رواية مرواد الظلمة الجزء الثاني للكاتبة هيلانا الفصل السادس عشر
جنت متوقعة ريم بس أجياد صار كدام خالة وما خلاها تفتح الباب كالي بأمر وهو يلزم أيدي
: -يلا زينب
وخالة لزمت ايدة توخرها كلب أعيونة بملل والباب الدكة صارت قوية وسمعنه صوت رجال غريب كال
: -عمي اهل البيت مو هنا
اعتقد ديسأل جيرانة عاد خالة خزرتنه وكالت فوتوا جوة واشوف منو بالباب ونتفاهم
دخلنا جوة سحبت اجياد من ايدة لزمني بالباب بمعنى وين جان عينه على باب كتلة بضحكة
: -تعاااال للغرفتي فوك.
شو هذا باوعلي بنظرات مدري شلونها مو راحة بس اني ما اهتميت جنت اريدة يصعد
فوك خفت خاف عمي إلى اجة رغم الصوت غريب بس اني لازمة كلبي بيدي ودوم خايفة
صعدنة فوك سديت الباب وهو جان يباوع بالغرفة ويفتر بقيت مرتكية على باب عيوني عليه
شگد مشتاقتلة صار هواي ما شايفته وجهه ضعفان ومتغير التفتلي وابتسم
: -شلونج
: -ما ادري وانت
تقرب وكف كدامي صارت عيونة بعيوني
تنهد وكال: -هم ما ادري بس من شفتچ ارتاحيت.
-: من وين عرفت مكانة
: -من واحد
: -عمي اعكاب صح
: -لا الزمال دكيته دك وماكالي
: -لعد
: -واحد صاحب أعكاب جان موجود من بسطت اعكاب وهو كالي مكانج لو ما حاجي مسگط اعگاب جوة ايدي
: -لا خطية تدري لو ما هو جان سائد كتلني
من ذكرت اسم سائد عگش وجهه وكز على سنونة بحقد: -واااالله شاربي مو عليه اذا ما أندمة لهذا النعال يكتل أبن خوي ويخطفج واسكتلة
: -ب...
حط ايدة على حلكي وحجة بحدة.
: -لا والحسن مو رجال اذا ما خذت حگي وهذا عمج الهو ولدة الا أمحي اثرهم بالعباس ما خليلهم ذكر
خفت منه من شفتة عصبي عود حجيت أهدي مبتعدة شوي عنه
: -باع هي أختهم ويعني صح مو حق ولا عدل وحرام إلى صار بس العرض غالي شتتوقع يسون
: -بيهم خير ياخذون حگهم مني اذا هيج همة زلم بس يكتلون طفل؟ لج بابة طفل بالقران انعل والديهم وانت شكووو ماااخذينچ
: -يعني همة لان بت عمهم وهيج سائد اجة اخذني.
اني خايفة وما اريد احد يموت بعد حاولت أمتص غضبة بس هو وين نار زكح بيه
: -شنييي ورث من الخلفوهم وياخذونچ
سكتت بقيت أفرك بدية وهو مسح على وجهه باوعلي وركز بعيوني توترت حجيت اكسر سكوتة
: -ليش أجيت هسه يبقون يدورون علينا ويكتلوك هم
: -يكتلني سائد؟ تقرب مني وحجة بسخرية
: -لو بي خير چا حفظ عرضة
وخرت لان جان كلش قريب علية وحسيت هالقرب مو تمام ورحت كعدت على طرف الجرباية.
وهو حط ايدة على خصرة والثانية يمسح على شواربة ومتعصب خوفنني بقيت ساكته.
رباب:
نزلنا وهو لزم ايدي بكل حب إلى يشوفة يكول يحبها هو ما ميت عليه عندة غاية متاكدة منه
وكفت وراة وهو دك الباب مرتين وماكو رجع دكة قوي وهم محد يفتح الباب
جان رجال بشارع راجع من السوك يمكن جيرانهم صاح عليه نبيل كالة
: -عمي اهل البيت مو هنا
رد عليه الرجال: -اي هنا ام ريم موجودة خاف نايمين دكة قوي
هز راسة بمتنان للحجي ورجع دكة قوي وماكو احد ولا حس ولا خبر انا كيفت بعبي كلت بلكي محد.
يفتح ونرجع بس خابت امالي من فتحته حجية
طلعت وكفت يم الباب
هلت بينة ونبيل اكلها اكل بالسلام
هنوب التفت عليه كالي
: - تعاي روب
تقدمت وكفت بصفة كالت بستغراب
: -تفضلوا خالة رايدن منو عليمن جاين
كالها: -جاين على زينب
ضغط على زندي واشرلي احجي كتلها
: -خالة انااا بت عمي زينب جاية عليها كليلها رباب بالباب
: -صار، وتفضلوا جوة
طبينه كعدنة جوة بالاستقبال وهو ماكعد ضال وكف الحجية راحت وهو التفتلي كالي بحزم.
