رواية بين قلبها وعينيها كبرياء للكاتبة شمس العراقية الفصل السابع
أزهار كمل كلامه وباوعلي ورجع گال
عصام أكو زواج وستر وغيرهن ممنو?
باوعت على? بابا بدون ما احجي هز رأسه وجاوبه.
كمال من أموت عود قرر عني وأفرض حكمك عليها دام اني عايش محد يتأخذ اي قرار يخصها واذا اجتها قسمه اخذ رأيكم اي بس مال أمشي على? رأيكم وحكمكم لا ما صارت وأزهار ترجع الها سسيارتها وظيفتها وكلام ثاني ما أريد خلص الموضوع ينسد نهائي مثلما انفتح بخبال تصرفت بقله فهم وطيش وحكمت عليها بدون ما تسمعها وجان سويتلنا سالفه الها أول ما ألها تالي.
عصام يعني كلامي ما أله أي أهميه ماششي!
بس أنتَ بهاي قرارتك تكون أنطيتها الحريه أكثر من اللازم وكلشي مباح ألها وكلنا نعرف كثرة الدلال يخرب والخراب اذا لكه أساس ينخر بس ميخالف ضلوا هيج ضلوا.
أزهار كام ومشه لغرفته وأسيا لحكته ومروان ساكت باوعلي بنظرات صعبه أفسرها
كمال كومي أرتاحي بنيتي وما عليج من أخوج كلها يومين ثلاث ويفش ويرجع الوضع طبيعي واذا ما عاجبه الباب يوسع جمل أني ما جايز منج وصال اخذيها لغرفتها.
وصال يله ماما كومي أخذج لغرفتج ترتاحين يله حبيبتي
أزهار كمت وعيون مروان عليه عبرته وصعدت فوك دخلت غرفتي وأمي نومتني بحضنها تمسكت بيها بقوه ونمت تعبانه وهالتعب احسه متراكم عليه من سنين.
مر أسبو? ولازم أباشر بدوامي كعدت من وكت صليت وشلت السجاده ورن التلفون على? الميز جريته مروان جاوبته هلأ مروان
مروان تروحين الدوام اليوم مو.
أزهار أي أن شاء الله ليش؟
هيج اسأل لن شفت سيارة جديده طابگه بالكراج أكيد سيارتج!
ما أعرف والله هسه أشوفها
تمام أنتبهي على نفسج لاتثبتين شك عصام عليج لن عصام من يخلي شيء برأسه يصير
وأنتَ
شبيه
هم تشك بيه
لااا لن ما شفت شيء موزين منج على? كلن الايام كفيله بالنسيان كدامج طريق طويل يله نزلي لاتتاخرين? دوامج.
ماشي أنتهى الاتصال لبست ورتبت روحي ونزلت لكيتهم كلهم مجموعين عصام باوعلي من نظرات تتفحص لبسي من رجلي لرأسي يباوع بنظرات شك ويأكل بهدوء مميت كعدت بصف مجد وأسيا قدمتلي كوب جاي اشرب ومتوتره من وجوده كمل وكام وصفن بوجهي وهو يشرب اخر ما تبقى من أستكان الجاي جان لابس ملابس عسكريه يلتحق مشه ولحكته اسيا بالجنطه مالته كملت يله اني اروح باوعلي بابا وابتسم.
كمال الله وياج باباتي أنتبهي? نفسج وهذا السويج سيارتج واذا حسيتي روحج تعبي كبل خابريني أجيج متفقين.
أزهار متفقين بابا مع السلامه طلعت من يمهم عصام بالسياره ومشغلها وأسيا واكفه ويحجون عبرتهم وتوجهت لسيارتي صعدت والباب جان مفتوح طلعت قبله وهو مباشرة طلع وراي اني سياقتي بطيئه بحكم بنت وهو سريع عبرني نزل الجام ومنحني رأسه يباوعلي ثولني وخرب كل يومي ما أعرف وين يريد يوصل خلاص دخلت رأسه ما يشليني بعد لو يجي الحمزه نكز شيطانه عليه.
وصلت دخلت وسلمت عليهم ويتحمدن اليه على? السلامه كعدت ما متوازنه دزيت على? كهوه وكعدت اشتغل واجت رشا
رشا أعذريني ردت اجيج البيت بس أستحيت لن وحدي
وان شاءلله تنذكر ما تنعاد سمعت سكرج نازل ومتخربطه شكد أنقهرت منين اجاج
منين سمعتي
ابوج اخذلج اجازه مرضيه وعرفنه على? هالاساس
اي صحيح الحمدلله عدت سلامات اي شلونج أخبارج
زينه بس أكو شيء اريد اكوله الج بس بعدين
لا كولي هسه شنو هالشي المهم.
