رواية لبوة علي للكاتبة كفاية كاظم الفصل السادس
لبوة: الجو بدأ يبرد اكرة الأجواء البارده تسببلي
كأبه حزن قلق نفسي...
گعدت الصبح مزاجي مخربط مريت ب ايلام مشطت شعره وداعبتة بقيت يمه شويه وطلعت...
احس روحي مغيمه وي الجو شبرعه اجه الشته زين شيخلصه طلعت من وقت نزلت قريب على المستشفى تمشيت مسافة اكو حديقه فارغه گعدت المسطبه لبسي خفيف مو مال شته حرارة روحي تضارب وي بروده الجو رجعت بيه الذكريات...
------.
گاعده بعتبة الباب منتظرة رجعته كل يوم مثل هيج وقت يرجع واروح اتلگاة طول بجيتة مثل كل يوم انتظرة وما يجي رغم ذلك عندي امل يرجع...
لأمة اديه لصدري واحجي وي نفسي هسه يجي خل احسب من واحد للعشرة ويجي...
واحد، ثنين. تلاثه، أربعه، خمسه. سته
سمعت ضحكات حقيرة زفرت بقهر ودرت وجهي للصفحة الثانية...
مازن -ههههه خبله لو تحسبين منا للمليون ليش
تعبين روحج ههههه عبالج يجي الخبللللة
نهضت وحجيت بعصبية ماشرة بصبعي.
- أنته لا تتدخل هسه يجي معليك بيه مازن الوصخ
إذا اجيك اسحلك سحل روح منا ماعايزتك
مازن -طبج مرض ضلي بس ما يجي هههههه خبلة من تكبرين نذبج وي المخابيل مايجي صار باااح
لبوة-يجي هو گال ابقى انتظرة أنته شعليك بية
الجو زادت برودته وخديها اصبحت وردتيان
شعرها متطاير بالهواء وعيونها الخضراء
مليئتان بشكاوى كثيرة لمن يفهمها...
الانتضار ليس بشئ سهل بلنسه لطفله
تسعه وتسعين ميه ياربي ليش ما اجه زين خل.
اروح العب بين ما يجي...
الشارع فارغ تمشيت مسافه شفت تراب واگع عليه مي صاير طين اخذت عود وبقيت العب بيه الجو بارد ما اريد ارجع للبيت الا هو يجي بقيت اللعب
ادمرت طين ما احس الا انرفعت من شعري
احس شعري تگطع صحت بصوت عالي...
-اخخخخ اخخ شعرررري عوفنييييي
سلطان -لج شعندددج طالعه بهل برد
شعندددج
لبوة-عمو والله منتظرة ابوي هسه يجي من الشغل.
سلطان-لجججج انتي زماله ما يجيي ماااات ما تعرفين اليموت ما يرجع سدوو عليه الگبررر لو ماخذج وياة ومخلصني شفايتلي
لبوة-لا تكول ماااات هو ما ميتتتتت هسه يجي
نزلني للگاع وضربني راچدي دارني صفح گمت ما احس بوجهي والجو يثلج تقرقرت عيوني بالدموع من كلامة...
سلطان-هم لساااااانج شطوووله وهم كلج وووووصخ.
لبوة-رديت عليه بقوة اني مو وصخه انتم وصخين وحقراء كملت كلامي وعيونه صارن بگصتة بقة يتقرب واني ارجع ليورة ردت اشرد لزمني من قمصلتي وجرني علية خنگني حجة فحيح...
سلطان-لج هاي عليمن هذا الحچي
لبوة-حجيت بخوف واني اباوع بعيونة كلهن شر اليوم شيخلصني نهايتي اليوم على ايدة: -
هااا مو عليك عمي عوفني حباب...
حجة مصطنع البرائة...
سلطان -عمي اني كلش حباب.
لبوة-: سحلني من شعري واني اصرخ احاول بكل قوتي أفلت شعري من ايدة...
دخلني للبيت بيبي بيومها مريضه تاخذ ادويه بس تشربهن تنام وفاطمه عده أهلها ببغداد شمرني بالحمام شغل ألمي البارد على باوعلي بنضرات حقيرة طلع وسد الباب وراة...
