رواية بين قلبها وعينيها كبرياء للكاتبة شمس العراقية الفصل الثاني والستون
ازهار شتحجين ماما أسيل شبيها صاحت بيه ماشي ماشي صاعده عفت التلفون وصعدت ركض ودگيت الباب عليه بكل قوتي مروان مروان اكعد مروان أسيل متخربطه مُباشرةً انفتح الباب بخوف
مروان شبيها أسيل أحجي شبيها
أزهار ما أعرف بس أمي گالت گولي لمروان اسيل سابحه بدمها بالحمام راح تروح من بين أيدينه
شتحجين أنتِ خوما منتحره فهميني أسيل شبيها.
ما اعرف ما اعرف بس امشي نروحلها عافني وركض لبس فانيلته بالمكلوبي وشال تلفونه والسويج ومشه سريع أوكف اجي وياك
أستعجلي ركض ترى ما أنتظر أحد
ركضت سحبت عبايتي وشال وجنطتي اسيا تلفوني اني رايحه وياه
أسيا ماشي عيني لما جهالي جان اجيت وياكم خطيه شجاها والله ما تستاهل أمانه طمنيني عليها
ازهار أي ميخالف مشيت سريع وهو حرك سيارته فرها بكل قوته مروان اوكف اجيت
مروان بسرعه.
ازهار فتحت الباب وطلعنا وسياقته جنونيه وعصام أتصل عليه جاوبته هاا عصام
عصام شبيها أسيل
ازهار ما اعرف والله هسه رايحين الها اني ومروان منو گالك
عصام أسيا هسه خابرتني وأنتوا وين رايحين هسه
لن أتصلت على امي متجاوبني
أزهار والله ما اعرف مروان وين نروح
مروان شمدريني ليش كمت اشوف طريقي خابريها شوفيها خابري على أمي عوفيلي عصام هسسه.
ازهار بعدين أني اخابرك قطع الاتصال وأتصلت على أمي جاوبتني يمه وين أنتوا.
مروان فتحي سماعه
وصال بالطريق ماخذينها المستشفى
مروان يمه أسيل شبيها شلونها يمج أنطينياها
وصال بحضني ولك يمه فاقده الوعي تأخرنا لما اسماء جابت سياره حارث طالع ونتصل عليه ميجاوب تعالوا المستشفى راح نوصل
مروان واهلها الكواويد وين مولين شعنده طالع طبعاً تفقد الوعي هي بس راحتلهم فقدت حتى عقلها كعديها يمه ضربيها على خدها شوفيها
وصال يله وصلنا اسماء تعالي منا
مروان يمه حاجيني
أسيل عمه.
مروان أسيل أسيل يمه وينج حاجيني خرب بحظ الكواد وين عفتي تلفونج يا مستشفى أخذوتها وين اجيكم
ازهار أنقطع الاتصال وفر سيارته وين يا مستشفى
مروان اكيد المستشفى العام رجعي خابريها
أزهار أتصلت جاوبتني اسماء هاا وين أنتوا
أسماء بالمستشفى هسه دخلنا اخذوها من عدنا
ازهار يا مستشفى
أسماء مستشفى، العام هاا عمه
وصال مروان وين صار خل يجي بسرعه اسيل طلعت حامل جاي يكملون الفحوصات خل يجي.
ازهار انقطع الاتصال استعجل امي تكول خل يجي
بكل سرعته وصلنا نزلنا ونمشي سريع وخابرتها يمه وين انتوا.
وصال يم صالة العمليات تعالوا.
ازهار يم صالة العمليات
مروان شتسوي يم صالة العمليات شبيها ازهار احجيلي شبيها تعرفين شيء وما تكولين اليه
ازهار خل نوصل ونفهم من أمي ما ردت اكوله لن الخوف القلق واضح عليه مرعوب بشكل ما أكدر اوصفه وصلنا ولكينا امي كاعده واسماء واكفه هي والدكتوره هاا يمه.
مروان هاا يمه أسيل وينها شبيها
وصال والله يمه ما ادري شگولك بس أسيل طلعت حامل والطفل ميت بطنها صارله أيام ومأخذها النزيف جانت كاعده وياي شو لزمت بطنها وگالت اروح الحمام راحت وتأخرت وكمت اشوفها لكيتها واكعه والنزيف مأخذها سوده بوجهي عليج يمه صفرت دم وجهه اصفر مثل ليمونه.
ازهار أمي كملت كلامها وهي تبجي ومروان ضل ساكت ولزم?اسه وداخ وأمي حضنته من?اسه وتبوس بي.
وصال لاتزعل يمه الله يعوضكم مهم سلامة أسوله گلشي ما نريد بس سلامتها وعافيتها.
مروان لا يمه شسوي بالطفل أريدها هي.
أزهار كعدنا وهو ضل واكف ودخلوا علينا أهلها كلهم وراهم اخوها حارث
أسماء خير أن شاءالله
جنان وين بنتي اسيل وينها شسويتلها دمرتوها ادري بيكم اخذتوها لحم ذبيتوها عظم حسبي الله عليكم من عيال ورجال حسبي الله عليكم
أسماء بصالة العمليات اخذوها عمه على كيفج گولي يالله.
حارث يمه هدي مو وگته هالحجي خل نطمئن على سلامتها
جنان عوفونييي ادافعون اله وهو دمرها مصم دمها الكواد نافشلك ريشك مثل الطاوووس بعد تحلم تشوف اظفرها تحلم.
علوان خل تطلع بنتي ويصير خير يا أبن كمال والله ما تصيرلكم جنه بعد
وصال لاتفتح حلكك ولا تقلل من احترام خليهم يحجون بنتهم وتضل بنتهم عيب مهم يكون عمك.
مروان هو هسه ساكت بس اذا يضلون هيج أعدلهم بالهندي والله واطلع غاديهم وانعل الكواد اليطلع وراهم لو مو عمامي.
جنان حسبي الله بيكم اشوف بيكم يوم يا بيت كمال
ناس ما تستحي شامرينها على اخوها من ضيمها من قهرها طگ گلبها من ابنج العار.
ازهار أحترمي نفسج وعمرج عليمن عار شويه أرتقي احنه بمكان عام والناس رايحه جايه تباوعلنا.
مروان لج بردي گلبي واجضعيها شبيج صيري مثل اخوج اخ الله كون اكدر اصير مره ساعه وحده بس والله الزمها انام عليها اعضضها اتمزمز بيها.
وصال ازهار امشي لا اكس? حلگج وامشي اهناك وانت هم اسكت لاتفضحنا وياهم كدام العالم خل تحجي بنتها وگلبها محترك عليها.
ازهار أمي سحبتنا وگفنا على صفحه ويباعون النا بحقد وحارث وكف يحجي وياهم ويفهمم ودخلت هديل تمشي سريع وياها حسن ومروان باوع الهم ويهز بأيده وامي جرت ايده وتهدي بي
مروان أجت المستشرفه
هديل انتوا صدك ما تستحون يعني فوك سواد وجهكم واكفين بدون خجل.
مروان ليش نخجل شمسوين قابل مصلخين كدامج علمود نستحي لو نخجل منج ووجهننا أبيض من تاريخج سكتي وطمي روحج.
حسن لك عليمن تحجي هالحجي والله انعل والديكم والساعه السوده الناسبنكم.
ازهار هجم على مروان ضربه بوكس وحارث وكف بينهم ويفازع ومروان لزم خشمه.
مروان والله الا اندمكم والله بس خل تطلع اسيل بالسلامه يصير خير هسه صايرين أهلها هسه طگ بيكم عرج المحنه صارلها سنه يمي ما شفت كواد منكم دك بابننا لو رفع اتصال وسأل عليها حالها حال اليتيمه هسه جنان هسه صرتلي ام دتروحي طبقي الأمومه على بنتج هديل ليش تخلوني أحاجيكم بالهندي.