هيج أكو واحد اجه لدائره بس شافج ما موجوده وطلع
منو هذا
هذا ابو المعامله كل مره أذكرج بي وتنسينه شبيج داگج الثول
أهاا اي تذكرته شبي وليش اجه
ما أعرف سألي روحج اكو شي بينكم
لاااا
هاا مو أكول لن من تمرضتي مرتين اجه ما لكاج وراح هو ما سأل احد بس حسيته خايف عليج ما أعرف هالشاب معجب بيج لو أني متوهمه اكو شي بينكم لن من يوم الشفناه بي هو ما شال رجله من الدائره وخاصه بعد ما تمرضتي.
گتلج ماكو شي لاتضلين تلحين بعدين اعرفه يعرفني عاد أنتِ من تلزگين بسالفه
شگو بيها اذا أكو والولد حلو ومبين أبن اوادم
رشا سدي حلكج
علينا ولج
لا اله الا الله روحي اريد أكمل شغلي
ماشي رايحه ونحجي بعدين
ماشي راحت وتذكرته هذا شيريد جاي لدائره فوك ما سببلي مشكله شگدها شگبرها وخسرت ثقة اخواني وصلت الموت على? أساس ناقصه وتكملها عليه.
خلص الدوام وطلعت وشفته واكف يم دائرتنا أستغربت وجوده جان واكف يم سيارته مشيت على? السريع كلتله ليش ما رايح
هشام وين اروح
أزهار شعندك اهنا
شعندي يعني شغل
ما جاوبته فتحت سيارتي وقبل لا اصعدها هو ابتسم واجو موظفين اثنين صعدوا بسيارته هذا شوكت ضبطهم تجاهلته وشغلت سيارتي وهو شغلها وفرها قبلي ويه طلعتي جان دعمته بس تلاحكت روحي وطلعنا سوه هذا مو صاحي.
وصلت البيت تعبانه لكيت ماما مجهزه الغده شافتني وأبتسمت حضنتها وبادلتني بحنيه جوعانه الغده جاهز
وصال اي جاهز غيري ملابسج ونزلي بين ما أسيا تطلع من الحمام دخلت تسبح كرم
أزهار ماشي صعدت اخذت دوش وطلعت رتبت نفسي لكيت رشا تتصل هاي شتريد جاوبتها هلا رشا
رشا هلا ولج طلعتي بدون متكولين شدعوه عليج
أزهار تعبانه وطلعت أول وحده واريد ارتاح.
صدك عرفتي الولد إلى يسأل عنج طلع أسمه هشام ولازم خط موظفين أستاذ احمد ورقيه زوجه أستاذ محمود هذا شبسرعه ضبط اموره واخذهم لخط مالته
شمدريني سايق تكسي وهذا شغله اكيد جان محتاج الشغل شعلينا بالعالم رشا أسألتج صايره ما اعرف شلونها
والله اسألتي كلشي ما بيها ورايدتلج الخير بس أنتِ داگج الثول ماما الرجال معجب بيج
وينعجب كيفه بس اني ما يعجبني.
وليش ما يعجبج شو يخبل حبيت شخصيته ومبين عليه شاغول يكفي عصبيته تنكع بالگلب والله ولد عين الله عليه رجال معدل
خل ينكع بگلبج هيج مخليه كل بالج وتركيزج عليه ما تضبطينه شگو لازكته بيه
لن حسيته معجب بيج
مو من مستواي ولا اعجابي واخر همي أرتاحيتي هسه
هاا هيج الحجي
أي رشا أطمئني وأذا عاجبج أخذي الچ.
تمام لعد راح احول الخط مالتي يمه
شدعوه هيج ساحله روحج عليه ترى الثگل حلو للبنت وقحط زلم.
أنتِ هيج تكولين لن اخر همج ولو ردتي تزوجين يجيج أحسن واحد واحسن مكان نعرف ابوج وأهلج شكثر مدللينج أما اني يحظي البيت مليان جنانين وأول ما اجه الدائره قبل لا تجين شفته خوش زلمه والدنيا متعبته أمر مني وبهل الوكت صعب تلكين زلمه يخاف عليه ويشتغل بذمه وضمير ويركض وره عيشته.
كيفج لعد الله يسهل الج
أدعيلي يولي
أن شاء الله يله باي نهيت الأتصال والله خبله عندج وظيفتج شلج بالزواج من هسه لاحكه على المسؤوليات.
خليت تلفوني على? الشحن ونزلت لكيت ماما مجهزه الغده كعدنا نتغدا واجه مجد ضايج شبيك الوجه معبس
مجد ما ضلي واهس بالدراسه
وصال ليش يا أمي من هسه يخرب واهسك بعدك وين والسادس يرادله تعب
مجد من ورا بابا وعصام راكضين وراه علمود العسكريه وأخرر همي اني عندي طموحي غير بس المن تحجين ليش احد مهتم لرأيي
أزهار يريدون مصلحتك امشي وراهم وما تخسر وشبيها العسكريه تصير مثلهم ونصير دوله وعلم.
