رواية بين قلبها وعينيها كبرياء للكاتبة شمس العراقية الفصل السابع والخمسون

رواية بين قلبها وعينيها كبرياء للكاتبة شمس العراقية الفصل السابع والخمسون

أسيل ضليت ساكته وبإصعب المواقف كلشي بيه مو راضي يتكلم شعور صعب مميت خسراته كدام عيني ندمت مليار مره من حجيت وفضحت سرنا كدام أمه وأخته ورجع صاح بيه وضغط على إيدي وأهتضمت رفع وجهي من حنحي وباوعلي وگال
مروان ما تحجين.
أسيل ما عندي شيء أحجي وما حاجيه لأي بشر
متأكده!

أي متأكده مسحت دمعتي وبينت كدامه القوه ومن داخلي ضعيفه وهشه بس أحاول قدر الأمكان أنفض روحي علمود لايشك اني حاجيه لعمتي وصال ضل مركز نظره عليه كأنما يحاول يفهم كذبي عليه
كذابه والله العظيم تكذبين
ما مجبوره أكذب عليك.

لا والله تكذبين ومتأكده مليار بالميه حجيتي ل أمي لن أمي وأعرفها ما تحجي كلام عبث والا شنو يُجبرها تقسي بالكلام وتسمعني وتهيني كدام أخويه يعني لوما تعرف باللي صار ما ذبت كلام وحتى عصام أستغرب كلام أمي عني وگالها ششايفه عليه وهيج تحجين أذن أمي عدها علم لن قساوة كلامها دلاله على أنه هي تعرف بكلشي مو
لا وگتلك ما تعرف وليش أحجيلها وهي أمك شيء أكيد تأخذ نظره مو حلوه عني
عوفيلي النظره هسه
عافني ورجع باوعلي.

أسيل أحلفي!
ليش أحلف على شيء أني ما حاجيته
أسيل أحلفيلي.
مروان ما مجبوره أحلف جاي أكولك ما حجيت سرنا شبيه متخبله أحجي لأمك مشيت أحاول أتهربت من نظراته ولا أضعف كدامه وابجي جرني وقربني أله وأيده ضاغطه على لحمي أيدي مروان جاي تأذيني.
تحلفين لو لا
غَمضت عيوني وفتحتهن بعيونه وجاوبته والله العظيم ما حاجيه لأي بشر وبعدها سگتت حلفت كذب ينكسر ظهري فوك ماهو مكسور رخت أيده وعافني وباوعلي ورجع گال.

ما أصدك بيج أنتِ وحدة كذابه وراح اتأكد بطريقتي وأذا تأكدت ولو متأكد بس أريد أسكت الأحساس البداخلي يصرخ بيج وبإسمج ويكولي صدكها لاتظلمها لج أنتِ دخلتيني بتحدي ويه أحساسي اكذبج لو اكذبه وأصدك بمنو ولو أنتِ جذابه.
دفعني وطلع مروان وطلعت وراه وگف يم الدرج وعمتي كبالي واكفه هي وعصام وأزهار وأسيا وتحجي بعصبيه وهو وكف ما نزل لن كلامها جان قوي.

وصال عباله أخوه مثله نفس قذارته واحد عقله وسخ ومنحط وكل تربيه ما عنده كلما اكول يكبر يصغر مثل بول البعير طايح الحظ تشك بإخوك يا سافل حرك دمي هالأدبسزز.
عصام يمه گافي شنو هالحجي عيب عليج شتعرفين أنتِ وهيج أنفجرتي عليه ترة ماكو هيج قابليه غلط غلط وصارلج ساعه تهينين بي كدامنا وأني ساكتلج فحمتي گلبي شبيج لخاطر الأسلام سگتي عاد سگتي فوك غلط عمار واكفه تحجين.

علي مروان رجال من حقه ما يقبل أحد يتعدى حدوده تجين أنتِ تصيرين ويه الباطل ضده.
أسيل مروان واكف ويسمع الكلام وباوعلي كأنما يگولي خلص تأكدت لن عمتي أبداً ما سگتت وهالشي أكدله وثبتله نزلت?أسي ورجع صعد وسحبني من أيدي ودخلني الغرفه وقفل الغرفه.

مروان وصلت بيج المواصيل تجذبين عليه أسيل وتحلفين الله جذب يعني فوك شينج كواة عينج وبكل صلافه باوعتي بعيوني وما خجلتي ولا أستحيتي ونكرتي وجذبتي أنتِ ما حاجيه لأي أحد.
أي ما حاجيه صاح بيه
وبعدج تنكرين ولج جذب لاتجذبين أسسيل
هزيت?أسي وبجيت وعاف أيدي ويفرك بوجهه بسرعه ولزم?أسه ويفتر بالغرفه مثل الدايخ الضايع الحاير شيسوي شنو يتصرف ورجع تقربلي.
خلي عينج بعيني وجاوبيني
مروان.

أسيل خلي عينج بعيني وكوليلي ليش حجيتي وكسرتيني ليش غدرتي بيه ليش حجيتي سرنا ليش
ما كسرتك والله بس جنت بلحظة ضعف ونفسيتي تعبانه والفتره المرت أنتَ جنت قاسي عليه وتضربني وأمك وأزهار صعدن وشافن أثار الضرب وسألني وحجيت الهن.
يا حبيبي يا حبيبي يا حبيبي
مروان والله.

ولج من اخذج الله ولج الله بري منج ومن أفعالج يعني طلعت مو بس أمي تدري لا وبعد ازهار وشيء اكيد أسيا هذا الشي منتهين منه لن اسيا هي وأزهار سرهن واحد واسيا متضم حجايه عن عصام اكيد كالتله يعني العائله كلها تدري باللي صار.
لا أسيا ما تعرف
أنتِ فاضحتني شاهرتني كدام أهلي ليش ولج ليش
جنت محتاجه أحجي وأفضض
سكتي لج سكتي هذا مو عذر وذبحتيني دومج محتاجه تفضفضين اليسمعج يكول أمارسين عليج كل التعنيف الأسري.

لج شغله وحده اريد أعرفها أنتِ ما تردين الستر لو شنو الضبط لج فهميني راح تخبليني وياج عقلي وگف خلاص قفل.
يعني غلطتي وياي والله ستر عليج ورجعت اني سترت عليج وطممت خياسج وخياسي وياج بزواج وكلت ميخالف عمي طفله مراهقه ما تعرف نفسها غلطت واني هم الصوج مني المفروض ما اصدك بيج مطلقه وعمرج 30 بس اني قشمر انضحك على عقلي.

وكل هذا وتزوجتج وكلت ميخالف بنت عمي صغيره وبعدين وضحتلي الصوره عن أهلج وعرفت الأساس شنو كلت كافي يا رجال لاتضربها جاهله ما تفهم ولاتعرف بنفسها شتسوي ولا اكو احد ينصحها ويرشدها ويعلمها الصح من الخطأ أخذها على كد عمرها وعقلها وعلمها ووعيها وارشدها لما تجي لطريق وتهتدي وتتعلم.
يحجي واني ساكته.

لج بكل الأساليب أجيت وياج ضرب وضربتج قساوة وقسيت عليج غلط وغلطت فشار وفشرت تعلوم وعلمت كلام وحجيت ونصائح ونصحت وأكدت وگلت إلج أسيل لاتأمنين بإحد لاتثقين بإحد لاتحجين لأحد كلت لوما كلت
گلت
أي وأنتِ شسويتي التزمتي لا، عفتي مروان وكل اللي سواه علمودج ولمصلحتج رحتي كلتي ل أمي عن غلطتي وياج وغلطه من غلطه ما تسولف ولج ما تسولف احجيها لمخبل عقله يرجعله لج ما أستحيتي من حجيتي ل أمي
من حجيتلها هي تفهمتني.

