رواية مرواد الظلمة الجزء الثاني للكاتبة هيلانا الفصل الثامن والعشرون
شجن:
: -ويه منو تحجي سونا
: -ويه نفسها
: -تشاقين
: -شجن هيج موضوع بي شقة سمعتها تسولف أكلها ويامن تحجين ماما دكلي وي نفسي وأني ما أعرف شسوي وما اريد أضغط عليها وعلى يعرف بوضع بنتة وسافر وخلاني وحدي هسه وكت سفر
: -ما تخلينا ناخذها لدكتور نفسي
: -أها وأعيد إلى صار وياي بزمنات وي بتي مابيها شي وما أخذها لاي دكتور أنتظر على وهو يشوفلنا حل
: -شمس لا تقارنين وضعج وي أسينات.
: -لا شجن مستحيل أني جنت مابيه شي ومحد صدكني والله يرحمهم أمي وأبوي دخلوني للمصح بدون ما يهتمون بشنو أحس او شراح يصير وياي فأني مستحيل أذب بتي هيج ذبة هسه يجي على ونشوف شنسوي وياها
خليت وكمت كلت حگهة بس هي هم ما تدري بعلي وين راح لو تدري شصاير بمصطفى
صعدت فوك مريت على غرفة أسينات جان الباب مرود على نص مديت راسي أباوعلها
جانت كاعدة تكتب وأيدها أخدهة وتبتسم وترفع راسها وترجع تنزلة تكتب كالت ببتسامة.
: -لا ما أحبك هو أني ما أحب بس أهلي
باوعت ثواني كدامها أنوب ضحكت بصوت عالي وردت تكتب دخيلك يابو الحسن البنية ضرب على راسها يمه هذا مرج يمكنة كلنا يشخطنة
تجمّدت بمكاني إيدي بعدها على الباب وعيوني عليها ما ترمش.
بلعت ريگي بهدوء ودخلت خطوة صوت الباب تحرك خفيف رفعت راسها أنتبهتلي عيونها اجت عليّه مباشرة وابتسامتها اختفت.
صارت تباعب القلم بين أصابعها وكأنو ماكو شي.
گلت بصوت هادي
: - أسينات ويا منو دا تحجين.
سكتت بس عيونها رجعت للدفتر قربت وكفت يمها عيوني لفت الغرفة لف ماكو أحد
: - دسالج ليش ساكتة
: -وي نفسي
نفس الجواب حسّيت جسمي قشعر بس حاولت أبقى صامدة رغم أني والله أخاف مدّيت إيدي للدفتر
: - شدا تكتبين خليني أشوف
بسرعة سدت الدفتر وسحبته لحضنها، حضنته بقوة وكأنو ما تريد أحد ياخذه منها
: - خالة شسوين.
نبرتها جانت حادة مو طبيعتها هي ما ترفع صوتها بوجهي هم جهال أختي كلهم مؤدبين وأني ربيتهم على أيدي وابد ما يرفعون صوتهم بوجهي
باوعتلي بنظرة غريبة وبهدوء كلش مالت راسها شوي
: - خالة أشبيكم أنتِ وماما كل شوي وحدة جاية والله صدك دحجي وي نفسي شنو ما يصير
: -خوب تعاي أحجي ويانا حبيبتي ليش تحجين ويه نفسج
: -ما يصير شنو
: -لا يصير بس خفنة عليج وأمج خطية بالها يمج
: -مابيه شي هيج كاعد تكبرين المواضيع أنتِ وماما.
: -تمام بس عود أني موجودة اذا تحبين تحجين خاف تستحين من أمج حبيبتي
: -اوكي خالة
عفتها وطلعت البنية وضعها مو طبيعي لازم أدز رسالة لعلي وعلى هم ماعرف شنو الوضع عندة وصل لا، هي من تلتم تلتم.
أسينات:
الي يكون حقيقي لازم يكون منطقي، والشي إلى ما يقتنع بي الكل ما تكدر تفرضة حقيقة
وأحيانا بسبب المجتمع وتكذيبة وعدم أقناعة ننجبر نخلي هالحقائق بداخلنا
شي جدا طبيعي يتغلب الخير على الشر وهذا الشي إلى متعارف عليه او على حد تقدير إلى نأمن بي مهما طالت الايام
بس مو من المعقول يتغلب الشر على الخير وهذا الغير متعارف عليه والي مانكدر نتقبلة.
مثلا عمتي أخت بابا والي، أني أحبها هي أخذت شي مو الها وبطريقة مو صحيحة وخربت حياة غيرها وهنا تعتبر هي الشر بس تغلبت على الخير
وسوت إلى رادتة والكل ممكن يشوف ماكو عدالة ربانية وحشى الله رب العالمين عادل
بس الشي إلى ناس والمجتمع الماكدر يفمهمة أنو الخير او الشر ياخذ قوتة من صاحبة
وعمتي أجوانا جانت قوية كافية حتى تحقق الي، تريدة عكس خالتي إلى بسهولة نهزمت لذا.
