رواية بين قلبها وعينيها كبرياء للكاتبة شمس العراقية الفصل السادس والخمسون
أسيل ردت اسأله بس خفت منه الصراحه لن شگله يوحي بالعصبيه والأنفعال ولازم أتحمله وگفنا ونزل واني وراه نمشي بالمول واني وراه اخر شيء مليت مروان نضل نمشي مو أتفقنا تريد تشتري ملابس ألك
مروان ها
أسيل أنت وياي
أي وياج خل نفتر بعدين عود نشتري بعد وكت
ماشي ومشينا ودخلنا نستراح طلبلي عصير هو ساكت وأني أباوع على الناس والسيارات من الجام وهو حسيته بعالم ثاني جسده يمي بس باله وأفكاره مو يمي مروان نمشي.
أي يله.
طلعنا وگف يم مطعم مروان شبيك من طلعنا لحد هسه ساكت واذا تعبان خل نرجع مو ضروري العشه
حجيت هيج لن گلبي نغزني اللي جانت بالاستقبال أكيد يعرفها لن النظرات المتبادله بينهم مو لله.
مو تردين تسوين تحليل
يا تحليل مروان بعدها ما غايبتلي بعد يومين
علي موعدها
ها يعني ما يحتاج تحليل لعد نتعشى ونروح
براحتك دخلنا طلب أكل بس ما أكل بس اني هم بالگوه مجامله.
ليش ما تأكلين
وأنت ليش ما تأكل
شعليج مني أكلي أنتِ.
لا هاي هي شبعت
خل نشرب جاي ونكوم
ماشي طلب جاي وشرب وطلعنا للبيت يسوق بطيء كأنما ما يريد يوصل البيت وصلنا هو ما حجه أبداً گبل صعد ونام بملابسه بالعاده يسبح يله لن هو وساسي وما يرتاح اذا ما يأخذ دوش عفته
وغيرت ملابسي ونزلت عليهن أحاول اسألهن منو هاي الجانت يمنا وليش من ساعه دخلنا سلمنا على الخطار هو أنكلب جذرياً والطريق كله صافن ورجع گبل نام.
وصلت الغرفة عمتي وقبل لا أدك الباب سمعتهن يحجن بينهم ومن خلال الكلام سمعت إسمها هناس! يعني الجانت بالأستقبال هاي هناس گلبي نغزني وشگيت بس ما توقعتها هي.
عفتهن وصعدت ركض عليه ولكيته نايم على بطنه مثل الواحد مقهور حاضن نفسه ضليت صافنه عليه يعني شفتها وهيج صار بيك وأنقلبت موازينك كلها.
خليت?أسي على المخده ونزلت دمعتي ومسحتها حقه ما الومه حقه حبيبته الله يعين گلبه أكيد تأذوا من شافوا بعض جانوا يحبون بعض وهو بس جان يسولف بيها كدامي كل سالفته هناس جنت أغير الموضوع وهو يرجعه ما الومك أبداً وأسيل وأنتِ!
وأسترجعت لذاكرتي لشكلها فاتحه الشعر وذابه الشال على كتفها وجمالها قوي ومُلفت مكياجها خفيف بس حلاتها بارزه وشخصيتها طاغيه ياريتني ركزت عليها أريد أشوف شنو البيها ينحب ليش مأخذه كل تفكيره ومن شافها أنعزل ودخل حالة صمت روحي.
بقيت كاعده ما يجيني النوم روحي مخنوگه وعبره بصدري عليه ومنه بالگوه غفيت مر وقت هواي كعدت عطشانه باوعت بفراشه فارغ وشفت ملابسه على الجربايه كمت طلعت برى عبالي بالحمام لكيته بملابس الداخليه كاعد البلكونه ويدخن ضليت أباوعله لهل الدرجه تحبها بس شفتها غيرتك وخلتك هيج تصير وتدوخ بزمانك.
عفته ورجعت الغرفتي تمددت وتالي غفيت كعدت الصبح هو نايم بصفي والنفاضه مليانه جكاير كمت على كيف وغطيته وشلت ملابسه سبحت وغسلتهن ونشرتهن ونظفت الطابق كله بس غرفة عمار ما تقربت الها بهل الأثناء طلع من الغرفه همزين جنت لابسه شال لن طلعت نشرت ملابس وضل على راسي.
