رواية لبوة علي للكاتبة كفاية كاظم الفصل الثالث عشر
لبوة...
اصعب شي بالحياة الخذلان من تشوف نفسك تنخذل من الكل جنت بانية امال ومخلية بالي شغلات حلوة ابتسم لا إراديآ من افكر بيها جنت اكول راح الگة اخوال يحبوني ويحتووني جنت اخلي الهم اعذار وأسباب ومبررات عديدة لأشخاص مامفكرين بية ولاحاولو بيوم من الايام يعرفون اخباري...
هواي اكو اسئلة من الصعب نلگة الجواب الهن ليش كل هذا اسئل نفسي ليش محد يتقبلني ليش دائما منبوذه ليش عزولني عن العالم مستحيل انسان ينعزل الا اذا شاف المحيط ممتقبل وجودة...
لا أهل ولاعمام واخر احتمال هما الاخوال ليش محد بيهم عوض مكان اهلي شي اكيد محد يأخذ دور الأهل بس الأقارب من بعدهم يجي الهم الدور...
ماجنت متخيلة ردة فعل اقرب الناس لامي بلة عمامي لاينفعون لاطبخ ولاشوي بقة احتمال الثاني خوالي بس هم طلعو انگس منهم...
غبرت روحي وبلعت ريگي من سمعت كلام احد اخوالي حتى مااعرف اسمائهم.
-وهسه شتريدين شعندج جايه تطالبين بورث امج؟
احس انضربت على راسي من سمعت هذا الكلام
من الصدمه ما اعرف شحجي اريد استوعب الكلام ويدخل بعقلي حجة كاز على سنونه...
-مو احجي وياج جايه تطالبين بالورثثث مووو.
حجه الكلمة الأخيرة بصياح رديت بخيبه أمل
-انتم كلة عدكم فلوس منو گال اني محتاجة فلوس
-اذا ما محتاجة فلوس شعندج جايتنه؟
-ليش انتم مو اخوالي مو تصيرون اخوان امي
لو اني غلطانه
-امج ماتت والله يرحمها
- متأكدين انتم اخوالي لو العنوان غلط اي اكيد واضح غلط
-لا ما غلطانة العنوان صحيح بس شني الغاية من جيتج بهذا الوكت بعد كل هالسنين
حجيت والغصة بگلبي...
-المفروض اني الاسئل هذا السؤال وينكم كل هذا الوقت ليش محد منكم سأل عليه؟
ليش عفتوني عد عمامي أكثر من عشرين سنة؟
رد برود قاتل واستهزاء واضح كولش...
-بت وعد عمامج احنةشعلينه بيج هما يعرفون شلون يربوج
-اذا هما عمامي فانتم اخوالي ماكو فرق بينكم
-بويه انتي متوهمه اكو هواي فرق واحنة ما ردنه
ندخل بتربيتج هما الهم حق أكثر من عدنا
-ليش تعتبر هذا تبرير الكل هاي السنين العفتوني
بيها.
-شوفي من الاخير گولي شرايدة لا دوخينا واحنه
دايخين
رديت بنبرة حزن وخيبة امل...
-ما ردت شي منكم ردت احس عندي ناس تجمعني بيهم صله قرابة حقيقيه ردت اتلمس شعور الاهتمام اليجي من العائله اعيش اجوائها...
لكن مع كل الاسف خاب ضني جنت اگول ليش ماعندي اخوال ليش ما يجون جنت دائما اطلع اعذار واكبر عذر طلعته يمكن ما يدرون بوجودي...
جريت حسرة وأردفت مكملة كلامي...
حرامات الساعات الخلصت واني افكر حياتي وياكم راح تكون مختلفة لكن طلعتوا ما تفرقون شي عن عمامي يمكن لو جنت عايشه وياكم جان عشت الاسوء من العشتة
أردف بعصبية يأشر باصبعة بتهديد...
-وهسه إذا خلصتي هاي المهزله تگدرين تطلعين تندلين الباب الدخلتي منه
ما اعرف شلون اوصف شعوري بهاي اللحظة بس العرفته كرهت كل شي اسمه أقارب نعلت الساعة السودة الاجيت بيها الهم ودكيت بابهم...
الكل يباوع محد حجه كلمه وحده لا نسوان ولازلم ينضرولي بنضرة استنقاص ما تحملت هذا المنظر تفلت عليهم وطلعت...
