رواية عروس الهور الجزء الأول للكاتبة هيلانا الفصل السابع والثلاثون
: -شمس
الحياة مستمرة رغم كلشي
ما راح توگف بموت أحد
ولا راح تنتهي بسبب مشكلة. تستمر دوم حبلى
بالمشاكل والهموم للحظات السعيدة والحزينة
والانسان العاقل لازم يفهم أن لا فرح يدوم ولا حزن وشگد ما طولت عتمة الليل لابد ما يجي شمس الصبح
والتفكير بالعدل أولى من التفكير بالميت
للي يبقى عايش على ذكرى والماضي
هذا أتعس الناس
لازم الواحد يتقبل الخسارة والفشل يتقبل كلشي ممكن يصير هو هيج الانسان معرض لكلشي.
أذكر جان عدنة حمامة مسوية
عش على الشباك الحمام
وكل مايصير عده بيضات ويفقسن تجي بزونة الجيران تاكلهن
بكل مرة الموت يخطف الافراخ
بس هالشي ما منع الحمامة أن تبطل تلم عشة او تخلي بيض مرة ثانية
هي بكل مرة تلملم جراحه وتتقبل الخسارة
وتحاول تبني من جديد
لان الحياة ما راح توكف هذا قانون الدنيا
بي شكل من الاشكال لازم نستمر
كاعدة على طاولة الاكل نتريك بعد ما على كال للاهلة راح نبقى هنا كم يوم و هو مشة.
حاليا أكبالي أمة للي من أول ما درت أني أجيت وهي تزورني ادري بيه ما تحبني
بس لازم تتقبلني مرت أبنها يعني شسوي مثلا؟
واختة اجونا نوعا ما لطيفة وهادئة وتوزع ابتسامات هواي بحيث كل ما اباوع الها تبتسم بوجهي
بس هي حلوة شگرة وعيونها خضر
ولا عبالك اخت على الظاهر ماخذة جينات الوراثية من امها
هسه بلكي جهالي هم تجيهم العيون الخضر وراثة من عمتهم
بس خوش يفكر ابو على رجال محسن
نسل وعدهم جوانا حلوة.
حجت أمة على وهي لازمة استكان جاي بيده وتخزرني
: -أني ما راضيه على جيتج للبيتي
: -أعرف
: -خوش لعد تدرين أني ما راح أتقبلج گجنة الي
: -اي
: -ولا راح أحبج
: -ايي
: -وأن شاءلله أبني يطل...
قاطعته بهدوء: - خالة هو وين يلكه وحدة تتحمله مثلي لو وحدة تسكت على سوالفه
توسعت عيونها وردت بعصبية
أم علي: ولج يا قليلة الأدب أني أتحجين وياي هيج لا وعلى أبني گدامي
شمس: - بس دا أجاوبج مو انتي سألتي.
ضرب الطاولة بيدها وعاطت بيه وجانت مبينة ادور حرشة حتى تتعارك وياي: - ما سألت أني دا أدعي عليج يالم، فشرت أبتسمت بوجهه وكتلها
-: الدعاء لازم يكون بي منطق يا خالة وأني حامل ميجوز تتدعين عليه لا ينضر أبن أبنج
أم علي: أگص أيدي اذا أنتي حامل كله جذب بس شلون تجلبين ببني وتسيطرين هي هاي أسوالفجن
تتمسككنن
شمس: -جذب زين هسه بس يجي يگلج واق ويق حبوبة عود كولي جذب
حجت أجوانا بصوت هادي.
: -ماما كافي مرت أخي ضيفتنا ما حلوة تستقبليها بهيج كلام
شمس: -لاا خليها أطلع اللي بكلبها مو زين الكتمان
أم علي: - ولج يا عينج يا كتمان وروح المرحوم راح أطردج من بيتي وما خليج ساعة هنا
حطيت أيدي على بطني وحجيت
: - وين أروح أني وأبني يعني يهون عليج نضل بشارع أني وحفيدج أني هسه صرت من أهل البيت جنتكم لازم تفرحين
كامت وكفت وأيدها على خاصرتها تباوعلي بحرگة أني جنت أتريك بهدوء.
أم علي: -كوووومي ما أريد أشوف جهرتج بيتي أني ما الفي أگبيتي
شمس: -هذا مثل ما هو بيتج فهو هم بيتي لان أني جنتج وزوجة أبنج
حجت بعصبية وهي تضرب على صدرها
: -اكيد مسويتله سحر ششاف بيج وحبج على شعفتج المعطبة
والله يالله أنوب أني ساحرة أبنها
شمس: - خالة هو الحب سحر أصلا فشنو على من شافني تخبل وأزوجنا حتى بالعلامة حبوبة جانت موجودة واساليها.
أجوانا رغم الهوسه بس هي تحاول تهدي الوضع بس كلما تحجي ام على تكلها اش اسكتي
تسكت وبنفس الوقت احسها متونسة على المشكلة
وتبتسم على خافت
أم علي: -فعلا أنتِ وحدة قليلة الحيا وأدب شمالة أبني ذوقة وين ام أعطوب والتايهه
شربت شوية من جاي وهزيت متوني بمعنى ما أعرف بس طبعاً ما سكتت عمتي كالت
: -يطلگج يطلگج أتفل بشيلتي اذا ما خليته يطلگج.
يالبومة دمرتي حياتة من وراج أرتكب جريمة قتل وحتى شغلة راح من أيدة الله لا ينطيج العافية من يوم ما شافج ما شاف يوم بي خير فگر وبومة
هزيت راسي بأسف: -معلش خالة هو أبنج حياته جانت مملة قبل لا أجي هسه صارت أكشن مو أحسن
أجوانا: -جاي برد لو تتريكن مو أحسن
ام علي: -أجوانا لا تتدخلين وكومي للغرفتج
جوانا: -تمام ماما
شمس: -خلي البنية تتريك
البنية صعدت وهي التفت عليه من كد ما معصبة
حتى ما تكعد تحجي وهي وأگفة.