-بقيت اصرخ عسى ولعل واحد يسمع ويطلعني لكن للاسف لاحياة لمن تنادي وهو منو موجود غير سعاد ومستحيل تفتحلي الباب كزبر جسمي من البرد...
اهءءءءءءء بارد ألمي باررر رددددد راح اموت.
ثلجت راح اموت افتح البابببب
بقيت مستمرة اضرب بالباب واصيح ماكو فايده
ملابسي انترسن مي الحنفية جانت عالية ماالوحة بس الدوش يرش فوگ راسي...
كعدت بالگاع وحصرت روحي بزاوية احس صرت قطعة ثلج حطيت راسي بين رجليه حضنت نفسي واني ارجف كل ذرة بجسمي ترجف حتى الكلام طار من عندي...
بقيت اتخيل على من يحجيلي قصص لافني بحضنة الدافي ويضحكني لو اني اسولف وهو يستمع إلى ويناقشني وكأني شخص جبير صرت ارعش بمكاني فقدت الحرارة البجسمي فقدت الوعي و ما دريت على شي بعد...
فتحت عيوني واني ارجف سن يطگ بسن احسهن راح يتكسرن نهضت من مكاني بعدني بنفس الملابس مبللات وبطانيه مشمورة فوگاي...
جسمي نار الصخونة أحسها تمشي بعضامي سحلت روحي سحل طلعت من الغرفة المشمورة بيها لگيت عمب سلطان وسعاد ومازن گاعدين يتعشون...
ريحة الاكل كفخت خشمي بطني گامت تصوفر من الجوع بقيت واگفه بمكاني اباوع عليهم شلون ياكلون وعاصرة بطني محد بيهم گالي تعاي تعشي...
. بقيت بمكاني وعيوني عليهم صاحت سعاد بصوتها المسموم...
سعاد -شلون وجه يسد النفس دشوف شعرها هسه شلون بله نريد ناكل لا تباوعين هيج لا اجي افكس عيونج...
اباوع لعمي سلطان ما حجه شي بس ياكل دنگت عيوني وردت امشي بس مابيه حيل منا جوع ومنا جسمي يون علية صاح مازن بصوت يرن...
مازن -يمه المعلمه گالت إذا شفتو چلب جوعان
انطوه اكل خطيه بيه حسنة الكم
سعاد-خوش يمه ماضاع تعبي بيك سويلك جم حسنة...
گام مازن ويباوعلي بنضرات اكرة روحي من اتذكرهن حط بالگاع ماعون بيه شويه اكل وينظرلي باستهزاء
مازن: هاج اكلي مااريدج تموتين هسه...
لبوة: - باوعت بالماعون جوعانه اريد اكل رفعته من الگاع استحقرت نفسي واستحقرت الجوع اليذل رجعته بنفس اللحظة دخلت الغرفه صاحت وراي سعاد...
سعاد-طبج مرض فوگ ما ننطيج اكل عود گلنه نكسب بيج حسنه بس انتي مابيج حسنه الصفره اني اعلمج ام الوصخخخ
لبوة: -گعدت تعبانة جوعانة مشتاقة لصوتة لو هو موجود محد يجرا يحجي كلمة وياي حسيت بخطوات درت وجهي شفتة مازن بدون اي مقدمات تفل بوجهي...
وگال هاي من امي ورجع كررها مرة ثانيه وگال هاي من ابوي والثالثه مني هديه ضحك بخباثة وطلع
ماتفاجأت تعودت على خباثتهم...
ما گدرت احجي بوقتها لأن وضعي ما يسمح لفيت روحي بالبطانيه اتمثل النوم بس الجوع مايخليني انام...
انتظرتهم ينامون البيت صار هدوء طلعت امشي على اطراف اصابيعي صرت كدام الثلاجه وجسمي يرجف مديت ايدي افتحهة لگيتها مقفوله...
درت وجهي والدموع تجمعن بعيوني ملابسي رطبات وأبوي ما اجه عليه حجيت والغصة بصدري...
