رواية بين قلبها وعينيها كبرياء للكاتبة شمس العراقية الفصل الخامس
أسيا
سحبني اله بدون مقدمات حضني وبدالته الحضن وبجيت مسحت دمعتي على? السريع تدري بروحك شكثر قهرتني عصام
عصام أدري والمن هالبجي هسه شحجينا
مقهوره منك والله
خلاص سدي السالفه لا اعاتبج ولا تعاتبيني
ماشي بس ياريت منا وهيج تحترم وما تضل تغلط وتفشر لا عليه ولا على أهلي
طلباتج تعجيزيه
ليش حرام
لا يابه حلال حلال منو يكولج حرام، وهسه عوفينا من الزعل والعتاب اريد اتمتع بحلالي أشتاقيتلج لو حرام
لا حلالك.
دتعالي لحضنج فارغ عايفته صارلج شكثر الزعل بيش فادچ متكوليلي عفتي عصامج المن.
عفتك لروحك كلت بلكي تراجع نفسك
أني اعرف بروحي وتصرفاتي ما يحتاج احد يعلمني
كمل كلامه وسگت وسگوته بسُكر وهيام رفع أيده ومسح دمعتي وقرب شفايفه وباسني من رأسي وهل البوسه احبها كلش أحس بقيمتي عنده كلش ألها معنى عميق بداخلي.
أبتعد وهو يأخذ نفس كأنما نفذ الوقت عنده صافن ويتمتع بتفاصيل وجهي يحب يعيش التفاصيل برومانسيه أكثر من العلاقه نفسها باسني بعمق من خدي وشدني لصدره وأني ذبت بطغيان رجولته على? أنثوتي وكبريائي وأخذني بين أيديه مليانات قساوه وحنيه في أن واحد.
أكمل بوساته على? أنحاء رقبتي بخفه ولطافه وقساوه الى وصل المحطه الأخيره شفايفي صفن بيهن كأنما يسوي أحماء بلحظه جنون ألتهم شفايفي وبادلته بكل حب الكون أعشق رجولته ورومانسيته من تتمرد عليه و? كبريائي وحبيت أكون جريئه هالمره وبوسته من رقبته بعمق ورجعت ابوس بوجهه وأتلمس بظهره بقساوه وهو يتملل بين أيديه انتهى على? الاخير لحظات جانت مثل الجنون أبتعد ولزمني من وجهي بأيده الأثنين وكال.
أشسويتي جنيتي على? عمرج اليوم
متفاجئ مني لن أني بطبيعتي خجوله كلش وبالأخص بعلاقه أستحي منه بعض الاحيان وهو ما يحب الخجل بالفراش يحب أتمرد على? رجولته ورومانسيته.
مبتسمه على? تفاصيله نفسه عالي وشعره مخربط وجهه تغيرت ملامحه الى ملامح ذايبه وهايمه أخذني من ايدي لمملكتنا ولحُبنا.
أسيا منومني بحضنه مثل العصفوره ضعت بين أيديه وبدواخلنا كلام بس ما نحجي بي وأثنينا ساكتين جنت متوقعته يعاتب ويرزلني على? اللي الصار بس أكتفى وكال.
عصام زعل ما أريد بعد هالمره غفرتلج لن أحبج ورايدج
أسيا رفعت رأسي من حضنه وجاوبته لعد ليش كلت أتزوج ومرتي هي تربيهم جهالي
أتزوج
أي
شسوي بالزواج ليش أني مو متزوج كافي ومكتفي الحمدلله
أنت ما تكول شيء اذا ما متيقن منه.
وأنت أخذتيها طابو وراح تأكلين رأسي بيها كلتها وخلص بس زين جابت نتيجه
كالها وغمزلي دنگت رأسي خجلانه وهو ضحك وغمرني بحضنه حضنته ونمنا ورمينا ورانا كل اللي صار وصار ماضي وما يعود أن شاء الله.