شمس: -أهدي خالة لا يصعد ضغطج وماكو داعي للاعصاب بكل الاحوال أبنج يحبني وميگدر يعيش بدوني
أم علي: -ما يكدر يعيش بدونج ولج أجيبلة التسوا
راسج
تتنهدت ورفعت عيوني ليفوك يربي شسوي وياها هسه لو ما أبنها ازرك شحال لو عيونة زرك وأشگر جان شسوت
سكتت ما رديت عبالي راح تعوفني بس هي أندارت وأندفعت عليه عيونها حمر من كد الغضب
جانت لگمة بيدي سحلتني أني ولگمتي من ميز الاكل وأخذتني سحل لباب وهي تصرخ بوجهي بصوت عالي.
: - كوووومي كوووومي من بيتي ما أريد أشوف خلقتج هنا
شمس: - على كيفج بعدني ما خلصت ريوكي مو زين أطلعين الواحد جوعان وهم أبني بعدة ما ماكل شي
: - نگلعي ولج لا تخليني أمد إيدي عليج
شمس: - مو زين على صحتج العصبية وهم ما يصير تضربيني مو زين على الطفل داحجي علمودج محد دا يضرر غيرج أنتِ وحفيدج معقولة يهون عليج حفيدج
ما أهتمت فتحت الباب ودفعتني برا وبقت واكفة بالباب متخوصرة
أكلت لگمة بيدي جانت طيبة گيمر عرب.
الظاهر يجيبون من اقاربهم بناصرية
لان الگيمر حيل طيب ودسم ومبين
مو مشترى
جان بابا دوم يشتري النا مو بذاك الطعم
هنا يمكن مغشوش
: -هسه على ميقبل لان طردتي مرتة وابنة من البيت
أم علي: - بس يجي ويشوف عرامتج ولسانج راح يطلكج وأتشوفين لو أني لو أنتِ بهذا البيت
شمس: -البيت جبير ياخذنة أثنينة أني وياج يا عمتي الحلوة.
أم علي: -مو جنتي أنتِ ولا أتشرف بيج أنتِ بلوة طاحت على راسنا يجيب ويذب عليه على بهل زبايل كلج خلگ وحدة تايهه
شمس: -ميخالف راح أكول عمتي وأسكت أشوفج على الغدة لا تنسين تسوين دولمة أحبها ويمكن جاي أتنسة عليها لان حيل مشتهية دولمة
قفلت الباب بوجهي وبقيت وأگفة برة الحديقة حلوة وواسعة تمشيت عليها
وأني أتنفس ريحة الورد طالعة وصوت المي
ياخذك لغير عالم
شفت عدهم حدقجي يرتب وينظف بالزرعات.
التفيت على جهه ثانية مالت البيت للمطبخ
ريحة الاكل توصل لسابع جار وأني جوعانة
كايمة أكل هواي
دفعت الباب وفتت جان مردود على النص
لگيت مرية تتطبخ ووياها نفس البنية
الي استقبلتنا البارحة كتلها
: -صباح الخير
رفعت راسها وابتسمت كالت
: -تفضلي مدام محتاجة شي من المطبخ
: -صراحة اي اريد ريوك لان عمتي طردتني ما خلتني اتريك واني وابني جوعانين
ردت بود العجوز-: تتدللين مدام هسه اجهزلج ريوك
شتحبين تاكلين.
: -اي شي خالة اي شي
حسيت براحة لان لطيفات شوي
كعدت بين ما حضرن جبن وبيض طك بالدهن وجاي
شمس-: تسلم إيدج خالة
: -بالهنة والعافية مدام
استمتعت واني اكل الجوء هادي
وحلو هنا لازم كل يوم اكعد اتريك هنا
علي هالجوء بس لازم بالاول أخلي علي
يجي ويحجي وي أمة لازم تتقبلني
خلص أني جنتها هذا الامر الواقع ماتكدر تغيرة
بعدني كاعدة وسمعت صوت مرام باالبيت صفنت معقولة همست مرام
مرام-: وينها وين شمس أريد أحجي وياها.
والله هذا صوت مرام گمت وطلعت من المطبخ لصالة
من الباب الداخلي
لگيتها تلعلع وام على متخوصرة واگفة دكلها
: -شمدريني بشمس
وكفت وكتلها: -ها
التفتت شافتني تنهدت وأجتني بسرعة لزمت أيدي نترتها وابتعدت كالت بحزن
مرام: -شمس أريد أحجي وياج
شمس: - ما عندي شي أحجي وياج بي
مرام: -بس اسمعيني والله مو مثل ما تتصورين
شمس: - لا مثل ما أتصور وأكثر.
مرام: -باعي شمس أني وياج صح صداقتنا مو قوية وما راح تسمعيني هسه بس ترى شجن صديقتي وكلش احبها وهي راح تسمعني أكيد وتعرفين منها
كلشي
شمس: - خلصيني منج مرام لا ريدج ولا انريد صداقتج
ام علي: -ختولي بت شوارع هاي شني ومصداقتها
أنصدمت من كلامها وحجت كدام مرام احس بعد ماكدر أسكت عطت بيها.
: -مااا اسمحلج تحجين هالشكل بت عائلة وطالعة من بيت أني صار من صبح متحملتج أكول مرة جبيرية لا تخليني أحط راسي براسج والله العظيم أشيبج
اذا ردت نتعامل كعمة وجنة
مرام: -أهدوؤء يا جماعة
ام علي: -قليلة تربية وأهلج أنطوج خبز بس ما أنطوج تربية بس ششترجة من وحدة طگت أبني جيلة عمي صدك كول وفعل وكحة وبت شوارع.
