رواية بين قلبها وعينيها كبرياء للكاتبة شمس العراقية الفصل الثالث عشر
أسيل
مسحت وجهي ونزلت وراها جايبين كومة لحم والمطبخ مليوص ونسرين نفسها تلعب من ريحة اللحم عود ما تحبه عشتوا بس يم العيال نفسهم تلعب ببيوتهم يأكلن الاخضر واليابس هيج فنود ما شايفه، رفعت ردان ثوبي وبلشت اكطع ويه امي وحارث وحسن يسهمون بالاكياس شفافه
حارث نوزع على? الجوارين والاقارب وعمامي ونسوي عزيمه بين الاهل مو هيج أحسسن
علوان لاتعزم هواي بس النعرفهم عمامك وخوالك
حسن اي هذا هو نسرين سجين من يمج.
أسيل كاموا يوزعون وخلصوا واتفقوا يسوون عزيمه جبيره وكاموا يعدون الاقارب وذكروا بيت عمي كمال
حارث لازم نعزمه هو وعائلته
علوان ماشي اني اخابر كمال وانت خابر الولد خاف بالدوام ملتحقين شوفهم علمود نعزمهم كلهم
حارث ماشي يابه
اسيل فرحت لن راح يجون بيتنا بلكي ترجع العلاقات مثل الأول ويجون لبيتنا ونروح بيتهم وهيج ونلتقي اني ومروان بس ما اظن لو يريد جان باوعلي من هذاك اليوم بس الاخ مبين عليه عاشك.
كملنا الهوسه وطبخنا الغده وصعدت لغرفتي سبحت وتمددت بفراشي حتّى تلفوني سحبوا مني لازم ارجع احسن علاقتي بامي واطلب منها تلفوني هيج أطك والله ولا شفته شنو نشر على? حساباته صار ايام ما شايفته أشتاقيتله يله راح يجي لبيتنا هو وأهله وأشوفه باالواقع أحلى يمتى تجي وتنور بيتنا بطولك الحلو يروحها أسيل.
ضليت بغرفتي وماخذتني الصفنه لبعيد هيج واصير زوجة مروان وأم مثل الامهات اللي رجلها بالدوام وبيتها نظيف ودافي وجهالها يكمزون يمها وتسوي فطائر ومعجنات كاعدين ومكابلينها علما تستوي وبهل الاثناء يجي ابوهم من الدوام ويركضون عليه يستقبلوا وينسون الفطائر اللي بالفرن اكلوا رأسي يمتى تسوي بس شافوا ابوهم نسوها ونسوني وياها واني واكفه على صفحه منتظرته يجي يبوسني وعبر عن الشوق بعد غياب مطول وننسى هموم الدنيا بعيون بعض هو اني نسيت العالم بتفكيري المنحرف هذا من طاح صبغج اسيل.
واجه يوم حفله ختان مصطفى أبن حسن وكلب الدنيا بصراخه ونسرين خلته بحضنها وتخشبت هاي هي بعد وهاي رادتها يموتن على? الكعده شگو عليهن أسيل تكفي وتوفي.
ظهر ما ضل عندي من الشغل والركض وجهال حارث يمنا من الصبح شمروهم وراحوا دوامهم رهف بوسخها وحفاظتها مليانه وملابسها ناكعه جايفه وريحتها تكتل ادري أممكم شُنو شغلها ياربي يخلفون واني مبتليه اخذتهم سبحت رهف ورضعتها ونامت وانوب ريم ورامي رامي كمز للاستقبال وريم كعدت امشطلها شعرها طويل وشالع گلبي طالعه على عماتها شعرهن طويل وحظ ماكو.
جنان صارلج ساعه خلصي عاد ورانا كومة شغل وتنظفين الاستقبال بيت عمج كمال يجون عيب نظفته الصبح ولا بين انتِ نظفي ورتبي شغلج مرتب يله امي
أسيل انظفه واعطره من عيوني بس اريد منج شغله
جنان خيرر شغلاتج ما تخلص اذا فلوس ما عندي راس الشهر وموشله ما ضل عندي يله جامعتهن اريدهن لاختج شو على? اساس تجي ما اجت
لا مو فلوس اريد تلفوني حبابه ماما.
ميخالف تخلص العزيمه وتدللي يله كومي شوفي شغلج علمود تحفين وجهي هسه تجي وصال وجنتها وبنتها يلمعن ما ادري شيخلن لوجوهن اني هالايام ولا مخليه شيء لوجهي من ورا هالمزعطه
همزين حسيتي
وين يولون يا امي بيت جدهم وخطيه
يله من تخلص العزيمه نروح الصالون سجى خابريها
الله كريم ميخالف نروح من زمان مارايحيين يله كومي خذتنا السوالف.
