رواية بين قلبها وعينيها كبرياء للكاتبة شمس العراقية الفصل الرابع عشر
أسيا
شو ساگت مو احاجيك منو هاي هديل إفندي ومروان من ذكر اسمها انت وجهك انكلب الوان وصگيت على? سنونك وشدعوه هالكد اكلها طيب شطلعت منال العالم نزع سترته وفتح الكنتور رجعها بالتعلاكه بهدوء وكفت وراه عصام اظن جاي احاجيك شو ساكت
شتردين أسسسسيا
منووو هاي هديل
محد
لا احد وتعرفها ليش غمزتله هااا ليششش
كرم نايم صوتج نصيييي
لعد من احجيييي وياك لاتتهرب عوفلي كرررم هسه.
لاتعيطيييين بوجهي حتّى الاحترامات ضيعيتها شجاج ناكزه ومتخبله عليه متكوليلي شصايرلج
اذا متكولي منو هاي ما اعوفك ليش ما تحجي ليكون زوجتك السابقه متزوج قبلي عصام مو اي متزوج وتريد ترجعها لن اسيا اكلت راسك وحنيت الها اي اكيد حنيت اعرف بيك گلبك رهيف على? النسوان تموت على دينهن
ضل صافن بوجهي وجاوبني بكل هدوء
خلصتي اريد اروح انام.
من قوة الهدوء ال يعاملني بي أحس صرت عاصفه ثائره صرخت بوجهه ليششششش ما تحجيييي أني مرتك من حقي أسال واعرررررف تقرب لوجهي بحيث خشمه طخ بخشمي وغمض عيونه وهمس بصوت مليان تعب
أسيا تعبان حد كطع النفس بس راح اجاوبج هديل حبي الأول وخطيبتي السابقه أرتاحيتي وهسه برد گلبج.
حبك الاول وخطيبتك السابقه
أي ومات بساعتها
شنو يضمن حبك الها مات بساعتها.
وجودج بحياتي وحبي الج هذا احسن ضمان وأفضلهن شوفي أني ما ردت أجاوبج مو لن مو شايفج كدامي بس شيء من الماضي وخلص وما معتبر اله اي أهميه
أمانه ما حنيت ألها
أسيا رحمه لتراب أبوج گافي
مشه لغرفه كرم وصحت وراه عصام جاوبني وريح گلبي عاط بيه بعلو صوته.
شجاوبج مثلاً على? اسألتج التافهه حنينت شحن الها مره تزوجت وانسترت بيت زلمتها وعدها جهال خلص كل اثنين ما توفقوا بحياتهم وكلمن بدربه لاتسوينها سالفه طويله عريضه ترى بزعت من المشاكل وياج.
بس ادري بيج وادري بعقلج المتبن راح تاخذينها سالفه وتضلين تنكين بيها على? رأسي فد سنه سنتين يله تفض شيخلصني منج جلبتي عاااااد جلبتيييي بس مووصوجج صوج مروان الطايح حظه يجفصون بالبطن خرب حظ الكواد.
طيب ليش ما حجيتلي عليها ولا كلتلي خاطب وفاصخ قبلي ليش ضميت عني
شئ خاص بيه وأنتهى وصفحه وطويتها من حياتي لا أنتِ ولا غيرج يحقله يتدخل بماضيي اني شلته من رأسيّ
مشه وصحت وراه وين تروح
رايح انام رأسي راح ينفجر
عصام
عوفينييي اسيا رحمه لذاك الاب الطيب فکي عني.
دخل غرفة كرم وقفل الباب وكفت ورا الباب عصام
روحي نامي أسياااااا.
رجعت لغرفتنا فارغه وتوحش من غيابه عن فراشه ومسكنه وراحته شفت ملابسه على? الجربايه جريت قيمصه وشميته وحضنته لصدري والله شكلي راح اموت من وراك شيء كلشي بيه مهوس بيك بس انت مو مقدره
ميخالف أسيا تحملي هما هذول الزلم شتترجين منهم.