: -سلمي على بت عمج وذبيلج جم دمعة وكليلها جنت بالسجن واهلي ذبوني هناك حتى يخلصون مني حتى تصدك بيج وتأمن من جهتج خوش دكيلها اليتمة
: -واذا ما صدكت
: -اتصدك
: -جااا نكول ما صدكت
ما احس غير رجع عليه لزمني من فكي بغضب
: -مسوليتج تقنعينها والا تتتتدرين شسسسوي هسه
وخر عني وحجة بملل: -مو من شيمي امد ايدي على مراة ولا تخليني امد ايدي عليج صيري عاقلة
: -تمام بس المهم اشوف ابني بخير.
زينب:
انفتح الباب ودخلت خالة هو باوعلها بستفهام واني هم كمت بسرعة كالت
: -هاي ابنية هنا دكول اسمها رباب بت عمج
انصدمت واجياد طلع أسلاحة وخالة رجعت ليورة بخوف كالها
: -منو جاي وياها
: -زلمة غريب ما اعرفه
: -ابقن انتن هنا
اخذ مسدسة ونزل واني ما اخذني صبر نزلت وراه
هو توة دينزل التفتت لكاني وراه أني وخالة هم نزلت خزرني رجعت خطوة
: -شكوووو نازلة
: -موو وياك خاف تحتاجني.
باوعلي هيج بنظرة مال واحد يكلي وانت شتكدرين تسوين
ما اهتميت مشيت وراه لاستقبال هو وكف من لمح الرجال ورجع وكف يم الحايط أبتسم بخبث وحجة مثل للي يحاجي روحة
: -أجيت والله جابك
ما أفتهمت شي منه بس التفتلي وأشرلي أفوت أستغربت تصرفة بس
دفعت الباب على كيفي ودخلت أني وخالة شفت رباب كاعدة ويمها زلمة غريب اول مره اشوفة جان واكف
من شافني ابتسمت و ملامحها مستبشرة هي كامت بسرعة عيونها مدمعة فتتت.
حضنتني بقيت حاضنتها وعيني على هذا رجال واجياد ورة الباب ما داخل ما ادري شنو منتظر وشدا يسوي
كالت بلهفة
: -شلونج شخبارج زينب وابنيي أبني شلونة وينه فدوة كلبي طاك عليه اردن اشوفنة
الچم كلبي وما ادري شگلها جان هذا الزلمة الغريب وياها بثواني طلع مسدس وخلا براسي جمدت هيج
بالحظات وهي شهكت ذيج الشهگة انصدمت عاطت بي: -شسووووي نبيل شبيييك
خلة السلاح براسي ولزمني من ايدي كلي بتلاعب
: -الحلوة زنوبة احتاجهااا.
ارتبكت ما اعرف شسوي عيوني على الشباك ماكدر التفتت وراي وخالة هادئة وتباوع للباب وترجع
عيونها للنبيل بس رباب انخبصت: -اااااننتت مو كتلي ماااتااذي زينب بس توصل لاجياد
كتلها بخيبة: -هم غدرتيني مرة لخ
رباب: -والله ودعت أبني هدددني كالي يكتلج أنتِ وابني ووافقت كال يريد يوصل لاجياد عن طريق...
قاطعها هو بعصبية: -بسسس صوتج و أنتِ تجين وياي وبعدين نتفاهم ويه اجيادج انشوف شلون يريد أندزج اله مشوي على فحم لو مرك
جفلت من سمعت صوت اجياد كالة برود
: -لا مشوي احب المشوي وراح اسويك مشوي اليوم وأشوي على اذانك بصل ابن الكلاش
طكة على راسة بالمسدس ورجال تگود من طاح اني عبالي طگة جيلة بس هو رگعة بطرف المسدس على الگوگة مال راسة من ورة
بدون ما نفهم شكو دخلوا ولد اثنين كالهم
: -اخذوا للسيارة.
اجواا يطلعون من الباب ورباب حجت بسرعة
: -البيت مراقب
اجياد: -منو مراقبج
رباب: -الامن اكو ناس مراقبينه ودازينهم وراي هسه اذا تتطلع يشوفنكم
اجياد كالهم بامر
: -نعبر من السطح على الجيران ومناك للشارع
التفت علية
: -يلا زينب
ورباب حجت بهمة: -وين أبني زينب خلي ناخذة ونطلع قبل لا يجون
بقيت أباوع بوجهه حرت شگلها ردت بسرعة
: -اااااشبيج صافنه وينه بالغرفة ااانا اجيبة
: -رباب اريد اكلج شي قبل لا اروح.
: -شوفي هسه مو وكت حجي خلى انروح وياكم اني وابني انااا هم ما اريدن ارجع يمهم اهلي
: -بس اصبري افهمج
: -وج زينب مو وكت سوالفج وين ابني كليلي اخذة وانتي روحي قبلي الحك...
حرت ماادري شكلها بس ادموعي واجياد مستعجل يردنة نمشي جان عاط بيها
: -ابنج ماااات
هو كال هيج لو هي تخبلت: - شنووو ماااات شلووون ماااات هاااا شموتة
كتلها بدموع: -مااادري بس والله ال...
