رواية لبوة علي للكاتبة كفاية كاظم الفصل الثاني
لبوة: -
وتختفي كل الكوابيس المرعبة عندما يأتي الصباح دك المنبه بالسته طفيته گمت امط بجسمي نهضت روحي وبست اصابيعي التلاثه خليتهن على گلبي كمت غسلت وحضرتلي كوب كهوه...
بديت بروتيني الصباحي متناسية الصار البارحة اخذت كم كليجة اكلتهم وي الگهوة، الرويگ اكثر وجبة مفيدة هي والمشكلة مااحب اكل الصبح بس اجبر نفسي لان مااكل من المطاعم...
جهزت نفسي اباوع بالمراية عيوني بيهم احمرار وشويه انتفاخ اخفتة بالفونديشن خليت حمرة لونها فاتح لشفايفي و خليت منها لخدودي...
حضرت غراضي و نسقت جنطة وي ملابسي خليت بيها دفتر صغير واقلام تلث اللوان وعطر كلنس مرطب هتفون شاحن معقم ومرطب اشيائي الما استغني عنهم تأكدت ما نسيت شي احتاجة رحت بوجهي للايلام...
امشي بالبستان خضار المكان وصوت العصافير وبروده المكان شي كولش لطيف ينطي طاقة.
إيجابية بقيت امشي بين الشجر واقدر أعمارهن
اكو كلش كبار من جنت صغيرة اتسلقهن واحير
شلون انزل منهن هههه اصعد بكل سهولة لكن من انزل اخاف اوگع ابتسمت من تذكرت وكاحتي بصغري...
لاگاني الملا صبح علية بوجهة البشوش المتعارف
علية اخذت مكملة طريقي للاسطبل شفتة من بعيد
بنشاطة المعتاد أردفت بصوت ناصي وابتسامه مزينة وجهي
: -افديك بروحي يبعد العافيه المابيه.
تقربت عليه حضنته قوي اردفت: - شلونك يولوو اليوم نشاط فول بعد ما هبطتني البارحه حتى عيوني توجعني من وراك ناوي تجلطني لو تختبر حبي الك...
شميته قوي ومشطت شعرة بصابيعي...
اول ما اكعد من النوم ابدل و اروحله. اصبح عليه قبل لااسوي كل شي صباحي يكتمل بشوفتة باوعت للساعة راح اتاخر واني احب اكون قبل الوقت...
اتصلت ب ادهم جاوب بعد طلاع الروح
-يولو تعال منتضرتك لا تتأخر بسرعة شدها.
ادهم -صباح النور دكتورتنا مرة بحياتج صبحي عليه اكلج شي انتي ثورة مو دكتوره
لبوة-خاب دنچب وتعال راح اتاخر صباح الخير هو أنته وجهك مال خير
ادهم -مشكوره هاي من الصبح مو جهة نعمة ااابدن
لبوة: -ديلا تعال مو تتأخر
ادهم -جاي يوجة البومة جااااي
بقيت رايحة جاية بين ما وصل ادهم خزرتة وصعدت وصلني للمستشفى ورجع نزلت بوجهي بصمت ورحت ادور على زينه لاكتني ام حمزة صبحت عليه
صباح الخير
لبوة: -صباح النور گلبي شلونج؟
من شفتج صرت زينة البارحة وحشة عليج
لبوة: -اخذت ريست الضاهر ما متعودين على غيابي
والله انتي يا يمة من داومتي بهذا المستشفى
ولحد هسه ما تغيبين هواي حتى لو عندج عطلة تعودنة عليج شنسوي
لبوة: -ما احب اكعد بالبيت ومن اشوف نفسي محتاجة ريست أخذ
روحي الله يفتحها بوجهك ويخلي صباحج عسل مثلج
لبوة: -تسلمين خالة...
ابتسمت من لطافتها الزايدة دائما تسال على اعتبرها بمقام خالتي الما اعرف عندي خالات لو لا اوفف.
دورت على زينه اكيد تتأخر واني اجي قبلها رحت للكافتيريا اشتريت عصير ليمون جاهز ما احب اشرب شي يتحضر أخذته وطلعت اشربه...
اجوي الدكاترة بس كولش قليل مو الكل ملتزم مثلي ومثل دكتور محمد وسليم هذولي قدوتي اجة دكتورمحمد صبح علية.
محمد: -صباح النور عيني
-صباح الخير
-احب التزامج يميزج اكثر
-شكرا دكتور
-بالتوفيق تجمعنة صالة العمليات اذا الله راد
-إن شاءلله.
