رواية مرواد الظلمة الجزء الثاني للكاتبة هيلانا الفصل السابع عشر
رباب:
ركضت و ركضت وكل خطوة أحس روحي اريد أطير وأبتعد
نفسي مگطوع وجسمي يخفك الجوء بارد والكاع طينة لان ماطرة بس ماكو مجال اوكف او أرجع
كل شوي التفت وراي خاف أكو أحد لاحگني
ليش كلشي يصير هيچ ليش كل ما أگول وصلت للنهاية تطلع نهاية أقسى
كل ما كول راح ارتاح أرجع أنتگس
ما عندي ثقة باحد ولا أكدر أثق بعد
هواي أنخذلت وأنطعنت لا إلى حبيتة بي خير ولا أهلي ولا إلى زوجتة كلهم جان الهم مصلحة وياي.
بس أنا وأبني دفعنه الثمن محد غيرنة
مشيت مسافة كلش بعيدة وتعبت حيل
كعدت على جزع نخلة يابسة واحاطة ادية على اركبي أتنفس سريع رفعت راسي أباوع
هاي كيعان مكلوبة وباقي بس التبن معبة بگواني
واكو حاصودات موجودات بس طافيات محد بيهن
بس أضويتهن مشتغلة ومضوية على الگاع كله
كلت أرتاح أشوي وأروحلهم بلكي أشوفلي واحد يوصلني لشارع او السوك
كمت مشيت بتجاهم وصلت يم الحاصودة محد بيه كعدت على الگواني وحدي أتصفن ماكو أحد.
مر وقت تقريبا ساعتين او اكثر وشفت بنات أجن موزرات ومنگبات وبديهن گواني مبينات يردن يلمن أتذكرت اني وعذراء جنه هيجي قبل
الله شلون أيام والله لو ترجع ما اعيد إلى سويتة
ابد فد متندمة گد شعر راسي
شافني واكفة يم حاصودتهم أجني توترت وحدة منهن نزعت انگابها كالت
: -هااا خالة شعدج هنانة
: -العفو حبيبتي بس انا تايهه واريدن اوصل للشارع العام بلكي تشوفيلي واحد من أهلكم يوصلني وادفعلة أجرة الطريق.
أستغربن كلامي وحدة تنوعت بوجه الثانية ردت كالت
: -بت منو أنتِ وشجابج هنانة
حكيت خدي بورطة خاف أكول أسم أبوي وخافن يعرفنه لو شي فكلت أنطيهن اسم مستعار
: -أنا بت رزن وشلون اجيت لهنا سالفة طويلة وانا مستعجلة مااكدر أضيع وقت لازم اروحن تكدرن تساعدني لو أمشي بعدين والله بفلوس مو بلاش
: -لا يمعودة شنهي نمونة هسه أشوفلج واحد من الوليدات يوصلج للشارع تعاي ويانا.
صدك رحت وياهم جان بيتهم طين طبيت كعدت بوحدة من الغرف
وأفرك بدية من كد ما متوترة كل شوي أفز صرت أتخيل أجياد ونبيل واريان وأبوي بكل الوجوه
احس هسه يطلعلي واحد من شي زاوية لحد ما اجت البنية وياه رجال شايب كوة يمشي كالت
: أبوي راحن يوصلج بس لو تباتين يمنه ليلة والصبح روحي
: -لا لا شكرا مستعجلة والله رحمة والديكم
: -بكيفج
هزيتلها راسي بمتنان ورحت ويا جان عندة سوبر صعدت يمه بالصدر والشايب يدخن.
والسيارة كوة تمشي وهو يسولف عليه بس بالي مو ويا اخذت قرار اوجهه مصيري وحدي
بعد ما عندي شي حتى أبني راح هاهيه اريدن أوكف على رجلية وأنقذ نفسي
بعد ماكو مشاعر ماكو ضعف ولا أنتگال على احد أنتگل على الله وعلى نفسي
وصلني الشارع بس شني شارع بالعگب وظلمة وماكو ولا طير حتى سيارات ماكو كالي
: -ها عمي هنانة تنزلين
بقيت صافنه أنزل هنا جا وين أروحن
: -ها. ها عمي متگدر توصلني للولاية مالت الحي.
بلكي هناك أحصلي سيارة ولو راحن أتعبك وياي اذا تكدر
: لا بوية صار
مشة وهو بالطريق سالني شعندي هنا عاد جذبت عليه كتلة أجيت سفرة وبسيارتي وحدي وعطلت
وما اعرف هنا وحرت وين اروح وشفت بناتك بصدفة وأجيتهم
عاد هو أقتنع. التفت عليه يدخن جكارة براس جكارة كتلة
: -أنطيني جكارة عمي
كالي بدهشة
: -أدخنين بوية
هزيت راسي عاد ورثلي وحدة حطيتها بين أشفايفي وسحبت نفس جانت اول مرة.
أتذكر أبوي واخواني دوم يشربون جكاير وخصوصا اذا جانوا عصبين او ضايجين ردت أجربها
ما ادري شجنت أمسلت بس اول نفس اختنكت بي هنوب الثاني لا جريته عدل
وطلعت فد تنطي شعور راحة وانتعاش طيب
اخذت الطريق ادخن واسولف ويا دخنت جكارتين
ونزلني بالولاية تشكرته ونزلت ما انطيته افلوس بس شني صرت اخواردة
كتلة عمي انطيك وهو
ما قبل عاد تشكرتة ورحت.
