رواية عروس الهور الجزء الأول للكاتبة هيلانا الفصل السابع والعشرون
يوم الجمعة ورة صلاة الظهر بعد ما رجع عمي وأزاد وعساف من الجامع
ورة الغدة جمعنة ازاد بالصالة وكال عندة موضوع مهم ويانة
ألله يستر من مواضيعة
كاعدة بصف ماما ومرام أبصفي ومن جهة الثانية مكابلني أزاد وعساف وأم ازاد هم جانت موجودة
وعمي كاعد أكبالنة هم
انرسمت ابتسامة عريضة على وجه أزاد وتحمحم تميهد لفتح الموضوع
والكل منتظرتة بذات هو جمعنة بس أحنا ومرام كل شوي تكرصني من أيدي وتهمس
: -أبن عمج القندرة شعندة.
: -مادري منتظرة يحجي ويفضنة لان توترت خاف عرف بينة من جنة بغرفتة وشفنا هو وذيج
: -لج واذا عرف شنو يجي يهرمل هنا ويفضح نفسة
: -لعد أسكتي خلا نسمع
اكو نظرة خبيثة بعيونة يباوع بنظرة مسيطرة يحسسك الناس كله جوة أيدة
حجة بصوت عالٍي ومرح: -أول شي جمعة مباركة على الجميع و اليوم عندي خبر يفرح الكل
أني ومرام وحدة باوعت لثانية بقلق وحيرة
ام أزاد: - خير يمه أزاد شكو؟
عدل كعدتة وباوعلي ببتسامة باردة: -اليوم، إجاني خطاب على أخيتي وبت عمي شجن
كلمةخطاب نزلت مثل الصاعقة علية كلبي فر وطار. و مرام فتحت عيونها على وسعهن
كال عمي بستفهام: -منين هذا الزلمة
رد بثقة: -هذا وساف حجي تعرفة أنت خوش ولد وكلمته مسموعة رجال يعتمد عليه وأهم شي راح يدلل بتنة ونأمن عليها عندة
گامت ماما بسرعة وحجت بعصبية: -ما موافقة شجن بعدها أصغيرة.
أزاد: -أصغيرة مرت عمي؟ جاااا مو ردتي تزوجينه لعمر شني صغرت هساع
رد عمي: -وساف جبير عليها شنو هالحجي بوية مقتنع أنطي بت أخوي لوساف
أزاد: - ليش لا شبي وساف؟
نهال: - كافي خسرت شمس وأدمرت حياتها ما أريد شجن تتدمر هي هم! بناتي ما أزوجهن للاحد لا وساف لا وخريان بس ترجع شمس أخذهن وأمشي
التفت على عمي وكالتلة: -حجيي بي شي خوية أبو عساف.
: -لا بعد أخوج كلامج ذهب وأنتي أمهن وأعرف بمصلحتهن والقرار الاول والاخير للبنية هم جا ما يصير هي هم الها راييي، أنتي شدكولين عمي
جنت جامدة بسرعة هزيت راسي وأني أحرك أدية بعشوائية: -لا اكيددددد ما موافقة مستحيل أصلا هو اصلا شايب مو بعمري شلون فكرت أني أوفق
تأفف وكال: -شبيكم من يمتى نشور النسوان أحنا وبعدين الزواج ستر وساف مو شايب كلش. وبعدين الفلوس تعوض كل شي ويعيشج ملكة وين تلكين هيج.
ابو أزاد: - وساف جبير عليها! ما يصير هيچ! البنية لازم تتزوج واحد بعمرها وماكو اي أجبار
سكت أزاد بس وجهه محتقن من شاف أبو وأمة هم قبلوا أنوب كال اريد أحجي وي الحجي شوية
گمنة طلعنا بس أني ما صعدت خليت ماما صعدت ورجعت نزلت وكفت يم درج أتنصط عليهم
ومرام بصفي تراقب خاف احد يجي ويشوفنا
ما مرتاحتلة ازاد النعال بس لا يقنع عمي
بس مادام ماما رفضت حسيت بالامان همزين ماما موجودة النا وأدافع عنا.
وكفت ومديت راسي شفتة كاعد بصف عمي ويكلة
: -يابة لازم توكف وياي وتقنع بت أخوك هذا الزوج راح يفيدنة
: -ولك بوية وساف جبير عليها
: - ادري بي جبير عليها بس هذا زواج مصلحة
: - مصلحة شنو
أزاد: - مصلحة العائلة مصلحة الكل هذا الزواج راح يخلينا أقوة راح يخلينا نكسر شوكة ابن هاشم
: -شنهي دخل ابن هاشم بهالموضوع أنت جاي تبيع بت عمك حتى تنتقم
گام من مكانه صوته أرتفع مليان غضب.
: -اييي أبيعها وأبيع روحي إذا احتاج الأمر على ال هاشم دمرنا و لازم يدفع الثمن ووساف، هو اللي راح يساعدنا هو اللي راح يخلينا أقوى بعد ونلعب براحتنا
: - بس مو على حساب بت عمك مو على حساب سعادتها البنية أمانة عدنة ماأقبل بالهحجي
أزاد: - السعادة تجي بعدين هسة أهم شي القوة أهم شي نرجع كرامتنا شجن لازم تتزوج وساف هذا قراري وماكو واحد يگدر يغيره.
همست مرام بصوت خافت: -شفتي هذا مو بس يريد يزوجچ لشايب هذا يريد يبيعچ حتى ينتقم
دا أنهار روحي خاوية شسوي أباوعلة واكف شيطان بهيئة بشر
مليان خبث ومكر. عمي ما قابل بس اكيد راح يقنعة مو صعبة عليه
ازاد: - هااا يابة شگلت راح تكون سبب قوتنا لو راح تكون سبب ضعفنا القرار الك
حسيت نفسي محاصرة ومصيري دينحسم كل كلمة جانت مثل البسمار دا تندك بتابوت حياتي يالله وساف الشايب أبو كرش يمة أشلون بيه.