: -كاااافي عادد كااافي ما ميته على ابنج أني وأنتي لو تعرفين حق الله جان ما حجيتي هيج طگيت أبنج جيلة لان جااان خاااطفني اتعرفين شنوو خاطفني هااا شسويلة مثلا اركص
مرام: -شمس حبيبتي أهدي
شمس: -وخرري أنتِ لا تتدخلين مرام
هزت أيدها ووكعدت مرام كالت: -شمس دسمعي وراح تعذريني
شمس: - كل واحد عنده عذر بس العذر ما يرجع الميت وما يرجع بيتنا ولمتنا ولا راح يرجع أهلي كلكم جنتو جنود لعلي كلكم ضدنا.
حجت ام على من يمها وهي كاعدة
: -مو طردتج أنتِ ماعدج كرامة ماما
شمس: -والله يا عمتي هذا بيتي رضيتي او لا تمام يعجبج اوكي ميعجبج هم اوكي راح تشوفيني كل يوم بوجهج نتريك سوة
لوت حلگها ما عاجبهة
عفتهم وصعدت للغرفة
وهي تصيح عليه بس خلة ترجع أختي ويستقر الوضع
أني أعرف أشلون أتعامل وياهم
بسيطة.
العصر من أجة على أني ما حجيت شي ولاجبت طاري
بس هي خالة حجتلة وخلقت مشكلة
الا أطلگهة بس هو جان بارد وتعامل وي
الوضع بهدوء
حسيته كلش يحب أمه بحيث صيحت عليه شگد جنت مرتگية على سياج الدرج وأباوعلهم كالتله
ماراضية ودموعها بعينه
: -ولك يمة ليش ماتاخذ كلامي أني مو كتلك وذممت عليك من البداية ترجعها للاهلها أنوب ازوجتها وجبتهاااا إلى قلت عليك النسوان والله أزوجك وحدة تسواها شني هاي ام عطوب.
ضحك حيل وحضنها وهي تتدفع بي ماراضية
حجت بلوم: -مالكيت غير بت سالم
: - أحبها اعشگ أعطوبها
هزت أيدها وكالت الهم يجهزون غدة الة
وهو كعد يمها يسولف وياها
رجعت للغرفة منتظرتة يصعد بس أنزل امة
تتعارك وياي
نص ساعه وصعد سلم وفات سبح بقيت افتر منتظرتة أول ما طلعت كعدت على جرباية
اباوعلة وهو واكف على مراية يمشط بشعرة
شمس-: ما تصدك شصار اليوم
علي: -ممم، شكو
شمس: - شكو أمك طردتني من البيت
: - زين.
گمت وكفت بنص جرباية متخوصرة
: -شنو زين جنت دا أكل لگمة بيدي طردتني
علي: - عوافي
شمس: - عوافي يا عوافي دا تفهم شدكول تفهم عليه مو داكلك طردتني وكالت أخلي أبني يطلگج
غمض عيونة وفتحهن بملل خلة المشط على الميز واجة تمدد يمي وحجة برود
علي-: زين
شمس: -: شنو زين أنتَ ما راح تسوي شي ما راح تحجي وياها لو شنو
علي: - شحجي هي أمي
شمس: -واذا أمك كلها يمه هي مرتي وحبيبتي ومن هالسوالف
علي: - زين.
شمس: -كلي هاي المفردة اليوم متعلمها مو
شنو زين أنتَ ما تسمع
تنهد وحط أيدة على عيونة يريد ينام
علي: - أسمع بس تعبان و صوتج عالي دوختيني.
شمس: - دوختك أني اللي دوختك فوك ما صابرة ومتحملة وعايشة وي العيال
علي: -ايبااا مو جنتي كاتلة نفسج على أمك وامك واهلك جبتج الهم أتحملي
: -شگد بارد
علي-: زين
شمس: - راح أموتتتك والله أكتلك
ابتسم ابتسامة خفيفة وحجة
: - ما تكدرين
شمس-: ليش ما أكدر
علي: حبيبج وأبو أبنچ.
شمس: -ااوي باع الثقة ماأحبك أني أكرهك
وبعدين أني أجذب فأأنت لا تجذب ميصير أثنينة نصدك الجذبة
علي-: زين
شمس-: شنو زين أنتَ ما عندك رد غير زين
علي: - شتردين أكلج
شمس: -أريدك تحس تعصب أريدك تدافع عني
علي-: خلة واحد يتفلهم بحجاية وياج والله يلگاني گدامة أطيحلج حظه بس أمي شسويلها
حجها وضحك رد كال بضحكة: - دافعت عنج يباا كتلها احبج جااا شسوي بعد
شمس: رحمة الله ولديك ما قصرت
-: بالخدمة بت سالم.
حط راسة على مخدة دينام شلت مخدتي وشمرتها عليه لگفها وضحك وحجت بصوت نعسان
: -دوختيني تعاي نامي
مسحت على وجهي وهو فتحلي ايدة نمت ودايرة وجهي عنه وهو يوخر بشعري من ورة ويمسح عليه
: -ترة كالت هذا بيتي وأني ما سكتت كتلها هذا هم بيتي لان أني جنتج
: -عفية
درت وجهي عليه مغمض ويحجي وياي
: -علي شنو اخبار اختي
: -ان شاءلله يومين هيج وهي يمج
: -زين وبعدين شراح يصير
: -أطلعكم من العراق
: -وامك وابنك.