أسيل
من بعد ما رجعنا من يمهم هديل تخربط عقلها وكامت تحجي على أمي وعصبيه وما تتفاهم
هديل كله منج أنتِ لحيتي تأخذيني وياج كتلج ما اريد أروح وأشوفه لن متوقعه الكاه اهناك تضيعينه تلكينه بيت جده هيج أحسسن هسه أرتاح گلبج
جنان وشصاار قابل الرجال ما شفنه منه تصرف مو زين سلم وراح ما شفناه طوله بعد لو مقهوره لن ما سلم عليج هذا كاتلج قهر شلون عبرج من دون الكل ولبسج ادري ك
هذا المخبلج.
وبالطكاك سلم والما سلم عاد شكد يهمني رايحه انوم جهالي والصبح اروح بيت عيالي احسسن
وين تروحين بعد أجازتج ما خلصانه
أروح أحسسن شگو باقيه
أختج تخبلت على? عمرها واكص ايدي اذا ما بعدها تحبه والا شجاها كامت تزاكط علينا وتنكز تشعوطت من ساعة شافته.
شتحبه يمه وهي متزوجه صدك تحجين بس لن جان بينهم حب قوي وتجمعهم ذكريات حلوه أكيد تنفعل وتعصب خطيه حقها عوفيها على? راحتها وبعد لاتفتحين وياها الموضوع.
مشت أمي مزعوجه منها وبعد ما حجينا وياها عفناها على? راحتها وثاني يوم خابرت سيف وراحت مأخذه الأمور أكثر من حجمها بعدين صفنت هي جانت تعشق عصام حد الجنون علاقتهم جانت كلش قويه وعميقه بتفاصيل ما تنحجي طبعاً من جانوا مخطوبين وبحلال وعلى التلفون جنت اشوف رسائلهم لبعض وهو من نوع الجريئ ورومانسي كلش يمكن الذكريات هي خلتها تعصب وتنفعل أكثر من طاقتها.
كاعده أدرس وخطر على? بالي خطف عقلي وسرحت بي وتفاصيله وصوته من طلب الچاي عقلي طار لهذيج الليله الشفته بيها أكتب ومبتسمه وأنفتح الباب بقوه يمه هاي أنتِ فززتيني تحممي دگي الباب
جنان خلصتي كومي البيت جايف واني يا دوب الحك ملابس وطبخ وجهال حارث اجو يردون تغسل وتبدل واريگهم واغديهم وادزهم المدرسهوورجليه يوجعني ما بيه اغسل كومي غسلي الكراج.
يمه شخصلت بعدني توني فتحت الكتاب وهذا رابع يرادله دراسه مو قشمره مثل كل سنه من ورا جنانيج وشغلج الما يخلص ترى طكت روحي قسم بالله على ساعه أهج من البيت وأفتك منكم
اشيل واركع بالكتاب واجتني كفخه طيرت الدرسته كله لاتضربيني اوووف عوفينييي شُنوْ الواحد ما يدرس يصخم ترى غبت لن عندي أمتحان علمود ادرسه زين موو علمود أخدم جنانيج واربيلهن جهالهن والله ما صارت.
جنان شنو هذا الحجيتي صايره تحجين كلام اكبر من عمرج والله افصم ركبتج شو كومي شغل عمل بس هالدراسه عاد شيطلع منج أنطيج تأكلين وتنامين صايره بكد الفيل
يمه مشاعر مو جيس حب
اتفل على? مشاعرج شو كومي وغرفتج عود بعدين نظفيها يله نزلي اروح اشوفهم شسوا
راحت وركعت الباب وراها باااااب من ينكسر تاكلين رأسي
وكسرت عين جدي كومي عاااد والله اذا نزلت وما لحكتيني اصعدلج اهلس عطوبح عطب عطب يله.
هسه روحي على احفادج تلاحكليهم هسه تلكينهم حاركين البيت على رأسي ورأس الخلفوني من انعل هيج عيشه زقنبوت يخلفن ويشمرن على? العيال وحايرات بوظيفتهن ويكتللك القهر لو راضيات بس يتبجنن ويتشكن من العيال من انعل ابوجن لابو الحواجن سواجن جناين بيت علوان شلون عيشه زفره حظ الكواد
شلت شعري كبايه لن نثر ما يوالمنا جهالنا وحوش كفيلك العباس يأكلونك أنت وملابسك.
