رواية مرواد الظلمة الجزء الثاني للكاتبة هيلانا الفصل الرابع
مرواد الظلمة (الحلقة الرابعة)
مساء الخير
#مرواد الظلمة
لا تنسون تصويت وتعليق
علي الفقرات لطفأ ومتابعة للحساب
ل أنستكرام 22 mc. al.
: زينب
: -ما أريد أروح
: -بس ذولة أعمامج وهذا قرارهم مانكدر نمنعهم و أنتِ بعد منو الج غيرهم
: -عايشة ويه بيبي ومستقرين ما محتاجة أحد
: -حبوبتج ما دايمتلج
: -خالو مقتنع بالكاعد دكولة شلون ترديني أغير حياتي بيوم وليلة أشلون أعيش ويه ناس لا أعرفهم ولا يعرفوني
: - زينب هذا القرار مو بدينة أخوج بعد راح الله يرحمه وإحنا عدنا عوائل ومسؤوليات منو الج بعد
: - يعني شتريدون أروح أعيش ويا ناس غربة.
: - مو غربة ذولة عمامج وهمة كالوا راح يهتمون بيچ أنتِ بتهم ماكو أحن من أعمامج وأهلج عليج
هم يعرفون مصلحتج
: - أني أعرف مصلحتي وما أروح أبقى هنا يم بيبي
: -ومن تموت منو الج
: -اسم الله عليها عمرها طويل ولذاك الوقت اكو الف حل
: -العلية كتلج بعد أحجي هالحجي ويه عمج
عافني وطلع بقيت نار وكابة بصدري أشلون أروح
وي. ناس ما شايفتهم وماما جانت تشكي
من ظلمهم وطغيانهم أشلون أعيش وياهم
باوعت على صورة مشتاق معلكة.
وعاتبتة بدموعي راح عزوتي بعد منو إلى كعدت
أبجي وأحس الدنيا وكعت على راسي
ورة صلاة الظهر أجة عمي ومرتة دخلوا كعدوا جوة يم بيبي تقربت وكفت يم الباب
أستمتع الهم سمعت بيبي دكلهم متعصبة
: -أخوها ميت ماصار جم شهر يا زواج
فز كلبي من سمعت بسيرة الزواج وعمو رد عليها
: -حجية لا دشين بنص من رخصتج أندهيلي على بت خوي
ردت حبوبة وهي طكت عوجيتها بالكاع.
: -اكلك أني ما أقبل بت بتي تبقى يمي وين جنتوا عنها هسه جايني ما أطيها
مرت عمي يسرة جانت ساكتة من شافت بيبي متعصبة كالتها
: -مالج غرض بيها أنتِ موش ولي امرها
: -يسيرة بت بتي شني مالي غرض
رجعت للمطبخ أتحركن راح أشوف أيام سودة
يربي شلون بيه أنهزم ماكو غير حل
اشرد وبعدين من تهدي الاوضاع أرجع
من ينسوني كلش
أحس نفسي ضليت وحدي سندي بالدنيا راح
منو يدافعلي ويوكفلي هسه.
شفتهم طلعوا بالحوش وأني طلعت وراهم من باب المطبخ صحت عمي التفتت عليه لاف عباتة ومرتة وراه
: -عمي أني ما موافقة
: -اافاااشهالحجي
: -الي سمعتة عمي اريد أضل يم بيبي
: -عليش يابة
: -لان متعلمة على عيشتي هنا ياريت تحترمون قراري وتعوفني
يسرة: -شنهي يحترم قرارج هي النسوان والقرارات شنهي
نصير: -لزوم توافقين عمي زينب
زينب: -عموو ما موافقة هي مو أجباري ترة.
حسيتة أنعكش لف عباتة على أمتونة وتقرب وكف يمي حجة بصوت هادي بس قاسي
: -أسمعيني عدل يا بت أخوي أخيج بعد راح وعيشة بغداد مالج وخبزتج بعد يمنه ويو عليتي خشمج ومارضيتي أعلگج من كراعينچ وأصلبچ فتهمي يو لا
احس الدمعة وكفت بطرف عيني هزيت راسي ب لا
رديت عليه بحدة
: -ما موافقة ولا راح أوفق لا تهددني
ماحس غير لزمني من شعري وعاط بيه
: -أشلللووون ولج
: -اااايددك عني عوووفني.
