رواية مرواد الظلمة الجزء الثاني للكاتبة هيلانا الفصل الثاني والعشرون

رواية مرواد الظلمة الجزء الثاني للكاتبة هيلانا الفصل الثاني والعشرون

دخلت لحمام فرجيت أسناني وحضرت ملابس أجياد يجي يسبح
شوي وسمعت صوت بالغرفة اكيد أجة حامي عرضي وحامي شرف العشيرة فدوة اروحلة
مديت راسي شفتة داير وجهه على الكنتور وينزع
بقميصة أجيت من ورة وگتلة بمممم
توقعت يكمز شي بس ولا ريگشن اصلا رهادي هز أيدة وباوعلي بسخرية
-هيج يستقبلون اليرجع من الشغل تعبان
-لا عيوني حقك عليه بعد اول ما ترجع أهزلك ركبة
-لا مابيج خير تسويها.

-والله أسويها شنو نمونة ماتصعب عليه أعرف اركص
حجة وهو يدير وجهه يخلي أسلاحة بالجرار
: - بس حجي أنتي
: - دكللك اس، أنتبهت ديستفزني حتى اسويلة أشياء خارجة عن الشرف والاخلاق والقيم
كتلة: -ايي تدري هم صح كلامك حبيبي
- أعرفج فاهيه
ضحكت كرص خدي ومشة لحمام صحت وراة التفتلي
: -اسويلك عشة
: -لا ما اريد ما أشتهي
فات يسبح وأني غيرت ملابسي وتمدددت شوية وطلع ينشف بشعرة.

اجة نام على رجلي أخذت المشط أمشط بشعرة وهو غافي گالي: -شكو ماكو
: -غيرك بالكلب ماكو حبيبي ابو حور
ضحك رجعت خصلاتي ورة اذني وهو عدل نومتة جر المخدة ونام بصفي
: -أريد أكلك شغلة
: -ترى طافي من النعاس عوفيه على باجر و طفي الكلوب اريد انخمد
: - اشبيك دكلي شنو
: -يببااا احجي شني الشغلة
: -أنسمي بتنا الجديدة ملاك
طگهه ضحكة وكال: -حلوة هاي مال بتنا الجديدة
وسمي إلى يعجبج
: -فدوة اروحلك.

: -لا يابة تتدللين هي زنوبة وحدة عندي
: -اي والله شعندك بس اني تروحلي فدوة
: -استغفرالله والله تجفصين
: -ليش اجفص لعد مو اني دكلك اروحلك فدوة وانت هم عادي تروحلي فدوة شنو المشكلة
: -بس مو هيج
: -لعد أشلون
سحبني ونومني على أيدة رفعت عيوني الة مغمض
: -هسة شنو
-: نامي
-: يعني أنت ما تروحلي فدوة بس أني اروحلك فدوة
-: لا عمي اروحلج فدوة أنا وعشيرتي بس نامي
هزيت راسي ونمت
ثاني يوم...

فتحت عيوني على ضوء الشمس خفيفة من الشباك. التفتت عليه نايم ويده بعده حاضنتني.
ابتسمت بهدوء سحبت نفسي على كيف منه حتى لا يكعد وطلعت للمطبخ
غسلت وجهي وربطت شعري وبديت أسوي ريوك
بيض و طماطة وجاي ثكيل شلون يحبه
وأني أرتب السفرة سمعت صوت باب الحوش أنفتح بقوة
لفيت بسرعة شفت أخته المزوجة داخلة بدون سلام، وجهها مكلوب من الصبح كلتلها
: - صباح الخير
ما ردت بس باوعتلي من راسي لرجلي
: - وين أمي
: - نايمة بعده.

راحت للغرفة مال عمة رجعت كملت الريوك ما أدري شبيه هاي البنية ما ترديني والله عجيب
شوية وأجت هي وعمتي هم كاعدة كعدوا دنتريك وهي كالت
: -صبيلي جاي
رغم القوري يمها تكدر تصب وحدها وعمة صبت استكانها وحدهة بس هاي تنرفز صبيت وخليته كدامها
: -اي شلونج زينب مرتاحة ويه أخوية
: -اي الحمدلله
: -اي طبعاً الحمدلله عوزها دكولين ما مرتاحة صرتي أم أفلانة وحطج بيت وحدج ومدللج جااا ليش ما ترتاحين.

ردت عليها امها بزمخة: -ام مرتضى شبيج يمة شني هالحجي ويه مرت أخوج
: -هسه شكلت يمه نسولف أنا ومرت أخوية مايصير
: -يصير بس مو هالشكل
أحسها متحملة علية وبلا سبب وأضح حقنه كلش ومبينه ما تحب الخير لغيرها كالت وهي تخوط بالاستكان
: -زينب صدك سوال هسه على فرض أنتِ جنتي مزوجة وترملتي وانوب تزوجتي كدرتي تنسين حسن وتحبين أخوي لو لا
حسيت أنتخمت من كلامها.

: -صراحة ماعرف شنو الداعي من هيج مواضيع كاعد تحجيها بس أجاوبج ما اخليها بنفسج خاف بنيتج تتطلكين وتزوجين مرة ثانية
وجهها حتقن ما راضية كملت ببتسامة
: -ااني أنجبرت على زواج من ابن عمي حسن وما حبيته وهو بنفس ليلة إلى أزوجنه بيها مات يعني مالحكت لا اعاشرة ولا أحبه اما اجياد فااني أحبه وازوجته برضاي وكلش احبه ولو يرجع بيه زمن ارجع وأختارة تمام يروحي.

: -بس والله محضوضة أخذتي اجياد هسه اذا أنا أطلكت لو ترملت هم هيجي حظي يكعد
عاطت بيها عمة
: -تفلي من حلكج شني هالفال من صباحيات الله هي اليموت رجلها بيه خير أخلافة بعد
: -اييي جا مو هاي زينب كدامج مرتاحة
عاد عمتي أنهدت عليها بكلام كلش ما حلو أني ابد ما حجيت وهي زعلت وكامت كالتلها
: -صارت جنتج أعز مني وادفعليها واطرديني.

