رواية بين قلبها وعينيها كبرياء للكاتبة شمس العراقية الفصل السبعون
أسيل طول هالايام المرت حياتي طبيعيه بس نفسيتي تعبت والمشاركه تقتل صح هو أغلب أوقاته يمي بس مع ذلك ما متقبله الوضع ولعبانه نفسي لأن أغار عليه بشكل مو طبيعي من النظره أموت الف موته وأني على قيد الحياة عذاب نفسي ومجبور تتحمل وتسگت ما عندك خيار ثاني ولا حل وسط
واكفه يم المغسله وبيدي أختبار الحمل معانات كل شهر وحرب نفسيه أعيشها من يقرب موعد نزولها لما تخلص وأنتظر يوم يوم بلكي أطلع حامل يله عاد.
أنتظرت وما طلع شيء شمرته بالوساخه وبجيت ليش مو تأخرت 5 أيام ليش بجيت وانقهرت وتالي غسلت وطلعت وصارت بوجهي هناس صاعده
هناس أسيل شبيج شصايرلج.
أسيل يهمج تعرفين شبيه
شگو أحجيلي
مو حامل أرتاحي خلي على گلبج ماي بارد
ليش هيج تحجين شعندي وياج قابل
لاتسوين روحج حنينه وماكو منج ترى ماكو هيج شيء متقبله الوضع وعادي عندج يجي يمي ويرجعلج وساكته وما تغارين ومسويه روحج العاقله عود مروان شوفني ترى تمثيلج عرفناه.
مثل ما انت متقبله الوضع لاتصيرين أنانيه ترى أني زوجته حالي من حالج ماله داعي كلامج وأذا ساكته أحتراماً لنفسي وأحب أكولج اني مو نوع تهمني هاي السالفه واتعارك واسوي مشاكل علمود نومه شبيه تخبلت واذا شايفتني أمثل عليج ابقي على نظرتج
لا مو حالج من حالي أنتِ حال وأني حال
تمام براحتج.
مشت وعافتني عصبت ودخلت الغرفه أتصلت عليه مشغول رجعت أتصلت هم كتبت اله رساله ويامن مشغول متجاوبني أكيد وياها! شبسرعه لحگت تحاجيك مُباشرةً أتصل وجاوبته
مروان شگو
گول لنفسك
شبيج حبيبتي
ليش مشغول
ترى بالدوام مية الف شغله ب?اسي مية الف أتصال يجيني باليوم يعني شرط الا أخابر بنات هيج عندي فراغ خو بدال ما أخابر بنات أخابرج شسوين بيهن
وأنتِ موجوده
لا ليش تخابرني تخابرها ست الحسن
هم رجعنا هم رجعنا
أي رجعنا.
أسيل أنتِ تردين تتعاركين
أي أريد أتعارك أريد أنفشها هم وأكتلك انت وياها هيج گلبي مفركس منكم وطالعه الدنيا من عيني
ليش حبيبي أحجيلي شبيج شُنوْ المضوجج سولفي أسمعج هاي حتى شغلي راح أعوفه وأكابلج يله
مروان
ها حروف أسمه
هيج ماكو شيء
شُنوْ هيج ماكو شيء لا أكو شيء أحجيلي شبيج ليش مطنگره.
لأن مشتاقتلك مخنوگه من تلتحق البيت يفرغ عليه أحس روحي وحيده بينهم رغم شگد يحبوني وعمتي تموت عليه بس مو مثلك أنت دنيتي وأهلي كلهم أني ما عندي أهل أنتَ أهلي.
أسيل شبيج شصايرلج راح أعوف الدوام وأنزلج
والله بس مشتاقتلك.
وأني هم والله لخاطري مسحي دموعج
مسحتهن
روحي غسلي
تمام
أمشي كدامي يله
ماشي فتحت الباب وطلعت
أمشي تمشين على بيض رب الحلو
وصلت وغسلت
رفعي خصلات شعري لاتذبين ماي على صدرج.
علي كيف نشفي زين باوعي بالمرايا شفتج نفسج
أي
مروان يحبج
دخلت الغرفه ومبتسمه أحبك
يا حنيتي هسه شلونج
كلش زينه
الحمدلله أريدج دومج زينه
بوجودك
يله لازم أروح أخابرج بعدين
تمام أنقطع الأتصال وصفنت على حالي جنت بس اني زوجته ما أعرف وين جان عقلي من گتله روح تزوحها وهو الأفندي العاشق الحلو ما صدك راحلها يركض الله يصبرني شلون راح أتحمل هالوضعيه ما منها خلاص.
مر كم يوم من يصيرله مجال نضل نحجي أتصال لأن يعرفني نفستي مخنوكه على فراكه وأعد الساعات لما ينزل، رحت جبت ملابسي من السطح واني راجعه شفت هناس صاعده گبل دخلت لحمام مالتنا مستعجله وگفت ورا الباب أسمعها ترد من معدتها
گلبي نكز ولعب هالحركه أشوفها بالمسلسلات اذا تتقيء يعني حامل.
ضليت مراقبتها وعيني على أكلها شلون أعرف هي حامل بس لا جان گالت خوما تضم حملها عن مروان وأهله قابل بايگه، تجاهلت الأمر وما شفت عليها شيء ولا هي حجت بس ضل شگ بگلبي هي حامل ومروان عنده خبر وما يگولي هيج مجرد أحساس.
كعدت من الصبح غسلت ورتبت نفسي ونظفت غرفتي وعطرتها هو نايم يم هناس البارحه نزل وراحلها والمفروض يمي لان ماكو أحد يشبع أشتياقه غيري بس يلا عادي أتحمل نتيجه قراراتي التافهه خلتني بنص الطريق لا بيه أرجع ولا بيه أكمل
فتحت باب غرفتي وباوعت لسويت هدوء بعدهم نايمين أنعصر گلبي وأختنگت گله من أيدي اني الجبتها لنفسي شلون أتحملها بحياتي وأتحمل وجوده يمها وبحضنها وبين أيديها ياربي الأفكار.
أكلت?اسي نفضت نفسي ومشيت.
نزلت كلهم كاعدين يتريگون صبحت عليهم وصبيت الچاي وسمعت صوتهم نزلوا وأسمع صوت أزهار
ازهار يا شوگت ليش ما گلتولي فدوه لله
مروان صوتجچ
أزهار يعمرري غير فرحانه بيك
أسيل كعدت يم عمتي نزل هو وياها
مروان صباح الخير
الكل جاوبهم صباح النور
وصال وين طالعين مو عدها اوف وانت نازل
مروان بصوت ناصي يمه سكتي
وصال أها أي.