عمار مروان وين شو ماكو
أسيل نايم والله
عمار خل يكعد شعنده دنيا الظهر اذا كعد كوليله عمار يكول خلي يلحكني للمعرض.
أسيل ماشي نزل ورحت الحمام وكفت أغسل وأجه هو بإيده منشفته واني گبل طلعت نظفت الغرفه وريحة الدخان تخنك فتحت الشبابيك وعطرتها غيرت الجراجف حضرت ملابسه يلبسهن ودخل هو
مروان عمار كاعد لو بعده
أسيل لا كعد ونزل وگال خل يلحكني للمعرض
وهيج جنتي مكشفه كدامه
لا طبعاً شالي وراك جنت لابسته ما جاوبني رتب شكله وكعد يگلب بالمشفر وجگارته بلحگه
حجيت أجيبلك ريوك
لا.
ماشي وكملت تنظيف وطلعت رحت الحمام غسلت وجهي أحاول أكون طبيعية كدامه وأني ليش أنقهر هو حقه حبيبته ولازم ينقهر ويتأثر شتردين أسيل ما كافي أخذتي منها أويلي على گلبي اليحبه نشفت وجهي وطلعت جبت ملابسه من السطح ودخلت أكوي بيهن وهو كاعد التلفزيون مشتغل بس باله مو يمه نظراته مو يم التلفزيون صافن ورايح لعالم بعيد معتزل ومعتكف لوحده كملتهن وعلكتهن وباوعت الساعه صار وقت الغده مروان ننزل نتغدا.
مروان لا جيبيلي الغده أهنا نزلي أنتِ تغدي يمهم
أسيل نزلت أخذتله الغده ونزلت وضل على هل الحال حتى الأكل شيء قليل يأكل واني باقيه بس أباوعله وصافنه على صفناته نيالها كل تفكيره بيها انقهرت عليهم اني فرقتهم وحرمتهم من بعض اني السبب.
أهتضمت ونمت وعفته كاعد يگلب بالتلفون ويدخن وضليت أكل والوم بنفسي من القهر ومقهوره على روحي هواي اني دمرت نفسي بنفسي ودمرته هو وهناس وضحلي وثبتلي هو يحبها وما نساها وكذاب اليكول اليحب ينسى شينسى يوم يومين جان اني كدرت أنساه مو تعلق بروحي.
كلت أخلي لوحده من حقه يعيش حزنه لوحده نزلت ولكيتهن كاعدات باوعت لغزل أخذتها بحضني وأبوس بيها وصافنه عليها هم يصيرلي بنوته صفنت وبجيت ومسحت دموعي وتالي كمت رضعتها نامت بستها وطلعت من يمها وهنا بالمطبخ يسون كيك وانفتح موضوع وأنذكر إسمها ترخصت وصعدت
لن?أسي كام يوجعني ونفسي تلعب روحي مخنوگه.
لكيته نايم ونمت بصفه بطني كامت تعصر بيه وجع موتني رحت الحمام الشهريه نازله تحطمت خابت كل أمالي وعبالك نزيف مو شهريه شوكت أخلص من الاكياس وأخلص من هالدمار والأذيه كل شهر غسلت ورحت الغرفه أخذ ملابسي وفوط صحيه وسبحت ولفيت?أسي ما مشطته أخذت مسكنات والعلاج وجسمي نحل بس أريد انام نمت وهو كاعد يگلب بالتلفون ويدخن وضليت أتگلب ولازمه بطني وتالي غفيت ما أعرف شكثر مر وقت اني نايمه بس أحس بوجوده يمي وأيديه تتلمس جسمي وفزيت من ماي بارد لامسني مروان.
مروان كومي لحمام أسبحج جسمج صاير جمر
أسيل لا ما يحتاج استحيت منه لن الشهريه نازله نوب يسبحني هسه اخذ بندول أصير زينه.
لا گومي
ما أستمعلي أخذني الحمام نزعني ملابسي وأني مستحيه منه مروان خليني أني أسبح
ماشي بس بردي جسمج زين أني يم الباب أنتظرج
هزيت?اسي وطلع ولزمت بطني يمه وجع يموت سبحت وشلت ملابسي وطلعت اخذني الغرفه وجابلي العلاج شربت كعدت وهو صافن بوجهي نزلت?أسي وگال.