: -كلكم اسفركم سوة لتخافين
: -و أنت
: -بعدين نحجي خليني انام هسه
: -تمام براحتك
نام واني بقيت كاعده بس نايمة بصفة
اريد أنزل جوة بس خاف نتعارك اني وخالة
والمشاكل موزينه تاثر على البيبي.
: -شجن
نحاول أن نفر من المآسي
ويفلت من أيدينا الطريق
مديت راسي وهو فتح الباب بلعت ريكي وأني أشوفه بالباب. ابتسم وكال
-: زارتنا البركة والخير عصام الغالي هنا ما كالولي.
شهگت حيل وقفلت الباب خايفة
أكيد راح نموت ما نطلع منا سلامات
جنت أدري والله راح يدري بينا.
بللت شفتي بخوف مرعوبة مرتجية على الباب وكلبي يريد يوكف من الخوف
ما سمعت شي غير الطكة القوية
ما أجه ابالي غير عصام.
ركضت بسرعة أخذت خشبة جانت محطوطة يم الشباك براسيتها موجود بسامير
وطلعت من الغرفة لازمة
الخشبة ومرعوبة شفته يسحل بوساف.
بردت أطرافي. كله دم وسحله من باب البيت للحمام حطه وقفل الباب عليه وطلع يلهث
اندارلي وأني لازمة الخشبة
مسح على وجهه وأدي كلهن دم
عصام: شسوين بيها هاي؟
حجيت بصوت يرجف
: كلت أضربه حسبالي موتك
هز أيدة وكال: - ك، أمي
راح ركض لبس حذائة وأخذ أسلاحة طلعو
قفل الباب وراة مشة مادري وين راح.
جنت خايفة لدرجة كعدت مثل صنم على قنفة
بدون حرگة ما تجرئت وفتحت باب
الحمام وشفت شكو وشصار بوساف
هو شلون عرف بينا وشلون هيج
وأثق بنفسة وجاينة وحدة
يعني حتى لو هذا مكانة هم
عصام ما يرحمة واكيد يموتة
تجمدت بمكاني
حتى دمعتي ما نزلت بس گلبي
جان يدگ مثل الطبل بصدري
الهدوء يخنك وكل حركة خفيفة
بالبيت تخوفني
وكلبي على عصام
ماعرف وين راح
مرت ساعات لحد الليل تقريبا
فتح الباب عصام ملثم وأسلاحة بيدة.
: - يله كومي ماكو وكت لازم نطلع من البيت
بلعت ريگي بصعوبة وگتلة
: -قتله
: -بعده يتنفس بس مو طويّل بس شغلة وقت
چنت أريد أجاوبه بس ما لحگت انصدمت لما شفت سلاح ثاني بيدة مو ماله غير شكل غير حجم
گلت بصوت مخنوك
: -شنو هذا منين جبت
: -بعدين أكلج يلا بسرعة نمشي
شجن: وين
ما حجه صعد فوك ونزل بيده جنطة سودة لابسها بظهره وجاب بوتين
ثنى ركبته وكرفص كدامي ديلبسني البوتين ويحجي
عصام-: لازم نطلع منا بعد مو أمان.
شجن: مات وساف
عصام: شمدريني
شجن: بيش ضربته
عصام: بالمسدس
شجن: طلقة
عصام: لا دغدغته بالمسدس
شجن: - يعني هو عايش
عصام: -يضربة مرض ميت عايش
: -أني اخاف عليك
حجيتها وبجيت كومني لزم ايدي وأضحك
كال بفرحة: -لا عليج الله
: -والله ما اريد ترتكب جريمة ببسبي
: -يابة هي التجي من السمة تتلگاهة الكاع
وأنة لعيونج أعزب وأصلخ وأذبح مايهمني ابد كلش
شجن: بس، بس راح يجي غيرة مو
عصام: - يجي بس مو هسه يالله
شجن: أني خايفة.
مشينة وهو يضغط على ايدي ويحجي
: - الخوف ما يغير شي لازم نطلع قبل لا يحسون بينا
طلعنا من البيت والهوا البارد
يلفح وجهي وصوت نباح بعيد
والظلمة طاغية على المكان
كلشي ساكت بس صدى خطواتنا
احس ينسمع بكل مكان
شايلين اروحنا بدينا وطالعين
جنت أمشي بسرعة وياه
وهو عيونه أدور بين الأزقة والدرابين
مشينة هواي من شارع
لشارع بصف الحياطين نمشي
تعبت وجسمي بلش
يحكني أحس خملت ونمل جسمي
كمت كوة أمشي كتلة بصوت ضعيف.
: -عصام تعبت وجسمي يحكني ويوجعني
ماكدر خلة نرتاح شوي
: - لا لا نركض شويه نعبر كم بيت وبعدين نكعد
ركضنا نطبّ من بيت ونطلعن
من السطح
ندخل على بيت ثاني
و ظلين نطفر بين البيوت
أكو هواي بيوت مهجورة
وغرف مخنوكة بريحة الرطوبة
هو كل شوي يباوعلي يتاكد مني
شلوني. التعب مبين بعيونة النعسانة
عصام: - تحملي شويه بس نوصل نكعد
ما رديت ووصلنا لبيت مهجور
شبابيكه مفلشة وبابه مخلوع
ما بي أحد
دخلنا والبيت ضاوي
الكمر عاكس من الشباك.
والتراب يغطي المكان
عصام: -نرتاح هنا أكعدي
كعدت عالكاع وأني أتنفس بصعوبة
حطيت إيدي على ركبتي أحك بيها
وهو فتح الجنطة مالتة طلع الأبرة
وگطن معقّم
مديت أيدي وهو غرّز الإبرة
وأصابعي متيبسة
ارتجيت على الحايط
جسمي برد شوي ونعست حيل
: - كلشي يوجعني حتى الهوا ما جاي أگدر أتنفسه
: -تعالي تعالي يمّي كعدي هنا بس شوية يخفّ التعب
سحبني خلة راسي على رجلة وطلع جرجف
خفيف يصير مثل مثل جراجف الصيف.