زينب:
جماعة أجياد هنا واول مرة أشوفهم ذولة مبين أكابرية ولبسهم حلو ومرتب واحد بيهم جبير بالعمر
والبقية لا من عمر أجياد يعني تقريبا مبين هيج فما أدري بعد
كملت الجاي وهو أجة أخذ ورحت للغرفة و بدربي مريت على رباب
كلت أشوفها خطية البنية تمر بفترة سيئة وضعها مو تمام واحسها مو بوعيها تتصرف بدون دراية
دفعت الباب وحجيت
: -رباب...
تفأجت الغرفة خالية ماكو أحد وينها هاي
رحت شفت الحمام مفتوح بابة.
مابي احد رجعت طلعت من باب المطبخ هم ماكو فارغة الحديقة
يربي وينها هاي البنية خاف سوت بنفسها شي أنوب
وينچ رباب
حسّيت بشي بارد يصعد من معدتي لصدري شايفين هذا الشعور اللي يجي قبل المصيبة بثواني
هيج تحس برودة بمعدتك وينقبض كلبك
هو نفسه اجتاحني
رباب مو من النوع اللي تطلع خصوصًا بهالظرف وهي بهالحالة.
خاف سوت بنفسها شي
خاف طلعت وهي مو بوعيها
خاف أحد أخذها.
ادية بردن رجعت للغرفة مرة ثانية دورت باوعت من الشباك ظلمة وين راحت البنية
اجاني صوت اجياد وجماعته جوة
يحچون بهدوء ضحكاتهم خفيفة
أنتظرتهم يرحون بقيت أفتر عبالك أطلك وايدي على صدري وادعي الله كون هسه تتطلع
لحد ما مشوا نزلت ركض شفت اجياد توة دخل ودعهم وفات يقفل بالباب كتلة بسرعة
: اااااجياددد رباب مو هنا
التفتلي مصدوم واني كتلة هيج بنبرة مباشرة صدمت رجال بزايد كال بهمة
: -دورتي البيت شني وين راحت.
: -اااييي خميت البيت كله ماكو ما موجودة
حجة بحدة
: -شلون يعني مو موجودة؟
: -دورت بكل مكان غرفتها والحمام حتى الحديقة ماكو
أتغيّر وجهه شويّة واندار يطلع
: -رايح ادور عليها خاف طلعت برا
هزّيت راسي بسرعة
: -مستحيل تطلع بدون ما تحچي خصوصًا وهي بهالوضع
هو راح يدور عليها وأني بقيت بالباب واكفة دورت قريب على بيت ماكو بقيت كاعدة يم سيارة اجياد برة مرتگية على البنيد وضامة ادية لصدري
فد وحشة وهدوء وقلق نهش كلبي نهش.
احسها طفلة وتلوعت هواي وما تعرف شتسوي
مر وقت واجة اجياد لاگيته بلهفة
: -هااا بشر
: -مالگيتها
: -يربي وين راحت خاف أنخطفت
: -منو يدخل بيتي ويخطفهااا ومحد يدري انا ضامكم هنانة
: -هسه شنسوي
مسح على وجهه ورد بدون نفس
: -شمدريني
: -شبيك اجياد يعني نكعد ونسكت
: -جااا وين ادور عليها فريت العگب فر وسألت كل الفلاحين محد شافها
: -همة وين يعرفوها جان وصفتها الهم
: -يابة وصفتها محد شايفها وكتلهم اذا شفتواها طرشولي خبر.
عفتة ودخلت كعدت جوة وهو اجة كعد يمي اثنينه ساكتين هو يدخن واني مكابلتة سكتة
: -تتوقع منو اخذهة
: -محد
: -لعد وين اختفت
: -يجوز هي راحت من وحدهة
: -معقولة رجعت لاهلها
ما رد صافن على النفاضة كدامة ويدخن مليت خليت وكمت للغرفة ماكدريت انام بقيت افكر بيها وين راحت البنية بهالليل.
رباب:
الشارع فارغ وأصوات بعيدة اول مره اجي للولاية كعدت على رصيف ما ادري وين اروح هسه
ضميت نفسي حطّيت راسي بين رجليّه صدري يصعد وينزل بسرعة مو بس تعب
هذا خوف خام عاري بلا ستر.
هسه وين أروح
الف سؤال براسي يدك مثل بمسمار وكل مرة أدوره يرجع أقسى
ما عندي بيت ما عندي أحد ما عندي مكان أگول عنه هنا آمن
رفعت راسي شوي أباوع بالشارع
سيارات تمر بسرعة وبصدف تجي مو هواي.
من بين هوسه افكاري وعيوني الضايعه تباوع لكل زاوية ودربونة والاضوية مال البيوت
هنيالهم هذول الناس هسه نايمين جوة بيوتهم ودفيانين بعائلة دافية
واني هنا وحدي متجردة
من كلشي
فجأة سمعت صوت خطوات رفعت عيني بحذر شفت مرة جبيرة بالعمر جسمها ممتلي شوي
لابسة عباءة بغدادية سودة قديمة على راسها بطريقة عشوائية. مشيتها بطيئة بس نظرتها حادة.
وكفت كدامي باوعتلي من فوك ليجوة
وبعدين گالت بنبرة مباشرة.
