رواية مرواد الظلمة الجزء الثاني للكاتبة هيلانا الفصل السابع والعشرون
الصبح ب 7
طلعت متجه لدوامي وبيدي مبايلي أباوع براسأل ملاك وفاكة عيوني مامصدكة
هي ملاك غير على أساس بكندا شنو ناصرية شنو خطف أتصلت عليها ماكو أكثر من مرة ما جاوبت
سمعت صوت وراي التفت عمو غيث
: -ها اليوم تمشين مغمضة
: -أسفة عمو مستعجلة
صار بصفي دنمشي أبتسمت وأني بداخلي قلقانة وبنفس الوقت ما فتهمت شي من ملاك
: -وين اليوم
: عندي دوام
: -مسويلج خط ليش مشلوع كلبج بتكسيات.
: -أي ان شاءلله أسوي عمو بس تعرف لازم أشوف واحد عرف أمي ما تقبل بي واحد
: -أكو واحد صاحبي أعرفه ياخذ خط أشوفة الكم
: -ياريت والله
أفترقنا يم أبو الصمون هو رايح يشتري صمون وأني كملت لشارع شفت كية أجت أشرتلة صعدت ويا
كله زلم بقيت ساكته ودايرة وجهي على جامة
بس بيه كم كرسسين فارغات
وصلنا قريب على الكلية ووكف حتى يصعد صاح عليه واحد من العبرية ومبين هم طالب ومتأخر
: -خالي تأخرنا حرك
: -بس أقبط.
: -ورانا محاضرات يمعود ما يدخلونا
: -جااا اروح فارغ هسه ربع ساعة
كاموا هم أثنين يحجون ويا والكل لح عليه عندة شغل ومن هالسوالف وهو لطش
عاد شلت جنطتي ودفعت إلى عليه ونزلت كلت خلي أكمل مشي وأني أصلا كاعدة على أعصابي
ما مرتاحة اذا ما أشوف نسوان شي بالكية ما ارتاح
اذا بس شباب صح ما مسوين شي بس هم ما أرتاح
الجو مغيم وينگط سحبت الكبوس على راسي ورجعت أتصل بأأختي.
جنت مدنكة بالمبايل وعبرت الشارع التفت ماكو أحد دريد أعبر على جهه الثانية أكبال بوابة الكلية
وأني مدنكة صوت الهورن صواني التفتت بسرعة وابو السيارة لزم أبريك أجيت أندعم
وهو مد راسة عليه من جامة اجة يعيط بيه بس من شافني وكف ركزت عليه
هذا نفسه ابن جيرانة إلى فشختة نزل من سيارتة وأني درت وجهي ومشيت على سريع بتجاه البوابة
التفتت وراي شفتة رجع على سيارتة.
دخلت من البوابة بسرعة أنفاسي متقطعة وكلبي يدك عيني على المبايل وراسي مليان بأسئلة عن ملاك
وين راحت
ليش ما ترد
شنو صاير وياها هي مو كالت بكندا
عدلت حجابي بسرعة ومسحت وجهي كأنو ما بي شي بس الصراحة
جنت دا أرتجف
صعدت الدرج ركض خفيف صوت خطواتي يضرب على الارضية وصلت للقاعة
الباب نص مفتوح وكفت لحظة، أخذت نفس عميق وبعدين دفعت الباب ودخلت كل العيون التفتت عليه.
والدكتور وكف ديشرح وبيدة قلم نظرته نزلت عليه من فوك لي جوة نظرة باردة حادة
هذا الدكتور جدا حاد ودقيق بالوقت فد نحس
بس شوي يشرح عدل
: - بيش الساعة هسه
صوته هادي بلعت ريكي حاولت أرتب كلامي
: - دكتور آسفة تأخرت بالطريق أزدحامات
: -مو زملائج وياج الكل حاضر بس أنتِ أزدحامات شلون وصلوا قبلج همة
سكتت ما عرفت شجاوب الطلاب بدوا يتهامسون حسيت بالاحراج.
: - المحاضرة تبدي بوقت محدد مو حسب مزاجكم اي تاخير ما أريد إلى يجي متأخر لا يدخل
عيونه ما نزلت من وجهي وهو ديحجي هو رزل الكل وسمع الكل بس شنو بوجهي أني حجيت بصوت خافت
: - آسفة دكتور أخر مرة
بقى ساكت ثواني وبعدين لف وجهه على الطلاب
: - ادخلي
تحركت بسرعة دورت على أقرب مكان كعدت آخر صف تقريباً
بدأ يشرح صوته واضح واثق، كل كلمة محسوبة شخصيته قوية بشكل يخلي الكل ساكتين.
وبمحاضرتة ابد ما نحجي يبقى ساعتين يلغي واحنا مركزين لان نخاف منه
بس أني ولا كلمة دا تدخل راسي الموبايل بيدي ومخليته جوة الستيج كل دقيقة أباوع عليه
ماكو اتصال ماكو رسالة
حسّيت عيني بدت تمتلّي دمعة وكفت على الحافة ضجت لان صيح عليه هالغثة ومنا أختي
ماعرف شصار وياها هسه الا تمشي جان لگينه حل
ما تسمع الكلام هالبنية ابد جنه ولد
عضّيت على شفتي ورفعت راسي أحاول أركز
: -إنتِ.