طلعت من بيتهم الهوى ضاگ اريد اتنفس ما اگدر احتقرت نفسي لأن خطيت هالخطوة جنت متخيله من اروحلهم يرحبون بيه ترحيب كل ساعه اتخيله شكل ابد ما توقعت هذا الرد من عدهم طردوني قبل لا احجي شي...
نار بعيوني تلهب دموعي ما تقبل تنزل احس
انكسر شي بداخلي روحي من الهضم توجعني وگلبي من الحزن فززني.
مشيت مسافه احس مو بوعيي بعدني بأثر الصدمه
اكبر صدمة محد يتقبلك ولا يسمع منك شمسوية حتى احصل كل هاي القسوة...
طحت بمستنقع مامنة طلعة كرهت الأشخاص الموجودين بيه وكرهت نفسي وكرهت القدر الحكم عليه العيشة وياهم...
اخذت تكسي ورجعت للبيت شگد ندم بداخلي
رديت من الهضم باب اهلي ما عرفه...
البيت هو الامان وهو الملجى من العالم وخباثتها.
العالم مليان حقارة مااملك شي بهاي الدنيا الواسعةبس هذا البيت المتواضع المني وتحملني
احسن منهم بهواي...
افكار تتناطح براسي صفيت بدون امال اخر امل إلى احترگ سؤال يطرح نفسه المن باقية بين ناس متحبني ناس ماتتقبل وجودي محد بيهم يريدلي الخير...
زين اني شحصلت من وجودي بهذا المكان الأسئلة هواي والجواب واحد هو الابتعاد واستعادة ماتبقى من القطع السالمة الموجودة بالداخل...
من هذا اليوم قررت اسافر واعوف كل شي وراي احتاج ناس جديده بلد مختلف ذكريات جديده، كان عندي خيط امل يحتووني ويصيرون إلى عائلة ياريتهم گطعو هذا الخيط گطعو واهسي بالدنيا...
من بعد ما رحتلهم مالي واهس بشي لا بدوام ولابغيرة حتى مالي خلگ احجي وي نفسي تندمت ع كل كلمه حجيتها وياهم، ما ادري شمسويه حتى تنسد بوجهي من كل الاتجاهات وكأني انسان منبوذ محد يتقبل وجوده بالرغم تجمعني بيهم صلة قرابة قوية...
أدركت شي أن غير الأهل محد يتقبلك ولا احد يحبك بهذا العالم اكثر منهم محد يحس بهذا الشي الا عند خسرانهم راح نعرف قيمتهم وأهميتهم بحياتنة العائله وجودهم وطن والماعنده أهل ما عنده وطن
گمت أجبر نفسي اروح للدوام ومن غير الإجازات
الاخذهم واليوم الما اروح بيه للدوام اخلصة گاعده بالبيت اضم الصورة لگلبي واصفن بالفراغ
صرت من كثر الهدوء إلى اني بيه صرت اسمع صوت الهوى اليمر من عندي ابقى احسب دگات گلبي...
أما إيلام گمت اقلل من روحاتي اله صرت اروح اله بليوم مرة ومرات ما اروحلة اريد اتعود ع غيابة لأن إذا سافرت ما اگدر أخذه وياي...
گمت اضغط على نفسيحتى ما اروحله كل يوم، صرت اعيش حرب نفسية ما الها نهاية متأمله يجي يوم وتعلن طبول هذه الحرب لكن للأسف بقت الحرب مستمرة...
اليوم الما اروح بية ل إيلام ابقى اتخيله صوته يرن بذني 17سنة أو أكثر ما مر يوم ما واحد ما شفتة بيه لو لعبت وياة طفولتي خلصتها يمه جان هو صديقي الوحيد بوسط وحدتي، صرت اتخيلة حتى واني بالدوم كل شويه اتصل بالملا اطمن عليه...
-ملا انطية اكل كل تلث ساعات
-صار
-ومو تغفل عنة خلية ببالك
-لاتهمين بية عينة علية والفريخات هم اوديهم علية
-مشكور ملا.
احس اكو شي انسرق من داخلي أي هو الامل الإنسان عايش على الامل واليوم انسرق والسارق ماهر ماخلة اثر العثور علية...
صرت اخلص الوقت صافنة حتى بوقت شغلي تأخذني الصفنه افز على صوت الممرضين...
