رواية عروس الهور الجزء الأول للكاتبة هيلانا الفصل الحادي والثلاثون

رواية عروس الهور الجزء الأول للكاتبة هيلانا الفصل الحادي والثلاثون

أجة على اليوم وياريت لو ما جاي گوم الدنيا على راسي ويريد ياخذني لمستشفى
كوة قنعتة مابيه شي زينة وحبوبة حجت ويا فعاد سگت، كال على باجر ما عارضتة
جنت كاعدة وهو متعصب يفتر وحبوبة تشرب
جاي كالي بشك
: -شسوووين يم البحيرة
: -ها. يا. بحيرة اني جنت أتمشة قريب على البيت وضيعت
: -حلوو. جااا شوداج على بيت سيد يأسر
هلو طلع سيد الرجال العضني گلابة كتلة برتباك
: -ماااعرف جنت خايفة وركضت ورجلية أخذتني.

: -ما تعرفين أجذبين شمس صعبة حبيبتي
بگت طن هوؤء وحبوبة كالتلة: -لا تغزل بالفرخة استحي مني وأني جويعدة يمكم
هو أبتسم وأني أجيت أكولها حبوبة يا غزل
حفيدج دا يهددني بطريقة غير مباشرة ديكلي
أني شاك بيج ما مقتنع
غلست عنهم وفتت جوة للغرفة فهو أجة وراي
كعد يمي باوعلي. دنكت راسي
وخر الثوب على جهة شاف الجرح تأفف كال
: -يوچعچ
: -لا شوي زينة
: -باجر أمرج لمستشفى
: -ماكو داعي
: -أششش شلون ماكو داعي يجوز ملتهب.

سكتت. جرني لحضنة حضني بادلتة مشتاقتلة هو أول ما أجة جان يرعد من حبوبة كالتلة عاضها الجلب
أنوب الله يسلمها سولفت السالفة كله ما تضم حجاية فضحتني فضيحة وخلتة يشك بيه شنو جنت أسوي، يم البحيرة.

العصرية جنت كاعدة برة بعتبت الباب وأيدي على خدي
عقلي صار يصورلي شغلات غريبة وأفكار مستحيل شخص عاقل يفكر بيها
نزيت على أيد حبوبة على متني التفتلة
وأبتسمت بوجهة
لابسة عباءتها وكاشخة الظاهر تريد تروح للعرس
اليوم عرس واحد من أقاربهم هنا
وكالتلي: -تروحين وياي يحبوبة
هزيت راسي بلا لعلم هي من العصر تلح عليه
بس ما مشيت ما لي خلك حايرة بيتي إلى راح يندمر أخ منك علي
: -راح أبقى منتظرة على روحي أنتي.

فعاد هي خلت ومشت وكالت يمكن ما ترجع لباجر واخذت راحتها لان على هنا
وأني بقيت منتظرة على يجي لأن هو أول ما أجة راح لصيد هو وكاظم
مرت ساعات، وأني على كعدتي شفتة أجة من بعيد مخلي الكسرية على متنة ولاف جراوية على راسة
يمشي كدام كاظم ويسولف ويضحك. وصلوا يمي كاظم اخذ، الطيور الصايدهن ومشة
وهو دنك علية خلة بوسة على راسي
رفعت عيوني الة بضياع
كرص خشمي وهو عيونة بالبيت: -كومي حضريلي المشواية جبتلج حجل يلوگ لحلك.

كالها وگرص شفتي وبأس أصبعة ابتسمت بوجهه
جذب وگمت فتت جوة أدور على مشواية
لگيت مشواية مال السمچ چانت متروسة تراب. بديت أنظفها
أحاول أبعد الأفكار اللي دا تنهش براسي. الحجل چان صغير ريشه أبيض ورمادي
بديت أنظفه وأجهزه للشوي. أحس بإيدي دا ترجف شوي ما ادري ليش
شفتة إجه وراي چان دا يغسل إدي يم الحنفية اللي يمي
عيونه چانت دا تباوعلي. ركزت بعيونة وأبالي هواي أسألة معقولة هو مو أنسان.

أتذكرت مرضي ومن أتهيلي أهلي بصورة غير أشخاص أقشعر بدني
فزيت من حجة بصيغة مذكر
: - بالك وين حبيبي
ضيقت عيوني بستفهام أنتبهت على الحجلة بالصينية واني لازمة السجينة وباقية أباوعلة
دنكت راسي ورجعت دا أغسل بيها
حاولت أكون طبيعية
: - لا، لا بس دا أنظف الحجلة بيها ريش هواي
ما حچى شي بس تقدم خطوة باتجاهي مد إيده بهدوء، سحب المشواية والحجل من إيدي
: -عوفيها أنة أسويها أنتي تعبانة
وخرت من يم الحنفية وهو بدة ينظفها.

گمل وگام وأني مشيت جمعت الحطب الة
وشعلت النار. جمرت بين ما كمل. أجة خلهن على النار وأني غسلت أدية وفتت جوة
شميت ريحة الدخان بملابسي كلت أسبح ورة العشة
حتى البس اي شي من ملابس حبوبة
محد يشوف
طلعت كعدت يمة أباوعله، وأحس بگلبي دا ينعصر. هذا الرجال
اللي أحبه بكل جوارحي للي أنقذني من جحيم مرضي وحبني
ما أعرف شنو نهايته، أفكار سودا چانت دا تنهش براسي.
شنو إذا طلع صدگ مثل ما دا أتصور
شنو إذا چان خطر عليه.

