رواية مرواد الظلمة الجزء الثاني للكاتبة هيلانا الفصل الحادي والعشرون
مر أشهر على موت عمي وسمعت من أجياد أنو سائد ماخذة مكانة
وسائد مو القديم لا هذا شخص جديد عبالك شخصية عمي تلبستة
گام يخلي دوريات تجي تاخذ الفرارية من القرية
وينسجنون وهيج يترقى منصبة
وصل مرحلة كلش استهتر يذب على اراضي الوادم وياخذها وناس ماتكدر تحجي ويا ويلة
الي يحجي ما رايد روحة كلش طغة وبيدة سلطة قوية صار يصعد على دم الناس
وجان يدور حرشة ويه اجياد رغم احنا مو يمهم بس دوم نلگة حلالهم بگاعنه.
وعمتي ماتقبل نحجي لاجياد تخاف من المشاكل وتخاف سائد يسويلة سالفة على اجياد
فما دكلة، قبل كم يوم لگينه الزرع مديوس واجياد تخبل شلون أنداس عاد عمتي كالتلة هاي الخنازير
تنام بي وأدوسة أني شفتها العصرية من رحت أحوي
تولة
طبعاً جذب أني جنت وياها وشفت حلال بيت عمي بي لعلم هسه همه ما يسرحون لا هسه عدهم رعيان مخلين بالكيعان
همة بس يأمرون وحتى ببيوت جديدة بنو
هو نفس الغرف كل وحدة بجهه.
بس، مو طين لا أبلوك. الوحيدة رضية زينه ومثل ماهي ما تغيرت أبد
دوم من اروح للگاع لاگيها هناك واسلم عليه بعدها تحبني وتموت عليه
بس سائد إلى جان مستجلب ودكول مالي حجاية عليه أبد ما ياخذ بكلامي.
بالليل
سبحت وجنت كاعدة كدام المراية أمشط شعري وبعدني منتظرة أجياد يجي بس بعدة لهسه ماكو
كملت وضفرتة گمت نمت بمكاني وبين ما أنتظرة نمت
ما أدري شگد مر وقت بس فتحت عيوني على سائد واكف يم راسي وبيدة خنجر كله دم من صارت
عيني بعينه حط أيدة على حلگي وحط الخنجر على ركبتي ختنكت ماكدريت أصرخ
كمت أرفس وهو يمحد بركبتي محد عضيتة من أصابعة بس جان.
ما يتحرك وعيونة مثبته عليه بكرهه عبالك يذبح بطلي حركت ادية وخرمشتتة بس ماوخر
أصرخ وارفس اريد واحد يطلعني من أيدة بس ماكو وملك الموت وكف على راسي.
فزيت مرعوبة وأني أصرخ وادية على ركبتي باوعت بهلع ماكو احد الغرفة فارغة
بس الشباك مفتوح والبردة يحركه الهوى بلعت ريكي وگمت عركانة من مكاني ودموعي بعيني
ما جان حلم والله جان حقيقية لدرجة من فزيت ادموعي جانت بعيني
مسحت على وجهي وطلعت لحوش ظلمة وهدوء.
بس صوت الجلاب تنبح
وينك أجياد شوكت ترجع
والله كلبي ما مرتاح وخايفة ليش كاعد أشوف سائد بحلامي ليش دوم أحس قلقانة وشعوري
غريب أحس بضياع وخوف رغم وجود اجياد وادري محد يأذيني بوجودة بس ليش هيج
الحلم ذكرني بموت حسن ما أنسى شلون أنذبح كدامي دخيلك يربي معقولة أني هم أنذبح مثله
لو شنو
هواي دشوف أحلام من تمرضت من قبل ولهسه
ودوم اشوف اعمامي بحلامي والوحيد
الي ما أشوفة اجياد ما ادري ليش وهو.
اكثر شخص قريب، مني ودوم يمي
بس ما اشوفة حتى من الگة نفسي دموت هو ماكو لعلم بالواقع هو يمي ويطيح كدامي ولا يخلي واحد يمسني
الشعور بالخوف من المجهول يمثل تحديات بذات أنت ماتعرف شنو ممكن
أيصير بالايام الجاية، ممكن يكون الخوف عدو الانسان الاول اذا، خلا يسلط عليه
ويتحكم بي وبالتالي يعتبر هل شي سلبي لان تبدي تخاف وتفكر وتبدي مخيلتك تصورلك
أشياء ما موجودة أصلا وممكن هل أشياء توصل للاحلام والخيال.
وبحالة ثانية ممكن يكون الخوف أيجابي ويحميك من الاخطار ويخليك تفكر الف مرة قبل ما تخطي اي خطوة
ولا اردي هل شعور ويانة من الصغر هو غريزة مانكدر نتخلص منه
بس كل شعور يستمد قوتة منك سوأ جان شعور، سلبي او أيجابي هو يستمد قوتة وتحكمة منك
وأنسانة مثلي هشة فقدت عائلته وتغربت وأجت هنا وتعذبت بدون سببب وذاقت المر
صعب الشعور البداخلي أسيطر عليه. أستغفرت ورجعت جوة توضيت ودعيت الله.
