رواية مرواد الظلمة الجزء الثاني للكاتبة هيلانا الفصل الخامس
الليلة چانت ظلمة وباردة
وأني مثل المسودنة
أركض وجسمي يرجف
وروحي متسربلة وأشهك ركضت للغرفة مال عمّي...
أدك الباب بسرعة وأصرخ
شنو هالحقد شنو هالحوشية
شلون يقتلون أنسان بهل طريقة الباردة هيج دم بني آدم رخيص لهالدرجة
ذبحوا ذبح ومشوا، المنظر يدك براسي
إيدي ترجف والهوا يكفخ بوجهي
بس ما حسّيت ببرودته الغصة چانت ثگيلة بحلكي
لميت أدية وأني أدك على الباب وأصرخ
: -ذبحوااا حسن عمييي وينكم.
انفتح الباب طلع عمي توة كاعد من النوم وراه مرتة
وولد عمي هم فزوا بعيون مفزوعة
نصير: شبيچ أاااحجي شمالج وجّچ
تلعثم صوتي...
الكلمة الوحيدة إلى طلعت من حلكي قبل لا تهوة أركبي وأاوگع
: -حسن، أنذبح، ذبحوه عمي، ذبحوه
وطحت. طحت بالكاع بدون ما أحس على نفسي
هوال الموقف يفرفح الروح
فزّيت الصبح البيت متروس نسوان
وجوه كله سود ومظلمة وتلطم
هواي ناس موجودة دورت بيبي بعيوني بس ماكو بينهم ردت احد يمي كله ناس غربة.
زلم هواي أقاربهم جاية الكل ينوح
الكل يتوعد بالثار...
عمي واكف بنص الحوش
لابس شيلة مرتة...
شادها عالراس مثل الجراوية
وصوته مبحوح كال بتوعد
: -ما أنزعها، إلا آخذ بثار أبني وأعيش وأخذ بثارة للاخر يوم بعمري
رجعت كعدت بالزوية يم البوفية
بعدني بثوب العرس الأبيض...
ما حسّيت إلا مرت عمّي طبّت ترعد وتريد تمطر
بيدها صمّ تراب طشته بوجهي
وسحلتني من إيدي كدام النسوان
دكول بصريخ.
: -هذاااا اصويحچ من بغداد لحگج، وكتل ابني ياهوووو ااااحچي
: مااا أعرف والله عمة جان ملثم ما شفت وجهه
بس هي ما صدّكت مدّت إيدها ضربتني
كطعت شعري بيدها
والنسوان يصيحن عليها وديحاولن يفكنّا.
عمة رضيّة سحلتني من أيدها وعاطت بيها
: -هدددي البنية ما يصلح أطگينهه وهي عروس
: عرس المصخم على راسج وراس الخلفج جيتج شوم علينا
رضية: حطي الله بين عيونج أنتِ صاحبة بنات البنية شعليها شمالج تسودنتي.
: هذااا أبني المكتول موش أبنج والجمرة ما توجي قير راعيها
: -وشني فرق حسن عن سائد نفس المعزة الله شاهد وعيب حجيج لا تسوين فتنة ولا تبلين المكرودة فوك ما ترملت بليلة عرسها هنوب توصخين سمعها وأطگينها
باوعتلي وأني لابدة بسد رضية
يسرة: انزعي البيييض انززززعي المن لابستة بعد؟ لاصخام وجچ موتي أبني بعدچ ما جيتي ام اليعولة ام الزلم هذا اصويحبچ منو قيرة أبو الخانة
أخذتني عمة رضية للغرفة.
وسدت الباب وحضنتني أسكت بيه
چنت أبچي...
رعب تعب صدمة، كلشي مجمع عليه والله أني خطية جنت أبجي على نفسي شنو مصيري
شراح يصير بيه روحي مكسورة مو لأن زوجي
أني أصلاً ما حبيته ولا عرفته
بس يموت بهالصورة البشعة خطية
شي ما يكدر العقل يستوعبة وفوكها
أمّه تتهمني إنّي إلى يد بموتة
شلوني أبرر لناس وهمة من أول يوم يشوفوني بهيچ مصيبة
رضية باوعت للحنّة إلى بعدهة بيدي
جانت تحجي بصوت هادي وياي حسيتها مكسور خاطرهة عليه.
رضية: عاينلي يمة زنوبة وفهمي الحچي زين
هزّيت راسي بمعنى أسمعج
كملت
: إحنا عدنا اليموت رجلها وتترمل تلبس أسود طول العمر وما تتقرمز (ما تتزين) ما تلبس لوان وتبقى أرملة المرحوم معززة بين أهلها ماكو زواج ولا يفوت عليها رجل قيره السواد ما تنزعه إلا بالمغيسل من تموت هذا احترام للمرحوم
هو على أساس بعد إلى صار بيّه أزوج
بس خلة أرجع لبغداد والله ما أريد شي
مرّ أسبوع الفاتحة
لطم وصياح و قراية.