حسن شو أنتَ هم عار عاجبك تنهان
مروان منو أنتَ تهيني لك سلوگي خليني لازم اخلاقي بشعره لا اكطعها واخلي الما يشتهي يتفرج الكم.
ازهار حسن كام يغلط ويفشر وحارث يحجي عليهم ويسكت بيهم بس فضاحه عزا مروان كلها تباوعلنا تخزينا شنو هاي.
مروان خلي تطلع بالسلامه حتى أسمهم اشيله من الجنسيه اذا ما غيرت نسبها اني مو ابن كمال والله
حارث مروان أكس? الشر وروح منا لاتسويلنا مشاكل والله أنفضحنا روح بعدين تعال.
مروان وين اروح شتحجي أنت بابا مرتي ما اعوفها لو موو تكونون أهلها خطوه ما اتزحزح منا شتسون سوا هسه صاروا أهل هي صارلها شكد يمك وصلوا الها لا سألوا عليها هم لا لعد شعدهم جايين كثره بلا خثره بس يفشلون
هديل ولله أحنه نفشل وأنتوا شُنوْ ينرفع بيكم الرأس اذا عدكم توالي ك?امه امشوا منا بكرامتكم شگو باقيين بنتنا واحنه اهلها انتوا منو واذا عيالها من على هيج عيال.
عصام هديل.
ازهار اجه عصام تقدم وعاف الكل وگف كدامها وهي انخلست كامت تموت بس شافته نزلت?أسها
قسم بالله جنازتج هسه أشيلها سگتي واحشمي نفسج لا اهينج وامسح بيج الكاع أمشي انكبري
ازهار مشت وكعدت بصف أمها وامها كامت تحجي عليها وهديل باوعتلنا عصام خزرها گبل نزلت عينها بعد ما سمعنا الها صوت لا هي ولا أمها وعمي علوان اشر ل حارث وطلعوا.
مروان وينك لعد طلعت أنتَ دواها وتأثر بيها خرب بيومها بس شافتك خرطت العافيه عمي أنتَ مأثر درجه أولى وينها اسيا وتجي تشوف الأكشن تسويكم مندي بالريزو.
عصام يحتاج الها ضب مستفلته فدمره هسه ما علينا اسيل وين صارت شلون وضعها.
مروان بالصاله ما يخلون احد يفوت دخلن وبعد ما طلعت ولا وحده منهن اذا يضل الوضع هيح انقلها على مستشفى خاص.
عصام نفس الشي بالعكس خوش مستشفى خدماته فول يله أني رايح اسأل تجي وياي نشوف ليش تأخرت هلكثر صدك هي شبيها لن اسيا تسأل عليها.
ازهار حامل وطفل ميت بطنها وصاير عدها نزيف
عصام وليش صالة العمليات
مروان صدك ليش صالة العمليات
عصام اذا حمل جديد ما تحتاج صالة عمليات امشي وياي نسأل بلكي نلكه معارف منا منا
مروان ما عدنا معارف بالمستشفيات بس بالسلك العسكري أمشي وهي تصفى.
ازهار راحوا أثنينهم وهديل تباوع الهم وأسيا اتصلت جاوبتها هلا اسيا
اسيا هاا عيني طمنيني أسيل شلونها شلون وضعها ضل بالي والله وعصام سألته عنها ما يعرف كلشي
اي هسه گال النا والله اسيل طلعت حامل الطفل ميت بطنها هسه هي بصالة العمليات ما عرفنا السالفه هسه عصام ومروان راحوا يسألون
خطيه شجاها والله ما تستاهل يله الله يعوضهم مهم سلامتها امانه من تطلع عود خابريني
ماشي حبيبتي
عصام شوكت اجه
قبل نص ساعه.
ها تمام يله عيني اخذي راحتج.
الله وياج نهيت الاتصال واجو هاا بشروا.
مروان كالوا هما يطلعون ويبلغونكم ادري صار شكد من دخلت شجاي يسوون الها ماكو هيج شيء
عصام هدي هسه مسألة وقت أنتظر
ازهار طلعن الدكتورات أثنين وهديل وامها كامن تقربن يمنا وعصام أبتعد مسافه عاد الدكتوره گالت.
الدكتوره أسيل حامل مع الاسف الطفل مشوه خلقي عباره عن كتله مشوه والرحم بأكمله متدمر بسبب الأكياس الدمويه والمريضه وضعها الصحي جداً خطير لن دمها جاي ينزل نزول سريع ما نكدر نسويلها عمليه وخلينا الها دم وما جاي يصعد بسبب النزيف وحاليا ننتظر تستقر حالتها ودمها وندخلها عمليه قيصيريه.
مروان شُنوْ وضعها الصحي خطير وأنتن شنو شغلجن صار شكد من دخلناها الصاله شجنتوا تسون الها متكوليلي.
عصام مروان هدي الدكتورات اعرف بشغلهن
مروان يا شغل يمعود صارلهن شكد وجايتني تكولي وضعها الصحي خطير
الدكتوره مقدرين خوفكم بس هذا شغلنا وياريت توكفون ويانا بدال التهجم لن المريضه جداً تعبانه
واضافه عمرها وبنية جسمها ما يساعد بين ايدينا طفله يعني مو كيفنا وهسه راح نطلعها ترتاح وتستقر حالتها وبعدها ندخلها صالة العمليات
وصال عفواً أمي ليش صالة العمليات.
الدكتوره ماما بنتج تحتاج عمليه ازاله الاكياس الدمويه لن متغلغله داخل الرحم مشوهته بالكامل رحمها شكلها متغير بسبب الاكياس الدمويه.
وصال شلون حامل وعمره أشهر وهي كل شهر تنزل الها شلون يصير حمل بهيج وضع.
الدكتور لا ماما يصير حمل مع أستمرار الشهريه وتعتبر من الحالات النادره جداً لن هي عدها اكياس ونفس الوقت هرمون الحمل ضعيف ما يطلع بالتحليل لن هي اساساً كلشي بجسمها مخربط وصايره هيكل عظمي خرابه بنتكم صايره خرابه
هديل بس الطفل بعده صغير ليش مو كورداج.
الدكتوره حبيبتي العمليه علمود انظف رحمها وأزلة الاكياس الدمويه لن اذا تبقى هيج تضل نزيف ودمها يصفر وتموت او تدخل غيبوبه وهسه راح نطلعها بينما نكمل الفحوصات والتحاليل كامله.
ازهار عافتنا ودخلت وضلينا واحد يباوع الثاني ومروان عيونه أنترست دموع وأختنك وعصام يطبطب على اكتافه
عصام شد حيلك كول ياالله ما بيها شيء أسيل سباعيه.
ازهار وأنفتح الباب وطلعت أسيل وهي مغمضه عيونها صاحت.
أسيل حارث حارث عمه وصال عمتي وينها
وصال يمه بنيتي يمج اني يمج لازمه أيدج
أسيل يمه راح أموت
وصال لا اسم الله على عمرج.
جنان أسيل يمه بنيتي
أسيل بطني بطني توجعني.
ازهار سحبوها عصام وحارث ولازم أيدها ودخلوها ومروان دخل وراهم وكف يمها وهي بس تون من الوجع وتنفض برجليها
أسيل عمه راح أموت
مروان لا اسم الله عليج.
أزهار لزم أيدها وباسها باوعلته وضلت صافنه عليه من كثر ما وجهه اصفر عيونها هم صفر تقربت بصف مروان أسيل حبيبتي شدي حيلج لاتخافين ما بيج شيء هسه يستقر وضعج وتصيرين زينه
أسيل تعبانه ما بيه تعبانه
ازهار غمضت عيونها ومروان يبجي انهار فدمره أبتعد وكف يم الباب وحارث تقرب الها ينفض بيها شبيها كلهم وكفوا يم?أسها طلعت مروان اسيل ما اعرف شبيها ركض كدامي
حارث شو ما تكعد اسيل ولج خويه أسيل
مروان أسيل أسسسسيل.
