رواية بين سلاسل العادات للكاتبة كفاية كاظم فصول إضافية الثاني
رغد: امشي وارجع بالممر اطگطگ باصابعي توترت اباوع للوقت تاخرو مو اي والله تاخرو
صاحت علية هدوة من بعيد وهي تركض.
شبيج راح تموتين هسة يجون
تاخرو حيل بلة صارلهم شي
مابيهم مابيهم هسة يجون تصير مرات يتاخرون
راحت تشتغل واني كعدت يم عتبة الباب كلبي يدك بقوة هلكد روحي بيهم، هلكد احبهم واخاف عليهم
مر وقت كلبي تفتت طفرت للباب من سمعت صوت سيارة ابتسمت من شفتة خطهم بقيت اباوعلهم.
نزلو تعبانين وضايجين اخذتهم لحضني بوستهم
وهما على طنكورتهم خليت واحد منا ومنا امسح على راسهم واسأل.
شبيكم اليوم احد مضوجكم
حيدر وجهة مايكصة السيف سوى بحلكة ججج
وسبقني جوة دخل باوعت لكرار رفع عيونة وكال
يمة والله ماكو شي لايضل بالج
بدلو وصبيتلهم غدة احس نشاطهم طافي هالفترة حرت وياهم وهما ياكلون بهدوء ورضا ابن رحمان بحضني اوكل بية كتلهم.
اخذكم العصر للالعاب.
رفع راسة حيدر عاكد حواجبة سبحان الله يكول جاسب كال بضوجة: ابوي ما نزل
هزيت راسي لا ذب الخاشوكة بحركة وكام صحت وراة: تعال كمل اكلك ولا تشمر الخاشوكة هيج مرة ثاني
طلع برا ونتر ماريد اكل
خلاني اتشعوط والله شنو جاسب ملتحق واني شعلية كايلتلة يلتحق وجهي صار دم
كرار كدامي ياكل ويباوعلي من اخزرة يدنك راسة
كال خالي ما اجة؟
بعد شوية يجي
سكت بس بلسانة حجي من شافني اعصاب سكت
كول احجي شعندك.
يمة مو تعصبني اني معلية هذا يميني يكول
شيكول احجي
دنك عيونة يلعب بالخاشوكة كال بتردد
ليش خالي بعدة بالمركز بس ابوي صار يلتحق
ميلت راسي وكلت مستغربة من سؤالة
شمدريني شغلهم هذا
هما مو نفس الشغل جانو ليش اختلف هسة
اسأل خالك
هز راسة لا وابتسم كوة عن روحة عيونة مدمعة من اشوفهم هيج اعصابي ترجف كتلة بهدوء
تعرف السبب انت؟
رفع راسة بقة يباوع بعيوني حاير يكول كرار فقير مو نفس اخوة مايضم وبسرعة يحجي بس جان خايف من ردة فعلي ابتسمت وكتلة.
شبيك احجي
ماتضوجين؟
لا ما اضوج
ذب الخاشوكة وصار يحجي ويترقب عيوني
كرار: يمة حيدر يكول ابوي من وراج صار يلتحق
فتحت عيوني مستغربة ومتفاجأة ضحكت
اني اني شعلية
دنك راسة وكال
باعي خالي كليومية يجي حتى يشوف مرتة
تحبة وتتلكاة ابوي محد يريدة لا انتي ولا ذيج
بس تدعي علية محد يحبة.
نزلت رضا من حضني وسحبتة من ايدة بقوة
احس روحي تنتفض من كلامة خلة عيونة المدمعة بعيوني حاولت اسيطر على اعصابي وافهمة.
اني مو مرررتة مو مرررتة بس هي مررتة
وابوكم الراح والاجة اني ميخصنيييي
خوووش ومالي علاقة بيكمممم لا كل ماتنفس جااسب ما تنفس تشمرررونها براسييي.
دفعت ايدة وكمت شروق جانت واكفة تباوعلنة عفتها ودخلت للغرفة سديت الباب مخنوكة ادور على الهوى افرك بصدري ودموعي تنزل اردد اني شعلية كالبين وجههم علية ومحمليني السبب ليش
طلعت ملابس وبوجهي للحمام سبحت بمي بارد بلكت ارتاح وماكو راحة تلفي علية.
شروق: طلعو الجهال مارجعو بعد حتى ما تغدو نيمت شمس واخذت رضا وياي ادور عليهم بيت جدهم سلمت وسالت هدوة عليهم كالت برا يلعبون.
عفت رضا يلعب وي فضل وطلعت بالحوش ادور عليهم ماكو فتحت الباب باوعت جهال فارس وياهم برا يلعبون بس حيدر كاعد على صفحة يباوع خزر محد عاجبة وضايج رفع ايدة وصاح بصوت عالي على اخوة.
حيدر: كرارررر اختك لاتندعممممم
راح كرار يركض سحلها وهي تضحك ولاية عايشة بيت جدي وي اخوتها البنية متبهذلة ولايكول عدها ام ماعرف شلون امها هيج ماتريدها وعايفتها.
قبل تجي كلش قليل بس من صار يلتحق ابوها تعوفها ولا تسأل والبنية فرحانة وي اخوتها.
اجت سفانة بيدها غزل لزمت جهالها من ملابسهم ترزل بيهم: امشووو كداميي يلا مو كتلكم لا تبطون
علي: يمة فدوة بس شوية
ماكو بث شوية امشو يلة
صحتلها ابتسمت
هلا شروق
تعاي يمنة شوية وروحي
وجهالها يكلولها اي يمة روحي يمها شوية
خزرتهم واجت دنكت ابوس غزولة ودخلنا نسولف
سفانة: ياشهر عليج هذا
رابع
هم رحتي للدكتورة
اي وكالت بية بنية.
