رواية لبوة علي للكاتبة كفاية كاظم الفصل الثاني عشر
أزل...
من جنة صغار ولهذا يومنة ماعشنة بين عمامنة ولاسمعنة بيهم ابد حتى محد يجيبهم بالطاري أصلا صار الوضع عادي كولش حتى ماافكر بيهم
عشنة بين اخوالي وخالاتي لاشفنة عم ولاعمة...
معقولة فجأة يطلع رجال ويكول عمنة ادري وين جان نايم بالكهف وهسة گعد وانوب محد يفهمك السالفة بقيت جني طرطور.
-اكيد مو تايهة وراها سر جبير وحقد بعيون حيدر من ينجاب طارية.
-شني بيناتهم على شنو يحقد علية شمسويلنة.
أزل: -والله ما ادري وعوفي هذا الموضوع لاتجي امي
أحسها تتحس يلا كملي اكل اريد اغسل المواعين
غزل -اوفف شبعت شيليهن حتى نفسي انسدت من وراكم محسسينة احنة ولا شي
ازل-اطلعي من السالفة وعوفي هذا الحجي وروحي اقري احسلج ترة محد يفيدج
غزل: -هم صح محد يفيد
راحت أزل تغسل المواعين واني بقيت افكر شنو عمي منين طلعنا بلا طلع عندي ولد عم اهوووو
انوب يطلعون لزگه واحد يحط عينه عليه ويگول.
ما تطلع للغريب وينهي علية استغفر الله شلي بهلحجي اركز بقرايتي احسن...
خليت گدامي صحن فواكه وطلعت علاگه الحلويات
من جنطتي كل ما اقرا شويه ارجع اكل احس طاقتي تخلص من اقرا بين ما اني ع هالوضعيه سمعت صوت حيدر يصيح بعلو صوته يمة بس لاصاير شي نزلت اركض اشوف شكو وكفت على اول بأية من الدرج اسمع شيحجي...
حيدر -شلوووون تخلينه يدخلللل للبيتتتت نسيتييي
شسوووى بينهه وشلوون عشنةةةة من ورااااة شلوووون ددددخلتيه.
بسمة -لا ما نسيت بس يبقى عمكم مهما سووة بينة
حيدر-بالقنددرراا ما اعترررف بيييه هالگ يااااعممم يااا صخااام الصخمةةة طينةةة تطينننن هالچلللب
بسمة-يبقى عمك والة احترامة
حيدر -لاتگوليننننن عميييي لا احرگ البيتتتت ع رراأسسه
بسمة-نصي صوتك منا العالم شدگول علينا
حيدر-انعللل ابووو العااااالم لا تداااافعيله وووتنسن العشناه من وراااة...
بسمة-نصي صوتك خل نتفاهم مو كلشي يصير بصياحك العالي.
حيدر-شتفاهم هذا الموضوع بالذات ما اريدددد اتفاهمممم بببيييه وحگ لبووووة حيدررررر اذا حجيتتتي وياي بهذا الموضوع بعددددد ما اعرفجججج ولا تعرفينيييي...
يحجي بصوت عالي وجهة صار احمر شوية وطلع من البيت بقينه اني وأزل وحده تباوع للثانيه مثل الاطرش بالزفه باوعتلنا امي ورجعت دخلت لغرفتها...
-شفتي شصار بحيدر
-اي والله شفت تسودن
غزل -ازل برأيج شنو السالفه؟
أزل -والله يا غزوله كلشي ما اعرف حالي حالج بس اعرف عدنة عم ومايجينة ولا نروحلة
غزل-وهسه شلون نضل هيج نفهي ترة اني ما اتحمل الا اعرف
أزل -لا اكيد نعرف بس خل يهدأ الوضع ونفتهم السالفه
غزل-بله منو هذا اليفهمج
ازل-لو امي لو حيدر لازم نخلي حد يحجي النة قابل احنه جهال اكيد يحجولنة
غزل-اگص ايدي إذا حجو النة شي وهسه تشوفين
ازل-افففف اروح اكمل محاضراتي بعدين نحقق بالموضوع مو وكتة هسه.
