رواية لبوة علي للكاتبة كفاية كاظم الفصل السابع
زينه...
رحت للمطبخ سمعت صوت طگطگه استغفرت الله
وغلست فتحت عيوني بصدمه من سمعت صوت شي وگع دب الخوف بداخلي كمت ارجف...
يمة اجه ملك الموت لأن حجينة بيه رحت ركض
للغرفه گعدت لبوة ماكو يگول جثه رجعت سمعت
طگطگه مرة ثانية گمت ادفر بيها واصيح...
-ووولللج رررااح ياخذنااا گومممي لبووووة ااااجه
گعدت تفرك بعيونها حجت بنعاس...
لبوة-منو شبيج؟
زينه-عيوني تباوع للباب بترقب ومجلبة بيد لبوة والله صرت ارجف ملك الموت بحصانه الاسود
لبوة-استغفر الله مو وكتج بأجر ورانه دوام
زينه-رجعت نامت وعافتني صرت ادغ بيها. ولج والله سمعته
لبوة-شسمعتي؟
زينة-شبيج لبوة گومي شوفية
گامت لبوة للمطبخ مفتحه عين وعين طالعة روحة -اكيد بزونه المكان مليان بزازين تلكينهن تعاركن وگعن شي.
رجعت نامت واني متت خوف شلون عايشه وحدها عود هي وياي وهيج خايفه مو انوب وحدي گلبها ميت هالبت شنو سالفتها...
حتى لو ما كو شي يخوف مجرد تحط فكره بالك تضل تتخيل وتخاف من اقل صوت...
رحت للمطبخ واني أتلفت يمنة ويسرة فعلاً ماكو شي طلعت كليجه وعصير بديت اكل مو كليجة ضيم مدري شمخلية بيها يكول منار العالم كولشي تسوي هم يجي يوم اطبخ واصير وام بيت الله...
كعدت اگلب بالفون ملل اجة على بالي كلامي اليوم وي علاء شلون حجيت وياة هيج بقيت افكر منو الغلطان اني لو هو هففف اني لسان طويل دخل اعتذر منه ماطول بعدني ماحاذفتة دخلت لصفحته شفته متصل كتبت...
-مرحبا
اعتذر من طريقة كلامي وياك اليوم
گبل اتصل ياا هذا شبية ماصدك كبر شايفني دهاك رفض واستقر رجع اتصل مرة ثانيه يمة هذا شبية رفضته و كتبتله...
ما افتح بس اريد اعتذر منك
طلع يمي جار تسجيل الصوت دز بصمه يگول بيها...
علاء: -افتحي الخط ما راح اكلج ما أگدر اكتب وعلي.
زينة: كتبتلة...
ما عندي شي احجيه بس حسيت طريقه كلامي وياك قاسيه
دز بصمه بصوتة يعع مدري شلون يحجي...
علاء: -اروح فدوة للقاسي
زينه: -طفيت الموبايل امداني غبرة شهل لعبان النفس اراسل واحد تالي عمري والله وكت وهذا ماصدك عبالة اني من ذاك النوع الغسل كون...
خليت ايدي على خدي صافنه على ترتيب البيت رغم هو قديم كولش بس حلو يفتح النفس يمكن بية طاقة ايجابية عطرة مميز الوجود ترتيبة عجيب يمكن هاي لبوة تقيس بالسانتيمات وتصفط...
حسيت بحركه جفلت بمكاني رحت للغرفه
اركض گلبي صار طبل لگيت لبوة غاطه بالعميق مددت يمها بعد ما اطلع التوبة بقيت اتگلب بفراشي مااكدر انام الساعة ماصايرة بثنعش...
فتحت الموبايل اضيع وقت بين ما نعس دخلت على انستا اباوع مقاطع ريلز اجاني مسج...
علاء: - اليوم شنو ما تنامين لو سهرانه؟
زينة: -ما يجيني نوم اريد اسولف.
علاء: -سولفي داده منو لازمج
زينة: -صعدت عندي الحرکة يستهزا بية من گال دادة بالاصل اني بغدادية ولدت بغداد وتربيت انتقلنة للبصرة علمود شغل بابا بس درست كلية بالبصرة اتصل فتحت الخط وانفجرت بوجهة...
-اگولك شنو دگولي داده تضحك عليه حضرت جنابك
لو تستهزأ بكلامي.
علاء-هسه الناس تگول مرحبا. السلام عليكم. شلونكم الله بالخير وانتي گبل لا احم ولا دستور اگولك اوي اوي داده...
زينة-يحجي بصوت بنيه ناعم هزيت ايدي هذا شبية...
- ترة راح اطفي...