ضحكت وهي هم ضحكت كالت
مثل شموثة فدوة تنكرط عمي لبني اريدها
اليسمعج يكول عنددج عشر ولد اشو على وسجيوة حاجزتة
ضحكت وكالتلي البارحة تخابر بعلي وحجيت وياها دكول الحبالة ثوتني عنيفة والزلمة راح يشرد منها
ضحكت وكتلها
عود هاي بعدها بالبداية وهيج عمي والله الحمل يتعب بس حلو
هاي جنج ناوية تحبلين
سفانة: مادري بث فارث يكول بث واحد بعد
يريد اخت لغزولة وعلى الله
ان شاءالله.
دخلت يمهن واني رجعت اصيح لكرار وحيدر خطية مامتغدي كتلة كال ماريد
حيدر لا تخليني اكول لخالك عليك تعال اتغدة وروح
خزرني وبقة على كعدتة عبالك شايب شايل هم الدنيا كلها اجة حبيبي كرار لازم اختة من ضهرها لاتفلت فحطان كلي: خالة سويلنة لفات جعنا
ولاية تردد وراة بضحكة
اي والله جعنا.
اخذتهم سويتلهم لفات اكلو وسحبت ولاية اغسللها وابدل ملابسها كرار بقة على التليفون شوية وراح اخذ لفات لجهال فارس واخوة رجعو ولاية ماخليتها تطلع كعدت تلعب وي شموسة اجة رحمان لازم بيدة حيدر ويضحك كمت سلمت علية هو من يجي يبوسني براسي كمت اخليلة ملابس وهو بقة يم الجهال سبح واني جهزت صينية غدة النا كلنة دكيت الباب على رغد حتى تتغدى كالت ماريد صوتها مبحوح اوف يهل البنية ولا رتاحت.
وفد يحترك كلبها على اقل شي خاصة من جهالها.
سال عليها رحمان كتلة بعدين تاكل كعدت اكل وعيني على حيدر ياكل من لا جارة احس هالولد اكبر من عمرة بهواي كال.
خالي ابوي شوكت ينزل
هالكم يوم
خالي هو ليش مايرجع وياك يشتغل
بعد خالي هو غير شغلة
زين خالي خو ماكو خطر علية
لا ماكو خطر ابد
كالها وباوعلي وحيدر بعدة يحجي
هم ياكلون اكل زين يعني دجاج ولحم مثل ما ناكل احنة لو لا
ينطونهم خالي لا تهتهم راحت ايام القحط.
حيدر: يعني ابوي مايجوع
لا يابة
هز راسة ورجع ياكل بشهية باوعت بوجهة رحمان وصفنت شنو من محبة شايل لابوة عبالة هناك ماينطونهم كال وهل يبقى بجوعتة.
مثل كل يوم يبقون وي خالهم واني غسلت مواعين اخذت جاي الهم شربو وكعدو يحلون واجبهم وبينهم يتهامسون شوية وگامو لغرفة رغد يدكون الباب.
رحمان: شبيهم ذولة احس صاير شي
سولفتلة بقة صافن كال
هو متبهذل وجهالة وراة متبهذلين مو عيشة هاي.
رغد: بالمختبر كاعدة واحس وجهي مصخن من حركة البارحة هاي اثارها اجت ملاك
وسبحان الله جنها ملاك هدوء وجمال تشتغل ويانة
وهم مثلي عازلة روحها كالت بصوت ناصي.
ملاك: رغد دكتور احمد يكول تحولن على وحدة سحب الدم
كمت تعبانة وجهي صاير احمر
ولا يخلونة نستقر بمكان خررب
ملاك: مو باعي اكو نقص صار بوحدة السحب
فنمشي الوضع
وصلنا للوحدة ويانة ولد يسحب صرنا تلاثة.
نسحب احس مابية حيل اسحب كالت ملاك اكعدي اني اسحب بمكانج كعدت على الكرسي لازمة راسي بيدي وخرت ايدي من الولد اليشتغل ويانة
شبيج رغد
تعبانة
خاف حامل
خزرتة بقوة ونترت بية
مامتزوجة
رفع ايدة ودنك راسة كال
اسفة والله بس عبالي متزوجة لان سمعت من نبراس
منفصلة
كلتها وغمضت عيوني شوية خفت المراجعين طلع هو للبيت لان جان خفر وخلص شغلة بقينا بس احنا دخل رجال ملاك واكفة كالتلك شنو اسمك.
رد اسمة رفعت راسها مصدومة احسها جمدت بمكانها والرجال طلع ايدة باوعلنة يريد وحدة دكوم تسحب باوعتلها طلعت راساً باستعجال ثنينة بقينا نباوع وراها كمت اخذت التروانكا اشدها على ايدة مستغربة من تصرفها وهو كال
شبيها هاي شافت طنطل
سكتت مارديت شديتها على ايدة وسحبتلة طلع
وهي مارجعت رحت اشوفها بالغرفة البصفنا دخلت
ومن شفتها استغربت جانت ترجف وتاكل باضافرها
تفتر مثل المخبلة وتحجي وي نفسها.
عرفني عرفني ه هسة هسة يكلة علية
شافتني بلا وعي اشرت بايدها للخارج
ملاك: راح؟
اي
لطمت على وجهها ورجعت تضرب على رجليها
راح يجيبة ويجي راح يموتني
بقيت بحالة ذهول من حالتها وهي تلطم وتملخ بنفسها داخلة بخالة خوف وهلع لزمتها من ايدهة اهديها.
