبل
لا درغام يوگع مريض رفعت راسي اله.
لا لأن هوَ حاچي ويا بابا من زمان من قبل لا تتعرض أنتَ.
الله يساعده على ما أبتلاه
حنين: شبيها أختي لا تحچي عليها هيج
درغام: ما بيها خيتي هاي، أتمنالها السعادة
يوم إلى ألك و نفرح بيك.
حط الماسحة على جهه مكمل الشغل طلع جكارة يدخنها ألتفت يباوعلي بعيونه.
وانتِ الحاضرة
وين حاضرة؟
بعرسي؟
هاا أيي أن شاء الله تستاهل كل الخير.
دوريلي وحدة على عرفج من أختيارج.
أبتسمت مجاملة و سحبت المنشفة إلى گدامي صرت
أطبك بيها منزلة عيوني عنه.
لا شعلية يعني أقصد أنتَ الأفضل تختار على ذوقك
مو أنا أختاريت على ذوقي و ما صارت نصيبي
الحياة تجارب
هيج تگولين يعني؟
أيي.
مغصتني بطني و گلبي مادري شبيه من گال.
يعني عادي أحب مرة ثانية؟
أي
خوش
أخطب لجين
يا لجين؟
أخت على حلوة و مبينة خوش بنيه و أحسها تناسبك
أهاا
أيي
يعني تحسينها تناسبني
كلش تشگون ويا بعض.
مقتنعة بكلامج حنين
أي والله عادي ترا مو شرط إلا تتزوج على حب مرات.
يجي الحب بعد الزواج و أيصير أقوا من الحب إلى يكون
قبل الزواج و لجين أكيد تعرفها لأن أخت صديقك
انا هم مرة سمعت يگولون أخذ إلى يحبك
و لا تأخذ
إلي تحبه ف أريد أخذ وحدة أحبها بس ما تحبني.
عرفته ديبسمر بكلامه دخلت خالتي وجدان.
وجدان: ها حنونه كملتي شغل ما گدرت أساعدج
لأن مرت عمران و جوهرة موجودات گعدت يمهن.
بقيت صافنة ما أدري شبيه حچى درغام.
درغام: عمه ترضينهااا شغلتني.
توسعت عيوني بسرعة عطت بي.
حنين: چذااااب والله چذاااب هوَ گال إلا أشتغل وياج.
منو الچذاب ولج
انتَ.
صاحت بينا خالتي.
وجدان: شلون بينا احنا بيكم كافي يا عيني وانتَ
درغام شكو بيها إذا ساعدت بنت عمتك
لا عمه ما مرجية منج أنا عمتي الحية متبري منها گولي بنت عمك سلطان.
وجدان: رادت تجي زمُرد للخطبة بس أمي ما رضت گلتلها
أنتِ و غياهب مو شي و لا تخربين هذا اليوم عليها
و هم أمي گالت خاف تسوي شي يخرب الوضع.
درغام: زين سوت ما ناقصين حياية.
والله بعده هستوا مكمل كلامه و دخلت علينا أمي زمُرد
من باب المطبخ صاح درغام و هوَ يدگ على الطبلة.
الحية أجت أجت. أجت من بيتهم أجت. أجت تمشي مشي أجت...
زمُرد: قليل تربية
ديله منتظرين منج التربية.
أتجاهلته و رادت تدخل جوا وگف مانعها تكمل طريقها.
درغام: وين؟
وخررر ولك أريد أدخل جوا.
عمتي عزيزتي روحي منا أحسن ما تحصليلج أهانه من أحد بناتج الكريمات
انتَ جابر ما عرف يربيك.
سبحان الله كلامج مثل كلام جدي سالم التربية شحچت
و التربية شگالت ماعندكم غير هذا الحچي و انتم أي تربية و أخلاق ماعندكم.
والله العظيم شايف إذا أخليك براسي يا درغام محد يخلصك مني.
رفع أيده يسويلها حركة بمعنى صرت أرجف من الخوف.
أمشي منا و لا تخربين فرحة الموجودين إذا شافج
عمي سلطان لو غياهب ما ندري شيصير.
و فعلاً سواها و طلعهاا من البيت، أنقهرت على الموقف
المفروض بهيج يوم كل أم تكون واگفة ويا بنتها إلا أحنا.
أمنا بعيدة عننا طلعت وراها أمشي بس ما عندي الجرئة اگلها ماما.
حنين: أوگفي ممكن.
وگفت يم الباب و جها مملي غضب نترت بالكلام.
زمُرد: شررررايدة.
ليش تسوين بنفسج هيج ليش مخلية الأنانية و الحقد يتحكمن بيج تدرين شگد تمنيت تكونين ويا غياهب اليوم.
أنتم ما تريدوني
أحنا؟ ليش منو السبب بهذا الشي غيرج أنتِ؟
منو عذبنا بطفولتنا يمكن اني چانت حصتي من عذابج
الضرب بس، الا غياهب عذبتيها عذاب المجرم بكل مرة تشوفينا.
تستفردين بينا و طلعين كل حقدج بينا و أحنا أطفال شنوووو ذنبناااااا؟
طلعت بدون ما تنطيني جواب الكل كلامي مسحت دموعي
أرجع جوا شيفيد وياها ما يفيد شي هيَّ أنسانة مريضة نفسياً
أتمنى بيوم تتعالج، دخلت للمطبخ ماكو أحد بس درغام.
درغام: ليش رحتي وراها.
حنين: ما أدري.
عفته و صعدت فوگ الغياهب أشوفها دخلت بعد ما طلعت الغرفتها ردت أدخل بس أستوقفني حديث بينها وبين نيروز و صوتهم واضح شددت مسمعي على صوت شهگة نيروز و كلامها إلى نطقته بصدمة.
نيروز: شنوووووو عمر أخووووو أرسلان؟
غرام.
صعدت خالتي مليكة ويا أنسام و زوجها و أني ويا أرسلان بسيارته
و كُميل هم ويانا بس گال أصعدي گدامي صعدت و أرسلان
ما منتبه إلى لأن تحسه داخل بغير عالم صافن ذيج الصفنة
إلي تخليك تتسائل، لازم أتبارك اله بخطوبته لأن ما باركتله چانت هوسة جوا.
غرام: احم. مُبارك خوية.
