رواية بين قلبها وعينيها كبرياء للكاتبة شمس العراقية الفصل التاسع والخمسون

رواية بين قلبها وعينيها كبرياء للكاتبة شمس العراقية الفصل التاسع والخمسون

أزهار بقيت لصبح كاعده وهو ولا شفته ولا وصل الغرفه ولا اعرف وينه صافنه ودمعتي بطارف عيني حيل مقهوره حسيت نفسي وقيمتي عنده ولا شيء مستحيل هذا الشخص حبني من گل گلبه اليحب ما يتخلى عن محبوبه لو كل الظروف أجبرته لو كل مشاكل الكون لو مو أهله لو الدنيا توكف ضده هذا مو سبب يتوصل لحل ونقطه ما منها رجعه واليقهر بلغ أخويه تعال اخذ أختك حسسني اني ذابه نفسسي عليه مو هو اللي حبني وحارب الكل وأخذني غصب عن أخواني وكسرت كلمتهم علموده طلعت من البيت وهما زعلانين مغثوثين مني علموده وبالاخير هيج تجازي حبي وتضحيتي يا هشام هيج تتخلى عني بأول مشكله ضحيت إلك.

أنفتح الباب ما تحركت من مكاني لما صارت كدامي وأيديها يرجفون على شنو ما ادري عود خايفات من اخوهن يا خوف هذا.
افراح تلفوني فدوه وين خليتي أريده.
أزهار بسطل التمن اخذي وفگي شرج عني أنتِ وأخواتج ما ناقصه قهر ومشاكل ويه أخوجن كلشي تسونه يوكع ب?أسي.
أفراح مشكوره فضلج ما انساه.

أزهار ما جاوبتها مشت وهي حزينه ما اعرف انقهر عليجن ماكو ام فوك روسجن ولا احد يعلمنج لو انقهر على روحي وطيبة گلبي عاملتجن بإصلي وتالي طلعت اني الموخوش ادمي.

نعست ونمت وكعدت على صوت باب الكنتور ياخذ ملابسه كمت لكيت غزل كاعده غيرتلها ورضعتها وكمت صبيتله الغده خليته بالكاع واجه عبرته ورحت صليت وضليت كاعده أتصفح وهو تغده ونام ولعصر طلع لشغل وضل ايام هو ساكت واني اسوي اللي عليه تجاهه وبس ما يدور بينا أي الكلام كلمن بحاله...

كعدت العصر هو رايح لشغل كمت نظفت الغرفه وسبحت اني وبنتي وسويت العشه واجتني افراح وتلفت وراها حسيت عدها شيء لن الخوف على ملامحها واضح وگل جسمها يترجف تجاهلتها.
أفراح أزهار أريدج تساعديني فدوه ما عندي أحد غيرج أمانه داخله عليج محتاجه مساعده.
أزهار عوفيني أفراح
بس أسمعيني أمانه.

لا أسمعج ولا تسمعيني ولي عن طريقي ما إلى شغل لا بيج ولا بأخواتج ما ناقصه مشاكل واخوجن ما يتفاهم شفتي شصار لهذا ساعدي روحج بروحج محد كلج تورطين نفسج الله يدري شمسويه بعدين تعالوا ساعدوني وتعرفن اخوجن زقنبوت امشي منا
أزهار والله ما عندي احد يفهمني أعتبريني أختج واكعه بمشكله حبابه المن اروح أيمان كبل تروح تكول لهشام ويموتني والله وهذنيج صغار ما أريد اورطهن وياي كافي هشام ما قصر بيهن بسسببي.

مشكلتج أنتِ أختهن الجبيره طالبة جامعه يعني مو مراهقه علمود توكعين نفسج بمشاكل منج لنفسج اني ما أتدخل بعد ولا عليه بيجن وهل طيبة الگلب وياجن ما حصلت منها بس الأذيه والقهر خليني بحالي والله ساتر عليه عفتها ودخلت غرفتي يم بنتي
فتحت تلفوني وكعدت أتصفح ودزلي رساله.
هشام شمسوين عشه؟
ازهار كبه وشوربه وسلطه
ماشي محتاجين شيء
لا
حليب حفاظات شوفي خوما خلصت
لا
وأنتِ
شبيه
محتاجه شيء.

لا، نهيت المحادثه وضليت كاعده واجه هو غير ملابسه وأخذ بنته عفته ورحت صبيت العشه وجبته اله من يوم المشكله كام يتعشى بالغرفه خليته
أكعدي أتعشي
ما جوعانه انطينياها واتعشى أنتَ أخذتها منه وكعد تعشى وخلص راح يغسل وغسلتهن وهنا يتعشن بس أفراح صافنه مبينه واكعه بمشكله شسويلج بعد أخوج ما يرحمني اضل بعيده أفضل اليه.

أخذتله الجاي كاعد على الجربايه خليته بصفه وكعدت بصفه ورضعت بنتي نومتها ولزمت تلفوني هو يشرب جاي ويتصفح ومروان دزلي مجموعة صور هو وأصدقاءه الضباط باللبس العسكري وكاتبلي
مروان شوفي أخوج الملك
أزهار أبتسمت واني اشوف الصور اووي فدوه لله فدوة لطولك وجمالك يربي هيبه هيبه دزيتله تخبلون ما شاءالله ربي يحرسكم حماة الوطن منور اخوي حبيبي سندي روحي من الدنيا فدوه لوجهك
وهو حجه من يمه
هشام شبيج؟

أزهار مو وياك سحب التلفون وشاف الصور وضل يگلب ويباوعلهن وحده وحده ويقرأ كلامي ومروان دزلي بصمه.
مروان بعد روحي خيتي تسلميلي غلا مو بجمال عيونج الحلوه دزيلي صور غزوله مشتاق الها وهالمره طولتوا علينا شوكت تجون عيني.
أزهار شمر التلفون عليه وحجه.
هشام شدعوه هيج تتغزلين بأخوج؟
عفواً ترى أخويه ليش ضايج.

ضايج على شنو اضوج بس عيب وهالتصرفات مال مزعطه وهو ما يستحي ويخجل على نفسه دازلج صوره هو وأصدقاءه الضباط باللبس العسكري مو عيب جاي يتباهي بيهم كدامج.
هشام شبيك ترى أخويه وأصدقاءه وين العيب بالموضوع وهو ضمن الصور ودزهن بالمحادثه ما جابهم گبالي عاط بيه
انجبي واحجي عدل
ازهار والله أحسك أنت تحسست منهم.

هشام ليش هما شنو مثلاً وأتحسس منهم بس كولي أنتِ عاجبج هذا شخصيات من التفدي مالتج الهم واني كاعد بصفج وهيج الضباط هيبه وشخصيه وأصدقاء أخوانج وعائلتكم كلهم عسكرين شعجب ما تقدملج واحد عسكري من مقامكم العالي.
أزهار والله تريد الصراحه أني من فتحت لدنيا وعيت على بابا وأخواني شايفتهم هما ابطالي واتباهي بيهم وين ما اروح وسانده روحي بيهم هما ربوني وصقلوا شخصيتي ممزوجه بشخصيتهم وعقلهم.