أسيل نظراتهم لبعض غريبه وبيهم شيء وهو نظراته تراقبني عكس البقيه عايف الكل ويباوعلي حسيته ضام شيء علمود لا اضوج سكت عمتي
وطلعوا سوه وأني نار بگلبي تعالي من اروح يمها سكتي وتحملي عود هذا عدل راسلته طلعت وياها ولا أهتميتلي أكتفيت بكم نظره تجي يمي ما تباوعلها تروح يمها ما تباوعلي تعتبر هذا عداله وأعتدال بينا!
مروان منو ما مباوعلج غير عيني خليتها يمج وتباوع لطولج لاتضلين تقهرين بروحج هسه اجي.
عفت التلفون وطبخت الغده وهما ماكو قبل الغده اني واكفه يم الثلاجه اطلع دبس رمان اكمل السلطه اجه هو فرحان وهي تضحك أثنينهم فرحانين! دخلوا لغرفه عمتي جانت تصلي
أحساسي ما يخيب ابد اكيد حامل كملت السلطه وكلت اصعد فوك أرتاح لزمتني من جتفي التفت هناس جاوبتها بنتر عكس أسلوبها السلس.
هناس فدوه أسمعي مني ولا تنقهرين ولا تضوجين ان شاء الله يترس بطنج درزن جهال مو واحد
شُنوْ!
اني حامل.
جاوبتها بفرح عكس النار البصدري لا ليش اضوج بالعكس كلش فرحتلكم واكثر شي مروان لان من أول ما تزوجنا وهو بنفسه بنيه من عندي خليتها تشب وتنطفي.
يلا عيني المهم بلغتج حتى مو تكولين ضموا عليه وتسويلج فلم وتخلينه يجيني طاير.
هيج اني أخوف.
والله صراحه والصدك أنتِ مكاره أسيل وما ادراك ما اسيل نار? وفتيل تحجيها بضحك
مشت وهو أجاني احتصني بعدته وخرر لا يجي أحد أحنه مو بالغرفه.
وشكو تتنرين شو صبيلنا غده خل نتغده اني وياج
ليش شكو
مو بليل التحق علمود بالنهار أضل يمج
صدك قهرني ما أريد اذا تريد من هسه التحق ماكو أشكال عود خايف على مشاعري أصلاً صارلك أيام متغير عليه زعلت أو رضيت ما يهمك
أسيل لا تسوين مشكله
ما مسويه بس أسلوبك مستفزز
يلا هذا هو حتى غده ما أريد سويتي سم
مروان وين رايح
للجهنم حته ترتاحين وتخلصين مني.
طك گلبي من القهر وهو بعد ما شفته وصار وقت الغده وصبينا وكلنا أجتمعنا على السفره ودخل علينا عاد عمتي وصال گالت.
وصال مبارك يمه ربي يتمم على خير ويكومها بالسلامه ويوم أسمع خبر حمل أسيل أن شاء الله
أسيا هسه عمه ما فهمنا منو الحامل هناس لو أسيل.
وصال هناس
أسيل كلهم فرحوا وباركوا اله وكام عصام بوسه ويضحكون وناصبين عليه
عصام وأخيراً راح تصير أب الحك على حليب وحفاظات خوش كبسه انكبست.
عمار وأحلى كبسه يستاهل ابو الحكم
ازهار بعد گلبي الف الف مبروك شوكت يجي وأشوفه حبيب عمته مروان جهالك أضمهم بروحي يمه حبيبي
مروان أحمم سگتي گافي
أزهار شگوو أها ما ادري والله أصلاً نسينا خرب
أسيل كعدت بصف عمتي طبطت على اكتافي بحنيه.
وعمي كمال يباوعلي بنظرات دافيه وهما يحجون ومروان مراقبني تجاهلته وتركته يعيش فرحته وياها ويه أهله وأخته اللي طارت من الفرحه لو اني فلا هيج تفرحلي متأكده بس هاي هناس حبيبة القلب
وصال لاتزعلين رزقج مضموم ويجي يوم ينجبر خاطرج وينترس حضنج بطفل وحقج علينا خاف فرحوا گبالج وأنقهرتي بس فرحة الحمل والحفيد حلوة وأريدج تتفهمين الوضع حبيبتي.
أسيل لا عمه عادي باوعلي ونزلت?أسي وتغدينا وهو ما أكل حسيته ضايج تجاهلته وكمت أصب الجاي وازهار گامت شالت المواعين وبنتها تبجي
وصال عوفيهن أني أغسلهن سكتي بنتج
أزهار لا اني أغسلهن أنتِ طبختي كعدي أرتاحي
مروان تتغده لو اشيل غداك
مروان شيلي ما أريد
أزهار كيفك
أسيل أزهار اصبلج جاي
أزهار لا مو تشوفيني جاي أغسل المواعين
أسيل تمام براحتج
أزهار أسيا تعالي أخذيها فدوه.
أسيا غير مثل بنتي شلعت كلبي بس تنگ والله جهال يطيحون الحظ
هناس ازهار وخري اني اغسلهن امانه روحي على بنتج كطعت نفسها عليج.
كمال عوفيهن بابا بنتج تبجي.
أزهار ماشي
أسيل هناس وگفت تغسلهن وازهار صبت جاي وكعدت بصف مروان گبالي وبكتفها على كتفه تحجي وياه بهمس هو مدلغم عينه عليه تجاهلتهم وعفت الكوب على الميز ومشيت.
وصال أسيل ماما وين رايحه ما شربتي جايج.
أسيل ما أريد عمه كلهم باوعوا اليه وصعدت الغرفه مقهوره وبجيت وأندك الباب صحت بعصبيه منو
أزهار اني
أسيل شتردين
شُنوْ شريد شبيج أنتِ
كمت فتحت الباب ها
شبيج عصبيه اذا مقهوره لأن هناس حامل هذا رزق والله يترس حضنج وحقج علينا اخاف فرحنا كدامج بس والله ما متقصدين وحتى شفتهم مهتمين عرفت بيج ضايجه واجيتج أطيب خاطرج
تعبتي نفسج ما مقهوره وليش انقهر عشتوا راح تخلفه ولي العهد وتخبصنا.
أسيل شنو هالحجي شبيج أنتِ طنگرتي على الكل وخليتهم كلهم يسألون عليج ومروان ضايج غده ما تغده حتى فرحته بحمل مرته انكسرت واجيتج وهذا كلامج ليش هيج تسوين
وأنتِ هيج مهتمه عاد أهتمامج لأخوج اليه
اي مهتمه أخويه وفرحان ما أريده اشوفه مقهور وزعلان وأنتِ بنت عمي ليش ما أهتملج شعندي وياج واكيد تحسستي حقج بس الله كريم ربي يرزقج ان شاءالله وتترسين البيت جهال.