فز من صفنته و دار وجهه يباوعلي مسح وجهه ورد بهدوء.
أرسلان: الله يبارك بيج.
عم السكوت بينا لأن اني كلامي وياه قليل بينما عمر بديت أتعود عليه، كسر حاجز الصمت سؤاله.
مرت خالي
أتفضل.
أبتسم طابك حواجبه أبتسامة خفيفة.
شلون شفتي خطيبتي؟
تخبل حنطاوية و الحلو بيها عيونها السود مُميزات، نزلت راسي ضامة ضحكتي. و شسمه شخصيتها مبينة قوية.
لا مرت خالي شتقصدين بكلامج راح أتسوگ عليَّ؟
لا والله مو هيج قصدي
أدري شبيج راح تبچين.
أموت و لا أحد يفهمني غلط، صعد كُميل إلى روحه طافرة.
و ما طايق الوضع، طلعنا من شارع أهل غياهب
و فتحت حلگي بصدمة من شفت أرسلان علك الأغاني بأعلى
صوت و رفع السبحة إلى بين أيده يفر بيها
و يهز بأكتافه.
رجع أيد مثبتها بالأستيرن و أيد مكمل يفر بيها السبحة.
حد ما كملت الأغنية رجع الهدوئه شنو هل الشخصية؟
دار وجهه كُميل ناحيتي صفن بوجهي و غمض عيونه رجع فتحهن.
كُميل: هاي شمسوية بعيونج؟
صفنت بسؤاله و جهي صار شعلة من النار يقصد
عيوني لأن مكحلتهن هاي أنسام جبرتني.
غرام: شبيهن؟
طالعة تشگين أرسلان.
صاح أرسلان بمكانه.
أرسلان: هسه انا شكووو أنتَ و مرتك تدخلني بالنص ليش خالي.
ما أهتمله و رجع يباوعلي صخنت من نظراته.
خالي بعد لا تحطين كحل لعيونج.
ليش خالي.
أرسلان: شدددد
كُميل: لا تتزومل شبيك تكمز.
انتَ رجلها لو خالها؟
رجلها أكيد
چا كلها رجلج انا مو خالج
انچب و خليك تسوق لا تدخل
ليش لازم اخرب لحظاتكم الرومانسية
لا تضوج حبيبي أن شاء الله بالمستقبل تترومس ويا بنت سلطان
زززيج.
غصينا بالضحك من گال هذا الملفظ الطرق كله
كل ما أتذكر السالفة أضحك و هوَ من أيشوفني يبقى يهز
بأيده وصلنا نزلنا بس اني و كُميل هوَ ما نزل ما أدري وين راح
وصلت خالتي ويانا سئلتها عن أنسام گالت رجعت
ويا رجلها لأن جهالها مخليتهم ببيت عيالها
و ما تگدر تبقى
دخلت اريد أبدل من ملابس الخطبة ردت أسد الباب و أنلزم.
كُميل: وين ويننن علوية
غرام: أريد أبدل
هااا
محتاج شي؟
لا سلامتج أخذي راحتج عيناي.
سديته شبيه هذا بدلت و طلعت أسوي عشه دخلت
للمطبخ ذكرت عمر، رحت ال كُميل إلى چان گاعد وحدة.
غرام: كُميل
كُميل: عيناي
عمر وين؟
رفع راسه و رفع حاجبة.
شعندج تسئلين عنه؟
مو خطية ماحظر الخطبة و هوَ ضايج ردت أشوفه شلون صار.
يمكن بغرفته لأن مستحيل يطلع تعاي أنشوفه انا و وياج.
أتوجهنا الغرفته و أبالي سؤال ليش مستحيل يطلع دگ الباب ماكو صوت.
يمكن ما موجود طالع
لا من أحنا عند أهل البنيه أتصلت گال بالبيت.
فتح الباب، بقيت واگفة بمكاني چان نايم أتقربله
كُميل ما أدري ليش بسرعة حط أيده على جبينه
كأنما يقيس حياته مثالية رفع عيونه ناحيتي.
مصخن
عفناه ما بي شي
طبيعته هاي من ينقهر يصخن و حتى أرسلان عنده هالسالفة يتمرضون و تعلسهم علس الصخونة.
دخلت أتقربت أباوعله أنقهرت عليه.
خطية زين اگلك كُميل شنسوي
خلي نسويله كمادات إذا ما نزلت ناخذه للمستشفى أو نجيبله علاج.
اييي أييي هسه راح أجيبله.
ركضت ركض للمطبخ طلعت ثلج من الثلاجة و حضرته
رجعت أنطيته اله بدأ يسويله كمادات عمر يهلوس
بكلام ما مفهوم و گدرنا نلتقط كم كلمة.
كُميل: شمالك عميرر.
حچى و الكلمة بصعوبة تطلع منه و يمكن بدون و عي بسبب حالته گال بنبرة تعبانة.
عمر: أحبها.
صفنا أثنينا عليه أتقرب اله خاله و سئله بهمس.
تحب نيروز عمر
كسرتها ما راح تسامحني.
تگطع گلبي على حالته خصوصاً بعد ما نزلت دمعة ضياع منه.
و هوَ مغمض عيونه و شلون بقى يحچي بيها و يهلوس
بأسمها طلعنا ويا طلعتنا صارت گدامنا مليكة باوعت علينا بشك.
مليكة: شتسون بغرفة عمر.
كُميل: مريض مصخن يمه.
لطمت على وجها بدون ما تحچي و دخلت الغرفته أباوعلها
شلون گعدت بصفه تبوس بأيده و تحچي بكلمات حنونة
وياه مليكة تعلقها غير بعمر و تحبه حيل رجعت للمطبخ
سويت عشه خفايف لأن مو كلش بالطبخ اني و مليكة گالت اني أعلمج.
لاحظت خطيبة أرسلان اليوم حتى ما باوعت عليه و لا مهتمة اله
لعد شگد واصلة مرحلة من الكره أتجاهه هوَ مدافهم شنو صنفه
مرة أتشوفه أنسان مُستفز و طريقة كلامه كافلة تخلق
الخوف داخلك، ومن جهة اله جانب آخر حتى أحلل شخصيته
كل ما أتذكر موقفه ويايَّ من سما و نور حاولن يهنني لو مثلاً
مرات يسئلني إذا اني بخير أو محتاجة شي ما يحط عليه عنده جانب شرير.