نزلت ولكيت رهف جيفتها تارسه البيت وريم الشعر منثور والوجه كله دبس وراشي كرهت الدبس من وراج سويده راح يصير بيج سكر ام دبك امشي غسسلي لا اسحلج المغسله وسخج كاتلج.
ريم ما أنتِ وسخه
أسيل تربات أسماء شتطلعهن الخلف على? الخلفوه اكيد هي معلمتجن? هذا الحجي امشيي جريتها وغسلت الها وتنكز صفكتها براجدي ركدي بمكانج لا اشيلج واذبج بالبلوه ما صارت هاي بس امجن متوظفه.
جنان اسيل والله اجي اصبغ جلدج عوفي البنات هنا جهال شمفهمن والله ايدج اكسرها د خل يجي ابوج اني اعرف شلون يربيج ولج جهال اخوانج مو جهال كواويد ما بكلبج رحمه عليهم.
والله ياريت جهال كواويد ولا جهال ابنج مو جهال حشا واحدهم سليمه كل واحد ناتفله للسان هطوله وفشار اني ما اعرف افشر بي ولدج مو مال خلفه بس مال نسوان وفراش كلت هيج واجتني جرتني من شعري كسرت الماسحه على? ظهري وطلبت من جهال يتفلون بوجهي اليوم متخبله كالبه جنيتها عليه مسحت وجهي وصعدت ركعت باب الغرفه دتشوف شلون دبرينها أنتِ وياهم.
ولج أسيل أسيل سليمه الكبور تلفج من بين البنات انزلي لا اصعد اخلص على? عمرج شجاج اليوم تخبلتي عليهم منو يتحملهم وين يولون تردين تعوف وظيفتها وتكابلهم لعد المن درست وتعبت موزين حصلت وظيفه حرامات.
فتحت الباب وجاوبتها والله مشكلتها شكوو تزوجت وتخلف وتشمر وتعالي اسيل ربي الها خلفتها وداري وغسلي وشطفي وكلي ونظفي وراهم كله براسي شنو مخلفتهم وناسيتهم لا رجال لا ولد لا تلد ما سالمه على? عمري فكييي عني أنتِ وجناينج من كطيعه كطعتهن
خل يجي حارث وأني أعلمج اصبريلي أسيل تردين رجال والله ما ازوجج لو تموتين.
ساعة السوده صارت بيها أسيل بهل البيت الأكشر والله لو يجيني واحد حافي منتف اوافق عليه والله عسا ما جلب اجرب راضيه مهم اتزوج وافتك منج ومن جناينج.
ما جاوبتني وتالي نزلت لن خفت تكول ل حارث وحارث ما يتفاهم گبل ياخذني للبيت يمهم واضل اخدم بجهاله ومرته وأمي لا حس ولا نفس ما ادري هالجناين شمسويات الها ولعقلها اكص ايدي اذا ما طاكتها بسحر وفارات رأسها ومخليتها متشوف دربها لن هالفتره مثوله فدمره ساعه تحبني ساعة جنها جنيه سوده ولا عبالك أمي، كطيعه تكطعجن يا نسوان أخواني.
دخلت سبحتهن ورامي كسر الباب يريد يدخل اخذت نفس وفتحت الباب وجع مو كتلك أسبحك ورا اخواتك شنو امك ما معلمتك حرام تسبح وياهن او كبالهن كديش انت كسرت الباب شو وخر اهناك اريد ابدلهن.
رامي ما ما اسبح وياكم بيبي بيبي.
أسيل بيابه كملت عليه كملتهن ومشط وتعطير ونوب سبحت رامي والله زلمه واكفه اني بنية بيت اسبحه شگول عليج يمه، زلمه وعاقل ما جاني من امداج يا اسماء يله امشي تغدى علمود ترحون المدارسكم واخلص من هوستكم شويه يله فضضني.
تغدوا وراحوا ضلت بس رهف الصغيره امي نومتها وغسلت المواعين هلكت قسم بالله صرت جنازه كعدت اشرب جاي والبيت نظيف وهدوء واهلي تغدوا وناموا وحسن ما تغدى راح يجيب مرته تكمل عاد تضل بس تحجي وتسمع حجي لامي بخصوص جهال وناسيه نفسها من تولي لدوام حالها من حال اسماء نفس الاسطوانه صايره مربيه الهن اغسل واشطف واوكل وانوم وادرس
أنفتح الباب ودخلوا حارث وأسماء سلموا وحارث راح الأستقبال وأسماء وكفت تلقي الانظار.
