رواية لبوة علي للكاتبة كفاية كاظم الفصل العشرون

رواية لبوة علي للكاتبة كفاية كاظم الفصل العشرون

عيونج حليوة مكحلة وموردة الخدين
زينة...
فرحة تغرست بأعماق الروح فراغ بالداخل أعلن عن رحيلة تقاسيم الروح المبعثرة اجة منو يرتبها...
ابتسامة غزوت روحي قبل وجهي همسات الروح تطاير باتجاه الامام...
ضحكت واني اباوعلة من طلعن غمازاتة غارسات بخدة زايداتة جمال وجاذبية مركزة علية بحب همس يم اذني بصوت ناصي.
علاء: -شبيج گمتي تمطگين مناه الناس من تصيرين وحدج سوي اليعجبج خليني صابر شوية.

زينة: -همست بفشلة يااا شبيك شنو امطگ شفتني
علاء: -شني قابل مجذب عليج صدك اني اجذب عليج اني كمت امطگ طالعة تطگين بالكاع بت الحبابة...
خاب دشوفي امي شلون فرحانة يگول حررت الموصل هو زواج شبيج يمة رحمة للكائنات كضي روحج شوية ومن يجيها ابوي تكضيها تعبانة راح اموت محد يحس بيه اخ يالنسوان...
خل اسكت لا تسمعني...
زينة: -هو يسولف واني اضحك على سوالفة احس بيهن ملوحة...

گومونه وكفنه بنص الصالة وشغلو موسيقى هادئه اعتقد راح نرگص سلو...
لزمني من خصري قربني علية كولش خليت ايدي على صدرة وايد الثانية طبگها بيده بقيت اتمايل وي الموسيقى...
لزمني من ايدي فرني ورجعني علية انرطمت بصدرة وهو عيوني عليه حجة بذوبان...
علاء: -تدرين ما اول ماشفتج حسيتج من نصيبي...
زينة: -حجيت واني اباوع بعيونه شلك بيها هاي
علاء: -ورحمة جدي ماادري حسيت بيج شي سحبني الج من اول كلمة گلتيها الي...

زينة: رديت بذوبان شقصدك وضح اكثر
علاء: شوضح وانتي الوضوح بحد ذاته...
كلشي بيج عفوي كلامج ضحكتج روحج...
عيشتيني بحرب نفسية حتى من فكرت اخطبج گلت خاف ماتقبل بيه لو تحب شخص ثاني...
تدرين من فكرت عندج شخص صار عصار بروحي بس بعدين طمنت والله وأهل البيت ماقصرو...
زينة: -اممم صدوك اكو سؤال دوم بالي شلون تجرأ وتبوسني بالمنزع واني ماعرفك يعني اي وحدة تعجبك تروح تبوسها،؟

علاء: -شذكرج بيها احلى بوسة والله هيج من الكلب طالعة...
زينة: -جاوب.
علاء: -اجاوب ليش مااجاوب...
اكيد مو كل وحده تعجبني واصلا اني ما جنت خال بالي اتقربلج ابد بس بوكتها مدري شجاني شفتج دخلتي وحدج كلت خل اروح احجي وياها اي شي بس بعدين انتي ستفزيتيني...
زينه: -حجيت بشك بس اني لكيتك گدامي حتى بوكتها سحبتني.
علاء: -ههههه مو انتي بقيتي تحجين وي الممرض وتضحكين فاني دخلت قبلج
زينة: -بس بوكتها كرهتك حيل.

علاء: -المهم هسة تحبيني
زينة: -وانت؟ فرني ورجعني اله
علاء: اعشقج
زينة: -اممم حلوة
علاء: -وفيكي من الجمال ما يلفت نظر الاعمى
زينة: -دنكت خجلانة احس بانفاسة الحارة تضرب وجهي
علاء: -هسة شني مو جنها مصخنها كافي رگص
زينة: المصورة جانت تاخذ لقطات رجع يسوي حركات تخزي گدام العالم بدي بعد مااباوع بوجة واحد من الفشلة...

وهو ولا كانة بشر موجوده بعدها رجعنة كعدنة على الكوشة اجت أمه باستني و لبستني گلادة ذهب واساور بكل ايد تلاثة...
وأخواته وحدة لبستني سوار والثانية گلادة ناعمة وامي لبستني طقم كامل گلادة وتراجي وأسوار ومحبس حسيت روحي هندية حتى صرت ثكيلة...
قربت الزفة واجة بابا لابس قاط ازرگ دخل باناقتة وعطرة سابقة حضني قوي...
كال راح اشتاقلج اجاني احساس غريب نزلن دموعي بدون انذار جلبت بيدة واني ابجي...

طبطب على ضهري كمت ابجي بالزايد صح بابا قليل نشوفة بس يبقى افضل واحن من امي بهواي...
كلها كامت تحجي المكياج خرب رفع راسي من حضنة نطوني كلنس اخذاة وبقة يمسح بدموعي على كيف خاف لايخرب المكياج...
باساني براسي وسلماني بيد علاء بعد ما وصاه...
شوف هاي زنو بعمري ما زعلتها ونزلت دموعها.

هاي مو بنتي هاي اميرتي المدلله جنت اشتغل الليل والنهار حتى اضمن اعيشها احسن عيشة اريدك تحافظ عليها وما تنام وهي زعلانة منك ترى ما تلگة بطيبتها وحنيتها...
دگ علاء على صدرة وحجة ماشر على عيونة...
علاء: احطة بعيوني وأن شاء الله مااقصر وممنون من عندك
زينة: -بارك ابوي لعلاء وطلع من القاعة اباوع لامي تصور ولاكانها عاد بالجذب تاثري موقف ابوي شكد فرحني وخلاني احس بالفخر بينهم...