رفعت عيني بسرعة جان دا يشير عليّه بالقلم أشرت على نفسي بمعنى تقصدني كال
: -إي نعم إنتِ المتأخرة
كل العيون صارت عليه فركت ادية
: - عيدي آخر نقطة شرحتها
سكتت الكلام كله طار من راسي حتى اسمي حسّيت نسيته شنو أخر نقطة ليش هو شنو شرح
ما جنت مركزة ويا باوعت على السبورة فارغة ما مكتوب شي بس الملزمة بيدة ااااف
: - دكتور أني...
: - واضح بالج مو بالمحاضرة وما تدرين وين وصلنا.
نزل القلم على الطاولة بخفة بس الصوت جان كافي يرجفني
: - ليش داخلة إذا ما تركزين على المحاضرة
التفتت وهو يوجهه كلامة للكل بنبرة عصبية
: -ممنوع تتدخل المحاضرة اذا ما تنتبه شكو داخلين اذا على الحضور ما أسجل حضور أني
القاعة ساكتة والكل ماخذ وضع السكوت
حسّيت الدمعة بطرف عيني
نزلت عيني حتى محد يشوفني بقيت أكل بشفتي بقهر
كلمته جانت باردة قاسية كبر لفة عاف القاعة شكبرها ورد عليه والله الا اجيب ماما تشتكيلي عليه.
شنو شاد وياي دحسة هيج طول المحاضرة ما رفعت راسي ابد وهو بس يلغي
واكو كم طالب متفاعلين ويا. حاصرة الدمعة بعيني صدري يوجعني وراسي مليان بس شي واحد
ملاك وينها
مر الوقت وخلصت المحاضرة بس كال أخذوا راحتكم
شلت جنطتي بسرعة ووكفت اول وحدة فتحت الباب
الممر جان فارغ صوت خطواتي بس مسموع لابسة كعب وصوتة قوي
نزلت الدرج بخطوات سريعة ومشيت للكفتريا كلية الهندسة المكان نصه فارغ كم طالب أصوات خفيفة.
ريحة لفات كص مالية المكان
اختارت طاولة بزاوية كعدت، حطيت الجنطة على الكرسي يمي وطلعت الموبايل
اتصلت مرة. مرتين، ثلاثة...
ماكو جواب.
دزيتلها اكثر من مسج ماكو كلش خفت وأصلا ما فهمت شي من كلامها
حطيت المبايل كدامي ماكدريت الزم نفسي
حطيت إيدي على حلكي وانفجرت بالبچي
شفت كم طالب يباوعون عليه دنكت راسي وبس دموعي تهمل
: - السلام عليكم...
صوت رجالي قريب رفعت راسي عيوني حمرة مطعونة من البجي ومليانة دموع التفتت.
هو نفسه ابن جيرانة إلى فشخته ذاك اليوم معقولة يداوم هنا وكف كدامي مستغرب مركز على وجهي
: - شبيج خيرج، ليش تبجين صاير شي وياج شي
هزيت راسي بسرعة
: - لااا لا ماكو شي
: - لا واضح أكو شنو صاير
سكتت ما جاوبت أمسح بدموعي بس العبرة بصدري ماكو فايدة ظل ثواني يباوع عليه وبعدين لف وراح
بعد دقايق رجع بإيده ماي وكهوة
حطهم كدامي بهدوء
: - خذي اشربي.
ما رفعت عيوني جر الكرسي وكعد بصفي بينه مسافة قليلة اجيت أفتح البطل وايدي ترجف
أخذة من ايدي وفتحة أخذت الماي بإيد مرتجفة
منه شربت شوي وخليته كدامي
: - هسه دكليلي شبيج لو لا
سكتت قرب كوب الكهوة مني وخاطة حجة وهو عينه على الكهوة
: - إذا ما تحجين راح أبقى هنا وألح وأزعجج
حجيت بصوت يرجف مخنوك
: -ماكو شي
: -شلون ماكو شي و أنتِ تبجين أحنا مو جيران وأهل ليش ما تحجيلي.
ما جاوبتة كال بشك: ألحجية بيه شي مو وتبجين عليها
هزيت راسي ب لا دك خفيف على الميز
: -أحجيلي شبيج شكو عليمن هالدموع ياهو محاجيج
: - أختي
رفع حواجبه بستفهام
: - شبيها
: - مختفية ما ترد ماكو أي خبر عنها...
بديت أحچي بسرعة أتلخبط بالكلام ودموعي تسبقني كملت بحزن
: - خايفة عليها كلش خايفة ما عندي أحد ما أعرف شسوي وحدي
ظل يستمعلي بدون ما يقاطعني عيونه عليه
كال
: - بس كافي لا تبجين إذا هاي السالفة نحلها أن شاءلله.
رفعت عيوني عليه مقهورة وضايعة
: - شلون
: - نروح للناصرية
: - هااااا
: - أكلج إذا تحسين أكو شي هناك نروح نشوف ونخبر الشرطة نطيهم العنوان
: -بس هي كاتبتلي ذولة الولد إلى وياها ما تعرف مكانهم
: -وين كاتبة الج
مديتلة المبايل أخذة قراءة الرسال حجة وهو يرجعة الي
: -حتى لو جان همة اكيد بنفس المنطقة نقدم بلاغ واحنا ما نندل مكانهم بالضبط بس نعرف المنطقة
: -تتتوقع يساعدونة.
