رواية بين قلبها وعينيها كبرياء للكاتبة شمس العراقية الفصل الثاني
أزهار أي كعدت كسرتوا الباب كمت والنوم بعيوني فتحت الباب امي كاشخه وجاهزه شو محد كعدني
وصال عزا العزاج لحد الان واخوج عصام خبص الدنيا بعجالته امشي لبسي لا يصعدلج ياخذج لخوالج بملابس البيت خو تعرفين اخوج شخبل.
أزهار وأني أخبل منه والله خوش عفتها ودخلت وراي طلعتلي ملابس ونزلت الجنطه واني دخلت سبحت وعصام يرعد طلعت ولكيت امي تهلهل على? الواهس تجاهلت الوضع وكعدت اخلي مكياج خفيف ما احس الا انفشت من شعري يمه شكووو سالمين
وصال وين تخلين مكياج شُنو نسيتي عصام هو يأخذنا عوفي هالصخام خو بشرتج تلج انظف من حياتي واني أكول راتبج وفلوس ابوج وين يرحن
هم رجعت على? بابا يمه بس عوفيني براحتي حتى بغرفتي ماكو حريه شطلعت هاي.
رايحه لعد استعجلي
عصام وين صرتن رايحيين حفله
وصال اجييينا
أزهار راحت واني كملت ولبست شالي وطلعت وهو يفتر ابو خابصها وصلت لعنده ما اعرف اسيا شلون متحملتك
عصام غصباً عليها لعد المره شُنو شغلها
وصال تتحمل خبال رجلها
عصام يمممممه
وصال سكتت يمممه سكتت يله امشيناا وأنتِ تحركي تذبين على? الحطب بانزين
أزهار طلعنا للبيت خوالي وبطلعتنا دخل مروان سلم ومشه البيت حتى ما سأل وين رايحيين هذا شبي فاصل.
وصال عوفي وتحركي ديله صعدي وفضيني يمه مجد ذب هالصخمان من أذانك
مجد شكووو يمه ترى طريق طويل شلون يخلص
عصام عوفي يمه بس خل نوصل اذا بقيتهن الا اشلع اذانك واخليهن سماعات عود علكهن بركبتك
إزهار شغل السياره وطلعنا وأتصل على? مروان
عصام ابواب قفلها ورانا مو تضل نايم
أزهار ردت اطلع هيتفون أسمع اغنيه موسيقى بس حظر والمكان مخطر دام عصام موجود حكومه عمي هي كوه
وصال يمه جان كلت ل مروان يوصلنا.
عصام ليش حجيه وأني شبيه لازم ما عاجبج.!
لا يمه فدوه لطولك شلون ما تعجبني بس سياقتك سريعه وبسلامتك دمك حار واخاف تبتلي بواحد
لاتخافين جنتج هدتلي أعصابي متشوفيني شلون مرتاح
الله يهديكم ويصلح حالكم وأنت هم عينك عليها مريتك هاي
والله يمه أشيل الها عيني بس أخخ خليها بالگلب احسن
شوكت ناوي ترجعها طالت يمه والزعل من يطول موخوش.
والله المره تخلف كلمتي وشوري ما تصيرلي مره بعد وجنتج جذبت عليه راحت زياره وبعدين زاعتهن كدام أخوانها وخلتني بوجه المدفع بس سهله يصير خير
أزهار يحجي بحقد ومقهور الى درجه رغم هو الغلطان بس مع ذلك يشوفها هي الغلطت طبعاً ما يطلعون نفسهم المذنبين هم هو وهم بابا نفس الطبع نسخ ولصق.
أسيا
كاعده أوكل كرم وذبجني بس يبجي يريد ابوه وجده.
أكل يا ابني ترى تعبتني فوك تعبي اوووف كافييي بس تبجي راسي فرغ دنيا ما تجين تاخذينا طلعي بالشارع خل يلعب وهاج فلوس اشتريله بلكي يسكت ويفضني
دنيا تعال حبيبي نروح نلعب ونشتري اني هم اشتري لو ارجعلج الباقي
اشتري بالباقي لاترجعين سمعتنا امي وعاطت بيها.