غطاني بي مددت رجليه على الحايط
وهو يمسح على جبيني بيدة ويهمس
: -نامي ارتاحي شوي حتى نكمل
: -شگد بعد
: -مسافة قليلة بس كون تشدين حيلج وياي نطلع
: -ماكو سياره نمشي بيه اني جسمي خامل
: -حاولت ما حصلت لازم نكمل مشي وقبل الصبح نعبر البوابة الصبح اكو حراسة مشددة فرصتنا هسه
غفيت وهو يسولف عليه. من كثر
التعب والمرض ما جنت حاسة بحجم الخطر
الاحنة بي. أدور مكان اكعد
ارتاح انام.
: -شمس
بعد معركة فاشلة وي النوم ما نمت
حسيت باليأس من محاولات الفاشلة
كاعد أعاني من الارق بسبب قلقي على أختي
وحياتنا المدهورة
لفيت عيوني على على غاط بنوم عميق
والتعب مبين على ملامحة
وخرت الغطة وگمت جنت جوعانة طلعت من الغرفة البيت صنتة هدوء
شفت باب غرفة مصطفى مفتوح مادري بس شدني الفضول أشوفة أتعرف عليه
ورجلية أخذتني الة دفعت الباب على گيف
ومديت راسي
جانت الغرفة مليانة بالألعاب مطشرة على الكاع.
سيارات صغيرة ولعابات
وهو جان كاعد بنص الهوسه ويلعب منهمك كلش
عندة وحدة من سيارتة صلاح لوري
يخلي بيه سيارات ثانية وقطع خشب
ويحركة عود على اساس دينقلهن
ابتسمت شگد بريء، جان بعيداً كل البعد عن عالمنة المعقد ما أتمنى من يكبر يشبه أبو
علي أقل ياخذ بس الصفات الحلوة
منه مثل حنيتة اما باقي صفاتة ما
أتمنى يطلع يشبه بيهن
علي أحيانا قاسي واحيانا بارد ومظلم
مرات يكرهك بحياتك ومرات يحسسك.
أنت اهم شي عندة ويخليك تحب الحياة
دخلت الغرفة بهدوء
وأقفلت الباب وراي
ما حس بيه وحدة يلعب وداير وجهه
مشيت خطوات بتجاهة ودنكت
اخذت وحدة من سيارات رفع راسة
: - شنو دا تسوي يا حلو
انتفض بخفة ورفع رأسه
يباوعلي مستغرب بفضول
أبتسمت بوجهه ورجعلي الابتسامة
ابتسامة بريئة كال
مصطفى: دا أبني بيت
كعدت يمة لزمت الشفل الاصفر احرك بي
شمس-: الله حلو بيت منو هذا
مصطفى: بيتنا
ضحكت بمرح وهو هم يضحك
-: ممكن أساعدك
هز رأسه بحماس.
مصطفى: - أي سويلي باب
بديت أجيب قطع الخشب الصغيرة
الي مطشرة يمة ونسوي بيها بيت
وهو ينقل باقي القطع باالوري مالتة
الي بعدين رفع راسة وكال
: -أنتِ ماما الجديدة
فكيت عيوني بستفهام: -شنو حبيبي ماما شنو جديدة
: -بابا كال راح يجيب ماما إلى واليوم الصبح كلي أنتِ ماما
بلعت ريكي مادري شكلة مسحت على وجهي
وحجيت بتسأل
: -زين وماما القديمة وين
رد وهو يلعب: -موجودة
: -منو هي
: -حبوبة
: -اها يعني حبوبة هي ماما.
هز راسة إلى دنكت ارتب بالخشب ومادري
حسيت بشعور ما حلو
حسيت سهاد خطية رغم هي أنسانة
سيئة بس مو من حق على يحرمها من ابنها
احس هي أولى بكلمة ماما
أني ما جبته ولا ربيتة كلمة ماما مو إلى ابد
رفعت عيوني الة من لمست ادية الصغيرة
ادية لمسة بريئة خالية من أي خوف أو شك
شمس: هذا بيت كلش حلو منو راح يعيش بي
مصطفى: أني وأنتِ وبابا وحبوبة وعمة جوانة
حسيت بوخزة بكلبي: -يعمري زين وهذا البيت بي حديقة.
مصطفى: -أي بي ورد هواي وبي عصافير
جنت حيل مستمتعه ويا وأضحك من كلبي
علي سوالفه رغم يعيد الكلمة مرتين
واكو سوالف ما افهمهن ويعصب عليه يكلي
ما تسمعين
هو ما يدري عندة مفردات يحتاج مترجم
الهم هسه أني اذا عندي ببيي شلون
اربي وافهم عليه
بس شعور حلو ااح يربي
كون اصير ماما
عادي حتى اذا زوجي الازرك
طلكني مو مهم أنربي أني واختي ونعيش وحدنة.
يمكن، يمكن هذا هو الأمان اللي أدور عليه أمان بسيط بريء بعيد عن كل المشاكل والهموم
عائلة صغيرة وطفل بضحكته واسوالفة
يخفف عني أهمومي
فجأة انفتح باب الغرفة بقوة ومو بس أني فزيت حتى مصطفى خطية خاف
دخلت ام على باوعتلي صفح وحجت
: -شسوين يم مصطفى
: -دا العب ويا
تقدمت خطوة ورفعت أصبعها بتهديد
-: ممنوع تقربين على حفيدي
: -ليش راح أكلة مثلا وبعدين هو حبني مو صح مصطفى
التفت علية وهو هز راسة ب اي يلا عفية.