بيبي تحاول أدفعة عني بس هو قوي ومرتة واكفة بعيد ولا مهتمة
التفت دفع بيبي عنه وطاحت صرخت أني دريد أروحلها لزمني وجرني عليه
: -موافقة يو لا
: -لاااا والف مرة اكلك مااااا اوفق لا تحاااول عمي
أصلا بعدني أصغيرة ما ازوج
يسرة: -البحلج معرسات شنهي أصغيرة خايبة لا تعلكين ضغط الزلمة
كالي عمي
: -الج هاليومين بالهواي ادناشين رايج بيهن وريدن جواب يسر خاطري خوش بوية.
هزيت راسي ردتة يهد شعري كطعة مجلب بيه غير أجلبة وبيبي واكعة
عافني ركضت عليها كومتها وهي كوة تمشي
مرة جبيرة ودفعها الله ينتقم منهم
همة طلعوا وأني دخلت بيبي جوة ورجعت قفلت الباب وراهم. كعدت يمها وهي تلوم علية
ودكلي اعمامج شرانين وافقي شسوين بعد بالي مو يمها أفكر أشلون أشرد واذا شردت وين أروح
بالليل:
الهوا يلعب بالباب ويحركة مردود على نص ما سادي عيني عليه لفيت وجهي على بيبي نايمة بصفي.
ظليت أتكلب على الفراش وبيبي يمي أنفاسها ثكيلة نايمة
گمت بخفة وگلبي يدگ خاف توعة بيه مشيت للغرفتي فتحت صندوكي الخشب بي ملابسي
لمت كم ثوب و فلس حطيتهن بجنطة وياهن صورة
الي أني ومشتاق سوة خليتها وياهن بالجنطة
لبست عباتي وطلعت شفت بيبي نايمة
ايدها طالعة من اللحاف
قربت منها دنكت عليها بستها براسها
سامحيني حبوبة أني مجبورة أعرف غلط بس شسوي ما أريد يذلوني ولا أعيش بالغصب يمهم واكيد أرجع بس يكطعون أملهم مني.
مشيت لباب فتحتة وطلعت الشارع أظلم وفارغ
أمشي وأتلفتت وراي
وصلت للشارع العام شفت تكسي وصلت يمه كتلة بتردد
: -سلام عليكم عمي
أندارلي جان يمسح بالدعامية ما منتبه عليه خلة غترتة على راسة ورد
: -وعليكم السلام بوية تفضلي
: -عمي توصلني للكراج
: -أصعدي
شلت جنطتي وصعدت ورة هو تحرك وكال
: - وين بالضبط بالبداية لو يم الكهوة انزلج
: -لا يم الكهوة
سكت، وأني أكل بضافري من القلق لحد ما وصلني.
نزلت يم الكراج ومشيت للخان حجي صالح أندلة
مشيت وكل شوي أباوع وراي الشارع أظلم يخوفني
خاف يطلعلي واحد منا منا
وصلت وكفت أكبال الخان لحظة جنت مترددة بس أبقى ليلة هنا وبعدين أشوف شسوي
دخلت رجال شايب جان موجد تقربت وكفت اكبالة كتلة
: -أريد غرفة
أخذلة نظرة علية ونظراتة مو مريحة رد
: -كم يوم
: -بس ليلة
: -20 دنيار
: -مو هواي
هز راسة ب لا فتحت جنطتي وطلعت أفلوسي أحسب بيهن وهو يباوع عليه بطرف عينه
: -عندج هوية.
: - ايي طلعت الهوية والفلوس أنطيتهم الة
أخذهن وكلي الغرفة رقم أثنين فوك
مشيت وأني ادور وين رقم أثنين وصلتها دخلت وسديت الباب جان بيها جرباية حديد وفوكهه دوشك وبطانية وضيگة المكان يخنك ومو مريح
راح أشوف شگد أبقى بلكي يملون ويمشون أعمامي
اعرف قراري خطأ بس مو بيدي
هاي أول مره أحس بالوحدة
حطيت أغراضي على جرباية وطلعت صورة مشتاق
باوعت بيه حسيته يباوعلي ماعرف اذا راح تلومني او تزعل مني بس اختك ما بيدهة شي.