غزل-بس لا راح تصيرين المحقق كونل أن شاء الله
ازل-اي ليش لا وبيش احسن من عندي كونل هسه دخل اروح اكمل المحاضره وبعدين ارجع انتظريني فاصل ونواصل
غزل: -هزيت ايدي وبقيت افتر شنو ومنو وليش هيج صار عصبي البيت صنطة وامي ولا تحجي شني هاي حتى محد تعشة لليل اجه حيدر شفته گاعد بالمطبخ يگلب بموبايلة اروح افهم منه السالفة عسى ولعل يحجي ويروي فضولي دخل اجازف واروح اسألة.
-احمممم شلونك حيدر
حيدر-هلا بغزالة تعاي عمري.
غزل: -رحت گعدت مقابيله سودة عليك حويدر ابد ماترتاح وجهك مدخن ملامحة تعبانة خليت شعري ورى اذني.
-احمم حيدر اريد اسئلك وتجاوبني مو تغلس بداعتهم
حيدر-اسئلي بوية
غزل-هذا الرجال صدك عمي؟ وين جان من زمان يعني مايجينة لايسأل حتى اني ما ادري بية هااا
وليش انت هيج صرت عصبي من اجانه يعني واذا اجة شصاير
حيدر-روحي صيحي أزل وتعالي اسولفلجن عن عمجن
غزل: - ثواني
رحت مثل الطلقه جفتت الغرفة
ازل: -گمزتيني شبيج خبلة.
-لا مو خبلة بس حيدر راح يحجينة على عمي الاجة الصبح گومي بسرعة
-گمت گمت اني الما اگوم امداني
نزلنة نتسابق على ساعة وحدة منة توگع على وجههة گعدنا مقابيله ع الطاوله حلگي راح ينشگ واخيرا راح اعرف السالفه.
حيدر-تردن تعرفن مو
هزينا روسنا ب اي طلع باكيت الجگاير سحب وحده شغلها وأخذ منها نفس و أردف بصوت ناصي.
حيدر- هذا الرجال عمي اخو ابوي الماعندة غيرة من جان عايش ابوي مو بحالنة ولا يريدنة والة اسباب ومنها زواج ابوي من امي.
من ابوي ازوج امي محد رضا على زواجه رادو هواي يخربون هذا الزواج بس ابوي ما نطاهم فرصه حب امي وتمسك بيها واستمر زواجه صرت اني صار عمري تقريبا ست سنوات...
امي جانت حامل بعزم جان الكل شاد وياها وبيوم صارت مشكله كلش جبيرة وي امي وبهاي المشكله مات عزم بطنها والدكتورة گالتلها احتمال جبير ما يصير عندج اطفال...
وبوكتها أهلها أخذوها ورادو يطلگونها و الكل ايد هل فكره بس ابوي ما رضا ضلت امي فترة كلش طويلة عد اهلها إلا أن ابوي جمع جم فلس واشتره بيت ورجع امي وبوكتها محد رضىا على ابوي وكلها صارت تحجي عليها رادوها فرصة لان يكرهون امي لان امي من عائلة على گد حالها ماتناسبهم مثل ما يگولون بس ابوي سوة عكس حجيهم وگام محد من أهلها يحجي وياه...
سكت وورث جگارة ثانيه سحب منها دخان بقوة زفرة وحجه.
-اهله گطعو علاقتهم وياه حاول ابوي يصالحهم بس ماجاب نتيجه استمر ابوي بمحاولاته وي اهلة خو ما يعوفهم بس هما قافلين بهاي الفترة توفه ابوة وهو ما راضي عليه...
صار محد يقبل يحاجي ابوي ورى فترة من وفاه جدي ابوي تمرض تقريباً سنه ما طول وتوفه...
من ورى ما توفه ابوي قسمو الورث واحنة ما النة حصة كلشي ما انطونة ومحد اجانه مهم غير بالفاتحه حالهم حال الناس الغربه گضت الفاتحة وبعد ماشفناهم ولاتواصلو ويانه ابد ورة موتت ابوي امي تمرضت كلش وصلت الموت وصارت حالتها حالة...
