رواية بين قلبها وعينيها كبرياء للكاتبة شمس العراقية الفصل الحادي والسبعون
أسيل ما متقصده أسمعهم بس صوتهم عالي وواضح وكلها نايمه وأستوقفني صوت مروان!
مروان طلاك ما أطلك شتسوين سوي هذا العندي
هناس بس أني تعبت من هالوضعيه وبس مشاكل ماكو أستقرار ولا أنت مرتاح طول الوقت مهموم ولا أني ولا أسيل ولاتنسى هي مريضه لازم تفكر بيها.
وأنتِ شعليج بيها عليج بنفسج وبس واذا تحسين روحج متضايقه اطلع وحده منجن بيت لوحدها بس طلاك ما اطلك الزواج مو لعبه عندج وعندها كلمه والثانيه طلگني تعرفن تكولن بس ما تعرفن عواقبها لو كل النسوان مثلجن المحاكم مقبطه كلها لازمه سره.
تقنع نفسك بهل الحجي لاعبالك ما حاسسسه بيك تجيني مجرد تخلي صورة زواجنا مستقره كدام أهلك واهلي أنت مو مروان الحبيته أول مره بس من يومك واحد أناني ما تفكر الا بنفسك وما تريد تطلگنا لان عاجبك ومستمتع بإذيتنا ما مفكر لابيه ولا بيها واحد ما تحب الا نفسك.
أكلج أنتِ شايفه روحج عليه بس تنترين وصوتج عالي تره انزعلج جلد الحيه وأعدلج بالنظيف اخليج تكرهين حتى روحج.
ليش يابه تايهتلك اني مو أسيل مسويها مكفخه تخاف من خيالك
سكتي رحمه لدينج مرافعاتج وشخصيتج هاي بالمحكمه مو عليه هذني مارات عليه تنفخين روحج لو أنتِ هسه نفسج الواكفه كدامي جان ما قبلتي بقرار البابا على كولتج هو أنتِ ما صدكتي مروان يصير الج وعيد وأجه شلون تفوتين هالفرصه هاي فرصة عمرج
لأتصير حقير وتخليني أكرهك
ترى من يومي حقير وأناني مو جديده عليه هالصفه.
الحمدالله عبالي بس اني ما متقبله إنه تنام وياي طلعت أنت هم لدرجه تصيح إسمها وتريدني اتفاعل وياك وأصيح أسمك لأن تحب تسمع أسمك بصوتها
هاي شجابها لهاي ترى غلطت كفرت قابل.
والله مروان اكلك اياها من الأخير انت إنسان فارغ وحبيت اسيل لان لكيتها فارغه وعقلها نظيف وحبيت تفرض نفسك وشخصيتك وجبروتك عليها وشفت ما وراها سند برأسه خير والدنيا ملطشتها من كل الاتجاهات وزرعت الخوف بيها وخليتها تعشقك وتعشق تفاصيلك وأنت ما تحبها تحب رضوخها وعبوديتها ألك
لا تتجاوزين حدودج لا أكس?ج حلكج
دمد أيدك اذا ما علكتها بركبتك اني مو أسيل المعيشها حروب نفسيه حتى ترضي عقدك النفسيه الفارغة.
إذا ما عاجبج بيت البابا مفتوح
مو على مزاجك امشي أني اتزوجج واطلكج على مزاجي شوكت ميعجبني اروح
بشر يشتري الاهانه
أي والله صدقت من يوم إلى تنازلت عن كرامتي حتى اشوف الانسان إلى ضيعت أربع سنوات من عمري وياه شكد جنت مغشوشه بيك لو تحبني من صدك وفي إلى ولحبي الك ما جان رحت حبيت اسيل ولا تظاهرت بالحب كدامها وختني وياها بس انت ما تحب بس نفسك.
عالعموم فتره وأروح لاهلي أرتاح من الحمل وبعد ما أخليك تشوف خلقتي والطفل يربى يمي وما أحرمك منه هذا أقل شي تسوي تكفر عن ذنبك وياي.
لأتصيرين القاضي برأسي محد ضربج على أيدج توافقين وتصيرين الشيخ المرضي الله والعباس والبابا وتعلكين اخطائج بشمعه أنتِ انسانه انانيه مفكرتي بس بروحج شفتيني ما راضي ارجعلج ليش وافقتي لو عاجبج أسيل ومرضها وقهرها وجع گلبي وگلبها.
أنتِ تكدرين تعيشين شهاده ظيفه أهل كلشي عندج الا أسيل اني والله وما عدها احد كل عقلج اعوفها وافرط بيها لخاطر إلى بطنج لا غلطانه.
ما توقعتك حقير لهدرجه واناني وتتنازل عني بهل السهوله حتى أبنك ما أهتميت اله عالعموم لا تسوي فضل ب?أسي مو اني إلى أبني سعادتي ع تعاسة اسيل صدكني راح اوكفلك سجينه خاصره لا عبالك ما عدها أحد احنه أخواتها اذا اني او ايفين أو ملاك أو حتى اهلي كلنا وياها وهي نسمه هوا بارده بس انت استغليتها واستغليت طفولتها لاجل ترضي نفسك.
أسيل دفعت الباب ودخلت مروان تفأجى بيه عبرني وطلع وهي بدشداشتها القصيره وشعرها مبهذل بس شافتني وكعت تبجي أنهارت تقربت عليها بدون وعي حضنتها وتبجي بقهر بكسره أنفجرت كانت منهاره بشكل لدرجه تشهك بغصه تخنك
هناس اوف أسيل نار بگلبي نار
أسيل هناس الله عليج لا تعوفينه هو يحبج جذاب والله يحبج وحتى جان جان يكول كلمه احبها قليله بحقها وأني ظلمتها وياي.
حتى لو يحبني اني طلع من عيني كرهته وكرهت تصرفاته تعبت من گلشي.
أني ادري أنتِ تريدين تعوفينا من ورايه شنو ذنب هل الطفل اذا مضوجج وجودي اني انسحب وأنتِ ابقي وياه وربي طفلكم اني ما عندي شيء بطرك روحي أنسحب واكمل دراستي.
أنتِ ما الج اي دخل من البداية اني الغلطانه لأن اليغدر مره يغدر الف مره هو ما غدر بيج وما عافج تمسك بيج لان يحبج اما اني غدرني وخاني وياج وعافني وبسرعه تخلى وتنازل عنبي وبعمره ما حبني هو يحب الجمال والقيافه والترتيب والمستويات ما جان يباوع لداخلي ولداخل روحي شنو بيها حبني كشكل مو ك روح أما أنتِ حبج وحب روحج وعانق روحج وأحتواها لان تشبهينه بالضبط أثنينكم نفس النسخه واحد مكمل الثاني.
ما عرفت شجاوبها رجعت مسحت دموعها
دكومي بعدين شو داخله علينا هيج ما تستحين
ضحكت لا سمعت صوتكم عالي واجيت ما عبالي واصلين للمرحله العميقه
هو وصل للعميقه من ذكر أسمج دفرته دفره خليته يعيط ويشيط كرهته حتى النومه.
هههههه خرب بلشتج ضحكتيني.
أسيل أني أنسانه استحق إنسان يقدرني ويحبني ويحب أسلوبي وطبعي اني بالمحكمه كلها تتمنى تحجي وياي خو حارث يكضي الدوام يلغي وياي يكول مواضيعج حلوه رغم أحنه أخوان ومن اغيب يكول المحكمه ظلمه بدونج لو زملائي كلها ادور ورايه من اغيب يفتقدوني
أما هو لا ما شفت شيء منه يدل هو متمسك بيه مجرد أسقاط فرض واذا يجي يمي باله مو يمي.
