رواية بين قلبها وعينيها كبرياء للكاتبة شمس العراقية الفصل الرابع والأربعون
زهار كاعده بالصاله مالتهم ودموعي على خدي وممه جود ولعبه گ?م بيدي وصافنه وصفناتي تأخذني لحبهم لحبها لأخوي وأهتماهها بي وهو هم حبها وعشگها ما شفت مثل حبهم أبداً والله جنت ناويه انطي قصتكم لكاتبه ليش هيج النهايه تكسر الگلب ليش ياربي ما ينفصلون والله صعبه علينا.
حسبي الله عليج يا هديل عساج بحرگه قلوبنا دمرتنينا هجمتي بيت كامل على حساب أنانيتج وحقدج ونيتج جانت واضحه راسمه ومخططه لكلشي بس أسسيا ما سمعت مني وأرتكبت خطأ واني شريكه بهل الخطأ ياريتني ما بقيت ساكته ياريتني بلغت مروان يتصرف لن موقفه كلش جان حلو وقوي موقف اخ لأخته وگفلها وگفه ينشهد ويتسولف بيها.
نهضت بتعب وباوعت ارجا? الغرفه الحزام بالكاع والكيبل مال التلفزيون الضربها بيهن تالي طگ گلبي وغادرت مملكتهم مثلما جانت تسميها وأحلى المسميات لامست قلبي أحلى عائله شافتها عيني جنت شاهده على كل الايام واللحظات العاشوها سوا الى أن وصلوا النهايه يارب مو هاي النهايه.
بقيت بالصاله لازمه بطني ومغص قوي وتذكرت أسيل خلي أخابرها وأفهم منها شصار مروان راحلهم بس لا تعارك هو وياهم بس منين حتى.
رقم ما عدها كمت دورت على تلفون أمي بلكي
ما مأخذته وياها مجد تلفون امي وين
مجد تلكينه لو على الكاونتر لو ميز التلفزيون دوري
ازهار دورته ولكيته بحثت عن رقم أمها ولكيته وأتصلت عليها رن أكثر من مره جاوبي وأجاني صوتها تبجي.
أسيل الو عمه
أزهار أسيل أني أزهار شبيج تبجين شصار مروان أجاكم.
أسيل مصيبه ازهار مصيبه تعالي شوفي علگت أختي تطلگت وووو شحجيلج
مروان وين
راح قبل شويه
أختج ليش هيج سوت.
والله ياما نصحت بيها وعقلت عليها من أول ما عرفت تحجي وياه بس ما يفيد ما سمعت مني ولا همها أحد عناد واللي ب?أسها تسوي لما انهجم بيتها والله يدري شراح يصير بعدها
مروان شسوه.
بعدين ازهار بعدين أخويه حارث أجه ما عنده علم يمكن هسه اجه الله يستر باي.
ازهار أنقطع الخط ورجعت كعدت وعيني على الباب وينكم وين صرتوا وأنفتح الباب ودخل مروان دمه فاير وأعصابه حاميه واضحه من بروز الدمارات ورجفة إيديه وأنفاسه العاليه مروان.
مروان أزهار سگتي
شصار أحجيلي.
أنتِ هم جان عندج علم مو؟
الصراحه أي
وليش سگتي ليش أزهار تدرين أخوح عصام مظلوم تدرين لو لا!
ما فهمت شلون يعني مظلوم من أي ناحيه والمراسلات والكلام البينهم شنو معنى؟
أنتِ ركزتي على المحادثات قريتي الكلام زين ما وضحلج لج أكو شيء غامض
أي وضحلي ليش شعرفت أنتَ
هديل دخلت حياة عصام بالحيله والمكر ونيتها واضحه وهجمت بيته بس عليمن عليمن
علي? مروان!
هديل الساقطه عبالها هي وأهلها وأمهن الادبسزز أتخلى عن أخوي واخلي يهجم بيته بإيده ويطلك أسيا بنت العز والشرف المره السباعيه أعدها بمية زلمه ويطبق العرف العشائري ويتزوجج يا هديل والله متعدي على حرمة غيره ولازم يسترها من على هيج قوانين تكسر الظهر.
لا لا اني الكواده والكحاب كاعدلهن كعود وغايتها.
لو اعرف اجرم بيها ما تتحق واسيا مثلما طلعت من البيت ترجع معززه مكرمه وهالبيت يبقى بيت دوله معزز ومكرم وما تطلع منه العيبه واني مروان ابن كمال عساني لا عشت اذا احقق غايتج ياهديل.
مروان شتسوي
كل الخير خل يجون والله كريم.
ازهار ضلينا كاعدين واجه مجد بإيده التلفون
مروان منو
مجد سيادته
مروان هص دير بالك تحجي حرف كوله كلشي تمام.
لاتبين اكو شيء أعدمك مجد اذا سيادته عرف صاير شيء يله افتح خط لا يحرك الدنيا على روؤسنا.
ازهار مروان يتسمع على كلام بابا يسأل علينا وعلى أسيا والجهال وعصام.
كمال أمك وأسيا والجهال شلونهم عصام ومروان نزلوا
مجد الحمدلله كلهم زينين وبخير اي نزلوا اليوم سيادتك
كمال وأمك وينها أنطيناها
مجد هاا راحت ل الاسواق عدها نقوصات.
كمال أسواق بهل الوكت شلون ادزونها تجيبلكم نقوصاتكم ولوحدها دازينها ولكم انتوا مو زلم شنو شغلكم اني مو محذركم ما ادزون امكم لوحدها تتسوك بله صار عليها شيء شسوي بيكم امشي لك الحك امك وانت تجيب النقوصات وهاي اخر مره تخلونها تطلع لوحدها.