وأني هم أبچي وياهم أبجي على نفسي وعلى حضي وساعة السودة الجيت بيه هنا
وكل ساعة مرت عمّي تهجم عليّه
تتّهممني وتصيح
: صاحبها البغدادي كتل ابني
وياريت صدگ عندي صاحب حتى أگو فد شخص أنهزهم ويا وأشىرد من هالضيم بس أني وحيدة ويتيمة
ورا ما خلصت الفاتحة
رباب إجت وكالتلي
: خلص عرسچ بعد كومي شدي أوزارج واشتغلي
عرفتهه عود تستهزاء گلتلها باستفهام
: -شنو أوزاري
شمرت العباءة عليّه وتوزرت كدّامي.
وحچت: تنوّعي عليه وتعلمي شلون تتوزرين حتى نروح للمحصار
لفّت العباءة علّيه وسوتلي مثلها لان ماعرفت أسوي وحدي وأخذتني يم الحلال
عرّفتني على البقرات
: ذني هْوايشنة والغنم وعدنّة دوابات وأصخول ومطاية
جانت تحجي وتعدد بصابيعها
وتشرح عن العيشة مالتهم
وأني أستمع الها اصلا ما أدري شسوي بس اكلها
اي ومنها فهمت إنو عمي نصير
مزوج اثنين أم حسن الجبيرة وراضية الصغيرة
أولاد أم حسن محمد وزيدان حسن و رباب وعذراء.
وراضية عدها بس سائد وخالد
وعدهم بعد عمّتي هم عايشة وياهم أرملة...
ويّاه أولادها أثمانية وبعد الباقي مو مهمين تعرفوهم
ثلاث غرف عدهم بس كل غرفة جبيرة تاخذ عشيرة
وهي نفسها نطبخ بيه وانام بيه
وداير ما دايرهن سياج سعف واكو ربضة برا بيه
محصار للحلال واكو طنيات من الطين
يخلون بيه حنطة وأشعير قسم يبيعونة وقسم يطحنونة الهم
ومرت الأيام وأني أحاول أحاول أتأقلم
أتعود شجابني هنا.
مر سنة وست أشهر بعد موت حسن ومحد عرف منو كتلة والسالفة أتغطت او أكو شي
الله أعلم بس إلى أشوفة أنو همة ساكتين وكملوا حياتهم عادي وأني هم
أتعودت على حياتهم بس مو كلش بس قبلت الواقع وكطعت الامل من كلشي
بهاي السنة حسّيت نفسي أتغيّرت، هواي كلش هواي.
وذبلت صرت أسرح بالحلال ويّه البنات
رباب و عذراء
تعلمت أخض البن بالشكوة
بس بالحليب بعدني ما أفتهم وما أعرف أحلب البقرات.
أظل أباوع لإيدين عذراء وأتحيّر شلون أسوي مثلهن هنه يسوّنه بسهولة
حياتهم غريبة...
تحسها حياة بدو رغم عدهم كيعان خير من الله
وحلال
يمشي كدّامج وما تشوفين إله نهاية
هو صحيح الحلال ما جان غالي بذاك الوقت
بس إلى عنده حلال يعتبر ملاج غني صاحِب خير
بس أعمامي
ما يبيّن عليهم ألخير
حريصين حيل حريصين
ما يبيعون من الحلال رغم هواي عدهم.
النعجات أربعين راس.
الصخول بحدود عشرين وغير إلى بعدهن حامل واللي توهة جايبة والرضع اللي بعدهم أصغار
والجاموس عدهم أهدعش وحدة.
غير البقرات...
والله هواي كلش هواي بس ما يبيعون بيها ولا واحد.
ومسواگ محد يجيب من السوك.
كلشي يزرعوه بكيعانهم.
بالشتا يزرعون فجل رشاد سبيناغ سلك تولة وأفطر.
وبالصيف رگي بطيخ عطروزي...
غير الحنطة والشعير اللي كل موسم تجي الحاصودة تحصدهن ويعبّوهن بجياس جلفاص
وعندهم غرف طين يخزنون بيها المحصول كل سنة.
ومرة عمّي تطلّع من عدهن وتطحن النا بالرحة
عدهة رحة تطحن بيه ونسوّي خبز شعير...
أنوب ما ينبلع ولا ينوكل
بس همة متعوّدين عليه ياكلونة عادي
وأني كل ما أصفن
أگول وين جانت هاي الحياة مضمومة إلى أحس كلشي مسدود بوجهي
عندي حچي هواي وعتب على أخويه اللي عافني بهالدنيا وحدي وخلّاني بيد الغربة
أني ما حسيت باليتم من مات أبوي وأمي حسيت بي من استشهد مشتاق
راح وخلاني بيد ناس ما أعرف طباعهم ولا دنيتهم.
وبيبي بعد ما سألت عني حتى ولا مرة أجت تزورني
هنا. جنت أتذكر ماما لما تحجيلنا عنهم
دكول أعمامكم جنهم بدو وهمچ ما ينعاش وياهم
هسه شفت بعيني عشت وياهم كون أجيبج وتشوفين حالي ماما.