بدت الهلاهل والهوسات الما تخلص وأمة تهوس بعبايتها...
اسمر حنطاوي كل القوط تلوگ علية...
يهل القوط ذبو القوط علاوي لبس قاطة.
وهو يهوس بنصهن اختة كالت...
هاي الرادها وهاي التمناها بس اشر عليها ركض جبناها...
اني دوري هنا بس اضحك منضرهم يخبل.
علاوي ياجكليتة حامض حلو باكيتة.
أمة صاحت بيهن: -ولجن بسچن اريد اكول للبنية شني كلة لعليوي...
فصوص روبة ياگفاها وين دورها ولكاها...
أي والله يمة صدك وين لگيتها...

وعلاوي طفي الكلوب وخدها يشع وي الروب...
زينة: اريد اسيطر على ضحكتي ماكو يكولون لازم العروس تصير ثگيلة بس اني وين لازم اضكك وكلام ام علاء فعلن يضحك گلت لو لبوة تسمعة جان وكفتهن وبقت تسال تعاي خالة تعاي شنو فصوص روبة شنو خدها يشع وي الروب...
لبوة بيها هذا الطبع تحب دقق وخاصه بكلام مامنطقي مثل اموت عليك ومن هذا الحجي
.

بس الصراحة أمه تجنن بمعنى الكلمه كولش حبيتها وهي ماشاء الله بسرعة تنحب اخير شي رادت تهوس بعدها ما گايلة جبنالك...
كام علاء وصاح بيها...
علاء: يمة كافي راح تبعربها
يا خليني اكمل
علاء: كافي بطلت بعد ما اريد يله خل اخذ مريتي ورانه درب طويل
. خاب شمالك ماخليتني اكمل جا انته شجم مرة تعرس لاحگ تشبع لا تخاف...
زينة: وكف بصفي وكومني نزل الكبوس وگال تحضري...

لزمت بيدة واني كولشي ما اشوف طلعنة من القاعة وصوت الهلاهل يطرب والجكليت صار مراگع...
وگفنة رفعت عيني اريد اشوف الكبوس كولش جبير بحيث كولشي ما طالع مني شفت ثنين لازمين خروف واحد بيهم حط السجينة ع ركبتة...
غمضت عيوني وضغطت على ايدة هو حس بيه بعدني مسافة عنهم وضغط على أيدي فتحت عيوني الگاع كلها دم منضر يخوف...

صعدني بالسياره سد الباب وبدأ الرمي السيارة مضللة رفعت الكبوس شوية اشوف الشارع متروس شباب و ضباط بملابس الدوام وسيارات وجلال لازم بندقية ويرمي خرطها خرط الشارع صار بيه رجة...
صعد بصفي واخوة يسوق وأمة كعدت بالصدر وانطلقت السيارة والرمي مستمر بقيت اباوع من الجامة ما حسيت غير دار وجهي علية وبايسني بشفتي مت بدمي منا أمة وأخوة ابتعد شوية يمسح بشفايفي ردت احجي صاحت أمة...

خاب شني شو انته فرد نوب لا حية ولا مستحة ماضل شي لاحگ على رزقك
علاء: -وانتي يمة لهدرجه مركزة وياي...
. ماتسكت شني مركزة وياك أنته زايح المستحة زيح
علاء: ، مرتي وبكيفي
هي لو مو اني صارت مرتك هي لجل عيني رضت بيك شافتني مرة معدلة ورضت بيك عبن اني امك موش لسواد عيونك...
علاء: -والنعم منج ومن اصلج ومحاولاتي صارن بشط شلاگة مع الاسف...

زينة: -متت بدمي ردت تنطبق المقولة مالت يا گاع انشگي وبلعيني احس اشتعلت حرارة درت وجهي للجامة اشوف الزفة وهو يسولف وي أمة...
شوية صار ازدحام نزلو بالشارع جلال وياه شكم واحد وطبالة يدگون بنص الشارع خوب جلال ذب لحم يكول هو العريس وعلاء نزل وياهم ولزم الطبل
وجلال لزملة واحد واحد مكابل الثاني يرگصون.
.
رجع صعد وكل شوية مطلع راسة من الجامة يركص ويرجع يبوسني...

وكفت السيارة واشتغل الرمي من جديد هدء الجو ونزلني وأصدقائه يهوسون زفيناه بصاية حيدر
زفيناه بصاية حيدر، صاح بيهم علاء
علاء: -يلا يولد مشكورين ما قصرتم يلا ارجعو يلا
جلال: زفيناة بصاية حيدررر زفيناة
علاء: -ولك كافي ماتعبت أخذ حيدر واخذ جماعتك ولي شني تعال طب وياي بعد
جلال: استغفر الله بس اذا تريد اوكفلك بالباب انطيك دعم معنوي
حيدر: بسيطة علاء وين تروح تطير.

علاء: -لا هذا حيدر ابد مو عليك الحجي انته وين اكو منك اني احجي على جلال وعلى هاي كشختك لو شايفلك مرة وزفتنة صارت سوة...
جلال: -الخوف يعمي الشوف حتى حجية يخبل...
علاء: -خاب انجب ولي
جلال ؛-وسفة عليك حيلي راح واني ارگصلك
علاء: -بعد شيبي جلولة شو تعاي احبك وأن شاء الله مااقصر وياك أنته وحمدية
جلال: -شو زعلت
علاء: لا تزعل بعد اخوك بس يخلص عرسي ازفك بيدي.

