رواية لبوة علي للكاتبة كفاية كاظم الفصل التاسع عشر
ندى: -اكيد مستغربة من طلبت اشوفج وانتي ما تعرفيني
لبوة: -ليش انتي تعرفيني؟
ندى: -اكيد اعرفج لو ما اعرفج ما اطلب اشوفج
لبوة: -هم صح ابدي بالموضوع الجاية بيه
ندى: -ماكو موضوع بس ردت اشوف بت اختي.
لبوة: -حجيت بصدمة شنووو!؟
ندى: -شبيج متفاجئة اي اني اصير خالتج اخت امج
لبوة: ما ستوعبت الكلام الحجتة بقيت ساكتة وعيوني تراقب بهدوء، من حجت احس قصة بداخلها اگدر اميزها بشكل ممتاز...
ندى: -ادري عندج الف سؤال براسج شنو، ليش، حاسة بيج اول سؤال بالج وين جنت وليش هسة جاية...
وليش اخوتي مايريدوج ولا صارو أخوال الج مثل باقي الناس راح ابدي براس سطر واطوي الصفحة...
اخخخ تدرين من شفتج رجعت 28سنةة...
حسيت اختي گدامي احسج نسخها منها.
لبوة: -محسيت بشي غير استمع الها بطبعي استغرق وقت طويل حتى استوعب الاشياء التصير وياي اشوفها تحجي بحركةةة...
ندى: -اختي إلى انحرمت من شوفتها زوجوني خواني واني بت الاثنعش جنت صغيرة كلشش بحيث ما اعرف اسوي شي...
ما اعرف شنو زواج، جان ابو حمزة جبير مو بكدي يطلع عمرة بالسبعة وعشرين واني طفلة...
من دريت راح اعوف اهلي بعد ما اشوف امي كمت ابچي تسودنت جان عقلي عقل طفلة...
جنت بوكتها حتى شعري نجمة تمشطة إلى صرت ابچي ليل ونهار جان كل ضني راح يبطلون ويعوفون هالقرار لكن بدون فايدة...
اتذكر بوكتها التمو عليه اخوتي گطعوني تگطع بمعنى الكلمه امي ما بيدها شي، جانت نجمة تبجي على بچيي الوحيده المسحت دموعي جنت حيل احبها ومتعلقة بيها أحبها أكثر من امي حيييل جانت حنينة...
زوجوني اهلي وأثر الكدم بعده بية...
بذاك اليوم اخذت عهد على روحي بعد ما اعترف باهلي واخلي شوفتي حسرة بگلوبهم ولو همة محد يهتم لوجودي غير امي واختي...
كرهتهم من شفت البگدي يتعاركن ع لعايب بعدني كتب الابتدائيه ما مسلمتهن...
انقلبت الموازين البعقلي من شفت ابو حمزة شلون يحبني ومهتم بيه حسيت بحنان الاب والام حتى نسيتهم رجعاني للمدرسة وصار يدرسني ويفهمني كولشييي من الالف للياء...
بذاك الوقت جانت امج معجبة بابوج قبل لا ازوج ابوج جان شخصية وحلو جان دائما يتردد النه وبذاك الوقت هي جان رايدينها عمامي لواحد من ولدهم...
النضرات صارت حب والحب صار عشق بمر السنين وعمج هم راداها اله بس هي رفضتة...
ابوج ما قصر كل يوميه جايبلة ناس اخر مرة گال مو بس اني رايدهة هي هم رايدتني وتحبني وانتم تريدون تغصبونها على الزواج من واحد ما تحبة.
صارت مشاكل يابو مشاكل وامج تزوجت ابوج غصب على اخواني بس ابوي إلى وافق...
تم الزواج وامج هم ماتجي لأهلها مثلي لأن محد يرحب بيها وتصير مشاكل من تجي جانت اخر روحة الها من ماتت امي التقينة بوكتها وجان اخر لقاء بينة...
زوجي ابو حمزة اجتة شغلة خارج العراق وسافرنة بوكتها جنت حامل بحمزة وامج من عفتها ماعدها شي من بعدها انقطعت اخبارها عني التهينة بعيشتنة جبت حمزة وكملت دراسة...
وبذلك اليوم المشئوم وصلي خبر فتت روحي فت اكثر خبر تأثرت بيه ولحد هذا اليوم متأثرة وأبد ما ماانسة موت اختي...
ماتت اختي بعمر الورد كولشي ما شافت من حياتها ولد عمي نفسوها ما تهنت، جان كل ضني هذا اول طفل الها ماجنت ادري عدها بت...
اليوم الدريت بية باقي ذكرة من اختي قبل جم يوم من اجيتي لاهلي من سمعت الخبر احس روحي طارت واجت تشوفج حصلت رقمج وهاي انتي يمي.
لبوة: -كمت لااخذ ولا انطي بس ارمش بعيوني اباوعلها وهي تحجي وجها انصبغ احمر والدموع تجمعن بعيونها حجيت بخفوت: -نزليهن لا تخلينهن
راح تاذين روحج...
حسيتها مثل شخص منتظر إشارة نزلن دموعها شلال تبجي وتشهگ جبت بطل مي فتحتة قدمتة الها وهي مستمرة تبجي...
حسيت دموعها بگلبي ماعرف شحجي وشسوي حتى اخليها تسكت بحركة سريعة طبطبت على ظهرها حجيت بصوت مبحوح: -خلص انتهى صار كولشي ذكرةة...
شالت ايديها من وجهة شربت مي وغسلت وجهة تنهدت وحجت مثل المستحية...