ماشي كملت مشط شعرها وراحت وكمت على الاستقبال بكل همه ونشاط جلفت من كل گلبي ولمعته وعطرته وسمعت صوت هديل اجت طلعت من باب الخارجي لك هلا حضنتها وابوس بيها شتاقيتلج
هديل واني اكثر والله شلونج شخبارج
أسيل شلوني بعدين نسولف تطولين لو تروحين
لا باقيه يومين
اي زين وطلعت امي تبوس بيها وبجهالها طارت بيهم باوعتلها هم تحبين جهالي مثلها كفختني وكالت
انجبي خفت رأسج أنتِ وجهالج كملتي شغلج غسلي الحوش.
ماشي هما شوكت يجون علمود ليش اغسله من هسه ويتوسخ
يجون على? العشه
هديل منو
جنان بيت عمج كمال
أسيل تغيرت ملامحها وسگتت عاد امي كالت
جنان بس كمال ولده مروان وعصام وصال خابرتني وتعذرت جنتها اسيا تعبانه حملها مخطر وما تكدر تعوفها كالت غير مره يجن
أسيل لا حرامات
جنان يله يمه هديل اتفضلي رجلج لعد وينه
هديل وصلني وراح گال المغرب يجي على العزيمه
جنان هلا بي يله يمه فوتي أسيل غسلي الحوش ونشفي زين.
أسيل اي ماشيي دخلن واني غسلت الحوش ونشفته ولحكتهن لكيت هديل كاعده تغير ملابسها وامي تبحوش بالكنتور وطلعت الفلوس الضامتهن خلتهن بيدها
جنان هاج يمه همزين جيتي جان انصرفن اخذي مصرفج
هديل مشكوره منو ومنو عازمين لعد غير بيت كمال
جنان ما ادري ابوج واخوانج عزموا بس العرفته فاضل وكمال وولده ورجلج وخوالج هاي هيه والله ما بيه حيل عزايم ولما اسيل وياي اوكع على صفحه ساتره عليه.
هديل هاا وأسيا مرت عصام شبيها كلتي وضعها مخطر
جنان عدها ولاده مبكره ولازم تضل نايمه يخافون تولد قبل اوانها شوي حملها صعب ولادتها أصعب لهل السبب يله يمه غيري ملابسج ولحكيني تساعديني
هديل ماشي يمه هسه الحكج
اسيل طلعت وضلينا لوحدنا لو تدرين يجي لبيتنا ما تجين
هديل اي والله ما اجي بس صارت ونوب راح يلتقون هو وسيف
اسيل شعليج أنتِ قابل بكيفج وسيف ما يدري بي هو خطيبج السابق مو.
سيف لا والله ما كايلتله عوفينا من سالفته خل نكوم نساعد امي دام اجيت امي راح تذب عليه الطبخ متاكده ههه
اسيل اكيد ماكو مهرب كمنا اني وياها وصارلي واهس اشتغل ولا تعاجزت لن كظيانها بس نسولف وما رضت على تصرفات أهلي بس شطالع بيدها عليه.
هديل هما هذول أهلي من يوم يومهم هيج وأمي عوفج منها ترى بس وياج وكحه هي فقيره ومغلوب على أمرها وحارث مستقوي من يومه تذكرين من فسخت الخطوبه شسوا بيه كرهني بعيشتي خلاني أتمنى الموت وما احصله كلمه والثانيه عصام رجال هم ينرفض ليش ما ينرفض على راسه ريشه مثلاً
أسيل عليج الله هديل ما متندمه عليه لن جان حبج الأول ويجمعكم حب قوي صفنت وكامت تشتغل سريع.
هديل لا يبووه على? شنو أتندم خلصت منه ومن خشمه العالي فارض حكمه على? الكل لا حارث ولا خبره
مرضى نفسسسيين.
اهاا هيج الحجيي
اي هيج ولاتضلين كل شوي ناطه بسالفته لاتسمعج نسرين ويكومن يفسسرن على? هواهن محد يرحم حال احد وكلها صايره تخوف تزوجنا وكلمن شاف حياته والله يوفقه ويسعده.
- ماشي خيتي سگتنا ورجعت اكمل شغلي سوينا مقبلات وكلها هديل جهزتهن بس أني على? ايدها ساعدتها اكلنا كم لكمه وكمنا نطبخ وهديل لزمت الطبخ وامي يمها أشراف توجهه هيج وهيج بس هديل معدله ما شاءلله عليها.