قاطعتني ترجف وعاطت بوجهي: - مو جان مابي شيييي زينبب اااحجي شني صار عندة جفاف لان ما رضع من صدري مو لو شني هااا هاااا شموتة الله عليج كليلي جذببب لاااااا ابوس ايدج
جانت منهارة لزمنتني من ايدي وتحجي ودموعها تتطافر وتلوم بنفسها دكلي خاف مات صار عندة جفاف ما تدري اخوها القاتل موتة كالها اجياد
: -الك اخوج كتلة خوش وهسه أمشن يلااا.
سحبني من ايدي ورباب هم صعد كدامنه واحنا وراه جنت لازمة بيد رباب وهي رايحة بغير عالم وتبجي ودكول يمه سودة عليه مات وما شفته ولا شبعت منه والله اجيييت علمودة والله هددوني بي واجيت طلع ميت ويضحكون عليه
جانت منهارة طفرنة من سطح بيت خالة على سطح الجيران واالبيوت جانت بيت على بيت والطفرة سهله
درنة على شارع ولگينه سيارة منتظرتنه صعدنة وطول الطريق رباب تبجي وجسمها كله يرجف.
مادري بردنة لو من الصدمة واجياد نزع قمصلته ولبسهااا الها
مشينة مسافة قليلة وما نشوف الا سيارات الشرطة ورانة عاد أجياد فتح الجامة وصاح على جماعته بالسيارة الثانية
: - دوسلها
السيارة طارت وكلشي بالطريق يضربة مايوكف جنت متشبثة بالباب و أصابعي زرك من الشد على الباب ورباب هم
احس أنفاسي متكسرة خوب الطسات يطفرهن طفر كل طفرة احنا هم ننشال ونرگع راسي مرتين نضرب بالقمارة.
ورانا تلث سيارات بس شلون حسوا بينا وليش اصلا ديلحگونة
من السرعة حسيت راح ننكلب ونموت صحت على اجياد بهلع
: -ااااااجياااااد راح اااااتموتنة
بس هو ما التفتلي ابد
عينه كدام وفكه مشدود
إيده على الستيرن وعيونة بالمراية كل شوي يباوع وراه ضيعهم لو لا بس همة ورانا
بنص الطريق أفترقنا وجماعته راحوا من غير فرع واحنا كملنا بنفس الشارع.
التفتت وراي أباوع سيارة وحدنة ودخلنا بدرابين اول مره اشوفها وراها صعدنة الشارع العام
بدون ما نوگف بس ضيعناهم وهو بعدة على نفس السرعة واني جسمي كله يرجف
عبالك طلعنا من حلك الموت هسه ماكو هيج حياة وضياع إلى كاعد أنعيشة
أحس كلبي دا يدگ مو بصدري لا بحلگي كل دگة تخنكني أكثر
إيدي بعدها متيبسة على الباب حتى من خفّف السرعة ما كدريت أرخّي أصابعي
عبالك الخوف صار لازك بجلدي
ما يريد يعوفني.
أحاول أتنفس زين بس صدري بس ما جاي اسيطر على انفاسي
كل عضلة بجسمي توجعني من كثر ما أنرگعت بالباب من الرعب
من انتظار الموت اللي جان واكف فوك راسي ثواني ويرجع يبتعد
أبلع ريگي بصعوبة حلگي ناشف أباوع للشارع كدامنا السيارات تمشي طبيعي و بسطيات مخضر على طريق مفتوحة وضحكات وحياة
وأني أحس نفسي جاية من عالم ثاني من مكان ما بي غير الموت والدم وكل يوم منهزمين.
ما تعرف منو يريدك كل يوم واحد لاحگك تشرد من الدولة لو من اعمامك لو منين
رفعت عيوني على إجياد بدون ما أحچي
براسي ألف سؤال
ليش
شنو صار
وين وصلنا
وإلى متى نبقى هيج
بس ما طلع صوت جنت أحس نفسي مو زينب اللي أعرفها هاي وحدة ثانية وحدة انكسرت نوخذت وما رجعت مثل قبل
داخلي شي انباك وانسحب شي انطفى وشي ثاني مظلم كل يوم يكبر بداخلي
و خوف ما يشبه الخوف ووعي يوجع إنو الحياة ممكن تنتهي بأي ثانية بدون إنذار.
دموعي نزلت بدون ما أحس مسحتها بسرعة بس جسمي فضحني رجفة خفيفة بإيدي بنفسي بجتافي.
حسيت نفسي تعبانة مو تعب جسدي
لا روحي تعبانة.
تعبانة من الركض من الخوف بدون سبب
واضح من كلشي ما لحگت أفرح بجيتة
رجعنا لنفس الوضع القديم والشي الاسوء ويانا ضابط شرطة حتى تكمل السبحة اجياد خطف ضابط شرطة
الحمدلله ختمنه كل انواع الجرائم ما ضل شي
كل التهم لافية يمنة
وگفنة عالشارع العام فجأة بدون إنذار السيارة طفت وحدهة كتلة.