يحفظة إلى ويكفينه شر المشاكل وشر أعمامي
وراها مرت الايام وجانت كلش سيئة وهو بغداد
واليوم الثور مالتنه طگة رائد جيلة وكاتلة بالكاع
وعمتي فرفحت كامت تلطم جانت غالية ثيران وبس احنا عدنة وبيت عمي باقي ناس بالمنطقة ماعندهم
تخبلت عمتي وهدت عليهم للبيت رحت وراها كلت خاف يصير شي
لگيتها تحجي ويه رائد وهو طاك القاط والجكارة ومرتكي على سيارتة
والله وكت من السرجين والهوش للسيارات. كالها بعجرفة.
: -شكوو تلعلعين نخسرلج الثور عيب منا وادم گصري حسج وبعدين اخاف عليج لا يطكلج عرج عمة
ردت علية منفعلة: -أنعل ابوك لابو بطن النگلتك ولك ثوري يسوة جاهمتك شلون دكتلة والحسين يجي اجياد لو ما يجي الة اخلي يترس حلكك تبن
رد عليها بسخرية لاذعة: -محترمج لان حجية وجبيرة روحي ما اريدن امد ايدي عليج بگد امي
التفتت عليه وكمل بأمر زينب أخذي عمتج ترة روحي بخشمي.
أني خفت يجاوز عليها لو يطگهه وكلشي يطلع منهم عارات وهي عمتي منهارة على ثورها بس هي عمتي
وين تسكت حجت بعصبية: -خايب ارويد نسيت البعرور صايرلي زلمة وعلى ادوس على راسك وانااا ام اجياد
وهو هز ايدة يضحك عود مستخف بيه مدري شنو
كوة قنعتها حتى نرجع جابت الطريق تبجي وتصيح
: -عمت عيني عليك حنش لو ميتين بيت نصير كلهم ولا أنت من فدوة يرحولك عساهم بالطحيل
ردت كملت وهي ترفع اديها للسما.
: -ربي كون يذبحون ارويد ابو الوصخ بقضية شرف
جانت كلش مقهورة خطية رجعنه للبيت شگد حجيت وياها ما فاد كاعد تنعي وتبجي على الثور
طلعت برة شفتة مشمور بالربضة والذبان ملتم عليه لا اكدر ادفنه وحدي جبير وضخم
وعمتي خطية كلبها ما ينطيه ادفنه عبالك واحد من ولدهة اسم الله انوب بقى القلق ماكلني وعلى من يجي
اجياد ما تمر سلامات اني ادري راح اتصير
عركة مابيه مجال.
ورة أسبوع أجة اجياد من بغداد وعمتي كالتلي ما أحجي الة شي
من شفتة دخل الحوش طرت من الفرحة بس أستحيت من عمتي ما حضنته بقيت واكفة
وعمتي سلمت عليه وهو عينه عليه أجة باسني براسي كدامها كال
: -شلونج
: الحمدلله وأنت
: -من الله بخير
أنوب عمتي أخذتة وفات جوة
كلبي يعيد من يشوفة. اصلا شوفته احلى من أهلال العيد
رحت كدامة للغرفة وهو شوية واجة اول ما دخلت ابتسملي وفتح ادية ركضت حضنتة
: -والله مشتاقتلك.
رد بضحكة: -اويلي هيج تحبيني
: -اي لعد أشلون ما أحبك بس أحس أنت ما تحبني
: -لا تشگين بمحبتي الج أنتِ أقرب من النفس
ضحكت بتساع ووخرت من حضنه وهو نزع قميصة
: -حضرتلك الحمام
كال بشك: -صاير شي متعاركين من وراي
: -لا ليش
: -شو امي مدري أشلونها هيست اكو شي وما حجت
: -لا ابد بس الثور مالتها مات وضاجت عليه حجة بتفائج حنش ميت شلووون ماات؟
يعني شلون مات؟ مات من القهر هالله
حجيت بهدوء: -غرك بالجدول.
: -شني غرك بالجدول هن غير يوفوچن
: -ما ادري بس هو غرك ومات
تقرب مني ومبين ما مقتنع يربي ولا اعرف اجذب احس كاشفني دجذب
: -شضامت أنتِ وامي
: شبيك اجياد يعني شنريد انضم انوب على موت الله تحاسبنا
: -شوفي اذا طلع غير هالحجي م.
قبل لا يكمل قاطعته بضوجة: -أهوو اجياد هستوك اجيت شجاك بعدين هو كلة ثور شميت زلمة مشورب
رد علية بملل وهو ديمشي للحمام
: -شايفتة هذا الثور عندي يسوة أعمامج كلهم.
ابتسمت بتسليك وهو راح يسبح بقيت احوس لان ضميت عليه بس معليه هذا حجي امة اني شكوو.