واذا جان مو بشر طبيعي بديت أزم الامور
وتجي أبالي سوالف غريبة
كلام حبوبة عن مرضه الغريب و الگبر الفارغ اللي حفرته بدية
اكو شي غلط شي چبير يخوف
معقولة خفى الجثة
لو إيهاب، بعده عايش
لو علي، قتله بطريقة ما تخلي اي أثر
شنو راح أسوي اذا هالافكار صارت واقع
أني هنا وحدي. بعيدة عن أهلي
أحس باليأس يسيطر عليّه أحبه بس أخاف منه أريد أثق بيه بس ما أگدر شلون أعيش وي رجل ما أعرف شنو يخفي.

فجأة رفع راسه عيونه التقت بعيوني نظرة عميقة كأنما دا يقرأ كلشي يدور براسي
ما حچى شي بس ابتسم ابتسامة خفيفة
نزلت عيوني بسرعة أباوع على النار. هو يعرف هو دائماً يعرف شبيه ويعرف اذا حاول أضم شي
أخذتلي شوية يمة وهنه بدن يستون فگمت
فتت جوة خليت السفرة
والخبز والخضرة وهو أجة خلاهن بصينية
كعدت أكبالة مالي نفس أكل
بس ما أريد أشگكك بشي هو دا يركز وياي
حيل
چان مكفكف أردان قميصه.

وعضلات إدي چانت دا تبرز بشكل خفيف. حط صينية الأكل اللي بيها الحجل المشوي يمي على الأرض
ريحة الشوي الطيبة ملت الغرفة
ما ماگلة من قبل حجل
من زوجنة لليوم خلاني أجرب هواي أشياء
علمني على هواي شغلات باگني من نفسي ودخلني بعالمة خلاني أحبة وأحب كلشي هو يحبة
عيوني علية گطع لحمة من الحجل
حطها بلگمة خبز حارة وكال
: -يلا افتحي حلگچ
أبتسمت وحجيت: -أكل وحدي
هز راسة بلا.

مد إيدة إليّ باوعتله أحس بالخجل يسيطر عليّة صراحة ما متعودة أحد يوكلني الا اذا جنت مريضة
بس فتحت حلگي مجبورة لان ادري بي راح يوكلني غصبا عني هو عنيف حتى بحبة وحنانة
حط اللگمة بحلگي جان الطعم طيب أول مره أضوگهة فعلا طيبة
حجيت بمرح والگمة بيدي: -طيبة عاشت ايدك
أخذ اللفة إلى بقت من إيدي عضهة من نفس المكان اللي أكلت منه
أحس بگلبي دا يرفرف. من تصرفاتة. كتلة بهدوء
: -جان سويت غيرها شنو مالتي مزورة.

: -من حلكچ أطيب
عضيت على شفتي كاتمة ضحكتي خجلني
يباوعلي عيونه تلمع بحب عميق
: -تحبني علي
صفن بوجهي ولگمة بيدة ثواني
حجة بنبرة غريبة: -عدج شگ
: -لا
: -چا ليش تعيدين هالسوال دوم
: -ما اعرف اذا أزعجك عادي لا جاوبة
: -كتلچ من قبل ما حبيت قبلج ولا تجي بعدج بنية
: -أني هم أحبك وما أتمنى بيوم تنتهي علاقتنة
: -وليش تنتهي
حجيت أغير السالفة حسيتة شك
: -هيج يعني خاف تمل مني وتلگة غيري
: -شعندي غيرچ أنتِ روحي.

: -اذا روحك ليش ما تحجيلي شي عنك يعني أفتحلي كلبك
: -لا تشغلين بالچ بشي هسه. كلشي بوگته حلو
سكتتت بقيت اكل هيج شوي أنكش ويا بس هو كل شوي مسويلي لفة أكبر من راسي وتعاي أكليها
بعد ما خلصنا العشة گمت لميت
الاكل وهو ساعدني
بس الجاي لا هو خدر وجاب گلاصين
صب واحد مدة الي
وثاني الة وطلع جكارة باوعلي وكال
: -نشرب سوا
هزيت راسي ضحك سحبني إله أكثر خلاني أسند راسي على چتفه
كلشي جان هادئ بس عقلي چان مليان ضجة.

حجة وهو ياخذ نفس من جكارتة
: -شبيچ ساكتة اليوم
: -ماكو شي هو أني هيج
: -لا أنتِ مو هيچ بالچ مو وياچ
سكتت شگد ما أحاول أضم بس عيوني دا تفضحني
مسح على شعري أحس بأنفاسه الحارة على راسي
: -بشنو تفكرين
وخرت راسي عيوني عليه هو جان منتظر يسمع مني شي تررددت بس اخذت نفس عميق وحجيت
: - أريد أسألك سؤال
: -جواب
: -حياتك، شلون عشتها؟ وين چنت قبل يعني أحجيلي عن نفسك شوي.