ماكو مقياس اسمه الخير لازم ينتصر لا كلشي ممكن ينتصر من قوة صاحبة وهاي الحقيقة مانكدر ننكرها
وبنفس الوقت الخوف من أني وأصغيرة بابا
خلانا نتعايش ويه وجود مخلوق غريب بيتنا وعلمنه ما نخاف منه لان اذا خفنا راح يسيطر علينا اكثر ويگوم يستمد قوتة من خوفنا وضعفنا ولازم نواجه
كلشي بشجاعة وأيمان قوي وثبات وفعلا أسنين تعايشنة ويا بدون ما نخاف منه وصار وجودة عادي بالنسبة النا.
گمت من مكاني وحجيت ويه روحي هو وهم هذا وهم حجة بصوت بارد
: -مو وهم أنا وأقعچ
التفتت عليه لازمة قلم بيدي أباوعلة شكلة بشر طبيعي بس مو اول شكل شفتة بي لا تحسوا
أنسان عادي مو نفس ملامحة اللي جانت تخوف كعدت بالكاع أقرا وهمست بصوت مسموع
: -ما أريدك بحياتي أني دا أمرك تروح
گام من مكانة ملامحة جانت بين التهجم والخيبة.
وأكو نظرة خبيثة بعيونة وعيونة كلش يخوفون أشتتى نظري من أحجي بدون ما أباوعلة جان ساكت بس يباوعلي
: -شنو اللي منتظرة
: -أطلبيني أريد أسمع اللي وأثق بي وأنا وأثق أنتِ ترديني
: -أنتِ وهم
: -أسينااات
سمعت صوت أمي نزلت جوة شفت أيما بالباب
سوتلي هلو بيدها
سحبتها ودخلنا للمطبخ كعدت وأني سويتلها جاي
: -أحكي شو صار
: -ما صار بعدة هادي
: -ما سوا شي هيك والة هيك معقولة الكتاب معلوماتة خطأ
: -ما اعرف أتوقع اي.
صبيت جاي الها حجت بعد ما شربت شوي منه
: -نروح للمكتبة نستعير الكتاب شو رايك
: -لعد خلصي جايج حتى نمشي
كملت وكلنا لماما طالعين شوي على سوبر ماركت قبلت لان ايما وياي بس بنص الطريق امها خابرتها
فراحت كلت اروح وحدي مخلية ادية بجيوبي وامشي وافكر الشارع شبه فارغ الهوا بارد وفزيت على صوت وراي انداريت
: - وين هالطلعة يا حلو
وكفت غمضت عيوني بعصبية من شفتة هسه وكتك
لا مو هسه حجيت بيني وبين نفسي.
: - شبيج شفتيني انصدمتي لو فرحتي
: -لا هاي ولا هاي شكو لاحكني
درت وجهي ماشية اجة بصفي يمشي بدون إذن
: - وين رايحة
: - مو شغلك
: - يعني أكو شي مهم تمام هسه صرت مهتم أكثر
وكفت التفتت
: - شوف لا تمشي وراي.
قرب خطوة
: - ليش خايفة أعجبج
: - لا خايفة أني أعصب وأجاوز عليك
رفع إيده مستسلم مبين مستهزاء
: - لا لا أهدي أني مواطن كندي مسالم
رجعت أمشي وهو بعدة وراي
: - تره حتى لو ما تحچين أني راح أظل وراج حماية مجانية.
: - حماية من منو
: - مني طبعاً
لتتفت عليه بنظرة ضايجة
: - والله إذا ما تروح.
: - شتسوين
: - أبلّغ عليك
: - خوش كوليلهم أكو واحد يحبني ويلحكني
انحرجت وعصبت بنفس الوقت
: - منو گالك أحبك أصلاً
: - محد بس واضح.
: - واضح شنو
: - أني أحبج مو أنتي لا تخربطين
ضحكت كوة عليه شگد تافهه درت وجهي متحركة وهو صار بصفي
: - أنت مو طبيعي
: - وأنتي طالعة وحدج هم مو طبيعية تكمّلينني.
وصلت المكتبة دخلت بسرعة وهو وراي رحت لنفس الرف أدور الكتاب وهو هم يدور وياي
: -شدورين بالضبط
: -على حظي
: -حلو
كام هو هم يكلب بالكتب ومهتم وكفت أباوعلة
: -شكاعد تسوي
: -أدور وياج
: -على شنو
: -غير على حظج
هزيت أيدي وأخذت الكتاب شاف العنوان مالتة وحجة بنبرة مصطنعة
: - طلعتي مثقفة
رحت كعدت على جههه فتحت الكتاب أكلب الصفحات بعصبية أدور على أي شي ممكن يساعدني
وهو كعد يمي ساند راسه على إيده.