ندى: -اگدر احضنج
لبوة: -بقيت ساكتة ما حجيت شي
ندى: -شو سكتي والله حسيتج اختي من شفتج كلبي تفتت عليج يكول نسختها
لبوة: -حجبت برود عادي ما عندي مشكلة.
حضنتني أحسهة جعصتني ماجان عندي ردت فعل بس اول مرة ما تلعبت نفسي حسيت بحساس حلو وغريب...
ندى: -وهسة تروحين وياي جهالي منتظرين يشوفوج
لبوة: -هاا لا ما اگدر اريد ارجع للبيت
ندى: -لاحگة علبيت اريد اتعرف عليج وانتي هم تعرفي علية
لبوة: -غير مرة أن شاء الله
ندى: لا ماكو بناتي منتظرات يشوفنج ومجهزات العشة
لبوة: -اذا هيج تمام...
صعدت بسيارتها جانت فخمةة احس اكو شي بداخلي تحرك من اباوع لوجهة كولش نتشابة بس هي لون عيونها اخضر فاتح واني غامق الطريق كلة مركزة وياها وهي الابتسامة شاگة حلگها...
ندى: -ليش عايشة وحدج؟
لبوة: -بس اني ما گتلج بهلشي
ندى: -من دريت بيج عرفت هواي اشياء عنج
لبوة: -شعرفتي ومنين؟
ندى: -المنين عوفيها والعرفتة انو انتي دكتورة ممتازة وبنفس الوقت عازلة نفسج كولش عندج صديقتين ما تلمسين أحد وإذا شخص لمسج حتى لو بالغلط محد يتوقع ردت فعلج ودائما تكونين وحدج
معزولة تحبين العزلة هاي المعلومات صحيحه،؟
لبوة: -الصراحة ما اعرف انتي شدگولين
ندى: -من شكلج مبينة هادئه كلش وعصبية كلش ومن سلمت عليج ما صافحتيني إذن الحجي صح بس خل اكولج شغلة من حضنتج هذا شي كولش زين لأن ما نفعلتي...
لبوة: شقصدج؟
ندى: -شوفي اني دارسة علم النفس بشكل ممتاز عندي هوس بية فهواي اعرف معلومات وحالتج أنو ما تلمسين أحد هاي جاية لسبب طفولي اغلب الحالات المثل حالتج والاسوء بهواي اكو ناس من يطلعون يلبسون كمامة وكفوف حالتهم حالة
بس انتي وضعج ممتاز...
لبوة: -شكو فاتحة هالموضوع بهلوقت واني هستوني عرفتج...
ندى: -هالموضوع نبش بگلبي نبش وكلش يهمني خليني اكمل
لبوة: -اعتقد اني ما طالبة من حضرتج تناقشين بموضوعي...
ندى: -الضاهر انتي ما حبيتيني مثل ما اني حبيتج
بعدج تحسيني شخص غريب.
لبوة: -احتاج وقت حتى اتعود على الأشخاص الجدد يعني مو بسهولة فلا تحسبينها غير شي.
ندى: -تدرين اني من سمعت بيج حبيتج وتمنيت اشوفج باسرع وقت...
لبوة: -حققتي امنيتج وشفتيني
ندى: -بعدني ما محققتها من تنسجمين ويانة بذاك الوقت تكدرين تكولين حققتها وهسه خليني اكمل حالتج إذا ما عندج اعتراض...
لبوة: -كملي خل نشوف وين توصلين.
ندى: -عجبني اسلوبج وطريقة كلامج كولش وين وصلت هااا شوفي إذا الجسد تعبان ناخذ أدوية أما إذا الروح تعبانة تحتاج شخص مو علاج اغلب الحالات النفسية اكو امراض خطيرة تدرين شجان علاجهم شخص...
لبوة: يعني شقصدج،؟
ندى: انتي اذا تزوجتي راح تتغيرين هواي لدرجة تختلطين وتلامسين وضعج يكون طبيعي.
لبوة: -خالة انتي شتحجين يا زواج يا بطيخ هذا الشي حتى بالأحلام ميصير.
ندى: -ليش انتي شناقصج حتى ما تزوجين يعني تبقين عمرج كله عايشة وحدج ماتريدين جهال شخص يحبج ويخاف عليج...
لبوة: لا ما احتاج ومنو كال راح فعلا يحبني لو يخاف على قصدج يخاف مني اي أما بالنسبة للاطفال وقت ما استقر وارتب وضعي من بيت وضيفة اتمنى طفلين من دار الايتام واربيهم احسن تربية...
ندى: -ليش انتي مو عندج بيت وضيفة؟
شمنتظرة...
لبوة: -خلص سدي الموضوع
ندى: -الضاهر وراج سالفة داچة بس وين اول وتالي اعرف...
لبوة: -هو مال تعرفين تعرفين بس بالوقت الضائع
ندى: -خليتي عندي فضول ولج احجي لا اسوي حادث من ورة التفكير
لبوة: -لا تشغلين بالج شي ما يستحق كل هالاهتمام
ندى: -منا ورايح كلشي بيج يهمني بعد ما اعوفج ابد حالج من حال جهالي...
لبوة: -رغم انزعج من أحد يناقش بحالتي بس اليوم ما نزعجت بالعكس حبيت اعرف المعلومات العدهة طريقه كلامهة تخلي الواحد ينصت الها شخصيتها كولش حلوة قوية سلسة مرحة وجهة بشوش ومثقفة بنفس الوقت من تحجي احس شي بداخلي ينجذب الها وصدگ لو كالو الدم يتحرك...
ندى: ها لبلب وين بالج
لبوة: -انوب لبلب شنو هاي
ندى: -ههه شسوي إذا اسمج لبوة يگول داخلين بغابة بس هلاسم ينطبق وي شخصيتج اللبوة مو سهلة وانتي مثلها...