وأزهار هم
أي.
ليش أستصغريتني كدام أمي وأختي وما كفاج وأنوب زوجة أخويه مره غريبه صغرتيني كدامهن
بس كوليلي شلون اخلي عيني بعينهن.
مروان عفيه تفهمني وهما أهلك مو غربه.

أهلك! وليش أنت لعد ما حجيتي ل أهلج وأمج من صُدك أنتِ وحده صلفه وما تردين الستر لو تردينه جان تعلمتي جان سمعتي كلامي وخليتي ترجيه بإذنج جان التزمتي بنصائح مروان جان كلتي مروان وصاني واكد عليه اقل شيء الغرفه اليوم والي صار جان تكدرين تقفلين الباب وأنتِ طالعه من الحمام اكيد عرفتي أخويه موجود لو صدك تخافين مني وحاسبه حساب لكلمتي جان التزمتي بس أنتِ ما تخافين من أي أحد لا مني ولا من غيري وزدتيها وصخمتيها من جذبتي وبقانون الجذب اللي يجذب كلشي أتوقع منه يسوي.

أنتَ بعمرك ما راح تفهمني دومك تظلمني
ولج أني أكثر واحد فاهمج ولوما فاهمج جان ما أعتبرتج زوجتي وبقيتج على ذمتي وگلبت الدنيا على?أس أخويه وسويت مشكله شگدها شگبرها.
بس أنتِ مشكلتج ما تردين تتعلمين مأخذه الحياة والناس بعاطفتج وراكنه دماغج وعقلج موقفتهن واني بشر تعبت لهنا وگافي عجزت وياج شسويلج بعد أكثر من هذا وبعد ما عليه بيج ولا ألي شغله شتسوين سوي أسحب نفسي منج وأريد أشوفج وين توصلين.

كمل كلامه ومشه واني منزله?أسي مسحت دموعي وفتح الباب بالمفتاح وقبل لا يطلع رفعت?أسي عليه وباوعلي وگال
وهذا أول غدر أجاني منج سهم ونبتي بنص گلبي
طلع وعاف الباب مفتوح وأحس گلبي يريد ينفجر ركعت الباب بكل قوته وصرخت بعلو صوتي الله يأخذني وأخلص من هالحياة الله يأخذني.
وكعت بالكاع وبجيت دمرت نفسي وصلت روحي لهلاك وأخر شيء عمتي وصال الأمنت بيها فضحت سري ودمرتنا اني الأمنت ووثقت كل الصوج مني.

بقيت كاعده وهو ما بين بعد تالي كمت لجربايه ونمت وروحي نار مشتعله بيها وكلامه ب?اسي مروان اني تعبت أكثر ما أنت تعبان وأثنينا تعبنا.

أزهار كل هل الأيام المرت هو يحاول يتواصل وياي بس أني مانعه ورافضه خط التواصل قطعاً أريده يعرف قيمتي مو بهل السهولة يتنازل عني ويريد يرجعلي وكأنما شيء ما صاير ويتصرف طبيعي مستحيل هل الشيء وبقيت على موقفي صامده وتلفوني غالقته وكلما أفتحه الكه منه أتصال مرتين وثلاث واتجاهله وأخر شيء شاف الوضع مو مال أتصال لن يعرفني ما أطخ خشم وما أنزل?أس دزلي مسج وكاتب بي.
هشام راح أجي اخذج تحضروا.

أزهار لاتعب نفسك ما اروح وياك باقية بيت أهلي
ولشوكت تبقين بيت أهلج شوفي راح أتصل وجاوبيني لن الكتابه ما تفيد ولو الأتصال هم ما يفيد لن هشام ما كادرلج.
اليسمعك يكول شالعه گلبه شمسويتلك بابا
أزهار
ها هشام وأتصل وجاوبته نعم
هذا الطبع غيري ولا تستخدمينه وياي
يا طبع وليش أغير من أطباعي منو يستاهل
محد يستاهل مو
قدمتلك الا بزعت والأخير شسويتلي تنازلت عني وعن بنتك هو هذا حبك اليه والخبصتني بي.

ما تنازلت وساعة شيطان جنت تعبان وضايج وأنتِ ما تتفاهمين وصارت بوجهج.
خوش أعذار مقنعه ولازم أصدك
أزهار گافي عاد ترة مو وضعيه صارلج شگد يم أهلج ما طلع أربعين هذا كاعده يمهم وأني حالي بالضيم ملابسي وسخه وما مكويه ارجع لكمه ماكو اتسمم بيها والغرفه فارغه عبالك كاعد بكهف.

وشسويلك يعني والده وجاي أرتاح وأنت دبر نفسك أعتبر نفسك أعزب اكو مطاعم قيامة الله أطلب وأكل وبعدين كلشي اكو ومتوفر غسل وكوي وأكل ما يراد الها روحه للقاضي والأ ازهار يمك.
جاي تعيريني عود اطلب من المطاعم واني أهلي يهتمون بيه وأنت أخواتك ما مهتمات بيك مو هذا قصدج.
لا مو هذا قصدي وأخواتك ما مجبورات بيك كلمن يخدم نفسه بنفسه
أها
شگولك لعد.
ماشي أزهار.

شتريد هشام وين تريد توصل يعني جاي أحسسك تحج بإسباب علمود تنهي كلشي واكف على الحافه
لهل الدرجه هنت عندك
شدخلج أنتِ وليش أنهي كلشي ليش تربطين علاقتنا بالمشاكل اللي تصير
ليش المشاكل ما تأثر على علاقتنا غيابك وبعدك عني وعن بنتك أمك وأخواتك ولا واحد من أهلك وأقاربك وصل وتحمدلي على السلامه وباركلي هذن ما إلهن تأثير على علاقتنا.
وأنتِ شعليج بأهلي وبإقربائي عليج بيه وبس
وأنت وينك هم حالك من حالهم هم أبتعدت.

عندي شغل ليش بكيفي اني مبتعد وأرجع وما الكاج الدنيا تطلع من عيني تلفون ما إلى خلك الزمه والغرفه وملابسي وزقنبوت ماكو يعني وضعيه تزهك حتى الكافر شترديني أصير.
مشغول وتعبان تكدر ترتاح وتحاجيني مو تجي للبيت وتحاجي أمي من ورا خشمك وتصيح عليها والله أني ما مجبوره أغفر قساوتك بالكلام بعد ما أريدها لا هي ولا بنتها شنو نسيت نفسك شنو حجيت لو تريد ازهار تنسى وترجع وياك عادي مثل كل مره سامحي وتحملي.

ماشي ابقي لعد والكواد بعد يسأل عليج ويريدج
قطع الخط وشمرت التلفون وما صدك بسرعه تنازل أحتركت حرك من القهر فتحت التلفون فاتح نت عفته ورى دقائق نزل ستوري صورته وهو واكف يم سيارته كلش حلوه الصوره ومخلي موسيقى ضليت صافنه عليها واتمعن بيها أشتاقيتلك ولو تعرف شكثر أزهار تحبك جان ما زعلتني منك
وضليت كلما أفتح التلفون أباوع الستوري الى أن خلص موعده...

وبيوم كاعدين ونزلت علينا أسيل وصارت مشكلة بين عمار ومروان وصلت بينهم للموزينه وأنتهت بخروج عمار من البيت طبعاً بابا ما عنده علم
وهذا قرار عصام طرده وأظن هالشيء بابا ما
يقبل بي وبالأخص عمار يترك البيت الله يستر
. بس ما عجبني قساوة أمي بالكلام ويه مروان حيل أنقهرت عليه هواي جرحته وهانته وكلامها مبطن وحسيت مروان حس وشك لن هو ذكي ما تعبر عليه نزلنا وهو دخل الغرفته.
واكفين وأمي تحجي عاد عصام گال.