مرام تضغط على أيدي التفتت عليها عيوني مليانة أدموع حجيت بصوت منهار: -شسوووي مرررام شيسووي
حضنتني وتنهدت تحاول أطمنئي بس أني ميتة خوف وحقدت حقد مو طبيعي على أزاد أبودي أكلة أكل بسنوني.
العصر بالمطبخ
شفت سيارات أجن جنت شاكة هو هذا العريس الشايب لان شفت ذني سيارات من قبل هم أجن
ومرام كاعدة تاكل طماطة نية وتفتر يمي مدت راسها تباوع وياي
شفتة نزل هو ويا مرة ثانية لابسة رسمي أسود
وأستقبلهم أزاد بحرارة ومحاضن
وعمي هم سلم عليهم دخلوا جوة للديوان
ومرام رجعت كعدت. بقيت أفتر وأفرك بصابعي راح يتكسرن من كثر، ما طگگتهن.
شجن: -يا الله مرام، شراح أسوي هذا أزاد النعال يريد يزوجني لشايب شايب لچ شايب
تتأفف وهي ترفع إيدها وتأشر بطماطة: - اهدي شجن اهدي
: -أكلچ راح يزوجوني لشايب دكلي أهدي؟
: -اي شبيج هسة. لازم نفكر.
ضربت على گصتي بيأس: -عقلي قفل أحس روحي دا أختنك لچ شفتي شكله چنه بطريق
مرام: - إي والله شفته چنه گلاص لبن مكلوب
شجن: - أني بورطة! حياتي راح تتدمر.
ضربت على رجلها وضحكت: - لچ تذكرين المزموز عصام جان يخبل رفستي نعمتچ برجلچ هسة راح يزوجچ وساف الشايب
شجن: -أهوو عصام شنو أني ما رفست شي أني ما أريد أتزوج لا عصام ولا وساف
طگت علجها وكالت: - چا شتسوين تگضين حياتچ بدون زلمة أرضي بقسمتج
: -مو وكت شقاج مرام.
: -تخيلي تكعدين الصبح وتلگينة نايم يمج و تتأملين كرشة الحلو يكول وحدة بشهر السابع وأسنونة طايحة بس مادام غني عادي المهم تتونسين تبجين بسويسسرا احسن ما تبجين يمي هنا وهم اذا خانج ما راح تنقهرين عادي
باوعتلها صفحت وكعدت على الارضية بيأس: -
ما أدري شأسوي وماما ما راح تكدر تسوي شي أني متاكدة راح يجبروني اكيد يمة الموت ارحملي أنتحر والحك بابا ولا أزوج واحد مثل هذا.
أجت كعدت يمي متربعة لزمت أدية حجت بجدية: -لازم نشرد ماكو غير حل.
شجن: - بس شلون البيت كله حراس
بعدنة دنحجي ودخلت مرت عساف باوعتلنا بشماتة والفرحة وأضحة بعيونها كالت
: -ليش كاعدات بالكاع بنات
مرام: -هيج مرتاحين
: -ها صدك كل واحد يعرف قدرة
: -ياااه شلون تخليني أنزع أخلاقي وأنگع الها تنگيع بس ربج يدري بي
مسحت أدموعي وباوعت لمرام حتى تسكت بس طبعا مرام هي والسكوت أعداء.
تحاجيها حجاية تردك بعشرة ومحضرة جواب لكلشي
مرت عساف طلعت بتيتة تسلك وحجت
: -صدك مبروك شجونة كالوا صديق أزاد متقدم الج هو صح جنتي راح تصيرين شريجتي بس شنسوي ماكو قسمة هو هذا حظج من دنيا ما صحلج تاخذين عساف
كلامها جان مثل السم حسبالها أني ميتة على رجلها جنه أنعال حمام
مرام گامت وتخوصرت حجت بستهزاء
: -ومنو عساف حسام الرسام لو ماجد المهندس لو ما جنة ديج مهلس بس يلا عاذرتج يمكن بس هو منفگج وهيج مجلبة بي.
طگتهة ضحكة بخباثة وسكتت
شوية وسمعنه أصوات الضحك برا كمت ركض أباوع من الشباك أشوفهم ومرام ومرت عساف وراي هم
وساف: - بت أخوك راح تكون ملكة دللها وبعيوني أخليها
عمي هز راسة بحيرة مبين موافق بس مو من كلبة جان ضايج وهذا وساف الشايب دنك وباس أيدة
دا يراهق النعال مصدك نفسه عريس أيع
ازاد: -لازم نكسر شوكة علي! لازم يعرف منو أزاد!
غمضت عيوني بقوة شلون راح أطلع من هالمصيبة ماأتخيل نفسي أزوج هذا الشايب.
مرام: لج القندرة هذا اااخخ لو أشگة شگ
أزاد: -هاا يبااا بعد قرينة الفاتحة ماكو تراجع
رد عليه عمي: -اللي تشوفه بوية
ابتسامة انتصار عريضة أنرسمت على وجه أزاد.
عبالك ديكول بكيفي أمشيكم وأني أقرر مصيركم
سهاد: - عاشت إيدك حجي أنت الخير والبركة
ازاد ضحك بستمتاع وحجة بصوت عالٍي
: -مبروك حجي وساف مبروك عليك العروس
عساف: - الله يبارك بيك أزاد ما قصرت
ما حس غير مرام سحبتني من أيدي: - أمشي شجن أمشي نصعد للغرفة.