عالعموم لاتضوجين اني وياج ما نتفارك أكون الج السند بحياته ما يميل مو مروان لو عشره مثل مروان ما أعوفج ابويه هو ابوج امي اعتبريها امج ايفين اعتبريها الجسر بالجامعه تعبرين عليه وما يأذيج
تمام عيني أترخص منج
الله وياج عيني
كامت من مكانها تعزل بالغرفه طلعت ودخلت لغرفتنا كيته نايم على بطنه مروان احجي وياك
عوفيني أسيل رحمه للاسلام عوفيني?أسي يريد يطك مو وكته الحجي.
لا وگته اكعد خل نحجي كعد وفتح الباكيت طلع جكاره ودخنها فتحت حضنه سحبني وسد حلكي
نامي ما أريد اناقش أحد ولا حرف سكتي ونامي
نمت بحضنه العب بشعر صدره داذوب بيك باوعلي عطرك طاغي على أحساسي.
أنتِ تتحارشين بيه واني مالي واهس روحي طافره
مو اني احبك
حبتج حيه
مو اني اريدك
واني ما أريدج عوفيني أسيل روحي بزعان منها
رفعت?أسي بسته من ركبته وصعدت العب باذانه أعشقك
أسيل أستري على شيطاني متمدد هو وجكارته.
اني أريده ينفخ جكارته ويهجم على حبيبته باوعلي وضل صافن بوجهي شبيك حبيبي تقرب باسني من گصتي وطول بيها لدرجه غفيت بين لمسات اصابعه وهي تغلغل بخصل شعري هو يبوس بكصتي ونمت باحضانه رجليه بين رجليه وهو ستري وهو غطاي
كعدت الصبح رحت سبحت حتى اتحضر للدوام طلعت المنشفه برأسي وصادفتني هناس تروح المحكمه.
هناس صباح الخير
أسيل صباح النور.
هناس هالشيء مو من حقي أتدخل بحياتكم بس بهالسهوله البشر عادي عنده كسره الگلب بسرعه نسيتي قبل دقايق قبل ماتكونين بحضنه اني وياج نبجي على حظي إلى رسمته بيدي وأنهاريت بين أيديج على حب عمري مصدومه بي ومكسوره.
يعني هيج أنتِ فرحانه لأن اني راح اطلع من حياتكم وبحضني طفل ما اله أي ذنب جان عندج يوم عيد اطلع من حياتج ورحتي بحضنه راضخه لنفسه عبده لحركاته وطغيانه عاجبج ومتونسه يإذيتي لهل الدرجه گلبج صخر عفتيني محتركه بنار گلبي والليل ما نمته أني وافكاري وحب عمري وأيامي العشتها وياه ناصبه عزاء بروحي بكل التفاصيل العشناه سوه بكل مكالمه بكل محادثه بگلشي وكل هذا رحتي لحضنه ولا كأنما شيء يكن وعادي عندج أگون متأذيه.
أني ما أحجي هالحجي حتى تضوجين مني بالعكس أريدج تكونين أنسانه لنفسج قبل ما تكونين زوجه
ل مروان وبالعكس ما راح تتغير نظرتي تجاه مروان لأن هو أول حب بحياتي صعب أشرحلج حُبنا وصعب تفهميني أني شكثر حبيته ولدرجه ما حب غيري ولا خاني وجنت متأكده واثقه منه لأن عيونه جانت ما تشوف غير هناس وكلها تدري بُحبنا بس بالأخير صدمني بي بوجودج بحياته شلون ما أدري.
المهم ماله داعي الكلام بعد أكثر ما أقهر روحي وأقهرج وأنتِ ما الج ذنب تتهنين بحبه الچ.
أسيل مسحت دموعها وعافتني ومشت شگد إستحقرت روحي دخلت الغرفه وهو نايم أهو عاد تحملني ذنب واني شعليه بيج من أيدج? أيدج شگو صرتي باره بإبوج ووافقتي على الزواج خوش گلاوات
طلعت ملابسي ولبست وهو كعد گبل سحب جگاره ودخن شعندك من الصباحيات أدخن.
مروان تحضرتي
أسيل أي جاهزه يله أني راح أنزل أتريك
مروان ماشي نزلي هسه أجي.
أسيل طلعت وهو ضل يدخن عفته ونزلت وهناس كاعده تتريك عمي وعمتي كاعدين صباح الخير ردوا عليه عمه الجاي حار
وصال أي هسه حميته سويت حليب شربي كلاص حليب عوفي الجاي وينج وين الجاي عندج فقر دم
أسيل ماشي عمه أخذته الكوب منها وهناس هم بأيدها الكوب ونزل مروان باوعلها نزلت?أسها عيونها منفوخات خلت الكوب شالت جنطتها
هناس يله اني أتوكل لدوام مع السلامه
كمال الله وياج
وصال عود رجعي من وكت
هناس أن شاء الله خاله.
أسيل عبرته وهو سحب الكرسي وكعد بس شرب الجاي وطلعنا طول الطريق ساكتين وصلني وراح
دخلت وبلشنا محاضرات وشفت أيفين سلمت عليها
ايفين شُنو هالنشاط والحيويه شگلج تعودتي
أسيل أي الحمدلله وطبعاً بفضلج ما قصرتي
لا حبيبتي ما سويت شيء الفضل لله وأي شيء تحتاجينه أمانه ما يردج الأ لسانج
تسلمين راحت وكعدت ويه البنات يسولفن واني بالي يمه لان عفته ضايج بسبب نقاش البارحه مأثر عليه وأتصلت عليه هناس جاوبتها هلا.
هناس راح اجي أخذج.
أسيل لا ما يحتاج مروان يجي يأخذني
براحتج
أنتِ وين
راجعه البيت وگلت أمرلج
ها لا تسلمين هسه هو يجيني
ماشي.
أنتهى الاتصال وراسلته وين أنت
بالأزدحامات جايج ليش
مو هناس رادت تمرلي گتلها مروان يجيني
ليش ما رحتي وياها اني أزدحامات لخه ولعبان نفس.
راحت بعد
ماشي أنتظريني
ماشي بقيت أنتظره واجه وطلعنا أبتسملي شلونك
الحمدلله هسه نمشي أغديج
شنو تغديني
كلشي ما عدا اللحوم
أريد بيتزا
تدللي على بيتزا وبعد.
هاي هي طلعنا وطبگنا بصف المطعم بقيت ما نزلت هو يباوعلي هاا
نزلي
ليش مو نأخذ ويانا بالبيت نأكل
لا نتغدى بالمطعم
ضحكت وهو مدلي أيده ونزلنا اني وياه تغدينا وشربنا جاي ها نكوم
لا خلينا كاعدين
ماشي أحمم مروان بيك شيء
لا عيني ما بيه شيء
ضايج من هناس مو خوما اني السبب
بيناتنا أنتِ ما الج دخل لاتأخذين على نفسج
يله نكوم
كيفك رجعنا البيت متغدين وبس أسيا بالمطبخ توه كاعده ومخليها جهالها تصبلهم الغده هلاو.
أسيا هلا عيني أصبلج غده ويانا
أسيل لا عيني عليكم بالف عافيه تغديت الحمدلله
عافيات يله ك?م ماما تغده وتالي تضل مطنكر
مروان شبي شو مبوز شبيك عمو
أسيا على أبوه التحق عاد يضل يومين ما يأكل
مروان أتصلي عليه خل يحجي وياه
أسيا عنده أجتما? گال بعدين يله ك?م حبيبي
مروان عوفي نتغده اني وياه وين غداه جيبي يله تعال يمي نصعد فوك.