لا والله اشوفج فرحانه وطايره من الفرحه اني بيش كيلوا وهيج مهتمه لمشاعري
أسيل شبيج وليش ما افرح غير أخويه شتردين اكعد الطم طبعاً أفرح وأباركله ترى زودتيها
لا والله گولوا لنفسكم ما أحترموا مشاعري كعدوا تضحكون وتباركون الهم واني ركنتوني على صفحه الا هو كال احمم يله حسيتوا بس مبينه تحبون المن وانوب راح تجيب الكم ولي العهد محبتها تزود.
مو گتلج حقج علينا لان ما تحكمنا بعاطفتنا وفرحتنا وصعدتلج اطيب خاطرج يعني شنسويلج ياعيني بس أنتِ تشترين المغثة لنفسج
لا والله أنتوا ما تحترمون مشاعري
والله كيفج بعد.
راحت وحيل ضجت منها من يومها أحسها ما تحبني وكلامها مبطن عود تبين هي ما عدها شيء وياي بس والله مبين عليها ما تطيقني وتجاملني مجامله لان اشوفها ويه هناس شكثر تنطلق وياها وتصير املس من جلد الحيه الا اني كلامها مثل السم وعود كيفت اخت زوجي حنينه لا والله حيه صفره تلدغ وتضم?أسها
رجعت بفراشي حيل مقهوره راح يصير أب لطفل من هناس وأني ما اخلف اله طفل بجيت وشبعت قهر وانفتح الباب
مروان أسيل كاعده.
أسيل مروان روح ما أريد اشوف وجهك ولا اي احد عوفوني بحالي ما أريد اشوف الشفقه بعيونكم
منو يشفق عليج ليش شُنوْ ناقصج وشبيج عين الله عليج مثل الورده جنج جماره
مروان روح
باوعيلي خل نحجي واراضيج يله گلبي
كتلك روح لاتلح
ماشي رايح
أي ما جاوبني بس سمعت صوت باب طلع بجيت
ونمت ما كعدت غير على صوته هو بالصاله سويت روحي نايمه فتح الباب اجا تمدد بملابس مال طوبه جان يلعب بالملعب.
گومي سويلي عشا ما متغدي من وراج وما متعشي
خل مرتك تسويلك ما عليه بيك
عافني وطلع شطتت وراه ضليت أنكز من القهر شو هذا ما يصدك أكوله روح كبل يروح اي عيني مل من عندي ادري بي يحبها الها وانوب حامل بولي العهد رجعت نمت مقهوره وشويه رجع سابح ومتعطر.
يله عشى ما أريد منج سويتي الأجازه سم.
إنتفضت كافي عاد مسوي فضل عليه جايني ونوب بمنيه لا يبوي تجي على أسيل المكروده لو تروح على هناس حبيبة القلب ام الجهال المستقبليه تجيبلك ولي العهد يشيل أسمك أني شجيبلك
وأخيراً غردتي طلعي البگلبج من الظهر اغث بيج حتى تنفجرين.
كعدت ابجي على حالي الله ليش هيج وياي ليش ما رزقني بطفل
الله سبحانه وتعلى اله حكمه بكلشي انطاج وطلع مشوه انطاج وطلع منغولي شسوين بهل الحاله.
أحتضني ييلعب بشعري
ليش كاصه شعرج.
أتعاجز امشطه واتشنج من اسبح كلت اكص منه اشويه
ديله أنفضي روحج وأسبحي أخذج تنعشى برى
مابيه خليني وياك حتى عشا ما أريد بس اضل بحضنك بعدين أنت مو كلت التحق
أستفزيتج البارحة نزلت قابل وزير وكل اشويه طالبيني أخلص أجازتي والتحق واني أحبج واريدج ليش تتعززين عليه وبس مطنگره
أحسن
شُنوْ الاحسن بالموضوع شالعه گلبي وگلبج
باسني بشفتي بعمق وابتعد ياخذ نفس بقيت هادئه بدون أي ردة فعل.
ليش تغيرتي أنتِ ما تحبيني مثل قبل.
نفسي ما تتقبل مو بيدي الوضع صعب لعبانه روحي
يلا هذا هو
طلع من الغرفة ما أريد اخسره بس ما أكدر مو بيدي بس السبب مني شسوي والله أحبه وأغار عليه
طلعت رحت سبحت وبدلت دزيتله رساله وينك
جاوبني
بالكراج أنتظر الحلوه تنزل
منو هاي الحلوه
هناس
واني
شبيج نفسج ما تتقبل شسويلج
تحجي صُدك لو تشاقه
دنزلي تره اطلع والله
قهرني حته شقاه عبالك صدك، نزلت كلهم كاعدين يتعشون اترخصت منهم وطلعت لگيته مشغل السياره هلاو.
هلوات ليش طولتي متت من الجو?
تستاهل
ليا ظالمه
صعدت بالسياره وطلعنا اتعشينا بمطعم وافترينا ورحنا للمول اخذلي كم قطعه ملابس دخل ملابس الأطفال أشترى لبنت أزهار وجهال عصام واخذ اوفر ابيض هو وجواريبه وشفقه كلش حلو كزكزت عليه
شافني وگبل رجعه أمانه تشتري باوعلي صفح هاي شبيك الله عليك أشتري يخبل أشتراه ومرينا اكلنه أيس كريم وطلعنا للبيت.
وصلنا البيت كلها نايمه هو راح لغرفتنا واني رحت على هناس اطيب خاطرها لأن احس بروحي زودتها مثلما اني انقهر من تطلع وياه اكيد هي هم تنقهر
دكيت الباب فتحته هيه وكفشتها والاواراق تارسه الكاع والغرفه مخربطه وأكواب الكهوه والحليب
هناس هلا عيني.
هلا بيج تذكرت ابنج ما أدري بنتج باوفر عجبني وعجب مروان شوفي شكد حلو
ياعيني قربانه مشكوره حبيبي كلفتي على روحج
لا عمري هو من أبوه
مفاوله عليه بالولد.
ليش وين اكو احلى من الولد
لا اني احب البنات هم اجيبه ويطلع ذكر أحب المجموعه النسويه حتى لو باطله
هههههه محاميه بعد بس ترى مو زين الكهوه على الحامل.
عرف اعرف بس اليوم عندي طلاق اخلصه وبعد ما اشرب.
تمام أساعدج بشيء
اذا ما تصير زحمه تاخذين الكوابه وياج يجي الصبح مروان ويضل يعيب ع أبو وصخه واني اتخبل من هالحجايه
هههههه تمام لكيت الأوراق وهي كاعده عالميز
تكتب شنو القضيه إلى لازمتها.