- بسيطه اني أعلمه ليش خلاني وياهم، زين اني شكو باقيه هنا مو عدنه بيت. مابقى بعد هنا اروح لبيتنة...
تمشيت للباب الرئيسي وبگلبي حقد كرة حزن غيض تنفست بقهر من لگيته مسدود باوعتلة مابيه قفل...
رحت للحمام جبت سطل صعدت عليه وخرت السركي فتحته على كيفي والجو يجمد انفتح الباب وانفتح باب الفرج لروحي الضايعة...
طلعت ورديته على كيف تمشيت بنص الليل والظلام مغطي المكان والبرودة تهش الاعضام هش وصلت لبيتنه صاير قريب عليهم...
باب بيتنه مسدود ماينفتح، بجيت بقهر بحرگة بوجع احس الدنيا انسدت بوجهي، جمدت البرد مايرحم والجوع ماخذ نص حيلي غمضت عيوني وتذكرت اخر جمله كالها الي...
لبوة على يبرالج علي
باوعت دنيا الليل حتى حيوانات ماكو الشوارع فارغة من البرد رفعت راسي ليفوگ مايبين شي كله ضباب ردت احاچية وسكتت...
صعدت الباب وطفرت داخل البيت رجليه ما احس بيهن تكسرن وهنا منا مثلجات كمت على حيلي ثبتت رجلية بالگاع الباردة وعيوني دور بالبيت...
اعرف نسخه من المفتاح مخليها بالسندانه دخلت ايدي بيها واني أردد ياعلي الگاهة...
انتعش روحي الفرح من لكيت المفتاح أخذته بيدي الترجف و فتحت الباب حسيت باب الفرج انفتح بوجهي اجت بخشمي ريحة بيتنه اخ يا بوية لو أنته موجود هسه اني نايمة بحضنك الدافي...
دخلت وسديت الباب وراي رحت للغرفة طلعتلي ملابس غيرت ملابسي طلعت شال من ملابس امي لفيت بي شعري المبلل لأن ما اعرف امشطه...
فتحت الثلاجه واني ادور على شي أكلة لكيتها فارغه
منو اليجيب مسواگ إذا ابوي ما موجود اخخ...
نزلت دموعي مسحتهن بيدي صايره ثلج وحمرة رحت للكاونتر طلعت بطل زيت وشكر نزلت الطاوة خليت بيها شويه طحين وزيت دورت على الشخاطة ما لگيت مددت بالگاع ومديت راسي جوة الطباخ.
شفت وحده هزيتها بيدي بيها تلث عودان فرحت فرحة كولش جبيرة شغلت الطباخ وصعدت فوك الجدريه الطباخ عالي عليه ما الوحة...
بقيت احرك بيهم شوية وخليت شكر ومي شميت الشعواط بسرعه طفيت الطباخ وسديت الغاز، اتذكرة من يخليني على الكاونتر ويسوي اكل واني اباوعلة...
اكلت بشراهة رغم محترگ شي دافي دخل المعدتي المثلجة شبعت خليت الطاوة بالسنك رحت نزلتلي بطانيه لفيت روحي عدل هسة الا دفيت وارتاحيت غفيت واني اسولف لروحي قصة...
ما احس الا رفسات بطني گعدت على أثرهن عقجت حواجبي بوجع واسمع صوت عمي سلطان رج البيت رج...
سلطان -لج بلووووه اليوووم إلا امووووتج ترررريدين تسودنينة بتتت الكلببب.
لبوة: -الرفسات تجي من كل مكان مااحس الا شالني ورگعني بالگاع سمعت صوت عضامي وهنا يطگن اجت بيبي زمرد تركض وتصيح عليه...
زمرد-ولك سليطن عوفهاااا هاي امانه على ولك المفروض تخليها بعيونك عوفهاااا الله لا يرضي عليك
لبوة: -عافاني وطلع بعده النوم بعيوني جسمي كلة يوجعني حرارتي كلش عاليه احترگت روحي من القهر گومتني بيبي واني ما مستوعبة الصار حضنتني گامت تبجي واني دموعي مايقبلن ينزل...