خلت ومشت للبيتها فد حقنه خرا بيومها ولا تنبلع وتريد تخلق مشكلة كوة ما ادري شبيها وياي والله
وراها مرت الايام عادية ودخلت بشهر السادس
وحضرنة أني واجياد أغراض الطفل
وجنت طايرة من الفرحة واجياد صبغ بيتنا من جديد ورتب غرفة حلوة للبنات
وحوري كاعد تكبر وكل يوم تحلى مدنفشة وتخبل
حيل وأبوها يموت عليها أحسها ماخذة معزتي عندة هههههه صدك لو كالوا البنية شريچة أمها.

ف بيوم صادف الأربعاء جان أسوء يوم دمر حياتنا وأنتهت وانطفت كل احلامنه
ما جان يوم عادي أنباكت بي ضحكتي وفرحتي ودمرت بي عائلتي
وجان بداية الهلاك ونهاية السعادة والحزن دائمي إلى راح يرافگني طول حياتي
جنت أرتب البيت وأجياد كاعد يشرب چاي يباوع على تلفزيون ويبتسملي كل ما أمر من يمه
: - شبيج صافنه
: - ما أدري كلبي ما مرتاح.

ضحك بخفة كام من مكانه حضني حطيت ايدي على صدرة وتنهدت دنك باسني أبتسمت غصب بس داخلي يرجف وأحساس ما حلوة غازيني
: -اجياد احس بشعور مو حلو
: -ماكلة شي مضايقج
: -لا بس ما مرتاحة
: -ماكو شي أشبيج بابة
ضمني حيل لصدرة بستة على ركبتة ضحك حسيت بفكة تحرك
: -اجياد أني كلش أحبك تدري مو
رد عليا بذوبان: -وأنا ميت عليج
كتلة بضحكة: -طايح على راسك
: -اي والله غركان كلش
فجاة سمعنه صوت باب الحوش أنرگع رگعة قوية.

هو بسرعة طلع وأني لحكته
جفلت من شفت الامن تارسين الحوش وبيهم صاعدين على الحياطين وبيهم فوك البيت
وكلها مسلحة يعني محاصرينه من كل جهه ما أجة ابالي غير سالفة الجريمة إلى ضمينها من أسنين
حسيت الكاع تميل بيه وركبي ما يشيلني
باوعلي أجياد بنظرة غريبة مو خوف
بس جانت نظراتة وداعية عبالك عرف على شنو جاين كالي
: - دخلي جوه.
: - شنو ديصير اجياددد
ما جاوبني وكف بثبات ما تهزهز كالهم
: -تفضلوا خير سيدي.

جان لبسهم أسود وجوههم جامدة
أسلحة بإيدهم يرهبون واحد منهم صاح بي
: - أجياد أنت مطلوب
صرخت بخوف وأني أشوفهم يحطون الكلبجات بدي مطلوب شنو
دفعوني على جهه بقوة بعد ما حاولت أچلب بجياد وهو زمخ بيهم
: -شيل ايدك عنهااا كو
عاد من كالهم هيج واحد رد علية وطگة بالمسدس على حلكه طيحة للكاع وهو بعدة يصيح عليه
: -ااااادخلي جوة زينب
ركضت عليه دموعي ترست وجهي بدون إحساس مشدوهة ومرعوبة.

: - لاااا وين تاخذوه هو شمسوي اااااجياااااد وين مااااخذينه
أخذوة للسيارة وأني أنهاريت الطم ركضت وراهم وهمة طلعوا بسيارتهم جنت منهارة والطم
رجعت ركض على بيت حماي ابو تاج فزعتههم جانت عمتي يمهم ومن سمعت بالخبر ماعت روحها
وطاحت كله فزعت وراه وما ندري وين أخذوا أصلا من شفت عمتي طايحة ومغمى عليها حسيت الدنيا
كلها تتهاوى صوتهم جيبوا ماي يرشون عليها
كل الأصوات مداخلة براسي
بس صوت واحد جان يدور براسي.

أجياد مطلوب...
بطني ثكيلة و بنتي بداخلي تتحرك عبالك حاسة برعشتي
حطيت إيدي على بطني وبچيت بحرگة
حسيت بذنب غريب
كل لحظة تمر عبالك سنة كل دقيقة بدون صوته عمر كامل وما ادري وين أخذوا او منو إلى أخذة
بقينا أسبوع أهله مخبوصين يدورون عليه ومالة أثر لحد ما أجة ابو تاج كال
ماخذينة على سجن أبو غريب جان هالخبر كارثي إلى ياخذوا لهذا السجن يعني أگطع الامل منه بعد
جنت أسالة شعرفت ومن وجهه جنت متاكدة.

أكو شي بس أبالي موت محمد وخالد ماكو غيرهم
بس صدمني من كال ماخذينه بتهمة تجارة بالسلاح وتمويل أحزاب معارضة للحكم ومنظم بحزب شيوعي
خلاني جامدة صفن عقلي بكلامة وصدمني جان الكل مصدوم معقولة يطلع من اجياد هالشي
كمل كلامة بقهر: -سائد مدسر السالفة عليهم واكو ندسة عليه هو وبعد كم واحد من جماعته كلهم گاضينهم بتهمة قيادة معارضة ضد الدولة
جان يحجي وأني منهارة ضايعه شكول والله جنت خايفة وكلبي لاعب.

مر أسبوع وما نعرف شي عنه غير أنو محكوم أعدام
وأبو تاج حطلة محامي
بس المحامي شيفيد أكو شهود ودلال وكلشي مدبر عليهم وهذا التحقيق شگلي مو اكثر
والقرار صدار بيهم أعدام بس ابو تاج متأمل يصير طعن بالحكم
عفتهم يحجون وطلعت شايلة بتي وروحي طايرة
صارلي أيام ما شايفة النوم وعيوني مورمة
من البجي ورجعت للبيتنا حطيتها باالكاروك
وكعدت بالكاع أبجي وأصرخ وحدي.

البيت فارغ وحور كامت تبجي وياي من شافتني أبجي وهي ما تعرف شكو بس تنط من البجي
وياي ماعرف أسكتها لو اسكت نفسي أحنا ضايعين بعد أبوها
بقيت وحدي لليل محد أجة حتى عمتي بقت يم بيت ابو تاج، نومت حور وطلعت كعدت بالحوش
حاقدة على أعمامي وعلى سائد العار هو سببب بلي كاعد يصير بحياتي ما جنت متخيلتة هلكد حيوان
الساعة بالعشرة من الليل هدوء جنت كاعدة بالحوش وحدي ورغم باردة بس ما جاي أحس.