أسماء ما شاء الله البيت نظيف جهالي ما مسوخين لعد ليش تتشگين منهم
أسيل اي ما يوسخون لن اكو فلبينيه تفتر وراهم ريبورت مو مثلي
يلة شصار قابل لما جهال أخوانج عوذه حتى المحنه تكاطعت هاي عود أنتِ عمتهم
ما جاوبتها لن اذا احجي ابدع فخلوني ساكته وساتره على? رياشتي لا يتهلسن ريشه ريشه
اجانا صوت حارث من الاستقبال وهو يكول
حارث أسماء صيبلنا غده من هالموجود شوكت تلحكين تطبخين واني جوعان.
أسيل فاتت على? الجدر وين وين هذا غده وحصة حسن تردين غده طبخي محد مانعج
لا والله وحسن عنده مره تطبخله
وأنتِ اطبخي لرجلج
هاا هيج صصار الحجي
اي ليش حجيي بي شيء وحسن ساكن اهنا مو طالع فايت ياكل ويمسح ايده بالحايط.
حارث أسماء جيبي رهف ولحكيني السياره وأسيل امشي ويانا
أسماء والغده
حارث بعدين نتسمم يله تحركيييي أسيل مو وياج
أسيل بس باجر عندي دوام.
بالجنهم الحمرا عاد شكد مهتمه لدوامج اخذلج اجازه أسبوع حاب أستضيفج كم يوم عندج مانع
ما اكدر عندي دوام ما حسيت غير اجه جرني من شعري وفتح باب سسيارته وشمرني بيها وصاح عليها هي ورهف اخذني حته اهلي ما بلغهم كله من امي هي مكبره رأسهم واذا احجي والله يقضي عليه شلون أهل طايح حظهم
وصلنا البيت وهي التهت بنتها واني دخلت البيت افر بأذاني وعاط بيه
حارث يله سويلي غده نص ساعه اذا ما جهز ما يجرالج خير.
أسيل اريد اكوله عندك مره خل تطبخلك بس سكتت لن مره كلتها وشبعت طن كتل ما يتفاهم مرته غاسله مخه غسل الزوالي اني شجاني ومنعتها خل يتغدون ويمشون ما اعرف اكظ لساني عنهم كبر وكعت برأسي انوب تعالي طبخي ونظفي أسبوع كامل اضل اخدم بيهم بس يا حسافه على? هيج اخوه يعاقب أخته تخدم مرته وجهاله
طلعت دجاجه سلكتها وتبلتها وخليتها بالفرن ميت سم خليت بيها حته لو اخوي الاخ شابع اخته طن تكفخ ويهين بيها شسوي بي.
مكابله الفرن بس على أعصابي روحي مسحونه سحن قهر واجت الخاتون لابسه قصير والزنود طالعه هاي تسويلي أغراءت لو توصلي صوره عن الزواج حاجيتها عفيه شهل هالجراءه شوي استحي كولي حماتي بنيه.
أسماء ما شاءلله عليج كلشي تعرفين ام بيت من طبخ ونفخ وتنظيف فحرمات ما تعرفين المره شتلبس لزوجها كلت اعلمج بطريقتي مو تضلين مثوله وباجر عكبه تزوجين وتكابلين خلقته بثوب البيت مثل اختج هديل كلما نروحلهم نفس الدشداشه عفيه رجلها شلون ما يتزوج عليها ما ادري.
شعليج بيها شدعوه هلكد مندقه منها لا يمج لا صوبج الحمدلله أهلي شابعيني تربيه وثكل مو بس خبز.
لا هواي شابعينج تربيه من لسانج الطويل وما تحترمين لا اخ ولا مرته وتالي اجيتي تطبخين بنفسج يله وين صار الغده حارث حبيبي تريد اسويلك مندي اصفر ويه دجاجه
حارث لا
هسه اجيب الغده كلبي.