-دكتورة ازيد الجرعة لو ابقيها على كميتها
-هاا شنو حالتة زادت سوء
-لا دكتوره حالتة مستقرة تقريباً بس انتي هيج گلتي
-شوكت گلت حالتة مستقرة
-شنو دكتوره غير انتي گلتي قبل شوية اطلعي على التقارير اذا تحبين.
-هاا اي تذكرت قللها بالتدريج مو فرد مرة
دائما انحط بهيج مواقف بالي مو وياي ابد
بديت اشتغل على موضوع سفري بعد عرس زينه اسافر كلها شغله شهر شهرين وابدي حياه جديده
وبيوم جنت طالعه للحديقه بوقت استراحتي بيدي ملف ماخذته وياي مدنگه راسي اقرا بيه ما احس الا انرگعت بالحايط راسي انضرب بشي حاد...
غمضت عيوني بالم بقيت واگفه بمكاني، اجت بخشمي ريحه عطر رجالي ممزوجة بريحة جكاير...
لزمت راسي بالم و فتحت عيوني جان اشوف حيدرا مقابيلي لدرجة داخلة بيه بسرعة ابتعدت عنه عگدت حاجبي والله عبالي حايط اردفت بعصبيه...
-شبيج ما تشوف گدامك؟
أردف برود
حيدر -هو منو المايشوف گدامه ترة انتي الضربتي بيه مو اني
رفعت حاجبي متخوصرة واحجي.
لبوة-لا بلة منو يگول اني الضربتك؟
حيدر -اني اگول عندج شك بكلامي
لبوة: -حجه الكلام ورفع تك حاجب...
-جنك حايط كسررتني تكسرر وهذا مسدسك شگ رراسي شكوو شايلة وياك الضاهر حتى من تنام تحطة جوه المخده، وهسه و لو صاير بيه شي من وراك منو يفيدني أنته...
حيدر-هذا شغلي و انتبهي لطريقج هالمرة انضربتي بالحايط ثاني مرة تنضربين بسيارة لا سامح الله
لبوة-شنو هاي عود نصيحة من عندك
حيدر-تگدرين تعتبرينها هيج
لبوة: -خليت اديه ع راسي وصحت
-يمه راسي چني فقدت الذاكرة من وراك يعني الا تحطه بخصرك.
حيدر-اذا شخص بمكانج انضرب بيه ما راح ياثر وجوده بس أنتي لأن...
لبوة-كمل گول شبية اني ها، اول شي اني جنت مدنگة لهذا السبب انضربت مو قصه طول افتهمت...
حيدر-يابه افتهمت والحمد لله على سلامتج
لبوة-رديت من ورة خشمي، الله يسلمك
حجيتها ومشيت ومن بعد هذا اليوم كثرت الصدف
التجمعنه لاكن احاول ما احتك بيه ونفسيتي ماجانت تسمحلي اختلط بأحد...
------------------
زينه...
ثاني يوم اجت ام علاء واخته ومرت إخوة مبين ع وجوهم ناس متواضعه وبسيطين طريقه كلامهم تجنن مملوحين حسيت نفسي اعرفهم من زمان ما حسيت بتقيد وياهم انطلقت بالكلام وامي بقت بس تخوزر بيه ورة يوميين تمت الخطبة الكلامية وبعد اسبوع گطع المهر
التوتر يحجي الف شسوي بهذا الاسبوع ما عندي غير لبوة تنقذني رحت للدوام متأخرة بين
ماكملت شغلي شفت لبوة من بعيد گاعدة وحدها...
صافنة بالبعيد فتت گلبي فت ما تقبل تحجي شي والوقت كلة صافنه حتى من واحد يحجي وياها ما تسمع اله يرجع الكلام مرتين، رحت يمها من شافتني گامت على حيلها تستطنع الابتسامه اردفت...
لبوة-هلا بزنو شلونج گلبي
زينه-الحمد لله انتي شلونج
لبوة-تمام
زينه: -اردفت بعصبيه
-لا مو تمام لبوة احلفج باسد الزهرة الدائما تحلفين
بية احجيلي شبيج
لبوة-لج داده ما بيه شي متوهمة انتي
زينة -لا ما متوهمة متأكدة بيج شي.