لبوة: فعلاً على گلي هيج
ندى: -ليش تسمينة باسمة
لبوة: -علاقتنة اقوى من اب وبنتة جان صديقي
ندى: -الله يرحمه
لبوة: -عيوني غورگت درت وجهي اباوع للطريق صافنة مدري وين فززتني من حجت...
ندى: -يلا يلبوة انزلي
لبوة: -وكفت السيارة يم بيت راقي نزلت وياها واني ما عرف شنو شعوري وشجاي اسوي فتحتنة الباب بنية شاب جميلة بمعنى الكلمه مبتسمة بوجهي بادلتها الابتسامه...
همس: -هلووو انتي لبوةةةة
لبوة: -اي
همس: -اسمي همس.
لبوة: -تشرفنا على فكرة اسمج حلو وغريب
همس: -لاتحجين وياي برسمية تحسييني انتي غريبة
لبوة: -ان شاء الله اتعود بسرعة
ندى: -ولج وخري من الباب خلينة نفوتت
لبوة: -اول مدخلت البيت جانت حديقة كولششش حلوة النظر بيها يريح النفسية اخذت اباوع ع ورد
وجمالة والشتل المزروع...
همس: -صح الورد حلو بس انتي احلى منه شو باوعيلي...
لبوة: درت وجهي الها مبتسمة.
همس: -الله عيونج اغمق من لون الحشيش بهواي.
لبوة: -ابتسمت شوية وطلعت بنية اكبر بالعمر من همس تجي 23تشبة همس بس عيونها خضر همس اسود...
شجن: -هلاو اني شجن مدرسة كيمياء السنة الأولى الي
لبوة: تشرفت بيج لبوة دكتورة متعينة حاليا...
همس: -الله عائلتنه اكتملت اخوي حمزة هندسة وشجن تربية واني قانون وانتي دكتورة...
لبوة: -شكلهن كولش لطيف وكأنهن يعرفني من زمان اباوع لخالتي كاعدة ع كرسي وتباوع الي...
شجن: -بعد اعرفج ع نفر الصغير شكلج راح تحبية.
همس: -هذا رضا الباشا
لبوة: -جابت همس طفل عمرة بالعشر سنوات بس شنو يخبل وسمين شويه هيج اله خدود وابيض
وشعرة ناعم نازل على وجهةة ما اتحمل هيج منظر...
رحت بستة الصراحة بوسة وحدة متكفي بستة بخدة الثاني، ادية انتبهت الهن يخبلن سمان وصغار احلى بوسة من تبوس طفل بيدة بوستهن ولو هنة مال عض بس استحيت...
رغم ما اسلم واتلامس وي الكل بس الاطفال غير أكدر المسهم براحة...
ندى: تعاي نطب جوة لو عاجبج الگعدة هنا.
لبوة: -هنا افضل...
شوية واجة رجال جبير بس بعدة قوي وأنيق سلم ورحب بية بطريقة تخبل استحيت من كلامهم كل واحد يحجي شكل شويه ودخل للاستقبال بقينة اني والبنات وخالتي الما شالت عيونها مني كعدنه بالحديقة جابت همس الضيافة...
همس: -مدري واحد ياكل الكيك البصحن مدري ياكلج
لبوة: -ليش ما ياكلج شكلج اضرب من الكيك نفسة
همس: -يا اني.
لبوة: -لعد عروگ آذاني
شجن: -هههههههه طلعتي تنكتين بس ما يبين على شكلج.
لبوة: بقينة نسولف يحجن عن حياتهم ودراستهم اندمجت وياهن ورة ساعة اجة حمزة سلم علية...
حمزة خاطب صارلة ست اشهر كولش لطيف ومرح بسرعة أخذ ميانة...
كامن البنات يحضرن العشة طبعاً خالتي ما خلتني اساعدهن ما خلت سؤال ما سئلتة بطبعي ما احب اجاوب بس الطريقة التحجي بيها سلسة خلتني اجاوب بس بشكل مختصر ما احب اسولف عن حياتي...
نصبو العشة اني وخالتي والبنات ورضا اول مرة اكل بيت مو بيتي ماجان اكو شي يمنعني مااكل البيت نضيف البنات تحفة النضافة طاقية ع مكان فأكلت بشكل طبيعي كملت ردت اكوم...
ندى: -ياا لبلب شو ما كملتي اكلج هاي وين
لبوة: -بالعكس اكلت وهواي هم اصلا اني بالعشة
اكل شي خفيف.
همس: -ولج لو تشوفين شجن تتعشة وترجع تاكل باليل
شجن: ؛يا هاي اني دشوف هاي منو التاكل تالي الليل صاير جنج فقمة...
همس: -ماغيرج الفقمة يمةةة صيحي بيها.
ندى: -ولجن كافي جهال انتن يمةةة مو بنات زومبي
لبوة: لبوة اباوعلهن ومبتسمة اول مرة اشارك بجو عائلي تمنيت عندي اخت حسيت بخالتي تباوع علية
كمت اغسل...
شفت همس تحضر صينية حجيت واني منزعجة: -بنات رجائا لا تسون شي الساعة راح تصير بثمانية اريد ارجع للبيت
شجن: -لا بله مو بكيفج وين ترجعين ابقي يمنة
لبوة: لا كلبي ما أكدر اغسل المواعين وياجن وامشي
همس: -ههههه خرب ولج يا مواعين.
.
لبوة: -يعني يا مواعين غير الاكلنة بيهن.
شجن: اول شي انتي نفر جديد بعائلتنة ثانياً المواعين الغسالة تغسلهن مو احنة...