: - شنو صار
: -السيارة أنطتتچ عمرها
گالها ببرود و نزل بسرعة فتح البنيد باوع ثواني وبعدين سدة كأنو يعرف من البداية ماكو أمل
السيارات تمر من يمنة ما توكف أشرلهم محد وكف واني ورباب وكفين وساندة رباب إلى كوة واكفة
بعدنة واكفين واجياد لمح رجال واكف على جهه الثانية عندة سيارة حمل
محمّلة صناديك خس واضح عليه يريد يطلع. إجياد راحله بخطوات ثابتة حچي وياه.
بس ما ادري شكالة أنوب على سريع طلع محفظته عد فلوس بسرعة وحطها بيده
الرجال تردد بالبداية وبعدين أخذهن
فتح باب السيارة والتفتت علينا اشرلنا نجي
أخذت رباب وعبرنة الشارع كال
: - اصعدي.
وأني بعدني ما مستوعبة شنو دا يصير ريحة الخس ضربت خشمي باردة وبيه تراب
منعشة بشكل غريب مقارنة بريحة الفشك والجيلات والخوف
كعدنة بالصدر واجياد يسوق اني بصفة بنص ورباب يم الباب ومخلية راسها على باب وعيونها.
علي شارع فاصلة كلش عنه واجياد جان ماخذلة راس خس ومخلي كدامة على الدشبول
مشينة مسافة ولزم بيدة. يد يسوق بيه والثانية لازم الراس بيه ياكل بي
انوب كله تراب وهو عادي متولي گرط باوعلي ومدة إلى بمعنى تاكلين هذا من كل عقلة
هزيت راسي ب لا وهو كمل ياكل هذا اجياد يمكن شاخط وعلى شو اني بديت اشك بي
وجهه هادئ بشكل يخوف عيونه مثبتة عالشارع كدامنا باردة فارغة ولا عبالك منهزمين
كتلة بصوت مهزوز
: -ما خايف
: -من شنو.
: -من الموت او السجن يعني ماخايف تموت
التفتلي بنظرة سريعة وكال
: - لا بس أخاف إنتِ تموتين
ردة جان غريب وحسنني بشعور ما أدري شلون اوصفة كتلة
: - ليش هيج مستهان بروحك
جاوب بهدوء
: -بالعكس مهتم بروحي
: -ما داشوف هالشي مساع اجيت تموتنة
: -جااا غير هالمهتم بيج شلون ما أشوفين
صفنت أستوعب كلامة واجتني لحظه ادراك خجلني بجوابة سويت روحي ما أفتهمت كلامة ودرت وجهي على رباب
ردت اسولف وياها بس البنية فاصلة كلش.
بقينه ساكتين لحد ما وصلنا
للمنطقة ريفية والطريق طينة بحيث السيارة كوة تمشي
من وصلنا نزلنا نبيل شالوا الولد وخلاه بوحدة من الغرف وإحنا أخذنا الغرفة الثانية
ورباب جانت ساكتة سكوت مو طبيعي حاولت أواسيها أحچي وياها
بس ولا كلمة طلعت منها كسرت خاطري خطية بعدها طفلة وبعدها شايلة ذنب أكبر من عمرها.
غلطت إي بس تلوعت هواي وانكسرت هواي وحتى ابنها ما لحگت تحضنه زين.
ما أدري الغلط منها لو من اللي قشمرها باسم الحب وبالأخير مات وخلاها وحدها تواجه كلشي.
لو من البيئة لو من أهل ما جانوا إلها حضن ولا أمان فخلّوها تضيع نفسها بدون ما يحسون.
أني مقتنعة ومتأكدة أغلب البنات اللي يغلطون مو لأنهم مو خوش بنات او تايهات
لا لأن مهملات مكسورات محتاجات اهتمام ما إجاهن
لو أهلها مهتمين لو متابعينها جان ما طلعت عن الطريق جان ما تقشمرت جان حافظت على نفسها.
بس بعض البيوت ما تعلّم بناتها شلون يحمون نفسهم كلشي غلط كلشي عيب وكلة خوف نكتلج نموتج
وهيج الخوف يخليها تسكت وما تحجي
حتى اذا غلطت.
رباب نامت وأني سويت اكل لكيت الثلاجة بيه مسواك يعني مجهز كلشي
يلا أحسن من كش ماكو قلمت البتنجان وهو دخل كفكف اردانة وأخذة السجينة من أيدي كال
: -جيبي أگمل بمگانج
: -تمام رايحة أسوي تمن
سويت تمن أصفر وهو گلة بتنجان ماادري شگاعد نخبط بس اي شي يتاكل ناكلة وخلص
رفعت عيوني الة مركز على بتنجانة كتلة
: -أني أسفة
ضيق عيونك بشك
: -على شني
: -لان ماكدريت أسوي شي ولا حميت جود بس حاولت والله ما تدري بمعزتة عندي.