شبيج شكو منو اليجيج؟
ز، زوجي زوجي يجيني يذبحني
اشرت على ركبتها باصبعها وسحبتة بمعنى ذبح.
اني من يمي خفت واستغربت عبالي مامتزوجة لان لا لابسة حلقة ولا احد يعرف، لزمت اديها اريدها بس تهدأ
من رجفتها حتى اني رجفت وبلعت العافية.
ملاك: عرفني راح يكلة لكيتها شلون بية شلون
دفعتني وركضت لمت غراضها وطلعت مثل المخبلة
رجعت للوحدة لكيت بية مراجعين يحجون.
شني عمي وين رحتو ولا واحد يسحب دم
المن مفتحين
تلكاهن كاعدات ياكلن وعايفات الوادم.
ماحجيت شي وسحبتلهم خلص الدوام واني افكر بيها وبحالتها رجعت للبيت حيدر كاعد برا من شافني كام بستة ودخلتة وياي من شفتة ضايج عرفت جاسب ما اجة سكتت عنة تغدينا ورحت نمت تعبانة للعصر اسمع كرار واني متمددة بفراشي.
شوكت تجي بابا مشتاقيلك هواي
جاسب: لو باجر لو عكبة كرار روحي انت وانا طاك كلبي عليكم وين حيدر وينة انطيني احاجية
زعلان عليك مايرضى يحجي.
وخرت الغطا اشوفهم كرار داير الكامرا على حيدر وهو مايقبل يطلع وجهة.
جاسب: شبيك حيدر صدك جذب ولا دكول ابوي
طاك كلبة علينة
استغربت من نتر بية بعصبية ودموعة هلت مثل المطر.
حيدر: ماريد اشوفك انت لو تحبنا ماعفتنا
هالكثر حتى ماتتصل علينة ررروح بعد ماررريدك
سكت جاسب وين يلة رد وحيدر كسر كلبي من بجة يمسح بدموعة مايريد واحد يشوفة ويدير بوجهة
جاسب: شغلي بابا هذا وانا ماعفتكم
للونسة طالع بشغل.
رد علية بعصبية وجهة صار دم
خااالي خاالي مو وياك ما راح وعاف جهالة بس انت تعوفنا وتروح يلا روح بعد لا تجي
واني راح اتعود وانساك
طلع من الغرفة يركض وجاسب اختفى صوتة بقة كرار يكلة: يحبك والله لا تضوج منه جذاب هذا بس جي بالواجب صارلك هواي زعلان عليك
بس ترجع بعد مايزعل
بقو يسولف على يومة وشصاير ماصار ومنو اجة ومنو راح انطاة موجز الاخبار كامل سويت روحي نايمة وبصوت ناصي كلة.
جاسب: امك شلونها؟
نصة صوتة ورد علية.
زينة
وين هي هسة
نايمة
اليوم بالدوام
اي
ذب حسرة واختفى صوتهم رفعت الغطا ما لكيت كرار لميت شعري وكمت اشوفهم كالت شروق راحو وي خالهم خابرتة كال يمي متونسين سديتة منه واتصلت بية سجى فتحت كامرا وجهة يريد يطك صايرة تموت اكل ونوم تركت الدوام لان راتبها قليل
وبتها حضانة تدفعلها كالت عليمن اخذ راحتي ارفد مامقصر وياهم وجاي يدرس للدكتوراء.
سجى: ها ولج شو وجهج اصفر شبيج
ماكو شي اي انتي شلونج ريمة شلونها.
تعاي يمة سلمي على خالتج
اجت ريومة سلمت علية وراحت
رغد: ماتجين اشتاقيتلج
هو راح اجي اشوفج ضايجة
كلش والله شغل وبيت ملل وطالعة روحي
اكلج خل نروح سفرة هم الجهال يتونسون وهم احنة ارفد ياخذنا حتى لو يوصلنا ويروح حتى محد يحجي
بقينا على هذا الاتفاق وبقينة نحجي هواي سديتة منها ورحت لبيت جدي صارلي فترة مارايحة سلمت وكعدت يم حبوبتي اباوع لولاية موجودة كلت بكلبي امها ماتريدها ماتسال عليها شبيها هاي.
رحت وي هدى نسولف كالت
اكلج انصحيني بدكتورة زينة
شبيج
اريد اراجع على طفل
تريدين تحبلين
اي والله كلش بنفسي اجيب اخو لفضل
عباس گلي اخذج هو هم يريد وفضل كبر
ابقى على دكتورتنا ترة زينة
كلتها وصفنت
رجعت منها للبيت ثاني يوم داومت وملاك ما داومت بقة بالي يمها خفت عليها ولا عندي تواصل وياها اعرف شبيها.
بقيت بوحدة سحب الدم وياي تلث بنات نسحب
وصاير لود علينة خلصت سحب للمريض وفتحت عيوني بصدمة من سمعت صوتة يكل للبنية.
جاسب: لا ذيج البنية تسحبلي
جنت منطيتهم ضهري مامصدكة هو جاسب لو واحد يشبهة صوتة التفتت من كالت البنية
يريدج تسحبيلة
وتباوعلي بشك باوعتلة حسيت گلبي يريد يوكف هستوة نازل من الواجب بملابس الدوام وجهة تعبان كعد بس عيونة تاكل بية اكل سرفن وطلع ايدة منتظرني اسحبلة التورنكا بيدي ترجف
كتبت اسمة بدون لا اسألة حجيت بصوت يرجف
شنو نوع التحليل
كال اي شي.