علاء-لا لا راح اسكت واصير شاطر
زينة-عفيه اني احب الشطار...
حسيت بنفسي جفصت اخ منك يلسلاني هسه ياخذهة علية...
علاء-ها يعني تحبيني اي مو اني اعرف مو غشيم أول ما شفتج عرفتج حبيتيني!
زينه-خاب هيووو شنو حبيتك منو أنت اصلا حتى اني احبك ركز دكتورة زينه الماخذة المستشفى صفقة احبك أنت؟
علاء-انت الماعاجبج ضابط برتبة ملازم والبنات كاتلات رواحن عليه
زينة-اويي اويي اگول ليش البنات قل عددهن اثاري
كلهن كتلن رواحتهن عليك حضرة الملازم
علاء-شسوي شبيدي عليهن هنا يگولن لو ملازم لو ملا زم.
زينة -هسه شجلبت عود شوفيني ترة اني ماناقصة لاتتباهة گدامي هفف اني اخلص من الخوف تجيني انته بس هذا هم حضي مصخم وملطم
علاء-هاا منين خايفه ولج؟
زينة-ماعرف بس اسمع صوت طگطكه السالففة تخوف وهاي لبوة يگول ميته جثة ولاتحس
علاء-شني انتن عايشات بنفس البيت؟
زينة-لا بس اهلي راحو لخوالي بغداد فبقيت يمها
لان عندي دوام
علاء-شعجب يخلونج تباتين يم صاحبتج.
زينة-يعرفون منو لبوة وشنو اخلاقها عاجنينها وخابزينها بس فلك نايمة وعدهم حديقة بيها شجرة يمكن بيها جناني تطلع اصوات...
علاء-لج الطناطلة تلتم بالشجر وداعتهم
-يمة خفت
-طبج مرض هسه لو جاينتي جا ما عفتج ونمت ابقى وياج للصبح
زينة-ديلا اني ما ناقصه سوالف سربته...
علاء-افااا سوالفي سوالف سربته، لا زنو خاب ضني بيج تهدمت كل احلامي. وامالي ركزي على كلمه امالي
زبنة-اوووفففف
علاء-طارت البركه
زينة -اوووفففففف.
علاء-هسه شجلبتي دوريلج سالفه غيرها احجي منا منا شبيج بس لسانج شطولة
زينة-صدوك اسولفلك سالفه
علاء-سولفي دكتورة روحي
زينه-راح اسولفلك شلون تعرفت على لبوة. وصرنا صديقات
علاء-اهوووو هم لبوة دسولفي عنج. شبيج مابيج بكل سالفه وگلتي لبوة ماكو سالفة غيرها
زينة-هسه شبيك وياها ما عندي صديقات بس هي
وحتى اخوات ما عندي
علاء-سوده عليه كملي بس شعجب مصادقه بس لبوة
زبنة-اجيك بالموضوع هسه اسولفلك اول مرة من التقيت بيها...
من جنت مرحلة أولى اكو محلات يم الجامعه بس مو قريبه كولش...
دخلت اشتري من دخلت للمحل انصدمت بولد فهذا لزگ كبل عباله متقصده من شفتة هيج طلعت من المحل...
بس هذا الفكر بقه يمشي وراي و يذب كلام اني سكتتله شسوي مابية حيل اراددة جاي امشي شو هذا جرني من ايدي علية...
علاء-لو اني موجود الا ااشگه نصين ابن.
زينة-اني جمدت بمكاني محد بالشارع بعد شويه وابجي اعت بيدي مجلب بيها بقيت اصيح و تجيني بنيه ناعمة شكلها عصبية مانطقت بكلمة گبل ضربتهةبوكس على خشمه طك دم وبقت تغلط علية حسيتها مدربة لان عدها حركات ضربتة ضربة مااگلك وين خلته يطفر للسمة التمت الناس علينة...
اني بغيت صافنه عليها تخبل من العصبيه وجها احمر وعيونها يخبلن اجت باتجاهي عاطت بيه لا تصيرين ثوله
علاء-حل تستاهلين.
زبنة-الصراحه خفت منها گلت راح ترگعني بدفرة حسيتها قوية ولاتخاف من شي
من داومت شفتها بالجامعه وياي وطلعت بنفس قسمي صدفة حلوة والله...
بس شنو جانت ما تختلط باي بشر ايد منعزلة تماماً تكعد وحدها ومن تخلص المحاضرات منتبهتلها تطلع گبل...
لا تلتقي بولد ولا ببنيه عازله روحها جنانن عندي صديقات مسويات كروب ولد وبنات الضحك والسوالف والطلعات، اني ما احب هيج سوالف مامتعودة بس شسوي وياهن اروح خو ما ابقى وحدي.