بعدنة دنطلع ومرت عساف كالت: -مبروك شجونة منج العيال ومنه المال ومبين مليان مالات مالات
رفعت مرام أصبعها بتهديد: -شووووفي لج ترا روحي بطرف خشمي اذا اجيج هسه أكطع شعفتج هاي أتكفي شىري واانجببي.
: -شدعوة عليج دنبارك لشجونة
شجن: -ميتة على مباركتچ أني
: -أشبيجن احترمن نفسجن هم كاعدات بيتنا وزاعجاتنا وهم لسانجن شطولة عيب أستحن شوية.
مرام: -والله يا قلبي أحنا ما نريد نظل هنا بس شنسوي ازاد وعساف جلبوا بينا خوب عساف موت نفسة كال الا تبقين مرمر كتلة يمعود عنك دونك
يكلي لا. رجعت توسلت بي حتى يخليني ارجع لبغداد واااابد ماقبل يكلي اخاف عليج أنتي وجمالج اليشك شك وناس مو راحة أني أفرغ وااوصلج بيدي
دخنت وحجت بغضب: -شنو هالجذب ترديني أصدكج ووينه جمالج شو تسدين النفس
مرام: -صخونة لهلحك اليلزك ولييي مالي خلگج هسه بعدين أعلمج.
أخذتني وصعدنة للغرفة أول ما دخلنة قفلت الباب وحجت: -عندي فكرة
شجن: -اي يالله شنو
مرام: -أنحط منوم للحراس ومن ينامون نشرد همة مو اكلهم كلة من المطبخ
شجن: -ويالفهيمة المنوم منين أنجيبة وأحنا ما نطلع محجوزين هنا
مرام: -يمي
راحت ركض نزلت أخذتلها نص ساعةوأجتني تضحك
أتامل الحجاية إلى أطمنئي منها
: -ولج هذا القندرة ابن عمج كاعد جوة ينطي محاضرة بالشرف ويسولف وي عمج.
اجيت أكلة فاقد الشي لا يعطي يا بلا شرف همزين لزمت الساني
ضحكت و كعدت اكبالي متربعة على جرباية
: -وهذا الثاني عساف فد قشمر. قشمرتة ودزيته لصييدلية راح يجيب
صفگت أدية بفرحة: -الله عليج شلون
: -وعلي ضحكتلة وطگيتة بغمزة وهو شو كيف وأنوب كتلة مريضة وعندي وجع راس بلا زحمة عليك تجيب لي علاج واذا تكدر حب منوم هم ما دا انام صاير عندي ارق ومدمرة
هزيت راسي بمعنى كملي حجت بمرح.
: -وهو كال حب منوم ما ينطوا بالصيدلية الا وصفة من دكتور، كتلة ابن العمارة الحيد ما أشوف غيرك والحرمة بشارب الخير شو هذا العفطي صدك نفسة وطار كال هسه اجيبلج الصيدلية كله كبرر نسونجي
: -ههههههههه والله أحبج
نفخت نفسها ورفعت حاجب: -لعد أني منو ما يحبني
: -اخ عزيز
: -مايصير بعينج وعلي
: -لااااهههههه
غمتني ونزلت من جرباية تفتر بالغرفة وأطك أصبع
التفتلي تتمضحك
: -دا أفكر أزوج عساف مادام يحب النسوان
: -مرام توبي.
خلت وطلعت أخذتلها شوية وأجت معبسة
كتلها: -خير ما جاب
هزت راسها ب اي: -يكول ما قبلوا ينطوني كبر بكد المطي كل خير مابي
شجن: -هو هذا حظي وأعرفة
مرام: -لا تفكرين هسه نلگة حل
تنهدت واني أفكر شسوي حتى مبايل ما عندي على أقل أطلب المساعدة من عصام
هو صح ساقط بس بي هدة والله بس هو مطيح حظ ولد عمي وخوب عساف ما يلام بي من سحلة ذيج المرة أمداني شگد جنت غبية وما أفكر.
ذولة ولد عمي موتهم ودفنهم لو يخلون جلاب تاكلهم بلا دفن حلال بييهم.
أنفتح باب النادي ببطء متعمد
كاشف عن دخول على وعصام
دخلوا بشكل هادي بدون ما يرفعون أسلحة او شوشرة
بس وجودهم وحده يملي المكان خطر.
حراس أزاد يتأهبون
حجة بصوت هادى وهو يجر الكرسي ويكعد مقابيل عدوة: - أأأزاأأد.
أبتسم أزاد بسخرية ورد: - أهلاً وسهلاً بابن هاشم ما توقعت تجينا بنفسك چا ما دزيت واحد من زمايلك
دور عيونة بالمكان عالموجودين حجة وهو يورث جكارتة: -عندي خيارين الك وماكو ثالث
أزاد: -أسمعك.
علي: -خيار الأول تنطيني مرتي آخذها وأطلع منا. ورا خمس دقايق يتفلش المكان على راسك
صمت مطبق. حراس أزاد يتبادلون النظرات بقلق. أزاد ضحك بصوت عالٍي ضحكة مصطنعة
أزاد: - خمس دقايق؟ أنت جاي تهددني منو كالك تتطلع منا عايش
أخذ نفس من جكارتة وملامحة ثابتة كمل بنفس الهدوء الخيار الثاني: هم تنطيني مرتي آخذها وأطلع منا بس ورا ست دقايق يتفلش المكان على راسك
ضحكة أزاد تتلاشت خازر على بحقد ظاهر.
أزاد: -أنت جاي هنا حتى تموت!