ازهار هديل وامها كامن يلطمن وحارث ومروان يكعدون بيها ودخلن الدكتورات والممرضات طلعونا برى بس مروان ضل ما طلع حاولوا وياه معند.
عصام حارث سگتت أهلك خطيه فهمهم
يمعود شد حيلك گول يالله.
حارث كسرتلي ظهري.
ازهار طلعت الدكتوره ما فهمنا منها كلشي ومروان هم طلع يسألون بي ميجاوب أحد مشه وكف بعيد
وطلعوها من الغرفه يمه وين مأخذنها
وصال لو عنايه مركزه لو انعاش.
ازهار أخذوها ودخلوها الانعاش وضلينا كاعدين ومروان بعد مسافه عنا ويعض بإصبعه يمه روحي على مروان باوعتله وأثنينا نبجي عليهاوعليه.
وصال شسويله وأذا رحتله اكدر اخفف عنه بس ادعيلها الله يگومها بالسلامه ويرجعها اله لن هسه تأكدت اذا الله قدر عليها لا سامح الله مروان يموت وراها سوده بوجهي يمه عليكم واحد لكه الثاني اني خفت لساني حجيت عليها وقسيت وياها وانقهرت مني طلعت من البيت زعلانه ومفرفحه روحها هالبنيه هواي أنظلمت يارب بس گومها بالسلامه أشيلها بعيوني.
أزهار أمين، وصفنت عليه حالته ووضعه يقهر ويكسر القلب والخاطر لعد شكد يحبها وهسه تأكدت وعرفت مروان وأسيل أثنيهم ضايعين مروان تكمله أسيل وواحد يكمل الثاني.
اجه دكتور وياه دكتوره ومروان فز وكام وتقرب النا.
الدكتور المريضه فقدت الوعي دخلت في غيبوبه بسبب نقص حاد بالدم وأحتمال تضل يومين ثلاث أيام حسب حالتها وطاقتها لما يستقر دمها واضافه طلعت التحاليل.
ازهار الدكتور يباوع بالاوراق وكلنا منتظرينه يحجي.
مروان أحجي شبيها التحاليل ليش سگتت أسيل بيها شيء؟
الدكتور من بعد الفحوصات الكامله والتحاليل تبين عدها مرض على الكبد أكياس وهل المرض قديم وابو صفار حاد يعني المرض ما يقتصر فقط على رحمها كبدها أيضا تعبان وتحتاج عمليه.
هديل خوما تسون لأختي عمليتين.
الدكتور أي عمليتين بس بالوضع الحالي نسوي الها عملية أنقاذ لن المدمر الأساسي هي أكياس الدمويه هي السبب نزول دمها وعدم استقراره وفقدانها للوعي ودخولها الغيبوبه واضافه عدها مضاعفات بالدم اما الكبد نبيقيها على العلاج هو المفروض عمليه بس ما يصير عمليتين بوقت واحد هذا الشيء مستحيل والله كريم الشفاء من الله تعالى ادعولها تكوم بالسلامه.
هديل دكتور الله عليك خوما بيها شيء يخوف يعني وضعها بي خطوره على حياتها
الدكتور كولي يالله
هديل ونعم بالله تحتاج نطلعها مستشفى خاص
الدكتور لا ما يحتاج احنه ما نقصر وياها وهذا شغلنا ولو يحتاج أقارب المريضه يطلعونها واني
عود أبلغكم
هديل هذا شبي لعد اني شُنوْ اقارب المريضه
حارث شگو حاشره خشمج امشي كعدي خفت طولج شعندج جايه ما جان تبقين مگبوره بالبيت
هديل أجيت على أختي.
حارث أمشي أنكبري من وجهي الله يأخذج خزيتني فضحتني أنتِ وأمي حتى الدكتور كام ما يعترف بينا أحنه أقارب المريضه لن مو اوادم من دخلنا غلطنا وصوتنا واصل لأخر المستشفى وصياح ومشاكل عبالك جايين لحرب مو علمود بنتكم ما خليتوا إلى لا قيمه ولا أحترام
أزهار يحجي بعصبيه وهو مقهور مروان وعصام سحبوا ويهدون بي وعصام خذه وطلعوا.
ضلينا كاعدين ويمر الوقت وأهلها مشوا بس هديل ضلت كاعده بصف أسماء وأمها ضغطها علك شدولها مغذي وراحت البيت هي وحسن وعمي وتاخر الوقت وأجه عصام جايب عشه محد أكل
عصام يمه روحي البيت أرتاحي تعبتي وأخذي ازهار وياج خطية بنتها تبجي
وصال لا خل مروان يروح يمه گوم روح البيت وأخذ أختك وياك أكل لكمه وغير ملابسك وأرتاح عود تعال.
مروان ما أتحرك من مكاني عوفيني يمه
وصال ما يصير يا أمي
مروان يمه فدوه رحتلج عوفيني.
وصال لعد أني ابقى يمك ما أتحرك حالي من حالك ولا أكل ولا اشرب وهاي كعدة.
مروان يمه ليش هيج تسوين اذا تخربطتي هسه
عصام أمشي وياي أرتاحي والصبح اجيبج ازهار جيبي جنطتها يله نمشي اوصلكم وأرجع تريد شيء أجيبلك وياي شاحنه ملابس
مروان گلشي ما أريد.
عصام أنت لابس فانيلتك بالعكس محد گالك
مروان عادي
ازهار أي صحيح نسيت أكولك ما جاوبنا وعصام سند أمي وكالتله
وصال بس اغير ملابسي وأصلي وترجعني.
عصام باجر الصبح ارجعج لازم تنامين وترتاحين
وصال لا ترجعني ما أعوفها أخاف تكعد وتريدني.
عصام الله كريم مروان عود من أتصل عليك جاوب
مروان ماشي.
ازهار طلعنا للبيت بس وصلت اخذت دوش ونزلت على بنتي روحي طايره عليها أسيا وينها
أسيا يم عصام بالغرفه جانت نايمه خطيه بس اخوج كعدها ومخليها بحضنه
ازهار يا يروحي هي وخالها ودگيت الباب
عصام أدخل.
ازهار دخلت ولكيته يبوس بيها ويسولف وياها وهي صغيره بين أيديه شايلها بكل حنيه وشفت تلفونه مفتوح مصورها
عصام يله روحي على ماما
ازهار أخذتها منه وأبوس واشم بعطرها حضنتها قوي وبجيت وأختنكت حاولت اسيطر على عبرتي عصام حس بيه وسحبني لحضنه عصام گلبي يوجعني عليها اني ظلمت بنتي
عصام لا أنتِ ما ظلمتيها لاتحملين نفسج الذنب وتقهرين بروحج خليج قويه ولاتضعفين.
ازهار أن شاءالله من رخصتك اروح انومها.
عصام أخذي راحتج عيني.
ازهار طلعت واسيا صارت بوجهي بأيدها صينية بيها العشه تصبحين على خير.
أسيا وين رايحه والله ما تروحين الا تتعشين ويانا امشي اني ميته جو? ضليت أنتظر أخوج لما يجي ونأكل اني وياه يله كدامي هسه عمتي وصال هم تجي بس تكمل صلاتها.
ازهار لا حبابه خليني اروح انام وبعدين ما جوعانه اكلوا أنتوا عليكم بالف عافيه
أسيا عصام تعال على أختك لا اركعها بالصينيه والله.
عصام أزهار ابويه تعالي تعشي لا تركعج بالصينيه ترى ما تكول باطل كلامها طابو
أسيا ليش عندك شك
عصام لا أبداً أي جهالي شوكت ناموا
من ساعه نومتهم لن خبصوني كرم ضل يبجي يريد يحجي ويه مجد وتعالي خابري بابا خل يروح يجيبه
هذا يحب عمه اكثر من عدنا
هو منو ما يحبه ورده مالت الله يلة ازهار كعدي لما أجيب الجاي واجيكم.