بعد نص ساعة اجت زينه تلهث لزوم تتأخر وتجي تركض وتحجي: -تف عليج رجليه طاحن واني ادور عليج
لبوة -صباح النور كلبي ليش اني طايرة شو مكاني ماغيرة بعد شكو
زينة-هففف صباح السرور والنور اكولج شنو اليوم المستشفى مسويله مداهمه احسة ضجة
لبوة-و الله داده ما ادري تعالي نشوف شكو اني هم حسيت بشي غريب اعتقد صاير هجوم وجايبين جرحة بالطابق الثالث
- خطيه بس لا يورطونة وياهم.
-على شنو نتورط ناس نأدي شغلنة مثل ماهما يأدون شغلهم
-هذا الحجي يفيدج
-يفيدنة كولنة دتعاي نستكشف
-هههه هسه يلاگينة جوجو
-اووف مو من الصبح تسدين نفسيتي
-ادللي اخليها الج ورة الضهر
جاي نمشي لاكانه دكتور محمد جنة يدور علينة ذب نفس واشرلي بيدة.
محمد -يلا لبوة جهزي نفسج عدج عمليه بسرعه
بقيت اني وزينة وحده تباوع للثانية بعدني ما گايلة ياالله رجع حجة بصوت عالي مبين الوضع مليوص.
محمد -يلا شمنتضراااا جاي اكلج بسرعه جهزي نفسج
لبوة: -جفلت بمكاني دخيلك ياعلي
كمل طريقة يمشي سريع رجع دار وجهة وحجة بقلة صبر
محمد: -علفكره العمليه راح تسوينها بيها خطورة
لبوة -شلون دكتور؟
محمد -ماعدنا كادر لبوة هاي العمليه مو هينه وانتي كدها اعتمد عليج لو ما اعرفج ما اسلمج هيج عملية
صيري سباعية ما يحتاج اوصيج بعد
لبوة-ان شاء الله دكتور
باوعت لزينة بقت صافنة بوجهي صاح دكتور محمد عليها بحدة.
محمد: -وانتي زينه محتاجج ضروري عندي عملية
يلا گدامي بسرعة
راحت زينه وي دكتور محمد توجهت لغرفة الدكاترة لگيت المكان هوسة متروس ضباط وجنود تارسين الممرات.
تجمعهم لخبط وضعي نوعاً ما انقلب رأسا على عقب من هيج اجواء وماشاء شغلي بنص الهوسة وهذا الشي مأثر على نفسيتي بشكل مو طبيعي.
غمضت عيوني قرفانة اي اقرف مو بيدي والله احاول شگد ماگدر ابين طبيعية بهيج اجواء بس للأسف فشلت الكل يعرف بهذا الشي وكل شخص يحجي بكيفة بس كلمة وحدة جبرت بخاطري من بعد الكلام المتداول دكتور سليم من يشوف هيج اجواء ويشوفني متضايقة يعفس وجهة ويهمس يلوگلج الهدوء
ضربت على اذني بانزعاج تام من شفت واحد يصيح ويغلط بصوت عالي ادري ليش شگد انانين محد يفكر بالثاني ولا بهاي المرضى.
گمت احس بوشوشة بأذني مشيت باتجاهة احس نار بيه نرفزني صوته أردفت بصياح.
-شبيكككك صااايبك الحمزززة أنته ويننننن كااااعد احنا بشارررع لو بمستتتشفى
رد عليه وعيونه حمر يطاير منهن شرار حسيت غضب الدنيا متجمع بية.
-هاااي عليمممن تعلييين صوووتج تعرررفين اااني منووو
أردفت كازة على سنوني: -ما يهمني منو أنته اليهمني صوووتك نصييي افتهمتتت لو اعيدددد
مااشوفه الايغلط ويسب والولد الوياه يسكتون بيه.
ماكو ولا جنة احجي وياه أردفت صياح بعد مانسطرت سطر وفقدت السيطرة على نفسي.
-صوووتك بكد الثور شبيكككك ترررعد.
اجتمعت الدكاترة تشوف شنو هاي الهوسة هدأت نفسي ماريد واحد يشمت بية مشيت خطوات و حجيت وياة بهدوء كاتمه الغضب بداخلي.
-صوتك نصي خاطر اسويي العمليةاوكي
من كلتله راح اسوي العملية سكت وبقى يباوعلي بنظرات استهزاء ومتوعده يريد ياكلني حجه بصوت ناصي مليان وعيد.