عصام أسيا أخذي الجهال وأمشي وأنتِ يمه گافي فدوه لعينج عوفي مروان هواي قسيتي عليه وعمار أني أبلغ أبويه بكل اللي صار ولا تذبين حطب على نار ويرجع على مروان خليني أني أفهمه.
وصال ماشي بس أريد عمار يرجع البيت لعد راجع من الخارج بعدني ما شبعت منه شوف تالي بالأخير تطردونه من البيت.

عصام محد طاردته ساعة عصبيه كولي يالله قابل متصير بمشاكل بين الأهل والأخوان يله روحي أرتاحي لا تضلين تقهرين بروحج أزهار ديري بالج عليها وكلشي ينحل يمي.
وصال ماشي إبني.
ازهار راح عصام وبعدنا واكفين نزل مروان وسمعنا صوت الباب أنسد قوي وأسسيل صاحت بعلو صوتها
وهو عبرنا بدون أي كلام وأمي ضلت تباوع وراه
وصال صعدي كوليلها أمي تريدج.
أزهار شتردين منها.

وصال أريد اسألها خاف تعاركوا لن أعرف أخوج رجع عليها والا ليش كامت تصيح بعلو صوتها وهو ما أهتم وطلع.
أزهار ماشي راحت الغرفتها واني صعدتلها ودگيت الباب أسيل أسيل أجاني صوتها بعصبيه
أسيل شتردين.
أزهار أمي تريدج نزلي.
أسيل ما أنزل
أزهار أسيل نزلي أمي تريد تحجي وياج أسيل ما جاوبتني أسيل عفتها ونزلت ما تنزل وعصبيه الظاهر متعاركين وواصله بينهم فدمره.

وصال عوفيها تنزل وأفهم منها شبيهم وشصار بينهم روحي على بنتج لاتكعد اني راح أرتاح تعبت
أزهار ماشي ماما خلص لاتقهرين بروحج بستها وتمددت وطلعت بس بالي يمها رجعتلها لكيت تبجي وتحجي ويه نفسها.
وصال سوده بوجهي ينكص لساني يمه ساعه الحجيت وغثيتك وقهرتك تنعمي عيوني يمه ولا أشوف ضايج ومقهور سوده بوجه أمك.

أزهار أنقهرت عليها تبقى أم وقلب الأم ماكو منه عفتها وصعدت لغرفتي لكيت بنتي كاعده رضعتها وضليت كاعده يمها وخلص هذا اليوم بإصعب مشكله خاص أذا كانت بين الأخوان
ثاني يوم الصبح كعدت على صوت بنتي كمت أسويلها ممه وسمعت حركه وصوت الباب انسد يعني طلعوا فتحت باب غرفتي وباوعت وشفت مروان لابس شنو يلتحق! نزل وهي ماكو والباب مسدود تالي رجعت يم بنتي رضعتها وعيني عليها بنظرات حزينه.

صارت العشره ودك المنبه وكعدت وشلت بنتي وياي وباب غرفتها مقفول اذن بعدها ما كاعده نزلت ورحت للمطبخ أمي وعصام واسيا والجهال يتريكون صباح الخير وكلهم ردوا صباح النور.
عصام يله اني طالع لاتتنظروني على الغده.
وصال وين رايح
عصام بيت جدي علمود موضوع عمار وخابرت أبويه وفهمته كال روح كدامي وهو يجي بعدين
وصال وشگالك يرجع.

عصام بعد ما حجه شيء بس ما راضي على تصرف مروان وكام يحجي يعني نفس موقفج هم يصير ضد مروان بس اروح أني واحلها وعمار غلطان.
وصال اذا دز على مروان وأجه لاتخلي أبوك يحجي ويقسي عليه فهمه بطريقتك.
عصام ماشي ما يحتاج توصيني عليه يله فيمالا.
وصال الله وياك أبني
أزهار راح وأسيا كامت تحمي الجاي يمه هم خابرتي مروان لن الصبح التحق.
وصال أي ادري بي أجاني الصبح باسني من?أسي وأعتذر مني عن كل اللي صار.

أزهار عيني هو والله گلبه طيب
وصال سوده بوجهي وجه سماد يحاول يضحكلي ويبين هو طبيعي وما زعلان بس مشه وهو ما عاجبني
أسيا يله عمه كولي يالله هسه خابري وأحجي وياه وتصير باأرقى العوائل ومروان أبنج وأنتِ أمه واذا حجيتي تبقين أم.
أزهار سگتت بس مقهوره وصبتلي الجاي وامي عينها على الدرج باوعت الساعه صارت ب 11.
وصال شوكت تنزل
أسيا أحتمال راحت عليها نومه عوفيها شعندج الها
اذا على الشغل هسه اني أكمله.

وصال لا يمتى أني رايده منجن شغل بس خل تنزل تأكلها لكمه على البارحه الغده ماي ما نزلت أخذت وهي شگوو عازله نفسها بالغرفه المشكله بيني بين ولدي ليش أخذت على نفسسها.
أسيا عمه أستهدي بالرحم?ن هسه تنزل خوما تضل نايمه ك?م أصعد شوف عمه يله حبيبي.
أزهار صعد ك?م وشويه ونزل.
ك?م بالحمام جاي تغسل ملابس
وصال هسه وكت غسل كومي صعديلها خل تنزل لاتوكع من طولها هي بدون شيء انفخ عليها توكع أنوب لا اكل لا شرب.

أزهار يمه عوفيها شسالفه تريد تأكل هي تجوع وتنزل حاركه دمج وأعصابج على شنو سگتنا وأسيا كملت غسل مواعين طلعت اللحم وراحت الغرفتها تنظفها ونزلت أسيل عبرتنا بدون كلام.
وصال شوفي ضل بيض بالثلاجه طكي وأكلي
أزهار ما جاوبتنا رجعت أكلب بتلفوني وحمت الجاي وشربته لوحده
وصال ليش ما طكيتي بيضه وأكلتي
أسيل بنتر ما جوعانه هي گوه.
وصال أني علمودج ما مأكله من البارحه كيفج لا تأكلين أزهار اخذي بنتج أكوم أطبخ الغده.

أزهار عوفي يمه أني اطبخ عنج
وصال أنتِ عينج على بنتج ما أريد منج.
أزهار امي كامت تطبخ وأسيل كملت وغسلت الكوب بعصبيه وامي سألتها.
وصال أسيل يمه جيس البهارات جبته هذاك اليوم وين خليناه شو ادور عليه ماكو.
أسيل وأني شمدريني.
وصال أزهار يمه تعالي شوفلياه وين اني الحاجه تضيع ما الكاها.
أزهار كمت دورته ولكيته وهي صعدت وأمي كملت الطبخ ورجعت تتصل عليمن تتصلين.

وصال على أخوج مروان ما يجاوبني ما تشوفين أسيل بلكي خابرته.
أزهار منين تخابره تلفونج مو يمج
وصال لا جان ضال بالمطبخ بلكي نزلت وخابرته بالي يمه ما مرتاحه حتى أيدي ما تأخذ على الشغله
أزهار هسه تجي ونسألها رجعت كملت الطبخ وما نزلت الا اذن الظهر وامي لازمه تلفون وگالت
وصال هم خابرتي مروان الصبح من راح
أسيل لاااا
أزهار أمي سگتت عافت التلفون وراحت تتوضأ أسيل تعالي كعدي.
أسيل أريد اروح أصلي.