كمت خليتهن بالحمام وتمددت بفراشي وفتحت التلفون ما فاتح نت احتمال يحجي اتصال مو شرط مراسله كمت اشوف وقبل لا اوصل شفت تلفونه بالصاله? ميز التلفزيون معقوله اكون ظالمته وخانگته بالشك مالتي حاولت افتحه ما انفتح مغير كلمة المرور ليش غيرتها سمعت صوته عصبي
عصام نام يا أبني بس تتكلب زرفت صفحتي اركد بفراشك يا بابا.
أسيا رجعت تلفونه لمكانه وخليت اذني يم الباب اشتاقيت لوجودك بصفي ولانفاسك بوجهي اشتاقيتلك كلك مسحت دموعي ورجعت تمددت بفراشي وافكاري كلها متناقضه اشبه بمرض بالعقل والقلب.
تالي خليت وطلعت كلت بلكي اشوف ازهار لكيتهم بالمطبخ يحجون بصوت ناصي وكفت اسمعهم بدون قصد.
وصال الصوج منك يا يمه هسه شگو تجيب طاريها شيء من الماضي لو الا تسونله سالفه هي بدون شيء طگه ونص من حبها اله عقل ما ضال برأسها وحقها زلمتها وأنتِ أزهار هم جفصتي وانوب اللي يجيب طاريها ما يلوم الا نفسه المره تزوجت وخلفت وهو هم كلمن شاف حياته كافي ما ناقصين مشاكل
مروان شمدريني تكبر حجيت بدون قصد وهو ليش ما حجالها قبل لايتزوجون من حقها تعرف شكو ضم عليها
وصال شعليكم منه شيء خاص بي يا امي.
مروان يعني هسه تعاركوا من وراي
وصال لعد من ورا جدي طبعاً من وراك
مروان اهوووو
أسيا رجعت الغرفه قبل لايحسون عليها وقررت موضوع هديل اسده لن فعلاً شيء خاص بي شعليه منها دام هي متزوجه ومخلفه اتجاهلها احسسن ما اضل اذكرها ويحن الها واكون بشي واصير بشيء ثاني نفضت الافكار ورجعت لفراشي تمددت وأحاول انام من دونه من دون حبه وحنانه وعاطفته.
أزهار صعدت لغرفتي وشفت تلفوني ما شفت شي منه وحزت بگلبي ومزاجي تغيرر تكأبت أتعودت? رسائله واهتمامه بيه وهيج فجأه أختفى وزعل من كيفه
باوعت رقمه ردت اتصل وتراجعت وتالي عفت التلفون ونمت وكل افكاري سارحه بي معقوله حببيته بهل الوقت وهذا الشي صح بس أني ما عبرت حدودي وياه ولا هو
فقط يجمعنا الكلام وأقل من العادي واسئله روتيينه طيب هو ليش زعل، زعل لن مطنشته اووف احس گلبي يوجعني خل انام وكتها يصير خير.
مر شهر وطول هالايام علاقتنا رسميه واكثر من الرسميه خله حدود بينا وأحترمت هالشيء يتصرف بأحترام اكثر من احمد ورقيه كلشي رسمي وياي وما يجمعنا الكلام مثل قبل لا اعجاب ولا هم يحزنون فقط سايق خط وموظفه عنده لا غير وهذا الشي المفروض يكون احسن اليه لا بالعكس مرض يأكل بروحي حتى ضعفت وروحي هلكت ومن اشوفه اموت وروحي تنعصر بصدري بس احترمت حدوده اللي فرضها عليه وهيج افضل النا أثنينا.
هو أبتعد عني لن عرف مكانته ويمكن عرف اني وياه صعب نحب بعض وعلاقتنا متوتره وحساسه وفرق شاسع بينا ما اعرف الحب ما يعرف هاي الامور والمستويات والعرقلات الصعبه.