ملاك:
أول ما فتحت الباب هو كعد شافني فك عيونة بصدمة كبل طكيته ركضة
ركضت وبعدت عن البيت بس بعدني بالبستان اريد أوصل للباب الرئيسي مالت البستان حتى أطلع
بس ووكعت على وجهي بجيحة مال طين البستان مسگي وكله طين حسيت بيدة لزمتني
من متني سحلني كمت كلي طين التفتت عليه ركعتة بوكسي على وجهه تراجع خطوة ليورة بس ما وكع حرك فكة بضحكة
: -حبارية ياهووو معلمج أطگين هيجي
: -مايخصك اذا بيك خير رجعها يلا.
أتقدم ديريد يضربني دنكت وضربتة بكل قوتي على بطنه لزم شعري بيدة وضربني على وجهي
طحت للكاع صار فوكي كعد كعدة كمت أضرب بي بدية بعشوائية وهو يحاول يلزم أدية
لحد ما ضربني على وجهي وقوة الضربة على خشمي تحسه متعمد بحيث رجع مرة ثانية وهم على نفس المنطقة ضربني دخت وحسيت بدم نزل على حلكي
وخر عني يباوعلي شافني بمكاني ما كمت لان ما جاي أركز شو كمت أشوف هواي نسخ منه صارت.
كومني وجرني من ايدي من كومني دخت اجيت اطيح بس لزمني مشاني كايدني ويغني، اغنية قديمة
: -ياخضيري بطلي النوح نوحج چتلني
يردد بيه مستمتع واحنا راجعين شالني عيوني على الكاع دخت حيل سمعت صوت أسعاف وحسيته بدة يمشي سريع لان دياذيني من يمشي لحد ما فقدت
ماعرف شگد. مر وقت بس من فتحت عيوني جان
كلشي ضباب وصوت همهمة ناس تحچي ضوء قوي ضارب بعيوني غمضت وفتحت مرة ثانية
: -ش، شنو وي، ن.
حاولت أتحرك بس جسمي كله يوجعني خصوصاً خشَمي رفعت أيدي ولمست وجهي أول ما لمستة صرخت بخفوت
: - آخخ،!
: -متأذية حيل ناخذج لمستشفى
الصوت غريب بس أني على كد ما دايخة ما دا أركز من وين كاعد يجي من يا زاوية
حاولت أركز التفتت على جهه الصوت شفت نقيب يم راسي ويا شرطي أني وين حاليا نفس البيت
ذولة شجابهم لعد فتحت عيوني قوي وهو حرك أيدة كدام وجهي
: -شلون صرتي تكدرين تحجيلنا شصار وياج.
هزيت راسي تقدم الشرطي ساعدني عدلت نفسي باوعت على هذا الشايب ومرتة وهو وياهم هذا المخبل واكفين كلهم يم البوفية والخوف مبين عليهم والغرفة مليانة شرطة وياهم شاب أحس أني شايفتة بس مدري وين تقددم ونحنى عليه مجعبز بكعدتة كالي بقلق
: -شلونج ملاك نروح المستشفى تحسين بدوخة مو
: -لا
: -متاكدة
: -اي، اي
التفتت على النقيب من حجة
: - أخذوهم للمركز أشر عليهم رجع التفتلي وكمل.
: الانسة شوكت ما تصير زينه جيبها للمركز تقدم أفادة
الولد رد عليه بود
: - أن شاءلله سيدي
اجة يمشون وصحت عليه كوة خشمي يوجعني رجع عليه
: -سيدي أكو وياي أقاربي أثنين واحد منهم عمي هم أنخطفوا هنا بهاي المنطقة
: وين بالضبط تندللين المكان
: -اي أندلة صاير بالاطراف أكدر أدليكم عليه هو بيت جبير وبي عصابة ماادري شگد بس جانوا هواي أخذوا سيارتنا وخطفوهم بس أني انهزمت وبعدين وكعت بيد ذولة وهمة حجزوني عندهم.
: -ماتذكرين كم واحد بالبيت
: -الي شفتهم يمكن ستة مدري اكثر
جان هو طلب دعم واني كومني هذا الولد بعد ما لفوا خشمي إلى وصعدوني بوحدة من السيارات العسكرية وأكو واحد منهم أنطاني مسكن وخلاللي بطل ماي على كصتي كال الزمي على راسج لحد ما نرجع ان شاءلله مري على مستشفى يعالجونج
مسافة وصلنا هناك دليتهم على مكان همة دخلوا من جهتين واحنا بقينه واكفين يم السيارة.
جنت مرتكية على السيارة وباوعلهم ويمي هذا الولد بس أني كلش قلقت وأحس بالذنب تجاه مصطفى
: ما تخلينا نروح وراهم
: -شعدنة همة شرطة ويعرفون شغلهم
: مو خاف يشردون نفوتلهم من اربع محاور
: -انتي من قبل مشتغلة ضابط
: -ليش
: -ما ادري تلوكلج
: -فدوة لكلبك
ضحك وابتسم هز ايدة وحجة
: -ولا مبين عليج انت وحور اخوات
: -اي صح حور فاهيه
: -مو فاهيه رقيقة
: -عمي يا رقيقة والله فاهيه
أبتسم التفتت عليه بستفهام.