مثل ابو صريح وما يخاف خوش صفة هاي
أجت كعدت يمه وأني گمت كالت بحدة
: -لو تموتين وتبوسين ايدي ما أخليج بيتي
: -لا تعبين نفسج أبنج يحبني ومصطفى هم يحبني و أنتِ هم راح تحبيني اليوم باجر لازم تحبيني لان ما تجي جنه غيري بالهل بيت حتى اذا نجبرت
: -شسوين
: -أگتل ابنج وها ترة تدرين بعد أني مسويتها من قبل ديريبالج لا سويها والله اني شاخطة مو صاحيه وأنت بكيفج
بقت جامدة وعيونها تريد تتطلع من مكانها.
سويت باي بطرف أصابعي لمصطفى وطلعت من الغرفة
نزلت للمطبخ بخطوات خفيفة كلت أكلي شي
ميتة جوع
لكيت اجوانا وحدهة دسوي كيكة ومشغلة اغنية يمها عفية عائلة كلهم كاعدين
وكلهم بيهم توحد كل واحد وحدة شنو هاي
بيت حبوبة بالهور بي دفو اكثر من هنا
رغم هي وحدها بس من اروحلها احس
كاعدة بين جمعه مال عائلة جبيرة
هسه هنا رغم همة هم هواي زينين بس شو ماكو دفوو العائلة تحسهم هادين وباردين اكثر من لازم.
اكول على قالب ثلج طبعا اذا هذا جوء عائلتة شلون يطلع هو بعد
شمس-: أجوانا
رفعت راسها مبتسمه كالت
: - ما نمتي مرت أخوية
اووي شگد مهذبة البنية
شمس-: لا. ما جاني نوم شنو دا تسوين الريحة كلش طيبة
أجوانا-: دا أسوي كيكة اجاني واهس بنص الليل
فتحت ثلاجة طلعت اكل وكعدت اكبالها اكل
وهي مدمرة الطاولة وتسوي خابصة المطبخ
ضحكت مستمتعة وحجيت
: -كيكة بنص الليل شنو ما تنامون
هزت راسها بمرح.
-: مرات يجي الواهس ومرات، باوعتلي بابتسامة حزينة: -مرات الواحد يحتاج يسوي شي حلو حتى ينسى المر
: -شلون يعني
حجت تغير الموضوع: -نهزمتي من ماما سمعت صوتكم مساع
شمس: - أي والله تعبتني وهذا أول يوم شلون نعيش سوة ما ادري
أجوانا-: هي هيج ماما كلبها طيب بس ما تعرف تعبر. خصوصاً من تشوف أحد قريب من على شوي تغار لان بس هو عدها وهي هم ما تحبج بسبب أهلج
: -حقها بس أني معلية مو صح.
: -اكيد صح أني هم حجيت وياها بس ما تسمع
مني تسوي للي براسها
: -همة هيج الامهات
: -لا أمي ما جنت هيج بس ماما ام على شوي عنيدة
: -لحظه كلتيلي أنو أمج وماما أم على يعني أنت واعية على أمج ملحگة عليها
نظرة حزن خفيفة مرت بعيونها كالت
: -ايي
: -اسفة بس شوي استغربت حسبالي ما واعية او هيج شي زين شعرفج أمج ماتت اني سمعت من على هي نفقدت
: -شمس للي ينفقد مثل الميت وينها صار أسنين لو عايشة جان رجعت.
: -يعني أنتِ هسه أم على ربتج
أجوانا-: أي ربتني هي اللي علمتني كلشي هي أمي الثانية بس مرات أشتاق لماما أشتاق لريحتها لصوتها لضحكتها مرات أحس بفراغ جبير هنا أحس روحي وحيدة حتى لو البيت مليان ناس
شمس: -أفهمج كلش أفهمج أني هم ماما ماتت وبابا هم هم أحس بهذا الفراغ أحس روحي وحيدة حتى لو على موجود
باوعتلي بتعاطف: - الله يرحمهم
شمس-: ويرحم أمج شفتي احنا اثنيناتنا يتيمات بس أنتي عندج أم ثانية أني ما عندي.
أجوانا: -أنتي عندج على وهسه مو وحدج أني وياج مو صرتي جنتنة من عائلتنا ادري بيج شكد تعبانة
صعبة واحد يفقد أهله ويحتاج أسنين حتى يتعايش وي حزنة
: -زين أنت نسيتي تعايشتي وي الوضع يعني راح اتعايش أنسى أني تعبانة اجوانا التعب مو بس بجسمي التعب بروحي أحس روحي ضايعة ما أعرف وين أروح ولا شنو أسوي كلشي صار فجأة
أجوانا-: أدري الحياة مرات تضربنا ضربات قوية تخلينا نحس أن كلشي انتهى بس بس هي ما تنتهي هي بس تتغير.
شمس-: تتغير شلون
أجوانا: - شوفي أني من ماتت أمي حسيت الدنيا سودة كلشي راح جنت طفلة ما أفهم بس كبرت وشفت أن الحياة مثل النهر مرات يكون هادي ومرات يكون بي أمواج قوية بس النهر ما يوكف يظل يجري
شمس: - يعني لازم نستمر
أجوانا: -بالضبط لازم نستمر أني جنت أكره أم على لأن مو أمي الحقيقية جنت عايشة بغضب وعصبية دوم واعيط على اقل شي واخلق مشكلة
شمس: -وبعدين.