كعدت من وكت باوعت بالمرايا وجهي طافي لونته بالمكياج ولبست مستعجله ومالي واهسس ولازمتني الطنكيره اذا يحاجيني انفجر بوجهه الحلوو.
0 طلعت بدون ريوك لن محد كاعد الكل نايمين ولكيته منتظرني فتحت الباب وصعدت بدون سلام وشغلها وطلعنا ورجع باوعلي جنت صافنه على الشار?
هشام أهلج هواي تعبانين بتربيتج وحقهم ونعم ما ربوا
أزهار شكراً سكتنا شوي وكف السياره ونزل واجه واندار عليه بيده لفه مال صمون كهوه جاهزه
هشام تريكي اليوم ريوكج عليه
أزهار ما اريد
خلقتج مكلوبه على? شنو شبيج من صباحيات الله.
ما بيه شي والافضل ارجع نفس ما أنتَ لاتغير معاملتك وياي على? مزاجك
مو هيج تردين مو أنتِ خليتي الحدود بينا وأني احترمتها شکوو بعد
سلامتك ماكو شي
أنتِ جبرتيني احترمج غصب على? رأس أهلي كلهم تصرفاتج وطبيعتج وكلامج ولبسج وگلشي بيج يخليني أسكت واحترم نفسي.
ما حجيت يسوق ويحجي مد ايده وكال
يا بنت الناس اخذيهن من ايدي واحترمي النعمه الكدامج طنكري عليه عادي اتحملج أنتِ وطناكرج وخشم اليابس.
صفن بوجهي ما كدرت اقاوم نظراته اخذتهن منه ويباوعلي بالمرايا
راح امشي على? كيفك علمود لما نوصلهم تخلصين ريوكج بس عوفيلي النزاكه على? صفحه ودوسي باللفه مو فركزتي گلبي بمياعتج.
أكلتهن وضلت من اللفه شويه باوعلي وكال
جيبيها
مديتها اله والكهوه هم شربت منها والباقي هو تريكنا سوه بس بزعل انطاني كلنكس مسحت شفايفي ولكيته صافن بوجهي وجاوبني
حمرتج خربت عدليها زين العالم تتنبه عليج.
أنتبهت بمرايا وهو يتأفف طلعت المرايا ومسحت شفتي وطبك السياره واجه احمد واخذنا رقيه وطلعنا وصلنا وراح دخلت الدائره ورشا تكلب بالمكتب مالتي صباح الخير فزت من شافتني خير مضيعه شيء على? شنو أدورين
رشا هلا حبيبتي صباح النور لا هيج ادور على? ملف ما موجود يله اخذي راحتج راحت واني بديت اكمل شغلي وقبل لا يخلص الدوام اجتني رساله منه
هشام اليوم الدوام ما ناوي يخلص
أزهار أبتسمت وجاوبته ساعه انوب ليش عندك شغل.
لا بس شتاقيتلج وهالشوق عبر الحدود ما اكدر اسيطر عليه اعذرينا يا بنت الاكابر
وكع التلفون وگلبي ينبض بكل ما يملك من سرعته كمت وكفت على? صفحه وايدي ترجف حرت شكتب سحب گلبي ابن اللذين احس فراشات تطير بكل مكان جاوبته بكل حب واني هم إشتاقيتلك
يا روحي أنتِ
يمه شعور يموت بقيت صافنه وابتسم وفرحانه رجع دز
والحدود البينا هي شاهده على? هالشوك مشكلتها مو مشكلتنا ما مسوين شيء غلط
جاوبته اي صح
هواي ضاملج حجي.
صافنه بكلامه ومبتسمه وما حسيت غير احد فوك رأسي رشا وگبل سحبت تلفوني ومشت صحت وراها شنو هالتصرف مو عيب جيبي تلفوني مشت وتقرأ الرسائل و? وجهه صدمه وخيبة أمل عيب منج هالتصرف رجعيلي تلفونييي
رشا عيب مني هالتصرف ليش ما كلتي عيب عليه أحب شخص صديقتي تحبه وتريده
أزهار شنو تحجين أنتِ شو جيبي تلفوني.