علاء-انتي الراح التسويله العملية؟
لبوة-اييي...
حجة ماشر باصبعة
علاء-ليش ماكو غيرج هنا
-للاسف لا واذا ماعاجبك اخذة لغير مستشفى هاي اذا بقى عايش بالطريق.
-شوفي اذا صار بحيدر شي ما تلومين الا روحج
حيدر يطلع من هاي الغرفة سالم غير هيج محد يطلع
رديت عليه برود ولامبالاة.
- تمام بس صوتك نصي
عفتة بنارة ورحت تجهزت ودخلت لصاله العمليات المريض شاب نهاية العشرين او بداية الثلاثي اعتقد عندة رتبة لأن خبصونة بيه كل شوية موصيني عليه حتى مدير المستشفى...
انطوني المعلومات الكافية عنة مثل ماتوقعت اذا صار بية شي ويييي نروح ورة الشمس شيخلصنة الدكتور اليشتغل بالعراق مبتلي على روحة.
واليوم بالذات دكتور سليم عنده ريست فاني بمكانه حضي وين يوديني يريد.
كان المريض مصوب بطلقتين الاولى مكانها بجتفه بسهولة طلعتها ما استغرقت وقت هواي أما الثانيه مكانها خطروحساس...
تحتاج تركيز، هدوء، دقه، أكثر اقل حركة يتمزق.
وريد لو شريان ويروح بيها المريض حاولت اكثر من مرة اطلعها لكن بدون جدوى اخذت نفس عميق وزفرته...
أردفت بهمس.
لبوة على يبرالج علي
غيرت الاتجاة بهدوء تام وحذر طلعتها بعد عده محاولات رفعت راسي واحد يباوع بوجة الثاني الوجوة مرتعبة اي واقع حال التهديدات التصير والعتدائات بفلس كملت العمليه وطلعت...
المريض حالته مو تمام صح طلعنا الصرصاص لكن بقت خطورة على حياتة...
تحمدت الله من تعدى الخطر. طلعت من الصاله صار بوجهي ابو شوارب الجان يعيط وگالب الدنيا، الخوف والقلق ماخذات نص حيله حجة بقلق
علاء-شلونه دكتوره؟
لبوة-مااكدر اكول شي هسه وضعه ما مستقر طلعت الطلق لكن ماا اگدر اگول شي حاليًا...
علاء-شلون؟ يعني راااح يمووت و يعوفني!
احس روحي انسحبت مني من كال هالكلمة
عيوني غوركت أردفت عليه بعصبية...
-محدد يعووف الثاني محددد يخسرررر شخص عزيززز علية ما دام لبوة موجوده.
احس كلت هالكلام بدون وعي اباوعله يباوعولي بعدم فهم أردفت بهدوء...
-مابيه شي يولو لا تخاف عليه هسه يكوم مثل السبع بس اهدء وادعيلة يگوم بالسلامة...
احس كلامي طمنه شوية اردف بهدوء.
علاء-شكرا دكتوره
لبوة-واجبي هذا
حجيتها ومشيت. صاح وراي
علاء-اعتذر جنت عصبي بس ما متقصد وعلي
لبوة: -كملت مشيتي اردفت ببرود عادي يبا ماصار شي...
صعدت للسطح الهوا البارد لفح وجهي، الهدوء مسيطر على المكان بشكل مريب، عكس ضجت المستشفى احلى والطف مكان بالمستشفى...
بست اصابيعي تلاثه خليتهم على كلبي اردفت بهدوء: -ما خلي واحد يبجي على شخص يحبه راح اسوي المستحيل ابذل كل جهدي حتى انقذ حياه الناس...
عائلة كامله بلحضه تنتهي، تتحطم، بضياع وفقدان واحد من أفرادها، ما اريد شخص يجرب هالشعور
ويعيش هالتجربة المرة...
مسحت الكرسي بالكلنس أكثر من مرة، كعدت عليه.
شغلت قصيدتي المفضلة حاسة وجودهم بقربي اشتغل صوت باسم دوة لكل مجروح...
لاترد ما ضل اثر كل شي انتهى بسفركم
لاترد مات الورد من انگطع خبركم
كتبت على دارة، دمعه انتظارة
مايسرك هذا حالي وداري تنعه
والليالي ذوبتهن شمعه، شمعه
ماتشاهد من اثرنا الا دمعه...
إيست مات الامل
وبيا جرح تجيني
إيست لا ما ترد واني عفت انيني
تنطوي بمدارك دمعة انتظارك.