: -شعدج هنا بهل الليل وحدج مامة
فهيت بوجهه شكول كملت بنبرة شك
: - إنتِ ضايعة لو شاردة من أهلچ؟
جسمي تشنج وهزيت راسي ب لا
سكتت شوي بعدين قربت خطوة
: - بنية بحدج مو أمان شنو تسوين وحدچ بهالوقت
مامة
سويت نفسي ما سامعة گمت من مكاني
ومشيت للجهة الثانية
ما أريد أحچي ما أريد أثق بحد ما أريد حتى أسمع بس هي صاحت وراي
: - إذا ما عندچ أحد تعالي يمّي.
: -لا شكرا خالة
ردت كالت.
: -مامة ترى أني ما عندي احد بس بنياتي تبقين الليلة وباچر الصبح تمشين
كلمتها الأخيرة دكت أبالي
تبقين الليلة
كلبي رجف أحساسي يكلي لا بس بنفس الوقت الشارع شبه فارغ ودنيا الليل وين اروح
يجوز رب العالمين لطف بحالي ودزهة الي
رغم هذا اكو شي بداخلي يكلي لا
هززت راسي بهدوء ب لا
ابتسمت وكالت
: - شنو لا تريدين تبقين بهالشارع وحدچ
ما رديت بس كلبي يدگ أقوى
قربت أكثر صوتها صار ناصي.
: - ماماتي حبيبتي مبين عليج منهزمة هواي بنات تنهزم وهنا بشارع نلكها فيأمي. تعالي بس الليلة ترتاحين وباچر روحي وين ما تريدين ولو اني مادري شنو سالفتج بس كسرتي خاطري ودنيا باردة
: -أريد أبقى هنا
: -منتظرة احد
: -لا
: -لعد شلون تبقين هنا ياامي مو امان
هنا على الرصيف بهالجو وبنص هالمنطقة
سكتت شوي بعدين گالت فجأة وبصوت أعلى
: - لا تصيرين غبية حبيبتي
حسّيت نفسي فعلًا مو مال ابقى هنا كلامها خوفني
قتنعت بكلامها.
سكتت داخلي حرب من جه اكول لا ومن جهه اكول بس ليلة عادي
رجليّه وجسمي تعبوا من المقاومة
عقلي صار ثكيل كلت أهدي نفسي
: - بس الليلة عادي
ابتسمت بسرعة
: - إي بس الليلة
رجعت بتردد كلبي ما مرتاح بس جسمي يطلب استراحة بأي ثمن
مشيت وياها وهي بتسمتلي أطمنئي الطريق جان ضيك أزقة متشابكة
ريحة رطوبة مي مجاري حياطين متآكلة
بيوت قديمة شبابيك مكسرة كل خطوة أحس نفسي أبتعد أكثر عن الضوء وأقرب للشي المجهول.
وصلنا لبناية قديمة بابها حديد لونه متگشر فتحت الباب ودخلنا
الدرج ضيك الإضاءة خافتة
أصوات ضحك بنات طالعة من فوك
ضحك بهالوقت كلبي نزل بطني.
من الخوف
طلعنا للطابق الثاني
أول ما فتحت الباب انصدمت.
أربع بنات كلهم حلوات بشكل مكياج طوخ شعر مفتوح ملابس قصيرة وضيكة ضحك عالي
دخان جكاير وأغاني ريحة عطر قوية ممزوجة بشي ثاني خانك
وكفت بمكاني جسمي تجمد العجوز دخلت بثقة وكالت بصوت عالي
: - هاي البنوتة راح تبقى الليلة هنا.
كلهم لفّوا عليّه بنظرات سريعة من فوك ليجوة ابتسامات غريبة فضول مو مريح
وحدة منهم ضحكت
: - هلا والله تفضلي حبيبتي
الثانية گالت بنبرة مزاح
: -جديدة لا بأس بيها حلوة
الكلمة جديدة دگت براسي مثل مطرقة
العجوز قربت منهن وحجت
: - دللوها تعبانة وديرن بالجن عليها
وهن ردن عليها
: -صار خاتون
وبعدين التفتت إليه
: - اكعدي ارتاحي أمي
كلشي بداخلي يكلي أشردي بس هسه أنا بنصهن
رجليّه ثكلن ما تحركن.
گعدت على طرف الفراش الممدود ظهري مستقيم إيدي بحضني أفرك بيهن عيوني أدور بالمكان
أحس نفسي دخلت بمكان غلط شيخلص هاليلة وامشي
وحدة من البنات قربت أنطتني مي
: - اشربي
أخذته بإيد ترجف شربت شوي حلكي ناشف
العجوز راحت للمطبخ البنات بقوا يضحكون ويسولفون
وحدة گعدت بصفي وكالت
: - من وين إنتِ
سكت
: - شنو اسمچ
هم بقيت ساكتة
ضحكت
: -خرسة؟
لفّيت وجهي للجهة الثانية. كلبي يدگ بقوة عيوني تحترك من التعب والخوف والنعاس.
شلون ورطت نفسي بهالمكان
مرت الساعات ثكيلة الباب ينفتح وينسد أصوات رجال تطلع وتدخل من الغرف الثانية
ضحك مصطنع وهمس خطوات
جسمي كله مشدود كل عصب صاحي.
جنت أباوع للباب كل دقيقة
أعد الثواني أريد الصبح يطلع بأي ثمن
العجوز إجتني
: - تعالي هاي غرفة نامي بيها امي
دخلتني غرفة صغيرة بيه جرباية وحدة
بطانية خفيفة ضوء أصفر خافت
: - نامي وباچر تمشين
هزيت راسي ما گدرت أحچي.