مجد بطرانه يمعوده، زين الله خلقج بنت والكل مدللينج مو مثل حظي على? دراستي لاحكني ويتحكمون بمستقبلتي
وصال هسه اطلع من السادس والله كريم ما عليك منهم وأنتي أزهار فگي عن اخوج شويه ما اريد يخرب واهسه
أزهار ماشي سگتنا بالتوفيق حبيبي مجد رجعت كملت أكلي وغسلت وصعدت وتلكتني أسيا صايرين ما نشوفج
أسيا موجوده والله تعبانه هالايام تعرفين دخلت بالسابع وحملي ثگل وهذا كرم متعبني
ربي يكومج بالسلامه
الله يسلمج.
راحت وحسسيتها متغيره عن قبل او يمكن عصام مانعها تختلط وياي ما اعرف اني افسسر على كيفي يله وشنو يعني توكف حياتي على عصام وأفكاره.
للعصر صديقاتي أيات وأستبرق اجو يتحمدن اليه على? السلامه ودزيت على? ضيافه مجد راح يجيبها وكعدنا نسولف ونضحك ونسيت اللي صار بجمعتنا وبصفي صديقتي إستبرق كالت
أستبرق ماكو منا منا نفرح بيج يا عروسه
أزهار لا والله أبداً الفرح الج حبيبتي شوكت تتزوجون.
شهرين انوب ان شاء الله لما يضبط أموره تعرفين الزواج جان أختياري ف لازم اصبر بين ما يكمل التجهيزات العرس
أنتِ مدلله والله مفضل عليكم شجاج ارتبطتي بواحد حالته على? كده واقعج وحياتج كلها تتغير
هذا الدلال تحجين عنه ما مرتاحه بي الله وكيلج عبالك منفوسين بيت اهلي ما بي راحه وأني حبيته وحبيت كلشي يخصه عسى ما يسكني يخيمه يكفيني أكون مرتاحه
والله أنتِ أدرى بروحج ومصلحتج بعد وربي يوفقج ان شاء الله.
ويوفقج حبيبتي
أيات هسه عوفونا من سالفة الزواج ولو المفروض أزعل عليكم ما حضرتوا عيد ميلادي واني رتبت وتعبت عليه وتالي ما تجون
أزهار حقج علينا ان شاءلله اجيج فد يوم بس والله العظيم ملتهيه دوام وارجع تعبانه حته تواصل ويه أستبرق ووياج قليل ما اعرف الوقت شلون يخلص بلمح البصر
أيات اي والله تصدكون الوقت صاير يخوف عكس قبل.
أستبرق وكتنا اختلف أنما الوقت نفسه وكلمن ملتهي بدنياه يله منا وهيج نضبط امورنا وكل فتره نتلقي فد مكان او ننجمع يم وحده
أزهار ان شاءلله اتفقنا ومر الوقت ودعتهن واجه سايق أستبرق أخذهن وراحن الله وياهن رجعت لميت الهوسه ولكيت ماما بالمطبخ مشيت وكالت
وصال تعالي اغسليهن ماما
أزهار والله تعبانه
ما يصير تضلين هيج ادري اذا تزوجتي يضل يباوع على طولج ما تغسلين ملابسه تسويله لكمه أكل.
والمطاعم شُنو شغلها وشجاب سالفه الزواج على? بالج ليكون
مو أبالج لتخافين الله يوفقه ويلكه بنت الحلال التسعده والمطاعم شغلها لناس تطلع تتونس وتأكل مو لامهات البيوت ما يطبخن بس يوصن منها ما يصير يا امي اخاف تجيج قسمه وأنتي كلشي ما تعرفين يومين ويرجعج عليه.
الله كريم منا لوكتها عفتها وصعدت غرفتي جريت الايفون وكعدت أتصفح وشفت عصام نشط الأن أرتعبت والله من هذاك اليوم واني صارت بيه خوفه منه الله يرجع الامور مثلما كانت وترجع عصام الاحبه وأمن منه.
أسيل
كاعده وأدرس بيهم وهما ثولان لايرحون ولا يجون شلعوا گلبي وركبوا گلب جديد أخر شيء نفذت طاقتي وعطت بيهم گاااافي امشي ولو على أمكم ادرسكم ما جاي تحفظون مو وضعيه هاي ريم كامت تغلط عليه وتفلت بوجهي والله من انعل أبوج لابو الرباج بنت الگلب كمت صفكتها راجدي وبردت گلبي وطلعت تصرخ وتشگي
ريم باباااااا مامااااا أسيل الوسخه ضربتني وتگول انعل ابوج بنت الگلب تغلط عليكم وكتلتني.
أسيل أكلتيها يا أسيل راح تجيج بارده مبرده جنت مندكه واشرح رامي موضوع الرياضيات ودخل حارث عيونه بكصته بدون ما يسألني ضربني وجرني من شعري عوفنيييي بنتك هي ما مربايه وتغلط عليه
حارث وتخلين عقلج وياها وتغلطين على? أخوج كدامها هاي التربيه الربيانها الج والله أنعل اليوم الصرتي بي يا حيوانه وهذا كبرج بهل الغرفه وغصباً عليج أدرسينهم.