: صدك إنت ليش جاي ويا الشرطة أصلاً
ابتسم بخفة
: - أدور عليج
: -هاي أختي دازتك مو بلا
هز راسه بيي فكيت حلكي: -والله يااا وهيج معرض حياتك للخطر وجاي علمود أختي
شو هذا حك لحيتة ودار وجهه جنه مستحي هلو هلو اني الج حور ام العمايل الظاهر اكو احداث من ورة ظهري واني ما ادري
قربت منه خطوة وحجيت بشك
: تحبها لو معجب خالي
: -شنو هالحجي جاي علمودكم واحنا جيران والحجية هم خطية بالها يمج.
: -اكلك فوت بالنظيف شابعه من هالكلاوات
: -لا يابة ماكو هيج شي
: -لعد
انحرج شوي كال
: -مو بهالطريقة يعني...
: -يعني تحبها بس مستحي دكول
: -يعني، معجبة بيها
: -آهااااا توقعت والله
رجعت أباوع على بيوت حجة بتسأل
: -هي هم اكو احد بحياتها
رديت عليه بدون أهتمام لان دشوف الشرطة صعدوا فوك السطح عيني عليهم
: -ها لا سنكل تروح وترجع بدربها لا تحب ولا تنحب
انت شلون أنعجبت بيها وصدك خلي أگلك من هسه أختي مو سهلة ترى.
: -واضح من خلالج
: -لا أني النسخة اللطيفة
: - انتي لطيفة؟
: -عندك شك
: -لا ابد صح لطيفة والله الله يحفظج لامج
: تسلم
: خشمج بعدة يوجعج
: -لا شوي مهود على المسكن بس احسه صاير جبير الله لا ينطي كسرة يمكن
: -لا تخافين نسويلة عملية اذا مكسور
لتفّت عليه كتلة
: -تعال نفوت وراهم
هو انصدم
: -هاااا شنو نفوت لا هذا شغل الشرطة ننتظرهم
: -إي وشنو يعني الشرطة وحدهم يشتغلون واحنا نباوع.
: -ملاك هي شنو حلك بلسان عيني هاي عصابة خطرة مبينة
: -اي أعرف بس مصطفى جوة
: -والشرطة وياه
: -وإذا كتلوهم ما شفتهم شلون معضلين
: -ما راح...
ما خليته يكمل مشيت مباشرة للبيت من الجهة الثانية اريد طفرت السياج سمعت صوتة وراي
: -ملاك وين رايحة
التفتت عليه بهتمام
: -تعال حطلي ايدك خلي أصعد بس أشلبك بالسياج
: -وين رايحة هسه يجون
: -شبيك دكلك لازم نجيت عليهم جيتة وحدة
: -احنا حتى أسلاح ما عندة شلون نجيت.
: -بالتواثي باع ذنيج حاطيهن على خضرة ناخذلنا واحد ونفوت ونهبدهم بي
تأففف واجة حطلي ايدة وجعبز كعد صعدت على ايدة وجلبت بالحايط صعدت وهو هم طفر وياي نزلنا بالجهه الثانية شفت السيارة طابكة امداج يالجارجر هاي الطلايب كله عليج هسه انتي من حورج
دخلنا من الباب بسرعة هو وكف لحظة برا يباوع يمين يسار متردد وبعدين تنهد ودخل
داخل البيت.
ظلام نص و نص صوت خطوات فوك والبيت من برا كلش جبير تحسه مقسم ومن جوة هم ما مقصر وريحة أعفونية أطر الرأس
هو يمشي وراي بحذر وحاط ايدة على خشمه والله هذا شو دلوع حور وين لگتة
: -ملاك على كيفج أمشي لا يحسون بينه لا طيرين
: -أنت بس أسكت ومحد يحس بينا
صعدنة فوك لطابق الفوك اول ما صعدنة لگينه مصطفى مدد وادي مجتفة والصراحة مبين مكتول كتلة غسل ولبس بحيث ملامحة ضايعة.
وجهه مورم وكله صاير بنفسجي ركضت عليه دريد أفتح ادي بس شنو مقيد بسلسلة سمعت صوت رمي انداريت عليه كالي
: -اويلي صار بيه فشك أنلاصت
: -اكلك انت شسمك
: -فواد
: -فواد ماتكدر تكسر السلسلة هاي
عود أتحرك حاول شگد يكسرها جر راد اكو جلابتين اخذها من رف وشگد حاول بيها ما فاد كعد تعبان مهدود حيلة
: -دكوم يمعود شو كعدت
: ما تنكسر جا شسويلها
: -لعد نظل كاعدين هسه يجونة
: اااني اكول نطلع ونعوفة الشرطة اطلعة.