رحت صبيتلة أكل بين ما سبح وأجة كعد دياكل جنت مكابلتة اريد اسالة عن رباب
رفع راسة وابتسملي همس: -أحجي حبيبتي
: -ها
: -احجي مبينة عندج شي
: -هو الصراحة ديريد اسال عن رباب هم عندك اخبار عنها
: بعد ما تتطلع نحكمت موبد
فكيت عيوني بصدمة: -الله عليك تحجي صدك عزاا بعدهااا طفلة
: والله صار طعن بالقرار بس ما اتغير والحكم النهائي موبد
وعلي كلبي أنمرد مرد عليها هو لاحظ هالشي قربني ومسح على خدي
: -لتضوجين.
: -خطية نقهرت عليها
كمل أكلة وأني كمت برا احس صدري قبط صدك أنقهرت عليها هالبنية شنو شافت بحياتها
هي مبينة عندها حالة نفسية وأنوب أنحكمت موبد هاهيه أيأس
بهل أثنا طلع هو جان مبدل وبيدة اسويج سيارتة
كتلة بضوجة
: اجياد خلي نطلع نتمشى والله احس خاطري أتگدر
: -صار يدلل زنوب
ابتسمت واجيت يمه بستة بخدة وهو التفت باوع ماكو احد لزمني من وسطي وقربني اله
يبوس بيه بس هو مادري شبي كله عنف
كوة وخرتة دفعته يضحك.
: -اهووو هو هيج يبوو اجياد استحي لعد بالحوش
: -والله انااا فقير أنتِ تعيلين
كشمت بوجهه ابتسم، حجة وهو طالع
: -يلا البسي أنتظرج بسيارة
رحت ركض لبست كوستم وحجاب، بوجهي للغرفة عمة اجيت اكلها بس لكيتها نايمة
يلا هو احنا شوي ونرجع اكيد راح انروح للكاع تخبل الكاع مالتنا وهسه مزروعة والاجواء العصريات تجنن بيه
ركبت بصف وهو اخذ الطريق يتغزل بيه وطبعا الغزل مالته كله منحرف هو مستهتر بس ما يبين عليه.
وصلنا هناك جان لازم أيدي وكل شوي يهمس بكلام منحرف واكرصة ويضحك اخر شي كال
: ما تخلينا نتباطح هنا بالزرعات حتى أتصير بيهن بركة
: -لا حبيبي قصدك أطير البركة
: لا وداعتج اصلا أنا شفت الخير كله على گصتج
ابتسمت بتساع: -يعني اني هسه خير عليك
: انا من أشوفج حتى همي أنسااا
: -من شوكت تحبني
وكف التفتلي مثل إلى يذكر شي حجة وهو مركز بعيوني: من ذيج ليلة
: يا ليلة
حسيته انتبه شنو حجة رجع كال.
: بيوم شفتج بالكاع ويه ولد عمج الگ
: -ااح ولا أدري بس شو ما جان مبين عليك
ضحك وسحبني من ايدي رحنا من الكاع بتجاه الجدول والعصريات الطيور والشمس مغوربة
الاجواء ولا غلطة جنت طايرة من السعادة والراحة إلى حسيت بيها بهاي الحظات جانت تخبل
تمنيت تبقى وياي عمر وابقى بنفس لحظات السعادة هاي طول العمر كعدت على الجرف ومددت رجلية
بالماي وهو دخل بالماي، جان صافي زلال واكو سمج اصغار بي يوصل للجفة ويروح.
جان يغسل بشعرة وجهه وأني اباوعلة حركت ادية بالماي وشمرت عليه رفع راسة ضحك اجة بتجاهي
سحبني من ايدي نزلني بالماي
: عزااا اجياد الماي بارد وين نزلتني
جان ديضحك ويرش ماي عليه جنه متونسين وفزينه اثنينة على صوت جيلة
ارتبكت وهو بسرعة طلع من الماي ركض على أسلاحة مخلي يم قميصة أخذة وهو يباوع بتجاه
الكاع. واني بعدني بمكاني التفتلي رجع عليه مدلي ايدة طلعني من الجدول.
جانت ملابسي مبللة وهو لازم ايدي دنمشي بتجاه السيارة
: -شنو هالصوت
: صوت كسرية اكيد صيد
: -بس الصوت قريب خاف بكاعنه
: اي هو أتوقع بيه أوصلج وارجع أطرگهه
: -عادي أروح وياك
: لا أشلون
ما أدري كلبي ما ارتاح وهو وصلني للبيت ومشى دخلت لگيت عمة تسوي تمن على موكد حجت بعصبية
: وين جنتي
: -ها عمة جنت ويه اجياد بالكاع
باوعت وراي على باب الحوش شافت ماكو احد
: -جا وينه اجياد
: وصلني ورجع للكاع
: -شعندة.