أزهار بعد وكت هسه أذن تعالي أريد أحجي وياج
بشنو تحجين.
عيني شبيج تتنرين كاتلين أهلج
أزهار ما إلى خلكج.
أذا ما الج خلك وياي عادي بس أمي لا وبعدين شگوو تتنرين بوجهه وتحاجينها من ورى خشمج بكدج هي عيب عليج هالتصرف من الصبح لحد الان هي تسأل عليج أسيل وأسيل ومهتمه بيج اكلتي شربتي وتسألج على مروان وأنتِ كوه تردين وتتنرين بوجهه عيب بمقام أمج.

ترى ما حجيت شيء وياها وحقي اللي صار البارحه مو قليل عليه لا عبالج مرتاحه لهذا الوضع وقساوة عمتي بالكلام على مروان ما أنساها هواي جرحته وهانته كدام أخوانه وكدامجن وصلتله أنه هي تعرف بكلشي واجاني يحاسبني ويسأل والسبب عمتي شتردين مني أتصرف واني من البارحه نار بگلبي مشتعله.

نار بگلبج شگو وأنتِ شعليج بالوضع مشكله وصارت بين الأخوان وهما يحلونها ويتراضون أخوان وعيال بينهم وكل بيت تصير هالمشاكل وبعدين أمي حجت والما حجت وتقسي تغلط تضرب أمه أنتِ شگو بينهم أم وأبنها ليش تدخلين هو ما أجه
عاتبها ولا كألها ولا فتح وياها الموضوع بالعكس وأعتذر منها وباس رأسها يعني ماله داعي كلامج هذا.
شنو ليش أتدخل ترى اني مو عن شيء بس أقصد عن السر الحجيته الجن هذا الأقصده.

وشجاب السر بالسالفه كلها ليش تشبجين المواضيع وبعدين أحنه ما حجينا اله ولا هو أجه وسألني واني كلتله ولو جاي عليه سألني جان عرفت شلون أفر عقله وأقنعه وحتى لو سأل أمي جان كالتله اني دائماً من أعصب أحجي عليكم يعني نكدر نقنعه ونلفف الموضوع لاتخافين احنه ما نريده يعرف بينا احنه ندري لن صعبه عليه وعلينا
اي ما حجيتن اله بس كلام عمتي وصال وضح اله وشك هي تعرف شيء عن اللي صار.

أنتِ كلتيها شك بس ما متأكد ولا متقين واكيد سألج وأنتِ كلتليه أي يعرفن.
لا كذبت عليه بس كشفني
والله مشكلتج أنتِ ما عرفتي تجاوبينه أكيد ذبيتي كدامه دمعتين وفضحتي أمرج والزلم بهيج مواقف لو تبجين دم ما يرف گلبهم وبالعكس البجي هو يثبت الشك باليقين.
أزهار شتردين مني لعد اضحك والموقف جان صعب شيء أكيد أبجي وأنهاريت كدامه.

أنتِ ما عرفتي تتعاملين وياه وواجهتي صعوبته شبي مروان قابل وحش ديناصور كدامج ما عرفتي تلفوين السالفه وتفرين عقله وتنكرين.
وين أكدر أنكر وهو نزل وسمع عمتي تكول سوالفه وقذارته وين بعد اكدر انهزم منه وانكر حتى كيدي اذا اشغله كله ما ينفع ويه أخوج أنتِ أخته وأعرف بي
وأنتِ مرته المفروض أكثر وحده تعرفينه وتعرفين اطباعه وأسلوبه وتصرفاته وتحفظيهن وتتعاملين وياه.

ما أريد بعد لا احفظه ولا يحفظني اني صاعده اصلي تغدوا عليكم بالف عافيه ما اريدّ
أسيل تغدي وصعدي النعمه ما ينزعل عنها وبعدين اني ما حجيت علمود تزعلين مني بالعكس اريد مصلحتج شعندي وياج قابل
ما زعلانه منج وحقج تنفعلين أخوج شيء أكيد ما تنطين بي وأنتِ كلتيها مشاكل عيال بيت وأخوان بينهم اني مالي دخل.

وأنتِ كلتيها مشاكل عيال يعني ما الها داعي تزعلين وتأخذين على نفسج وعلاقتج أنتِ ومروان أنتِ اعرف بيها وشي خاص بينكم وأني من حجيت من علمود تزعلين بالعكس شعندي وياج قابل.
من رخصتج
صعدت وأجتي أمي
وصال شبيها شو صعدت
أزهار تريد تصلي
ليش ما تصلي بغرفتي
عوفيها يمه الظاهر حابه تبقى لوحدها
ها هم حجتلج عن مروان خوما راجع عليها.

لاتشغلين بالج بينهم لاتضلين تأكلين بروحج هما يتراضون، سگتت ومشت صبينا الغده وأسيا اجتي وهي ما نزلت ولليل هي ماكو دزينه كرم كال نايمه تالي عفناها على راحتها.
ومر يومين هدوء بيتنا ومن ناحية هشام ما أتصل ومبتعد واني كذلك أريده اشوفه وين يريد يوصل بهاي تصرفاته.
أما أسيل بهل اليومين داخله حالة صمت نهائي ما تختلط فقط على كد السؤال والجواب حتى مروان ما أتصلت عليه ولا مهتمه بي مثل قبل ما تدخلنا.

لحدما كاعدين العصريات وبابا جان موجود وسأل
كمال أسسيل وينها لعد ما جاي أشوفها كلما نكعد هي ماكو خوما مريضه تعبانه وصال شفتيها سألتيها
وصال بغرفتها ما بيها شيء أي شفتها وسألتها لايضل بالك.
أزهار سگتنا وأمي باوعتلي ما راضيه وأنفتح علينا الباب دخل مروان سلم واخذ مني غزل يبوس بيها
مروان حبيبة خالها لك فديت فديت القشطه شنو هالجمال لج.
وصال الله يرزقك الأحلى منها يمه
مروان أمين يله من رخصتكم.

أزهار صعد لغرفته وأمي باوعتلي وأبتسمت يعني مزاجه زين أرتاحينا ورن تلفوني بابا گبل أنتبه هشام
أترخصت منهم وكمت جاوبته ها هشام
هشام راح أجي أخذج وترجعين وياي كافي عاد لاتخلين ساعة شيطان تنكز بينا وتخرب علاقتنا بابا اريدج بالبيت روحي طافره
وشگو تصيح ما تعرف تتفاهم.

أي اني واحد ما أعرف اتفاهم شوفي أزهار ساعه وأوصل والكاج مزروعه يم الباب وتمشين وياي كلام زايد ناقص ما أريد ترة واصله لخشمي روحي طافره من الدنيا كلها
ماله داعي كل هل العصبيه تعال أخذنا واني مو مثلك أتنازل بسهوله اني ما ابيع العشره بساعة شيطان ولعلمك ماكو ساعة شيطان كول أكو أنسان ما يعرف يتحكم بروحه ويلزم أعصابه ويخسر أحبابه.

ما جاوبني وقطع الخط أستغفر الله العظيم ناوي يجلطني هذا خلاص يجلطني رجعت يمهم وبلغتهم
كمال راح يجي
أزهار اي بابا بالطريق
وصال مو بعد وكت اربعينج ما طالع عبالي يطلع ونحتفل بيها بعدلج أسبو? أنتظري حبيبتي وهشام اني احجي وياه وأفهمه.