أسيل أخذه وصعدوا عمتي هم سألت عليه.
أسيا ما أعرف اني توني كعدت من النوم لكيتهم متغدين وغاسلين المواعين.
أسيل يله من رخصتج مشيت ونزلت أزهار فتحت الثلاجه وعبرتني حتى ما سلمت عليه وكفت تسوي أكل ل بنتها وصعدت الغرفه لكيتهم يضحكون اخذت ملابسي ورحت الحمام غيرتهن والسويت جان مفتوح الباب مشيت صارت بوجهي ازهار
أزهار مروان كاعد
أسيل أي فتحتلها الباب ودخلت
أزهار مروان عندك وقت
مروان ها عيني أي گولي
تعال نحجي.
أحجي أهنا
لا بغرفتي
ماشي.
أسيل طلعوا وك?م نزل شلت الصينيه ونزلت لكيت اسيا تغسل بنتها جمعت المواعين وغسلتهن واجتي
أسيا ليش غسلتيهن صدك جذب أسيل
لا يمعوده ما يكلفن بس عادي اسألج
سألي حبيبتي
أزهار شبيها وياي
وياج
أي
ما بيها شيء اذا قصدج ما تحجي مو بس وياج حتى اني كلنا ما تحجي ويانا لأن بنتها وضعها هواي صعب
ليش شبيها.
لحد الأن التشخيص ما متأكدين منه كل طبيب شكل واحد يگول عدها صر? واحد يكول توحد واحد يكول رهاب أجتماعي ومرض نفسي يعني وضع ازهار صعب الله يكون بعونها أعذريها والله هي طيبه وحبابه وما عدها شيء وياج بس نفسيتها تعبانه اللي شافته من شاهين مو قليل وأنوب بنتها الله يساعدها.
ماشي عيني عفتها وصعدت وشفتها باب غرفتها تبجي ومروان حاضنها ويسگت بيها عفتهم ومشيت غرفتي كعدت أقرأ دروسي وركزت على دراستي ومروان وياي حتى بملابسي يساعدني وياي خطوه بخطوه ما عافني ولا مل بالعكس أحسه يتونس من يكون يمي وهم يروحلها بس بديت احس والاحظ ماكو شي بينهم! بس مع ذلك أحترك بناري حتى لو مهم يجمعهم مكان واحد ما أكدر أتقبل فكره اليعيشه وياي يرجع يعيشه وياها تلعب نفسي وأكره الساعة الرجعت بيها اله.
جنت كاعده أقرأ وفتح الباب ودخل أبتسلمي ودنك باسني لاحظت نفس ملابسه رجع بيهن ما سابح بينت روحي طبيعيه وكعد سحب الملزمه وضليت صافنه عليه واندك الباب ادخل
هناس جاي تدرسين
أسيل أي والله ليش
عبالي تنزلين نسوي كليجه مشتهيته هاي أسيا تكول ما أدبرها وملتهيه بجهالها وأزهار نايمه ما لكيت غيرج أخاف تطلع بكصته خطيه.
لا هسه أسويلج
ماشي عيني
سدت الباب ومروان عينه بالملزمه شنو اشتاقيت لدراسه
لا بس صعبه شلون أدبرينها.
لاتخاف عليه كدها
تربيتي
ونعم التربيه عاد
شو تستهزين ولج
أني
لا اني مو اجيج
تعال الف هلا بيك
خو تكيفين
أي طبعاً كمت حضنته أسوي الكليجه وارجعلك
نزلت وياها وعجناها سوه واجتي عمتي ساعدتنا بيها وكملناها وضل بس الشوي غسلت وصعدت وعمتي صاحت وراي
وصال وين رايحه وين يطير مروان.
أسيل هناس باوعلتنا وسگتت ورجعت تشوي عمتي سگتت ما حجت شيء عفتهن صعدت لكيته نايم مروان ما رد عليه عفته ونزلت وهناس تشوي عمتي تسوي العشه ونزلت ازهار وكفت يمها وتأكل كليجه
أزهار الله طعمها يخبل طلعتي منال العالم وما ندري ابداعك حبيبي عاشت ايدج كلش طيبه
هناس والله الصراحه مو أني سويتها أسيل خطيه هي عجنتها اني بس شكلتها وياها وشويتها بس فعلاً كليجه طعمها يجنن عبالك جاهزه مشكوره أسيل تعبتج وياي.
أسيل لا عادي بالعافيه
أزهار ماما شمسويه عشه
وصال مقليات وهناس تگول روبه وكليجه
أزهار أكلي بس لاتكثرين تحمض على معدتج يصعد الجالي والدنيا تكومين تموتين اني من جنت حامل بالليل اكل شيء خفيف لان جالي يدمرني
هناس والله اني مشتهيته بعد أكل وعليك يالله
أزهار بالعافيه مروان وين لعد ما شفته
هناس نايم أسيل خل يكعد الدنيا مغرب راح يأذن
أزهار ما يكعد هو روحه بالنوم رايحه أشوف أسيا.
أسيل راحت ومروان نزل أبتسملي صح النوم
مروان صح بدنج شبيج وجهج حزين
ما بيه شيء
أكيد
أكيد
گملتي الكليجه
أي گملتها
معدله خوش مره مريتي
أبتسملي وطلع برى ضليت أباوعله وهناس صفنت عليه صاعده اصلي أذن
تمام
صعدت الغرفتي صليت ونزلت تعشينا وتعلوله وسوالف وكعده وتأخر الوقت ونعسست وصعدت أول وحده وكبل نمت حيل صايره أتعب الدوام متعب الكعده من الصبح ودراسه القسم صعب بس مع ذلك ميخالف مهم ادرس وأتخرج.
ومرت الايام حياتي طبيعية صح هناس بحياتي بس مبتعده أحسسها أنسحبت بس باقيه علمود طفلها
أو اكو قرارات أكبر منها ما تكدر تخالفها ما اعرف بس علاقتهم مو نفس أول فقط مبنيه على الأحترام
وأني هم سحبت نفسي كمت ما ادقق ولا اسأله وين جنت يمها لو تحبها ولا خنگته بغيرتي سيطرتي وتحكمت بمشاعري وعفته على راحته لان مهما يكون مرته وهذا حق حرام عليه أمنعها من حقوقها الزوجيه.
ونفس الوقت شفتها وعرفتها هي مو من النوع تهمها هالسالفه حياتها ما توكف على هذا الشيء صح من حقوقها بس عدها عزة نفس تضغط على قلبها ولا تنذل عسكي اني ذاله روحي بگلبي وبحبي اله وحتى هو اللحظ عليه من يشوفها او تمر من كدامه ينخطف لونه شيء بي يتغير حتى لو يحبني تبقى هناس بداخله غير عني بهواي ومميزه ومفضله لان كلشي بيها مختلف ونادر شيء أكيد يتأثر بيها.
بالحمام واكفه يم المغسله ولازمه أختبار الحمل بيدي هذا رابع واحد أجربه نفس الشيء شمرته بالوساخه ورجعت ومثل كل مره تخيب امالي وارجع لنقطه الصفر رجعت للغرفه ونمت على بطني اندك الباب عرفتها من دكتها إتفضل
هناس شبيج شفتج تمشين بدون واهس
أسيل أجتني الشهريه.