جهزت كلشي على الكاونتر واريد يصيرلي مجال اطفر ارتب نفسيي ماكو البيت لوصه من الجهال واسماء اجت وكعدت بغرفة نسرين وسدن بابهن وعافن جهالهن تكمز مثل القروده ولا اجت كالت خل اساعدهن شكد حقيره بس ياكلن على الحاضر.
جنا نطبخ بالحوش على? جهه وهديل كاعده تشخل التمن وسمعنا صوت وحارث طلعهم شمدرينا جوا واكفين نشتغل ودخلوا علينا حارث وسيف وبابا وحسن طلعوا.
يستقبلوهم وامي تقدمت تسلم عليهم يبووه شافته عيني طالع هيبه شهل الجمال ياربي فدوه لخلقتك وعطاياك
نسيت الكل وضليت صافنه وتقدم سلم عليهم كلهم و? امي وهديل وكفت على صفحه وتوترت وتعصر بيدها وتقدم عصام على امي باسها من رأسها وكاموا يسولفون ما اعرف شكالتله وكام يضحك وباوعلنا وهديل اجت عينها بعينه كبل صدت وجهه كامت تموت
عصام شلونج أسيل
أسيل الحمدلله بخير الله يسلمك أنتَ شلونك.
عصام بخير الف الحمدلله شنو هذا عمه مسويه أكل ل الاوادم كلها الظاهر عمي مثخنها وياج بالعزايم
أسيل يحجون ويضحكون ونزع حذاءه ودخلوا ومروان سلم على امي واني وراها عفيه من ثكل شايله ولا يباوع ولا يسلم انقهرت شدعوه عليك نزع حذاءه ودخل وراهم
وأستلمتنا امي يله ويله دتنطينا مجال خل نشوف نعمة الله خوما حرام علينا
جنان يله يله يمه بسرعه هسه اخوانجن يخبصونا يله أسيل شبيج تخشبتي ولج تحركييي.
أسيل اي تحركت شبيج انكرصتي وكرص عبرتها ومشيت للمطبخ باب الاستقبال مفتوح كبالي عزا يمه گلبي عاد حسن كام رد الباب خلي مفتوح شبيك يحظي خل يتنفسون هوا نقي على? حظي خل نشوف هالحلو.
واجه وكت الخبصه وكاموا يصبون العشه وحارث خبصنا يله ويله والله ثولنا ثول لما كملنا صب كعدت تعبانه وهديل كعدت توكل جهالها باوعتلها وهمست شفتي شلون تسلاموا هو وسيف
هديل أسيل مو وكت هالحجي اسماء اجت سگتي
اسماء خلصتوا
أسيل اي.
اسماء منو ومنو جاي من بيت كمال
جنان بس كمال وولده
اسماء شعجب وزوجه عصام ووصال ما اجن
حنان مرته حامل وحملها مخطر وتعبانه غير مره يجن
اسماء اي ما تتحمل ناعمه وحيلوه هذيج المره شفتها خطيه عمي حقها ما تحمل ماخذتلها واحد دنگه خوما فريخ دجاج مهلس
اسيل عرفناها تبسمر وتقصد سيف لن قصير وضعيف هديل غمضت عيونها تطلب الصبر واني بالكوه متحمله وساكته على? ساعه اشيلها واجظعها بالجدر.
جنان كولي ما شاءلله لا اطكينا بعين الولد على? سلامته
أسماء لا يبووه على? شنو اطكه عين عندي مثله هو وحارث نفس الشي سبحان الله اني هم دومي حملي مخطر وضعي يتعب كلش بالحمل
هديل بصوت ناصي أستغفر الله هاي وين تريد توصل بحجيها زودتها هواي ما ضل عيب ولا مستحى
اسيل سگتي بالكوه ساگته عبرتنا وفتحت الجدر وكامت تصب الها اخذت صينيه ومشت لغرفه نسرين وهديل عافت الاكل من ايدها وكالت.
هديل يمه جنتج زايعه المستحى متكول هاي بنية بيت شنو ما اتحمل مو عيب شكوو تبسمر بكلامها ترى سكتت وعبرتها لن خطار كاعدين.
جنان عوفيها ختولي تحجي تحجي وتمشي شعلينا منها تكول اللي تگوله وشتبسمر خلقة الله هاي كلمن انطاه وفصله لا كيفها ولا كيفي وكيفج اخلاق سيف تعادل كننوز الدنيا وما بيها يكفي شايلج بالصلولات لا زعلانه لا شاكيه لا يضربج لا يغلط عليج لا متجاوز على? اهلج محترمج ومحترمنا رجال بي حظ عيني هو وعيني طوله تروحله فدوه من خفت وجهها ختولي ما عليجن منها ولا تردنها خلنها تحجي وتنجب لوحدها.