كمل الجگارة وشغل الثانيه وعيونيه غورگت
-احتاجينه فلوس للعمليه اخوالي حالتهم الماديه مو كلش زينه بوگتها رحت عليهم طلبت منهم يساعدونه بفلوس العملية ما انطونه فلس واحد...
وحصتنا بالورث اكلاها عمي راضي خلة عماتي يتنازلن اله واحنا ما انطانه شي...
ومن ذاك اليوم لهذا اليوم لا رحنا عليهم ولا اجو علينا ولا گال اخوي عدة جهال صغار شلون يعيشون منو الهم محد فكر بينة ابد متنه عشنة لهذا يومجن اجة يشوفنة...
غزل: -جنا نستمع ومنسجمين وياه وعيونه غورگت بحجت أزل بعصبية...
أزل -وشعنده هسه جاينه كون مايريدونة ومحد سأل علينة كل هاي السنين؟
حيدر-يريد نبريه الذمه وننسه الصار ونسامحة ويگول حتى ورثكم ارجعة الكم هههه تالي عمر من كونة رواحتنة وكبرنا.
جر حسرة وحجه مكمل كلامه.
-ابنه مات بسرطان الدم والثاني بالسجن بتهمه تجارة المخدرات ومرته حالتها مو زينه يمكن هذا السبب الخلاه يجي ويسأل علينة يمكن حس على روحة تالي شيبة وعرف روحة غلطان بحقنة وماكل حلالنة.
غزل -خطيه الله يسامحه...
انتفض وگام من مكانه صعد لغرفته وامي واكفه باب.
المطبخ جانت تستمع لحديثة مسحت عيونها اكيد تذكرت ذيج السنين وشلون تعبو وعانو جانت تسولفنة على حيدر دگول اشتغل وهو صغير رحنة اني وأزل حضناها گرصت خدودها حجيت بمرح...
غزل-شنو هذا كرز
أزل -لا هذا تفاح
بسمه-شو انتن ما تستحن شني كرز شني تفاح
يلا گدامي تأخر الوقت روحن نامن باجر وراجن مدرسة لاتستهترن
غزل: -راحت أزل لغرفتها واني رحت لغرفة الخطار طلعت المشط مشطت شعري...
باوعت عليه بالمرايه عود هذا هم شعر ساعة السودة علية ما عجبني ابد ما متساوي ساويته ما قتنعت بيه گلت لازم اجازف ما يلوگلي الشعر الطويل خل اگصه شيصير قابل إذا گصيته يطير نصي...
لزمت المگص وبداخلي تناقض اگصه ما اگصه اخر شي گصيته سويته ولادي لحد رگبتي...
هو ناعم وبيه شويه شگار صار يخبل نضفت الشعر الگصيته وگابلت المرايه كل شويه گالبته لجهه واخذ صور مليت الجهاز صور بس شيخلصني من امي إذا.
درت يلا احصلي كم رزاله سهله تهون...
رحت نمت گعدت الصبح لبست ملابس المدرسه ولفيت شال ع راسي تريگت بسرعة وطلعت ازل ماتداوم گلت خل امر بنور نروح سوة الشارع يصوصي فارغ بعد دنيا الصبح واني جاي امشي وگف گلبي من الخوف صحت بصوت عالي واني اهرول ولج يمة الحگيلي...
مادريت هذا الموقف التافة راح يدخلني بمدارات ماجنت اتوقعها.
------------
لبوة...
كل شي يدور بعقلي ما اكو اله جواب اول مرة يصير اختلاف بين عقلي وگلبي اصعب شعور هو التانقض بينهم.
هواي اسئله دور ببالي لازم اعرف جواب كل سؤال
من صارت الحادثه وياي كل شي تخربط بحياتي حاولوا بيت جدي يحجون وياي لكن جنت رافضه اشوف شكل اي واحد بيهم هما السبب بالحاله الوصلتلها والراح اوصلها.
يمكن اسامح الناس كلها إلا هما مستحيل يجي يوم
وانسه السووة وياي حبسي داخل غرفة مابيها.
شباك نسمه هوة ما تدخللها محاوله استفزازي
كل كلمه كل فعل من عدهم محفوظ بالذاكرة...
كل شي دامس...