رد بهدوء: -أغلب حياتي كضيتها بالخارج، دراسة وشغل. چنت أتنقل هواي. بس بعد ما تخرجت استقريت بالعراق ما گمت أسافر
: - وليش ما عشت بالناصرية أنتَ مو أصلك منا ليش بغداد
: -أمي ببغداد لازم أكون قريب منها وأدير بالي عليها ما أگدر أبعد عنها بس أنة هواي أجة هنا
: -يعني، هذا كلشي
: -چاا شگو، سكتت حسبالي أسحب منه كلام بدون ما يحس بس هو صعب
ضغط على أيدي وكال.

: - أدري شني أبالج بس گتلچ كلشي بوگته والثقة هي أساس كلشي فثقي بية أنة ما راح أأذيج بيوم
: -شلون أثق بيك وأني ما أعرف شنو اللي دا يصير حاسة بيك داضم شي چبير، شي يخوفني
سحبني إله أكثر خلة راسي على صدرة
: -أدري بيچ خايفة بس اكو أسرار مو كل گلب يگدر يتحملها. مو كل عين تگدر تشوفها وتظل صاحية وأنة أخاف عليچ
رفعت راسي أباوعله بعيون مليانة توسل اريد يحجيلي ما أتحمل ابقى هيج مغمضة.

: -بس أني أريد أعرف أريد أفهم ما أگدر أعيش هيچ، ما أگدر أعيش وياك وأنتَ لغز
: -وأنة راح أحچيلچ بس مو هسه. مو هنا. هذا المكان بيه عيون وهاي الأسرار ما تنحچي إلا بيني وبينچ بوقت تكونين مستعدة صدگ تسمعين مو بس تسمعين تفهمين وتتحملين
: -يعني راح تظل هيچ راح أظل خايفة
: -لا ما راح تظلين خايفة أنة أمانچ بس لازم تثقين بيه لازم تعرفين كلشي سويته كاعد أسوي علمودچ وعلمودنا.

حجية دا يضربني مثل السچين علمودچ. علمودنا أيست بس اني ما راح أنتظرة راح اعرف بطريقتي
باوعت لجكارة بيدة اخذتهة ابتسم سحبت نفس منها
ريحة الدخان چانت غريبة عليّة
بس أحس بيها دا تملي صدري بالراحة المؤقتة
مد إيدة سحب الجكارة من شفتي بهدوء أخذ نفس عميق منها وبعدين رجعها إليّ
عيونه چانت مثبتة بعيوني نظرة عميقة
بينا وكل وأحد يفكر بشي
: -لا تتعودين عليها مو زينة عليچ
: -وأنتَ
: -تعودت أنة من زمان.

: -أني هم اريد أتعود
تقرب خلة بوسة على طرف شفتي وحجة بجمود
: -مو ضحگتلچ وتسوفلتي ممنوع تتعودين على شي يضرچ
: -حتى أنتَ
: -حتى أنة
: -بس الوقت فات وأني تعودت عليك
: -وأنة ما أضرچ أحميچ حتى من نفسي
هو دا يهتم بيّة حتى بأصغر التفاصيل أخذت نفس ثاني من الجكارة، وبعدين رجعتها إله
أحس بينا دا نشارك شي خاص شي ماكو أحد غيرنا يفهمه أباوع لملامحه الهادية لعيونه اللي دا تخفي هواي أسرار.

مر الوقت والدخان ملة الغرفة وهمزين حبوبة تبات هناك جان زفتنه زفة على هالگبارة مال الدخان
نعست كلش. گمت دورت بالوفية مال حبوبة واخذت ثوب منه سبحت و لبستة
جان بي فتحة من الصدر على شكل مثلث كلش عريضة هو أصلا جبير يفوتون وياي عشرة بي
طلعت من غرفة حبوبة وجبت أفراش وياي ولازمة الثوب لان طويل
علي يباوعلي وكاتم ضحكتة كوة والله أني
اعرفه ديريد يضحك بس ميگدر خطية
فرشت والتفتت عليه متخوصرة.

: -أضحك أبو مصطفى لا تموت
طگهة ضحكة هيج طالعة من كلبة وكال
: -لايگ عليچ
: -اي اي صدكت
تمدد وأني نمت يمة سحبني خلة راسي على أيدة دفنت وجهي بحضنة
غمضت عيوني نعسانة وهو هم بس حط راسة نام مبين تعبان
من هيستة نام درت وجهي عنه أنطيتة ظهري
وأيدة على وسطي
خليت أيدي فوك أيدة تلمست الخاتم إلى بصبعة
باوعت على الخاتم الفضي الغامق اللي ما ينزعه أبداً
ضوء خافت چان دا يتسلل من الشباك
دا يخلي الخاتم يلمع بشكل خفيف.

بديت أركز عليه الزخارف الغريبة اللي عليه
كلمات ما مفهومة عبالك مكتوبة بلغة قديمة
رجعت ذاكرتي لذاك اليوم
ايوم اللي چنت بيه مريضة كلش
وتهيلي أهلي بصورة غير أشخاص يوم اللي على لبسني هذا الخاتم ليش ليش لبسه إليّ ذاك اليوم بالذات
قشعريرة سرت بجسمي. ليش ما ينزعه أبداً حتى من ينام
شنو سر هذا الخاتم
معقولة تعويذة او شي يحمي
لو شي يربطه بشي، شي ما أعرفه أني
مديت إيدي بهدوء لمست الخاتم.