بدت درجاتي تقل لبوة جانت اشطر وحده بالقسم
وما اسولفلك الزحف عليها حتى الدكاترة كتلو ارواحتهم عليها بس هي ابد ولا يمها الموضوع
-مبينة جامدة اني من شفتها رادت تصير بالنعل
-ههه سولفتلي، فمرا من المرات جان عندي امتحان صعب كولشي ما مفتهمه. بعد ساعه ونص امتحاني...
شفتها تقرا كلت اروحلها تشرحلي بس هي كل ما يروحولها طلاب من القسم يريدون تشرحلهم ترفضهم...
گلت اروح وعلى الله. رحت يمها سلمت گتلها اشرحيلي حبابه مامفتهمة الموضوع ردت عليه برود
-ما اعرف اشرح...
بوقتها ضليت ابجي من كل گلبي يبوو شصار بية ح
علاء-ههه شنو زعطوطه تبجين
زينة-ايي غير ارسب وانوب فشلتني واني حساسة بعدين باوعتلي انكسر گلبها علية گالت اكعدي اني ما صدكت مسحت وجهي وتربعت بقت تشرحلي شرحها ولا غلطه بحيث الدكتور ما يشرح مثلها...
گلتلها شرحج يخبل ليش ما تشرحين للطلاب...
ردت على برود ما يستاهلون...
جانت هادئه كلش حتى حجي ماتحجي عكس البنات، بيومها جاوبت اول امتحان اجاوب بيه هيج...
طلعت الفرحه ما واسعتني رحت اشكرها شفتها
طلعت ثاني يوم رحتلها تشكرتها وكمت كل يوميه
اروح الها. بس هي ولا تحجي وياي. ولا كاني موجوده. ابقى كاعده يمها لا حس ولا نفس.
علاء-غير لزگه
زينة- أي والله لزگتلها لزگك. الصديق الزين نعمه ما يجرك لطريق السوء...
-هم صح وبعدين.
-شسوي ابقى كاعده يمها اسولف شكد. وهي ولا تحجي تعلقت بيها. وصديقاتي سحبت روحي منهم علگد السلام وافلت. اجيب كتبي وأبسط اشرحيلي هذا وفهميني ذاك على ساعه تنفجر بوجهي
علاء-هههه شني سالفتها هيج ماتتحمل!
زينة-ايي والله گمت ما اروح الها اباوعلها من بعيد ابقى گاعده وحدي...
مرة من المرات. جنت گاعده وحدي اجاني واحد من قسمنا لزگلي لزگه معجب وكذا سوالف طلاب شعرة ملزگة وبنطرونه رافعة لبلاعيمة چلب چلب سودة بوجهة.
وين ما اروح يلحگني روحي طفرها شسويله يبقى يسولف يععع شكلة مقزز واني فاهية ماكدر احجي لو ارزلة.
مرة حيل ضوجني اجت لبوة لو تشوف شسوت بيه طاحتلة بذيج الرزايل وكالتله اشتكي عليك بتهمة تحرش وازعاج مو بس بالمقررية اروح لرئاسة الجامعة وإذا أنطر الأمر المراكز موجوده وشيخلصك مني بعد...
-وكفووو.
-من ذاك اليوم بعد ما تقرب ناحيتي ولا حجه وياي ابد شوية رجعتلها گمت اكعد يمها ونبقى ساكتين. اسئلها مرات تجاوبني ومرات تغلس، فصرنا مقربين حيل...
صح ما تحجيلي عن نفسها هواي بس احس بالراحه وياها، عكس صديقاتي ملعبات
علاء-اگول تهددني بيها لبوة ولبوة
زينة-اي والله هاي لبوة شرسه اليحاجيها تأكله
علاء- مو لهاي درجه.
زبنة-لا لهدرجه والله عصبية بس هادئة هههه فگامت تشرحلي كولشي. صرنا بنفس المستوى اني وياها من الاوائل، صرت وين ما تروح اروح وياها...
صارت اختي صديقتي ومعلمتي...
علاء-انوب معلمه شني هاي خاب على كيفج
زينة-اي والله هواي علمتني اشياء زينه علمتني على الصلاه وأهميتها، گمت اصليها بوقتها واني جنت
ما اعرف القبله وين
علاء-والله لو هيج الصاحبات لو ما ينرادن...
احنا عندنا ابو دحام ماتكمل الگعدة بدونة مرات يضحك ويشاقي. ومرات وجهة ما يگصه السيف طن رزايل يرزل وينصح.