غرفه شحب وجهي وقل صبري فيها
كل شي اسود مثل قلوبهم
لا احد يوجد يستطيع أن يخرجني منها
كدت أموت لا اتحمل كل هذا
كيف استطيع ان اخرج من هنا؟
الا يوجد أحد يفتقدني؟
الا يوجد شخص يقول اين ذهبت هذه الطفلة الصغيره؟
سوف اموت لا يوجد شيء استطيع اكله
حتى الهواء بدأ ينفذ
أسمع أصواتهم تتعالى خارج هذه الغرفه.
اذهب بخطواتي العاثره أطرق ع الباب طرقات
تفوق طاقتي
الا أحد يسمعني
افتحوا هذا الباب
ارجوكم اخرجوني
لا استطيع اتحمل اكثر...
لا احد يلبي ندائي فقط حديثهم يخترق مسامعي
لماذا كل هذا الظلام؟ الا يوجد نور؟
عندما يتأخر أحد الأطفال باللعب معي يأتي أحد
من عائلته
ويقول له: اين انت تأخر الوقت قلقنا عليك ثم يمسك بيده ويذهبوا معا...
لماذا انا لم يأتي أحد يفتقدني؟ لماذا ابقى وحدي؟
تذكرت ليست لدي عائلة.
لا ليس كذالك لدي هو بمثابه عائلة
لكنه رحل!
لكن وعدني يرجع عليه انتظاره
نعم انتظر
لكن تأخر كثيراً سوف اموت
غرقت في ذالك الظلام ولازلت بداخله
واكفة بنصهم ومكتفة ادية الكل متفاجأ من وجودي يمهم ويريدون يعرفون شنو الكلام الراح احجية حجيت برود واني موجهة سؤالي لعمي سلطان الگاعد بكل شموخ ويلعب بالسبحة باصابعة...
-ليش جنت تحبسني بذيج الغرفه شمسويتلك؟
رد علية برود وحقد بعيونة واضح وضوح الشمس او يمكن اني اشوفة هيج...
سلطان -حتى تتادبين وتسمعين الكلام وتطيعيني
حالج حال غيرج بيش انتي احسن من نسوانة وبناتنه
لبوة-بس اريد اعرف يا كلام هذا الما سمعته!
سلطان -ماعدنه بت متمرده مثلج حتى ولدنة تسمع الحجي وتنفذ وهي ساكتة الا انتي جسرة وگحة
لبوة-ههههه ليش اني جنت متمرده؟
سلطان -جسرة عنودية وكيحة راسج يابس ما تطبقين الكلام تريدين تمشينه بمزاجج عنادج وعصبيتج عمن عليج ما جنت اريد اكتلج ولا احجزج بس اسلوبج يخليني اتعامل وياج بهاي الطريقه
لبوة-ليش ماكو طريقه غير هاي جنت تگدر تفهمني
تحتويني وتعلمني الصح من الغلط واني جنت طفلة بسرعة اخذ...
ضحك باستهزاء يباوعولي بنظرة مليانه حقد وانتصار...
سلطان-ما يفيد وياج انتي وحدة كلشي مايفيد وياها راسج يابس ايبس من الحايط وشايفة روحج من يوم يومج لاتحترمين ولا تخضعين لعم لسانج طويل وتراددين...
بس شي واحد يخليج تنسين اسمج واخليج تتوسلين هههه استخدام نقاط ضعفج ضدج اذكرج بيهن خاف نسيتيهن خل اعددهم الج...
لبوة: -يحجي ويعدد باصابعة ونضراتة كلهن استفزاز
شبت النار بداخلي احسة يعيرني ومتشمت لحالتي النفسية إلى الكل يعرف بيها.
سلطان: اولا: المجان المغلوق.
ثانيا: الضلمه
ثالثا: الدخان، ريحه الجگاير تسببلج قلق نفسي
تتغيرين مية وثمانين درجة بس تشمينها...
لبوة-وانت ما قصرت استغليت هذا الشي أبشع استغلال دمرتم طفله بعمر العشر سنوات
شستفاديت هاي ييسمونهة نذالة من طلع قوتك
علي طفلة اصغر من جهالك...