بالبرد ناري بكلبي أحسني جاي أغلي
شعري منفوش وعيوني حمرة من البجي
إيدي على بطني توجعني
وصافنة شسوي واجياد شلون يطلع من هالمصيبة
الباب أنفتح بهدوء رفعت راسي
سائد دخل هذا شجابة خطواته بارد وابتسامة جانبية مستفزة كمت من مكاني حجيت بعصبية
: -ليش جاي ما كافي إلى صار شراايييد بعد هااااا شعدكم بيتي
سد باب الحوش ورا ظهره بهدوء متعمد والتفتلي والابتسامة ما نزلت من حلكة
: -جاي أطيچ حل يساعدج ويطلع أجياد.

-: -حل ويطلع أجياد لك ياااا عار جااا هو منو طبببة السجن غيركم الله ينتقم منكم متهم بجرائم ما مسويهن، وانت تحچيلي عن حل
قرب خطوة
: -أطلع أجياد.
تتجمدت أباوع بعيونة ما عندي ثقة بي ونيته بوجه كتله
: -جذاااب ما اصددككك
: -والله زنوبة
: -شلون؟
ميل راسه و بتسم بخبث
: -نتزوج
ثانية، ثانيتين طبعت ايدي على وجهه براشدي وعطت بي
: -ااااانت مريض اني مرته حااامل منه شنوووو نتزوج أدري بيك عار بس ما توقعت لهلدرجة.

مسح على مكان الضربة وضحك
: -أدري ولهذا أريدچ
أحس ما بقة براسي عقل ودموعي تارسة وجهي تفلت عليه: -حقيررر تستغل ضعفي تستغل سجنه
لزم أيدي بقوة ردت أسحبها بس ماكدريت جان أقوى مني السافل ويضحك ضحكة باردة مال شماتة
: -مو أستغل أستثمر
شهكت وحجيت كوة
: -استثمر شنو
: -بعدين تعرفين شنو استثمر.

: -ااااامشي ولي الله ينتقم منك متاكدة تريد تحرك كلب اجياااااد وتسوووي هيج لو تموت ما احققق مبتغاك وان شاءلله يطلع غصبااا عليك
: -ما يطلع بعد من هسه أقريلة الفاتحة بالهواي شهر وينعدم وداعتج طلعت مفارز بس الگة جثث أخواني بعد اعدامة ماكو أسهل منه
من كال هيج وذكر هالموضوع خلاني أبلع العافية معقولة يلگاهم يربي لازم أروح
لذيج المنطقة وأطلع الجثث من مكانهم حتى لو أذبهم بالجدول مال الماي بلكي يرحن ويه الماي.

كلمته الأخيرة ظلت ترن براسي
بلعت ريگي حلگي نشف
يعني هو ديحفر ورانة ديقرب
لا، لاااا، إذا وصل قبلّي كارثة
عيني راحت يم الباب شسوي ها أروح قبلة رجعت عيوني عليه يراقب وجهي يستمتع بالخوف اللي
ديكبر بعيني ابتسم ببطء.
: -شبيچ ليش فجأة سكتي بس لا تعرفين شي وما تحجين
لفيت وجهي بسرعة: - ما أعرف شتحچي
قرب خطوة وخطوة ثانية همس
: - زينب أنا أعرفج من عيونچ عشنة سوة أسنين
مد إيده حتى يلمس خدي دفعتة بقوة.

: -لا تلمسني لاااا تقرب مني يااااا نجس
ضحك وحجة
: - هالخوف كله على أجياد لو على شي ثاني
جسمي كله رجف
: -يعرف لو يراوغ حتى أحجي
: -أنت لو بيك خير وشجاع جان أخذت ثارك منه بدون ما أدخل الشرطة بس تدري بنفسك جبان ويسحك على راسك وماتكدر تسوي شي اصلاااا جان خالسكم ومطيح حظكم هسه طلع السانكم
ضيق عيونة بكره نبرته تغيرت
: - أجياد لازم يعيش ويشوف بعينه شلون مرته تتزوج غيره وهو موجود
صرخت بوجهه، اسكتتتت.

دفعت صدره بكل قوتي بس هو ثبتني
لازم أجتوفي بقسوة
: - اسمعيني زينب أنا ما أهددچ. أنا كاعد أعرض صفقة تقبلين أجياد يعيش ترفضين ما يبقى منه غير اسم
دموعي نزلت بدون إرادة
: - ليش هيج شمسوي أجياد إلكم
مال قريب مني همس بسم
: - أجياد كتال حسن وأنت غدرتي بينه ورحتي أزوجتي كتال رجلج
أنصدمت لدرجة بقيت أباوع بوجهه بدون رد وهو مبتسم حاس بلذة إلى كالة.

عيونة، اخ اجياد جنت كل ما أباوع بعيونة اكولة عيونك أحس شايفتهن ويكلي لا
اه أجياد ليش هيج ما أصدك دفعته وطحت بالكاع أبجي مخنوكة مامصدكة ومصدومة بنفس الوقت
هنا فهمت الموضوع أكبر من سجن أكبر من زواج
هو يريد حرب نفسية يريد يذلة ويحرك كلبة قبل لا يموت.

: - انت جبان وجذاااب مستحيل أصدكك جاي تحجي هيج لان ما تكدر توصل لأجياد وتريد تكرهني بي بس ااانيي ااحبه وحسن مات الله يرحمة وهذا زوجي واني مقتنعه بي لو شگد ما تحجي ما اثق بيك ولا أصدككك واااااطلع من بيتي يلاااااا
سحبت نفسي إيدي على بطني و بطني وجعتني حيل هو لاحظ كال
: - لا تنسين عندچ نقطة ضعف ثانية
ونزل عيونة على بطني رفعت عيني بكره
: - هذا طفلي مو ورقة ضغط
: - يصير ورقة وحتى دفتر أسوي.