التفت لعصام وأشرلة جان عصام طلع ورقة من جيبة أخذها علي
ومدهة على الطاولة أكبال أزاد إلى أخذلة نظرة عليها وكال بستفهام: -شنو هذا
علي: -هذا بايسكل اذا هسه شغلتة اركبة واطلع من النادي حتى أتظل عايش
ازاد: - ههههههاي لا صدك كمل بسخرية: -مابي بانزين
علي: - تريد تشوف الخمس دقايق شلون تصير؟
أزاد: -أنت كاعد تلعب بالنار ما تگدر تسوي شي ومرتك يمي حركة غلط منك وراح تشوف شي ما شفته بحياتك
علي: -أطلع بالنظيف
ازاد: -هدنة ونتساوم ها شرايك
علي: -أحجي العندك
ازاد: -اتاخذ أجلابك وتتطلع من النادي بدون فوضى وبالمقابل أسلمك شمس صاغ سليم
علي: - هنا أثبت أنتَ كواد لأن بس الكواد يساوم على عرضة وأنة عرضي خط أحمر ما أساوم عليه
لا تختلط الاوراق يمك.
ازاد: -أنت تعرفني زين ما أخاف من تهديداتك وشمس ما تشوفها بحلامك
علي: -أني ما أجيت طلب! أني جاي آخذ
وراح آخذها غصباً عنك...
التفت لعصام وكال
علي: -عصام
هو بس كال عصام وذاك طلع سلاحة وطك رصاتين بالهوء على أثر صوت الرصاص
النادي صار عبالك يوم الحشر لا ظلت راقصة لا مطربة لا زبائن كله طلعت ركض
وأصوات اعياطهم مالة والي مرعوبين جنت ماخذ ركن ومخلية قناع واكفة على جهه وأستمع الهم.
أزاد گام بسرعة باوع ليجوة على القاعة فرغت تقريبااا ما بقى غير الحراس
علي: -الخمس دقايق بدت
باوعلة بنظرة عصبية بدون ما ينطق حرف وعلى وعصام طلعوا
هو مباشر خابر أخو عساف كالة بغضب: -اخذ الشباب والحگهم خلص عليهم
طلعت مبايلي ونزلت طالعة من النادي خابرت على وكتلة
مجرد ما أتاكد مني طلعت من النادي وأبتعدت بمسافة وكفت على جهة أتاكد من إلى راح يصير.
صوت الانفجار دوة باالحظات هز المكان وكتلة من الدخان والغبار والحطام تتصاعد
من النادي بثواني
عيوني صارت على الباب شفت أزاد طلع وراة أثنين من حمايتة ركض للسيارة
كله أتراب وملابسه كله دم
صدك عار ما مات.
: -شجن
بيت عمي مخبوصين والخبر وصلنة أسرع من الطلقة
النادي منفجر أثر أتماس كهربائي وأزاد وعساف هناك
عمي وصادق راحوا ركض والبنات بس يصارخن
شگد أني كلبي طيب وما أحب الاذية لغيري
بس فرحتي ما أنطيه لبوي اررريددد اركص موت الجلاب البگع وعساك ما شفت النور بعد
رحت ركض أبشر مرام دفعت الباب بقوى وعطت: -مراااام.
نايمة حضرة جنابها وأني ما أشوف النوم من التفكير. گمزت يمها على جرباية وأني أطگع أصبع وأعيط: -مررررام ولج مرررام ااااكعددددي
فزت ووخرت الغطة تباوعلي تك عين
: - يا ستار شكو مو وكت هالحركات بالليل! خلي الواحد ينام لو طك عندج فيوز
شجن: - مرام، مرام خبر خبر مثل القنبلة
فكت عيونها وحجت بسرعة: -عزيز راح يخطبني
شجن: -لا شنوو هو هذا هم خبر ااااسمعي
مرام: -شبيچ شصاير وساف أبو كرش إجى يخطبج هسه.
تدنيت منها وحجيت بفرحة: - النادي، نادي ازاد انفجر وهو بي
فكيت عيونها ببطء صفنت للحظة بعدين كمزت من فوك الجرباية تكمز وأني خربت ضحك
: -شنووووووو؟ يا نادي واااازاااد ببببيييي متتااااااكدة
هزيت راسي إي، أزاد چان بداخله...
مرام: - الله يفرحچ على هالخبر يمماااااي العباس عليج والله بشارة فدوة برد گلبي وگليلي ماااات راسه طار صار طشار الجثة لگوهة لو ندفنت جوة.
جانت تركص وتكمز وتحجي بصوت عالي مفضوحة بس والله فرحنة
لزمتها من ايدها وجريتها حتى تكعد
: - لچ مرام اسكتي راح يسمعونا
دفعتني ونزلت من جرباية أدك على الكنتور وتغني
وكفت وحطت أيدها على صدرها وهي تاخذ نفس براحة: -هاي الأخبار اللي تبرد الگلب وعلى لو خاطبني
حسام الرسام ما أفرح هيچ شنو هالخبر الحلو منو جاب الخبر خليه أروح أبوسه
شجن: -لچ كافي راح نفضح هسه لازم ننزل جوة نواسيهم على موت ابن عمي.
رجعت حجيت بجدية: -بس اكلج خلي نتاكد بعد شوي خاف يطلع ماميت
مرام: - لا لا لا! لا دگولين هيچ اسم الله أن شاءلله هسه يم ابو جهل سكران ويا بقعر جهنم! أني متأكدة مات أحسة بي أحس روحي خفيفة چان ثگيل على گلبي
ضربت خفيف على بطنها: -حتى بطني خفت يمكن جنت حامل بي
ضحكت وتمددت على جرباية وهي تفتر يمي
شجن: - زين هسة شنسوي إذا مات أزاديعني إحنا أحرار.