سلطان-ما جنتي طفله لا بتفكيرج ولا بتصرفاتج جنتي لبوة من صدگ ما لاحضت بيج عقل الاطفال
عنادج وصلج لهاي الحاله لو طايعتني ما جنت
قسيت وياج بهل شكل...
لبوة-قسيت!؟
هههههه انت بهذا الشي كرهتني باصلي وكرهتني بيكم كلكم كمت اقرف من كلمة قرابة العشيرة كلها اكرهة وحاقدة عليها بسببك...
زين وهسة شنو الشي الاستفاديت منه؟
سلطان-ردتج تكونين مطيعه حالج حال غيرج بس هذا احنة عدنة المرة تسمع كلام الزلمة وتحطة على راسها.
؛جان من يجي العيد الكل يدنگ يحب ايدي كبار وصغار الا انتي امد ايدي حتى تحبينها وانتي بكل عين صلفه تفشليني جدام الكل حضرتج تستنكفين مني بهاي الحالة انتي الجبتيها الروحج وخليتيني اكرهج واكتلج.
لبوة-ليش هذا هم حاسبة سبب! زين وين وصلت بحقارتك وتفكيرك هذا؟
سلطان-ردت اوصل لنتيجه ردت اكسرج وزوجج لياهو الجان وتصيرين مرة مطيعة تكنس وتمسح وتصيح تأمرني امرر بس انتي ماتنكسرين مانطبقت عليج القاعدة...
درت وجهي مخاطبة عمي الثاني ردت اوصل لخطابي وياهم لشي بداخلي.
لبوة-زين وانت الثاني اني مو بت اخوك ليش ما ساعدتني جنت تشوف بعينك وتسكت ضرب
إهانة مافكرت مرة تفتحلي الباب شصار لو واكف
وياي...
طلال -مثل ما گال ابو مازن راد يادبج لأن ماكو شخص يادبج اهلج وماتو تريدين تضلين على خر اذانج وتلعبين شاطي باطي وتسودين وجوهنا جدام الوادم...
لبوة-الله شنو هل إنجاز زين وهسه تادبت مو وخربت سمعتكم الجميلة؟
طلال -ابو طبع ما يغير طبعه وكل ما تكبرين تتخبلين بالزايد
لبوة-واووو يالله شهل كلام الحلو ارفع القبعه لحضرتك سوري ما لابسه قبعه جان رفعتها...
-وانتي زمرد صح اني احبج واعزج بس ليش ما حاولتي توكفينهم عند حدهم من تشوفين معاملتهم
وياي انتي مو امهم...
زمرد-جدة تعرفيني ما إلى جلمه محد يسمع مني شگد احجي بس شيفيد بالزايد واني جنت دومني مريضة وطايحة
لبوة-هذا هم عذر حلووو مقبول منج مو اني اعرف البير وغطاه.
سلطان -ما عدنه المرة تمشي جلمتها علينه حتى لو جانت امنة
لبوة -اهااا ومنو المشت كلمتها وكملت دراستها ودخلت جامعة وصارت دكتورة
قهقه بطريقته الحقيرة قهقهات متتاليه...
سلطان- بس شني الفايده دكتورة بيها توحد ما تختلط بالناس ما تكض شي بيدها ما تبقى بمجان بيه هواي ناس بدال هذا حجيج ودگولين اني دكتورة وتتباهين بروحج روحي عالجي روحج بالاول لايجي يوم وتتخبلين فرد مرة.
احس حرارة گامت تطلع مني حيل استفزوني بس مو وقت الكلام وياهم يجي وكتهم.
فاطمه-لهنا وكافي انهو هل مهزله انتم خطئتوو هواي وياها هذا بدال ما تقدمون اعتذاركم وتگلولها ابرينه الذمه عمي بكل عين...
سلطان -ابو ادهم سكتتت مرتتتك وگلها لا تتتدخخل
فاطمه -سكتتتت سنيننن وهسه هم تريدوووني اسكتت بيا حظ بيا بخت بت اخوكم المفروض تصيرولها سند وظهر مو صرتولها كسرة ظهررر...