أسيل هديل سكتت خطيه وامي ما قصرت لن تحب سيف هواي وتعزه حاله من حال اخواني هو خوش رجال ومرضي ومحترم الله يحفظه واحنه نحجي بي دخل علينا المطبخ وباوع لجهاله ومرته
سيف هاا عيني تعيشتوا هديل تعشيتي روان بابا اكلتي
هديل اي عيني تعشينا الحمدلله وأنت شو كمت
سيف اكلت الحمدلله وكلت اشوفكم
جنان تعشوا يمه داز جثير
سيف عاشت ايدج عمه الزاد طيب لن نفسج طيبه
جنان بعد عيني عليك بالف عافيه.
أسيل مشه المغاسل يغسل وامي ردت الباب لن عصام طلع وراه يغسل هديل مدت راسها باوعت ورجعت تكمل اكلها وتوكل جهالها وأني باوعت هذا لحد الان ما كايم جن جوعان بعده سوده عليه اكل عليك بالف عافيه
غسلوا واجوا وعصام رن تلفونه وراح على? صفحه ضل يحجي شوي واجه ل الاستقبال وطلع الحلو راح يغسل اريد اباوع وامي طردتني ورزلتني ما خلتني اشوف كلشي غسل ورجع
حسن يله جاي جاي.
أسيل اي هسه محضره الاستكاين كبل صبيتلهم واخذه وبدأ الهوسه على? اصولها وتكربست برأسي رفعت ردان ثوبي وبلشت اغسل المواعين كملنا وتعشينا وشربنا جاي حتى الحوش امي جلفته وغسلته طلع يلمع ما خلينا هوسه أبداً وهما بعدهم كاعدين بس اسمع صوتهم وضحكهم الظاهر الكعده حلوه كعدوا عمي البيت بيتكم.
بالمطبخ واكفه وسمعنا صوتهم كاموا راح يرحون هديل جانت برأ واجت وجهها مخطوف نوميه شبيج كمتي تموتين.
هديل ليش ما كلتي راح يكومون سوده بوجهج
أسيل شگوو شبيج
هديل طلعوا وهو طلع أول واحد وشافني وعكد الحواجب موو حواجب ولا نظرات عبالك ملك موت وقبض روحي باوعلي لو موتنييي ما اريد نلتقي ما اريد لو ادري معزومين وهو بينهم موجود فلا اوصلكم.
أسيل شمدريني يطلعون وأنتِ لحكتي ابنج للمغاسل قابل متقصده تشوفينه طولج ونظراته أحتمال مو بقصد هو هيج يباوع للكل بس أنتِ كمتي تخبطبين وتفسرين على? كيفج من نار گلبج منه وعليه.
سسگتي أسيل سسگتي
سگتنااا عمي اخذت بنتها ومشت لغرفة أمي واجت اسماء هي ونسرين هسه طلعن من الكهف بعد خلصت العزيمة والمواعين انغسلت والحوش انجلف طلعن روسهن وكامن يصبن الجاي ويشربن عفتهن واجه حسن شايل مصطفى وبحضنه كومة فلوس كلها اوراق انطاه لامه ورجع الاستقبال يمهم.
رحت يم هديل وعصبيه على? جهالها شجاج تخبلتي شكووو قابل شصار شافج لو اخذ روحج خوما حاجاج.
هديل لا يمعوده يحاجيني انوب هاي العايزه اووف ساعه السوده الجيت بيها لو ادري سليمه يجي اكسر رجلي وما اوصلكم
سليمه نوب بابا شبيج تخبلتي هو شعليه حاله من حال اهله الرجال بحاله ما شفنه منه شي موزين بس أنتِ كمتي تموتين شجاج ما ادري بعدين هو نساج ومن زمان ويكولون يحب مرته يموت عليها جن ماكو نسوان غيرها
وشمدريج أنتِ يحب مرته يموت عليها.
شنو شمدريني أمي بس تسولف بيهم من زعلت وزعلهم صعب ولن يحبها رجعها ما اعرف هي شمجفصها بكلامها بس كالوا هي السبب ما تعرف اطباعه بس مع ذلك يحبها ويريدها ورجعها.
واحنه شعلينا رجال ومرته سدي سالفته.
اي شعلينا والله سالفته مسدوده بس أنتِ فتحتيها هديل تخطي فدواتج ترى أنتِ عفتي وهنتي رجولته وتخبل وراج ونكز بإيده ورجليه بس علمود الخطوبه لاتنفسخ وتالي فرضتي كلمتج عليه وعفتي وخليتي مثل المذبوح على? النص ترى أنتِ اذيتي وتركتي والرجال مابي عيب ولا ذنبه الذنب منج أنتِ ما تحملتي أطباعه وقساوة رجولته وفرض حكمه ما تحبين هيج وعفتي.