لبوة-هسه عوفينه من هذا الخرط وخل نجهز لخطبتج ما ضل وقت ولازم تأخذين اجازه
زينه-راجعتلج من أخلص الخطبه ولو اني لو انتي بس هسه صدوك شنسوي
لبوة-خل نسأل تبارك عدها خبرة ترة اني هم كولشي ما اعرف بسوالف الاعراس
زينة: -رحنة لتبارك وگامت تجيب وتحط لعبت رواحتنا لبوة سفطتها راچدي ع ضهرها خسفته الها خسف.
تبارك: -اخخخخ شبيجن فوگ ما اعلمجن امداجن
لبوة: -ترة هذا اسمه لعبان نفس صوچنة اجينه الج يلا زنو امشي نبحث.
زينة: يلا ولج ماضل وكت
فتح عين غمض عين شفت نفسي گدام المراية بمكياجي البسيط البارز ملامحي مطلع شكلي جدااا جميلةةةة...
انداريت اشوف بدلتي الفضية منفوشه من جوة ومن فوگ دلعتها مو كلش چبيرة محفورة
من الضهر والردن بادية من نص الزند ليجوة صايرات تور خفيف منفوش، علاء اختارها الي.
ماخذة الغرفة رايحة راجعة اسمع صوت گرايبنة جوة جايين امشي و اطگطگ باصابيعي من التوتر ما اميز شعوري بين الخوف والقلق مع ذلك ممزوج بفرحة چبيرة...
يمكن هاي المشاعر تمر على كل عروس ارجع و اتمايز نفسي گدام المراية وبداخلي قلق اخاف لبوة ما تشاركني بهيج مناسبة لأن وضعها ما يسمح ولا مرة حاضرة هيج مناسبة اوففف...
مااگدر اتخيل نفسي وهي مو وياي شاركتني كل ايلامي الحلوة والمرة معقولة ما تجي رغم حيل.
احتاجها لكن عاذرتها مقدره وضعها الصعب...
الجو شبه هادء ما خليت امي تعزم هواي ناس
اباوع ع وقت إيست تجي دمعتي بطرف عيني البنت بهيج مناسبة تحتاج امها أو واحد من عائلتها وياها وهيه اعتبرها هيج طول ما اني فوگ امي ما صعدت ولا أدخلت بشي يخص خطبتي كلة اني والبنات جهزناه حيل يخز بخاطري لكن وجود لبوة يكفي...
شوية وانفتح الباب رفعت راسي انبهرت من المنظر سبحان الخالق دخلت لبوة لابسة فستان بينصل مشمشي ناصع ومن الوسط بية فتحة صغيرة وردنه منفوشة وشعرها گالبته ع جها مكياجها البسيط مطلعها جدا جميلة...
احلى بنت شفتها لحد هاي اللحظه هي لبوة يمكن لان صديقتي هههه گمت ع حيلي أردفت بابتسامه...
-اللهم صل على محمد وال محمد شهل جمال وحق
اسد الزهرة تسطرين سطر.
لبوة-اني الأسطر لو انتي ماشاء الله عين الباردة عليج هاج هذا اسوار البسية من الحسد
زينه-ولج خافي ع روحج لا تنلزگين بصاروخ
لبوة-ما انلزگ لا تهتمين يلا بله هسه شلون تطلعين وهاي الشكول جوة، احسج متوترة مو...
زينه-اي والله حيل متوترة بس هسه لا، عبالي ما تجين
لبوة-شكم زينه عندي حتى ما احضر خطبتها
زينة: -لبستني أسوار بية شذر ازرق رفعت راسها باوعت بعيوني أردفت
-لبوة: بنيتي كبرت وصارت عروس هههه.
زينة-ليش تحسسيني انتي اكبر مني بعشر سنوات
لبوة-مو قصه عمر بس احسج طفلة بريئة كولشي ما تعرف بديت وياج من الصفر ولهسه انتي بعيني
ذيج الطفله التمشي وراي وين ما امشي
زينة-ولو يرجع بيه الزمن أتمسك بيج بكل حيلي
عيونها نملت بدموع حسيت بهاي اللحظة التجمع بين الام وبنتها بهيج مناسبة والله من صدك احس عدها مشاعر الام رغم محرومة منها، شويه ونفتح الباب لا والله اندفر دخلت تبارك شايلة ابنها معصبه.