زمرد -سوده بوجهي من تكسرت ايدك يسليطين الله ينتقم منك يالظالم...
لبوة: -اخذتني وياها للبيت سوتلي ريوگ اكلت شويه، شربتني دوة گعدت عاقله لا صوت ولا نفس جسمي يون علية ليش شمسوية لا اگدر احرك ايد ولا رجل...
للعصر گعدت بالباب حطيت راسي بين رجليه واحجي وي روحي معاتبتة وغصة بلعومي...
-ليش عفتني أنته مو گلت ما عوفج يله حباب ارجع
لا مو هيج أنته گلت اذا ردتي امج تسمعج بوسي
اصبعج وخليه علا گلبج بس هسه صرتم تلاثه.
أنته وامي وأخوي...
بست اصابيعي ا خليتهم على گلبي حسيت
براحه وكانما شفته گدامي...
صار الجو بااارد جسمي مصخن صاحتلي بيبي زمرد...
زمرد -لبوة تعاي امشطلج
لبوة-حجيت واني ضامة راسي بين رجلية مااريد انتي ما تعرفين تمشطين
زمرد-بيبي تعاي امشطج شوفي شعرج مو حلو
لبوة-ما اريد هسه على يجي ويمشطلي مااريد منكم شي...
گامت تبجي وتمسح عيونهة بشيلتها...
زمرد -ولج يمه على هو گالي مشطيلها
لبوة-صدك
زمرد-ايي بيبي شودتعاي.
لبوة: -گعدت گدامها تمشطلي تلمست الضفيره وگمت اصرخ ودموعي تتناثر على وجهي...
-مو هيججججج اني كتلججج انتي ما تعرفين سويتها مو حلوه بس هو يعررررف يسويها...
طلعت من البيت فليت شعري ودموعي تنزل وجهي صار باار ودموعي حاررة تدفي بية لگيت گدامي مازن وصحبانه وياه...
مازن -ها المخبله شوفو الخبله شوفو شعرها
بدأ يصيح والجهال تصيح وياه على الواهس
مازن -يله خطيه اسكتو ابوها ميت عيب عيب محد الها.
لبوة: -من كال هيج لزمته من قميصة شبعته كتل ترسته خراميش وملابسه انترسن طين
-لو بيك خير مو تبجي مثل البنات وتروح لامك تبجي اهءءءءء لبوة كتلتني
صاح علية بصوت عالي
مازن-انجبيييي
لبوة: -مشيت باتجاهة واني الوي برگبتي...
تفووو هاي مني تفووووو هاي من امي
تفووووو هاي من على وتفوووو هاي من إيلام
حس وجهة ومشه رحت لبيتنة طفرت الباب جني شاذي ايدي تشنجت نترتها نتر موتتني لگيت باب الصاله مقفول فتحته ودخلت...
كعدت وحدي بزاوية دافي بيتنة بس يخوف يگول مهجور مرت نص ساعه وهو ماكو رجعت عزلت البيت كنسته وشغلت بخور صارت ريحتة تخبل.
آيست بعد مايجي اليوم صارت الدنيا غروب رجعت قفلت الباب رحت للبيت جدي بيومها اجت فاطمه حيل حبابه تمشطني تقريني تسويلي اكل...
جنت بالنهار لبوة اليحاجيني كلمه ارجعها بعشره النهار مخلصته عرك بس من يجي الليل كلشي يختلف...
اخلي راسي بين رجليه وابجي الليل ماكله مانامه ابقى اسمع صوت الرعد اليطلع روحي. صوت المطر من ينزل يزرف اذني الهوة العالي احس اشباح محاوطتني من كل مكان...
انام على أمل اكعد الگة روحي بحضنه الدافي
بس ما صار اگعد الگا الناس مو ناسي...
رغم جان عمي طلال زين احسن من سلطان بس مايتدخل من يضربني إخوة بس فاطمه وبيبي يدافعولي
احس نفسي وحيده وغريبة الماعنده أهل بهاي الدنيا غريب وضايع يدور ملجأ يأوية...