هالكلمة طلعت منه ببرود يخوّف سكت لحظة وبعدين حجة
: -وبالمناسبة أنا أحبج واعزج اكثر من اجياد واخاف عليج وعشنه ايام سوة ما ناسيهن بس زواجج من اجياد خلاني أضوج منج واله أنتِ بت عمي
أدري بي يمسلت عبالة أصدكة ما جاوبتة خلة وطلع
بقى الباب ورا مفتوح أباوعلة وكف لحظة برا
يمكن ينتظر أركض وراه لو ينتظر أنهار وأصيح باسمه وأتوسلة
بس أني جنت متيبسة مثل شجرة انكسرت بس بعدها واكفة
صوت خطواته اختفى مشى والهدوء رجع...

اريد أكوم بس رجلية ما شالتني
إيدي بعدها ترجف
كلامه يعيد نفسه براسي
أجياد كتال حسن،
لا. لا مستحيل أجياد
بس عيونه
عيونه أول مرة شفتهن حسيت أعرفهن
نفس النظرة نفس العمق
حطيت إيدي عراسي بضياع
: - لاااا يريد يخرب بينه يريد يزرع شك بكلبي.
بس ليش ذكر اسم حسن
ليش اختار هالاسم تحديداً
حسن...
لو كايل كاتل نصير ما أضوج أني موت حسن كلش اثر بيه جانت هاي اول جريمة أتصير كدامي.

وبليلة عرسي يمكن لو باقي عايش ما صار كل إلى صار جان ممكن يطلكني ويرجعني لاهلي
بذات هو جان شكلة فقير وحباب ليش أجياد يكتلة بطني وجعتني أكثر ضميت ايدي على بطني
هو يريد أكره أجياد ويكتل صورته بكلبي
حرب نفسية قذرة
مسحت دموعي بعصبية.

: - حتى لو جان ماضيه أسود حتى لو كلامة صدك اكيد اجياد عندة مبرر أني لازم اوكف ويه حبيبي وأبو بيتي مايصير أعوفة بهالشدة وحدة شگد جان حاير بيه ما راح أنطي بي وأمشي بكلام سائد عسى ما يكتل بيت نصير كلهم طبهم طوب
گمت مشيت للحوض وغسلت وجهي بماي بارد
لازم أروح لنفس المكان هسه وأطلع الجثث
ماكدر أفكر بشي غير هالموضوع اذا لگوا الجثث راح التهمة تضاعف على أجياد وأحتمال ينحكم موبد
الساعة قريبة عال 11.
ضلّيت أفكر.

ما أگدر أطلع وحدي بهالوقت وإذا أحد شافني إذا صارت مصيبة بالطريق وأني حبلة أخاف كلشي
يصير اترددت هواي وبالأخير قررت أروح للبيت حماي الوسطاني هو قريب علينا
لبست عباتي ومشيت وصلت بيتهم دكيت باب الحوش مرة مرتين لحد ما أنفتح
جان نايم فتح الباب وعيونة مغمضة هنيالهم شلون نايمين وأخوهم بالسجن كال
: -زينب شني صاير
صوته جان قلق بلعت ريگي
: - أريد أطلب منك طلب
: -خير.

: -اريدك توصلني للبيتنا القديم أني واجياد أريد أجيب أغراض إلى هناك.
: -هسه بهالليل ليش ما تنتظرين لباجر
حاولت أثبت صوتي حتى ما يشك خاف يخاف وما يروح وياي
: -ما أرتاح غير أجيبهن هواي أشياء خاصة إلى وأريدهن هسه
حسّيت شك بصوته
: - المنطقة مو آمنة وبعدين هالبيت مهجور من زمان شني توج مذكرة أغراضج وين جنتي
: - أني حامل وتعرف وضعي شلون لا تصعّبها عليه تروح وياي لو أشوفلي رجال من القرية يوصلني بسيارتة.

تنهد ما راضي: -زين بس أوصلچ وأنتظرچ بالشارع ما أدخل للبيت و أنتِ مو تبطين عليه
: -إي بس خمس دقايق والله
هذا الحجي مرتة كاعدة واكفة باب الصالة وأخت اجياد هم يمهم فهم كاعدة على صوتنة وتباوعلي
مر فترة.
هيج ووصلنا المنطقة بعيدة و الشارع شبه مظلم.
السيارة وكفت لف عليّه باوعلي
: -مو تبطين عشر دقايق وتعاي تدرين بالوضع ويردون يلزمونة علينا لزمة
هزّيت راسي: -ما أطوّل.

نزلت خطواتي جانت سريعة من الخوف أمشي وأتلفتت وبيدي أتريك أضوي بي
هنا كلشي بدأ.
دخلت
ريحة تراب ورطوبة استقبلتني.
سديت الباب بهدوء.
مشيت للمخزن الخلفي
بعده مثل ما عفنا
فتحت الجنطة تنك جوة بيه فاسه موجودة والكرك مرگي على الحايط
إيدي ترجف طلعت الكرك
وبعدها الفاس.
ثكلهم بيدي حسسني بثكل اللي دا أسويه
سامحني يا ربي فدوة
طلعت من الباب الخلفي للحديقة القديمة
بعدني أندل وين دفناهم
بس ظلمة وأشجار داير مداير البيت والربضة.

ذاك اليوم دفناهم هنا شلون هيج مر الوقت بسرعة بدون شاهد بدون علامة واضحة بس أني أعرف المكان وأندلهم
غرست الفاس بالگاع وبديت أحفر صلبة ومتچوچة وكل ما اطگهه بطني توجعني أكثر
راح ينشلع طفلي والله بقيت أحفر بيه شوي بالفاسة وشوي بالكرك
التراب بدأ يتناثر صوت دكات كلبي أعلى أدلي التايه
بطني شدّني من الم
عرگت رغم البرد والهث لحد ما أخر طكة حسيت طكيت شي قوي مديت أيدي أتلمس لحد.

ما لزمتة بيدي جان عظم رجل من لزمته روحي طارت من جسمي وحسيت أدين أنحطن
فوك أجتافي حسيت واحد لزمني والله بسرعة ذبيت العظم والتفتت وراي وصرخت
ماكو أحد بس صوت الهوى العالي يحرك الاشجار ويطلع صوت يخوف حيل تجمدت
وخوف غريب غزاني وأحس أكو شي ديباوعلي بهل أثناء سمعت صوت أخو اجياد يصيح عليه
طگيت ضوء التريك عليه شفته اجة يركض
: -هاااا زينب ااااشبيج.