وأحلامي جانت أنه زوجي المستقبلي يكون يشبهم جنت اتمنى يكون عسكري قوي وحنين مثل بابا وعقل وشخصيه وهيبه مثل عصام وشخصيه وأناقه وحكيم مثل مروان يعني جنت أتمنى يكون بطلي نفسهم بعقلهم وعيهم وحنيتهم وشخصيتهم وتقدملي شخص من اللسك العسكري صديق عصام بس اني رفضت.
هشام وليش رفضتي وهو ضمن المواصفات اللي تريدها وعسكري مثل أخوانج وهيبه وشخصيه؟
أزهار شكله ما يساعد يعني مو من أعجابي وهذا زواج مو علاقه عاطفيه.

هشام ها وشعجب أنعجبتي بيه
ازهار عجبتني شخصيتك گلتها وصفن بوجهي
هشام الجمال يهمج أكثر
ازهار الجمال عامل مهم بس مو مقياس شنو الفايده يكون حلو وشخصيته مو قويه ومأثره سگت وما جاوبني سحبت تلفوني وباوعت لصور وهو عيونه تراقبني تالي عفت التلفون لن الظاهر اتحسس
وهو صاير فدمره يريد حجه واسئلته إستفزازيه.

عفته كاعد ونمت جنت متوقعه منه يبادر أو يعتذر لكن كل هذا ما صار وأنداريت لكيته نايم صفنت عليه وطالت صفناتي وركزت على شكله مو بس عجبتني شخصيتك كلشي بيك عجبني گلبك حنيتك طريقة حبك اليه تفكيرك المنعزل حبييت گلشي بيك
بس أنتَ تستاهل هل الحب ليش خذلتني هشام.

أباوعله واتمعن بنظراتي وأسولف بگلبي لما نعست وغفيت وصورته بمخيلتي وفزيت الصبح من كابوس وشيء ملتف على رقبة هشام وجان يصيح ازهار كعدت لازمه گلبي يدك سريع وخايفه ومرعوبه هشام مديت أيدي على مخدته فارغه هشام فزيت برعب طلعت من للغرفه ادور عليه هشام حبيبي فتحت الاسقبال والمطبخ باوعت الحوش سيارته ماكو رايح الشغل حسيت على نفسي وغسلت وجهي وتوضيت وصليت وگلبي يوجعني عليه سحبت تلفوني وأتصلت عليه جاوبني هشام.

هشام ها ازهار شبيج.
ازهار حلمت بيك وخايفه عليك گلبي يريد يوكف بجيت واختنكت هشام ما بيك شيء مو
لا گلبي أنتِ گلشي ما بيه لاتخافين هذا كابوس اتعوذي من الشيطان وأستغفري
أي صليت الحمدلله وين أنتَ
بالشغل
هشام لاتزعل مني
ما زعلان منج
تمام حبيبي تجي الظهر مو
أي گلبي أجي
ماشي أخذ راحتك
لاتروحين أبقي مشتاقلج
مشتاقلي ليش ما أجيت
جنت حيل مقهور منج
وهسه
مشتاقلج بس وگلبي حن ألج أحبج زهرتي.

واني هم احبك وبقينا نسولف وتراضينا ونهيت الاتصال ورحت سحبت ورتبت نفسي ومكياج وسرحت شعري جنت ضايعه بحبه ونسيت گلشي ومستعده اسوي كلشي ولا خسارته.
أجه الظهر طلعت أستقبلته وهو مبتسم اخذت منه المسواك وصبيت الغده خليته بالكاع واجه قفل الباب وحضني وضلينا حاضنين بعض ويبوس بيه حضني من وجهي باسني من خشمي.
هشام أسف لن زعلتج.

أزهار تعال نتغده كعدنا تغدينا وعفته كاعد وخليت المواعين على السنك ورجعت يمه واخذني لحضنه وعشنا حبنا بكل شوق وحتى لشغل ما راح للمغرب يله كعدنا هو راح يسبح واني مغطيه?أسي ونايمه نعسانه وغزل اسمعها كاعده هشام وينك حبيبي.
كمت بملابس النوم شلتها واسمع صوت صياح كمت غيرت ملابسي وطلعت وسجى واكفه ويه اخوها وتحجي وتبجي وأيمان ملخها وجهه الا الدم طالع وهشام واكف مصدوم.

سجى اني كل هذا ما راضيه عليه والله حتى معاملة أخواتي ما عاجبتني وحجيت وياها ما سمعتني بس كام يهدد ينشر صورها ماكو احد يساعدنا ما سمعت كلامهن وكلت لازم اكولك.
هشام ولج أفراح صبا اليوم أعدمجن.
أزهار دخل عليهن بس صراخهن يوصلني وسجى تبجي وايمان كاعده أدك على?أسها وطلعت صبا شعرها منثور وباوعتلي بحقد وصاحت.

صبا مو بس شاطر علينا روح على مرتك عليها هي جانت تدري بعلاقة افراح وسمعتها من تحجي لن هدت علينا للغرفه وكالت كل سوالفجن ادري بيها ومن اخذنا منها الفلوس جانت تدري بأفراح وسگتت.
أزهار شتحجين أنتِ أني شعليه تحجي وهو يسمع الها ويباوعلي.

صبا أي أنتِ السبب مو بس احنه أنتِ ساعدتيننا والفلوس الاخذناها منها مو بس اشتركنا بيها أنترنت اشترينا بيهن رصيد وندز كارتات اللي يبتز افراح بصورها وزوجتك تدري بكل هذا ومن صارت المشكله افراح تتوسل بيها وتكول الها ساعديني أمانه اني واكعه بمشكله ما عندي غيرج ساعديني وازهار طردتها وگالت الها مشگلتج ما إلى شغل
جانت تدري وسگتت.

أزهار سحبها من شعرها ودخلها الغرفه يم أفراح وقفل عليهن بالمفتاح واجه اخذ بنتي مني وانطاها لسجى وهي تصرخ تريدني هشام لاتظلمني مره ثانيه هشام اني ما إلى دخل لاترجع عليه سحبني الغرفه وضربني كف لأول مره بحياته يمد أيده عليه باوعتله مصدومه تضربني هشام تمد أيدك عليه.
هشام وأكسر?أسج هم جنتي تدرين بكلشي وساكته جان عندج علم بأفراح.
ازهار أي جنت أدري بكل سوالفها.

ليش ضميتي عليه هيج موضوع مهم ليش ازهار ما بلغتيني اتصرف ليش ولج هذا عرضي شرفي وأنتِ جان عندج علم وسگتي وما حجيتلي ما گلتي هشام أخواتك جاي يحبن ويدز صورهن وواكعات بمشكله عفتيهن وسگتي وأفراح أجتي عليج وطردتيها وسگتي هيج اني رخيص عندج هيج شرفي وعرضي ماله قيمه عندج لهل الدرجه ازهار.

أنتَ مو رخيص وعرضك وشرفك عرضي وشرفي بس اني تعبت مليت بكل الطرق اجيت وياهن وحاولت اتقرب منهن وعاملتهن بإصلي وطيبة قلبي بس عجزت وما شفت منهن بس الأذيه والمشاكل وأنت تعوفهن وترجع عليه وأخر مشكله لما عصام انسان واعي ومتفهم جان اني وياك هسه لازمين درب المحاكم لن انت وصلتنا لنقطه ما منها رجوع
واني سگتت اتجفى الشر وما اريد خسارتك وينهجم بيتي بسبب أخواتك.