زينة: -اباوعلهم شلون صحبان نفس الشخصيه علاء لازم ايدة ويقنع بيه وذاك مسوي روحة زعلان اخير شي بأسه الا مشة وجماعتة يصيحون اكتل البزون
بيومة اكتله بعد اخوك...
الصراحة اني خفت يمكن عدهم عادة يكتل بزون والله لو صدوك ويكتله ابد ما ابقة وياة هسة الخروف دمة برگبتمن خطية انوب بزون هذا مو عرس...
صعدونه للطابق البية الغرفة رجلية كامن وحدة تطگ بوحده من الخوف صعدت أمه وهي تهوس وتهلهل.

اول منبدي وشنكول ولا اله الا الله والف الصلاه على الرسول...
السلام عليك يا حبيب الله محمد كلولششششس
لزمت علاء من ايدة توصية...
. دير بالك على البنية مو جنك ما شايف شوف ترة البت رقيقة وانته صقيع على كيفك وياها ابني ما أوصيك.
علاء: -شبية ما شايف
ليش اني مجذبة وين شايف كيك ينوكل
علاء: -يمة تعاي طبي بدالي
صدك ما تستحي يلا اني رايحة.

زينة: -هي تحجي واني ميتة خوف على خجل اجت باستني وراحت سد الباب ورة أمة واجة يمي رفع الكبوس وباسني براسي وهمس يم اذني
علاء: -مبروك
زينة: -همست واني ارجف الله يبارك بيك
علاء: يله روحي بدلي لو انزعها الج
زينة: حجت بتوتر لا شكرا اني اعرف انزعها
دخلت للحمام نزعت البدلة وسبحت ضربت على گصتي نسيت اجيب ملابس خرب حضي هسة شلون
بقيت بالحمام دگ علية الباب...
علاء: -ها شني بيج شي.

زينة: حجيت بصوت ناصي شوية بعد وابجي نسيت ملابسي.
علاء: -يله هسة اجيبلج
زينة: -ضليت اكل بروحي من اول يوم بدا الثول
شوية ودگ الباب اخذتهن من ايدة وفتحتهن لطمت على وجهي جايبلي ملابس دخليات وقميص نوم ابيض يگول مالت جهال هو وياه روب طويل بس ما جايبة الي...
لبست وبقيت بمكاني فتحت الباب شفته ماكو ركضت طلعت ازار الصلاة لبستة درت وجهي وهو صار بوجهي صحت بية نصلييي رد عليه بصحكة.

علاء: -علكيفج نصلي يله بس خل اتوضة
زينة: راح توضة وصار مقابيلي يصلي واني وراة صليت صلاتي وصلاه الزواج والدعاء وهو كذالك كمل وگام
علاء: -يلا تعاي تعشي راح الاكل يبرد
زينة: يلا هسة الحگك راح واني رحت نزعت الايزار وطلعت الروب شوية ستر صح هو تور مبين الجسم بس احسن شعري مبلل ردت امشطة صاح علية.
علاء: الاكل برد
زينة: -بس امشط شعري
علاء: -بعدين مشطية تعاي اكلي من الصبح ولجاي بدون اكل.

زينة: -كعدت مقابيلة وبديت اكل احس اللكمة توكف بلعومي انطاني عصير وگام يسويلي لگمات صغار
حجيت بتوتر لا اني اكل شنو قابل طفلة
علاء: -صدگ انتي طفلتي
زينة: -كلت بگلبي لا بله مدري ليش ما ارادده لو غير يوم گتلة
علاء: -شعجب ما كلتي لا بلة
زينة: -رفعت راسي فاتحة عيوني هذا شلون عرف هيج ردت اكول گام يضحك
علاء: -ادري بيج تكولينها بس اليوم حكم عليج الخجل ترى بعدني نفسة علاء كل شوية وكلتي انجوب.
يحجي مقلد صوتي.

زينة: -يمتها كلت هيج
علاء: -اه نسيتي بس مناة ورايح تنسين كلمة انجب مو مثل كبل خوش
زينة: -هزيت راسي وحجيت خوش
علاء: -اروح فدوة للهوش قصدي للخوش...
اكلج شو ماتاكلين خوب من عزمتج بالمطعم ماخليتي المواعين غسلتيهن غسل...
زينة: -ادري بيك حطيت عينك على اكلي بذاك اليوم بس انت ما خليتني ادفع الحساب هسة راح تضل تسولفها لحفادنه.
علاء: -فدوة الج الحساب واهلة بوكتها ردت اكلج...

زينة: -رفعت حاجبي ماعاجبني بس لايضل يعيرني بيها اني من توتري اكلت هواي والله عندي حالات.
علاء: -اني اروح أسبح وانتي اكلي زين...
زينة: -تم...
گام علاء وهو مبتسم واني كملت ضبيت الاكل مشطت شعري وشسورتة...
خليت شوية تنت طبعاً بشرتي صافية ما يحتاج حسيت بانفاس حارة بركبتي رجفة سرت بجسمي دار وجهي علية ملابس قميص...
غمضت عيوني وحجيت صدوك راح تكتل البزون طكها بصحكة وحجة غاص بالضحك...
علاء: -يابزون.

زينة: -حجيت واني اطگطگ باصابعي هم كلولك اكتل البزون
علاء: خيولون عوفينة منهم هسة
زينة: -حسيت بخوف مو طبيعي خليت ايدي على وجهي وبقيت ابچي وخر ايدي من وجهي وحضن وجهي بادية حجة بصوت ناصي مطمني
علاء: -شبيج صدگ جذب قابل اجبرج على شي انتي ماتريدينة اذا مو بموافقتج ما اسوي شي اروح الف راسي وانام...
زينة: -حجيت واني اشهگ اخاف
علاء: ليش اني جني حتى تخافين مني.