حطيت الصورة جوه المخدة وتمددت سحبت الغطا عليه أحاول أنام
بس كلبي مليان خوف اول مره أنام بمكان غريب
مو بيتنا الدافي المتعودة عليه
حاولت هواي انام بس ما كدريت كل ما اسمع صوت افز وكل شوي اسمع صوت باب
بعيد ينفتح أو شخص يعبر بالممر يخلي كلبي يدگ بسرعة
ثاني يوم الصبح كعدت راسي يوجعني كمت أريد أغسل طلعت من الغرفة أكو حمام بالجهه الثانية
مشيتلة غسلت وجهي وبعدني اباوع على وجهي بالمراية سمعت صوت بالممر.
: -عمي أبو حسن گهوة لو چاي
وصوت ثاني يضحك ويرد عليه
: - سويلنا گهوة
لفيت شعري وعدلت نفسي رجعت للغرفة لبست عباتي وطلعت مريت من يمه الرجال ابو الخانة
يشرب جاي سلمت عليه وطلعت كتلة نازلة اشتري وارجع اكو دكانة قريبة شفتها من الشباك
صاير بركن من جهه الشباك درت عليها أخذت منهم أكل ورجعت أمشي وأحسب بفلوسي
شگد صرفت منهن وشگد بقن. رجعت للغرفتي
اكلت بيه وضليت كاعدة ماعرف شسوي.
هسه دروا بيه اكيد معقولة جاي يدورون عليه
لو لا هسه كم يوم ويملون متاكدة
وارجع للبيتنا ان شاءلله بيبي ما تزعل
مني حتى اذا زعلت اكدر ارضيها
مر اليوم والتفكير هلكني هلاك الليل خيم واكفة يم الشباك أباوع على الشارع فارغ وهدوء بس صوت المولدة البعيدة
رجعت نمت على أفراشي وبقيت أتكلب أنوب الحياطين مجلدة باوراق ولونها خافت الضوء
عاكس على الحايط وهو مجلد منطي لون كيئب
ومظلم للغرفة.
غمضت عيوني دنام وبعدني ما غافية كلش شبه
نايمة وسمعت طكت الباب على الخفيف
فتحت عيوني بسرعة وفزيت عيني بعين
صاحب الخانة طفرت من جرباية بسرعة وعطت بي
: -شسسوووي هناااا
كالي: -اسم الله اسم الله أجيت أطمن عليج
أباوعلة كرشة كدامة و حاط نظارات عريضة وشكلة مو مريح شنو يطمن
كتلة برتباك: -شكرا عمي أني بخير تكدر تتطلع ومايصير بعد تتدخل للغرفة هيج
ضحك ضحكة غريبة شوي وراة شي قرب خطوة رجعت ليورة كال.
: -لا تخافين بس أرد أطمن عليج الدنيا خربانه ومحد يعرف شنو بيها بعدين ليش هنا وحدج أهلج وين
: -ياااريت تتطلع ومعليك بهيج أسالة شخصية لا تخليني أعيط
: -على شنو العياط عجيب واحد يسأل عليك ماتقبل
والله حاس بيج شاردة من أهلج
ركضت بسرعة على جنطة مالتي أخذتهة وادية ترجف طلعت صورة مشتاق من جوة المخدة
وتحركت اريد أطلع من الغرفة وهو لزمني بالباب حاولت أدفعة بس أقوى مني
: -عمييييي شسوي شببييك.
: -نتفاهم وين رايحة بالليل الدنيا مو امان
: -اهوو معليك
دفعتة وركضت لباب وهو وراي يصيح ردت بس أطلع يا ربي شجابني لهنا
وأني طالعة وهو وراي يصيح زينب أوكفي
الي يسمعة يصيح بسمي هيج يحسسني ماكلة ويا بالخمسة وعشرة عمر الله ياخذة
لاكني وجهه بوجه عمي ويا أثنين زلم لابسين دشاديش سود وچماغات هم سودة
شهكت ذيج الشهكة من جهه الباب همة ومن وراي ابو الخانة يصيح زنوبة أوكفي.