ما تردين خسارتي وتحافظين على بيتج من الخراب بس اني عادي عندج بيتي ينهجم وعرضي يتطشر وشرفي ينداس عادي مو.
لا هشام مو هيج قصدي ليش اني لهل الدرجه ما عندي گلب واحس بيهن ليش هينه عليه
لا هذا قصدج وسگتي وتستري عليها وتعاطفتي وياها گلتي خطيه اني هم حبيت قبلهن عبالج الكل مثلج يتعاطفون وياها مثل ما أهلج وأخوانج تعاطفوا وياج وبعدين تتزوج وتاخذ التحبه
تعيرني بحبك هشام.

لا ما اعيرج بس هذا شرف وعرض وهيج مواضيع ما ينسكت عنها وبالاخص اذا يبتزها بصورها.
لا عيرتني بحبي الك وعيرتني تعاطف أهلي وياي ووافقوا على زواجنا وهم يعرفون بينا نحب بعض مستحيل اصدك مستحيل.
مصدوم بيج أزهار حرامات شكد حبيتج حرامات بعت الدنيا واشتريتج.

اني المصدومه بيك ومحد جبرك تحبني واني اللي بعت الدنيا وأشتريتك مو أنتَ تنازلت عن حياتي وظيفتي وما طلبت منك حاجه ولا ردت تسويلي عيشه مثل عيشه أهلي بالعكس عيشتكم حابتها إلى انتوا كارهيها اخواتك ومتبطرات عليها يتعاركن عالكحل والحمره والحذاء اني تمنيت احد يشاركني بملابسي اكو ملابس ما لابستهن اتمنيت اكعد ويه اخت واتناقش واتعارك وياها على لبسه على مكياج افضضلها وأشاركها بإصغر تفاصيل حياتي.

والأكل إلى متبطرين عالاكل البايت اني ما مامتعلمه اكلها صرت أشتهي واكلها وياكم بس الفرق بيكم ونفسياتكم الضعيفه المشكله بيكم مو بيه.
نفسيتنا ضعيفه لو أنتوا وأهلج شايفينا مو كد مقامكم العالي.

هشام رجاءً أساس المشكله مو أهنا لاتقلب المواضيع واني حجيت من حركة گلبي ورداً على كلامك مو قصدي اجرحك واني والله ما تهمني المستويات والمقامات ولو تهمني جان ما حبيتك وعاندت الكل ووافقت عليك وتزوجنا وكلنا أبناء ادم وحوى وأهلي ربوني بنفس طيبه
ازهار تعبت ماكو تفاهم لا أنتِ تفهمتي أخواتي ولا هنا تفهمجن واني ما أعوفهن وهنا ما الهن غيري.
والمعنى تعوفني علمود أخواتك
مو بس هذا سبب هواي أسباب.

لا عوف الأسباب يعني تضحي بيه وبنتك علمود أخواتك لامستحيل ما جاي أصدك
ليش ما تصدگين هذن أخواتي ما ألهن غيري وأني مو مثل أخوانج من مروان من طرد أخوج عمار من البيت علمود مرته اني اطرد أخويه علمود مرتي ولا وأثنيهم على واحد.

عمار ما انطرد من البيت وعصام من گاله اطلع من البيت تجنباً لمشكله مجرد حل وسط لفض النزاع لن دخلته لغرفة مروان تعدي حرمه وكسر خصوصية واحنه نحترم ونقدس الخصوصيه وبيتنا عدنا نظام وقانون ثابت محد يدخل غرفة الثاني بدون ما يدك الباب ومروان انفعل لن عمار ما التزم ودخل غرفته مو لن هو يشك بي لا أنتَ غلطان أخواني واحدهم يفدي الثاني ومستحيل تراودهم فكرة الشك.

عمار من طلع من البيت ما ضل بالشوارع بالعكس راح يم جديتي هو أصلاً مروان جان مقيم عدهم وتزوج واستقل وهسه اجه عمار بمكانه هم اعزب ياخذ راحته وما يتقيد لن هو مقيم بالخارج واله اطباعه وحريته الخاصه محد يكدر يجبره ونفس الوقت نسوان أخواني ما يتقيدن بوجوده وجديتي هي تريدهم يمها ونس الها بمكان مروان صار عمار
ضل ساكت ما حجه رجعت اخذ نفس واني عبرتي بصدري وحجيت.

ما تكدر تخلي خط احمر على اخواني عصام ومروان والله لن طردوا اخوهم عمار بس تدري الصوج مو الك الصوج اللي اني وثقت بيك وفتحت گلبي وسولفت الك مشاكل أهلي واهلي خط احمر لا أنت ولا غيرك يكدر يشوه صورتهم
من يوم يومج أهلج وأخوانج رقم واحد بحياتي وهشام على الهامش لدرجه عادي عندج اذا ما احترموني واكبر دليل هسه واكفه وتحاجيني بكل صلافه.

أي أهلي وأخواني رقم واحد بحياتي لن هما أهل وأنت حياة ومكانك بگلبي وماكو مقارنه بينك وبينكم كلمن اله مكانته ومعزته الخاصه.
لا أكو مقارنه والفرق واضح واني شايفه من زمان بس جنت اتغاضى عنه لن أحبج بس دام عندج الأهل أهم والمعامله بالمثل خلاص يا بنت البشوات والعسكرين والفايخيين والطاكيين وعايشه الدنيا طول بعرض أني لهنا وكافي تحملت أهلج وخشومهم العاليه أكثر من طاقتي.

لا هيج تحجي لاتخلي أهلي بالنص هما ما دخلهم بمشاكلنا ليش كل مشكله تصيير ترجع عليهم.
ولحد الأن أدافعيين الهم ازهار أهلج ما أحترموني ولا أحترموا أهلي من يوم يومهم ما متقبليني الظاهر اكو فرق شاسع بينا والمستويات لعبت دورها.
يعني شنو!

روحي? أبوج وكوليله بابا أختياري جان غلط المفروض مني إسمع كلامك وأتزوج واحد أنت تختاره رجل دوله ويعيشج بقصر اللي تحلميين بي أحسن من هشام وأخواته ومشاكلهن الما تخلص روحي شمنتظره ذبحتيني بمكانة أهلج وأصدقاء أخوانج وبكل قلة حيا تكلبين بتلفونج وتشوفين صور أصدقاء أخوانج الضباط والله بحجه اصدقاء أخوانج محتفظه بصورهم وما كلتي لنفسج اني مره متزوجه وعندي رجال يغار عليه ولازم اخلي حشيمه اله ولنفسي.

لاااااا لهنا وحدك لاتغيير الموضوع كله عفت گلشي ورجعت ولفيتها على? بابا وأخواني وبعدين الصور ما محتفظه بيهم مجرد مراسله اني ومروان ودزلي صوره هو وأصدقاءه وهو موجود بينهم شكوو بيها لو الا عندي شيء، لو بس تبطل وتتقبل نفسك وما تشوفهم أعلى منك جان ما وصلنا لهذا الحال.