كملت الاكل و شفت عمر نايم طلع كُميل يجيبله علاج.
غرام: خالة أصب الأكل
مليكة: لا يمه ما أشتهي انا أكلوا أنتم
بس ما أيصير عندج علاج على الأقل شوية علمود علاجج
والله يا يمه ما أشتهي
ميخالف حبيبتي شوية كم لگمة.
هزت راسها بقبول دخلت حطيتلها و قدمته الها گعدت يمها و خطية ساعة تاكل ساعة تصفن.
مليكة: والله گلبي ما ينطيني أدعي عليه بالموزين.
فهمت تقصد أرسلان.
غرام: الله يهدي
عيل هوَ وينه
ما أدري وصلنا بعد ما شفناه
شوف بيا زاوية خاتل، شفتي البنيه
أيي.
بجاه كلمن عنده جاه يمك ياربي كون تصيرله دوه
هههههه دوه الارسلان؟
خيولي بلگي الله ويحبها و يغير كلشي
خالة ما أدري إذا من حقي اسئل أو لا بس شنو موضوع أنتقامه وياهم
سالفة طويلة يمه، و الناس إلى مدخلهم أرسلان
مالهم عرض بشي بس راس البلة منهم وبيهم كاسرة خاطري
هاي البنيه الچلب ابن الچلب انا أعلمنه بس يجي.
الله كريم.
دخل خاله جايب العلاج گال صبيله أكل علمود ياكل
وياخذ العلاج سويت مثل ما طلب رجعت گعدت بمكاني.
مليكة كملت أنطيتها علاجها و راحت أتشوف عمر و طلعت بعدين ا
لغرفتها تعبانة نامت بقيت وحدي طلع كُميل بأيده الصينية أخذتها منه.
غرام: أصبلك أكل
كُميل: لا ما أريد تعبان أكلي انتِ.
برطمت شفايفي بزعل لأن چنت أنتظره ما أكلت گلت ناكل سوا.
استغفرلله شبيج برطمتي
ما أتعشيت لأن منتظرتك و هسه تگلي ما أكل وين العدالة؟
ألعببب تدور عدالة
أيي لعد شنو
أنا هم أدور عدالة.
بشنو
نتعشه و اگلج
يعني راح تاكل ويايَّ
أي عيناي.
أبتسمت فرحانة.
جهزت الاكل النا و ترتيبات اليوم واهس و نشاط عندي گعدنا ناكل.
خبصتيني خبص و طلعتي مسوية خفايف
وشبيها؟ لازم بالعشه شي خفيف
ما يمشن ويايَّ ما أيشبعن.
هسه أكل و أسكت موزين سويت لأن كلشي ماكو بس أنتظر خالة تعلمني و أنطتني وعد.
أمده حظي الأغبر
حشاك خالي
لِچ رررجلج انا خاالج شنو
شمدريني كلها تگلك خالي و انتَ من تحچي تگول
هيج ف أني على الواهس وياكم.
العببب هنيال أمي
ههههههههههههه.
كملنا و هوَ بقى يباوع للاخبار كملت شغلي گعدت
يمه أيدي جوا خدي من الملل دار وجهه عليَّ.
كُميل: شبيج ام عيون إلى تلمع
غرام: ضوجة
نلعب.
عدلت گعدتي أباوعله.
شنلعب
نلعب لعبة و إلى يفوز شيطلب من الخسران ينفذ بدون أي أعتراض و مماطلات.
أبتسمت بحماس.
تمام متفقين.
بس ما تتراجعين شنو أطلب
لا لا ما أتراجع أخذ كلمة مني
خوش
يله، شنو الشي إلى يمشي بس ما أيشوف
شنو هذا
لغز إذا أنتِ ذكية حلي.
بقيت أفكر شنو الحل و أفر بعيوني بنظراتي حول
المكان إلى گاعدين بي باوعتله و أبتسمت.
غرام: لگيت الحل.
شنو
ال مي
لا عيناي
لعددد شنوووو
انتِ و شطارتج و إذا تريدين تستسلمين گولي
لا اوگف أفكر.
صرت ارطنها منها و أجيبها منا مدا أعرف شنو تعبت
من التفكير أستسلمت علمود أعرف الجواب صار عندي فضول.
يله خوش أنتَ فزت كُميل شنو الجواب
سهلة
هسه غير يگول
الأبرة
هاااااااا
اذا ما مصدگتني هاج هذا الجهاز و شوفي.
أنطينياه.
أخذته و فعلاً طلع صحيح رجعته و أني ضايجة من الخسارة.
هسه بما انُ أنا إلى ربحت شنو أريد تنفذين.
بس لا تطلب شي صعب
لا سهلات
يله احچي
أنام أسبوع كامل على الچرباية
لااا بله
وجعه من الله شنو أتفقنا
لا ما أقبل بهذا الشي شوف غيره
خوش تنامين يمي جوا اسبوع.
غرام: شنو ماعندك غير ذني الطلبات و يتشابهن ترا
كُميل: أنتِ بعد بكيفج ماعندي غيرهن فكري و رجعيلي خبر.
درت وجهي أفكر اني ما أعرف أنام بالگاع ظهري يبقى.
يأذيني و أخاف أخلي ينام يمي شلون هسه أجت
أبالي فكرة من بعد تفكير عميق علساس.
اني موافقة تنام يمي بس بشرط
فوگ ما خسرانة تتشرط
هسه شگلت كُميل
بس لا تتنعوصين احچي
مرة شفت بمسلسل يحطون مخاد بالنص علمود محد يصير قريب من الثاني.
خالي بعد روحي احنا عراقين مو أتراك
أي أدري شبيك هههههههه حباب وافق
أمري لله.
باوعت للساعة ب 11: 00 و أرسلان ماكو دخلت الغرفتي
أخذت ملابس أسبح شعري ميتعب لأن مو طويل.
لفيته بالمنشفة و لبست الشال هم خاف أحد من الولد يطلع بوجهي.
رجعت للغرفة وگفت فاتحة حلگي نايم و بدون لا
قميص لا تيشيرت هو لبسه أكثر شي قمصان يلبس هذا إلى لاحظته.