مرام: -أحرار لچ إحنا صرنا ملوك هسة نطلع منا ونروح ندور على شمس وبعدين وكملت وهي تغمزلي: -و ندور على عصام بطريقنة
شجن: -عصام؟
مرام: - إي عصام المزموز ما يتفوت لج هذول جماعة على كلهم خوشية من يحبون يعاركون الدنيا على إلى يحبوها فااانتي لا تفوتين عصام وهو مبين فاسد بس يعني مزموز عود انتي من تزوجينة علمي على الاخلاق وربي من جديد اذا ما هو رباج وطلعج من طريق ويا
شجن: -دولي هم أسولفين وحدج.
مرام: - يلا گومي لازم نجهز نفسنا لدفنة يمااااي ازاد عمت عين امك عليك
شجن: -هههههههه جديدة لعد وعينج
مرام: -فدوة لعيوني شنو ابن القندرة اعمي عيوني عليه، كووومي ناوسي النسوان مو عيب كاعدين هنا شيكولون علينا ما نعرف الواجب
گمت أجينا نطلع وهي تمشي كدامي أندارتلي وكفت
: -خللا البس لبسة حلوة خاف يجيبون الجنازة ويجوز بيها مزاميز لازم اطلع حلوة.
راحت فتحت الكنتور أدور على ملابس طبعاً ما عدنة ملابس هنا هنه ذني جابتهن ماما كم قطعة من بيتنا وعلى اساس نبقى هنا بين ما نلگى شمس ونطفر وتالي لحد الان كش ماكو
شجن: -مرام، شدا تسوين مو وكته هسه
مرام: - مو وكته شنو هذا أحلى وكت لازم نطلع بستايل!
فردشت الملابس أدور بيهن وطلعت فستان أسود ضيق وبي لمعة خفيفة وفتحة من يم الرجل توصل للركبة رفعتة بيدها.
مرام: - شوفي هذا هذا الفستان الأسود صاروخ هذا اللي راح ألبسه على موت أزاد يمة ازودي العزيز يستاهل اببقى بالداخليات من حزني عليه
صفنت على الفستان وضربت على گصتي بيأس مرام ما أتوب فضيحة
: -أنتي تخبلتي رسمي هذا فستان مال حفلات مال عرس مو مال جنازة
طگت علجها وضحكت مستمتعة
: -هذا مو اي واحد هذا ازاد چان ساجنة يريد يزوجج لشايب لازم نلبس شي يعبر عن فرحتنا.
مو نلبس مال حزن أني أريد أطلع كشخة أريد أطلع حلوة حتى لو ماكو أحد يشوفني لازم أعبر عن فرحتي بطريقة غير مباشرة
شجن: - زين وإذا ما مات إذا بس انصاب او شي
مرام: -اووع تتتفائلي بالخير متاكدة مات
شجن: -تمام بس عوفي الفستان وخلي ننزل جوة
رمشت برائة وحجت بتوسل: -بس ألبسة شوية حتى لو بس أطلع بيه للباب وأرجع
كوة سحبتهة وطلعنة
نزلنة جوة كعدنة صفة وصوت أعياط البنات ومرت عمي مالي البيت.
وماما هم تبجي وكل شوي وكالت يا سالم عمت عيني عليك
كل واحد يبجي على ضيمة أني هم أذكرت بابا وبجيت ومرام بصفي مغطية وجهه بالشال
كرصتها من زندهة طلعت عين وحدة من شال وحجت بهمس: -شبيج
: -شسوين
: -غير أبجي
: -وخري الشال عن وجهج
: -عوفيني هيج احسن أدموعي ما يوگعن
: -عصري روحج أذكري شي موقف حتى لو دمعة جذب
: -ماكدر والله شسوي
أخذتها وگمنه صعدنة بعدنة الدرج أني گدامها أمشي وأسولف وياها.
وهي حجت بصدمة: -لجج عززززا هذا شبح أزاد يفتر بالبيت
أنداريت وأشوفلك أزاد فات هو وراة صادق لافين راسة وجهه مدمر دمار صاير جنه جلب
: -لا حبيبتي هذا مو شبحة هذا ازاد شفتيلج عار يموت
: -يااا والحظ
: -يا فرحة ما دامت
: -كبر لو متأخر شوي مخلينة مرتاحين شمالة
فتنة جوة مطنگرين وحدة بوجه الثانية.
: -شمس
وعيت لگيت نفسي بسيارة على ما أتذكر منو أخذني بس أذكر اخر شي شفت وجهه
رغد يمي وبعد ما حسيت بنفسي غير لما فزيت هنا
اباوعلة يسوق ساكت وماكو اي ملامح على وجهه لا هو عصبي ولا هو هادي مدري شنو
بلعت ريكي خايفة منه وما وأثقة بي
شلون حبيتة أني
كسر الصمت صوت مبايلة فتح خط بدون ما يحجي بس كال علم
رجع دك على عصام إلى سيارتة تمشي ورانة مباشر
كالة: -اعبرني بمسافة وطفي الضوء.
ما أعرف عصام شگالة بحيث هو رد عليه بعصبية
: -يول سيارتك ما مصفحة صير كدامي
وهو هم طفة ضوء سيارتة وخفف سرعة جان الشارع فارغ ونص الليل تقريبا
التفتلي كأل بأمر: -دنكي راسج
: -ليش شكو
: -ماكو شي سوي الكتلچ عليه
: -غير أعرف شكوو
تأففف وزمخ بيه: -لجج بابة أنة زلم خشنة دايس على شواربه وانتي بگد الفصمة ما گادرلچ دنكي راسج جوة ولا تخبليني
: -على اساس انت عاقل وأخبلك
: -جااا تگفي شىري.
نجبيت وسكتت دنّگت جوه نزلت نفسي بالكشن
وعيوني عليه عينه بالمراية مال سايق.
وسلاحه يمه. هي چانت ثواني.
و سمعت صوت جيلات مو جيلة وحدة لا چان وابل من الجيلات جان رمي كثيف يضرب السيارة.