مجد لا سيادتك مروان وياها لايضل بالك عليها
كمال ها زين الوضع موزين بابا واخاف عليها يله عود أتصل عليكم
مجد تأمر سيادتك.
مروان اوووو
مجد ليش ما كلتله مو لازم يعرف.
مروان شمدريني عصام گال لاتبلغونه غير لو يجي ونفهم منه وين صاروا.
أزهار مروان ومجد يفترون وصلوا عصام وأمي وأنفتح الباب دخلوا عصام كعد حيل مهدود وتعبان
عصام أزهار كلاص ماي ريگي يابس
واصل عوف الجگاير راح تكتل روحك بي
عصام شيطفي ناري غير الدخان مروان مجد سيادته خوما صار عنده علم باللي صار
مروان هسه جان على الخط وسأل على الكل وعيني يمه سيادته گال من تجي كولولها ابويه سأل عليج.
وصال وين تلفوني ازهار تلفوني وياج
مروان عيني قبل لاتتصلين عليه اكعدي خل
نتفاهم وياج
وصال تتفاهمون وياي على شنو
عصام ما أريده يعرف اي شيء عن اللي صار نهائي
ازهار أخذ كلاص الماي شربه ورجع كمل كلامه
عصام يمه أنتِ ومروان ومجد وأزهار ما أريده يعرف ولو حرف وأني احلها بطريقتي ومن تنحل افاتحه بالموضوع بالتمهديد.
وصال وتردون أسكت واضم على ابوكم كل هالسالفه المصخمه ترديني أطمم على سوالفك أنت وهديل وضربك ل أسيا واخذتها ل اهلها شمرتها هي وجهالها واجيتني متباهي بروحك اني أحلها لا هواي راح تحلها من يكبعونك بزواجه بالناقصه هديل وتاكل تبن وترضى وتسسكت غلطان ما غلطان غصباً عليك يسحلونك ويخلونك توافق على قرارتهم.
عود بعدين تحجي ل أبوك لا السالفه ضروري توصل لأبوكم لن اذا مو الرأس الجبير يوكف عليكم انتوا ما ينكدر الكم وراكم مصايب وكسر رگاب واني كافي عليه خطايا بنات العالم عندي هالبنيه عبالكم ما الهن حوبه وبيمن تطلع تطلع بنتي وحيدتي.
عصام يمه بس هالمره اوكفي وياي وسمعي مني سيادته اذا يعرف يگلب عاليها واطيها يسحب الرتبه من جتافي يديحني بالشوارع هذا أول شيء يفكر يسوي وبعدها يطلك اسيا لن هو بدون شيء متحمل عليه شبيج أنتِ قابل ما تعرفين ابويه من يكوم يصدر قرارات.
وصال أبوكم يصدر قرارت بحق لن رجال يخاف الله ببنات العالم ولا واحد طالع عليه ويشبه ولكم من يوم اخذني ما يوم دزني ل أهلي زعلانه دصيروا مثله يحظي لا انت يوميه دازها لأهلها تعثر بالكاع ترجع عليها امشي ل اهلج هذا الشاطر بي تعلمني بيك.
عصام شمسوي تعلمني بيك مكود قابل شمصخم.
وصال لا خطيه عليك لعد هاي سوالفك أنتَ وهديل والمحادثات الشافهن مروان واسيا دزتهن لسيف شيسمونها تلعبون دعبل بالخاص لوتعيدون ذكريات الطفوله لو تلعبون خيتلان بالغابه الاسد والفأر كولي شيسمونها يالفهيم.
عصام يمه يرحم جدج السابع مو وگتج هسه خليني أفكر والكي حل لمصيبتي اريدج توكفين وياي لو تتقشمرين عليه بس والله وكت اني ابو ك?م صرت مضحكه للوگت هاي هي انكشفتلي الوجوه.
وصال دنجب انكشفتلي الوجوه دكعد واحجيلينا يله وأنت الثاني إشسويت من رحتلهم.
مروان خليني ساكت لا أكوم اعدلهن بالهندي يمه ضاب لساني عليهن بالتفلات تصدقي على روحي بس علمود اضل ساكت والبكلبي ما يطلع.
وصال خير أن شاءالله وهسه يا زلمي الهتيله
مروان يمه لاتوجهين قذايفج علينا السالفه وما بيها عند عصام اي ابو ك?م احجيلنا السالفه كلها.
عصام ماعندي شي أحجي منتظر سيف شيقرر شيسوي على شنو ناوي وحارث ليش لحد الأن ما اتصل.
مروان ما عنده علم ولا واحد من أهلها يدري بالسالفه كلها ما وكعت بس ب?اسك أنت وأسيا وهديل شامخه مثل الثور وعين الكح كاعده
ولا هامها شيء الصلافه العدهن ما شفتها بنسوان غيرهن.
بس عمي الاب مخلينه بس لواجهيه لا يحل ولا يربط الامر والناهي بيد العمده جنان هاي رب الاستفلات والانحطاط والانحراف أنت أذا تريد تلزم?أس الحيه الزم امهن واذا الام فالتوا لا عتب على الابناء لن الاساس العرج مليان خياس ومنا وقيس.
وصال يمه ولك لسانك عيب شنو هالحجي مو عمتك أم مرتك وأنت نسيبهم لاتخرب علاقتك وياهم من ورا سوالف اختها.