الله لا ينطيك على هالمصيبة عمي عيونة صارن بكصته لزمني وضربني راشدي وكلي
: - يااهوو هذا ولج شاردة ويه صاحبج
: -لااااا عمي والله ال...
قبل لا أحجي ضربني مرة ثانية وذولة الشباب الويا لزموا ابو الخانة سحكوا سحك راشدي وچلاق
سحلوني للسيارة مالتهم صعدوني ورة أبجي وأدموعي ترسن وجهي
جنطتي ماكو بقت بالخانة والطريق كله يسبون باهلي حتى أخوي الشهيد ما خلص منهم الهمج.
هسه هو ميت ليش تسبونة. وصلنا بيتنا ونزل يسحل بيه لاكتة بيبي بالعوجية كوة تمشي
تريد تاخذني منه وتحميني بس ماكو صار ثور
بس يصيح ويسب
دخلني للغرفة وكطعني تكطع بالضرب ويه كل ضربة اعيط وبيبي أدك على الباب
يضربني ويكلي: -تصخمين وجوهنة زينب ولج شلون تشردين هذا الشايب مواعدج أحجي
ما أطاني فرصة أدافع عن نفسي طلع من الغرفة بعد ما خلاني أجنازة أون من كل جهة.
بقيت بمكاني واكعة على وجهي يم البوفية وبيبي اجتني حضنتي وتبجي على حالي وتلوم بيه
لان شردت لو ما شاردة أحسلي اكلت كتلة
بحيث أعظامي احسه كامت تسبني هم
بيبي تحجي وياي بس أني ما أكدر أحجي ماگدرت حلگي ناشف ودموعي تنزل
حتى الهوا حسيته ثكيل ويخنكني بيتنا صنته بس صوت عمي يحجي بالحوش
وبيبي حاضنتي وتبجي وكلشي ساكت تباوع بوجهي تتلمس خدودي اللي كلها كدمات
: -الله لا يوفقهم شسوا بيج.
گعدتني بصعوبة وغطت ظهري بعبايتها السودة وهي تمسح على راسي
ضليت ساكته ومغمضة عيوني وأبجي بدون صوت
وشفتي ترجف تمنيت أخوي موجود جان محد مد أيدة عليه
عشت أسنين مهيوبة ومعززة بوجودة هسه ضعت
خلاني وحدي ومشة يدكون عليه ويضربوني
لان ما عندي والي جانوا قبل ما يجون ولا يقربون منا هسه أخذوا راحتهم
ما أعرف أشلون وشوكت نمت بس فزيت وحدي بالغرفة ومتغطية بعباء بيبي وفوكهه بطانية.
اريد احرك روحي وجسمي كله يوجعني اديه كله كدمات وخشمي يوجعني
كمت كوة وعيني على جف ايدي صاير أزرك البارحة من دفعني اول ما دخلت للغرفة نضرب بالباب
لميت نفسي أشلون ما جان وكمت غسلت طلعت برا لكيت بيبي مسوية ريوك وكاعدة وحدهة
بس صافنه ما ماكلة شي احسها محتارة وما بيدهة شي تسوي بس تبجي وتواسيني
شافتني وابتسمت: -هلة زنوبة كعدتي شلون صرتي تعاي يمي.
اجيت كعدت بصفها بدون ما أحجي وهي صبتلي جاي وتسولف وياي اخر شي كالتلي
: -أقتنعي بقسمتج ووافقي يحبوبة أحسلج
: -ما أريد
حجيتها وبجيت كلش مكسور خاطري وضايعة
وحيرتي حيرة جبيرة
مسحت دمعتها بطرف شيلتها لزمت جف ايدها حجيت بدموع: -خلي نشرد أني وياج سوة أني وحدي اخاف عاد سوة والله حتى اشتغل بي مكان وادبر مصروفنه ما نخليهم يعرفون مكانة.