: -طبعاً وهسه أشوفلج الوالد عندة معارف وعلى طريقة ان شاءلله تنحل
أبتسمت مجاملة بوجهه كال
: -هسه أنتِ على هاي تبجين لو جاية كايلتلي
: -مو مستحية منكم من أخر موقف
: -من شگيتي راسي
: -وداعت بابا مو قصدي
: -لا فدوة الج أتصير
: -هسه شنو أكول لماما عن ملاك
: -لا تحجين هسه لحد ما أشوف شنو السالفة أني اروح وياهم ونبقى على أتصال
: -تمام متفقين وشكراً ما تقصر
: -ولو بالخدمة بس أنطيني رقمج حتى أخابرج بالطريق.
طلعت مبايلي رديتلة الرقم وهو كتبة بهالاثناء
شفت الدكتور دخل للكفتريا
توجه للكاشير أخذ كهوة وعينه لفت بالمكان شافني اجت عيني بعينة
وجهه تغيّر لحظة انشد وضيق عيونة مستغرب شبي هذا
نظراته صارت ماعرف أشلونها بس حسيتة ضاج ما أعرف يمكن استغراب لان بالعادة أني ما اكعد وي طلاب ولا أحجي حتى وي زملائي
ظل ثواني يباوع وبعدين أخذ كهوته ومشى
وهو يمر حسّت بنظراته عليه بس ما درتلة بال
أنتبهت عليه يحجي وياي
: -أوصلج للبيت.
: ما تخليني أروح وياك
: -لا أبقي بالبيت وأني عود أخابرج
: - ما أكدر كلبي ما يطاوعني
: - أدري بس وجودج بالبيت مهم خصوصاً يم أمج لا تحسّيها بشي هسه.
سكتت أفرك بدية بحيرة
: - أخاف أخاف يصير بيها شي
: - ما راح يصير شي إن شاءالله وأنا وياهم رايح لا تخافين
: -تمام
وكف أخذ مفاتيحه
: - يلا أوصلج للبيت
: - لا عادي أروح وحدي
: - لا بهالحالة ما أخلّيج تروحين وحدج
ما جادلت كمت وياه وبقى عندي محاضرتين ما أخذتهن.
طلعنا من الكفتريا الجو بعده مغيّم
هوا بارد خفيف وهو يمشي يمه ويخابر بأبو
بين كل خطوة والثانية أباوع عالموبايل
وصلنا للسيارة فتحلي الباب
: - تفضلي
صعدت وهو دار من جهه الثانية مجرد ما شغل وحرك حجة بضحكة
: -اليوم لو ما ستر ربج جا دعمتج
: -أي أعرف ما جنت منتبه
: -أنتبهي بعد لا تعبرين الشارع و أنتِ لازمة مبايلج التفتتي وتاكدي ماكو سيارات وأعبري
: بالي مشدوهه اليوم وما أنتبهت
كال بخبث
: -ليش أنهزمتي من شفتيني.
: -ها لا مو أنهزمت بس يعني جنت مستعجلة على المحاضرة
أبتسم وسكت الطريق كله هدوء وهو بين فترة وفترة يباوع عليه
: - لا تخافين ولا تفكرين
: - شلون ما أخاف هاي أختي
: - أدري بس خليج قوية ان شاءلله ماكو شي
هزيت راسي بتأيد رجع كمل بتوصية: -ديري بالج على أمج لا تحسسيها بشي هسه خلي الموضوع بيناتنا
: - تمام
وكف لحظة عند إشارة المرور لتف عليه
: - أني هسه أوصلج وبوجهي لمركز وعندي واحد أعرفه هناك يساعدنا لا تشيلين هم.
باوعت عليه باستغراب خفيف
: - صدك تعرف أحد
: - إي لا تقلقين أهم شي أهدي ولا تبجين
: - شكراً والله ما أعرف شلون أردها إلك
ضحك ومسح على وجهه باوع على المراية هو راسة بعدة ملفوف
: -ترجعين تفشخيني مرة ثانية
ابتسمت: - لا هاي مستحيل
: - ليش خو خوش ضربة جانت
: - لا تعايرني بيها بعد لو سمحت ترى ابد ما قاصدتك
: - لا فدوة الج بالعكس خليها ذكرى حلوة
: -يا ذكرى حلوة هههههه
أبتسملي بود جان جدا لطيف والكلام ويا ينعش محترم.
وصلنا بيتنا وكف السيارة
: - وصلنا
فتحت الباب و نزلت وبعدين التفتت عليه نزل الجامة
: - أتصل بيه اي شي يصير أنتظر خبر منك
وهم دير بالك على نفسك
: - وإنتِ ديري بالج على أمج وعلى نفسج
: -تمام بالسلامة
حرك ومشى دخلت جوة
دخلت للبيت شفت ماما تصلي.