زينة-هههه تاثير الهرمونات هذا
عزاا حسيت بروحي جفصت هو الولد منيلة صخامات اححممم اكمل.
علاء-كملي
زينة-واخر سنه النه بالجامعه شگد نذرت نذور نتعين سوة وتستمر علاقتنه و الحمدلله طلع تعيينا بنفس المستشفى
علاء -بس والله هواي سحلتي روحج عليها
زينة-شسوي تستاهل واحد ينسحل علمودها
علاء-خوش نهاية
زينة-يييي.
علاء-زنو
زينه-هاوووو
علاء-وسماو احبج
زينة: -فهيت حلگي خنست وجهي صخن شنو يحبني كبل سديت الموبايل بوجهة زلغت خدوي بس مامطولة اضافر عزاا العزاني شلون احجي وياة بنصاص الليالي هسةشيگول علية شلون بية گبل ذبيت ميانة وياة طحت بية وحضرته لو من البداية بس بعد باوعت لبوة لافة روحة لف لفيت راسي و نمت...
گعدت على صوت المنبه لبوة مخليتة گمت غسلت ورحت للمطبخ لگيت الريوگ بالصينية على الكاونتر اكيد لبوة مسويتها قابل الجني مسويه ابيض سلگ ومخلمه زيتون دهن جبن گيمر مخليتهن بمواعين صغار والجاي علطباخ منصيته...
رحت دورت بالبيت ما لگيتها وين طلعت هاي گعدت بالحديقة شوية باردة رجعت انتظرها بالمطبخ...
---------
لبوة...
گعدت الصبح صليت وبدلت سويت الريوگ وجهزتة وزينة نايمة حقهة اذا مدري بيش الساعه الا نامت عفتها بعد وقت رحت للاسطبل اشوف ايلام حضنته قوي...
انطيته جت وشعير سحبت طبله گعدت عليها وعيوني عليه اباوع لتفاصيلة ايلام من الخيول الاصيلة لونة جوزي مائل للاسود وبگصتة مثل المثل لونة ابيض وشعرة طايح صفح احب شعرة كولش طاير بالهوى...
-اخ ياعلي. اخ. ياوجع گلبي
اشوف إيلام شلون كبر جان صغير حيل كبرنا سوى.
بيوم اجاني على گالي جايبلج هديه صرت انگ على راسة اريد اعرف حيل تحمست بوقتها.
-لج بويه انطي صبر من اسمها مفاجئه يعني راح
تتفاجئين بيها
-بس إذا طلعت مو حلوه ازاعلك ما احجيلك قصص
ضحك حيل وخزرني رافع حواجبة ابوي جميل بشكل لحد الان ملامحة مطبوعة بوجهي عيونة صفر وحواجبة ثخان ورموشة مهفة جميل بمعنى الكلمة.
-هوه منو اليحجي قصص
باوعتله صفح زعلانة...
-اني اني احجي قصص كل يوميه باليل تضل تبجي.
وتصيح لبوة حبابه سولفيلي قصه واني انقهر عليك اسولفلك
-فدوه لبنيتي التنقهر
شالني يمشي بيه دخلنة للبستان طبعاً البستان لجدي اللهيرحمه اخذني لمثل الغرفه صغيرة بس شوية وصخه مو حلوه(الاسطبل)
-هسه أنته المن جايبني هنا عود مسوي مفاجئه
-هسه اراويج المفاجئه
دخلني بالغرفه الصغيرة بيها فرس صغير حيل
-بابا منو هذا منين جبته؟
-هذا أمه جابته وماتت وتراهنة اني وصاحبي واخذتة منه.
دمعت عيوني انقهرت عليه حيل صغير: - يعني نفسي أمه عافته
-ايي بس انتي عندج اني بس هوة محد الة ابوة سفروة ضل وحيدتة
-خطيه بس هذا حيل صغير شلون ياكل وأمه ماكو
-انتي توكلينه وتشربينه حليب منا لمن يكبر
-اي بس اني مو أمه هوة يريد أمه
-بنيتي أمه ماتت نشربة حليب
-يعني صارت بالسمه مثل نجمه وايلام
دمعت عيونيه ورفع رأسه للسمه تنهد ورد علية مصطنع الابتسامة.
-اي بنيتي بالسمه وياهم
-زين هسه هوة شسمه؟
-ماعنده اسم.
-هو بنية لو ولد
-ههه ذكر يعني ولد
-خوش راح اسميه
-شني تسمينه؟
-ايلام بدال اخوي
باس راسي وگال
-هاهيه اسمه إيلام ديري. بالج عليه لبوة ترة يموت اذا ماياكل
من يومها صرنة نهتم بيه او الاصح اهتم بية لان ابوي بالشغل اشربة حليب خلال شهر كبر شويه صار إيلام صديقي وأخوي...