: -شطلعا ما اشوف صارهم ساعة يترامون برة لو سهله جان فاتوا وطلعوا
: -ادي مربطة وما ينفك شلون نطلعة وهو بعد ويا
واحد مو كلتي
: -اي عمة عزيز
: -جا نطلع واحد ونعوف واحد نعوفهم والشرطة اطلعهم سوة وهاهيه
: -لا مو عمة مو مهم رجال جبير بالعمر حتى اذا مات المهم مصطفى خطية بعدة شاب
: -انتي راح تموتينة والله اااامشي نننطلع يللااااااا
: -ماااااطلع اذا مو مصطفى وياي.
: -بابة شبيج موتي نفسج عليه هسه لو ما اعرفكم جا كلت يقربللكم
: -يقرب ما يقرب مااااطلع بدونة يلاااا حاول تكسر لسلسلة فدوووة اااااخوي اااانت السبع شنو تعصة عليك سلسلة
شجعته حتى بلكي يتحمس ويكسرها رجع يحاول يكسرها بالجلابتين.
: اسينات
: - شتقرين
: - شي ما تفهمه.
: -يمكن أفهمة
: -طبعاً لاااا
: -جربيني يمكن أطلع عبقري
: - مستحيل
قرب أكثر
: - زين خليني أجرب أقرا ويّاج يمكن أتعلم وأصير مثقف و مناسب إلج
ما رديت عيوني بس على الكتاب
هو لاحظ صوته هدأ شوي
: - شبيج صدك
: -مابية بس أسكت هسه ننطرد من وراك شوف الناس شكد هادية بس صوتك شعلوة
: -أدلل سكتنة
صدك سكت وأني كعدت أقرا بالكتاب شهكت من وصلت للسطر مكتوب لا يمكن التخلص منه الا.
بالموت إيدي تجمّدت على الصفحة عيوني توسعت بس حاولت أسيطر على نفسي هو مال براسه يقرب أكثر
: - هااا شنو سؤال صعب لو شفتِي بعبع
ما رديت بس بلعت ريگي وبسرعة سدت الصفحة
: - ماكو شي
: - ماكو شي؟ منو يقرا كتاب ويخاف منه
لفت عليه بعصبية وهمست
: - گلتلك اسكت لو تتطلع
رفع إيده ببتسامة
: - أوكي أوكي عصبية بدون سبب واضح أكو شي
رجعت فتحت الصفحة نفس الكلام بعدة موجود
تنفست أهدي نفسي وحجيت بخوف.
لا لا مو هسه يجي بابا وأكلة يلكة حل طبعاً اكيد ما يعوفني بابا
هو طگ الطاولة بخفة
: - أني موجود ترى مو شفاف تكدرين تحجين وياي بدل ما تسولفين وحدج
: - أتمنى
: - هاا
: - هيج
قرب أكثر يحاول يباوع بالكتاب
: - خليني أشوف شنو هذا الكتاب
دفعته بخفة
: - لا وخر
غمضت عيوني لحظة وبعدين قررت أتتجاهل إلى قريته بديت اكلب الصفحات بلكى الكة فد شي
هو ابد ولا مل مكابلني وكاعد
: - تره إذا أدورين على حل أني موجود.
: - شنو تحل واجب رياضيات
: - لا مشكلة حياتج لأن واضح عندج مشكلة
صحت بوجهة بعصبية
: - إي عندي مشكلة ارتاحيت
سكت لحظة حسيتة انصدم من نبرتي وبعدين كال
: - أوكي احچيلي
: -وليش أحجيلك
: -يجوز عندي حل
: -لا ماعندك محد عندة حل
سديت الكتاب بعصبية وكمت رجعتتة بمكانه
ماكو فايدة وكف هو باوعلي مستغرب
: - هاا خلصتي نروح لو بعد
ما رديت بس أخذت جنطتي وطلعت بسرعة من المكتبة ركض وراي
: - وين ست أسينات
: -منين تعرف أسمي.
: -برايج من وين
: -مو مهم العرفتة او لا
: -زين ما تعرفنه ما كتيلي شسمك
: -اااااني مثلا ليش أتعرف عليك شعندي وياك
جان ديمشي سريع وياي ويحجي وأني أباوع كدامي ضايجة مالي خلك بس هو لزكة خلي يرجع صوفي واخلي يكتلة اعلمه
: - أسينات تره أحچي وياج!
ولا جاوبت حتى ما التفتت
: - زين أوكي سوي روحج ما تعرفيني بس أني بعدني أعرفج
بقيت ساكتة رجع حجة
: - تره عيب واحد يحبج وإنتي لابستة
: -همزين تعرف نفسك ملبوس.