مروان من عمه العماها وعمه بناتها وياها اني عمتي وحده مثل جنان عوذه تفله بوجهي على هالقسمه الخايسه شنو هالانحطاط والاستفلات
لك أنتَ ربك حبك ونقذك وخلصك من أولها ورزقك وعوضك بإسيا ترجع تلحس الماعون مليان زفر ليش شبيك معمي ساطرك العباس راكعينك بسحر ثلاثي
ازهار عصام ساگت ودايخ ويفرك بأيده حتى ما رد على مروان رجع حجه ويه أمي
عصام هذا هو ما تكولين لابويه متفقين
وصال وإذا عرف بعدين قابل محد يوصله الخبر.
عصام يمه سيادته حالياً هو بإجتماعات مهمه ويه الوزير وتلفوناته مغلقه ما يجاوب احد واذا يريد يتصل يتصل فقط على أهل بيته يعني مو فاضي فهمتي عليه لو ارجع اعيدلج.
مجد اي كال بعدين ارجع أتصل عليكم.
عصام اهاا سمعتي واذا يتصل تتصرفين بوضع طبيعي وتتحكمين بلسانج وتضبطين مشاعرج واي حرف يخص السالفه كلها منعاً باتاً ما تحجيله.
مروان يمه ركزي زين وحفظي كلام عصام مو بعدين كدام سيادته تجفصين بأم السالفه وتبعرينها لا الحلو تغلط بالأسماء وتكوله مروان مو عصام لن اعرف بيج اني الوسطاني دائماً تضحين بيه علمود جبيرج تخليني بوجه المدفع ديري بالج ارفعج اعدام والله خو سيادته ما موجود بساعه اصدر حكم وانفذه.
وصال ما تكدرلي استقر لا تنسحل
مجد شو كمتوا تهددون بأمي ترى سيادته موكلني حمايه الها.
مروان دسكت عمي خو انت اول واحد لن كثره بلا خثره.
وصال بس هيج تغلطون يا امي
عصام الغلط كله اني اتحمله بس سمعوا كلامي رحمه للاسلام مره وحده واحد منكم يسمع كلمتي
ازهار يحجون ويخططون واني خارج حديثهم وضلوا حاطين امي ويقرون ب?اسها وقنعوها وسحبوها لجانبهم وهذا الشيء غلط لن راح تصير كوارث والكارثه العظمى يتصلح الغلط بزواج عصام من هديل عيعع يمه والله هذا الشيء ما يصير.
خلصوا وعصام ومروان راحوا الصاله مالت عصام وامي راحت الغرفتها تبدل وكفت أحاول اسمع.
مروان تعال أحجيلي صدك رجعتلها يعني سالفه بيها حبجيات لو أكو شيء ثاني إبالك أحجيلي وأنا اخوك لن السالفه كلها ما خرطت مشط دماغي
عصام أنت تعرف أخوك
اي أعرفك خوش زلمه ومعدل
هاي هي بعد دام تعرفني لاتسأل لوكتها عود أحجيلك
ردت تلقنها درس؟
بالضبط.
غلط هالشيء وأنتَ الغلطت مخلي?أسك ويه مره عمي أكو النسوان كيدهن عظيم ينخاف منهم قسم بالله تجيك بالكلام المعسول وتأخذگ لشط وترجعك عطشان تلتفت عليك مثل الحيه متكولي وين مأخذ عمرك بيمن مورط نفسك بيا خيسه داخل دتعال احجيلي أستشيرني يحظي جان اني ربيتها بطريقتي لن أعرف دواها شنو واكع على علتها.
شنو.
تريد اللي بالي بالك ضاله بنفسها هيج شخصيات نفسيتها وسخه متشوفها حظرتني لن واجهتها بحقيقتها الخايسه وزعلت وگلبت خلقتها وصارت مستشرفه برأسي لو جاي عليه يحظي شبيك تتصرف من?أسك
أسكت لك مصدوم بشكل مو معقول بس اسكت لن عرضي والعرض واكفه تحجي بي وانت لسانك ضبه ولاتضل تفلت بسوالفك مهما يكون عمامنا ونسابتك ابلع واسكت.
هو بالعها من زمان وساكت ومأكل طن وحل هاي هي بعد صارت وكع الفأس برأس يله امشي نطلع واني اخابر اسيل أستفسر منها.
ماشي.
ازهار انهزمت لمطبخ وشفتهم طلعوا أثنيهم والله ينخاف منكم بس فرحتي بعصام يعني مثلما توقعت لازم ابلغ اسيا رحت المطبخ اتصلت عليها مغلق سوده عليه اكيد مصدومه ومقهوره راسلتها فاصله النت يمه أسيا شلونها.
وصال شلونها الله يكون بعونها عفتها مثل الجثه الهامده وعبالي اشوفها قبل لا امشي قافله الباب على نفسها وصيت أمها عليها ادير بالها لما نشوف تاليها
يمه خوما ينفصلون.
لا يابه بكيفهم وسالفة هديل مكيده منها توكع أخوج قابل ما أعرف ابني اني حجيت وقسيت وياه بس ابني واعرفه ومربيته عدل تربيتي بي ما تخيب وما يفشلني وادري نيته شنو جانت بس هذيج شيطانه لفتها عليه وكعته بمصيدتها اخ لو عندي علم قبل بساع لو اروحلها لبيتها واسحلها سحله ابرد خاطري بيها بس صارت وتريد تصير مكتوبه على اسيا تتعذب وتتلو? سوده بوجهي عيونها گبالي وهي تبجي بس طولها بالبيت كافي مثل الحمامه خفيفه لطيفه ما تضر مخلوق عيني هي فدوة لروحج يا يمه يا أسيا عسى حرگة گلبج تحطم هديل.