: -لا يحبوبة أنتِ بعدج شابة وما تعرفين يطلع عليج الحجي أشكال الوان والدنيا موش امان والناس ما تتمن أرضي بنصيبج وخلي ثقتج بربج ان شاءلله خوش وليد واني البارحة شفته حسيته خوش ولد مو مثل عمج مسودن وعسى ولعلى ربج يحنن كلبة عليج ويحبج ويدير بالة عليج ويعوضج
سكتت، حتى حبوبة سحبت نفسها عفتها وكمت دخلت جوة.
مر يومين وعمي حدد العرس هذا الاسبوع بدون موافقتي كال لبيبي أزوجها واحد من الولد وتعيش يمنه بين اهلها وناسها
وأجة وي عمي مرتة وبعد مرة ثانية كالوا اخته يعني عمتي وياهم ذولة الشباب الاثنين
واحد اسمه حسن إلى هو على اساس راح يصير زوجي والثاني اخو هاني
البيت صاير هوسه نسوان اخوالي هم أجن وبناتهن واخوالي يرحون ويردون
كلشي ديمشي بسرعة والكل فرحان بس أني أباوع بالوجوه ردتلي واحد بكلبة رحمة.
ينكسر خاطرة عليه ماكو شكد خطية أني
صافنه على زماني وين ماخذني
عمتي سوت جاي وتصيح: -يسرة وج يسرة
ومرت عمي ملتهية تسولف وي نسوان خالي كالتلها بملل: -وعمة العماج شمالج
: -جاي ما تردين
: -ياا خايبة جا ماتجيبي راسي موتني
: -جا صارلي ساعة أندهلج يالغمة و أنتِ صافنه
ضليت أباوع عليهن أسلوبهن ما حلو ولا كنما مرتة اخوها وهاي حماتهة شوي أحترام
يعني هم هيج يسون وياي يربي شلون بيه.
جابلي عمي ملابس عرفتهن أجهاز العروس عود
بيهن ثوب أبيض مطرز بخيوط ذهبية
جنت لابستة وبيبي كل شوي تباوعلي وتصلي على محمد. هو منو راح يحسدني
هسه لو يحسدوني وأتصير بيه سكتة قلبية وأموت ولا هالعرس الاكشر
طبعا هذا أبن عمي حسن شفته مرة وحدة من الشباك بالحوش واكف حسيته ضايج
مو شكل عريس وفرحان احسه مجبور مثلي
علي هالزواج لا يوافقهم ليش هيج يسون بينه
بيبي كاعدة يم الباب وجهها متغير.
عيونها مليانة دموع ومن تشوفني أباوع الها تبتسملي عود على اساس هي فرحانة
هو مبين بوجهه مو فرحانة أبد
ما حاسة هذا بيتنا احس غريب ولا عندي شعور بي شي والعرس احس اجنازتي هاي مو عرسي
عيوني حمرة من البچي وشعري ملفوف لان عمي ان شاءلله عمة العما من ضربني كطعة
خليت ولفيته احسن خاف ارجع أنضرب عاد ما يلزمون شعري ويكطعوا
بعد همة صاحبين بيت بعد منو يمنعهم
سمعت من بره صوت عمي
: -يابه سون درب القاري أجة.
كومتني بيبي كعدتني وهن طلعن بس مرت عمي يمي وبيبي ودخل القاري (المومن) وعمي وحسن
ملجوا النة كوة كتلة موافقة عادهة
مرتين وبالثالثة الا كتلة
من عادتهم الملجة(العقد) قبل الزفة والعرس بكم يوم وراها العرس
العصر أخذوني كملوا أجهاز العرس إلى ما جان أكو بي اي لذة او فرحة بداخلي بس همة فرحانين
بس ذهب جابولي هواي بأون وتراچي زوجين وكلادة مدورة جنه صحن مال جاي كلش جبيرة واحزام هم ذهب وبتوت.
استغربت ليش هالكد جايبين بذات الذهب
جان غالي
يمكن هاي أطبيعتهم يلا ميخالف أضمهن لوكت الشدة
خاف أشرد حتى أبيعهن وأستفاد منهن
بعد ما كمل كلشي أجة يوم العرس
وجانت أخر ليلة إلى بيت أهلي جنت حزينه وبيبي شرطت عليهم يسون الزفة بدون هوسه
لان مشتاق ما صارلة سنة بعد وعمي كالها ولا يهمج ما نعتبرة عرس بسكتة نسوي
نكول مرة مختاضة (زعلانة) ورجعنها لرجلها بدون هوسه وصفك وهلاهل.