لاتضحكيني فدوه لعينج وضحلي اني ما ترست عينج وعينج فارغه لن متندمه? زواجج وبنفسج تزوجيين ضابط وعسكري نفس شخصية أخوانج وهيبه ومنصب ومكانه نفس مستواكم.
لا ما متندمه ولا راح أتندم أنت حبي الأول صفن بوجهي وعيونه مليانات دموع جاوبته لاتنهي حُبنا احنه اكبر من هالسوالف ولا كلمة والثانيه أهلج وأخوانج وهما شعليهم وبعدين موضوعنا عن أختك ليش رجعت عليهم ومخليهم حجرة عثره بطريقك.

أگرههم ما اطيقهم مسوين عندي حموضه بمعدتي.

حموضه بمعدتك دام هيج لعد ليش أجيت عليه ليش رفعت ركبتك فوك وباوعت عليه باوع على وحده من مستواك جان اخذت رشا مو جانت تحبك وموظفه ليش كسرت?كبتي وياك ليش خليتني أحارب أهلي ليش خليتني أعاندك أخواني وأكسر كلمتهم وازعلهم علمودك ليش خليتني بموقف صعب بينك وبينهم ليش خليتني أخليهم بموقف صعب وهما يشوفون المحادثات وصوري أنتشرت بسبب حبك وقهرتهم وزعلتهم تأكل وتشرب وياي وحجوا وحجوا وعاندتهم وكسرتهم علمودك ليش كولي ليش.

دام انت مو مستواي ليش ركضت وراي واجيتني
من كل طريقي خليتني أنعجب بيك واني اعرف رشا تحبك وروحها بيك وصرت انانيه وحبيتك حاربت الصديقه والاب والام والاخ والدنيا كلها علمودك بالاخير هيج تجازي حبي الك هشام لهل الدرجه مسترخص حبي صرت العاشق الولهان واحبج وزهرتي والقمر بيد والشمس بيد.

والعمر يكظي بحضنج واترس البيت جهال واغنيلج وتغنيلي وتحملي ظروفي وتحملت ظروف وتقبلت عيشتك وصبرت وما شكيت وما تذمرت ولاتعاليت ولا تكبرت واني اكثر وحده الكبرياء ينشاف بعيونها جفصت عليه علمودك حتى كبريائي تخليت عنه بسببك وبسبب حبك.

أرجعي لحياتج ولكبريائج القديم هشام حبج وحبيتي بس حُبنا صعب اني تعبت ما ضلت عندي طاقه أكمل الطريق وياج لهذا خابري أخوانج يجون يأخذونج يفصلنا الطريق والانفصال أفضل ألنا أثنينا ما أريد أظلمج أكثر ومن الأساس زواجنا ما متكافئ ومعانات ومشاكل أكثر من الاستقرار.

كمل كلامه ودار ظهره ومشه وعاف الباب مفتوح نزلت دموعي بغزاره وشفايفي ترتجف وأحس گلبي يريد يتوقف وجسمي نمنم لزمت گلبي كعدت كاتمة عبرتي بصدري نهضت بتوالي طاقه سحبت تلفوني وطلعت رقم عصام وبجيت وأتصلت عليه وأجاني صوته مو كادره أنطق اي حرف
عصام ها عيني خيتي
ازهار خويه
أزهار شبيج
جيب أخواني وتعالوا أخذوني هاي هي بعد
شصار أنوب تعاركتوا
تعال أخذوني فدوه
ماشي ماشي جايين امشي غسلي وجهج بماي بارد
ماشي لاتتأخرون
ماشي.

قطع الأتصال وكعدت مختنگه ووجهي تطلع منه حراره تلسع بخدي وأسمع صوت غزل تصرخ كمت طلعت وشفته يدخن باوعلي أخذتها من أيمان سويتلها ممه كعدت أرضعها وهي بحضني ودموعي تجري وتنزل على وجهه البريء ما شفتي من عائلتج گلشي سوده عليه.
مر وقت وسمعت صوت مروان عصبي.
مروان وينها أزهار.

أزهار يروحها وعيونها تفداك ازهار من عمرها لعمرك، شلت بنتي وطلعت وهو طلع الهم من باب المطبخ سلم على عصام ومروان سحب أيده ودخل الأستقبال وعمار ومجد سلموا عليه ودخلوا ورا عصام وهشام باوعلي صديت وجهي عنه ودخلت ومروان شافني وباوع لعيوني وأنتفض وصاح
مروان شبيج ليش تبجين وعيونج مورمه أحجي لك شمسويلها ضربج مو ضربتها والله أكسرك والله
عصام مروان ما جايين نتعارك لاتفضحنا أكعد.

مروان وين تريدني اكعد اكعد على فراشه وهو هاين أختي متشوفها باوع عيونها شلون مورمات وخدها أحمر لك أختي تسواك أنت وأهلك وعشيرتك كلهم تاج?أسك والله ومن يوم تزوجتها كلت أنت مو رجلها وحاط ايدي على گلبي لا تكسرلي گلبها.
عصام گافي عاد خل نفهم السالفه وبعدها بيك خير وأحجي واحنه دايسسن بيته وفراشه غصباً علينا نحترمه هو وأهله فاهمين عليه واليحجي ويقلل أحترام يتفضل يطلع برا.

أزهار كعدوا بس على أعصابهم حتى عمار متوتر ومجد ضاغط على أيديه ويباوعلي ورجع باوع بحقد ونظرات لهشام عاد عصام حجه.
عصام أي أبو غزل نسمعك داز علينا يابه أمرنا
مروان يأمرك ما يأمرنا عصام لاتخبلني
عصام تسكت لو تطلع برى
مروان اللهم طولج يا روح.
عصام أحجولي السالفه.

هشام هواي مشاكل صارت ما ألها حل وخصم الحجي ما اطولها عليكم وصلنا لنهاية الطريق ما منه رجعه وتوصلنا الحل هو الأنفصال أختكم ما أريدها بعد وننفصل أحسن النا إثنيننا.
عصام مشكور رحمه الله والديك كثر الله خيرك وأستر ما شفت منا
مروان والله سويت علينا فضل بردت گلبي الله يبرد نار گلبك
مجد أصلاً البيت فارغ من دونها ومن يوم تزوجت عبالك البيت شايل وياها ومشتاقين لكعداتنا وياها وسوالفها والشقه وصوتها وضحكتها.

مروان أزهار هي مونستنا بالبيت والبيت يحلى بوجودها وعزيزه وغاليه وزادت معزتها بنتها غزل جان عدنا بنيه وحده صارن أثنين حبيبة خالها
تعالي خالوا تعالي لخالج.
عمار خسارة أختي ما تتعوض فرصه سعيده.

أزهار مروان اجه اخذها من حضني يبوس بيها ونهضت ودمعتي نزلت وعصام صافن عليه وساكت طول ما هما يحجون هو عايفهم كلهم ويباوعلي هشام وكف واني بالنص أنهاريت وكمت اشهك وكاتمه صوتي استحي منهم وكفوا يباعون اليه مجد وعمار نزلت دموعهم بس مروان يباوع بحقد لهشام تقرب عصام سحبني وضمني لصدره وحضنته وبجيت واشهك واشهك وهو يمسح على شعري خويه أنكسر گلبي خويه
عصام هاي هي خيتي الحمدلله على كل حال.