شبيج أسيل.
ما بيه بس الشهريه نزلت وتعبانه
ماشي أرتاحي هسه أجيج.
لبست ونمت وانوب صرت نار حراره كامت تطلع من وجهي ومر وقت ودخل تلمس كصتي
مروان ولج صرتي نار حتى العلاج أخذتي ما فاتجج اوكفي أصيح لامي نوديج المستشفى.
أسيل مشه وصاح على عمتي وصعدتلي خطيه خايفه واني لازمه بطني وكاتمه الوجع بدون صوت
وصال أسيل بنيتي شنو اليوجعج سوده عليه.
أسيل عمه الشهريه نزلت يمكن لهل السبب خطيه كامت جابتلي عبايتي لبستني وذبيت الشال على شعري بأهمال ونزلنا بس كوه امشي دايخه ما متوازنه سندني وطلعنا المستشفى وصلنا كبل مغذيات وابر واني دايخه وهما يمي ومروان عيونه تراقبني وشفت الخوف بعيونه عليه واجه لزم كف أيدي وعمتي باوعتلي وأبتسمت شد عليها واني كذلك.
مر وقت اجه الدكتور بأيده أوراق التحاليل
الدكتور أسيل شلونج.
أسيل الحمدلله مروان صار كدامه والدكتور باوعله
الدكتور أختك
مروان لا زوجتي.
الدكتور اسيل ليش هامله نفسج دمج نازل صاير 9
يحتاج أهتمام بالتغذيه وهسه نكتب الچ على علاج
أسيل انطه الورقه ل مروان
الدكتور من الصيدليه الخارجيه.
مروان أي
الدكتور عليج العافيه أسيل.
أسيل ما جاوبته ومروان باوع لعمتي وطلع وتقربت يمي مسحت على شعري بحنيه توقعت تفتح الموضوع بس ما حجت ضلت ساكته وهمزين ما حجت مالي خلك واني كافي عليه صحتي اذا خسرتها شحصل بعد.
جاب العلاج وطلعنا للبيت وگبل نمت كعدت على صوته يحاجيني فتحت عيوني بوجهه رأسي فارغ
مروان اسيل عيني أكعدي كافي نوم
وصال يله بنيتي علمود تأكلين ومروان شوه الج معلاك يله كومي ونفضي نفسج تضلين نايمه الصخونه تنخر عظامج موزين النوم هواي.
أسيل كعدت رحت غسلت ورجعت كاعد هو وعمتي يحجون من وصلتهم سگتوا قدموا الصينيه گبالي كلها مشويات وخضروات وعصائر طبيعيه أكلت وجنت جوعانه وهو گبالي شهيتي أنفتحت.
مروان بالعافيه بعد منا وهيج الأكل مالتج كله مشواي.
وصال أسيل سباعيه يله اني انزل اذا احتاجيتوا شيء بس صيحولي.
أسيل نزلت وأخذت الصينيه وياها كمت غسلت ولاحظت ملابسي ماكو باوعت شفت ناشرتهن غاسلاتهن هنا والجرجف الجربايه فدوه رحتلج عمه.
رجعت شافني حسيته يريد يحجي وياي تهربت منه وكف كدامي
مروان الأفكار اللي برأسج طلعيها والتفتي على نفسج لن ماكو شيء منها واني ما جان عندي علم بجيتها وحالي من حالج متفاجئ لهذا الموضوع يرجع ينسد وما ينفتح نهائي فهمتي عليه.
أسيل عادي أحجي وياك بهل الموضوع وبعدها نسده ما نحجي بي
شنو أبالج
بعدك تحبها
أسيل ماله داعي عوفيلي الأسئله تحبها وتحبك شيء صار من الماضي وخلص
لعد ليش عزلت نفسك عن الكل.
اظن ما ضايقتج بشيء لا أنتِ ولا غيرج
اي بس
خلص أسيل انهي الموضوع
ماشي مثل ما تريد
أي عفيه عليج هيج أريدج يله اني نازل اذا تشوفين نفسج زينه نزلي يم ازهار.