وصل يمي أتفائج من شافني حافرة التربان بس الاعظام ما مبينه هو بس واحد طلع بيدي
ومن الخوف طاح من ايدي بالكاع نظرتة من خوف لصدمة تحولت كال
: شسووووين هنااااا
ارتبكت نكت التراب من ادية وحجيت بتوتر
: -ما أسوي شي
: ززززينب
رص على سنونة بغيض وباوع على المكان بقيت جامدة بعدة بهل أثناء واكفين والضويات طگت علينا والصوت دوة
: -أرفعوووا اديكم فوك
هو رفع أدي وأني وراة واكفة مصدومة أشوف الامن طوقوا المكان.

لزمونة خلو الكلبجات بدينة وأخذونة للسيارة وقسم بقوا بالمكان واحد من الضابط كالهم كملوا حفر نشوف شكو هنا
عبالك واحد متاكد لو أحد دازهم ومتاكدين كل واحد خلوا بسيارة وحدة
السيارة وكفت كدام المركز نزلوني وأني دا أرجف الكلبجات تضرب بمعصمي وبطني يشدني من الخوف.
دخلوني غرفة تحقيق وحدي أخو أجياد فصلوه عني.
كعدوني على كرسي حديد إيدي مربوطة كدامي.
مرت ربع ساعة والباب أنفتح خطواته معروفة شفتة سائد.

لابس بدلة رسمية شعره مرتب ابتسامة باردة على طرف حلكه جان أكو شرطي واكف بالباب كالة بامر
بعد ما باوع عليه
: - طلّعوا برا أريد أحچي وياها وحدي.
الباب انسد بقى هو وأني بس اقترب سحب كرسي وكعد كبالي قرّب وجهه عليّه
: - عفية عليج يا بنت عمي دليتيني على مكان أخوتي بنفسج.
: - شنوووو
ابتسم هالمرة ابتسامة لذة مريضة.
: - خالد ومحمد عبالج نسيتهم عبالج دمهم يروح هدر
حجيت أنكر
: - أنت مسودن مو صاحي ما أعرف شتحچي.

مد إيده لزم فكي بقسوة ورفع وجهي
: - لا تمثلين أنا من زمان أشاك بس الليلة ثبتيلي كلشي
عيوني غرگن بدموعي
: - ما كاتلت أحد ما لي علاقة
ضحك بخفة
: - يمكن، يمكن لا بس القانون ما يهتم بال يمكن.
مكان الجثث وين بيتكم منو جان يحفر إنتِ منو موجود وياج أخو أجياد.
سكت لحظة عيونه بردت أكثر
: - ألبسها عليچ وعليه وأنطيها الهم زوجة القاتل وشقيقه يخفون جريمة قديمة وتدخلون سجن يم أجياد حتى ما يحس بالغربة.

صرخت بوجهه وأدموعي تتطافر
: - لااااا...
قرب أكثر همس:
: - أو ال...
سكت متعمد
: - أو شنو؟
عدل كعدتة شبك إدي بهدوء
: - تشهدين دكولين بالحرف الواحد أجياد هو اللي كتلهم وأنتِ ساعدتي بدفن الجثث خوفاً منه
: - مستحيل!
ضرب الطاولة بإيده فجأة الصوت رجّ الغرفة.
: - مو بكيفج
صرت أرجف نزل صوته بهمس أخطر وأخبث
: - عندج خيار ثاني.
عرفته قبل لا ينطقه كتلة
: - لا...
ابتسم: - تتزوجيني.
: - أنت مريض.

: - يمكن بس عندي نفوذ أطلع أجياد من حكم الإعدام أخففها مؤبد أحمي أخوه أدفن القضية للأبد.
وكف دار وراي ودنك عليه صوته قريب من أذني.
: - وبالمقابل أجياد يعيش ويشوف بعينه مرته تتزوج غيره وهو بعده يتنفس
حجية يوجع يدك بالكلب
: - ليشششش شسويت إلك
وكف كدامي وحجة بحقد: - كاتلي أخواني شترديني أسوي هااا
: - لا مو هيج هو هو ما كاتلهم.

: - كتل أخوي حسن بليلة عرسكم نسيتي شني والله ثارهم أطلعه من أعيونكم وحتى الاعدام قليل بحگة
صدري ضاك كلش ثرت بوجهه
: - جذاااااب
عيون أجياد تذكرني بذيج ليلة ذاك الشعور القديم رجع أول مرة شفت أجياد دفعت سائد بكل قوتي.
: - اسكتتتت ااااااجذب مااااصدك اي كلام على اجياد ما أصدكة
هو ثبتني من أجتافي جنت منهارة أبجي
: - اسمعيني زينب لازم توافقين
عيوني توسعت وهو كمل بخبث.

: - تقبلين يعيش او ترفضين ما يبقى منه غير اسم على الكبر
انهاريت و دموعي على خدي
: - انت جبان ما تكدر توصلله فتستقوي عليّه
: - جبان؟ أنا خليتج بنفسج تحفرين كبور أخوتي.
خليت الأمن يوكفون بالضبط باللحظة المناسبة دبرت كلشي اكو فرق بين الجبان والذكي أعرف شلون أطيحكم
: - أنت دازهم
: - طبعاً من طلعتي من بيتج أنتِ مراقَبة
بقيت جامدة فاكه اعيوني أباوعلة ما شفت بحياتي أنذل منه.

: - تخيلي تنسجنين وطفلچ ينولد بالسجن لو يمكن ما ينولد أصلاً أحتمال يموت بطنج
: -والله حرام عليك
: - من كتل اجياد أخوتي مو حرام وحرام أخذ حكهم مو صح
ضربت صدره بيدي حاولت أضربه على وجهه...
لزم ايدي يضحك
: - بعدج ضعيفة حتى ضربج ما يوجع
سحبت نفسي للكرسي أبچي مخنوگة.
: - أني أحبه حتى لو صدك حتى لو عنده ماضي أسود هذا زوجي ما اوكف ضدة مااااتخيل نفسي أشهد عليه واودي حبل المشنقة بيدي
سائد ابتسم بسخرية.