مع الاسف عليج أزهار وثقت بيج وحجيتلج عنه وبالاخير تسويلنا دراما ومشهد تمثيلي وتدعمين سيارته ويجي ابوج ويحلها تتحقق رغبتج وغايتج الخبيثه وتروحين وياه بالخط وتكملين حبج اللي بنيتي على? حسابي و? حساب ثقتنا بعض وصداقتنا إلى حرام تسمى صداقه يا خاينه يا حقيره ما توقعت تطلعين تخطفين زلم.
خلت تلفوني بيدي ومشت تبجي اني شجاني ما أنتبهت بعدين هو ما حبها ولا أملها بشيء ولا بينهم اي كلام على? شنو موتها نفسها والحب مو غصب اووي اني شلي دخل بيج روحي عليه هو حبني اليه قابل كيفي لو كيفه عبالها الحب نستله وتتوزع، تجاهلتها ورجعت كملت شغلي وخلص الدوام وطلعت بدون ما اشوفها هيج احسسن نبتعد عن بعض تهدأ واحجي وياها مهما يكون خطيه جانت تحبه هو هم صوجه اكيد شافت منه نظره
وضلت تتامل.
طلعت ولكيتهم موجودين واني اخر وحده صعدت وسلمت عاد احمد كال
احمد اليوم رشا خطيه شگلها ما عجبني أزهار هم فهمتي منها شبيها
أزهار لا
رقيه شعجب أنتِ وياها صديقات مقربات
أزهار ما اجه على? بالي اسألها سگتوا وهو عيونه أكلتني وصلهم وكف السياره وأندار عليه
هشام شبيها وياج وجه الطركه
أزهار لاتحجي عليها
ليش حبيبي
نزلت رأسي مستحيه من جراءته رجع شغل السياره ومشه وهو يحجي
شنو تزاعتلن
عرفت بيني وبينك
شنو عرفت
هشام
عيونه.
ارتبكت وحجيت شسمه هي تحبك وشافت الرساله وتخبلت من عرفت احنه
احنه شنو
شمدريني
شنو شمدريج أحنه شنو أزهار
أنتَ شتشوف
ما اشوف غير أنتِ حبيبتي ومرتي وأم بيتي وجهالي
نزلت رأسي غركت بهدومي وافرك بيديه متوتره وعركت وگلبي راح يوكف من سرعته بالكلام والمشاعر الجياشه طلقها بوقت مو مناسب
الحب مو عيب أزهار ليش خايفه تنحبين
بقيت منزله رأسي وما حجيت بس جسمي كله يرتجف
اعرفج أنتِ شنو وأعرف تربيتج وكلشي يخصج من الابره للخيط.
بقيت ساكته وكف السياره على? الشارع العام شوي مكان بي سيارات قليله وإندار عليه ونظراته فاضحته
أعذريني وكفت السياره وحقج على? رأسيّ بس أريد أكول كلام بداخلي ياكل ويشرب وياي من ساعة الشفتج بيها اكوله ألج وأرتاح واريح هالگلب المحترك عليج
بقيت ساكته وافرك بيدي.
أكول العندي ونمشي يا بنية الناس اني حابج ورايدج ومن شفتج حبيتج من عقلج ورزانتج وثكلج هذن متربعات بگلبي رفعي عينج وباوعيني خليني احس بطعم كلامي بشوفتهن احبهن واحب نظراتهن المليانه وكاحه
وكبرياء البين عيونج هذا ناعل شيب اهل أهلي باوعيني يا زهرة العمر وتعبي اللي من اشوفج ينزاح قسم بالله ارجع طفل بشوفتج.
رفعت عيوني وصفنت بوجهه اني حبيته رجع همس
أحبج
صديت وجهي عنه خل نمشي هشام تاخرنا.