الصبح أجت جيرانة حفتني ومكيجتني وضفرتلي شعري كصيبة وحدة وطلعتلي بكلة من كدام
جانت هاي التسريحة بوقتها اسمها القاتلة
ودوم العرايس يسون منها
لبسوني البدلة واني جسمي كلة يرجف خايفة
احس ماشيه بطريق مجهول
ما اعرف شنو ضاملي الوكت وشراح يصير
راح أحب زوجي أتعود عليه لو أشرد
والله من هسه مخلية الشردة على بالي
بس القلق والتوتر أكلني أكل
للعصر أجت الزفة سيارتين صعدوني بوحدة منهن وبيبي وياي.
طبعا بس اني وبيبي والسايق وعمي كاعد بالصدر
العريس ماكو
لان ما يصير يجي بالزفة العريس يبقى بالبيت أبو او واحد من اهله يجي بمكانة
أخذتنه الطريق أبجي وتعبت كلش وراسي صار شكبرة الشي الوحيد إلى مهون عليه بيبي وياي
وصلنا الغروب كلش منطقة ريفية نزلوني من السيارة عيوني صارت على الزلم والنسوان كله سوة
هي الظاهر كله اقارب أنوب يدكون ماصول
واحد منهم يموصل والثاني يغني.
والبقية يدكون جوبي وكله لابسه دشاديش وبيه معلكة والركص صاير على فلس
عود حبوبتي كالتلهم احترموا شهادة مشتاق
ولا كنما ولا يكول أبن أخوهم
دخلوني للغرفة، كعدوني على الجرباية ومرت عمي وخرت الطرحة مني
فتلتت عيوني بالغرفة طين ومسكوفة بعمدان
عمدان مال أشجار تمر
والحياطين مال الغرفة كله سودة ومصبوغة بلون ازرك ظاهر جان يحركون بيه نار وحطب
وهيج مصخمة الحياطين وفارشين فرشة باالكاعية والنسوان تركص.
من يركصن مو يطكن أصبع ويدبجن التربان يطاير وية الهوء من الكاع
بقيت صافنه أني شجابني هنا أمدة قسمتي
اي والله وأمداني
لعشرة وبعدهم يركصون وهوسه أنوب جابوا عشة
بيبي ما أكلت واني كاعدة على الجرباية
وأباوعلهم وهن كلهن ياكلن وويسولفن ويضحكن
وكل شوي وكالن: -أكلي وراج شغل ليلة
ما رديت عليهن يمسلتن بس اني بطني مغصتني
من الوضع
أنوب طلعوا وبيبي وصتني وباستني براسي وطلعت واسمع الهوسات قريبة يعني راح يجي.
صدك زفوا ودخل عليه وسد الباب شال الطرحة عني أباوعلة لابس دشداشة خضرة وحذاء وسترة
كالي: -على راحتج بدلي
والله ولا أبدل أبقى بالبدلة كتلة بنتر
: -ما أريد أبدل مرتاحة هيج
تنهد وهز راسة ومشة وكف يم الزاوية نزع السترة
والحذاء والدشداشة
واجة تمدد على الجرباية وانطاني ظهرة ونام
هذا شبي والله سالفته مو خالية
توقعت يسوي شي بس هو ما أهتم وعافني
وراح انام يعني مبين مجبور مثلي
ومالة رغبة بيه. رفعت عيوني ليفوك.
يربي معقولة حنيت عليه فدوة كمل فرحتي وخلي يطلكني
كعدت بالزاوية سحبت الصينية مال الاكل بيه
رجل طلي وتمن كعدت اكل شاهيتي أنفتحت
صارلي أسبوع صايمة ما اكل من الخوف
هسه شوي ارتاحيت
مبين ما يريدني راح أحاول أقنعه نطلك لو ابقى يمه فترة ونلكة غير حل
لو اكلة اذا اهلك جابريك خلي نشرد سوة لشمال العراق وهناك نفترك وكل واحد يشوف دربة
احسن ما نبقى عايشين سوة واحنا مالنا نفس
واحد بالثاني.