: -ادري
كالها ورجع سكت. حسيتة مهموم ومالة خلك مزاجة مو مثل قبل
: -ليش أجيت
: -غير على أحسابچ
: -يعني ليش على أحسابي
رفع السجينة بيدة وكلبها على ظهرها أبتسم ورجع دنك كمل
وراها أجو واحد من جماعتة إلى جانوا ويانا الصبح وهو طلع بقيت وحدي كملت العشة وصعدت رباب اكعدها ما قبلت تنزل تاكل شگد حاولت وياها بس هي معتگفة على نفسها
رجعت بالصالة دخلي السفرة وفزيت على صوت اجياد يصيح گمت بسرعة طلعت للباب جان لازم مسدسة.
وصاير نار يسب ويشتم كلشي ما فتهمت منة بس فشاير و غلط. خفت لا اكو شي صار
خليت ورجعت اكمل الاكل بس سمعت صوت السياره يعني مشة، شوية ودخل اجياد
جان وجهه معبس توترت وگلبي يركع بصدري حجيت بتلعثم
-: شكو شبيك
-: ماكو شي
-: هذا الصياح والحجي كله وماكو شي صدك تحجي
حجة بحدة: -من أكلج ماكو شي يعني ماكو مفهوم
مسح وجهه بجف ايدة بضيق مر من يمي فات جوة دنك أخذ سويج سيارة وطلع تفاجت شبي صدك يحجي.
ركضت ورا قبل لا يصعد لزمت ايده كلبي ما مرتاح لتفتلي بدون مايرد
- وين رايح شكوو خوفتني
شال أيدة وخلة وجهي بين أدي همس بحنان عكس وجهه المعتگف
-: أنتِ تعرفين شنو أنتِ بالنسبة إلى مو
رجف كلبي. هزيت راسي تنهد وجر نفس صافن بعيوني وخر مبتعد
وصعد سيارته وحرك فهيت شبي وين راح
رجعت جوة كعدت حتى ما تعشيت نفسي أنسدت
احس عندي مشاعر الة بحيث من اشوفة ضايج هم أضوج حتى أكل ماأكدر اكل.
وما رجع لحد ثاني يوم
بالليل كلش لنومة
يالة رجع جنت كاعدة بالصالة مددة و لازمة مراية بيدي اباوع لوجهي شلون صاير و الهي روحي من تفكير
نفتح الباب ودخل جان ايدة ملفوفة أستغربت باوعلي بنظرات ماتفسر وبعدين فات جوة
بقيت مفهية شبي هذا يربي
رحتلة حضرتلة الاكل واخذتة جان مبدل ومغسل وكاعد يدخن حطيت الاكل كدامة
: -هذا عشاك
كعدت يمه اكبالة اريد أفهم شكو الصراحة ما مرتاحة وهم هو وجهه ما يتفسر أربكني.
بس هو قافل ما يحجي بس كل ما ارفع راسي الكاه صافن بية
: -شبيها أيدك
-: كلشي مابيها
-: شنو كلشي مابيها لعد المن لافها
-: ماكو شي لايضل بالج
-: مو طلعت بسرعة وجنت معصب اكو شيء
: - سالفة بالشغل لا تفكرين
: -زين وهذا نبيل وين وديتة
: -للجهنم
كالها بسخرية حجيت بجدية
: -صدك اجياد شسويت بي
: -موجود
: -ليش أخذتة
: -هو جان يدور عليه واجيتة برجلية ما اريدن أتعبة
: -همة ليش يدورون عليك
من كتلة هيج عاف الاكل وهمس.
: -أحسلج ما تعرفين
: -شنو السبب
: -احسن
: -لا ضم عليه احجيلي يعني شراح اعيش اكثر من هذا
: -يجوز اذا حجيتلج تگرهيني
: -لا ما أكرهك بالعكس أنتِ وكفت وياي والله وگفتك إلى من لحمي ودمي ما سواها
حجة ببتسامة: -ترى انا هم من لحمچ ودمچ غير ابن عمج
: -لا ابن عم أبوي
: -نفس المسلتة
: -لا أقارب من بعيد
ضحكت وهو هم ضحك كمل وگام واني لحكتة ورة مالميت السفرة.
جان نايم بفراشة على ظهرة ومخلي ايدة فوك عيونة مارفع راسة ولا باوعلي اجيت بصفة
حاولت أسحب منه كلام بس هو ما يسولف بعدنة كاعدين وأندك الباب
حيل بعصبية فز أجياد وطلع يفتحة واني وراه
وكفت يم الدرج مجمدة واني أشوفها
بنية أول مره أشوفها متوسطة بالعمر صوتها تصيح و تشتم ماخلت شيء ما گالتة
نگلبت فد مرة وتلعلع علية كدامة هاي منين تعرفني وهيج تحجي عليه أنوب كله فشاير.