: - الحب ما ينقذة من حبل المشنقة.
قرب وجهي بإصبعه
: - عدچ يومين لو نزوج لو تشهدين ضده
كمل بحقد: - وإذا تلعبين من وراي ألبس الجريمة إلج ولأخوه وأخلي أجياد يشوفچ تدخلين السجن كبله
دموعي ما وكفت: - ليش هيج تكرهنا
عينه لمعت بحقد صافي: - لأن أريد يحس بكل لحظة انكسار حسيتها من مات حسن واريد أذلة أريد كلبه يحترك وينذل
وكف مشى للباب وقبل لا يطلع التفت.
: - فكري زين زينب أنقذي أو دمرّي الكل وياج بكيفج بعد.

الباب انسد بقيت وحدي صوت أنفاسي متكطع.
إيدي على بطني دموعي تنزل.
همست بصوت مكسور
أجياد شسويت بينا.

خلاني يوم كامل بالتوفيق لحد ثاني يوم أجة أخو اجياد أبو تاج
أجو طلعوني كالوا عندج ازيارة من رحت لگيته منتظرني وسائد يمه من اجيت أني سائد طلع
كعدت اكبالة حاولت قدر الإمكان أبقى صامدة
كالي بحيرة وهو يقرب يكعد اكبالي
: شمسووين زينب انتم شمسوين من ورانة أحجيلي شني هاي الاعظام
المشكلة أني ما عندي ثقة باحد بعد حجيت بدون أهتمام
: -شدراني يجوز أعظام حيوانات.

: -زززينب شني هالحجي ترى ودوهة للطب العدلي ااحجيلي حتى نتلاحكم قبل لا يصير شي اكبر كافي علينا اجياد بالسجن تردون انتم هم تلحكوا
: -كتلك ماااادري
: -سائد كال ذني جثث أخوتة
: -يمسلت سائد
: -زينب أحجي لا تماطلين بالسالفة
: -شحجي دكلك ماااعرف شي ااااشبيكم ما تفهمون
يعني أعترف بشي احنا ما مسوينه
: جاااا شعندج هناك بنص الليل وماخذة حماج وياج وهو مايدري شكوو ليش مورطته
: -جنت رايحة اجيب اغراض.

: -مو لگوج تحفرين بكبر
: منو كالك سائد يجذب
: -لاااا أخوي الحجة
اذكرت حماي المطفي كبر مابيهم خير كتلة بسخرية
: معقولة أنتم اخوان اجياد وجايبتكم نفس البطن ياااحيف هو بالسجن وانتم برة كل خير مابيكم سائد يسوك عليكم جاااين تحققون وياي بدل مااادورن حل لاخوكم
: ززينبببب اووزني كلامج شو ما تعرفين تحجين أنتِ
كمت من مكاني اريد أطلع وحجيت بحقد.

: -ااااني اريد اساعد زوجي بكل الطرق دحااول انقذة مو مثل اخواتة الجبناء خايفين على نفسهم هذا إلى جنت اسوي هناك ومو بعيدة واحد منكم وشة بينه
والا سائد شلون لحگنه
هو عاف كلشي وكالي بشك
: -يعني اجياد صدك كاتلهم
: -لاا هو ماكاتل أحد
: وين السلاح المكتولين بي هذا الشي يساعدنة نبري من جريمتين اذا صدك ما اله ايد على اقل يخف الحكم هو بدون شي عليه جريمة سودة.

اتذكرت السلاح عندة واحد منهم عليه بصماتي اكيد اني جنت لازمته من كتلت محمد
بس أني ما أعرف وين هن بقن عند اجياد
هزيت راسي بتشتتت
: -مااادري، مااادري بيهم عند اجياد روح اااحجي ويا
: -مانعين الزيارة عنه ما يخلونة أنشوفة
: -ياربي أشلون بيه شسوي
: ااااحجيلي الصدك زينب حتى نكدر نطلعة
بقيت ساكتة لحد مالح عليه حيل وتلمست الثقة بكلامة الا قررت أحجيلة سولفت الة بس مو كلشي.

كالي: -راح أروح أقشمر سائد وخلي يدبر ازيارة لاجياد وأحجيلة شگاعد يصير نشوف شيكول
: -بس ما أعتقد تمشي على سائد
: -تمشي معليج هسه أقنعة
فعلا هو راح وأني بقيت ولحد هسه ما مطلعيني من التوقيف أجت على بالي رباب شلون عايشة
هسه بالسجن شگد خطية دحس نفسي مختنكة وما صارلي يوم ما أتخيل أولد طفلي هنا
ويفتح عينه بالسجن لا يربي دخيلك مالنا غيرك
بقيت أدعي والقلق ياكل بيه.

بقيت أفتر مثل اليتيمة الفاكدة أحساسي بموت أخوي رجعلي ماأتحمل أفقد اجياد أموت بدونة
أني حيل متعلقة بي احبه والله هالكلمة ما تعبر عن حبي الة ابد احسه هيج مستطون روحي ومحتلني
كلشي بيه يريدة حياتي ظلمة وهو ماكو
الشمس إلى مضوية حياتي هو، من هسه أختنكت
الله لا يگولها ويأخذوا مني أنجلط أموت
لثاني يوم أجاني ابو تاج جان وجهه مغيم وحزين ومكسور حيل تحسه حاير كلش.

كتلة بلهفة ودموعي بعيني: -هاااا شفت اجيادد شلونة فدوة متغير تعبان شبي احجيلة شكتلة
حجة بهدوء: -على كيفج زينب هو زين لا تخافين
أحسه يجذب عليه من يحجي ما يباوع بوجهي اجياد يحب الحياة يتخبل من السجن
كالي اريد أشوف بتي تكبر كدامي ومن يمشط شعرها يكلها باجر أزفج بيدي وارمي وراج
هو يحبني ويحب أهله ادري بي مايتحمل فكرة يبقى بالسجن ويعوفني ضايعه وحدي.

هو يدري معندي احد غيرة أني أخلافة أموت أختنك بس الله يدري شيصير بحالي
: -فدوة خوية ابو تاج أحجيلي شلونة
: -زين الحمدلله لا تفكرين بي بس هو كالي اوصلج هالكلام
رفعت عيوني مركزة ويا حجة بتردد وضياع
: -سمعيني زينب هو يدري ناوين يخلصون منة ويكول مادام الموضوع وصل لهنا...
سكتتت كتلة بنهيار
: -اييي اااحجي لتسكت شكالك
: -هو كال تشهدين ضدة
عبالك وأحد ضربني
: - شنوووووو.