يله امشي ويانا بيت أهلج ينتظرج.
أزهار مسحت دموعي وأبتعدت والكل واكفين وعصام حجه.

عصام دام ما تريد أختنا هاي هي بعد والطلاك احنه نمشي بي ونلزم محامي ما يحتاج تكلف على نفسك ما نريد نتعبك ويانا والمتقدم والمتأخر متنازلين عليه ما نريد گلشي منك لا غرفتها ولا أي شيء فقط ذهبها لن هذا حقها ولن من عدنا احنه جهزنا الها حق أهلها يضل الها لو منك أتنازل عنه بالعافيه عليك وبنتها تضل بحضنها لا أنت ولا غيرك يكدر يأخذها ويسحبها من حضنها وخوالها عايشين والقانون وياها الطفل لأمه وهاي هي يله بعد أخوج لبسي وتعالي وكلشي لاتجيبين وياج عدا ذهبج بس حتى ملابس لاتجيبين.

أزهار هزيت?أسي عفتهم ومشيت بتعب وخطواتي بطيئه مثل الوحده مصابه وفعلاً اني أنصابيت بسهم ونبت بنص گلبي سوه عندي إعاقه جسديه وصلت الغرفه وصارت گبالي الجربايه وبدلة النوم غمضت عيني قبل ساعات جان بين أيديه ويباوعلي ويتغزل بيه وكلشي حلو عشته وياه أنتهى بهل الليليه.
فتحت الكنتور شفت علبة الذهب خليتها بالجنطه وسحبت عبايتي بصف قميصه الأسود تلمسته ونزلت دمعتي بخذلان وجرح بالروح.

سحبتها ولبست عبايتي وذبيت قراصتي على الميز بصفها المشط مالتي ومكياجي ومواد العنايه مالتي عطوراتي وماشات شعري وأكسوارتي وكل تفاصيلي تركتهن ومشيت.

جمعت أغراض بنتي وملابسها بجنطه وخليت تلفوني بجنطتي حتى السماعه عفتها حتى ممه بنته باقي بيها الحليب عفتها صورتي ويه صورته مركونه عالميز گبالي گلبتها ونظرت نظره أخيره ومشيت ودمعتي واني طالعه أصطدمت بصدره وصارت عيوني بعيونه نزلت دمعتي وعبرته رحت غرفة أمه دخلت عليها لكيتها تبجي هي وأيمان مع السلامه خاله أعذروا ما شفتوا مني وحقكم عليه خاف بدر مني أي قصور تجاهكم وتقربت بستها من?أسها الله ينطيج الصحه والعافيه ويحفظلج هشام ويستر على بناتج ويسهل أمرهن ويوفقهن.

حضنتني وضلت تبجي بستها من ايديها.
الحجيه الله يرضى عليج دنيا وأخره راضيه ومرضيه ونعم منج ومن مرباج ومن أهلج وأصلج وحشاج من القصور بنيتي حشاج القصور والعيب بينا أحنا موخوش أودام عداكم العيب يمه.
ازهار تسلمين خاله هذا من طيب أصلج تقربت سلمت على أيمان وبست الجهال كاموا يبجون
أمجد عمه ازهار لاتبجين والله احنه نحبج وخالي هم هواي يحبج ما عليج من خالاتي خلي يولن.

ازهار دير بالك على نفسك وأخواتك وامك صير زلمه وسبع ماشي حبيبي بسته وهو يبجي ومشيت وهو واكف ويدخن عبرته وفتحت الباب عليهن أفراح شافتني كامت تبجي بس صبا صدت وجهه عني وسجى?اسها بين رجليها وتبجي.

مسحت دمعتي باوعتلهن اني رايحه وبعد ما أرجع ديرن بالجن على نفسجن واللي صار خلنا درس الجن وتعلمن منه والله شاهد حبيتجن وأتمنالجن الخير والتوفيق بحياتجن وجنت أتمنى تكونن أخواتي لن اني وحيده ما عندي أخت بس القدر اله رأي ثاني لازم يخليجن بطريقي علمود أتعثر وأستقيم.

وأنتن مو السبب بإنفصالنا اني وأخوجن أنتن مجرد سبب مو أسباب مع السلامه طلعت وعبرته وتقدمت شلت الجنطه ومشيت وأجه مجد اخذ الجنطه مني لكيتهم واكفين ينتظروني ومروان گال.
مروان أدري من جايبنا كُلنا وبسياره وحده وهي ويه بنتها وين تكفي.
عصام لا تكفي يله صعدوا سيادة الوالد وأمي وأسيا حركوا الدنيا عليه بإتصالتهم ما جاوبت ولا واحد.
مروان نوصل ويصير خير يله نمشي خوما نسيتي شيء.

أزهار بگلبي نسيت روحي جاوبته لا ما نسيت شيء عمار صعد ليكدام وعصام يسوق ومروان بحضنه غزل ومجد بصفي واني صرت بالنص وشغل مشينا
طول الطريق تلفوناتهم ما سگتت وأخر شيء مروان فتح الخط وجاوب.
مروان ها أسيل جايين بالطريق ربع ساعه ونوصل نجي وتفهمون السالفه كلها يله.
وصلنا البيت والكل منتظرنا مروان انطه غزل
ل أسيل وبابا يباوعلنا كلنا وهما ساكتين وأمي لزمتني وتلمست وجهي ومسحت دمعتي بخوف.

وصال شبيج حبيبتي ازهار أمي حاجيني واحد منكم يحجي أختكم شبيها شصاير من رحتوا لحد الان ما واحد منكم رد على أتصالتنا.
كمال تبقون ساكتين عصام عمار مروان مجد بابا شبيكم شصاير أزهار بابا أحجيلي شبيج بابا.
عصام خل ندخل الأستقبال ونحجيلكم أسيا أسيل أبقوا أنتوا والجهال يله أتفضلوا.
أزهار دخلت الأستقبال ورا بابا وأخواني أربعتهم وأمي لازمه أيدي تريد تفهم مني شبيه شصاير وياي.

كعدت لن ما عندي طاقه أمشي وهما كعدوا وبابا ضل واكف يريد يفهم السالفه وعصام كعد يحجيله
وأنتهى الكلام وبابا باوعلي واجه عليه وصاح بعصبيه
كمال شمسويه ويه زلمتج وهيج يگول ما أريدها وتعالوا أخذوها أحجي شمسويه لا أشيل?اسج عن جسمج وأنعل والديج.
عصام يابه على كيفك وياها
كمال ولا واحد منكم يفتح حلكه بعدين حسابكم بعدين خلي أخلص من أختكم وأتفرغلكم اصبرولي
أي ست ازهار أحجيلي شبيج ويه هشام.

ازهار نزلت?اسي وبجيت والله بابا ما مسويه شيء
كمال هيج لعد من كيفه كام ما يريدج شجاه مو ذبح وكتل نفسه عليج وهسه يگول ما اريدها احجي ولج قللتي أحترامات وياه
لا والله
غلطتي عليه
تجاوزتي عليه أو على أهله
لا
هنتي رجولته
هزيت?أسي وبجيت لا
لعد شجاه تسودن وصخم وجهج ودزج إلى شجاه ولد مثل الورده يباوع على حلگج يتفداج ليش كام ما يريدج ليش لا لا لازم أكو سبب.