تحجي وتبجي دم واني وياها ابجي عليها وكلبي نار
گلبي ممرود مرد غرفتها خاليه وصوت الجهال وكرم يكمز على?اسي و?اس جده وعمامه ويركض ورا مجد تعالي طلعني واشتريلي لو ضحك ومنغات جودي ومروان عقله ناكز وروحه متعلگه بيها اوفف يا يمه شايله هم اذا اجه ابوج وسأل عليهم شگوله هو روحه بجهال عصام.
الله كريم تنحل أن شاءالله ويرجعون وهديل حسبي الله عليها.
الف مره بس تعالي اني خايفه على أسيل لاتنشبج بالسالفه وتروح بالرجلين سوالف أختها تأثر عليها ويكوم اخوج مروان يكسر ركبتها ويطلگها لن هو بدون شيء احسهم ما مرتاحين بزواجهم ويلكاها سبب ويعوفها وهي شنو ذنبها المسكينه بشر
اعمال اختها.
لا عفيه ماما والله خطيه أسيل دره شيجيبها لأختها وهي شنو ذنبها فدواتج لاتخلين سوالف أختها تأثر على زواجها من مروان وبعدين هي ما راضيه خابرتها وخطيه كالت ياما نصحتها وعقلت عليها ما سمعت مني من اول ما عارفه ناصحتها بس هذيج ما تسمع كلام احد يعني أسيل ما إلها ذنب.
لا يمه مخبله عاقله اخلي سوالف أختها تأثر عليها خلي العصر يروح يجيبها احسن ما تضل وتسمع حجايه من أهلها ويغثونها هي حساسه بسرعه تتأثر وما تعرف ترد احد حلك الفطيمه.
مروان منو حلك الفطيمه أسيل
ازهار مروان
مروان يعني جان عدها علم بسوالف أختها من الأول مو.
ازهار لا ماكو هيج حجي شمعرفها هي وهديل شيطان ما تشرك احد بسوالفها
لا تعرف من الأول وضلت ساكته ماشي يصير خير
وصال ولك مروان اوكف يمه بس خل أحاجيك.
مروان بشنو نحجي يمه بجنتج شريگة اختها بمكيده وكعن بيها اخويه
هي شعليها بأختها
يمه فدواتج طيبة الگلب هاي بطلنها ترة بس أنتِ وبنتج ضالات على نياتجن تعلميني بيهن وبعدين اذا ما عليها بأختها ليش ضلت ساكته ليش ما كالتلي تخاف مني وتستحي جان خابرتج وكالتلج عمه ترة اختي ناويه تهجم بيت عصام وحذرتنا من سوالف أختها الساقطه ليش ضلت ساكته بس يصير خير
ولك يا خير لاتشبجها ولك خطيه والله فقيره
گتلج يصير خير.
ما جاي اشوف الخير بكلامك الله يستر
ازهار بس لا يرجع عليها عفيه ماما صار لازم تبلغين بابا هسه وكت أجتماعات احنه محتاجينه من اتصلت عليه هو مغلق لو حاضر بسساعتها جان اسيا ما طلعت من البيت ولا هما بكيفهم يتصرفون يعني اسيا انوب أسيل المسكينه غلط منج ما تبلغين بابا.
وصال شسوي متشوفينهم شسوا وساعه كاعدين يقنعون بيه تردين اكسرهم كدام ابوهم وهما يخافون منه ويحترمونه بالأخص اخوج عصام هسه خلي اشوفه شيسسوي وعگبها اخابره خلي يعوف شغله ويجي يحل هالمشاكل مدري وين جانتلنا مستقرين والله ساتر علينا وكاعدين شگول عليج هديل خربتي راحة بيت كامل.
يعني ما تبلغين بابا
لا نصبر هسه خل نشوف أخوج عصام
تمام رايحه اتمدد تعبانه ظهري كام يوجعني.
روحي أرتاحي من اجيتي لحد الان تفترين وأنتِ حامل اشهرج الاولى
ازهار صعدت لغرفتي تمددت وأتصلت على أسيا مغلق لحد الان سوده عليه لازم أتواصل وياها بس شلون ياربي وبهل الأثناء هشام أتصل عليه يبوه ولا سألت عنه وجان متصل عليه ولا رجعت أتصلت جاوبته هلا حبيبي
هشام هسه تذكرتي حبيبج بعد وكت لو من تروحين ل أهلج تفقدين تنسين الدنيا
هشام تغار من أهلي
جان سألتي من الصبح لحد الان أنتظرج واتصلت متجاوبين مو من حقي.
حقك حبيبي بس أعذرني ألتهيت تعرف أول يوم ازاحة الشوك
اويلي على الشوك
اي شعبالك هذول أهلي
اي شگايل أني
شلونك وين أنتَ بالشغل لو رجعت
الحمدلله زين لا بالشغل ما ارجع لليل يله المن راجع الغرفه اليوم ما تنسكن
يومين وتعال أخذني
يومين بس والله ما أكدر على فراگج صعبه عليه
فدوه اروحلك حبيبي.
ازهار من أخذتج أتكمل وياج اني وياج صرنا واحد وانوب كملنا بطفل وحلاوة هو ديري بالج عليه ما يحتاج اوصيج أنتِ امه احرص مني عليه.