أستحيت كالها بحدة وهو يدفعها من الباب عود يريد يطلعها حتى ما أسمع كالها بحدة
: -بت المطي شجابج هنا
نترت ايدهة منه وطاكه عيونها وتنفخ من العصبية
: - ااانت لو بيك خير ما تسوي بينه هيج علمود هاي الس
صاح بيه بصوت عصبي كاسح جرها من زنده نحنت بوجع: - كاااافي الصمي ماريد امد ايدي عليج
تخبلت كامت تضرب بي على صدرة وتعاب بي وتشتم بيه من تفشر عليه يتخبل
اخر شي دفعها لباب
: - أطيح حظكم كلكم علمودهة.
ردت بحقد -: اييي غير الك مالتك
-: اشرف منج
-: اييي چي خلتك تنام وياها صارت شريفه
جاااا على شني مخليهاا بيتك
وكف شعر راسي من كلامها ضاع الكلام وماعرف شحجي وهي ما خلت غلطة عليه
طلعت لباب وهي تهد وترد وتتوعد لتفت عليه شافتني واكفة نظراتها حاقدة وعيونها حمر
أخذها من أيدها للسيارة واكو واحد منتظرها برا وهي تصيح
-: والله خطيتنا بركبتج ياااا سافلة
صعدها بالسيارة وكالها برود.
: - يضربج مرض واذا اجيتي هنا بعد أكسر رجليج
رجع حجة على الولد الواگف
: -شلون تخليها تجي
كالة: -والله اكلت كلبي الا تجي
: -مابيكم خير زلم ز
أخذها ذاك الرجال ومشة واني بعدني بمكاني
ما فهمت شنو شكو منو هاي أصلا
ومنين تعرفني رجع عليه كالي بأسف
: -ما ادري شگلج بس والله أطيح حظها اذا جابت اسمج بعد على السانها
: -هي منو هاي
جر نفس وكال
: -بعدين أحجيلج مو هسه.
: -فدوة لا دكلي هاي مرتك وجايتنه لا تصدمني اااحس وراك اهواي اسوالف
: -لااا يمعودة يا زواج
: -احلف
: -بالقران ما مزوج شبيج
: -لعد منو هاي هااا ومنين تعرفني وليش هيج تتطعن بشرفي
حك خدة ووتنهد حسيته ما يريد يحجي كال
: -مو هسه بس ان شاءلله أحجيلج
: -ااااحجي هسه شعندددك
: -اريددد ااانطمر تعبان نفسي لعبانة لا تلحين وياي
: -ااذاااا هيج تعباااان ومالك خلكي ليش جبتني ماااعفتني هناك.
: لان مااااكدر يا بشر ماااكدر اعوفنچ هناك اريدددج كدام عينييي
: -اييييي ليش
: -مو شغلج ولا تلحين تكفريني من تلحين
عفته وصعدت يم رباب لگيتها نايمه كعدت يمه ضجت والله حيرة يربي منو هاي أنوب.
رباب:
مرات الوجوه تتغير وماتگدر تشوفها مثل جمالها قبل. مثل الألفة و الحنية
وشلون بلحظة مثل البساط تنسحب حياتك بحيث ماتگدر تستوعب
ما أدري شلون بعدني أتنفس وشلون واگفة على رجليّة
ابني مات الجزء الوحيد النظيف بحياتي
الجزء البري مني.
جنت كل ما أحس بضياع أفرح نفسي وأگول باچر أطلع وأنجمع بابني وأرتاح.
وأخوي هو اللي كتله طفل ماله ذنب أخذوا بذنبي.
أنا الغلطانة.
إي أعرف أنا اللي حبلت بدون زواج.
أنا اللي كسرت عيونهم وشرفهم
سمعتهم صارت بالكاع من وراي أدري.
جان كتلوني بس ليش ابني يدفع ثمن غلطتي
شنو ذنبه
أحس روحي متلوعة مو مستوعبة سائد يكتله
سائد أكثر واحد جان هادئ وحنين علينا.
شلون صار بهالقسوة والبشاعة
صح غلطت بس والله ما أستاهل كل هالعذاب.
گمت گوة من الفراش وأحس الكاع تفتر بيه
إيدي ترعش راسي يريد ينفجر من الوجع غربة فضيعة بروحي. استندت ومشيت ويا الحايط
فتحت الباب.
طلعت أريد أنزل بس دايخة الدرج يروح يمين يسار يمكن لأن ما آكل هيج جسمي راخت.
گعدت على أول باية وخليت راسي بين رجلية
گمت أبچي تعبت
والله أريد الوجع اللي بروحي يهدى. مر وقت هواي فززني صوت زينب رفعت راسي وعيوني مغوشة من دموع.
: -حبيبتي رباب شوكت گعدتي
: -هسه
: - ليش گاعدة هنا الجو بارد يروحي كومي.
ما رديت بقت تحوس يمي وتسأل وأنا ساكتة منزلة راسي على رجليّه ودموعي يوكعن مثل المطر.