غاط بالنوم مشيت بهدوء و كل حركاتي بهدوء لا يگعد
مشطت شعري كملت وگفت گبال المكان إلى أنام بي
هسه شكو تورطين نفسج باللعب أخجل أنام بصفه و بنفس المكان
حطيت المخادع سويت هاي الحركة إلى شفتها بالمسلسل
تمددت بمكاني لأزگة نفسي بالطرف غمضت عيوني.
و التوتر يقرأ ألف فز گلبي و كُلي من گال.
كُميل: گومي طفي السبلت لا تتمرضين
غرام: أنتَ گاعد.
فتح عيونه بنعاس.
نايم بس من حطيتي هذا السياج إلى بينا گعدت
مو أحنا أتفقنا
خوش خالي طفي و تغطي زين.
هزيت براسي و رحت طفيته رجعت المكاني نمت
ما أدري شلون مرت هاللليلة رغم هوَ نايم و ماله علاقة بيَّ.
الثاني يوم فتحت عيوني باوعت المكانه ما موجود
گعدت لبست حجابي و طلعت شفتهم گاعدين يتريگون.
صبحت عليهم و چان أرسلان موجود بس طبعاً كالعادة
وجه ما يگصه السيف حتى تخاف تباوعله رحت
غسلت وجهي ورحعت يمهم سئلتهم.
غرام: عمر شلون صارت.
بسرعة رفع راسه أرسلان يباوعلنا بنظرات تسائل.
أرسلان: ليش شبيه عمر؟ البارحة من رجعنا جان مصخن.
بدون ما أيرد نهض من مكانه متوجه الغرفته دخل
سد الباب عضيت شفتي بخوف خاف يسويله شي همست الخالتي.
خالة خاف يصير شي بينهم.
مليكة: أگطه نعالي عليه عبن محمل گلبي عليه.
ما طول و هوَ يطلع لازم عمر إلى ماله خلگ گعدوا أثنينهم و مبين ساحله جبر.
عمر: صباح الخير الج بس مرت خالي.
أبتسمتله.
غرام: صباح النور.
كُميل: ما تسوا العلاج إلى البارحة خسرته عليك
يا عار و أمي مليكة ما تصبح عليها؟
مليكة: أسكت ولك چا غير أول وحدة صبح بوجهي
يمه ترا انا علمودج حچيت
مالك شغل عمير محد يحاچي وانا بالوجود.
همس أرسلان بكلام بس سمعناه.
أرسلان: طبعاً هذا المدلل احنا بيش الكيلو.
لأن مليكة تنحاز بالأكثر اله و تتفده عمر تفدي ماتقبل
أحد يحچي عليه خصوصاً من أرسلان ضرب عمر لعبت لعب بي
بس الحلو ب أرسلان شما تحچي ما يرد عليها يبقى ساكت.
عمر: البارحة خابرتني غياهب.
صارت لحظة صمت الكل باوعله إلا أرسلان إلى لازم گلاص
الچاي بأيده أتوقفت حركته بي بقى ثابت رد عليه بدون ما يباوعله.
أرسلان: سبرايز جميل.
و هنا كلام عمر زاد حطب على النار من گال.
غياهب صار عندها علم أنتَ ليش راح تتزوجها.
هه طبعاً بفضلك عرفت
عاد انا ما حچيت شي بس طلعت المحروسة مرتك ذكية.
جاوبة و هو كاز على أسنانه بغضب.
شحچيتلهااااا عمررررر
ما مچيت شي بس هيَّ ربطت كلشي من عرفت انا أخوك
و هيَّ شلووووون دررررت أنتَ أخووووي.
سواله حركة بفمه بمعنى ما أدي، رفع عيونه أو نظراته توزعت علينا.
أرسلان: حاچين شي گدامهاا يخليهااا أتشك بشي؟
هزيت براسي ب لا رجع باوع الخاله كُميل.
وانتَ خالي.
انا لو حاچي وياها احچيلها كلشي مو بس اگلها عمر أخوك خالي.
عاف الريوگ و طلع رجع كُميل يباوع ال عمر إلى أكو شبه ابتسامة سعادة ب ملامحه.
كُميل: خاف أنتَ حاچيلها كلشي و جاي تضمضم.
عمر: لا و داعتك خالي خابرتني بالبداية نيروز تسئل مانطيتها جواب بعدين هاي البنيه غياهب خابرت
إذا أنا اخو أو لا سئلت ليش نجذب كلهن كم يوم و جاية يمنا و أتشوفني گتلها أي.
أهااااا اگووووول وجهك مورد اليوم طلعت سامع صوت نيروزه.
شبيك خالي؟
صفك كُميل أيد ب أيد بعصبية وصاح.
والله يا خالي راح أشك هدومي و أطلع بالشارع متسودن من وراكم أنتَ و أخوك.
غياهب.
طلعت أنسام بدون ما أبين الها شكوكي دخلت نيروز
حچيتلها إلى سمعته من أخته و چانت صدمتها
ما تقل على صدمتي، صابنا أنجماد جمد أجسامنا
من دخلت حنين صرنا و حدة أتباوع بوجه الثانية
و أكيد سمعت كلامنا ماكو مجال للجذب و مثل ما أتوقعت.
حنين: سمعتجن تگولن عمر أخو أرسلان
غياهب: بعد ما متأكدين.
أردفت بأستغراب و الواضح عقلها ضرب.
ب. بس شلون
ما أدري بس أخته ذكرت عندهم أخ اسمه عمر و هنا دا أشك اله علاقة يمكن.
سكتت أباوعلها ما لازم حنين تعرف شي عن الحقيقة
و عندي شعور و أحساس بداخلي يگلي أكو صلة قرابة بينهم
خصوصاً بعد ما عقلي بدأ يربط بالأحداث أشرت النيروز فهمتني.
نيروز: اگلچن شو أتصل ب عمر مديجاوب عوفنها
بعدين هسه راح أنزل ويا أمي باجر أجيكم.
رادت تطلع منعتها حنين.
حنين: وينن مووولية خلينا نعرف بالأول هذا اله صلة قرابة ب أرسلان أو لا
اييي شبيج حنين باجر لأن ما اگدر أبقى لازم أرجع ويا أمي.
عافتها و نزلت بقت تباوع وراها و دارت بجسمها ناحيتي.
حنين: شبيها هاااي؟
غياهب: شبيها غير ترجع البيتهم.