فوزيه شسوين بالمشترى رجعي الباقي لأختج وأنتِ أمي ضبي إيدج متريدين مصرف لابنج وهذا ابن الدلال كل ساعه والثانيه يشتري واذا خلصن منين تجيبله يكسر ظهرج يمه واحنه حالنه على? كدنا يا أمي
يا يمه هي ترجع خمسميه خل تشتري بيهن خطيه روحي دنيا واشتري بالباقي وما عليج راحت وأمي كعدت مقهوره عليه، شنو مليتي مني.
منو كال مليت منج يا امي بس يمه أبنج أبن دلال لو سامعه مني وما شاكيه لأخوانج وخليتي دمهم حار وحادين سنونهم على? رجلج
يعني عاجبج نسيبج يذل بنتج بعيشتها على? طالعه والنازله وأنتِ بنت الملك سليمان واخر شيء يكملها بنت الفگر.
يمه الرجال من يعصب يطلع حشو مصارينه ما يخلي حجايه ما يگولها واذا كال خل يكول لا عيب ولاحرام والفقر من الله والحمدلله ما ميتين من جوع ولا داگيين باب وشاحذين اللكمه منه ومن اهله مستوره من يومها هاي نسوان اخوانج ثلاثتهن بهل البيت المهرهر شو ما تذمرن من عيشتهن وراضيات وساكتات وبس يردن رضى زلمهن لن شبعانات بيوت أهلهن بس عيالج ما شافوا وشافوا.
هي علواه لو على عيالي ما سمعت منهم كلمه تغث بالاخص عمتي والله ما ترضّى على? سوالفه بس شسوي حظي وكع بهل الرجال ساعه سوده صارت بينا راده
سگتيي لا يسمع واحد من إخوانج
وعلى اساس ما يدرون يمه خليني بهمي
مخليتج يمه
هذول وين صاروا انوب يصير شي يمه والله عصام يعزينيي كمت طلعت يم الباب نسوان جوارينه كل اثنين يم باب طلعت امي سلمت عليهن وتحجي وياهن واني عيني ادوره اجه من بعيد هو وخالته دنيا يتمشون فدوه لطولك.
أكول دادا ام أبراهيم صدك سمعنا أسيا رجلها الضابط يريد يطلك
لا منو كال منين تجيبين العلوم
والله سمعنا صدك ولج اسيا راح تطلكين
أسيا ضليت ساكته اجه كرم جريته دتعال طب جوه كل شوي مشترى اضل اركض وراك يروح يصير شي عليك شيخلصني من لسان ابوك عمامك حكومه ما شاءلله
باوع عليه وبرطم حضنته وبجيت لا حبيبي مو عليك تعال شوفني شنو أشتريت وأنتِ دنيا اشتريتي
دنيا اي خيتي أشتريت وهاج هذا ربع رجع.
أسيا خلي الج حبيبتي شلته ودخلت داخل ونزلت زوجه اخوي ابراهيم اسمها دره وعلى اسمها وشايله بنتها وبيدها نساتل خلتهن كدام كرم
دره هاا شلونكم شبي ابنج يبجي الظهر خطيه كسر كلبي والله ردت انزل بس ابراهيم. تعبان ونايم واسوي صوت بالباب ويضل يعيط على? راسي شيخلصني بعد
أسيا هو طبعه نحس شالع كلبي والله ليل نهار يبجي حتى إهناك اذا موو يجي ابوه ويطلعه ما يسكت خو من يلتحق البيت ما ينسكن من عياطه.
خطيه متعلق بابوه دام هيج كسري الشر ورجعي
بعد كل اللي صار
تصير أسيا تصير كل الزلم هيج يحجون وبعدين بيهم يتندمون بيهم لا والله عادي عدهم السالفه بس شطالع بيدج ابنج معلم على? الدلال وبيته وغرفته وفراشه
والله ما آدري يا أختي الله كريم
لاتنقهرين يمعوده ولا يهمج اليوم بالليل يجن نسوان أخوانج رسل وبراء ونسهر سهره مرتبه اكيد يجن محملات من يم اهلهن ونكعد نسولف كعدة نسوان ولاتخلين بالج يمه.