أسيل فتحت الفرن واخذتها وراحت واني وراها على? زلاطه وخضروات وبيبسي واجيب واخلي كدامهم وانهضمت حيل دمعتي بطارف عيوني بس عاندت وكابرت ما بحيت رجعت المطبخ مكلوب عفته والله فلا اغسل هو راد غده وسويتله بعد شكوو ما اله وليه عليه بعد كافي راح يغيبني من المدرسه أسبو?.
رحت غرفة الجهال اعرف مكاني لن متعلمه على سوالفه هو ومرته من يشوفني أعاند لو ارادد كبل ياخذني لبيته وأهلي لا حس ولا نفس والله بيت اخوج وما بيها شي ما يدرون الاخ مسويني فلبينيه لمرته وجهاله الواحد يحير شيحجي على? هالاخوه.
بقيت لليل نايمه ومنطيتهم ظهري وأسمع هوستهم وخبصتهم هي وجهالها بس ما أهتميت كملت نومتي وكعدت ولكيتهم طالعين وقافلين الباب عليه بالجذب ما كالي تعالي ويانا الحمدلله والشكر رحت المطبخ أكل لكيته مهجوم طابخه عشه الافنديه وكالبته سويتلي لفة جبن وكلاص جاي ورحت الغرفه.
بقيت صافنه بلا هسه لو متزوجه جان رجلي يطلعني اني وياه ونفتر ونحب ونسولف مو مسجونه بين اربع حياطين وحاطيني ويه الجهال لاعبين بخقلتي مسويني دوشك كلياتي جفصوهن
لو بيت اهلي غسلي طبخي نظفي الجهال عينج عليهم اسيل جاي اسيل اكوي ملابسي اسيل جهال عينج عليهم مبتليه بالكل ودارستي باالزقنبوت والدفرات يله أطلع من الصف ما خلولي واهسس.
تذكرته أخر مره شفته مروان الله أسمك شكد حلو? گلبي فدوه لطوله شحلو ما توقعت روحي هلكد راح اتأثر بي.
خرب بيكم اهلي أشتعلوا صفاح أهلكم ما تخلون واحد يفكر كله أسيل ركضي ركضي حتى نفسي ما منطيتها مساحه عود الصغيره ومدلله لا والله الصغير مجفوص ومنعول والد والديه.
فزيت على? صوت الباب أنركع بقوه وصوت حارث عصبي الظاهر طلعوا وتعاركوا الله يدري شمسويه من مصيبه.
حارث مو مال طالعه لا والله كتلج لاتلبسين هيج لبس لا عانديتني الا البس امشي نومي جهال لا ابتلي بعمرج والمطبخ ليش هيج وسخ ليش ما منظفته
أسماء شلحك مو انت خبصتنا نطلع ونطلع وركض بدلتهم وطلعنا وبعدين اسيل مو موجوده جان غسلتهن شكو بيها المساعده حلوه شصصار عليها تموت قابل
حارث أسسسسسيل ومرض طلعي نظفي المطبخ يله.
أسيل ما جاوبته عبرته بديت أغسل بالمواعين ونظفته وجلفته طلعت روحي كملت والبيت صار هدوء همزين نومتهم ما يضلون يلغون على? رأسي راديوا مو مثلهم
مشيت للمغاسل وقبل لا اوصلها غرفة حارث بابها كبالي ومفتوح وأنصدمت باللي شفته حتى أطرافي تجمدت حارث وأسماء بوضع العين تستحي تباوع ما اعرف شصارلي باوعتلهم لن صايرين كبالي يبوس بشفتها وهي حاضنته كبل معدتي كلبت ركضت المغاسل وأسمع صوت حارث يحجي عليها.
حارث شفتيييي سوالفج وين وصلتنا شفتييييي خرب بعقلج أسماااااء
أسيل أستفرغت كل الأكلته وغسلت أخذت الخاولي وأسماء واكفه فوك رأسي وتباو? بشك!
أسماء مستشرفه حضرتج شعندج تباعين النا لازم عجبج المنظر
أستغفر الله شتحجين أنتِ اكيد تخبلتي مشيت ولزمتني من ايدي
شوفي لج سوالفج ما تعبر عليه هذا الأستشراف عاجبته وخابزته اكيد تباعين افلام وعجبج الشفتي وضليتي تباعين لن من شفتينا ماجان تمشين شگوو ضليتي واكفه.