مروان يابه ماكو كل سبب قابل ما نعرف أزهار وتربيتك بعد اكيد ما تغلط بحقه بس هو مو أدمي.

كمال لا أدمي بس أحنه مو أوادم بس شجاه هيج صار بس هذا الطيحان الحظ يجي جفتة وحده ويصخم وجهي ولج مو وأنتِ ذبحتي نفسج عليه لو هشام لو ما أتزوج مو هذا هشام عاندتي أخوانج وطلعتي من البيت وهما منزلين روؤسهم من وراج ما راضين على زواجج بس رضوا لخاطرج واني كلت خطيه اطلع من خطيتها بنيتي وحيدتي وهي واعيه وعقلها فاهم وهشام خوش هشام والكل تمدح منه وافقت لخاطرج والله لخاطر ما أكسر گلبج وبعدين تكول بابا ظلمني وحرمني من الأحبه.

وبالأخير أخوانج جاييني يابه هشام يكول بعد ما أريدها ويريد يطلك لا والله مو على كيفكم وكيفه شوفي ولج وسمعي زين طلاك ماكو وهسه تمشين ترجعين لزلمتج وبيتج من أول مشكله ما صارلكم سنه من تزوجتوا وتنفصلون امشوا رجوعها ما تضل هسه ترجع ل زلمتها هسه.
عمار يابه شسالفه الرجال يريد يطلگ يعني تريد نهين نفسنا ونهين أختنا كدامه وهو غريب وعلى فضاحه وخزي علينا اذا اخذناها اله.

كمال لعد تردونها تتطلك ولكم هذاك اليوم تزوجت شتكول الأوادم علينا طلگها وشمرها عليكم تردون تفضحوني تردون تخزوني.
لا وأخوكم الجبير الخوش زلمه وسبع ماخذكم كلكم ورايح جايبها رايح تحرر الموصل ولك مأخذهم تتباهى بيهم كدامه الوحيد الما عنده اخوه المسكين واكيد تكاويتوا عليه مو وتجازوتي عليه.

مروان لا يابه وغلاتك ما حجينا شيء ولا قللنا أحترام لا وياه ولا ويه أهله حتى أساس المشكله ما عرفناها شنو لا هي حجت ولا هو حجه أثنيهم ساكتين بس هو گال أختكم ما اريدها وتوصلنا لقرار الأنفصال وهاي كل السالفه.

كمال وأنت ثور الجبير شلون تروح تجيبها وتجي لو اجتي ل أيدك على المستريح وهذا مناك ومبتغاك لن ما تحب هشام ولاتطيقه كبل وافقت وجبتها بدون ما تفهمون السالفه شنهي ولا تكعدون ويه اختكم بلا طلعت هي غلطانه على الرجال
لا واليكتلني القهر مأخذ أخوانه كلهم من يومكم بيكم عرج شوفة حال طايحين الحظ.

عصام هما ما متفاهمين وقبل فتره هم تعاركوا ودزوا عليه وكعدت حجيت وياهم وفضت وكل ظني هاي هي مشكله وتنحل بينهم بس ما عبالي يرجعون يخابروني ومتوصلين لقرار أخير وهو الأنفصال.
كمال شتحجي أنت يعني مو أول مره أزهار أحجي شنو المشكله البينكم أحجي
أزهار الفارق الطبقي بينا مختلف وگال اني وياج زواجنا ما متكافئ وما ينجح هواي أمور ومشاكل صارت أحد أسباب خلته ينهي هذا الزواج.

كمال والفارق الطبقي شعليه وهسه يلة تذكر الفوارق وحجه لو أنتِ حسستي أي اكيد كمتي تتعززين ورفعتي خشمج عليهم لو كمتي تستنكفين من عيشتهم وأكلهم وعيشتهم لن أنتِ بنت كمال بنت الوزير على?أس ريشه تتبطرين على العيشه وتتعالين عليهم
عصام أمشي رجع أختك لبيت زلمتها واني أخابر هشام وأحجي وياه وأفهم منه شبي ليش هيج
عصام يابه الرجال نهى گلشي شنو گوه قابل
كمال أكمل أتصالي وأرجعلكم.

أزهار بابا طلع وركع الباب وراه وأخواني يفترون وأمي تبجي وتبوس بأيدي واني تعبانه أريد اوكع من طولي بالگوه كمت أشوفهم.
عصام مروان مجد واحد منكم يجيبلها كلاص ماي
مجد أي هسه.
أزهار جابلي وشربت ودخل بابا كعد بالگوه يأخذ نفس مروان تقدم عليه فتح دكم القميص مالته وعمار سحب الماي من ايد مجد انطاه شربه على السريع
مروان يابه على كيفك صحتك عدنا بالدنيا كلها وانعل هشام لابو خيره.

كمال أني صوجي أتصلت عليه ما يجاوبني
عصام مو گتلك أنت ما سمعت مني.
كمال ليش يطلك ليش
مروان يابه هدي أعصابك هدي رحمه لأهلك لأتنفعل موزين عليك.
عصام هاي هي قسمتها هيج وعد ومكتوب ومقدر الحمدلله على كل حال وطلاگها أني أمشي وياها أتكفل بگلشي.
كمال أمشوا طلعوها منا ما اريدّ أشوف خلقتها كدامي أخذوها وصال أخذي بنتج.
مروان يابه على كيفك عليها.

كمال لا أدافعون إلها لا أفرغ قهري بيكم شو گبل صرتوا ضدها هسه صرتوا خوش زلم واكفين وياها وانتوا هم السبب وأختكم طايحة الحظ اكيد السبب منها هي يوميه عايفته وجايتنا والرجال طفرت روحه ويرجع من شغله تعبان يريد لكمة يأكل والافنديه دايحه يم أهلها مسويه الطريق سكة طريق رايحه جايه متزوجه اهلج لو متزوجة المكرود تزوجتي اكعد بيتج وكابلي زلمتج وانجبي.

عصام وهي شعليها ترجع عليها ما ألها ذنب ذنبها وثقت بي عبالها رجال كفو ويستاهل وخذلها گافي تحجي وتقسي عليها ترة مو سهله عليها ووراها طفله يعني الواحد طايح حظه تجون أنتوا تزيدونها عليها.
بصياح أسيا أسيا.
أسيا هاا عيني
عصام أخذي أزهار بالغرفه بقيها يمج خل ترتاح
أسيا أي تدلل تعالي عيني.

أزهار سندتني وكومتني وكعت من طولي وأخواني ركضوا عليه رفعوني من الكاع وامي وأسيا سندني وأخذني الغرفه نمت على جربايتهم وغطتني وأني شبه ميته روحي مثل الريشه ينفخون عليها تطير
بقيت مخليه?أسي على المخده وصافنه وأسيا وأسيل وأمي يمي ويحجون بينهم وسمعت صوت أخواني عصام ومروان دگو الباب
وصال دخلوا يمه
عصام ها نامت
وصال منين يجييها النوم سوده عليه دمعتها ما نشفت وعيني أنتوا من وگفتوا ويه أختكم.