وحده مطلقه وتاخذ نفقه من زوجها ومتزوجه مره ثانيه وأريد اطلكها حتى تأخذ نفقه من زوجها الثاني أيضاً
ليش نفقتين من الزوجين
هذا حق الأول عدها منه أربع أطفال بيش تعيشهم
والثاني يريد يطلقها وعدها منه أطفال أثنين هم بيش تعيشهم والزوجين ميردون الأطفال
يا مو ضناهم
هذا حال الدنيا يردون يعيشون وما يتحملون المسؤوليه.
شهل الأستهتار.
بعدج شايفه لو تدخلين المحكمه تكولين الحمدالله على راسي رجال وكاعده بيت اكو ناس يخلون ولدهم تدعمهم سياره حتى يقدمون شكوى وفصل فلوس علمود يدبرون عيشتهم
وييي عزا
ويي ويي أسعاف امشي هسه يكول خطفتها مني ما يدري بيج تخطفيني وتكتليني ومحد يدري
يا هيج اني قاتله محترفه
أي.
ضحكت واني غثتني هالحجايه يحسسوني اني صدك مكاره ووحده حياله واني كل تصرفاتي عفويه معقوله تشاقه لا مو مال شقه لأن هم كالتلي وحده مكاره وعمتي هم كالت شسويتي لمروان وخليتي مزومل حتى ما اكل يعني قصدهم اني اسوي حيل وأخلي يتغير، معقوله هيج يفكرون بيه
دخلت الغرفه هو متمدد
مروان وين چنتي؟
أسيل يم هناس
شتسوين خير هل من مشكلة
لا شكو ليش تحسسوني اني وحده بس مال مشاكل
لأ يبوي اني النهار كله انكد واتزعل على كل سالفه.
نزلت الدمعه من عيني خلف الله عليك حتى أنت هم عليه واكفلي عالحجايه.
ليش منو وياج كلهم يكولون وحده حياله ومكاره ودخلت گلبك بالحيله هاي نتيجه السر إلى حجيتي عرفوا اني دخلتي بالحيله فضحتي روحج وخليتي لزمه عليج
هو منو يعرف غير عمتي وأزهار أكيد هنا يكولن حياله ومكاره والباقين جلبوا بيها
أسيل سدي الموضو?
يعني الصوج مني
اسيل لا تتحسسين من اهلي من تحبيهم من گلبج وتصفين نيتج بعد ما راح تشوفين هما يحجون عليج.
حتى هناس تكول مكاره
ترى يحجونها بدافع الشقه بس أنتِ حساسه تره هناس اكثر وحده توصيني بيج كافي تقهرين بروحج هو وين اكو ام احن من امي عليج أستقبلي الأمور بساطه وخلينا نعيش وكلهم يحبونج ويردونج واذا قصدهم حياله لأن اني اجي يمج تقهريني واروح اذب قهري بهناس فهما عبالهم تشيشيني? هناس لا أكثر لا أقل خل نعيش على حب الله مو كافي مشاكل
مروان أنتَ ما تحس بيه.
أسيل عيني اذا كلها شافتج مكاره وحياله اني أشوفج طفله منقصه حنان ومالكت احد يحتويها اذا كلها شافتج حياله اني اشوفج طفله بريئه يهمج أمري لو أمرهم
لا اكيد أنت
بس اهلي والله يحبونج اني لو أدري ما يحبونج اكلب الدنيا على راسهم بس همه على نيتهم والله
يلا هذا هو
لا تزعلين
لا ما ازعل
يلا تعالي خل انام.
ماشي رحت بدلت وتعطرت هو يطفي بالاضويه لبست دشداشه قصيره لون ماروني بيها ورود سود هيج حلوه عجبتني واشتراها هو أحاول اتقبله وما اتحسس منه ويضوج مني فتحلي حضنه أستنشقت عطره باوعت على وجها أتلمست شعره ليش هلكد أحبك
لان احبج
لا هو اني من زمان أحبك.
والله جذابه ما تحبيني ربع حبي الج لو تحبيني من صدك ما ذليتيني هالذله وشلعتي گلبي ونزلتي من كرامتي واني لحد هذا يومي ماخليت احد يقلل من كرامتج لو يحجي عليج الحب انك تحافظ على إلى تحبه بكل ما تملك الحب مو بس كلمه احبك ومشتاقلك
يعني هسه ما مشتاقلي
لا والله مشتاقتلج بس انتظرج تحسين مو گلبي جمر عليج.
گبل رفع إيديه فوك وبلش حركاته المعتاده بعد كل غياب وكل نزول وكل زعل ما يشبع وما يمل بادلته بكل حب رفع رأسه عليه شبيج ما شبعتي بوس لا مشبعت بعدني عطشانه ما أرتويت منك أبستم بحب وباسني من رقبتي الا عطت يلا بطل من ركبتي ونمنا بإحضان بعض معوضين فترات الزعل إلى مرت بينا.
بعد مرور أيام كعدت الصبح كل جسمي مكسر اليوم أول يوم إلى اروح اقدم جامعه اني وخنوسه استغفر الله كل ما اذكرها تلعب نفسي وهو صاير ما يلفي للبيت كله يم بيت عمي فاضل كل ما احاجي عندي شغل وما ارتاح اله هناك واني لعبانه نفسي من هالوضعيه خابرته اليوم ما راجع للبيت
الليل كله بحضني نايمه وما تدري الحلوه حقج عيني حقج بحال مروان أنتِ
شسويلك تعبانه ما حسيت عليك ما تجي انروح نقدم على الجامعه.
لا عيني لا وحده تروح تباوع عليه وتسويلي فضيحه
سوي فضل لا تجي
هو منو مصخم وجهه وجاي
أحسن اريد مصرف
ماشي تدللي ملابسج بليل جبتهن بالكنتور.
ملابس ليش
ملابس جامعه البارحه بليل جبتلج كم قطعه والعصر عود اخذي أمي وروحي
وليش ما انت تأخذني
ً تامرين أمر رجلي كبل راسي أجي
هسه تعال تسجلي أنت
تمام عيني جايج
مروان
اوف منج گولي
أشتاقيتلك
جذابه أنتِ صايره لوتيه وكارهتني واني گلبي يرجف يمج.
اكو واحد يكره روحه بس تلعب نفسي من هالوضعيه
والله اني هم ما حابها بس العتب على صماخج المليان تبن
ألمهم تجي لو لا
هو اني كاعد اتريك
يعني مو بيت عمي فاضل
لا كاعد اتريك
وهناس وين
أخذت الحليب وصعدت
تعال
تمام صاعد
رحت عالسريع غسلت ورجعت لميت شعري مشطته وفاتحته على طوله طلعت نستله اكلتها وشربت حليب بالفراوله فتح الباب
شبي حبيبي مطنكر
منو كال منطكره
صايره حقيره
تستاهل
مو احبج
ما توگل خبز هالحجايه دفعني عالثلاجه شببك.