أحاول أقرأ الكلمات بس ما أفهم شي
مجرد رموز غريبة شنو معنى هاي الكلمات الغريبة اللي ما أفهمها
أحس روحي محبوسة بين حبه و أسراره أريد أعرف كلشي أريد أواجه الحقيقة
شگد ما چانت مؤلمة بس بنفس الوقت أخاف أخاف من اللي راح أكتشفه أخاف من على أخاف من نفسي
تنهدت وتغطيت. رجعت دفنت وجهي بصدرة أحس بأنفاسه الهادية
هو نايم هادئ بس أني، أني دا أشتعل من الأفكار.

ثاني يوم الصبح
ضوء الشمس جان كاسر باللغرفة
فزيت على حركة على يمي
فتحت عيوني شفتة لابس ويفتر يمي ماعرف شيدور غطيت راسي
نعسانة ومجاهلة الحركة إلى يمي البارحة هواي بقيت أفكر وكوة نمت هسه نعسانة
علي: -گعدي شمس لازم أمر بيج على المستشفى
حجيت من جوة البطانية: -مابية شي عوفني نايمة
سحب البطانية مني خزرتة، حرك حواجبة بمعنى كومي. تأففت وگمت
لبست وأنوب طلعت غسلت. شفت حبوبة جاية وكاعدة بالحوش تتريك سلمت عليها.

ما ادري شوكت راجعة من العرس
وتمددت يمهه خليت راسي على رجلها وأجة
علي كعد أكبالنة دا يتريك
علي جان دا يشاقة وياها كالها: -أن شاءلله أشوفلج شايب وأزوجج
ضربتة بالعوجية وحجت ما راضية: -برد حيلك شنهي رادة ردود
رجعت كالتلي: -شلون صرتي يدة أيدج بعدها توجعچ
شمس: -لا حبوبة صرت أحسن الحمد لله
أنوب گمنة ودعناهة، وهي توصي بعلي
دكلة: -دير بالك على الفرخة
حضنتهة وهي بوستني وحجت همس عود حتى
علي ما يسمعها.

: -ديري بالج على روحچ يدة وسمعي كلام رجلچ ترى هو صح ساقط بس يحبچ
هزيت راسي ب ايي وحطيت أيدي بيد على ومشينة راجعين للبيتنا.

باالطريق كال
علي: -راح نمر على المستشفى. لازم يفحصون الجروح
: -ما يحتاج، اهلك عقموا إلى وضمدوا وزينة هيج ألم خفيف عندي
علي: -لا يحتاج ماكو نقاش بهذا الموضوع صحتچ أهم شي
سكتت، ما ناقشتة
وصلنا للمستشفى، على حجة لدكتورة كلشي
صار باختصار
رفعت قميصي شوي. شافت عضات الكلاب واضحة على متني وإيدي كالت
: -الجروح نظيفة بس لازم نتأكد منها، ورجعت كالت: -هم صخنتي على أثر العضة
-: لا اا.

جان سوتلي تنظيف وبزتني ابرتين وأنطتني اكثر من لقاح لعلم أتاكد على من الرجال ابو البيت وهو كال أني مربيهن هنه وأصغار وملقحات أصلا
فالحمدللة عدت على خير هو همزين ما اكلتني
الحيوانات عضة الجلب جانت أهون عليه
بعد ما كملت على لبسني قميصي وطلعنة راجعين للبيت.

بعد فترة وصلنا للبيت نزلت قبلة من سيارة
وهو صفها وأجة وراي
سحبني إله خلاني أگعد على القنفة بالصالة راح جابلي گلاص مي بارد وأنطاني علاجي
: -أريد أطلب منك شي
: -گولي
: -أريد تليفون أريد أخابر أهلي أريد أطمن على أمي، وعلى شجن
: -داير بالي عليهم لا تخافين كل فترة أطمن عليهم ماكو شي يقلق.

: -بس أريد أسمع صوتهم أريد أتأكد بنفسي. أحس روحي وحدي هنا، بعيدة عن كلشي. أني خايفة عليهم وهواي گايمة أشوف أحلام محلوة تخوف
: -شمس، گتلچ أنة داير بالي ماكو داعي للقلق. هذا مو وكت مناسب الوضع بعده مو مستقر
: -معلية اريددد تليفون يعني هم مخليني هنا وحدي وهم تليفون ما عندي ما أگدر أتحمل هيج
غمض عيونة بنفاذ صبر وكال
: -تمام بس مو هسه
: -شوكت
: -راح أدبرلچ تليفون بس مو أي تليفون تليفون آمن.

وراح أكون يمج من تحچين ما أريد أي شي يأذيچ
: -ما تثق بيه
: -شني هالحجي يول
: -لعد ليش تحجي هالشگل
: -كتلچ أخاف عليج
: -أهوو مليت خايف عليج وخايف عليج من شنووو خااايف فهمني من ازاد لو وساف شو الاثنين أنتَ دوم تگفخ بيهم ومبين هالشي بعد منو إلى تخاف يأذيني
باوعلي بنظرة طويلة وسگت ما حجة عافني وطلع ما ادري وين راح.