أول ما طلعت سديت الباب كعدت على الجرباية ضميت نفسي ظهري للحايط
أذني تسمع كل صوت برا
كلبي دگاته عالية
جسمي يرجف يا ربي بس خلصني من هالليل
ما نمت أغمض عيوني شوي واكعد على
علي صوت ضحك صوت باب صوت همس صوت خطوات. أحس نفسي محبوسة بقفص مو غرفة.
كل دقيقة تمر جانت مثل ساعة
ما غمضلي جفن لحد الصبح رغم النعاس بس جنت انام وارجع أفز
أول خيط ضوء دخل من الشباك حسّيته مثل نجاة. كمت بسرعة لبست حذائي فتحت الباب بهدوء.
طلعت للصالة البنات نايمات متفرقات مكياجهن ملطخ شعرهن منكوش وجوههن تعبانة عبالك جانن بمعركة
و العجوز جانت بالمطبخ
گلت بسرعة
: - أنا أمشي خالة شكرًا.
لفّت عليّه بنظرة غريبة
: - وين
: -شني وين
قربت مني فجأة وحجت
: - لا تستعجلين اكعدي أتريكي وروحي
هززت راسي
: - لا ما أگدر
: - ليش خايفة
سكت، ابتسمت ابتسامة باردة
: - شنو تتوقعين إنو الشارع أأمن من هنا
گلت بحدة بدون ما أحس
: - إي ما مرتاحة اريد امشي
شو هاي ضحكت وكالت.
-: غبية
قربت أكثر وحجت: - اسمعيني هسه روحتچ مو بصالحچ خليچ هنا كم يوم ترتاحين وبعدين نشوفلچ حل
هززت راسي بقوة: - لا ما أريد شكرا
لزمت إيدي فجأة قبضتها قوية أكثر مما توقعت
ولا عبالك عجوز: - ليش مستعجلة شنو خايفة يصير
سحبت إيدي بسرعة كلبي دگ بقوة: - خليني أروح
: - اسمچ شنو
: - مو مهم
: - بالعكس مهم
واحدة من البنات طلعت من الغرفة وكفت تباوع علينا بقلق وهي لتفّت عليها وكالتلها
: - أرجعي نامي
وبعدين رجعت إليه.
: - شوفي أني مو وحدة طيبة لدرجة أخلّي الناس تطلع وتدخل على كيفها إنتِ دخلتي بيتي وهسه لازم نعرف شنو قصتچ
: - ما عندي قصة بس خليني أطلع
ضحكت
: اااحجي مامة
: -شعلييج وخررري
: -ماكو روحة
: -شنييي تمنعنيني
زكحت بيه: -ايي امنعج هذا مكانج ما جبتج لسواد عيونج هنا
علي صوتنه فزن البنات كعدن يتثاوبن ويباوعن علينا خفت وهي صاحت عليهن
: -كومن حاجن المسعدة وعلمنها مالي خلك احطها براسي هسه
رجعت خطوة ورا: - لا لا أنا أمشي.
لزمت الباب وبصوت حاد
: - وين رايحة
: -عوووفيني اررررد ارروحن
لزمتني من ايدي وجرتني للغرفة اتريد أدخلني قبل لا ادخل انفتح باب الرئيسي ودخل شاب ويا ابنية
بس شنو الشاب كلش حلو وهيج تحسه جنتل يشبه الممثلين ذكرني بممثل مصري جنت ملزكة صورتة على الحايط كلش يشبه يخبل وشواربة
صراحة شفت هواي زلم بس مو حلوين اول مرة اشوف زلمة هلكد حلو استغفرلله.
والبنية مجلبة بيدة ما تريد تبقى وهاي العجوز هدتني وراحتلة ركض تتلوك وتصبغ وتهلي بي
كالتلة -: هلة هلة بستر بيتنة
رد عليها بعجرفة-: دوخري لا تلوگين
خاتون-: شذگراك بية ولگ وحنيت
كيان-: لاحنيت و لا صبغت جايبلج امانة خليها يمج فترة و ارجع اخذها
غمزتلة وحجت بخبث: -ها ولك لعبت بالدرابين ونوب طاحت براسك
كيان: -لا عيني لزمي نيتج هاي حبيبة غيث خليها يمج ترة يشلع رموشج وراها.
تغير وجها و باوعتلة بنزعاج و نوب باوعت للبنية بتفحص من راسها لرجليها
دفعها هذا الرجال ليگدام و يوصي بيها ديري بالج عليها
اجة يروح والبنية ركضت وراة لازمه ايدة
كالتلة بخوف
-: وين رايح منو هاي صدك تحجي عايفني لوحدي
كنان: - لاتنعوصين ضلي هنا لحد مايجيج غيث ها صدك شتسألج لا تجاوبين وين جنتي منين ما منين غلسي گليلهم انة خرسة
هو يحجي كدامنه ويكلها كليلهم انه
خرسة وهي ردت عليه بضوجة.
-: شتخربج انت ما اضل هنا ماعرفهة منو ما رتاحيتلها
جانت تقصد العجوز وهو تخوصر ورد عليها بسخرية
كنان -: مو خاطبتج هية روحي استخيري بعد
كالتلة-: كنان لاتشلع گلبي كول لغيث يجي ياخذني يالة
كنان: -مو غيث ماعندة شغل و عمل بس أنتِ بابا عوفي رجال مجلبة بي
-: انتة شعليك راح يخليني على ظهرك
مارد علية فتح الباب يطلع لزمتة بسرعة وهي مفولة كلش من برودة
-: وين مولي كنان.