ترة بعدني نفسة علاء تمدين السانج علية شطولة جنة بيكيسي شو ولامرة استحيتي وسكتي بس اليوم شبيج زنزن...
تعاي اسولفلج سالفة عن البزون...
زينة: -هم البزون
علاء: بكيفج تريدين نغير نروح لغير حيوان بس لا تروحين للأسد خاف تجينة لبوة هدادة وراه واني ما ناقصها وانتي تشوفينها منا تجلبين وياها واني اضل مكابل حجي خضير...
زينة: -ههههه
طبعاً علاء عنده سوالف تموت ضحك ومن سالفة البزون واكل بعقلي حلاوة...

صرت ماله وحاله...

لم اتعافى لقد أجبرت على تخطي كل شي،!
لبوة...
امشي بين الأشجار والهوى الطلق بوجهي يخترق الشال المخليتة على راسي رجلية بنص الزرع اباوع للمكان كولشي بيه إلى ذكرة...
تنهدت بتعب واني امشي بين الشجر...
كبرن اي كبر واني بقيت ذيج الطفلة الما تندل دربهة
بكل مكان تنتظر يرجع غايبها تنتظر تخلص مآساتها راح يخلص العمر وكولشي ما انتهى لا اني ولا مآساتي...

ابتسمت واني اتذكر شلون جنت قبل جني شاذي على گولة الملا اتسلق الشجر ومرة جلب شعري بالشجرة لأن ماالمه احس راسي انشلع بقيت على وضعي منا لمن اجة الملا فل شعري ونزلني...
كل مرة جان ينزلني شكد اله مواقف حلوة وياي لو الناس تعرف بساطة الاشياء النقدمها للآخرين شكد تبقى الها اثر چان محد قصر بفعل الشي الزين...

درت وجهي من سمعت صوت شفت ابو امير لابس دشداشه والغترة شامرها على راسة بملل والشيب تارس وجهة ابتسمت ومشيت باتجاهة...
شلونج حجي
ابو امير: -هلا وكل الهلا شلونج بوية ما تسألين ليش هيج گطعتي بينه فرد گطعة...
لبوة: حجيت وعيوني دور بملامحة الكبرانة الدنيا شغلتنة ودخلتنة بدوامة نحير شلون نطلع منها والطيب الشفتة من عدكم كفيل يطلعني ويجيبني الكم ومثل ميگولون الروح لهل الروح حنت...

ابو داوود: -والله يا بوية حگج بس احنة نعتب عليج چي انتي بنيتنة
لبوة: -الكلام اله دور كولش جبير ويأثر على الإنسان لذالك انعد من ضمن الصدقات عن رسولنا الكريم
الكلمة الطيبة صدقة...
ماعرفت ارد علية اكتفيت ببتسامة نزلت راسي وحجيت بهدوئي المتعارف عليه: -الحجية شلونها.
ابو امير: -كواكة ساعة تصير زينة وساعة شينة
دوم بطاريج.
لبوة: -اصلية والاصيل ماينسة ناسة...

اريد اسئلة بس استحي الكلام يروح ويرجع سوة فضل من حجةة.
ابو امير: -امشي بوية وياي كلها تنشد عليج وخصوصاً امير.
لبوة: -شلونة؟
أبو امير: والله يابوية على حطتة ماتغيير بيه شي يأخذ علاج وعايش الحمد لله
لبوة: -الحمد الله دائما وابدا
مشيت مسافه مو كلش بعيدة من بعيد لاگتنة الجهال واحد يركض ورة اللخ...
ابو امير: -ولكم شني هاي شبيكم لا تطيحون مابينة حيل السنة نگضيها كسور.
مانطيح لا تخاف جاي نلعب شحيتان.

ابو امير: -العبو بس موش تتعاركون ترة الزملكم الصوندة ايبسها على ضهوركم وانته حسين ومجتبى
تسمعون...
. نسمع نسمع بس جدو منين هاي الصاكة الوياك
ابو امير: ولكم شو انتم ما تستحون شني صاكة هاي دكتورة احجو عدل لا تفشلونة
انتي شسمج
لبوة: -ابتسمت على طريقة كلامهم وعفويتهم كولشي عدهم نضيف وصافي من كلوبهم، كلامهم، روحهم
الحلوة...

جهالهم يخبلون عيونهم ملونة وخدودهم صايرة حمرة من الشمس جاوبت واني مخلية ايدي من الشمس صايرة بوجهي، لبوة
شني هاي لبوة
لبوة: -ضحكت على فطريتهم يبوووو حتى انتم علقتو على اسمي شسوي اروح اغيره بالجنسية حجت بنية مقلدة حركتي...
لا حلو انتي عيونج تشبة اللبوة هم هيج يخوفن
لا لاتجذبين ما يخوفن أصلن عيونها يخبلن شوفي
شلون صايرات.
لبوة: -كرصت خدوده وحجيت بابتسامة عيونك احلى.

دنگ راسة عود خجل ضحكت وبستة بخدة لو طفر من ايدي درت وجهي اشوفة طگاها ركضة بعيد ضحكت من كل كلبي علية...
اباوعلهم عيونهم علية الله اليستر سمعت صوت وحدة تصيح...
زهرة: يااا هاي ياهي خاب تعالو شوفو ياهي الاچت
لبوة: رحت الها وسلمت عليها سلام حار لأن صار فترة كلش طويلة ماشايفتها...
زهرة: صدگ جذب خاب مااصدگ عيوني عود هاي انتي لبوة
لبوة: -هزيت راسي ببتسامة
زهرة: -تعاي انفوت جوة حبوبتي كلش مشتاگتلج.