: -شجن
-خالو حبيبي تعبناك ويانا ما قصرت
رد عليه بحب: -بوية هذا واجبي المهم رجعتوا لبيتكم بخير وسلامة
بعدين ماما حجت شوي ويا وما بقى راح حتى على غدة ما ظل
خطية تعب بس خابرتة ماما راح أجر سيارة ومشة للعمارة جاب غراضنة من بيتنا
بقيت أني وأمي بالبيت الصناديك چانت مالية الصالة كل صندوك بيه قطعة من حياتنا القديمة
أحس روحي دا أتنفس من جديد ريحة بيتنا، ريحة بغداد أحس بيها دا ترجعلي روحي.

صح البيت شوي تعبان لان إلى ساكني هواي مخربي ومغيرين بديكور بس المهم رجعنة ونرجع نرتبة من جديد
بديت أفتح الصناديك واحد ورا الثاني
وكل قطعة أرجعها لمكانها
الكتب على الرفوف الملابس بالكناتير.
أحس بيها دا ترجعلي روحي أفتر مثل الفراشة
والضحكة بكلبي مو بس بوجهي
خلصت من كابوس العمارة
خلصت من وساف و أزاد
من كلشي چان دا يلاحگني هناك. أحس بالراحة
راحة ما حسيت بيها من زمان حيل من زمان.

كلت لماما: -الحمد لله رجعنا لبيتنا ماما أحس روحي دا أتنفس من جديد
نهال: -أي والله يا أمي بغداد غير بقت شمس هادة حيلي شلون بيها
شجن: -لا تضوجين ماما هي يم على وهو يحبها
أبتسمتلي بتعب وما مطمنئة بس شنسوي
أدري بيها فرحانة بس كل هذا الهدوء چان ناقص كل هذا الفرح چان بي غصة
مديت إيدي سحبت إطار صورة من صندوك
چانت صورة إليّ ولشمس احنا صغار دا نضحك.

ابتسامتها و عيونها أحس بيها دا تباوعلي من الصورة أحس بگلبي دا ينعصر
شوكت كبرنة شوكت عشنة هالضيم كلة بسنة وحدة ليش هيج صار ويانة وشنو الذنب الفضيع إلى تعاقبنة على شانة
لو جاي نتعاقب على أخطأء أهلنة
رجعت أباوع على صورة شمس بحزن فضيع مشتاقتلها كلش أريد نرجع نلتم ونتعارك ونطبخ سوا
جانت عجوزية ما تحب تطبخ دوم نجيب جاهز
ودوم تشمر الشغل عليه وحايرة بحبيها كاظم الساهر
أنوب أخذت على ولا يم كاظم الساهر ههه.

ضحكت بمرح ومشيت لمطبخ قررت أسوي غدة من أدية
بلشت أحضر الغدة لزمت السچينة وبدت أگطع الخضرة صوت السچينة چان دا يكسر هدوء الظهر
هذا هو بيتنا هذا هو مكاني رغم جان عدنة بيت هناك بس أبد ما حسيت بألفة ولا ارتاحيت مو مثل هنا
بس بنفس الوقت أحس بشي غريب شي ما گدرت أفسره
أجة على بالي عصام ضحكت بدون وعي بس بسرعة رجعت غندبت وطردت الافكار من راسي
كأنما دا أطرد فكرة مو مرغوبة اي كلش.

أتذكرت شلون لحگني للفندق وشلون دافع عني بهواي مواقف
ضحكت على أفكاري شنو هالتفاهة
ما يصير أفكر بشي هو مجرد ساعدني وبس ماكو شي ثاني
رجعت ركزت على الطبخ بس. أتذكرت شلون جان حنون وياي بكل موقف جنت بي
طبعا ما عدا الموقف الخايس إلى صار بيتة من أنصاب علي
هذا الموقف من أذكرة أضوج حتى مواقفة الزينة ما تشفعلة گدام هالموقف
أخذت نفس عميق وقررت أنجب وما أنطي
مجال لكلبي لازم أفكر بعقلي.

وأرجع أدور شغل حتى نعيش أني وماما وأصرف على البيت وما نحتاج أحد
أندك الباب ودكة مال مخابيل ركضت أفتحة
أول ما فتحتة دفعتني وفااتت
عابرتني وتصيح: -شجون اشتااقيتلج
ارتكيت على باب وكتلها: -مرام هاي أني هنا
كالت بعيارة: -يااااه ما شفتج
رجعت علية حضنتني لا مو حضن خنگتني أصلا
: -شجووووووني راح أموت من الشوگ
وأخيراً رجعتي البيت نور بغداد نورت واني نوريت
شجن: -مرام راح تخنگيني شبيچ شنو هالدراما.

أبتعدت عني ومشت بتجاه المطبخ وأني وراها فتحت الگدر تخوط وتذوق
چانت لابسة ملابس بألوان صارخة وتعلج
: - عندي أخبار أخبار تكتل
: -اي بلا
: -ام الخيرة كالت راح تزوجين أنتي والي أبالج
: -وانتي منو ابالج
: -عزيز
: -يجذبن ذني لا تصدكين
هزت راسها ما عاجبها كلامي كالت
: - يي أحجي إلى اكو شي جديد
: -ماكو شي
غمزتلي وحجت بمكر: - همهمم عيونچ بيها لمعة غريبة مو مثل قبل شنو عصام جايج شي.