لهذا هو عايش حياته ومن هذاك اليوم لهل اليوم ما حاجاج ولا كرب كرباج لاترجعين عليه وسليمه وحجيج مدري شلونه كل اثنين ما تفاهموا وهاي هي كلمن شاف حياته، سگتت ما جاوبتني حسسيتها انقهرت وأني يمكن طوختها عليه اسفه مو قصدي
هديل لا يمعوده عادي ولا يهمني أصلاً اي سولفيلي عليج.
أسيل بعدين نسولف غير يوم أنتِ اليوم تعبتي واني هم الله وكيلج ماكو عظم بجسمي صاحي نحجي وصاحوا على? جاي اي اجييت عفتها ورحت صبيت الهم الجاي وضليت بالمطبخ كاعده حضرت الفواكهه والحلويات وانتظر يجون يأخذونها وبالي وتفكيري يمه انوب كل ما اشوفه هالحب يتضاعف وكمت اموت على الكاع يمشي عليها سحلت نفسي سحله اخت الصدك وكعت بحبك يا مروان وشلون تكون نهاية هالحب ما اعرف.
أزهار
يوم الاحد يوم الدوام من الصبح كاعده ونشيطه عكس باقي اليوم والليل ما نمته لما صبح الصباح هيج لحالي بالي مو صافي وأفكاري مشوشه ساعه يخطر? بالي وأضل هايمه بصوته وسكرانه بنبراته ورجولته وعصبيته وساعه أكعد أعقل? نفسي وأنفض هالافكار من راسي بس شعور مو بالأيد من يتغلل داخلك وشوي شوي يبدأ يتملك كل جزء من خلايا عقلك وكل ما تحاول تحارب هالشعور يتمرد أكثر.
كملت مكياجي ورتبت شكلي وحجابي ضبطته القيت نظره أخيره كلشي تمام ولبست الستره مالتي وشلت جنطتي وأغراضي ونزلت شعور فرح خوف أرتباك مرافقني.
صباح الخير
وصال صباح النور ماما كعدي تريگي
كمال تأخرتي بابا أخاف الولد يجي وأنتِ لحد الان ما متريكه عيب من أول يوم تأخير
أزهار أبتسمت وكعدت وياهم واجه عصام شكله مزعوج سوه كهوه مره وكعد يشربها وصافن ماما وبابا صافنين عليها لن وضعه ما يعجب، بهل الاثناء رن تلفون بابا.
كمال أي ابني اجتي يله بابا أزهار الخط اجه يم الباب
أزهار كمت وبابا صاح المجد يوصلني وخفت عصام يكوم بس أبداً ما تتدخل ولا حجه يشرب كهوته بهدوء مميت
يله ماما باي
وصال الله وياج حبيبتي
أزهار طلعت ومجد كدامي فتح الباب الحوش ماكو احد سلم عليه واني صعدت بدون سلام وشغل وطلعنا وراه مُباشرةً باوعلي بالمرايا وگال
هشام شنو ما نعجب حضرتج تصبحين علينا
أزهار لا العفوا بس جنت مستعجله
أطلبج أعتذار من هالخشم اليابس.
? شنو أعتذر يابه.
? موقفج القديم شنو نسيتي
لا ما نسيت شگد قديم لحد الأن أبالك
ولا انسى ليش هيج يوم ينسي
أبتسمت كيفك لاتنسى وأعتذار ما معتذره أنتِ هم دعمتني وخسرت سيارتي بسببك، ضحك وضحكته شگت گلبي وابتسمت وياه على? الواهس
لاتعتذرين عمي على راحتج
وصلنا فرع وطبك يم بيت وشوي وطلع أستاذ احمد سلم علينا وكعد بالصدر وباوعلي متفاجى ومصدوم.
أحمد بحلم بعلم هشام اخاف فاقد الوعي هاي الوكحه ام خشم شجابها وياك شلون تصعدها سيارتك بابا نطلبها فصل على? سالفتها ويانا
أزهار ليش يابه ضحكوا بالاخص هو يحجي وعيونه ما يشيلهن عني أستاذ احمد ضحك وكال
احمد عمي أنتوا بلابل حب بس تبييعون ثكل برؤوسنا.