: ما أدري عمة بس كال يطرگهه ويجي
فتت جوة بدلت ملابسي اكيد راح أنشل على هل السالفة ورجعت كملت العشة ويه عمة
لحد ما أجة اجياد جان بركان وثاير دخل للبيت بعصبية وعمة لاكته بعدها ما حاجيه عاط بيها
: شلووونة تظمن عليه ياااهو يطاول عليج وما دكليلي
عمت حجت تهدي: يمه برد شبيك فهمنه شكوو
: -شني شكووو شعدة رائد القندارة وياج اااحجيلي
هسه تحجين
: ياا يمة والله ماكو شي وروح ارياض يااهوو كايلك انت سامع شي.
: ااانااا راح اعرف بطريقتي بس بالعباس ال.
حجاها ورفع أصبعه بتهديد باوعلي اني وعمة
ما كمل خلة وراح بتجاه بيوت اعمامي ومسدسة بيدة
وعمتي راحت ركض وراة خطية بدون عباتها وتصيح
وراة: -ووولك اااااجياد اوكف رااااح تموتني وين رااايح
بس هو ولا أهتم عاد اني رحت فزعت اخوانه همة قريبن علينا كلت خاف يصير شي
عاد اخوانة ويا اني وعمتي شنكدر أنسوي. وحطيت العباء على راسي ولحگتهم وصلت هناك.
لگيته ماطل رائد بربضة يم الغنم ويجغص بي
رفعه بيدة وطگة راشدي طير ملامح وجهه
وهو كل خير مابي شگد يفشل لا شال ايد ولا رجل امداك عاد دافع عن نفسك
ما أتمنيت بيوم أشوف هيج شي عود اعمام وأهل احنا بس همة أجلاب هسه هيج شنو تسوالك
ورضية ومرت عمي كتلن نفسهن كلهم يردون يوخرون اجياد عنه وهو ما هادة
سگطة تسگط يشيلون اجياد ويشيل رائد ويا لحد ما زوعة العافية ومرت عمي تصرخ وادعي علينا.
كالة بتهديد: لك ااازمااال يااهو دافعك علينا اااحجي سأئد مووو لو بي خير هو يجي ياخذ حگة
رائد حلكه كله دم وكوة يتنفس
: محد انااا من نفسي وامك ما سويتلها شي جدامك اسالها عمة ااانا حاجيتج
عاد هي عمتي خطية والله تتخبل من المشاكل وتخاف على ولدها جانت مفرفحة وتحلف
: والله ما حاجي ولا مسوي شي ابن عمك ااانت ياهوو حاجي براسك شمالك يمه تسودنت
طبعاً هو ولا منتبه لعمة كوة وخروا اخوانه ويحجون عليه حتى يسكت ورضية هم.
بس اني جنت ساكته، رفع أصبعه بتهديد وحجة بحدة: هاي السوالف مو عليه بس بعلي الشرجي اذا سمعت بيك جاي على بيتي حاجي طالع نازل أدگك
دك وأدفنك حتى كبرك ما يندلونة
كالتلة رضية بعصبية: ما تستحي جاية تهددنة بيتنا ترى نخبر شرطة هذا تهديد
رد عليها بسخرية: اذا تگدرون ليش لا
عاد رجعنا بس شنو جان متعصب على امه واني وعمة لهسه ما ندري هو شلون عرف بالضبط.
واصلا منو كايلة وشكايل بس مادام راح على رائد كبل فاكيد عرف بسالفة مال الثور
جنت بالغرفة واسمع عليهم وهو صوتة عالي
يكلها: شنييي ما معترفة بيه وما تحجيلي
: لاااايمة مو هيجي بس اسمع مني اسولفلك
: شسولفين هااا ااانا بس اريد افتهم عليش تضمين
عليه يعني اسمع من الغربة وأمي ومرتي ما يحجلي
سودة مصخمة حطني بالنص يربي هسه شكلة اكيد جاي دوري ورة عمة
شوية وأجة طب للغرفة وأني الملگوفة كبل حجيت عود ردت أبرر موقفي.
: باع عمة كالتلي ما أحجي والله
: -وأنتِ بكيفج عمتج تمشين؟
: لا مو هيج بس خفت عليك
: -خفتي عليه لو مخليتني وراج
هزيت راسي ب لا وهو لزمني من فكي بغضب جان يرجف من العصبية
: -صارت اليوم بس اذا انعادت بعد ما اعرف عمتج اعرفج أنتِ وتعرفين شيصير
حركت ايدي فوك ايدة لان وجعني اريدة يبعد عاد وخرها وكال
: مفهوم كلاميي أتوقع
بلعت ريگي صوتي طلع متقطع
: مفهوم، بس اسمعني شوية.
جر نفس ويباوعلي بعدم رضا هيج ما ادري اشلون يخوفني فركت ادية برتباك اريد ابرر الموقف
بس هو ما يتفاهم
: - أسمع شني بعد ها تقرب مني وهمس
: - ضامة شي ثاني وتخليني آخر من يدري؟
: ما ضميت كافي دكلي هيج بس خفت عليك
: -لااا شني هالحجي خايفة عليه لج أسمع من الغربة أنااا ومرتي مخليتني وراها ما دكلي
قرب عليه خطوة رجعت خطوة لورا
: - لحظة عصبية وهو أصلا مو قصدة بعدين ما حجة شي أسال عمة.