: -وين يجيني بالحلم الرجال راح من وصلنا بعد ما شفتة
: -لعد شبيج ما تعرفين بالاصول غير تخابري تتاكدين وصل بسلامة للعمارة
: -بشنو اخابرة هو عندي مبايل اني
: -اااني عندي أبوكلج مبايل أمي نخابرة بي
: -لااا شبيج مرام عيب على شنو اخابرة رجال ساعدني هاهيه نعمالله عليه بعد شكو
: -ولج حرامات يروح من ايدج
: -يعني شسويلة مثلا اروح اعرض علية الزواج
: -جنج تحبي
: - مرام لا تلزكين بسالفة بعدين هو ماعندة شي تجاهي.

: -منو كالج
: -هوة
: -سألتي
: -يي يعني من باب الفضول سالتة وماكال لا احبج ولا شي مبين ديساعدني لان على صديقة واكيد هو موصي علينا
: -ااوع غبية سوة كل هالشي والله علمود على خوما اكو شي، مبين يحبج
: -لعد ما يحجي منو لازمة
: -يجوز ما يعرف يعبر عن حبة.

: -ماكو رجال ما يعرف واني ما اربط امالي بي شخص بعد مثل بيرس هم يطلع عار بيرس من جنت أشوف أهتمامة اكول يحبني بس وين ماكو شي تيقنت اذا ما يتقدم. بخطوة وأضحة يعني ما يريد لو يريد ما يتركني
: -ماكو مقارنة بيرس ما سوا شي الج مجرد اهتمام عادي بس عصام يختلف اوووي فكري زين
: -ما افكر فدوة مرام انجبي وعوفيني بحالي
: -عدي الج فكرة
: -الله يستر من افكارج
: -لازم نحصل رقم عصام
: -لشنو.

: -بعدين أكلج بس لازم بالاول نحصلة شلون أندبرة
: -عندي رقمة هو كتبة الي
: -هلاااا راح أجيب مبايل أمي بالليل وأجيج نخابر عصام
: -الولد كال خابريني عند ضرورة شنسوي هسه مخابري
: -هم عدنة ضرورة لعد شنو
: -لاااااا مااااا عيب ما اخابرة شنو هالحچي
: - أشبيج نختبره نشوف گلبه وي منو يحبچ لو عنده وحدة بحياته نشوف ردة فعله
: - هالتصرفات الطفوليةأني ما أسوي هيچ سوالف اخاف وانكشف اصلا
لطمت على صدرها بعيارة.

: -يا عيب يا فشلة هذا حب والحب يحتاج تضحية وبعدين، أنتي ليش خايفة
: - مو صحيح هاالتصرف شنو راح يگول علينا
حجت بعدم أهتمام: -ما راح يعرف رقم غريب وبعدين إذا طلع يحبچ لعد شنو المشكلة وإذا طلع عنده وحدة بعد أحسن نعرف
: - بس، بس بشرط أني ما أحچي أنتي تحچين
: -ياااا موافقة أني أحچي
: -خاف يعرفنة
ما يعرف ما يعرف بس أوفقي وخليها وراي
راحت للبيتهم كالت بالليل أجيب المبايل وأجيج.

صدك صعدت للغرفتي رتبتها وحضرت سهرة حلوة من عصر
بس لازمة كلبي بيدي خاف يتعرف على صوتنة
وهم صار عندي فضول أعرف يحبني لو لا
كله من ورة مرام زرعت الفكرة براسي.

: -رغد
السيارات چانت دشگ الظلام
سرعتها چانت عالية
گاعدة بصف أزاد كل شوي أباوعلة ماعرف شنو يدور براسة
بعد فترة طويلة وصلنة
نزلنا من السيارات. المكان چان عبارة عن ميدان مهجور مليان تراب وبقايا بنايات قديمة
الهوا چان بارد و الظلام دامس أزاد جمع الفريق. عساف چان موجود ملامحه چانت حاسمة
أزاد باوعلي بنظرة خفيفة، وبعدين بدأ يحچي.

: -الخطة بسيطة بس تحتاج دقة الليلة راح نأمن شحنة مهمة جداً هاي الشحنة بيها معلومات حساسة وموقعها بالضبط عند النقطة (س) اللي راح أحددها الكم أي تسريب أي خطأ يعني نهاية كلشي
التفتلي وكال بأمر
: -رغد أنتي راح تكونين عيوني برا مراقبة أي حركة غريبة أي شي مو طبيعي تبلغيني فوراً الشحنة راح توصل بالضبط الساعة 2 بالليل عساف أنتَ وفريقك راح تكونون بالكمين الأول والبقية وياي.