وكفت بمكاني باوعت عليها
أنكسر كلبي عليها دوم حايرة بينا وصايرة أم وأب النا أوف ماما لو تدرين شدا يصير
صعدت فوگ بهدوء حتى لا أزعجها لان هي ما حست بية أعتقد.
دخلت غرفتي وسديت الباب وأسندت ظهري عليه.
الف سالفة أجت أبالي
تمشيت للحمام سبحت وغيرت ملابسي لبست شي مريح وطلعت أباوع بمبايلي
ماكو شي نزلت جوة لگيتها كاعدة على السجادة والسبحة بيدها
هي تتاخر بصلاتها لان دوم تصلي لنفسها ولبابا وياها هم
أجيت وكعدت يمها وحضنتها التفت عليه ملامحها مستغربة بس حضنتني نمت على رجلها رجعت تمسح على راسي
: - شبيج حوري
: - ماكو شي بس مشتاقتلج
أبتسمت وكالت.
: -فدوة أروح لحنينة أنتِ حنينة مثل أبوج
رفعت عيوني الها: -ماما أني أشبه بابا لو ملاك
حجت بفتور وكنها تستحضر صورتة أبالها همست بصوت حزين بس مليان حب
: -لا أنتِ حيل تشبهينة من أشوفج أحس شايفتة كلش حتى ضحكتج
سكتت حسيت الدمعة بعينها رجعت حضنتها طولت أحس بالامان بحضن ماما
وياريت لو بابا موجود يمكن جان حياتنا تختلف مرات أفكر لو هو موجود شنو ممكن يصير
وخرتني من حضنها تباوع بوجهي
: - عيونج حمر باچية.
ارتبكت مسحت عيوني برداني
: - لا بس بالطريق ماعرف شنو دخل بيهن وفركتهن حيل وصارن حمر
مدت ايدها تفتح بيهن مركز: -خاف بيهن گشة
: -لا ما أعتقد هيج رشگة مال أتراب
سكت گمت من يمها رحت لطباخ لگيتها مسوية غدة وهي كامت تلم بالسجادة صحت عليها
: -ماما عاشت ايدج ريحة تشهي
أجت يمي وكفت وأني أجهز بالصحون سألتني
: - ملاك هم خابرتيها ماكالتلج يمتى ترجع.
هنا توترت ما أعرف شكلها هي مريضة من غير شي هسه اذا أكلها شكو والله تموت ابتسمت جذب وهزيت راسي
: - إي خابرتها و زينة الحمدلله
: -ما كالتلج شوكت ترجع
: -اي كالت إن شاءالله راح تجي هالايام
حجت بقهر
: -مشلوع الكلب لا راحك البال ولا مرتاحة خابريها إلى اريد أهجهاااا هاي اذا ما أگربها ما تجي هسه ياهو عتب عليها تروح لو حالفة تموتني
: - ماما هي ما ينخاف عليها لتفكرين حبيبتي.
: - خابريها هسه خلي أحچي وياها ما مرتاح كلبي من البارحة
ارتبكت حكيت خدي بورطة
: - هسه اكيد مشغولة بعدينخليها نحاجيها خليها بالليل
: - وج بس اسمع صوتها جا شعدها مشغولة تحصد شنو
: -يا ماما دكولج يمكن نايمة هسه فرق توقيت بعدين خليها تحاجيج إن شاءالله اول ما تفتح وأخابرها تحجين وياها كبل
سكتت باوعت عليه بشك بس بعدين هزت راسها
بتمام كعدت يمها كم دقيقة حاولت أبين طبيعية.
وأحجي وياها حجيتلها عن الدكتور إلى رزلني عاد خليتها تدعي عليه شوية دعاء الام مستجاب
بلكي بعافيته على الفشلة والاحراج مال
اليوم
تغدينة وبقيت أهلك عليها سوالف وأنطيتها علاج لحد ما نعست ونامت.
ودّيتها لغرفتها وغطيتها ظليت أباوع عليها وهي نايمة وجهها شاحب تعبان.
طلعت وسديت الباب، ورجعت لغرفتي كعدت على الجرباية حطيت الموبايل بحضني عيوني عليه بس.
كل دقيقة أشوف الشاشة ماكو اتصال ولا رسالة.
شجن:
الباب بعده مفتوح إيدي ترجف والموبايل بعده بإيدي أسينات كاعدة بالصالة ساكتة بس تباوع
عيونها مو طبيعية سمعت صوت باب البيت ينفتح بقوة دخل على وراه شمس والقلق والخوف كاسح ملامحهم
شمس ركضت لأسينات مرعوبة
: -ماما سونا حبيبتي شبيج
حضنتها بقوة بس هي ابد ما تحركت بقت جامدة وشمس تبچي وتحجي وياها بس ابد ولا ترد
علي وكف مكانه عيونه تنتقل بينها وبين الدم إلى على ملابسها.
راح للمطبخ بدون حچي وكف ثواني بس ملامحه هادى تحسه جان يعرف راح يصير هيج شي مو
شخص مصدوم عكس حالتة شمس الخايفة
رجع كعد يمها وشمس من جهه الثانية كالها
: -أحجيلي بابا ليش كاتلة الارنب
: -مزعج
: -الارنب
: -اي بابا يتحرك هواي وضوجني وكتلتة
: -أنتِ لو هو
من كالها هيج باوعتلة بحقد والله تحسها مو هي الكاعد تباوع تحس شي ثاني متلبسها
: - لا أني
: -لا مو أنتِ
عاطت بوجه بصوت مزعوج.