ماشي طلع وصفنت على كلامه ليش يتهرب من الأجابه معقوله لحد الأن يحبها ويحن ألها وأني شنو موقعي من حياته وقلبه نفضت نفسي وأحاول أتخلص من الأفكار اللي ساكنه?اسي ساعه أكول يحبها اكيد بعده هذا الشيء منتهين منه وساعه اكول أحتمال يتواصل وياها ويعرف بيها تجي ودخل سلم عليها هي وامها وأختها وكل هذا تمثيل كدامي شلون بإفكاري كمت ما اميز بكلشي عقلي لطشش.
ومر كم يوم صرت احسن الحمدلله وضعي ممتاز وتنظفت من الشهريه وضيمها كل شهر نزيف بسبب الأكياس الدمويه دمرتني وكل هل الايام المرت هو زين وياي ويروح ويجي المعرض عمار الصبح وهو يروح العصريات لن نومة الصبح ما ينطيها ل 12 يله يكعد عاد يتغدى ويطلع لشغل وصاروا هو وعمار على المعرض أستلموا بس عصام مكتفي بوظيفته ومنعزل وبحكم دوامه والتزامته واجتماعته أقوى من مروان.
كاعدين وعمار جان موجود ومروان يتصفح بالتلفون وباوع على عمتي وصال وحجه
مروان أبويه شوكت يرجع
وصال يم بيت عمك فاضل ما ادري ما گالي
عمار ليش صاير شيء تسأل عليه لن هو هم سألني عنك
مروان لا ما صاير شيء هيج سألت عنه.
أسيل ضلينا كاعدين وهو ما شارك وحسيته منتظر عمي وأسيا اخذت أطفالها وراحت نامت وازهار كذلك عينها بالتلفون واخذت بنتها واني هم صعدت أخذت ملابسي وسبحت رتبت نفسي وسرحت شعري بقيته مفتوح بطوله على أنحاء خصري وتعطرت وعطرت الغرفه ولبست ثوب نوم فاضح وعليه روب وحضرت كرزات وفواكهه واجباس ورتبت السهره وشغلت التلفزيون على فيلم وطفيت الأضويه بقيت فقط أنارة شاشة التلفزيون منطيه جماليه وهدوء للغرفه.
بقيت كاعده أباوع الفيلم وأنفتح الباب ودخل ضل يباوع ورجع ركز نظره عليه وقفل الباب بس طگة المفتاح سمعتها وخله تلفونه على الشحن واجه تقربلي خله برقبتي ضل يبوس على الخفيف بهدوء ورومانسيه بقيت صامدة وبعدها أبتعد اخذ الكرزات وقدمتله فواكهه واخذ من أيدي ويباوع الفيلم.
مروان خوش فيلم بس يحتاج حضن عميق
أسيل وكل اللي يباعون الفيلم لازم حضن وياه.
واني شعليه بالكل عليه بس أني وياج يله تعالي ليش بعيده عني شنو مستحيه لو تردين عزيمه واظن الحظر خلص واليوم أشوف شغلي.
لا ما خلص
مو عليه يله تعالي لحضني.
كمت تقربت وسحبني واخذ شفايفي وجان حيل مشتاقتلي من خلال لمساته وحنيتة المفرطه وأمتزاج الروحي والعاطفي اللي هو يخلق الجو بتفاعله بس اني متناقضه واللي صار حيل أثر على نفسيتي وتشوش عقلي صرت أحس ما مستقره وجذوري مو ثابته.
نومني بحضنه ويلعب بشعري بهدوء واني أباوع الفيلم هو يشم بشعري وحاضني من خصري الى أن استقرت وأنتظمت انفاسه عرفته غفه أنداريت نايم سحبت نفسي طفيت كلشي والغرفه صارت ظلمه ورجعت حضنته وكملت النوم واني حاضنه روحه.
مرت الأيام طبيعية وحلوه وهادئه رجعت حياتنا أستقرت الحمدلله وهو ملتحق لدوام واني كل وقتي اخلصه ويه عمتي وأزهار نسوي كبه وبورك سمبوسه ونجمد وحتى كليجه سوينا ترسنا المجمده حيل اتونس بهل الأجواء العائليه بس أسيا قليل نشوفها بس وقت الأكل لن عصام نزل ما يطلعون هو ومرته وأطفاله وبالليل يطلعون يتعشون برى ولوقت متأخر يلة يرجعون الله يسعدهم عائله كلش حلوه.