أسيل دفعني وخلص كلامه وطلع باوعتله بحقد وبگلبي نار منه بس الصوج مو منه الصوج من أهلي صارلي أسبوع محد سأل عني المن عايشه اني على? شنو مبقيني للخدامه وتربيه جهالهم وشابعيني تكفخ وفشار حتى أحترام محد يحترمني لو فصليه هم مو هيج.
اكلت نعل مكطعه ورجعت ادرسها وأني ساكته بس بداخلي عبره مهتضمه حيل شوي وكفت يم الباب باوعتلها بحقد.
أسماء يله تكبرين وتنسين هاي ولا شي من اللي تكتلين بيها جهالي عبالج ما ادري شابعتهم كتل وغلط
أسيل ما جاوبتها لن العتب مو عليه العتب على? أخوي لو محترم أخته ومقدرها هي ما تكدر تفتح حلكها وياي بس شتشوف كدامها.
أسماء يله كملوا دراسه علمود تنامون من وكت ورامي أدرس الموضوع البعده لن باجر عمتك تروح واني كلش مالي خلكك.
رامي بس عمتي تعبت خطيه.
أسماء شبيها تعبانه شو أكل ونوم ودلال وأجازه من المدرسه أرتاحت بيها شتريد بعد يله كملوا دراستكم
أسيل رجعت اشرحله الماده وهو صافن بوجهي أنتبه على? الشرح عوفك مني راميييي
رامي عمه لاتزعلين من أبويه لن ضربج
أسيل لا عمه ليش أزعل هذا اخويه ميخالف، كلتها وحيل وأختنكت خلصوا دراستهم وكمت نومتهم وفرشت فراشي ونمت بالكاع.
والصبح كعدت على? دفرات جفصوني وكالبين الغرفه وناثرين ملابسهم وكتبهم كمت ساعدتهم ومشطت شعر ريم ولبستها جنطتها صحيح وكحيين واغلط عليهم بس احبهم وتعودت على? هالاسطوانه مو جديده عليه من صاروا لدنيا لحد هسه هما كبروا على? أيدي.
راحوا واسماء دوامها ظهري وحارث ما راح المحكمه ما اعرف ليش تجاهلتهم وكمت لملمت الغرفه ورتبتها وطلعت ملابسهم الوسخه غسلتهن ونشرتهن واجت عليه
أسماء أسيل تحضري تروحين اخوج ينتظرج.
أسيل ما جاوبتها رحت لبست صايه دائماً اجي بيها عليهم فوك تراكسودي وذبيت شالي بدون دنوس وطلعت لكيته ينتظري صعدت ليورا وشغلها وتوجه للبيت ما حجينا أبداً وصلنا وامي فتحله الباب عفتهم ودخلت
جنان ما تسلمين وجه النعال
أسيل خلقة الله، عفتها لكيت ابوي يتريك شگو عليك تاكل وبنتك مسحوله سحلة الجلب خدامه لجنانين أب مزهريه لاتهش ولا تنش وامي سايگه عليك.
علوان شبيج بنيتي شو وجهج مصوفر ادري دازينج تقاتلين عافيتج مسلوبه
أسيل ما بيه شي عن أذنك صعدت غرفتي باوعت كتبي على? حطتهن والله أشتاقيت لغرفتي دورت على? تلفوني ولكيته كبل اتصلت على? هديل وجاوبتني هديل
هديل هاا عيني شبيج.
أسيل بجيت ودموعي عشره على? عشره كلشي بيه طالعه روحي من الدنيا كلها مخنوكه خنك تعالي امانه مشتاقتلج صحيح من تجين تضلين بس تعيبين وتصيحين فاهيه وما تشتغلين وما تنظفين والبيت خايس وتعاركيني بس ميخالف راضيه أنتِ ولا أسماء الجلبه.
هديل هي أسماء جلبه من يومها وأستجلب بالزايد ومنو جلبها غير حارث وأمي يمشون كدامها وادري مسويتج خدامه الها واتصلت اسأل عليج امي تكولي لا دزيتها ترتاح خطيه تغيير جو يا جو هذا خدامه
هي هاي أمي متتغير من يومها هيج تذكرين من جنتي ما متزوجه اشسوت بيج ومن انفصلتي من عصام يبوه كرعت روسنا
هاي هي الج الله شطالع بيدي عليج وأحاول اجيكم هالأسبوع وأنتي طنشي قابل جديدين عليج
أحبج هواي.
يا بعد روحي وأني هم ديري بالج على نفسج ولاتنقهرين
ماشي مع السلامه نهيت الأتصال ولكيت مكالمات من صديقاتي تقى وهاجر ورسائل يسألن عليه ما جاوبتهن
كبل شمرت روحي على جربايتي ونمت بعدني ما غافيه عاطت
جنان ولج أسيل وجع أسيل نزلي غسلي البيت جايف
أسيل انكصف عمرج أسيل هو البيت كظه العمر جايف واسيل تغسله صحت بيها نازله رفعت شعري معقدني هالشعر لما اشوفه حلو الا اكصه واخلص منه.