كمال وصال عوفيها البنيه لاتخابرينه خليها تروح لبيتها وعيالها والرجال من حقه يريد يشوفه بنته وهنا ما يكدر يجي وياخذ راحته روحي بابا ما عليج من أمج واحنه ما طايرين عليج الزمي بيتج وديري بالج على زلمتج وبنتج.
أزهار أن شاءالله بابا حبيبي من رخصتكم رحت تجهزت وجمعت ملابسنا ونزلت أغراضي وطلع مروان من الحمام شافني تفأجى
مروان شنو بس لاتكولين راح تروحين
أزهار اي والله.

لا بربج بعدني ما شفتكم وهشام وينه أجه لو بعده
بالطريق هسه يجي.
هسه بس البس ملابسي واجي عوفي أغراضج اني انزلهن
ماشي حبيبي دخل غرفته واني شلت جنطتي ونزلت رحت على أسسيا دكيت الباب محد فتحلي يمكن نايمين عفتهم ولكيت هشام واصل كاعد هو وبابا ويحجون شلت بنتي ودخلت عليهم ولاحظته منطلق ويضحك وشافني عيونه لمعت بفرح سلمت عليه مرحبا
هشام هلا عيني انطيناها تعالي حبيبتي.

أزهار أخذها مني يبوس ب?اسها ويشم بيها يريد يضمها لروحه وصافن عليها ونزل مروان تقدم سلام ومباوس واخذ غزل من هشام
مروان هشام شلون تاخذها والله تعلمنا عليها
وصال خوما يبيقيها الك يا يمه بنته خطيه.
مروان الله يحفظه الكم وتتربى بعزكم ودلالكم
هشام امين أشكرك.

أزهار وكام وسلمنا عليهم وأهلي يم الباب ودعناهم وطلعنا للبيت واحنه ساكتيين وصلنا هو أخذها مني ودخل البيت وما لكيت بس أفراح وصبا استغربت الباقين وين سلمت وردن السلام وتقدمن اخذنها من اخوهن ويضحكن ويباعن الها.
أفراح يا حبيبي هشام بنتك تخبل ما شاء الله ربي يحفظها بالخير عليك عيني.
صبا لج شنو هالجمال والنزاكه يمه فدوه البنات دخلها الغرفتها خطيه بعدها صغيره.

أزهار دخل الغرفه واني نزلت أغراضي عفتهم بالحوش وعبرتهن ولكيته يفتر بيها عبرته وشفت سرير جبير لونه وردي ومفروش ومرتب صفنت عليه وخلاها بي وعلى وجهه الفرحه بوجودها وطلع دخل أغراضي كلهن وطلعت ملابسي ومشيت للحمام غيرت ورجعت هو ماكو كعدت ارضعها وسمعت صوت كمت فتحت البرده جايب طلي هو وابن عمه بارق وذبحوا ويضحك وشافني وركز ناحيتي گبل رديت البرده ورجعت وزعوا لحم وطبخوا بيت عمهم اجو وباركوا اليه وتحمدن على السلامه وطلعن.

الليل فضت الهوسه وغسلن ونظفن واني بغرفتي
كمت افور ماي الها وشفت صينيه مرتبه ودخل هو بإيده شياش مشاوي عبرني خلاهن بالصينيه كملت ورحت الغرفه وجابلي العشه.
هشام تعالي اتعشي
أزهار ما جوعانه
نعمة الله عوفي الزعل وتعالي مدي أيدج.
عوفها من أجوع اني أكل
مو يبرد
ميخالف سگت وفتح الكنتور اخذ ملابسه وافراح صاحت عليه
افراح هشام اجيبلك العشه ما تعشيت
هشام ما أريد.

أزهار عرفته ما متعشي راح سبح واجه وشلت الأكل خليته كدامه وكعدت أكل وهو هم وكملنا وشلتها وغسلتهن لن المطبخ نظيف ورحت غسلت ورجعت هو نايم شفت بنتي رضعتها ونامت وتمددت بصفه وبلحظات أنسحبت لحضنه وكلبني ناحيته وصفن بوجهي.
هشام بعدج حاقده عليه ام گلب الأسود
أزهار گلبي مو أسود وليش أحقد عليك كول لنفسك هالسؤال اخاف أنت تحقد مو اني.

أنتِ تجرين ويه دمي شلون احقد عليج گلبي يقسي عليج ودمي يحن الج بس الظروف المرت عليه خلتني هيج اصير وارجع وأنت ماكو والغرفه فارغه شص.
ما خليته يكمل خليت أيدي على شفايفه وباس كف أيدي وحضني وحضنته ولمني لحضنه أعشقك هشام
أموت بيج وبعشقج روحي أنتِ.

بقيت بدفؤ حضنه وحنيته وحبه مثل الضايع ولكاني مثل الوحيد وصرتله أهل بقيت?اسي برقبته واشم بعطره المشتاقلته رفع وجهي وقربني اله والتقت عيوننه وأخذ شفايفي بعمق حبنا وبادلنه بعض بكل حب وشوق وأنتهت ليلتنا بكل حب وأحضان دافئه
ومرت أيام عايشين حياتنا طبيعي وهو فرحان بينا
بس حسيت أكو شيء شاغل باله لن دوم صافن وأفكاره ما مستقره دايخ بدنياه.

صحيح امه مريضه وصحتها تعبانه وجانت نايمه المستشفى طول فترة بقائي بيت أهلي ورجعت
هي وايمان وباركوا اليه واخذوها يمهم فرحانين بيها بس حسيت هذا مو سبب يخلي هيج يصير ويبتعد عني وعن بنته وتنازل عني بساعة شيطان مثلما يسميها وبعدين حبي اله هو خلاني أرجع وأعدي كلشي وأستمر مثل ما أني بدون تغير.

أكعد من الصبح من يروح الشغل أسويله ريوك وهو يتسوك البيت ويروح وارجع بنتي نايمه اكمل شغلي غسل ملابس تنظيف الغرفه وهل الأمور وكمت اني اطبخ لن ايمان سحبت نفسها من الطبخ إمها مريضه وتعبانه بشكل معقده وهي تكفلت بعنايتها تكسر الخاطر نظراتها كلها حزن تباوعلي برضا واحس العبره واكفه بصدرها.
كاعده أنوم بنتي وباب غرفتي مفتوح وعيني على الساعه انتظره يجي وأكوم اصبله الغده ورن
تلفوني عصام يتصل أستغربت أتصاله!

عصام شلونج خيتي أخبارج غزوله شلونها
أزهار الحمدلله زينين وأنتوا شلونكم
بخير الله يسلمج أكول ازهار
كول عيني
هذا هشام شايل خشمه وعزة النفس العنده على شنو بله
ليش شگو صاير شيء
لا ما صاير شيء لاتخافين عيني بس حاجيته علمود التعيين على شهادته بس رفض وما قبل واني عبالي يتعيين ويعين أهله وسمعت أمه مريضه فد مره يعني المصاريف هواي كثرت عليه
شگالك هو.

كلامه ما ادري شلونه مال واحد بطران والله ما محتاج تعيين وما اريد أتعيين بواسطه يمعود يا واسطه أصلاً اني ما إلى دخل بالتعيينات وعمري وحياتي ما معين احد لا اني ولا مروان حتى ابويه بس شاهين ومنذر بالجيش مجرد قدم اسمائهم وهاي هي يعني ما مسوين فضل على أحد علمود يعتبرها واسطه.
يجي واني أحجي وياه.

يتعين على شهادته بس كتله دزلي الفايل مالتك وهذا هو شو هذا رفض يا اختي خوما يضل على التكسي وهل الشلعان الگلب وأخواته طالبات كومة يردن مصاريف وامه المسكينه شيلحك متكوليلي هو اهل الرواتب يا دوب يمشون الشهر وعدكم طفله وحليب وحفاظات.
ماشي اني احجي وياه وأفهمه وأردلك خبر
ما يوافق لاتعبين نفسج لن قبل لا تتزوجون ابويه عارض عليه وحاجي وياه ورافض ما اظن يقتنع بكلامج بس اني كلتلج وسوينا اللي علينا وعلمودج.