كاعده اخبط كيكه وأزهار هي وعمتي يلفن الكبه جريش عمي طلبها ما يحب مالت التمن واجتي أسيا
ازهار واخيراً طلعتي من المملكه مالتج همزين شفناج شدعوه عليج من يجي عصام تفصلين عن العالم كله
وصال ليش بس هي تفصل كولي على أخوج هم حاله من حالها أدري بلابل الحب عرسان متزوجين جديد شسالفتكم تعالي انطينه الخلطه السحريه شتسوين ل أبني تخلينه مكابلج ويباوع على طولج
أسيا سحر بطيب رحماني.
وصال وشنو هذا أسمه مسويتله سحر خرب بيومج.
أسيا والله عمه ما مسويتله شيء هو من زمان ما نازل ومشتاقلنا واحنه كذلك وشوق متبادل وعميق اهم شيء العمق
وصال عوذه من لسانج الواحد يتورط يحجي وياج
أزهار لا كلنا ندري عصام يحبج
أسيا عيني وماي عيني هو فدوه لطوله فدوه لعقله خرب أشتاقيت الهرمونات هاجت رايحه عليه.
وصال لاتأكلينه
أسيا والله مالتي أكله أبقي بكيفي
وصال دولي تأكلينه أنوب
أسيا فديتج وفديت بطنج الجابته.
أسيل ضحكنا عليها وراحت وكملت الكيكه وأتصلت عليه وجاوبني حبيبي.
مروان هلأ وغلأ هلأ والله شلونج عيني
أسيل الحمدلله تمام وأنت
الحمدلله أي شتسوين
كيك
كيك يسوي كيك وين صايره هاي
خجلتني بكلامك الحلو
أغرق بخجلج أني أعشقه أدماني
ضليت ساكته
شايفه هسه اذا أخليج بحضني شيصير بيه لج شگو تعب بجسمي ينزاح بلفت ايدج على صدري.
شوكت تنزل
ليش أشتاقيتلي
أي
فدوه للخجلان أبوسه وأضمه بحضني
حبيبي
ها عيني
سويتلك گلشي تحبه ترسنا المجمده.
أهم شيء الكبه
سويتلك گلشي تحبه
عشتي عشتي معدله أنتِ
مريتك بعد
كفو والله
فدوه
بعدج تنامين يم أزهار
أي ومتونسه بنتها تعلقت بيها وتعودت عليها
دزتلي صورها حيل مشتاقلها أي وبالنهار تروحين الغرفتنا
أي بس بالليل انام يمها
ها ماشي اي الباقين وين
عمتي وازهار جاي يسون كبه لعمو كمال واسيا وعصام والجهال بالمملكه مالتهم
هذول عشاق المملكه منتهين منهم
تدري حبهم كلش حلو ما شاءالله عليهم وعصام شكد يحب أسيا.
أي.
سگت مروان أنتَ وياي
اي وياج يله بعدين اخابرج أني أتصل ماشي وعوفي تلفون أمي
ماشي عايفته باي عيني
الله وياج.
أسيل أنتهى الاتصال ورجعته على الشحن وكملت شغلي عمه الكيكه راح أعوفها برى تبرد وأصعد أسبح.
وصال هذا هو بنيتي عاشت أيدج خليها اني اقطعها وأخليها بالثلاجه روحي سبحي خاف مروان ينزل اليوم تعبتي كومه أشتغلتي.
أسيل لا عمه شمسويه قابل واتونس بالشغل أبتسمتلي بحب ورضا وصعدت غرفتي واخذت ملابسي ومنشفتي ومشيت وغرفة عمار جانت مفتوحه عرفته اليوم موجود اذن باليل بايت أهنا لن هو العاده يبات بيت عمي فاضل.
دخلت وقفلت الباب من داخل اني واثقه منه بس أخاف من مروان اخاف ينزل لن دائماً أسأله شوكت تنزل ما يگولي ولا يبلغ أحد بنزوله هذا الشيء ما احبه بي يجي فجأه.
سبحت وكملت لبست ملابسي ولفيت شعري فتحت الباب مديت?اسي ماكو احد بس باب غرفته مفتوح ركضت الغرفتي الباب ضل مفتوح ما مقفول وكفت امشط شعري وأنفتح الباب وفزيت عمار.