مدلي التليفون: -هذا التليفون وياچ أي شي يصير. تخابريني عليه مباشرة ما أريد أي تواصل خارجي
أخذت التليفون أحس بيه دا يراقبني. لازم أكون حذرة
أزاد انطى الأوامر للفريق وكل واحد راح لمكانه بقيت أني وحدي، أحاول ألگى مكان مناسب أراقب منه
مر الوقت الدقائق وصارت ب 2
باوعت حوالية ماكو أحد
طلعت تليفوني الخاص ب وبديت أكتب رسالة لعزيز أبلغه بالوقت والمكان
شفت ضوء خافت دا يقترب من بعيد
سيارة اكيد هاي الشحنة.

فجأة حسيت بإيد قوية على متني
التفتت چان أزاد عيونه باردة مليانة مكر وحقد
ضحك بسخرية: هاي هي الشحنة اللي چنت دا أحچي عنها بس مو الشحنة اللي ببالچ
السيارة اللي چانت دا تقترب وكفت نزل منها رجال جان من زلم أزاد
أتاكدت هاي خطة حتى يگشفني خرا بالحظ
وكفت أكبالة أباوعلة برود
ازاد: -هاي الشحنة، هي الطعم والطعم نجح
رغد: -اي وشنو يعني أصفگلك.

ازاد: -عرفتي ليش ما گتلچ وين رايحين بالبداية لأن أني أعرف كلشي. أعرف منو وياي ومنو ضدي. أعرف إن أنتي تشتغلين وي على هههه الخيانة اكره الخيانة رغد
أشر بإيده لعساف وفريقه تقربوا مني
ربطوا أدية وأخذني صعدني بسيارة ازاد
جان فرحان وكيفة صاعد كال
: -شگد ينطيج بأابن هاشم وتبعيني كليلي أنطيج الضعف
: -ما يحتاج ينطيني هو أنتَ رخيص أبلاش أبيعك.

حجة بعصبية: -خوش جاا هاي بس البداية يا روحي جولتچ الجبيرة وياي توها بدت
جان طريق مظلم وترابي ما ادري
وين رايحين كال
: -شنو رأيچ بالخطة عجبتچ لو چنتي تتوقعين أكون غبي لهالدرجة
: -خطة رخيصة مثل صاحبها وبينة الحجي أنتَ غبي شلون طلعت هالخطة منك
ضحك بصوت عالي ضحكة مليانة سخري
: -رخيص أني بسيطة أشوفج الرخيص شراح يسوي بيج راح أخليچ تصرخين اسمي تتوسلين رحمة ما راح تلگيها
: - راح تسمع ضحكتي مو صرخاتي.

بعد فترة طويلة وكفت السيارة فجأة
فتحوا الباب وسحبوني للخارج
المكان چان عبارة عن بناية قديمة
مهجورة، مليانة ريحة رطوبة. الظلام چان دامس
دفعوني لغرفة صغيرة مظلمة ماكو أي ضوء. ماكو أي صوت بس صوت أنفاسي
سمعت صوت خطوات أزاد تقترب
وبعدين سمعت صوت باب دا ينفتح ضوء خافت چان دا يتسلل من الباب، دا يخلي ملامح أزاد تبين اكثر
: -أن شاءلله عجبج بيتج الجديد مكان هادئ بعيد عن العيون هنا، راح نحچي براحتنا.

حط الكرسي. گعد گدامي بس ما گدرت أشوف ملامحه بوضوح
: -راح نبدي من البداية كلشي كل خطوة خطيتيها وي على كل معلومة دزيتيها كل خطة رسمتوها أريد أعرف كلشي
: -ما راح أگولك أي شي تگدر تسوي اللي تريدة
: -أدري بيچ قوية بس كل واحد عنده نقطة ضعف. وراح ألگى نقطة ضعفچ. راح أخليچ تتمنين لو ما تعرفتي علية بيوم
: - ما عندي نقطة ضعف أني وحدي. وما عندي شي أخسره.

حجة بتهديد: -كل واحد عنده شي يخسره. حتى لو چان هذا الشي، مجرد ذكرى حلوة. أو شخص عزيز. أو حتى، مستقبل. راح أخليچ تختارين بين حياتچ، وحياة اللي يهمونچ.

: -شجن
مر يومين ومرام ما أجتي واني هم تركت السالفة
اصلا احسها تافه خيولي هسه يكول هاي ذابة روحها عليه
سبحت ومشطت شعري لبست دشداشة قصيرة ربع ردن لون أسود وخليت شعري مفتوح
حتى ينشف من الماي. بعدني كاعدة ما نايمة
أباوع لنفسي بالمراية وأخلي كريم
ما أحس غير الشباك أندك. التفتت بسرعة
وكلبي طاح منو هذا
باوعت على ساعة بالوحدة دهر اشرررد لماما
أحسلي.

مشيت على گيف على طروف أصابعي وعيوني على الشباك وأستوقفني صوتة: -شجن نايمة
طبعاً أنام لعد شعندي كاعدة، أحس الصوت مو غريب طخت أبالي هذاا عصااام
رجعت لشباك وخرت البردة شفتة مرتكي على الشباك ملامحة مليانة ضوجة عبالك صار ساعات ينتظر وشعرة مخربط ضحكت اشرلي بعيونة
عود أفتحي
فتحتة على نص، كتلة متفأجئة
: -عصااام شنو تسوي هنا
حجة بطرف خشمة: -ساعة أدك وين جنتي.