إن شاءلله إبتسمتلي وراحت تشوف إمي شُنو تسوي على? العشه هما عازلين فوك هي وبراء بس اسيل باقيه جوه بس من براء وأسيل يحن ل أهلهن لن أخوات متزوجات الأخوان على? طيب براء اخذنا رسل لاخويه محمد الصغير، تنزل دره تاكل يمهم.
أهلي ناس فقره وعلى كد حالهم اخواني يشتغلون عماله بس ابراهيم اسطه احنه ثلاث اخوان ابراهيم ومنذر ومحمد وديانه واسيا ودنيا ابوي متوفي وامي عدها راتب ابوي التقاعدي بس يا دوب تلحك كلها تريد وعيال جبيره
وفعلاً اجن وخطيه اشكال الدنيا جايبات اهلهن متمكنين بس زينين عليهن وابدا ما يوم شفنه شيء محلو من عدهم مقدرينه ومحترمينه احسن ما يكون الا حظي.
اباوع عليهن مخبوصات ويسون كيك ومجهزات الاستقبال والكزرات والعصائر وشلغن التلفزيون كعدنا ونسولف ونضحك وأمي راحت نامت تعبانه من شغل البيت وهوسة الجهال يحجن واني صافنه يالي مو يمهن
رسل قفلي تلفونج قفلي حركي حرك الحكران يكطع المصران تجاهلي شوفي شلون يمشي وياج مثل ميل الساعه.
براء شنو نسيتهن هذا عصام زقنبوت مو رجال عمي الله يساعدج عليه ما ينجرع يمه الف الحمدلله على زلمنا صحيح مرات يصيرون سم بس اهون من زلمتج
دره وانتن لاتكعدن تشيشنها على? زلمتها يطبهم الرحم?ن الله كريم تفرج خوما تضل سالفتها معلگه وإن شاء الله ترد ييت عيالها معززه مكرمه
براء اشوفج واكفه وياه وتردينها ترجع شُنو نسيتي رجلها شُنو حجه.
دره لا ما نسيت وادري كلامه كله يغث بس شتسسوي تحمله وراها ولد وبطنها مليانه وهي من خذته هذه اطباعه وخبالاته شتغيير بي كل مره يتعاركون ويردون
براء والله جان أستحى على? شواربه شايف نفسه شوفه بس هما عدهم ماليه درينا عائله عسكريه وعدهم معارض سيارات شكوو هالنفس وشايلين خشومكم على? عباد الله، يمه گلبي الله يساعدج لو منج اطلك وانعل والديه منين ما طلعلج قسمت الگشره اي والله.
رسل براء يمعوده يضل زلمتها شبيج نزلتي على? الترابي عيب ضبي لسانج
براء من حرگة گلبي منهم
أسيا يحجن وأني ساكته سمعت تلفوني يرن فتحته هو باوعت الهن براء غمتني ودره غمضت عيونها وهزت رأسها جاوبي شلت التلفون وطلعت برا ورجع اتصل لمره الثالثه جاوبته نعم
عصام نعم الله عظامج عظمه عظمه وينج متجاوبين
ويني قابل وبعدين شتريد متصل
ميت على? صوتج ومتصل
هاا لحظه صدكته بس رجع كال.
وجعاا انطيني كرم احجي ورجعي حشي بزلمتج يم أخوانج ونسوانهم ما اوصيج شكوو سالفه بالغرفه خليها بحلوك الاوادم.
تمام وشتفهم من كرم
أفهم افهم شعليچ أنتِ يله انطيني أبني وولي
ما جاوبته رحت أدور على? كرم يلعب ويه جهال خواله تعال ماما حبيبي كرم بابا على التلفون يحجي وياك
كرم باباتي حبيبي زلمتي السبع لك البيت خالي الك وحشه والله، هيج فراكك كاسر ظهري.