: - والله قوية عجبني الأسلوب
وكفت كشمت بوجهه
: - تگدر تسكت دقيقتين
ابتسم
: - إذا طلبتي بهيج نظرة مستحيل
تنهدت و كملت مشي
: - زين خلينا نتفق إنتي ساكتة وأنه أحچي صفقة مربحة إلي
: -ولا كلمة
: - تره صدك شبيج قبل شوية جان بيج شي
: - أسينات
تجاهلتة
: - زين ماشي لا تحچين بس لا تروحين وحدج هيج، الشارع مو أمان أوصلج
: - وانت أمان يعني؟
ابتسم بثقة
: - إي طبعاً حماية VIP
: - لا شكراً
: - والله لو مو أني جان هسه انخطفتي.
: - الله ياخذك.
: - لا تدعين عليه بعدني ما اعترفت بحبي رسمي وخطبتج
: - شوف لتلحكني بعد.
: - ليش
: - لأن ما أريد أشوفك
: - بس أني أريد أشوفج
: -وأني شعلية بيك
: - زين آخر سؤال إذا گلت لج أحبج شتسوين
: -ترى صار ساعة مزلغ نفسك ولابستك اذا كلت ما راح يتغير شي وأنت شتعرف عني وحبيتني
: - ما أعرفج حقج بس نبدأ من الصفر عادي
: - أني أصلاً مو بصفرك.
جنت دمشي وبالي بالكتاب حسيت بصوت همس التفتت وراي ماكو احد بس هذا يمشي بصفي
ما ركزت عليه حاولت اسمع صوت الهمس هذا هو اكيد مرافكني وين ما اروح
الهوا برد بشكل غريب.
خطواتي ثگلت وحسيت برودة أنتبهت على صوتة
: - أسينات
شهكت لفيت بسرعة عيوني متوسعة هو هم وكف يباوع وياي كتلة
: - انت سمعت شي
وكف باوع حواليه ببرود
: - إذا تقصدين صوت الحب اللي بكلبي إي سامعه من زمان
: - لااااا مو هذا.
: - زين شنو صوت ضميري هذا نادر يظهر.
قربت منه خطوة همست بعصبية
: - أكو صوت همس عبالك ناس تحجي هم تسمعه وياي
قرّب من يمي وحجة بخفوت
: -هذا همس المشاعر
خزرتة بضوجة طگهة ضحكة
: -ابد مو وقتك ابد
دفعته ومشيت صاح وراي
: - زين زين أوكفي شنو گال الصوت
كملت مشي وهو بعده وراي يصيح بس هالمرة صوته بدأ يبعد التفتت وراي شفتة واكف وايدة بجيبة يباوعلي
مشيت راسي هوسه أحس كأنو أكو ناس تحچي فوك بعض بس ولا كلمة مفهومة.
وصلت للبيت فتحت الباب دخلت دنكت أنزع حذائي وصحت
: - ماما
صوتي رجعلي صدى البيت هادئ سديت الباب وراي
حسيت اكو شي فتت جوة لكيت الصالة مخربطة
: -ماما وينج
مشيت لمطبخ للغرفة للصالة حتى الحمام فتحت بابه ماكو أحد مستحيل
طلعت مبايلي بسرعة اتصلت على أمي سمعت صوت مبايلها من فوك
صعدت للغرفة لكيته على شحن عايفتة هنا شنو
رجعت خابرت خالة يرن بس ما أجاوب
عضّيت شفتي اتصلت مرة ثانية
يلا خالة ردي.
نزلت الموبايل بيدي كلبي بدأ يدك وين راحو وكفت بنص الصالة حاسّة نفسي وحدي بشكل مو طبيعي
همست وين راحو دكيت عليهم مرة ثالثة ماكو
جسمي كله بدة يرجف مشيت للباب فتحته وطلعت
برا كعدت على العتبة الهوا بارد ودنيا هيج ظهرية حطيت راسي بين إدية وأفكاري تتصارع
وين راحو بدون ما يكولولي و ليش مبايل خالة مسدود والبيت فارغ بالعادة خالتي المتواجدة
اصلا لازم واحد يبقى بالبيت ما يطلع الكل هيج فجاة وبدون ما يحجون.
رفعت راسي الشارع شبه خالي رجعت حضنت نفسي
وأول مرة الخوف صدك بدا يتسلل
سمعت صوت خطوات رفعت راسي شفت حيدر
: - أسينات
: - أجيت حيدر
إجا يركض جنطته على ظهره شعره مبعثر
وكف كدامي يلهث
: - ليش كاعدة هنا
: -ماما وخالة مو هنا وما أدري شسوي كلت أنتظرهم هنا
: -جا وين ما كالولج وين راحوا
باوعتله عيوني بيها قلق واضح
: - ما أدري
عقد حواجبه
: - شلون ما تدرين.