لايضل بالك حبيبي دايره بالي
يله حبيبتي لازم أروح بالليل أخابرج
تمام حبيبي أنتظرك نهيت الأتصال دزيتله
روحي دائماً معاك
أحتضنها لروحج أحبج زهرتي
أبتسمت وتلمست بطني أبني حبيبي أني وأبوك بإنتظارك وبعز فرحتي وصفنتي خطرت على بالي راسلتها ماكو وأتصلت مغلق وتالي نمت وكعدت جسمي متكسر باوعت الساعه ب 9 بالليل شكثر نايمه رفعت نفسي وشفت صينيه مليانه فواكهه وحبشكلات شلتها ونزلت لكيتهم كاعدين ثلاثتهم.
يم أمي وعصام صافن وصفناته واضحه عليمن متفقدهم مكانهم خالي وفارغ.
منو منكم مخليها يم?أسي شنو هالدلال
مجد أني مو ألج هذا لحبيب خاله.
ازهار حجه وأني استحيت عصام ومروان باعوا اليه نزلت عيني مستحيه خليت الصينيه وامي گالت
وصال ليش مستحيه يمه قابل بايگه عود راح تصيرون خوال بالطريق جايكم ابن أختكم.
أزهار ما حجوا شيء مروان أخذ تلفونه وطلع برا وعصام ضل كاعد بس ساكت سگوته يقهر صبيت عشه وكعدت أكل صدك ماما عندج رقم أم أسيا
عصام شسوين بي؟
ازهار أريد اسأل على أسيا تلفونها مغلق وحساباتها كذلك فاصله الأنترنت.
عصام عوفيها شتردين منها
وصال ليش تعوفها أختك ما تهون عليها العشره شوف لك خاف عبالك طلگلها وتريد من عندنا نعوفها والله نعوفك وما نعوفها وطلاك لاتحلم ماكو.
عصام هذا الشيء منتهي منه خل أخلص من هاي السالفه الخلتني بيها واتفرغلها واني وياها أنتهينا وما يهمني تعوفينها ما تعوفينها الله يثخن لبنجن واخر همي.
ازهار شال تلفونه وطلع عصبي وبقيت مصدومه ومقهوره ليش هيج گلب وحقد عليها فدمره.
موقفه صعب ما تدرين الصعوبه راح يواجهه
كدام عمامه والزلم ورجلها وسالفة عيب وما تنحجي ولحد الان الهدوء محد خابر وهذا الشيء مخوفني واظن باجر الكعده الله يستر.
الله يستر اي يمه عندج رقم ام أسيا
اي بتلفوني موجود شوفي وأتصلي عليها اريد أحجي ويه الجهال خل تفتح الأنترنت عليمن مبتعده طز بالراح وبالاجه.
دورت بتلفون امي لكيته وأتصلت واجاني صوت هلا خاله شلونج
فوزيه هلا حبيبتي ازهار مو
اي ازهار عيني خاله اسيا يمج
أي نايمه والله
كعديها فدوه
هسه ابقي على الخط أسيا يمه أسيا شو كعدي بنيتي اسيا يردونج على التلفون شو گومي كافي نوم.
أسيا اذا عصام وربي أهج واعوفلكم البيت ما اريده صوته ما اريد أسمعه
فوزيه لا مو عصام هاي حماتج ازهار
أسيا ازهار عيني ازهار لك حبيب روحي گلب گلبي عشقي شلونج اخ گلبي طاگ عليج عمتي شلونها
وصال بعد وكت كلب گلبي وعشقي وبعدين عمتي شلونها همزين خطرنا على بالج وينج يالكاطعه
أسيا عمه مو بيدي والله اعذريني اني هم حقي.
حقج والله حقج بس لاتبعدين وتغلقين تلفونج وتفصلين الانترنت مو جنتي خوش مره ليش بعدين تبيين اله متأثره بي رجعي مثلما اعرفج رفعي?أسج بشموخ واني وياج مو ضدج.
قصدج أفتح تلفوني وحساباتي
اي بنيتي وما عليج ولا كأنما عندج رجال طز بي هالخاين هالناقص هذا باع العشره بيعي ولاتهتمين ولا تخلين بالج يمه
عمه احبج هوايه.
مو بگدي بعد روح عمتج لعد هين عليه البيت فارغ من صوتج أنتِ وجهالج جنج حمامه تفترين علينا اليوم البيت شايل والله وما ينسكن من دونكم
عسى ما انحرم منكم عيني عمه
ولا منج يا عيني والله كريم تنحل ان شاءالله وهسه اريدج تنفضين نفسج وتطلعين من القوقعه كلها وصيري قويه وتحدي وبيني اله أنتِ قويه ما مهتمه اله ولا متأثره بي ولا بخيانته لج شعوطي بعد هذن السوالف أنتِن تعرفنهن مال النت والستوريات.
هههه اي الباقي عليه عمه شكرا لن حاسه ييه
شلون ما أحس بيج شلون بنتي الخيانه صعبه اذا اني ما احس بيج منو يحس بيج ولو اعرف ابني ما خانج بس غلط منه ضل مستمر يحاجيها وبعدين احاسبه عليها والا اخلي يجدي شوفتج أنتِ والجهال
هسه احظره
لا لا ديري بالج تحظري بقي عينك تنظر يا عزيزي شعوطي يباوعلك بس ما يلوحك
هاا
اي بنيتي الحظر لناس الموزينه لاتبيعين مثل ما باع أنتِ احسن وأعقل منه ما اوصيج بعد
تمام عمه أن شاءالله.