هالثلاجه موقعها مو حلو ماخذه الزوايا إلى تخليني ابتلي بيج.
ضحكت ههههه
جاي اشتاقلج اريدج بحضني الليل كله أنتِ نايمه وما شبعت منج
أنت متحس بنار گلبي
والله احس أنتِ إلى ما تحسين شكد اريدج واحتاجج بس صايره حقيره
سحبني من أيدي بحنيه
تعالي شوفي الملابس شنو أخذتلج
فتح الكنتور طلع اول تنوره جلد لون جوزي وجنطه مرتبه جلد وبوت اوف وايت وشال نفس أللون شلازك بهل الون ترى مو حلو
بالعكس تطلعين كمر بي.
أخذتهن منه ولبست وطلعت جواريب لحمي گملت هو كاعد يتصفح بالتلفون كملت حبيبي واندك الباب اتفضل دخلت هناس
صباح الخير شلونكم
هلا عيني
يلاتجين
لا ما يحتاج مروان ياخذني
كيفج عيني اني اروح
مروان لا تعالي ويانا أنتِ واختج عدجن معارف اني أكره هالسوالف
هناس عادي ما عندي مشكله
أسيل يحجي هو وياها بكل أحترام ودخلت أسيا
اسيا صباح الخير يجماعه مروان عمي يصيحلك
شكو خير
وراكم حصبه وجدري أستعجل وعمار شغل السياره
ماشي.
طلعن ضليت بس أني تقرب احتضن وجهي وباسني
فدوه لوجهج البريئ روحي وياها
عبالي اول يوم انت وياي
اني هم بس اعوضج والله
طلع واني طلعت وراه امشي لبست بوتيني ونزلت وعمي كمال گال
كمال بنيتي لا اضوجين عندي شغله وياه ودزيته
لا عمو عادي هناس تاخذني
اي قسم يعجبج قدمي لتشيلين هم اني بظهرج
احتضني بحنية أب لبنته
اني ابوج وكلشي تردينه
الله لا يحرمني منك عمو ويخليك ألنا
دك على جتف هناس.
محاميتنا نريد همتج أنتِ وابو الحوارث اريد اصلخه ما أخلي عليه شيء
هناس بعيني عمي إعتبره صار التريده
وديري بالج على اسيل
بعيني عمي
بگلبي كلت انفكست عينج هواي تلوگتلي عفيه شهل القابليه.
يله أسيل نمشي
طلعنا وما حجينا شيء والجو متوتر
أسيل ليش ما صفين نيتج وياي
والله نيتي بيضه وصافيه أبيض من وجهج
واضح من كلامج إلى كله دج وكره عالعموم ما تضريني تضرين نفسج وصحتج كلشي يتعوض الا الصحه
زين يعني مخليه بالج يمي.
ليش الكذب شايله همج والله بس ما عليه كلمن ينجاز هو وربه
وأنتِ كلتيها ما عليج ما جاوبتني وصلنا ودخلنا كملنا الاجرائات وأختاريت قسم، . جان كلش حلو صح صعب بس ترتيبه حلو والدكاتره مثقفين كلش ما أعرف اني مشايفه وهي جانت تفتر وتخابر
عبالك وزير احسها هواي تبالغ بشخصيتها خلصت أتصالاتها وأجتني مبتسمه.
أسيل تجين نروح للكافتريا بما انو خلصنا تسجيل ومباشره.
تمام
وأختي أيفين هم هنأ تدوام خلي اعرفج عليها
ما يحتاج.
دكتوره هي وتاخذكم بماده من المواد
تمام يلا استعجلي
دمشي أنتِ مو مال إحترام
زين عرفتي ولج لعبت نفسي وبارده ثلجت ما حجت
تمشي وامشي وراها دخلنا بغرفه راحت شغلت الهيتر وجابته يمي
كعدي تدفي بي بينما اسويلج نسكافيه
تمام تدفيت أحس البرد بعظامي اجت هي وحده وياها الطول والكشخه فول والنزاكه والقيافه الا بشدتين تموت
ايفين زارتنا البركه نورتي الجامعه اسيل شلونج شلون صرتي عيني
هلا عيني بنورج عيني الحمدالله احسن.
شوفي اني راح اخذكم بفلان مادة وان شاء الله ما أقصر وياج بس اهم شي لا تغيبين هواي بالبدايه حتى تكدرين تسيطرين لان شويه هذا القسم صعب
تمام عيني اسلوبها حلو وسلس مثل هناس بس اني مبلعت هناس بس هي حبيتها احسها حنينه وطيبه.
هناس اني اتوكل اسيل عندي مرافعه ما أكدر اتاخر أنتِ ضلي افتري بالجامعه هاي ايفين ما عدها محاضرات تفررج بالاسم تعرفج على الأماكن
اسيل منو يرجعني.
عود اخابر مروان لن اني اتاخر اخلي يجيج واذا ضجتي تلفون واحد اجيج
ايفين اني بالخدمه شوكت ما تضوجين كليلي حتى اوديج هسه خلينا نروح أعزمج على ريوك
تمام راحت واني رحت ويه ايفين حجتلي عن نفسها متزوجه عدها ولد وبنيه أعمارهم 10 و8 سنين بالمدرسه زوجها يداوم ويه عصام وصديق مروان
دخلتني بكروبات التلي مالت القسم والدكاتره وهواي أمور علمتني عليها.
لا تختلطين من البداية ويه الكل وتنطين نفسج اليريد صحبتج هو يجيج بيني للكل أنتِ مو بحاجه احد واذا محاضرات شيء تعالي عليه وأول سنه البنات هواي يوكعون باغلاط ويثقون بناس مو محل للثقه وأنتِ مبينه فطيره على نيتج لازم تكونين نبه
كلشي تحجي واني اهز براسي.
هسه اعرفج على بنات وياج بالقسم يصيرون بنات اخت زوجي تؤام رسل ورفل حبابات وعلى نيتهن.
صدك شويه وخابرتهن واجن وكعدنا نسولف ونضحك على ايام السادس وشلون الاسئله وشلون نجحنا وسألوني عن حياتي واني اجاوب بكل اريحيه ما تقيدت كلش ارتاحيت وياهم تونست مر الوقت ساعه ساعه 1 يله ما نروح
يلا امشي
طلعنا صعدت بسيارتها فخمه وريحتها تجنن مرت اخذت غده من المطعم وصلتني البيت مشكوره
ولو تدللين حبيبتي
نزلت وتوني فتحت دخلت ومروان لكيته يسد باب السياره يتلفت ماكو احد فتحلي حضنه رحت ركض بحضنه.