والله نريد نشوفج مرتاحه وأنتِ أختي وأعرفج كتومه وما تحجين وطول الفترة البقيتي بيها يمنا اني ملاحظ وساكت بس ما اريد أتدخل لخاطرج.
لا أبداً لا يضل بالك مرتاحه الف الحمدلله
أزهار أبويه أي شيء تحتاجينه تعالي عليه بس عليه اكص من لحمي والله.
تسلم ما تقصر أريدك سالم وربي يحفظكم اليه
ماشي عيني يله فيمالا.

الله وياك عيني قطع الأتصال ليش متوافق شگو بيها اذا تعينت بقيت كاعده وأتصلت عليه رفضني وسمعت صوت سيارته سجى راحت فتحتله ودخل علينا مزعوج غير ملابسه وصبينا الغده كمت غسلت المواعين ولحكته اريد احجي وياك
هشام أريد انام تعبان بعدين نحجي.
أزهار واذا متى تضل هيج تعبان
جديده هاي لازم مليتي تشوفيني تعبان
لا ما مليت بس ليش رفضت التعيين
أخوج خابرج مو.

أي خابرني شگو بيها حالك من حال شاهين أبن خالي ومنذر أخوه أسيا يعني وين الغلط بالموضوع
حالي من حال شاهين مو تردين أصير عبد ولواكه مثل شاهين ضل نايم بابكم يجدي واسطه من أهلج علمود يعينوا وتالي عينيوا
والتعيين مو خيرات بس علمود أصير نفس مستواهم لن أهلج ما عاجبهم سايق التكسي يردوني أتعيين بواسطه قبل أبوج گالي وهسه أخوج عصام.

ليش واسطه منو كالك يعيينون بواسطه ترى أهلي ما تمشي عدهم الواسطات وما معيينهن اي احد غير شاهين ومنذر احنه مو دوله وبكيفنا اخواني ضباط حالهم حال الباقين وبابا مسؤول وبتعبه
شگو بيها اذا وافقت ما بيها ابو زوجتك.
سدي هذا الموضوع ازهار
لا ما اسده ليش ماتوافق.

ما اوافق بكيفي خليني حالي حال هالعالم وبعدين كلها تضل تحجي نسابته عينوا لو تزوج بنتهم علمود مصلحه ومن هالحجي الخايس لا من اولها رفضت وهسه هم ارفض والموضوع تنهينه مثلما اني نهيته وخلص.
شعلينا بعالم احنه ولو نضل ورا حجي العالم ما نخلص وما نعيش ولا نلحك الاوادم
لا اله الا الله بعد هاي هي لزكت يالاسلام لزكت
اذا متوافق خليني لعد ارجع لوظيفتي
ما ترجعين واظن حجينا قبل بهذا الموضوع.

لا ارجع اني بنتي تريد مني وانت أخواتك يردن منك وعمتي مريضه وتعبانه شتصير متكولي
ما الج شغل لا أنتِ ولا بنتي ولا بأخواتي وأمي وايمان وجهالها اني رجال البيت واني المسؤول عنكم يله سكتي اريد انام.
هشام
أزهار أبويه سكتي
حباب فكر
فكرت بيها من زمان ماكو وظيفه يعني ماكو.

عفته ما ناقشته بعد بس حركني حرك ياربي بعزة النفس الما تخلص هسه شگو بيها اذا وافقت نضل هيج طول العمر مشاكل هسه ساكتات ومبتعدات عني لن ولدت ويخافن من اخوهن الله يدري شنو ضامتلي لن ما اضمنهن يتغييرن.
للعصر هو طلع لشغل واني سبحت بنتي وتمددت بصفها وأسمع صوت أيمان متعاركه هي وأخواتها خير يا ساتر شبيهن كمت فتحت الباب وصوتهن عالي.

أيمان خوما بس اني بس اني شصير مقسومه نصين منا جهالي يردون مني وانتن شايلات ايدجن منها من يوم تمرضت ما تتقربن الها ترة مو وضعيه هاي اني تعبت لعد هسه اريد اسبحهم وهي تريد مني اسبحها على اقل ساعدني بيها.
افراح والله شسويلج أنتِ بنتها الجبيره ومسؤوله عنها من يوم يومج شايلتها وساكته شعجب هسه يله كمتي تحجين لو لن وكعت ونفسج كامت تلعب منها وكمتي تطلعين أعذار بجهالج.

صبا وجهالج شگوو ساحتلهم وراج وشالعه گلبج بيهم مو عمهم كالج لو توافقين نتزوج لو تنطينهم النا ماوافقتي وشالوا ايدهم منهم والله بعد هذا هو سقط حقج شنسويلج احنه موزين عايشه ويانا أنتِ وياهم وهشام يجيب ويخلي بحلوكهم هما اهلهم ما سألين عنهم.

أيمان لعد وين اولي بيهم اهج اني وياهم بالشوارع وتردن مني اتزوج عمهم واني شايفتة اخ بس منو يحس بيه اذا انتن اخواتي متحسن بيه وامي يجي هشام واكوله عليجن كل مره على وحده وامجن مو بس امي واني لما جهالي ما اريد منجن
افراح اني ما إلى شغل نفسي تلعب واذا شافتني وحست تضل بس تبجي شيسكتها انوب
صبا ولا اني
سجى بس اغسل رأسها بس جسمها ما اكدر ما اعرفلها
ايمان لا يبوي بس ملتهيات بالتلفونات شعليجن.

أزهار متعاركات بينهن وصفنت وحيل أنقهرت الله لايخلي عبد مسلم بهذا الوضع الصعب الموت ارحم من ذل البشر تعاركن وصوتهن صار عالي وسمعت صوتها تصيح عليهن
الحجيه أيمان يولي ايمان وين صرتي
أزهار رحتلها الغرفه والجهال طلعوا سادين خشموهم
امجد عمه لا دخلين يمها وسخه محد يغسلها امي وخالاتي متعاركات.

أزهار لاتسدون خشمومكم كدامها خطيه وعيب حبيبي ما يصير يله روحوا منا دخلت عليها نايمه على السرير شافتني لمت أيديها وتغطي بنفسها وتبجي وهي ساكته كسرت خاطري وتبجي مهضمومه مثل الطفل عبرتها تخنك خنك تقربت عليها خاله.
الحجيه صيحيلي أيمان.
أزهار اني اساعدج وأيمان هسه تجي مسحت دموعها وشفايفها يرجفن وقفلت الباب رفعتها وشلت الغطا عنها ومسحتلها وحيل أنقهرت على.

منظرها وهي مستحيه وخجلانه خاله اخذج الحمام انطيني أيدج
الحجيه الله يرضى عليج دنيا وأخره
أزهار أخذتها وفتحت الباب وهنا واكفات وايمان اجتي ساعدتني دخلناها الحمام سحبتها وهي راحت جابتلها ملابس ولبسانها وعطرتها وفراشها ايمان غيرته وتحجي وتبجي انقهرت عليها.
ايمان اني الصوج مني كسرت خاطرها ورحت عليهن يساعدني بيها وتالي هيج يصير بيج يمه سوده عليه.