تبارك-ها لبوة الچلبة ليش عفتيني ما نتضرتيني تفووو عليج يا حقيرة
زينة -دگولي يا الله علكيفج داده اعصابج شبيج
مچلوبه علينة
تبارك -چلب الچلبچن أن شاء الله، اللهم صل على محمد وال محمد ولجن شطالعات عين الحاسودددد بيها عودد
زينة -وانتي هم ما مقصرة دادة تطيحين الصخل
تبارك -ها ولج لبوة ليش هيج عمي على كيفج ويانه گنالج حلوة بس مو هيج راح تكسرينه.
لبوة-الضاهر تريدين واحد يخبطبخ مو ابنج بحضنج عوفي هاي السوالف تولي.
تبارك -يلا بلا لغوة زايدة هاج لبوة الزمي ابني وانزلي قبلنه
لبوة-ما اگدر انزل بيه خاف يوگع مني من انزل انطينياه
زينة: دخل ننزل كلنة سوى احسن
نزلنه تلاثتنا والانظار توجهت علينة وبدت الصلوات والهوسات تحتل المكان...
گعدت ع كوشه ولبوة اخذت ابن تبارك وراحت بنهايه الصالة الكل اكلها اكل بنضراتهم شوية واجو دخلت أمه من شافتني گامت تصلي على النبي مانزلت عيونها مني هيه واخته ومرت إخوة...
-بعد شيريد عليان شلون بنية جكليتة مصغولة وعلي
-تسلمين من ذوقج
-اغديلج فدوة.
تم العقد الميمون واسمع موافقته احس بفراشات بداخلي من الفرح شويه ودخل علاء وعيونه اكلتني اكل والإبتسامة ع وجههة وغمازاتة زايدات ابتسامتةجمال وگف بصفي وعيونة دور بملامحي لبسني الذهب وخلصنا المراسيم گالت أمه خل ياخذون صور وحدهم...
اخذنه طن لقطات وأكثرها كانت جريئه بوخت من الخجل والمصورة يمنه وهو ولامهتم جرني من خصري لزگت بيه لزم راسي من ورة مال رأسه حيل.
واخذني بقبلة عميقه انگطع الهوة صرت اضرب بيه الا وخر والمصورة لازالت تاخذ لقطات...
طگها بضحكه واردف
علاء-بويايييي مو بوسه ضيم بعد وحده
زينة-لا شنو كافي لا تصير طماع كافي حباب
دنگت راسي بخجل باوعت على المصورة الضحكه شاگه حلگها رفع راسي حجة موجه كلامه الها
علاء-خلص تگدرين تطلعين.
زينة: -عيونها علينا اكلت علاء اكل طلعت بقيت مركزه وياها ما احس الا رأسه برگبتي وانفاسه الحارة تضرب بيها وشواربه تبزز حسيت بقشعريرة
اردفت خجلانة...
-علاء كافي اطلع هسه شيگولون
علاء-هو منو اليگول مرتي وحلالي طزززز
زينة-بعدني ما صرت مرتك عيب عليك الله اطلع
علاء-بوسيني واطلع
زينة: -حجيت بتوتر
-وين ها شبوسك لا يصوحوك روح روح
لزم وجهي بثنين اديه وصار يبوس بيه كل بوسه ام الطگه اخير شي عض خدي وطلع...
عدلت روحي و طلعت وراة وبدت الهوسات
-هاي الرادها وهاي التمناها بس اشر عليها ركض جبناها
شكد هوسات اول مرة اسمع بيهن راحو گرايبنه بقو بس أهله اباوع بالشكول ادور ع لبوة من خفت الهوسه اجت اول ما شافتها ام علاء گامت تصلي على النبي...
ام علاء-فدوة لله منين هاي البنيه شنهي الجمال عين الباردة عليها
لبوة-تسلمين خالة من ذوقج هذا، لبوة صديقة زينة
ام علاء-فدوة لله شني انتي هم دكتورة
لبوة-اي.
ام علاء-اذا نخطبج ترضين يو لا
لبوة-لا
أم علاء-هسه انتي شفتي الولد عرفتي ياهو حتى گبل لا
لبوة-الله يحفظه لاهلة حالياً هذا الموضوع مو بتفكيري
أم علاء-ان شاء الله يصير ابالج ونجيج نخطبج
لبوة-استبعد كل البعد
أم علاء-خاب جا انتي بكيفج ان شاء الله تصيرين للبالي وادبچلج بعبايتي.