لبوة: حتى اني...
مشيت وياها وهي طايرة من الفرح بيت حجي خلاطي ناس معروفين بروحهم الطيبة وتواضعهم من جنت طفلة اروحلهم ومن كملت دراسة اجيتهم كذا مرة...

دخلت لبيتهم المنظر كولش حلو ويرجع التفاؤل ويبين الناس بعدها بخير والگلوب متصافية ثنين بنات شابات وحدة تاخذ للثانية خيط وام فلاح بيدها صينينه بيها تمن تنضف بيه والحجية لازمه سبحتها وكاعدة على الكرسي وام امير كاعدات يمها بنات صغار تمشط بشعرهن ومرت حماها تغسل ملابس وتسولف وياها...
من دخلت الكل تفاجىء ام امير گامت على حيلها
وسلمت علية شگد احبها تحسها ملاك نازل من السمة اكو ناس هيج شوفتهم راحة...

بعدها سلمت ع الكل وخصوصا الحجية گلبي طاگ عليها احس بالامان من اكون يمها المهرب الوحيد اللتجء اله جانت تحميني ماتخلي ايد تنمد علي...
اول ما شفتها دموعي نزلت وشهگتي ماگدرت اسيطر عليها رفعت راسها عيونها تعبانة...
بعدني اشوفها المره القوية التحميني صعبة كولش صعبة من تحميك الناس الغرب من أهلك اخخ بعدني اتذكر ياريت تنمسح ذاكرتي واخلص حجت وهي بحالة ذهول...

-ولكم هاي ياهي يو اني مااشوف خاب يزهرة علميني هاي بنيتي لبوة يو اني عميت...
زهرة: اي چدة هاي لبوة
لبوة: -رادت تگوم ماتگدر مشيت مسافه أحسها مترات نزلت بالگاع جوة رجليها ولزمت أيدها وكنت انحب بصوت مسموع...
اول مرة ما استحي ابجي گدام واحد حضنتني وگامت تبجي وياي جلبت بثوبها الاسود مثل سواد الخيم على روحي ودموعي تتناثر بغزارة بجيت لمن تعبت شالت راسي وأخذت تمسح بيدها الدافية على وجهي حجيت بصوت مبحوح...

شتاگيتلج جدة ردت عليه بعد ما باست وجهي بكل مكان
-فتتي گلبي يجدة خفت اموت وضل شوفتج حسرة
بگلبي ولج اني يچدة مثل يعگوب هيج متحسرة على شوفتج وادعيلج بكل صبح ومسية...
لبوة: بست اديها واني اتلمس شرايينها البارزة حجيت بقهر ما اگدر اجي وهذا حالي اخذت وعد من اتغيير اجيج وما ردت اگطع بهلوعد بس اليوم گلبي ورحي سحلني وعافن ذاك الوعد على صفحة...
اريد اشوف احبابي قبل لا اروح اريد اودعهم واشمهم لآخر مرة...

-يبعد هلي لا تبچين چم مرة گتلج دموعي غاليات لاتخلينهن ينزلن
لبوة: -رخصونهن چدة رخصوهن من زمان
-الله يراويني بيهم يوم كبل ما اموت تعاي ندش جوة وانتي زهيرة جيبي ماي بارد...
لبوة: -اخذت بيد الحجية مدري هي اخذت بيدي احس حيلي رايح دخلت لغرفتها عطرها ترس ريتي...
خلتني بحضنها فليت الشال وبقت تمرر أصابعها بشعري حضنتها وبجيت بچي مال واحد ضايع منكسر وحيد غريب ضعيف مايعرف شيسوي...

خلتني براحتي تدري بيه اكدس بگلبي حسيت براحة نزلت على روحي وانتعشت غفيت بحضنها الدافي نمت مرتاحة ولأول مرة من بعد سنين گلبي خالي من التعب تمنيت مااگعد ابد...
هم أناس...
لايوجد مثيل لهم...
حاولوا اصلاح روحي المنكسرة...
حاولوا إطفاء ناري عندما كان هناك شحة في المياة...
دعني لااقول شي فكل كلمات الوصف والجمال لاتوفي حقهم...
رحماء، كرماء، غرباء هم من أهل الروح...
-جدة روحي توجعني.

-لاتسوين بروحج هيج لبوتي ماعلمتها تصير
ضعيفة ردتج تصيرين نفس چدتج گوية...
-بس اني مو مثلج.
-اي انتي يچدة اگوة مني
-ابد مو هيج...
چدة اريد اشوف امير...
-تشوفينة بس مو بهاذا حالج اغسلي ويهج كافي بجي يچدة
لبوة: -غسلت وجهي وشربت مي عدلت شالي سمعت طگطگة وراي درت وجهي ركزت عيوني علية هو اي هو امير گاعد على كرسي متحرك ملامحة كبرانة صاير شاب رافع شعرة الاشگر مثل لون عيونة حجة يحاول يطلع جملة...

امير: -ش ش شلونج للببووةةة
لبوة: -رحت باتجاهة واني اضحك بهستريا الكل تفاجأ
من ردت فعلي حتى هو ابتسم بخجل عيوني دمعن واني اضحك حجيت بصوت مگطوع...
اول مرة اشوف شوارب صفر منين جاي من صار الاحتلال ذبوك ومشو جذور امريكا أنته...
مسحت وجهي احاول مابين الشعور البداخلي واخلية ينتبة باوعت بعيونة وحجيت بهمس زينة انت شلونك...
امير: -ززيين ببسسس انتتي مموو زينةةة.