العصر كلش الشمس دتريد تغيب واكفة يم التنور أدعلج بالعجينة ورباب تخبز
صاح عليه سائد كال: -تعاي زينب أنربط العجول
كمت رحتلة ونكت ادية من الطحين هو يلزم العجل وأني اربطة بحبال مال جلفاص
حتى خاف يطلعن بالليل من المحصار ربطناهن سوة
وطلعت رحت غسلت أدية من الحب مال الماي
وأجة زيدان بالبيكم طاير نزل وهو يصيح علينا
: يلا أزنيبة واعذيرة ترحن للكاع الحاصودة ذبت أنروح أنعبي.
كالتلة رباب: -خايب دنيا العصر جااا الطليان من تروح ياهوو يربطهه وياي وعشة بعدني ما طابخة
زيدان: -رضية يمج يلااا ولجن
رحت لبست لفاليف بدية يصير مثل الجفوف بس يسموهن لفاليف وعذراء تنكبت
صعدنة بالمكينة مال الكراب ويه سائدة هو كاعد على الدركجر يسوق واحنا بصفة
لحد ما وصلنا الكاع لكينه الحاصودة كالبة الزرع كله
ورائد ومحمد يعبون بالجياس.
نزلنة وبدينة أنعبي وياهم واحنا رايحين العصر صارت دنيا الليل وبس ضوء الحاصودة والمكينة مال الكراب
طاكات علينا الضوء واحنا انعبي تعبنة واني ظهري انكسر من كثر ما مدنكة والم كتلة
: -رائد فدوة خلة نرتاح شوية
رد عليه بعصبية: -اهوو بدة التبربك كملن ورانة ردة ويب عشة لاوادم
سائد: -يلاا بوية همن اديجن
عذراء: -طاحت أيدي شني يمتة تهدونة انروح.
سائد التفت على رائد وكالة: -انة اروحن أشوف السد خاف طار وتغرك البانية أنتِ كمل وأخذ أهلك ورد
زينب: -لعد احنا ما تخلونة هم نروح والله تعبنه
رائد: -عبن لا تضلن تهترن هواي
خفت الح عليهم ويضربوني لان ايدهم والكفخة انوب منكبين وخناجرهم جوة احزامهم
دنكت بقيت الم وعلى من التعب اريد ابجي
لحد ما كملنا طلعت الدنيا من عيوني
كعدنة على جهه نرتاح شوي و همة يصعدون بالكواني بالسيارة البيكم حتى باجر ينزلونه للسوك.
واحنا كاعدين شفت مروا من يمنه رجال جبير شايب يصير بعمر عمي ويا اثنين ولد شباب
واحد منهم ملثم بس شكلة مألوف الثامة وعيونة مو غريبة عليه وهو من شافني خزرني من شافني مركزة بي
ودار وجهه سلموا على سائد ومروا من يمنه وطلعوا طبعا رائد وزيدان ما سلموا عليهم
وهمة هم زورهم بس سائد سلم عليه ورد عليهم
كالة رائد
: -عليش تسلم عليهم هالخرية
سائد: -السلام لله
رائد: -وعلي فلا أسلم.
هز ايدة وسكت ما ادري ليش ممرتاحة اله لهذا ابو الثام نظراتة وعيونة تذكرني بذبح حسن وذيج ليلة المشومة واكول خاف اوسوس وشكي مو بمكانة
واكو شي بداخلي يشككني بي
ما ادري شسوي
رجعنا بالمكينة وعذراء تسولف وياي كالت بحلامية
: -شفتي أجياد
: -اجياد؟ منو اجياد
: ولد عم أبوي المروا من يمنه هذا ابو الثاام شفتي
: -هو هذا اسمه أجياد
: اي أجياد
: -يعني هذا ابن عم ابوكم صح
: -اييي وابن عم ابوج هم
: زين ليش رائد حجة عليهم.
: -بينه مشاكل وثار قديم
: لعد ليش يمرون من كاعنة شنو يعني يدورن حرشة
: -ياا موش هيجي بس كاعهم ورة كاعنه وعبرتهم دوم من يمنه
: يعني همة أعمامكم الح
: -ايي اعمام أبونة
: -شلون اعمام الله يستر عليكم
: -شنهي قصدج
: -هيج هيج كملي معليج بيه
كالت بتمنى: -تدرين جنت احبه أموت عليه هيج نايم بفادي
: -قصدج هذا ابو اعيون المنكب
: -جاياهوو قيرة مامش بالديرة حلوين قيرة
: -ها، زين ليش شصار هسه بطلتي تحبي.
: -موش هيجي بس بعد ابوي ما يطيني الة عبن بينه ثار
: -على شنو
: -هيجي أسويلفة قديمة
: -ايي ااحجيلي شنو هالسالفة
حجت تغير الموضوع: -كون نلكة رباب طابختلنة اسبيانغ ونطيح بالجدرية
عرفتهه ما تريد تحجي مالحيت عليها شعليه بيهم
نارهم تاكل حطبهم.