لبوة- هذا الكلام خلص وقته، وبعدين وين وصلتوو وخصوصاً انت سلطان ابنك مشمور بالسجن ومرتك
من دكتور لدكتور أن شاء الله ماتلگة الها علاج...
وانت صدگني راح تعيش اسوء عيشه راح تطلب الموت بلسانك راح يجي يوم تتوسل تشوف وجهي قبل لا تموت حتى ابريلك الذمه...
لكن مع الاسف ما راح تلگاني راح افضل الغريب عليكم دائما وابدا ولاتنتظرون مني شي حتى كلمه لا تنتظرون مني...
شكرا الج فاطمه ما راح انساج ولا راح انسى كل كلمه منج راح تبقين بگلبي وين ما رحت...
وشكرا الج سمر لأن اعتبرتيني مثل اختج شكرا لحسن معاملتج وانت ادهم شكرا الك وانت الوحيد إلى تستحق اعتذر منك تعبتك هواي وتحملتني هواي
اتمنى الكم حياه سعيده بعيده عن المشاكل...
غمضت عيوني تقربت لزمرد بست راسها تلمست
ايديها التجاعيد ماليتها أردفت
-راح تبقين بگلبي وعقلي رغم زعلي منج بس ما راح أحقد عليج ابد...
درت وجهي لجهال سمر فتحت ايدي أجه إلى ابنهة حضنته بست اديناته همست...
-ما راح انساك وراح يجي يوم اشوفك وين صرت
ديربالك ع امك.
رفعت راسي كلها تباوعلي باستفهام مستقربين من
جيتي الهم وطريقة كلامي وياهم وفتحي بالهموضوع بالذات حجت فاطمة مستفسرة...
فاطمه -شراح تسوين؟
لبوة-الي بي خير يصير.
اباوع لسمر عيونها غورگت نضراتها تترقبني سويتلها بعيوني رسالة شكر باوعتلي ورجعت باوعت لابنها طلعت اديه من الگماط تقدمت عليها بستهن اخذت نفس منهم ودعته بنضراتي...
رجعت باوعت الهم بنضرات حقد أردفت
-رب العالمين ما راح ينسى شي ولاتنسون
الحوبه تبطي بس ما تخطي
طلعت من البيت باوعت عليه من الخارج كاني أودعه
اخر مرة ادخله لهنا وراح ينشال من الذاكرة...
القساوة التعرضتلها داخل هذا البيت مو هينة على الكلام السمعتهة منهم تعذيبي النفسي داخل جدران
هذا البيت طفولتي الضاعت ما شفت منها شي...
كل شي راح ينتهي اعوفه ورة ضهري
ابدي حياه جديده مكان جديد ناس مختلفة
لكن قبل كل شي أواجه مخاوفي...
خلصت من الخطوة الأولى اجه وقت الخطوة الثانية رحت لبيت الملا اسحب نفسي سحب بس لازم اخلص من هذا الحلم المرعب والامل المترسب بداخلي اشوف وين يوصلني دگيت الباب طلعلي الملا.
-السلام عليكم
الملا-وعليكم السلام خو ما بيج شي
لبوة-مابيه شي اريد احجي وياك
الملا-تفضلي بويه
لبوة-زاد فضلك ملا نحجي برا افضل
الملا-خير بويه
لبوة-كل خير ملا
جريت حسرة أردفت
ملا رايده منك شغله اتمنى ما تردني
الملا-افاا اني اردج ابشري عد عيناح
لبوة-رحمه الله والديك ما تقصر، بما انك علاقتك قويه بيهم فأنت الوحيد إلى يگدر يجاوب على اسئلتي غمضت عيوني بتعب أردفت.
اخوالي وينهم؟ وليش محد سأل عني ولاحاولو يتواصلون وياي؟
-الملا: والله يا عمي ما ادري ليش بس العرفه كلمن ملتهي بروحه
لبوة-ليش هذا عذر؟ الشي الوحيد الباقي من اختهم ما حاولوا يفتقدونه! اريد عنوانهم؟
-ما انصحج تروحين الهم
-ليش
-لو يريدونج سألو عليج عوفيهم
-حتى اريد اشوفهم واخليهم گدام الامر الواقع عندك غير هذا السبب
-انة اعرفهم ناس ملتهية برواحتهم وبفلوسهم وشغلهم.