أزهار سکتت وأستحيت يبوووه هو هم سکت وصلنا رقيه واجت وطلعنا اكثر شي منطلق ويه احمد سوالفهم على? الشغل والدوام والتزامات وعرفت هو وحيد أهله والمعين الهم وعنده أخوات يدرسن من خلال حديثهم أستسرقت هالمعلومات
وصلنا الدائره وبدخولي رشا صارت بوجهي وأستغربت شكلها كالبه خلقتها مكياج طوخ صفنت بوجهه وهي حسيته أدور على شيء وتلفت وراي
رشا شلونج أزهار أخبارج
أزهار زينه وأنتِ شو ما تتصلين أختفيتي فدمره.
والله ملتهيه تعرفين دوام وبيت مليان جنايين وشغل وطبخ ونفخ يا دوب الحك اكمل شغلاتي اي هسه ما علينا منو جابج اقصد منو وصلج لدائره
شنو هو تحقيق من صباحيات الله
شبيج هو سؤال شدعوه عليج
ما يعجبني اجاوبج شيئ خاص بيه عن أذنج اروح اشوف شغلي مشيت بس حسيتها راح تنفجر لن سؤالها عن منو وصلني ما مرتاحتلها وطريقه مكياجها والتموع مو راحه هالبنت عجيبه غريبه متغييره فدمره ولا عبالك رشا عرفتها وصادقتها بالبدايه.
كعدت وبلشت شغلي وأني اشتغل وصلتني رساله من هشام كاتب بيها
هشام أزهار رشا أبتعدي عنها وحده ما مرحمنه خليج بعيده عنها أثناء الدوام وبعد الدوام أنتِ أكبر من هل النماذج التعبانه
جاوبته ليش شتعرف عنها
هشام شنو ما مصدكتني
لا مو هيج القصد بس المعنى من تحذيري منها شنو سببه
وحده تركض وره الزلم شتترجين منها ترهم تكون صديقه وتمشين وياها سحلت نفسها بالقندره بس علمود أباوعلها.
شيءخاص بيك أنتَ وياها ليش جاي تحجيلي بعدين هي فعلاً تحبك ومعجبه بيك
بس أني گلبي مو يمها ولا أبالي ولا باوعتلها ولا انطيتها أمل اني من احب احب ناس مثقفين واعيين وعاقلين
سحبت نفسي وما جاوبته بعد رجع دز
أكولها كدام عيونج وخشمج اليابس تطلع أحلى
أبتسمت وخجلت نوعاً ما وضحت الصوره كامله بس احاول ما أباوعلها بنظره اوضح أستغبيت هيج أفضل.
خلص الدوام وطلعت ورشا وراي وكفت بصفي عود زعلانه ضربتني على كتفي وضحكت.
رشا شبيج يمعوده شو صايره خشم علينا
أزهار أنتِ شبيج متغيره عن قبل ما اعرف گلشي بيج متغير طريقه مكياجج لبسج هواي امور
شنو حرام أتغير حالي من حالج لو بس أنتِ يحقلج تتونسين وتروحين صالونات راقيه حلال عليج وحرام علينا والله عمي أبوج مدللج وهذا الدلال مخليج هيج رافعه خشمج على الاوادم
مو هيج القصد تجاهلتها رجعت عادت حركتها أستفزازيه
أي عوفينا هسه ما كلتي منو يجي يأخذج للبيت
محد.
شنو أبوج ما يجيج لعد ويامن اجيتي
ويه هشام اروح وياهم بالخط يله باي اجه
شنو شنو شنو ويه هشششام شو ما كلتيلي وهشام شلون قبل يأخذج وياه مو على? أساس ما يأخذ موظفين وياه ورفضني وأنتِ دعمتي سسيارته شجاي يصيررر أزهار
يمعوده شبيج شيصير مثلاً بابا حجه وياه وأتفقوا وحلوا الموضوع وأني ما ضابطه السياقه هواي وقبل اروح وياهم شبيج كبيتي.
لن تعرفين أحبه وأموت عليه وتالي يأخذج وياه بالخط وأني رفضني ويتحجج مية الف حجه طلعلي بيها
ما أعرف مشكلتج أنتِ اني مالي شغل يله هشام ينتظر من رخصتج مشيت وهي? نار فتحت الباب وصعدت جنت أول وحده اجه مرحبا
هشام شنو حجيت أني
أزهار عفواً
ليش ما تأخذين حجايه
منو أنتَ أخذ بحجايتك
هاا منو أني هم صدك.
شغل السياره ولفها سريع صحت بي على? كيفك لاتكلبنا يمعود
لاتخافين أني مو مثل سياقتج أنتِ ضبي لسانج ما تموتين.
أسم الله على? عمري.