: - رحت للمكتبة رجعت ما لكيت أحد دكيت عليهم مبايل ماما هنا وخالة ما أجاوب
باوع للباب بعدين رجعلي
: - خاف طالعين
: - لا مو من عوايدهم لازم واحد يبقى بالبيت
بدأ التوتر يبين على وجهه
: - بس لا صاير شي
بلعت ريگي
: -يجوز بابا صاير ويا شي وراحوا
: - لا أن شاءلله ماكو شي
سكتنا ثانيتين بس السكوت جان أسوأ
حيدر قرب كعد يمي
: - زين ندخل ننتظر جوة ليش هنا باردة
هزيت راسي
: - لا ما أريد أدخل وحدي
باوعلي باستغراب.
: - وحدج؟ أني وياج
همست
: - مو قصدي هيج
: - شنو قصدج
سكتت ما كدريت أشرح لأن حتى أني مو فاهمة
كعد بصفي خليت راسي على متنه وهو حضن جف ايدي يطمني
هو صح أصغر مني بس مرات أحسه عاقل شوي ويتصرف عبالك جبير ولو هو سخيف احيانا
بس هم ماخذ مكان صوفي وصاير ابو البيت بغياب بابا ومصطفى بقينه كاعدين بالباب.
ملاك:
عاد هو شد حيلة وجيب الطبر وكوم دك على السلسلة بكل قوتة لحد ما طكت
: -عشتتتت فواد
: -لا واجبي بس استعجلي نفكة ونطلع
صدك فتحنة ادي وهو مايكدر يمشي وفواد سندة
بعدنة بهذا الطابق المتروك دريد ننزل جوة
ولاكانة هذا المعضل صخوم مدري جلمود نسيتة وبيدة مسدس فواد من الخوف هد مصطفى وطاح على وجهه
دنكت عليه اصلا هو مو واعي بس لا مات وعلى عمو على يموتني ورة أني ورطت أبنة وجبتة.
حطيت أيدي على ركبته يتنفس خوش بي نفس
وفواد مخلي أدي فوك راسة عود يعني أني مستسلم
أني هم صفيت بصفة مخلية ادية فوك راسي همستلة: هسه شنسوي
حجة بخفوت: -ربج يحلها
: -ونعم بالله بس أضن راح نموت
: -جا غير هاي أسوالفج كتلج نولي نطلع ما قبلتي اكلنا هواء هيج أحسن
تقرب علينا وياشر بالمسدس
: -وين أبقوا نضيفكم
فواد: -لا رحمة والديك مستعجلين والله
رد عليه بغضب: أنجب ك، واد.
سكتنا أشرلنا نمشي كدامة نزلنا وهو ورانة نمشي رافعين ادينا وفواد يخوزر بيه عود يكلي كلها من وراج بعدنة تونة طالعين وما أحس غير واحد صاح أخخ ووكعة صارت ورانا التفتتنا
أشوفلك أثنين شرطة واحد لازم أسلاح والثاني طك جلمود مدري صلبوخ على راسة بحيث وكع
أجانة بهمة كال
: -شكم واحد فوك
رد عليه فواد
: ماكو سيدي بس واحد من الرهائن جوة
: -أبقوا هنا احنا داخلين نحررة.
صدك أخذني فواد ورجعنة للسيارة وأكو رمي من الجهه الثاانية يمه جازفت بروحي العزيزة علمود مصطفى السرسري شيريد عمي واني هاي روحي العزيزة ما أجازف بيها
مرت هيج عشر دقايق وطلعوا ساندين مصطفى بينهم جابوا للسيارة وجلمود هم كلبجوا
وراها طلعوا عمو عزيز وبعد أكو رهائن جوة اكو بنات هم ومبينين خلية جبيرة بحيث داخل البستان
لكوا هواي سيارات بيها مفصخة وبيها مغطيها بعدها جديدة يمكن سلابة مو بس قتلة ذولة.
كشوهم كش والله هاي كله بفضلي لو ما أني جان ماتوا مصطفى مدان إلى بالشكر
بس لا شسوي بالشكر لازم يجيبلي هدية كرسي جابر لان طلعتة من حلك الموت.
ركبت وأني بعدني أتنفس الحمدلله ما متنة
حسيت الدم دا يضرب براسي وكلشي صار فجأة هادي بعد ذاك الرعب وصلنا لمستشفى
التفت على مصطفى مغمى عليه وعمو عزيز مساندينه نزلوا كلت لفواد
: - دير بالك عليه فواد
: - لا تخافين عايش
نزّلونا نقالات أخذوهم حسيت نفسي ضايعة بينهم
بس فواد أخذني لطوارى كعدني على السدية
والممرضة جابت قطن وبلشت تنظف وتسألني شبيه بعدين تذكرت أهلي مبايل أريد أتصل صحت عليه
: - فواد
لف بسرعة.