شتگولين عمر أيصير أخو أرسلان إذا طلع أخوه يعني أرسلان عنده انتقام ويانا
لا مو أكيد و هم توقع ضعيف خلي نتأكد بالأول.
لازم احچي بهذا الأسلوب علمود ما تشك أكثر و يبقى
الموضوع أبالها لازم احچي ويا هذا الولد عمر بس شلون
و حنين تفتر و كل دقائق جايتني تسئل طلبت من نيروز تدزلي.
رقمه و أني أتفاهم وياه لأن هيَّ مخابرته و ما منطيها
جواب فضلت بنفسي أتصل و أيدي على گلبي.
عمر: منو ويايَّ
غياهب: السلام عليكم
عليكم السلام أتفضلي
أني غياهب.
سكت الثواني رجع صوته.
هلا بيج
اني ما أدري إذا راح تكون صادق ويايَّ بجوابك بس أتمنى.
اسئلي
أرسلان أخوك؟ الضابط أرسلان المقلب بالاعرج.
أردف بنبرة خاوية من أي أحساس.
اتأخرتي على معرفة هذا الشي
مو مهم، المهم هسه جوابك
أي أخوي.
رمشت بثكل بعيوني و گلبي عصرني عصر هفيت
بأيدي على وجهي إلى نار شبت بي هوَ و جسمي.
يعني هوَ راح يتزوجني النفس السبب إلى خلاك تتقرب النيروز؟
تقريباً
بسسسسس ليشششش شنووووو أنتقامكم وياااناااا.
هذا بس إلى اگدر احچي زواجكم مصلحة أنتقام
لا أكثر ف أنتبهي لأن علكتي نفسج ويا واحد مو أي واحد.
سده مني و أني أحاول أستوعب كل كلامه وگفت أفتر بالغرفة
حايرة لأزمة راسي و افرگ بصدري اهدئي غياهب لازم.
تفكرين بكل خطوة تخطيها عوفي التسرع بجهة خابرتني
نيروز حجيتلها كلشي و أنغلت على سبتهم حد ما فوخت گلبها.
نيروز: شگددد نذلينننن
غياهب: غياهب ما لازم حنين تعرف بشي اياج و تچفصين بشي أمها إذا سئلتج
لعد شگول؟
گولي طلع مو أخوه و لازم تسوين هالشي أعرف دنجذب بس ما عندنا غير حل حالياً.
أرسلان مهددج مو؟
زاد حقدي أتجاها من أتذكر بذاك اليوم بشنو ساومني.
ما اگدر أسحب نفسي من هذا الزواج الله يلعنه.
شگددد سافللل بشنو هددج.
گعدت و أيدي لازالت لأزمة جهة گلبي إلى دگاته
ما منتظمة غمضت عيوني بيأس و أردف بالحقيقة.
هددني بحنين و درغام.
شدا تحچين غياهب شدخلهم هم
أتمنى يبقى هذا السر بينا، حنين إذا عرفت راح
يخرب كلشي و هوَ عقد أتفاق ويايَّ.
غياهب بشنو هددط فهمني الله ينتقم منهم.
نزلت دموعي بتعب و بقلة حيلة.
هددني بحال إذا ما قبلت بهذا الزواج راح يتزوج حنين
و يكسر درغام بيها مو بس هيج ياريت بس هيج.
نيروز أنطاني ورقة بيها تلفيق تهمة على درغام
و يگدرون يسجنونه و يفصلونه من وظيفته.
هذااا من كل عقله؟ لاااااا مستحيلل
ما أگدر أشوف اختي متزوجة هذا الشخص لأن يمكن
يعذبها و تكون ضحية الشي احنا لحد الآن ما نعرفه
و لا اگدر أسمحله يكسر گلب درغام و يهدم حلمه
إلي من سنين يحلم بي و شاف الويل حد ما وصله.
غياهب لازم تحچين الدرغام كلشي أيييي ماكو غير حل.
ماااا اگدرررى أفهمينييي نيروز الحچي سهل بس التطبيق مو.
من صالحي العواقب راح تكون موذية أضعاف من أذيتي بالوقت الحالي.
شنو يعني راح تتزوجينه
لازم، أعرف سبب أنتقامهم هذا من منو و ليش أحنا.
-خايفة عليج منه والله
مثل ما وصيتج لا تحسسين أحد بشي الخاطري.
ليش ما تحجين الأبوج شوفي قبل فترة حچيتله منو إلى حاول يقتل...
سكتت ما مكملة كلامها طلعت من عالم مصيبتي و سئلتها بعدم فهم.
شحجيتي الأبوية
هيج لا تهتمين
احچي نيروز تقصدين منو إلى حاول يقتله؟
اتافأفأت و هيَّ تجاوبني.
أيي
يعني أنتِ تعرفين منو إلى حاول يقتل أبوية و بقيتي ساكتة.
لا والله مو هيج غياهب بس من عرفت بسرعة أجيت حچيتله بس هوَ ما قبل نحچي الأحد
شتقصدين ما قبل نحچي الأحد ليش أكو أحد غيرج
رماد شاهد على كلشي صار و شاف المجرم
منو؟
ابوج طلب ما نحچي شي
يابه دحجي موووو طحنتيني طحن
أمج زمُرد.
طبكت حواجبي من كلامها و كأنما صاعقة نزلت صعقتني
و لا ممكن أتخيلت و لا شوية تكون هيَّ كل إلى أبالي چان جدي سالم.
ش. شلون يعني زمُرد.
هيَّ إلى حاولت تقتل عمو سلطان بذاك اليوم و الله يعلم ليش
بعدين نحجي.
سديته منها نزلت طايرة مفرفحة الأبوية وگفت گدام
الباب دگيته أكثر من مرة عاضة شفتي إلى راح تنگطم
لأن كاتمة غضبي أنفتح الباب چان نايم لأن الوقت متأخر.
سلطان: غياهب خيرج بابا.
غياهب: أنتَ ليش ما گتلي زمُرد هيَّ إلى حاولت تقتلك.
أعتلت ملامح الصدمة وجهه سحبني من أيدي دخلني الداخل غرفته و سد الباب.
ممنوع يطلع شي
لااااا يطلععع هاي رادت تموووتك.