كرم بابا ادو تعال.
اسيا ضل يسولف وياه ومطول خلگه على? الرغم كرم ما يفهم شيء بس يسولف لما سمعته يكوله
عصام كرم حبيبي انطي التلفون ل لامك وينج
هياتني
شوكت ناويه ترجعين شو طابتلج الكعده بيت أهلج لازم دلال اخوانج يغزر بس تعب عصام بالقندره ما يغزر بيج
من تحسسن ألفاظك ومعاملتك وتضب لسانك عن خلك الله ارجع بس تبقى هيج المحاكم تندل دربها هذا العندي
هذا العندج! عبالك تهدديني
ما اهدد ليش أهدد خليت التهديد ألك أنت الحكومه.
انجبي لا اجفص على? حلكج احجي عدل خوش
رجعنا لمربع الأول شفت نفسك الصوج بيك مو بيه اني وحده على كد حالي كرامتي ما سمحتلي ابقى وياك وأنت تهين بيه وبإهلي
أهلج شوكت هنتهم شو كمتي تلوصييين
وكلمتك بنت الفگر
لا اله الأ الله عمي اني ابن الفگر وابن سطعش الگلب ساعة الكلتها ليش اخذتيها حجايه وزن ورحتي خليتها بلحك اخوانج طلعتيني نمله ما اسوه كدامهم هاي تاليتها أسيا.
البشر اله طاقة تحمل وأني طفح الكيل منك ومن لسانك المتبري منك
ليش جديد عليج لساني مو تعرفيني روحي بخشمي وما اتحمل غلط شبيج ما تعرفين اطباعي صارلنا شكد من متزوجين ولا عبالك معاشرتني أنتِ أنتِ
ولا اريد اعاشرك بعد خلص جهالك يمي والطريق ما تبعده سياره
ماشي أسيا.
الله وياك نهيت الاتصال شعوطني بأتصاله مليان سم شلون جنت مرتاحه من دونه ولا يبطل من سوالفه الله يصبرني عليك بعدني ما داخله الأستقبال دزلي رساله.
عصام شوفي ولج طلاك ما أطلك لو توذنين نجوم السما أقربلج من الطلاك وكرم اجي أخذه يمي وتولدين البطنج هم اخذه وأتزوج ومرت ابوهم تربيهم وأنتِ أبقي خل إخوانج يفيدونج ام الكرامه تعرفينها بس ما فاهمتها
أسيا شطتت وأخذت نفس بقلة صبر وتزوج منو لازمك اوووف كتبتها ورجعت مسحتها ونسوان اخواني يباعن
دره شبيج ولج شصاير تعالي احجيلنا
براء شيصير اكيد غلط عليها وجفص عليها بلسانه الوسخ عوذه شلون متحملته.
أسيا صفنت عليها لحظه تندمت شكيت من عنده وخليت كدامهن كل سوالفه تالي نفضت الافكار خيولي يستاهل انشره على? الحبل
رسل شبيج حبيبتي أسيا
أسيا شوفتهن الرساله وأحتركت حرك وهنا تشعوطن وياي ودره تباوعلي وتكولي سحبي تلفونج منهن شكوو قابل يمعوده
دره الله يهديج رايحه انوم جهالي تأخر الوكت تصبحن على? خير.
براء يا خير يجينا من ورا هذا الحقير الله ياخذك على? اللسان يا عار الزلم وأنتِ اذا براسج عقل طلكي وشمري عليه جهاله
رسل براء لاتدعيين يضل زلمتها شبيج حميتي زايد
براء شو وخرن عن دربي ترى طفح الكيل منه ومن سوالفه اخليهن كدام منذر وخل هو يتصرف وياه شايف نفسه شوفه والله خوش هذا شافنه ساكتيين وهيج يسوي بيج.