نزلت لكيت البيت وسخ والدنيا مكلوبه متريكين والمواعين مكدسه والكوابه الجاي يمه صار أسبوع ما منظفات ادري شنو شغلجن أنتِ ونسرين
جنان والله يمه من رحتي ظهري أنكسر وبعد ما ادزج يم بيت حارث
أسيل همزين حسيتي لن كافي عليه الخدامه اهنا.
جنان أنجبي خدامتيش هذا بيت أبوج وهذاك بيت أخوج واخذج يمه لن أسماء مشكله ويخاف عليها تعرفين حبالتها زقنبوت واني التهيت بمرتضى ومصطفى نسرين ظهرها بس يوجعها من رجعت من بيت أهلها لحد اليوم ما تجيس شيء يا دوب تطبخ الغده واني ملتهيه بالجهال شالعين كلبي ومحد يكدرلهم بس أنتِ.
أسيل شعدها تحبل دام حبالتها زقنبوت تخلف واسيل تربيلها كافي العدها شالعين گلبي ونسرين شجاها جانت العافيه لو هاي حيل من حيل جناينج ترى اعرف كل سوالفهن بس أنتِ تغطين ساطرتج من سطرهن العباس ابو فاضل، ضربتني على? ظهري احس كلياتي وكفن بالكوه اخذت نفس يمه دخيلج والله راح تسكطيني حتى خلفه ما تخلين بيه تضربين جموع على ظهري ما جايزه من رويحتي والا راسي سويتي مخي مرگه تبسي.
من الله يكصف عمرج على? هاللسان االشايلته لو بس تضبينه فلا احد يكرب صوبج شوكت تجنين عقل ما اعرف شاده دوبج من دوب نسوان أخوانج من عمه العماج يله امشي شوفي شغلج لما اشوف مرت اخوج.
أسيل راحت ورفعت رداني وبلشت اغسل بالمواعين وجلفت المطبخ جلفه مالت اخ لاخوه ورجعت غسلت البيت كله والأستقبال خايس من كطوف الجكاير والهوسه بي للظهر كملت وظهر ما ضل عندي وامي طبخت وطلعت نسرين على? الحاضر تغدت وهمزين غسلت المواعين
نسرين اعذريني يولي ما ساعدتج بس ظهري موتني من الوجع حتى اخذت اجازه.
أسيل لا يمعوده متعلمه صعدت غرفتي اخذت تلفوني وتمددت على? جربايتي لكيت هديل فاتحه نت راسلتها ما جاوبت دخلت اتصفح وشفت حارث ناشر صورته دخلت اشوف التعليقات فضول لا اكثر ولا اقل اريد اشوفه هم يخون أسماء هم عنده معجبات بديت اكلب وصار حساب كدامي ولفت أنتباهي الصوره دخلت هذا مروان ابن عمي كمال ضليت أكلب بحسابه ما بي شيء بس صورته أنرسمت بخيالي حليوه مبين عليه هادئ الله يحفظك لشبابك ويحفظك ل أسيل كلتها وضحكت على? روحي اني شبيه استخفيت كبر، شمرت التلفون ونمت.
الثاني يوم كعدت من وكت لبست صدريتي ورتبت حجابي وجهي شاحب عبالك جنت بسجن مو بيت اخوي جهاله جعصوني جعص على ساعه يوكفون كلياتي من الدفرات.
شلت جنطتي ونزلت لكيتهم كاعدين صبيت كوب جاي وسويت لفه جبن كعدت اتريك يمه خابرتي ابو الخط يمرلي
جنان لا والله يمه نسيت عبالي ما تروحين
أسيل صدك تحجين يمه وليش ما اروح خوما اعوف دراستي هسه شلون اخابره يضل بس ينتر من صباحيات عاد اني لساني شلونه.
نسرين روحي ويانا نوصلج بطريقنا
أسيل اي والله كعدوا تريكوا هي وحسن مبين عليها صدك تعبانه كلمنا وطلعنا لمدرسه وصلوني وراحوا دخلت المدرسه شمرت جنطتي شفتهن كاعدات هاا ولجن
تقى عبالنا ميته نتصل ما تردين وابو الخط اهلج مبلغينه ماخذه أجازه أسبوع ادري شعندج وين جنتي
هاجر وين تكون قابل اكيد يم الحيه أسماء مو بالله
أسيل اي وين اكون لعد عوفونا من سالفتها شگو ماكو شخبار المدرسه والمواد ترى كلشي ما شفت من رسائكم.
تقى شنسويلج والله فاتتج هواي اخبار مهمه هاجر أنخطب وراح تزوج وتغادر الشله
أسيل جذب كولوا والله منو سعيد الحظ
هاجر أبن عمتي
أسيل شايفه الف خير تستاهلين حبيبتي بس بعد وكت على? الزواج خلصي السادس على? الأقل
تقى شمدريني كاتلها الجوع يكول خطيبها يخليها تكمل دراسه
أسيل يمعوده كلاوات العيد بس تروح يمه ينفش رياشاته عليها وما يخليها تكمل على? أغاررر وما اكدر على? فراگج واريدج يمي.