يرحولج فدوه هشام الج ولحبج المايع خل اوصلج هسه اهلج يحركون عشيرتي
ابتسمت وخليت ايدي على? شفايفي
حتّى وأنتِ مبتسمه تستحين وتخفينها بأصابعج جنهن خرز ليلوو وتعال هشام احترم الحدود يا حدود مو شيب أهلي احترك كلبي متعلعل ومحترك عليمن.
وصلنا ولكيت عصام واكف يم الباب وكفته ما توحي بالخير شكله ينتظرني وهشام لاحظ الخوف بعيوني
أخوج مو قباض أرواح ترى.
ما جاوبته نزلت ومنزله رأسي ومشيت سريع وميته خوف وصلت يمه مرحبا عصام
عصام هلأ شعندج متأخره اليوم
أزهار لا وين بينما خلص الدوام واجيت
فوتييي ساعة السوده توظفتي بيها انوب عليه الخطوط
أزهار مشيت بدون ما التفت وراي دخلت الصاله لكيت امي مخبوصه خير شگوو يمه
وصال ماكو شي يمه مرت اخوج هم تعبت واخذناها الدكتوره مالتها كالت خل ترتاح تشلع گلبي لما تولد بالسلامه
هاا خطيه وهسه شلونها.
زينه هي ما ادير بالها على? نفسها راكضتلي وراه عصام وناسيه روحها وطفلتها اسيا عقلها صغير وفلا تصير ادامي لا والله
هو خوما لحد الان ما يحجي وياها
اي وتستاهل من لسانها جاي يعاقبها عباله بهل المعامله والتصرفات تصير ادامي ما يدري نوب تزيد خبال عليه ما تنقص اخوج هم مو قصر هي لما تحبك شجاريلها يحظي.
اي هو هم ما ينجرع دام ما عندك شيء ليش تخليها تحترك بنارها برر إلها خطيه يوميه متخربطه وما سأله على? حمله وضعها بسببك
سگتي اجه وراج ديري بالج تتدخلين ولا تفتحين حلكج بأي كلمه هو ما يحب أحد يتدخل بحياته عوفي على? راحته حجيت اني وكام يصيحح وأنوب رجع على? اسيا شطالع بيدنا غير ندعيلهم بالصلح والهدايه
سگتت توني ردت أمشي جر الگرسي وكعد مقابلي وعيونه تتفحصني باو? لأمي وگال
عصام يمه
وصال هاا يمه
أكول
كول يمه.
هذا السايق شسمه ومنين أهله وشنو تحصليه الدراسي وواقعه الاجتماعي ومن وين
وصال ليش يمه
شنو ليش غير نعرف عنه گلشي ويامن دازين الخاتونه لو عامي شامي ياهو اليجي ادزونها وياه بله طلع كواد طلع ساقط طلع شراب عرك طلع ابو نسوان وسوالي سالفه ويصخم وجهي بيها لو هاي متفكرون بيها
شنو هالحجي يمه عيب عليك الولد مبين من أهل الله وطيب وما شفنه منه موزين شهل الحجي سد حلگك عن الاودام وكف شرك عنهم ابني.
شنو اسد حلگي ترى ما كلتلج اريد اناسبه سألتج عليه اسأله عاديه شبيج أنكرصتي وحميتي عليه
لا أله الا الله شد ويه الزلمه عاد
يمه لاتكبرينها وهي صغيره ترى سألت ما جرمت بأهله
شتعرفون عنا مو احجييييي وياجن
اسمه هشام مو ازهار هاشم لو هشام
أزهار أي اسمه هشام
عصام وحافظه أسمه بعد
أزهار غير أنتَ سألتني على? أسمه
عصام أنجبي محد طلع عينج غير أبوج
أزهار سگتت ليش اكدر احجي
عصام أريد رقمه هذا اللي اسمه هشام
وصال شتسوي بي.