صوت الجيلة يوز أحسه يزرف أذاني صوت الزجاج وهو يتكسر. السيارة اهتزت بقوة. من وكفت
صرخت بصوت عالي غطيت راسي بإيدية مااريد أسمع الصوت
گلبي چان يدگ حسيتة راح يوكف
حسيت بالخوف يسيطر عليّ.
علي ما تحرك بقى ثابت بمكانه عينه بالمراية. ما رمش
قبل لا ينزل التفتلي رفعت عيوني الة أبجي كالي بتحذير: -لا ترفعين راسج أبقي مدنگة
هزيت راسي وهو نزل من سيارتة وصاح على عصام
بقيت مدنكة وداحسة نفسي جوة الكشن ومغمضة عيوني حسيت عزرائيل يفتر علينا
هي ما طولت دقايق وعلى اجة ركض صعد وهو يصيح على عصام: -بسررررعة حرك
بعدنة مسافة وباوعلي: -أرجعي لمكانج
: -جسمي ديرجف احس ماكدر أتحرك أنهبطت.
مدلي أيدة وسحبني باوعت بالمراية سيارة عصام ورانة تمشي وهو خابرة يضحك
حجة بلذة: -منو عساف السگط مااتتت؟
ضحك بصوت عالي وقفل الخط، التفتتلة وكتلة بصوت يرجف: -عساف مات
علي: -ايي
شمس: -يعني مات روحة طلعت
علي: -جاا هو اليموت روحة تلعب شناو. غير تصعد لربها
شمس: -انت كتلتة
علي: -يستاهل الموت كواد
شمس: -علي انت كتلت أنسان يعني هو مات
علي: -يومة
حسيت بهدوؤء عبالك الدنيا وكفت
احس صدري كله أدموع ليش هيج دا اعيش.
شنو ذنبي شسويت معقولة أتصال واحد هيج دمر حياتي وليد منو دفعني
حسيت نفسي كاعدة بكبر أظلم ودا أتعذب شوي شوي ما عندي غير دموعي تشكي حالي
وشهكاتي الملت السيارة بقيت أناشغ وأبجي لحد ما عاط بيه: -كاااافي تبجين شمس
: -أنت واحد سفاح وقاتل
: -يعني الكواد لاحگني شني أضحگلة لو أفتحلة صدري
: -بس مو تكتلة موت شكم واحد لحد هسه كاتل ليش عندك دم ناس مثل شربة الجكارة ليش هلكد قاسي.
ملامحة جامدة وما تعبر عن شي ويحجي برود ولا كأنو مسوي شي الحجي وياا ضايع
هو يسوي إلى براسة بس
ما أريد أظل ويا هذا سفاح ماعندة رحمة أني صرت أنرهب منه وأخاف وجودة بدة يسببب اللي رعبة
عيوني على الشارع خاوي سكون ماكو زحمة سيارات بس سيارتنا
وهيج سيارات تجي خطف من بعيد شارع عام
ومظلم
أتاكدت أحنا طلعنة من العمارة صرت أعرف الطريق بس ما أدري وين متوجهين
: -علي وين ما خذني
: -لكلبي.
: - ياريت تحجي بجدية وياي بدون ستهزاء
حك طرف حاجبة وباوعلي بطرف عينة
: -والله لكلبي أحطچ بي وأقفل عليج
درت وجهي بضوجة، لحد ما كشف الظلام
طبينة الناصرية
وين رجعت للاول أيام من جابني هنا أنعصر كلبي ما جنت أعرف هيج راح أتبهذل
وصلنا للبيت صف گدامة نزلت أمشي وراة بروح خاوية كتلة: -اريد أفوت للحمام نفسي تلعب
دخلنا جان بيت عادي وبنائة قديم أشرلي لوحدة من الغرف. مشيت بوجهي لحمام
أتقيت ونعسانة كلش.
أرتكيت على المغسلة ونزعت قميصي بقيت بس الفاينلة نص ردن
ودا أفك باللفاف من أيدي وهو فات باوعتلة ورجعت أفتح باللفاف
حسيت بخيالة خيم عليه رفعت عيوني الة خلة أيدة على الحايط فوك راسي ونحنى جبينة على جبيني
: -منو مسوي بيدج هيج
: -وساف
طلع مبايلة من جيبة وخابر وعيونة بعيوني يباوعلي هيج بنظرات تخليني أنسى حتى أهلي
بس من أذكر هو جذب عليه وهو الة أيد بموت بابا أكرهه أخاف منه.
لو بس حجي وساف ما أصدكة بس رغد صديقتة عود هي إلى شهدت عليه
زين هي ليش خانت بي مو جانت دكلي هو بمقام أخووي
شنو ذولة واحد يغدر بالثاني ما تعرف تصدك منو وتثق بمنو
كالة بأمر: -عصام جيبلي وساف
قفل الخط وورفع أيدي وخلة بوسة على مكان الحرك
وعافني وطلع. كملت وطلعت ذبيت نفسي على جرباية ونطويت على نفسي ونمت
حتى على الغدة ما كعدت أتغديت شكد حاول وياي بس ما أشتهي
من كثر الصدمات حتى نفسيتي تعبت وأكلي قل.
گمت ماكدر أكل شي لو اكل قليل وأبطل
للعصر بالستة هيج وقت كعدت غسلت وجهي وگمت طالعة لصالة
لمحت باب صالة مفتوح على نص مديت راسي أباوع
شفت وساف راكع على رجلي ومجتفي. على واكف يمة ومخلي ايدة بجيبة ويباوعلة بستحقار
وعصام كاعد بالسيارة وفاتح الباب يشغل بالمسجل يطلع أغاني
وساف: -شترررريد مني ليش جبتني هنا على ترى هيج انت وديت نفسك بتهلگة
علي: -أنة شريد؟ ما ريد شي سلامتك.