هاجر لا خطيبي يختلف وعدني وعمتي هم تريدني اكمل دراسه
تقى يمعوده شنريد الله يسعدكم
أسيل ضلينا نسولف ورن الجرس واجت مدرسه الرياضيات أول درس ضغط نفسي اويلي يابه...
خلص الدوام ورجعت وياهن بالخط وصلني البيتنا دخلت البيت من باب المطبخ الاكل جاهز دولمه اوفيش يابه اخذتلي ماعون وصعدت لغرفتي غيرت ملابسي وكعدت أكل واكلب بالتلفون وهم رحت الحسابه ولكيته مغير صورته بقيت صافنه بيها وبهل اللحظه تقى دزت رساله جاوبتها هلاو
تقى شو ما تحجين مثل قبل صايره تغطين منو مأخذج من عدنا شتسوين
أسيل جهال أخواني منو قابل كاعده ومالي خلك.
نعرف جهال أخوانج من زمان على? الخط عفيه ما تملين من هالوضعيه الخايسه أهلج عدهم ومتمكنين ما يخلوهم بحضانه مثل رهف وجهال اخوج حسن اخليهم بحضانه يحظي والكبار خل امهم تتكفل بيهم شبيها مكسوره وكسرت عين جدي.
ألمن تحجين عبالج ما ماله والله طالعه حتى روحي بس شسوي امري لله.
تزوجي يحظي وأخلصي كم يوم تضلين تخدمين وتربين خلفتهن وهنا وظائف ولبس وطلعات وطبات وكشخه وصالونات وتجميل وما راحت بس عليج مضيعه عمرج بين الجهال باجر عكبه حتى واهس لجهالج ما يضل بسبتهم يمه الله يساعدج
يا زواج تحجين عنه خل أكمل دراستي عكبها الله كريم وبعدين حتى لو اجتني قسمه امي ما توافق اتزوج.
ليش شكو بيها هاي هاجر يتيمه وجديتها ما دايمه الها ابن عمتها خطبها وتكول كلش زين عليها واعدها تكمل دراستها وليش امج شگوو غير ابوج اليوافق شنو رجل كرسي هالاب ترى ربالي عله أبوج
يمعوده سدي سالفة شبيج كالبه الرنه على الزواج
أنقهر عليج والله خاصه من غبتي أسبوع كامل واليوم كمتي كلشي ما عرفتي والواجبات مكدسه عليج وجهج طافي كلت أسيل لو تتزوج اشرفلها من عيشة أهلها.
و? أساس الزواج حل لمشاكلي ومعاناتي ويه أهلي وجناينهم وجهالهن لا يمعوده هسه يطلع اضرب منهم على? اقل محصله حريتي تلفون وانتن ودراسه ما متقيده عوفينا عوفينا
علي? راحتج صدك نهاية الأسبو? بابا يسافر بس اني وماما بالبيت تعالن أنتِ وهاجر نتونس ونسولف نخلص من ضغط الدراسه واخلصج من ضغط أهلج عليج اخاف بيوم تشردين من ضيمهم
لا اسم الله، ماشي الله كريم عود نتفق
يله حبيبي باي.
الله وياج راحت واني تمددت وصفنت بكلامها نوعاً ما بي وجه نظر ايجابيه يمكن الزواج هو حل مشكله الاعاني منها بس منو سعيد الحظ الامي توافق عليه والله لو يجي الوزير بنفسه امي ترفضه يله عاد اني شبيه حميت انوب وزير والله يالله استقري أسسسيل.
أسيا
من يوم الصارت سالفه أخته والتحق لدوام هو ما أعرف شبي حتى اني ما اله خلك يحاجيني أراسله ساعه علما يجاوبني وحجاياته كوه عبالك محملني منيه ولا عبالك زوجته وبالدوام المفروض يشتاق يحن شو هذا لابس الوضعيه ومطنش ماشي يا عصام لا تجاوب اني الك.
تجاهلته يوم كامل ولا عبالك شاف رسائلي ولا كلف على نفسه يرد عليه عفت التلفون لن احس نار بگلبي مشتعله من يتجاهلني أو يقرأ رسائلي بدون رد عديتها وكلت ميخالف اصبر وأتحمل واعاملك بالمثل شگو عندي شغل عمل.
التهيت بغرفة كرم غيرت الديكور مالتها وصيت على? سرير جديد وصل ومجد ساعدني بي والعصر رحت السوك كلت اغير جو اخذت عمتي ورحنه حتى ما بلغته ولا انطيته خبر على? اساس هلكد مهتم ملتهي بسالفة أخته شد وياها على? شيء ما صاير جان موتتها من ورا خبالاته.
أشتريت جراجف ودببه ومجموعه العاب ونواقص لغرفته ونواعم لغرفتي كلت اغير بيها ومريت محل ملابس اخذتلي كم قطعه ملابس بيت ونوم ما اخذت هو يحب يجييلي على? ذوقه ومعروف ذوقه.