صوتج لا تعلينه غياااهب
ليشش ساكتلهاا ليشش
أكو شي أبالي ما ساكتلها بس يصير راح تاخذ جزاتها التسرع إلى عندج غيري بابا.
ضربت وجهي بقهر.
يااا تسرع راح أفقد عقلي هاي المرأة مصرة تبقى تأذي بيناااا
تاخذ جزاتها بابا حبيبتي بس شهادة رماد ما تكفي لازم أكو دليل قوي يثبت
وهذااا رماد ليش بقر ساكت.
تهدد و رماد عمره صغير شتريدي يسوي الخوف ركبه لأن هددته بأمه.
أتقربت اله حضنته بخوف بكل قوتي بس حسيت.
راح تجيني حالتي إلى الكلام يبقى ما يطلع و لا اگدر أسوي شي مسد على شعري.
لا تخافين بابا.
ما اگدر احچي شي غمضت عيوني مختنگة شهگت
بصوت عالي بعدني عنه لازمني يباوعلي بقلق بس شاف حالتي.
أهدي بابا.
گعدني يغسل بوجهي و أيديَّ ضربتني البرودة يله گدرت
أتنفس طبيعي و أرجع الوضعي الطبيعي
و الرجفة بعدها ملازمتني.
حضني الصدرة و هوَ يگول.
شسوي الچ بعد شسووووي بس گليلي ما بقى
دكتور ما أخذتج اله ما گدرت أطيبج من هالحالة.
أدري بي ينقهر من تجيني هل الحالة لأن أعراضها
تصير عندي ضيق بالتنفس و تصيبني رجفة بكل جسمي
ما اگدر احجي شي بس عيوني تبقى مفتوحة و كل هذا بسبب
طفولتي من الصغر هالحالة و بقت ملازمتني لليوم غمضت عيوني
بسبب الخدر إلى أحتل جسمي، حضنه هذا يذكرني
شلون چان بصغري يحضني و ينومني بصفه.
للصبح فتحت عيوني شفت نفسي بغرفته نايمة جسمي مكسر
لميت شعري لأن راجعة حركتي الطبيعية طلعت شفت حنين گاعدة.
حنين: شعندج بغرفة أبوية.
غياهب: چنت نايمة بيها
شعجب
يمكن حبيت أجدد ذكريات الطفولة.
شصار؟
بشنو.
باوعت للباب و رجعت باوعتلي.
ارسلان و عمر
هاا أييي ماطلع بينهم قرابة
صدگ؟
أيي.
إلي طمني أنها راح تصدگني حنين مشايفة شكل عمر ما أدري
هم غريب نيروز تعرفه من زمان بس حنين و لا مرة شايفته.
أووووف أرتاحيت البارحة كله ما نمت من التفكير
و أنقهرت والله خفت أرسلانو يطلع اخوه صدگ.
أبتسمت بوجها، طلع أبوية من المطبخ.
سلطان: يله بنياتي تعالن نتريگ اليوم الريوگ من أيدي.
باوعت الحنين هزيت راسي بيأس منها.
غياهب: لِچ شوگت تتعلمين الطبخ هسه هذا ريوگ هم ما تعرفيله.
حنين: ما أحب المطبخ اوعع البيض يلزگ بأيدي.
ضحك بابا غسلت و تريگنا سوا اباوعلهم هاي جمعتي
وياهم ما باقي شي و أتصير ذكريات لزمت كوب الچاي أشرب
و عيوني لا زالت عليهم دگ جهاز أبوية فتح خط لي ما أعرف منو بالضبط.
سلطان: أهلاً أبني. الحمدلله أنتَ شلونك. الله يحفظك أي بالبيت. مو مشكلة حياك الله بأي وقت.
سده منه و گال.
-هذا أرسلان اليوم راح يجي النا.
بدون تفكير گتله.
-شعنده جاي؟
رجع الاكل إلى بايده و باوعلي مستغرب من تصرفي لأن حجيت بنتر.
عادي بابا عندج مشكلة يعني بجيته.
لا عادي بس مجرد سؤال، و يعني شعجب لأن
أمس خطوبتنا عيب كل يوم يمنا هسه الناس شتگول.
لا مابيها شي زوجك بالحلال، راح يجي يتعشى هنا.
اومأت ساكتة مر اليوم عادي نفس الروتين بس خالتي
خابرت تطمن عني و سئلت شوكت أبلش اجهز بس أجلت
الموضوع لأن عقلي ضرب من زوجي دخل أبوية
وياه خالي عمران اتفاجئت حضنته مشتاقتله.
غياهب: صاير بذات
عمران: حبيبة خالو دوام و حقج، بس أمس ما فوتت خطوبتج.
المهم شفناك مو مهم الخطوبة
-لا شلون مو مهم هههههههه خوش مختارة
دتقلد أدري بي خلقته مال مجرمين.
حنين: شگد ذوقج معفن هذا أرسلانو الصاك.
ضحك خالي بصوت بسبب كلامها أشرلها بايظه اجته تركض حضنها.
عمران: أم السان.
أبوية ساكت بس يباوعلنا هم صح رجعت علاقتهم
و أحنا ندخل الهم و يدخلون النا بس أبوية يكول عمران
هواية علاقته تغيرت من الماضي لليوم ما رجعت مثل
قبل بسبب موضوعه هوَ و خالة وجدان الا خالي جابر ما اهتزت علاقته بأبوية.
حنين: خالو أني دا أشفق على هذا أرسلان
عمران: ليش.
-راح يتزوج غياهب لا هيَّ من الناس إلى تعرف تحجي.
حجي حلو و لا من الناس إلى تعرف تتلاطف شكد خطية.
غياهب: أحب إلى يتقبلني مثل ما أني ليش أبقى أتصنع غير شخصية.
-هسه أحنا مدنگول هيج بس بيوم الخطبة عبالك ماخذينج و حاكمينج مؤبد.
عمران: أحنا منطينه جوهرة ثمينة مو اي أحد هاي محاميتنا غياهب سلطان.
ضحكنا قدمنا ضيافة ما بقى هواية و نهض من مكانه.
غياهب: بعد وگت خالو عليك الله أبقى بعد ما شبعنا منك
غير مرة حبيبتي عندي شغل و أجيت اشوفجن صارلي فترة ما شايفجن زين.
عيوني صارت على أبوية تحسه يريد يحجي و يگله
أبقى بس متردد بس بالاخير نطف ما سكت تحمحم و طلب منه.