ثاني يوم الصبح
جنت أفور حليب مخليته بقوري جبير أستيل ومخليتة بالموكد
ورباب تخبز على التنور الطين وعذراء تحلب بالبقرة
عدنة فد عشر بقرات وكلهن حلوات وهادات
بس وحدة منهن ترفس كل ما واحد يقرب منها ترفسة برجلها فرائد كلي لا تقربين منها
جنت صافنه على قوري وعذراء صاحب عليه التفتت عليها
: -اكلج تعاي گضي الهاشة لا تزگطني علما أحلبها
: -منو أني؟
: -جااياهي أمي خايبة يلااا عجلي متانينة
: -خاف أنوب ترفسني.
: -وج لا تعايرين تعاي
تقربت منها شو هاي رفعت ذيلها وكفت توكف مديت ايدي جان طلعت صوت كالت: -موح
أبتعدت وحجيت بتردد: -باعي هاي جنه عصبية فدوة خاف تجيني رفسه منها ورائد كال لا تقربين منها
ردت بضحكة وهي لازمة ثدي مال البقرة
: -لا وج هاي الشرادة فد حنينة ما تزاكط بس أنتِ مسحيلها
مديت ايدي بتردد أمسح على ظهرها ولازمة الحبل إلى بركبتها وعذراء تحلب بيه.
والمحصار صاير طين من المطرة مال البارحه وانوب فضلات الحيوانات هم لعبان نفس
كملنا وأني أمشي ورة عذراء وهي شايلة جدر الحليب على راسها لاكتنه مرت عمي باوعتلنا كالت بامر
: -زينب اكنسي المحصار ولمي السرجين
فكيت حلكي كتلها بستغراب: شنو عمة شسوي
: -لمي السرجين شمالج أنطرمتي ما أسمعين
: قصدج فضلات البقرات
عذراء: -يباااخ يالحضرية فضلات هن سرجينات لميهن وأنجبي.
: -لا مااكدر فدوة تلعب نفسي بااع أكمل ريوك وأصب مكانج عذروة
عذراء: مالي غرض
التفتت على رباب بعيون متوسلة هزت راسها بلا وهاي مرت عمي جنهن حرملة الكتل عبدالله الرضيع
واكفة فوك راسي. خليت ورجعت للمحصار دنكت المن بيهن وأخلي بالجدر مدنكة
والمحصار كلش جبير ومتروس ترس وهي اجتي وراي كالت: -من تلميهن كلهن تروحين يم سابوط العنب فوك الطينية تمطلين
: -شلون يعني أمطل.
جان دنكت وكامت تاخذ بالفضلات مال البقرة وتسويهن بشكل دائري
علمتني عليهن ومشت تتريك. بقيت وحدي المن وأخذة اخلي يم الصابوط كملتهن كلهن
ورجعت كعدت يم الصابوط أسوي بيهن بشكل قرص دائري لحد ما أجتني رباب كالت روحي أتريكي
وأنة أكمل بمجانج أني مو بحال ريوك ريحتي تلعب نفس صارت
أخذتلي صابونة وملابسي ورحت للبحيرة أسبح بيه رغم جو بارد ويكص كص
بس تعاجزت أجيب ماي وأحمي على النار وأسبح.
كلت أسبح بالماي البارد حتى لو انشلت
بلكي انشل وأموت واخلص من هالعيشة المصخمة
رحت وحدي هي قريبة خطوات عن بيتنا
والاشجار والزور داير ما دايرها كعدت على الجفة كلش أغسل بالصابونة ما نزعت ثوبي كلت
خاف يجي احد ويشوفني ما أمن فبقيت بملابسي بس أجيب ماي بالطاسة وادير فوكي
وأسنوني واحد يطك بالثاني وي كل طاسة ماي اكول اشااا، نزعت الجفية مالتي فركت شعري بصابونة وغسلت الجفية.
ومددت رجلي بالبحيرة كلت اغسل هذا الطرف انوب اغسل الطرف الثاني بعدني توني كاعد امد رجلي
ما احس غير القندرة الجوبلس ازحلكت واني وطاستي بالماي كبل انوب هي غميجة
واني ما اعرف اسبح كمت اغط واطلع وبيدي الطاسة
اشر بيها ماالحك اصرخ و اصيح
الهوء طار كمت ما أتنفس والماي دخل بحلكي شركت وختنكت فاكة عيوني
حسيت بواحد جرني من شعري بقوة وسحلني من نص الماي طبعا لموت واني طاستي بيدي
طلعني وي الجرف اسمع مرة دكلة.