جنت عازله نفسي ابد ما اختلط بيهم اگضي كل وقتي بالبستان يم إيلام وكل يوميه انضف بيتنة واشغل بخور وابقى گاعده بيه منا لمن امل...
المتوحده الكل جان يسميني، رجعني للحاضر المنبه كلشي اله وقت حتى الذكريات الها وقت رحت للمستشفى بدأ الدوام...
-----------------
زينه...
رجعت للبيت بوجهي للحمام سبحت بمي بارد احس جسمي نار بحياتي ما حاجيه وي شخص مو يجي واحد لا اعرفه يبوسني بكل وقاحة...
أسبح واحجي وي نفسي التافه الثور الزمال ابو شوارب السطل ابو غمازات الأرعن...
ما خليت كلمه تافها ما كلتهاطلعت ارجف لفلفت روحي بالبطانيه ونمت ميتة من الحرگة بحلم مدري بالواقع اسمع موبايلي يرن...
ما بيه حيل اگوم افتحه خبصني خبص اخر شي كمت سحلت روحي جسمي يرجف من الصخونه مانتبهت للمتصل گبل فتحته...
-حجيت بصوت يرجف. الوو منو
علاء-ها زنو شلونج
-اجاني صوتة القذر، علاء؟
علاء-لا نجلاء.
زينة-ومرض أنته شتريد مني ومنين جبت رقمي
احجي وارجف وهو يحجي بكل برود
علاء- بيج شي گلبي
زينة -انجب لا تكلي گلبي ابن السگط تفووووو عليك
يا جلب الوصخ ابن النعال
علاء-هيوووو كافي جلبتي لسانج لسانج مال گح
زينه-انجبب
علاء-هسه شبيج گلبتيها على انجب ما انجب
زينة-شتريدني أگولك مثلا اوييي بيبي
علاء-لا احطج بجيبي
زينة-اليوم السويته ما انساه الك بس اصبرلي اني اعلمك هذا اعتداء مااعبرة الك.
علاء-الله يعني ترجعين تنتقمين مني وتاخذني
بمعطهه امووححح
زينه-انجب شنو من ألفاظ تفووو عليك
علاء-وصلت حتى التفله منج تخبل
زينة-ان شاء الله تتخبل ويركضون بيك بالمستشفيات الجلب
علاء-الله وانتي وياي انوب يخلونه بنفس الغرفه
وتبدي الحبشكلات
زينة-انجب أنته مخبل
علاء-هسه شلون جلبت بدلي دوريلج غير كلمه انجب
زينة-الثور ابو شوارب الوصخ
علاء-لا لا زنو دكتوره روحي هاي ما مرجيها منج
زينه-ديلا هسه شتريد.
علاء-اگلج انتي وصاحبتج بس جمال كل انوثه ماكو
زينة-عفنا الانوثه الك
علاء-تسلمين گلبي ما تقصرين الضاهر لبوة مأثره
عليج انتي كيوت بس سوتج حوتت
زينة-اني كم مرة گتلك عوف لبوة لا تحجي عليها
كلشي ولا هي
علاء-بعد روحي مرتي وفيه
زينه-منين صرت مرتك انته ما تنجب
علاء-يبوووووووووووو
زينة-اذني الأرعن اذننننيييي.
سديت الموبايل بوجهة واني افور من العصبية منين جاب رقمي وشعندة متصل بيه وانوب اني الثولة المستمرة احجي وياه لو وحدة غيري كبل انطتة حظر بس ابقى ثولة حتى نسيت الحظر...
ضربت گصتي بقوة واني افتر گتلني الجوع رحت للمطبخ اخذت، تفاحه اكلتنة ونمت اهذي...
ثاني يوم صحصحت رحت للدوام منتظره لبوة تجي واحجيلها على هذا اللزگة تشوفلة حل وتخلصني من عندة وهم راح ابقى يمها شفتها اجت من بعيد...
حجيت بحماس واني أشرلها بيدي.