: - تشهدين ضد اجياد وأطلعين منا أنتِ وأخوي ترى هو أتخبل من درة بيج بالتوقيف والله كوة هديتة كتله ما اخليهاااا ان شاءلله أطلعهاا
: - مستحيل لو اااااموت مااااشهد على اجياد
: -ززينب بري نفسج وبري حماج خلونة بواحد ما نريد نخسر أتلاثة
حجيت بدموعي
: -يعني نطلع على أحساب اجياد لا ماااكدر
: -بكل الاحوال هو مايكدر يطلع هذا النذل مدستر السالفة عليه يرادهلة لفتة من ربج وتتحول لاموبد ولا اعدام.

ويه كل كلمة أموت الف مرة وأصرخ وانهار ااخ يا ضياعي شلون بيه يردوني اشهد عليه
وأصلة على المشنقة بيدي أموت أني ماااجاي أتحمل هالحظات جاي تخنگني مفرفحة مخليتني
جنت أدري إلى زرعته ويا يموت وأحلامي دوم تتلاشى وتضيع وهو جان حلمي وشبابي واول حب
يريدوني أصلّي صلاة الموتة على روحي قبل لا أصلّيها عليه
يريدوني أوكف بثوب أسود كدّام قاضي ما يعرف شنو معنى الحب
وأشهد وأكون أني الإمام وأني الجنازة بنفس الوقت.

يريدوني أشيّع حبيبي بكلمتي وأدفنه بشهادتي ضدة
وأهيل التراب على اسمه بلساني و أذبح شبابي بيدي
وأعلّك أحلامي على باب المحكمة مثل إعلان وفاة
يريدوني أرجع لبيتي أرملة وعاشقة كاتلة حبيبه بيدها
شلون أعيش بعده وشحجي لاطفاالة عنه شكلهم امكم شهدت على ابوكم وطلعت نفسها
وهو ضحة بنفسه علمودنا شنو هالقسوة هاي
شنو هاالامتحان هذا
يريدوني أدفن دنيتي بيدي
وأرجع أتنفس وكأنة ما صار شي.

يا ربي يتمتني مرة فدوة لا ترجع تيتمني أني وجهالي روحي متعلكة بجياد
عبالك طفل ومبعدينة عن أمة متخبلة ماااجاي أتقبل فكرة يروح من أيدي
بتي ما ادري بيه وين واصلا ما ذكرتها حتى ما افتقدتها كل عقلي بجياد ماجاي افكر بشي غيرة
روحي مفرفحة عليه وكلبي مغيم وحيلي مهدود
كمت أتخيل موتة وهو بعدة عايش خيم عليه الحزن
: -اريددد اشوفة خلينييي اااحجي ويا فدوة لا تخلون شوفته حسرة بكلبي.

: -ما يخلونج والله أناااا كوة وسائد وساطته بدفعات الا دخلت وعلمود مصلحته دخلني أنتِ محد يخليج
وكف كدامي وحجة بهمة وحزم
: -أنتِ موش كاعد تودينة للمشنقة هم مودينة سواء شهدتي او لا بس إذا شهدتي أطلعين منا لان الجثث بعد كم يوم راح يجي الخبر واكيد تنعرف الهم اجياد مايريد سائد يشمت بي لو يذلة
: مااااكدر جاي تتطلب مني المستحيل.

: -زززينب هذا كلام رجلج هو فوك وضعه دخلتي أنتِ السجن راحن يتخبل الزلمة لازم تحكمين عقلج وتفكرين زين واحنا مانعوفه نلكة حل بس بالاول أطلعون منا
: -وين سائد اريد اشوفة
: -زينبب
: -اااريد ااااحجي ويا ااااشبيك
: -مااايرضة اجياددد اكعدي واسكتي هذا النذل لا تتقربين منه يكول
ضربت على وجهي حيل وطحت بالكاع أملخ بشعري جنت منهارة وفاقدة
: -ااااني علموووود اجياد كلشي أسوي ماااكعد واسكتتت.

هو جان يباوعلي بأسى وأنوب أجة الشرطي كالة الزيارة أنتهت عاد مشى وكلي فكري
بقيت أسبوع بالتوقيف وطلعت ما أدري شنو كاعد يحوكون علينا بس لكيت ابو تاج منتظرني
وصلني للبيتنا جنت فاقدة الى درجة فتت للبيت لاكتني عمتي جان حالها أنكس من حالي
وبيدها حور تلگع من البجي أخذتهه منها وكعدت بالكاع أبجي وبتي بحضني تبجي
وعمتي تنعى على اجياد خلتني انهار بالزايد أني دموت والله كاعد أجرع المر.

الله لا يوفقهم عساهم بحركة كلبي
والضياع الكاعد أنعيشة
وراها بربع اسابيع مرن برود وسكوت يخوف لحد ما أجانة ابو تاج جنت كاعدة بالغرفة حاضنه
ملابسة أحس نفسي كاعد أحضنه هو بعد عطرة بيهم معقولة غرفتي تفرغ من ضحكته
ومن حضنه الدافي وحبة وجهالي ما يشوفون أبوهم يكبرون بدون سند ولا عزوة
معقولة يعوفني ويروح وين جانت هاي إلى كل ما اكول الله عوضني ارجع أنتكس.

سمعت صوت ابو تاج جوة وكمت نزلت لكيته يسولف ويه عمتي وهي تبجي خطية راح تعمة الليل وانهار تبجي
باوعلي من دخلت جنت منتظرة يحجي اي شي
كال
: -طلعت التحليلات.
: - اي و شنو
صوته جان مكسور ومشدود بنفس الوقت.
: - العظام طلعن لمحمد وخالد ثبت هويتهم، تحليل طابق مية بالمية
سكتت بس دموعي نزلت
: اجياد ما كتل محمد أني إلى كتلتة واجياد كتل بس خالد وجان يدافع عني لان هو جان راح ياخذني كوة.

حجيتها هيج يأسة ضايعة جانت الصدمة واضحه بوجه خصوصا جان متوقع اجياد الكتال وحدة
: -عليش هيج زينب شمسوين من مصايب ومحد يدري
: -والله جنه مجبورين انت تعرف ولد عمك وهم تعرف اخوك وتدري بنذالتهم
حجت عمة بعصبية من يمهه: -كل هالمصايب من جووة راسج ااانتي ورطتي وليدي
: -يمة وكت هالحجي دخيل بختج
ما هتميت اله بقيت مركزة ويا كتلة.