كنان-: من استلگو اهل كنان وج ضلي هنا رايح اشوف شنو سالفة وارجعلج هودي استجني
-: وعد تجي وشوف غيث وين هم منتظرتك
كنان: اييي بس فگي ياخة عني.
-: امشي ولي سويتها ظلمة ودليلها الله
رگع الباب وراه و مشة تنهدت بضوجة وحجت ويه نفسها شورطني ويا كلشي ما افتهمت منة
رجعت باوعت علينا بخوف والعجوز رحبت بيها وكامت تتلوك وتصبغ بيه ظاهر مهمة.
زينب:
أيام مرت ورباب أختفت شگد دور عليها اجياد خطية بس ماكو
أني ما ادري ليش أحساسي يكلي هي أنهزمت بس حتى لو نكول هي انهزمت وين ممكن اتروح
ولو عند اهلها جان اجياد كال ما بقى يدور عليها
لان سالفة تنخطف لو احد يدخل للبيبت هاي
مستعبدة جداا لان جان اجياد بالبيت وجماعته
يعني إلى يريد يجازف ويدخل هم ينكمش
احس دخت من تفكير وربط المواضيع وماجاي اوصل لنتيجة ابد
جنت بالمطبخ سويت تمن ومركة وخبزت هم.
جهزت الغدة وتغديت وحدي لان اجياد ماكو
ورجعت طلعت كعدت برة اباوع وايدي على خدي احس اختنكت من كعدت البيت ضليت فترة
وفتت جوة ما ادري شسوي طلعت بكرة وكعدت احف بوجهي طلع حلو انوب سويت حواجبي
ولبست دشداشة عندي حمرة جبتهن قبل كم يوم رحت ويه اجياد واشتريتهم
هم رحمة والدي ولا مقصر ويانا
بس اوف رباب مدري وين راحت يربي
لبست حجابي ورتبت نفسي وضليت كاعدة لان ما ادري وين اروح هو بهل بيت
للعصر.
سمعت صوت سيارتة يعني اجة رحت ركض أفتحلة الباب صار وجهي بوجهه لاگيته ببتسامة
بس تفأجت بي وجهه كله دهن ومكفكف اردان قميصة ولازم بيدة دبة ام لتر اعتقد مال دهن
من شافني بقى يباوعلي حتى مال كال سلام عليكم شي شياتين شبي هذا ابتسمت بوجهه وكتلة
: -هلا اااجياد
رد عليه بهيام: -يااا ميت هلا
يربي شبي الرجال وخرت عن الباب حتى يفوت شو جنه فاقد فات وعينه عليه كال
: -هاي شمسوية بروحج
: ها شمسوية.
رد عليه ببتسامة: -طالعة حلوة
: -رحمة والديك
حك لحيتة ومشة صاعد للغرفة واني رجعت حضرت الاكل وحطيت بصل هم بالعشة جنت مشتهية اكل
هو غسل ونزل كعدنة بالمطبخ سوة متكابلين وناكل
علي ساكت
وراها كمت غسلت وسويت جاي وهو سكت من كمل صبيتلة وكعدت يمه أشرب
ونسولف عود أسالة على رباب بس هو يصفن بوجهي كل شوي اخر شي كال
: -اليوم حيل طالعة حلوة
: -يعني أني كل يوم مو حلوة
: -لا هم حلوة بس بيج شي متغير اليوم.
كتلة بغباء واني مكشرة
: - حفيتتت حواجبي ووجهي ولبست احمر بشرفك مو أخبل
رد بهيام: -اي والله تچتلين مو بس تخبلين
: -رحمة والديك
: -لا تتدللين
بقينة ساكتين أنوب رجع كال بهدوء وكنما ديمهد الموضوع وتحس كوة جابر نفسه يحجي عبالك الموضوع صعب عليه كال
: -انت تعرفين أنا شني وهواي صارلج يمي
هزيت راسي بمعنى كمل وياك رد
: -وتدرين شگد مهتم بيج
: -اي والله ما قصرت
: -ايي بس الناس تحجي مگلب وانا ما اريدن حجي يلحوج.
فهمت قصدة كتلة بسرعة بدون ما انطي مجال يكمل
: -يحجون علينا لان عايشين سوة هااا بس لا تريد ترجعني للبغداد لو اخواليي لو اعمامي بعدين ااانت شكوو جبتني اذا يهمك حجي الناس وثاني شي انا م...
حط ايدة على حلگي كاطع كلامي كال بحدة
: -اريد أتزوجج
بقيت فاكه عيوني بعيونة انوب هو مخيط حلكي دوخر ايدك خلي اعبر عن صدمتي
وخر ايدة بهدوء واني ماعرف شكول احس فأجني
لگيت شفتي متوترة وهو عيونة تترقب شراح احجي.
حسيتة مستصعب الكلام أول ما كالة
حجيت برتباك
: -بس اني جنت مزوجة
: جا انا ماادري شني
: -يعني أقصد خاف أهلك ما يقبلون
: -متخصهم السالفة هذا قراري
: -يصير أفكر
كام واخذ جكايرة والجداحة كال وهو طالع
: -فكري بس اريدن نعم ممنوع اسمع لا
فكيت حلكي وهو طلع يااا لعد المن افكر يمه اذا هو حاسم القرار ويريد نعم
بقيت حايرة بين اقبل وبين لا ما متاكدة من مشاعري وما سبق وحبيت احد.