ازهار فرشت السفره بالكاع وخلت الاكل ورتبته وعصام كعد واني بحضني بنتي وأجتي امي وراها اسيا عصام اخذ القوري منها وهو صب الجاي وقدملنا وامي اكلت اول لكمه وكامت تبجي يمه صدك تحجين.
عصام گولي يالله يمه
وصال گلبي يمهم بس نتعشى توديني
عصام الصبح اوديج
وصال لا هسه
يجرالج هسه هسه بس كملي عشاج.
أزهار كملنا العشه وعصام وصل أمي ورجع واني رحت غرفتي نومتها بصفي وصافنه عليها ودمعتي على خدي هم تدرين بإمج مشتاقه ل أبوج وهم يفكر بينا اني وياج لا ما اظن اللي يتخلى بعد ما يفكر.
فتحت تلفوني وأخذتني أيدي لحسابه من زمان غالق النت باوعت الساعه بالوحده نايم هسه هو ما يسهر يرجع تعبان وينام من وگت علمود يشبع نوم ويرتاح
ضليت أباوع لأخر محادثه بينا وأني ابجي تالي غلقت التلفون وخليت?أسي ودمعتي على خدي ونمت.
كعدت على صوت بنتي رضعتها وباوعت الدنيا فجر كمت توضيت ورجعت شفت غرفة مروان وأسيل مفتوحه باوعتلها وگلبي وجعني قفلتها ومشيت صليت وضليت كاعده أسبح وأستغفر كملت
وكمت سحبت تلفوني فتحته واريد اراسل مروان صارت محادثتة كدامي نشط الأن كعد يصلي ويروح الشغل ياربي هونها عليه تجاهلته وراسلت مروان ما فاتح نت أتصلت عليه جاوبني هاا مروان شلونكم أسيل شلونها.
مروان بعدها مثل ما عفتيها
أزهار الله كريم عيني شد حيلك.
مروان ونعم بالله
أزهار الله يكون بعونك ورجعت كملت نومتي وللعصر لبست وبابا وعصام ينتظروني نروح المستشفى خليت بنتي عند اسيا ومشيت طول الطريق يحجون بينهم وأني بالي مو صافي أفكار تأخذني وتجيبني وصلنا المستشفى ماكو بس هديل كاعده لوحدها وامي بعد مسافه عنها
كمال أسيل شلون وضعها هسه شگالوا الاطباء
وصال بعدها نفس ما هي ينتظرون دمها يستقر وتصحى وضعها يصير زين يله يدخلونها العمليه.
كمال لا حول ولا قوة الإ بالله والحمدلله على كل حال هذا الانسان معرض لكُل شيء ولا رد لقضاء الله، تكوم بالسلامه أن شاءالله عصام ابني يحتاج عنايه اكثر ندخلها مستشفى خاص يعتنون بيها اكثر
عصام والله ما مقصرين خطيه
كمال اذا يحتاج قوم بالازم
عصام أن شاءالله.
كمال مروان وين لعد
وصال طلع برى لا يأكل ولا يشرب حجيت وياه ما يفيد
كمال ماشي اني احجي وياه.
أزهار بابا راح وعصام واكف مقابلنا عاد امي گامت وحجت بصوت ناصي.
وصال عصام يمه روح جيب أكل خطيه محد جابلها اخوها اخذ مرته وعافها واهلها ما سألوا ولا بينوا.
عصام گلبج الطيب شسويله
وصال نعامل بإصلنا يله روح خطيه
عصام ماشي لخاطرج بس
أزهار راح وضلينا كاعدين وجاب الاكل امي اخذته منا وانطته الها وامي راحت الحمامات وعصام كعد يمي تدري بنات عمي مظلومات
عصام شلون
أزهار ما اعرف احس أهلهن قاسسين عليهن يعني ليش عافوها لوحدها بدون عشه.
عصام فدوه ل أحساسج محد يظلم أحد الأنسان هو يظلم نفسه بسوء تصرفاته وسلوگه.
ازهار صفنت بكلامه عميق جداً وبي حكمه وفعلاً مرات الأنسان هو يخلق ظلمه لنفسه نتيجة أفعاله وسلوكه مو دائماً نتيجه أفعال الأخرين.
واجه مروان يمشي بخطوات متعوبه وحيل مهدود مبين عليه الحزن وضل مراقبها ما ابتعد عنها ولا وصل البيت ولا غير ملابسه وهامل روحه ولأول مره بحياتي اشوف أخويه بهذا الحال لن دائماً متعلمين عليه بشخصيته المعتادة وأهتمامه بمظهره وطول الوقت مهتم بشكله وملابسه وكشخته رقم واحد.
والدوام عصام خابرهم حتى أكل ما يأكل بالگوه أمي تجبره كم لگمه ويگوم مبين عليه التعب كاسره ظهره لدرجه أهلها ما حزنوا وأنقهروا عليها بگثره والله يا أسيل بس تكعدين أسولفلج الا اخليج گبل تحضنينه وما تفكرين تعوفينه وحيد ووضايع.
وحقه ما ألومه الحب هو مصدر لفرحه والسعاده وأيضاً مصدراً الالالم والأحباط أصعب شيء من يكسر واهسك بالحياة ويعدم شغفك تجاه گلشي يخليك داخل قوقعه عميقه.
ومرت الأيام وأروح وأجي ما عفتهم مره ويه بابا مره ويه عصام وأمي ما عافته بس تروح ساعتين وترجع والتعب مبين عليها بس ما تقبل تروح حتى مروان حجه وقنعها ما أقتنعت
وهديل مره وحده راحت أخوها لاحظت محد سأل عنها ولا أحد مهتم لأمرها بس صافنه مراقبه أختها وتباو? ألنا من نكعد من نحجي ومن يجي عصام تبتعد حسيتها تخاف منه توكف بعد مسافه لما يروح يله وأحنه كاعدين ومروان مقابلنا
عصام يله أني اروح كرم هم مصخن.
وصال يمه گلبي شبي وهسه شلونه
مروان جان جبته وياك
عصام لا زين هسه بس ضايج يريد مجد
وصال اي هو متعلق بمجد يلا يومين وينزل ديروا بالكم عليه لاتضل كل شويه مسبحتهم وين طالع هو علمود يتوسخ
عصام ماشي يله فيمالا عود نتخابر
وصال الله وياك.
ازهار راح وهديل تباوع وراه وامي هزت?اسها تقرب مروان
مروان أمهن أدبسزز وما تشم ريحة الجنه
وصال عيب ماما شنو هالحجي.
مروان يمه خليني ساكت يعني أكو ام صارلها يومين ما واصله ولا سألت على بنتها والأب يجي العصريات هو وحسن جيتهم كفالة وجه ويرحون وخلف الله على حارث ما كطع رجله وهذا ما أعتب عليه وراه عائلته.
وصال شعلينا يمه
مروان لا مو أنتِ ما تقبلين أحجي.
ازهار سكتننا وراح وجاب العشه ومروان ما أكل
وثاني يوم الصبح أسيل كعدت ودخلنا عليها وهديل تبوس بإيدها وتبجي ومروان تقرب يمها وهي تباوع النا وساكته
هديل شلونج عيني أنتِ.
أسيل زينه الحمدلله بس?أسي هواي يوجعني
وصال ميخالف يمكن لن جنتي فاقده الوعي هذا مروان خوما ما تعرفينه
أسيل لا شلون ما أعرفه
مروان شلونج
أسيل زينه
ازهار تباوع بالوجوه وحسيتها ادور على أحد
هديل هسه أخابرها وأكولها تجي
أسيل لاتخابرينها ما يحتاج
ازهار دخلوا الدكتادره وطلعنا وضلوا يمها وبلشوا الفحوصات والتحاليل والاجراءات يجهزونها للعمليه.