فد اشتاقيتلج روحي فركست عليج شلونج شلون الجامعه
حيل حيل حلوه أقسام والقاعات نوبه ريحتهم طيبه ضليت بس اشمشم والدكاتره القيافه والترتيب حسيت روحي شمبانزي يمهم كلش واوا
بيج البركه بس هو لازم تعتنين بلبسج اول خطوه حتى تبرزين نفسج والقيافه والترتيب اله دور بالجامعة العصر اني وياج نروح ونأخذلج ملابس
لا خلي اروح ويه هناس لبسها حلو واكيد تعرف بلبس الجامعه اني اعرف بس مو كلش احس هالشيء لازمله خبره.
براحتج حبيبي اليعجبج
تمام دخلنا عمه وصال كاعده تنتظر وعصام ومجد وعمار وهناس وعمو كمال واسيا والجهال كلهم عالسفره وجودي تكمز تريد تاكل جوعانه وازهار لازمه بنتها اطعمها
مروان سلام عليكم هاي كلكم تنتظرونا
وصال اي يابه ابوك ما قبل كال الا اسيل تشرف من الجامعه وتكعد كبالنا عالسفره يلا.
هناس يلا عمه متنا من جوع
عمار شكد تاكلين صايره من جيتي لحد الان تكرطبن خيار عبالك أرنب
هناس كيفي معدتي مو معدتك وخايف عليها.
قابل خايف على معدتج خايف عالثلاجه فرغت من وراج بس تطحنين اكل.
يمه الحريص مجد اذا طلعت تاكل اندومي نصير فريق.
مجد أبو النسنس احنه عائله الاندومي
أسيل عفتهم اسيا تصب الغده واني رحت غسلت وعمي كمال سوالي مجال يمه ويمسح على راسي
كمال شلونج شلون الجامعه
أسيل احجي والفرحه تارسه وجهي حلوه حلوه تجنن هواي.
الله يدوم فرحتج يابه
كلنا ناكل جان دجاج شوي وياه برياني وفاصوليا وزلاطه وطرشي بيت عمه منو مسوي هالطرشي.
هناس أمي مسويه وكالت مري اخذي ورحت جبته
هواي طيب عاشت إيدها جان كله خيار اصغار وزيتون، كملنا الغدا واكفين يم المغاسل انتظر مروان يكمل وهناس تلم بالمواعين واسيا تغسل وازهار تصب جاي.
گلبي راح اصعد فوك جيبلي جاي وتعالي.
أوك گلبي رحت اخذت كوب وهناس كالت
شوفيلي غساله عود طفيها اخاف الكهرباء تجي ويصير بيها شيء
تمام رحت شفتها وطفيتها وفتحت الباب ماكو مروان مروان اثاري خاتل وره الباب اخذ الكوب خلاه عالميز.
اي ست اسيل ان شاء الله مرتاحه
كلش كلش احس بديت حياه جديده باسني من عيوني
أتمنى هالفرحه متفارك عيونج
سكرت بنظراته احتضنته بكل قوتي
شبيج باوعيلي
ما بيه شيء بس مشتاقتلك
مو بگدي
رفع رأسي، واسترسل الشوق بعيوني، نزولن إلى تلك الأماكن التي تغزو مشاعري بالفرح. قبل عنقي الذي يطال بي الشوق المفرط، أتمنى أن أعانق لحظات السعادة. في هذه اللحظات، أجد نفسي محاطة بالحب والشوق، منتهين بنوم عميق.
مرت الأيام طبيعيه أشتريت ملابس وكلشي أحتاجه وبلشت دوام صح بالبدايه واجهت صعوبه بس أيفين ما قصرت خطيه ورسل ورفل كلش حبابات تعودت وأحس حياتي حلوه بعد ما كملت دراستي بس ناقصه فرحتي ما مكتمله.
جان يوم عطله نزلت كملت تنظيف وعمتي طالعه هي وعمي راحوا الهم غسلت واجيت المطبخ أسويلي لفه جعت
أسيا اكول شنو تطبخين اليوم.
أسيل عمتي كالت باميه بلحم وتمن واسوي بيتنجانية وياها لمجد وعمار كالت احسبي حسابه يتغده يمنا هيه وعمي ما يجون يتغدون يم أبو حرب
أسيا بس عمار ميحب الباميا
هناس ولا اني احبها
اسيا ولا اني ولا ازهار
عصام شسون لعد كلجن متحبنها
أسيل بس اني احبها
هناس أسيل سوي عادي كلنا نأكل
عصام طلعي سمجه من المجمده بارحه جابها مجد
هناس اشويها شسويلها
عصام لا دغددغيها قابل شسويلها غير تشويها دطلعيها نكعيها مي وملح وخل.
أسيل طلعتها ونكعتها مثل ما كال اسيا ما تدخلت لان عمتي هالمره هيه وصتني لان طبخي نفس طبخ عمتي هناس غسلتها وتبتلتها وخلتها بالفرن واني كملت الغده.
. واسيا ساعدتني خطيه شكد گلبها عليها كلما تشوفني بالمطبخ تجي يمي ولطيفه أبداً ما تغثني عكس هذيج ملتهيه بنتها ما تنزل أبداً معتكفه بغرفتها ما أعرف رغم ما عندي شيء وياها واحبها وأنقهر عليها وعلى بنتها حالتها تكسر الخاطر بس هي احسسها ما تحبني عكس اسيا من تشوفني وجهه يضحك ودمها يلعب تنكط محنه هي ورجلها فد زينين عليه خو عصام حاسبني بنته من يشتري اطفاله يذكرني بعلاكه اشكال بيها صح بسيطه بس شكد قيمتها جبيره عندي.
صعدت الغرفتي وتمددت وانفتح الباب مروان
مروان هلا بكبدي شلونج
بخير اشوكت اجيت
توني كبل صعدت
اشو مامقتنعه
لا تسويلج سالفه بلا معنى بعدين لازم تتقبلين الموضوع يوم يمج يوم يمها
لا مو على كيفك الحجي اني أحدد وبكيفي يعجبك ما يعجبك وديني لاخويه انكبر يمه واخذوا راحتكم
أشو ماتعرفين تحجين تخوطين وتخربطين شبيج تخبلتي
ما عليك مني ما عليك
هاي شبيج ثول على كيفج شحجيت وياج أنكرصتي عليه نلدغتي
عوووفني.
أسيل نصي صوتج لا تخليني اكفر بيج
كتلك عوووفني خل يفيدك اليوم اليمها يشبعك ما يشبعك انت واحد روحك بالمره.