: - ها شبيج
: - مبايلك أريد أتصل باأختي
مد إيده أنطاني موبايله بدون سؤال دكيت على أختي ثواني وجاوبت مبينة جانت منتظرة أتصال
: - ألو فواددد وينك
: -حوري أني ملاك عمري
شو هاي أنهدت عليه
: -الله يطيح حظج يااادبسز يا جلبة ولج تجين لو ما تجين الا أموتج
: -اهوو شبيج شكو
: -انوب دكول شكو ولج وين جنتي واني ميتة رعب عليج
: -والله جنت بالمالديف اعذريني ما اخذتج وياي.
: -انجبي من توصلين النا حجي ثاني المهم شلونج شصار وياج
: -بعد وكت عيني اني زينه وجنتل مان تبعج نقذني
حجت بفتور: -يا جنتل مان
: -فوادج
: -منو فوادي
: -ولج ثولة الولد إلى دازتة ويه الشرطة غير لو ما هو جان متنه
: -ياااا ليش اسمه فواد نسيت ولا دكولين فوادج منين اجة فوادي
: -هنيالي ما تعرف اسمه لعد شلون جاي
: -عوفج من اسمه هو شلونة زين بالي يمه كلت خاف يتعرض لمكروه واني موديته.
: -لتخافين عليه جنه صل مابي شي وصدك كلي لماما اني تمام
: -باعي بالليل اخابرج وحاجيها ترى هي ما مرتاحة
: -يلة سهلة نتخابر
: -شوكت تجين
: -باجر اكيد
: -وينج هسه أنتِ
: - بالمستشفى بس لا تخافون خشمي بس انكسر شوية
: - شوية؟
: - إي شوية بس مصطفى ويانه عمو عزيز هم زين
سمعت صوت أمي وراها
: - أنطيني الموبايل هاي ملاك مو
صدك حجيت وياها شوي وسديت الخط همزين ارتاحيت هيج
رجعت الموبايل لفواد
: - شكراً.
: - تدللين بس ترى بعد هالموقف لازم تعزميني
: - على شنو
: -اي شي
: -والله شكلك أني امراة فقيرة وانت ما جاي لسواد عيوني عود خلي ذولاك الناس يعزموك
ضحك، شفت مصطفى من بعيد كاعد على سرير الدكتور يفحصه وعمو عزيز يمه رحتلة
: - مصطفى
فتح عيونه شوي باوعلي ببتسامة
: - الحمدلله على السلامة
: - الله يسلمك شلون صرت
: - الحمدلله
مرت شوية و هو بعدة يضمدون بي
إجى شرطي كال
: - نحتاج إفادتكم.
وكل واحد أنطى أفادتة أني اشتكيت حتى على ابو البستان وامة وهو لعد أشلون اعوفهم هيج حجيت كلشي من البداية للخطف للمكان للبستان.
أسينات:
: -ما تخابرين أبوي
: مغلق
: -شعجب هو مو بمقاطعة كيبك
: -أني هم أستغربت ليش فونة مغلق
: -ماتدرين شوكت يرجع
: -ما أدري ماما ما كالت
: -نقدم بلاغ
: ننتظر لبعد شوي اذا ما أجوا نقدم بلاغ
راح كعد بالصالة وأني بقيت بالمطبخ أكل بضافري من القلق وعيني على ساعة كوة تمشي حتى الوكت واكف.
غريب شلون الانسان ممكن ينطفي بالحظة يتمنى لو يتلاشى ولو يفز ويطلع كلشي حلم من يحس باليأس كل السبل والحلول ضايعة وبابا مو هنا
افكار كله تجمعت براسي وما أبالي غير، الكلام إلى قريتة بالكتاب يحاول القضاء على كل من يشعرك بالأمان
هزيت راسي أبعد هالافكار من راسي شنو هالحجي وحتى لو فعلا حقيقة هم جان موجود أحد
اكيد طالعات هسه يرجعن.
زين اذا طالعات ليش الصالة هيج هوسة عبالك اكو شي صاير فركت وجهي وكمت من مكاني طلعت
شفت حيدر، بعدة بملابسة مال المدرسة وبعدة كاعد بالباب أجيت يمه
: شدكول نروح ندور عليهن
: -وين
: ما أدري خلي نسأل بالشارع أحسن ما نظل كاعدين وبلكي يلاكنة راجعين
گام قفلنا الباب وطلعنا نمشي لازمين ادين بعض بعدنة بمسافة عن البيت ومبايلي دك فتحته خالتي
ايدي رجفت فتحت خط
: -خالة وينكم أنتم
ردت بصوت يبجي: -بالمستشفى شمس تعبانة.
جمدت من الخوف حلكي نشف ماكدر أسالها شبيها وحيدر أخذ المبايل من أيدي كام يحجي وياها أخذ العنوان وكلي
: -أمشينا أسينات
حجيت بضياع وأدموعي بعيني
: -ماما شبيها
: -ماااابيه شي أمشي
أخذني ورحنا وأني طريق كله أبجي وادية ترجف وصلنا ونزلت كوة أمشي رجلية ميته
ثمة لحظات تكون فيها الروح جاثية على ركبتيها مهما كان وضع الجسد.