وضلينا ننتظر ودخلنا يمها لن راح يدخلونها العمليه باوعتلنا ومروان يباوعلها بحزن ولزمت أيد أمي وكالت
أسيل عمه خاف ما اطلع من العمليه وصيتي الج ديري بالج على مروان وخلي يتزوج هناس.
وصال ما يحتاج توصيني ولا عليه بي تطلعين بالسلامه وأنتِ ديري بالج عليه ولعلمج هناس خابرتني تسأل وتطمئن عليج وهسه نريد منج تشدين حيلج وترجعين النا بالسلامه.
مروان أنتظرج لاتعوفيني
أسيل دير بالك على نفسك.
ازهار حجتها وأختنكت ودخلوا الممرضات وطلعوها على السديه واجاها اخوها حارث سلم عليها ومشت وكل قلوبنا وياها...
ويمر الوقت وطلعت من العمليه هادئه ما سمعنا الها صوت ولا شگت ولا تألمت.
وصال شكد عاقله.
مروان هي أنسانه صبوره.
ازهار واكفين يمها الاطباء وأهلها اجو ودخلوا وضلينا برى لن أزدحام ودخلت عافيت ألها ومروان يباوعلها وفرحان بيها وبسلامتها بس هي حزينه ولازمه بطنها وتباوعله بنظرات تكسر الگلب تحاجي بعيونها.
وضلت تحت المراقبه اشرفوا على حالتها وأهتموا بيها وضلينا يمها واني اروح العصر وارجع ثاني الظهر وبنتي عايفتها يم أسيا وبهاي الأيام كلنا يمها حتى بابا ما عافها صحيح بالدوام بس من يجي للبيت يمر يسلم عليها ويروح.
كاعدين يمها ودخل عمار وياه جديتي.
عمار يابه الحمدلله على السلامه معافيه معافيه
أسيل الله يسلمك اشكرك
الحجيه نعيمه شلونج فريخه محد گالي شصاير بيج ضامين عليه وهسه دريت واجيتج شجاج يمه
أسيل الحمدلله على كل حال
الحجيه الحمدلله الحمدلله امج لعد وين
هديل قبل شوي راحت
الحجيه ما تعرف تكرصها وتكعد تكابل بنتها
هديل علمود جهال حسن
وامهم وين موليه أمج مبتليه
زعلانه عند أهلها.
هججتنها أنتِ وأمج الجنه ما تزعل من كيفها بس مرات بيهن يعنفصن ويكفحن نعمتهن بيدهن.
ازهار سگتت وباوعت على اسيل الظاهر مبلغينها ورجعت باوعتلي ونزلت?أسها.
الحجيه أخذوني البيت ريحة المستشفى تخنگني مروان اسيل اخذها وياك للبيت لا ادزها لأهلها
مروان هو هم هيج جده
أسيل لا اروح بيت أخويه حارث
الحجيه عناد لاتعاندين امشي ويه زلمتج ورجعي بيتج وعيالج لاتضلين ميبسه?أسج أنتِ مريضه تركدي على عقلج.
أسيل لا جده أعذريني ما أكدر وأرجع يم أخويه
مروان أسيل انهي الموضوع ترجعين وياي للبيت
أسيل ما ارجع
مروان أسسيل
أسيل گتلك ما ارجع لاتلح
الحجيه عوفها خل تروح بيت اخوها تصير زينه ونحاجيها هسه مريضه وعقلها مو ب?اسها يله عمار امشي رجعني البيت زهره تعالي يمي.
ازهار ها عيني جده باستني من?اسي
الحجيه أنتِ من النسوان المعدله سولفلي أخوج عصام ونعم منج وصال ربيتي واحسنتي تربيتج بس قليلة حظ.
ازهار الحمدلله على كل حال مشت عمار اخذها ومروان رجع يحجي وياها وهي قافله وتعاركوا
مروان وليش ما ترجعين ما كافي عاد وشعندج باقيه يم اخوج هالعناد هذا شيسمونه
أسيل لاتفتح مواضيع ما أرجع يعني ما ارجع
هديل عوفها هسه خل ترتاح وبعدين أحجوا
مروان أنتِ لاتتدخلين محد طلب رأيح
هديل وليش ما أتدخل أختي وجاي تگولك ما ارجع وياك لزكتلها شگد تلح لخاطر الله مريضه وتعبانه عوفها بحالها ما نخلص منكم.
مروان أنتِ أذا ما تسكتين اشحطج كدام خلگ الله وأشمرج باب المستشفى وأنعل الكواد يطلع وراج وشعندج مگابلتنا گاتلج المحبه أنهجم بيتج.
هديل ماشي مروان يصير خير تسب أهلي والله أدفعك ثمنها غالي واشوفك الكواد شيسوي بيك
مروان دروحي أيدج وما طالت.
ازهار سگتت وما جاوبته بس تباوعله بحقد وأسيل ضلت ساكته رجع مروان يحجي وياها
مروان أسيسسل باوعيني عناد لاتعاندين ترجعين وياي يعني ترجعين كلام ثاني ماكو گافي عاد.
أسيل لا والله اكو ورجعه ما أرجع لو تأخذني سحل هم ما ارجع وياك وهسه يجي حارث وارجع وياه هديل خابري خل يجي.
هديل خابرته بالمحكمه يخلص ويجي.
مروان يعني قفلتي
أسيل أيي
ازهار مروان عوفها بعدها تعبانه لاتضغط عليها
مروان شمسويلها يا الاسلام شمسويلها جاي اكولها ترجع وياي معانده ليش هو شگوو علمود ما ترجعين منو وياج.
أسيل لا خطيه ماكو گلشي اليسمعك يگول عنك ملاك منزل من السما سلام الله عليك.
مروان أعوذ بالله منك يا شيطان نكز ب?اسج نكز وين أعوفج وأنتِ مريضه وتحتاجين أهتمام عنايه صحيه.
أسيل لا تخاف عليه ما أموت وما أحتاج أهتمامك كثر الله خيرك
مروان أشهد وأن لا اله الا الله أشهد وأن لا اله الأ الله بابا شبيج أنتِ مطي متمدد ب?أسج تخبلتي
ازهار تعصب ويحجي وهي تجاوبه برود ودخلت امي على صوته وكامت تحجي وياه
وصال شعندك كمت تصيح فوك?اسها.
مروان أگولها ترجعين وياي للبيت ما ترجع معانده يمه رگبها الشيطان.
وصال عوفها على?احتها قابل غصب ما تريد ترجع امشي اطلع منا بس متعاركين وهي بعدها بسم الله طلعت من الموت مو وگتك تنك وتصيح فوك?أسها يله ابني تحرك مروان.
ازهار سحبته وطلعوا وطلعت وراهم وهي ضلت هديل يمها وعصام واكف هو ومجد يحجون سلمت على مجد شلونك حبيبي
مجد فدوه لعينج الحمدلله زين نزلت وما لكيتج وكالوا بالمستشفى واجيت.
أزهار فدوة لوجهك مروان شايط وروحه مفرفحه وامي تهدي بي وهو بالكوه لازم روحه ما يدخل.
وصال گافي يا يمه تحرك بإعصابك باوع روحك صرت نار خليها نفسيتها تعبانه وعمليتها توجعها ورحمها غاسلينه غسل يعني الوجع البيها يفطر الصخر وخسرت طفلها ومنا الكبد مالتها يعني شتصير الله يكون بعونها فوك هذا گله أنتَ تصيح عليها يعني لو جاييه بإسلوب وكلام حلو بدون صياح ونتر ما تمشي ويانا.
مروان والله حاجيتها بهدوء بس هي قافله الا تمشي لبيت أخوها.