يله ما صار شيء بعدين يا اسيل الله ما شافوا بس عرفوا أنتِ مريضه وينج وين الخلفه دصيري زينه والله كريم بعدج صغيره لاحكه على شلعان الگلب والنساة والنومه سم عليج والثكل لاحكه دتونسي بحياتج ملابسج كليتج الدنيا كدامج بعدج بآول ربيع عمرج يا عيني صحتج اهم لو الطفل
تحجي وياي واني بالي مو يمها
يلا اني اروح تردين مسكن شيء ولو ما انصحج بالمسكن لأن علمياً اكدوا انو يأخرها.
لا ما أريد راح انام لا تكعديني سدت الباب وراحت
سحبت التلفون وخابرته هلا حبيبي
هلا عمري هلا بروحي
بجيت مروان أجتي
منو هي أجتي
الشهريه
اي هلا بيها اكو شيء
أني أكولك أجتي الشهريه انت تكولي هلا بيها شارب نفط اني محترك گلبي وانت تستهزء بيه
ً شسويلج أنتِ كلتي أجتي واني رحبت بيها شفتج ما تعرفين الاصول وترحبين بيها كلت ارحب بدالج
لا تقهرني والله ضجت
يلا لا اضوجين من انزل اوديج على وحده يكولون زينه.
شُنوْ دكتوره شسمها
لا وحده تبيع جهال على المواصفات أشقر رمادي اشقر أحمر وأبيض اسمر بني فاتح.
لا مو مفتحين صالون وتحجيلي بالالوان صوجي خابرتك نوب حركت دمي بالزايد
لج بابا كل عقلج مخابرتني أجتي الشهريه أنتِ وينج وين الخلفه كبدج تعبان صايره سگله مسكربه
اتعير بيه تره المرض مو عيب
لج أنتِ عقلج شوكت يكبر اني وين احجي وهي وين تثرد بصف الماعون
خلف الله عليك واني محتاجتك أريدك يمي حجيتها واختنكت ابجي.
هسه شلون بيج
تكدر تنزل أريدك يمي روحي طالعه
لج وين أنزل غير هذا اللواء مرته تطلك تريد تتولد وهو حاصرنا عبالك سسترات يريد يجيبنه بدالها
خرررب اسكت فضحتنا
لو تشوفينه بس يفتر الطلوگه تحمى عنده وتبرد
يبو ما يروحلها
يستحي من نسابته هو لو يطلع بيده يجيب بمكانها
وووي
وكل شويه يعيط بينا كوموا صلوا اندعوا لمرتي تجيب بخير وسلامه
يووو ليش ما عنده اطفال.
لا خطيه صارلها 12 سنه متزوج هذا اول طفل ومرته دخلت الاربعين هو هم جبير الخلفه? كبر ما تنراد
خطيه
شلونج هسه
وووي ضيم
وأنتِ كضيتيها عليه يووو ويوو وووي وجعوا بس تتنعوصين وين اودي وجهي وأنتِ غركانه بسد دوكان.
مروووان
وجع انوب تتنعوص وولا تجوز العجوز.
انوب عجوز خلف الله عليك
يابه شلون عجوز عيني عيني
هف تعال عاد
لج أنتِ فد وحده
اي كمل كمل
فد وحده خوش بنيه
صدكت صاير لوتي.
يلا هسه اروح اكوله مرتي ولادتها متعسره بلكت يخليني إنزل ويحس على روحه
تمام أنتظرك حبيبي
نامي اذا ما خابرتج معناها ما اجي
اوك سد الخط وراح وتمددت والوجع يذبح غفيت كعدت على ايده تمسح على رأسي كعدت حضنته بكل قوتي اريد ادخل بنصه ابجي من كل گلبي
يابه عشر جهال ما يلحكون خبالج دربي نفسج بالاول بعدين خلفي جاهل نوب تبجين يالله هاي شتحطلها وتطيب.
مروان گافي
أبدل وأجيج أبقي نايمه.
تمام راح بدل ورجع فتح حضنه نمت بحضنه يمسح على بطني حتى يخف الوجع واني الليل كله اتلوى وهو ما نايم جايلي جيس مي حار خلاه على بطني وغفيت وسكن الألم كعدت الصبح غسلت ونمت يم الصوبه هو اجه كاعد من زمان انطاني كوب أعشاب النعناع وعشبه ثانيه اعتقد اسمها مريمه هيج شيء اخذته اشرب بي هناس وراه
هناس ها صباح الخير شلون صرتي عيني
أسيل اوف هناس متت الوجع موتني شكد حقير ما يرحمني.
يبوو الله يساعدج فورتلج أعشاب اشربيهن ها تروحين للدوام
لا ما بيه
كيفج اني اروح ابدل اتأخرت عندي مقابله ويه وحده.
تمام راحت هو طول ما أحنه نحجي ساكت يلعب بالصوبه قلقني بحركته نمت يم الصوبه هو كعد يمي خلاني بحضنه ربع ساعه واجت شايله الروب بإيدها شكد تعجبني.
أكولج أنتِ غياباتج هواي وما أريد تتراكم عليج المحاضرات أمشي دوامي احسن تتلهين وتنسين الوجع واذا تعبتي ايفين تجيبج مو احسن.
كيفج مروان أروح.
براحتج اذا تشوفين نفسج زينه روحي
يالله ميخالف هسه ابدل تعاي كعدي هنا
لا أنتظرج برى
لا تعاي بارده دخلت وحسيتها توترت وهو هم يطك بإصابعه كعدت عالجربايه وأخذت ملابسي وكاموا يسولفون بس رسميات ورحت للحمام بدلت واجيت اخلي مكياج خفيف وهيه كاعده يمه يسولفون هي عالجربايه هو بالكاع يم الصوبه وتضحك وياه هي دمها يلعب باوعتلهم كملت عيني
تمام يلا امشي ما ضل وكت عليه
طلعنا واخذت اللفه من عمتي وانطتنياها.
وصال هاج اكلي دفي بطنج بالاكل
أخذتها لعبانه نفسي كوه جرعتها صعدت بالسياره دافيه صوت القران سوره الحاقه عبد القادر الكردي كلش صوته حلو ومريح
وصلنا الجامعه دخلت المحاضرات كلهن وصلنا لمحاضره ايفين شرحت شويه وكالت يلا اخذوا راحتكم باوعتلي اشرتلي أروحلها
هلاو شلونج شون صرتي عيني
يبوو لا تساليني والله على اعصابي وجسمي متشنج.
دمشي لمكتبي أدفيج بالصوبه علمود اخلص تصحيح واخذج فره للمولات اكو محل جديد مفتح وعنده عروض كلش حلوة ملابس وموديلات تخبل
تمام يابه من ايدج هاي لايدج هاي دخلت المكتب دافي كتلها قفلي الباب خل تتمدد.
كلج عبالك اخذتي وجهه زايد ترى اني دكتوراه
علي نفسج مو عليه هههههه
ديلا عيني لاتروح تزعل أختي من وراج
اوووي داده
وجع هاج حليب حار
اخذته وتمددت عالتخم اشرب غفيت وكعدتني
ديلا كعدي نروح ناخذ الملابس إلى حجزتهن.
طلعت وراها وخابرت مروان ها حبيبي وين أنت؟
موجود غاليتي أنتِ وين
اني حروح ويه أيفين أشتري ملابس كالت ملابس مال بيت وتراكات حلوه توافق أروح
براحتج حبيبي أي موافق أنتظرج عالغده لو تتأخرين
ما أعرف حبيبي إذا تريد من اكمل اخابرك تجيني.
اني بالمعرض من تكملين اتصلي أجيج.