بس من اشوفة افرح وكلبي يطير ومن يضوج اني هم انغث ويا ومن جنت بغداد وهو ماكو كل تفكيري بي معقولة هو هذا الحب
بنفس الوقت هو صاير الامان بالنسبة للي
وهواي ساعدني لو ما هو جان انا هسه بالنجف يرشون عليه ماي ورد
ثاني يوم بالمطبخ دسوي ريوك هو اثنينه موجودين هو لابس يريد يطلع بس ما نحجي
لا هو كال شي ولا اني انوب حتى صباح الخير ما كالي شبي هو هيج يعرضون الزواج.
جان ابن خالي يحبلة وحدة اذكر اختة سولفتلي جايب الها ورد وفرقة تغني وهاي السوالف
شو هذا اجياد ولا يم الرومنسيات حتى عرضة مابي خير خوفني عبالك ديهددني لازم اوفق
انطيته ديشرب على سريع وهو واكف كال بدون ما يباوعلي
: -فكرتي
: -شسالفة ترى البارحة كتلك راح فكر وبالليل نمت هسه كعدت اتريك ورة الريوك افكر
باوعلي بنظرة هيج جنه يكلي شگد سخيفة وخلة وطلع حتى الجاي ما كملة
بس شنو اني صار عندي واهس والله فد فرحانه.
جنت شاكة هو يحبني هسه أتاكدت
قابل هو كاتلة حجي الناس على اساس شلون مهتم بحجي الناس هاي حجة
ركضت كشخت وبدلت ولبست دشداشة بيها احزام
حلوة ومخصرة
عود ذني جبتهن نلببسهن اني ورباب هسه
ضلن بس إلى البس بيهن
أنتظرتة رجع بالليل واني بالمطبخ كاعد أسفط بالماعين طلعتهن ورجعت رتبتهن
حسيت نفسي ام بيت صايرة مثل حبوبتي جانت تحب اماعينه اطلعهن تغسلهن وأضمهن
دكول للخطار. مر من يمي صاعد كالي
: -ها يباا لگيتي وقت تفكرين لا.
كتلة بدون مالتفت
: اي فكرت
: -وشطلع وياج
: -موافقة
ضحك وكال: -يلا على خير
عضيت على شفتي بضوجة يربي شبي هذا رجال دكمز شوي عبر عن فرحتك
شنو على خير مشترين سيارة لو بيت جديد
شوية ونزل جان مبدل والضحكة ماليه وجهه عكس من اجة معبس اجة كعد اكبالي فهيت بوجهه
واني لازمة الماعون أريد اعرف شيريد هيج مبسط كدامي طلع جكارتة حك خشمه بيه انوب ورثهة
: -اي شتردين
: -شنو شريد
: -يعني هاي اسوالفجن النسوان مال العرس.
: -اكلك اجياد
: -كولي
: -انت هم سبق وحبيت شي
: -لا والله ليش
: -اي مبين
: -شني قصدج
: -هيج
: -ااحجي
: -ما ادري تفأجت يعني لا انت بارد لا انت مهتم ولا مو مهتم ما ادري ما افهمك وبعدين شنو سولفنا غير انت تجيب ذهب وملابس وحاضر وغايب واهلك وينهم لو اشلون نزوج مثلا
كال بهتمام: -تدللين جنج على كلهن ماعدا ألاهل
: -ليش عود
: -مو هسه تدرين وضعنا خليها بس يهدى الجو أرتب كلشي
: -لعد ليش ما ننتظر لما يهدى.
: -لان ما ادري شوكت يهدى وانا مستعجل
: -على شنو
: -عليج
: -ليش
: -أحبج يعني ليش هذا هم سؤال؟
ارتبكت كتلة واني شتت عيوني عنه
: -ها رحمة والديك
: -بالعباس راح أسبچ شني رحمة والديك
: -لعد شكلك شتريد
: -يبااا كلشي الجان
كمت بسرعة وكتلة
: -اني نعست وتعبت اليوم من الشغل كملهن بمكاني هاا وتصبح على خير
قبل لا يرد شردت الغرفة يلا نزوج واكلة عود احبك.
احس قراري تمام رغم متخاوفة بس احسن على اقل هيج اصير مرتة وبعد محد الة حق يجي يدور عليه لا عار ولا هاي اسوالفهم الهمجية.
رباب:
مرت الايام وانا على حالي. باقية ابيت هاي العجوز للي اسمها خاتون
ما ادري اذا هو اسمها فعلا لو لقب جبرتني وبقتني هنانة ما خلتني أمشي
والبيت مقبط ماكو فد فلتة هو باب واحد الطبة والطلعة منه
ويوم عن يوم تترسخ ابالي فكرة هذا المكان موزين ورطت نفسي من اجيت
ماعندة مبرر لسوء تصرفي
تعودت على الوضع بس ابد ما مرتاحة. البنات زينات وياي ماعدا الخاتون أتصيح عليه.
ودكلي اكعدي سولفي ويه البنات ترديني أخالطهن بس انا ما اقبل ضالة بالغرفة
البنات سوالفهن موزينه كله فشاير والمشكلة عرفت يشتغلن كاوليات
ماأدخل بشغلهن لحد الان لا انتقدتهن ولا نصحتهن مالي علاقة انا مو عوزي
فزيت على صوت الكلاص نكسر بصفي وگفت الخاتون متخوصرة گلبت عيوني بجزع وقلة
صبر من تصرفاتها-: ياصلاة محمد بدة رحمة الله من صباحيات شتردين
خاتون: تعاي اخذيلج راجدي طراگ منا منا اذا يعجبج.