وصال ميخالف عوفها خل تروح ويا أخوها مريضه وأعذرها ومن تصير زينه اني وابوك وأخوك نروح نرجعها الك بس هسه اصبر وطول خلكك عليها
مروان يمه فدوة لعينج صدك تحجين وين أعوفها يم أهلها كل واحد منهم بصوب هما مشاكلهم ما لاكين الها حل انوب مشاكلي ويه بنتهم وهي امها تجي شوي وتروح مثل المكروصه عايفتلي هديل بس لمشاكل ولسانها بطول القندره بگلشي تتدخل.
وصلت ب?اسي اجرها واشحطها وأشمرها باب المستشفى
عصام مروان گافي عوفها ولا تتدخل وشعليك بأهلها يجون ما يجون مشكلتهم أحنه سوينه اللي علينا وهي قدر وضعها مريضه وأعذرها ومثل ما گالتلك أمي تصير زينه ونروح نرجعها الك أما
هسه لاتعاند ولا تتعارك
وهديل لاتخلي?اسك ب?أسها وحده صلفه وما تستحي لاتفضحنا كدام العالم.
مروان شُنوْ ما أتدخل يعني عاجبك تمشي وياهم.
عصام أي شتسويلها أهلها بعد وهي تريديهم خليها تجبرها لو تسحلها ما الك گوه عليها ناس تلومك اذا غصبتها واخذتها وياك ما تلومها لن مريضه ومعذوره
لهذا هدي والزم أعصابك ما نريد مشاكل لن واضح هما ما ناوين على خير من منشورات حسن الطايح حظها.
شبي شنو ناشر هل السلوگي.
يفلت بسوالفه جاهل ما عليه العتب يشمر كلام بالتعليقات وولد عمامي داوود مجاوبينه كل أسلوب ما عنده مدخل هديل بالنص ولك جان استحيت فاضح روحك كدام البشريه وشكد اكرهه هاي السالفه مالت النشر والستوريات ومقصوده وهاي السوالف التعبانه.
هذا ناقص وفارغ والله عبالي ادمي طلع اخيسهم
لا تعتب ماكو لا تربيه ولا قياده.
وصال ما عليكم لا تتدخلون ولا تحجون أبوكم ما يقبل واني هم ما أقبل وأنت مروان يمه أسگت مهما يكون لخاطر مرتك خطيه ولله تكسر الخاطر
عصام لا يابه يله ترحون تبقون لن مجد يريد يرجع البيت خطيه وك?م ينتظره يحتفل بي وخابص أمه تعالي سويلي كل الاكلات اليحبهن عمي واسيا تسوي وهي ساكته
مروان رجال أبن رجال
مجد متربع بگلبي ماخذ عقلي والله غير انهزمت منه هزيم تعال اخذني وياك واخاف عليه من المستشفى لا يتمرض.
وصال تعال يمه ما شفتك فدوة لوجهك
مجد باقي اشبعي من عندي.
ازهار ضلينا واكفين ونحجي واجه حارث سلم علينا ودخل يم اخواته وانوب اجه عمي علوان وحسن بدون سلام وطلعت اسيل شايله جنطة الملابس وأسيل على الكرسي متحرك حسن دفعها وحارث وراهم باوعتلنا ومروان أنقهر وجلب بحارث
مروان تبقيها يمك اذا سمعت رايحه بيت اهلك ما يصير خير والله أفجركم
حارث هي يمي لا يضل بالك يله فيمالا ابو ك?م ممنون منك ما قصرت حبيبي.
عصام على?اسي واجبي هذا
ازهار مشينا صعدنا بسيارة عصام ومروان لوحده بسيارته وطلعنا للبيت واني بالي يم بنتي هالايام هواي ابتعدت عنها.
وصلنا البيت اخذت بنتي وصعدت غرفتي وعفتهم يحجون ومروان عصبي ومزعوج وابويه يحجي وياه ويهدي هو قافل الا يروح يرجعها.
مرت أيام والجو متوتر ومشحون من يوم طلعت أسيل من المستشفى وحالة مروان حاله وهذا الموبايل ضوجني كل شويه يجيني طلب أخر شي حذفت الموقع كله من كثر الطلبات التوصلني
وفتحت الواتساب رقم غريب ردت گبل احظره
استوقفتني الكلام مشتاقلج ام خشم!
عبالي هشام جاوبته عفوا من وياي؟
جبرتيني اجيج هنا ومنا احجي وياج
عفواً منو وياي؟
أبن خالج شاهين!
أحتراماً جاوبته أهلاً تفضل رايد شيء؟
سلامتج حبيت اسال عليج واطقس اخبارج.
مشكور أني بخير
سمعت اطلكتي كسر خشمج وعافج مذلوله.
جاوبته اني بنت كمال وأخواني عصام ومروان وعمار ومجد وأنذل مو بالحيف
المهم طلكج وخلصتي منه حقنه شكد اكرهه وشايف نفسه على شُنوْ حبيتي وتزوجتي وهو طلع نذل ما عرف قيمتج وعافج أنتِ وبنتج يستاهل هالحب منج.
عفواً ما أسمحلك تتجاوز ولا أحب احجي بإي موضو? يخصنا ياريت تحترم نفسك وما تتدخل.
محترم نفسي بس من اذكر طاري انزع الاحترم
ما جاوبته.
تدرين بعدج بعقلي متمدده بغرورج وطولج الحلو وجسمج وخصرج المنحوت يوكع أكبر شارب ما نسيتج أبداً ولا اكدر أنساج أنتِ شيء عزيز ما تنسين بسهوله بيج ميزه مختلفه عن النسوان.
انطيته حظر وشلت تلفوني ونزلت عليهم كاعدين بس بابا ما موجود عصام باوعلي أكدر احجي وياك
عصام خير صاير شيء شبيج.
ازهار انطيته التلفون وفتحت المحادثه وكعد يقرأها ومروان نهض وكف بصفي وسحب تلفون من عصام ويقرأ.
مروان هذا شاهين الساقط والله اشرب من دمك يا خسيس وأنتِ شلون تجاوبينه وتحجين وياه شلون
ازهار ما حجيت وعصام سحب التلفون
عصام حظرتي مو
ازهار اي حظرته
عصام هذا هو واذا يدخلج بعد تعالي بلغيني وأنت امشي وياي.
مروان وياك على الموت
وصال وين ترحون
عصام نعلم أبن أخوج مالت الاوادم
وصال لا يمه دخيلك عوفوا خيولي.
مروان لا يمه مو احنه نعوف اللي يندك بينا وسالفه تمس أختي لا فوك القهر يحجي على هشام شعليك أنتَ عافها ما عافها مشكلتنا انت نعاليش تتدخل.
عصام أمشي يلا.
وصال عصام أنتَ العاقل فدواتك ابني أستهدي بالرحم?ن وعوفوا يجوز بس حب يسلم عليها.
مروان يسلم عليها لا واضح تقري المحادثه وشوفي شمبدع المسقط امشي نضل هيج نار گلبي تطفى خليني اتناوشه عالحامي ومنا اني مفول وگلبي مفحم على عمامي الا اتمزمز بي عالناشف عليها ابو كرم.
عصام تموت على الطلايب
مروان أشتريها بدم گلبي.
ازهار طلعوا أثنيهم ومجد يقرا بالمحادثات
مجد منين حصل رقمج!
أزهار ما أعرف والله
مجد يمه أنتِ منطيه رقم ازهار لبنات خوالي
وصال لا.
مجد هذا شيطان من يوم شفته گلبي ما أتارحه واحد ملعب تلكي هو مأخذ الرقم من تلفونج من رحتي الهم زياره.
وصال أنتوا ياهو تشوفونه گلبكم ما يرتاحه وهسه اخوانك يتعاركون وياه ويسولنا سالفه شگدها شگبرها وتعال حلها
مجد غير ماكو رجال كفوا يعجبنا بس للامانه هشام خوش زلمه ليش صار حيوان وتحيون علينا ما ادري وخلي عاشت إيدهم أخواني وأعرفهم ما يندكون بأحد باطل
اتصل عليهم وانطيني عصام مروان يركص بجفيه على الطلايب.