: -لااا أني ديزعجني بعد لاااا أجيب حيوانات على بيتنا ما أحبهم
شمس كالتلها: بس هو حيوان اليف وما يأذيج حبيبتي
: -لا ماما ديأذيني
: - أسينات بابا
رفعت عيونها عليه مد إيدة لزم أيدها بحنان
: - شنو طلب منج
: -ما طلب
: -أنة أدري مو أنتِ كاتلتة
: -لا بابا أني
سكت وشمس أخذتها أسينات غسلتها وبدلت ملابسها وبالليل بقوا يمها
لحد ثاني يوم الصبح
علي خابر على مصطفى عود حتى يستعجلة لان ظاهر هي متأثرة بربط على حسب كلام علي.
بس ما يرد اخر شي خابر على بيت عزيز وكالوا مالهم أثر صار يومين مختفين واحنا جاي ندور
عليهم خبلوا على محد جان يعرف بس أني وهو كالي لا دكولين لشمس شي أنة رايح ورة مصطفى
وراح أكلها رايح بشغل
وفعلا كال لشمس رايح بشغل لغير ولاية وهي ما قبلت لان أسينات مريضة
بس هو راح ووصاها على أسينات وأني القلق موتني على مصطفى وماكدر أحجي الوجعه ضالة بكلبي.
أسينات:
اليوم وعلى غير العادة لكيت الكتاب محطوط وي كتبي بالجنطة
ضليت صافنة عليه متأكدة هو رجعة ومن أخر مرة بابا شگ أيدي بيها بعد أبد ما شفت أحلام
ولا حسيت بي شعور حتى حتى غرفتي ما دا أحس بضيقة من أكون بيها ولا أخاف
طلعتة خليتة على ميز كلت من يجي بابا يشوفة
رجعت طلعت قلمي دريد أحل الواجبات
بس بداخلي أحوس كل شوي عيني تروح على الكتاب اريد أفتحة
كمت أخذت كتابي ونزلت جوة كعدت بالحديقة أقرأ.
ما جاي أحفظ بالي يمة رجعت صعدت فوك بعدة بمكانة مديت أيدي لزمتة فتحت أول ورقة
مثل أول مرة عادي ما أقرا جنت بس أباوع وأتصفح بي فزيت من صفنتي على صوت مبايلي
رجعتة ورحت فتحت خط جانت أيما حجت بمرح
: -كيفك سونا
: -زينة قلبي و أنتِ
: -هلق أحسن بس والله مبارح نمت نص نومة
: -طبيعي بعد الجني الرومنسي مالتج
: -لك سوناااا لا تبلشي
ضحكت بستمتاع وهي حجت بتسأل
: -شو عم تعملي هلأ
لفيت عيني على الكتاب إلى يمّي على الميز.
: -جاي أحل واجبات
: -كذابة صوتك مو صوت وحدة تدرس
: -وداعتج دا اسج من وراج
: -مممم
غيرت الموضوع فجأة
: -تذكري هداك الشب اللي رشّنا مي
: -ههههههه شلون أنساه
: -والله كان بدو يعمل حالو رومنسي طلع خربها
: -رومنسي شنو جنه أبنية خوش گفخة بابا
: -بس ضحكنا بعدها
: -إي والله
رجعت كالت بهتمام
: -سونا
: -ها
: -تذكري لما قلتلك إني بحثت عن حالتك
: -إييي
: -ولكيت معلومات
: -طبعاً وما أستفدينا شي من معلوماتج.
: -ولك لا أسمعي هلا أنتِ عم تقولي مانو مرج تبعكم
: -اصلا متاكدة مو هو
: -شو ريك نتاكد منه اكثر
: -شلون يعني
: -لك حالتك بتقول معك شيطان فهلا نتاكد منه
: -شنسوي مثلا ما جاي أفهم عليج
: -من بحثت من ضمن المعلومات إذا بدنا نتأكد هو شنو بالضبط
سكتت لحظة كأنها مترددة بعدين كملت
: -لازم تسوين شي واحد
بلعت ريگي
: -شنو
: -بس تسمعين وتسوين بالضبط مثل ما أگلك بدون خطأ
: -إيما لا تخوفيني
: -لا تقاطعيني ركزي.
مركزة وياها و عيني بدون ما أحس راحت للكتاب
: -إي
: -تاخذي أشمع من درج تبعك وأطفي لمبات وتشعلين الشمع وتوكفين قدام المراية
باوعتلها إيدي بردت
: -وبعدين
: -تحطينه قدامك وتقعدين قباله
: -إي
: -تطفي الضو بس خلي باب الغرفة مسكر
: -ليش
: -حتى ما يقاطعك أحد
سكتت وبعدين كملت
: -تشغلين شمعتين مو أكثر
: -تمام
: -وتقعدين تتتطلعي على المراية وتركزي على عيونك
: -ليش المراية
: -لأن هو ما يطلع مباشرة
سكتت حجت بهدوء.