ازهار انطيناه ينخاف منجن وصال مصدومه بيج
وصال شتردين لعد اعوفها واحضن اخوج واكوم ابجي وياه هذاك رجال وهاي مره يستاهل شكو عايفلي الورد وراكضلي الشوك.
ازهار والله عمي صدگتي اخذت التلفون ها حبي
أسيا عشقي شلونك كيفك شو اخبارك
مشتاقه البيت حزين يبجي عليكم
بعد روحي
ابتعدت عن امي احم اريد احاجيج
كولي
باجر الكعده هذا الفهمته
اي ويتزوجها وين الغريب بالموضوع
يتزوجها شتحجين أنتِ
اي مو كدامج حجه اكسر عينج بيها.
كذاب والله يريد يحرك گلبج لج يريد يلقنها درس
ههههه أعذار واهمه حبيبي
لاتنطينه الها ولج شبيج سوي اي شيء منعي هالزواج أنتِ قدمتي الها عصام بطبق من ذهب وهذا اللي تريده وتوصله وتحقق الها وأنتِ اذا تطلعين من حياته لا سامح الله الله لا يگولها لاتخلينها تأخذ مكانج لج مكانج لو الج لو يضل طول العمر فارغ
أدري بي يعطش ويجيني وصدگي يفتر على نساء الكون ماكو وحده تروي عطشه غيري اني تركت ختم بكل روحه.
دام هيج أمنعي هالزواج لو أنتِ لو ماكو غيرج
أني بعد ما إلى مكان بحياته خلاص وصلت لقرار أخلعه
هسه عوفينا وشغلي مخج منعي زواج هديل من عصام
ليش امنع زواجهم بالعافيه عليها فضالتي عيع خل تشبع بي بقيته الها وهاا لحد الان ختم ملكيتي تلكينه طابع برقبته خل تشعر بالقرف اني من يمي قرفت بس عمي هديل نفسيتها خايسه تحب المستعمل خل تشبع بي مبين هذا اللي تريده وتحلم بي بلكي يشبعها على حجمها وقياساتها.
أسيا لاتحجين بالعميق لعبت نفسي خرب بيومج
هاي حقيقه گلبي وأني الزم ما عليه كرامتي خط احمر لا عصام ولا غيره يتعدى على گرامتي ابيعه وما اسال عنه كلمن يهين وجودي وقيمتي بحياته خلاص اشطبه من حياتي.
لا أسيا مو لهل الدرجه لخاطر أطفالكم.
صدكي ما عليهم شيء باجر يكبرون ويكملون حياتهم ما راحت بس عليه وشگو عليهم غصباً على اخوج يوفرلهم أحتياجاتهم ويبيقيهم نفس عيشتهم ويخصص مصرفهم مو منيه من عنده لا هذا واجبه واكسر ركبته اذا شال ايده عنهم واذا اخلي عقلي وياه ادمره والله.
لا ما يسسويها ابو گ?م
حركتي دمي عفيه من تتصلين لاتجبيبن طاري تصعد الحماوه وانفعل خرب شنهي هاي صرت نار
تصعد الحماوه بشنو
نجبي صفي نيتج أخر همي عابتله هو وحماوته.
هههه تعالي لج بابا لحد الان ما يدري
ليش عمو كمال لحد الان بالدوام
اي ومحد بلغه باللي صار
ليش
طلب عصام وجمعهم وقنعهم ومنعهم وسيطر على عقل أمي واني هذا الشيء ما مرتاحتله
عصام
اي
لشنو جاي يخطط
ما أعرف والله
دزيلي رقم عمو كمال اخر مره أتصل من عنده لن ارقامه كثيره ما اعرف اي رقم منهم اكدر احصله
شتسوين بي
دزي وبعدين تعرفين شسوي
لحظات اذا يجاوب
يجاوب يجاوب
تمام هسه ادزه الج برساله
بالأنتظار.
شفت المكالمات ونسخته ورسلتها الها وكتبت الها شتسوين حبابه
سبرايز ناري.
ينخاف منج
بعدين أتواصل وياج اوك ادعبلي ومسحي كلشي
تمام حبيبي نهيت المراسله وحذفت الرسائل وعصام اجه وعيونه تتنقل على التلفون وتقدم سحبه مني وگلب عفته يگلب ما بي شيء الحمدلله حذفت عافه وباوعلي بنظرات تخوف.
ضليت كاعده بصف ماما بس نظرات عصام ما فارگتني الصراحه بديت أخاف امي باوعتلي
وصال شبي هيج يباوعلج
ازهار ما أعرف
هيج من كيفه.
اي يله اني صاعده أنام تصبحون على خير
عصام بعد وكت وين تنامين من هسه
وصال شتريد منها خلها تروح تنام وترتاح حامل واكيد تعبانه روحي بنيتي نامي وأرتاحي بس قبل لاتصعدين تنامين شوفيلي أسيا ما فتحت حساباتها اريد احجي ويه الجهال.
أزهار هاا أي لزمت تلفوني وهو ما شال نظراته عني أرتبكت وتوترت راسلتها ماسنجر هاا أسيا أمي تريد تحجي ويه الجهال رسلتها ماما ما فاتحه.
وصال يجوز ناموا يله الصبح روحي نامي.
ازهار تمام مشيت وتلفوني بيدي ونظراته تلاحقني صعدت واني امشي انضربت بمروان غير تباوع كدامك.