لبوة: -حكيت طرف خشمي حجيت واني اباوع لادية لا امير اني كلشش زينة ولو مو زينة مثل متكول ما اجيت اشوفك ابتسمت بوجهة وحجيت بصوت مرح نلعب...
حسيتة فرح امير صح عمرة جبير بس روحة روح طفل...
بقينة نلعب اني وياة والجهال التمت علينة لعبنة محيبس حجرة ومقص حية ودرج ولا جني دكتورة وجبيرة رجعت الطفولتي الما شبعت منها لعب...

اشوف الفرحة على وجهة انتعشت روحي بقيت يمهم للعصر تغديت وتونست رغم ممنوع علية اروح الهم بس ميهمني هالشي يمكن قبل اهتم لأن اخاف يبطلوني من المدرسة إذا خالفت كلامهم بس هسة ماعندي شي اخسرة...
طلعت من عدهم واحس باحساس كولش حلو رغم بجيت هواي من شوقي الهم والم والحيرة البداخلي...
رجعت للبيت مشي همة صايرين ورانة اكو اراضي زراعية بينة يعني مسافة مو هينة تعبت من المشي كعدت جوة شجرة اسمع صوت العصافير...

ابتسمت واني اشوفهن يتعاركن حتى العصافير تتعارك الله اكبر برودة المكان نحلتني گعدت متذكرة الصار البارحة بعرس زينة...
جنت اريد ارجع لابسة صاية كولش عريضة لأن فستاني ضيگ وشال بلونها ومكياجي ماسحتة بقة بس رسم عيوني عجبني فبقيتة...
ماادري شنو الشي اليخليني اتناقش وي حيدر بطبعي ابد مااتجاوب وي شخص.
انصدمت من كالي تريدين تشوفينة...
.

منين وين يعرفة اني ماعرفة هو شلون يعرفة عقلي عجز عن التفكير كلبي يدگ باعلى سرعة...
اكو أشخاص مرو بحياتنة صدفة انتهت الصدفة وخلص وقتها بس ماانتهى تفكيرنة بذولي الأشخاص
تحب تعرف وين وشلون صارو...
بية طبع دمرني وخلاني ابتعد عن بناء اي علاقة التفكير بالأشخاص وخصوصاً الأشخاص الحبيتهم والدخلو بكلبي...

مشكلة مالها حل من ابوي صار على غيابة 17سنة أو أكثر ما مر يوم ماذكرتة وذكرت ايامنة سوى كل لحظة مانسيتها يوم وبقى أتذكرها...
حتى يقين الطفلة السويت لوالدها عملية أتذكرها وافكر بيها وسوارها بعده بيدي لابستة...
عن اي نسيان تتحدثون ونحن والوفاء يمشي في عروقنا...
الشي الوحيد اليخلي الإنسان على قيد الحياة هي الذكريات أن كانت حلوة او مرة.
الحلوة تنعش روحنة والمرة نتذكر العبرة وماننسة العشناه وننكر ماضينا...

طفلة تعد ذكريات والدها وي نفسها تسلي نفسها من الوحدة...
اجه شخص قضى على وحدتها وبعد ماتعودت علية وحبت وجودة وتغيرت من نفسيتها بسببة اختفى...
اي جان صديق شاركتة هواي شغلات تقاسمنة معانات يكولون اليشوف مصيبة غيرة تهون عليه مصيبتة...
لعب الزمن وياه دور بحيث احمد ربي الف مرة على حالي من اشوفة الشمس ماخذة نص حيلة والتعب ماخذ النص الثاني...

طفل اي بنضري طفل حتى لو اكبر مني بس اعتبرة طفل ماعاش طفولة جان يجي وجهها احمر والتشيرت مالتة مشگوگ وكل يومية متعارك...
مرة حاولوا يدجونة بسجين بس هو قوي دافع عن نفسة واجت السچين بيدة خاف على أمة لا تشوفة بهذا المنظر اجي يمي اتذكر بوكتها تخبلت من شفت ايدة الشريين طالعة.

وبعد وبعد اشكال شاف حاربوا بربع دينار اليطلعة مايقبلون يشتغل يمهم صايرين عصابات كل واحد يكول هذا الشارع شارعي والمنطقة منطقتي مع الاسف هذا بالعراق حتى اليشتغل بالحلال محد يخلية...
من انگطعت اخبارة خفت علية منهم لأن هما عصابات اليحاجيهنم يكتلوة وهو عنيد ماضل بيدي غير ادعيلة بكل صلاة هذا جان الاتفاق إذا ما التقينة والزمن اخذنة الدعوة الصادقة أن جان حي او ميت...

وبيوم تأيس من اللقاء تسمع كلام مثل هذا ماردت شي بس اشوفة شلون صار شكلة مرتة اطفالة شيشتغل شياكل ششيرب بس أبرد كلبي من ناحيتة واسافر واني مطمنة عن ناسي...
بقيت ارمش بعيوني صوتي كوة يطلع اننتت وين تعرفة رد برود وهو يباوع بعيوني...
حيدر: -تعرفين كلشي بس بالاول تشوفية وتتاكدين من عندة والنة حديث بهذا الموضوع...
لبوة: -حجة الكلام ودار وجهة مشة بخطوات ثابتة واني بحيرة من امري استفزني بنقطة ضعفي...