: -فگي ياخة عني مالي خلگج
-: مالها خلك الست اذا ما فگيت شسوين
: -اااانت شتردين عوفينيي ااااامشي
: -ماااالج طلعة منا
أحس ما ضلي صبر واطفر عليها الزمها من شعرها لافة حجاب فوك الشعر وشاتلة الحاجب
مرفعته خيط هي اعجيز كبل طاحت بالكاع ونمت فوكها بس البنات فرغن بينه وخرني عنها
وحدة منهن اسمها مسرة طكتني راشدي الزمالة
فرت وجهي جفهه بكد جف سعيد جنه زلمة
دفعني للغرفة وقفلن الباب عليه ااااامداني ااانا الزمالة اشلون.
اجيت همة غربة اكو وحدة براسها عقل تجي ويه وحدة غريبة عنها ياعلي دخيلك
الناس وحوش والماعندة احد يستغلوا ويضيع
الامان بس بالعائلة حتى
لو جانت عائلة مفككة حتى لو قاسية بس تبقى هي محطة امان ودفة الك
بقيت احوس بس ما بجيت أتفأجت بروحي اول مره ما أبجي وما أهتز ماادري يمكن احساسي مات على
كد الكتل إلى اكلتة. للعصر كلش الا فتحلي الباب اجت وحدة منهم فتحلي
جانن مسويات عشة ومجمعات بالصالة
كعدت اتعشة وياهن.
وهاي مسرة هم كاعدة تاكل وتخوزر بيه مبينه لوگية مال الخاتون كملنه
عشة وهنه لمن الاكل انوب سبحن وتمكيجن ولبسن اثياب كلش كلش جرئية
مبين عدهن طلعه ومن خلال
كلامهم فهمت اكو حفلة المسؤول ومطربة جاية
وهنه ويه الفرقة يرحن يركصن وماخذهن الواهس ويضحكن وحدة دكلة للثانية
اكو اضباط اكو مسؤولين وهاي دكلها أغمزيلة وذيج دكلها بس يلفتت
جنت بس اباوع بعيوني ما اشارك لعلم الباقيات زينات وياي بس هم ما خالطتهن.
وراها اجت الخاتون مشتت الجمعات طششتهن ضليت لوحدي اشتغل بالمطبخ كملت الماعين
ونظفت البيت وهنة مجمعات بالصالة وحدة تحف للثانية و يعدلن بنفسهن. الخاتون مسوية انذار تريدهن يلجن
وهنة كزاز مو وجوه عدهن وانا من اباوع لروحي تلعب نفسي. شاربي ينحلف بي
اجت الخاتون كالتي بأمر اروح الم الملابس المشرورات
طلعت برة لميت الملابس ورجعت صعدتهن للصالة الفوگ.
بعدني ما نازلة و اجاني صوت الخاتون جوعر من جوة تصيح علية. نزلت.
لگيتها واصلة لنص درج عود جايتني لزمتني من متني و جرتني ليجوة
وخرت منها اعدل بملابسي حجت بأمر
-: گعدي خل بتول تحفلج
رباب-: ليش
خاتون-: يعجبني بكيفي وجهج جنة وجه عابد اكعدددي
ما عرفت منو اصخام بس رديت عليها بحدة
-: شبييج زمخين انا عاجبني ابقى هيج
دفعتني يم بتول اجيت اگوم لزمتني هيام وهمست يم اذني
-: لاتعاندين سمعت عابد جاي والله طلعلج سالفة
و يجنزج
-: شنو بكيفها ما ماريد.
جرتني بتول وهمس بلواتة: امداج عدي وجهج وما اعدلة الفاهية
هيام: تنحنحي رجلج راح يروح يحظي
رباب-: رجل ايش
نزيت على لسعة بخدي و بتول لازمة خيط وتضحك عبست بوجها
نوب لزمتني هيام وبتول تحفلي نزعجت كلش وهنة ماهمهن يضحكن
كوة طلعت روحي منهن. كل ما يشوفني يغمزن و يتشاورن طالعة حلوة وطالعة حلوة
الخاتون طلعت مدري وين ومسرة وياها بقيت بس انا والبنات وهاي البنية الجديدة هم عازلة نفسها عنه.
جانت كعدة حلوة سوالف و ضحك وهنة يتحارشن ما يستقرن
حجت بتول وهية تكرص خدودي
-: يبووو صغيرووونة تخبللل
رباب-: يبووي دوخري شلعتي خدي
هيام-: باع باع هذا كرصتي خدها و نفط حمار لو هههههه تحصللها م، شيصير
رباب: انتن صدك ماتستحن
بتول-: ماسمحلج اهلي ماتعبو علية حتى تجين تكليلي ما استحي تشككين بحيائي
رباب: -نجبييي انتي اكثر وحدة ماتستحي
هيام-: صدك تحجين أنتِ ترة ذني غاطات و طالعات بالملاهي بس كدامج لازمات روحهن.
بتول: خاب احمدي ربج ماسامعة اللفاظ و سوالف گعدي ستقري لا نطگج طگة تخليج تلمين جوالاتج
و تشردين
رباب: ادري انا الفطيرة ويامن احجي
بتول: هههههه تعجبيني رغم هيج مستمرة بصفاء النية ابقي هيج حبيبتي
عفتهن يسولفن ورجعت للغرفة كلت انام جا وين اروح هن مبينه وراهن سهرة ليلة.