أسيا أخذت التلفون وكمزت على? أخوي منذر وركضت وراها لا دخليج لااشوفين الرسائل تكبر السالفه وما تصغر خليني اني وياه نحل سالفتنا ومنذر بدون شيء حامي عليه وهسه يتعارك وتصير مشكله ألها اول ما الها تالي لا دخليج لا دخليج براء
وعلى? صوتنا نزل منذر وراه إبراهيم وبراء طفرت عليهم خلت تلفوني بيدهم ويقرون الرساله وهي تحجي بعصبيه هيج أحسسن كملت عليج أسيا راح يتسود وجهي من جعب الجدر.
براء هذا صدك ما يستحي شُنو ما وراها أهل ويهدد بيها ولج لو برأسج خير ما تضلين على? ذمته
إبراهيم كولي خير براء خل نفهم السالفه من أسياا وياريت ما تتدخلين رجال وحرمته واحنه اخوانها نتدخل وبس
منذر يا خير تحجي عنه إبراهيم شُنو خايف منه واحد بايع ومخلص ووصلت بي المواصيل يهدد بإختنا ونبقى ساكتيين لا والله فلا اسكتله والله هذا الزواج ما يضل لو على? جثتي.
وأنتِ شوفي ولج طلاك تطلكين وابنج تشمرينه على? ابوه وتولدين هم حاله حال أخوه وانعل والديه لابو
ال يربيله خلفته
أسيا بس ابني مستحيل اعوفه وما انطي اله تأخذون روحي من صدري لاتلوعني على? إبني فدوه لعمرك.
منذر لعد شتردييييين ما فهمناج شو يركعج بالقندره ويسبج ويسب اهلج ويعيرج بفقرج ويهدد بيج ومجلبه بخلفته تندفنين عمرج تربيله جهاله وهو عايش حياته لا والله هذا الحجي ما يوكل عندي هو بصوب واحنه بصوب وخل يتزوج وياخذ من مقامه العالي وراه سبع حجرات كواويد ناس ما تستحييي.
إبراهيم أني احجي وياه وخل نفض السالفه بالطيب دخل بالحسنى يطلع بالحسنى ماله داعي العنتره والسب والغلط هو موخوش ادامي ميخالف بس مو نصير مثله ومن هذاك يومنه لهذا يومنه الطفل يتربى عن إمه لا هو ولا غيره يكدرون يأخذون أبنج من حضنج.
منذر شُنو تريدنا نربيله خلفته لا عاااال والله نحلت السالفه بابا شبيك اخوي أنتَ ترى سبنااا عيرنا بفقرنا تعرف شُنو ثمن كلمته بنت الفگر هذا جافصنه بسطاله وما سأل عن واحد بينا وأنتَ هذا كلامك وردك
أبراهيم ولاتنسى رجال ومرته
منذر لا ما ناسي بس خليها عليه اني اتصرف
أسيا ركع التلفون بالكاع واخذ الشريحه وابراهيم عاط بي
أبراهيم هاي أنت إشسويت هي هيج تنحل المشكله التلفون شعليه.
منذر علمود الافنديه ماتتواصل وياه سمعي ولج اذا سمعت لو دريت حاجيه وياه لو جاي وطالعتله ما تلومين نفسج وطلاك أطلكج واخلص منه ومن كل عشيرته وساعه السوده وافقنا عليه كلنا خوش ناس وسمعتهم زينه طلعو أنذال
أبراهيم منذر لاتصير انكس منه خلاص كلمن يولي لغرفته يله
أسيا طول المشكله أمي جانت ساكته أخر شيء جرتني الغرفه وقفلت الباب وكامت تحجي عليه.
شسويلج هسه اضربج بهذا العمر وكل ال يجرالج من أيدج مو من أيد احد من يوم حبيتي وعشگتي وخطبج هو هذا للسانه هو ابوه يسب ويلعن بي عاد وكفت علينا هاي طينته وخبالاته شتسويله تبدلين رأسه وعقله شيتبدل منه
جاي تلوميني كافي عليه كلام ولدج.