ضحك ورد برود: - حلو والله عصفور كَفَل زرزور واثنينهم طيّارة كمل بستهزاء: -انت وعمتج وحدة توصي الثانية وتمشن الموضوع من وراي
: - والله ما مشيته بس رائد إجى فجأة وتعارك ويه أمك وأني انصدمت ما لحگت أتصرف
: -ااحجيلي عليش شني السالفة جاا ما صارت هيجي فجاة
بقيت صافنه بوجهه أحجيلة لو لا زين هو يدري الثور كاتلي بيت عمي لو يدري فقط رائد محاجي عمة
والله حيرة شكلة حكيت خدي بورطة وهو منتظر أحجي كتلة بتوتر.
: -ها شحجي
: -أنتِ تستغبين لو شني
: -اااهو كاافي صار ساعة أتغصغص بيه أدري غلطت من ضميت عليك بس أتوبة بعد ما اعيدهاا وعمي بعد مااخاف عليك روح أتكاتل وياهم معليه بيك
هز أيدة ما راضي وعافني وطلع. ما حجيت بس أدموعي بعيني ما ادري حيل ضجت
ادري غلطنة لان ما حجينة بس شسوي غير أمة كالتلي ما أحجي شبيدي أني
:
:
:
لليل وأني بغرفتي كاعدة صافنه وايدي على خدي وأدموعي بعيني حتى عشة ما تعشيت من الهبطة.
هسه الساعة بالعشرة اسمع صوت الجلب ينبح برا يعني اكيد اجة وصارت طگة بالباب
عاد تغطيت ونمت غطيت حتى راسي حيل مقهورة ما اريد أشوفة أبد
هيست خطواتة بالغرفة حركته يفتر اعتقد دينزع بملابسة أنوب طلع شلت الغطة عن راسي
شفتة ماكو رجعت أتغطيت شوي ودخل الفراش بصف نزل رفع الحاف ودخل وياي
نام بصفي بس ما تقرب مني حسيت بي أنطاني ظهرة ما أدري ما تحملت وخرت الغطة وكعدت
باوعتلة داير وجهه عني على الجهه الثانية.
: -اجياددد اسفة والله اخر مرة
التفت عليه وجهه ثكيل استعدل بكعدتة
: -جا أنتِ مو نايمة
: ها اي بس فزيت من أجيت نومي خفيف تدري
: -تعشيتي
: -اي أنتِ ما قصرت خوش عشيتني العصر
: -ها يعني لفتي السالفة عليه هسه الصوج بيه يول
: لا بس ااني شوكت الحك اكلك هو اني وين اشوفك شو كل يوم والثاني رايح لبغداد بالسنة حسنة تجيني بعد شوكت أحجيلك شجاي أيصير.
لزم أيدي وحجة: -انااا ما أعتب على أمي مرة جبيرة وادري بتفكيرهاا بس عتبي عليج جااا مو أنتِ زلمتي بالبيت من أمشي ومعتمد عليج وهذا الزعطوط اذا ما حطلة حد يعيدها مرة ومرتين
طبعاً أني عفت الكلام كله وركزت بزلمتي
: -عود صدك اجياد معتبرني زلمة.
: لا يول مو بالمعنى المقصود بس اانا اعرفج خوش مرة وشريفة وادري بيج معدلة وبغيابي زلمة خشن اعتمد عليج قربني عليه حضني وباسني براسي رفعت عيوني بعيونة وضحكت بتساع كمل بحب
حجة يغير الموضوع
: -اريدن بنية تشبهج
: -ليش مو ولد
: لا بنية
: -عود ليش
: -حتى أحبها مرتين مرة لان بنتي ومرة لان تشبهج اريد نسخة ثانية منج.
: -اجياد والله أني كلش أحبك ما تعرف شنو انت بالنسبه إلى فد حياتي فارغة قبل جيتك ما تعرف من جنت يم اعمامي جنت أتخيل أكبر وحيدة وما عندي احد بحياتي الحمدلله الله عوضني ورزقني بيك
كال بهدوء: -واذا باجر متت
بلعت ريگي بغصة الحجاية طلعت من حلكة ونظراته حيل جدية وشعور مو حلو استقرر بكلبي
حطيت ايدي على حلكة وهمست
: -اسم الله يومي قبل يومك ليش تحجي هيج
: -بس هاي الحياة محد ضامن روحة حبيبتي.
: -ادري بس لا تحجي هيج أخاف أني بدون شي أهوجس ومسودنة تريد تموتني
استعدل بكعدتة جنت كاعدة بحضني وادية على صدرة وخر شعري عن أعيوني حجة عبالك ديوصيني
: -اذا بيوم نكول لا سامح الله ومتت ال...
قاطعته بعصبية: -ااجيااددد شجاك بهاللليل راح ابجي والله.