عفتها تحچي وگمت مشيت ويا الحايط گوة وأحس جسمي راخي وتعبانة. فتت للمطبخ وفتحت الباب الخارجي وطلعت.
گعدت على الگرسي بالحديقة مبلل من ماي المطر والحديقة فايضة وصوت الماي ينزل من البوري فوك.
شلون يرتاح كلبي شلون تطفى نيران كلبي ليش
ما كاعد أكره أخواني على السوة بيّه
بعدني أحن لهم وأحن لنفسي القديمة جزعت من الحزن أريد أبچي مشتاگة لأهلي ولحياتي حتى رياض والله مشتاگتله.
شهگت وگمت أبچي بصوت عالي خرمشت صدري وأنا أحاول أتنفس ضاگت الوسيعة بي مختنگة وأحس ماكو هوء
لحد ما إجت زينب حضنتني وبقت تبچي وياي وتتأسفلي على موت ابني
أنا أعرف هي ما بيدها شي أدري بيه ما تقصر وكلشي تسوي علمودي بس هذا حظنا من الدنيا.
گومتني وفتنا گعدنا بالمطبخ سوتلي جاي وصبت كلاص خلتّه گدامي مالي نفس والله.
أريد أموت وأرتاح لو ضالة بالسجن ولا طالعة.
بقت يمي وتسولفلي هواي سوالف تحاول تلهيني وتخفف عني بس أنا مخنوگة من البيت أحس يخنگني وتطلع روحي.
گمت رجعت لغرفة بقيت أفتر ما أكدر أنام حتى بالليل ما أگدر أنام.
مرت أيام وأيام وأنا على هالحالة
حتى نوم ما أكدر أنام
مليت جزعت كلش ما طايقة شي وأجياد گالي دافنه بالنجف ومسمينه جود.
انعصر كلبي أكو غصة بكلبي شگبرها أريد أروح للنجف.
وراها بكم يوم گلت لزينب وهي قنعت أجياد ياخذنا للنجف.
فبيوم گال ياخذنا صادف العصر كلش گال نروح لبسنا ومشينا للسيارة جنت ساكتة وگضيت الطريق.
أباوع من الجام ومطلعة إيدي من الجام
ما حسّيت إلا شي يندس بي من متني.
فزيت وأثوب ليش أنا شوكت نمت
معقولة انداريت عليها
گالت
: -صح النوم حبيبتي.
: - ليش أنا نمت
: - راح نوصل وإنتِ نايمة.
: - ما حسّيت والله مدري تعبانة.
: - ارتاحيتي گسرتي نعاسچ
: - إي.
رجعت رگيت راسي على الكشن مغمضة عيوني عندي خمول وتعب مو طبيعي ما أگدر أشيل ماعون من الكاع.
وصلنا هناك بالليل وكبل للمكبرة شفت الگبر
أجياد گال هذا
فرفح كلبي عبالك اليوم مدفون گطعت نفسي وبچيت هواي.
عاتبته هواي گلتله أنا جنت منتظرة أطلع من السجن وآخذك ونشرد تالي يعوف أمّه ويروح للتربان
گتله كوم ويه أمك أنا إجيتك يعزيز كلبي والله جنت أتخيل نفسي اكبر وهو يصيرلي سند وتچوة.
بس ولا شي من هذا راح من ايدي وما جنت ام زينه الة ليش رب العالمين اأنطى إلى وأخذة مني
أحس نتهيت وراسي صفّة من الوجع ودايخة گوة كومني أجياد وأخذنا لمرقد الإمام على عليه السلام.
أول ما دخلنا التفتيش بعدها للحضرة شعور رهيب ورائحة مختلفة ما أعرف تحس المكان راحة نفسية.
كد ما جنت مهمومة والحسرة متكسرة بكلبي من زرته ارتاحيت من بعده طلعت گعدت قريب على الحضرة.
منتظرتهم لأن زينب بقت جوة كل واحد يبچي على ضيم كلبه.
أنوب إجوا وأجياد جابلنا أكل محد أكل بس زينب شوية أكلت
ورجعنا بالطريق.
طبّينا البيت الصبح كلش وأنا كبل الفراش نمت بملابسي بس الحذاء هو اللي نزعتّه زينب إلي.
نسحبت للفراش ما نمت أباوع بالسگف بصمت تام أحس كلبي يوجعني حطّيت إيدي على صدري أضغط عليه.
أنا تايهة كلبي يبچي دم بدل عيوني حياتي تمر گدامي دمّرت نفسي ودمّرت كل الناس وياي.
غمضت عيوني بقوة ما أريد أذگّر شي حرگت راسي بتشتّت بلعت ريگي بغصة
وجهي شاحب تعبانة حتى من الهواء اللي آخذه تعبانة من نفسي أريد أنام وما أكعد.
ليش باقية عايشة ولشنو ضلّيت باقية أدولب وحدي من مكان لمكان
محتلّني شعور باهت هادئ محزن
شعور غربة فضيع
مرت الأيام باهتة ونبيل أدري بيه عند أجياد بس شيريد منه وين أخذه ما أدري وما اهتمّيت ولا سألت أصلًا.