مروان شمدريني خرب ضربتيني على حاجبي اخ الله
ازهار اسفه مو قصدي
مروان لا عادي ولا يهمج
ازهار نزل ودخلت الغرفه وأتصلت عليها مغلق ليش غلقته اخ منج أسيا فتحي عاد والله متت خوف من نظرات عصام هسه اني شمسويه خايفه هو دزيت رقم بابا الها شگو قابل رقم عمها شيصير قابل اتصلت على هشام وجاوبني بعصبيه
هشام شسويلج هسه.
ازهار شتسويلي ليش شگو
بيوم اللي صارت المشكله أنتِ وأخواتي
اي
ليش من طلعتي من الحمام ما لبستي ملابس اللي نزعتيهن ليش طلعتي مكشفه وشافن كل جسمج ليش ما تسترتي يعني هسه صفنت وضحلي الغلط منج مو من أخواتي.
ليش اني متعمده طلعت بدون ما اتستر شوف ما اريد اكعد ابررلك واشرحلك بس دام صفنت وضحلك الغلط اوضحلك علمود تصفنلها زين
ازهار احجي عدل.
شوف هشام اني من سبحت ملابسي فتحت الباب وخليتهن بالسله بصف الغساله ومن ردت اطلع ردت شيء اتستر بي ماكو اخذن مني كلشي واني جنت بوضع صعب وصدك كلشي جان مخطط اله من قبل أخواتك واذا متصدكني كيفك ومشگلتك
مخطط اله شنو عيب عليج هالحجي بحق أخواتي.
اي هذا هو عيب عليه صدك كلام اخواتك وكذبني قطعت الخط بوجهه وغلقته وفصلت الانترنت وقفلت التلفون من انعل ابوك لأبو أخواتك بكلام واحد يتغيير موقفك حيل أنقهرت وحزت بگلبي وسگتت حشن براسه وغيرنا الله يدري شگاللنه وهيج اجاني اعصابه فايره عليه بعد معركه بين التفكير استسلمت لنوم...
صحيت الصبح على صوت أمي يا ساتر يارب شكو
وصال ازهار نزلي بسرعه.
ازهار لبست عالسريع ونزلت شگو ماما لزمتني من ايدي وضغطت عليها وحاجتني بعصبيه
وصال أنتِ بلغتي ابوج مو
لا والله ليش شگو شصار
لعد منو بلغه ولج خابرني گالي خل ولدج يكعدون وينتظروني اليوم أحرك البيت على رؤسهم واولهم جبيرج عصام يا يابه يا يمه تعزينا ولج شسوي بمصيبتي هسه هو مو بإجتماعات مهمه وتلفونه مغلق وما يجاوب احد بس أهل بيته منو خابره
وگاله معقوله مجد لك مجد مجد
مجد ها يوم
وصال هم خابرت ابوك.
مجد لا والله من البارحه حجيت وياه وهاي هي ليش شبي
وصال شبي بي كل الخير يارب سترك يارب لطفك
ازهار أمي أيديها على?أسها وتفتر واني بطني مغصتني ومجد باوع الكاميرات.
مجد جديتي وعمي فاضل اجو منو كال الهم
وصال نعلسنا امشي كعد اخوك مروان ركض ولك
بس لو اعرف يا كواد طش السالفه جديتك شمدريها وشجابها من صباحيات ما تجي بس اذا سمعت اكو مصيبه لك تحرك شمنتظر
مجد وعصام منو يكعده.
وصال شمدريني حيل ما ضل عندي شيخلصنا من ابوك وجديتك
ازهار مجد صعد يركض يكعد مروان وأمي استقبلت جديتي وعمي فاضل وعمي دخل عصبي ومزعوج ويصيح
فاضل وينه وينه ابو المصايب الله يصخم وجهه على هالسالفه التسود الوجه
وصال نايم
فاضل امششوا كعدوا اليوم اعلكه والله هالخسيس المراهق
وصال امشي كعدي اخوج ركض.
الحجيه دقايق ينزرع كدامي اليوم اتحنى بدمه.
أزهار دكيت الباب عصام عصام أكعد ماكو صوت فتحت الباب الصاله باب غرفته مفتوح نايم بملابس الداخليه ياربي عصام عصام ما يكعد وصلت لعنده ضربت الميز عصام اكعد عصااااام
عصام شگووو تصيحين
أزهار أكعد جديتي وعمي فاضل اجو وبابا بطريق
گبل نهض من الجربايه ويفتر وداخ يحير وين يلتفت
عصام منو گال الهم منوووو يا كواد امشي طلعي هسه ابدل واجي امشششششي.
أزهار طلعت من يمه مروان واكف يحجي أتصالات ويفتر وعمي فاضل أيديه ورا ظهره ويفتر باوعلي ورمقني بنظرة عصبيه وصاح
فاضل وينه
أزهار هسه يجي كعدت بصف جديتي ادك بعوجيتها وامي جابتلهم ماي محد شرب ومجد يباوع الكاميرات.
مجد هاي حماية بابا وصلوا وصل سيادته.
أزهار مروان قطع الاتصال ويبلع ريك وعصام طلع متوتر وسلم محد رد السلام وعمي صد وجهه ويباوع الكاميرات دخلت سيارة بابا فتحوا اله الباب ونزل عصبي شمر المناظر والجنطه على مجد واجه
ودخل علينا عاف الكل وتقدم ضرب عصام كف شال وجه ومروان كذلك وصاح بيهم بصوت عالي
كمال بكيفكم تخططون وتقروون وتطممون خياسكم ومن ورا ظهري يعني الى متى تبقون ضامين عني وما تبلغوني الى متى هاا جاوبني؟ واحد منكم يجاوبنيييييي.
مروان سيادتك هدوءك بس خل نتفاهم واللي تريده يجرالك.