زينة: -اخذنه صور اني والبنات حرفيا تجنن خلصت الخطبه وبدت ايامي بوجود شخص جديد نور ايامي وزادها جمال...
----------
غزل...
مريت بنور واني جاي امشي سمعت صوت وراي جفلت بمكاني من شفت جلب وراي صار بصفي يمة يخوف اسود بقيت امشي على كيفي شو هذا بقه ينبح...
واطگها بركضه اركض ويركض وراي حسيت روحي بمسلسل هندي دخلت بالفرع الثاني وهو وراي شفت بيت بابهم مفتوح دخلت بالبيت بدون تفكير وسديت الباب وراي خليت ضهري ورة الباب.
واتنفس بصعوبه احاول اسحب هوى گلبي راد يطلع من مكانة رفعت راسي شفت گدامي ولد مكتف ادينه يباوعلي مت بدمي حجيت بصوت گوة يطلع...
-شوف جان وراي يركض جلب وشفت بابكم
مفتوح ودخلت اسفه هسه اطلع ومحمد اني مو حرامية
أردف بابتسامه
-اهم شي سلامتج خو ما عضج
هزيت راسي بالنفي فتحت الباب وطلعت طلع وراي
أردف
-ليش جايه وحدج
رديت بتوتر...
-خطي ما اجه اليوم واجيت أمر على صديقتي
-امشي اوصلج
-لا شكرا اني اروح.
مشيت بسرعه بدون ما اباوع لوجهة صاح وراي
-انتظري لا يطلعلج ثاني مرة خل اوصلج مسافه
حجيت واني امشي...
-لا شكرا راح بذاك الفرع
حتى نور مامريت بيها امشي واحس باالعرگ يمة شني من فشلة وصلت للمدرسة لگيتهم داخلين الصفوف والمدرسة ترتب بالطالبات امتحنت جاوبت جواب خورافيييمن صدك اني مبدعه بالرياضيات...
خلص الدوام بقيت منتظرة الخط عسى ولعل اليوم يجي امي گالتي انتظرية بس هو وين ابد ما يلتزم مرت نص ساعه واني انتظر شفت نفسه الولد الدخلت بيتهم اجه يمي لابس مناظر شمسيه وسويج السيارة بيده نزل النظارة وحجه.
-شعندج واكفه هنا
حجيت بدون ما اباوعله
-منتظرة الخط
-اعتقد ما يجي الوقت تأخر لو رايد يجي جان أجة من زمان ما تأخر هيج
-اذا ما اجه اخوي يجي ياخذني
-وانتي تبقين تنتظرين شوف الشارع فرغ امشي اوصلج.
-شكرا هسه يجي اخوي ما يعوفني
-هو وينه اخوج ما دام رايح خل اوصلج بطريقي
-گتلك شكرا لا تلزگ وانته شدخلك بيه الرجعت والبقيت هنا
-اخاف عليج يصير بيج شي الدنيا مو امان ولد الحرام هواي
اجه صوت حاد من وراة فززني ودخلني برعب درت وجهي شفتة جلال الصراحة تفأجات من جيتة...
جلال-وانت منو حتى تخاف عليها؟
رفعت راسي باوعتلة ودنگت وگف گدام الولد موجه نظراته الي...
رد عليه الولد...
-انته منو
جلال-انت المنو وشعندك هنا.
-ها أنته اخوها
جلال-اخواها ابن عمها أنته شعندك هنا؟
ججه الكلمه الاخيره بصياح رد عليه الولد بتوتر
-مو الشارع فرغ بقت بس هي گلت خل اوصلها خطيه كسرت خاطري
جلال-ما شاء الله لو كل الناس تتعلم منك المبادء والإنسانية جان هسه احنه عايشين بنعيم
رفع إصبعه بتوعيد
-ديربالك تحجي وياها لو تدخل بشي يخصها
سكت الولد ما حجه شي بقيت مدنگه راسي.
الشمش بيومها عاليه حمستني حمس باوعلي جلال وفتح الباب اشرلي لسيارتة اصعد صعدت وطبگ الباب وراي حيل صعد والتفت عليه حجه عاگد حاجبه.
-شيريد منج
حجيت بتوتر واني العب بالجنطة
-ما راد شي بس گال خل اوصلج
حجة بانذار وعيد...