لبوة: -اهاا بس خل يكون بعلمج شي من اكل احب اشتغل حتى لو ماكو شغل ادور على فد شغلة لازم مامنها...
شجن: -مبين من هدوئج نادرة بس ما توقعت لهدرجة
لبوة: مو قصة ندارة بس بيه طبع لازم اصرف الاكل خو اذا هيج صرت بطة واني منا كصيرة...
همس: -انتي مو كصيرة انتي قزمةةة قزوم ينوكل.
شجن: انجبي لا اركعج بل أربعة ولاربعين احترمي شنو قزمةة
لبوة: -عادي هاي حقيقيه بس اني لأن ما اختلط فمحد يتجرأ ويكول هذا الحجي ماعدا ماي my friend.
همس: -عندج صديقات؟
لبوة: اي عندي ثنين
شجن: -شلون تعرفتي عليهن.؟
لبوة: زينة اول ما دخلت كلية وتبو بداية تعييني بالمستشفى...
همس: -حبيت يعني داومن سوة.
لبوة: اي.
هذا اليوم جان كولش مختلف وتونست وي البنات حسسني كاني شخص من عدهم حلوة الجمعة خالتي حنينة كولش كل شويه ومسحت عيونها...
من اركز بوجهة اتذكر شكل امي جانت تشبهة بحيث اول ما شفتهة شبهتة بشخص محفور بذاكرتي جنت صغيرة كلشش بس اتذكر شكلها بصورة مو واضحة كولش...
طلبن مني إبات يمهن لكن رفضت ودعت البنات ورجعتني خالتي بسيارتها...
ندى: -لبلب عندي اقتراح اتمنى تفكرين بيه
لبوة: اسمعج.
ندى: -بدال ما عايشة وحدج تعاي نتقلي لبيتي شوفي حمزة راح يتزوج وآله الطابق الاول وانتي أخذي الطابق الثاني وأبو حمزة اعتبربة مثل ابوج...
لبوة: لو قبل سنة هذا الحجي يمكن فكرت باقتراحج بس هسة مستحيل...
ندى: -ليش مستحيل وشنو الاختلف بهاي السنة
لبوة: -هواي اشياء اختلفت انسي هذا الموضوع
ندى: -غير اعرف ليش انطيني سبب مقنع والله بدي احطج بكلبي ماتدرين الفرحة الفرحتها من شفتج بدي ما عوفج ابد.
لبوة: -شكرا بس مااگدر انطي سبب
ندى: -يمه هذا مو عذر ريحي گلبي بسبب واحد
لبوة: إذا كلت السبب صدگيني ما راح ترتاحين
ندى: -لبوة شنو السالفة احجي والله بديت اقلق
لبوة: مايستاهل قلق بس اني ماكدر اجي يمج لأن
هذا اخر اسبوع إلى بالعراق بأجر والوراة وبعدها ارحل بسلام...
ندى: -يااااا صدووگ تحجينننن
لبوة: -اي ورجائآ لا تسئلين على شي لان مراح اجاوبج راح اسافر وخلص.
ندى: -اني ما عولت اشوفج وتدگليلي هذا الحجي ولج اني رسمتلج بالي هواي شغلات خططت شنسوي وين نروح هواي شغلات بالي عاد كليلي راح ترجعين يعني شكم شهر...
لبوة: -ما مفكرة بالرجعة اريد استقر
ندى: -من شوكت هذا الحجي
لبوة: -قبل شهر تقريباً بديت اجهز للموضوع
ندى: -زين ليش ريحي گلبي ولج لبلب وين رايحة
شدسوين بروحج انتي عبالج هي بالحجي اني وياي زوجي وجهالي ما تحملت اعيش بالغرب الا انتي شلون بيج...
لبوة: هههههههههه غرب شنو الفرق هنا لو هناك مو بكل الاحوال اني عايشة بالغرب شتفرق صدگي مراح تفرق عندي شي الماعندة أهل ماعندة وطن...
انتي اليوم عرفتيني فلا تحكمين على اني ما عندي
عائلة ولا عمام ولا أخوال كولشي ماعندي انگطعت من شجرة وهاي الشجرة انشكت الگاع وبلعتهة ما لگيت أثرها وشكرا على اليوم القدمتية إلى مراح انساة...
وصلت هنا مقري سكتت من سمعت كلامي ماحجت شي نزلت ونزلت وراي حجت بنبرة صعبة كولش مليانة حزن شايفين من شخص يحجي بنفس الوقت يريد يبجي...
ندى: ؛لبوة
لبوة: هااا
ندى: -ديري بالج على نفسج واي شي تريدن اني موجوده صدگيني لو جنت اعرفج من زمان ماعفتج...
هسة انتي بين جهالي ومن دريت بيج احس الدنيا ما واسعتني من الفرح الشي الباقي من اختي ردت احطج بروحي وتعيشين وياي واعوضج السنين المضن...
اكيد هذا القرار ما اخذتية عن فراغ متأكدة وراة هواي اسباب واني ماالي حق اعترض طريقج واني اليوم شفتج خلي يكون بعلمج اني مثل امج وشتريدين اني موجودة وراح اساندج بكل قراراتج
ولا تنسيني...
لبوة: تحجي وتبجي حركت مشاعر نايمة من سنين داخلي وبفعل لا متوقع حضنتة قوي ونزلن دموعي
رجعت حضنتي اقوى بعد فترة ابتعدت عنها واني صايرة كتلة من المشاعر حسيت بحنان الام الما عشتة سلمت عليها ومشيت ما اتحمل اكثر...
اول مرة احضن شخص اول مرة أتأثر لهلدرجة وين جانت عني كل هالسنين ليش ما مكتوبلي ارتاح بوسط ناس ليش مكتوبتلي العزلة والسكون شيصير لو عشت بوسط ناس تحبني لكان مو هذا حالي ولا اتخذت قرار مثل هذا...