غمضت عيوني كتبت شامل اخذت التورنكا شديتها على ايدة بينة مسافة قليلة عطرة دخل بخشمي مخربتة ريحة الجكاير سحبت السرنجا ترجف بيدي شلون اسحبلة دم التفتت على زميلتي كلتلها
تعاي اسحبيلة
حجة قبل لاترد لا ماريد انتي تسحبيلي
رجعت بيدي السرنجا لزمت ايدة اريد ادخل الابرة وزميلتي كالت ماعقمتي المكان!
من التوتر مدري شصار بية بقيت ضاغطة على ايدة.
وسحبت كطن بيدي الثانية خليت معقم ومسحت المكان وجهي احس جمر عيونة حفظت ملامحي
باصبعي ضغطت ادور على وريد وهي شرايينة بارزة لكيت الوريد ثبتت اريد ادخل الابرة ماكدر اسيطر بسبب رجفة ايدي رفعت عيوني لوجهة تلاكت عيونة ابتسم وبصوت ناصي كال
لاتسحبين
صار شكددد ماشايفتة ولا جامعتنة هاي المسافة القليلة صارلة شكد مامركز بوجهي هيج ولا اني عيوني بعيونة تحجي عتب وليش
ليش هيج تسوي بية متعمد تحرجني وتوترني.
حسيت على نفسي وابتعدت فتح التورنكا وكام يسحب بردن البدلة.
جاسب: خفت بعد ما اسحب
باوع للبنات يباوعلة والوحدة فارغة كال
راجع غير مرة اسحب
طلع واني رجلية ترجف كعدت على الكرسي وعيونهن وراة باوعلي وكالن بصوت واحد
شيعولج حبيبج؟
هزيت راسي لا كالت
ههههه كولي غيرها يمعودة هو غير ماخلانة نسحبلة رادج انتي
اكلاج اكل بعيونة اصلاً هو مبين مايريد يسحب دم بس حتى تلزمين ايدة اجة لهناة.
ضحكت بصوت عالي واني رجفة سرت بجسمي واتذكر، من لزمت ايدة غمضت عيوني استغفرالله محرمة علية شلون هيج يفكر هسة هذا الحرام عليمن!
اكلج هو ضابط
ماجاوبت كالت الخ: ماشفتي رتبتة ولج والله لگطة اويليييي شلون شخصية اذا ماتردية احنا مامزوجات نريد هيج شكول
بالعادة طبيعي يحجن هيج على مراجع بس ما اضوج الا هالمرة كلش تنرفزت ردت اكوم حيلي راح كالت: عاشگج ولج خرب عيونة تحجي
شو ماتكولين.
متزوج لا يروح بالجن بعيد وماعندي شي وياة
لا حبيبي ولا شي
عفتهن وطلعت برا اختنكت اريد اتنفس ماكدر اني شلون وي جاسب وسوالفة الماتخلص.
شروق: اسمع بجاسب نزل والبيت مختبص رحت سلمت علية اخذ جهالي يبوس بيهم بنتة كاعدة بحضنة حاضنتة رضية تسوي دولمة كعدت الف وياهن كال.
جاسب: رحمان بالدوام؟
اي
شوكت عطلتة
هالفترة لغوها
هز راسة وطلع برا شوية واجوي الجهال من الدوام نازعين جنطهم يدورون علية.
حيدر: بيتنا فارغ هاي انتي هنا
اي حبيبي اجيت هنا
كرار: كومي سويلنا اكل جوعانين
عايشة: يخسى الجوع هسة اسويلكم راحت بوستهم وابوهم وراهم التفت حيدر من حس وراة شخص بس شافة فتح عيونة على وسعهن وجهة صار دم عبالي يروح يحضنة بس صدمنا وراح يركض بعيد عنة ركض وراة جاسب وحيدر يصرخ
ماريدددك عوووفني كلتتك بعد انساااك
رروح لا تحضني
حضنة جاسب بقوة يبوس بية وهو يبجي ويكلة
ماريدك عوفنا يلا روح منا.
كلها طلعت تباوع عليهم لزم وجهة بين ادية الولد فحط من البجي بس يشهك ويعاتبة.
مادكول ولدي ماتشتاقلنا مادكووول بوية حيدر
ماتكووول
يحجي بحركة بچانا كلنة مسح وجهة يبوس بية ويعتذر دار وجهة لكرار خطية مصدوم صاحلة راحلة يركض ويبوس بية شالهم ثنينهم وطلع بيهم
امة ضلت تبجي مقهورة عليهم.
عايشة: اتمنى گبل لا اموت اشوفة مرتاح ومستقر
صارت امنية عمري هاي ربي ماريد منك بس هاي.
كملنا لف وكمت اغسل بالمواعين الضلت رجع لازمهم من اديهم كال اكو غدا لو ناكل برا
رضية: اكو يبعد امك
جاسب: مسوين دولمة مايحبها حيدر مو صدك
امشو اغديكم برا
باوع علينا وكال
اجيبلكم غدة
عايشة: لايمة مسوين محد يريد منك
بس انتو اكلو عوافي
اخذهم وطلع رجعت للبيت اخذت جدرية دولمة صغيرة خليتها على النار واني اثرم زلاطة اجت رغد من وجهة حسيت بيها شي مشيت وراها.
رغد بيج شي
لا لا لا.
سدت باب الغرفة ضل بالي عليها بعد ماطلعت حتى نفسي انسدت على الاكل للعصر كلش يلة رجعو التوم بس وجههم يضحك خاصة حيدر فرق من السما للگاع بيدهم علاليك راحو يدكون باب غرفتهم كتلهم.