-ديرباج تحجين وياه ثاني مرة ولو شفتيه تعاي گليلي عليه
هزيت راسي باي بقيت امسح بوجهي حسيته نار
بس لايفتهم شي ثاني لو يگل لحيدر صخام الصخمني قدم باتجاهي بطل مي أردف
-هاج اشربي وغسلي وجهج.
أخذته بديني ترجف افتح بيه ما ينفتح جراه مني
فتحه وانطاه إلى شربت شويه وسديته اردف
-اغسلي وجهجج
غسلت وجهي وسديته أردفت.
-حيدر وين ليش ما اجة
-عنده شغل
شغل السيارة طول الطريق العب باصابيعي طبگ السياره يم بيتنه فتحت الباب ونزلت.
-شكرا
گلتها ودخلت للبيت اول ما دخلت فليت الشال نسيت روحي اول ما شافتني امي شهكت ولطمت على صدرها حجيت وعلامه الاستغراب على وجهي
نسيت السالفة مالت شعري...
-شبيج يمه شصاير؟
-عزا العزاج يمفلوكه شمسويه بشعرج وين رايح
حجيت بتوتر واني الزم بشعري
-ها شعري شبيه ما بيه شي يمة
-خربتي ذاك الشعر الحلو يمتها گصيتيه يمعزايه
تحجي وتتقدم باتجاهي لزمت النعال وركضت
صعدت اول بايتين واجه براسي النعال وصلت لنهايت الدرج وهفتني بالثاني شلون نعال ابو الطگه...
راسي خدر دخلت الغرفه وسديت الباب علية سبحت ونمت للعصر الا گعدت ما طلعت گدام امي ماردت احصل گتله لثاني يوم راحت لخطبت علاء اول ما اجت نست متحلفه بيه ذبت عبايتها وحجت بحماس
-لو تشوفين خطيبه علاء يمه صلاوات على محمد
تخبل جنها جكليته عين الباردة عليها
-الله شوكت حيدر يزوج ونفرح بيه نفسة
-ان شاء الله طلبت من ام البنين يتزوج ويفرحني
- يمه البنيه طالبه معلمة شني سالفها
-لا دكتوره
-الله دكتورة وين لگاها.
-دگول أمه شايفها بالمستشفى
-فديت حب من اول نظره مدري اول إبرة هههه
-لو تشوفين صاحبتها اضرب منها لو تشوفين الجمال الشايلته ما شاء الله عيونها بصفحه وهي بصفحه
-يمه شسالفتج ما تدرين بيه اكزكز على الدكتورات، ما تخطبينها لحيدر
-دخل يرضة بالبدايه البنيه مبينه مؤدبه مو مثل البنات الموجودات لا ترگص ولا تهوس وياهن مبينه ثگيله.
-لعد شعبالج بعد ذني دكتورات مو حي الله أن شاء الله اني هم اصير دكتورة بجاة كلمن من عندة جاة
أزل -لج انتي ماتصيرين دكتورة تصيرين ثووورة
غزل-شو الا اصير دكتورة وتشوفين بعينج يجي يوم والبس الابكوت الابيض
بسمه -ان شاء الله وافرح بيج
ازل-واني يمه ما تفرحين بيه بس هاي
بسمه-ليش مافرح بيج وحد هم اشوفج احلى مهندسة
غزل -ديلا هسه ارتاحيتي لازم تشارك بالموضوع
ازل: -بكيفي عندج مانع
غزل: -لا والله ما اشرب.
تخلص الايام وما تخلص مداهرنا اني وأزل نتعارك
ونرجع ما بيناتنه حقد ابدد، الفرق بينه هي هادئه وتفكيرها عقلاني واني تفكيري جنوي وشويه طفولي.
ثاني يوم رحت للدوام وجان اشوف هم نفس الولد صرت دائما اشوفه وبيوم اجت بنيه فتحت ايدي خلت بيها ورقة ومشت...
فتحت الورقه مكتوب بيها: - هذا رقمي ضروري تتصلين بيه والا يصير شي ما يعجبج.
قريت الورقه وشگگتها وما هتميت للموضوع مر اسبوع نسيت السالفة وبيوم جنت اگلب بموبايلي وجان تجيني اشعارات متتالية فتحت الاشعارات جمدت بمكاني صرت لا آخذ ولا انطي...
منين هاي المصيبة النزلت فوگ راسي ربي استرني.