عصام أخابره ويه ال 12 اتغزل بي شسوي بي يعني
وصال يجي ابوك واخذ رقمه
عصام يعني ما عدكم رقمه
أزهار امي خافت وجاوبت بسرعه تتلافى لسانه واسئلته الصعبه ومميته
وصال لا ما عدنا يجي ابوك واخذه منه
عصام لعد شلون مره اجيتوا وياه من السوك ترى ما ناسي شگله أذكره نفس الجهره هو الوصلكم
وصال شنو تحقيق يا امي مية الف واحد غيره شمدرينا عندي بال اكعد اتذكرلك
عصام لا يبووه شمدريج يعني هسه رقمه ما موجود
وصال لاااا ما موجود.
خوش يجي سيادة الوالد ونأخذ الرقم ونكبل وياه لن شگله محبوب وسبحان الله شگد حبيته
وصال اي والله خوش ولد وگلبه طيب
منو هو
أزهار زلكها بالكلام غمضت عيوني وأمي وجهه كام ينطي الوان خلت نفسها بموقف كلش عادي وصعبت الامر هو بدون شيء شگاك. نوب يخلي هشام برأسه لا ربحنا.
عصام گلبي من ينكز من شخص لو يصبلي روحه بالذهب ما أتقبله لو يصيرلي ملاك وعنده جناحيين ما ارتاحله والله من انعل وظيفتج وساعه الداومتي بيها ادري ابويه شلون قابل ودازج ويه ولد شاب بس سهله عصام مفتلحكم بالماء العگر يصير خير.
وصال يا سالفه خلاها برأسه شد ويه الزلمه دام هيج وصلها انت شكوو مصعب الامر.
عصام هي لو عليه جان بطلتها من وظيفتها والكواد اليوصلها بعد، شنو أشتغل سايق عند الخلفوها لا هاي العايزه اوصلها انوب
أزهار مشه لغرفته وباوعت لامي ليش صعبتي الامر تصرفي عادي شگوو قابل شمسوين احنه
وصال شمدريني دمي جمد والله هو اخوج شيطان محيل ما شفتي شلون وكعني بلسانه واني عبالي هذاك اليوم خلصنا طلع اثاري ضامها ويطبخ بيها.
يطبخ اللي يطبخه شنو هالحجي عيب عليه وعنده شگوك يروح يسأل عليه ويفضها لا يسويلي سالفه ويفضحني كدام الموظفين حليها ويه بابا فدواتج لن عصام كلش ما يتفاهم خلصوني من لسانه واسئلته
ماشي امي الله كريم يله صعدي غيري ملابسج وتعالي تغدي ما عليج منه يحجي يحجي ويسگت هو وابوه ما النا شغل وهشام الولد مبين هذاك وينه شنو من طينه طينته ما يحتاج احد يسأل عنه اني من گلبي يرتاح لبشر هاي هي ومن ينكز من بشر هم هاي هي.
أبتسمت وأستبشرت بكلامها خير وصعدت غرفتي غيرت ملابسي واتصلت وحجيت بصوت هشام
هشام هاا عيني
أزهار نهائي لاتراسل ولا ادز اي حرف الا اني احاجيك
يجرالج جنج ما طلبتي
فدوه لتفهمك
فدوه الج أكول حبيبتي صاير شي ولو تتدخل مني بس ضل بالي يمج ونظرات اخوج مو راحه يباو? لواحد بنظره مو مقياس عبالك الناس عبيد عنده شدعوه هلكد شايف نفسه
لا مو شايف نفسه بس هو هيج طبيعته ونظراته
ما محبوب ما حبيته ولا دخل رأسي واحد مغرور.
تحبه مع الوكت
شسوي بي أحبه أحبج الج
يله لازم اروح
ماشي حبيبي راسليني على مجالج وديري بالج? نفسج
تمام قطعت الخط وتنفست براحه فتحت الباب باوعت ماكو احد ونزلت شفت اسيا طالعه من غرفتها لازمه بطنها شلونج
أسيا الحمدلله
أزهار عصام وين
يگلب بتلفونه
شبيج شو مختنكه
لا هيج ما بيه شي رايحه اصبله غده طلب يتغده بالغرفه
ماشي روحي صدك بعدكم متزاعلين
ماكو فرق يله من رخصتج.