نايمة امكم ادخلو بغرفتي
حيدر: لا خالة مانريد باعي ابوي شجابلنة
كعدو يفتحون بالعلاليك ويطلعون ملابس حلويات دفاتر اقلام حتى عطور من غير الحلويات طلع تراك واحد ولادي والثاني بناتي كال هاي لرضاوي وشموسة لمو الحلويات وانطوني العلاكة.
خليها بالثلاجة
ضلو يحوسون منا لمن فتحت رغد الباب وجهها صاير دم راحولها يركضون بوستهم وبحماس يكلولها: اجا بابا اجاا
هزت راسها باي واني رحت حميتلها الاكل اجت تاكل كوة اسالها دكلي فلاونزة شوية واجو الجهال لابسين جنطهم المدرسية كالو.
اليوم يم ابونا نام بيت جدي
اجو باسو رغد وهي عيونها مدمعة حتى ماحجت
راحلها كرار يكلها: اذا ماتردين نروح مانروح.
كالتلهم برود روحو باسها بخدها وبقة واكف حاير يباوع لاخوة انكسرت فرحتة كال.
يمة اني اضل يمج بس حيدر خل يروح مو حيدر
رغد: روحي حبيبي شوفو ابوكم
راحو وهي نزلت دموعها تخبلت عليها حضنتها بس تشهك.
رغد شبيج ياهو وياج
رغد: ماكو شي بس انقهر عليهم
سكتت ماكدرت ارد احسها محملة نفسها ذنب بعدهم عنة جانت ماتهتم بس من شافت حبهم اله وتعلقهم بية خاصة هما يحجون مرة جنا سهرانين سوى ورحمان ويانا كالو.
والله حلوة الكعدة خالي بس ناقصها ابوي
كون يجي ويانا
مرة سمعتهم يكلولها كون احنا نفس رضا نعيش وي ابونا ونسوي وكاحة ونبوك جكايرة ونخلية يدور
لو نلعب ختيلان وبعدين نام ويشيلنا مثل خالي من يشيل جهالة
ورغد خطية تبلع لسانها تبقى بس تصفن رحمان من اسولفلة يكول حقهم كبرو وشافو الجهال هما بصوب وابوهم بصوب ارد علية بتر من ايدة يسكت مايأيدني هالشي حيل قهرني جا هو لو ماتزوج عليها هيج حالهم؟
من شفت حالة رغد كلت اروح اجيبهم بلكت تسكت وتبطل بجيها رحت لكيتهم بالصالة كلهم مجتمعين وهو يسولف.
جاسب: راح ابني بيت بصفكم اخذت القطعة
جا وبيتك
بعيد بوية انا التحق وكلها طاشة عاد اجمعهم
حيدر رافع حاجبة تحسة راح يطير من الفرح
دنك عليه كلة: شدكول بابا حيدر، مو احسن
اي
جاسب: حتى ترحون وتجون باي وكت
يمكم انا
جدة نوفة: جا حبوبا ماترجع لشغلك تروح وترجع
تؤ.
شوية اجة نزار جايب زهراء سلمت على اخوها كعدو شوية وراحو التهيت وياهم اجا رحمان كام جاسب سلم علية وكال رايح انام وجهالة وراة
باوعلي كرار كال:
خالة امي صارت زينة
باوعلي جاسب عاكد حواجبة كال
شبيها رغد؟
ها مصخنة
كرار: رايحلها اني
فلت ايد ابوة وراح يركض وحيدر وراة راح لحكتهم لبيتنا لكيتهم كاعدين يمها يبوسون بيها.
كمت جبت حلويات سوينا صينية انتبهت لحيدر ياخذ من كل نوع ويخلي بجيبة ويبقى يباوع حتى محد ينتبة همستلي رغد لابوة هزيت راسي عرفت
رغد: اضحك واسولف واني روحي طالعة اعرف اذا ابقة نايمة مايعوفوني وهما مشتاقين لابوهم ويحسبون يوم يوم جيتة بدلت ملابسهم وخليتلهم عطر كالت شروق.
عطرج ما لكيتية
لا والله طار
حرامات عاد والله طيب ومتروس
جبت غيرة فدوة.
خليتلهم منه وشروق عدها فضول اكثر مني لعلبة العطر مالتي حيدر يترس نفسة عطر منه بس من يروح لابوة باقي الايام عادي رغم هذا ماخليت بالي اكو جهال كلتلهم روحو لابوكم نامو يمة طارو من الفرح عبالك وين رايحين كال كرار
وصلينة يمة اخاف
حيدر: انت زلمة الزلمة مايخاف
لزمة من ايدة طلعت وراهم صدك يخوف الممر
دخلو لبيت جدهم بالحديقة جان كاعد جاسب وحدة جكارتة مشتغلة راحولة يركضون صعدو على ضهرة.
وهو يتماطل وياهم ويكلبهم صوت ضحكتهم وصل يمي دمعت عيوني احسهم يضحكون من كل كلبهم
وياهم لو شسوي الهم وشنطي من حنان من اهتمام ماكدر اسد مكان ابوهم ويبقون وياة شي.
من لمحني دخلت جوة كوة كدرت انام بدونهم مامتعودة على فراكهم كعدت الصبح بدلت وطلعت مريت لدوانية بيت جدي الباب مردود بس ردت اشوفهم دفعت الباب برهاوة ومديت راسي.