: حطهاا ولك يمه حطهاا وي الراك (جرف النهر)
كمت اكح واجر النفس بالكوة والمرة ادك على ظهري على خفة ايدهة رفعت عيوني الهم
هذا نفسه أجياد ويا حجية يمكن أمة اول مرة أشوفهه هو رجال طلعني بس ابتعد من طلعني وكف على جهه
بس الحجية يمي ودكلي: -يمه اسحبي نفس
كعدت على الجرف وهي حطت جفيتي على راسي
جسمي كله يرجف وعلى كمت ابجي
يحجون وياي بس ما ارد عليهم بس ابجي كالتلي.
: -خالة أنتِ بت منو وعليش تيين للبحيرة وحيدتج قير تغرگچ
: -جنت اغسل ويه الجفة مااعرف اشلون زلكت
: -الحمدلله على سلامتج والزوم مرة الثانية ماتيين وحيدتج
: -ماشي خالة شكرا الله يخليج
حسيتها انكسر خاطرها عليه اخذت ملابسي بيدي ورجعت امشي سريع وملابسي كله ماي
وقندرتي الجوبلس متروسة ماي ومن امشي اطلع صوت جبت الطريق أبجي وادعي على يسرة
والله فد مبهذلتني الله لا يوفقهه
رحت بوجهي للغرفة سديت الباب وبدلت ملابسي.
محد بالغرفة مو وكت ريوك فكلهم بغرفة مرت عمي يتريكون لبست ورحت يمهم لكيتهم الكل ماشي
علي شغلة باقية بس مرت عمي رضية كالتلي
: -اكعدي حطيلج الگيمة بحلگج
كعدت يم النار جان شاعلين نار بالمنقلة مال الطين كعدت أدفي بنفسي وامسح بدموعي
: -شعدج تبجين ياهو وياج عمة
مسحت أدموعي واني ادفي ادية على النار ما حجيت اجت اتقربت يمي
: -عاينلي عليش تبجين لا تضلين تشاهكين سولفيلي خافنه ايسرة محاجيتج.
: -ماعرف اني تعبانة عمة اريد ارجع لبغداد
: -يا تبجين على بغداد
: -اييي والله حياتكم صعبة عليه وبعدين حسن اتوفة الله يرحمه شكوو مخليني عدكم خلوني ارجع هناك يم بيبي
: -لا يايمة بعد لا تحجين هيجي لا تسمعج ايسرة وتزن عمج أعليج تراهم ما يرضون مامش بعد ردة لبغداد
: -بس ماكاعد أتحمل العيشة هنا
: تتعودين
حجتها وكامت طلعت لباب وبيدهة عباء كالتلي
: -رايحة أحوش تولة نطبخهة غدة.
هي مشت واني كعدت اتريك الحليب بالقوري حامي حار صبيته وكعدت اكل وابجي
همزين حار دفيت بي بطني وصدري البرودة
بجسمي احس الرجفة تجيني من الاعماق
كملت وعذراء اجتني لافة العباء ومنكبة كالت
: -خلصتي ريوكج انروح نحطب من نهر المعاطي
: -لعد رباب وين
: -راحت وي رائد للكاع قير اليوم يحون البتيتة
: -لعد اني ما اعرف احطب
: -شني نمونة انة احطب وشدلج الكارة وانت بس تنكلينها على راسج
: -ياا بلا صار عندي فقرات.
هزت ايدها ما راضية بسخرية: -يااع والله تعايرين أزنيبة هاي انة احطب النهار كله گيض واشتة جاا ما أطكني الفقرات كومي كومي أتوزري حتى انروح
تأففت و كمت وهي سوتلي العباء على شكل اوزار
وتنكبت بعدنة ما طالعين فتحت البوفية
: -اكلج وين قرمزچ اريدن أتقرمز كبل لا نروح
: -يمج جوة الملابس
طشرت ملابسي وطلعت الحمرة السحرية وكحلة حجر مال عرب كالت بضحكة
: -أحط من هاي السحارة مالتج تكلب الخدود طماطة
: -حطي.
خلت لخدودهة ترستهن ترس صارن حمر وهي البنية سمرة طلعت مدري أشلونها
: -اكلج عود شسوين بالقرمز بعد حسن اتوفة المن اتقرمزين ما تعبريهن اليه وراي عرس
: -هسه عود ازوجي واخذيهن عادي
: -لا اريدنهن هسه
: -اخذيهم
اخذتهن حطتهن بصندوك خشب مالتها وقفلتة
اخذنة الفاسة (الطبر) ورحنه نحطب
وصلنا لنهر ابو المعاطي هو نهر غميج بس مابي ماي جاف ومتروس اشجار ترسس بيه اخضر وبيه يابس
واكو مكسر وباقي بمكانة والعشوش مال الطيور.
علي الاشجار وبيه بالكاع
اكو نوعية من الطيور اتصير اصغيرة كلش وملونة
تخلي العشة مالتها بالكاع وين ماكو حفرة تخلي
جان اخذت الفاسة وبدت تشلع بالاشجار وتذب تكسر بي تكسر يعني الشجرة نكسرها وناخذ منها حطب
هواي كسرت التفتلي عليه تعبانة
: -اكلج كومي زبري بمجاني تعبت انة
: -ما اعرف
: -خاااايبة كومي شنيي ما تعرفين عود اعلمج
كمت اخذت الطبر من ايدهة من اضرب الشجرة احس ايدي تهتز كله واتوجعني.