مشت المطبخ وباوعت لغرفتهم ولحتكها ماما مجهزتلهم الاكل بس اخذته وجهه نوميه حيل تعبانه ومن يم الباب طلع هو اخذ الصينيه منها وباوعلي يمه گلبي وكف من نظراته رحت تغديت ويه امي بس اني وياها لن الباقين بالدوام.
أسيل
من بعد هالايام المرت جنت أفكر ومية فكره متربعه برأسي واخيراً نويت وين توكف خل توكف وشيصير خل يصير
من بعد ما انطتني تلفوني وكلت اراسله واجس نبضه بس ما اراسله بحسابي لن راح يعرفني وتصيرلي سالفه ويتصخم وجهي لن هو عنده صداقه بأخواني وهديل ونوب يراسلها ويبووه شيخلصنيي لا حسابي وشخصيتي بعيده كل البعد عن هالشيء اجي من غير درب استخدم شخصيه ثانيه ومزيفه هيج أحسن ومع الوقت يحلها الف حلال.
ضليت يومين دايخه ومتردده وبالاخير قررت وسويت حساب جديد وسميته زينب ودخلت عليه دزيت لايك يوم كامل ما فتح المحادثه كلت أشوفه وأختبر مشاعره حتّى لو أضطر الامر اكون صديقته بس مهم أدخل قبله وأعرف مشاعره المن ويا سعيده حظ يا بختج ياليحبج يا بختج تسمعين صوته ويتغزل بيج واني باقيه اتحسر على? النظره وشمسويتله هيج عاميه عيونه ما يباوعلي ولا عبالك وحده كدامه صار كم مره نتشاوف هو هو بس ميخالف أصبر عليك شعندي شغل عمل شو دراسه وماكو عمري وقتي كله الك يا مروان.
رجعت دزيت اكثر من مره لايكات ولا يفتحهن اخر شيء دزيتله مرحبا شلونك كتبتها بكل حب ولهفه ورجفه تارستني مرت ساعتين واني انحمست حمس نزلت غسلت المواعين وكملت شغلي حتّى غده ما تغديت نفسي مسدوده وبالي يم المحادثه مليار مره دخلت ماكو هذا ليش هيج خرب بحظي جاوب زاحفه يمعوده زاحفه زحفت عليك واحبك
خلصت وصعدت ركض واللهفه تارستني اريد اشوف المحادثه جاوبني لو لا وامي عاطت.
جنان ولكف شعندج مطيوره اذا وكعتي وتكسرتي نوب اضل حايره بيج
اسيل ضحكت وحجيت ويه روحي راح أخلصج مني ومن همي ومن جناينج الحيايا دخلت غرفتي جريت تلفوني من الشحن ودخلت المحادثه شايفها يمه گلبي اذا جاوبني شيصير بيه گلبي حيوكف شويه وودز
مروان هلا بيج
أسيل فدوات لهلا مالتك احمم جاوبته دومك ما شافها يمكن مرت عشر دقايق حركني حرك وشافها ورد
مروان يدومج ورده.
عيعع شگد اكرهه كلمه ورده جاوبته شدعوه هلكد مغرور متجاوب راسلتك هواي ينراد نحجز قبل بوقت
بصفتج منو اجاوبج
اله بصفتي منو يله تجاوب
اي نعم
شنو عصبت
لا يابه شسالفه شعندي وياج قابل
تمام مبين عليك حباب
شكراً كلج ذوق
لغه الحوار ما احبها احسك رسمي هواي
شتردين انزعلج
عزاا يمه غطيت وجهي بقيت ساكته من الفشله
شنو أستحيتي وسگتي
اي انت سخيف
مو شفتج شريفه كلت أنزعلج.