شفته نايم وكل واحد بصفحة مخلية كرار ماكشف وشامر الغطا دومة نومة مبهذل عكس اخوة تقربت اغطية بس سحبت الغطا علية فتح عيونة جاسب
تخشبت بمكاني ادري شكعدك حضي نترت الغطا بيدي سحب ادية من جوة حيدر راد يكعد على حيلة مشيت سريع احس گلبي يدك بقوة.
طلعت للدوام وبالي سارح سالني البنات على ملاك كتلهن ماعرف بعدين سألن الدكتور، كال ماخذة اجازة.
بوقت الريست مالتي طلعت اشتم هوى عدنا حديقة بالمستشفى بيها صبات يكعدون عليها جنت مدنكة راسي اسمع العاملة من بلكنادش تصيح مدام هازا ليكي مدام
رفعت راسي وانصدمت بوكية ورد احمر وعلاكة هدايا باستغراب اشرت على نفسي إلى اني هههه
اي مدام ليكي.
عافتهن على الصبة وراحت واني اكول هسة ترجع مشتبهة بالعنوان رفعت البوكيا ورد احمر طبيعي ضحكت متاكدة مو إلى ريحة الورد تخبل والعلاكة باوعت بيها علبة مافتحتها كل ضني هاي مشتبهة وهسة ترجع تاخذها رجعتها وضليت كل شوية اباوعلها واكول شكد يحبها هذا الجابلها هيج
انتبهت لكارت بالبوكية بخط مزخرف مكتوب
كل عام وانتِ بالف خير سنة سعيدة
يا معشوقتي
جنت اضحك قبل لا اوصل لكلمة
شلون وي العاشگج رغدة.
يعني إلى هاي إلى اني لاااا
بلعت ريك وكلمة رغدة خلتني اعرف هل هديا منه
لان لو غريب يكتب رغد اي شي ضحكت متذكر عيد ميلادي اني مامتذكرتة فتحت العلبة الداخل العلاكة
جان بيها تخم كامل فضة حلقة وتراجي وكلادة طقم كلش نازك مزين بحجر الياقوت.
مافرحت بلهدية ابد وكمت شلتهن حتى اشمرهن بالزبل بس كلبي ما انطاني قررت انطيهم للعاملة وهم كلبي ما انطاني ردت اكتل روحي واتعارك وياها لان عاندتني وبقت الهدية خليتها يم الرزبشن
مابية حيل اجاوب اليسألني بعد شيخلصني من نظراتهم الي.
خلصت دوام ورجعت هنا بيدي ماكدرت ارجع للبيت هيج نزلت اشتريت علاكة سودة جبيرة خليتهن بيها ودخلت للبيت مخليتهن وراي كالت شروق
شجايبة وياج
ها هدية من صديقاتي.
اجت فرحانة تريد تشوفها اخذتها خزرتني بشك
اممم صديقاتج ههههه يهدن بوكية ورد وتخم غالي لج هذا
واذا هنا متمكنات
اني الاعرفة هنا مايعرفن عنج هواي شلون هيج عرفن عيد ميلادج وويجيبن هدايا
دجيبي شتعرفين انتي
اخذتها منها حايرة بالورد وين اخلية لو حرامات اخرب البوكية هي اول وتالي تذبل اعوفها مثل ماهي
ضميت العلبة وبقت بس البوكية بدلت وطلعت
اكلج شروق روحي صيحي الجهال شني بعد مايردوني.
لا ولج وي ابوهم متونسين لعب وشوارع وين يلكونها هههه روحي شوفيهم هسة يطلعون
طلعت كلت بلكت اشوفهم واصيحهم يجون ماكو وقت غدا مشيت واني ادعي ما الاكية بقيت باب المطبخ ورضية واكفة سلمت عليها وكتلها صيحي الجهال.
مو هنا طالعين وي ابوهم
استغفرالله وين يفتر بيهم
هنا مو بعيد علمود البناء
رفعت حاجبي مستغربة
يا بناء
عافت البيدها واجت كدامي بتردد كالت
جاسب راح يبني بيت بصف بيتنا
المن
الج ترجعيلة؟
هزيت راسي بالنفي عيوني تشخصت وهي تقنع بية
ارجعي شتردين بعد لمي جهالج واكسبي بيهم اجر
اني البيت هذا بعد ما اطبة ماطول تحاولون وياي
بهذا الموضوع
مشيت وهي لحكتني تتعذر وهم ترجع تحجي ارجع
رجعت للبيت فايرة واتوعد ما اروح الهم كل التلزمني تقرا محاظرة براسي، رجعت نمت مقهورة ومن كعدت لكيت سجيوة يمنا وسوولي عيد ميلاد غيرو واهسي
كلة ضحكنا واخذنا صور.
سمعت جاسب منزل مواد وعمال يبني ومريم ماتقبل تكعد بالبيت دكول هناك مرتاحة فايخ راسي ومن هو مو هنا اشبع شوف من اهلي، واداريهم وهو متخبل
يكلها ذاك البيت تنسينة عاجبج عاجبج.
شروق: رحت يم بيت جدي مريم ورة العركة زعلت يم اهلها والله ماريد اكعد بالبيت هذا ورة فترة جابها اخوها يمنة بقت لان جاسب صادف بالزيارة.
قبل الغدا هيج وقت اجت مرة وسط عمرها سلمن عليها نسوان عمي وهي ضلت واكفة تباوعلها عبالك ماتعرفها بس بعدين كالت المرة.
شني مريم ماتجين تسلمين على مرة عمج
راحت بغير عالم كلنا صفنا عليهن تالي اجت باوستها والمرة تسولف.