أزهار نامت بفراشها وابتسمتلي بحنيه وايمان تباوعلنا يله اني اروح
ايمان أزهار مشكوره رحمه الله والديج
أزهار ما جاوبتها ومشيت للحمام همزين إيمان غسلته بقاصر ونظفته دخلت سبحت وأحاول اتقبل كلشي وأكول الحمدلله.
الليل هو رجع وأيمان حجتله وهو ضل ساكت ما حجه شيء وعبرني وراحلهن وسمعت صوته يصيح عليهن والله لو مو تصيح أخواتك ما ينفع وياهن كلشي هنا اذا امهن ما يتقربن الها ويبرن بيها.

وبعدها تناوبن عليها بس كامن يكرهن أخوهن يموتن منا وكلما يشوفني يدعن عليه كدامي دعوات شعر?اسي يوكف منها.
أفراح الله ياخذه ويخلصنا منه شلع گلبنا يعني فوك ما عيشتنا تلزك وأشتراك الانترنت ما يشترك النا كل هذا انوب غسلي ونظفي واحنه نحجي وياه أيده والضرب ما يتفاهم.

أيمان خفت حلكج ليش تدعين عليه فوك ما مشلوع گلبه ميت نهار بالليل يركض وما ملحك علمود يعيشجن ويوفر طلباتجن وامي وعلاجاتها وجهالي وهمزين مرته وبنته اهلها ساترين عليها والله عمي زين منها متحمله وساكته احنه ما ينعاش ويانا اذا انتن امجن تتنكسسن منها ضلت على الدعاوي على اخوجن.

صبا لعد بس احنه ليش هي على?اسها ريشه بنت الباشا مكعدها بالغرفه الخاتون ويجيب ويفوت عليها بهل العلاكيك اشكال وانواع بس الحاويات تخلينا نشوف شيجيب الها ويدلل بيها.
أيمان مرته ما الجن گوه عليه ومدلله وبنت عز ودلال وتستاهل الواحد يددللها خلف الله من ساكته ومتحمله سمجن وكلامجن راضيه وساكته بهل العيشه الكواويد ما يعيشون ويانا.

أفراح وأنتِ شگو محروك دمج عليهن هو ومرته وما ترضين احد يحجي عليهم أشوفج رجعتي طبگتي وياها وصايره ضدنا
أيمان الحجي وياجن ضايع شلعتن گلبي من ساعة ترملت گلبي فركس وعمل منجن.
أزهار عافتهن واني ما شاركت أبداً شعليه قفلت بابي والتهيت بنتي وكمت اسويلها ممه وشفت الحليب ما يكفيني وللمغرب هو ما بين وتأخرهواي أتصلت عليه وجاوبني هاا هشام وين أنت.
هشام ها گلبي اتأخر والله طالع كروه محافظات وقفلوا الباب زين.

أزهار يعني ما ترجع
هشام أي والله اذا ما لحگت ليش محتاجين شيء
ها لا ما محتاجين سلامتك
الله يسلمج عيني غزوله شلونها وأمي أكلت كاعده نايمه
الحمدلله زينه اي أكلت اي نايمه
ماشي حبيبي ديري بالج عليهم
ماشي وأنت دير بالك على نفسك
فدوة رحت لعمرج
اسم الله
يله حبيبي وصلت السيطره.

ماشي الله وياك وأنتهى الاتصال وكمت فتحت الكنتور اوصي أيمان تروح تجيبلي فتحت الجنطه دورت على فلوس مالت الفضل مال عزل ماكو ولا ربع وين راحن كلبت الكنتور ولا ربع باقي هسه شلون رحت على ايمان نايمه وحاضنه جهالها هاي منين الها باوعت لغرفتهن يضحكن ماكو غيرجن واذا حجيت اطلع اني موخوش ادمي ومخليه عقلي وياجن يجي وأكوله نوب وصلت بيهن يبوكن شنو هالفلت هذا قبل لا امشي اسمع صوتهن.

أفراح امشن منا اريد افتح كاميرا عوذه شيكول عليه عايشه بكن دجاج كلجن فوك?اسي صبا ولي منا
صبا عليج الله خل نشوفه صدك حلو لو تنفخين بي علينا.
سجى منين اله اسود عبالك سلبوح سيان.
أفراح انجبي شو نامن شكوو كاعدات يله.
سجى هم لو يستاهل ما انقهر على الفلوس الشتريتي بيهن رصيد علمود تحجين وياه وتجددين اشتراك علمود جهرته الزفره.
أفراح تسكتين لو اكوم اجفص بطنج اطلع حشو مصارينج السكط العوجه.

صبا هسه عوفيها وافتحي اريد اقترن عليج حبابه
أفراح بس أنتِ والعوجه هم حلك تنام وتنحم صوت ما أريد أسمع ألج وباجر جددن بتلفوناتج وخلصني منجن.
أزهار عفتهن مصدومه بيهن على صوت غزل كعدت ارضعها وضلت رضعه خلصت حليب وين انطي وجهي بهل الليل احسن شيء أتصل على عصام رضعتها ونامت وأتصلت عليه جاوبني هلا عصام شلونك
عصام هلا خويه أزهار بخير الله يسلمج
أزهار عصام أنتَ بالدوام لو بالبيت.
لا بالبيت ليش كولي محتاجه شيء.

ما أعرف شلون أكولك بس
بس شنو گولي واني أخوج
هشام طالع بگروه محافظات ويتأخر واني خلصت حليب وما يكفيني لصبح وما عندي احد يجيبلي.
ولا يهمج هسه اني أجيبلج
تسلم ياغالي ما تقصر
يله خيتي روحي على بنتج تبجي هسه اجيبلج
ماشي عيني نهيت الأتصال ورحت عليها شلتها وضليت افتر بيها الا نامت ورن تلفوني عصام ها عيني
عصام يم الباب.

أزهار اي اجيت لفيتها وطلعت عليه باسني واخذها مني يبوس بيها وخلاها بحضني ونزل الحليب جايب اربع قواطي كبار وبالة حفاظات وأكياس هواي مليانه دخلهن المطبخ ليش كلفت على نفسك عيني أنت
عصام يمعوده شجايبلج قابل
أزهار فدوة لكلبك متقصر
عصام يله اني اترخص واذا تحتاجين شيء خابريني ولاتستحين مني اني أخوج.

فدوة اروحلك بسته ورجع باسني من?اسي وراح الله وياه وقفلت الابواب ورجعت غزل بسريرها ورحت دخلت الاغراض لغرفتي وجايب فواكهه من كل فاكهه كيلوين وكرزات وبقلاوه خليتهن بالثلاجه
وقفلت باب غرفتي ونمت والصبح كعدت على صوته يحجي وياهن.
هشام وعصام شوكت اجه
صبا بالليل حتى الوقت جان متأخر بس هي مخابرته وكالتله واجه بسيارته محمل حفاظات وحليب وفواكهه وكرزات وبقلاوه.

أزهار كمت فتحته دفع الباب ودخل وركع قوي على كيفك البنيه نايمه عبرني وفتح الثلاجه وشافهن ورجع صاح عليه
علي كيفي مو لازم ما تعجبج العيشه عند هشام والا تأكلين فواكهه مشكله والا بقلاوه من الغاليه والا كرزات ليش اني مقصر وياج بشيء بس كوليلي واخوج شايف علينا جوعانين لو بنتي ميته جوع ما عدها حليب جايب هلكد حليب وحفاظات
علي كيفك أفتهم الموضوع بالأول.

شفتهم عيني شفتهم وهو ما مخلي ما جايبلج واكيد أنتِ رحتي خابرتي وطلبتي منه مو
اي اني خابرته أخويه
أخوج مو واني الكواد المسؤول عنج شنو دوري عندج ليش صغرتيني كدام أخوج ليش ازهار يعني اني ميت واشتغل ليل بنهار علمود ما اخليج بحاجه احد ولا احد يتمنن عليه وتجين أنتِ تخابرين اخوج وتوصينه وهسه شيگول عليه أخوج عايف أختي وبنته بدون مصرف لو بدون حليب مو عيب ازهار.