سلطان: ابو نيروز خليك يمنا اليوم مو طلعة هاي و خطيب غياهب هم راح يجي.
أبتسم خالي أبتسامة أتوقع جبر و تسليك بدون ما يباوعله.
عمران: غير مرة أن شاء الله الجنايات هواية سلملي عليه.
راح خالي رجعنا ضايجين أكثر شي مفرح النا من يجون خالي جابر و عمران النا هم بس الزينين و علاقتنا قوية بيهم، أما الباقين عكسهم خصوصاً عمامي الله يحبني إذا أحبهم لأن غاسلة أيدي منهم.
سلطان: الولد راح يجي.
غياهب: هلا بيه.
ويا أذان المغرب دخل علينا وگف يسلم على أبوية
و حنين واگفة فرحانة بجيته اتسائل لو بيوم عرفت هددني بيها شنو موقفها وياه.
أرسلان: شلونها أم روح الحلوة
حنين: هههههه بخير وانتَ
مثل كل يوم.
يعني شلون؟
يعني بخير عايشين الحمدلله.
هااا مو اني ما أعرف هيج شغلات من أحد يحجي بالالغاز.
أبتسم بوجها ودار بعيونه ناحيتي.
أرسلان: شلونج ست غياهب.
ست؟ ست بعينك هسه لو بيدي ألزمه و بصوندة
شرط يابسة أگطعها عليه أبتسمت مجاملة اله.
غياهب: أهلاً أرسلان.
دخل جوا و أحنا مجهزين كلشي وحنين شيشلعها من يمهم همستلها.
لِچ گوومي.
أوف ما أريد روحي أنتِ ما أحب المطبخ و قبل شوية بدلت و تعطرت
ما تخرب أناقتج.
عود من تكملين أطي أنقل الاكل
متعبة نفسج والله.
أيست منها رحت وحدي أكمل شغلي الحقيرة عبالك زوجها
إلي جاي و ما شايفته من سنين، اندگ جرس البيت طلع أبوية
سمعت صوته يگول أتفضلي منو هاي؟ أبتسمت
شعجب جاية صوت خالتي هذا دخلت إلي.
وجدان: هاا خالاتي شلونه الحَلو المزيون
غياهب: ضايج خالة ضايج.
ياا ليش
هاي حنين الحقيرة عايفتني و مكابلة صخمان و لاكأنما خطيبي و لازم اني اگعد.
گرصتني بزندي بخفه تضحك.
عيب ماما صخمان شنو، زوجج لازم تحترمي.
هسه شمسوية سبينا العنب
يمه من السانج أنا أساعدج.
ههههههه لا روحي اني كملت ما باقي شي بس دزيلي هل الادبسزز.
طلعت وراها بشوية اجت حنين تضحك.
حنين: ماااا اتزوج إلا واحد مثل أرسلان
من حوره غير
خاب دولي و العباس شخصيته تموت و.
بعدها ما مكملة و أنكبست من أجه صوت درغام.
درغام: هذا منو إلى يموت وشخصيته تموت و هيج مرفرفة جناحاتج عليه.
حنين: أنتَ شوگت أجيت و منو فتحلك الباب.
هسه ما جاوبتي سؤالي منو هذا
منو
أبو الشخصية إلى تموت
هاا دا احچي عن خطيب غياهب
وانتِ گلتيها خطيب غياهب مو خطيبج و هيج تحچين عنه.
صارت مشاحنات بالكلام بينهم و واحد خازر الثاني.
وانتَ شكو ضايج نسيبي مو غريب
أثكلي حنين الثكل مريود.
أبوية ما عنده اعتراض احچي هيج
هوووو شدمرنا غير أبوج عمي سلطان فاتح المجال الچن
والله يا الله شبيها هاي الناس
و ما عاجبج بعد؟
أدخلت بالنص لأن الواضح راح بتمالخون
و درغام.
دخن فد مرة و هاي ثولة ما تعرف تتصرف.
غياهب: درغام شلونك
درغام: هلا.
شو سلامك من طرف خشمك
أسكتي عني غياهب أسكتي
سكتنا يأبه هسه شحچينا.
طلعت حنين وگف يمي مقهور بأن من ملامحه.
أريد أسب أختج و مستحي منج
أحترم نفسك تسب أبوية
لا أسب زمُرد الحية.
أصبر عليها درغام إلى يريد الحلو يتحمل المر
ما أتشوفين تصرفاتها و شلون تحچي عن أرسلان.
قلبت عيوني بملل.
هسه أنتَ تغار من أرسلان
چا شبيه مو رجال.
لا ما أقصد هيج بس هو خطيب أختها.
ولچ انا أغار عليها من أبوج من تحضن و تبوس بي.
لا تحمى علينا ترا المطبخ حار.
ما أحس غير أجتني غمه لطش بنص گصتي.
غياهب: گصتي شبعت غم منك
درغام: تستاهلين، همزين ارسلان ما عنده سالفة
خطبت بنت عمك و أختك جان حتى شغلي بطلت منه إلا هاي السالفة.
عنده ذوق و أخلاق عود
شو چنج ما مامقتعة لي غياهب
لا شلون ما مقتنعة لعد شلون وافقت عليه
خلي نروح يم نسيبنا.
غياهب: درغام تخيل بعد فترة تگعد ويا خطيب حنين.
صفن بوجهي كاتمة ضحكتي على شكله شلون صار.
درغام: ليش حنين جاينها خطابة.
هم ما أجوا بس سمعت نسوان بخطوبتي يحچن عنها و هاي
صدگ تحچين لو تشاقين
شبيك خوية مشاقية وياك قبل بهيج أمور وياك.
و هيَّ شگالت
ما گالت شي بس الله يعلم يمكم توافق إذا خطبها خوش ولد.
علمود أشگه و أحرگ أهله.
سنة الحياة بعد
سنة النعل أحسن لا تحرگبن بگلبي باجر مولي الدوامي.
دخلت حنين سكتنا و عيونها تخزر بدرغام و هوَ نفس الحالة
نقلنا كلشي و ألتمينا على سفرة وحدة طلع أبوية إلى مخابره هوَ و خالتي يجون.
درغام: شوگت تلتحق أرسلان
أرسلان: ذني الأيام
ورايَّ بكم يوم يله مجاهد يمي.