: -خلي أعترف بقتلي لمحمد واشهد لاجياد انو هو ما جان متعمد وثاني شي السلاح مالكوا يعني ماكو دليل
: -ززينب شلون ماكو دليل غير لگوج هناك لزموج لزم يد وبيتكم بعدين اااجيااااد ما يرضة بالعباس اتخبل من درة ااانتي بتوقيف لا تجلطينة وتزيدين همة اكعدي نحاول نحلها
وراها مرت الايام باهتة ولحد الان اجياد قضيته غامضة وما انحكم واخوانة حاولوا شگد ويه سائد
حتى قرروا ينطوا أفلوس تعويض بمكان دم أخوانة.

وما رضة الحقير جان حالف الا ياخذ حكهم
ويعدم اجياددد، وأني محد خلاني أشوفة أبد
وكل مرة أروح وارجع مادري ليش
لعلم اخوتة يرحون وحتى امه واخذت حور وياها الة الا أني اروح وأبقى أنتظر وانوب ارجع
ميخلوني اشوفة ويكلولي على مرة الجاية
ويه الايام اكتشفت سائد
هو أمرهم بالهشي وراشيهم بفلوس هم وهنا تاكدت هو شگد ايدة طويلة وبعمق الدولة جان ديمارس عقاب نفسي ويه اجياد.

لان يدري بي يحبني جان مخليني متلوعة والله اجرع المر كاعد اكل بروحي ودموعي بعيني
وعيوني مورمة جنت كاعدة بغرفتي مرتكية على الكنتور وكدامي حور نايمة
أتذكرت مرة سبحت وطلعت من الحمام جان كاعد شمرت المشط عليه طاح بحضنه لزمة وضحك كعدت بين رجلي وكتلة
: -مشطلي شعري ابو حور
كعد يمشط بشعري وأني أسولف عليه وهو مخلي جكارتة بحلكة ويهز راسة بدون ما يحجي حجيت منزعجة
: - ذب جكارتك واحجي وياي احس أحجي ويه روحي.

رد بضحكة: -‏أدخن حتى انَدمچ وياج
لفّيت بوجهي عليه متضايقة
: - دخت من ريحتها
ضحك طفّاهة بالمنفضة
قرب أكثر وهمس
: - أذبها لعيونج بس لا تسوين روحچ زعلانة ترة أعرفچ من تتغنجين
ضربته خفيف على إيده
: - مو أتغنج أريدك تسمعني من أحچي
مال على أذني وهمس
: - أنا أسمع نفسچ قبل لا تحجين شلون ما أسمع كلامچ
سكتت لحظة حسّيت بحرارة إيده وهو يمرر المشط بهدوء وجهي بوجهه وهو يمرر المشط على مقدمة راسي
: - أجياد أني كلش أحبك.

أبتسملي وحضن وجهي بين أدي وطبع بوسة على گصتي وطول بيه جان حيل حنين وياي ودافي
رجعت للحاضر ولغرفتي الخالية منه
ومسحت أدموعي من خدي
ورها بيوم صادف الخميس أجاني سائد للبيت جنه شيطان يحوم علينا
والله وكت جانوا صاكرين من اجياد هسه مسوي بيتنا مزار كل يوم والثاني جاينه شگد عار
كعد وحدة وكام يسولف عليه جنت اباوعلة بحقد كاعد ومرتاح كلش ماخذ راحتة
: -اي شني بشري فكرتي لا.

: -شتريد تسوي سوي لا أعترف بيك ولا بشروطك ولا راح اشهد ضد رجلي ولا أنطي بي مستحيلة
: والشرط الثاني
: -بحلامك
: -مو انا احبج زنوبة وانتي عزيزة عليه علمود الايام القديمة ما اريدن تنسجنين ادري اجياد الكتال وأنتي مالج ذنب
لبستة ما جاوبتة وهو حجة هواي حاول يقنعني ما ادري شنو غايته عكس قبل فترة جان يهدد
اخر شي خلة ومشة ما ادري شسوي محتارة.

لبست عباتي ورحت للبيت حماي ابو تاج لكيت عمتي يمهم وهو ماخذة عمتي زارتة واجت منتهية
والله ضلت حسرة بكلبي أشوفة، كال محكوم اعدام علية قضية تجارة بالسلاح وانظمام وتمويل لاحزب الشيوعي وفوك كل هذا كاتل خالد ومحمد وتهمة خطف ضابط ولحد لان مفقود وهو ما أعترف وكلشي يثبت تورطة ومايقبل يعترف
وسائد مشتكي عليه ويگدر يطلعة ويطعن بالحكم وبنفس الوكت عندة معارفة يگدر يساعدة بس هو العار قافل على اجياد كلش.

رجعت للبيت تايهه كلشي مسدود بوجهنة والله جنت شاكة يشتغل بشغل موزين
من جنت اشوف لاقطة الصوتية(مبايل) بسيارته جنت اعرف هاي لاقطة موجودة عند تجار السلاح هيج جنت اسمع بس بقيت اجذب نفسي
ليش هيج اجياد مو تدري عايشين بدولة قاسية ونظام ظالم ليش هيج سويت بنفسك
منو راح يفيدك هسه منو يطلعك لمنو جنت اسوي هيج وليش رحت بهيج طريق مظلم
هواي فكرت وتعبت كلش أحس روحي مزوهرة كلش خلص باجر البس عباتي واروح لسائد.

مستعدة ابوس رجلي علمود يطلع اجياد والله اسوي كلشي المهم يبقى عايش وخشمة يشم الهواء
بعد ما بقى كدامي اي حل غير أقبل بشروطة وأطلك من اجياد وأوفق عليه المهم عندي هسه يبقى عايش
ها أنا واقفة على أطراف قلبي. أراقب الصمت يبتلع أنفاسي.
الأمل هرب، وظلّ يتلاشى كظلي. وكل كلمة أحببتها صارت رمادًا بين أصابعي.
هل أنا الضحية أم الجانية؟
أم أننا كلانا أسرى الفقد والحزن؟

أمشي وحيدة بين حطام الأمس. أبحث عن نفسي في أعماق الدموع. وأجد نفسي ضائعة، بلا عذر، بلا خلاص.