مروان شنسويلها مثلاً هذا سؤء أختيارها والملامه ما تفيد بعد، يمه ديري بالج على غزل نامت اني لو تسكت يمي جان أخذتها بغرفتي تنام يمنا.
وصال لا يمه خليها يمي أنت هم تريد ترتاح يله اصعدوا أنتَ ومريتك تأخر الوقت والصباح رباح الله كريم، يله أسيل ماما امشي ويه زلمتج صعدوا ناموا أسيا روحي نومي جهالج ك?م بس يكمز وجده معصب لا يعيط بي
أسيا ماشي عيني عمه وعصام أفرشلك بالصاله.

عصام حضري فراشي بالاستقبال خل ك?م يجي ينام يمي يضل بس يحوص على?اس عمته.
أسيا ماشي عيني
مروان تصبحون على خير
أسيل تصبحون على خير
أزهار راحوا وأندك الباب
وصال ادخلوا يمه ها عيني مجد تعال ابوسك ولا شفتك من نزلت
مجد نزلت ويه عصام ها شلونها نايمه كاعده
وصال كاعده
عمار عوفوها خل ترتاح غزل وينها لعد
أسيا أسيل نومتها
عمار مصدوم بي والله العظيم
عصام ليش بس أنت بس أحنه بس هي أبويه وين عفتوا.

مجد كاعد وصافن وكل شوي يصفك بأيده
عمار لا أنوب يكول هالثلاثه شلعوا گلبي هي وأخوانها مشاكلهم ما تخلص همزين احنه طلعنا ما شلمنا ضمن القائمه.
وصال كلمن ونصيبه من الدنيا يمه والحمدلله وأنت اصعد لغرفتك نام وأرتاح ما ترجع بيت عمك الوقت تاخر
عمار لا يمه أرجع أحسن
عصام عمار لاتزعلني منك أمشي لغرفتك ومروان گلبه طيب ما عنده شيء وياك وهو أصلاً يريد يسوي سويت منعزل هم أنتوا تأخذون راحتكم وهم هو.

مجد يله اني رايح أسبح وانام تعبان تصبحون على خير.
وصال تعال أبوسك
مجد ما شبعتي هاج بوسيني
وصال فدوة رحتلكم ملابسك مكويات ومجهزات
مجد عاشت ايدج يله تصبحون على خير
عصام وأنت بخير يله اني هم يله عمار أمشي كدامي بدون نقاش.
عمار ليش أكدر اناقشك.
أزهار طلعوا وضلت بس أمي خلت أيدها على?أسي وتمسح بحنيه وحجيت يمه گلبي يوجعني يمه أحسه ينزف دم.

وصال يمه شبيدي عليج ربي يحط الصبر بگلبج ويمدج بالقوه أحزني وأبجي لاتكتمين بداخلج خلي حبه وكسرته تنزل بدموعج عيشي حزنج يمه عيشي
أزهار كعدت وحضنتها ولمتني بحضنها يمه عافني يمه بكل سهوله گالي ما أريدج ليش شسويتله يمه كسرني يمه نار نار نار مشتعله بگلبي احس البجي ما جاي يكفيني يمه روحي تنكز مفرفحه ما مصدكه معقوله هشام يتخلى عني هيج حب ازهار وتضحيتها ما غزرن بيك هيج حبي طلع رخيص.

وصال أحجي أحجي وابجي طلعي گلشي بگلبج خل يكول اللي يكوله واذا ما يريدج الدنيا ما وكفت عليه ولا هو الاوكسجين وهو الخسران احنه ما نخسر وكلنا وياج ما نعوفج ميخالف خلي ابوج ضدج أخوانج اربعتهم وياج واني ونسوان أخوانج
أزهار حاضنتها وأبجي وأجتي أسيا باستني من ايدي وتبجي وياي أسسيا هشام يگولي ما أريدج احجي والعبره بصدري مثل الطفل من حضن امي لحضنها أسسيا أني أستاهل أستاهل.

أسيا خيولي هو الخسرج أنتِ قويه وسباعيه خليج أزهار الأعرفها ما تضعف بسهوله ما تنهز ميخالف اليوم مسموح الج تعيشين كل مشاعرج واحزني وعاتبي وابجي براحتج بس باجر ممنوع لن هشام ما يستاهل منج دمعه كافي عليه حزن ليله وحده مو علموده علمودج أنتِ نخاف عليج لايصيرلج شيء من الكتمان وكلنا وياج ونباوع عليج ومنتظرينج.

أزهار بقيت حاضنتها الظهر نومني بحضنه غرقني بالحب والغزل وقبل المشكله بساعه اني جنت نايمه بين أيديه يعني تصوري طلعت الهم بروب النوم يمه عفت ثوب النوم على الجربايه بوسخه وبعدني لحد الان اني ما سابحه شحجي الجن محد يحس بنار گلبي محد.
أريد أروح الحمام أسبح أسيا اريد من ملابسج ما جبت ملابسي وياي عفتله گلشي اريد اتنظف تضايقت.

أخذتني أمي الحمام دخلت وياي سبحتني واني ابجي وحضتني واجتي أسيا لبستني بإيديها ومشطتلي شعري وأمي نامت ونومتني بحضنها وتمسح على شعري وضليت فاتحه عيني على وسعهن لما تعبت وغفيت...

أسيل جانت ليله صعبه علينا وگلبي وجعني عليهم كلهم هذول أهلي وما أتمنى أشوف أحد متأذي منهم كسرت خاطري ما تستاهل الا كل خير بس وعد ومكتوب ومقدر وما منه مهرب.
صعدنا لغرفتنا گبل نمننا وهو صافن دايخ ومقهور على أخته الله يعينهم صعبه وبعز صفنته حجيت مروان.
مروان هاا
أذا بيوم أني وياك أنفصلنا هم تضوج! رفع نفسه من المخده وضربني على كصتي أخ ليش تضرب.

أنجبي وانحمي هاي أنتِ من تريدين تنامين تكومين تمسلتين وتفلتين بسوالفج التافهه يا تافهه
يعني تضوج
وليش أضوج عليمن عليج ليش أحد كايلج أنتِ الاوكسجين
ها
أي
أي طبعاً متضوج لن اني مدوختك وشالعة گلبك علمود تخلص من أسيل ويفضالك الجو وتأخذ رأحتك.
لا أنتِ مشتهيه أتعارك وياج معركة كنعان واني من روحي زهكان عقلي ما ضال بي ولا فيوز اطك?أسي براسج وامشي بيج للگبور.
أنتِ ما حجيتلي تضوج لوما تضوج.

باع هذا الزواج من تأخذ وحده زعطوطه وأكعد زعط بروحك علمودها شلون سالفه هاي اني كوه ربيت نفسي أنوب اكعد أربيج واصغر عقلي علمودج
شدخل عقلك هسه جاوبني تضوج
أسيل قفلتي على الضوجه تردين تطلعين الها جواز ترفه عن نفسها لو شنو بالضبط لو تردين تنفصلين عني واني أفصل عظامج عظمه عظمه وأخليج مفككه حتى اني بعد ما تفيديني.
يله نام أخذت الجواب.