اگعد من الصبح انطيه حليب الضهر وكل ما يجوع اروح انطيه اكل لمن كبر صار ابوي يدربة ويصعدني وياة بعدين علمني اصعدة وحدي صرت اعرف امتطية وحدي صار إيلام يفهم علية بكلشي...
اسولفله يحس بيه من ابجي عيونيه يدمعن وياي وخاصة احجيلة على ابوي الوحيد الاحسة ينقهر وياي لان على رباة واهتم بية مثلي.
الحيوانات عدها مشاعر وإحساس أكثر من بعض البشر بعدها الملا صار يهتم بية ويدربة وحتى مسابقات ياخذة...
ابتعد عن الاكل ودگ بحوافرة بالگاع ابتسمت على حركتة بمعنى احجي لاتضلين ساكتة دائما يسويها من اسكت تنهدت وحجيت.
-ايلام كبرت صرت دكتورة واني بعدني ذيج الطفله الصغيره التنتظر يرجع ابوها ما ملت من الانتظار ولا اهتمت بكلامهم...
علي ما مات...
علي عايش بروحي وبكلبي كلماته أنفاسه بروحي حافضه كل كلمه منه. كل حرف ضحكته بالي صوته...
17سنه واني كل يوم افتح عيوني على أمل الگه روحي بحضنه الدافي من بعده ما لمني حضن مالگيت اليشبها تطشرنا وماكو اليلمنه...
مسحت دموعي النزلن وكملت كلامي مخاطبتة
كل يوم كل ساعه احتاجه يمي الابوي ديرة واني ماعندي ديرة هم يرجع بعد واگحل عيوني بشوفتة هم يجي يوم واحط ايدي بيدة واضحك من كل گلبي.
اخ يفراگ الابو هدالي حيلي
والله لبيع الروح كونة يجيني
اخ ايلام اخ ما عندي واحد بهاي الدنيا لا اخت لا ام لا اخ اشكيله احجيله غير على وهو هم راح وعافني ايلام ضليت بس انت إلى لاتعوفني بداعت العشرة والايام الطويلة.
صهل بصوتة العالي يشاركني الحديث گمت على حيلي حضنتة بكل قوتي حركت شعرة بيدي وضحكت.
اگضي وقتي كله يمه من اعصب يصهل بيه بأرض الله الواسعه ومن ابجي وشتاك لعلي احضنه واشتم ريحته...
مريت على زمرد صبحت عليها بس هي گاعدة اعرف بهذا الوقت نايمين رجعت للبيت لگيت زينه جاهزة...
-صباح الخير
زينة-صباح النور لبوو
لبوة-انوب لبوو
زبنة-شسوي اريد ادلعج مثلا اگولج بلوه
لبوة: -الافضل لاتكولين شي
نزلت الصينية خزرتها وبدينا ناكل.
زينة-اگولج لبوو مثلا اذا واحد گال لبنيه احبج وكذا
يعني البنيه شتسوي تعوفه لو شنو
لبوة-احبج وكذا
زينة-لا يعني معجب بيها وهاي
لبوة-اها منو البنيه.
زينة-داگولج بنيه يعني اريد أناقش بهيج موضوع
لبوة- گولي اني علمود اعرف شحجي
زينة-لا مو اني مو اني
لبوة-لعد جدي علاء وكذا
زينة -منو شبيه علاء
لبوة-المعجب
زينة-شبيج لبوة شكاعد تحجين
لبوة-شبيه جاي احجي الحقيقية
زينة-يعني انتي تعرفين
لبوة-بنيتي اني اقرا افكارج الحجيتي والما حجيتي
بكل الاحوال اعرف
زينة-هسه شسوي
لبوة-تجاهليه التجاهل يرجع الناس لمكانهم
زينة-يعني شلون.
لبوة: -اذا فعلا يريدج يتقدم يخطبج، اما إذا يضيع وقت راح يولي من وحدة.
-هيج
-اي هيج دادة الرجال اذا شاف المرة تضحك وتسوالف وياه وهما مابيناتهم علاقه شرعيه. شراح تكون نضرته الها راح يتزوجها،؟
لا المرة التضحك وتسولف وي الرجال وتنطيه على مايه ماراح تصير ام لجهاله.
اما اذا شاف اخلاقها وعجبته صارت ام بيته وربيعته...
المراه الجميله تجذب الرجل لساعات.
أما المراه العفيفه تأسره مدى الحياة.