سيل راح اسكت الج بس إلى تصرف ما يعجبج
والله اعلى ما بخيلك اركبه
تماديتي هواي اذا ما تصيرين أدمي اطيح حظج والله
نزل وبعد ما صعد ضليت اغلي نار واشتعلت بگلبي وين راح كمت طلعت من الغرفة باوعت من يم المحجر شفته سابح كاعد بالصاله وهي ماكو دكيت عليها الباب فتحته ماخذها ملابسه تريد تسبح نار وشبت بضلوعي.
هناس ها أسيل
أسيل انتوا اكثر اثنين شفتهم بحياتي من جوه ليجوه نكسين بس اني حيوان وانتو زمره نكسه شجابني عليكم وعلى قذارتكم
هناس كملتي أمشي طلعي بره لأتخربطين بالحجي اشتمي ريحتي كلها سمج اخذت ملابسي أسبح
جذابه وحده حياله حقيره دفعتها وأضرب بيها
عوفيني اسيل ولج اسيل مروان مروان تعال فدوه
هو يدفعني يسحل بيه للغرفه دخلني وقفل الباب
شبيج شبيج انجلبتي شصايرلج متخبله وكاعده
شصايرلي مو سابح ومتعطر جنت نايم يمها.
اي اي شتريدين
نار وطگت بگلبي صرت اعيط واصرخ حلكي يرجف ايديه أحسهن ثلجن خشمي عبالك قالب ثلج ريحه الزفره الدم بحلكي دنكت بالكاع بعد ما وعيت على روحي.
فتحت عيني واني بالمستشفى وهناس بصفي تبجي وأسيا لازمه ايدي ومروان يفتر عيونه حمر جان يبجي عصام واكف بالباب.
هناس ها عيني اسيل شلون صرتي
أسيل صديت بصفحه مو عاجبني اشوف دموع التماسيح عبالها ما أعرف حقارتها تصير كدامه ماكو منها وهي احقر خلق الله.
اسيا يولي خوفتينا عليج غركانه بدمج وجهج.
خشمج حلكج انرعصت من شفتج الوجه ازرك كلت هاي ميته
هناس لا اسم الله ما بيها شي هسه تطلع تحاليلها
اسيل اجت الممرضة جابت التحاليل كالت
الممرضه هسه من يجي الدكتور انطوها اله
أسيل ساعه واجه الدكتور نفس إلى جنت اراجعه علمود الكبد سلم على مروان ومروان ذكره بيه وشرحله الحاله
الدكتور اها هاي إلى كالت راح ننفصل اي شصار على انفصالج بنتي.
أسيل ماصار شي رجعت لزوجي وهاي المصونه زوجته الثانيه هناس خجلت وعافتنا وطلعت وهو سكت وبدأ يشرح ضغطي 18 ونوبه هلع فاقده أعصابي وجسمي متشنج نتيجه الضغط العصبي عندي قرحه وطالع الدم من حلكي من القهري طبعاً واني شحصلت من مروان افندي غير الهم والغم
انطانا علاج وصانا عدم العصبيه وهالسوالف التعبانه واني كل حركه منه تحركني الف حركته.
رجعت لللبيت صعدت لغرفتي تمددت هو اجا نزع سترته وطفه الاضويه ونزل البرده وفتح الغطا وسحبني لحضنه.
مروان وعد ما أزعلج وشرفي ما أزعلج
أسيل شلون تضمن ما تزعلني وهناس موجوده
ما عليج منها هي تحجي وياج كالت بعدين
لا اريدها ولا اشوف خلقتها ختولي
اسيل لا تحكمين عالبشر بسرعه صفي نيتج والله ما ادافعلها بس انرعبت ترجف وتعيط عليج عبالك اختها لوتشوفينها شصار بيها عليج
هاي درجه يك بالتمثيل مو بعيده على أحمد راضي.
دنامي نامي بس تلغين
نمت بحضنه المغرب كعدت هو ماكو نزلت باوعت عليهم كاعدين كلهم اجتماع مفتوح هناس وكفت يمي
هناس اريد احجي وياج
واني ما أريد هي گوه
اسيل اني ما اريد احد يكرهني
بس أني كارهتج بعد ميفيد الندم
اسيل وشرفي وعافيتي وغلاة اهلي بكلبي اعوف مروان بس اصبريلي كم شهر واطلب الطلاك.
أ الكيلج جاهل تضحكين عليه وين جنتي من خطبج ما عفتي هسه عد ما تزوجتي وصار بأسمج تعوفينه وأنتِ حامل بإبنه عليمن تضحكين بابا اني اسيل عشره من أمثالج مياكلن وياي
أسيل اني حبيبته حرام عليج.
وأنتِ كلتيها حبيبته اكيد ما يتنازل عنج بسهوله لا تضحكين عليه خليني براحتي كافي نمثل على بعض لا احبج ولا تحبيني واحنه ضراير وحده تثرد بدم الثانيه لاتكسرين القاعده والضراير يصيرون اخوات ماكو شيء بالقاموس هذا جذب وتلفيق ولواكه زايده علمود تكبسين محبة مروان وشوفني اني شكد عاقله أسيل تسوي المشاكل عبالج ما كاشفتج امثالج يا مكثرهن
لهذا خليني احافظ على الباقي من صحتي ما أريد منج ومنه شي ناركم تحرك حطبكم.
النقاش وياج عقيم براحتج عبالي أوصل وياج لحل مشروع يفيدج.
حلولج لنفسج مو إلى أنتِ اتونسي بي اني جزت نفسي منه
ماشي يصير خير
عفتها ورجعت لغرفتي وصارت ازهار بوجهي عبرتها
ازهار اسيل عيني شلونج شلون صرتي
اسيل بخير
شُنوْ زعلانه مني
لا على شُنوْ ازعل
لعد شبيج أحسج زعلانه مني كوه تحجين وياي
لا بس أنتِ ما تحبيني ليش نمثل على بعض
نمثل وما أحبج وليش شمسويتلي.
المحبه من الله يجوز تشوفيني اني ظالمه وما توديني وكلامج اليه مبطن
والله أنتِ ظالمه نفسج محد ظالمج واني ما عندي شيء وياج بس احب أكولج اللي يريد يعيش يتحمد ربه على عيشته على مكانه على راحته على الامان غيرج فاقده وعايش بخوف على رجال يحبج ويريد رضاج غيرج شابعات تكفخ كلمه طيبه ما سامعات.
احمدي ربج على عيال يردون خاطرج غيرج يركضن بإيديهن ورجليهن ومحد راضي عليهن اتحمدي ربج على الماي البارد تشربينه غيرج مسلوكات بالحر وشابعات ضيم أسيل تحمدي ربج وأرضي بواقعج
وشمسويه قابل وبعدين كلمن وقسمته ليش حاسدتني على هالواقع وأخوج مرمرمني وشلع گلبي وياه وكل هذا وتكولين ظالمه نفسج حقج ما تعرفين أخوج محد جرعه بس اني.