يا مره خافي الله وعوفيني بحالي تخبلتي شهل الكلام بحقي عيب عليج أني بنية بيت وأنتِ صاحبة بنات خلي الله بين عيونج ودام ما تردين اباوعلكم عدكم غرفه وبيها باب قفلوا بابها متخافين بناتج شايفات اللي اني شفته شنو يكون موقفج ولو كبرن تترسخ الفكره أبالهن هاي اني موجوده وهيج لو ما موجوده جان شلون.
شوفي لج سوالفج ما يعبرن عليه وبناتي مربيبات مو مثلج مفلفه على? الرجال وتردين تزوجين علمود تخلصين من الخدامه بس لو تموتين ريحة الرجال ما تشمينها عبالج ما ادري شتسوين بجهالي وتعذبينهم وشابعتهم ضرب والله لا يرحمني اذا أرحمج وحده حقيره وحقوده.
الكلام وياج فارغ عفتها ومتت قهر أكيد امي حاجيتلها وعبالهم صدك كاتله نفسسي على? الرجال اوف يمه بس لو ادري جنانيج شمسويات الج هيج تعبديهن عباده كلشي تخلينه بلسانهن.
أي واني اكول هديل ليش وافقت بسرعه على الزواج علمود تخلص من الخدامه وما وكعت بس برأسي عاد بس اسلم بس على دراستي هالزواج هم مو أبالي.
أزهار
نزلت كاشخه وحسيت كشختي مالت مافيات ضحكت ويه روحي وأني نازله صادفتني امي بيدها بدله مروان تكويها لن راح يلتحق مشت وتهز بيدها
وصال لا شغله لا عمله انوب علينا الوظيفه
أزهار شتردين أسويلج مثلاً أغسل وانظف وأطبخ
وعلمود بعدين أصير مثلج اركض ورا الرجال علمود يرضى عليه وهو مو بحالي كاظي حياته شغل سفر وطلعات وأصدقاء ولقاءات عمل وتطوير أعمال.
ولاتخافين عليه لن أذا أريد اصير ما اصير مثلج أصير مثل بابا وأخواني طموحين ويحبون نفسسهم وحياتهم وأعمالهم مو علمود رضا الناس!
تفأجات من كلامي وضلت ساكته وقبل لاتمشي
وصال هو تاليتج توكعين بواحد مثل أبوج لن يرفع ركبته زايد تنكسر وضلي رافعه خشمج اشوف تاليتج شلون وسفه تعبي بيج كمتي تعييرين بأمج وسفه.
أنتِ وصلتينا لهل المرحله مشيت المطبخ لكيت مروان ومجد وبابا يتريكون صباح الخير حضنت بابا مشتاقين صايرين ما نشوفك
كمال أعمال باباتي شلونه الدوام سولفيلي
أزهار عادي ماكو شي جديد حالي حال الموظفين وكلش حابه عملي لن باباتي حبيبي بطلي هو اختاره اله
كمال الله ينطيني العمر ما اقصر وياج يله اكعدي تريكي علمود أوصلج بطريقي وسيارتج عصام تكفل يصلحها اذا ما تتصلح خل يجيبج المعرض اختاري اللي تعجبج.
أزهار فديتك أني ليش أحبك كعدت بصفه واجت امي كعدت وجهه مزعوج باوعلي بابا وغمزلي
كمال شبيها أمج
مجد بابا الافضل أنتَ تسألها شبيها
كمال بيني وبين أمك لاتتدخل يله بابا أزهار اوصلج ومروان عود انت رجعها البيت مو تخلون أختكم
مروان ان شاءالله
مجد بابا مصروف
كمال تدلل مجد أفندي بس شد حيلك بدراستك بابا وراك مشوار صعب يرادله زلم
وصال زلم هه القبله شسوا عاد هو ما ادري ش عاشك من هالعسكريه طيحت حظهم بيها.