لاتنطينه وجه اليريدج يدگ بابج مو يگضيها
احبج ومشتاقلج بدال هذا الكلام يحضر اموره
ويتزوج...
زينة-اگولج بس اني ما اريد اتزوجه. ما ادري شبيه يعني ما اريد اتزوج...
وهم اريد احجي وياه بس مو غزل وهيج بس
بعدين اتندم اگول هسه اني شكو ارد عليه هفف...
لبوة-الله كريم البي الج صالح يصير صدوك منين جاب رقمج؟
زينة-ماادري داده، بعد همه بالدوله اليجيب معلومات عن المجرمين ويسحلونهم وهما بيتهم ما يجيب رقمي لو حسابي
لبوة-هم صح بس أخذي حذرج لا تضربين ميانه
وياه لأن هما مو راحة ابد يسوون علاقات هواي
زينة-لبوةاحس نفسي غلطانه لأن حاجيته يعني ما احجي وياه مثل الغريب مثلا نعم تفضل
طال مساءك اغرب عن وجهي
لبوة -هههعههههه ولج گلبتي فصحه. هذا مو غريب هذا فلم الرساله
زينة-هسه گليلي شسوي احس مسويه ذنب.
لبوة-داده انتي هذا طبعج تضربين ميانه وي الناس
تذكرين من سولفتيلي اسرار العشيرة كلها واني
اعرفج بس اسبوع
زينة-هههههه سولفتله شلون سحلت روحي حتى أصير صديقتج
لبوة-عززززا
زينة-لا خاب شبيج مو مثل البالج
لبوة-شنو البالي؟
زينة-البارحه حيل خفت وانتي جنج جثه شفته متصل راسلته گلت اعتذر منه وجرني الحجي
لبوة-وسولفتي الاول والتالي
زبنة-لا بس رؤؤس اقلام انتي لو ما نايمه كل هذا ما صار
لبوة-ديلا كملي راح نتأخر.
-اي شبيج مو جاي اكل
كملنا ورحنا للدوام...
-
----------------
غزل: -اختنگت من المدافر مال الحلة خفة حتى خفة طابور اجتني روجة شمرتني صفح ساعة السودة على روسجن طلعت مختنگة الصدرية طافرة وجنطتي صايرة برگبتي وشالي مفتوح وكفت على صفحة ارتب بروحي وادردم...
الشارع زحمة هسه وين الگة ازل بس لا المدرسة جلبت بيهم بحجة السادس شفت نور صديقتنة اشرتلها اجتني.
-الحمدلله على السلامة.
نور: -الله يسلمج ضلعة ولج اختنگت شني هاي يگول زيارة
-اي والله اگلج ازل لحد هسه ماكو
-امشي انتانيها يم الباب
لزمت بيد نور لا اضيعها بالزحمة وگفنة ننتظر ست ازل نزيت من شفت ولد ورة ضهري صرت على صفحه گبر حتى گبر زاحف هذا سمعتني نور احجي دغتني بجتفي
-ها ولج شكو
-ذاك الچرو راد يحط رقم بيدي دخل يجي الا افضحة بسيطه
-عوفيهم ذولة هتلية شعلتهم هاي لاتحطين راسج براسهم.
سكت ورة دقائق طلعت ازل وجهة شاحب حقهم اذا المدرسات دقيقة مايعوفنهن
ازل: يلا امشونة بنات ميتة تعب
مشينة سوة وذولة يحومون بالدراجات شلون شكول
اخذنة الطريق ساكتين نسحل برواحتنة والجنط كاسرة ضهورتنة ما نحس الا درجة دراجة خطفت من يمي شوية وتدعمني لافت ورجعت ورانة ماتحملت لزمت طابوكة وشمرتها اجت براسة.
نور: عزاا ولج شسويتي امشونة بنات بسرعة
ازل: -يمة اني مااگدر امشي على كيفجن فدوة.
رحنة نطرگ طرگ خو اني صرت اركض ركض وحنة نمشي طبگت علينة سيارة وگفت گلوبنة انفتحت الجامة ونشوف جلال صديق اخوي حيدر عگد جواجبة وحجة.
-شبيجن تركضن
نور وازل انبلعت لسانتهن ماردن شجعت روحي وحجيت: -لا مانركض جاي نمشي
-هذا ركض مو مشي احجن شبيجن
باوعت للبنات يهزلي بروسهن مااحجي باوعتلة مترددة احجي بس اذا سكتنة راح تتكرر الحالات ويسوون الاسوء جلبت بيد نور حيل.