كسرت كم غصن من الشجرة اخر شي تعبت كلش كلتلها: -وااالله بعد ماكدر خلة نرتاح شوي
: -مابيج خير اعويبة
اخذت الطبر وكعدت هي اطبر واني من التعب متمددة يم الشجرة وعلى اهم شي ارتاح مابيه حيل
شنو هالتعب شنو هالحياة لا يستقرون لا يكعدون كل يوم نفس الروتين ولا يتعبون رجليهم ميته
رجعنة للبيت وهي شايلة الگارة (الحطب) على راسها وأني شلت عرج واحد والفاسة.
كالتلي بس نوصل أكل للامي عليج ما تنكلين أعروك وياي كتلها كولي عادي
غير أتصير عندي فقرات شنو ما أريد ركبتي
مثلا همة مدري أشلون صاحين لهسه
وصلنا بعدنة ما دخلنا للبيت لكينة رباب جاية وتتعارك ويه أمها
يسرة: -خايبة ضلي هنانة جاياهو يسرح ويه رائد اذا أنت ترحين لزرع
التفتت عليه وحجت: -ياهو مالتي زينب موجودة جنتج مالي غرض
يسرة: -زنيبة تضلين هنانة طبخيلنا الغدة ومن يروح رائد تسرحين بمچانة.
زينب: -خالة بس أني ما أعرف أسرح
عذراء: -هن صخول والدوبات گطهن وروحي أسرحي بطبچ أحميد
أستغفرالله أنوب وين صاير هذا
خلن ومشن وأني رجعت
رحت للموكد سويتلي مركة أكطين الهم بس ما عندي معجونة حطيت بس أبهارات عليها
بقيت منتظرة لحد الوحدة أجة رائد وجايب الغنم
ويصيح عليهن بصوات وحركات غريبة وهن
يمشن على صوتة أخذهن دخلهن للمحصار مالتهن وسد الشرك
شوية وأجاني حجة: -هاا زنيبة ترحين بالصخول.
: -اي مرت عمي كالتلي أخذهن بس أكلك هذا طبج أحميد وين صاير ما أندلة
رائد: -أنة اوديچ والعصر أيبچ
راح هو صاح على صخول وطلعهن من الشرك يسويلهم أصوات بحلكة ويكلهن
: - تحة هيو تحة
وهن يمشن وراه وأني هم وياهن مشينة مسافة كلش بعيدة وصلنا للمكان كله أشجار أثل وزور يابس وطحمة وبعد شجر ماعرف أسمه
كلهن وكفن بي وهو كالي: -هنانة يرتع الحلال العصريات أييچ اكعدي يمهن.
زينب: -اكلك ما تبقى لعد عايفني هنا بالعگب وحدي بلا أجاني شي منا منا
رائد: -چاا شعليچ ماكو شي كل يوم نسرح هنانة هاج الشاروط هذا هاوشي بي الصخول حتى ما يتعبنچ
أخذتة من أيدة سعفة مال نخل كاطعه ومقلمها بالسجينة يسميها شاروط
زينب: -تمام بس فدوة مو تتاخر عليه واذا تكدر أدزلي واحد وراي على الواهس
رائد: -يلا عود أشوف
خلة وراح كعدت بسد الشجرة وبيدي الشاروط ضليت أباوع على صخول ياكلن.
مر وقت هواي وكل شوي وحدة رايحة بصفحة وأني اركض وراهن أرجعهن
وبقيهن سوة تقريبا صارت دنيا العصر وأني بعدني وحدي وماكو أحد اجة
لعد شوكت يجون وبعدني ما أندل الطريق زين وأرجع للبيت وهم ماكدر المهن وأرجع
فزيت من صفنتي وتفكيري على صوت خيل يمي
التفتت وراي على صوت وأشوفة الخيال
وراي منگب ولاف وجهه بجماغ بلعت ريكي
بقيت مصنهمة واكفة بمكاني هذا أجياد.
أحساسي فضيع تجاه هالشخص يربي شعندة جاي هاي مرة ثانية أشوفة وشكلة دينطبع أبالي ويرجع يصورلي الحادثة
واكفة جامدة عاصرة ايدي على الشاروط دنيا العصر وبعدني وحدي هنا كال
: -ياهي أنتِ؟ وشعندج بگاعنة
فكيت حلكي متفاجى شنو كاعهم كتلة بتردد
: -أني چنة بيت أبو حسن أقصد عمي نصير أني جنته وبت أخوو وه. و هو ابن عمي كالي خلي الحلال هنا معرف هاي الكاع المن حسبالي للبيت عمي
: -لا گاعنة وگطي حلالچ وروحي بساع.