: -اسمعيني ياعيني فدوة اروح لعيونج بس اكمل هو حجي جاااقابل متت صدك أناا المهم اريدج أتصيرين سبعة ولو أنا راسي بارد من جهتج ادري بيج أصيلة بس يا زينب ما اريدن تزوجين بعدي ما أتحمل أحد يشمج ويحضنج غيري اغار ترى اطلعلج من الكبر حظج أطيحة
جان يحجي ويضحك مثل واحد ديوصي ويودع بس بطريقة غير مباشرة حتى ما يحسس المقابل
كمت من حضنه ادموعي يجرن كام وراي طلعت لحوش وهو لزم ايدي جرني عليه يريد يحضني.
دفعته وشهكت أبجي: -تريد تعوفني اجيادد هاااا ليش هيج تحجي لو متقصد تبجيني
: -لاا بالعباس شو تعاي
حضني وأني أبجي كمت ابجي بصوت عالي وهو يضحك ويحجي مثل أسوالف بيبي يكلي
: ادموعج غسلني اسكتي اروحلج فدوة
: -لا تعوفني اجياد اني اموت من دونك مستحيل ما اعيش شوف اختنكت بس من الحجي اذا صارت اموت وياك بنفس اليوم والله
: ما أموت ولج لا تبجين كافي.
دخلنا جوة واني ارجف وهو يسكت بيه كوة سكتت جان نايم واني بحضنه ويسولف عليه
لحد ما غفة كعدت مكابلتة وأباوعلة مررت ايدي على شواربة جنت مركز على ملامحة كلش أحبه
هو جان عوضي بعد كل خساراتي ما أتخيل نفسي يوم بدونة مستحيل والله
نمت بصفة حضنته وكل شوي أبوسة بصدرة جنت خايفة حيل من كلامة
مرت الايام ودخلنا بسنة 1998 و صار عندي بنية واجياد سماها حور جانت كلش حلوة وماخذة ملامحي وابوها جان يموت عليها ومدلله دلال.
بس حياتنا ما جانت مستقرة واجياد ما جاي يصارحني هو وين يشتغل ولا شنو يشتغل
ومن اكولة ليش تروح لبغداد يكلي اشتغل ويه صاحبي ناخذ محاصيل منا ونسوگها هناك
مرت الايام وحور جانت تكبر كدام عيني لحد ما صار عمرها سنتين الا حبلت جنت ما متاكدة
من نفسي حبلة بس بيومها اجياد أخذني كال نحلل جان لازم ايدي وامشي ويا وكل شوي يكلي
: شطالع اليوم الگيمر
ضحكت وجاوبته: -لا بعد كبرنة شوف راح أجيب بيبي ثاني أحس صرت عجوز.
: -لا يابة انااا الشايب أنتِ بعدج أطگين بالگاع كمل بستفهام: -صدك أنتِ عليمن طالعة حلوة شو اعمامج كلهم جلحان ملحان
: -طالعة حلوة على عمي نصير
: -اشتعلت روحة
: -لاا يمعود خطية هههه
: -يروحلج فدوة وهو وعشيرتة
: -ترى انتم من نفس العشيرة
: -بعد روحي ولا يهمج اروحلج فدوة انا وعشيرتي
ضحكت حيل ورص على ايدي جنت طايرة بي من الفرحة وهو أخذني لواحد يحلل اسمه كمال.
كعدنة جوة وهو سحب دم مني بقينه منتظرين فترة لحد ما طلع تحليل جنت منتظرة لحد ما كال
: -الف مبروك حامل المدام
طلعنا فرحانين ونضحك حجيت بسعادة
: -تتوقع ولد لو بنية
: -شيجي من الله خير ونعمة
: -احسك تحب البنات
: -هو اكو احلى من البنات
: -لاا ماكو بس انا اريد ولد هيج حلو يشبهك
ضحك وكرص خدي وراح جابلي بقلاوة
: -ادري بيج تتنسين
: -عفية اجياد شوكت لحكت أتنسة.
جبت الطريق حاطة البقلاوة بحضني اكل أعض نصها وأنطي النص الثاني ياكلة
وهو عاد مستقبل الموضوع حجة بجدية
: -شجيبلج بعد مشتهية شي
: -اي انت
: -استغفرالله ودكليلي انت فاسد وموخوش ادمي هاايابة منو يعيل
: -مو اني هاي بس والله اثار الحمل
: -هو أنتِ من تحبلين تستهترين
ضحكت بتساع وجبنه الطريق ضحك وغزل بشرت عمه بالحمل وهي جانت تدعي كون ولد.
دكول اريد اشوف ولد اجياد وافرح بيهم رحت للغرفة لكيت حوري نايمة دنكت عليها وبستها
حيل هادئة ومالها صوت عاقلة ابد لا يمي ولا يم ابوها مرات احسها بيه شبه من خالها الله يرحمه
هم جان هيج هادئ ومالة صوت كلش عاقل
العصر كلش أجو يمهه جهال عمها الوسطاني وياهم أمهم
و يلعبون وياها واحد. منهم اسمى تاج الدين
فد وكح ومشيطن
عندة كتكوت صغيرون وحور تريد تلعب ويا وكلما تقرب منه يدخل أصبعه بعينها لو بخشمها.