تمام گلبي أنتهى الاتصال وطلعنا وصلنا المول الدنيا تزخ مطر دخلنا المجمع شكد مرتب ودخلنا المحل بنيه تبيع بي وأسعارهم حلوه والملابس حرفياً تجنن وتأخذ العقل صدك واو أخذت كم قطعه نوم وتراكات شتويه وعطورات هم تبيع بغير قسم هم أخذت هي أخذت الها ولاختها انتبهت عليها بس ملابس بيت وماخذتلها نوم وشتسوي بي المن تلبسه! گملنا وطلعنا وگالت
أگولج خابري الشفيه ياخذج اني اروح الم جهالي من المدارس هسه داحوا بالشوار?.
تمام خابرته كال اني يم مطعم (، ) تجين
كلت لايفين
تمام هو قريب هسه اوصلج يمه
وصلتني وراحت وصلت يمه أخذ أيدي شبكها وباسها بردانه حبيبي كلش كلش.
تعاي ادفيج
أحتضني من كتفي بإيده ودخلنا للمطعم اتغدينا وكملنا وطلعنا وصلنا البيت نزلت الغراض وهو التهى ويه عمار يحجون على مجد متعارك ويه ولد عمي داوود وعمار ضايج حيل على مجد يكول ماعدهم أحترامات لان فقير مستغلينه تحشيش وتصنيف.
مروان عوفهم أساساً مجد ما معترف بيهم هيج مرات يروح لديوانيه علمود عمي فاضل
كتلي عمي فاضل موو ترى أنت واخيك أعرفكم وحافظكم بصم ونقش مجد ضامله وحده جوه اباطه من عمامه صايرين لواته
لك أنتَ ما تفوتك فايته
اي والله.
أسيل عفتهم ولكيت هناس متمدده بغرفه عمتي عمه وصال شبيها هناس
وصال متخربطه وحارث وصلها
أسيل حاجتني وجهه ثكيل عفتها ودخلت لغرفه هي نايمه هلاو شلونج اخبارج رفعت ايدها من عينها
هناس هلا عيني.
شبيج متخربطه
اي والله نفسي لعبت وضغطي صفر ربج حارث موجود وصلني الا رجلج الشفيه أخذي من كبالي تره اسويله مشكله أتصل عليه وميجاوب خوما يهوديه اني شدعوه عليه.
ما أعرف والله لأ تظلمينه
ما أظلمه دمشي اخذي ما أريد اشوفه
واني هم ما أقبل تغثين مرواني
هو محد طيح حظ مرواني غير التنعوص مالتج
فديتني.
اي مأخذه عقله حقه ميجاوبني
شسويلج أني أحجي وياه
لخاطر الله ما تسگتين دمشي خليني أرتاح.
أوك طلعت وهو دخل عليها عفتهم وصعدت بدلت ونزلت وهو كاعد يمها يحجي وهي متعصبه ما أنطته مجال گبت بي دخلت عليهم كتله مروان حبيبي يلا.
رافعلي حواجبه بإنزعاج وما عاجبه
مروان أمشي أمشي
ما مقتنع مشا كدامي أشرتلها باي
أكولج وين الملابس بس لا تردين تقطيهن
يا نسيتهن بالمطبخ رحت جبتهن وشوفتها ملابسي
ولج أنتِ فاينه هم فايض السد وهم جايبه ملابس نوم مغريه خررب بلشتج ولا تكعدين راحه.
يستقر السد والبسهن شعندي قابل غير مروان وأدلله سگتت وملامحها بهتت وحسيت بيها انقهرت هي الجابتها لنفسها ليش كلمه والثانيه وكالت البابا والبابا وعزة نفسها شسويلها اني أريد أعيش صعدت لغرفتي ولگيته مخلي جگارته ويدك برجله بعصبيه خير شبيك
تسألين شبيه هواي مهتمه وتراعين المشاعر حضرتج هواي
شبيك گبيت شگو شصاير.
طبعاً ما تعرفين شصاير لأن أنتِ وحده محد يهمج بس نفسج ما شايله حساب لأي بشر كدامج لا هو ولا مشاعره ولا أحساس ولا صخام ب?أسي ولاتكولين هذا البشر زين وياي شايلني على?اسه محترمني ومقدرني ويعاملني بالكلمه الطيبه.
غير أعرف شگو بعدين عدلي هالجريده المحضرها.
شگو مو أني أگولج شگو ليش هيج سويتي تتصرفين بحقاره ونذاله كدامها شصار عليج لو مخليتني اني أصعد فوك براحتي شگو دخلتي يله حبيبي تموتين اذا تأخرت كم دقيقه تموتين
رجاءً لا تسوي مشكله مالي خلك تعبانه
واني هم مالي خلگج اروح أرجع لدوامي واكله مرتي جابت والطفل انطاك عمره من الله اخذ عمري وخلصت من هالعيشه الزقنبوت.
عافني وفتح الكنتور بقوه ولبس ملابسه وطلع وصحت وراه شسويلك ضايج على حضرة جنابها مجان توفي وياها وما تخونها وياي انت الجبتها لروحك مشكلتك مو مشگلتي، أنفتح الباب بقوه وفزيت.
لج والله أنتِ عار وما تصيرلج جاره وهذا لسانج إذا ما تلزمينه وتصيرين أدمي وتحترمين نفسج أرجعج لعصر الحجري.
طلع وشلت الملابسي وشمرتهن ولزمت ملابس النوم كلهن شگكتهن بالمكص وذبيتهن حقير اني صُدك عار لأن أحبك وأوهم نفسي أنتَ تحبني لا والله أنتَ ما تحبني تحبها الها لدرجه صاير نار والله دخلت عليكم وحضرتها مقهوره من هالتصرف ولازم طلع حرگتها بيه لازم شلون هاي هناس العزيزه الغاليه حتى وهي مبتعده عنك تكن الها مشاعر وأحترام خوما صارت مثل أسيل ساحله نفسها وراك وأنت بموقف واحد تزوعهن كلهن وتخليني بالقندره.
ضليت كاعده ما طلعت من الغرفه للمغرب اني بالغرفه والملابس منثره بالكاع ومحد سأل عني هسه عرفت عمتي وصال ليش حاجتني بوجه ثكيل الظاهر مزعوجه لأن هناس تخربطت ومروان ما مجاوبها واني شعليه شدخلني ترجعون عليه روحوا على أبنكم حاسبوا والله البيه گافي عليه كافي كلامه وقهرته تأكل بگلبي...
أذن المغرب واني ما طالعه وأندك الباب ما جاوبت
أزهار أسيل نزلي أمي تسأل عليج.
أسيل هسه أجي كمت صورت گلشي وجمعتهن وشمرتهن بالسله وطلعت هناس وباوعت وشافتهن
هناس ليش هيج سويتي
أسيل أرتاحيتي شفتيهن ونفسيتهن وهذا صا? مكانهن أرتاحي تعاركنا من وراج وقهرني وقهرته وراح الدوام شايط بسببج.
ليش من ورايه ومحلمتني السبب ليش ما تگولين بسبب تصرفاتج بدون وعي أسيل ترى عايفته الج يعني ماله داعي تجرحيني بالكلام.
عفتي إلى والله تضحكون أنتِ وياه عايشين تمثيله ب?أسي عود واحد يكابر على الثاني ونفسكم عزيزه وأنتوا واحد يشوف الثاني تكومون تتراجفون عليمن هالمهزله ليش ما تكونون حقيقين وواقعيين بدال
ما تفرغون سمكم وقهركم بيه وتكولين عايفته الج لعد عوفي شگو باقيه لو كلمة البابا ما تسمحلج.