الف مره اسم الله
بعدت نظراتي
باوعيني لاتبسلين وجهج بالمگلوبي
عصبت وجاوبته اهووو عفيه هشام شتريد ترى بزعتني
رايدج تحسسين من عساج لا حسيتي هذااااا احمد وين وله اريددددد انكبر بيتي
صار عصبي وأنزعج وأجه احمد ورقيه وشغل وطلعنا حتى بالطريق ما حجوا وصلهم وأني بالاخير وصلني ونزلت وباوعلي بنظره حقد مشيت وهو ضل واكف تجاهلته ودخلت بعدني ما وصله وصلتني رساله
هشام الله ياخذج يالخبله.
أزهار أبتسمت ورجعت التلفون ودخلت البيت هدوء كبل صعدت غرفتي سبحت وتمددت وبالي كل اللي صار بهذا اليوم جان يوم لطيف خفيف رغم تقلبات مزاجه وعصبيته الحلوه.
أسيا
مرت أيام وكل كلام ماكو بينا مثل الغربه ويحتاج شيء هو يسوي بنفسه ولا كأنما اللي وجود بحياته حزت بکلبي وسگتت.
متمدده بفراشي وكرم نايم بصفي دخل اخذ ملابسه ودخل الحمام سبح وطلع رتب روحه خله عطورات وكشخ على? أخر حبايه وكف ويرشش عطورات نكع روحه اخر شي شال السويج والتلفون وطلع كسرت الصمت بينا وحجيت وين تروح مشه بدون جواب ولا حتّى نظره بس ردة الباب وراه جان بيها صوت وخفيف عيشني الهدوء بكل تفاصيله المميته.
سحبت تلفوني شاشته متكسره بالكوه تبين أتصلت عليه ورفضني ورجعت اتصلت مره ثانيه وغلق التلفون متت قهرر يمه شصار بيه تشعوط دفرت الغطا وكمزت وراه بدون حجاب الصاله فارغه فتحت الباب وكفت بالطرمه أباوعله هو وعمي واكفين يحجون ومروان يشغل السياره يارب لك الحمدلله يعني رايح وياهم عدهم طلعه سوه مو لوحده واني أباوع لمحني وجه نظراته ناحيتي عبالك سهم وصوبني بنص گلبي اخذ روحي بجيت دموعي هي جانت تعبر عن حالي اني لما احبه واخاف النسوان تاخذه مني ما اسوي هييييج شجاريلي لما حبك وغيرتي عليك.
مسحت دموعي وهزلي رأسه معناها طبي داخل هزيت رأسي برفض عاف أهله واجاني واني حافيه وشعري نازل على? ظهري ودموعي تجري مثل الشلال تقرب لزمني من ايدي وسحبني لداخل ورد الباب وراه حجه بثكل
عصام متكوليلي شمطلعج وحافيه وبدون حجاب
أسيا بس أبجي حسس بيه ميته عليه وبعده موتني
روحي الغرفه يله كدامي
وين تروح جاوبني بعصبيه
وين رايح معزومين اني وابويه ومروان على? عشه
صفن بوجهي ومروان صاح عليه.
مروان يله عصام راح نتتأخر عيب ينتظرونا
عصام اجيت يله روحي الغرفتج
أسيا متطول مو
فيمالاا
أسيا راح وضليت صافنه على? طوله لما فتح باب السياره وصعد تمنيته يباوعلي ما باوع رديت الباب ورجعت وصارت عمتي بوجهي
وصال شمطلعج وحافيه وشعرج وبدون حجاب ومدلعه ولج حموينج بالبيت تخبلتي على? عمرج
أسيا لحكت عصام جان رايح
وصال اي معزومين على? عشه ليش لحد الان متزاعلين
ما حجيت.
لمي زلمتج وأحتويي لا يروح منج من ورا مشاكلج والنگ مالتج يله ما صار شي روحي الغرفتج ارتاحي انتبهي لنفسج امي
ماشي عمه
رجعت الغرفه وأتصلت عليه مغلق ليش ما تفتحه تريد تموتنييي قهر كمت غيرت ملابسي وطلعت ولكيت ازهار تراسل ومبتسمه كعدت بصفها يم منو معزومين ما عرفتي جاوبتني وهي تكتب بالتلفون
ازهار يم بيت عمي علوان
أسيا منو هذا
بيت ابن عم ابويه هاي المره اجو اسيل وجنتهم اسماء وخالتي جنان ما تذكرين.
اهاا هذول وهاي اسيل متزوجه عزابيه
اسيااااا ترى صايره فدمره مكروهه شدعوه مو لهل الدرجه عاااد غيرتج هواي صايره مفرطه خففي راح تنخنكين الرجال ويهج من وراج
شنو مناسبة عزيمتهم
كالوا حفله ختان أبن حسسن.