: -يظهر انعكاس بالبداية
جسمي قشعر
: -اي
: -إذا كان قرين راح تحسين بثكل وضوجة ويمكن تبجين بدون سبب لكن ما يظهر
: -وإذا
: -إذا كان هو
سكتت كم ثانية وبعدين همست
: -راح يقرب
: -شلون يعني يقرب
: -راح تشوفي قدامك أنا هيك قرت
إيدي لا إرادياً راحت لركبتي حتريت
: -ويمكن
: -شنو
: -يحكي معك
سكتت وبعدين ضحكت ضحكة خفيفة حاولت تخفف الجو
: -بس لا تخافين مجرد اختبار
بس ما ارتحيت
: -وإذا صار شي.
: -اذا صار أحكي معه وأمري يطلع من حياتك
: -وهو هيج ياخذ بالحجي
: -ولك لا هو ما بيقدر يستحوذ عليك الا أنتِ بتسمحي الة هلا هيك أنتِ هم تدعي لحياتك ولما يظهر أطلبي منه يرحل وقبل لا تبلشي قولي الهيك الا يظهر
: -اذا نفترض حجيج صار بلا ما راح شلون بية
: -هون بتكون مصيبة
: -ليش
: -هلا في كثير حكي بكرا بشوفك ونحكي
: -اوكي متفقين
رجعت كالت
: -سونا اسمعي
: -شنو
: -بس يعني يمكن ما يصير شي أصلاً
باوعت للكتاب مرة ثانية.
عبالك ديصيحني
: -جربي
ضحكت بخوف
: -أكيد لا
: - مو حابة تعرفي شو عم يلاحقك
: -يمكن
: -جربي بكرا بعد ما نحكي وتتطلعي على المعلومات
باوعت للغرفة هدوء
الكتاب المراية كلشي جاهز
: -لا ما أجرب اصلا بابا محذرني أسوي شي وهو موجود اكيد يلگى حل أصلا هالايام زينة
: -طيب متل مابدك
سديت الخط منها باوعت للموبايل وتفكيري صار كله على الموضوع هذا حجيت بيني وبين روحي بخوف لا لا ما أجرب
بس ما تحركت بقيت صافنة.
دقيقة دقيقتين فزيت على صوت ماما
نزلت جوة لگيتها مخلية العشاء كعدت وياهم بس اني وحيدر وخالة وماما
وبابا ومصطفى مو هنا شگد البيت وحشة عليهم
جانوا ديسولفون ويحجون مواضيع بس أني ابد مو وياهم أنتبهت من صارت ايدة ماما على ايدي رفعت عيوني عليها
: شلون صرتي حبيبتي
: -تمام ماما
: -بعد ايدج توجعج
: -لا زينة
كملنا عشة وخلتني أخذ علاج يمها ورادت انام يمها بالغرفة لحت عليه هواي.
كوة سحبت نفسي و صعدت للغرفتي حاولت أنام بس بقيت أتكلب خلص لازم أجرب
أنتظرت لوحدة كلت حتى أهلي نايمين ومحد يجي يقاطعني
صدك صارت بالوحدة وشمرت الحاف وكمت طلعت الشموع أثنين شموع معطرة عندي أخذتهن
قفلت الباب وطفيت الضوء وأجيت شعلتهن كدام المراية وكعدت جنت مركزة بس بعيوني وحجيت الكلام إلى كالتلة إلى أيما إلى هو دعوة ظهور الة.
ثواني بس ثواني وبدت تتشكل ملامح على وجهي فتحت عيوني على وسعهن وأني أشوف بياض بالمراية وسرعان ما تحول هذا البياض
لرجال جان بملامح كلش تخوف عيونه أكبار وأسمر وفص عينه أبيض طلع من المراية وصار كدامي
جان يباوعلي هيج بنظرات ما أعرف شلون اوصفها
شلون شخص جوعان على شوفتك.
بقيت صافنه بحالة من السكون تشبه وضع الشخص من يكون نايم ويجي الجيثوم يكون واعي، بس مايكدر يتحرك أني جنت واعية بس ماكدر أتحرك ولا أسوي شي بس أباوعلة حجيت بصوت خافت
: -منو أنت
: -أنا أنتِ و أنتِ أنا
أجة ابالي كلام أيما رجعت خطوات وهو تقدم عليه من أرجع مبتعدة عنه يتقدم بتجاهي جان رجال ضخم وشكلة بشع ابد مو مريح واكف بكمال هيتة كدامي حجيت بأمر
: -أطلع من حياتي ما أريد تكون موجود بيها.
مد أيدة الضخمة ولزم أيدي دشوفة لازم أيدي بس ما أحس بي يعني ايدي محد لازمها بس اني أشوفة لازمها كال بملامح شبه غاضبة
: -مالج حياة بدوني أنتِ وحيدة أنتِ الي
: ما أريدك كاعد تفهم اني مو إلك
: -طلبتي مني أحضر أذن تريدني
: -لا لا ما اريدك.
قرب أكثر ريحته طيبة بشكل يخوف دحس بشر طبيعي ويحجي وياك بس ملامحة وهيتة لا مو عادية ابد وصوتة نفسه إلى قبل فترة حاجني يعني هو نفسه بلعت ريكي متشجعة واكفة بكل ثبات اريد أخلص من هالعبء
: -كل ليلة تنامين بحضني تبجين هم أذوج
: -منو همة ماكو احد هنا ديأذيني غيرك
: -أهلج
: -لا أهلي يحبوني.