التفتت لعصام وكالة: -شتريد من وساف ليش جايبة
عصام: -منو أنة لا ما جايبة
جان هو رد بعصبية: -هيلگية ما فارغ الكم أني وراي أعمال فك أدية الا أسويهه كارثة ومحد يخسر بيه غيرك
علي: -والله كله صوج عصام الكواد
كوووم افتح الباب لوساف يمشي معطلة عن شغلة ليش
جان ذاك طلع قلم من سيارة وراح وكف يم الحايط رسم باب مفتوح على الحايط وكالة
عصام: -يلا أطلع فتحتلك الباب.
وساف: - نصابين عليه كمل وعيونة نار: - والله حرامات بيك المعروف لو ما أني أنت شنووو منووو يعرفك منو يهابك أني سويتك وكبرت أسمك ناكر لجميل ابن هاشم
جان لزمة من صلعتة بثنين أدي هو ما عندة شعر
راسة يتزحلك: -أاااانت سويتني لك عصام سمعت واحد ك مسويني أنة أبن هاشم لك بزودي صرت محد الة فضل عليه شوف القشمر
وساف: -ناقص أبن ناقص
علي: -ليش متعدي على عرضك.
ما حس غير على لزگة بوكس على وجهه وگعة بالكاع سحك على راسة بحذائة وحجة
: -ليش ما تبطل رعونية مو عمرك طب الاربعينات حلوة كل يوم هاينك وتااالي أحطك وأتفل على كبركك ااااكعددد بابة ااااكعدد مسويني أبو نقفة
ناس ما تستحي وعلي
عرفتة جابة هنا حتى يهينة مو يكتلة موت
قفلت الباب ورجعت لمطبخ
مرت ساعة وعصام أخذة ومشة وهو هم راح وياهم
زين وين ولة وعافني وحدي هنا
ما سويت عشة بس أفتر بالمطبخ جني طنطل.
مادري والله ما أدري شبيه
أحس نفسي فارغة من داخلي ما أحس بلذة اي شي
حتى الاكل گايمة ما أستتطعمة
كلشي باهت وتايهه بشكل غريب
خسرانة وهواي خسرانة
شفتة أجة جايب مسواك بيدة خلا على الكاونتر
كعدت وخليت أدية على ميز نمت عليهن
أباوعلة گصگص البتينجان بگشورة وبتيتة وطماطة وجايب خضرة وببسي وخبز
جان يشتغل على ساكت التفتلي شافني أباوعلة
ترك البيدة وتقدم كعد يمي
لزم أيدي بين أدي رفعت راسي مستعدلة بگعدتي
عينة بعيوني.
ضغط على أديناتي حيل: -يوجعج شي وجهج أصفر
هزيت راسي ب أي
دنگ باس خدي وحجة: -شبيج شيوچعچ
: -نفسي. أني نفسيتي تعبت وطاقتي صفرت أريد أنام وأفز الگة نفسي بيتنا القديم بين ماما وبابا وأختي شلت أهموم أكبر من عمري جانت أكبر اهمومي قبل شلون أكعد قبل شجن وأخذ المراية وأبدل براحتي
رفعت عيوني الة مركز وياي
بللت شفتي بحسرة.
: - تعرف على صح أحنا ما جنة بذيج الامكانية وبابا يجوز هو ما كدر يوفر إلى أنت كاعد توفرة إلى هسه بس هو جان يحبنة وجنة مرتاحين أني وياك ما حسيت بطعم الراحة نطلع من مصيبة نطب بغيرها
حياتك عبارة عن مشاكل وأني أتحاسب على مشاكلك بدون ذنب
مسحت أدموعي وحجيت برجاء
: -عوفني على حباب ماأكدر أتقبلك
جر كرسيي علية صرت بحضنة تنهد وحجة بنزعاج
: -بعد لا تعيدين هالحجي
: -ما أريد منك شي بس عوفني.
: -مو عدل أعوفج هسه ممكن أنفكر بيها بعدين
وخرت من حضنة: -يعني مفكر تعوفني
: -لاءء
: -لعد شلون دكول نفكر بعدين
: -أنتِ شتردين أعوفج لو ما أعوفج
: -أنتَ شنو جوابك تعوفني لو ما تعوفني
: -أنتِ شتردين
: -تعوفني
: -قابلة أعوفج
: -اي قابلة عوفني وريحني ال...
رفع أيدة خلاها على حلگي گطع كلامي
: -حتى لو أنتِ قابلة وتردين أعوفج أنة ما أقبل خوش لو لا
: -علي أني ضايجة وأنت دضوجني بزايد
: -أدگ لج جوبي أنضيع الضوجة.
: -والله بطران
ضحك بستمتاع وگام رجع يگلي بتنجان وأني گمت لصالة كعدت بيها
هذا البيت مابي قنفات بس كرسين بالمطبخ
مفروش سجادات
هو شوي وأجة بيدة الصينية خلاهة بينة
شمس: -أني ما أريد
علي: -جا وأبني يضل جوعان
شمس: -كرهتك وكرهت أبنك والساعة الكلت لك بيه حامل
علي: -والزهرة جانت أحلى ساعة
سوالي لفة وأنوب تنگط دهن أخذتهة من أيدة وكتلة بضوجة: -بطلت أحبك ترة
رد عليه وهو ياكل: -جا هسه أنة ميت عليج
: -يعني ما تحبني.
: -أكدر ما أحبنچ
: -والله مراوغ ولوتي
رفع راسة باوعلي وأبتسم
حسيتة ينطيني على مايي ويسايرني لا أكثر
أكلت شوية ويا ورحت غسلت
ونزعت ملابسي جان بيهن ريحة معقم ودم. الكنتور الموجود بالغرفة
قديم وبي بابين بس وكلة ملابس رجالية أخذت أتراك رجالي لبستة
ما نمت الجرباية سحبت الدوشك مال جرباية وخليتة يم الشباك وفتحت الشباك
تغطيت ونمت. الهوء يدخل بارد حسيت بلذة النومة وأني تعبانة.