لا ما يكول وأنتِ طالع وكلتلي ما أجي اتاخر وشفت القوطيه باقي بيها قليل ما تكفيني لما ترجع وفلوس ما عندي وماكو احد يجيبلي وين اروح ما لكيت الا أخويه.
وأنتِ قوطية الحليب الا تخلص يله تحجين ما تكدرين قبل لاتخلص هشام راح نخلص حليب ولو أنتِ حتى تستحين تطلبين مني ولا عبالك اني المسوؤل عنج راحت بنفسي يوم توصيني على حاجه.

فتح الباب وطلع مزعوج شكد حقيرات شفته طلع بالحوش ورحت عليهن دفعت الباب عبالجن ما ادري بسوالفجن الليل كله وما ادري أنتن أخذتن الفلوس مالتي من الكنتور وكل هذا ما كفاجن الصبح ترسن?اسه وكلتله على اخويه عصام وخليتنا يعصب ويحجي بس اريد اعرف انتن شنو من طينه طينتجن شمسويتلجن اني هلكد تكرهني بس يصير خير.

عفتهن وهنا ما حجن ولا حرف وشافتني أيمان وراحت الحمام والله الا اكوله على الفلوس لحكته لكيته فاتح باب السياره وكاعد يدخن استغربت هو بالعاده ما يدخن اسويلك ريوك
لا
هشام والله ما ردت أقهرك وما بيها شيء أخويه
لا هاي هي حقج عليمن تروحين لعد واني الصوج مني مو منج نسيت ابقيلج مصرف بس ما عبالي تجيني كروه بعيده ما حسبت حساب
هشام احجي بس ما تعصب
احجي
باوعت ماكو وشفت صبا تتوسل وتبجي من بعيد
ها شعندج شو سگتي.

لا هيج حبيبي يله عوف الجكاير وكوم الغرفه اسويلك ريوك ونتريك اني وياك.
ماشي لا تتاخرين
تمام حبيبي باسني من خدي لاتزعل
ولا يهمج وما زعلان منج
راح الغرفه وسويتله الريوك واجتني صبا وتتوسل بيه
صبا عفيه شتردين اسويلج بس لاتكولين اله
أزهار والفلوس وين وديتهن
صرفناهن
كلهن
اي والله وأخواتي وياي مو بس أني
وين صرفتيهن
أشتركنا نت شهري على الرصيد ثلاثتنا لن الأشتراك خلصان وهشام كال هالشهر ما اشترك وصينا على مكياج توصيل.

وليش تأخذن بدون ما تكولن مو عيب وأخوجن مقصر وياجن هيج تسون يعني سالفتجن فلا احد مسويها واني جاي اشوفه ما مقصر وياجن.
والله التوبه هاي اخر مره وبعد أبداً ما علينا بيج ولا نسوي مشاكل أبداً والله العظيم.
صبا فهمي أخواتج إلى جاي تسون خطأ وهشام اذا يدري ما يرحمجن.

والله ما نسوي اي شيء بعد هاي اخر مره بس أنتِ ستري علينا ولاتكولين اله حبابه بداعت بنتج غزل بغلاتها أنتِ هم عندج بنيه واحنه بنات بيت والستر حلو وأعتبريهن صدقه على?أس بنتج فدوه رحتلج والله اذا يعرف يعدمنا لن هذيج المره من اخوج اخذج صبغنا صبغ الا امي توسلت بي يله عافنه.
ماشي باستني من?أسي
فدوه لعينج مشكوره والله ما ننساها الج عيني أنتِ الله يوفقج ويحفظلج هشام وغزل.

راحت بس گلبي ما م?تاح وما أعرف اللي سويته صح لو خطأ بس مع ذلك أضل مراقبتهم اذا حسيت الوضع ما يطمن أبلغه مهما يكون أخوهن وهو المسؤول عنهم خاف يصير ما يصير.
اخذتله الريوك ولكيته صافن على بنته ويصور بيها
عوفها وباوع ل أمها أبتسم خليت الريوك كدامه وتريگنا اني وياه.
هشام وديها ورجعيلي نعسان وأريد أخليج بحضني وانام يله ولا تتأخرين عليه.

أزهار ماشي خليتها على الكاونتر ورجعتله وأستلمني جان حيل مشتاقلي واني هم مشتاقتله أصلاً اني ولا شبعانه منه حياتنا كلها شغل وتعب ومشاكل.
وتمر الأيام ما رحت بيت أهلي حتى هما مستغربين ويسألون عني ليش ما تجين وناويه هاليومين أروحلهم اضل أسبوع يمهم.

نفس الوقت حيل مرتاحه هنا مبتعدات عني وكلش حبابات ويشتغلن والبيت شايلته كله بس أفراح ما عاجبتني بشكلها ولبسها العصريات تكشخ وتلمع بروحها وأيمان تحجي وترزل ولا تهتم لاحد بس
من يجي أخوها تغسل وتغير ملابسها ضليت دايخه بيها وبتصرفاتها وحايره ومحتاره لازم اسأل امي وخل تنصحني.
واكفه ادكم القميص مالته وهو صافن وكرصني من خدي وباسني يله تأخرت على شغلك
هشام يعز عليه أفاركج تدرين هالايام مرتاح
أزهار شلون.

ماكو مشاكل وهدوء.
أي
مشكور منج على تحملهن ومتطوره علاقتج بيهن وصايرات حبايب
هزيت?أسي وسگتت وكمل لبس وطلع حبيبي عود حليب وياك
ذكريني برساله انسى
ماشي عيني طلع لشغله ورجعت نومت بنتي ورن تلفوني أسيا جاوبتها هلا حبيبي
أسيا هلا بالحب ولو المفروض ما أكولج لن مفأجاه بس كلت خطيه خاف نايمه.
شنو
بالطريق أجينا عليج زياره
ياعيني منوو ومنو
أني وعصام وأطفالي ومروان وعمتي وصال.

هلا بيكم عيني يله ادعبلي قطعت الخط وكمت شفت الاستقبال رتبته وعطرته والحوش نظيف وركض عالمطبخ ماكلات اندومي غسلت المواعين ورحت غيرت ملابسي ورتبت نفسي وغزل كعدت كعدي كعدي خوالج اجو واندك الجرس شلتها وطلعت الهم فتحت الباب هلا بيكم عيني سلمت عليهم ودخلوا وعصام ومروان نزلوا كومه مشترين شنو هالزحمه والله مكلفين على نفسكم.
مروان الحليب والحفاظات من خالها مروان.

أزهار عيني هو يله اتفضلوا اخذها مني ودخلوا الأستقبال كعدوا وكمت لمطبخ وصاحوا وراي
عصام وين كلشي لاتجيبين جايين نشوفج
وصال تعالي يمه كعدي عمتج وينها اريد اشوفها
أزهار بغرفتها كامت وطلعت الها ايمان سلمت عليها عفتهن كاعدات
مروان أزهار كامت تبجي يمكن جاعت
أزهار هسه اجيبلها ممه دخلت الغرفه أسويلها ممه واجتي يمي أسيا اكولج اريد اسألج
أسيا سألي حبي
أزهار اذا أحد طلب منج تسترين عليه تسترين لو تحجين أفضل.

أسيا حسب الشخص يستاهل الستر او لا وحسب الموضوع.
أزهار توني اريد أحجي أنفتح الباب ودخلن علينا أفراح وصبا.!