مرت استراحتي نزلت وصارت بوجهي الغثة دكتوره جديدة حاطة دوبها من دوبي وكفت بطريقي.
-نريد نفوت شلون؟
-تفضلي حب بس حبيت احجي وياج كلمتين
كتفت ادية لصدري حجيت بنفاذ صبر: -احجي
-اكول انتي شدعوة هيج مغرورة وشايفة نفسج حتى ماتجتمعين ويانة عود ليش
-مو شغلج
-ترة كولنة بشر من نفس الطين مايحتاج رافعة خشمج وشايفة روحج شوفة
-عندج بعد كلام
-اويي عود لان حلوة شوفوني مااحجي وياكم
-وبعدين
-نصيحة وراج كبر لاتنغرين زيادة اوكي.
-اوكي
عبرتها ومشيت شكد غثة يريدني اگص بالعالم وياهن الا يرتاحن دطيرن اني بحالجن...
كملت شغلي بين طفل فاقد الامل بين ام دمعتها بعينها بين اب حاير بفلوس العلاج هم يجي يوم ومحد يتمرض اوفف.
تطمنت على المريض وصيتهم علية حددت الأدوية وقتهن الممحدد لحد هذا الوقت ما راجع الوعيه خلصت شغلي رجعت للبيت...
اجت الجهال تركض بصوبي ضحكت عرفت شيريدون طلعت من جنطتي جكليت وكليجة وزعتلهم.
-انتي خوش بنيه
-وانت خوش وليد.
-سوي هواي هواي
-ادلل
عفتهم يلعبون ودخلت للبيت اخذت نفس و توجهت للحمام المستشفى كولة جراثيم مو نضيف ينتقل النة.
سبحت ورحت صليت نمت ساعتين كعدت ميته جوع مخلصتها حلويات انسحلت روحي سحل.
فتحت الثلاجه طلعت طماطه وبتيته كرفس صدر دجاج بصل خليتهم بالخلاط صارن ناعمات ذبيت فوگهن تمن ومعجون دبس الرمان. وشويه شطه بهارات، واهم شي الكشمش احبه بالاكل...
خلطتهم، حفرت بتيته حشيتها، خليت بالكدر زيت صفطتهم بيه خليته على النارشويه حمه ضفتله مي، نصيت الطباخ. سويت زلاطه طلعت التمر واللبن...
التمر عندي شي اساسي باكلي وقتت الموبايل نص ساعه اخذت تفاحه ورحت للبستان اشوف ايلام...
كالعاده من امشي على بعد مسافه اسمع صوته يعرفني اني جايته يشتم عطري ما ادري شنو سالفتة...
وصلت يمه مشطت شعره ضفرته، هسه تكولون شبيها هاي هوة فرس من اسوي هيج احس اعتني بواحد من عائلتي، مثل ما امشط لختي الصغيرة، لكن شاء الله ما إلى أحد...
امتطيته، احلى شعور الفروسيه الفرس يختلف مميز حيل يحس بصاحبه يواسيه.
كلشي عندي احجيله عن كلشي بحيرتي بحزني بفرحي إيلام وجوده عائلة، أكثر وقتي يمه صديقي
المقرب نص ساعه و دخلته للاسطبل...
رجعت للبيت لاكاني ادهم.
ادهم -ريحت الاكل جابتني احترگ مطر صايرة منال العالم
لبوة-انته ليش ماتنجب
ادهم-ومرض كل ما احجي شي وكلتي انجب احترمي هسه اني كايلج انجبي
لبوة-شسوي ضاربه ميانه وياك إذا ضوج من كلامي بعد ما احجي وياك شي حالك من حالهم
ادهم -هيه لو طخه لو اطلع مخه
لبوة-بعد هذا الموجود
-اكل وياج بداعة شناوة
-ديلا تاكل بس تغسل المواعين
ادهم -شكد ستغلاليه انتي ما تعبرين شي.
لبوة-شسويلك عاجبك عاجبك ما عاجبك انتف حاجبك ترى هنه شويه مو هواي
ادهم: -ادري شويه هسه طلعين مواعين البيت كلهن
حتى النضيفات
لبوة: مو لهدرجة اني حقيرة.
-الله اليعلم ليادرجة الحقارة عندج
-امم جيد
صبيت غده وهو عشه بنفس الوقت
: -من تاكل لاتطلع صوت اوكي
ادهم -يعني شلون ابلع بلع!