خلي يكون بعلمج هسه بهل الدقيقه أكدر امشي واروح وأطلع من حياته وبعد ما أرجع بس باقيه لخاطر أهلي ولخاطر كلمة بابا اللي حضرتج تستهزئين بيها حتى لو كنت محاميه كد الدنيا تربيتي ما تسمحلي أعارض أهلي ولخاطره هو لا عبالج عفته معناها أنهي قاموسه من حياتي لو ما أهتمله ولا أهتم لوجوده ولكلمته لا غلطانه ماطولني على ذمته وهو رجلي وأبوه أبني ما أتجاوز حدودي وياه ولا أقلل من تربيتي ولا أحترامه وحتى لو أنفصلنا ابقى أكن اله الأحترام مو شرط العلاقات تكون مبينه فقط على الحب.
والله عجبين غربيين يمكن اني بينكم النكره ما
جاوبتني راحت على غرفة أزهار راحت تتشكى مني باوعت الملابس هسه اني ليش خليتها تشوفها وتعرف أحنه تعاركنا اني هم غبيه وما أفتهم والله اني صُدك عار وما تصيرلي جاره.
نزلت لكيت عمتي كاعده تسبح سلمت عليها وكعدت عمو كمال يباو? أوراق مالت الشغل المعرض وأشلع بإظافري أحس روحي غريبه وأنوب هو زعلان نار بگلبي هضيمه من ما عندك أهل يسألون عليك هيضمه الكل يباوعلك بحزن وشفقه هضيمه الكل مقهور عليك وكاسر خاطرهم حتى هناس شافتني ما عندي سند وأهلي مو كفو مقهوره عليه وگالتله اسيل من دونك تضيع هو صُدك اضيع لما هو الله يدري شصار بيه يمكن جان وگعت بيد واحد لعب وضحك على عقلي جان هسه حالي بالشافعات أهتضمت ونزلت دمعتي وعمتي بيدها سبحتها مدتلي إيدها.
وصال تعالي يمي دنيا مغرب لاتبجين
أسيل خليني عمه
شو تعالي لا أهفج بالسبحه
سحبتني وضمتني بحضنها وتبوس بيه وعمو كمال باوعلنا وأبتسملي
گومي غسلي وتعالي سبحي وأستغفري بالسبحه مالتي علمود ترتاحين يله بنيتي
كمت غسلت واجيت انطتني السبحه
صليتي
أي عمه صليت ضليت كاعده يمهم وصار وقت العشه ردت أكوم عمتي ما خلتني.
ما عليج العشه اني سويته ازهار وأسيا يصبن وهنا يغسلن المواعين أنتِ شايطه على مروان أدري بيج.
قهرني وعصب وضل يحجي وتالي راح زعلان
أنتِ هم قهرتي شوكت تتعلمين على أطباعه
هو ما يتعلم على أطباعي تعبت والله اني كرامتي وين أضل ساكته ومتحمله كلمه والثانيه يرجع عليه
كلنا تعبنا وهاي اني كدامج عمج لحد الأن هم يصيح ويعصب ويحجي ويزعل وهما عليمن طالعين على أبوهم لا والله هما أحسن منه أبوهم بعمرهم ما ينجر? ولا ينحمل بس جرعته وتحملته وصبرت عليه وسايسسته وما عاندته ولا قللت من أحترامه.
ولا رفعت صوتي عليه بالمختصر عاملته مثل ما يريد مو لأن هو يريد لا لأن اني أريد راحة بالي وراحة بال أطفالي وأستقرار العائلي والأسري.
وبالعلاقه يا ماما لازم واحد من الطرفين يتنازل لثاني عن كبريائه مو لأن هو ضعيف شخصيه وقليل كرامه ضعف الشخصيه والكرامه مفهوم صعب مو الكل يفهمه ويدرك معناه ولا بكل موقف أوكف بوجهه وارده والله اني شخصيتي قويه ما أسمحلك تعلي صوتك أو تتجاوز عليه ولا كرامتي تسمحلي أبقى أكمل وياك لا الكرامه مو كلمه تنگال الكرامه تنشأ بإساس أحترام العلاقه الزوجيه.
يعني بدال ما رديتي بنفس أسلوبه وهمجيته بالكلام جان رديتي بإسلوب أحسن والطف أو تسكتين لأن اذا هو يرد وأنتِ تردين هو يتجاوز وأنتِ تتجاوزين ما راح توصلون لحل بس تكونون جرحتوا نفسكم يعني
لازم تتنازلين لان الرجال صعب يتنازل بالأخص اذا دمه حار وما يتفاهم هذا منتهين منه النقاش عقيم
لا تكولين أعتذري منه
لأ وأدري?اسج يابس ما تتنازلين
أزهار العشه جاهز.
وصال گومي.
أسيل كمنا تعشينا وخلصنا اني كمت رحت صبيت الجاي وأزهار تغسل المواعين وأسيا تصفط على أيدها وهناس كاعده تحجي هي وعمتي على الطفل والمراجعه يردن يروحن يشوفن الجنس لان صا? عمره أربع أشه?.
وصال أشك بيج بنيه لأن بطنج جبيره
هناس والله عادب بنيه ولد ماكو فرق مهم تمام الخلقه
وصال اي والله ربي يكومج بالسلامه أنتِ وياه.
أسيل يحجن بينهم وصبيت الجاي أخذت الكوب وصعدت الغرفه أخذت تلفوني من الشحن لگيته گومه متصل عليه خير شتريد عفته وشغلت التلفزيون وكعدت أباوع مسلسل وصلتني رساله
مروان أخذتي علاجاتج.
أسيل لا والله
گومي أخذيهن أكو شريط خلصان أخذتلج واحد تلكينه بجيب الستره بالكنتور
هسه أشوف كمت دورت على سترته دزيتله ياهي منهن
السوده بكنتور بصف ملابسج موجوده.
أي اخذتها وهبت عليه ريحته وبجيت حضنتها بكل قوتي دزيتله رساله لكيته شكراً
أخذتي
هسه كمت اخذته دزيتله اي تعشيت
لا والله بعدني وأنتوا
تعشينا الحمدلله بس السفره ناقصتك
تخلص أجازتي وأنزل ان شاءلله
ان شاءالله شوكت تتعشى
ما جوعان هسه
براحتك
بس مشتاك لحنيتي
دمعت عيني مشتاقه لصوتك گبل أتصل وأجاني صوته شرح روحي اوف يمه ردتلي روحي
فدوه لروحج
خوما زعلت مني
راحت بوگتها
يعني هسه ما زعلان
لا أبداً
عيني أنت
عيني أنتِ
روحي أنت.
روحي أنتِ
گلبي وعمري وحياتي
گلبي وعمري وحياتي
أحبك
أعشقج أتنفسج روحي منج وبيج.
كون هسه فد حضن
وأجعصج جعص واشبكج بآيديه ورجليه أخليج بقفص صدري وأضمج بروحي.
ووي قلبي الصغير لا يتحمل
ووي ووي شحبها صرت
لأنك تحبني
أي أحبج وأحب عنادج وأحب قوتج احب طفوليتج احب تصرفاتج العفويه بنفس الوقت اكره الشيطان إلى بداخلج لان هذا طبع مطبعته من أهلج
أنت هم على كيف وياي
أي صوت يمج مشغله التلفزيون
أي والله جاي أباو? مسلسل.
شعجب ما بقيتي يمهم تعللتي وبعدين صعدتي
مخنوكه لان أنت مو أهنا اني من دونك يتيمه هو تجي لصدك اني فعلاً يتيمه الما عنده أهل شنو يتيم
ما الج دخل أني أهلج كلهم.