اي الومج لعد الومن كوليلي الومن ماكو أم ترضّى بخراب بيت بنتها وادري عيالج زينين عليج ورجلج مدللج بس عيبه للسانه يهلل على? الرايح والجاي خير شر ولو مشكلتج ويه عيالج جان حجيت وصخمت بس شحجي ما أنتِ ما قصرتي كدتيتهن كلهن بحلك أخوانج ونسوانهم والمره اللي تطلع سر غرفتها تنزل من عين زلمتها ونزلتي ما تكوملج كايمه بعد من إمداج من بين النسوان
يعني ترضينها يگولي بنت الفگر.
ولج يكوووووول اللي يگوله قابل الزلمه جاذب خليييي يرطن منا لباجر شوفي شلون يحسس بذنبه ويجي يتعذرلج بس أنتِ إشسويتي اجيتي ركض حجيتي الأول والتالي ما خليتي خط رجعه اذا رجعتي ما تردين عين تباعين بيها بوجه زلمتج
ما ارجع اله لو يمووووت وهذا كلامج ما هز شعره بيه ويريد ياخذ جهاله خل يأخذهم.
أي وضلي دكي ونوحي على? رأسي كتلتي نفسج كطعتتي روحج علما تأخذينه وأخوانج يوافقون هسه صار كخاا مو هذا أختيارتج ما جان تتحملينه الرجال من يحمله غير مرته
ميهمني بعد
وميهمني لا يبوو شيهمج هم غم ما واكعه بس برأسي
هو أنتِ مليتي مني
سكتي لا اكوملج أنعع عظامج وكومي جيبي أبنج ونومي لما اشوف أخوانج شيسون بسالفتج يا خوفي من تاليها يا خوفي أخ منج أسيا شلعتي گلبي بزواجج.
أسيا عفتها مقهوره عليه وطلعت لكيت ابراهيم يحجي هو ومنذر عبرتهم وجبت كرم لكيت رسل تعزل وتنظف هوسة الاستقبال طلعها من عيني جبته وغسلتله واخذته نومته بالكوه نام شلع كلبي وتذكرت إبوه وكلامه وتذكرت روحي أشسويت اني اوووف يحظي.
أزهار.
بعد مرور وقت وأمي ختمت القرأن علما وصلنا من خوفها على? عصام ادري بيها تحبه أكثر واحد بينا واله معزه خاصه من دون أخواني وشاغل بالها بزواجه وجهاله دوم مشاكل والسبب من أسيا اي شيء يصير هي وياه تركض تخليهن بحلك أخوانها وتالي تصفى الگلوب وترجعله وهو يعدي الموضوع لن يحبها الله يصلح حالهم.
وصلنا ودخلنه القريه بيوتهم كلها من طين وغنم وابقار ودجاج وطيور وأنواع الحيوانات ضليت صافنه ومبتسمه وأباوع على? الزرع والخضار طبيعه تفتح النفس هواء وأوكسجين نقي ومجد طالع رأسه من الجام ويصور الاجواء وحركات وكذا وعصام كفخه على? رأسه وعاط بي
عصام نزل رأسك لسياره لا انزل اجفصك شيكولون علينا الأوادم يصورون نسواينه ما تشوف الكاعيين مليانه نسواين من طاح صبغ من بين الزلم يمتى تجني عقل لك ارعن.
مجد كافي تغلط عليه ترى مو ابنك ولا جاهل أني طالب أعداديه ما عدت طفل صغير
عصام أغلط عليك وأكسر رأسك هم والما يجني عقل لو عمره بالستينات العقل مو بالعمر يالفهيم.