مجد أثنيهم مغلق
ازهار امي لازمه گلبها ورادت تتصل على شاهين مجد سحب التلفون منها
مجد تردين تبلغينه علمود ينهزم عبالج ما يلگونه والله لو يروح سابع أرض ينبشون اهل اهله عوفيهم لخاطر الله خليهم يشوفون شغلهم ويربونه دشوفي شكاتب الا تخليني اقرالج بالفصيح يله ترى وصلت بيه الحكهم برشاش والله.
وصال اني علمود المشاكل يا ابني ما اريد تصير بينا وبين خوالكم مشاكل شيخلصنا وخالك سلمان ما يسكت وأنتِ شگوو اجيتي تركضين عليهم راسلج تعالي عليه اني ارزله واطرده الا تجين على اخوانج وهما واحدهم يشرب الدم بدال الماي يارب استر
ازهار كعدت واسيا اجتي وفهمت السالفه من امي
وامي تفتر ومجد يتصل عليهم ما يجاوبون وسمعنا صوت هاا
مجد سيادته أجه.
وصال كملت علينا كملت اگليها ازهار امشي اخذي بنتج وصعدي ركض تحرگي لا انوب يرجع عليج.
اسيا عمه هي خطيه شعليها
وصال أنتِ تگولين شعليها عمج شتكوليله ما يتفاهم بالأخص هيج مواضيع وبين الأهل يقفل لو غريب يسكت بس الاهل لا والله يرجع علينا كلنا
ازهار شلت بنتي وتوني مشيت دخل بابا وصاح بصوت عالي الا بنتي جفلت بحضني.
كمال ازهار وين موليه.
ازهار انداريت عليه بخوف ها بابا.
كمال ولج من لا الج الاب شعليتها بين أخوانج وابن خالج فضحوني كدام خلك الله يخابروني ولدك متعاركين هما وجندي وواصله بينهم والكل يباوعلهم ولدج فضحوني بس خل يوصلون يصير خير اني الهم الا اعيد تربيتهم ساقطين.
ازهار كعدت بصف أمي وأني ثوله گبل مسحت المحادثه خفت من بابا وضميت تلفوني ودخلوا أخواني باوعوا النا وأندار عليهم ابويه راد يضربهم بس امي وكفت كدامه منعته.
كمال توكفين بوجهي.
وصال ما اوكف بوجهك بس ما اسمحلك تضربهم هما مو صغار والسالفه عوجه وما رضوا بيها ولا يقبلونها على نفسهم احد يندك بيهم وبشرفهم وأنت علمتهم على هالشي الشرف والعرض خط احمر.
كمال لا اله الا الله شماخذكم اله شمسوين أنتوا مو عيب فضحتوني كدام خلك الله وتلفوني يركع ما يسكت الحك ولدك متعاركين شكول شحجي ولدي ضباط وخابصين نفسكم وسمعه صارلي عمر ابني وأسس بيها وادرس واتعب عليكم واوصلكم واسويلكم اسم وهيبه ومكان ومنصب وانتوا جنابكم شالتكم الغيره ورحتوا هنتوا بالسلك العسكري لك مو عيب هذا ابن خالكم ابن خالكم يالبهايم.
عصام سيادتك حقك علينا بس هو مو أدمي ويحتاجله ضبة أذن.
كمال خوش ضبة أذن مثل هشام من طلعلته بالرشاش وهنته وصغرتوا كدام أهله وناسه أنتوا أستجلبتوا وما احترمتوا لما طگ حوصلته منكم وطلك أختكم وشمرها عليكم بسبب قلة وعيكم وتصرفاتكم الطايشه ما تحسبون حساب طيحتوا حظنا عود أنت جبير أخوته لا ربحنا.
ازهار حجوا اله ومروان تقدم سحب تلفوني باوعتله مسحت المحادثه.
مروان گبر ليش طاح حظج اي والله فوك ما هو طايح شگو تحذفينها والثول ما يشتغل عندج الا هسه.
ازهار خفت من بابا.
مروان شيسويلج ابوج ترى شاهين مراسلج مو أنتِ هالخوف شگو بس اخذتلج حقج اخ برد كلبي هنته أهانه تسوى عمره وشاربه تفلت عليه اللي بس يشوف السنوان يوكع أمداك يالخيخه انت وشاربك
ازهار عاف التلفون وبابا عاف عصام وتقدملي لزمني من كتفي وكومني وصاح بيه.
كمال وأنتِ خاتون هسه صرتلي خوش مره وكمتي شيصير وياج تجين ركض على اخوانج وهذا ابن خالج شوفتي محادثاته بس هشام لا بقيتي ساكته مستمره وطممتي سوالفج وياه وتالي وينه هسه هشام وين عافج وهسه صحيتي على وگتج وصرتي تحسبين حساب الشرف ماطول هيج شگو تجاوبي.
وتحجين وياه وبالاخير ركضتي على أخوانج وراحوا جفصوا ابن خالج وفضحتيني وفضحتي وأنهان بين ربعه، يعني ما گدرتي تكولين ل امج ولج تعالي عليه الا تروحين على هل الثيران بس يشوفون وصله
حمره يثيرون، ولج لا بارك الله بيج على هالسالفه التصخم الوجه
ازهار دفعني وكعت بالكاع مروان رفعني
مروان بس ازهار ما عليها هو متجاوز حدوده.
كمال بصياح أنت تسگت ولا واحد يفتح حلگه هسه شاهين تجاوز حدوده شو هشام ما گلتوا عليه تجاوز حدوده ويه أختكم وسكتوا بس هذا گرابتكم رحتوا جفصتوا مو عيب مو خزي من خوالكم شتكول علينا العالم هانوا ابن خالهم ولكم جان استحيتوا على اقل لخاطر امكم بس ولدي واعرفكم شايفين نفسكم على العالم وما تعترفون بأحد كلها موخوش بس انتوا خوش اوادم خلي اشوف واحد منكم يعيد هالتصرف الرعوني قليلين عقل دماغزيه.
ازهار سگتوا ما حجوا شيء وبابا عصبي ودخل الاستقبال يجري أتصالات وكعدوا وعصام باوع لمروان.
عصام عبالك أستعجلنا
مروان لا وداعتك أبداً وياريت نرجع نعيد التجفيصه والاهانه بعده گلبي مفوخ منه ما يگتلني غير شاربه من يشوف النسوان يوكع ادري ملزوك بتفله.
عصام لاتضحكني مو مال ضحك الجو مشحون وتلفوني قافله علمود المتسشرفين لايخبوصني بالعيب والعيب عاد هما لو بمكاني يسگتون لو لا بس ولد كمال لا شلون تطلع منهم مو عيب ويصير العيب بس علينا عمي تسكتوا من حبايه بخشومكم
مروان شرفاء وشارب شاهين شرفاء
وصال گافي عاد سگتوا وأنت الثاني عوفلي شارب شاهين والتفت على مرتك وعمامك عمتك خابرتني ما تتفاهم وخل مروان يطلك واسيل ما تصيرله مره.
مروان هاي تحتاج اطلعها علمود تبرد الدوده ما تتدخل بين الرجال ومرته
عصام مروان لسانك عيب لك
ازهار ضلوا كاعدين واجه بابا باوعلهم وگال
كمال بالليل خوالكم وجدكم وشاهين يجون ومثل خوش أوادم تدخلون تتعذرون منه وتبوسون شاربه وحجي زايد ناقص ما اريد وصال الحكيني.
ازهار مشه وامي وجهه اصفر ولحكته
مروان ماطول گال ل امي الحكيني السالفه بيها النا وكولوا مروان ما گال لن سيادته بس بالمواضيع المهمه وصال الحكيني الغرفه.
مجد بس تعالوا اني اللي اعرفه الاعتذار يصير بيت اللي انهان مو بيت اللي هانوا.