: -أحبج اكثر منهم أسينات بنتظارج أطلبي مني أتملگج بالكامل أنتِ إلى وانا أشوف الحياة من خلالج وراح تشوفين الحياة بوجودي وياج
جنت صافنة عليه بدة شكلة يتغير لحد ما أختفت ملامحة الضخمة وصارت وجهه طبيعي يهمس بصوت غريب ممزوج بصدى من يحجي أحس الحياطين كله تحجي قرب اكثر وبينه بس النفس
: -أحبج محد يسمعني ويحجي وياي غيرج محد حررني غيرج ماكدر أعوفج الهم لازم أخذج وياي اريد أخذج منج إلى رغباتج بيج شهية.
جان لازم أيدي وطول ما لازم أيدي ويحجي ما جنت أحس بي ابد فراغ بس الهوء والضيگة الجانت موجودة بوجودة فضيعة كمل بحقد
: -نتخلص من كل الحواجز بينة وأدري راغبتني تسدعيني حتى أحتويج بدون ما يشاركني أحد بيج أنتِ الي
أجيت أرد عليه بس حسيت بعجز وخدر وهو أختفى بالحظات كعدت بالكاع مهدود حيلي.
جامدة حركت أيدي إلى جان لازمها شفت كتابة على جف أيدي جانت عبارة عن حرفين
:
:
ثاني يوم.
فتحت عيوني بصعوبة عبالك ما نايمة أصلاً كلشي بية يوجعني مو جسمي لا روحي باوعت لإيدي
تجمدت الحرفين بعدها موجودات نفس المكان نفس الشكل عبالك محفورة مو مكتوبة.
مررت إصبعي عليهم بخوف بلعت ريگي نزلت عيوني حاولت أتجاهل حاولت أقنع نفسي حلم بس لا مو حلم
لبست ملابسي ونزلت جوة ما تريكت رغم ملحة ماما بس ما اكلت مالي نفس طلعت للمدرسة طول الطريق وأني بالي بي وبملامحة.
صوت أي شي حولي ما دا يوصلني الطلاب الشارع حتى صوت ماما من صاحت عليه قبل لا أطلع كله جان بعيد أفكاري كلها عليه كلامه براسي
: -أنتِ إلي
وصلت المدرسة دخلت الصف كعدت بمكاني الكتاب مفتوح كدامي بس عيوني مو عليه.
جنت أحس أحد يباوعلي رفعت راسي شفتها إيما دخلت عيونها مباشرة عليّه أجت كعدت وراي وسلمت عليه
بعد الحصة طلعتلها بسرعة حتى قبل لا تحجي.
لزمت إيدها بقوة
: - أيما
باوعتلي بقلق
: - سونا شو فيك وجهك مو طبيعي.
: - سويتها
صفنت بس ملامحها تغيرت
: - شو يعني سويتيها
: - التجربة البارحة سويتها
عيونها توسعت
: - لاااا سونا جد عم تحكي
: - شفته
هنا سكتت مصدومة ما مصدكة
: - شو شفتي
: -هو هو شفتة
: - لا هاد مو طبيعي
رفعت إيدي كدامها باوعت على الحرفين
: - شوفي
: - يا الله
: - شنو
: - سونا هاد مانو مو مزح
سحبتني من أيدي طالعين من المدرسة ماعرف وين رايحين
: - تعي معي
: -وين
: - المكتبة لازم تشوفي شي
:
:.
بعد نص ساعة كاعدين بالمكتبة المكان هادئ حتى صوت تقليب الصفحات واضح والكل يقرا مندمج
أيما رجعت من بين الرفوف بيدها كتاب قديم
لونه باهت حطته كدامي
: - هاد هو
: - شنو هذا
: - الكتاب اللي حكيتلك عنه أنا ما كنت متأكدة بس هلا. تاكدت
فتحته بدت تكلب الصفحات مثل إلى حافظ مكانهن
وكفت على صفحة ودفعت الكتاب إلي
: - إقري
ركزت عليه جان عربي ومكتوب بخط قديم قريت بصوت خافت الكلمات الموجودة.
عند تحرر الكيان يبدأ بإزالة كل من يمنح الضحية شعور الأمان ليبقى هو الوحيد
رفعت عيوني عليها بصدمة
: - شنو يعني
همست بخفوت
: - يعني راح يحاول ياخذ مكان الكل بحياتك
: - مستحيل
: - سونا اسمعي
كلبت صفحة ثانية أدور بيها
: - في كمان شي
وأشرتلي على سطر مكتوب بي
يضع علامة على ضحيته كدليل ارتباط وحاجز
حسيت الدم انسحب من وجهي باوعت لإيدي
الحرفين رفعت إيدي كدامها
: - هذا
هزت راسها ب إي سكتت لحظة وبعدين همست
: - هاد وسم.