حسيت نبرتة خشنة وقاسية كتلة بكلبي أمداك ومدة كاعك منو ميت على كاعك غير
الوكت الطايحظة جابني هنا تاليتي أسرح بالحلال مثل الراعي
جنت منكبة بالحجاب وموزرة مرت عمي لافتلي العباء وسوتهة اوزار على الخصر
وخرت النكاب وكمت أصيح على الصخول اريدهن يتلمن ماكو ولجن ردت منهن ماكو
وهذا واكف فوك راسي منتظرني طلعهن من كاعهم وعلى البجية حسرتني.
التفت عليه: -بلا زحمة عليك خليني شوية علما يجي ابن عمي أني والله حتى ما أندل منين أرجع للبيتنا وهم ما أكدر ارجعهن وحدي خاف يضيعن مني ودنيا الليل والله عمي يموتني
: -أنطرچ لشوي ما روحتي بالحلال مايصير خير
هزيت راسي ومشيت وكفت بمسافة بعيدة عنه وأباوع للطريق الاجيت منه بلكي يجي رائد
صار دنيا الغروب كلش وصوت حمام الطوبان يرن وهدوء مخيف شفتة رجع وعلى اختلست.
نزل من أحصانة وأجة بتجاهي بلعت ريكي وبجيت بسرعة حجيت أدافع عن نفسي
: -والله بعدة ما جاي
وكف يمي بدون مو يوخر الثامة جان لابس دشداشة وأسلاحة مخلي كلايدي بمتونة وخنجرة بحزامة كال بهدوء
: -شنهي أهلچ ما يردونچ عايفيج بالعگب لهساعة
: -ماعرف بس هسه اكيد يجي كالي ما أتاخر
: -ما يتاخر جاا مو هالجلجلت الدنيا وهنانة العگب مسكون هاي أگعوب وصباخي تنسكن بالمغربية ما تنطب.
خوفني بالزيد أمسح بدموعي وأتلفت شنو ذولة خاف نسوني
: -لعد شسوي
كال بشك: -أنتِ العروس البغدادية
بلعت ريكي بخوف كتلة برتباك: -اي
: -بت أسعد
: -اي
: -هنانة الحجي بغدادية شجابج على بيت عمج المعدان
: -بعد صارت القسمة وأجيت
حك لحيتة وحجة: -خافنهم نسوچ
: -ما أدري بس مو معقولة ينسوني
: -جا غير عدهم طبچ أفروخ وين يذكرونچ مروحة يو لا
: -زين ماتكدر توصلني الهم
: -أنة وياهم مو صلح
: -ليش شنو قرابتك بيت عمي.
: -أنة أبن عم أبوچ
طبعا أني أعرف بس سويت روحي فقيرة وماعرف شي خفت يحطني ويكتلني هنا وحدي
: -لعد ليش ما تخلينا نسرح بكاعك حسبالي غريب وما ترضى
: -لا بس بيت عمج نصير وولدة ك فشر عليهم ولف الثامة كالي: -أتصعدين على الحصاني
: -لا أمشي مشي
: -يلااا كدامي
كام يصيح على الصخول جمعهن وتحهن كدامة وهو صاعد على فرسة يمشي على كيف
وي ممشاي والصخول تاحات كدامنة وصلني مسافة قليل شوي عن بيتنا وكف والتفتلي.
: -أنة هنانة حدي توكلي بعد
: -تمام أني أشكرك
جياد: -ديري بالج على نفسج من أسرحين ولا تضلين لليل ترة الكيعان بيه أسباع لا تاكلج لو يركبچ طنطل ويسودنج
بلعت العافية بس ما حجيت هزيت راسي ومشيت وهو بقى واكف من بعيد يباوعلي لحد
ما وصلت كلش للبيوت اعمامي الا مشى لكيتهم سادين باب الحوش
مخلين ورا برميل مال نفط دفعتة ودخلت والصخول عفتهم نومن بالربضة.
لكيتهم مادين السفرة بالحوش وكلهم كاعدين صايرتلهم هوسه بيهم فوك العشرين نفر ويانا الزعاطيط نصير بالتلاثين نفر العايلة
شافني عمي كال: -ياااهي زينب وين جنتي بوية
: -عمي جنت سارحة
: -جا توج أيتي غير تروحين من وكت
: -رائد كالي أجيج وما أجة
جان ياكل رفع راسة ولگمة بحلگة: -نسيتج جا ما تين وحدج
لا يربي يعني شلون ينسوني معقولة محد فكدني بيهم وعلى فد ضجت أشلون أشرد منهم وين أشرد.
رحت غسلت أدية من الحب مال الماي وأجيت كعدت بصف رباب حتى أتعشى وياهم
جانوا مسوين مركة عدس أصفر بدون معجون بس أبهارات والعدسات يركصن بالجدر
بس بالاسم مركة عدس والا عدس ماكو بالمركة
والخبز مال حنطة حشة نعمة الله جنه تاير
مدور وسمين وخشن ما ينوكل ابد بس همة متعلمين عليه ياكلونة
مرت عمي تحطن بالرحة وتعجنه ياكلونة عادي
كعدت أطوني كرصة عبالك بالجيش عدهم نظام.