وهاي تنط من صريخ تفرگست من ورا لو ما فشلة من امة كاعدة يمنه الا أكوم الزگة بالكاع
عمتي شالت حور بحضنها
-: خليولي يحبوبة لا يعضج
هو على روحه ما سالم شيعض يجغصون بي خطيه طلعو روح روحة خلو يگفر
وامة طردتة ما يقبل يروح لاهله لزك وكل شويه لو يگرصها ويخليها تبجي لو ضاربه حسرة أخمل يضربه لازم يسويلة شي
مليت خليتها بحضني وهي تبجي على الكتكوت أشتعل ابو الكتكوت شلون مصيبة هاي.
وهذا تاج مچلوب ما يقبل ينطي اله راحت لحضن حبوبتها تبجي
أنوب رجع أجياد من الكاع وهي من شوف أبوهة تصير بأتمان
أخذوا الكتكوت من تاج وطردو صراحة طلعو قفاصة راح يبجي لأهله وأمة تضحك
وهي كاعدة بحضن ابوها وتلعب بي وتبوس بي وانوب دكول لاجياد حتى يبوسة وياها
وطبعا ينطيها على مايها ويبوس الكتوت
ويكلة يبعد جدك
بالليل أجوا ربع أجياد سويتلهم جاي جنت بالمطبخ انوب اجة اخو ويا ابنه تاج الدين وطب يضحك.
ارتكيت على الباب اتسمع الهم سمعت أخو يكلة
: - عمي فصل واحنه نلبس
واجيا رد عليه-: جيب تاج أطگة حور
كلهم ضحكوا وابو رد
: - هههههههههه تخنث الولد أبني يصير خنيث اذا أطگة نثية
-: بتي تاخذ حگها
كمية الهدوء وتفهم عد أخو تجنن دفع أبنه وتاج مدنك راسه مبرطم
-: روح بوس بت عمك وعمك هذا النسيب
عاد اجياد كلشي ولا واحد يطخ بتة
-: أطيح حظه شنو يبوسها. تعال تاخذلها منك راشدي وروح.
تاج بقى واكف خايف وهمه يضحكون عليه طفر واحد من جماعة اجياد اخذة يمهم
وحور بحضن ابوهة وهو يكلة
: - يلا بعد عمك اليوم راشدي باجر بوسه
وذاك الثاني حجة من يمة
-: بت عمك تمون
شجعوهة خاطر تاخذ حكها بس ماكو ضمت وجهه بصدر أبوه هههههه وتاج اعتذر من عمه
أرتخت ملامح اجياد وضحك حجة بتهديد
: -تاج وحك من سماك اذا مريت پ بتي بعد أطيح حظك
باوع لأبو وأبو غمزلة. اندار على عمة اجياد دنك باسة بخدة ورجع كعد يم ابو.
حلوة علاقتهم هل شي وأضح واخوان اجياد عكسة كلش تحسهم فقرة وعلى نياتهم الوكاحة والمشاكل يم اجياد تلگوهة
رجعت كملت الجاي وصحتلة أجة أخذة ورجعت للغرفتي تمددت بفراشي أحس شي أنام همة ما يمشون هسه يتاخرون.
رباب
تمر الأيام وتنطوي
وأنا على حالي.
حياطين الزنزانة صارت تعرف أنفاسي.
أعرف شكد الوقت من ضوء الشباك
أعرف صوت خطوات الحارس من بعيد.
حتى السكوت صار عنده شكل.
أيام السجن مرّة
وأمرّ شي من تدرين مالج طلعة منا أبد.
مو لأن الحكم مؤبد بس
لا لأن الأمل نفسه انسحب بهدوء
جنت بالبداية أعد الأيام.
بعدين صرت أعد الشهور.
هسه ما أعد شي.
كل يوم نفس الضوء
يدخل من الشباك العالي
نفس الرطوبة
نفس البطانية لونها كالب.
نفس الفراغ واليأس.
جان النقيب ريان يجي بين فترة وفترة.
خطواته تختلف عن الباقين
يجيبلي كتب يجيبلي بطانية أنظف حتى ملابس
مرات أكل بدون ما أطلب
ومرات يدز عليه اروحلة للمكتب يكعد يسولف وياي ويسألني عن وضعي ما أدري شنو الغاية
من إلى كاعد يسوي بس دوم أشوف نظرة الاسى والحزن بعيونة
مرة سألته بعد ما دز عليه جنت كاعدة كدامة كتلة
: ليش تسوي هيج؟
بقى ساكت لحظة بعدين كال بتشتت
: -ما أدري.