حتى مهنتي كمت انزعج منها أحسها فوضة صارمة زادت الفوضى البداخلي اليشوفني في قمة الهدوء لكن الضجيج محتل بالداخل من سنين...
رحت سبحت ازيل الهم البداخلي كملت لبست ايزار الصلاه لزمت القران بديت اقرا كملت جزء رحت فرشت اسناني ونمت...
كعدت على صوت التليفون يدگ شفت المتصل تبوو
جاوبتها واني مفتحة عين وعين الوو
تبارك: الوو صباح الخير
لبوة: صباح النور شعندج متصلة بيه من غبشةة
تبارك: شو بعدج نايمة يلا كومي ورانة طلعة يمته نشتري يمتها نلبخ وووولج كووومي
لبوة: -اذني اذني يلا كايمة...
. سديت التليفون منها ورحت سبحت تريكت علسريع أجرت تكسي وصلت اتصلت بيها انطيتها عنوان المكان اجتي رحنا ندور على فستان الها دخلنا محلين ماعجبنها ثالث محل اختاريت الها فستان ذهبي مگصوص گصة السمجة كولش حلو ونازك...
تبارك: -حلو مو
لبوة: -كولش الصراحه عجبني
تبارك: -، اول مرة اختار بسرعة وجهج خير عليه
لبوة: -من تجين وحدج تحيرين ماكو وياج شخص ينطيج رأيه فتتاخرين الا تختارين...
تبارك: -يلا شوفيلج واحد.
لبوة: -كلساع ملطمين مو كتلج اشتري اشتري
ما اجار
تبارك: -ديلا ولي اشتري منو الكاضج.
لبوة: -افتريت المحلات كولها ولا عجباني واحد لو القياس ما يجي على گدي لو ما يعجبني الصراحة كولش ضجت وخطية تبارك تعبتها بقة محل واحد
كلت خل اجرب حظي هذا اخر محل...
اول ما دخلت وگع عيني على فستان گلت هذا هو رحت عليه خمنت القياس يجي علية جان لونه فيروزي بينصل كولش حلو بس طويل بس كتصميم عجبني ردت ابوس تبارك من الفرح...
تبارك: -يخبل هذا شوفي السعر
لبوة: من سمعت تبارك بالسعر شهگت حتى ابو المحل فز عزاا فضحتينة
تبارك: -اشك عندج عقل لو ماجرة مو احسن
لبوة: خلص عجبني فدوة الفلوس اله يستاهل واحنه اصلا شنسوي بالفلوس هذا وكتها...
اخذت إلى ملابس للبيت وكم شغلة محتاجتها من غسولات ومعطرات إلى وللجو كملت نواقص جنطة السفر...
انطيت الغراض بيد تبارك ورحت للصالون مااكدر اعوف زينة وحدها وي أهل العريس متأكدة أمها ما راحت وياها دخلت سلمت لكيتهن يمكيجن بيها شكلها تحفة هي بدون شي تخبل مو بدلة ومكياج...
اباوع لشعرها منعمته هو جان يصعد للسگف من تخابرني رحت جهزت نفسي لبست الفستان إلى اجه وي جسمي عدل وكانه مصمم خصيصاً بقة المكياج ماخليت لان مستعمل من ارجع اخلي.
رفعت شعري لبست كعب عالي رشيت عطر قبل كولشي باوعت على مضهري ضحكت ويني وين هاي السوالف انطوني اعارگ اي بس مو اصير انثى رقيقة لا هذا مو جوي...
----------------
زينة...
زواجي صار بسرعة ما حبيت اخرب واهس علاء جان كولش متحمس جهز الغراض والغرفة كتلة على ذوقك أنته رتبها بقى بس جهاز العرس...
اني عندي ملابس ومكياج وعطورات كولش هواي فما حبيت اخسرهم وحتى لو اشتريت وين اخلي الغراض...
بهاي الفترة اوضاعي تخربطت من جهة احضر لنفسي والجهة الثانية احضر باقي الترتيبات كل شوية متصلة بلبوة ما اسوي شي اذا ما اخذ رأيها زينة القاعة جانت لون بنفسجي فاتح وابيض طبعا ذوق لبوة...
كملت سالفت القاعة من كوشة وباقي الترتيبات بقيت اجهز نفسي اني مسوية ليزر وجهي وجسمي بس سحبت شعري صاير اندومي مكفش وميشتة بلونين بني فاتح واصفر نثر صار روعة وكملت النواقص...
ومرت اخوه واختة كولشش حبابة وساعدتني بهواي اشياء راحت وياي من اشتريت الجهاز...
قبل العرس بيوم رحت احجز بدلة كولش تعبت اله لكيت ذوقي وعلاء دوخني ساعة السودة الخذتة وياي موتني كولشي ما يعجبة حجزت تلث بدلات ثنين الالوان وحدة احمر غامق والثانية وردي وبدلة بيضة احلى وحدة بيهن البيضة كولش عجبتني.
(حسب وصفها تشبة هاي)
اليوم راح ارتبط بشخص ممفكرة بحياتي كلها راح ارتبط بية ولا حاطة بالي علاء كولش حباب يشاقي ويضحك بحيث يحسسني بيناتنة علاقة قديمة إضافة إلى شخصيتة...
ام الصالون تمكيج بيه واني الابتسامه شاگة حلگي من اذكر سوالفة اباوع للبوة گاعدة گدامي هادئة بشكل بس تراقب بعيونها...