منو گال حاسدتج الحمدلله عيني مليانه ما احسد احد على عيشته وواقعه بالعكس أتمنى الكل يكون مرتاح وعايش وما يعاني بحياته مثل ما اني عانيت.
والحمدلله عندي أهلي واخواني ما مقصرين واذا أخويه شالع گلبج أنتِ السبب راجعي نفسج محد مشتهي الشلعان الگلب كلمن يريد برودة الكاع والحياة بكثرة المشاكل ما تنراد ومصيرها ما تدوم وتخسرين صحتج لا مروان ولا غيره يعوض الصحه والعافيه فكري بنفسج وصحتج ودراستج وعوفي المشاكل أنتِ تنضرين.
. وأخويه اني الأعرفه وشايفته شكثر يحبج ويريد رضاج وكلنا ملاحظين وربي يدوم هالحب شنريد قابل بس لاتكونين أنانيه بحقه وبحق مرته حالها من حالج تردينه بس الج ما يصير هذا حق وعدل لا كيفي ولا كيفج والزواج صار بموافقتج ليش هالدراما كلها يوميه تنعاد وتحجين وتسمعين حجي وتغثينها وهي ساكته اني ما خايفه عليها وأدفعلها بس شايفيتها محترمه نفسها ومروان هي جانت أولى بي لان حبيبها بس هذا الشيء أنتهى من تزوجج وصار الج وأنتِ هسه زوجتة الأولى بس العداله حلوه خليج رحيمه لان هي هم ما الها ذنب صارت ضحية قرارات الأهل.
من رخصتج ما جاوبتني ومشت ونزلت تنطي نصائح كولي تحبين هناس وتموتين مني ليش تطولينها عليه والله البشر مكشوف بتمثيله
لليل اجه تمدد بصفي أبتعد عنه وشلت مخدتي ونمت بالكاع وهو ضل واكف ومتخصر ويباوعلي
مروان شُنوْ هل التصرفات
أسيل هذا العندي
أسيل شتردين لخاطر الله
إذا اريد تنفذ
شنفذ
مو تريد تعرف شريد
أي بلكي أوكع على علتچ
طلگها طلگ هناس تگدر
أنتِ واعيه على نفسج شتطلبين مني
أي كلش
لا بالله تخبلتي رسمي.
خبله شلكم بيه ما دزيت عليك خط مصخم تجيني
أسيل أذا ما تصيرين ادمي أكس? حلكج والله
كس? حلكي شمنتظر أصلاً لو بيدك تلزملي الحزام والكبيل وتشوف شغلك وتزورك جسمي مثل قبل بس المانعك وشال ايدك مرضي ومكسور خاطرك عليه وتخاف أموت جوه أيدك.
. وكلكم مقهورين عليه وشافقين عليه حتى هناس والا وين اكو مره ما تغار على رجلها وترضى بالقليل وتركض كدام ضرتها وتريد رضاها لا والقهر تسلمني بيدك وتگولك دربك أخضر بس گولي وين اكو هيج شيء تردون تكسرون القاعده والضراير يصيرون اخوات لا حبيبي أموت ولا هناس تصير أختي.
كافي هدي لاتعصبين دمج محترك عليمن شو كومي فوك ارتاحي كومي.
عوفني مروان عوفني طگت روحي منكم كلكم والله العظيم مقهورين عليه لان مريضه ومو بعيده كايل الها اني مو بنت عمك وأبويه واحد سگير
لا بالله تخبلتي شبيه تخبلت على عمري أكولها ترى هي ما تعرف محد گايلها واني موصيهم كلهم بس أنتِ بسوالفج ومشاكلنا كوه تخلينا تعرف وعاجبج هناس تعرف حتى تعيشين دور المسكينه واني اكثر شي اكره هالشي من احد يسوي روحه خطيه ومسكين ومظلوم.
أهاا اعيش دور المسكينه هذا الطلع وياك رحمه الله والديك وبعدين تعال ليش موصيهم خايف تعرف اني مو بنت عمك واني بنت واحد شراب عرگ وسكير وعماتي بالملاهي خايف من اصلي لأن يفشل ويفشلك كدامها.
صوتج نصي صوتج نصي
علي أساس هي ما تعرف انصي صوتي
أني وأنتِ نعرف هالشي ما يقدم ولا يأخر اذا حجينا او ما حجينا أنتِ بنت عمنا عيب احد غيرنا يعرف حتى لو كانت هناس تبقى أسمها غريبه.
وأنتِ بنت عمي وهذا الشي ما يتغير ما يهمني أمج شتكول وشتحجي وتعجبيني رغم كل الظروف ما وكعتي وما بينتي لأحد كسرتج لا تنزلين من عيني بتصرفاتج أحب الانسانه القويه بنفس الوقت احبها تكون هشه ورقيقه وورقه بيضه أنقشها بأيدي.
عافني وراح نام وضليت كاعده ومر يومين اروح الجامعه واجي وهو يوصلني ويرجعني بس ما نحجي على كد السؤال والجواب وحسيته مشتاق بس ما بادر وليله يكون يمي اني أعوفه وانام لوحدي عزلت نفسي وأبتعدت عنه ومنه تعبت من گلشي.
تعشينا وأزهار شالت بنتها وصعدت اني هم عفتهن لان سويت العشه وهناس وكفت عالسنك تغسلهن
وعمتي كامت تحجي ما رضت
وصال عوفيهن من أيدج ما كافي عليج دوام المحكمه تعالي كعدي أرتاحي هسه اني أكوم اغسلهن.
هناس لا خاله ما يكلفن خلصتهن
أسيل مروان باوعلي بنظرات كلها عصبيه تجاهلته وصعدت الغرفتي ضليت أقرا ومر الوقت باوعت الساعه حيل شكد الساعه ولا حسيت لميت الهوسه ورتبت الغرفه شو هذا ما بين المفروض اليوم يمي.
فتحت الباب باوعت من فوك الصاله ظلمه بس ضوء الموبايلات گبالي باوعت زين عمار ومجد مبطوحين اكيد يمها باوعت السويت أظلم اناره لون رومانسي خرب حظ الكواد مشتعلين واني باقيه أحترك بناري الله ياخذني ساعة الرجعت لهل العذاب والقذاره
دخلت الحمام غسلت وجهي بماي بارد وفرشت أسناني وغسلت وجهي بغسول واني جاي اغسل كبت العيطه والصوت صا? عالي يارب سترك غسلت عالسريع وطلعت الصوت جاي من السويت بين مروان وهناس...