: - يعني؟
: - يعني انتي صرتي إلو
بلعت العافية رجعت أيما قريبة عليّه وبدت تكلب الصفحات بسرعة عبالك دا أدور على شي محدد
صوت الورق جان يخرش أعصابي وكفت فجأة وحجت بهتمام
: - لگيتها
دفعت الكتاب إلى أكثر
: - ركزي سونا هاد أهم شي
قريت: -عند اكتمال الظهور لا يعود الكيان إلى موضعه الأول
رفعت عيوني عليها
: - شنو يعني
همست بخوف: - يعني تحرر ما راح يرجع لعالمة حاليا هو وياج هنا
حسيت كلبي وكع وريكي ناشف
: - يعني هو هسه.
: - إي صار ويانا بهالعالم
كملت قراءة
بعد التحرر يبدأ الكيان بالارتباط الكامل مع الضحية ولا يغادرها إلا بأمر أقوى منه أو بزوالها
إيدي بدت ترجف
بزوالها يعني يا إما يختفي هو لو أني
كلبت الصفحة برتباك جان مكتوب
الكيان بعد تحرره يسعى للسيطرة الكاملة ويبدأ تدريجياً
وتحتها نقاط جنت أقرأ وكل كلمة تنغرز بصدري
اول نقطة جانت
العزل يبعد الضحية عن كل من تحب يجعلها تنفر منهم أو يؤذيهم بطريقة غير مباشرة.
ثم التعلق يجعل الضحية تشعر أنه الوحيد الذي يفهمها حتى تبدأ بالاعتماد عليه نفسياً
صوته رجع براسي من كالي
أحبج أكثر منهم
غمضت عيوني بقوة لا شسويت أني ليش ما أكعد
رمشت مركزة على النقطة الثالثة
الظهور التدريجي يظهر بالبداية كظل ثم صوت ثم هيئة كاملة وقد يغير شكله ليصبح مقبولاً للضحية
تذكرت شلون تغيّر شكله من بشع إلى طبيعي
حسيت بغثيان
اللمس والتأثير رغم أن لمسه غير محسوس إلا أن أثره يظهر على الجسد.
باوعت لإيدي الحرفين وأضحات
الوسم يضع علامة وهي رابط دائم من خلالها يستطيع الوصول للضحية في أي وقت
أخر نقطة جان مكتوب الاستحواذ
وهنا وكفت أيما مدت إيدها وسدت الصفحة بسرعة
وخرت ايدها بضوجة
: - ليش شبيج ايما
: - ما لازم تقرين هاد الجزء
: - أيمااااا
صرخت بييهت بخوف
: - أريده أعرف
باوعتلي عيونها مليانة تردد
: - أوكي بس لا تخافي
فتحت الصفحة وأشرت على اخر سطر
: - هون
قريتة.
: -عند فشل السيطرة النفسية الكاملة يبدأ الكيان بمحاولة الاستحواذ الجزئي وفي المراحل المتقدمة قد يتم الاستحواذ الكامل وتفقد الضحية سيطرتها على جسدها تدريجياً
دموعي نزلت بدون ما أحس
كملت
: -الكيان لا يقتل الضحية مباشرة بل يحتفظ بها لأنها مصدر وجوده في هذا العالم
همست بخوف
: - يعني يحتاجني
: - إي
: - يعني ما راح يعوفني
رجعت باوعت لأيما عيوني مليانة خوف
: - هو هنا هسه
: - إي اكيد.
كعدنا لحظة سكوت حتى صوت أنفاسنا مسموع
: -شنسوي
أيما نزلت عيونها على الكتاب تفكر بفتور
: - لازم تبقين هادية
: - هادية شلون لج دشوفين شسويت بنفسي والله بابا حذرني بس أني ثولة ماااكعد
: -لك لا تخافي إذا حس إنك خفتي يقوى أكثر
خطر ببالي شي رفعت راسي كتلها
: - بابا
: - شو؟
: - بابا موجود هو أكيد يعرف شلون يتصرف هو من قبل حذرني وأني أثق بابا
نفس اللحظة ملامح أيما تغيرت
: -لك لاالا
: - ليش
: - فيك تحكي معه بس...
: - بس شنو
: - لا تذكري المصدر.
: - شنو يعني
همست وهي دا تباع حواليها بخوف
: - لأنو إذا عرف مين ساعدك أو مين خلاك توصلي لهالمرحلة
بلعت ريگها وكملت
: - راح يأذي
جسمي كله برد
: - يأذيه
: - إي سونا ركزي
حضنت وجهي بين إديها
: - هاد الشي ما بدو حدا غيره يكون قريب منك
فتحت الكتاب وكلبت لصفحة ثانية
: - هون اقري.
الكيان يسعى للانفراد التام بالضحية فيُبعد كل من يمنحها الأمان أو القوة يُظهر الغيرة ويؤذي أو يُخيف كل من يقترب منها حتى تبقى له وحده
: -يعني أي شخص تحسي أقرب إلك منه
راح يصير هدف الو
: - كلشي ولا بابا أتخبل اذا صار عليه شي
: - هو هيط كل شخص تثقي بي وتحسين بالأمان وياه بيأذي وهو بده يلغي هالشي
حطيت إيدي على راسي بضياع أفكاري مشتتة هو مو هنا المنو أحجي ماما متكدر تسويلي شي.
شسويت بنفسي خاف جان مسجون هسه أني حررتة بيدي.