اجيت اواجب وكلت اسلم عليجن وعلى مريم
ومريم حتى كعدة ماكعدت واكفة بس تباوع الها شتريد تحجي حتى الجاي اني سويتة شوية وطلعت والمرة كالت مريم توصلني ضلن كاعدات.
مشن واشوف مرة عمها لازمتها مز زندها تحجي وتبتسم ماهتميت وطلعت لاكتني وجههة احمررر
حادة سنونها.
بس رجع جاسب رجعت لبيتها ولاية اخذتها وياها هالمرة لان ابوها موجود لو مو هنا شمرتها.
سرى: قبل جنت اسمع يكولون مشت ايام وردت ايام شو ماشفت ايام ردت بس مشت هواي مشت من عمري ايام واني ما حاسة بيها.
اليوم الذكرى السنوية لوفاة ابوي اي راح لدار حقة وكسرنا بغيابة
رحنا للنجف زرنا وشبعنا بجي
ومناك مريت بحياوي
شنو قصة الحلم وليش من ذاك الحلم بعد ماخطر بالي ولا اجاني بالحلم امي دكول حلمج واضح سولفية على اي واحد يفهمة واني ماقبل اسولفة.
بعالم الرؤيا ماكو شي يشبهة بيتنا ولا حياتنا شي مختلف اجتني دعوة عرس واني فرحانة احضر رحت وهناك شفت ناس ملتمة بس من شفت العريس احمد ويمة عروسة ماواضح شكلها بس هو
عبالك تزوج بالدنيا وهاي صدمتي صحت بية ليش ليش وهو يگلي لا تنتظرين هواي بعد تزوجي واني تزوجت هاي عروستي
كعدت متخبلة عبالك حقيقة مو حلم ملخت روحي.
واصرخ ليش تزوجت ليش فترة دخلت بيها بكأبة حادة منا وفاة ابوي ماصارلها تلث اشهر ومنا هذا الحلم عيشني حقيقة
امي دكول تزوج حور العين وراحت مسولفتة لعمتي هند خطية شصاير بيها دكول وليدي عريس
وامي قبلها بفترة تحجي علية تزوجي ابوج وراح محد بقالج وراها شكم يوم تحلمت هذا الحلم
اخذتني امي لشيخ عرفت راح تسولفلة الحلم
الرجال هم كال مثل ماكالت امي كال تزوجي
بعدج صغيرة وحرام ومن هاي السوالف.
شغلي القديم راح ومحتارة حيرة اريد بس اشتغل اي شي يا زواج هذا ابني كبر ويفتهم كلشي وين اعوفة ماكدر يجوني خطابة وارفض لو مرة ثانية وبيتي وحدي لو ارامل وطاكين وكبار بالعمر واكيد ارفض.
طلعت اشوف ابن عم صديقتي بلكت يخليني اشتغل وياة حتى لو مو بمجالي اتعلم وهي مسولفتلة حالتي كالت يكول خل تمرلي رحت كلت لامي يمي ادعيلي يقبلوني
يمة ادعيلج تزوجين وتخلصين لوين تبقين تشتغلين وتركضين.
احمد يخزر بيها جان يدرس طفر من مكانة يصيح
ماتشتغلين اكعدددي اكعدددي اني اشتغل
اسكتتت انتتت لا تدخل
عفتة وطلعت ارجف هم ناقصتك يشتغل گال استغفرالله وصلت للمكان تلكتني مشينا سوى
شركة اجهزة طبية صغيرة واني شغلي سكرتيرة يمهم مشيت لغرفة المدير دكت الباب دخلت كدامي وسحبتني.
نور: صباااحووو
رد عليها بثكل صباح النور هلا
نظراتة تحولت إلى ابتسمت وكلت بهدوء
السلام عليكم
وعليكم السلام
سرى صديقتي
عرفتها.
سرى استاذ عمر ابن عمي
عمر: هاي انتي وين ماترحين تصيحين ابن عمي
نور: لعد غير ابن العم سند
يلا عيني عن اذنكم تفاهمو بينكم باااي سراوي حبيبتي
راحت تركض للباب ودارت علينا كالتلة
دير بالك عليهااا عمووري
نهض من مكانة طلع برا الغرفة انداريت علية كال
تعالي اعلمج شغلج
مشيت وراة بقيت بمسافة عنة لازمة ادية سوى
اباوعلة فتح الطابعة علمني شلون اطبع
كال تعرفين تستعملين الحاسبة؟
طبعاً
حلو لعد.
علمني على شغلي جان على الحاسبة والطابعة كمل وكال: كهوة وسط اول ما ادخل وبعد الغدا كوب كهوة مرة مو تنسين
هزيت راسي باي رجع لغرفتة واني كعدت بالمكتب برا الغرفة بوجهة الرايح والراجع كل الفايت صادلي حسيت بالتوتر لان بعدني بالبداية ومامتعودة.
شوية وتذكرت هو كال كهوة وسط هسة لو راح وقتها دكيت الباب فتحتة بالباب كتلة
استاذ هسة اجيب الكهوة لو تبقة ورة الغدا
هسة.
طلعت للمطبخ سالت العاملة كالت هاي الخانة غراض المدير اخذت كوبة سويت كهوة ورجعت دكيت الباب لكيت يمة شخص المدير جان عمرة اربعينات بس مرتب كلش والشخص الكاعد اصغر تلاثينات دخلت وقدمت الكهوة على الميز
سكرتيرة جديدة؟
عمر: نعم
التفتت علية ابتسمت كال بضحكة
تاخذلها فترة وتاخذ اجازة امومة واحنا نبتلي
عمر: اخذت احتياطي جبتها منفصلة
بقة يباوعلي انحرجت بسرعة طلعت
ورة شوية طلع حسيتة واكف التفتت كال
اسمي فاروق ست سرى.