أجوانا-: بعدين شفت أن الغضب ما يغير شي بس يتعبني وياخذ من صحتي واتمرضت هواي و شفت أنو أم على ربتني أحسن تربية ودارت بالها عليه ما حسستتني أني بت ضرتها ابد تعلمت أتقبل أتقبل اللي صار وأتقبل الناس مثل ما هم
شمس-: بس شلون نتقبل شلون ننسى الألم صعبة
أجوانا: - ما ننسى الألم يبقى جزء منا مثل الجرح بس الجرح يطيب يبقى ألأثر لازم نركز على اللي كاعد يصير هسه على اللي نكدر نسويه مو على اللي راح.
شمس: - أني ما عندي شي لا بيت لا أهل حتى أختي ما ادري بيها وين
أجوانا-: أنتي عندج صبر وقوية وهذا أهم شي وعندج فرصة تبنين شي جديد صدكي وما تضيج الا تفرج وراح تبدين حياة حلوة يمكن مو مثل اللي راحت بس يمكن أحسن. بداية جديدة أنت وزوجج وعائلتكم
شمس: - أخوج أذاني هواي عود يحميني بس هو يذيني.
اجوانا: -علي طيب وماكو منه ما أحجي هيج لان أخوية بس فعلا أنتِ محظوظة بوجود هيج رجال بحياتج بس لازم تفهمين مو كلشي نشوفه هو الحقيقة مرات الناس تسوي شغلات تبين مو زينة بس نيتهم غير شي فهو كلشي ديسوي علمودج
شمس: - بس شلون أثق بعد كل اللي صار شلون نعيش بهدوء وكانو ماصار شي أنتِ ماتعرفين شصار اجوانا.
أجوانا: - الثقة ما تجي بيوم وليلة تجي بالوقت وتجي من المواقف بس لازم تطين فرصة لنفسج وللناس. الحياة ما توكف لازم نلكه طريقة نعيشها ونعيشها صح
ابتسمت بتساع حسيت بألأمل شوي
جوانا لطيفة ومتفائلة
وهي طلعت الكيكة من الفرن والريحة ملت
المطبخ
أجوانا: - يالله أخيراً هسه راح تكدرين تنسين كل المشاكل من تاكلين من كيكتي
شمس: -مبينة من الريحة تجنن عاشت إيدج
أجوانا-: بالعافية بس قبل لا ناكل عندي سؤال فضولي
شمس-: شنو.
أجوانا: -أنتي شنو تحبين يعني شنو نوع الأغاني اللي تسمعيها منو مطربج المفضل هيج أسوالف بنات
: -قبل لا أحب أخوج جنت أحب كاظم الساهر
اجوانا-: هههههه حبيبج السابق صوته يجنن أني هم من معجبينة
شمس-: أي والله صوته ينسيني الدنيا وما بيها يقدس المرأة، يحترمها مو مثل بعض الناس
ضحكت وخلت قطعة كيك وجاي كدامي وهي هم خلت لنفسها وكعدت
سالتها بفضول: - زين وأنتي أنتي شنو تحبين منا مناك لوو اكو أحد بالبال.
رجعت شعرها الاشكر ليورة بديها وكالت بضحكة
: -لا ماكدر اكول اسراري تضلين مرت اخوي يعني حية يكولون نسوان الاخوة حياية
: -نهجم بيتج اذا أني حية أنتِ عكرب بهاي كفشتج الصفرة
: -حبيت القب ههههههه خلة أحجيلج مممم، اكو
تحمست وصفگت أدية
-: منو احجي بلا منو سعيد الحظ
تنهدت عبالك دا تستجمع شجاعتها
: - هو صديق على من أصدقائة ماعرف أني كلش معجبة بي من زمان
عگفت وجهي بتفكير: - صديق على منو
: -تعرفيهم أنتِ.
: -صراحة أعرف بس عزيز وعصام مقربين منه فعرهم دوم أشوفهم
أكلت من الكيكة شوي وحجت مرتبكة
: -عصام
نصدمت وحجيت متفاجى
: -عصاااام؟
هزت راسها بخجل-: أي، عصام
: -من شوكت
: -من زمان هو دوم جان يجينا من جنت أصغيرة شوي جنت أسلم عليه وعلاقتنه حلوة دوم من يجي على اتفقدة اذا هو هم جاي ويجيب للي هداية شگد جان يموت عليه بس ماعرف من كبرت ابتعد
: -ليش
: -ماعرف يمكن لأن أخت صديقة
: -اي همة حبابين ما يباوعن لعرضهم يستحون.
: -هو هذا إلى عاجبني بي شمس
: -زين يعني ليش ما بينتي الة أنتِ معجبة بي يجوز جان هو هم بادلج
: -مو هو يباوعلي عبالك طفلة ومن كبرت كلش گام ما يجينا مثل قبل غير كم مرة وحتى من يجي يسلم على ماما ويروح واني هم گمت أستحي منه من كبرت فبقيت الاعجاب بكلبي وبس
: -مادري شگلج
: -عادي لا دكولين شي أني ما حاجية الموضوع
للاحد من قبل هاي أول مره أحجي سر وهم الج حجيت.
: -ميخالف اعتبريني اختج اني هم عندي كومة اسرار بس تجي اختي شجونة راح نشكل شلة حلوة وانصير احلى صديقات
: -يااااي فرحانة بيكم لازم اشكر على لان جاب النا جنه جنت احس بالوحدة وحدي النهار كله هسه راح انصير اتلاثة اكيد اختج مثلج
: -لا شجون تجنن بس تشوفيها راح تحبيها اكثر مني
: -تحمست هههههه
: -معليج ونفكر بطريقة نصيد الج عصام بيها
ضحكت بتساع: -خلتجي اختج ونفكر اكيد نجمع كيد تلث نساء نسوي كارثة هههه.