كمال يجرالي وغصباً على رؤسكم يا حيوانات بس أريد أعرف شمتوقعين خياسكم ما ينكشف سيف يضل ساكتلكم طول العمر منو يسكت على عرضه وشرفه من يسكت انتوا سكتوا من سالفة اختكم مو گلبتوا الدنيا على?اسه و?أس عشيرته مو انت ابو ك?م العلم من كمت تهوبز بالرشاش مالتك ومسويلي بيها رجل دوله وبطولات ونافخلي روحك كدامهم والله عسكري هاا ولك احجي شو ساكت اي حقك تسكت ليش اللي مثلك عنده لسان ويحجي لا لا لسانك بس بالخاص يحجي بسوالف السريريه تحجي بس كدام ابوك تخرررررس.
أزهار عصام منزل?أسه ومروان يفرك بوجهه وعمي فاضل صافن على عصام وبأيده الفون وجديتي تحجي ويه امي ودمها محترك على
اسيا وكاعده تسولف الها كلشي وعصام يسمع ويعصر بإيده نبت أظافره بلحم إيده من شده اعصابه وصعوبة الموقف.
كمال لا الاكبر منها عود مسيطرين على الوضع ومسكتين أمكم والله شنو نحترم سيادته ما نريد نقلق راحته ليش أنتوا خليتوا بيها أحترامات ضيعتوا القيم والمبادئ والتربيه نعلتوا اهل أهلها لك شمسوي شمبدع أنت وبنت عمك من طاح حظك امشي لك زين شورابك واتفل عليهن يا خزي تبيع زوجتك ام اطفالك عشرة عمره وياك ولك أنت اني ابوك ما متحملك امك حملت بيك ما متحملتك منو يتحملك غير أسيا منو غيرها.
الحجيه تسواه.
كمال وبالأخير هيج تجازيها لك ناقص هيج تجازي المعروف بس تسواك مره بمية رجال هيج نسوان حرامات يضلن عند امثالك وهااا سمعت تريد تطلگلها لا والله مسوي فضل حضرة جنابك لك اني اطلكها منك اني امشي وياها بالمحكمه اخلعك هم مو طلاك كافي عليك الخلع.
أزهار بابا تعب حيل ومروان ركض عليه وكلنا انخبصنا بي وجابوا اله ماي شرب وكعد ياخذ نفس ومروان فتح دكم القميص ويفرك بصدره ويبوس بأيده خفنا عليه اعصابه فايره على عصام.
كمال شوف لك أسيا تنساها واظفرها بعد متشوفها بالحلم هم ما تحلم بيها واذا ما كظبتك الشوراع اني مو كمال امشي من خلقتي لاتشوفني وجهك امشششششي.
الحجيه ولك جده جنت شايفتك بعين جبيره على بختك يا جده ليش كسرت مريتك ولك اسيا ذهبه
فاضل الثور الجبير بعد شيطلع منه.
ازهار ما حجه ولا حرف مشه الغرفه ورد الباب بهدوء وامي تباوع وراه وتنزل دموعها وتمسحهن كامت وراه وصاح بيها بابا
كمال وين رايحه.
وصال رايحه على أبني هواي قسيتوا عليه سبحان الما يغلط ما جايزه منه اخاف يصير بي شيء خليني كمال.
كمال رجعي لمكانج وعوفي خلي يعرف حجم غلطته وخسارة مرته واطفاله ما تتعوض خلي يحس بذنبه
ازهار مروان كام لن تلفونه أتصل كام على صفحه فتح خط واسمعه يحجي بصوت ناصي
مروان هاا اسيل شتكولين لا بربج ماشي ماشي
ازهار خلص أتصال وباوعلنا كلنا وطلع عصام غير ملابسه ومشه وبابا صاح وراه
كمال وين مولي.
عصام سيف مسوي كعدة زلم طالبيني للحگ
ازهار بهل الأثناء رن تلفون بابا وفتح سبيكر
كمال هاا ابني حارث
حارث عمي جيب ولدك وعمي فاضل وتعالوا لبيتنا
كمال جايين ابني جايين منو موجود خوما طشت السالفه
حارث عمي تجي وتعرف ما تنحجي على التلفون السالفه جبيره حيل جبيره.
ازهار انتهى الأتصال ومروان طفر غير ملابسه لن جان لابس ملابس بيت لو الدم بالكاع مروان كشخته رقم واحد نزل وعصام دايخ ويفرك ب?أسه وامي راحت عليه ما صبرت تبجي ويمسح بدموعها اخر شيء حضنته وتبوس بي وجديتي دگت عوجيتها.
الحجية مروان تعال ساعدني اروح وياكم.
مروان تأمرين جده.
ازهار ساعدها وراحت وياهم بسيارة مروان وعمي فاضل وبابا بسياره وعصام لوحده بسياره طلع أول واحد وراحوا وفرغ البيت ضلينا بس اني وامي ومجد وامي كعدت تبجي وتشهك واني اسكت بيها ما تسكت صوتها طبك من كثرما بجت
وصال يمه وليدي يمه، يمه سوده بوجهي عليك يمه كسرت رگبتك الما تخاف الله يمه هجمت بيتك وشتت مرتك واطفالك يمه نار بگلبي عليك يا وليدي.
يمه بس لا يكبعونك بيها وتعال استرها يا سواد وجهج يا أسيا يمه سوده بوجهي عليك يا وليدي.
ازهار شهكت شهكت ودموعي تصب ويه امي وگلت بقهر وكسره وعبره حسبي الله عليج هديل.