الشي الوحيد الاسوية بحياتي هو السكوت لأن الكلام يكشف هواي اشياء عني ويمكن البعض يستغلها مثل ماهو استغل هالشي...
حجيت بعصبية وين رايح وانته ماجاوبتني
رد عليه بنفس بروده وكمل مشيتة...
حيدر: -گتلج اوديج اله وشوفية بعد شسويلج بس حبيت اساعدج...
لبوة: -الشارع جان شبة فارغ بعدها الزفة ماجاية والناس قلة دنيا ضهر الساعة بتلاثة ضبط صعد سيارتة واني احترگت مناه شمس ومنا استفزاز...

اي استفزاز شنو تفسرين يجي شخص يحجي وياج باكثر شي محتاجتة ينطية الج بس المقابل شنو يا ترى...
فتحت باب السيارة واني اتذكرت من رجعت من المحكمة بيها جان يوم شؤم ادمرت نفسيتي وخطيت هواي خطوات بسبب الصار...
صعدت بالصدر وطبكت الباب حيل بقة يباوعولي بنضرات مكدرت افسرها حجيت واني رافعة اصبعي بوجهة...

شوف لا عبالك اني منا منا شكد شايف بس مثلي مراح تشوف بس تحاول مجرد تفكرة فكرة تلكة روحك بصف ابو لهب اذا جاوزت الحدود موتك على أيدي ثق واعتقد عندي قوة أكدر اموتك بيد وحدة ضحك بصوت عالي وهو يباوعلي...
حيدر: -شطلعتي بوية ما تگلليلي انوب بيد وحدة
بس سؤال شعندج وي ابو لهب هاي ثاني مرة تهدديني تشمريني يمة...
لبوة: -حجيت واني اباوع على الشارع لاتستهزء بوية وامشي بلا كلام...
حيدر: -حاضر دكتورة لبوة.

لبوة: -مشت السيارة مسافة واني كلبي مثل النار ماادري الشي الجاي اسوية صح غلط ما اعرف نيتة شنو بالضبط شمضموملي شراح يصير عقلي يصور الف شغلة والف سؤال طرح وكلبي يدك بقوة مااعرف الصح من الغلط...
درت وجهي اباوعلة وهو يسوق عقجت حواجبي وحجيت أنته شرايد...
حجة وهو يسوق وعينة على الطريق...
حيدر: - كفيلج الله ما رايد شي منج ولاتفكرين تدني نفسي عليج ترة حاط اخواتي كدام عيوني...
لبوة: ليش انت بالذات ليش مو غيرك.

حيدر: -هسة تعرفين كلشي بس اصبري...
لبوة: -فتحت الجامة البصفي دخل الهوة صاح بيه...
حيدر: -سديها اني المن مشغل تبريد.
لبوة: -غلست وطلعت ايدي من عدها سكت ماحجة شي طبكت السيارة يم بيت صغير باوعت علية بتساؤل نزل واستند بالسيارة نزلت وصرت بصفة تقريبا كتمت عصبيتي وحجيت...
يلا وينة روح صيحةخل اشوفة...
مد ايدة كدامي بيها مفاتيح حجيت بتساؤل شنو هذا.
حيدر: -مفاتيح البيت.

لبوة: حجيت واني افح من العصبية انت جنيت على نفسك شفتني وحدة رخيصة...
أنته فتحت عليك ابواب جهنم بتفكيرك هذا والله يا حيدر إذا ماسحلتك أنته ورتبتك بالمحاكم وخليت سيرتك على كل السان واصغر جندي يضحك عليك فلا اتسمى لبوة عسمى العالم كله يحجي بشرفي...
حيدر: انتي شبيج خبلة كتلج هاي الفكرة شيليها واحترمي نفسج ولاتتجاوزين بالكلام ثاني مرة...
لبوة: -اني محترمة نفسي بس أنته بهذا تصرفك ماخليت احترام النفسك...

حيدر: -انتيي كلشي عندج عرك...
شوفي هذا البيت بيه هواي شغلات تخصج ومن انطيتج المفاتيح ادري بيج ماتدخلين إذا اني وياج فروحي ادخلي وشوفي...
واني مو بدون اخلاق وهذا كلامج احاسبج علية بس مو هسة اله يوم...
لبوة: -رجع گعد بالسيارة واني بقيت واكفة وأفكاري تتناطح صح اني اعتبر نفسي قوية ومحد يكدر يحاجيني بس كولشي جائز حجة شكل واليصيرشكل كلامة مثل الغز هسة شسوي...

ضحكت على روحي وهزيت ايدي هاي اني لبوة اخاف من رجال لو من الراح يصير شيصير أكثر من الصار يمكن هاي مغامرة جديدة وشكلي احب المغامرات...
فتحت الباب الخارجي باوعتلة كاعد بالسيارة ويدخن لعبت نفسي من منظرة دخلت للبيت جان شوية قديم بس نضيف بالحوش شجرة مالت زيتون جبيرة...
واستقبال صغيرة باب المطبخ بية سرگي بدون قفل فتحتة زين نضيف بس مبين محد ساكن بية...
الصالة بوجهي بيها قنفات قديمة مفروشة فراش قديم...

درت وجهي خاف اجة وراي ماكو رجعت ادور بالبيت صح كهرباء ماكو بس ضاوي مو اضلم اكو غرفة مديت راسي بيها بدون فراش ومتروسة الأرضية الالوان...
جذبني شي الها مخفت اريد اشوف شبيها جانت عبارة عن لوحات بالكاع وحده بصف اللخ والوان وفرش تصبيغ...
عجيب أمرها انتبهت على اللوحات جانت طفلة صغيرة شعرها مثل الطاير عيونها لونها بارز اخضر بصفها فرس صغير درت وجهي كلهن نفس الرسمة بس اختلاف نوعية اللوان...