لأن ما عندي شي أخاف عليه ولا شي أفكر بي بعد بس أريد أرتاح شوي والوجع يهدى.
گمت أحچي ويا نفسي كل يوم أبچي وأدوخ وأنام.
أبچي هواي وأدوخ وأنام
صارت دموعي تواسيني ونوحي يسلّيني وصرخاتي تونّسني وتزيح من وجعي.
حتى الأرق راح جنت ما أگدر أنام هسه گمت أدوخ من البچي وأنام
رجفت من نسمات الهواء الباردة تسرب من الشباك المفتوح على النص
بردت أطرافي بس مالي حيل أتحرك أسدّه أحس نفسي جثة باقية بس جسد.
ثقل على صدري وخنگة گارهة نفسي أحس روحي عبء على الناس ما أريد شفقتهم ولا منتهم عليه
عاجزة ما أگدر أسوي شي من داخلي فراغ وبرودة.
أنعس بس نوم يجافيني إلا أبچي إلا أنام صداع ما يفارگني وروحي لايعة.
ثاني يوم الصبح نفضت البطانية وگمت جسمي يننّ عليه من وجع ومرارة بحلگي. باوعت على الجرباية
ماكو زينب هي تنام يمي كل يوم ما موجودة نزلت جوة وأنا أدور مالها أثر.
رحت للباب لكيته مقفول من برا لعد وينهم اثنينهم
ماكو.
رجعت بيأس بعد ما حاولت وياه وما انفتح باوعت برجاء للبيت بملل رجعت صعدت فوك
بالليل كلش رجعوا وزينب ما حجت وين جانوا كالت رحت جبت ملابس النا واجياد أخذني
وراها أجو جماعة ومبين جماعة أجياد جانوا كاعدين بالصالة وزينب بالمطبخ راحت تسويلهم جاي
جنت كاعدة على اول باية باالدرج أشوفهم بس ما يشوفوني وملتهين يسولفون بينهم
واحد. منهم كال لاجياد
: -لو جاي على الكهوة.
رد عليه بملل: -الوضع خطر مو مال كهوة شوفلنا مكان ثاني ننجمع بي بعد
: -صار تدلل
رجع كالة بهدوء
-: شسويت علمود بت عمك
: -شبيها
شد أنتباهي من سمعتة كال
: -ليش ما تفكر تستفاد منها وهددهم بيهه وكلهم جيبهم حتى هذا النقيب نجيبة بيها لان مبين مهتم بيه خليت الشباب يجبولي أخبارة وحتى بيته و اهله كلشي يخصه صار عدنة واذا تحب نصفي لان حك خشمه علينا.
من سمعت الگلام أحس ما بقت بيه روح يعني عوزي مصايب فوك ضيمي تدنيت اباوع
رفع راسه الة وعيونه تجدح حجة بحدة
: -البنية بت عمي وعرضي شلون هيج تفكر هيج انااا ناقص وأسويهه شتخربط انت بس النقيب اي مفكر بيه اناااا لازم نصفي
-: ايي واني شكايل هسه كتلك أستفاد منه مطول عندك والا شلون نجيبة نحتاج طعم
قبل لا يگمل عاط بي
: -كااااافي سد حلككك نجيبة بدون طعم وهالخرابيط سهلة شغلتة يجي.
ذاك مبين شخص مهم ومقرب والة تاثير على اجياد بس اجياد أتخبل منه
كام وكالة برود
-: يضربك مرض لمصلحتك أحجي
-: دنعل ابو مصلحتي
رجع كعد على گرسي يدخن و يمسح على وجهه
وذاك الرجال رجع كالة
: - يعني هسه أني كتلك سويلها شي بس مجرد أعلام حتى تجيب سائد والنقيب بيه وهيج نسحب الملف من أيدهم ويطلعوك من التهم مثل الشعرة لا صير غشيم يا خوية وهم نصفيهم
واجياد ما جاوبة فكام ذاك عافهم وراح بقوو بس همه رجعت لغرفة.
بسرعه كلبي ديرجف والله أحس انهاريت خف يسلمني ل سائد يكتلني لو يرجعني بيد اريان وارجع للسجن
ما ادري تشوشتت ماادري شفكر شسوي ها زين شني أتصرف ما ادري ابقى هنا وأثق بجياد لو لا
لبست حذائي ونزلت أمشي على أطراف أصابعي
شفت زينب ماكو بالمطبخ بس جاي يفور على الطباخ
أخاف مااأكدر أمن ماعدي ثقة بأي أحد بعد إلى صار مريت من يم المطبخ طلعت من باب الخلفي
رحت ركض. امشي وأتلفتتت وراي خاف يلحكوني لو يحسون بيه.
لازم أوصل الشارع ومناك أشوفلي سيارة وأشرد
لان مستحيل ارجع لا لاهلي ولا السجن
وهنا المنطقة مگطوعة وطلعت اركض بدون ما التفت وراي.