: - شكو جاي انوب من الشباك خوفتني وبعدين لا يشوفك الجيران وأنفضح وأمي نايمة تكعد على فضيحة الصبح
: -جاا أجي أدگ الباب بنص الليل وأگعد أمچ لو أجي من البلكونة وأخوفچ أنتي اختاري أنة اختاريت الأقل ضرر
ضحكت مستمتعة وهو مطنگر عبرني وفات للغرفة بقيت جامدة: -عزززا عصااام عززااا
: -شبيج شگو
: -لا تشوفك ماما
حجة بعدم أهتمام، وهو دا يذب نفسه على الجرباية أنوب بحذائة وماخذ راحتة
: -أمچ تشوخر هسه.

سديت الشباك، حجيت ويا وأني أرجع البردة على الشباك بصوت مليان عتاب
: -ممكن تفهمني شكو جاي هسه لو شايفيك واحتمال شافوك الجيران غير أصير علج
سكت ما رد، اندريتلة دا أحجي شفتة صافن عليه
ومركز كلش أنتبهت على نفسي
أني شلابسة، بقيت جامدة متت بدمي ماعرف شسوي ولا ارداي عطت بوجه
: -دير وجهكك وووين دددتباوع
حجة بخبث: -على نعمة الله
من شافني كلش خجلانة حط أيدة على عيونة
: -يباااا غمضت
: -ديربالك تفتح عيونك دباوعلك.

رحت للكنتور بسرعة طلعت صاية خفيفة مال سهرات بنات خليتها على جسمي شلون ما جان
اندريتلة بعدة مخلي ايدة
: -كملت تكدر تفتح، كتلة بضوجة
أنت المن جاي شنو راح يگولون علينا
: - ما يهمني شنو يگولون المهم أجيت
: -ليش جاي
: -أشوفج
: -وليش تشوفني
: -شنهي ليلة نگضيها ليشات
وخرت شعري عن وجهي توترت: -يعني غير افهم
گام من جرباية بحركة سريعة تقدم بتجاهي
رجعت خطوات على الكنتور ميل راسه شوي وابتسامته خبيثة على طرف شفتة.

: -يعني، ما يصير الواحد يشتاگ لشوفتچ لو لازم اكو سبب چبير ما يصير الواحد يجي يتطمن على اللي باله
أحس بگلبي دا يدك بقوة ونظراتة دا تخليني أتوتر أكثر
: -يعني. شنو اللي ببالك
: - لازم أگولها بالحرف الواحد حتى تفهمين
صخنت من قربة بينه سنتيمات جنت لازكة نفسي يم الكنتور و هو دا يضغط عليّة دا يخليني أتوتر
تذكرت مرام خير ما جانت ادور خطة نخابرة
اجة وحدي المشكلة اني من اشوفة أنثول.

أحاول أبعد عيوني عن عيونة وأشتت نظري عنه بس هو چان قريب كلش. ريحة عطره ترست خشمي
حجيت برتباك: -عصام، شنو دا تسوي
تقرب أكثر صوته صار همس: -أروح فدوة ل دا وأهل الدا كمل بنفس لهجتي دا أباوع عليچ بيج شي خلاني أكسر كل قواعدي وأجيچ بنص الليل من الشباك ترى مو أخلاقي أطفر على بنات العالم بنص الليل بس أنتي.

: -بس، بس هذا مو صحيح. أنتَ، أنتَ رجل غريب وهم خطير وأني، أني. ماما ااذا شفتك بغرفتي والله تموتنة سوا فروح حباب شكو جايني والوقت متاخر
: -يبااا حقج باجر اجيچ من وكت
: -لاااااتجي المن جاي لاااا فدوة
: - عيونچ تحچي حچي ثاني مو مثل لسانچ. عيونچ دگلي، ظل ولسانچ يگلي، روح بيمن أصدك أنة
: -رووح يا عيني دا اكلك روح
: -جااا وين ابات ليلة
: -ماعندك بيت مثلا
: -لا والله بغداد ما عندي
: -لعد الفنادق طاردتك أجر غرفة.

باوعلي من فوك ليجوة وعض شفتة
: -مابيه مناظر حلوة الفنادق
: -عصام لازم تروح أمي راح تكعد حباب
: - راح أروح بس بشرط
: -شنو
قترب أكثر همس بأذني قريب كلش وطخني بصدرة جمدت والله قطرة دم ما ضلت بيه
: -المرة الجاية أريد أشوفچ بدون هاي الصاية أريد أشوف نعمة الله براحتي
وجهي صخن من جرائتة شگد سافل وما يستحي بتعد عني يضحك وبعدين روح باتجاه الشباك. يباوعلي بنظرة أخيرة مليانة خبث.

: -تصبحين على خير يا نعمة الله والمرة الجاية، راح أجي من الباب ان شاءلله
ما جاوبتة وهو راح أختفى بالحظات
بقيت واگفة بمكاني گلبي دا يدك بقوة
مشيت لشباك قفلتة ورديت البردة أباوع على أدية ترجف
رجعت لفراشي دحست نفسي جوة البطانية
بردانة بس مو الجوء لا من قربة من إلى صار هسه
عزا هذا ما عندة كل خطوط حمر فد مرة ما يستحي.