-لبووووةةة اني هنا
لبوة-شبيج فضحتيني شنو مضيعتني
زينة-اگولج انتي ما تبردين شوف شلابسه
لبوة-عوفج من لبسي شردتي تحجين
زينه-ردت احجي وبطلت هاااا اي لج اهلي راح يروحون لخوالي
قلصت عيونها و حجت بشك.
لبوة-وانتي فرحانه لان اهلج راح يرحون!
زينه-لا ولج غير عندي دوام راح ابقى يمج بين ما يجون
لبوة-موخوش سالفه
زينة-لا خوش سالفه نتونس ياييييي
لبوة-شبيج تخبلتي صوتج
زينة-هههههه لا بس متحمسه.
لبوة-والله ياالله اليگول راح تسافر لتركيا
زينه-حبيبتي ما اسافر اذا مو رجلي على رجلج
لبوة-ايي مو اني رجلج
زينة-خيولي رجلي تف عليه
سمعت صوته وراي درت وجهي بسرعة علية اي والله هو بهتت ملامحي من شفتة حجة وهو يباوع علي...
علاء-لا ليش خيولي دكتوره يعني تحجين على الرجال وهو مو يمج ميصير هالشي عيب وحرام بنفس الوقت...
زينه -حجيت واني متخوصرة شعندك جاي؟
علاء-اخاف جاي لبيتج حضره الدكتورة
زينه-هي عوزك بس تجي لبيتي.
علاء-جاي اسئل دكتورة لبوة محد جاييج
زينة: -ردت عليه لبوة وهي تباوعلي بشك جنهة عرفت ردت عليه برود...
لبوة -تفضل
علاء- شلونج دكتورة؟
لبوة-الحمد لله حيدرا شلونه
علاء-ههههه حيدر
لبوة-يي شلون صارت حالته
علاء-دكتورة جاي اسئلج على حالته من سويتيله
العمليه صاير ما يحتاجه والنهار كله ضايج
وصفنه تجيبه وصفنه تأخذه...
لبوة- احتمال العملية لتهبت لو عندة اوجاع بس ما يحجي لو شي مرتبط بحالته النفسيه اوفد مشكلة صايرة وياه.
علاء-دكتورة اني اشك بشي
زينة: -يحجي ويباوعلي جاي يسأل على صديقة اگص ايدي تكتفت لبوة وردت برودها القاتل...
لبوة-الي هو
علاء-من سويتي العملية بگتي هرمون السعاده
لبوة-ههههههه انوب هرمون السعاده
اباوع للبوة تضحك ملامحها كلها تغيرت وهذا مامصدك روحة يضحك على الواهس.
زينه -هيوووو شو انته تمسلت شنو بگنه
انوب هرمون السعاده هو اليشوفك يشوف
سعاده ابتعد عنه وتلگاه يغني ويضرب
موالات...
علاء-دكتورة لبوة شفتي صاحبتج ضاربه ميانه
وياي يگول رجلها
زينه-اليمنه لو اليسرة
لبوة -زنو روحي لشغلج يلا گدامي
زينة-ماشي رايحه
علاء -ماشي لو يركض
زينه -حجيت واني اعيب علية هههههه ما تضحك
رحت واني اخزر بيه ادري بيه جاي عليمن...
لبوة -خل يراجع نشوف العملية خاف التهبت
علاء-ان شاء الله اقنعة يجي يلا اني رايح
لبوة-مع السلامه.
زينه: -ماادري ليش احجي وياه بهل طريقه بس احس يستاهل اصلا المفروض مااحجي وياه واتجاهلة مثل ما لبوة متجاهلة جهاد ومخليتة يضرب اسداس باخماس بس اني ثولة...
بس الصراحة شكلة جذاب وبيه شي مميز يطك بالگاع وغمازاتة شي ثاني هسة اني شدخلني بيه تفووو علية...
، كملنا شغل ورجعت وي لبوة لبيتها لبوة اول ما دخلت البيت راحت للحمام اباوع للبيت شلون نضيف ومرتب وريحته طيبه...