هزيت راسي بفرحة همزين اختة
وردة مو مثلة.
: -شجن
فزيت ماعرف شگد مر وقت
ضلمة بس الگمر مضوي
التفت على عصام جان راگي راسة
علي الحايط و مغمض عيونه بس مو نايم
أول ما حس بيه كعدت همس
: -ها شلون صرتي بعدج تعبانه
هزّيت راسي گلتله
: -أحسن شوي
گام و شال الجنطة
: -يله نكمل هنه كم شارع ونوصل
مشينه وكلبي متروس خوف
الجوء جان صافي وهادي ودرابين فارغة
وصلنه لحايط عالي وهو خلة أدي
وكالي
: -أصعدي
جلبت بالحايط وحطيت رجلي على ادي
كوة لزمت الحايط وهو جان ساندني من ورة.
ودفعني الا صعدت بقيت فوك الحايط
ما نزلت لطرف الثاني خاف اطيح
انتظرتة يصعد حتى هو ينزلني
فهو جلب وصعد وحدة
صرنة متكابلين ضحكت وهو طفر
علي جهه الثانية ورجع مدلي ايدة
جنت متررددة اطفر بحضنه
بس هو شجعني عاد مديت رجلية
ونكزت لزمني بسرعة
ولزم ايدي طلعنا ركض ركض
جنت اتعب نوكف شوي جر نفس
ونرجع نكمل
يمكن هو لو مو اني ويا جان
سواها خطوتين ومن زمان طلع
بس كل شوي يوكف علمودي
حتى ارتاح
ركضنا چنت أتعب بس هو يسحبني.
وكل شوية يباوع عليّ ويگلي
: -شدي حيلج بعد شوي بس
بس فجاة صوت طلق ناري
قوي بالمنطقة
وهو سحبني لواحد من البيوت
دخلني جوة وطلع مبايلة
متعصب ماعرف خابر منو بس كالة بعصبية
: -شلون هشام يقتحم المكان غير بعدنة ما طالعين مو كتلكم لما نطلع
ما اعرف ذاك شنو رد عليه بس هو زمخ بي
: -نطلع شنطلع هسه راح يشددون المراقبة أبن الحلو نعلعلا دروح روح أنة شلون اعتمدت عليكم
قفل الخط ويستغفر عيونه صارت شرار
همس وهو يگطع النفس.
: -كشفونة هسه اكيد لحگونا
گمت أرجف وهو لزمني كمت ويا
گال: -منن ورا الحايط ذاك نطب ببيت قديم بي سرداب يوصلنا لنهاية الشارع
جنت أباوع وين ما دا أيشر
علي البيت اللي اكبالنا
الظاهر يعرف المنطقة كله
ركضنا واحس صوت الطلق يلزم الهوا
دخلنا من فتحة صغيرة
بيت مهجور وسرداب نازل جوه
كله تراب و ريحة قديمة
عصام رفع الخشب العتيگ
اللي يغطي باب السرداب
چنه مدفون ومحد واصلة
من سنين هز راسه گال
: -خليج وراي خطوة بخطوة.
رغم كلشي ديصير صوت الطلق برة
والظاهر اكو مداهمة عسكرية على مكان
ودخلونة هنا بيت مهجور وبسرداب
جوة الكاع ما جنت خايفة هواي
لان هو وياي ثقة عمياء جان عندي بي نزلنة جوة وريحة رطوبة وحديد قديم والكاع مليانة طين
كلشي ضلمة بس ضوّء التيلفون
مال عصام يضوي گدامنا وبمسافة قليلة
چنت أتنفس وصدري ثكيل
أختنك من هيج أماكن
وكلشي هنا يحسسني إحنا دخلين
بالكبر
: -عصام شنو هذا المكان
رد بصوت خافت: - سرداب قديم مهجور.
يستخدمونة حتى يشردون من المداهمات
چنت أمشي وراه جسمي يرجف عيون عصام أدور ويده لازمة بيدي بحذر
: -عصام
التفتلي كتلة: -اذا هاي عوفني هنا وروح
اخاف متگدر نطلع سوة وأني أتعبك كوة دا أمشي أسحل بروحي سحل
: -هو أنة أجيت لخاطرج وترديني أعوفج بلا شحجي وياج هسه لج بابة أنتِ أعز من روحي
ابتسمت وكرص خدي وتحرگنه وهو جان
حذر كل شوية يسكت يسمع يتأكد
سكت فجأة حط إيده على چتفي گال
: -أوگفي سمعتي الصوت
كتمت أنفاسي كلبي يريد.
يطلع من صدري
سمعنا صوت صفير خفيف مو بعيد جاي من جهة جوا أو يمكن من طرف الفتحة الثانية الموجودة بتجاه البيت گال
: - مو طبيعي هالصوت مو صوت حيوان
عبالك واحد يحچي ويا نفسه
قربني يمّه أكثر
وصار يحسب خطواته
ولف بمسار ضيگ بين الحياطين
تحرگنة نمشّي بخفة رجلينة وحيل بخوف
ظلينا نمشي يمكن ربع ساعة چوة
والجوء شوي أتغير بدأ الهوا يدخل من مكان
هوء بارد لفحني اتاكدت احنا وصلنا
لنهاية السرداب يالله
الحمدلله.
الگمر ينشاف من فتحة فوك
وصلنا للطرف الثاني وهو واگف
طلعني قبلة
رجلية جانت ترجف
بس من شفت الگمر
حسيت إنفاسي رجعت شوية
بس قبل لا نكمل الخطوة الأخيرة ونصعد
صوت جلب نبح قريب
وكسر الصمت صوت رجل يصيح
: - وين رايحين.