عمار مروان اجه لو بعده
أسيل لا بعده
عمار بس علمود المشفر اريد اشوف مالتكم.
أسيل هاا ما اعرف بهل السوالف والله مروان يعرفله هو يخلص هو يجدد الاشتراك.
عمار ماشي.
أسيل گبل دخل وراح على التلفزيون ولبسه مو نظامي برموده وكيمونه صدره كله عاري وتداركت نفسي بدون شال جريت المنشفه خليتها على شعري وفتحت الكنتور عالسريع و طلعت شال لبسته وكفت يم الباب وأندفع وانضربت بي على خشمي رفعت?أسي مروان!
مروان أي مروان!
أسيل دفعني وطفر من الجربايه على عمار وضربه بوكس وكام يعيط عليه بكل علو صوته
مروان شتسوي بغرفتي يا خسيس والله الأ أشرب من دمك اليوم والله لك ساقط شمدخلك لغرفتي.
أسيل سحبه وطلعه بالصاله وعمار يريد يفهمه مروان ما ينطي مجال ونزلت ركض عمه لحكي عمار ومروان تعاركوا فدواتج لحكيلهم.
وصال ولج شگوو يا ساتر هسه نزل بعده نفس ما مأخذ شسويتله.
أسيل عمه فدواتج مو وكته الحجي صعدي عليهم متعاركين بينهم وسمعنا صوت عمار رج البيت رج
عمار أنجب لك ماكو ساقط غيرك شايفني أبن شوارع تحجي هالحجي المنحط مثلك يا خزي.
مروان اني أعلمك أشوف السقوطيه على اصولها اني ساقط مو اني ساقط لك هو ماكو شريف غيري اني.
أسيل وعلى صوتهم طلع عصام دفعنا من يم الدرج وصعدلهم وكلنا وراه وعمار ضرب مروان بوكس الا الدم طفر من خشمه وكف مروان مسح خشمه
وعصام وكف بينهم وصاح بيهم
عصام شنو هالخبال أصغار أنتوا واحدكم بكد الثور تتعاركون وصوتكم واصل لسابع جار فضحتونا شنو الفاظ والغلط البينكم.
عمار والله گوله هالحجي اني ما عندي أي مشكله بس حضرته يتهمني ويشكك بيه ويه مرته اليسمع ويشوف اللي سواه بيه يكول لاكيني نايم ويه مرته
مروان لك شتحجي أنت لك ساقط احجي عدل لا قسم بذات الله اطلعك منا محمل لو مو تكون اخوي ثمن حجايتك كبل لاتحجيها لو رحت بالخارج وتطبعت بأطباعهم وتغربت ونسيت اصلك وفصلك وشرفك يا عار يا خزي.
وصال أكل وأنجب ولا تضل تلوص بكلامك عيب عليك شايف عليه وهيج تحاجي اخوك وماكو عار وخزي غيرك تظن بعمار بالموزينه ولك بأخوك من طاح حظك من بين أخوانك أنت وعقلك الوسخ.
أسيل عصام سحب عمتي وكام يحجي عليها
عصام شنو هالغلط شگو تغلطين عليه صغير هو بعدين أنتِ أفتهمتي الموضوع گبل شگلتي على الخط وكمتي تحجين غير نفتهم منهم شبيهم.
وصال لن اعرفكم شنو وأعرف تربيتي كلش زين ما تطلع منكم العايبه بس كول هو ما عرفت اربي عدل وعقله وسخ كام يشكك بأخوه.
عصام يمه ل أهلج سكتي منو جايب طاري التربيه هسه نبصتيها بالنص خل نفهم منهم شبيهم احجي مروان
وصال لا خل عمار يحجي.
مروان يمه أنتِ شبيج گبل كمتي تغلطين عليه وما عرفتي أساس الموضوع شنو بس أكولج هذا الثور اللي دزيتوا للخارج يكمل دراسته والله ما عاجبني ادرس بالعراق محسسني العراق ما بي جامعات ما بي تدريس بس بالخارج.
عمار وأنت شعليك ليش مغثوث وحارك حمامك.