ازهار مجد ضاج من قساوة كلام عصام وصلنا وطبك السياره باب الحوش ودك هورن وطلع خالوا سلمان وخالي سلام وراهم شاهين نزل عصام مباوس هو وياهم وسلام حار وامي كذلك واني تقدمت سلمت عليهم ودخلنا لداخل جانت اكو غرفه معزوله عن البيت وعليها طرمه كلش جبيره كالوا هاي المضيف طبعاً البناء كله من طين دخلنا وجدي جان كاعد وخالي مازن هم موجود سلمنا عليهم وجدي خطيه هواي فرح بينا وضل يباوعلي ما شال عينه عني واجه شاهين جاب ماي وقدم النا وصل لعندي رفضت وعصام كبالي خزرني اخذت ما عطشانه هي كوه.
الجد أسماعيل يا هلا من زارنا يبه سلام سلمان ذبحوا وحضروا الزاد جية الغوالي جثير عزيزه يا هلأ
عصام بالمهلي جدي طال عمرك والله ما تقصر ليش تكلفون على? نفسهم من هالموجود قابل احنه غربه
سلمان لا يبعد خالك ما يصير وجيتكم مناك لهناك الها ذبيحه ابني شاهين كوم نذبح بجية بيت عمتك يله يبوي
شاهين على? امرك يبوي.
أزهار جان الترحيب والتقدير من أحسن ما يكون إمي طايره من الفرح انقهرت عليها شوي ودخلت جديتي وضحى وكمنا سلمنا كلنا جرتني وتبوس بيها كل قوتها وتمسح على? ظهري بحنيه
الجده وضحى ولج وصال بنيتج صايره مره وكبرانه وحليانه عين النبي تحرسها
وصال اي يمه البنيه بساع تكبر ركض ركض درست معهد سنتين وتعينت
وين تعينت
عصام موظفه جده موظفه بالدائره الحكوميه.
الجده وضحى وأنتوا كاتلكم الجوع توظفون هالطيره بنص الزلوم وين غيرتكم عليها ولك عصام شلون تراضاها خيتك وحيدكم هاي مو عيب شتكول الاوادم
عصام والله جده گوه علينا هذا شغل سيد الوالد هو وظفها والله السالفه لو توكف عليه كعدت البيت كافي عليها
الجده وضحى يلة يجي نصيبها ورجلها يحكمها وهذا تظويف ماله داعي بعد والخبزه الزلمه يجيبها موش الحرمه.
أزهار يحجون وأني ساكته بس على أعصابي مبين جديتي وين راسمه جنيتها عرفتها مو خاليه لاهي ولا جدي نظراتهم اليه وكلامهم بالزواج الله يعدي على خير اني وأحلامي وين وهما وين كل عقلهم اتزوج وأعيش بيت من طين وازرعي وداري حيوانات يمه لا انتحر احسن شي.
مجد ترى يردون يزوجونج ل شاهين.
أزهار أكرمنا بسكوتك أنتَ، أمي لحكت جديتي وكمت وراهن تمشينا بالحديقه وبعدها دخلنا للبيت مضيف النسوان اجن أخوات شاهين ال 6 وسلمن علينا وحده وحده
سندس أرمله
سناء متزوجه أبن عمها
وداد
سهاد
سميره
أميره
كعدنا بالغرفه جبيره كلش بيها صور الأمام الحسين.
(عليه السلام) وتلفزيون هذا القديم على? ميز خشب ضخم مثل الكنتور بي خانات وتقسيمات وعليه ورود من كل مكان بس مع ذلك المكان نظيف وريحته تجنن والبرده لونها فستقي واني صافنه بتفاصيل الغرفه جديتي ضربتني بالعوجيه مالتها.
الجده وضحى ولج حبوبه وين شردتي شنهي اخذ عكلج
أزهار منو جده
الجده وضحى لا هيج يلة يمه كومن جهزن الزاد واخذن وياجن زهيره خل تعاونجج بالطبخ مبين وصال ما معلمتها تكون ام بيت مو هيج وصال.
وصال اي يمه إبوها مدللها ما يخليها تجيس شيء شتريد أمر ولبيك تعرفين وحيدته وعزيزه گلبه هي بكفه واخوانها كلهم بكفه
الجده وضحى الله يحفظها ويفرحكم بيها يله زهيره كومي شمالج صافنه بوجهي كومي جده كومي
أزهار جده أسمي أزهار مو زهيره ودلعي زهره
الجده وضحى محلو أسمج خو لو مسميج زهراء شحلاته.