رجعت هلكانه عفتهن ولا رتبت وتعبت من الطريق والفره مالت السوك هسه اني ادور شلعان كلب لنفسي شمدريني كلت التهي عنه ولا اضل وراه.
رحت على التلفون لكيته متصل عفته ورحت سبحت رجعت متصل مرتين واخر شيء كاتب رساله
عصام وين مكبوره اليوم.
أسيا شفتها وما جاوبته
شُنو سالفتج اتصل متردين اراسلج ومتجاوبين كامن طناكرج عليه هسه
ما جاوبت بس منتظرته واعرف راح يكوم يغلط ويفشر
هوووش ومرض ما تحجين شبيج بيج توحد
اي والله توحد منك ليش اللي تعاشرك صاحيه
لا طبعاً لازم تكون نص عقل لن سبحان الله العقله كامل يوكعله بوحده نص عقل بس تزومل وتتزعل
منو گال زعلانه تفسسر على? كيفك
جدي طلع من كبره وگالي منو قابل عوفينا هسه
كرم وينه
يم عمتي
وأنتِ وين
بالغرفه
وين بالضبط.
علي? الجربايه
متمدده لو كاعده
ليش بشنو يهمك
هسه يا يابه اسألج وجاوبي
متمدده وتعبانه
اوففف بمكاني لو بمكانج
مكاني طبعاً جذب مكانه
ادري بيج ما تشتاقين اليه بس اني
بس انت شنو
بس اني جوعان اكوم اسويلي حميسه لحم احسن ما اكابل هالوجه اليلطم خير شر
واني شحجيت تريد حجه وتروح.
وين رايح مو جاي احاجيج شتردين اطلعج من التلفون واتعبج فوك تعبج ومن شنو تعبانه شو عصام مو يمج لو كعدتي تنبشين وطلعين شغل من جوه الكاع بابا عوفي الشغل من انعل...
انعل ليش سكتت لو ما تعرف تسگت الا تغلط وتفشر
لاتشيلين هم نعلتهم بگلبي هسه كوليلي شمسويه وتعبانه منو متعبج حبيبي
والله غيرت ديكور غرفة كرم احسن ما كاعده.
ومنو رايد منج تغيير مو حجيت وكلت من تولدين بخير وسلامه اغير الهم هو واخته لو دوده بيج متعرفين تكعدين اسسيا كعدي وستري عليه شهر لخ تروحين عليها وتجين تتبجين الدكتوره تكولي لاتخلين رجلج يتقربلج مخليتني وجه اليتيم
هو هيج أحسسن علمود تعرف قيمه نعمتك
شمسوي لنعمتي شو مداريها احسسن ما يكون وصابر عليها و? خبالها شتريد بعد
سلامتك
الله يسلمج حبيبتي أكول اشتاقيت شلابسه
ضحكت وجاوبته ثوب قصير التحبه لونه اسود.
اووووف نعلتي أهلي بهل الثوب يرادله تجديد بس انزل اجيبلج غيره ينراد النا سهره معدله تكعد الرأس
سخيف
لا والله ماكو أعقل مني يله حبيبي بعدين احاجيج لازم اروح
عود جاوبني مو تجاهلني
هسه فهمت شبيج اثاري مستخدمه وياي الصمت العقابي مو؟
منو اني لو أنت
عليج الله استخدمي كل يوم وفكيني منج ومن نكدج
خلف الله عليك
احبك يا حبيبي أنت
ضحكت يله دتروح
ارجعلج اتصال واريد تدلليني
تمام راح وصفنت هذا خبل وطباكات فلا صاحي هالرجال.
صار الليل وكمت لملمت الهوسه وعزلت الأغراض على? صفحه بعدين ارتبهن مالي خلكهن شو صايره بسرعه اتعب شوكت اولد وارتاح منا حمل منا عصام هذا حامل بي بدون كرش حاملته بگلبي بسوالفه وسخافته تذكرته وأشتاقيت خرب بيومه ولا اكدر من دونه يله ننتظره كال ارجعلج أتصال خل اشوف يوفي بوعده.
طلعت لكيت عمتي موكفه أزهار وتعلم بيها على? الطبخ هاا منال العالم جايه وما عندي علم
أزهار أتقشمري أتقشمري شگوو عليج.
أسيا تحمس بالبصل ولعبانه نفسها خرب بيومج على? حركاتج لعد شعبالج هيج الطبخ يرادله نسوان معدله
أزهار اجت وصال رقم 2 عفيه أسيا ما يصير الطبخ بدون بصل والله اشوفه ماله داعي بس دموع وريحه خايسه تتطبع بأظافري يمه خلصيني عاد ما طلع عشه هذا
وصال وين يصير طبخ بدون بصل شو حمسي وبلا لغوه الله يساعد الياخذج يموت جوع والله بيضه ما تعرفين اطكين متكوليلي شلون تعيشين ويه الرجال وعيال.