نامي أنتِ وديري وجهج وأنطيني ظهرج علمود أخلص وأفتك من لسانج ما تحجين الا وكت ما انام يتشغل الراديو.
حضني من ظهري وطوقني برجليه ولزمت أيده وأعد أصابعه ونزعت المحبس مالته والحلقه وكمت أشلع شعر وهو كمز وصاح بيه بعصبيه
أسيل ما تبطلين سوالفج قلة ما بين أيديج تهلسين شعر أيدي انوب من أصابعي خرب شخبله
أنظفهن هواي بيهن شعر شوف حبيبي باجر اشيلهن بالشيره.

شالج الله انوب عليه الشيره ليش تخليني أكوم أعدلج بالهندي واتسخف خليني مهتدي وجار وياج درب الصلح والطاعه يا فاسقة.
لا دخيلك عوفلي الهندي هسه انطيني أيدك انطاني لبسته الحلقه والمحبس ومسحت عليها هو صافن عليه.
تأخذين بركاتي لو جاي تقرين طلاسم سحر شو شفايفج يتحركن وبس تمسحين على أيدي
يا شبيه تخبلت لاتخاف ما أسويلك سحر وأذا اسويلك أسوي سحر تفرقه.

لا سحر لجلب الحبيب خلينا بالفسوق اللي طمسنا بي أنوب السحر أسيل كوليلي شتردين من الاخير لن صارلج ساعه تحوصين ماكو لعبه ما لعبتيها وياي ساعه لسانج ساعه حركاتج وسوالفج
گلشي ما أريد والله شبيك تفسر على كيفك
علي كيفي مو
أي
تقربي عليه
وين
لوجهي
ما
أسيل تقربي
تقربت
بعد
گافي مروان طخ خشمي بخشمه وأنفاسي صارت عاليه توترت وهو صافن عليه
تستحين مني.

غمضت عيني بعدت وجهي وسحبني بقوه وقربني اله وأنتهت ليلتنا نايمين بإحضان بعض هو نام واني بقيت كاعده ولو نفرض بيوم أنفصلنا شيصير بينا
وما اعرف ليش ترادوني هالفكره ولن داخلياً أحس تعبت صرت احس علاقتنا مبينه فقط على الفراش وأهنا كلشي ينفصل وينسى اني شنو غلطت وياه يعاملني معاملة الحبيبة بس هالشيء مو دائمي ونفس الوقت متعب نفسياً من حقي أحس اني عنده أنسانه كامله ليش يعاملني بنقص.

الصبح كعدت هو هم كعد كمت أخذت ملابسي ورحت الحمام شفت الباب مقفول ورجعت وهو أستغرب الباب مقفول يمكن أكو احد بالحمام رفع الغطا وطلع وشويه ورجع.
مروان عمار موجود بالحمام لن رجع البارحه وأنتِ أبقي هسه لاتسبحين لما ينزل.
وأني اضل أنتظره لما ينزل
وشگوو تتنرين بوجهي أي أنتظري تموتين اذا ما سبحتي هسه وفوكاها هي الما عاجبها وتتننر.
شكو عصبت وتصيح ترة ما حجيت شيء
أي هذا هو لغوه لاتلغين.

فد كرهت نفسي حسسني اني وسخه مو لن هو وسخني شبعت قهر وضليت أكل بروحي وتذكرت بالليل شصار أمداني ولا تصيرلي چاره والله طبعاً أني عاجبني أنذل وأنهان وهو متونس على الوضع يمارس عليه كل طقوس رجولته يعصب ويغلط بكيفه لن متوقع مني أسيل تضل ساكته وما تفتح حلگها واللي يريده يجراله هذا الوضع صار مينطاق
ضليت كاعده وهو رجع كمل نومته وتمددت بصفه ومر الوقت كعدت على صوته يحجي على التلفون كمت فتحت الباب وعاط بيه.

مروان وين
أسيل وين أروح قابل أسبح الساعه صارت 11 شوگت أنزل
وشعندج نازله
مروان شبيك لخاطر الله رجعنا لشك مالتك ترة مو وضعيه طگت روحي خو لعد أحبسني بالغرفه
منو شاك وشحاجي وياج كلمه والثانيه وتردينها بعشره وتتنرين بوجهي وجهج من صباحيات الله يلطم
ما جاوبته طلع قبلي وأجه
أمشي سبحي وخلصيني
كرهتني حتى بروحي والله العظيم.

شمسويلج متكوليلي يرادلج حجه واكفلتي على الكلمه شبيج اليوم خبالتج طبگن عاجبج تنهانين يلة ترجعين تجرين مثل البشريه.
دخيلك على أساس هسه ما هايني
شوفي لج النتر بوجهي وطبع العنفصه هذا اجفص عليه وعليج أحترمي نفسج جري عدل.
ما جاوبته مشيت الحمام سبحت وأضرب بنفسي گبر يگبرني أمداني ولا أتوب كل كلمه يحجيها يغسلج غسل يالرعنه يالثوله لو يحبج ويريدج زوجه ما يشك بيج ويضل بس يدقق وينك ب?أسج.

فتحت الباب وهو دفعني ودخل مشيت وقفل الباب وين قفلته اريد اطلع.
مروان شبيج اليوم خلقتج مگلوبه
أسيل ما بيه شيء أفتح الباب أريد اطلع تأخرت على عمتي
شو ما افتح وطلعه ماكو وعمتج لحد الان نايمه
ولا واحد كاعد
مروان مو وضعيه هاي بطل تصرفاتك
يا تصرفاتيش شبيج أنتِ مزومله يابه دتطلعي عاد ميت على شگولج الزفره.

فتح الباب ودفعني لبرى فد كرهته كل أسلوب ما عنده لو يغلط لو يذل يسمعني كلمه حلوه يطلعها من خشمي سم وزقنبوت الله يساعد گلبي شلون جرعتك وتحملت أمداه گلبي عاف كل الاوادم حبيت واحد مسقط وسافل.
دخلت الغرفه مقهوره نار بگلبي من تصرفاته كملت بس بدون مكياج لبست شالي ودخل هو شمر المنشفه على وجهي وكف يمشط طلعت نشرتها على المحجر وأني نازله صاح وراي.
مروان سويلي ريوك هسه أنزل.

أسيل ما جاوبته نزلت دخلت المطبخ لكيت عمتي وصال كاعده صباخ الخير عمه ازهار شلونها اليوم
وصال هلا عيني صباح النور والله شلونها الله يعينها بس يعني اهون من البارحه هسه عصام كاعد يحجي وياها علمود المحاميه.
أسيل الله يكون بعونها، ليش راح يبلشون بإجراءات الطلاق!

وصال أي هذا هو وهو قافل ومصمم على قراره وعمج كمال هم حقد عليه وقفل على الطلاق من شاف ازهار الفجر تخربطت جان ماتت ردت من معدتها مرار الا بزعت الله ردها إلنا وگبل خابر
علي محاميه ونمشي بالأجراءات ما نطولها واحنه كرامتنا مو رخيصه علينا ونضل نتوسل بي
أسيل خطيه الله يساعدها
وصال هذا الجاي صبوا وتريكوا اني أخذلها الريوك تأكلها لكمه تسند طولها وتكوم تتحضر المحاميه راح تجي لهنا.

أسيل ليش المحاميه تجي عليها للبيت شتسوي تجي ليش ما هي تروحلها للمكتب
وصال أي عمج طلب منها تجي للبيت.