أزهار لا كلش حلو بابا هو سماني وكلش حابته ضحكت وضربتني بالشقه بالعوجيه ومشيت وياهن للمطبخ لاحظت امهم ما موجوده صدك خاله جنان وين ما شفتها
سهاد زعلانه يم خوالي
سندس سهاد لسانج
أزهار ما حجيت بس وحده تباوع الثانيه ما اعرف ليش
وداد راحت تغسل التمن على الحوض وسناء اخذت الضيافه لإمي وجديتي اساعدكم بشيء
سندس لا يمعوده بشنو تساعدينا وبعدين يمكن ما تعرفين تطبخين.
أزهار لا اساعدكم بشيء مو شرط الطبخ كامن يضحكن شكوو كلت شيء يضحك
سميره لا عادي إكول عوفينا من الطبخ احنه نطبخ سولفلينا شسوين صدك تشتغلين ويه والزلم.!
أشتغل ويه الزلم
اي سمعنا توظفتي بدائره بيها موظفين وياج
اي صحيح بابا وظفني
سهاد هم إبالج تزوجين
أزهار لا مو طموحي الزواج ولا أبالي
سميره شعجب ما شاءلله عليج دارسه ومتعينه وحلوه وكامله والكمال لله.
سندس شنو هالاسئله مو عيب يله كلمن تلفتت لشغلها شعليجن تزوج والما تزوج ما عليج منهن حبيبه تعالي امشيج وأشوفج كاعنا والخضار والزرع
سميره أي عيني مشيها مشيها خل تشوف العيشه شلونها بالقريه عليش تجي تعيش بيها وبعدين تنصدم
أزهار أعيش بيها شتحجين أنتِ
سندس سميره مو وگته الحجي.
سميره وشگلت قابل مصيرها تعرف خيه سمعي احسن ما تسمعين من غيري خيي شاهين رايدج بالحلال تكون حرمته وابوي عزمكم علمود يفاتحون عميمه بالسالفه كلها
أزهار لا تششاقين مو معقوله
سهاد ليش مو معقوله ليكون مو عاجبج اخوي والله يصحلج زلمه مثله فديت طوله اخته تعشگه
أزهار ضحكتيني والله وبعدين اللي اعرفه الرجال يمشي لبيت العروس ويخطبها مو ينتظر المره تجي بيته ويخطبها صدك خطبه اخر وكت نفضن ايديهن وعصبن.
سهاد والله كالتها أمي بنت العز والدلال ما تعيش عدنا
سندس سميره سهاد كافي سكتن شعليجن أنتن بهل السوالف امشي أزهار وما عليج من الحجي
أزهار كلامهن كله بحقد تجاهلتهن وأخذتهن على كد عقولهن بس السالفه كالنها ضلت برأسي معقوله يطلع كلامهن صدك لا مستحيل اوافق ولا أهلي ينطوني بالأخص بابا ما يجبرني على? الزواج اخ منج يمه اكيد عدها علم بالسالفه وضمت عليه من ارجع احجي وياها ويصير خير.
ومشيت ويه سندس جانت حبابه ولطيفه واحنه نمشي اجه شاهين صارت گبالنا وايده كلها دم أنرعبت من المنظر ضحك وگال
شاهين شبيج تتراجفين ترى ما ذابح احد دم الطلي هذا
أزهار لا ليش ارجف عادي يله سندس نمشي
شاهين وين
أزهار كالت نتمشى
سندس روحي هسه تلحكج
سندس ماشي خويه
أزهار راحت وعيني وراها الصراحه خفت من تواجدنا سوه وخاصه هو نظراته ما اعرف شلونها بس يباوع بتركيز ويصغر عيونه ويرجع يعيد نظراته شبيك مضيع شيء بوجهي.
شاهين أزهار
أزهار أتفضل
شاهين أحد گايلچ أحبج!