كرصة وحدة نضامهم بالعشة كرصة خبز وحدة وبالغدة وريوك هم وحدة حتى اذا جوعان مالك اكثر
خليت الكرصة بالمركة عود بلكي تنگع وأكلها بس ماكو صلبة ويابسة أكلت لكمتين وكمت
من كمت عمي صاح عليه
: -سويلنا جاي بوية زنوبة
رحت أخذت القوري من غرفة عمتي ورحت للموكد برة يم المحصار لكيت بي جمر
ضال من العشة مو طابخين عليه فضال جمر
خليت القوري عليه وبقيت أنتظر لحد ما فار.
وكملتة وأجيت صبيلهم كلهم وأنوب خليته يم عمتي وكمت للغرفة عمة حتى انام
لكيت عذراء ورباب قبلي فارشات اول ما دخلت كالتلي عذراء
: -أمدلچ دوشك يمي
: -اي عادي وين ما جان
خليت دوشكي بصف البوفية وبصفي رباب وهي بصف رباب والد عمي بصفهن كلنا نايمين
واحد بصف الثاني احنا البنات بجهه البوفية وهمة بصفنه
كامت رباب نزلت بطانية احياكة من البوفية
كالت: -هاج اليزار هذا ثجيل أدثري بي من البرد.
تغطيت بي وصافنه عليهن فرشن للولد كلهم
وبعدنة كاعدين وهن يسولفن
دخل رائد وسائد ومحمد وزيدان وخالد ذولة بس إلى ينامون ويانا بهاي الغرفة
والبقية بغرفة مرت عمي طبعا ماكو خصوصية
وغرفتي مال العرس أخذوهة
سوهة محصار لحلال مالتهم حتى اغراض العرس أخذوهن كالوا بعد شسوين بيهن
عدلت نفسي ولفيت روحي بالبطانية أباوعلهم لان راح يدكون ماصول
طبعا الماصول عدهم بالافراح وبالاحزان بكل الاحوال يدكون ماصول.
حزينين فرحانين لازم يدكون ماصول مرات يغنون وفجاة يمكن يبجون
أني ما أبجي وياهم أحسهم مخابيل بس ماعندي دليل والا وين اكو واحد يغني ويبجي
رائد حط جدرية فافون مال عجين بين رجلي يدك عليها وزيدان يدك ماصول والبقية يصفكون
وهمة يغنون سوة واحد يذب على الثاني
سائد طگع أصبع وكال
: -علة الچوبية الچوبية وضافر كصايب مية
رد عليه زيدان: -وبالحمزة تلاكينه وأشابكنة وغفينة
خالد: - وست أشهر ماوعينه.
كملة رائد: -والگيم شاهد علينا
كملت وياهم رباب طگع أصبع وتغني
: -خلي البلم بالدوحة وكلبي مخزنات اجروحة
رد سائد: -فرط الرمان اخدودة وعيونة الحلوة السودة
زيدان: علة الجوبية الجوبية هواي(محبوبي) مسير علينا
جنت صافنه عليهم وابتسم، بغض النظر عن التعب والحياة إلى كله مشقة وغريبة عليه هنا
بس جنت أتونس عليهم جانت هاي الاجواء كل ليلة قبل لا انام مرات نعي وبجي ومرات أجوبي ومرات نلعب أمحيبس.
ودنيا تمطر حالوب واحنا مشعلين الفانوس ولبة مال النفط وشاعلين نار بالغرفة بحيث صايرة دخانة ويغنون ويدكون چوبي
لحد ما نتعب وانام كل ليلة جانت هاي الفقرة احبها ومونستني
ندست رباب من أيدهة كلتلها
: -منين تعلمتوا الجوبية
كالت بضحكة: احنا خالي شغلتنا ماصولية من زمان
بعدنة نضحك ونسولف وسمعنه صوت عمي يصيح
: -تفگتي. التفگة وينهااااا
علي صوتة طلعوا الولد يركضون أني اخر وحدة طلعت وكفت بالباب وأشوفة عمي.
شيل نفسه ويدگهة بالكاع وبيدة أسلاحة ولازمة
عمي الثاني أعگاب وهو يدفع بي ويكلة
: -هدددني وابو الحسن أضلن لابس شيلت يسرة من كون ما أرد ثار أبني
عگاب: يااااابة الناس تريد الخراب شلون تصدك شهالحجي أجياادد أبن عمكم منكم وبيكم ما يسويهه
دفع عمي أعگاب وراح يركض للبيكم ذولة ولدة رائد وسائد وخالد بدون ميعرفون شكو
أخذوا أسلاحهم وركض ورة عمي هو ما وكف الهم بس همة طفروا بالبدي مال السياره صعدوا.
بقى مرت عمي تلطم والكل أنخبص أني كلت أروح أسال رضية وأفهم منها شكوو.