-الاظفر مايطلع من اللحم على كل حال ابقى بت اختهم
-الله يسهلج
-مشكور ملاتنه
اتصلت بدكتور محمد ياخذلي اجازه...
-هاا بنيتي لبوة بيج شي خيرج وي الاجازة
-مابية شي بس عندي شغل
-متأكدة ماكو شي
-وداعتك مابية شي
-خير إن شاءلله واي شي تحتاجينة اني براس الخدمة
-مشكور ماتقصر الرب يوفقك
حزمت امري لازم اروح مامنها اخذت العنوان وتوكلت ع الله أجرت تكسي انطيته العنوان
مشت السيارة مسافه مو كلش بعيده...
وكفت السيارة انطيته الگروة ونزلت گدام بيت تنكسر رگبتي إذا اباوعله اربع طوابق بيت راقي وفخم والمنطقة كذالك راقيه...
بقت متردده اخاف يفشلوني وينكرون وجودي ليش ينكرون وجودي قابل بت زنا استغفرالله سميت باسم الله ودگيت الباب طلعلي شاب يطلع عمرة بالعشرين باوعولي باستغراب أردف.
-تفضلي محتاجه شي؟
-هذا بيت منير السرحان؟
-اي هذا منو حضرتج؟
-انت شتصير منه؟
-منير يصير جدي الله يرحمه
-ليش هو ميت؟
-اي بس ليش تسألين!
-لا تستعجل على رزقك تعرف كل شي، اكول منير يصير ابو ابوك لو ابو امك
نفخ بضجر واردف
-ابو ابوي وتاليتها وياج شتريدين
-ها يعني انت ابن خالي
-ابن خالج ليش انتي منو حتى ما اعرفج عقلج بيه شي انتي
-دنجب ولي من گدامي
دفعته ودخلت بقه وراي مثل المنصدم من فعلي
مشيت ليگدام دخلت للمطبخ يودي للصاله مو
صاله يگول قاعه على كبرها بقيت واگفه بدايتها...
شفت بيها تلث زلم كبار يطلع عمرهم بالاربعين واربعشباب عمرهم عشريني ونسوان تلاثه وبنات شابه وأطفال بصفحة يلعبون عائلة جبيرة الله يسلمهم...
الكل وجه نضره باتجاهي احاول اركز بوجوهم
باين عليهم الخير الغرور والتعالي، شكلهم مو غريب عليه رغم اول مرة التقي بيهم اكو بينة شبة نهض رجال يطلع عمره نهاية التلاثين واجة باتجاهي.
- تفضلي منو حضرتج؟
بقيت ساكته اباوع بوجوهم وعلى لمتهم الحلوة تخيلت نفسي بينهم وحالي حالهم بس وين اني منبوذة محد يريدني ولا يسأل علية دخل الولد الفتحلي الباب وجهة يضحك...
-اني اصير ابن خالها يعني تصير بت عمتي ههههه
رفع أيده باستسلام وحجه
مدخلني هي هيج گالت والله
بانت علامات الصدمه والاستغراب على وجوه الكل
گامو على حيلهم وصارو گبالي حجة واحد بيهم مبين الجبير.
-انتي منين؟
كتفت ايديني أردفت برود.
-حفيده منير السرحان بت اختكم نجمه
فتح عيونه بصدمه يحاول يستوعب الصار الكل
هزيت ايدي وكملت.
-نجمه اختكم المحد سأل ع بنتها الشي الوحيد الباقي منها محد منكم حاول يشوفها وين عاشت
ماتت شجاي تعيش محد منكم فكر ليش كل هذا الجفاء اريد منكم سبب مقنع يريحني...
الكل سكت جنت منتظرة منهم كلام يبرد گلبي ويمنعني من القرار الراح اتخذة لكن للاسف الكلام السمعته كان مثل الصاقعه النزلت ع راسي خلتني مصرة على قراري شگد شفت ناس بدون احساس بس مثلهم ما شفت جمعت كل حيلي حتى استوعب كلامهم...
واهسنه
مثل شايب جزه العمرين
وبعد ماله نفس يركض ورة احلامه.