مروان والله سالفة بوس الشوارب واكفه ما ابوس شارب من يشوف النسوان يوكع كافي عليه تفله.
عصام مروان لاتحجي بعد الزم نفسك كدام الوالد.
مروان شلزم نفسي والله ما ادخل واعتذر وابوس شارب لو يرفعني أعدام فوك ماهو غلطان بحقنا تعالوا انتوا اعتذروا منه كرامتنا وين شنو موضوعها اني هشام ما اعتذرت منه أعتذر من هذا المسقط.
ازهار عفتهم وصعدت غرفتي خليت بنتي بحضني كله من وراك أنتَ السبب خليتني بهل الموقف يسوى عمري شكول عليك هشام خليت نار بكلبي ومشيت لليل نزلت وأمي تجهز الضيافه اجو
وصال اي عصام اقتنع يفوت لن ما يخالف امر ابوج بس هذا الشالع گلبي راكب?اسه ومعند ما يدخل ولو سالفة الاعتذار زايده من ابوج هواي صاير ينحاز ل شاهين هسه صار شاهين خوش زلمه بس ابوج الاسم والمكانه والسمعه يداريهن بعافيته.
ازهار اخذت الضيافه ومشت وعصام يدخن ويفتر ومروان كاعد ياكل اندومي ولابس الوضعيه.
مروان ازهار قوطية بيبسي من يمج شو هاي بسرعه خلصت
عصام كوم غسل وأكس? الشر وتدخل وياي تعتذر
مروان ما ادخل والله وخل هو يجي يعتذر مني
عصام مروان.
مروان عصام أنتَ على عيني و?أسي وأعرفك تحترم سيادته وما تخالف امره ولا تعترض على كلامه بس اني اسمحلي أعتذار ما أعتذر وهو يطلع عليه صاحب الحق واني باطل لا ما ارضاها على نفسي وأنتَ أعتذر بس لاتبوس شاربه بداعتي ابو ك?م شاربه لاتبوسه الك اسمك وهيبتك تبوس شارب شاهين ملزوك بتفله.
ازهار طلع بابا وباوعلهم وأشرلهم ومروان مستمر يأكل الاندومي وصاح بي.
كمال كوم غسل من هالسم الخايس التأكله اكو رجال مشورب يأكل أندومي.
مروان اعذرني سيادتك حقك عليه و?اسك أبوسه بس أعتذار ما أعتذر مو بيدي ما أكدر كرامتي ما تسمحلي.
كمال لعد انتوا من هنتوا كرامته ما گلتوا لنفسكم يله تحركوا لاتحركون أعصابي ومروان اذا ما مشيت غسلت اكوم الماعون ب?اسك وانعل والديك.
مروان سيادتك ماله داعي سالفة الاعتذار بس أكو شيء راسمه بالك! من رخصتك واعذرني ولا تزعل مني اني طالع احسن ما اغثك وتغثني.
ازهار اخذ تلفونه والسويج وطلع من البيت وبابا لزم?اسه ومشه وعصام وراه دخلوا وضليت كاعده ومروان راسلني
مروان من ينكبرون?اسليني لن تعبان أريد ارجع انام.
ازهار ماشي وعفت التلفون ومر الوقت وطلعوا لن سمعت أصواتهم وشويه واجه عصام وبابا كعد باوعلي صفن عليه وعصام سحب الباگيت جكاير وراح الغرفته حسيت صاير شيء ما كدرت اضل كاعده صعدت لغرفتي وبلغت مروان وتمددت بصف بنتي وصافنه عليها يا ترى شلون راح تكون حياتك.
ومرت أشهر وخلصت العده وحياتي كلها بنتي وأهلي وطول هالايام المرت مشاكل بين مروان وأهل أسيل يردون يطلگون ومصممين على قرارهم.
وهي كذلك تريد تطلك وقافله واحسسها هي راح تخسر لن مو كل مشكله حلها الاساسي الطلاق خطأ هالشيء ياريت تعرف ثمن هالكلمه شكد صعب علينا وياريت تقدر حب مروان وترجعله قبل لاتكثر خساراتها.
وأني صافنه وصلتني رساله من هشام
هشام شلونج غزل شلونها.
ازهار ضليت متردده أجاوبه او لا بس أحتمال علمود غزل يسأل جاوبته الحمدلله
راح أجي أخذ غزل ساعتين وارجعها الج حضريها
ماشي بس لاتتأخر يله تجيببها.
لا تخافين ما أحرمج منها بس مشتاقلها وأني ابوها من حقي أخذها يمي وأشوفها لو تردين تحرميني منها.
لا أنت أبوها ما أحرمك منها
ماشي نص ساعة واوصل بيتكم
ماشي لعد أتصل أمي هي تتواصل وياك علمود تشوفها.
يجرالج أخذي راحتج.
الله وياك.
عفت التلفون وكمت غيرتلها ملابسها وحضرت جنطتها وگلشي تحتاجه ولفيتها زين لن الجو بارد وامي صعدتلي هاا ماما
وصال هشام وصل يريد بنته شُنوْ تدرين مبين مجهزتها
أي راسلني وبلغني
ها.
لاتخافين گلتله يتواصل وياج ويشوف بنته
اي زين سويتي يله أنطينياه أخذها اله
دخل البيت
لا يم الباب عصام طلع عليه واجيتج
نزلت واني وراها بيدي جنطتها انطيتها لامي وحضنتها وأبوس بيها كوليله لا يتأخر يله يرجعها
ماشي
راحت وعيني وراها ورجعت بابا صار بوجهي باوعلي وتهربت من نظراته گبل صعدت غرفتي ضليت كاعده أنتظرها ودخلت عليه وبيدها غزل أمي هاا يمه.
بس شافها وباسها بالربع ساعه وانطاها ل عصام وراح گال خاف تبجي ومتعلمه على امها.
ها ماشي اخذتها منها
نازله أشوف أبوج ما اعرف شبي بس يحجي
شبي
نازله اشوفه نومي بنتج.
نزلت وحضنتها وأبوس بيها وشميت ريحة أبوها نفضت عقلي ورجعت نومتها وسمعت صوت بابا فتحت الباب وكفت بس ما نزلت.
كمال فهمه لا يضل رايح چاي واكفلي يم الباب شتگول عليه العالم طلگها وضل مكابل بابهم.
عصام ترى اجه يشوف بنته بس شافها وراح والرجال ما بدر منه تصرف موزين وما النا الحق نمنعه انه يشوف بنته هذا حق.
وبنته هسه تذكرها صارلها شگد من طلگ أختك هسه متذكرلي عنده بنت لا ادافعله هيج واحد حرام يكون أب صايرلي حنين وجايني يشوف بنته فهمه بس من احنه موجودين يجي يشوفها مو يضل مكابل الباب العالم تحجي ما ترحم وما يكولون علمود بنته واني اب ومستحيل احرم بنت من أبوها بس سالفة طلاك اختك لحد الان مصدوم منها وما متقبلها صعبه عليه
ماشي.
ازهار عصام رفع?أسه وشافني عفتهم ودخلت غرفتي وگلش ضجت يمكن حقهم واللي صار مو قليل وفعلاً هو هسه يله تذكر بنته صار شگد ما سأل عنها كتمت الكلام وبلعت العبره وضليت
علي حالي والوضع بيت أهلي مشحون ومشاكل كابه لستار وبابا يحجي وعمامي يهدون ويخابرون يردون طلاك ومروان لابس الوضع ومصمم ما يطلك وبوسط هالمشاحنات والنزاعات اني مركونه بزاويه.
كاعده وهي گبالي تلعب وتضحكلي فتحت تلفوني وصورتها واضحك اني وياها صارت كلشي بحياتي روحي من الدنيا ثانيه ما أكدر أفارگها وانفتح الباب ودخلت أسيا فاحطه شبيج
أسيا ولج أجو عليج خطابه!