: -اكو واحد ما يعرف شنو سبب تصرفاتة
: -اي كدامج اني
أبتسمت وطاحت عيني على أيدة جان لابس حلقة وهاي جانت اول مرة اشوفة لابس حلقة
سالتة بستغراب
: -خطبت
انتبه وين أباوع حرك ايدة عاصرها رد بتوتر
: اي قبل كم يوم
: الف مبروك شايف كل خير
: -الله يبارك بيج
كمت من مكاني وهو ما جان ابودة أمشي بس أنا دكيت الباب والشرطية اجت أخذتني
رجعت للزنزانة ودموعي تجري
مو لأن خطب ولا لأن فقدته
بس لأن فجأة استوعبت شكد جنت متعلقة بي.
جنت أگول لنفسي هو مجرد إنسان يساعدني.
بس الحقيقة وجوده جان الضوء الوحيد
من يجي الزنزانة تصغر الهواء يصير أخف.
الوقت يمشي أسرع
هسه حتى الضوء إلى يدخل من الشباك العالي حسّيته أتغير
سجينة يمّي كالت
: - رباب شبيج صار شي وياج
هزّيت راسي ب لا.
شلون أگلهم أبچي لأن النقيب خطب
وأنا مؤبد.
ضحكت بيني وبين نفسي شگد أنا خطية
بس شنو جنت متوقعة ينتظرني
نقهرت كلش بس انا ما ادري، شبيه حسيت بشعور من الوحدة واليأس فوك أحساسي.
جنت أحب وجودة وأهتمامة يهون عليه عتمت ايامي وظلامه بس هسه هو خطب الحسرة تكسرت بخاطري
بس الله يسعدة ما قصر وياي هواي ساعدني وكفتة اهلي ما سوهة وهو الغريب هواي حاول يساعدني
مر شهر ما إجه الشهر أطول من سنة.
كل ما ينفتح الباب كلبي يدك وأتظاهر ما مهتمة.
بس ما جان هو بس اليوم
الشرطية صاحت اسمي
: - رباب
گمت كالت
: -النقيب داز عليج
رحت وياها وأنا أجرجر بردان ثوبي مرتبكة دخلت.
جان واكف يم الشباك، ظهره إلي.
لمن سمع الباب، التفت نفس النظرة والله مرات أحس يحبني ومرات أكول ما أضحك على نفسي
شحب مني بس نظراتة غريبة وعيونة بيها تعب
: شلونج؟
: مثل ما عفتني على حالي
ابتسم ابتسامة خفيفة
كعدت كباله صار صمت لحظات حجة
: -قريتي الكتب الجبتهن الج
: -لا
: -ليش
: ما دا أركز.
: -و ليش ما تركزين
رفعت عيني بعينة مباشرة
: لأن يمكن جنت أقرأ بس حتى أحجيلك عنهن
سكت واضح انصدم من صراحتي.
نزل نظره على إيده الحلقة لمعت بالضوء على أصبعة.
گال بهدوء:
: -رباب لازم تعرفين شي.
: شنو
: -اللي كاعد أسوي علمودج مو شفقة.
: أعرف
: -ولا ذنب
: أعرف
: - يمكن تعويض
ارتبكت
: تعويض عن شنو
تنفس بعمق وكمل: - لأن أكو أشياء صارت بقضيتج ما جانت واضحة مثل ما المفروض تكون
: شنو تقصد
رفع عينه بعيني
: - أقصد مو كلشي انسمع بالمحكمة
رجفت إيدي.
: -تعرف شي جديد
: -صارلي فترة أراجع أوراق قديمة
: ليش
سكت لحظة
: -لأن ضميري ما مرتاح
أول مرة أشوفه بهيج ضعف
همست
: -ليش تهتم لهالدرجة بيه.
ظل يباوعلي نظرة طويلة
: - لأن من أول يوم شفتج ما شفت مجرمة أنتِ طفلة بريئة مو حرامات يخلص شبابج هنا
سكتت هاي الكلمة جانت كافية تخلي خيالي يسرح بعيد وينسى الواقع المر
بس تذكرت شي هو خاطب ابتسمت بحزن
: بس هسه إنت عندك حياة جديدة و خطبت
شاح بنظرة عني وكال
: -إي
: زين تسوي
: -رباب
: لا صدگ الحياة تمشي لازم تمشي
: -مو كلشي يمشي بسهولة
فهمت بس ما جان إلى الحق أفهم أكثر
وكفت حجيت بهدوء
: شكراً على كلشي سويته.
: - ما خلصت بعد
التفتله
: شنو
: -أفكر أرجع أفتح قضيتج
: -ترى أنحكمت مؤبد
: - المؤبد حكم مو قدر نهائي ليش يأسة من الحياة
وكف كدامي
: - إذا أكدر أفتح باب واحد بهالقضية راح أفتحه
دگات كلبي بيدي تقريباً هاي أول مرة من أسنين أحس بشي يشبه الأمل بس أخاف منه.
لأن الأمل إذا ينكسر بهالمكان يموت
همست
: لا تواعدني بشي ما تگدر عليه
جاوب بثبات
: -ما وعدتج تطلعين وعدتج أحاول.
انفتح الباب الشرطية تنتظرني قبل لا أطلع التفتله آخر مرة شاف دموعي بعيني.