لبوة-اكل بس علا كيف مو چنك ما ماكل من قبل
خزرني ما عاجبه...
ادهم: -الصراحة طبخج كلشش طيب
لبوة: -اعرف
ادهم: -ثقتج بنفسج حيل عاليه.
لبوة: -من زمان
ادهم: -تدرين مرات احسج مثل انسان آلي
لبوة: - يعني؟
ادهم: -تجاوبين على كد السؤال لا زايد ولا ناقص
وما تنطين شي زايد مثلا من اكو شي يضحك ضحكتج لحضة ما تطول
لبوة: -شدعوه مركز بتصرفاتي لهدرجة
ادهم: -ما مركز بس المختلف يصير مميز تتحول الأنظار اله
لبوة: -هسه اني مميزة بنظرك؟
ادهم: بنظر الكل انتي مختلفة بطريقة كلامج اسلوبج حتى شكلج
لبوة: -لهنا اوگف شكلي عوفه على جنب.
ادهم: -لا بالعكس اختلافج حلو من بعيد ضاويه وعيونج تنطي لصفة
لبوة: -شكرا وبعد لا تتعمق
ادهم: دللي
لبوة: -امك شلونها هي وسمرة؟
ادهم: -امي كم مسافة عنج روحي شوفيها وهي تفرح بشوفتج
لبوة: -ما لي خلگ اشوف سعاد لو مازن اففف
ادهم: -براحتج بس سؤال؟
لبوة: -جواب إذا كان سؤالك بيه خير
ادهم: -بعدج تركهينهم وحاقدة عليهم
لبوة: -هما منو؟
ادهم: -تعرفين قصدي كلش زين.
لبوة: -من تكره شخص المعنى اله أهمية بحياتك حتى تنطية شعور مثل الكرة أما هما ما يستاهلون انطيهم هذا الشعور
ادهم: -تفكيرج عالمي
لبوة: -سالت هواي اكل
ادهم: -سكتتت
كملنا الاكل راد ادهم يغسل المواعين اخذتهن من ايده.
-شبيك بابه صدكت اخليك تغسلهن
ادهم -فدوه لكلبج يعني ما اغسل
لبوة-تؤ بس اريد اشوفك إذا كلت لا ما خليك تاكل وياي
ادهم- شگد نغله
لبوة-انجب وادعبل
ادهم -رايح وما وصيج بأجر بالاربعه اكعديني طالع عماله انه.
لبوة-بالسبعة قلبي
ادهم - عود مسويه فضل علية جنج وجه شنشون ابو عيون
-امم
- يلا أنه طالع خو ما رايده شي
لبوة-شكراً
راح ادهم غسلت المواعين ورجعت نضفت البيت رغم هوه نضيف، عطرته. كل يوم ما ارتاح إذا ما انضفه...
حياتي مابيها شي جديد كل شي اسويله بشكل يومي الروتين ما استغني عنه، اتصلت بزينه
-ها زنو شلونج يبا؟
زينه -شلوني ولج بعدني بالمستشفى
لبوة-لحد الان!
زينه-ايي داده مجلبين بيه يكول بس اني موجوده.
لبوة-شعجب لحد هسه ما مخلصه
زينه-ما اكو كادر، ولج لو تشوفين المستشفى شصار
لبوة-شصار؟
زينه-الصياح والعياط مالي المكان والمستشفى متروس ضباط وجنود خوب الهوسه موضوع ثاني
دختت دختت بويه راسي صدددع غير يطلعوني هسه شبيهم وياي
لبوة-ايعع لعبتي نفسي شنو يصيحون شچاهم اموت من شخص صوته عالي احسة جاي من غير كوكب، علا ساعه استقيل من ورا هالسالفة.
زينه-على كيفج داده بس انتي لاتركزين بالموضوع وما راح تتاثرين غلسي اشغلي نفسج بشي ثاني
لبوة-لج مو بيدي احس نفسي نار من اسمع هاي الاصوات والهوسه أحسها تنتقل لروحي يصير داخلي ضجيج
زينه -اگولج لبوة ما تشوفين دكتور نفسي بلكت تصيرين احسن ويخف عندج هالشعور وتروح الاعراض
لبوة-لج داده رحت لأكثر من دكتور ما يفيد مايفهمون واني ماارتاحلهم ينطوني ادوية.
الادويه ماتعالج الروح تعالج الجسد واني روحي توجعني كولشي كولشي ما يفيد ماخليت شي يعتب عليه من نصائح طبيه علم النفس درخته درخ
زينه-الله يكون بعونج وراح يجي يوم يروح كل هلشعور وتخف الاعراض عندج.