تشرفت
الي الشرف بالتوفيق
كالها وطلع كملت الشغل ورجعت للبيت بس امي احمد ما موجود كلت بالشارع يلعب طلعت دورت ماكو تمالكت نفسي وكلت انتظرة حدي للغروب وياة وصار الغروب وهو ماكو والمشكلة ماعدنا احد حتى باهر منكطع عنا فترة طويلة وملتهي بحياتة وين راح ابني تعبت وكعدت بالباب انتظرة يرجع ومرت ساعة وماله اثر...
رغد: مرت فترة عزلت نفسي عن بيت جدي في سبيل محد يحجي وياي بالموضوع ولا اريد اتنرفز واتعصب بيوم عندي عطلة طلعو الجهال برا
جنت اسرح بشعري وكلام امي يتردد باذني تفنين عمرج الهم وتالي كلمن يعيش حياتة وانتي تضلين وحدج ولدج من هسة ولد ابوهم شيكول شيريد هماةوياة دعوفيهم كلهم وروحي تزوجي مو ماتردين جاسب اخذي اليسواة بس كولي اي واني اخليج تمشين بدون طلايب.
گلبي يضل يوجعني تالي عمري اصير انانية وافكر بس بنفسي واعوف جهالي شلون اعوفهم واني ماكدر افاركهم مستحيل اسويها لو شمايصير
انفتح الباب بقوة دخل حيدر يركض وفحطان وجهة صاير دممم عفت البيدي من كثر ما فحطان مايكدر يحجي بس يسحب بملابسي دنكت ميتة خوف
شبيك حبيبي شبيك
بيتنا هذا بيتنا وعلى ماتكعد بية بيتناااااا
كولي بيتنا النة مو الهاااا
يابيت شكووو تنفسسس اتنفسس
شبيك راح تموووت
دخل كرار وهذا يرجف بيدي صحت بية.
تعال انت تعال شبية اخوووك يرجف
باوع لحيدر وسكت دار وجهي حيدر علية يكلي
رغد باعي رغد هذا بيتنا ابوي سواة النة حتى نكعد سوى وهو بعد يرجع يشتغل وي خالي مايروح هواي هسة ذيج مرتة دكول بيتي كتلها مو بيتج بيتنا هذا كوووولي مو بيتنا
لا مو بيتنا بيتهم
لا بيتنااااا احناااا مو الها هي عدهااا بيت
هذا الناااا احناااا
احس الدنيا دارت بية بيش ارد علية وشكدر احجي شحاجي براسة ابوة وهيج مخبلة علية.
حيدر: بيتنا والله بيتنا النة مو الهااا خوش تسمعين ماتاخذة منا النة هذا
لا بيتهم خوش
ضل يبجي ويصيح مفرفح
بيتنا النة ماتكعد بية
اريدة يسكت ماكو مو مال اقشمرة واكلة اي تخبل اكيد مريم حاركة دمة ماطولها هنا هالمرة ماراحت لاهلها عفتة وطلعت متخبلة وي جية رحمان صارت صرخت متخبلة وطالعة روحي.
مانررررتاح وين نرررروح بعد اهججججج واخلصصص منكممممم
وحيدر فد عنودي وكح يصيح كلي لابوي
بيتنا ماننطيا.
صحت بية بعصبية انعل ابووووك لابو ساعة السودة الشفتة بيييي
حيدر: لا تغلطيييين علييييي
اطلععععع براااا اطلععععع
صحت متخبلة بدون وعي طلع بهدوء واني ردت اهج واطلع بهذا حالي رحت لبست عباتي وطلعت ورحمان وراي يحجي وشروق وين اروح بس يلزمني اصيح.
عوفوني اهججج واخلصصص منكممممم
راح تخبلوووني
حضني رحمان بجيت بحضنة صعدني بسيارتة.
وطلع بينا ماعرف وين ولا سألت بجيت لمن تعبت وغفيت نمت ماحسيت بالطريق كعدني كوة افتح عيوني وراسي طبل صاير عدل شعري كال.
انزلي زوري بلة ترتاحين
وين احنا
بكربلا
نزلت لازمة بيدة ماعندي طاقة حتى اباوع للطريق امشي على خطاة بس وصلت للامام متت بجي
شكيت وبجيت ومن ارتاحيت كمت كوة امشي
اخذني رحمان جابلي اكل اكل شوية شربنا جاي ورجعنا ما داومت ثاني يوم خلصتها نايمة حتى ماسألت على الجهال حسيت عليهم باليل حاضنيني.
صبح الصبح عفتهم نايمين وداومت.
لكيت كدامي ملاك وبس بقينا وحدنا كالت فدوة انسي اني متزوجة واليسألج كولي لا مامتزوجة
هزيت راسي باي اني بيا حال بس ضيم جاسب ولدة كافي علية مو احجي اشوفها متوترة مابقت بوحدة السحب رجعت للمختبر حتى بالاستراحة ماتطلع
انوب صرت اشوفها لابسة كمامة عبالي مريضة
طلعت وهي طلعت صدفة وياي وكفنا على الشارع ننتظر سيارات فجاة سحبتني حضنتني وضمت راسها بصدري جسمها كلة يرجف مجلبة بية بقوة.
وتردد.
ما اخذت حقييي يمه حقييي
ماخذتة راح يموتوني واني ماخذت حقيي.