كولشي منظم مابيه شي واحد مخربط من كتب من غراض الأقلام شلون مصفطتهم بعلبة الرصاص بجهة الجافة بجهة الكتب بصفحة الدفاتر بصفحة المعرض مرتبة بيه المزهريات والاثريات والمواعين كولش عجبني الترتيب وجان صورة معلگة على الميز للامام
علي كولش قديمة...
صاحت لبوة وهي بالحمام...
لبوة-اكو جدر صغير بيه دولمه ما مستويه خليه
علي الطباخ...
زينة- فتحت الثلاجه مرتبه وتفتح النفس...
طلعت الگدر خليته على النار خليته شويه وضفتله
مي رحت بدلت ملابسي وهي بعدها تسبح...
-لج كافي فرغ التانكي شنو ما شايفه مي
لبوة-ومرض هسه انتي شحارگج
زينه-لج راح تصير ساعه
لبوة -نص ساعه ما صايرة من تصير 30 اطلع
زينة-معقوله انتي بشر اشك؟
لبوة-دروحي شوفي الجدر لا يحترگ
زينة: -رحت نصيته وبديت اسوي زلاطه طلعت من الحمام وريحت الشامبو والمعطرات ترست البيت لفت شعرها ولبست ازار الصلاة صاحت علي...
لبوة-زنو تصلين؟
زينة-لا داده مجازة
بقت تصلي هواي يمكن مال شهر، استوت الدولمه عفتها تبرد خلصت و اجت گلبتها بصينيه صغيرة...
وفرغت الزلاطه بكاسات طلعت علبه چبيرة بيها تمر دوائر مسويتهن بسمسم ونص بيهم بجوز الهند وفستق خلت بماعون...
طلعت دبه طرشي خلت بكاسه خبطت لبن طلعت الخبز حمته بدون اي كلام جهزت السفرة بدينا ناكل بهدوء حجيت كاسرة الهدوء لو تضل عليها ماتحجي لو يومين ابقى مگابلتها...
-اگول لبوو
لبوة-گولي دادة.
زينة- بحياتي ما ماكله هيج اكل طيب
ابتسمت ابتسامه جانبية ورجعت تاكل...
لبوة-بالعافية
زينه-يمته مسوية هاي الدولمة
لبوة -الجمعه
زينة -وهذا التمر والطرشي
لبوة-شبيه؟
زينه: -يعني يمته مسويته
عافت الكل وبدت تحجيلي
لبوة- من زمان كل يوميه اسويلي شي مثلا يوم اسوي دولمه تلث جداري صغار واخليهم بالثلاجه يوم اسوي طرشي كليجه اسوي صينية كبة واخليها بالثلاجة من اجي متأخرة بس اطلع واكلي مااتعب...
والتمر هذا شي روتيني اجيب چيس جبير
ادگه واطلع النوه منه واگليه بدهن الحر واحمص
سمسم اخلط وياه وجوز الهند وسويه دوائر
واخليه بعلبه چبيرة من اريد اكل اطلع منه...
زينة-حجيت واني مبتسمة هنيال اليزوجچ...
ابتسمت بانزعاج حجت ورافعة تك حاجب...
لبوة-منو يگول ازوج
زينة-ابدا
لبوة-ابد
زينة: -اني اكبر إنجاز إلى بالطبخ بيض تگلاه
سكتت تاكل بهدوء كملت بقيت بس اني الاكل حرفيا يجنن بحيث الدولمه مسويتها اصابع والتمر ما.
ينوصف كملت اكل لميت المواعين ردت اغسلهن...
لبوة-لا گلبي اني اغسلهن انتي روحي طلعينا مسلسل
زينة-شبيج لبوة خليني اغسلهن حبابة
لبوة-تؤؤ
زينة-شنو عود لان اني خطار
لبوة -منو گال خطار انتي من أهل الروح
زينة-زين ليش ما تخليني اغسلهن وياج
لبوة-متعوده داده وانتي شبيج مجلبة بالغسل تره ماعندي اخو وازوجج اله...
زينة: -خزرتها وگعدت اگلب بالتليفزيون وانتبهلها شلون تغسل...
تغسل الماعون أكثر من مره وترجع تنشفه.