مروان على شنو انغث حبيبي اني درست بالعراق بلدي بتعبي والحمدلله مو مثلك كمت تتعالى على بلدك ونطحت ر?اسك الا تتدرس بالخارج ورحت للخارج كلنا ميخالف فلوس أهلك هوايه وأنت الغالي المدلل بس شوف لك مال ترجع وتنسى واقعك عاداتك وتقاليدك وتتطبع بإطباع الغرب لا هاي ما ينسكت عنها.
وصال وأنت شعليك بي شنو يمشي حياته على كيفك لو أنتَ المسؤول ولي أمره والله خوش.
عصام من هذا الحجي هذا كله أساس المشكله شنو من عدا ملابسك المنتفه شمصخم بعد
وصال شنو أنت هم ضد أخوك
عصام يمه رحمه ونور تنزل على أجدادج سگتي خليني افهم شمصخم أنتِ شوفي شنو لابسلي
مروان لا والبيت بي جنايين عمي مو زوجتي نكول بنت عمه ليش أسيا لو عادي عدكم يفتر بينهم وهو كراعينه طالعات وجسمه عاري وداكلي وشم مراهق عود شخصيات مافيا وكذا من عليك أنت ولبسك واطباعك
عمار گافي عاد سگتلك بما فيه الكفايه.
مروان غصباً عليك تسكت وتنجب لعد شمدخلك لغرفتي بلا لو اعزب ميخالف بس هسه اني متزوج شگو تفوت لغرفتنا وزوجتي موجوده لو عادي عندك ونسيت اصلك عراقي وصرتلي اجنبي ملشتح خاف عبالك أطباعك مالت الغرب تمشي عليه اشرب من دمك الخايس والله لك اني دمي عراقي حار وساعة الشفتك بغرفتي وبهذا لبسك طلقه وانفضها براسك يا ساقط.
أسيل بعد ما مروان سگت عصام تقدم ضرب عمار ونفضه من ملابسه عجنه عجن وعمتي تتوسل بي.
عصام شنو هذا اللي سمعته من مروان أحجي شنو هذا السمعته شمدخلك لغرفتهم شمدخلك وبهذا لبسك
عمار كلكم عليه وعقولكم الوسخه بكيفكم تفسرون وتظنون عمي ما عندي شيء والله العظيم عادها مثل ازهار ودخلت اشوف المشفر هاي كل السالفه هو دخل كبل هجم بدون ما أفهمه يعني كل عقلك عندي شيء وياها مخبل عاقل
مروان لك أسكت اسكت.
عصام لحظه مروان لحظه شوف لك أنتَ من رجعت لليوم ما عاجبني وكل تصرفاتك ما داخله?أسي لبسك والوشوم على أيدك وطلعات وطبات لتوالي الليل لو ترجع لو تبات يم عمي وما شاءالله سيادة الوالد منطيك مطلق الحريه بكيفك توصل وتجول عمي عيش حياتك منو مانعك بكيفك بس بداخل البيت وعلى العرض والشرف أعدمك عمار اعدمك بنات العالم مستورات وبيهن تطلع مكشفه وبيهن تدخل الحمام وانت فالتوا واضح من لبسك متغرب صايرلي أجنبي اخذ سلابتك وطلع برى البيت ما الك كعده بهذا البيت أنت ما محترم والما محترم روحه ما اله مكان بيتي برى.
وصال وين تطردونه منو سمح الكم البيت بيت ابوكم هو يطرد ويبقي بكيفه مو بكيفكم صرتوا عليه اثنينكم وهو واحد جان استحيتوا على شواربكم من ورى سالفه ما تسوى تعادون أخوكم وتطردونه من البيت وهو كظه حياته بالخارج هسه اجه يريد يستقر توليتوا مثل الذياب.
عصام يمه
وصال وجعة ابو أمي عبالي تطلعلي عون طلعتي فرعون وكفتلي ويه اخوك بنص عقل.
مروان ليش بنص عقل شبيه.
عصام يمه اكذبكم كلكم ومروان ما أكذبه اخوي واعرفه كلش زين حافظه يمه حافظه وبعدين الغلط راكب عمار من?اسه لرجليه وهذا هو كدامج خير دليل امشي غير لبسك لا اشكهن عليك.
عمار هذا هو طالع ومخلي البيت الكم ولعقولكم الوسخه وافكاركم المنحطه جيل متخلف ومدمر
أسيل رادوا يهجمون عليه وعمتي وصال منعتهم وعمار دخل الغرفته وركع الباب بكل قوته
عصام اجي أكسسسسر الباب على?أسسسك.