-إنشاءلله
- بس عفيه مو تسويلنة عركه ترة ذولة كلهم بالدوله واصلين يذبوج ورا الشمس وانتي ماالج غير وضيفتج...
لبوة -والله ولا يهمني ولا يخوفني شخص بس اخاف من الشماته اذا انفصلت
زينه-ان شاء الله حرگ اليحركهم.
لبوة -لاتدعين داده احنا ما ناقصين يكول يا داعي الك ثلثين الدعاء
زينه-تف عليهم الحقراء الوصخين
لبوة -دعوفيهم ربج ما ينسى هسه راح اخابرلج دكتور محمد اخليه يطلعج
زينه-تسوين فضل والله
لبوة -تدللين چم زينة عندي.
نهيت الاتصال وي زينه خابرت دكتور محمد وصيته
يطلعها دكتور محمد هو المسؤل علينة، رحت اتابع فلم كارتون نعيش طفولتنة تالي وقت...
رحت انام بعد ما تأكدت من نظافة البيت...
ثاني يوم طلعت للدوام وصلت لعبانة نفسي من الازدحامات...
وصلت دخلت للكافتيريا اخذت عصير ورحت بصمت
صار بوجهي جهاد درت وجهي اجتازيتة.
-شلونج لبوة؟
-من الله بخير
-ترة مايطير نصج اذا حجيتي وياج
-غلطان يطير
-ليش هيج تحجين وياي شمسويلج
-مامسويلي ولا اسويلك عيسى بدينة وموسى بدينة
-وتالي وياج گلبي فتتية
-رجائا ابتعد عن هيج مواضيع انت زميل لااكثر ولا اقل
-اعبري مرحلة الزمالة مثل مااني عبرتها من زمان.
-آسفة موبيدي ماگدر اعتبرك اكثر من زميل عن اذنك
عفتة ومشيت وتالي شوكت ارتاح من هذا الموضوع الحب موبيد الانسان ابد احس نفسي بدون مشاعر باااردة شلون يريدوني احب اووف.
اجتازجيت مجموعه ممرضات ادري شنو من كادر مخلصاتها بس يسولفن شوية وعاطت بيهن سليمة بس هي على راسي من صباحية الله يسولفن طشن كل وحده راحت لشغلها واجت سليمة الي.
-ها ولج لبيوة اشو تضحكين
-ابتسم بشوفتج سليمة الوردة.
-واضح ادري بيج تضحكين على سندس وهندس
-اي والله مخلصاتها گص من اول ماشافني عرفتهن يحجن بية
-خيبة ينغارن منج
-لا موهيج بس يحبن يحجن على الناس
-سمعتهن ترس اذني يتحرگنن عليج
-اوفف ناس فارغة بدال مانخلص شغلنة
-دعوفيج منهن هذا جهيد شيريد منج؟
-تناقشنة على حالة جديدة جايتة
-اممم جذابة يمة لاتجذبين علية احجي ترة كلها تدري بدكتور جهاد رايدج من زمان
-استغفرالله شنو هالحجي
-يعني انتي ماتدرين علساس
-ادري.
-من كونج تدرين بية ماتنطينة كلمة وتريحينة
-حجيت وياه وگتلة انت زميلي لا اقل ولا اكثر هذا راح يطلع شعر بالساني واني اگلة
-اريد احجي بس ادري بيج تضوجين
-احجي هسة بقى بس كلامج مامضوجني انطقي عيني
-يعني دكتور جهاد خوش ولد ليش رافضته ببالج احد
-تؤ
-جا ليش ماتريدينة
-الهواية من الله
-ودكتور حسن هم ماعندج هواية بية
-اعتقد راح يبدأ دوامي عن اذنج
-اذنج وياج دكتورتنة الصاكة.
عفتة ورحت للمنزع ضايجة من كلامهم ومتذكرة الماضي المرير شلون اني ما اخلص من سوالف الحب قحط نسوان بس اني موجوده.
تقرقرت عيوني بالدموع من ذكرت اسم حسن تغاضيت عن الموضوع وراي شغل داريد اطلع وما احس الا صوت شك الحيطان شني من حنجرة عند هذا الشخص.
احس نفسي دخت اذني صارت توجعني استدنت بالحايط شوية وطيح جفت على وجهي بلحظة ارتفعت درجة حرارتي اجتني الحالة.