وشعجب خاله ما راحت وياهم
علمودج ما راحت عصام ما قبل كال منو يضل بالبيت يمها اذا تروح اني ما اروح عاد امي كالتله روحوا عود اني وازهار غير مره نرروحلهم خابرت خاله جنان وشرحتلها وضعج وتعذرت منها.
نهضت بفرح صدك هو هيج گال
اي شبيج انخرعتي؟
متزاعلين وطاكني الجفاف وقلة الاهتمام
علمود اتوبيين خوش يكعدلج گلب عصام عاشت أيده
عابت، اكول ويامن تحجين
هاا لا هيج مو ويه احد ويه صديقاتي
وصديقاتج توزعين أبتسامات اثناء المراسله!
اي شگو بيها يله اني صاعده غرفتي من يجهز العشه صيحوني
اكص ايدي اذا مو البالي
مو ابالك حبيبي يله بااييي.
وجعااا ضحكت وطلعت تركض على? الدرج وسم راح توكعين وتتكسرين ونحير بيج من يشيلج هم اني ابتلي بيج
فدوه الك
وسم
بگلبج السم
ضحكت ونوعاً ما ارتاحيت من مهتم لأمري وتعشينا ومر وقت وهما ما اجو شدعوه هلكثر طولوا ما تحملت كمت أتصلت عليه جان مفتوح مو مغلق جاوبني بسرعه الو عصام
عصام هاا
أسيا وين صرتوا
بعدنا
شوكت تجون
ما ادري يله فيمالاا
وين رايح مو جاي احجي وياك
شتردين هسه
ما اريد شيء يله روح
تعيشتوا
اي الحمدلله
يله فيمالاا.
الله وياك مو تتاخر قطع الخط هذا شبي سد الخط بوجهي هيج صاير ما تطيق تسمع صوتي ماشي عصام اعاملك نفس ما تعاملني شگوو بيها تدلل على أسيا.
ضليت كاعده ويه عمتي وصال تباوع مسلسله ومجد يلعب وازهار بغرفتها وسمعنا صوت على? الدرج نزلت والوجه مورد هااا نزلتي
أزهار شنو ممنو? أسيا خانم
أسيا لا العفوا أكولج مو عبالك تأخروا.
لا عادي أحتمال راحوا بيت جدي وصلوا عمي فاضل لن العرفته رايح وياهم على? العشه هسه يجون لاتخافين محد يتغزل بي ولا احد يأخذه منج هنا عافنه هاا شسمه يمه اكوو عصير بالثلاجه
كامت وصحت وراها تعاالي احاجيج شو ذبيتي الحجايه وانهزمتي كملي الحجيتي شنو عافنه منو هنا
يمعوده سمعج ثكيل منو قابل عفيه اسيا الله يساعد عصام عليج شلون متحملج
غير احبه اي غيري السالفه غيرها
يمعووووده ماكو شي
أكيد
اكيد.
سممعنا صوت سسيارتهم اجوو شوي ودخلهم ثلاثتهم كعد بصفي عود يبين لأهله ماكو شي بينا لا واضح كلش
حجيت بصوت ناصي مو عبالك تأخرتوا يم بيت عمك. ما جاوبني وتجاهلني باوع لعمتي وگال
عصام يمه باقي حلو بالثلاجه نحلي
مروان حقك عمي اذا انت دست زايد بالاكل ومسحت مسح وانوب الطبخ والطعم يرد الروح اكيد هديل الطابخته عمي فنانه بالطبخ بس شسويلك.
اسيا حجه مروان وغمزله وعصام صك على? سنونه بغضب مروان حس وسگت هسه عرفت السالفه وهاي هديل وراها شيء أزهار كالت وطمطت سالفتها وهسه مروان اكو شي وعصام ضامه عني يصير خير.
ضلوا يحجون ويمدحون من الأكل والاستقبال عصام ما شارك ضل ساكت وبصفي يگلب بالفيسبوك ضربته بخفه على? كتفه منو هاي هديل باوعلي بنظره هادئه ومشه للغرفه ولحكته ورديت الباب بهدوء لكيته ينزع الستره والساعه ويباو? على? روحه وكشخته بالمرايا الكنتور تتمثل بروحك ومعجب بشخصك ولبسك ما جاوبني بس هز رأسه اريد احجي وياك
عصام تعبان وأريد انام مو وكته الحجي أجلي هسه رحمه لابوج
أسيا نخلص حجي وروح نام.
حجيج ما يخلص كولي شعندج
منو هاي هديل!؟