وتباوع بيه خاف بيه شي رغم المواعين شويه
بس طولت بيهم كملت ورجعت ع لبيت خلت
بالسطل معقمات وديتول وبدأت تمسح...
-اگولج لبووو مو البيت نضيف المن تنضفينه شبيه هو
حجيت برود وهي تمسح لبوة باردة كولش شكلها مابية ملامح.
لبوة-متعوده كل يوميه انظفة
زينة-حتى اذا نضيف...
هزت راسها بمعنى اي هدوئها مو طبيعي بس بلحضه تتحول بركان كلمة استفزازية لو موقف تطلع ابو الهدوء كملت وجابت عصير وكيك بارد مسويته وكرزات وجبس...
-اگولج داده انتي ما تخافين عايشه وحدج
ضحكت برود
لبوة-وين شايفه لبوه تخاف
زينة-هم صدوك بس شعجب ما تبقين يم بيت جدج
حسيت لونها تغير أردفت بحرگه
لبوة -عوفينة منهم
زينة-يعني شلون قبلو تعيشين لوحدج وهما تقاليد وكذا
حجت برود وهي تاكل وتباوع بالفلم
لبوة-القوانين تضعها الاسواد أما على الحمير التطبيق
فقط.
زينة: -ما فتهمت عليمن تقصد صح احنة نسولف كولشي لبعض بس هي ماتحجي على نفسها الا إذا اسئلها وكولش قليل بحيث اجر الكلمة جر عكسي احجيلها كولشي...
-اگلولج احجيلي قصه انتي مو تقرين قصص
لبوة-بالتسعه ونص احجيلج
زينة -ليش مو هسه
لبوة-نص ساعه اسولفج ومن تصير بالعشرة انام
زينة-يا شنو بالعشرة واني بالوحدة انام
لبوة-روتيني هذا
زينة-والله ذبحتيني روتين وروتين تف علا هيج روتين.
راحت ضبت الاكل وغسلت المواعين فرشت فراش بالگاع فرشت فراشين مبتعدين عن بعض...
لبوة كولش غامضة احس وراها قصة كولش جبيرة وماساه مستحيل شخص يوصل لهلمرحلة من البرود والاكتفاء بالذات ويميل لنفسة فقط اكيد شايف ضلم وتعب من الناس حتى قرر الاعتكاف على نفسة...
دائما تكعد وحدها ما مرة شافت لمة وگعدت يمهم وأغلب وقتها صافنة تروح بغير عالم صح مبينه كولش قوية بس الحزن يفضح يبين بعيون الإنسان لهذا السبب ماتكون قريبة لشخص يمكن تخاف تنكشف...
لبوة-يلا اسولفلج قصه
زينة-يلااا. بدت تحجي واني استمع الها...
لبوة-كان يا ما كان في قديم الزمان
- كانت هناك طفله ضائعه في وسط الغابه
تبحث عن شخص ما
فمر بها ملك الموت بحصانه الاسود وقف
أمامها وسألها ماذا تريدين؟
فأجابت الطفله بحزن.
ارجعه لي
فأجابها: أنا لا ارجع الاشياء
فنضرت اليه بحزن وقالت بصوت حزين
هو كل ما املك اعطيك كل شي وترجعه لي
فهز رأسه الملثم ب لا
فبدأت الطفله تبكي وتقول له
أنته سارق!
فمسح علا خديها الباردتان
سأدفع لك مقابل!
فنضرت إليه بعيون باكيه
لا اريد اريد مقابل أريده هو
فأجابها بصوت يحاول أن يكون لطيف
لا استطيع لكن وعدا مني سوف اعطيك شخص يشبها
وبلحضه اختفى
زينة: -تحجي بهدوء وحزن وعيونها الخضر بيهم دموع سكتت...
-كملي بعدين شسوت وين راحت الطفله
لبوة-نعست اريد انام
زينة-لا حبابه كملي
دارت وجهة نفسها ثگل عرفتها نامت
بقيت اتگلب ما اعرف انام من وقت رحت للمطبخ سمعت صوت جفلت بمكاني...