فدوة اروحلك شوكت تنزل
اليوم التحقت ما أطول عليج وابقى أحجي وياج علمود ما تضوجين وتحسسين نفسج غريبه.
بجيت ماشي
ليش البجي
لا بطلت ما ابجي
اي عفيه يله گلبي اروح اتعشى بعدين أخابرج ماشي.
ماشي ياقلبي راح وأنتهى الأتصال ورجعت أباو? المسلسل وضليت كاعده ورجع أتصل وضلينا سهرانين نحجي أتصال وبعدها نعست وراح
كعدت الصبح لبست وطلعت عبالي أروح ويه هناس أستحيت أدك عليها الباب واني البارحه قبحت وياها مشيت وطلعت هي
هناس أمشي امشي عود زعلانه ام خشم.
أسيل نزلت وياها تريكنا وصلتني وراحت وبالرجعه هم هي أجتي أخذتني وضل هالحال دوام ونفس الروتين الا ان يوم رجعت ولكيته نازل واكف بالمطبخ شافني لمعت عيونه بفرح أبتسم وهناس وراي سلمت عليه وصعدت واني لحكتها اخذت ملابسي وطفرت الحمام سبحت وطلعت ركض الغرفه لكيته موجود وقفل الباب وقربني اله
مروان لك مشتاقين.
أسيل مو بكدي قربني اله وأخذني بوسط الشوق والزعل وهو نايم صفنت عليه شكثر تعبان گلبي وجعني عليه اني تعبته تعبان من وراي والله.
قررت أتفادى المشاكل وما أتدخل بعد هي هم خطيه وما مقصره وياي أفضالها مغركتني والله من مروان يلتحق فد احبها وعبالك أختي وأسولف وياها كلشي وأتصرف وياها طبيعي وأضحك وياها وما إتقيد أبداً ونتساعد ونطلع سوه نشتري ملابس يعني عبالك أخوات بس من هو يجي لا والله يركبني جني عليها أشوفها شيطان رجيم أتخبل منها عقلي يطير منها حتى لساني يتبرى مني وياها أريد أذبحها أملخها على الرغم هي للامانه وحق الله ينحجي محترمه نفسها أبداً ما تسوي حركات لو تتلوك اله لو تحجي وياه أصلاً معتبرته ما موجود ومبتعده عنه.
بيوم كاعدين كلنا العائله مجتمعه ولمة الأهل بس كانت لحظات جانت مثل البرق مرت وخطفت لحظات الضحكه إلى جانت مرسومه على وجوهنا ولمتنا الحلوه هناس كاعده يم الصوبه وتضحك هي ومجد على بنت ازهار تدردم عليهم
هناس والله بنتج أسيل معلمتها تشتم عليه
أسيل لا هذا مروان يعلمها
خبيثين يلا غزوله احجي
خربنا من الضحك عليها غزوله اصيح وتعارك وصاحلها مروان ودفعتني بزعل وكعدت بحظنه.
شوف هاي ضرتي الثالثه مناشبتني عليك الله يدري شدردم عليه تحجي وتأشر عليه ومخبوصه ودردم ومروان مساندها على أساس يفهم شي منها.
وأجه عمو كامل وجهه محتقن وضايج وحزين
مجد بابا شبيك شنو ضغطك صاعد
أسيل كلهم گاموا عليه مروان يفتح دكم قميصه وهو الدمع يجري على خده
كلهم يسألون منو مات بابا شبيك
عصام يابه خير صاير شيء.
كمال شحجي يابه شحجي نار بگلبي نار راح الجنت اكول عليه اخ وغالي ما شبعت من عشرته.
أسيل ما أعرف شحجه ويه عصام وعصام هو راسه
وصال شگو يمه شبي أبوك
عصام ماكو شيء صديق الوالد متوفي
هناس الله يرحمه ويصبرك عمو كلنا على هل الطريق
أسيل كل واحد رجع بمكانه هناس كاعده يم الصوبه وتراسل ما رفعت رأسها أجاها عمار اخذ ماعون الشلغم من كدامها وسحبته.
هناس لا تتطفل الجدر مليان روح أكل
عمار فكور دنطيني
ما تأخذ من الجدر
لا ماعونج بارد وتحطين ملح عليه يطلع طيب.
اخذ الماعون وهيه تراسل دك تلفونها تحجي وترجف كلنا أنتبهنا اولهم مروان تشخصت عيونه عليها شگو شبيها
أبويه أبويه شبي أحجي شبي جذابه والله جذابه ابويه لا لا أبويه شلون يعوفنا بعدنا صغار لج شلون بابا مات لاااااااا
شمرت الموبايل وكع يم الشباك وتصرخ وتنفض بنفسها كلهم يركضون عليها بس يردون يلزمونها تعيط تروح منا تجي منا ترجف زلغت خدودها طلعت تركض محد كدر يلزمها
يابه كسرت ظهري يابه أبويه مات أبويه أبويه.
دك وتلطم شلعت شعرها ونحاول وياها فقدت السيطره عن نفسها عمو كمال حالته تأزمت هواي عصام ملتهي بي هناس مروان ومجد بس يردون يلزمونها فقدت بس تعيط صوتها من الصراخ أختفى يبجي حتى الصخور أباوعلها وابجي وكلنا نبجي وياها مروان أحتضنها كدر يسيطر عليها ويسكت بيها.
أخذوني يمه يمه أريده أريده لج عمه ابويه مات اني الماكسرتله كلمه اني الماكسر خاطري اني الجبيره اني الجان يكول أنتِ اخوهن الجبير أنتِ سندي وين راح واني اكول عليه هو سندي هو حبيبي الاول وين عفتني بابا وين ليش حبيبي ليش كسرتني بابا فدوه لعينك ربي
وصال الله يرحمه بنيتي ويصبركم على فراكه
هناس اوف عمه أخر شيء أتوقعه واسمعه خبر وفاته ريتني يومي گبل يومك يابه عيني أنتِ يابه.
أسيل كلنا تحضرنه حتى نروح وياها هيه بس الدمع يجري ومخليه راسها بحضن مروان ما عافها بدلنه وقفلنا البيت بقى بس عمار عمه وصال واسيا يقنعنها تكوم مو راضيه بس تبجي حيل ما بيها
هناس نار بگلبي نار شلون أودعه بتابوت هي بس كلمة اموت جان يكولها جنت انصب عزه من وراها شلون اروح اشوفه شلون عمه كوليلي قنعيني قنعيني بابا وبابا ونهار كله اصيح بابا أعثر بالكاع واكول بابا.
يا وكت خلاني وحيده يا وكت عمه ضيعني بدرب اعوج وكلت ميخالف مهم رضاه ولا زعله مهم رضاك يا نظر عيني تالي تعوفني بابا ليش ليش ليش.
وصال الله يصبرك عمه شبيدنه عليج هذا امر الله
قنعي روحج قنعي روحج عمه الما دافنله ميت بمكبره لا يحجي بالصبر.
أسيل صارت ادك وتلطم بهستيريه ملخت نفسها
هناس ولك يابه يابه وجعتلي يابه جان يكول من عمري على عمرجن راح وعافنا راح وعاف بنيتاته.