كعدت اكل ورجعت الصينية لمكانها بس ماكو أشلون أغسل هسه أنوب دمرت نفسي أني وبدلتي
الغرفة مابيه شباك لا بيه رازونة
أتصير دائرية
أخذت ماي وفتحت الباب طلعت شوي برة كلش يم الباب لان اخاف غسلت ادية أشلون ما جان
وباوعت المنطقة ظلمة ماكو ضويات ولا اكو صوت تحس المكان هنا مكطوع أكو غرفتين شوي
مسافة كم خطوة عنه ذني لاعمامي لعد المن
رجعت دخلت وسديت الباب
هو أشلون باب خشب اذا أدفعة يوكع وينكسر
مدري شلون مثبتينة.
نزعت البدلة ولبست ثوب أبيض خفيف
بس طويل واردانة أطوال وفتحت شعري
اجيت نمت بالطرف الثاني من الجرباية جنت تعبانة والطريق أبعيد حطيت راسي وغفيت
ما أدري بيش الساعه ولا شگد مر وقت بس حسيت بحركة بالغرفة وهمس قريب يم راسي
فتحت عيوني لمحت رجال ملثم واكف يم راسي بس عيونة مبينه والثاني لازمة حسن وماطلة باالكاع يم الجرباية
وحاط الخنجر على ركبته غمضت عيوني بثكل حسبالي حلم وانوب فزيت وكمزت من مكاني.
مرعوبة مصدومة شيسون ذولة الزلم بغرفتنة
وهذا الوكف يم جربايتي قبل لا اعيط التفتلي لزمني
حط ايدة على حلكي والخنجر على ركبتي
فكيت عيوني على وسعهن نشليت شل من الخوف
هذا إلى لازمني بس يراقب
وذاك حاط خنجرة على ركبت حسن يريد يذبحة وحسن يدافع بي ويحاول بكل قوتة يدافع عن نفسة الروح عزيزة
بس هو بالحظات حز ركبتة بالخنجر وذبحة
مثل الطلي خلة دمة ينبر
عبالك بوري ماي وانفتح احس كلبي وكف جمدت ذبحة ياااااالله ذبحة.
من الصدمة ما بجيت بس شابحة عيوني عليهم كام وبيدة خنجرة مسح الدم بقميصة
جان لابس اسود كله ولابس جراوية سودة وملثم
تقرب مني وحط عيونة بعيوني حجة بتهديد
: -اذا فكيتي حلگج بچلمة أعاود لديرة وأذبچ خوش؟
ما طلعت مني اي حركة وصاحبة وخر عني واني على جرباية بمكاني طلع لباب
وهذا إلى كتل حسن دنك اخذ جفيتة من الكاع
والتفتلي رفعلي أيدة وسوالي حركة ذبح
بركبتة عود أذبحج وصاحبة إلى ويا كالة.
بهمة: -يلاااااا مرواد لا يحسون بينه العرب
طلعوا بثواني واختفوا اعيوني صارت على حسن
دمة ترس دشداشتة يالله يالله شسوي
جسمي كله يرجف كمت من الجرباية وطحت بالكاع رجلية ما تعيني أكوم احس الموت دخل بجسمي
أشلون هيج ذبحة بدم بارد ولا عبالك أنسان
هاي روح طلعت اركض والدنيا ظلمة
بطرك ثوبي للغرفة عمي وعمتي
جان بنيانهم عبارة عن ثلاث غرف طين وبين غرفة والثانية مسافة والسياج مال البيت
حطب وعمدان مال أشجار وشرك حديد.
الهوء بارد لفتح وجهي واني اركض وأصيح
: -حسن أنذبح عميييي ويننك ويييينكم حسن انذبح ذبحوواا حسن وينكم عمييي وينك
اعيط بكل صوتي واحس كلبي يريد يطلع من هوال الموقف إلى شفتة مستحيل بشاعة المنظر
أشلون ذبحوا هيج بدم بارد الله لا يوفقهم
كلبي يوجعني عقلي صفن.