زينب:
مر يومين وجاب سيد يعقد النا رجال مستعجل عبالي نماطل بالموضوع كم يوم
وجابلي ذهب وملابس بس شي ما يشبه شي إلى يشوفهن ما يكول نيشان عرس كله كوستمات
وفساتين هاهيه اجيت اكلة لعد بالليل شلبس الك كوستم لو فستان يربي رجال ولا يعرف شي
بس اذا كتلة هسه يكول هاي خفيفة وكلشي تعرف
هو اني صح خفانة وصراحة مو خفانة بس طايرة من الفرحة بس شنو متثگلة كدامة.
هيج بساع بساع بس كتلة نعم فضت راحت بقى بس عقد المحكمة جنت بين فرحانة وبين خايفة
فرحانة لان احس صار عندي سند ورجال مو وحدي بعد ما اخاف مادام هو موجود
وخايفة اخاف تنباك فرحتي خاف يصير شي اعمامي موجودين وما مرتاحة الهم ابد
هو سيد مشة وهو راح يوصلة واني بقيت بملابسي كاشخة ما نزعتهن لحد ما رجع
جنت بغرفتي واكفة اباوع على نفسي بالمراية وهو فات وكف ساكت
جانت اعيونة تحجي بمكانه عن كمية العجاب إلى تشع من عيونة.
تقدم وكف كدامي كال
: -صرتي حلاللي
ابتسمت ونزلت عيني ما اعرف شكلة هو جان مختلف عن حسن الله يرحمه
احسن حتى ب ليلة عرسنه ما حسيت بي شعور حسيته طفل مو رجال احسه مو يمي ابد
عكس اجياد كلشي بي يختلف هو صح ما جاي يعبرلي عن حبة بشكل صحيح بس شنو افعالة سابقتة
تقرب حيل و عينة بعيني حاوطني بأديه خليت ادية فوك ادي حجيت بتوتر
: -باع اجياد احنا بعدنة ما عقدنة محكمة
حطة اصبعه على شفتي وكال
: -اشششش.
تقرب حيل مني عبالي راح يبوسني حطيت ادية على صدرة ودفعته على كيف
غمض أعيونة بقلة صبر كتلة
: -هاااا سالمين بعدنة ما عاقدين
: -أنتِ السالمين شعدج
: -شوف روح نام هسه والصبح أشوفك ان شاءلله
-: تعاي ادفيج الجو بارد
-: لعد البطانية المن صانعينهة اذا انت دفيني
: - تعاي بابا شوفي شلون ترجفين
-: ما ارجف اصلا الغرفة دافية اروح لغرفتك وصير خوش ولد ونام
بس هو وين يسمع لزمني وقربني الة
غمضت عيوني متوترة على خجلانة.
صار نفسة قريب مايفصل بينة اي شيء گلبي ينبض بقوة و بطني مغصتني تنفست بتوتر
حسيت بلممس شفتة على شفتي لحظة و وبتعد شوية. لزگ جسمة بجسمي و خلة اديه على خصري
ماحسيت غير طبع بوسة على كصتي بسرعة وخر سمعت صوت ضحكتة
فتحت عيوني واكف يباوعلي بسخرية گب وجهي من فشلة
اجياد: - ياهي مساع ما تريد أبوسها شوو خ...
صنمت بمكاني اباوعلة بحقد و فشلة كرص خدي ومشة
: -تعاي نتعشى جبتلج عشة وياي.
خليت ادية على وجهي تنفست اهدء عصبت من نفسي شمالني امداني بس والله هو خبيث
رحت وراه مبوزة كعدت وهو فتح الاكل جان جايب هواي شغلات
بس يمزمز ويضحك شكد سخيف
ضليت ساكتة ما حجيت الموقف محرج حيل
جر خدي بصابعة وحجة بضحكة
-: زعلانة الحلوة لان ماحصلت ح
ضربت على ايدة وحجيت بنزعاج
-: وخررر شگالولك علية
عفتة وكمت صاح وراي ما رجعت رحت للغرفة دورتلي دشداشة قصيرة أني أعلمك.
لبستها وحطيت حمرة طوختها كلش وفتحت شعري وطلعت شلون ما أدري
بس حقدت عليه ردت أطلع حگي منه وكفت يم درج وهو جان مكمل عشة وكاعد مادري شيسوي يدخن ويكلب بوراق كدامة كتلة
: -أجياد
رفع راسة شافني هو رجال وضعه أتخردل كبل كام عاد شجعت روحي اكثر وطگيتة بغمزة
رفعت الدشداشة شوي طلعت رجلي و حجيت بضحكة
-: دشوف گيمر مو رجل
بلع ريگة و عيونة علية غمزتلة و طفرت للغرفة لحكني قفلت الباب اضحك
حجة بصوت عالي من ورة الباب.
-: نامي هنا اذا طلعتي اشبعج كتل
: -هههههههه ميخالف اتمدد وانام بس انت شلون تنام الله يساعدك
: -اذا خليت عليج هاي الدشداشة اليوم انا معتب
-: لعد ليش تفشلني قبل أشوي
رد عليه بضحكة-: اذا بيج خير اطلعي وأخذي حگج
-: مو صرت متدين مساع و تباوس بالكصص
دشوف منو يطلع الك
أجاني صوت ضحكتة وأنوب صارت صنتة اكيد مشة
طبعاً ما طلعت طفيت الضوء ونمت
شبيه ما اريد روحي أطلع.