وصال ليش متكسسره على?أس الوراك هم الغلطان شلون يشك بأخوه من دمه ولحمه جان أستحى على شواربه
مروان ليش اللي سواه مو غلط داخل بغرفتي وبهذا لبسه وأسيل بالغرفه أي واحد بمكاني ما يراضاها على نفسه.
عصام محد يراضاها يله گافي عاد
مروان عصام دخيل الله خليني أحجي
وصال احجي منو لازمك وشتحجي بالله تتبلى على اخوك مو حلفلك وگال اريد اشوف المشفر شگو بيها جرم لو كفر وهي بنت عمه ليش عقلك يفكر بالموزين.
مروان يريد يشوف المشفر ينتظرني اجي ويگولي مو يفتح الباب ويفوت ليش ما تكولين عمار غلطان ترجعين على مروان وتذبين الغلط كله عليه شنو ما عندي عرض ما عندي شرف مو من حقي يكون عندي خصوصيه لو الخصوصيه بس عند عصام ماشيه وكلكم صغيركم كبيركم يحترمها ويا ويله اليتعداها لن هذا عصام مو مروان اليحجي حجاية الحق تزعلج لو أسيا جايبه من ربها خبز واسيل بنت شوارع ياهو يفوت غرفتها ويتعدى حدوده وبنت عمه على عيني و?أسي مو يفوت داخل الغرفه بهذا لبسه المخازي وهسه يله كوليلي منو الغلطان اني لو عمار گولي ليش ساكته.
عصام مروان گافي عاد وأنتِ يمه خفي عليه ترى عمار غلطان وأنتِ واكفه وياه.
وصال شكوو واكف تحاجيني ما تحاجي العاقل الواعي اللي متكذبه ودومك تصدك بي بس عباله الناس كلها مثله ونفس أفكاره الوسخه والمنحطه
لو بس نادر على عمار بس يصير خير يجي أبوكم واكوله على هالعمل هذا.
مروان شقصدج يمه
وصال شقصد قابل ياريت تنظف عقلك وأفكارك گبل لا أدمر روحك اليوم خسرت أخوك باجر الله يعلم تخسرمن.
عصام يمه شنو هالكلام ترى زوديتها ويه مروان
وصال يستاهل واحد مسقط بايع ومخلص قلة ما بين أيديه يرجعلي على أخوه.
مروان مسقط وبايع ومخلص مو ليش أني ابن منو مو أبنج شيء أكيد تربيتج واطلع مسقط خوما من كيفي صرت مسقط.
وصال أي من كيفك من كاعك من هواك أنت مسقط اني ما ربيت واحد مثلك وهذول أخوانك وياك شو ما طلعوا مثلك وصلت بيك المواصيل تشك بأخوك من دمك ولحمك ويه مرتك من جان أستحيت يا يمه بس أنت من يومك عال گلبي بسوالفك بعدك تمشي وأنت مررمرني مو عاد
هسه كبرت وتزوجت.
مروان رحمه الله والديج يمه بس اني ما شگيت بأخويه ولا يمكن أشك بس منظره وهو داخل غرفتي بهذا لبسه المخازي ما تقبلته.
وصال لا شگيت لن أعرف شگو بعقلك من أفكار وسخه وقذره!
عصام يمه رحمه للاسلام گافي عاد شنو هالحجي هذا، ششايفه عليه وهيج تحجين گافي فضينا عاد.
أسيل باوعلي بنظرات نص عمري راح جوه الكاع عمتي عبرتني ونزلت سريع وعصبيه وعصام وازهار واسيا وراها گبل دخلت الغرفه متت قهر ليش عمه ليش ليش حجيتي هيج مو أمنت بيج وحجيتلج ليش تسمعينه كلام واندفع الباب وفزيت بخوف خفت منه يضربني بس قفل الباب واني ارجع ليورا وهو يتقدم لعندي وسحبني من ايدي وقربني اله وگال
مروان أسيل أنتِ حاجيه ل أمي
أسيل باوعت بعيونه بيهن دموع بجيت ونزلت?اسي وضغط على أيدي وصاح بيه.
أحجي حجيتي ل أمي مو.