لاحظت اكو تحسن بين لوحة والثانية استقرت عيني على لوحة جبيرة معلكة بس رسمها ممتاز احلى وحده بيهم اعتقد جديدة...
كولشي ماافتهمت دخت بالزايد ليش اجيت ليش هاي الوحات ونفس الرسم وينة الولد...
طلعت لكيتة على كعدتة لزمت راسي واني اشر على البيت شنو هاي أنته شبيك المن جايبني هنا شكلولك اني فنانة واقيم هاي اللوحات...
حيدر: -عرفتي هاي البنية المرسومة هي وفرسها
لبوة: -هزيت براسي اريدة يكمل...

حيدر: -هاي انتي وايلام تذكرين من جنتي تشخبطين على أساس ترسمين.
بعدين تشككين الورقة وتمشطين بايلام وعايفة شعرج مفتوح الهوة يلعب بيه...
طلبتي مرة ارسمج وبوكتها كمتي تصرخين بوجهي من ذاك اليوم وعدت نفسي اتعلم وارسمج وهذا اني عد وعدي رسمتج...
لبوة: -جمدت بمكاني من سمعت كلامة انتبهت لايدة نفس الأثر وحتى بنفس المكان وكلامة صحيح عجزت عن النطق بالكلام بس اباوع بشكلة واتفحصة اي نفس لون العيون...

حيدر: -تدرين شنو احلى شي لااني اعرف اسمج ولاانتي تعرفين اسمي هههههه سالفة تضحك...
بس اني عرفتج من عيونج تذكرين من اكلج عيونج برتقاليات وانتي تكليلي لا خضر جان قصدي لون برتقالي داخل اللون الأخضر بحيث مميزات كلش وخاصة من تصيرين عصبية يزيد اللون البرتقالي بالضبط مثل الحريق في وسط الغابه...

لبوة: -كلامي شتتني فعلا هو ماعندي شك بكلامة مانطقت بكلمة وحدة بس شي بداخلي اطمئن ع حياه هذا الصديق حجيت وإني اباوع بعيونة...
جنت افكر بيك خاف قتلوك وذبوك افكر بامك وين صرت شلون عايش أنته وجهالك محتاجين شي تنامون جوعانين شبعانين بس الحمد لله من انت بأفضل حال...
حيدر: -منو كال بأفضل حال صح مامحتاج شي فلوس سلطة سيارة بيت كلشي عندي بس ابد ما مرتاح...

لبوة: -الله يريح بالك وتعيش بسعادة من بعد ماارتاح بالي من رخصتك وراي درب طويل درت وجهي ومشيت صاح وراي...
حيدر: -من حجيتي بية عبالي اذا تشوفينة راح تكون الج ردت فعل وتطيرين من الفرح بس الضاهر ما همج من عرفتي...
لبوة: -انته فاهم غلط الضاهر متخيل مشهد رومانسي مثل الافلام التركية تجي البطلة تحضن صديقها...

بابا احنه بالعراق وثانيا انت جنت شكل وهسه شكل جنت بريئ واني كولشي ماعرف بس هسة أنته رجال والناس تحكم على الضاهر...
وخلال هاي السنين اتبعت اشياء تختلف المهم تغيرنا هواي لانت طفل ولا اني شعري منثور والجهال تصيح علية...
جنت افكر بيك والحمد لله من انت بهذا حالك جنت مفكرة غير شكل فكرت عندك اطفال تشغل وماتلحگ
علي عيشتهم جنت ماكلة همك...
الله يوفقك ويصير عندك اطفال ويوفقني ويكملها وياي...

حيدر: -كلامج صحيح بس نضرتي ماتغيرت تجاهج بعدج بعيني ذيج الطفلة العصبية...
لبوة: -عصبية هههه ادعيلي...
حيدر: -ادعيلج كل يوم بس عندج شي معين...
لبوة: حتى اني هههه والله دنيا من ردت اسافر طلعت إلى خالة حنونة وبنات خالة جنهن ورد وصديق قديم ضهر قبل سفري بكم يوم...
حيدر: -شني وين تريدين تروحين!؟
لبوة: -عوفك من هالخرط بس اذا صار اتواصل وياك واذكرك بايام زمان وشكرا لأن مانسيتني درت وجهي ومشيت...

حيدر: -تعاي بس فهميني وين تريدين تروحين
لبوة: -خليها سكتة يله باي...
مرت تكسي اشرتلها وكفت صعدت بيها مشيت السيارة درت وجهي اباوعلة من الجامة مخلي ايدة فوگ راسة تنفست بقهر واني اتذكر من خطبني وكال اعرف كل حالاتج ومتقبلج...
شصار لو هذا الكلام مو بهذا الوقت...
اطمنت حتى على الشخص إلى من المستحيل گلت التقي والقدر جمعني بية...

بقة بس كسرة روحي فعلا من راح كسر روحي بروحتة اجة الوقت الاواجة بيه الواقع الشاردة من عندة سنين كافي لازم اموت احساسي والامل المزروع بداخلي...
خلص على راح ما منه رجعة...
وصلت للبيت اي هذا بر الأمان هنا محد يگدر يشوف انكساري تنهدت واني اباوع على حيطانة كل شي بيه إلى ذكرة هزت روحي هز...
صفنت بالمكان حسيت بحرارة بجسمي استغفرت الله ذبيت الشال والصاية عيوني جمرت...

دخلت للغرفة اطلعلي ملابس كمت اشوف نار محاوطتني صحت بصوت عالي احترگتتتتت.
طفوني...