شنو هالحجي عيب عليك الشرف ما ينحجي بي شو كلامك ما اعرف شلونه واني اشرف من الشرف اوك
هههه شريفه وانزعلج بابا الشريفات ما يلزمن هاي الدروب ساحله نفسج بالقندره عليمن
احترم نفسك
محترم نفسي وكاعد وساكت بس عاجبني ما احترم هيج نماذج
وشبيها هالنماذج عفيه شگد مغرور
ما تعجبني ومغرور كيفي
شنو يعجبك
وأنتِ شعليج عبالك اخذتي وجه
لا شحجيت أني
بابا ولي عن وجهي ناقص عطلات بحياتي
اوكف اوكف لاتروح
شتردين
ما اريد شيء بس نسولف.
بشنو نسولف ليله الدخله مثلاً احب هيج سوالف
عفيه شكد سخيف
عجبني أتسخف وياج لن أحسج مو راحه
ضحكت وفرحانه لن يحجي وياي وسوالفه تنكع بالگلب رجعت جاوبته شعرفت مني وأشتغل احساسك عليه وعرفتني مو راحه شنو شايل خرزه
من لايكاتج واحد ورا الثاني مال مستعجل ووحده مشتهيه ومستحيه
صخام الصخمك لطمت على? وجهي وطفيت الواي فاي عزا مو لسان حشا فضاحه وربي شنو هذا داهيه طلع ونعرفه هادئ وسگوتي عزا عزا.
بقيت صافنه على? المحادثه واحسس روحي تورطت وياه ونفس الوقت شعور حلو نحجي اني وياه رجعت شغلت النت ولكيته داز
وين رحتي شنو دانشتي فكرج
لا النت فصل وشدعوه هلكد ثكيل
عاجبني ادك ثكل ب?اسج
ضحكت وحجيت تمام بس سؤال
جواب
شلون هيج تحجي متخاف على? نفسك
ليش شحاجي
سوالفك سخيفه
منو گال
شنو تحجي بدون متشوف
لا اشوف نظري سته? سته بس سؤالج كلتي تخاف على نفسك شتقصدين؟
ما اقصد شيء والله هيج مجرد سؤال
المفروض أخاف منج يعني.
لا يمعود مو هيج قصدي
متخوفين جلبي بنت الگلب لا تتعيقلين ب?اسي
لاتغلط ما كلت شيء
شتردين ادگلج تحيه بنت ال
ليش تفشررر
ليش تفشررر بابا امشييي ولي
كبل حظرني يبووه ليش هيج ما تتفاهم اني انطلقت وياه وشكلنا تفاهمنا من خلال لغه الحوار وأسلوب الكلام
ابقي بلكي كم يوم ويفتحه ومتأكده منك راح ترجع واني انتظرك.
عفت التلفون وحضنت مخدتي وكلني فرح شحلو كلامه ياريت العمر كله نبقي هيج نحجي هههه خرب سوالفه السخيفه تفشل بس ميخالف مقبوله منك ابن عمي.
أسيا
مر شهر وعلاقتنا للأسوء وحياتنا بالغرفه فقط كلام رسمي و? كد السؤال والجواب وهدوئنا قاتل والشياطين تكمز ب?اسي من أبتعاده عني ينزل ويتلحق هو مبتعد عني وهالشي ما مرتاحتله لن رجلي وأعرفه روحه بالمره وسوالف الفراش شلون كدر يفاركني لا حضن لا بوسه ولا شمه شلون مصبر روحه على? هالبعد ما يشتاق ما يحن.
دخل أخذ ملابسه بدون ما يگولي ودخل الحمام كمت دورت على? تلفونه ماكو گلبت الصاله والغرفه ماكو وين وداه معقوله اخذه وياه للحمام لا صخام شيسوي وياه بالحمام
مشيت للحمام وباب الكنتور مفتوح وشفت ضوه فتحته مخلي تلفونه فوك التيشريات مالته رفعته رقم غريب يتصل انقطع الاتصال واني ايدي ترجف على? صدمه على? خيبة أمل معقوله يخوني وهاي هي تتصل عليه صافنه على باب الحمام ورجع رقم أتصل وفتحت الخط واجاني الصوت.