-شوف اكو ولد يتحارشون بالبنات وعدهم دراجات قبل شوية واحد يفتر علينة همزين مادعمني بس اني شسويت ماسكتتلة شلت طابوگة وشگيت راسة
-يلة روحن السجون فارغة الا اخليهم يعفنون امشن
ولا تحاجن واحد
هزينة بروسنة وكملنة طريقنة.
نور: -فلك ولا تستحين لو اموت مااحجي بس انتي عينج گوية
غزل: -لعد شلون نسكت وبعدين دخل يخلصونة منهم لعبت رواحتنة عاجبج الوضع
نور: -بس هو والله صاك خاب متزوج لا.
-لا ولج مامزوج هما متفقين كلهم يتزوجون سوى
نور: -عليجن الله ماتخطبني لخوجن لصحبان اخوجن شبيجن يحضي
ازل: -حبيبتي ذولة ناس كبار مو يمنة ولا يفكرون بمثلنة صغار يريدون بعمرهم
غزل: -وشبينة صغار شو كل وحدة بطول البعير وبعد سنة سنتين وندخل جامعة
نور: -بنات عليجن الله شوفلي واحد من صحبان اخوجن مو تنسني فدوات
غزل: -ولا يهمج يمييي
-كفوو من شواربج.
وصلنة نور لبيتها ورحنة لبيتنة على بعد مسافات دگيت الباب فتحتة امي كلعادة.
-گواجن الله
-الله يگوي حيلج بعد عمري
شمرت الجنطة بباب الصالة وطلع بوجهي حيدر حيللل مشتاقيلة يمكن بالشهر هو مانازل بس شصاير بية متغير هواي.
- ععععععاااااا لج ازل شوفي منو جاي!
حيدر -هلا هلا بروح اخوهن
أزل -هلا بضلعي هلا بهيبتنا شلونك.
حضنة ثنينة يمسح على روسنة حيدر ماخذ دور ابونة الله يرحمه من بعد السلام رحنة نبدل نزلت لگيت امي تصب الغدة مبينة الفرحة بوجهة.
-هاا بسومة اليوم منشنشة
-غير اجوجن منور البيت تحكلت عيوني بشوفتة الحلوة
-أي والله صدك
التمينة كلنة على السفرة كلها تاكل الا اني حصرتني الضحكة مدري شبية اجت بالوكت الغلط.
غزل -هههههه
حيدر -شبيج بابه مو نعمه گدامج
غزل -هههههههه
بسمه -يععععع يمة هاي البت تخبلت.
ازل -شخبلها البهلول يايمة
غزل -شبيكم وياي يعني واحد ما يضحك
حيدر -ممكن ست غزل تسولفي شنو المضحكج؟
غزل-دكتورة غزل
حيدر -اي ليش لا غزل الدكتورة
أزل -دكتورة زين إذا صرتي فراشه سامعه بالدكتورة
معدلها شگد تجيبينا انتي ام حلگ
غزل -هسه انتي شحارگج بالعطله اكعد اقرا للسادس
بسمه -ولجن كافي بعد بس تكافشن
غزل -سكتت ياضحكة ردي المكانج اكو حيدر مو تدخل بس ماتزوج كبران شوراك بعد.
حيدر-معقولة صرت شايب
غزل-ايييي
بسمه -وجعيي
أزل -اصلن صاير يخبل تلاثيني صديقاتي كاتلات رواحهن عليه كل يوميه يسألن عليه شلون اخوج الصاك
حيدر -نعمه الله عليهن
بسمه -ولجن كافي لو تاكلن لو تگومن
حيدر -يمه على كيفج وياهن جاي يسولفن
غزل -حيدر اليوم تحجيلي قصه
حيدر-من عيوني
غزل -يايييييي
ازل -وجعاي.
عطات امي بينه سكتنا كملنا الغدة على الصامت گمت سويت جاي ماترهم صبيتلهم ورحت وديته الهم كالعادة كاعدين يسولفون بالعشاير مدري بيمن محد يفتهم عليهم رحت اغسل المواعين ست أزل سادس مدارين مشاعرها...
خلصت شغلي وگعدت اقرا بالصالة ورة دقائق نزل حيدر لابس دشداشه لون بني والچراويه لافها على راسة بطريقتة خو عطرة يجيب التايه العطور تارسه الغرفه مالتة وإذا اخذت واحد يتكهرب.
ما يحب واحد يلعب بغراضه لو يأخذ منه شي.
كملت دروسي رحت للعشق ساجده عبيد نثرت الشعر وسديت الغرفه اطلع خبالاتي بالرگص...
الواحد يرادله شي يطلعه من الضغوط، وماكو غير هاي الطريقه. غزل گاضيتها قرايه ما تطلع من الغرفه وامي تكضيها صلاه لو تقرا قرآن لو تابع محاضرات.