: -شجن
بعد ما طلع أزاد عايش والله صارت ظلمة دنيا بعيونة أني ومرام
وهو أنوب ولا كأنة طالع من حلك من الموت صاير نار ومرتين گبت العركة بينة وبين عمو
علي شنو ما أدري
-: ما مات
حجت ولگمة بحلگهة جانت متربعة وتاكل يمي بالغرفة
مرام: -اكمل عشة وأروح أكتلة بنعالي
: -هو النعال ثوب مفصل ويا شفتي شلون معصب وكالب الجوء هاي بدل ما يذبح ذبيحة على سلامتة عود
: - القندرة عبالة هو النمرود وشايف نفسة شوفة.
سمعنة صوت العركة كبت جوء گمنة أثنينة لان سمعت صوت ماما هم
طلعت لصالة شفتها هي وازاد واكف عصبي وهي صايرة نار وعيونها شايطة
وعمي يحاول يهدي الوضع التفتلي وكالت بحدة
: -يلااا بسىرعة البسي نمشي
حجة عمي: -أم شجن أستهدي برحمان وين ماخذة البنية بهل الليل
انهال: -لعدد شتريد أسوي أباوع للابنك وهو يزف بتي لواحد شايب علمود مصلحتة.
ازاد: -مرت عمي خليني محترمج بدل ما تشكريني بتج أنخطفت وأسبوعين الا رجعت منو ياخذها بعد منو يددك بابج كولي يالله ووافقي على وساف رجال خير وقبل بيها الله يعلم واحد غيرة ما يقبل
نهال: -خايب شو ما تخجل على نفسك ميتة عليكم ذابتهن عليكم يشرفنكم بناتي وتاج على راسكم
: -بسسسس أم شجن حجيج ما مقبول شني تاج راسنا.
نهال: - ايي تاج راسكم وغصبااا عليكم أمهن بعدهه عايشة لا عبالكم مات سالم وأستحگرتوهن والله العب بطروگم وأسويكم فرجة وهذا الشايب صاحبك رجلي بالكبر وجاي يتخطب جان أستحى على شيباتة
زمخت بيه بعصبية: -بعدددج وأگفة رووووحي البسي
وأزاد ينافخ بعصبية
رحت ركض البسة خفت منها متعصبة ومرام مجلبة بيه
: - وأني تعوفني هنا وحدي.
: -لا البسي وأني أروح گدامج للسيارة أوكف هناك أشوفلي طريقة أشغل بيه السايق حتى أنتي تصعدين بدون محد يدري وأنتي أنتظريني باب المطبخ بس أشرلج تجين ركض
راحت ركض لبست وأني هم لبست. بعدنة دنسولف بالباب والصريخ گب
ما أجة أبالي غير ماما نزلت ركض وعيني شبحت عليها وأني أشوفهه وأگعة بالكاع
وأزاد جامد بمكانة وعمي مدنك عليها هو ومرتة
ومرت عساف صافنه وفاگة عيونها بهلع مثل واحد متعرض لصدمة او شاف شي جريمة ونفجع.
ركضت عليه ذبيت نفسي عليها وأني أعيط
: -ماااااماااا شبببيهااااا ماماااا شسوييتواااا الهاااا اااااحجووووا شبييهاااااا
دفعني أزاد وأخذهة شالها بحضنة وطلع ركض للسيارة وأني أركض ومرام وياي
صعدت بصفها وابجي ررروحي ترجف يالله أنعاد عليه نفس المنظر
: -يالله يالله أحضر ياااارب العالمين مااااريدد ماما تموت بين أدية أتخبل هالمرة لااااااياللله
أضرب خفيف على وجهه وهي ابد لا حس ولا نفس
جسمهه يابس عصة.
وصلنا المستشفى وأخذوها منا وأني مفرفحة
وأبجي روحي تريد تتطلع لا يالله راح تموت مثل بابا لا يالله دخيلك أرحمنة لا تاخذهم أثنينهم منه
لا هيج تيتمنة شنو ذنبنة شسوينة
كعدت بالمرر أبجي ومرام تبجي وياي وتواسيني
ممر بارد بالمستشفى، الإضاءة بيه خفيفة، والليل غاطس بكل الزواية
صوتي يرجف بعدني مو مستوعبة
: -ماما هم راح تموت وتعوفنة وحدنة
مرام ما واستني بجت وياي وگامت تشهگ شاركتني حزني وبجينة على نفسنة.
حجيت بشهگة: - مشتاقة لنفسي القديمة اريد ارجع لبيت اهلي شبسرعة كبرت وشبسىرعة هيج فاركوني بابا ليش عافنة وحدنة هيج ضايعين بيد الغرب وماما هم راح تموت وتعوفنة
: -لا اسم الله مابيها شي والله شجون
هزيت راسي بيأس وهي گومتني من أيدي كالت
: -تعالي نسأل الدكتور عنها ونشوفها هذا الزاد القندرة مدري وين ولة وخلانة هيج
جسمي يرجف وكوة أمشي كل ما أتقدم خطوة روحي توجعني واحس راح تموت راح أخسرها هم.
وصلنة لطوارى لوحدة من الغرف على أساس ماما بيها بس، ما شفتها راحت عيوني على أزاد واكف يسولف وي الدكتور
سمعت يحجي وياه الدكتور صوتهم أنساب للگلبي مثل الخنجر
جمدت مصگورة وعيوني على مرام إلى نخطف
لونها، وصلت بي الحقارة هالدرجة.