أسيل اخذها مروان احتضنها هي تبجي ويحجي ويقنع ويتوسل هي قافله لحد مصعدنه بالسياره خابروا كالوا المستشفى رحنا وعمي كمال نزل وإجا اتجاه وهي تمشي مثل التايهه كعدت كبال الاستعلامات
هناس مره بعدني صغيره وراح عافني وضعت وبس هسه من صدك ضعت يابه ليش يتمتني ليش عفتني اني الجبيره فرحة گلبك ليش هان عليك گلبك تعوفني
أسيل تقرب عمي كمال اخذها لحضنه يهدي بيها
كمال على كيفج بنيتي اني أبوج اني وياج.
هناس مو مثل ابويه مكانه محد ياخذه محد أبويه واحد ومات راح وخلاني راح راح الغالي عافني راح عمو راح ابويه مات نار بصدري عليك يابه
أسيل لحد ما اجت ايفين واختها الصغيره ملاك
تدفع بيهن
هناس َ حقيررات ما كلتن خل تشوفه ما كلتن خل تبرد گلبها اخر مره خوماااا حرام عليجن تخابرن تكولن اني اجي اخذه جثتة من المستشفى وما اكحل عيني واشوفه واودعه.
أسيل أخر شي حجته
هناس الغالي وراح وكلمن يفكر بروحه.
أسيل وماتت هناس بهذا اليوم واغمى عليها أخذناها كلنا اخذنه دور المتفرج من الصدمه بس نبجي اخذوها للطوارئ بس مغذي وهي حامل ماكدر ينطوها شي ترجف الحلك ازرك والوجه أصفر
اخذو المرحوم واخذناه للبيت بتابوت وهي مروان جابها ورانا تمشي وخلوا بصاله جبيره ولد عمامهم كرايبهم هواي ورجل اختها يسحب بايفين
إيفين أخر مره اريده بغرفه احجي وياه اشبع منه تلحكون تاخذونه وتدفنونه وتصير المكبره بيته ومسكنه.
أسيل اخذوه للغرفه مالته وهنا دخلن يمه وعافت مروان طلعت تركض على الغرفه وتصرخ واجاني
مروان اسيل فدوه لعينج دخلي وياها هاي تفقد وكلهن ما يدرن برواحهن شيسون يله روحليها
أسيل أي هسه دخلت وهي فاتحه البطانيه من رأسه لابس قميص سمائي شعره ابيض وبي شكار وجهه بي نمش باسته من رأسه ومن ايده نزعت محابسه وساعته تبوس بإيده وتحجي وياه.
هناس غدرت بيه واني جنت تكول طول العمر وياج اني محكمتج والقاضي مالتج وين رحت وعفتني اخ ناررر وشعلتها بگلبي ما خفت الله بيه ماكلت هاي تموت ورايه صارت الدنيا سوده بعيني أختنك حتى النفس بدونك يابه ماله طعم يابه ليش تخلي العالم تكلي يتيمه مو تدري بيه اكره البجي مو تدري بيه اكره الفقد يابه بس ارجع يابه بس ارجع بس احجي وياك بس لحظات ودعني سامحني لان كلتلك اريد الأنفصال من مروان وزعلت مني يابه انعل أبو گلبي ابقى العمر كله وياه بس انت خيمتي وفوك?أسي يابه بس گولي انت ما زعلان مني وبعدني هناستك.
يابه بس أرجعلي اللي تريده يصير أعيش واجرع الما ينجرع بس أنت فوك?أسي والله ما أرفضلك طلب كلمتك هي التمشي يابه والله ما عصيت أمرك والتريده صار بس هالامر طلبته منك وما رضيت جعل لساني ينكص ساعة الگتلك أريد أنفصل من مروان أرجعلي والتريده يجرالك يا نظر عيني يابه.
أسيل تقربت يمها لزمت أيدي قوي وصار لازم يأخذونه وتخبلن مجلبات بتابوت واني ضعت يينهن.
ما يقبلن ينطن دخلوا عمي كمال ومروان ولد عمامهن سحبوهن ومروان سحب هناس وفرفحت بين أيدي وتبجي تتوسل بمروان
هناس مروان فدوه خليني أشبع منه فدوة أروحلك خليني أشبع منه لاتأخذونه مروان خليني أشبع من أبويه خلي أشم ريحته
مروان گافي گافي فدوة أروحلج گافي
هناس كسرلي ظهري ما ضلي أحد صرت يتيمه مروان صرت يتيمه
مروان أدعيله الله يرحمه گافي فدوه اروحلج گافي.
أسيل سحبها حاضنها هي مجلبه بي وتشهك وهما طلعوا بالگوه لازمه انطاها لأمها ولحكهم.
أخذوا وهناس نفس وضعها زادت ما نقصت بصف أمها وأخواتها مخلن نفسهن وامهن انتهت كعدت بصف عمتي وأسيا وبجيت عليه الله يرحمه ويصبر أهل بيته وبناته.
ضلينا وياها طول الفاتحه ثلاث أيام باليل أرجع ويه أسيا بس عمتي وصال ومروان ضلوا ما رجعوا مروان ما رجع أبداً وملابسه أخذله وياي اهناك بيتهم يغير.
ما عافها ولا ثانيه وأمها حسيتها روحها بمروان هواي تحبه ومبين علاقتهم قويه أستحقرت روحي عبالك نكره بينهم لوما وجودي جان بس هو رجلها وحبيبها وسندها ويهون عليها كسرتها بس هسه حتى مروان ما يعوض مكانه بالأخص بعد ما ذكرت تريد تنفصل عنه حيل أنقهرت عليها الله يرحمه ويصبرهم...
دنيا لليل ورجعنا البيت عمتي وصال هم رجعت ويانا بس مروان ما رجع ضل يمهم وطول فترة الفاتحه هو ما وصل البيت حتى ما أعرف شيء عنه بس اسأل عصام يكول يمهم باقي عفته بعد ما لحيت گلت بيوم صعب لازم يكون وياها ويه أهلها وهنا ما عدهن اخ بس أبوهن وتوفى.
رجعت من الدوام لكيت عمي كمال معصب يحجي ويه عمتي وعصام وأزهار هم كاعده سلمت وردوا السلام.
كمال هذا قرار الأنفصال منين طلعلي أبنج يريد يطلگها لو شُنو أحجيلي ليش ساكته هو يريد ينفصل مو
ازهار لا مو هو هي طلبت قرار الأنفصال ومن زمان قبل أشهر هما حاجين بهل الموضوع بس هو ما يريد يطلگها وهناس ما تريد تكمل وتنسحب أفضل الها.
كمال شتحجين أنتِ شُنوْ أفضل الها ليش الزواج لعب جهال وهما مو يحبون بعضهم ليش ينفصلون شُنوْ بس هو تزوج نسوان أثنين واذا متضايقه من أسيل أخذها واطلعها بيت لوحدها وأكعد امج وياها بس مال أنفصال وهي حامل وكسرة أبوها شتصير متكوليلي شتصير.
عصام يابه هذا الموضوع يجي مروان وأكعد وأحجي وياه وأفهم منه تريده اخابره يجي كيفك.
كمال خابره خل يجيب هناس ويجي واذا ما جابها وياه البيت يحرم عليه ما اله دخله بعد وطلاك ماكو لا هناس ولا غير هناس.
أسيل حسيته وجه الكلام اليه عفتهم وصعدت غيرت ملابسي فتحت تلفوني ماكو اي اتصال منه
أتصلت عليه ما جاوبني تالي عفته وضليت كاعده أقرأ وسمعت صوت جوه يمكن اجه كمت وفتحت الباب صاروا بوجهي حاضنها من كتفها وهي لازمه أيده گوه تمشي شكلها متغير ضعفانه بس بطنها ضاله بارزه وعبروني ودخلوا السويت مالتهم.