أزهار ما اتزوج ما أتزوج عوفيني يرحم أهلج
أسيا متلاغيات هي وياها وعمتي نكزت جنيتها الا تعلمها على? الطبخ اضحك عليهن وعمي اجه شايل بيده اكياس خلاهن على? الميز وكال
كمال جهزولنا العشه جبت وياي مشاوي
وصال منو رايد مشاوي مو طبخنا عشه
كمال مجد خابرني وكال جيبلنا عشه وياك ما طابخين
وصال يااا وصارلي ساعه اعلم بنتك علمود تطبخ النا العشه وأهل أهلي أشتعلوا وتالي تجيبلي مشاوي
كمال عوفي وجهزي بين ما اصلي.
وصاال اويلي منك مجد الا اكسر رأسك
أزهار يمه خل اروح اسبح فدوه
وصال لا والله فلا تروحين خلصيها طبخ ولي يله حمسي صدر دجاج يله امييي فاهيه يربي يربي
أسيا عوفيها عمه شوي شوي تتعلم خوما من اول مره
ازهار تباوعلي وتضحك كملت وجابتها بعد ما جهزنا العشه بس والله طلعت طيبه
أزهار عاشت ايدي شوف بابا طبخي طيب
كمال والله تعيشين باباتي بس متوصلين طبخ أمج
وصال ما طالعه عليه كرت عيني.
كمال تتعلم تتعلم محد اجه من بطن امه متعلم على? كيفج وياها انطيها مجال
أسيا ما جاوبته بس حسيتها ضاجت لن احسن تربيه ومصلحة أزهار من مسؤولية عمي مو مسؤولية أحد لن بنته وحيدته ويحبها ويدللها بنته محد اله كوه عليه بس عمتي هم الها دور خطيه بس بوجود عمتي تسحب نفسها
كملنا العشه وأزهار غسلت المواعين وأني سويت جاي صبيت الهم وشربوا عمي كاعد هو وعمتي وكرم يكمز عليهم ومجد طلع بالحديقه صديقه أجه عليه.
مشيت وصاحت وراي
أزهار أسيا أوكفي اريد احاجيج
أسيا كولي حبيبتي
عصام هم حجه وياج بخصوصي
لا والله أبداً ولا جاب طاريج
شعجب
اي والله حتّى گالي لاتتدخلين ومنعني اتدخل نهائي وحذرني اذا متدخله ما الوم الا نفسسي وفعلاً شيء بينكم وربي يهدي القلوب
ماشي حبيبتي
اذا تحتاجيني تعالي أني بغرفتي
ماشي حبيبي.
أسيا أبتسمت ومشيت للغرفه مالتي تمددت باوعت تلفوني ما أتصل گالي أتصل لا واضح خوش تتصل صاير لوتي وتخاتلها عليه عبالك اني غشيمه عنك
ضليت مراقبه حسابه صار ساعتين نشط الأن وأدز بهل الرسائل توصل بس ما يشوفها.
وينك حبيبي الووو مرت وقت ودزيت تعشيت فاتح نت ميفتح ولا يجاوب والرساله توصله شنو سالفته
مو كلت أتصل كرم يريدك ماكو رد نهائي هو غير لو يشوف الرسائل!
أخر شيء طكت مرارتي وأتصلت ورفضني ويامن مشغول وما ترد? رسائلي وأتصالتي دزيتها ومر وقت وجاوبني
عندي شغل يمعوده
شغليش هذا
ترى بالدوام ما فاضي لنكدج اخلص واخابرج
هاا كلتلي شغل وشغلك هذا الأ? التلفون طول الوقت نشط الان!
انتظرته يرد وصلت بس ما يفتحها نشط الان راح يخبلني هذا شبي شوي و رد.
يمعوده تلفوني عايفه وفاتح بيانات طبعاً يطلع الج نشط الان شغلي أعلى من رأسي خفارات وجماعتي يمي تردين كل الوقت اسولف وياج شبيج أنتِ
ما جاوبته بس أنحمست قهرر اعرفه يجذب متأكده جاي يخوني وواثقه من هالشيء أربع وعشرين ساعه فاتح نت عرفته مو خالي رجع جاوبني لن حس بيه
ما تجاوبين شبيج حبيبتي
سلامتك شبيه يعني
مشتاقتلج والله بس قدري ظروفي يا عيني يله أنزل واعوضج عن أنشغالي عنج
ما جاوبته.
مو أحاجيج شبيج أنكلبت خلقتج مو صوجج صوجي اني كاعد احاجيج يابه دولي.
شمرت التلفون ولطمت? وجهي الله ياخذني? قسمتي الكشره ما أعرف شحبيت بي وافقت عليه لا وكتلت نفسي عليه لو عصام لوما اتزوج أستلمي هذا عصااام ربالي عله بوسط گلبي رجال ما ينحزر وصعب الاطباع
صافنه وأكل بروحي رجعت فتحت التلفون نشط الأن ويامن عصام ويامن راح تموتني قهرر يله تنزل من الدوام وأفتح حسابك بتلفوني ونشوف شمسوي سهله حبيبي!