رفع راسه يتسائل.
أرسلان: طبخ منو هذا.
جاوبته خالتي.
وجدان: طبخ غياهب.
ها ما شاء الله طيب عاشت أيدها
غياهب: شكراً.
غمزلي بدون لا أحد ينتبه.
يعني راح نشبع أكلات طيبة من ايدج عن قريب.
ما فهمت؟
شبك أيديه الإثنين مثبتهن على الميز و عيونه ثبتهن
ناحيتي يمكن منتظر أيشوف ردت فعلي.
أرسلان: إذا ما عندكم مشكلة حاب من أرجع من دوامي نتزوج.
عضيت شفتي ألزم نفسي ما أگوم أحط الصحن براسه.
سلطان: مو چنك مستعجل
أرسلان: إذا ماكو شي يعرقلنا ليش نتأخر عمي
براحتك أتفقوا أنتَ و غياهب بهذا الموضوع.
كملنا و گعدوا بعدها خالتي طلبت من درغام يوصلها للبيت
إلى خلص الگعدة بس يخزر بحنين طلع الكل بقينا بس أني و أرسلان.
غياهب: شيسمون هذاااا تصرررفك
أرسلان: شبيه يا أنسه
الف مرة گتلك بطل هالكلمة.
سريعة الأشتعال أنتِ.
أبتسمت رافعه حواجبي.
أكيد وصلك خبر و أجيت.
مد أيده يلزم شعري ابتعدت عنه.
أممم خبر شنو
لا أتسوي نفسك غشيم.
دخل أبوية رأستاً بدون مقدمات وگف قريب منه و طلب منه.
أرسلان: إذا ما عندك أعتراض أو مشكلة اگدر أخذ خطيبتي منكم ما نتأخر.
أتجحظت عيوني بسبب طلبه شنو هل الجرئة إلى عنده المشكلة.
أعرف ب أبوية يوافق لأن مرتاح اله لزمت جبيني أباوعلهم
سلطان: براحتك بس لا تتأخرون.
هز براسه و هنا ما اگدر أرفض و أفشل أبوية لو وحدي
چان عرفت شسوي، طلعت وياه و ما باقي شي الرأس السنة
و ندخل بسنة جديدة، صعدت وياه ساكتة من شفت
أبتعدنا عن بيتنا ألتفتت اله احچي بنفاذ صبرر.
غياهب: ويننن أتريددد تووووصل.
أرسلان: صوتج
مشكلتك صوتك، و مشكلتي تصرفاتك
جيد.
لا بعد ما اگدر أتحمل الوضع صار ما ينطاق.
شحسيت من مدخل بأنتقامك بنات وين رجوولتك بالموضوع
لا تچفصين
انتَ لو فعلاً رجال چان ما التجأت بأنتقامك البنات ما ألهم أي صلة.
دار عيونه عليَّ إلى نطت بشكل مُخيف.
لا شلون ما الچن أي صلة، چا أنتن مو بنات هاي العائلة.
شبيك أبني؟
كلمة أبني جديدة نضيفها القاموس
لاااااا تغيرررر المووووضوع أرسسلان
بلاعيمج راح أتطگ على كيفج صوتج راح
الله يااااخذك
وانتِ ويايَّ
أخوووك يحب نيروز ترررا
أدري
بس هيَّ ما تدري.
شنو رأيج نزوجهم بعد زواجنا.
تحلموووون تشوفون أظفر منهااا بعد ما شفت حقيقتكم
ولك أنتَ شنو من بشر خليت أخوووك يستغل بنيه والله
إذا ما أخذ حقهاااا من نص عينك انا أعلمككك و لااا عبالك
بسسس حچي ثقققق بالله هالكلام رااااح يصيررر أفعاااال.
الحب أعمى
نكته تضحك.
كاااافي لغيتي شگددددد
أبقى ألغي و غصباً عليك و رجعنييي يلااااا للبيت
مو إذا ما تسكتين أسكتج بطريقتي الخاصة
أموع بيبي من الخوف
كااااافي غيااااهب.
ونبي ماااا أسكت رجعتي يلاااا
أستغفرلله
أييي دكثر يمعود كثر أستغفار بلگي الله يهديك ولو شيهدي من واحد مثلك
ترا أبوسج إذا ما تسكتين
أتقرب و شوف شسوي إذا ما خليت راسك بهاي الجامة.
سكت بعد ما حچى و عيونه بالطريق و أني أحس فحطت من گد
ما حچيت نزلنا يم الجسر طبكت حواجبي شمعرفه أحب اجي هنا باوعتله.
ليش أجينا هنا؟
أشمرج من الجسر.
غياهب: أنتَ جبتها النفسك بعد.
نزلت گدامه وگفت أباوع للمكان و الجو بارد وگف بصفي.
تحبين هذا المكان
ما يخصك
أعرف كلشي تحبينه
الجذب يخرخر و تريدني أصدگ واحد مثلك.
تجربين
أشمرك منا؟ أيييييي عادي
مو السان بيكيسي
شتعرف عني.
بعدت الشعر عن وجهي اباوعله بحقد و أرجف من عصبيتي.
أرسلان: جريئة ذكية بس عندج تسرع مرات ما تفكرين بنفسج
المهم عندج تكملين الشي إلى أتريدي عصبية تحبين
اللون الأسود تحبين تقرين كُتب، مو هواية تفضلين
الأختلاط تضحين بكلشي علمود عائلتج.
بقيت صافنة هذا شلون يعرف كل هذا أردفت بعدم أستيعاب.
انتَ وين تعرف كل هذا؟
ما يخصج
تسويها وحدة بوحدة
أممم
راح تعذبني مو.
بقى ساكت ما أنطاني جواب أبتسمت.
بس صدگني أني راح أعذبك أضعاف من عذابك إلي.
جيد
شتعرف بعد عني.
ركز بنظراته نزل عيونه على أيديَّ أتقرب إلى لزم
أيدي رفع ردن القميص جسمي كله أتشنج مسح
بأبهام اصبعه بهدوء على الآثار الموجودة.
و أعرف تكرهين هاي الآثار.
بلعت ريگي و گلبي خفقان صار بي.
انتَ وين تعرف هاي الآثار؟ ش. شلون أندليت مكانهااا؟