كملت مكياج لبست البدلة الوردية اباوع لنفسي مكياجي بسيط بارزة عيوني أكثر شي، تسريحتي هادئه ابتسمت راضية عن نفسي...
درت وجهي للبوة جان منظرها تحفة النسوان ما شالت عيونها منها الفستان الابستة زايدها جمال.
ابد ما عافتني رغم الصالون هوسة واغاني وأهل علاء يهوسون وهلاهل بس ما عافتني ابد كلتلها لاتجين ادري بحالتها ما تحب هيج جو بس ماهمة كالت كولشي لخاطرج يهون...
يالله أحسها شايلة حنان الام نضراتها نضرة ام لبتها من تشوفها عروس عيونها مدمعة ما تحملت منضرها حضنتها قوي احس بالامان وياها...
طبعاً امي مااجت وياي ولا كلفت روحها بس تعرف تعزم بقاربها وصديقاتها ولا ساعدتني بشي...
دائماً من احتاج شي لبوة موجودة دوختها وياي.
زينة: -شكرا
لبوة: -على شنو
زينة: -لانج وكفتي وياي بكولشي ودائما طلعيني من القلق والتوتر وتلگيلي حل مرضي...
لبوة: -احنة اخوات واكثر فما اريدج تعيدين هالحجي مرة ثانية ترة ازعل بس احب اكولج شي مو تنسيني وخليني على بالج دوم واتذكري ايامنة ولاتنسيني ابد حتى لو بعيدة عنج باي وقت تحتاجيني اعتبريني موجوده...
زينة: -ليش تحجين هيج والله اتوتر واحسج راح تختفين وما اشوفج بعد...
لبوة: -ما اريدج تتوترين ابد ولا تفكرين هيج تفكير وشوفي شكلج طالعة تشگين شگ الله يساعد علاء
اليوم...
زينة: -لا تحجين هيج وتعاي ابوسج بس هلمرة.
لبوة: انجبي ولي من يمي لزگتي بيه
زينة: -ياا مو قبل شويه كلتي احنة اخوات واكثر
لبوة: -لان اختج تريدين تبوسيني امشي ولي روحي بوسي علاء وفري طاقتج اله.
زينة: صايرة ما تستحين فرد نوب
لبوة: -اني من زمان ما استحي
زينة: -اباوع الكل مركز وياي الكلام السمعتة حسسني أميرة الصلوات والهلاهل فعلا يوم من العمر...
اخذونه للقاعة جانت شبة فارغة ورة دقايق التمت الناس لكيت تبارك هي وصديقاتي الوياي بلدوام كدامي باركلي وبدت أجواء الحنة راحت لبوة هي وتبارك وبقيت كاعده العيون كلها علية...
---------------
غزل: -سمعت بعرس علاء واني طرت كمت اهز جتاف واني امشي محتاجة جو يرگصني بويايييي...
رحت اقنع بامي اروح وياها للعرس: -
يمة فدوة حبابة ة حبابةةة خل اروح وياج والله طالعة روحي من للمدرسة للبيت بليززز ماما ماي لو.
بسمة: -واختج تضل وحدها
غزل: -تروح لبيت خالي تبقى يم فاطمة حبابةةةةةةة
بسمة: -دروحي گليلها إذا وافقت اخذج
غزل: -كلتلها وحضرت روحها هسة يجي حيدر يأخذها
بسمة: -مدبرتها گبل بساع
غزل: -لعد شعبالج بسومةةة يلا اروح الحگ على روحي...
لبست فستان من أزل اشترتة بعرس ابن خالي صاير اسود فتحتهة سبعة طويله بس مو كلش
ردانة تور بيه لمع براق يبين الجسم منه ومن ناحية الصدر مغلف بنفس التور ومن جوه كلوش قصير لحد الرگبة...
لبست وياه گعب اسود وگلادة سوده خنگ وميكب هادء وشعري مثل ماهو ضحكتي شكت حلگي واكفة گدام المرايه انطي بوسات لروحي
شني هاي گمر ولابس اسود ما صايرة هاي نعم يا سادة انهو القمر وسط السماء الدامسة...
بسمة: -ياا شبيج تخبلتي
غزل: -نو ماتخبلت بس اكتشف جمالي
بسمة: -يا جمال هذا ابن ابو جمال عده سبع جهال وكل واحد چنة صخل يشبهج بالضبط بس لون العيون يختلف...
غزل: -يااااا شبيج وياي شمسويتلج اني.
بسمة: واني شمسويتلج جاي احجي الحقيقة بس صدوك لو كالو الحقيقة مرررةة
غزل: -حقيقه فدوه لجمالي اليكتل اويي اكزكز على روحي احس روحي احلى من انجلينا جولي
بسمة: -انجلينا يمة كلبي وينج وينها خاب طيري انجلينا ام شعر المبتور جنج كفار بنو قريش دمشي اجة اخوج يلا بساع البس صايتج.
غزل: ضجت بزعل من كلامها بس هي هذا طبعها تغيير جو، اخذانة حيدر للقاعة دخلنة جانت جبيرة وبيها ناس بس مو كولش هواي مدري لأن احنه اجينة من وقت سلمنة على اهل علاء اختة وسن حيل حبابة متزوجة جديد...
اخذتني تعرفني ع عروس وامي هي وام علاء دگ سوالف شفت العروس تعجبت جنت مفكرتها جبيرة وماتتحاجة بويةةةة تشگ شگ وشكلها ينگرط ملامحة طفولية كلشش...
وسن: اعرفج غزل اخت حيدر
زينة: -تشرفت بيج حبيبي.
غزل: -كل عام وأنتي بخير لاءءءءء اقصد ءءءء
هذا
وسن: -وصلت وصلت
غزل: ضربت وسن بكتفها متفشلة اريد اتذكر الكلمة
وهي بالگوة ضامة ضحكتها باوعت بلمكان وصحت
ع خير والبركة بلمبارك زواج الدهر...