ورا العشه اجه حيدر وياه جلال واگف بالگراج بويههه مو صاحب ضيم يخبل. الطول والعضلات
شحلاته انوب اسمراني هستوني انتبهت عليه...
بقيت اباوعلهم من الجام شويه ودخل للاستقبال صاح حيدر جاي رحت سويته وبقيت اتسنط عليهم...
كلساع وگال وداعت حمديه ام البن وهذا اخوي طايحله طن رزايل، اوي شلون متحمله بقيت اسنطلهم سوالفهم تشد الواحد.
تذكرت الجاي رحت ركض صبيت الهم أخذه حيدر مني بقيت احجي وي روحي: انوب جلال والله اسمه حلو يدلعون جلوله.
من زمان شايفته بس ما منتبهتله. دائما يجون لبيتنا وهو وعلاء، علاقتنا بيهم عائليه أمه تجينه وامي تروحلهم، بقيت اكلب بالموبايل ودخل حيدر شمرتة ورحتلة.
غزل-يله أنته مو. گلت اسولفلج قصه
حيدر-يله بنيتي هسه
ذب الچراويه وگعد على القنفه صرت گبالة و مزكزة
بكل حواسي وياه شغل جكارة اخذ منها نفس وصار يقص نفس القصة لنفس الطفلة خمسين مرة قراها إلى حتى حفضت حركاتها والمشكلة ما افتهم منهة شي.
-شني هاي حيدر ماعندك غيرها
-تؤ
-زين فهمني شلون وحدها تمشي شلون التقى بيها الشرير.
حيدر-بويه هاي قصه من الخيال مو حقيقية يلة خلصت السالفه روحي نامي.
-خلص رايحة تصبح على خير
-وانتي من اهله.
سواد الليل يبقى وتطفى اللوان
واعيد بذكرياتك والمشاهد
حيدر.
اصعب شي بالحياه التخلي عندما الكل يتخلى عنك باصعب اوقاتك بوقت تتقبل بيه حتى اعداءك كلماتهم خناجر بصدري جانن...
-راح تموت الحگولهاا
-وانة شني رب العالمين ولو ماتت أزيد من اخونا
-اذا ماتت ياهو النا اخواتي ياهو الهن؟
-العدل يعيش لاتخاف عليه اخواتك احنا نربيهن
-وامي نخليها تموتتت؟
-كل واحد ويومه
-ارجعهن دين برگبتي ارجعهن دينار دينار
بس ساعدونه.
-هههههههه ابن الفگر منين ترجعهن ابوكم عايفلكم
ورث شو مات حافي
-انته شني من بشر ترة احنة ولد اخوك
-اخوي من اخذ امك الفگر صار مثلها فگر
-وين اروح هسه؟
-ارض الله واسعه
طلعت من بيتهم، واني نار مشتعلة بروحي تسعر
كرهتهم وحقدت عليهم بگد هوه الله ذليت روحي الهم خير ابونة ياكلون بية صعدت بكية ارجع للبيت بدت العبرية تجمع الكروة مديت ايدي بجيبي ادور على الخمسمية ماكو حضي الگوضاعت.
صرت امسح بگصتي ماكو لازم انزل واكمل مشي حتى لو بعيد امشي احسن مااتفشل صحت نازل كلها التفتت علية عرفوني ماعندي كروة همس حجي بصفي.
-بوية اني ادفعلك الكروة كون ماعندك
هزيت براسي لا ونزلت امشي گعدت بالگاع ودموعي تنزل مذلول محترگ محتار صرت اناجي الله الماعدنة غيرة.
يارب لا تموتها لا تعوفنا تايهين تطشرنا مرة لا طشرنا مرة ثانية ماعدنة غير امنة لاتيتمنة مرتين.
رفعت راسي على صوت طفلة تحجي برائة وجههة يفتح النفس.
-ماتموت اني گتله ما راح يأخذها راح تبقى يمك لا تبجي بعد
مسحت وجهي وسألتها مستغرب من تواجدها بهيج مكان مهجور محد بية وهي بنية صغيرة.
-انتي ليش هنا؟
-مكاني. أنته ليش هنا؟
-ضايع
-كلنة ضايعين
حجيها مو مال عمرها جان بيدها دفتر.
-شتسوين بالدفتر؟
-ارسم
-شترسمين؟
-اي شي بكيفي بس اني ما اعرف ارسم
-اوكفي خل ارسمج رسمة
-مو هيججججج مو هيج ما تعرفون كلشي
بس هوه يعرف...