كمال كرت عينج حجايه ما تعرفين تحجين امشي بابا
أزهار مشيت وياه وشكله عصب وانزعج امي أبداً ما تعرف تحتوي ومن سالفه شاهين كلبت على? الكل ما طلع شاهين هذا الملك سليمان
وصلني الدائره وجنت أشعر بفخر كلش جبير وهو الوصلني نزلت وبوسته
كمال ديري بالج على نفسج بنيتي ومن تطلعين أتصلي على? مروان وأني هم اكد عليه
أزهار أن شاءلله راح الله وياه ودخلت الدائره وبلشت شغل ورشا كومه تحجي والله رشا راتبج حرامات بيج.
رشا ليش عوذه
ما تحللين خبزتج كاظيتها سوالف وجاي بين الموظفين وشغل من ورا خشمج لا عبالج ما ملاحظه عليج
وأنتِ شعليج خوما بس شغل شوي واحد يرفه عن نفسه عفيه شنو من وحده أنتِ عندج شغلج أهم من كلشي بالحياة بس عمي عائلتج كلكم صاحبين أعمال حقج.
ما جاوبتها رجعت كملت شغلي الى خلص الدوام وأتصلت على? بابا رفضني معناها عنده شغل مهم اعرف هالحركه.
طلعت وباوعت مروان ما موجود دزيتله رساله وين صرت مو على? أس أنتَ تمرلي تأخذني.
انتظرته ما رد رجعت اتصلت رفضني بسرعه انتظرته هواي ما بين عاد عصام روحه شكد طويله شوكت يصلح سيارتي واخلص من هالسالفه اروح اجر تكسي واروح هذا ما يجي وبابا تلفونه كله مشغول خل اروح احسن مشيت اوكف تكسي وطبكت تكسي كبالي والشكل مو غريب عليه وتذكرته انت ابو المعامله اجيتنا لدائره
اي أني ليش مستغربه اصعدي اوصلج.
ليش يابه شكالولك عليه اصعد وياك
ترى سايق تكسي مو كواد
أستغفر الله روح ما اصعد وياك، انتظر اخوي يجي ياخذني تكدر تروح
ياهو منهم مروان لو عصام!
بتفاجئ وأنتَ شمعرفك بيهم
سألت عليكم طلعتوا عائله عسكريه عمي دوله أثاري صدك أنتِ حكومة ابوج واخوانج كلهم عسكرين
اي الحمدلله يزيدني فخر ويطلع من الاذاني هم
دربالج لاتنفجرين لا يكوم يطكلج عرج
شعليك أنتَ شكد فضولي مشيت وسمعت الباب انركع نزل وشكله عصبي كال.
منو الفضولي ولج شايفتني كاتل نفسي عليج وعلى? أهلج
والله گول لنفسك رايح سأل عليهم هاي شيسموها بله وبعدين بتعبهم مو بتعب احد شكوو مضغوط منهم بيك خير روح صير مثلهم
هيييي لسانج شو كمتي تلوصين بصف الأستكان احجي عدل لا انزع المستحى وياج وانعل اهاليتج كلهم شُنو شايفه نفسج شوفه طبج ستين مرض عساج لاوصلتي بيت أهلج فوك زييتي اوصلج وهي الما راضيه كطيعه تكطعج من بين النسوان بنت الگلب.
لاتغلط على? بابا خوش.
وأنتِ كظبي لسانج عن الاوادام مو خدم عند الخلفوج.
أكلني بلسانه مو لسان حشه خبل قسم بالله شغل سيارته وطار بيها واني تعصبت واتصلت على مروان وجاوب عطت بي متكولي وين أنت ساعه علما تجي
مروان مو اشتغل سايق عندج لاتصييحن خوش من انعل ابوج لابو وظيفتج يلة اخذي سياره وانكلعي للبيت والكواد يخليج اداومين بعد.
أزهار قطع الخط بوجهي هذا شبي الثاني هم أنكلب عليه خرب بيكم لسانهم متبري منهم حتى ابويه ينعلون أهل اهله بالغلط مالتهم
رجعت اوكف سياره طبكت تكسي صعدت وانطيته الگروه وعنوان بيتنا وتذكرت عصبيته وكلامه هذا طالع من النسل بدفره على? هاللسان الشايله عزا لا اخواني ولا خبرهم خبال لايروح ولا يجي.