اباوعلهن ميتات ضحك حكيت راسي بفشلة وكمت اضحك وياهن ع واهس...
زينة: تشبهين اخوج كولش اول ما شفتج شبهتج بيه
غزل: -اي صح نفس العيون والملامح بقينه شوية الجو هادء وبس يجن يباركن ويروحن حجت زينه
ضايجة...
زينة: غزولة حبيبتي روحي شوفي لبوة وين شو راحت بعد ما رجعت
غزل: -تدللين بس شنو هاي لبوة
زينة: -هههههه صديقتي انلصمي لا تعيبن على اسمها
خوش
غزل: -يااا معبالي بنية يلا خل ابحوش عليها
زينة: -قصدج ادورين عليها
غزل: هو دة الله ينور عليج
رحت بالقاعة ادور لبوة مدري ذيبة الصراحة حبيت اشوف شلون شكلها صاير امشي والتلفت انصدمت ببنية كولش ناعمة حجيت بخجل اسفة ما انتبهت.
من شفتها فتحت حلكي مو بنية لعابة تخبلللل من صدوك تخبلللل عيونها حيل خضر وتسريحتهة والفستان سطرتني سطر شحال لو اني ولد تسريحت تسرسح...
لبوة: لا عادي مصار شي
غزل: رحت ادور وانوب ما وصفت إلى شكلها هسة اني شلون اعرفها رجعت للعروس حجيت بملل
اكولج هاي صديقتج ذيبة مدري لبوة ماكووو دورت دورت حتى تعبت يعني وين الكاها وانتي ما موصفتلي شكلها وشلابسة حجت بضحك.
زينة: -يااا لج هياتهة لبوة.
غزل: -درت وجهي اشوف ذيبة يمة اسم الله نفسهة هاي التشگ شگ ابتسمت ابتسامه هادئة ونزلت راسها ياخي احسها رزنة فد شخصية مثل ذني البمسلسلات شخصيات بس حرامات قزمة...
حجيت بهمس هاا اي يعني هاي هم دكتورة مثلج...
زينة: يسسس خل اعرفجن لبوةةة هاي غزل تصير اخت حيدر غزززل هاي لبوة ضلعتي.
لبوة: اتشرفنا بيز
غزل: -حجيت بثول شنو بيزز
لبوة: -هاي كلمة اكولها للاشخاص الطيفين
غزل: -شكرااا.
لبوة: ولو. شكلج لطيف عكس اخوج رغم تشابهون
بالشكل
غزل: تعرفرفينننن اخوي
لبوة: شايفتة هيج...
غزل: -لا والله حيدر حيل حباب وهادء نوعاً ما وأزل هم هادئه بس اني وامي مشكلين جو بالبيت
لبوة: -عائلتكم صغيرة
غزل: -اي شنسوي كون الله يهدي حيدر ويتزوج
حتى تكبر عائلتنة
لبوة: وهو شنو السبب اليخلية ما يتزوج
زينة: هااا يمعودة الووو شو فتي فوتج اول تالي تسألين عن شخص
لبوة: مو هيج بس حبيت اخذ وانطي مو اكثر.
غزل: دوكفو خل اكول ليش متيزوج احمم مدري والله يغلس من نسأله
لبوة: -على كل حال امم اروح اشوف تبو. وانتي غزل امشي وياي
زينة: واني يااا راح تعوفيني وحده والعالم بدت تلتم
خاينةةة
لبوة: شبيج بنتي مرايحة بعيد بس نحضر فقرة صغيره قبل لا تصير هوسة...
غزل: مشينا مسافة اجت بنية حاجتها لبوة
لبوة: -يلا تبو مثل ما اتفقنا
تبارك: -يلا كبد.
لبوة: راحت تبارك مبدلة الأغنية على ذوقنة شتغلت اغنية عانديهم صرنا بوسط القاعة وتبو خلت زينة بالنص واني من جهة وتبارك وغزل حاوطناهة شتغلت الأغنية بكلماتها الحماسية
صرت اتمايل وي الاغنيه واهز بمهارة...
وعاندي وسلمي علية خلي لوم الناس اليةة
وعانديهم، عانديهم
خل يفركون باديهم
عانديهم، عانديهم
خل يفركون باديهم
ايدج الحلوة بادية
عاندي وانسي الملامة
ضوي كلبي بابتسامة
وصيحي باعلى الصوت احبك
هو گلبي واني گلبك...
زينة: -شغلن البنات اغاني وخلني بالنص فرحانةةة
بشكل من اشوف صديقاتي وياي وخاصة لبوة لعبت لعب تعجبتت معقولة هاي بتنة لا مبدلينهة تهز رگبة
وجتف وتبارك لازكة بيها تهز ولبوة كل شوية ودفعته
ورايحة على صفحة وهاي تبارك وراهة متعمدة تغثهة...
راحن مبدلات الأغنية لساجدة عبيد اردن اعوفن كل هلي صار جو بالقاعة والكل تهز كبار وصغار...
وخوب ام علاء طبگت وي لبوة وهززز للگاع متت ضحك ولبوة ما قصرت تبدعتت بالرگص وخوب تبارك كل شوية مبدلة الاغاني لعبت لعب هي وباقي البنات...
رحت بدلت ولبست بدلتي الحمرة وعدلت مكياجي
كملت باقي الطقوس حنني البنات وأخذنا صور
وطلعت الغضى والمضى لعبت لعب وخاصة البنات سولي جو واني منا شلوني الثكل بويةة الثكل...
ورة شوية كالن روحي بدلي بدلتج لبست بدلتي البيضة والقلق دب بداخلي على فرح شعور مخربط.
اجت لبوة طبطبت على كتافي...
لبوة: شايفة كل الخير كلبي
زينة: يوم الالج كلبي
لبوة: ، انجبي ولا تقلقين خليج ريلكس ترة علاء خوش ولد مو تصيرين جنج زعطوطة وتبجين وتفضحينة صيري مرة معدلة...
زينة: ياا شنو زعطوطة شبيج ويااي
لبوة: ههه مابية شي يلا اني اروح لأن راح تصير طاح طيح كض اخوك لا يطيح
زينة: ياا وين حتى العريس ماجاي
لبوة: -ما أكدر اتحمل الجو المعذرة بنيتي.
زينة: براحتج، لبستني بيدي اسوار عبارة عن فراشات متفرقات وحدة صغيره والثانية اكبر نازك ويجنننن حضنتهة ادري متحب واحد يحضنها.
لبوة: راح افتقدج هوااااايي
زينة: شنو السالفة ترى اداوم وتشوفيني مثل كل يوم
لزمت وجهي بين ايديها حجت وعيونها مدمعة...
لبوة: انتي اجمل شي صادفني واحلى هدية حصلت عليها بس الموازين انقلبت وصرت اني اخذ دورهم
بعد ماجنت احجي عليهم...
زينة: همة منو؟
لبوة: هااا عوفي هاي السالفة وابدي حياة جديدة يلا ا ننزل راح يجون...
زينة: -مكياجي عدل عيلج الله عطري تشمينة مو
لبوة: -كولشي بيج عدل بس امشي...
نزلنا كعدتها ع الكوشه ورحت بنهاية القاعة لأن صارت هوسه شويه واجة العريس شفتهم شلون واحد يباوع للثاني وزينة عود تستحي شكلهم كولش حلو لايگ على بعض...
ماتحملت أكثر اخذت شالي لفيتة وطلعت للحديقة اكو ممر معزول تنفست بأريحية كعدت على صبة اتنفس اريد ارجع قبل لا تصير الزفة والرمي طلعت امشي اجر تكسي لكيت بوجهي حيدرا يحجي بالتليفون وراسة منزلة بالكاع...
لابس قاط اسود وفاتح دكم الاولى من القميص انتبهت لايده الرافعها سرحت بتفكيري...
جنت كاعدة ارسم وساعة اشخبط واتعارك وي ذبان وجهي شفته اجة من بعيد رحت طفرت اله بحماس واخيرااا اجيت.
شحت الابتسامه من شفت أيده تنزف وقميصة مشكوگ من ناحية صدرة...
حجيت بقلق هاي شصار بيك رد برود...
مابيه شي بس اجيت اشوفج قبل لا اروح
حجيت بفزع وخوف هاي شبيك دم دم هذا راح تموت وتعوفنييي
مابية شي كله جرح
. زمجرت بعصبية لا هذااا مو جرح شوف دمك راح يخلص...
رحت اركض ادور على شي يلف بيه أيده مالگيت باوعت جنت لابسة فستان صيفي كشمير وفوكاه مثل السترة گصيرة لحد الصدر باوعت بيتنه بعيد نزعتها وشگيتهة بقوة حجة بالم...
هاي شتسويننننن
. ماحجيت شي لفيت ايدة بقوة اريد اكطع الدم حجيت بحدة ويامن متعارك...
ما متعارك بس انجرحت...
صكيت سنوني واحجي بفحيح هذا ابو الول وجماعتة مو بقة ساكت ماجاوبني...
حسيت بية يتالم من غمص عيونة حجيت بطفولية مراح تموت لاتخاف انت حباب وصديقي هم خل هما يموتون...
هما منو؟
درت وجهي برعب وضربت على خدي نسيتتت
باوعتله وكلت يله روح لأهلك بعد الدم راح اني راح اروح بقة يصيح وراي لأن بقيت بس بالفستان وادية طالعة.
اوكفي شلون رايحة هيج.
درت وجهي ما سمعته ورحت طايرة مثل الطلقة اركض طلعت من البستان واحس شعري انسحب بقوة وكفت برعب وما احس الا الراچديات تتوالة...
رجعني للواقع صوت يكول بيج شي فتحت عيوني شفتة گدامي حجه بتساؤل...
حيدر: -شتسوين هنا
لبوة: رديت بهفوت اريد ارجع للبيت
حيدر: -لبوة بس اريد اسئلج سؤال وتجاوبين بشكل مقنع
لبوة: حجيت برود تفضل
حيدر: شفتج صافنة علية خو ماكو شي
.
لبوة: حجة الكلام ورفع حاجبة رديت بعدم مبالاة ماجنت صافنة عليك يمكن الأثر بيدك ثار انتباهي ورجعني ليورة...
حيدر: بل مزرعة هم جنتي مركزة بية شنو اني اول واحد عنده اثر بايدة.
لبوة: لاااا بس ذكرت صديق قديم انجرح بنفس المكان
حيدر: -الاعرفة انتي ماعندج اصدقاء ولد
لبوة: صح لكن هذا قديم يعني صديق طفولتي
حيدر: مبين شخص مهم لدرجة تذكرينة لهذا الوقت
لبوة: حجيت بحزن كولش مهم
حيدر: شعجب حالياً ما تتواصين وياه
لبوة: رديت بأسف انكطعت اخبارة من زمااااان
حيدر: -تحبين تشوفينة حالياً
لبوة: -اكيد ولو اعرف ادفع ثمن غالي بس اعرف وين صفة بيه الوكت...
حيدر: -زين وإذا خليتج تلتقين بيه.